བདག་དང་ཆོས་ཐམས་ཅད་ཀྱི་སྟོང་ཉིད་སྒོམ་པ།

བྱང་ཆུབ་སེམས་ཀྱི་སྙིང་རྗེ་ཆེན་པོ།

བརྩེ་བ་དང་སྙིང་རྗེའི་བདག་ཉིད་བླ་ན་མེད་པ་སྟོན་པ་ཤཱཀྱ་ཐུབ་པར་བསམ་བློ་གཏོང་སྐབས། ང་ཚོས་ཁོང་གི་རླབས་ཆེ་བའི་མཛད་པ་དང་འཕྲིན་ལས་བསམ་བློ་འཁོར་གྱི་ཡོད། ལྷག་པར་དུ་གཞན་དོན་ཆེད་ཁོང་གིས་བསྟན་པའི་དམ་པའི་ཆོས་རྣམས་བློ་ལ་འཆར་གྱི་ཡོད། ཆོས་དེ་དག་གི་ཁྲོད་ནས་གཞན་སེམས་ཅན་ཐམས་ཅད་ཀྱི་ཆེད་དུ་བླ་ན་མེད་པའི་སངས་རྒྱས་ཀྱི་གོ་འཕང་འཐོབ་བྱེད་བྱང་ཆུབ་ཀྱི་སེམས་རིན་པོ་ཆེ་བསྟན་པའི་ཆོས་ངོ་མཚར་ཆེ་བ་རྣམས་ལ་བསམ་བློ་གཏོང་བའི་སྐབས། དེ་ནི་དངོས་གནས་དྲང་གནས་བློ་སྟོབས་དང་ཚོར་བ་འདྲེན་ནུས་པ་ཞིག་ཡིན། སྤྱོད་འཇུག་ནང་། བྱང་ཆུབ་སེམས་སྦྱོང་གི་འགྲེལ་བ་ཧ་ཅང་རྒྱས་པོ་གསུངས་ཡོད།

གལ་སྲིད་ང་ཚོས་གཞན་ལ་ཕན་ཐོགས་བྱ་རྒྱུའི་ཐབས་ལེགས་ཤོས་དེར་བསམ་བློ་བཏང་ན། བྱང་ཆུབ་སེམས་ལས་ལྷག་པ་མེད། སངས་རྒྱས་བཅོམ་ལྡན་འདས་ཀྱིས་ང་ཚོར་དེ་ལྟ་བུའི་བྱང་ཆུབ་ཀྱི་སེམས་བསྐྱེད་ཚུལ་སློབ་ཀྱི་ཡོད། ང་ཚོས་སོ་སོ་སྐལ་བ་དང་ལྡན་པ་ཞིག་ཏུ་ངོས་འཛིན་བྱེད་དགོས། རྒྱུ་མཚན་ནི། ང་ཚོར་རྩ་ཆེའི་མི་ལུས་ཐོབ་པ་དང་དམ་པའི་ཆོས་དང་ཁྱད་པར་དུ་ཐེག་པ་ཆེན་པའི་ཆོས་མཇལ་རྒྱུའི་གོ་སྐབས་ཐོབ་ཡོད། ད་ལྟ་ང་ཚོར་མཐུན་རྐྱེན་ཚང་མ་ཚང་ཡོད་ཅིང་། གནས་སྟངས་ཐབས་རྡུགས་དེ་འདྲ་མེད། དེར་བརྟེན་གོ་སྐབས་འདི་བེད་སྤྱོད་ཚུལ་བཞིན་དུ་བཏང་ནས་སྟོན་པ་ཤཱཀྱ་ཐུབ་པས་ཐུགས་བརྩེ་བ་ཆེན་པོས་བསྟན་པ་ལྟར་གཞན་དོན་སྒྲུབ་རྒྱུ་དང་སངས་རྒྱས་ཀྱི་གོ་འཕང་འཐོབ་རྒྱུར་འབད་བརྩོན་བསྟེན་དགོས།

སློབ་དཔོན་ཕྱོགས་གླང་གིས་མཛད་པའི་ཚད་མ་ཀུན་བཏུས་ནང་། ང་ཚོས་སངས་རྒྱས་ནི་ཚད་མའི་སྐྱེས་བུ་ཞིག་ཡིན་པའང་སྙིང་རྗེའི་གཞན་དབང་དུ་གྱུར་བ་གང་གི་མཛད་འཕྲིན་ལས་ཤེས་ཐུབ་ཅེས་གསུངས། ང་ཚོས་སངས་རྒྱས་ནི་སྙིང་རྗེ་ཆེན་པོའི་བདག་ཉིད་དུ་བཀུར་གྱི་ཡོད། སྙིང་རྗེ་ལྡན་པ་ཞེས་པའི་ཐ་སྙད་སྤྱོད་པའི་རྒྱུ་མཚན་ཅི་ཡིན་ནམ་ཞེ་ན། ཁོང་གིས་མཐའ་གཅིག་ཏུ་གཞན་དོན་སྒྲུབ་པར་མཛད་ཀྱི་ཡོད། གཞན་དོན་འདུན་པ་ཤུགས་ཧ་ཅང་ཆེན་པོ་ཡོད་པའི་རྐྱེན་གྱིས་ཁོང་གི་རང་རྒྱུད་ཀྱི་སྐྱོན་རྣམས་བསལ་ནས་གཞན་དོན་སྒྲུབ་པའི་ནུས་པ་ཐོབ་ཡོད། ཆོས་ལ་དད་པ་ཡོད་ཀྱང་རུང་མེད་ཀྱང་རུང་སྙིང་རྗེ་ཅན་ཞིག་བྱེད་པ་ནི་ཕན་ཡོན་ཤིན་ཏུ་ཆེ། སུ་འདྲ་ཞིག་གི་སེམས་བཟང་པོ་དང་སྙིང་རྗེ་ཆེ་བ་ཡོད་པ་དེར་གཞན་དོན་སྒྲུབ་པའི་ནུས་པ་ཆེ་བ་ཡོད།

ངས་ཡང་ནས་ཡང་དུ་དགོད་བྲོའི་ཚུལ་དུ། “གལ་སྲིད་རང་ཤེད་ཚ་པོ་བྱེད་དགོས་ཀྱི་ཡོད་ན། མ་མཐར་རྣམ་དཔྱོད་ལྡན་པའི་རང་ཤེད་བྱེད་དགོས།” ཞེས་བརྗོད་ཀྱི་ཡོད། གལ་ཏེ་གཞན་ལ་གནོད་པ་བསྐྱལ་ནས་རང་གི་བདེ་བ་སྒྲུབ་འདོད་ན། གཞན་གྱིས་རང་ཉིད་ལ་རོགས་རམ་བྱེད་མི་འདོད་པ་ནི་གསལ་པོ་རེད། དེར་བརྟེན་གལ་སྲིད་གཞན་ལ་དོན་དམ་པའི་ཕན་ཐོགས་བྱེད་འདོད་ན། གཞན་ལ་སེམས་ཁུར་བྱེད་དགོས། དེ་ནི་རྣམ་དཔྱོད་ལྡན་པའི་རང་ཤེད་ཡིན། སོང་ཙང་། ང་ཚོས་རང་ཉིད་ལ་སེམས་ཁུར་དངོས་གནས་ཡོད་པ་དང་། དེའི་ཐད་རྣམ་དཔྱོད་དང་ལྡན་པ་ཡིན་ན། སོ་སོའི་དོན་དག་སྒྲུབ་པའི་ཐབས་ཡག་ཤོས་ནི་གཞན་ལ་རོགས་རམ་བྱེད་པའི་ཐོག་ནས་ཡིན་པ་ཤེས་དགོས།

འཛམ་བུ་གླིང་འདིའི་ནང་། མི་རྣམས་ལ་སྤྱིར་བཏང་ནས་གཞན་དང་སྤྱི་ཚོགས། དེ་བཞིན་མི་ངན་གྱི་རིགས་ཁ་ཤས་མ་གཏོགས་གཞན་ཧ་ལམ་ཕལ་མོ་ཆེ་ལ་དོ་ཁུར་གྱི་བསམ་བློ་ཡོད་ན། དེ་དག་མི་བཟང་པོ་ཞིག་ཏུ་ལྟ་གི་རེད། མི་དེ་དག་ནི་རྟག་ཏུ་སྤྱི་ཚོགས་ལ་ཕན་ཐོགས་དང་གཞན་ལ་སེམས་ཁུར་ཆེན་པོ་བྱེད་མཁན་ཡིན་པ་སོང་ཙང་། དེ་ལྟའི་མི་རྣམས་ཁ་བྲལ་ནས་འགྲོ་སྐབས་ཚང་མས་བློ་ཕམ་པོ་བྱེད་ཀྱི་ཡོད། མི་དེ་དག་ཕྱིན་ཟིན་པའམ་འདས་ཟིན་པའི་རྗེས་ཁོང་ཚོའི་བྱས་རྗེས་ལ་མི་རྣམས་ལོ་མང་རིང་དྲན་གསོ་དང་ཡི་རང་ཞུ་གི་ཡོད། དེ་ལས་ལྡོག་སྟེ། དམར་ཤོག་རྒྱལ་ཁབ་ཁ་ཤས་ཀྱི་ནང་། སོ་སོའི་དབང་ཆ་དང་ཁེ་ཕན་ཆེད་ཐབས་ཤེས་ཡོད་རྒུ་བྱེད་མཁན་རྣམས་གྲོངས་ཟིན་རྗེས་མི་རྣམས་ཀྱིས་དྲན་གསོ་དང་བསྔགས་བརྗོད་བྱ་རྒྱུའི་ཚབ་ཏུ་སྟབས་ཡག་སོང་ཞེས་བརྗོད་ནས་དྲན་པ་བརྗེད་ཀྱི་ཡོད། གཞན་ལ་སེམས་ཁུར་བྱེད་མཁན་འགོ་ཁྲིད་རྣམས་ཀྱི་བྱས་རྗེས་ལ་མི་རྣམས་དགའ་པོ་དང་སྙིང་ཉེ་པོ་སོགས་བྱེད་ཀྱི་ཡོད། གལ་ཏེ་འཛམ་གླིང་ནང་འཚེ་བའི་ལས་ཤུགས་ཆེན་པོ་བྱེད་མཁན་གྱི་མི་ཞིག་ཡོད་ན། ཐ་ན་ཆོས་ཁས་མི་ལེན་མཁན་གྱི་མི་རྣམས་ཀྱིས་གཏུམ་དྲག་ཅན་ཞིག་ཏུ་ལྟ་གི་ཡོད། དེ་ལ་མི་སུ་གཅིག་གིས་ཀྱང་དགའ་པོ་མི་བྱེད། མི་ངན་དེ་རིགས་ལ་ཐ་ན་བྱ་བྱེའུ་ཡན་ཆད་ཀྱི་དགའ་པོ་མ་བྱས་པར་འཁྲིས་སུ་འཁོར་གྱི་མེད།

ང་ཚོ་འགྲོ་བ་མིའི་སྤྱི་ཚོགས་ཤིག་གི་ནང་སྡོད་ཀྱི་ཡོད། དེར་བརྟེན་ཚང་མ་ཕན་ཚུན་གཅིག་ལ་གཅིག་བརྟེན་དགོས་ཀྱི་ཡོད། ཚོགས་པ་ཞིག་ལ་མཚོན་ནའང་ཚོགས་པའི་ལས་དོན་ཚགས་ཚུད་པོ་ཡོང་མིན་དེ་དེའི་ཁོངས་མི་རྣམས་ཀྱི་བྱམས་པ་དང་མཉམ་རུབ་ལ་རག་ལས་ཡོད། ཨ་རི་ནས་ཡིན་པའི་ངོས་ཀྱི་གྲོགས་པོ་ཞིག་གིས། མིའི་རང་བཞིན་ནི་ཧ་ཅང་གདུག་རྩུབ་ཅན་ཞིག་རེད་བསམ་གྱི་འདུག་ཅེས་ང་ལ་བཤད་བྱུང་། ངས་ཁོང་ལ་ཆོབ་བསླངས་ནས་དེ་དངོས་གནས་ཡིན་ནམ་ཞེས་བརྗོད་པ་ཡིན། གང་ཡིན་ཟེར་ན། དུད་འགྲོའི་ནང་དུའང་རང་བཞིན་ངན་པ་གང་ཡིན་པ་དེ། དཔེར་ན། སྟག་དང་། སེང་གེ་སོགས་ཤ་གཟན་སེམས་ཅན་དེ་དག་གིས་སོ་སོ་འཚོ་གནས་ཆེད་གཞན་རྣམས་གསོད་ཀྱི་ཡོད།  དེ་བཞིན་མཆེ་བ་དང་སྡེར་མོ་ཡོད་པའི་སེམས་ཅན་རྣམས་ཀྱང་ཧ་ཅང་གདུག་རྩུབ་ཆེན་པོ་ཡོད། དེ་ལས་ལྡོག་སྟེ། རྩྭ་དང་རྩི་ཤིང་སོགས་ལ་བརྟེན་མཁན་རྩྭ་གཟན་སེམས་ཅན་རྣམས་ཧ་ཅང་ཞི་ཞིང་དུལ་ཅན་ཡོད། འགྲོ་བ་མི་རྣམས་གདུག་རྩུབ་ཆེ་བའི་སེམས་ཅན་དེ་དག་ནང་བཞིན་མེད། མིས་གཞན་ལ་སྡེར་མོ་དང་སོ་སོགས་རྒྱག་གི་མེད། མི་ལ་སྙིང་རྗེ་བའི་སེན་མོ་ཐུང་ཐུང་དང་སྡེར་མོ་སོགས་ཡོད། གལ་སྲིད་ང་ཚོས་ཞི་མི་ཞིག་ལ་བལྟས་ན། ཞི་མིའི་བདག་པོས་དེས་བྱམས་པོ་ག་ཚོད་བྱས་ཀྱང་། ཞི་མིའི་རང་བཞིན་ཐོག་ནས་ཙི་ཙི་བསད་དེ་བཟའ་གི་ཡོད། དེར་བརྟེན་ངའི་བསམ་པར། འགྲོ་བ་མིའི་རང་བཞིན་ངོ་མ་ནི་ཤ་གཟན་སེམས་ཅན་ལྟར་གདུག་རྩུབ་ཅན་ཞིག་རེད་བསམ་གྱི་མི་འདུག

མི་ཞིག་ཡིན་པའི་ཆ་ནས་སེམས་བཟང་པོས་གཞན་ལ་སེམས་ཁུར་བྱས་པའི་ཐོག་ནས་ནང་སེམས་ཀྱི་ཡོན་ཏན་ཡར་རྒྱས་གཏོང་ཐུབ་པ་ནི་གསལ་པོ་རེད། ང་ཚོ་ཚང་མ་ཕན་ཚུན་གཅིག་གིས་གཅིག་ལ་བརྟེན་ནས་ཡོད་སྟབས། ཕན་ཚུན་གཅིག་ཕན་གཅིག་རོགས་བྱ་རྒྱུ་ནི་གནད་འགག་ཆེ། དེ་ནི་སྤྱི་ཚོགས་ཀྱི་རང་བཞིན་གྱི་འགྲོ་སྟངས་ཡིན། སྤྱི་ཚོགས་ཀྱི་ངོས་ནས་ལས་དོན་ཡག་པོ་སྒྲུབ་པར། དེའི་ཚོགས་མི་ཚང་མ་ལ་རག་ལས་ཡོད། དེར་བརྟེན་ཕན་ཚུན་སེམས་ཁུར་བྱེད་པའི་བསམ་བློའི་འཁྱེར་སོ་ཞིག་ཡར་རྒྱས་གཏོང་རྒྱུ་ནི་ཧ་ཅང་གལ་ཆེན་པོ་ཡིན། བསམ་པ་དེ་བསྐྱེད་ནས་གང་ཐུབ་ཅི་ཐུབ་ཀྱིས་མཐའ་ཡས་པའི་སེམས་ཅན་རྣམས་ལ་རྒྱ་སྐྱེད་གཏོང་དགོས།

སངས་རྒྱས་ཀྱི་ཚུལ་ཁྲིམས་དང་སྤྱོད་ཚུལ་འཛིན་ཕྱོགས་ཐད་ཆོས་གསུངས་པའི་སྐབས། བྱ་མི་རུང་བའི་ལས་འགའ་ཞིག་དང་། ཡང་བྱ་རུང་བའི་གནད་དོན་མང་པོ་ཡོད་པས། དེ་དག་ལ་ང་ཚོས་བརྩི་འཇོག་བྱེད་དགོས། གནས་དང་དུས་སོགས་ལ་ལྟོས་ནས་འགག་བྱ་དགོས་པའི་དབང་གིས་སངས་རྒྱས་ཀྱིས་བཀག་གནང་བའམ་བྱ་མི་རུང་བ་འགའ་ཞིག་བྱ་རུང་བ་ཡིན། དེ་ལ་ང་ཚོས་རྣམ་དཔྱོད་ཀྱིས་ཚུལ་བཞིན་ཤེས་པར་བྱེད་དགོས། དེའང་གཞན་ལ་ཕན་འདོགས་པའི་ཀུན་སློང་དང་བཅས་ཡིན་དགོས།

དེར་བརྟེན་ང་ཚོས་སེམས་བཟང་པོའི་ཐོག་ནས་གཞན་ལ་ཕན་གང་ཐུབ་ཐུབ་བྱས་ཏེ་གནོད་པ་རྩ་བ་ནས་བྱ་རྒྱུ་མེད། དང་པོ་ང་ཚོས་སོ་སོའི་འཁྲིས་སུ་ཡོད་པའི་ངོ་ཤེས་དང་གཉེན་ཉེ་རྣམས་ལ་བློ་དེ་སྦྱོང་བརྡར་བྱས་ནས་ཕྱིས་སུ་རིམ་བཞིན་གཞན་ལ་རྒྱ་སྐྱེད་གཏོང་དགོས་པ་དང་། དེ་ནས་སོ་སོའི་རྒྱལ་ཁབ་ནང་གི་མི་ཚང་མར་སྙོབ་པ་བྱེད་དགོས། དེ་རྗེས་འཛམ་གླིང་ནང་མི་ཚང་མར་རྒྱ་སྐྱེད་གཏོང་དགོས། དེ་ལྟར་རྒྱ་སྐྱེད་བཏང་ནས་མཐར་ཁམས་གསུམ་འཁོར་བའི་ནང་གི་སེམས་ཅན་ཡོད་དོ་ཅོག་ལ་དམིགས་དགོས། གཞན་སེམས་ཅན་ཐམས་ཅད་རང་དང་འདྲ་བར་བདེ་བ་འདོད་པ་དང་སྡུག་བསྔལ་མི་འདོད་པ་ཡིན། དེ་ནི་ང་ཚོས་བསམ་བློ་གཏོང་དགོས་ཚུལ་དེ་ཡིན།

ཨ་ཅང་ཅང་ཨ་མ་ཞིག་གིས་རང་གི་བུ་ལ་ཡག་པོ་རྐྱང་རྐྱང་བྱུང་ན་བསམ་གྱི་ཡོད། དེ་ནི་སྟོབས་ཤུགས་ཧ་ཅང་ཆེ་བ་ཞིག་ཡིན། འོན་ཏེ་ཕྱོགས་གཞན་ཞིག་ནས། བསམ་བློ་དེས་རང་གི་བུ་གཅིག་པུར་དམིགས་པའི་ཚད་ཅན་ཞིག་ཡིན། དེར་བརྟེན་ང་ཚོས་གཞན་གྱི་ཁེ་ཕན་ཆེད་བསམ་བློ་ཤུགས་དྲག་པོ་ཞིག་བསྐྱེད་དེ། ཁ་ཤས་ཙམ་ལ་མིན་པར་ཐམས་ཅད་ལ་ཁྱབ་པ་བྱེད་དགོས།

གཞན་སེམས་ཅན་ཐམས་ཅད་ལ་ཕན་འདོགས་ཐུབ་པ་བྱེད་པའི་སླད་དུ་རང་ངོས་ནས་དེ་ལྟར་བྱེད་ཐུབ་པའི་ནུས་པ་གོང་སྤེལ་གཏོང་དགོས། དེ་ནི་ཐར་པའམ་ཐམས་ཅད་མཁྱེན་པའི་གོ་འཕང་འཐོབ་པ་བྱ་རྒྱུ་དེ་ཡིན། གཞན་སེམས་ཅན་ཐམས་ཅད་ལ་ཕན་འདོགས་པའི་ཀུན་སློང་དེ་གཉིས་ལ་མཚོན་ན། དེ་ནི་བྱང་ཆུབ་སེམས་ཀྱི་དམིགས་པ་ཡིན། དེ་ཡང་ང་ཚོས་གཞུང་འདིའི་ནང་ནས་མཇལ་རྒྱུ་ཡོད་ལ་སོ་སོས་ཀློགས་ནའང་འགྲིགས། ད་ལྟ་ཁྱེད་རང་ཚོས་དེ་ཏཱ་ལའི་བླ་མའི་དྲུང་ནས་གོ་ཐོས་བྱུང་བ་རེད། དེར་བརྟེན་དེ་ནི་བདེ་བ་ཐམས་ཅད་ཀྱི་འབྱུང་ཁུངས་ཡིན་པར་ངེས་ཤེས་རྙེད་ཕྱིར་ཐབས་ཤེས་བྱེད་དགོས། དེ་བཞིན་དཀའ་ངལ་སེལ་བ་དང་སེམས་བཟང་པོ་རྣམས་རྒྱུད་ལ་སྐྱེད་ཆེད་དཀའ་ལས་རྒྱག་དགོས། དེ་ལྟར་ང་ཚོས་གཞན་དོན་སྒྲུབ་ཀྱི་ཡིན་ཞེས་པའི་ཀུན་སློང་བརྟན་པོ་ཞིག་བཅོས་ནས་དུས་དང་རྣམ་པ་ཐམས་ཅད་དུ་ནམ་ཡང་ཉམས་པར་བྱེད་ཀྱི་མིན་ཞེས་པའི་ཆོད་སེམས་བརྟན་པོ་ཞིག་དགོས། དེ་ལྟ་བུའི་བསམ་བློ་དེ་སོ་སོར་ཡོད་པའི་རྒྱུ་ནོར་གྱི་ནང་ནས་རྩ་ཆེ་ཤོས་དང་བླ་ན་མེད་པ་ཞིག་ཏུ་བརྩི་དགོས།

ཐབས་ཤེས་ཟུང་འབྲེལ།

ད་ང་ཚོའི་གཞུང་གི་འགྲེལ་པའི་ནང་མུ་མཐུད་ “སངས་རྒྱས་ཀྱི་གོ་འཕང་འཐོབ་ཕྱིར་རང་ངོས་ནས་ཟུང་འཇུག་གི་སྐུ་གཉིས་འཐོབ་དགོས་” ཞེས་པའི་བླ་མ་ཆོས་ཉིད་ཀྱི་ལུང་དྲངས་ཀྱི་ཡིན། དེའི་དོན་ནི་ང་ཚོས་ཐབས་དང་ཤེས་རབ་ཟུང་དུ་འབྲེལ་ནས་ཉམས་སུ་ལེན་དགོས་ཤིང་། ཟུང་འབྲེལ་ཞེས་པས་ཤེས་རབ་ཐབས་ཀྱིས་ཟིན་པ་དང་ཐབས་ཤེས་རབ་ཀྱིས་ཟིན་པ་ཞིག་དགོས། འབྲས་དུས་སུ་ཐབས་ཤེས་གཉིས་ངོ་བོ་གཅིག་ལ་ལྡོག་པ་ཐ་དད་དུ་འགྱུར་གྱི་ཡོད།

དེ་ག་ནང་བཞིན་ལམ་བདེན་ལའང་མཚུངས། ལམ་མམ་ལམ་བདེན་ཡང་ཐབས་ཤེས་ཟུང་འབྲེལ་གྱི་སྒོ་ནས་མཐར་ཐུག་ངོ་བོ་གཅིག་ཏུ་གནས་ཀྱི་ཡོད། དེ་བཞིན་གཞིའི་རིམ་པ་ལའང་གཅིག་པ་ཡིན། གཞི་བདེན་པ་གཉིས་ཀྱང་ངོ་བོ་གཅིག་ལ་ལྡོག་པ་ཐ་དད་དུ་གནས། དེར་བརྟེན་གཞི་བདེན་པ་གཉིས་ཀྱི་ཚུལ་ལེགས་པར་ཤེས་རྒྱུ་ཧ་ཅང་གལ་ཆེན་པོ་ཡིན།

དངོས་པོའི་གནས་ལུགས་ཀྱི་འགྲེལ་བའི་རིམ་པ་ཚང་མའི་ནང་ནས་གསལ་ཤོས་དང་གནད་ལ་ཁེལ་ཤོས་ནི་སངས་རྒྱས་བསྐྱངས་དང་ཟླ་བ་གྲགས་པས་བཀྲལ་བའི་དབུ་མ་ཐལ་འགྱུར་བའི་གཞུང་ཡིན། རྒྱ་གར་གྱི་མཁས་པ་འདི་གཉིས་ཀྱིས་མགོན་པོ་ཀླུ་སྒྲུབ་ཀྱི་དགོངས་པ་ཇི་ལྟ་བ་བཞིན་དུ་བཀྲལ་བ་དང་། ལོག་རྟོག་ཚང་མ་བསལ་ཡོད། བོད་ནང་མཁས་གྲུབ་གཉིས་ལྡན་གྱི་སྐྱེ་བུ་དམ་པ་མང་པོ་བྱུང་ཡོད་ཅིང་། ཁོང་རྣམས་ཀྱིས་དངོས་པོའི་གནས་ལུགས་ཇི་ལྟ་བ་བཞིན་དུ་རྟོགས་ཐབས་དང་འགྲེལ་ཐབས་སྐུ་ལས་དུ་མ་བསྐྱོན་ཡོད་པ་དང་། ལྷག་པར་དུ་རྗེ་ཙོང་ཁ་པ་ཆེན་པོས་རླབས་ཆེན་གྱི་མཛད་རྗེས་བཞག་ཡོད། རྗེ་རིན་པོ་ཆེས་སྐུ་ན་གཞོན་པའི་དུས་ནས་ཀྱང་དེའི་ཐད་ཐུགས་སྣང་ཆེན་པོ་མཛད་དེ་ཡང་དག་པའི་ལྟ་བ་རྒྱུད་ལ་སྐྱེད་ཆེད་སྐུ་ལས་མང་པོ་བསྐྱོན་ཡོད། སྐུ་སྐྱེ་སྔོན་མར་རྗེ་རིན་པོ་ཆེས་སངས་རྒྱས་ཀྱི་སྤྱན་སྔར་བྱང་ཆུབ་སེམས་ཀྱིས་ཀུན་ནས་བསླངས་ཏེ། མ་འོངས་པར་སྔགས་དང་འབྲེལ་བའི་ཐོག་ནས་དབུ་མའི་ལྟ་བ་མཐིལ་ཕྱིན་པ་འགྲེལ་ཐུབ་པར་ཤོག་ཅེས་ཐུགས་བསྐྱེད་སྨོན་ལམ་རླབས་པོ་ཆེ་མཛད་ཡོད། རྟག་ཏུ་དབུ་མ་དང་གསང་སྔགས་གཉིས་ཟུང་འབྲེལ་ཐོག་མཐར་ཕྱིན་པ་ཡོང་བ་བྱ་རྒྱུ་ནི་ཁོང་གི་ཐུགས་བསྐྱེད་དམ་བཅའ་བཞག་གནང་ཡོད། དེའི་འབྲས་བུར། རྗེ་ཙོང་ཁ་པས་སྐུ་ན་གཞོན་དུས་ནས་བཟུང་དེའི་ཐད་ཧ་ཅང་ཐུགས་སྣང་ཆེན་པོ་ཡོད།

སློབ་དཔོན་ཟླ་བ་གྲགས་པའི་གསུང་ལ་གཞི་བཞག་སྟེ་སྟོང་ཉིད་རྟོགས་པའི་ཡང་དག་པའི་ལྟ་བར་ཁོང་གིས་གཙིགས་ཧ་ཅང་ཆེན་པོ་གནང་གི་ཡོད། དེར་བརྟེན་ཁོང་གིས་སྟོང་ཉིད་སྐོར་གཞུང་ཧ་ཅང་མང་པོ་བརྩམས་ཡོད་ཅིང་། དམིགས་བསལ་ལམ་རིམ་ཆེན་མོ་དང་འབྲིང་པོའི་ནང་ལྷག་མཐོང་ཆེན་མོ་དང་། མགོན་པོ་ཀླུ་སྒྲུབ་ཀྱིས་མཛད་པའི་རྩ་བ་ཤེས་རབ་ཀྱི་འགྲེལ་བ་དབུ་མ་རྩ་ཤེ་ཊིག་ཆེན་དང་། ཟླ་བ་གྲགས་པས་མཛད་པའི་རྩ་བ་ཤེས་རབ་ཀྱི་འགྲེལ་བའི་ཡང་འགྲེལ་དབུ་མ་དགོངས་པ་རབ་གསལ། དྲང་ངེས་ལེགས་བཤད་སྙིང་པོ་སོགས་མཛད། གལ་སྲིད་ང་ཚོས་གཞུང་ལྔ་པོ་དེ་དག་མཇལ་ན། འགྲེལ་བ་དེ་དག་ཁ་གསལ་པོ་ཇི་ཙམ་ཡོད་ཤེས་རྟོགས་ཐུབ། གནད་དོན་གཙོ་བོ་ནི་སྟོང་ཉིད་རྟོགས་པའི་ཤེས་རབ་སྐྱེད་རྒྱུ་དེ་ཡིན། དེའི་ཕྱིར་ཕྱོགས་གཅིག་ནས་དགེ་བའི་ལས་བྱས་ཏེ་ཚོགས་གསོག་དགོས། དེའི་ཐོག་ནས་དགེ་བའི་བཤེས་གཉེན་ཞིག་ལ་བརྟེན་ནས་ང་ཚོས་གཞུང་ཚད་ལྡན་ཞིག་གི་རྗེས་སུ་འབྲངས་ཏེ་ཡང་དག་པའི་ལྟ་བ་རྒྱུད་ལ་སྐྱེད་ཐུབ་པ་ཡོང་གི་ཡོད།

རྗེ་རིན་པོ་ཆེའི་སློབ་མ་ནམ་མཁའ་དཔལ་གྱི་གཞུང་འདི་དགེ་བཤེས་འཆད་ཁ་པས་མཛད་པའི་བློ་སྦྱོང་དོན་བདུན་མ་གཞི་རྩར་བཞག་སྟེ་འགྲེལ་བརྗོད་མཛདཡོད། གཞུང་འདིའི་ནང་དོན་དང་པོ་གཉིས་ཀྱི་ཐོག་རྒྱས་པར་བཀྲལ་ཡོད། དེ་ཡང་སྔོན་འགྲོའི་རྟེན་གྱི་ཆོས་དང་ཀུན་རྫོབ་དང་དོན་དམ་བྱང་ཆུབ་ཀྱི་སེམས་སྦྱོང་ཚུལ་གཉིས་བསྟན་ཡོད། གཞན་དོན་ཚན་ལྔ་པོ་རྣམས་འཕྲོས་བཤད་ཀྱི་ཚུལ་དུ་གསུངས། དེ་དག་ནི་རྐྱེན་ངན་བྱང་ཆུབ་ལམ་དུ་བསྒྱུར་བ། ཚེ་གཅིག་གི་ཉམས་ལེན་དྲིལ་ནས་བསྟན་པ། བློ་འབྱོངས་པའི་ཚད། བློ་སྦྱོང་གི་དམ་ཚིག །བློ་སྦྱོང་གི་བསླབ་བྱ་བཅས་ཡིན། དོན་ཚན་དེ་དག་ནི་བླ་མ་མཆོད་པའི་མཇུག་ཏུ་བསྔོ་བའི་མཚམས་སུ་མདོར་བསྡུས་ཏེ་གསུངས་ཡོད། དཔེར་ན། “ལམ་སྣ་མ་ཟིན་འཆི་བའི་དུས་བྱེད་ན། །བཙན་ཐབས་འཚང་རྒྱ་བླ་མའི་འཕོ་བ་ནི། །སྟོབས་ལྔ་ཡང་དག་སྦྱར་བའི་གདམས་ངག་གིས། །དག་པའི་ཞིང་དུ་བགྲོད་པར་བྱིན་གྱིས་རློབས། །” ཞེས་པའི་ཚིགས་སུ་བཅད་པ་འདིས་ཚེ་གཅིག་གི་ཉམས་ལེན་དྲིལ་ནས་བསྟན་པ་གསུངས་ཡོད། ལྷག་པར་དུ་འཆི་བའི་ཚེ་སྟོབས་ལྔ་ཉམས་སུ་ལེན་དགོས་པའི་སྐོར་གསུངས་ཡོད་པ་ལྟ་བུ་རེད།

ནམ་མཁའ་དཔལ་གྱི་གཞུང་ནང་། དགག་བྱ་ངོས་འཛིན་དགོས་པའི་གནད་དོན་བཀྲལ་ཞིང་། ཁ་སང་ང་ཚོས་དེའི་སྐོར་གོ་སྡུར་བྱས་ཟིན། དེ་རིང་གང་ཟག་གི་བདག་མེད་སྐོར་དང་། དེ་ནས་ཆོས་ཀྱི་བདག་མེད། མཐའ་མ་ཆོས་ཐམས་ཅད་སྒྱུ་མ་ལྟ་བུར་ལྟ་ཚུལ་ཐད་བགྲོ་གླེང་བྱེད་ཀྱི་ཡིན།

གང་ཟག་གི་བདག་མེད།  

ད་ང་ཚོས་གང་ཟག་བདེན་པར་གྲུབ་པས་སྟོང་པའི་སྐོར་ལ་གོ་སྡུར་བྱེད་ཀྱི་ཡིན། དཔྱད་སྒོམ་འདིའི་སྐབས་སེམས་ཀྱི་དམིགས་པ་ནི་ཀུན་རྫོབ་ཏུ་ཡོད་པའི་བདག་གམ་ང་ཞེས་བྱ་བ་དེ་ཡིན། དེའི་ཐད་ནང་པའི་གྲུབ་མཐའ་མི་འདྲ་བའི་བར་ཁྱད་པར་ཅུང་ཟད་ཡོད། གྲུབ་མཐའ་ཁ་ཤས་ཀྱིས་སེམས་ཀྱིས་ཀུན་རྫོབ་ཏུ་ཡོད་པའི་བདག་གི་ཕུང་པོ་ལྔ་ལ་དམིགས་པའམ་ཡང་ན་ཕུང་པོ་འགའ་ཞིག་ལ་དམིགས་པར་འདོད་ཅིང་གཙོ་བོ་རྣམ་པར་ཤེས་པའི་ཕུང་པོ་འདོད། གཞན་རྣམས་ཀྱིས་ཀུན་གཞི་རྣམ་ཤེས་ལ་དམིགས་པར་འདོད།

གྲུབ་མཐའ་དེ་དག་ཚང་མས་བདག་ནི་རྟོག་པས་བཏགས་ཙམ་དུ་གྲུབ་པར་མི་འདོད་ཀྱང་། གདགས་གཞི་རྙེད་རྒྱུ་ཡོད་པ་སྟེ་མཐར་ཐུག་དཔྱོད་པའི་རིག་ཤེས་ཀྱི་ངོར་རྙེད་རྒྱུ་ཡོད་པ་ཞིག་དགོས་ཟེར། དེར་བརྟེན་ཁོང་ཚོས་རྣམ་ཤེས་སམ་ཀུན་གཞི་རྣམ་ཤེས་དེ་བདག་གི་གདགས་གཞིར་མཐར་ཐུག་དཔྱོད་པའི་རིག་ཤེས་ཀྱི་ངོར་རྙེད་རྒྱུ་ཡོད་པ་ཞིག་ཏུ་འདོད། ཕྱོགས་གཞན་ཞིག་ནས་དབུ་མ་ཐལ་འགྱུར་བའི་གཞུང་ནང་། བདག་གི་གདགས་གཞི་བཙལ་ན་རྙེད་རྒྱུ་ཡོད་པ་ཞིག་ཏུ་མི་འདོད།

ཐལ་འགྱུར་བའི་གཞུང་ནང་། མ་གཞི་ཕུང་པོ་ལྔའི་ཚོགས་པའི་རྒྱུན་དེར་དམིགས་ཀྱང་ང་ཚོས་ཚོགས་རྒྱུན་དེ་བདག་ལ་བཏགས་དོན་བཙལ་ན་རྙེད་རྒྱུ་ཡོད་པའི་བདག་གི་གཞི་ཡིན་པའི་ཐོག་ནས་དམིགས་ཀྱི་མེད། དེ་ལས་ལྡོག་སྟེ། རྒྱུན་དེར་ང་ཞེས་པའི་བདག་གི་གདགས་གཞི་ཙམ་དུ་དམིགས་ཀྱི་ཡོད། ཀུན་རྫོབ་ཏུ་ཡོད་པའི་ང་ཞེས་པ་ནི་ང་ཞེས་པའི་ཐ་སྙད་ཀྱི་ཡུལ་ཡིན་ཞིང་། འདོགས་སའི་གཞི་དེར་བཏགས་ཡོད། ང་ཞེས་པ་ནི་རྒྱུན་གྱི་གཞི་དེའི་ཐོག་བརྩི་གི་ཡོད། ཞིབ་ཏུ་བརྗོད་ན། ང་ཞེས་པའི་གདགས་གཞི་ནི་ཕུང་པོ་ལྔའི་རྒྱུན་ནམ་འབྲེལ་བ་དེ་ཡིན། དེ་ནི་གདགས་གཞི་ཡིན། དེའི་ཐོག་ནས་ཀུན་རྫོབ་ཏུ་ཡོད་པའི་ང་ཞེས་པ་ཐ་སྙད་ཙམ་དུ་གྲུབ་ཅིང་དོན་དམ་དུ་མེད།

བདག་གི་གདགས་གཞི་ནི་འབྱུང་བ་ལྔ་དང་ཕུང་པོ་ལྔ་སོགས་ཡིན་སྲིད། འོན་ཀྱང་བདག་གམ་ང་དེ་ཉིད་གདགས་གཞི་དེ་དག་གང་རུང་མ་ཡིན་ལ་དེ་དག་ཚོགས་པ་དང་རྒྱུན་གང་ཡང་མ་ཡིན། དེ་རྙེད་རྒྱུ་མེད། ང་ཚོས་ང་ཞེས་པ་ནི་ལུས་པོ་དང་སེམས་སོགས་ཀྱི་སྟེང་བཏགས་པ་ཞིག་རེད་ཅེས་བསམ་བློ་གཏོང་བ་དང་བརྗོད་སྐབས། ང་ནི་གདགས་གཞི་ལྔ་པོ་གང་དང་ཡང་གཅིག་པ་མིན་ལ་དེའི་ཚོགས་པ་དང་རྒྱུན་སོགས་ཅི་ཡང་མིན།

གལ་སྲིད་ང་ཚོས་ང་ཞེས་པ་འདི་སོ་སོའི་ལུས་ཀྱི་ཆ་ཤས་སམ། སོ་སོས་གྱོན་པའི་གོས། ཡང་ན་སོ་སོའི་སེམས་ཀྱི་ཆ་བཅས་གང་ནས་ཡོང་མིན་བརྟག་དཔྱད་བྱས་ཏེ་སྐད་ཆ་དྲིས་ན། དེ་དག་ལས་ང་ཚོས་བདག་གམ་ང་རྙེད་མི་ཐུབ་ལ་དེའི་ཚུགས་ཐུབ་ཏུ་གནས་པའི་མཚན་ཉིད་ཀྱང་རྙེད་མི་ཐུབ། དཔེར་ན། བསྟན་འཛིན་རྒྱ་མཚོ་ཞེས་པ་དེ་ཁོང་རང་གི་གཟུགས་རེད་དམ་ཞེས་བརྟག་དཔྱད་བྱས་ན། མ་རེད། ཡང་སེམས་རེད་དམ་ཞེ་ན། དེ་ཡང་མ་རེད། ཁོ་པ་སོ་སོའི་ལུས་དང་འབྲེལ་མེད་རེད་དམ་ཞེ་ན། མ་རེད། ཡང་ཁོ་པ་སོ་སོའི་སེམས་དང་འབྲེལ་མེད་རེད་དམ་ཞེ་ན། དེ་ཡང་མ་རེད། འོན་ཀྱང་བསྟན་འཛིན་རྒྱ་མཚོ་ཟེར་བའི་མི་དེ་ཡོད་པ་ནི་བདེན་པ་ཡིན། ཁོ་པ་གཏན་གཏན་མི་རེད། ཁོ་པ་བོད་པ་ཞིག་ཡིན་པ་གསལ་པོ་རེད། ཁོ་པ་ཨ་མདོ་ནས་རེད། གྲྭ་པ་རེད། དེ་ཚང་མ་བདེན་པ་རེད། འོན་ཀྱང་མི་དེ་སུ་རེད། གྲྭ་པ་དེ་སུ་རེད་ཅེས་དྲིས་ན། ཁོ་པའི་ལུས་མ་རེད་ལ་སེམས་ཀྱང་མ་རེད། འོན་ཀྱང་ཁོ་པ་གཞི་གྲུབ་ཡོད། ང་ཚོས་ཁོ་པ་སུ་ཡིན་མིན་མཛུབ་མོ་བཙུགས་པར་ཕྱིན་ན། བཙུགས་ས་གང་ཡང་རྙེད་མི་ཐུབ།

དེ་ག་ནང་བཞིན་མེ་ཏོག་དང་། བུམ་པ། ཅོག་ཙེ་སོགས་ལའང་གཅིག་པ་ཡིན། དེ་དག་གི་ཆ་ཤས་དང་རྒྱུན་གྱི་ཐོག་ནས་གདགས་སའི་གཞི་ཡོང་གི་ཡོད། འོན་ཏེ་ཆ་ཤས་དེ་དག་རེ་རེའི་ངོས་ནས་དེ་དག་ཚོགས་པའམ་རྒྱུན་རེད་ཅེས་ང་ཚོས་བརྗོད་མི་ཐུབ། གཞི་དེའི་ཐོག་ནས་ང་ཚོས་མེ་ཏོག་དང་བུམ་པ་སོགས་གང་ཡིན་རུང་དེ་དག་སོ་སོའི་ཐ་སྙད་འདོགས་ཐུབ་ཀྱི་ཡོད། ཐ་སྙད་དེ་དང་མཐུན་པའི་གཞི་ཚུགས་ཐུབ་རང་སྐྱ་བ་ཞིག་མེད་ནའང་། གཞི་དེ་ཀུན་རྫོབ་ཏུའང་རྩ་ནས་མེད་ཅེས་བརྗོད་ན་མི་འགྲིགས།

ང་ཚོས་ཆོས་དེ་གང་དུ་ཡོད་པ་དེར་ཚུགས་ཐུབ་གནས་པའམ་བདེན་པར་གྲུབ་ཅེས་བརྗོད་མི་ཐུབ། དེའི་དོན་ག་རེ་ཡིན་ནམ་ཞེ་ན། གནས་སྟངས་དང་རྒྱུ་རྐྱེན་དུ་མ་ཡོད་པས་དེའི་ཐོག་ནས་ཕན་ཚུན་བརྟེན་ནས་བྱུང་བ་ཡིན། འོན་ཀྱང་དེ་དག་གཞན་ལ་ལྟོས་པ་མེད་པར་རང་ངོས་ནས་གྲུབ་མི་ཐུབ། དཔེར་ན། གཞན་ལ་མ་བརྟེན་པར་ཆོས་གང་ཡང་ཚུགས་ཐུབ་ཏུ་གནས་མི་ཐུབ། བརྟེན་ནས་བྱུང་ཞེས་པའང་མིང་དང་རྟོག་པ་ལ་བརྟེན་ནས་བྱུང་། གཞི་དེ་ཡོད་པ་ནི་བློ་ཚང་མ་ལ་སྣང་བའི་སྒོ་ནས་འཇོག་དགོས།

རང་ངོས་ནས་མ་གྲུབ་ཅེས་པ་དང་། རང་གི་ངོ་བོ་ཉིད་ཀྱིས་མ་གྲུབ། བདེན་པར་མ་གྲུབ་ཅེས་པའི་ཐུན་མིན་ཆེད་སྤྱོད་ཀྱི་ཐ་སྙད་དེ་དག་གི་དོན་ལ་ཁྱད་པར་མེད། ང་ཚོས་ཐ་སྙད་དེ་དག་གི་ཐུན་མོང་གི་དོན་ལ་དཔྱོད་སྐབས། ཆོས་ཐམས་ཅད་སེམས་ཀྱིས་བཏགས་པ་ཙམ་ཡིན་པ་ཤེས་ཐབས་བྱེད་ཀྱི་ཡོད། དེ་ཡང་བདག་གམ་ང་ཞེས་པར་གཞིགས་ན་རྟོགས་སླ་བ་ཡོད། གང་ཡིན་ཟེར་ན། ང་ཞེས་པ་ནི་ཕུང་པོ་ལ་བཏགས་པ་ཡིན་པ་གསལ་པོ་རེད། དེར་བརྟེན་གང་ཟག་ནི་གདགས་གཞིར་བཏགས་པ་ཙམ་ཡིན། འོན་ཀྱང་བཏགས་ཆོས་དེ་ཉིད་སོ་སོའི་ངོས་ནས་སམ་གདགས་གཞིའི་ཐོག་ནས་འཇོག་མི་ཐུབ། ང་ཚོས་ལྷན་སྐྱེས་ཀྱི་མ་རིག་པའི་ཡུལ་གང་ཡིན་པར་བལྟ་བའི་སྐབས། གང་ཟག་གམ་བདག་ལ་མཚོན་ན། ཐམས་ཅད་རང་ངོས་ནས་གྲུབ་པ་ལྟ་བུར་ངང་གིས་ཤར་འོང་བའམ་མངོན་དུ་འགྱུར་གྱི་ཡོད། དེ་ག་ནང་བཞིན་མེ་ཏོག་དང་། བུམ་པ། ཅོག་ཙེ་སོགས་ལའང་གཅིག་པ་ཡིན། དེ་དག་ནི་ཐ་སྙད་དང་སེམས་ལ་མ་ལྟོས་པར་ཚུགས་ཐུབ་ཏུ་གནས་པ་བློ་ལ་འཆར་གྱི་ཡོད།

དགག་བྱའི་བདག་འདི་དོན་དངོས་སུ་ང་ཚོར་ཇི་ལྟར་སྣང་ཚུལ་ཤེས་པར། སེམས་ཚོར་དྲག་པོ་ཡོད་པའི་སྐབས་དང་། ང་དང་ངའི་སོགས་བསམ་བློ་གཏོང་བའི་སྐབས་བརྟག་དཔྱད་བྱས་ན་འགྲིགས། སྐབས་དེ་དག་གི་རིང་དགག་བྱའི་བདག་དེ་ཆགས་པ་དང་སྡང་བའི་གཞིར་འཆར་གྱི་ཡོད། དེར་བརྟེན་ང་ཚོས་ངོས་འཛིན་བྱ་རྒྱུ་ལས་སླ་བ་ཡོད།

གཞུང་ནང་ང་ཞེས་པའི་ཐོག་ནས་ང་བདེན་པར་གྲུབ་པ་འགོག་གི་ཡོད། གལ་སྲིད་ང་རང་དབང་དུ་རང་ངོས་ནས་གྲུབ་ཡོད་ན། གདགས་གཞིའི་སྟེང་གཅིག་གམ་དུ་མ་གང་རུང་དུ་གྲུབ་དགོས། (མཆན། གཅིག་ཡིན་ན་ང་ཞེས་པ་གདགས་གཞི་དང་དབྱེར་མེད་གཅིག་ཡིན་དགོས། གདགས་གཞི་བཏགས་ཆོས་གཉིས་གཅིག་མཚུངས་རྙེད་རྒྱུ་ཡོད་པ་ཞིག་དགོས། དུ་མ་ཡིན་ན་གདགས་གཞི་ལས་ཡོངས་སུ་ཐ་དད་དུ་ང་ཞེས་པ་དུ་མ་ཡོད་པར་འགྱུར། དེར་བརྟེན་ང་དང་གདགས་གཞི་གཉིས་རྦད་དེ་ཐ་དད་དང་འབྲེལ་མེད་དོན་གཞན་དུ་འགྱུར་གྱི་ཡོད)

གལ་སྲིད་བདག་ཅེས་པ་གདགས་གཞི་དང་གཅིག་ཡིན་ན། དེ་གཉིས་རྟག་ཏུ་གཅིག་པ་དང་ཁ་བྲལ་དུ་མི་རུང་བ་དགོས། གལ་སྲིད་ཐ་དད་དམ་དུ་མ་ཡིན་ན། གདགས་གཞི་དུ་མ་ཡོད་པའི་རྐྱེན་གྱིས་བདག་དུ་མ་ཡོད་པར་འགྱུར། དེ་དག་འགྲེལ་བ་རྒྱས་པ་དཔེར་ན། སློབ་དཔོན་ཟླ་བ་གྲགས་པས་མཛད་པའི་རྩ་བ་ཤེས་རབ་ཀྱི་འགྲེལ་བ་དབུ་མ་འཇུག་པ་སོགས་ཚད་ལྡན་གཞུང་ཁག་ལས་མཇལ་རྒྱུ་ཡོད། གཅིག་དང་དུ་མ་གང་རུང་དུ་ཡིན་ཟེར་བའི་མཇུག་སྡོམ་སྣ་ཚོགས་ཤིག་ལ་དགག་བཞག་སྤོང་གསུམ་བྱས་པ་གཞུང་འདིའི་ནང་མཇལ་རྒྱུ་ཡོད།

བདག་ཅེས་པ་ནི་ད་དུང་སྐྱེ་བ་སྔོན་མ་དུ་མ་བརྒྱུད་པའི་ཐོག་ནས་འགྲེལ་བཤད་མཛད་པ་དང་། གལ་སྲིད་བདག་དེ་སྐྱེ་བ་སྔོན་མ་རྣམས་ཀྱི་མྱོང་བའི་རྒྱུན་དང་འབྲེལ་བ་མེད་ན། ལས་རྒྱུ་འབྲས་ཀྱི་རྣམ་གཞག་ཆ་ཚང་གོ་ལྡོག་པར་འགྱུར། གང་ཡིན་ཟེར་ན། ཚེ་འདིའི་ནང་བདག་གིས་མྱོང་བའི་འབྲས་བུ་རྣམས་རང་དང་འབྲེལ་བ་མེད་པའི་གང་ཟག་ཅིག་གིས་སྐྱེ་བ་སྔོན་མར་བསགས་པའི་ལས་ཀྱི་འབྲས་བུར་ཐལ་བར་འགྱུར། ཅི་སྟེ་དེ་ལྟར་ཡིན་ན། ང་ཚོར་གང་ཡང་འབྱུང་བ་དེ་མགོ་རྙོག་ཚ་པོ་ཆགས་ངེས་པ་ཡིན། རྒྱུ་མཚན་ནི་ལས་གསོག་པ་པོ་སུ་ཡིན་རུང་དེའི་ལས་ཀྱི་འབྲས་བུ་ང་ཚོར་མྱོང་ཐུབ། ང་ཚོར་ག་རེ་ཡིན་ནའང་ཡོང་སྲིད། འོན་ཏེ་གནས་ཚུལ་དེ་ལྟར་མ་ཡིན།

ཆོས་ཀྱི་བདག་མེད།

ད་ལྟ་བར་དུ་ང་ཚོས་བདག་བདེན་པར་གྲུབ་པར་འཛིན་པའི་བདེན་འཛིན་སྐོར་གོ་སྡུར་བྱས་པ་རེད། ད་གཞུང་ནང་བདག་གི་བ་བདེན་པར་གྲུབ་པར་འཛིན་པའི་སྐོར་ལ་དཔྱད་ཡོད། གཞན་ཡང་བདག་གིས་ཇི་ལྟར་མྱོང་བའམ་བདག་གི་བར་འཛིན་ཚུལ་ཐད་བགྲོ་གླེང་བྱས་ཡོད། དེ་ནི་ཆོས་རྣམས་བདེན་པར་གྲུབ་པར་འཛིན་པ་ལ་གོ་བ་ཡིན།

ཆོས་རྣམས་ཀྱི་བདེན་པར་མ་གྲུབ་པ་སྒྲུབ་པའི་ཆེད། གཞུང་འདིའི་ནང་གཅིག་དང་དུ་མའི་གཏན་ཚིགས་གཅིག་མཚུངས་བེད་སྤྱོད་གནང་ཡོད་པ་དང་། ཆོས་རྣམས་རང་གི་ཆ་ཤས་དང་། རྒྱུ་སོགས་ལ་བརྟེན་ནས་བཏགས་པ་ཙམ་ཡིན་པའི་ཚུལ་འགྲེལ་བརྗོད་མཛད་ཡོད། དེ་ནས་གཞུང་གིས་ཆ་དང་ཆ་ཅན་གྱི་འབྲེལ་བ་དང་། ཁྱད་པར་དུ་རྟེན་འབྲེལ་གྱི་ཐོག་ནས་འགྲེལ་བཤད་གནང་ཡོད། ཆོས་རྣམས་ཕན་ཚུན་ལྟོས་ནས་གྲུབ་པ་ཡིན། གང་ཡིན་ཟེར་ན། དེ་དག་གི་ཆ་ཤས་དང་རྒྱུ་རྣམས་ཕན་ཚུན་ལྟོས་པ་དང་བརྟེན་ནས་བྱུང་། དེ་ནི་འབྲས་བུ་རྒྱུ་ལ་བརྟེན་ཚུལ་ཡིན།

རྟེན་འབྲེལ་ཞེས་པ་ནི་འབྲས་བུ་རྣམས་རྒྱུ་རྐྱེན་གཞན་སྣ་ཚོགས་པ་ལ་བརྟེན་ནས་བྱུང་བའི་དོན་ཡིན། དེས་ན་ཡིན་པ་སྲིད་པའི་གྲུབ་ལུགས་གཅིག་པུ་དེ་ནི་ཆོས་རྣམས་རྐྱེན་གཞན་ལ་མ་བརྟེན་པར་རང་ངོས་ནས་བདེན་པར་གྲུབ་པ་མེད་པ་དེ་ཡིན། གལ་ཏེ་ཆོས་རྣམས་གཞན་ལ་མ་བརྟེན་པར་བདེན་པར་གྲུབ་ན། རང་རྐྱ་བར་གནས་ཐུབ་པར་འགྱུར། གལ་སྲིད་རང་རྐྱ་བར་ཚུགས་ཐུབ་ཡིན་ན། གཞན་ལ་བརྟེན་མི་དགོས་ལ་གཞན་དང་འབྲེལ་བ་ཡོད་མི་དགོས། གནད་དོན་དེའི་ཐད་རྟེན་འབྲེལ་གྱི་སྐད་ཆ་ཤོད་མི་དགོས། གང་ཡིན་ཟེར་ན། གཞན་ལ་མ་བརྟེན་ནས་གཅིག་པུར་གནས་ཐུབ། མེ་ལོང་ནང་གི་བྱད་བཞིན་དེ་མེ་ལོང་ལ་མ་བརྟེན་ནས་པར་མི་ཤར་བ་ལྟར། ཆོས་རྣམས་རྐྱེན་གཞན་ཞིག་ལ་མ་བརྟེན་པར་གྲུབ་མི་སྲིད།

འཁར་རྒྱུག་ལ་བརྟེན་པའི་མི་ཞིག་ལ་མཚོན་ན། དབྱུག་པ་ལ་བརྟེན་དུས་ཁོ་པ་རང་ངོས་ནས་ལང་ཐུབ་ཀྱི་མེད། གཞན་ཡང་ཁོ་རང་ཡར་ལངས་པ་དེ་དབྱུག་པ་ལ་བརྟེན་ནས་གྲུབ་པ་ཞིག་ཡིན། དེར་བརྟེན་སྲིད་མཐའ་གཉིས་པོ་གཞི་མཐུན་མེད། ཁོ་པ་ཡར་ལངས་ཐུབ་པ་དེ་གཞན་ལ་མ་བརྟེན་པར་གྲུབ་བམ་ཡང་ན་དབྱུག་པ་ལ་བརྟེན་ནས་གྲུབ་ཅེས་པ་དེ་ཡིན།

ཅི་སྟེ་ང་ཚོས་ཆོས་ཐམས་ཅད་ཀྱི་ཐོག་ནས་བཤད་ན། དེ་དག་རང་ངོས་ནས་གྲུབ་པའམ་གཞན་ལ་བརྟེན་ནས་གྲུབ་པ་གང་རུང་ཡིན་དགོས། (མཆན། གཞི་མཐུན་མེད་པའི་མཐའ་གཉིས་པོ་དེས་དངོས་འགལ་སྟོན་གྱི་ཡོད་དེ། ཆོས་རྣམས་གཅིག་གམ་གཞན། གཉིས་ཀ་ཡིན་པ། ཡང་ན་གཉིས་ཀ་མིན་པ་གང་རུང་ཡིན་དགོས།) དཔེར་ན། གལ་ཏེ་ང་ཚོས་ཆོས་ཐམས་ཅད་མི་དང་མི་མ་ཡིན་གཉིས་སུ་དབྱེ་བ་ཕྱེས་པ་ཡིན་ན། ཆོས་ཐམས་ཅད་དབྱེ་བ་དེ་གཉིས་གང་རུང་དུ་བསྡུ་དགོས། འོན་ཀྱང་གལ་སྲིད་ང་ཚོས་ཆོས་རྣམས་མི་དང་བུམ་པ་གཉིས་སུ་དབྱེ་བ་ཕྱེས་པ་ཡིན་ན། དེ་གཉིས་ཀྱིས་ཆོས་ཐམས་ཅད་ལ་ཁྱབ་ཀྱི་མེད། རྒྱུ་མཚན་ནི་མི་དང་བུམ་པ་གང་རུང་མིན་པའི་ཆོས་གཞན་ཡོད། (མཆན། དེས་ན། མ་གཞི་མི་དང་བུམ་པ་གཉིས་གཞི་མཐུན་མེད་ཀྱང་། མི་དང་བུམ་པ་གཉིས་ཀ་ཡིན་མི་སྲིད་པས། དེ་དངོས་འགལ་ཆགས་ཀྱི་མེད།)

མི་དང་མི་མ་ཡིན་གཉིས་སུ་ཕྱེས་པའི་དཔེ་མཚོན་ལྟར། ཆོས་ཐམས་ཅད་གཞན་ལ་བརྟེན་པའམ་ཡང་ན་མ་བརྟེན་པ་ཞིག་དགོས། གཉིས་པོ་གང་རུང་མིན་པ་མེད། གལ་སྲིད་ཆོས་གཅིག་གཞན་ལ་བརྟེན་ནས་གྲུབ་དགོས་ཀྱི་ཡོད་ན། ཆོས་གཞན་རྣམས་ཀྱང་གཞན་ལ་བརྟེན་ནས་གྲུབ་དགོས། ཕྱོགས་གཞན་ཞིག་ནས། གལ་ཏེ་ཆོས་རྣམས་རང་ངོས་ནས་གཞན་ལ་མ་བརྟེན་པར་གྲུབ་ཡོད་ཅེས་ང་ཚོས་ཐག་གཅོད་བྱས་ན། དེ་བདེན་པར་གྲུབ་པ་ཡིན་དགོས། དེར་བརྟེན་སྲིད་མཐའམ་ཡང་ན་གྲུབ་ཚུལ་གཉིས་ཡོད། དཔེར་ན། མི་དང་མི་མ་ཡིན་ལྟ་བུ་གཉིས་པོ་གང་རུང་ཡིན་དགོས།

ང་ཚོས་ཆོས་རྣམས་གཞན་ལ་མ་བརྟེན་པར་རང་ངོས་གྲུབ་པ་བཀག་པའམ་རྒྱུ་མཚན་མེད་པར་བསྒྲུབས་ན། གྲུབ་ལུགས་གཅིག་ལས་མེད་དེ། ཐ་སྙད་དང་རྟོག་པ་སོགས་ཆོས་གཞན་ལ་བརྟེན་ནས་གྲུབ་དགོས་པ་དེ་ཡིན།

དཔེ་ཆ་བཞག་ན། དཀྱིལ་ཞེས་པའི་ཐ་སྙད་འདིར་མཚོན་ན། གཡས་དང་གཡོན་སོགས་མ་ཡིན་པ་ཤེས་པའི་ཐོག་ནས་དཀྱིལ་ཞེས་འཇོག་དགོས། དེར་བརྟེན་དཀྱིལ་ཞེས་པ་དེ་གཡས་གཡོན་གྱི་ཕྱོགས་གང་ཡང་མིན་པར་དེ་གཉིས་ལ་ལྟོས་ནས་འཇོག་དགོས་ཀྱི་ཡོད། དེ་ག་ནང་བཞིན་དབུ་མ་ཞེས་བརྗོད་སྐབས། མཐའ་གཉིས་དང་བྲལ་བ་ལ་བརྟེན་ནས་དབུས་སུ་ཡིན་པ་ཤེས་ཀྱི་ཡོད། མཐའ་གཉིས་ནི་རྟག་མཐའ་དང་ཆད་མཐའ་ཡིན། ཆོས་རྣམས་རང་དབང་དུ་མ་གྲུབ་པའམ། ཡང་ན་དེས་ཆོས་དེ་འཇིག་པར་རྒྱུ་རྐྱེན་སོགས་ལ་མ་ལྟོས་པས་རྒྱུ་རྐྱེན་ལ་མ་ལྟོས་པར་རྟག་པ་རང་བྱུང་ཡིན་པར་སྟོན་གྱི་ཡོད། ཡང་ན་གཞི་མ་གྲུབ་པ་ (དེས་ཐམས་ཅད་མ་གྲུབ་པར་སྟོན་ཅིང་། མཐའ་གཉིས་བསལ་བའི་དབུ་མ་སྟོན།) མ་ཡིན་པ་བསྟན་ན། ང་ཚོས་ཆོས་རྣམས་གཞན་ལ་བརྟེན་ནས་བྱུང་བ་ཤེས་ཐུབ། དེར་བརྟེན་ཡིན་པ་མི་སྲིད་པའི་གྲུབ་ལུགས་བཀག་པའི་སྟོང་པ་ཉིད་ནི་རྒྱུ་མཚན་དང་འགལ་བའི་སེམས་ཀྱི་བཟོས་པའམ་གཏན་མེད་དུ་འདོད་པ་གཉིས་ཀ་མིན།

སྟོང་ཉིད་སྒོམ་ཚུལ་གཉིས།

སྟོང་ཉིད་སྒོམ་ཚུལ་རིགས་གཉིས་ཡོད་དེ། དཔྱད་སྒོམ་དང་སེམས་སྟོང་ཉིད་ཐོག་རྩེ་གཅིག་ཏུ་འཇོག་པའི་འཇོག་སྒོམ་གཉིས་ཡིན། དང་པོ་དཔྱད་སྒོམ་སྐབས། སྟོང་ཉིད་ལ་དཔྱད་པ་བྱས་ཏེ་ངེས་ཤེས་གསལ་པོ་ཞིག་རྙེད་དགོས། དེ་ནི་དཔྱད་པ་བྱས་ཏེ་སྟོང་ཉིད་རྟོགས་པའམ་སྒོམ་པར་ཟེར། དེ་རྗེས་ང་ཚོས་ངེས་ཤེས་དེ་བརྟན་པོ་བཟོ་དགོས། དེ་ཡང་སྟོང་ཉིད་ཐོག་སེམས་རྩེ་གཅིག་གཏད་དེ་དཔྱད་པ་བྱེད་དགོས། དེ་ལྟར་ངེས་ཤེས་གསལ་པོ་རྙེད་པ་དང་རྒྱུ་མཚན་གྱི་ཐོག་ནས་དགག་བྱར་དཔྱོད་དགོས་པ་དང་། དེའི་ཕྱིར་གཞུང་ནང་རིགས་པ་ལྔ་གསུངས་ཡོད།

ང་ཚོའི་ངེས་ཤེས་དེ་མེད་འགག་གི་རྣམ་པ་ཅན་ཞིག་ཡིན་རྒྱུ་གལ་ཆེན་པོ་ཡིན། འདི་ནི་དགག་བྱའི་རིགས་ཤིག་ཡིན། སྣང་བ་ལྟར་མེད། དེའི་དོན་ནི་ནམ་ཞིག་ང་ཚོས་དགག་བྱ་བཀག་ཟིན་པ་དང་། གང་ཡང་འགོག་རྒྱུ་ལྷག་གི་མེད། གཞན་ཡང་ཤུགས་ཀྱི་བསྟན་བྱའམ་དོན་གང་ཡང་ལྷག་མེད། དེར་བརྟེན་ང་ཚོས་ངེས་ཤེས་གསལ་པོ་རྙེད་ནས་དགག་པར་བྱ་བའི་ཆོས་དེ་འདྲ་མེད་པ་མཐོང་ཐུབ།

འདི་མ་རེད་ཅེས་པ་དང་དེ་མ་རེད་ཅེས་པའི་དགག་བྱའི་རིགས་མ་ཡིན་དགག་མ་རེད། དགག་བྱ་དེའི་རིགས་འགོག་པའི་ཚེ་བཀག་ཤུལ་དུ་ཆོས་ཅན་སྒྲུབ་པ་ཞིག་འཕེན་གྱི་ཡོད། འདིར་སྟོང་ཉིད་སྒྲུབ་པའི་སྐབས་དགག་བྱ་བཀག་པ་དང་ཤུགས་སུ་འཕེན་བྱའི་ཆོས་ཅི་ཡང་མེད་པས་གྲུབ་ལུགས་གཞན་མེད་པ་སྟོན།

དེའི་རྗེས་སུ་གཞུང་ནང་གལ་སྲིད་ང་ཚོས་དགག་བྱ་ངོས་འཛིན་ཡག་པོ་བྱེད་མ་ཐུབ་ན། ཆོས་དེའི་ཡིན་པ་མི་སྲིད་པ་དང་གཞི་མ་གྲུབ་ཅེས་བརྗོད་སྐབས། སེམས་ནང་ངེས་ཤེས་གསལ་པོ་ཞིག་རྙེད་ཀྱི་མེད་ཅེས་གསུངས་ཡོད། གང་ཡིན་ཟེར་ན། ང་ཚོས་གཞི་མ་གྲུབ་ཅེས་བརྗོད་པའི་དོན་དེ་གསལ་པོ་རྟོགས་མེད།

དེར་མ་ཟད། ང་ཚོས་གང་གཞི་མ་གྲུབ་པ་དེའི་ཐོག་སེམས་གཏོད་པའི་སྐབས། ཞི་གནས་སྦྱོང་བའི་ཚུལ་ལ་ལེགས་པར་བསླབས་ནས་དྲན་པ་དང་ཤེས་བཞིན་ལ་བརྟེན་ནས་སེམས་རྩེ་གཅིག་ཏུ་གཏོད་རྒྱུ་ཤིན་ཏུ་གལ་ཆེ། ཞི་གནས་ནི་སེམས་ཀྱི་གནས་བབས་ཞི་ཞིང་བརྟན་ཚུགས་པ་ཞིག་ཡིན། དེའི་ཕྱིར་ང་ཚོས་སེམས་ནང་གི་དཀྲོག་རྐྱེན་བྱིང་བ་དང་རྒོད་པ་རགས་པ་དང་ཕྲ་མོ་རྣམས་གསལ་པོ་བྱས་ངོས་འཛིན་ཐུབ་པ་དགོས། ང་ཚོས་དེ་དག་ཚུལ་བཞིན་དུ་ངོས་འཛིན་བྱེད་དགོས། དེ་ལ་བརྟེན་ནས་ང་ཚོས་སོ་སོའི་སེམས་དམིགས་གཏད་ཀྱི་ཡུལ་དེར་རྩེ་གཅིག་ཏུ་གཏོད་པ་ལས་གཡོ་བར་བྱེད་པའི་སྐྱོན་རྣམས་མེད་པ་བཟོ་ཐུབ་ཀྱི་ཡོད། དམིགས་གཏད་ནི་དགག་བྱའི་ཆོས་དེ་ཡིན། དགག་བྱ་དེ་ཡིན་པ་མི་སྲིད་པ་ཡིན།

དེ་ནས་ནམ་མཁའ་དཔལ་གྱི་གཞུང་ནང་ཞི་གནས་སྦྱོང་ཐབས་སུ་སྟོབས་དྲུག་དང་སེམས་གནས་སྐྱེ་བའི་རིམ་པ་དགུ། ཡིད་བྱེད་བཞི་བཅས་གསུངས་ཡོད་པ་དང་། དེ་དག་གིས་སེམས་ཞི་བ་དང་བརྟན་པར་བྱ་ཚུལ་གསུང་གི་ཡོད། ང་ཚོས་སེམས་གནས་དགུའི་ཐོག་ནས་སྐྱོན་དང་བྲལ་བའི་སེམས་ཀྱི་གནས་སྟངས་དེ་འདྲ་ཞིག་ལ་དམིགས་པ་གཏོད་ཐུབ་ན། ལུས་དང་སེམས་ཤིན་སྦྱངས་ཐོབ་ཀྱི་ཡོད། ལུས་སེམས་ཤིན་སྦྱངས་ཐོབ་ན། ལུས་དང་སེམས་གཉིས་ཇི་ལྟར་འདོད་འདོད་ལྟར་ཏིང་ངེ་འཛིན་ལ་བཀོལ་དུ་རུང་བ་ཡིན། དེ་ནི་ཧ་ཅང་གལ་ཆེན་པོ་རེད། ཞི་གནས་སྦྱོང་དགོས་པའི་གལ་ཆེའི་གནད་འགག་ཐོག་ངས་དམིགས་བསལ་ཞིབ་ནན་བྱེད་མི་ཐུབ། ལྷག་པར་དུ་སྔགས་ཀྱི་ལམ་དང་འབྲེལ་སྐབས། དེ་ནི་རྩེ་གཅིག་པའི་ཏིང་ངེ་འཛིན་རྩེར་སོན་པ་དེ་ཡིན།

ང་ཚོས་ནང་པའི་ཆོས་ནང་གསུང་པའི་ལམ་གཉིས་ཀྱི་སྐོར་རྟག་ཏུ་ཤོད་ཀྱི་ཡོད། དེ་ཡང་ལུང་གི་བསྟན་པ་དང་རྟོགས་པའི་བསྟན་པ་གཉིས་ཡིན། ལུང་གི་བསྟན་པ་ཧ་ཅང་མང་པོ་ཡོད། འོན་ཀྱང་ང་ཚོའི་སེམས་རྒྱུད་དུ་ཞི་གནས་དང་ལྷག་མཐོང་བསྐྱེད་ནས་རྟོགས་པའི་བསྟན་པ་ཐོབ་རྒྱུ་དེ་གལ་ཆེན་པོ་ཡིན། དེ་གཉིས་ཀྱི་ཐོག་ནས་ལུང་གི་བསྟན་པའི་ཐོག་གཞི་བཞག་སྟེ། གཞུང་ནང་གསུངས་པའི་ཡོན་ཏན་ཐམས་ཅད་རྒྱུད་ལ་སྐྱེད་ཐུབ་པ་དང་། སོ་སོའི་སེམས་རྒྱུད་དང་འབྲེལ་ནས་གསུང་དེ་དག་གི་བརྗོད་བྱ་རྟོགས་ཐུབ།

ལྷག་མཐོང་ནི་དངོས་པོའི་རང་བཞིན་ལྷག་པར་རྟོགས་པའི་ཤེས་རབ་ཡིན་ཞིང་། ཞི་གནས་ཙམ་ལ་བརྟེན་པའི་ལུས་སེམས་ཤིན་སྦྱངས་ཀྱི་དབང་གིས་མིན་པར་ད་དུང་ཆོས་རབ་ཏུ་རྣམ་འབྱེད་ཀྱི་ཤེས་རབ་ལ་བརྟེན་ནས་ཀྱང་རྐྱེན་བྱས་ཡོད། གཞན་ཡང་དེ་ལྟ་བུའི་ལྷག་མཐོང་དེ་ཆོས་གང་ཡང་རུང་བ་ཞིག་གི་ཐོག་སེམས་རྩེ་གཅིག་ཏུ་གཏད་པ་ཙམ་ལས་མིན་པར། དངོས་པོའི་གནས་ལུགས་ཚུལ་བཞིན་དུ་རྟོགས་པའི་ཤེས་རབ་ལ་བརྟེན་ནས་ཀྱང་བྱུང་། དེར་བརྟེན་ཤིན་སྦྱངས་ཐོབ་པ་དང་ཞི་ལྷག་ཟུང་འབྲེལ་ཐོབ་སྟེ། ང་ཚོའི་སེམས་དེ་ཞི་ཞིང་བརྟན་ཚུགས་པ་ ༼ཞི་གནས་༽ དང་ཡང་དག་པའི་ཤེས་རབ་ཀྱི་ཁྱད་ཆོས་དང་ལྡན་པ་ ༼ལྷག་མཐོང་༽ ཆགས་ཀྱི་ཡོད།

ཆོས་ཐམས་ཅད་སྒྱུ་མ་ལྟ་བུར་འཆར་ཚུལ།

ཞི་གནས་ཀྱི་ངང་ནས་ང་ཚོས་རིམ་བཞིན་སེམས་ཀྱི་དམིགས་གཏད་ཕྲ་རུ་ཕྲ་རུ་བཏང་ནས་ཁམས་གོང་མས་བསྡུས་པའི་ཞི་གནས་འཐོབ་པར་བྱེད་ཐུབ། ཁམས་གོང་མ་ནི་གཟུགས་ཁམས་དང་གཟུགས་མེད་ཁམས་གཉིས་ཡིན། འོན་ཏེ་གཞུང་ནང་རྟོག་མེད་མངོན་སུམ་དུ་རྟོགས་པའི་ཤེས་རབ་བསྐྱེད་པ་ཙམ་གྱིས་རྗེས་ཐོབ་སྐབས་ཆོས་ཐམས་ཅད་སྒྱུ་མ་ལྟ་བུར་མཐོང་མི་ཐུབ། རྟོག་མེད་མངོན་སུམ་དུ་རྟོགས་པ་ཙམ་ཞེས་པའི་དོན་ནི་རྟོག་པ་ཁོ་ན་བརྒྱུད་དེ་རྟོགས་པ་མ་ཡིན་པར། ཆོས་རྣམས་རང་བཞིན་གྱིས་གྲུབ་པས་སྟོང་པའི་གོ་རྟོགས་མེད་པའི་སྒོ་ནས་རྟོགས་པར་གོ་བ་ཡིན། དེ་ལྟའི་རྟོག་མེད་མངོན་སུམ་ཙམ་ལས་ལངས་པ་དེས་ཆོས་ཐམས་ཅད་སྒྱུ་མ་ལྟ་བུར་མཐོང་བའི་རྗེས་ཐོབ་ཀྱི་གནས་སྐབས་འཐོབ་པར་མི་བྱེད།

ཕྱོགས་གཞན་ཞིག་ནས་གལ་སྲིད་ང་ཚོས་ཆོས་རྣམས་རང་ངོས་ནས་མ་གྲུབ་པ་རྟོག་མེད་མངོན་སུམ་དུ་རྟོགས་ན། དེ་ལས་ལྡང་པའི་ཚེ་རྗེས་ཐོབ་སྐབས་སྒྱུ་མ་ལྟ་བུར་མཐོང་ཐུབ། གལ་ཏེ་ང་ཚོར་དེ་ལྟའི་གོ་རྟོགས་མེད་ན། མཉམ་གཞག་ལས་ལྡང་པའི་ཚེ། ཆོས་རྣམས་ཀུན་རྫོབ་ཏུའང་མེད་ཅེས་བཀག་ནས་ཆད་མཐར་ལྷུང་བའི་ཉེན་ཁ་ཡོད།

ལམ་རིམ་ཆེན་མོའི་ནང་ལྷག་མཐོང་སྐབས། ཆོས་ཐམས་ཅད་སྒྱུ་མ་ལྟ་བུར་འཆར་ཚུལ་འགྲེལ་བརྗོད་རྒྱས་པོ་དང་ནན་པོ་མཛད་ཡོད། དཔེར་ན། ང་ཚོའི་སྟོང་ཉིད་རྟོགས་པའི་གོ་བ་ནི་ཆོས་རྣམས་ཆ་ཤས་ཚོགས་པ་ལས་བྱུང་ཞིང་ཆ་ཅན་རྙེད་རྒྱུ་མེད་པ་ཞིག་ཡིན་པ་ལྟ་བུ། ཐ་ན་ང་ཚོས་ཆོས་རྟོག་མེད་མངོན་སུམ་དུ་རྟོགས་ཀྱང་། རྟེན་ཅིང་འབྲེལ་བར་བྱུང་བའི་ཐོག་ནས་རྟོག་པས་བཏགས་པའི་སྟེང་ནས་སྟོང་ཉིད་མ་རྟོགས་ན། ཆོས་རྣམས་སྒྱུ་མ་ལྟ་བུར་གསལ་པོ་མཐོང་མི་ཐུབ། སྒྱུ་མ་ལྟ་བུར་གསལ་པོ་མཐོང་བར། རྟེན་འབྲེལ་གྱི་དོན་རྟོགས་རྒྱུ་གནད་ཆེ་ཞིང་དེ་ཡང་བློས་བཞག་པའི་ཐོག་ནས་འཇོག་ཚུལ་ཤེས་དགོས། རྟེན་འབྲེལ་གྱི་གོ་བའི་ཐོག་ནས་སྟོང་ཉིད་རྟོགས་པ་འབའ་ཞིག་བརྒྱུད་ང་ཚོར་ནམ་མཁའ་ལྟ་བུའི་སྟོང་ཉིད་དང་ཀུན་རྫོབ་པའི་ཐོག་ནས་ཆོས་རྣམས་སྒྱུ་མ་ལྟ་བུར་རྟོགས་པའི་རྟོགས་པ་གཉིས་སྐྱེད་ཀྱི་ཡོད།

རྫོགས་པ་ཆེན་པོའི་སྒོམ་ནང་། (མཆན། རིག་པའི་ཐོག་མཉམ་པར་བཞག་པའི་མཉམ་བཞག་དང་རྗེས་ཐོབ་གཉིས་ལ་ཁྱད་པར་ཅི་ཡང་མེད།) ང་ཚོས་རིག་པའི་དགག་བྱ་གཞི་མ་གྲུབ་པའི་ཐོག་མཉམ་པར་འཇོག་པ་དང་དུས་མཚུངས་ཆོས་རྣམས་ཀྱི་སྣང་བ་རང་བཞིན་གྱིས་ཤར་ཡོང་གི་ཡོད། འོན་ཀྱང་རྟེན་འབྲེལ་རྒྱུ་མཚན་དུ་བྱས་ཏེ་ང་ཚོས་སྟོང་ཉིད་རྟོགས་པའི་ཐོག་ནས་ཤར་ཡོང་གི་ཡོད། དེ་ལྟར་ང་ཚོས་རྫོགས་ཆེན་གྱི་ཉམས་ལེན་ནང་དུའང་ཆོས་རྣམས་སྒྱུ་མ་ལྟ་བུར་གྲུབ་པར་མཐོང་གི་ཡོད།

མཇུག་སྡོམ།

འདི་ནས་དགེ་བཤེས་འཆད་ཁ་པས་མཛད་པའི་བློ་སྦྱོང་དོན་བདུན་མའི་འགྲེལ་བ་ཧོར་སྟོན་ནམ་མཁའ་དཔལ་གྱིས་མཛད་པ་མཇུག་རྫོགས་པ་ཡིན།

ད་ནི་བྱང་ཆུབ་ཀྱི་སེམས་རིན་པོ་ཆེ་དང་རྒྱུད་པའི་བླ་མ་ཇོ་བོ་རྗེར་བསྟོད་ཕྱག་སྐོར་ཡིན། ཇོ་བོ་རྗེས་འཕགས་པ་ཐོགས་མེད་དང་རྗེ་བཙུན་འཇམ་དཔལ་དབྱངས་དེ་བཞིན་རྒྱལ་སྲས་ཆེན་པོ་ཞི་བ་ལྷ་ལས་བརྒྱུད་པ་རྣམས་གཅིག་ཏུ་འདུས་ཡོད། དེ་ནས་གཞུང་དངོས་དང་རྩོམ་པ་པོ་སྟེ་རྗེ་ཙོང་ཁ་པའི་སློབ་མ་ནམ་མཁའ་དཔལ་ལ་བསྟོད་ཕྱག་མཛད་པ་ཡིན།

(མཆན། རྒྱལ་སྲས་ཐོགས་མེད་བཟང་པོའི་གཞུང་གི་མཇུག་ཏུ་ཚིགས་སུ་བཅད་པ་འདི་ཁ་སྣོན་མཛད་ནས་གསུང་ཡོད། དེ་ཡང་། སྔོན་སྦྱངས་ལས་ཀྱི་འཕྲོ་སད་པས། །རང་གི་མོས་པ་མང་བའི་རྒྱུས། སྡུག་བསྔལ་གཏམ་ངན་ཁྱད་བསད་ནས། བདག་འཛིན་འདུལ་བའི་གདམས་ངག་ཞུས། ད་ནི་ཤི་ཡང་མི་འགྱོད་དོ། །ཞེས་གསུངས། སྐྱབས་རྗེ་ཕ་བོང་ཁས་ཀྱང་ཚིག་བཅད་འདི་གསུང་ནས་མཇུག་སྡོམ་མཛད་ཡོད། འོན་ཀྱང་ཚིག་རྐང་དང་པོ་སྟེ། སྔོན་སྦྱངས་ལས་ཀྱི་འཕྲོ་སད་པས། །ཞེས་པ་དེ་གསུང་མེད། ནམ་མཁའ་དཔལ་གྱི་འགྲེལ་འི་ནང་ཤོ་ལོ་ཀ་འདི་ཐོན་གྱི་མེད།)

ད་ནི་བློ་སྦྱོང་ཉི་མའི་འོད་ཟེར་གྱི་བརྒྱུད་པ་མཇུག་བསྡུ་གི་ཡིན། བློ་སྦྱོང་གི་གཞུང་འདི་ནི་སེམས་ལ་ཕན་ཐོགས་ཧ་ཅང་ཆེན་པོ་ཡོད། དེ་ལ་བརྟེན་མི་ཚེ་ཧ་ཅང་དོན་དང་ལྡན་པ་དང་སྐྱིད་པོ་ཞིག་ཡོང་ཐུབ། ངས་ནམ་རྒྱུན་བསམ་བློ་འཁོར་བ་དང་མི་རྣམས་ལ་ང་རང་འཛམ་གླིང་ནང་མི་སྐྱིད་ཤོས་དེ་ཡིན་རྒྱུ་རེད་ཅེས་བརྗོད་ཀྱི་ཡོད། དེ་ཡང་ཕྱེད་ཀ་ཏཱ་ལའི་བླ་མའི་གོ་གནས་ཡོད་པའི་རྐྱེན་དང་། ཕྱེད་ཀ་གཏན་གཏན་བློ་སྦྱོང་ཉམས་སུ་བླངས་པའི་འབྲས་བུ་རེད། བློ་སྦྱོང་ལ་བརྟེན་ནས་ང་རང་ལ་བདེ་སྐྱིད་ཐོབ་པ་དང་དཀའ་ངལ་འཕྲད་སྐབས་དེ་ལ་གདོང་ལེན་བྱེད་པའི་སྟོབས་ཤུགས་སྦྱིན་གྱི་འདུག །ནང་ཆོས་ནས་གསུང་པའི་སྔོན་འགོག་གི་ཐབས་ལམ་རྣམས་ང་ཚོས་དོན་དངོས་སུ་ཉམས་ལེན་བྱེད་བཞིན་པ་ལྟར། དུས་དང་རྣམ་པ་ཀུན་ཏུ་ཆོད་སེམས་བརྟན་པོས་འདི་ཉམས་ལེན་བྱ་རྒྱུའི་འབད་འབུངས་ཆེན་པོ་བྱེད་དགོས།།

Top