ارتھ ڈے دی ایس پجاویں سالگرہ اوپر، ساڈی دھرتی لوکاں دی صحت اتے خیر نوں جو بہت وڈا خطرہ ہے نال نبڑ رہی اے ۔ ایس کشمکش دے دوران سانوں درد مندی اتے آپس دی سہائیتا دی قدر اتے قیمت دا چیتا کرایا جا رہیا ہے۔ اجوکی جگتائی وبا نال سانوں سب نوں بغیر نسل، سنسکرتی، یا جنس دے لحاظ دے خطرہ ہے، اتے ساڈا رد عمل اک متحد قوم جیہا ہونا چاہیدا اے جو سب دی بنیادی ضرورتاں نوں پورا کرے۔
اسی چاہیٔے یا نہ چاہیٔے، اسی ایس زمین اوپر اک بوہت وڈے پریوار سمان جنم دتے گئے آں۔ امیر یا غریب، پڑھیا لکھیا یا ان پڑھ ، کسے اک قوم نال تعلق رکھن والے یا کسے دوسری نال، بہر حال اسی سب ہوراں سمان انسان ہاں۔ ہور ایہ کہ سانوں سب نوں خوشی دی تلاش اتے دکھ توں مکتی دا برابر دا حق ہے۔ جد اسی ایہ جان لئیے کہ ایس معاملہ وچ اسی سب برابر ہاں تے اسی آپوں ہی ہوراں دے نال تعلق خاطری اتے نیڑلا پن محسوس کرنے آں۔ ایس توں اک جگتائی خلوص بھری ذمہ واری دا احساس جنم لیندا ہے؛ لوکاں دے مسلے حل کرن وچ اوہناں دی عملی طور تے مدد کرن دا احساس۔
ساڈی دھرتی ماتا سانوں جگتائی احساس ذمہ واری دا سبق دے رہی اے۔ ایہ نیلی دھرتی اک سندر بستی اے۔ ایس دی زندگی ساڈی زندگی ہے؛ ایس دا مستقبل ساڈا مستقبل ہے۔ بے شک دھرتی ساڈے نال اپنے بچیاں والا سلوک کردی اے؛ ایس دے بچیاں وانگوں اسی ایس دے محتاج ہاں۔ جنہاں جگتائی بپتاواں نال سانوں واہ پیا اے ایس دے پاروں سانوں سب نوں رل مل کے کم کرنا چاہیدا اے۔
مینوں ماحول بارے سمسیاواں دی سنجیدگی دا اودوں احساس ہویا جد میں ۱۹۵۹ وچ تبت توں جان بچا کے نسیا، جتھے ماحول ہمیش توں ہی صاف ستھرا سمجھیا جاندا سی۔ جد اسی کوئی ندی نالہ ویکھدے تے ایس دا پانی پین بارے کوئی پس و پیش نہ ہوندی۔ افسوس اے کہ اج ساری دنیا وچ پین دا صاف پانی اک مسٔلہ بن گیا ہے۔
ساڈے لئی ایس گل نوں یقینی بنانا لازم ہے کہ دنیا بھر وچ بماراں اتے اوہناں دے دلیر تیماردار لوکاں نوں صاف پانی اتےمناسب صفائی ستھرائی دا سامان ورگی بنیادی شیواں میسر ہون تاں جے بماری دے بے لگام پسار نوں روکیا جا سکے۔ چنگی صحت لئی صفائی ستھرائی ہونی بڑی ضروری اے۔
ایس موذی وبا نال نبڑن لئی جس نے ساڈی دھرتی اوپر تباہی مچا رکھی اے صحت عامہ دے ادارے جنہاں وچ مناسب سامان اتے عملہ موجود ہووے تحفظ پسند رسد ضروری اے۔ ایس نال آئیندہ پیش آون والے صحت عامہ دے بحران دے خلاف زبردست رکھشا میسر ہووے گی۔ میں جاننا واں کہ اقوام متحدہ دے تحفظ پسند ارتقائی ہدف دے وی عین ایہی منورتھ نیں جو جگتائی صحت عامہ نوں خطریاں نال نبڑدے نیں۔
ہن جد کہ اسی سب ایس بحران نال نبڑ رہے آں، ایہ لازم ہے کہ اسی سب مل کے کم کرئیے خاص طور تے اپنے اوہناں بہن بھراواں دی لوڑاں پوری کرن لئی جنہاں دا حال چنگا نہیں اے۔ میں دعا کرنا واں کہ آون والے دناں وچ، ساڈے وچوں ہر کوئی اپنی پوری یوگتا نال دنیا نوں خوش اتے صحت مند بناون وچ زور دار کردار ادا کرے گا۔