وستر
اَنِت یاتا توں مراد بدلاؤ اے: جو شیواں سبب اتے حالات دی تابع نیں اوہ کدی اک جیہی نہیں رہندیاں، اوہ ہر پل بدلدی رہندیاں نیں۔ بعض شیواں، بنائے جان دے بعد، ہولی ہولی ٹٹ بھج دا شکار ہونا شروع ہو جاندیاں نیں حتیٰ کہ ختم ہو جاندیاں نیں، جویں کہ تہاڈا کمپیوٹر، تہاڈی گڈی یا تہاڈا شریر۔ بعض ہور شیواں ہولی ہولی بدلدی رہندیاں نیں، پر کیوں جے اوہ فیر نویں سرے توں بندیاں رہندیاں نیں ایس لئی اوہ اکا ہی غائب نہیں ہوجاندیاں، جویں تہاڈے من دی بنیادی کاروائی بھاویں اک نیانے دی، یا کوئی چست جوان یا کوئی بڈھا بھلن دا روگی۔ بعض شیواں اوپر تھلے ہوندیاں رہندیاں نیں، جویں کہ درجہ حرارت یا تہاڈے مراقبہ دا وصف؛ جد کہ ہور لوکی، جویں کہ اوہ لوکی جو ہوائی جہاز وچ جمع ہوندے نیں اتے فیر وچھڑ جاندے نیں۔ بعض شیواں ادوار دی تابع ہوندیاں نیں، جویں کہ موسم یا دن رات دا چکر، جد کہ کجھ ہور وار وار ابھردیاں نیں، کجھ چِرقائم رہندیاں نیں اتے فیر مُک جاندیاں نیں، جویں کہ بدھ مت دے نظریہ مطابق جگ۔ اَنِت یاتا دی کئی قسماں نیں۔
بد قسمتی نال، چونکہ ساڈے من سمے دے دھارے نوں اک پل وچ پھڑن دی یوگتا نہیں رکھدے، تے اسی پلیکھے دا شکار ہونے آں اتے کدی کدار ایہ سوچنے آں کہ شیواں جامد نیں اتے کدی نئیں بدلدیاں، جویں ساڈے سمبندھ، ساڈی جوانی، ساڈا مزاج، وغیرہ۔ جد اسی انج سوچنے آں تے اسی اپنے لئی سنتاپ تے مسلے پیدا کرنے آں۔ مثال دے طور تے، جے اسی کسے نال پیار کرنے آں۔ اوس دا مڈھ بعض سبب اتے حالات سان– اسی دونویں اک ہی تھاں موجود ساں، اسی دونویں سنگی ساتھی دی تلاش وچ ساں، اتے ساڈے دونواں دی زندگیاں وچ کجھ ہور معاملے چل رہے سان۔ پر سمے بیتن دے نال نال حالات بدل گئے۔ جے اسی انج دا ہی تعلق قائم رکھنا چاہئیے جس طرں دا کہ شروع شروع وچ سی، تے اسی اپنے ساتھی دے ملازمت بدلن، کسے دوجے شہر منتقلی، یا کسے پروہنے دے آون، کوئی نویں دوست بنانا، یا ساڈی زندگی وچ کسے انج دی تبدیلی دا ہونا، ایہناں سب شیواں نال سمجھوتہ نئیں کر پاواں گے۔ اسی اوسے پرانے تعلق نوں چمبڑے رہنے آں اتے چونکہ انج دا کرم حقیقت دی نفی اے، تے اسی پریشان اتے نا خوش ہونے آں۔
اپنے مراقبہ دی خاطر، آؤ اسی اپنی زندگی وچ ون سونّی چیزاں اوپر غور کرئیے جو اَنِت یاتا دا شکار نیں اتے اوہناں اوپر ایس احساس نال توجہ دئیے کہ اوہ بدل چکیاں نیں اتے سمے گزرن دے نال نال بدلدی رہن گیاں، اتے اخیر مک جان گیاں۔
مراقبہ
- ساہ اوپر گوہ راہیں شانت ہو جاؤ۔
- اپنی والدہ نال اپنے سمبندھ اوپر غور کرو۔
- ایس دی شروعات اوپر غور کرو – تسی اک ددھ پیندے نیانے سو اتے ایس دا تہاڈے تعلق اوپر اک طراں دا اثر پیا۔
- فیر تسی اتے تہاڈی ماں ہور وڈے ہو گئے، تسی بچے سو فیر نو جوان ہوئے اتے فیر بالغ، تہاڈی ماں وی وڈیری ہو گئی، تہاڈا رشتہ بدل گیا – بدلیا کہ نئیں؟
- حتیٰ کہ جد اوس دا مرگ ہو جائے یا جے اوہ انتقال کر چکی اے، تے بھاویں تہاڈا آپس دے معاملہ والا تعلق ختم ہو چکیا اے، تے سوچو کہ تہاڈا رویہ اتے اوس دی یاد کس طراں بدلدے نیں اتے بدلدے رہندے نیں۔
- انج ہی اپنے پیو نال اپنے تعلق اوپر غور کرو۔
- اپنے کسے ساتھی جس نال تہانوں ات دا پیار اے یا سی دے بارے سوچو۔
- اپنی پیشہ ورانہ زندگی اوپر غور کرو۔
مکدی گل
اَنِت یاتا زندگی دی حقیقت اے۔ اسی بھاویں پسند کرئیے یا نہ کرئیے ہر شے ہر پل بدلدی رہندی اے، اتے کوئی شے وی ہمیش اک جیہی نہیں رہندی۔ جد اسی ایس حقیقت نوں من لئیے، تے سانوں احساس ہوندا اے کہ کسے وی شے نال چمبڑے رہنا ایہ سوچ کے کہ ایہ ہمیش انج ہی رہوے گی بیکار اے۔ جد اسی ایہناں سب تبدیلیاں نال جو کہ نا گزیر طور اوپر ساڈی زندگی، ساڈے تعلق، ساڈے شریر وغیرہ وچ آوندیاں نیں سمجھوتہ کر لینے آں، تے اسی بے شمار مسلے اتے سنتاپ جو کہ سانوں پیش آ سکدے سان توں بچ جانے آں۔