پیار کس طراں پنگریا جاۓ

How to develop love derek thomson unsplash

جگتائی محبت – ہر کسے لئی خوشی دی آشا اتے خوشی دے سبب پیدا کرنا – دا مڈھ ایس گل دی سرت اے کہ کس طراں ساڈی زندگیاں دوجیاں نال جُڑیاں ہوئیاں نیں [ویکھو: پیار کیہ شے اے؟]۔ اسی سب انسانیت دا حصہ آں اتے ساڈی نچنتا ساری انسانیت نال جُڑی ہوئی اے –ساڈے وچوں کوئی وی معاشی بدحالی یا واتا ورن دی تبدیلیاں دے اثر توں بچ نہیں سکدا۔ جس مضبوطی نال اسی انسانیت نال جُڑے ہوۓ آں، تے ایہ ڈاڈھا سوتر اے کہ اسی سب نال اپنا پیار ونڈئیے۔

دوجیاں لئی پیار پنگرن نال من نوں شانتی ملدی اے۔ ایہ زندگی وچ کامیابی دا حتمی اُت پتی استھان اے – چودھویں دلائی لاما

پیار پیدا کرن دی خاطر سانوں اپنے آپس دے میل نوں سمجھنا ضروری اے۔ ہر اوہ شے جو اسی کھانے آں، ورتنے آں اتے جس توں مزہ لینے آں دوجیاں دی محنت دا نتیجہ ہوندی اے۔ ذرا اوہناں ہزاراں لوکاں بارے سوچو جو دنیا دی مختلف نکراں وچ بیٹھے ایہ برقی آلے بنا رہے نیں جنہاں اوپر تسی ایس ویلے ایہ مواد پڑھ رہے او۔ ایس اوپر ڈوہنگا وچار کرن نال اسی ہر پرش نال جڑے اتے اوہناں دے شکر گذار محسوس کرنے آں، جس توں ساڈے اندر زبردست خوشی دی موج اٹھدی اے۔ ایس توں قدرتی طور تے ساڈے اندر دوجیاں لئی خوشی دا احساس پیدا ہووے گا؛ اجیہے جذبے جگتائی پیار دی بنیاد نیں۔

پیار بھری شفقت پیدا کرن لئی اک مختصر مراقبہ

سب توں پہلے سانوں اپنے لئی پیار بھری شفقت پیدا کرن دی ضرورت اے۔ جے اسی اپنے آپ لئی ہی خوشی دی آشا نہیں رکھدے، تے اسی کسے ہور نوں کیوں خوش ویکھنا چاہواں گے؟
اسی ایس ڈاڈھے احساس دے نال شروع کرنے آں:

  • کنی ودیہ گل ہووے جے میں خوش ہوواں اتے خوشی دے سبب پیدا کر سکاں۔
  • کاش کہ میں خوش ہوواں۔
  • کاش میں اپنے لئی خوشی دا سربندھ کر سکاں۔

اک وار جد اسی اپنے لئی خوشی دی ڈاڈھی آشا پیدا کر لئیے، تے اسی ایس نوں ہور لوکاں دی وڈی نفری اوپر وی لاگو کر سکنے آں:

  1. پہلاں اسی اپنے پیار دا منہ اپنے عزیزاں اتے دوستاں ول موڑنے آں۔
  2. فیر اسی ایس نوں اوہناں سب لوکاں اوپر لاگو کرنے آں جنہاں نال اُنج ساڈا کوئی رشتہ نہیں۔
  3. فیر اسی اوہناں لوکاں لئی پیار پنگرن دا جتن کرنے آں جو سانوں پسند  نہیں۔
  4. اتے با الآخر، اسی اپنے پیار دا منہ کل عالم اتے اوس وچ ساری مخلوق ول موڑنے آں۔

ایس طراں، اسی اپنا پیار دا احساس انج پنگر سکنے آں جس وچ نرا اسی اتے ساڈے نیڑلے لوکی ہی شامل نہ ہون سغوں  ایس وچ ساری کرت شامل ہووے۔

جے اسی دوجیاں نوں خوش کرن لئی کجھ کر سکئیے تے سانوں ضرور کرنا چاہیدا اے۔ جے اسی انج نہ کر سکئیے، تے سانوں اوہناں نوں کجھ ایہو جیا دین بارےسوچنا چاہیدا اے جس توں اوہناں نوں نہ صرف عارضی خوشی ملے سغوں جو اوہناں لئی ہمیش دی بھلائی دا وی سبب ہووے۔ ایہ نرا بے گھر لوکاں نوں بھوجن اتے کوٹھا مہیا کرن اوپر ہی نر بر نہیں-  فیر وی، بوہت سارے دولتمند اتے کامیاب لوکی وی انج دے نیں جو سوگمان نیں اتے اوہناں نوں وی سانوں اپنی آشا وچ شامل کرنا چاہیدا اے۔ ہولی ہولی، ساڈے گھر والے، یار بیلی اتے ہر اوہ پُرش جس نال ساڈا واہ پیندا اے، دے لئی پرخلوص پیار فطری طور اوپر پیدا ہووےگا، جس توں سانوں اتے دوجیاں نوں خوشی نصیب ہووے گی۔ 

ویڈیو: میتھیو رکارڈ – «بے لوث پیار اوپر سمادھ»
نکے وشے نوں سنن/تکن لئی ویڈیو سکرین اوپر سجی نکر وچ تھلے نکے وشے آئیکان اوپر کلک کرو۔ نکے وشے دی بولی بدلن لئی "سیٹنگز" اوپر کلک کرو، فیر "نکے وشے" اوپر کلک کرو تے اپنی من پسند بولی دی چون کرو۔
Top