حکمت بطور اک پرمت: پرجن پرمت

جے اسی حقیقت اتے افسانہ دے وچکار انتر کرن دی حکمت توں بے وس آں، تے اسی اپنے اتے ہوراں دے مثبت جگتائی اتے روحانی ہدف پان دے سب توں ضروری وستو توں محروم آں۔ لا علمی اتے پلیکھے دی حالت وچ اسی ایس گل اوپر کیول ٹیوا ہی لا سکنے آں کہ ساڈے اپنے لئی یا کسے ہور لئی کیہ فیدہ مند ہووے گا، اتے چوکھے سمے اسی غلطی اوپر ہونے آں۔ دور رس نکھیڑلی پچھان دے کارن – حکمت دا پرمت – جس وچ درد مندی اتے بودھی چت ہدف شامل ہووے، اسی اک مہاتما بدھ بنن دے اہل ہاں اتے ایس گل توں چنگی طراں واقف آں کہ ساری ذی حس مخلوق نوں فیدہ پوہنچان دے سوتر اتے تگڑے طریقے کیہ نیں۔

دور رس نکھیڑلی پچھان – جس نوں عام طور تے "پرجن پرمت،" یعنی سرت بطور اک پرمت کہندے نیں – ایہ چھ پرمتاں وچوں اخیرلی اے۔ ایس دی مدد نال اسی ڈونگی پرکھ پرچول کرنے آں اتے ٹھیک ٹھیک تے یقین دے نال ہر اوس شے دی فطرت اتے اوس بارے لمے چوڑے حال احوال دی پچھان کرنے آں جس بارے سانوں گیان پراپت کرن اتے سب دا بھلا کرن دی خاطر جانکاری دی ضرورت اے۔ ایس دے تن حصے نیں - دور رس نکھیڑلی پچھان جو درست سرت رکھدی اے:

۱۔ قدرت دا ڈونگا روپ – حقیقت دا اصل الاصول، یعنی قدرت دے سارے روپ دا خود مختاری توں مکمل عاری پن، جس دی سرت یا تے معنیاں دے انوسار تصوراتی اے یا غیر تصوراتی طور اوپر موجود وستو  وچ دِسدی اے

۲۔ اوپرے، رواجی روپ – ودیا دے پنج وڈے شعبے: دستی کلا کاری، طب، زباناں اتے صرف و نحو، منطق اتے بدھ مت دی ساری شکشا دا وچل واہی گیان، اچیچ گیان پراپت کرن دے مختلف پدھر اتے اوہناں نوں پان دے طریقے اتے اوہناں دی بشارت

۳۔ بھلائی دے طریقے جو سب دکھی اتے ذی شعور ہستیاں اوپر لاگو ہون – ۱۱ قسم دے اوہ لوکی جنہاں دی مدد کرنی اے جس دا ذکر دور رس اچار ونت، امرتا اتے من دے استحکام دے سلسلہ وچ کیتا گیا اے۔

پرمت حکمت نال اسی  درست اتے فیصلہ کن نکھیڑ کرنے آں:

  • اوہ مثبت ہدف جنہاں نوں اسی پانا چاہ رہے آں
  • ایہناں نوں پان دے فیدے
  • ایہناں نوں نہ پان توں ہون والے نقصان
  • ایہناں نوں پان دے موثر طریقے
  • ایہناں طریقیاں دی صحیح مشق کس طراں کیتی جاۓ
  • ایہناں دی مشق وچ آون والیاں رکاوٹاں
  • ایہناں اوکڑاں توں بچن  یا ایہناں اوپر قابو پان دے طریقے۔

دور رس نکھیڑلی پچھان توں آون والی درست سرت دے بغیر اسی بدھ مت دا پاٹ انھیاں وانگوں کر رہے ہوواں گے، ایس یقین دے بغیر کہ ساڈا ہدف کیہ اے، کیوں اے، ایس نوں کس طراں پانا اے، اتے جد اسی ایس نوں پا لواں گے تے فیر ایس دا کیہ کراں گے۔ اسی اپنے پاٹ نوں خود غرضی اتے لا علمی دی اکساوٹاں نال گندہ کراں گے، پریشان کرن والے جذبیاں اتے طور طریقے نال ایس وچ گندگی بھراں گے، اتے ایس طراں اپنی کامیابی دے امکان نوں خطرے وچ پا  لواں گے۔

دور رس نکھیڑلی پچھان باقی دے پنج دور رس طور طریقے – اُپکار، اچار ونت، صبر، امرتا اتے من دی امرتا یا دھیان- نوں مناسب ول نال لاگو کرن لئی لازم اے۔ ایس پرمت حکمت نال اسی درست اتے فیصلہ کن نکھیڑ کرنے آں کہ:

  • کس نوں اتے کیہ دینا مناسب اے یا غیر مناسب اے، اتے ہور ایہ کہ، ساڈی بے معنی حیثیت، اتے اوہ پرش جس نوں اسی دینے آں اتے کیہ دینے آں، تا کہ اسی بغیر کسے وڈیائی یا موہ یا پچھتاوے دے اوہ کجھ دے سکئیےجو فیدہ مند ہووے
  • ساڈے لئی اتے دوجیاں لئی کیہ فیدہ مند اے اتے کیہ ہانی کارک اے، اتے ہور ایہ کہ، سمسار دے بکھیڑے اتے نروان دی شانت اتے بیگانہ حالت وچ رہن دے نقصان، تا کہ اسی خالص طور تے دوسریاں دی مدد دی خاطر نہ کہ اپنے خود غرض لکشن نوں پراپت کرن لئی اچار وہار اوپر کار بند ہوئیے
  • بے صبری دے نقصان اتے صبر دے فیدے، تا کہ اسی بغیر روسے دے، پیار اتے درد مندی دے نال دوجے لوکاں دے منفی اتے ویری رد عمل نوں جس دا اوہ ساڈی مدد کرن دی کوششاں دے خلاف وکھالا کرن، اتے دھرم دا پاٹ کرن وچ موہرے اوکڑاں نوں برداشت کر سکن
  • ساڈے روحانی ہدف قائم کرن دے سبب، اتے ایہ کہ جو طریقے اساں اختیار کیتے نیں اوہ سانوں کس طراں اوہناں نوں پان وچ سہائت ہون گے، تا کہ اسی اپنے پاٹ وچ ثابت قدم رہئیے اتے ادھے رستے وچ سستی یا حوصلہ شکنی دے کارن کم بند کر کے نہ بیٹھ جائیے
  • حقیقت کیہ شے اے اتے وجود دے انہونے روپ دا تصور کیہ شے اے، تا کہ دھیان اتے من دی امرتا جو کہ من دی حقیقت پسند فطرت اوپر مرتکز ہووے دے راہیں مکش اتے گیان پا سکئیے۔ ہور ایہ کہ، اپنے ہدف بارے نکھیڑلی پچھان دے کارن، اسی کسے انج دی شانت اتے خوشی بھری حالت جو اساں مراقبہ دے دوران پائی ہووے نوں ساڈے ہوراں دی مدد کرن دے ہدف توں بھٹکان دی اجازت نئیں دیندے۔

دس پرمت

جد اسی دس دور رس طور طریقے دا ذکر کرنے آں، تے اخیرلے چار دور رس نکھیڑ دے ہی انگ نیں:

  • دور رس کلا کاری دا مطلب اےخاص قسم دی نکھیڑلی پچھان جس دا تعلق ڈاڈھے سوتر اتے موثر طریقیاں نال اے جنہاں دا رخ اندرلی پدھر اوپر دھرم دی شکشا نوں حقیقت دا روپ دینا اتے باہرلی پدھر اوپر مکش اتے روشن ضمیری پان دی خاطر دوجیاں دی مدد کرنا اے
  • دور رس کامنائی دعا – اسی جس شے دی شدید آرزو کرنے آں اوس دی خصوصی نکھیڑلی پچھان، یعنی کہ کدی وی ساڈے سارے جنماں وچ بودھی چت ہدف اتے دوسریاں دی مدد دے سلسلہ وچ اپنی رجھتا، بغیر کسے وقفہ دے چالو رکھن توں پھِر جانا
  • دور رس شکتی دی پراپت –اُچیچ نکھیڑلی پچھان، جس نوں پرکھ پرچول اتے امرتا دین والے مراقبہ نال حاصل کیتا گیا ہووے، اتے جس دا لاگو کرنا ساڈی دور رس نکھیڑلی پچھان نوں پسارن دی خاطر کیتا گیا ہووے  اتے ایہ کہ ایس نوں مخالف قوتاں مثلاً لگاوٹ دے ہتھوں کچلے جان توں بچایا جاۓ
  • دور رس ڈونگی سرت –اُچیچ نکھیڑلی پچھان جس دے لاگو کرن نال سارے روپاں دے خالی پن دی درست سرت نوں ساڈے من دے نال پوری طراں جوڑ دتا گیا ہووے، تا کہ ہر شے دے متعلق اوپری اتے اصلی سچائیاں دی اکو ویلے پچھان ہو سکے۔

خلاصہ

دور رس نکھیڑلی پچھان دے راہیں، اسی کسے وی پاٹ جو اسی کر رہے آں، دے فیدے دے بارے صاف اتے پکی پچھان رکھنے آں، اتے اوہناں ہانی کارک معاملیاں دی وی جو ایہناں طور طریقیاں اوپر قائم رہن توں موہرے آ  سکدے نیں جنہاں اوپر اسی پاٹ دے ذریعہ قابو پانا چاہنے آں۔ ایس ٹھوس سرت اتے پکے یقین دی سہائتا، اتے پیار، درد مندی اتے بودھی چت ہدف دی غیر متزلزل اکساوٹ نال، دھرم دا کوئی وی پاٹ جو اسی کرئیے اوہ گیان پراپت کرن اتے دوسریاں دی ہر ممکن مدد کرن دی یوگتا دے سلسلہ وچ موثر ثابت ہوندے نیں۔  

Top