དམ་བཅའ་ཅན་གྱི་བྱང་ཆུབ་སེམས་ཀྱི་བསླབ་བྱ།

བྱང་ཆུབ་སྨོན་པའི་སེམས་དང་འཇུག་པའི་སེམས།

བྱང་ཆུབ་སེམས་དཔའ་རྣམས་ནི་བྱང་ཆུབ་ཀྱི་སེམས་དང་ལྡན་པ་སྟེ། སེམས་ཅན་བློས་མི་བཏང་བར་གཞན་དོན་ཁོ་ན་ལ་ཡོངས་སུ་བརྩོན་ཞིང་། གང་ཐུབ་ཅི་ཐུབ་ཀྱིས་སེམས་ཅན་རྣམས་ལ་ཕན་པ་སྒྲུབ་པའི་ཆེད་དུ་སངས་རྒྱས་ཀྱི་གོ་འཕང་ཐོབ་པར་བྱ་རྒྱུའི་སེམས་དེ་ཡིན། བྱང་ཆུབ་ཀྱི་སེམས་ལ་དབྱེ་བ་གཉིས་ཡོད་པ་ནི།

༡༽ སྨོན་སེམས།

༢༽ འཇུག་སེམས་གཉིས་རེད།

སྨོན་པ་སེམས་བསྐྱེད་ནི། སེམས་ཅན་ཐམས་ཅད་ལ་ཕན་པའི་ཕྱིར། རང་ཉིད་ཀྱི་སྐྱོན་གྱི་ཆ་རྣམས་ལས་ཐར་ཞིང་། རང་གི་ནུས་པ་རྟོགས་པའི་མོས་པ་དང་འདུན་པ་ཤུགས་དྲག་དེ་ཡིན། འཇུག་པ་སེམས་བསྐྱེད་ནི། དེ་ལྟ་བུ་བསྒྲུབ་བྱ་གཞན་ཕན་གྱི་དོན་བསྒྲུབ་པར་བྱེད་པའི་ཆོས་ཉམས་སུ་ལེན་པ་དང་། དེ་དག་ལ་བར་ཆད་དུ་འགྲོ་བའི་ལས་རྣམས་སྤོང་བར་བྱང་ཆུབ་སེམས་ཀྱི་སྡོམ་པ་བླངས་བ་དེ་ཡིན། སྨོན་སེམས་དང་འཇུག་སེམས་གཉིས་དབར་གྱི་ཁྱད་པར་ནི། དཔེར་ན། སྨན་པ་མཁས་པ་ཞིག་ཆགས་འདོད་ཡོད་པ་དང་། དེ་ལྟར་ཆགས་པའི་ཕྱིར་དུ་དངོས་སུ་སྨན་གྱི་སློབ་གྲྭར་འཛུལ་བཞུགས་བྱེད་པ་དང་མཚུངས་པ་ཡིན།

སྨོན་པ་ཙམ་དང་དམ་བཅའ་ཅན་གྱི་བྱང་ཆུབ་ཀྱི་སེམས།

ཆོ་གའི་རིམ་པ་དམིགས་བསལ་གྱི་ནང་འཛུལ་བཞུགས་ཐོག་ང་ཚོས་བྱང་ཆུབ་སྨོན་པའི་སེམས་དེ་བསྐྱེད་སྲིད་ཀྱང་། དེ་ལྟར་བྱེད་པར་བྱང་ཆུབ་སེམས་དཔའི་སྡོམ་པ་ལེན་དགོས་པའི་ཁྱབ་པ་མེད།

བྱང་ཆུབ་སྨོན་པའི་སེམས་ལའང་རིམ་པ་གཉིས་ཡོད་དེ།

༡༽ གཞན་དོན་དུ་སངས་རྒྱས་ཀྱི་གོ་འཕང་འཐོབ་པར་འདོད་པའི་སྨོན་སེམས་སྨོན་པ་ཙམ་དང་།

༢༽ སངས་རྒྱས་ཀྱི་གོ་འཕང་མ་ཐོབ་བར་དུ་ནམ་ཡང་བློས་མི་བཏང་བའི་སྨོན་སེམས་དམ་བཅའ་ཅན་བཅས་གཉིས་ཡོད།

དམ་བཅའ་ཅན་གྱི་བྱང་ཆུབ་ཀྱི་སེམས་ལ་བརྟེན་ནས་སོ་སོའི་དམ་བཅའ་ནམ་ཡང་མི་འདོར་བར་ཕན་ཆེད་བསླབ་བྱ་ལྔ་ལ་བསླབ་པར་ཁས་ལེན་བྱེད་པ་དེ་ཡིན། སྨོན་སེམས་སྨོན་པ་ཙམ་སྐྱེད་པ་ལ་འདི་ལྟ་བུའི་ཁས་ལེན་དམ་བཅའ་མེད། སྨོན་སེམས་ཀྱི་བསླབ་བྱ་དང་པོ་བཞིས་ཚེ་འདིའི་ནང་བྱང་ཆུབ་སེམས་ཀྱི་དམ་བཅའ་མི་ཉམས་པར་ཕན་པ་དང་། བསླབ་བྱ་ལྔ་པས་ཚེ་ཕྱི་མའི་ནང་བྱང་ཆུབ་སེམས་ཀྱི་དམ་བཅའ་དེ་མི་ཤོར་བར་ཕན་པ་ཡིན།

ཚེ་འདིའི་ནང་བྱང་ཆུབ་ཀྱི་སེམས་བསྐྱེད་མི་ཉམས་པའི་ཆེད་བསླབ་བྱ་བཞི་ཡོད་པ་ནི།

༡༽ སེམས་བསྐྱེད་ཀྱི་ཕན་ཡོན་དྲན་པ། དེ་ཡང་ཉིན་དང་མཚན་དུ་བྱང་ཆུབ་སེམས་ཀྱི་ཀུན་སློང་གི་ཕན་ཡོན་དྲན་པ། དེ་ཡང་ཇི་ལྟར་རང་ཉིད་ཀྱི་ཕྲུ་གུར་ལྟ་རྟོག་བྱེད་དགོས་ཐུག་པའི་སྐབས། ངལ་བ་ཁྱད་དུ་བསད་དེ་ནུས་ཤུགས་གཅིག་ཏུ་སྤུངས་པ་ཇི་བཞིན་བྱང་ཆུབ་སེམས་དེ་ང་ཚོའི་མི་ཚེའི་ནང་གི་ཀུན་སློང་གལ་གནད་ཆེ་ཤོས་ཡིན་པའི་སྐབས། ང་ཚོས་ལས་སླ་པོའི་སྒོ་ནས་དཀའ་ངལ་གྱི་རིགས་ཡོངས་སུ་རྫོགས་པ་ལས་རྣམ་པར་རྒྱལ་ནས་རང་ནུས་གང་ཡོད་བེད་སྤྱོད་གཏོང་ཐུབ།

༢༽ ཉིན་རེར་ལན་དྲུག་རེ་བསྐྱེད་པ། དེ་ཡང་རང་སེམས་སངས་རྒྱས་ཀྱི་གོ་འཕང་དང་གཞན་སེམས་ཅན་གྱི་དོན་དུ་ཉིན་ལན་གསུམ་དང་མཚན་ལན་གསུམ་དུ་བསྔོས་ནས་ཀུན་སློང་འདི་བསྐྱར་དུ་ངེས་བརྟན་དང་ནུས་ཤུགས་ལྡན་པ་བཟོ་བ།

༣༽ ཚོགས་གཉིས་གསོག་པ། བསོད་ནམས་དང་ཡེ་ཤེས་ཀྱི་ཚོགས་རླབས་པོ་ཆེ་གསོག་པར་འབད་པ། ཡང་ན་གཞན་དོན་དུ་རང་ནུས་གང་འཇོན་གྱིས་ཕན་འདོགས་པ་དང་། དེ་ཡང་དངོས་པོའི་གནས་ལུགས་ལ་གོ་རྟོགས་གཏིང་གང་ཟབ་ཡོད་པའི་སྒོ་ནས་ཕན་འདོགས་པ། ༼ཚོགས་གཉིས་ཞེས་པར་གཟིགས།༽

༤༽ སེམས་ཅན་བློས་མི་སྤོང་བ། དེ་ཡང་གཞན་སུ་འདྲ་ཞིག་ཡིན་རུང་ཕན་འདོགས་ཐབས་བྱ་རྒྱུ་དེ་ནམ་ཡང་བློས་གཏོང་བྱ་མི་ཉན། ཁོའམ་མོ་ལ་དཀའ་ལས་ཇི་ཙམ་ཡོད་སྲིད་ཀྱང་། མ་མཐར་ཡང་གཞན་ལ་ཕན་བཏགས་ཐུབ་ན་བསམ་པའི་ཡིད་སྨོན་དེ་དགོས།

ཚེ་ཕྱི་མའི་ནང་བྱང་ཆུབ་ཀྱི་སེམས་མི་འདོར་བའི་བསླབ་པ།

བསླབ་བྱ་ལྔ་པ་དེ་ནི། ནག་པོའི་ཆོས་བཞི་སྤོང་ཞིང་དཀར་པོའི་ཆོས་བཞི་ལ་སློབ་པ། དེ་ཡང་རང་རྒྱུད་ལ་ཡོད་པའི་ནག་པོའི་ཆོས་བཞི་སྤོང་རྒྱུ་དང་། དེའི་ཚབ་ཏུ་དཀར་པོའི་ཆོས་བཞི་དང་དུ་ལེན་རྒྱུ་དེ་རེད། གཤམ་གྱི་སྡེ་ཚན་བཞི་པོ་རེ་རེའི་ནང་སྤྱོད་ལམ་གྱི་རིགས་དང་པོ་ནི། ང་ཚོས་འགོག་ཐབས་བྱེད་པའི་མི་དགེ་བའམ་ནག་པོའི་ཆོས་བཞི་དང་། གཉིས་པ་ནི་དགེ་བའམ་དཀར་པོའི་ཆོས་ཏེ། དེ་དག་ནི་ང་ཚོས་དང་དུ་ལེན་ཐབས་བྱེད་དགོས།

༡༽ རང་གི་དགེ་བའི་བཤེས་གཉེན་དང་། ཕ་མའམ། ཡང་ན་དཀོན་མཆོག་གསུམ་ལ་ནམ་ཡང་མགོ་སྐོར་སླུ་བྲིད་མི་བྱེད་པར། དེའི་ཚབ་ཏུ་དུས་དང་རྣམ་པ་ཀུན་ཏུ་ཁོང་རྣམས་ལ་དྲང་པོ་བྱེད་དགོས་ཤིང་། དམིགས་བསལ་སོ་སོའི་ཀུན་སློང་དང་གཞན་ལ་ཕན་འདོགས་པའི་སྐབས་དྲང་པོ་བྱེད་དགོས།

༢༽ བྱང་ཆུབ་སེམས་དཔའ་རྣམས་ལ་ནམ་ཡང་སྐྱོན་འདོན་པའམ་ཁྱད་གསོད་མི་བྱེད་པར། དེའི་ཚབ་ཏུ་གང་ཟག་སུ་འདྲ་ཞིག་དོན་ངོ་མར་བྱང་ཆུབ་སེམས་དཔའ་ཡིན་མིན་ནི་སངས་རྒྱས་ཁོ་ནས་མཁྱེན་པས། ཀུན་སློང་རྣམ་པར་དག་པའི་སྒོ་ནས་ཚང་མ་སོ་སོའི་དགེ་བའི་བཤེས་གཉེན་དུ་ཆ་འཇོག་བྱེད་དགོས། གལ་ཏེ་མི་རྣམས་ཀྱིས་སྤྱོད་པ་མ་དུལ་བ་དང་མི་འདོད་པའི་བྱ་སྤྱོད་སྤེལ་ནའང་། ཁོང་རྣམས་ཀྱིས་སྤྱོད་ལམ་དེ་ལྟར་བྱ་མི་རུང་ཞེས་ང་ཚོར་སློབ་སྟོན་བྱེད་ཀྱི་ཡོད།

༣༽ གཞན་གྱིས་དགེ་བའི་ལས་ཅི་འདྲ་ཞིག་བྱས་ཡོད་ཀྱང་། དེ་དག་ལ་འགྱོད་པ་ནམ་ཡང་མི་སྐྱེ་བ་བྱེད་པ། དེ་ཡང་། གལ་ཏེ་མི་ཞིག་གིས་ང་ཚོའི་ཆེད་དུ་ཡི་གེ་ཞིག་གློག་ཀླད་ནང་མཛུབ་གནོན་བྱེད་སྐབས་ནོར་འཁྲུལ་མང་པོ་བཟོ་བའི་སྐབས། ང་ཚོས་ཁོང་ཁྲོ་དྲག་པོའི་སྒོ་ནས་གཤེ་བ་དང་སྐད་ལོག་རྒྱག་པ་ཡིན་ན། ཕྱིས་སུ་མི་དེས་ནམ་ཡང་རོགས་མི་བྱེད་པ་སྲིད་པས། དེའི་ཚབ་ཏུ་གཞན་ལ་བཟང་ཕྱོགས་ཀྱི་བྱ་བ་རྩོམ་དགོས་པའི་སེམས་སྐུལ་དང་། གལ་ཏེ་གོ་ཤེས་ཅན་ཡིན་ན། སོ་སོའི་སྐྱོན་རྣམས་མེད་པ་བཟོ་རྒྱུའི་འབད་བརྩོན་དང་གཞན་ཐམས་ཅད་ལ་ཕན་པ་གང་ཆེ་འདོགས་ཐུབ་པའི་ནུས་པ་དེ་རང་རྒྱུད་ལ་ཡོད་པ་རྟོགས་པའི་སེམས་ཤུགས་སྤར་དགོས།

༤༽ གཞན་དང་མཉམ་དུ་འབྲེལ་འདྲིས་བྱེད་སྐབས་ཚུལ་འཆོས་སམ་མ་ཡིན་ཡིན་ཁུལ་གྱི་རློམ་སེམས་ཅན་ནམ་ཡང་བྱ་རྒྱུ་མེད། ཕྱོགས་གཞན་ཞིག་ནས་བཤད་ན། སོ་སོའི་སྐྱོན་གྱི་ཆ་རྣམས་སྦས་ཏེ། རང་ཉིད་ལ་ཡོན་ཏན་གྱི་ཆ་མེད་ནའང་ཡོད་ཁུལ་བྱེད་པ་དེ་སྤོང་དགོས། དེའི་ཚབ་ཏུ་གཞན་ལ་ཕན་འདོགས་པའི་འགན་འཁྲི་འཁུར་བ་དང་། དུས་རྟག་ཏུ་དྲང་པོ་དྲང་གཞག་དང་། སོ་སོའི་སྐྱོན་དང་ནུས་པའི་ཆ་རྣམས་ཕྱི་གསལ་ནང་གསལ་བྱེད་དགོས། ང་ཚོས་ཇི་ཙམ་བྱེད་ཐུབ་པ་ལས་འདས་པའི་དམ་བཅའ་བྱེད་པ་དང་གཞན་ལ་རེ་བ་ལོག་པ་སྟེར་བ་ནི་ཧ་ཅང་ཡ་ང་སྙིང་རྗེ་མེད་པ་ཡིན་པས་སྤོང་དགོས།།

Top