الیگزینڈر برزن (جنم ۱۹۴۴) نیو جرسی، امریکہ وچ پلے ودھے۔ اوہناں نے بدھ مت دی پڑھائی ۱۹۶۲ وچ پہلے رٹگرز اتے فیر پرنسٹن وش ودیالا وچ شروع کیتی، اتے ۱۹۷۲ وچ ہارورڈ یونیورسٹی توں سنسکرت اتے ہندوستانی ودیا بھیاس اتے مشرق بعید دی زباناں (چینی) دے شعبیاں توں مشترکہ طور تے پی ایچ ڈی دی سند پراپت کیتی۔ جس طور طریقہ نال بدھ مت اک ایشیائی سنسکرتی توں دوجی تک پوہنچیا اتے کس طراں ایس دا ترجمہ ہویا اتے کویں ایس نوں اپنایا گیا، ایس توں متاثر ہو کے ہمیش توں اوہناں دی توجہ روائتی بدھ مت نوں اجوکی پچھمی سنسکرتیاں نال ملان اوپر قائم رہی اے۔
ڈاکٹر برزن ۲۹ ورے تک ہندوستان وچ رہے، پہلاں بطور فلبرائیٹ سکالر دے اتے فیر ترجمہ دے مرکز نال جڑے رہے، جس نوں قائم کرن وچ اوہناں نے مدد کیتی جو کہ دھرم شالا وچ تبتی کتاباں اتے ذخیرہ دے پستک گھر وچ واقع سی۔ ہندوستان وچ قیام دے دوران اوہناں نے بدھ مت دے چاراں تبتی پنتھ دے گورواں کولوں شکشا پراپت کیتی؛ فیر وی، اوہناں دے خاص ادھیاپک تقدس مآب دلائی لاما، تسنژاب سرکونگ رنپوچے اتے گیشے نگوانگ درگھئے رہے نیں۔ اوہناں دے زیر سایہ پاٹ کردے ہوۓ اوہناں نے گیلوگ پنتھ دے پربھاوت سمادھ دے چلے کٹے نیں۔
اوہ نو ورے تک تسنژاب سرکونگ رنپوچے دے خاص التھاؤ رہے نیں، اوہ اوہناں دے سنگ بدیسی دوریاں اوپر جاندے اتے آپوں اک بودھی استاد بنن دی سرکھیا پراپت کردے رہے۔ کدی کدار اوہناں نے تقدس مآب دلائی لاما لئی وی التھاؤ دی خدمت سر انجام دتی اتے اوہناں لئی کئی جگتائی پراجیکٹ قائم کیتے نیں۔ ایہناں وچ چرنوبل دےجوہری شعاواں دی درگھٹنا توں پھٹڑ ہون والے تبتی لوکاں نوں طبی امداد؛ منگولیا وچ بدھ مت دے پنرجیون دی خاطر لوک منگولی بھاشا وچ بنیادی بودھی کتاباں دی تشکیل؛ اتے اسلامی دنیا وچ وش ودیالا پدھر اوپر بدھ مت اتے اسلام وچکار سمبھاشن شامل نیں۔
۱۹۸۰ توں ڈاکٹر برزن نے سفر شروع کیتا اتے ۷۰ توں ودھ دیساں وچ یونیورسٹیاں اتے بدھ مرکزاں وچ بدھ مت اوپر بھاشن دتے نیں۔ اشتراکی دنیا، لاطینی امریکہ اتے افریقہ دے وڈے حصہ وچ بدھ مت دی شکشا دین والیاں وچوں اوہناں دا شمار پہلی فہرست وچ ہوندا اے۔ اپنے دوریاں دے وچ اوہناں نے بدھ مت بارے پلیکھیاں نوں ختم کرن اتے بدھ مت دی شکشا توں روز روز دی زندگی وچ فیدہ چکن اوپر زور دتا اے۔
بطور اک بوہت ساری کتاباں دے لکھاری اتے ترجمان دے ڈاکٹر برزن نے ۱۷ کتاباں چھاپیاں نیں جنہاں وچ 'روحانی استاد نال تعلق' ، 'کلچکر بیعت'، سنتولن حسیت پیدا کرنا' اتے تقدس مآب دلائی لاما دے نال رل کے 'مہا مدرا دا گیلوگ-کیگیو پنتھ' شامل نیں۔
۱۹۹۸ دے اخیر وچ ڈاکٹر برزن ایہناں کتاباں، وشے اتے ترجمے جو اوہناں نے کیتے، مہان گورواں دی شکشا دے کاغذ پتر جو اوہناں نے ترجمہ کیتے، اتے جو شکشا اوہناں نے اوہناں مہان گورواں کولوں پراپت کیتی اوس دے نوٹس، ایہ سب جو حالی تک چھپیا نہیں سی اتے تیہ ہزار صفحیاں اوپر مشتمل سی لے کے پچھم نوں واپس آۓ۔ لوکاں لئی ایس مواد دے فیدہ مند ہون اوپر یقین رکھدے ہوۓ اتے ایس نوں ضائع ہون توں بچان دا پکا ارادہ لے کے اوہناں نے ایس نوں "ذخیرہ برزن" دا نام دتا اتے برلن، جرمنی وچ رہنا شروع کر دتا۔ اوتھے، تقدس مآب دلائی لاما دی صلاح اوپر اوہناں نے ایس مواد نوں زیادہ توں زیادہ زباناں وچ انٹرنیٹ اوپر مفت مہیّا کرن دا کم شروع کیتا۔
تے انج، دسمبر ۲۰۰۱ وچ ذخیرہ برزن ویب سائٹ آن لائن موہرے آئی۔ ایس دا پسار ہویا اتے ہن ایس وچ ڈاکٹر برزن دے جاری و ساری بھاشن وی رلت نیں اتے ایہ سب کجھ ۲۱ زباناں وچ (۲۰۱۵ وچ) میسر اے۔ ایہناں وچوں بوہت ساری زباناں لئی، اچیچ ۶ اسلامی عالمی زباناں لئی، ایہ ایس میدان وچ پہلا کم اے۔ ایس ویب سائٹ دا اج دا روپ ( ۳۲ زباناں وچ ۲۰۲۱ وچ) ڈاکٹر برزن دی روائتی بدھ مت اتے ماڈرن دنیا دے وچکار پل بنھن دے تا حیات منورتھ دا اگلا قدم اے۔ ایس شکشا نوں پل دے پار پوہنچان اتے روز مرہ زندگی وچ ایس دے پربھاؤ نوں وکھان وچ، اوہناں دی حکمت ایہ رہی اے کہ ایس طراں دنیا وچ جذباتی سنتولن پیدا کرن وچ مدد ملے گی۔