- ທຸກຄົນຢາກດຳເນີນຊີວິດທີ່ເປັນສຸກກວ່າ, ແຕ່ໜ້ອຍຄົນທີ່ຮູ້ວ່າມັນໝາຍເຖິງຫຍັງ ຫຼື ຮູ້ວິທີເຮັດໃຫ້ໄດ້ແນວນັ້ນ.
- ອາລົມ ແລະ ທັດສະນະຄະຕິຂອງເຮົາມີຜົນຕໍ່ຄວາມຮູ້ສຶກຂອງເຮົາ. ດ້ວຍການຝຶກ, ເຮົາສາມາດຕັດອາລົມດ້ານລົບອອກຈາກຕົນເອງ ແລະ ສ້າງອາລົມທີ່ດີກວ່າ ແລະ ເປັນບວກກວ່າ. ການເຮັດແນວນັ້ນຈະເຮັດໃຫ້ຊີວິດເຮົາເປັນສຸກ ແລະ ຖືກເຕີມເຕັມກວ່າ.
- ອາລົມລົບກວນ ເປັນຕົ້ນແມ່ນຄວາມໂມໂຫ, ຄວາມຢ້ານກົວ, ຄວາມໂລບ ແລະ ຄວາມຍຶດຕິດ ເຮັດໃຫ້ເຮົາເສຍຄວາມສະຫງົບໃນຈິດໃຈ ແລະ ການຄວບຄຸມຕົນເອງ. ດ້ວຍການຝຶກ, ເຮົາຈະສາມາດປົດປ່ອຍຕົນເອງຈາກການຢູ່ພາຍໃຕ້ການຄວບຄຸມຂອງສິ່ງເຫຼົ່ານີ້.
- ການກະທຳຕາມໃຈຍ້ອນຄວາມໂມໂຫ ຫຼື ຄວາມໂລບຈະສ້າງບັນຫາໃຫ້ເຮົາ ແລະ ນຳໄປສູ່ຄວາມບໍ່ເປັນສຸກ. ດ້ວຍການຝຶກ, ເຮົາຈະສາມາດຮຽນສະຫງົບຈິດໃຈ, ຄິດຢ່າງຈະແຈ້ງ ແລະ ປະພຶດຢ່າງຊານສະຫຼາດ.
- ອາລົມດ້ານບວກ ເປັນຕົ້ນແມ່ນຄວາມຮັກ, ຄວາມເຫັນໃຈ, ຄວາມອົດທົນ ແລະ ຄວາມເຂົ້າໃຈຈະຊ່ວຍໃຫ້ເຮົາຄົງຄວາມສະຫງົບ, ເປີດກວ້າງ ແລະ ຈະແຈ້ງ, ແລະ ນຳເອົາຄວາມສຸກມາໃຫ້ເຮົາຕື່ມອີກ. ດ້ວຍການຝຶກ, ເຮົາຈະສາມາດຮຽນສ້າງອາລົມເຫຼົ່ານີ້.
- ການເອົາຕົນເອງເປັນສູນກາງ, ພຶດຕິກຳ ແລະ ຄວາມຄິດເຫັນແກ່ຕົວຈະປິດກັ້ນເຮົາຈາກຄົນອື່ນ ແລະ ເຮັດໃຫ້ເຮົາບໍ່ເປັນສຸກ. ດ້ວຍການຝຶກ, ເຮົາຈະສາມາດເອົາຊະນະສິ່ງເຫຼົ່ານີ້ໄດ້.
- ການເຂົ້າໃຈວ່າເຮົາທັງໝົດຕ່າງເຊື່ອມເຖິງກັນ ແລະ ການຢູ່ລອດຂອງເຮົາກໍຂຶ້ນກັບຄົນອື່ນຈະເປີດຈິດ ແລະ ໃຈຂອງເຮົາ, ຊ່ວຍໃຫ້ເຮົາສ້າງຄວາມຫ່ວງໄຍຕໍ່ຄົນອື່ນ, ແລະ ນຳເອົາຄວາມສຸກມາໃຫ້ເຮົາຕື່ມອີກ.
- ສິ່ງທີ່ເຮົາຮັບຮູ້ເຂົ້າໃຈເກືອບທັງໝົດໃນຕົວເຮົາເອງ ແລະ ໃນຄົນອື່ນແມ່ນພາບຈິນຕະນາການ, ບົນພື້ນຖານຂອງຄວາມສັບສົນ. ເມື່ອເຮົາເຊື່ອວ່າພາບເຫຼົ່ານັ້ນສອດຄ່ອງກັບຄວາມເປັນຈິງ, ເຮົາກໍຈະສ້າງບັນຫາສຳລັບຕົນເອງ ແລະ ຜູ້ອື່ນ.
- ດ້ວຍຄວາມເຂົ້າໃຈທີ່ຖືກຕ້ອງ, ເຮົາຈະສາມາດຕັດຄວາມສັບສົນອອກຈາກຕົນເອງ ແລະ ເຫັນຄວາມເປັນຈິງໄດ້. ສິ່ງນີ້ຈະຊ່ວຍເຮົາຈັດການກັບສິ່ງຕ່າງໆ ທີ່ເກີດຂຶ້ນໃນຊີວິດດ້ວຍຄວາມສະຫງົບ ແລະ ສະຫຼາດ.
- ການປັບປຸງຕົນເອງ ເພື່ອກາຍເປັນຄົນທີ່ດີຂຶ້ນເປັນຄວາມທ້າທາຍຕະຫຼອດຊີວິດ, ແຕ່ເປັນສິ່ງທີ່ມີຄວາມໝາຍທີ່ສຸດທີ່ເຮົາຈະສາມາດເຮັດໄດ້ໃນຊີວິດຂອງເຮົາ.