میری کہانی

بدھ مت دا عالمانہ ودیا بھیاس اتے روز مرہ زندگی وچ بودھی شکشا نوں لاگو کرنا دو انتر شیواں نیں۔ ایہ گل اکثر کہی گئی اے کہ بدھ مت دے کیول بدھی مان ودیا بھیاس توں تہاڈی زندگی نوں کوئی فیدہ نہیں ہووے گا۔ ڈاکٹر الیگزینڈر برزن جو کہ اک وگیانک وی نیں اتے عامل وی، اتے دونواں پرتاں یعنی علمی اتے روحانی توں واقف نیں، ایس سلسلہ وچ اپنے تجربے بیان کردے نیں۔

سپتنک پیڑھی

میں ۱۹۴۴ وچ امریکہ دے اک معمولی گھرانے وچ پیدا ہویا۔ میرے گھر والے مالدار نئیں سان، اوہ کیول محنت کرن والے لوک سان، اتے اوہناں دی شکشا وی کجھ خاص نئیں سی۔ پر مینوں نکے ہوندے توں ہی ایشیائی شیواں وچ دلچسپی سی۔ میرے گھر والے ایس معاملہ وچ نہ تے میری حوصلہ افزائی کردے اتے نہ ہی حوصلہ شکنی۔ اتے اُنج وی اوس زمانے وچ ایشیا بارے زیادہ جانکاری میسر نئیں سی۔ جد میں ۱۳ ورے دا ساں تے میں اک بیلی دے نال رل کے یوگا کرنا شروع کیتا، اتے بدھ مت، ہندی سوچ اتے چینی وچار، وغیرہ بارے جو کجھ ملیا سب پڑھ چھڈیا۔ 

میں اوس ویلے دا جم ساں جس نوں امریکی "سپتنک پیڑھی" کہندے نیں۔ جدوں سپتنک خلا وچ گھلیا گیا، تے امریکی ڈاڈھے رُسے کیونکہ اساں محسوس کیتا کہ اسی روس توں بوہت پچھے رہ گئے ساں۔ سکول وچ سب بالڑاں نوں، میرے سمیت، سائنس دی شکشا لین دی حوصلہ افزائی کیتی گئی تا کہ اسی روس دی برابری کر سکئیے۔ لہٰذا، ۱۶ ورے دی عمر وچ میں کیمیا پڑھن لئی وش ودیالا رٹگرز وچ داخلہ لیا۔ وش ودیالا رٹگرز نیو جرسی وچ واقع اے، جتھے میں جوان ہویا، اتے بھاویں گیشے وانگیال جو کہ اک منگول بدھ گورو سی، صرف ۵۰ کلومیٹر دور رہندا سی، مینوں اوس دے وجود دی کوئی خبر نئیں سی۔ 

اپنی شکشا لین دے دوران میں ایشیائی ودیا اوپر اک کورس لیا جس وچ ایہ دسیا گیا سی کہ بدھ مت کس طراں اک سنسکرتی توں دوجی تک پوہنچیا، اتے کس طراں ہر سنسکرتی نے ایس نوں وکھ ول نال سمجھیا۔ بھاویں میں کیول ۱۷ ورے دا ساں، پر ایس دا میرے اوپر اینا ڈونگا اثر ہویا کہ میں سوچیا، "ایہی اوہ گل اے جس نوں میں سمجھنا چاہنا واں، بدھ مت دا اک سنسکرتی توں دوجی وچ بدلاؤ۔ " اتے میں ساری حیاتی ایسے ہی منورتھ اوپر، بغیر کدرے تھڑکن دے، عمل کیتا اے۔

Top