ہر کوئی مہاتما بدھ بن سکدا اے

مہاتما بدھ نے بڑا زور دے کے ایہ آکھیا کہ اسی سب مہاتما بدھ بن سکنے آں، پرایس دا اصل مطلب کیہ اے؟ مہاتما بدھ اک اجیہا انسان اے جس نے اپنی ساری کمزوریاں اوپر قابو پا لیا اے، ساریاں برائیاں دی اصلاح کر لئی اے، اتے سارے گناں دا پریوگ کر لیا اے۔ ہر کسے مہاتما بدھ نے اپنا سفر ساڈے ورگے عام انساناں وانگوں شروع کیتا جنہاں نوں سچائی بارے پلیکھا اتے جھوٹے وچاراں دی بنا اوپر زندگی وچ کئی وار مصیبتاں نال واہ پیندا اے۔ اوہناں نے محسوس کیتا کہ اوہناں دے ہتھیل وچاراں دا حقیقت نال کوئی واسطہ نئیں، اتے دکھ توں مکتی پان دے پکے ارادے نوں لے کے اوہناں نے اخیر آپوں ہی اپنے من دے جھوٹے وچاراں نوں رد کر دتا۔ اوہناں دی پریشان کرن والے جذبے اتے وسوں باہر دَشا توں جان چھُٹ گئی، اتے انج اوہناں نوں سارے دکھاں توں مکتی مل گئی۔

ایس سارے چِر وچ اوہناں نے اپنے مثبت جذبے مثلاً پیار اتے درد مندی نوں پکا کیتا، اتے ہوراں دی اپنے پریوگ مطابق مدد کیتی۔ اوہناں نے سب لئی ماں دی ممتا جس دا اکو ہی بالڑ ہووے، ورگا پیار پنگریا۔ سب لئی ڈاڈھا پیار اتے درد مندی اتے اوہناں دی مدد کرن دے پکے ارادے توں شکتی پا کے، اوہناں دی سچیائی بارے سُرت پکی توں پکی ہوندی چلی گئی۔  ایہ اینا شکتی مان ہو گیا کہ اخیر اوہناں دے من اجیہے پلیکھے وچ پان والے وچاراں توں خالی ہو گئے جو ہر شے دے آزاد وجود، یعنی تمام دوجیاں شیواں نال لاتعلقی، دی صلاح دیندے نیں۔ بغیر کسے اڑچ دے اوہناں نے صاف صاف ویکھیا کہ سب شیواں وچکار آپس دا جوڑ اتے سانگھے پاۓ جاندے نیں۔

ایہ معرکہ مارن توں اوہناں نوں گیان ملیا: اتے اوہ مہاتما بدھ بن گئے۔ اوہناں دے شریر، اوہناں دا جوڑ ملان دا پریوگ اتے اوہناں دے من سارے عیباں توں پاک ہو گئے۔ ایس احساس دے نال کہ اوہناں دی شکشا دا لوکاں اوپر کیہ اثر ہووے گا، ہن اوہ ایس جوگے ہو گئے کہ سب ہستیاں دی جتھوں تیکر ہو سکے، حقیقت دی حداں اندر رہ کے،  مدد کر سکن۔ پر کوئی مہاتما بدھ وی سروشکتی مان نہیں ہوندا۔ کوئی مہاتما بدھ وی اوہناں دی ہی مدد کر سکدا اے جیہڑے اوس دی نصیحت نوں ٹھیک طراں سنن اتے منن لئی تیار ہون۔

اتے مہاتما بدھ نے ایہ آکھیا کہ جو اوس نے کیتا اوہ ہر کوئی کر سکدا اے؛ ہر کوئی مہاتما بدھ بن سکدا اے۔ ایس دی وجہ ایہ ہے کہ اسی سب "بدھ- جات" دے مالک آں – ایس مڈھلے ترکھے پرتندھ دے جو بدھیت دا پریوگ بخشدا اے۔

علم الاعصاب رگاں دے لیف دی گل کردا اے – یعنی دماغ دی ساری عمر تیکر تبدیلی اتے نویں رگاں دے تانے بانے پنگرن دی یوگیا۔ مثال دے طور تے، جے دماغ دا اوہ حصہ جو سجے ہتھ نوں کنٹرول کردا اے ادھرنگ ہو جاوے، تے طبیعی علاج نال دماغ نویں اعصابی تانے بانے بنا لیندا اے جو سانوں کھبا ہتھ ورتنا سکھلا دیندے نیں۔ اجوکی پرکھ پرچول توں پتہ لگا اے کہ سمادھ، مثلاً درد مندی اوپر سمادھ، وی نویں اعصابی تانے بانے پنگر سکدا اے۔ جس توں خوشی اتے من دی شانتی وچ وادھا ہوندا اے۔ تے جویں اسی دماغ دے اعصابی لیف دی گل کرنے آں تے انج ہی اسی من دے لفن دی گل کر سکنے آں۔ ایہ سچیائی کہ ساڈے من اتے ساڈی شخصیت دی خاص عادتاں اک ٹُھک اوپر قائم نہیں رہ سکدیاں، اتے ایہ کہ اوہناں نوں اکساوٹ دے کے نویں مثبت تانے بانے پنگرے جا سکدے نیں، ایہ ساڈے سب دے روشن ضمیر مہاتما بدھ بننے دی یوگیا دا مڈھلا پرتندھ ہے۔

نفسیاتی پدھر اوپر، جد وی اسی کوئی مثبت قدم چکنے آں یا کوئی مثبت گل کہنے یا سوچنے آں، تے اوس توں اسی اک اجیہا مثبت اعصابی رستہ پکا کرنے آں جو اجیہے کرم دے گھڑی مڑی ہون دے امکان وچ وادھا کردا اے اتے اوس دے ہوون نوں ہور سَوکھا بنا دیندا اے۔ من دی پدھر اوپر، بدھ مت دا ایہ کہنا اے کہ ایس توں مثبت شکتی اتے امکان پیدا ہوندا اے۔ اجیہی مثبت شکتی دے تانے بانے نوں اسی جنی وی ہور شکتی بخشئیے، خاص طور تے جدوں اسی غیراں دی مدد کر رہے ہوئیے، تے ایہ اونا ہی پکا پیٹھا ہوندا جاندا اے۔ مثبت شکتی، جو اک مہاتما بدھ سمان سب ہستیاں دی بھلائی کرن وچ رُجھی ہووے، ایہ ہی اوہ پرتندھ ہے جو سانوں جگتائی پدھر اوپر بھلائی دے انومان نوں پانے وچ سہائت ہوندا اے۔

انج ہی، اسی ایس گل اوپر جنا گوہ کرئیے کہ سچیائی بارے ساڈے وہماں نال سہمت کوئی شے موجود نئیں، اسی اونا ہی اپنے اعصابی تانے بانے نوں کمزور کرنے آں، پہلی گل ایہ ہے کہ من دے پلیکھیاں اوپر یقین کر کے اتے فیر ایس یقین دا وکھالا  کر کے۔ اخیر، ساڈے من ایہناں دھوکے باز اعصابی اتے دماغی تانے بانیاں توں جان چھڈا لیندے نیں، اتے ایہناں پریشان کرن والے جذبیاں دے تانے بانے اتے وسوں باہر سبھاو جو ایہناں دا مڈھ  ہوندا اے، توں وی مکتی پراپت کر لیندے نیں۔ ایس دی تھاں اسی حقیقت دی ڈوہنگی سُرت دے شکتی مان تانے بانے پنگرنے آں۔ جد اسی ایہناں تانیاں بانیاں نوں اک مہاتما بدھ دے سروش من نوں پراپت کرن دے ہدف نال شکتی پہنچانے آں، اک اجیہا من جو ساری سرت مان ہستیاں دی مدد کرن دے ودیہ طریقیاں دی جانکاری رکھدا اے، تے ایہ ڈوہنگی سرت دا تانا بانا سانوں ایہ یوگیا دیندا اے کہ اسی اک مہاتما بدھ دا من پا لئیے۔

کیوں جے اسی سب اک شریر رکھنے آں، یعنی ہوراں نال ناطہ رکھن دی یوگیا–اُچیچ گل بات – اتے اک من وی، تے ساڈے  ساریاں کول اک مہاتما بدھ دا شریر، بول اتے من پراپت کرن دا ترکھا مواد موجود اے۔ ایہ تنوں وی انج ہی بدھ- جات دے پرتندھ نیں۔ ساڈے سبناں اندر کجھ نہ کجھ ودیہ گن پاۓ جاندے نیں – ساڈی اپنی جات دی انویوتا راجیوی، اپنی نسل دی انویوتا راجیوی، ساڈی مادری اتے پدری جات، وغیرہ – اتے کجھ کرن اتے ہوراں پر اثر پان دی یوگیا۔ ایہ وی بدھ- جات دے پرتندھ نیں؛ ایہ ساڈا اوہ ترکھا مواد اے جس توں اسی ودیہ گن جویں ات حدل پیار اتے احساس، اتے اک مہاتما بدھ دے گیان والے کماں دی پنگرتا کر سکنے آں۔

جدوں اسی ایس گل اوپر گوہ کرنے آں کہ ساڈا من کویں کم کردا اے، تے فیر سانوں بدھ- جات دے ہور وی پرتندھ دِسدے نیں۔ اسی سارے جانکاری لین، اکو جیہی یوگیا رکھن والی شیواں دی گروہ بندی کرن، شیواں دی پچھان، جو تکنے آں اوس اوپر پرتیا گھت، اتے شیواں نوں پچھانن دی یوگیا رکھنے آں۔ ایہ طریقے جنہاں نال ساڈا من کم کردا اے ایس ویلے محدود نیں، پر ایہ وی اک مہاتما بدھ دا من پان وچ ترکھے مواد دا کم دیندے نیں، جتھے اوہ اپنی پوری پوری یوگیا نال کم وچ رُجھے ہوندے نیں۔