དངོས་ཡོད་རིང་ལུགས། ནང་པའི་ལམ་དང་དེའི་དམིགས་ཡུལ་གྱི་གཞི་རྟེན།

སྟོན་པ་ཤཀྱཱ་ཐུབ་པ་སངས་རྒྱས་པའི་རྗེས་སུ་ཐོག་མར་གསུངས་པའི་ཆོས་ནི་བདེན་པ་བཞི་ཡིན། དེ་རྗེས་ཁོང་གི་སྐུ་ཚེ་ལྷག་མའི་རིང་བདེན་པ་བཞི་པོ་ཆོས་ཕྱོགས་ཀྱི་བསམ་བློ་ཡར་རྒྱས་གཏོང་བ་ལ་ལག་བསྟར་བྱེད་ཚུལ་དང་། དེ་ལྟར་ལག་ལེན་བསྟར་བ་ལ་ནང་པའི་དངོས་པོའི་གནས་ལུགས་ལ་ལྟ་ཚུལ་ ༼བདེན་པ་གཉིས་༽ ལ་རྒྱུས་མངའ་དང་དཔྱད་ཞིབ་དགོས་ཤིང་། དམིགས་ཡུལ་མཐའ་མ་དེ་གང་ཡིན་པ་དང་དེར་སླེབས་པའི་ཐབས་ལམ་ ༼དཀོན་མཆོག་གསུམ།༽ ལ་གོ་རྟོགས་གསལ་པོ་ཞིག་དགོས་པ་བཅས་བསྟན་ཡོད། ༸གོང་ས་མཆོག་གིས་ཚིགས་བཅད་ཉུང་ངུ་གཅིག་གི་ནང་གལ་གནད་ཆེ་བའི་ཁྱད་ཆོས་འདི་དག་གི་དབར་གཏིང་ཟབ་པའི་འབྲེལ་བའི་རྣམ་གཞག་བསྟན་གནང་ཡོད། ཚིགས་བཅད་དེར་དཔྱད་ཞིབ་བྱས་ན། ནང་པའི་ཆོས་ཀྱི་གལ་གནད་རྣམས་ཕྱོགས་གཅིག་ཏུ་བསྡུས་ནས་དེའི་ཐོག་ལ་བསམ་ཞིབ་བྱེད་སྟངས་དང་གལ་གནད་ཅན་གྱི་མཐའ་སྡོམ་རྒྱག་ཚུལ་སྟོན་གྱི་ཡོད།