مراقبہ کیہ چیز اے؟

مراقبہ من دی فائدہ مند دَشا پنگرن دا اک طریقہ اے۔ ایس لئی اسی من دی بعض حالتاں پیدا کرنے آں اودوں تیکر جد کے اوہ ساڈی عادت بن جاون۔ طبعی پدھر اوپر، مراقبہ توں نویں نیوراتی تانے بانے وجود وچ آون دا ثبوت ملدا اے۔

مراقبہ دے فائدے

مراقبہ راہیں اسی من دی کئی فائدہ مند حالتاں پنگر سکنے آں:

• زیادہ شانت اتے گھٹ پریشان ہونا۔
• زیادہ مرتکز اتے گھٹ منتشر ہوناشانت ہونا، مستقل پریشانیاں توں ازادی
• اپنے آپ دی اتے اپنی اتے دوسریاں دی زندگی بارے ودی سرت پراپت کرنا
• مثبت جذبے جویں پیار اتے درد مندی وچ وادھا۔ 

ساڈے وچوں چوکھے انسان اک شانت، صاف اتے خوشی بھریا من چاہندے نیں۔ جے اسی پریشان ہوئیے یا کسے مندے حال وچ ہوئیے، تے ایس توں اسی دکھی ہونے آں۔ ایس دا ساڈی صحت اوپر برا اثر ہوندا اے اتے ایہ ساڈے کم، ساڈی ریہتل بیہتل اتے یاری دوستی نوں برباد کر سکدا اے۔

جے اسی پریشانی اتے غصے والے سبھاؤ توں تنگ آ گئے آں تے سانوں اپنی دَشا بہتر بنان لئی کجھ طریقے لبھنے ہون گے – مثلاً مراقبہ۔ مراقبہ راہیں اسی اپنی جذباتی کمزوریاں اوپر قابو پا سکنے آں بغیر کسے فالتو بھیڑے نتیجیاں دے۔  

[ویکھو: مراقبہ کویں کیتا جاۓ]

سانوں مراقبہ دے معاملہ وچ حقیقت پسند ہونا چاہیدا اے۔ ایہ بھلے سبب پراپت کرن دا رچھ اے، پر ایہ کوئی امرت دھارا نئیں۔ کسے واپر دے پچھے اک ہی وجہ نئیں ہوندی، سغوں کئی سبب اتے حال ہوندے نیں۔ مثلاً جے ساڈا خون دا دباؤ زیادہ ہووے تے مراقبہ یقیناً فائدہ مند ہو سکدا اے، پر جے اسی ان پانی وچ بدلی، کثرت اتے دوا دارو کرئیے تے نتیجہ بوہت ہی فرق ہووے گا۔ 

بودھی مراقبہ دیاں قِسماں

مراقبہ کرن دے کئی طریقے نیں، اتے بھاویں ایہ سب سانوں شانت ہون وچ سہائت ہوندے نیں، پر ایہ ساڈا مدعا و منتہا نئیں اے۔ فیر وی،  بھلی دَشا پیدا کرن وچ حقیقی کامیابی توں پہلاں سانوں اپنی پریشانی نوں دور کرنا ضروری اے، تے ایس لئی اسی اپنے من نوں ساہ  اوپر ارتکاز راہیں شانت کرنے آں، ایس توں پہلاں کہ اسی بدھ مت دے مراقبہ دے دو طریقے: ادراک اتے استقامت  اوپر عمل کرئیے۔

ادراکی مراقبہ، جس نوں عام طور تے  "تجزیاتی" وی کہنے آں وچ اسی عقل راہیں اپنے آپ نوں، ہولی ہولی، من دی کسے بھلی دَشا مثلاً پیار ول لے جانے آں۔ یا اسی عقل نوں ورت کے کسے صورت حال دا تجزیہ کر کے اوس بارے صحیح سرت پنگرنے آں، مثلاً اوس دی نا پائداری۔ یا اسی نری کوئی شے جو مثبت صفتاں رکھدی ہووے، مثلاً مہاتما بدھ دی شبیہ، دی من وچ مورت بنانے آں، اتے انج اوس دی صحیح سرت پان دی کوشش کرنے آں۔

فیر، استقامتی مراقبہ وچ، اسی ایس بھلی دشا نوں جو اساں پیدا کیتی اے من دی جاگرت راہیں، توجہ اتے ارتکاز زیادہ توں زیادہ چِر تیکر قائم رکھن دی کوشش کرنے آں۔ یا اسی ایہناں رچھاں دی مدد نال من دے اوس غیر منتشر ارتکاز نوں قائم رکھنے آں جو اساں من دے تصور نال پیدا کیتا اے۔ 

اسی دو قسماں دے مراقبہ وچ آپس دا رد و بدل کرنے آں۔ جدوں اسی من دی من پسند بھلی دشا نوں پیدا کر لئیے اتے سانوں ایس دی سرت وی ہووے، تے فیر اسی ایس نوں پکا کر لینے آں؛ اتے جے کدی ایس اوپر ساڈی توجہ کمزور پے جاۓ یا مُک جاۓ، تے اسی مڑ کے ایس نوں پیدا کرن اتے ایس دی سرت لین اوپر کم شروع کر دینے آں۔

روز مرہ زندگی لئی مراقبہ

مراقبہ دا اصل مقصد نرا ایہ نئیں کہ جدوں اسی اپنے گھر وچ گدی اوپر بیٹھے ہوئیے تے شانت، مرتکز اتے پیار نال بھرے محسوس کرئیے، سغوں ایہ ہے کہ ساڈی پوری زندگی اوپر ایس دا اثر ہووے۔ جے اسی باقاعدگی نال مراقبہ کرئیے، تے بھلے جذبیاں دا مڑ کے آونا اک عادت بن جاندی اے جنہوں اسی کدی وی، دن ہووے یا رات، کم وچ لیا سکنے آں۔ اخیر ایہ ساڈا حصہ بن جاندے نیں – اک اجیہی فطرت جس دے سبب اسی ہر ویلے بغیر کسے جتن دے ہور پیار بھرے، مرتکز اتے شانت محسوس کرنے آں۔

اجیہے سمے وی آون گے جد اسی غصہ اتے نراش  محسوس کراں گے، اوس ویلے سانوں نرا اپنے آپ نوں ایہ یاد دوانا اے:"دل وچ پیار نوں ودھاؤ۔" اتے کیوں جے متواتر مراقبہ کر کر کے اسی من دی ایس حالت نال اینے زیادہ واقف ہو چکے آں، کہ اسی ایس نوں شتابی  پیدا کر سکنے آں۔

[ویکھو: غصہ نال نبڑن دے ۸ بودھی گر]

کوئی انسان وی پوری طراں بےعیب نئیں اتے اسی کسے نہ کسے بھیڑی عادت دی نشاندہی کرسکنے آں جس توں اسی جان چھڈانا چاہئیے۔ خوش قسمتی نال ایہ عادتاں پتھر اوپر لکیر نئیں ہین ایس لئی  بدلی کیتی جا سکدیاں نیں۔

ایس بدلاؤ لئی نری ساڈی محنت دی لوڑ اے۔ ساڈے وچوں کئی اک ورزش گاہ وچ کئی کئی گھنٹے گزاردے نیں پر اپنے ات حدل قیمتی اثاثے: اپنے من نوں کثرت کرانا بھل جاندے نیں۔ شروع وچ ایہ اوکھا ہووے گا، پر اک وار جد اسی اپنی زندگی وچ مراقبہ دے فائدے ویکھ لئیے، تے فیر اسی اپنے من اوپر کم کر کے خوش ہوواں گے۔