موت بارے حقیقت پسندی

ایس گل نوں مندیاں ہوئیا ں کہ زندگی تھوڑی اے اتے کسے ویلے وی مُک سکدی اے، اسی بھلے کم کرن دے موقعے گوان توں پرہیز کرنے آں۔

وستر

موت اک اجیہا وشے ہے جس بارے اکثر لوکی سوچنا پسند نئیں کردے۔ پر موت زندگی دی اک پکی حقیقت اے جس دا سب نوں سامنا کرنا اے۔ جے اساں اپنے آپ نوں اک ہونی لئی تیار نئیں کیتا، تے ساڈی موت خوف اتے پچھتاوے دے نال ہو سکدی اے۔ ایس لئی موت اوپر مراقبہ ڈاڈھا فیدہ مند اتے پربھاوت اے۔ 

اسی موت اوپر کئی اک مراقبے کر سکنے آں، مثال دے طور تے ایس گل دا تصور کرنا کہ جے سانوں ایہ دسیا جائے کہ سانوں کوئی موذی لا علاج روگ لگا ہویا اے تے اسی ایس نال کس طراں نبڑاں گے۔ مندرجہ ذیل مراقبہ اک عمومی مراقبہ اے جو اپنے رویہ اتے ورتاؤ نوں بہتر بنان لئی کیتا جاندا اے جدوں کہ سانوں حالی ایس دے موقعے میسر نیں۔ ایس مراقبہ وچ، اپنے ساہ اوپر گوہ دے راہیں طبیعت نوں شانت بنا کے، اسی درج ذیل نکتیاں اوپر گوہ کرنے آں:

سمادھ

موت نا گزیر اے، کیونکہ:

  • ایہ گل پکی اے کہ موت اک دن آئے گی، اتے اسی ایس نوں کسے صورت وی ٹال نئیں سکدے – پورے انسانی اتحاس وچ ہر کوئی جس نے جنم لیا اوس نوں موت دا مزہ چکھنا پیا، تے ساڈے اندر اجیہی کیڑھی گل اے کہ اسی ایس نال دو چار نئیں ہوواں گے؟
  • جدوں ساڈی موت دا سمے آ جائے تے ساڈی زندگی دا چِر ودھایا نئیں جا سکدا اتے ایہ کہ ساڈی زندگی دا باقی سمے متواتر گھٹ ہو رہیا اے، زندگی دے ہر پل اسی بڑھیپے ول جا رہے آں اتے موت دے ہور نیڑے ہوندے جا رہے آں، نہ کہ جوان اتے موت توں دور۔ ایہ انج ہی اے جویں کسے مال بردار چلدی ہوئی پٹی اوپر سوار مسلسل اپنی ہونی موت ول رواں ہونا۔ 
  • موت تے آ ہی جائے گی بھاویں اساں من دی شانتی پان یا افسوس گھٹ کرن لئی کوئی قدم چکے یا نہیں – موت آ سکدی اے، جویں کہ اچانک دل دا دورہ پین نال یا کار دی در گھٹنا نال، اچانک جدوں کہ اسی ایس دی اُکا ہی توقع نئیں کر رہے ہوندے۔

سانوں موت کدوں آئے گی ایس دا کجھ یقین نئیں، کیونکہ:

  • ساڈی زندگی دی مدت دا کجھ پتہ نئیں – مرن لئی بڈھا ہونا ضروری نئیں۔
  • زندہ رہن دی تھاں موت دے آون دے امکان زیادہ نیں – جگتائی ودھدی ہوئی گرمی دے سبب، قدرتی آفتاں اتے مہلک وباواں وچ وادھا ہو رہیا اے؛ لگا تار گھٹدے ہوئے قدرتی وسیلے اتے معاشی نا انصافیاں دے سبب خون خرابہ ودھدا جا رہیا اے؛ ودھدی ہوئی نراش دے سبب منشیات دے حد توں ودھ پریوگ وچ وی وادھا ہو ریا اے، وغیرہ وغیرہ۔ 
  • ساڈے شریر بڑے نرمل نیں – معمولی جیہی بماری یا کوئی درگھٹنا موت دا سبب ہو سکدی اے۔ 

اپنے رویہ اتے ڈھو ڈھب نوں بہتر بنان، بطور حفظ ما تقدم، ایس اوپر کم کرن دے علاوہ ہور اسی کیہ کر سکنے آں جو سانوں مرگ دے سمے من دی شانتی دے اتے افسوس توں بچائے۔ جے سانوں ہنے موت آ گھیرے:

  • ساڈی دولت کسے کم نئیں آئے گی – ساڈا روپیہ پیسہ کمپیوٹر اوپر اک پردے سمان ہووے گا
  • یار بیلی کوئی مدد نئیں کر سکن گے –سانوں اوہناں نوں چھڈ کے جانا ہووے گا اتے جے اوہ ساڈے آلے دوالے رون پٹن پاون گے، تے اوہ ساڈے لئی پریشانی دا سبب ہون گے
  • ساڈا شریر وی کجھ کم نئیں آئے گا – ایس فالتو بھار توں بھلا سانوں کیہ ارام ملے گا؟ 

تاں  اسی ایس نتیجہ اوپر پوہنچنے آں کہ فیدہ مند کرم ایہی ہووے گا کہ اسی انج دے قدم چکئیے جو سانوں ڈر اتے پچھتاوے دے بھار تھلے مرن توں بچائے۔

مکدی گل 

موت دے یقینی ہون بارے با خبر رہن دا مقصد اپنے آپ نوں نراش اتے خوف نال لبیڑنا نئیں اے۔ جدوں سانوں ایس گل دا احساس ہو جائے کہ ساڈی زندگی دا باقی دور محدود اے اتے کوئی وی یقین نال ایہ نہیں کہہ سکدا کہ ایہ کدوں مُک جاوے گی، تے اسی ایہناں چنگے موقعیاں اتے سمے توں پورا فیدہ چکن دی اکساوٹ پراپت کرنے آں جو سانوں میسر نیں۔ موت توں باخبری سانوں آلکس اتے ٹال مٹول کرن اوپر قابو پان وچ سہائت ہوندی اے جو سانوں انج دے مثبت قدم چکن توں باز رکھدی اے جو حالات نوں مستقبل وچ چوکھا بھیڑا  بناون۔  

Top