دس ہانی کارک کرماں توں بچاؤ

اسی سب اپنی بھلائی وچ وادھا کرنا چاہنے آں، اتے ساڈے وچوں بوہتے ہوراں دے نال صحت مند، تسلی بخش سانگھے پنگرنا چاہندے نیں۔ ایہ خلا وچ پیدا نہیں ہووے گا: ایس لئی سنسکاراں دی لوڑ اے۔ جس توں مراد ہانی کارک سبھاو توں پرہیز اتے فیدہ مند، تعمیری طور طریقے نوں اپنانا اے۔ جد اسی پریشان کرن والے جذبے مثلاً غصہ یا لالچ دے ہیٹھ ہونے آں تے اسی تباہ کرن والے سبھاو اختیار کرنے آں، جس توں ساڈے من دا چین اتے اچار ونت کھس جاندا اے۔ منفی عادتاں توں مجبور اسی بے قابو روش اپنانے آں، جس توں نہ صرف دوسریاں نوں بلکہ خود اپنی ذات نوں وی نقصان پوہنچانے آں؛ ساڈا اپنا سبھاو ساڈے اپنے ہمیش دے سوگ دا سبب بندا اے۔ دوجے پاسے، جے اسی اچار ونت توں کم لئیے اتے پیار تے درد مندی توں کم لئیے، تے اسی ہوراں لئی اتے اپنے لئی وی قابلِ اعتماد یار بیلی دا کردار ادا کراں گے، اتے یقیناً خوشگوار حیاتی بتاواں گے۔

ہانی کارک سبھاو دی تتعریف

ہر سنسکار دے کول تباہ کرن والے سبھاو دی قِسماں دی اک ویروا اے جس دی بنیاد اوہناں ون سونّی اکھ دھرائیاں اوپر اے کہ کیہ قابل قبول اے اتے کیہ نئیں اے۔ دھرمی اتے شہری نظام دے قنون دا ماخوذ کوئی اسمانی طاقت، ملک دا راشتڑپتی، یا کوئی قنون ساز ادارہ ہوندا اے۔ جد اسی نافرمانی کرنے آں تے اسی اپرادھی متھے جانے آں اتے سزا دے حقدار ہونے آں؛ جد اسی فرمانبردار ہوئیے تے اسی جنت وچ انعام دے لائق ہونے آں، یا ایس زندگی وچ محفوظ اتے مربوط سماج دے۔ انسانیت دے نظام کسے نوں نقصان نہ پوہنچان اوپر زور دیندے نیں، پر ایس وچ وی مسلے ہین: 'کیا اسی ہمیش جان سکنے آں کہ کسے لئی کیہ مفید اے اتے کیہ ہانی کارک؟' مثال دے طور تے، کسے اوپر چیکن نال اوہناں دا من دکھی ہو سکدا اے، پر ہو سکدا اے کہ اوہ ایس دے سبب کسے وڈے خطرے توں بچ جاون۔

بودھی سنسکار خود تلف سبھاو توں پرہیز اوپر زور دیندے نیں – اچیچ اجیہے کرماں توں جو سانوں بھوشٹ سمے  وچ نقصان پوہنچان۔ جے اسی اوس ڈرائیور اوپر جو ساڈے توں اگے نکلن دی کوشش کر رہیا اے چیکئیے تے اوس توں سانوں وقتی طور تے چنگا تے محسوس ہووے گا، پر ایس توں ساڈا من پریشان اتے ساڈی شکتی ہل جاوے گی، جس توں ساڈے من دا سکون برباد ہووے گا۔ جد اسی چیکن دی عادت پا لینے آں تے اسی کوئی وی بے ارامی برداشت نئیں کر سکدے؛ ایس توں نہ صرف ساڈے دوسریاں نال تعلق وگڑ جاندے نیں  بلکہ ساڈی صحت اوپر وی بھیڑا اثر پیندا اے۔

ایس دے موہرے، جد ساڈا سبھاو دوسریاں لئی پر خلوص فکر، پیار، درد مندی اتے بھائی چارے نال بھریا ہووے، تے اسی فطری طور اوپر چیکن توں پرہیز کرنے آں بھاویں ساڈا من انج کرن اوپر مائل ہووے – اسی خوشی نال اوس ڈرائیور نوں لہنگ جان دینے آں۔ ایس دا نتیجہ ایہ ہوندا اے کہ ڈرائیور وی خوش اتے اسی وی خوش؛ اسی اک خوش باش من دے نال پر سکون اتے شانت رہنے آں۔ سانوں اپنی چیکن چلان دی احتیاج نوں روکنا نئیں پیندا اتے نہ ہی اسی شکست خوردگی دا شکار ہونے آں۔ بلکہ اسی ایہ ویکھنے آں کہ ہر کوئی فٹا فٹ اپنی منزل مقصود اوپر پوہنچنا چاہ رہیا اے، اتے اسی اپنی ڈرائیو نال گڈیاں دی دوڑ وچ تبدیل کرن دی حرکت دی بیکاری اتے بے مقصدیت نوں محسوس کرنے آں۔


بدھ مت وچ ہانی کارک سبھاو توں مراد پریشان کرن والے جذبے اتے بھیڑیاں عادتاں دے اثر ہیٹھ بے قابو ہو کے کجھ کرنا اے۔ اسی چنگے ماڑے دے وچکار فرق کرن دی یوگتا نئیں رکھدے، یا تے نرا ایس لئی کہ اسی نئیں جاندے کہ بھلا کیہ اے یا فیر جے اسی جاننے وی آں تے اسی اچار ونت توں مکمل طور تے عاری ہونے آں۔ لالچ، غصہ اتے ساڈے کرم، گفتار اتے وچار جد اوہ ایہناں  پریشان کرن والے جذبیاں دی اکساوٹ توں پیدا ہوۓ ہون، دے نتیجیاں توں بھولپن دی حد تک بے خبری، ایہ نیں موٹے موٹے پریشان کرن والے جذبے۔ اتے سونے تے سہاگا ایہ کہ چوکھی وار اسی اپنی قدر تے قیمت نوں گھٹ پچھاننے آں، لہٰذا ایس گل دی بالکل پرواہ نئیں کردے کہ ساڈا سبھاو کیہو جیا اے۔ ساڈا سبھاو انج اے 'جو وی ہے سو ہے'، جتھے کسے شے نال کوئی واسطہ نہیں سواۓ چند مصنوعی شیواں دے جویں ساڈا لباس کیہو جیا اے، ساڈے وال کنج دے نیں، اتے ساڈے یار بیلی کون نیں۔ اسی اکا ہی ایس گل دی پرواہ نئیں کردے کہ ساڈے سبھاو دا ساڈی پوری نسل، قوم، دھرم یا جس کسے دھڑے نال ساڈے سانگھے نیں اوہناں اوپر کیہ اثر پیندا اے۔ ساڈے اندر اپنے من دے ستکار دا گھاٹا اے۔

دس تباہ کرن والے کرماں دی روائتی فہرست

ایہو جئے بوہت سارے طبعی، لفظی اتے دماغی کرم نیں جو ہانی کارک نیں۔ بدھ مت ایہناں وچوں دس جو سب توں زیادہ ہانی نیں دی خاکہ کشی کردا اے۔ ایہ ایس لئی ہانی کارک نیں کیوں جے ایہ تقریباً ہمیش پریشان کرن والے جذبے، بے حیائی، بے شرمی، یا لا تعلقی دے سبھاو توں پیدا ہوندے نیں۔ ایہناں دا مڈھ ساڈیاں پکیاں عادتاں نیں، اتے ایس دے نتیجہ وچ ایہ ساڈے منفی وچاراں نوں شکتی دیندے نیں۔ ایس دا نتیجہ ایہ ہوندا اے کہ ساڈا ہانی کارک سبھاو اک سوگمان زندگی دا سنیہہ دیندا اے جس وچ اسی اپنے لئی مسلیاں نوں جنم دیندے رہنے آں۔

طبعی سبھاو دی تن قسماں اجیہیاں نیں جو ہانی کارک نیں:

(۱) 'کسے نوں جان توں مارنا' -  کسے انسان توں لے کے کسے نکے جیہے کیڑے تک۔ ایس دا نتیجہ ایہ ہوندا اے کہ اسی کسے وی بھیڑی شے دا وجود برداشت نئیں کردے؛ کسے وی نا پسند شے بارے ساڈا شتابی رد عمل ایہ ہوندا اے کہ ایس نوں سٹ لائیے اتے نشٹ کر دئیے؛ اسی اکثر لڑ پینے آں۔

(۲ ) 'کسے دے مال اوپر ناجائز قبضہ کر لینا' -  چوری، ادھار لئی ہوئی شے واپس نہ کرنا، کسے دی کوئی چیز اوہناں دی اجازت بغیر استعمال وچ لیانا، وغیرہ۔ ایس دے نتیجہ وچ اسی اپنے آپ نوں ہمیش فقر اتے مظلومیت دا شکار محسوس کرنے آں؛ کوئی سانوں کوئی شے ادھار نئیں دیندا؛ ساڈے تعلق دی بنیاد آپس دا استحصال بن کے رہ جاندی اے۔

(۳) 'غیر مناسب جنسی سبھاو اختیار کرنا' – زنا بالجبر، منکوحہ دے علاوہ کسے نال بد کاری، محرم دے نال بد کاری، وغیرہ۔ ایس دے نتیجہ وچ ساڈے تعلقات عارضی ہوندے نیں اتے اسی اتے ساڈے وار وار ملن والے ساتھی اک دوجے نوں سچ اتے ٹھوس حقیقت مننے آں؛ بنیادی طور اوپر اسی ملیچھ شیواں نوں موہ لائق پانے آں۔ 

لسانی سبھاو دی چارقسماں اجیہیاں نیں جو ہانی کارک نیں:

(۱) 'دروغ گوئی' -  جان بجھ کے اجیہی گل  کہنا جو سچ نہ ہووے، دوسریاں نوں گمراہ کرنا، وغیرہ۔ ایس دا نتیجہ ایہ ہوندا اے کہ نہ ساڈی گل دا کوئی یقین کردا اے اتے نہ ہی اعتبار، اتے اسی وی کسے دی گل نوں سچ نئیں مندے؛ اسی حقیقت اتے اپنی من گھڑت گلاں وچکار فرق محسوس نئیں کر پاندے۔

(۲) 'پُھٹ پان والی گلاں کرنا' – دوسریاں دی بد خوئی کرنا تا کہ اوہناں دے وچکار پھٹ پوے یا اوہناں دا آپس دا وَیر ہور ودھے۔ ایس دے نتیجہ وچ ساڈی یاریاں دیرپا نئیں ہوندیاں کیونکہ ساڈے یار بیلی ساڈے اوپر شک کردے نیں کہ اسی اوہناں دی وی پٹھ پچھے برائی کردے ہوواں گے؛ ساڈا کوئی گوڑھا یار نئیں ہوندا اتے اسی اکلے محسوس کرنے آں۔

(۳) 'کوڑا بولنا -  ایہو جئی گلاں کہنا جس توں دوسریاں دا دل دکھے۔ ایس دے نتیجہ وچ لوکی سانوں چنگا نئیں جاندے اتے ساڈے توں پرے رہندے نیں؛ اتے جد اوہ ساڈے سنگ ہون وی تے اوہ خوش نئیں ہوندے اتے کئی وار سانوں جواباً بھیڑیاں گلاں کہندے نیں؛ ایس طراں اسی ہور وی اکلے ہو جانے آں۔

(۴) 'یاوہ گوئی' -  فضول گلاں توں اپنا اتے دوجیاں دا سمے برباد کرنا؛ لوکی جد کسے تعمیری کم وچ رجھے ہون تے اپنی بیکار گلاں نال اوہناں دے کم وچ دخل دینا۔ ایس دا نتیجہ ایہ ہوندا اے کہ کوئی وی سانوں سنجیدگی دی اکھ نال نئیں ویکھدا؛ اسی کسے کم اوپر وی توجہ نئیں دے پاندے بغیر اپنے ہتھ دے آلہ نوں ہر چند منٹ دے وقفہ مغروں چیک کرن دے؛ اسی کوئی کم دا کم نئیں کر پاندے۔

سوچ دے تن ول اجیہے نیں جو ہانی کارک نیں:

(۱) 'لوبھی وچار–کرودھ دی بنا اوپر، کسے ہور دے کول جو کوئی شے یا گن اے اوس نوں پراپت کرن یا اوہناں اوپر بازی لے جان دی وسوں باہر سوچ اتے منصوبہ بندی۔ ایس دے نتیجہ وچ، سانوں کوئی من دی شانتی یا خوشی نصیب نئیں ہوندی، کیونکہ اسی ہر ویلے دوجیاں دی کامیابیاں دے احساس دی وجہ توں دکھی رہنے آں۔

(۲) 'کینہ پروری' -  کسے نوں نقصان پوہنچان دی خاطر یا اوہناں دے کسے قول یا کرم دا بدلہ لین دی خاطر منصوبہ بندی کرنا۔ ایس دے نتیجہ وچ، نہ تے اسی کوئی محفوظ محسوس کرنے آں اتے نہ ہی شانت؛ اسی مستقل طور تے ایس ڈر ہیٹھ رہنے آں کہ دوجے لوکی وی ساڈے خلاف سازش کر رہے نیں۔

(۳) 'تحریف زدہ ورودھی وچار-  نہ صرف حقیقت نوں ہٹیل سوچ نال جھٹلانا سغوں اپنے من ہی من وچ دوجیاں نال جو ساڈے نال سہمت نئیں ہین جھگڑنا اتے اپکاری ول نال اوہناں دی ہتک کرنا۔ ایس دے نتیجہ وچ، اسی ہور وی تنگ نظر ہو جانے آں اتے کسے وی مفید مشورے یا نصیحت نوں قبول کرن توں انکار کرنے آں؛ ساڈے دل دے دروازے وی ہوراں لئی بند ہو جاندے نیں، اتے اسی ہمیش اپنے ہی بارے سوچدے رہنے آں اتے ایہ کہ اسی ہمیش صحیح آں؛ اسی جاہل اتے مورکھ رہنے آں۔

ایس گل دے قطع نظر کہ اسی کس دھرم نوں مننے آں، ایہناں دس کمزوریاں توں پرہیز ہر اوس پرش لئی مناسب اے جو اک خوشگوار زندگی بتانا چاہندا اے۔

ہانی کارک سبھاو دیاں دس وسیع تر ونڈاں

دس ہانی کارک کرم دس قسم دے سبھاو ول اشارہ کردے نیں جس توں اساں بچنا اے۔ سانوں اپنے سبھاو اتے اوس دے نتیجے بارے جس قدر وی ممکن ہووے نرول من نال سوچنا اے۔ ایتھے سوچ وچار لئی کجھ ادھارن پیش کیتے جاندے نیں، پر مینوں وشواس اے کہ ساڈے وچوں ہر کوئی ایس وچ ہور وادھا کر سکدا اے۔

(۱) 'کسے دی جان لینا' -  مار پٹ توں کم لینا، کسے نوں کوئی بھارا کم کرن لئی مدد دی لوڑ ہووے تے اوس نوں امن جوگ کرنا، کسے بمار یا بڈھے پرش دے نال چھیتی چھیتی ٹرنا، یا شریر نوں کسے قسم دا نقصان پوہنچانا جس وچ واتا ورن نوں گندہ کرنا اتے غیر تمباکو نوشاں دے نیڑے، اچیچ نیانیاں دے، تمباکو نوشی کرنا

(۲) 'کسے دے مال اوپر ناجائز قبضہ کرنا' -  انٹرنیٹ توں غیر قنونی طور تے مواد ڈاؤن لوڈ کرنا، بنا اجازت چربہ سازی، دھوکہ دہی، ٹیکس دی چوری، دوسریاں دے ذاتی معاملیاں وچ دخل اندازی، حتیٰ کہ اپنے ساتھی یا بیلی دی تھالی وچوں اوہناں توں پچھیاں بغیر برکی لینا

(۳) 'جنسی کو سنسکار-  کسے نوں جنسی طور تے پریشان کرنا، سمبھوگ سمے اپنے ساتھی دی ضرورت دا امن جوگ کرنا، اتے بوہت گھٹ یا حد توں ودھ پیار دا وکھالا کرنا

(۴) 'دروغ گوئی' -  کسے نال تعلق دے معاملہ وچ اپنے سچے جذبے اتے وچاراں بارے دھوکہ کولوں کم لینا

(۵) 'پھُٹ پانا'–کوئی پرش جو کوئی تعمیری یا ادھرمی کم کر رہیا ہووے یا کرنا چاہ رہیا ہووے اوس دی حوصلہ شکنی کرنا

(۶) 'کوڑے لہجہ وچ گل کرنا' -  لوکاں اوپر چیکنا چلانا، اپکاری ول نال گل کرنا، جد کوئی پریشان ہووے اوس نال غیر ہمدردانہ، برا سلوک کرنا، اتے غیر مناسب دَشا یا غیر مناسب موقع اوپر گندی، طنزیہ زبان استعمال کرنا
(۷) 'یاوہ گوئی' -  کسے دے وشواس نوں ٹھیس پوہنچانا اتے اوہناں دے بھید کھولنا، معمولی گلاں ٹیکسٹ کرنا یا اوہناں بارے سنیہے گھلنا،  خصوصاً ادھی رات نوں، اپنی روز دی زندگی دے معمولی معاملیاں بارے تصویراں اتے تبصرے سماجی نشر خبر دے وسیلیاں اوپر لکھنا، کسے دی گل مُکن توں پہلاں ہی اوہناں نوں ٹوک دینا، اتے سنجیدہ گفتگو دے وچکار بیوقوفاں والا فقرہ کسنا یا کوئی بیوقوفی دی گل کہنا

(۸) 'لوبھی وچار' -  ایس گل دی آشا کرنا کہ جس پرش نال اسی ریستوران وچ کھانا کھا رہے آں اوہ اپنا بھوجن سانوں چکھن دی پیشکش کرن گے، اتے جد سماجی نشر خبر دے وسیلیاں اوپر لوکاں دی تصویراں اتے لکھائی ویکھئیے جو ایس بارے وچ اے کہ اوہ کویں مزے پئے لٹدے نیں، تے اپنے مندے حال دا سوگ منانا  اتے دل وچ اجیہے رشکیہ وچار لیاونا کہ کاش اسی وی اینے ہی مقبول اتے خوش باش ہوندے

(۹) 'کینہ پروری' -  جد کوئی پرش ساڈے نال کوڑا بول بولدا اے اتے اسی اوس دا کوئی فوری جواب نئیں دے پاندے، تے بعد وچ اپنے من وچ ایہ سوچدے رہنا کہ میں اوس نوں کیہ جواب دے سکدا ساں جس توں اوس دا دل برا ہوندا

(۱۰) ' تحریف زدہ ورودھی وچار-  کسے پرش بارے جو کسے اجیہے معاملہ وچ ساڈی مدد کرنا چاہ رہیا اے جس وچ اسی اپنے آپ نوں کامل سمجھنے آں منفی اتے ورودھی وچار رکھنا، اتے ایہ سوچنا کہ کوئی پرش کنا مورکھ اے جو کسے اجیہے شعبہ وچ اپنے آپ نوں بہتر بنانا چاہ رہیا اے جو کہ ہانی کارک نئیں اے، پر جس وچ سانوں کوئی دلچسپی نہیں یا جس نوں اسی ضروری نہیں سمجھدے۔  ۔

اپنی ذات نوں نقصان پوہنچانا

جس طراں اسی اپنے آپ نال پیش آونے آں اوہ اونا ہی ہانی کارک ہو سکدا اے جنا کہ ساڈا سبھاو دوسریاں لئی ہوندا اے۔ خوشگوار زندگی بتان دی خاطر سانوں ایہناں منفی طور طریقیاں دی پچھان اتے ایہناں دی اصلاح کرن دی لوڑ ہوندی اے۔ تے، دس ہانی کارک طریقے ایس قسم دے سبھاو دی پچھان کراندے نیں جس دا اساں ستیا ناس کرنا اے۔

(۱) 'کسے دی جان لینا' -  اپنے آپ نال شریر دی بد سلوکی جویں حد توں ودھ کم، گھٹیا خوراک، کسرت دا گھاٹا، یا نیندر پوری نہ کرنا
(۲) 'کسے دے مال اوپر ناجائز قبضہ کرنا' -  بیکار شیواں اوپر پیسہ خرچ کرنا، اپنی ذات اوپر پیسہ خرچ کرن دے معاملہ وچ بخل کولوں کم لینا جد کہ ایس دی کوئی لوڑ نہیں 
(۳) 'جنسی کو سنسکار' -  ایہو جئے جنسی فعل کرنا جنہاں توں ساڈی صحت نوں خطرہ لاحق ہووے، یا فحش لٹریچر توں اپنے من نوں گندا کرنا

(۴) 'دروغ گوئی' -  اپنے آپ نوں اپنے جذبیاں اتے نیت بارے دھوکہ دینا

(۵)  'پھُٹ پانا' -  اجیہے بھیڑے سبھاو نال گل کرنا، جویں ہر سمے شکائتی لہجے وچ گل کرنا، کہ لوکی ساڈے توں اینے تنگ پین کہ اوہ ساڈے سنگ توں گریز کرن

(۶) 'کوڑے لہجہ وچ گل کرنا' -  اپنے آپ نوں چنگا مندہ کہنا

(۷) 'یاوہ گوئی' -  اپنے ذاتی معاملے، شک  شبہے اتے پریشانیاں بارے بنا انتر گل کرنا، یا گھنٹیاں دے حساب نال سوشل میڈیا اوپر بیٹھے رہنا، بیکار قسم دی ویڈیو گیماں کھیڈدے رہنا، یا انٹرنیٹ اوپر موج رانی کرنا

(۸) 'لوبھی وچار' -  اک کمال پسند ہون دی حیثیت نال اپنے آپ نوں مات کرنا

(۹) 'کینہ پروری' -  ایہو جیا اپرادھ دا احساس کہ اسی کنے بھیڑے انسان آں اتے سانوں خوش ہون دا کوئی حق نئیں

(۱۰) ' تحریف زدہ ورودھی وچار'-  ایہ سوچنا کہ اسی کنے بیوقوف آں کہ اسی اپنے آپ نوں بہتر بنان یا دوسریاں دی مدد کرن دی کوشش کر رہے آں۔

اپنے تباہ کرن والے طریقیاں نال کویں نبڑیا جاۓ

جد اسی اپنے سارے گزریل ہانی کارک طریقیاں دا جائزہ لئیے، تے ایہ اوِش ہے کہ اپنے بارے وچ منفی احساس توں گریز کرئیے۔ اپرادھ دے احساس ہتھوں مفلوج ہو جان دی نسبت سانوں ایہ من لینا چاہیدا اے کہ اساں جو کیتا اوہ لا علمی دے سبب ہویا اتے ایہ کہ اسی اپنے کرماں دے اثر بارے بھولپن دا شکار ساں: اسی پریشان کرن والے جذبیاں دے غلام ساں، نہ کہ اسی بنیادی طور اوپر کوئی برے انسان آں۔ اسی اپنے کیتے اوپر شرمندہ ہونے آں، ایہ سوچدے ہوۓ کہ کاش انج نہ ہوندا، پر ایہ وی جاندے ہوۓ کہ ماضی نوں بدلیا نئیں جا سکدا۔ جو ہو گیا سو ہو گیا – پر ہن اسی ایہ فیصلہ کرنے آں کہ اسی پوری کوشش کراں گے کہ ایہ سبھاو مڑ کے نہ آوے۔ فیر اسی ایس مثبت راہ دی مڑ کے توثیق کرنے آں جس اوپر اساں چلنا اے، اتے پیار تے درد مندی دی بنیاد اوپر قائم مثبت کرماں اوپر عمل دی ہر ممکن کوشش کرنی اے۔ ایس توں ہور مثبت عادتاں پنگردیاں نیں جو نہ صرف توازن پیدا کردیاں نیں  سغوں اخیر منفی عادتاں دی شکتی دا خاتمہ کر دیندیاں نیں۔

لوکی اتے دشاواں جنہاں نال سانوں واہ پیندا اے ایہناں نال نبڑن لئی اسی ذرا دھیرج کولوں کم لینے آں، تاں جے اسی اپنے عادت دے مطابق وسوں باہر رد عمل اتے درست عمل دے درمیانی وقفہ نوں ودھا سکئیے۔ ایس سمے وچ اسی فیدہ مند اتے ہانی کارک سبھاو دے وچکار انتر کرنے آں جو سانوں ہانی کارک کرم، گفتار اتے وچار توں بچاندا اے۔ جویں کہ مہان ہندوستانی گورو شانتی دیو نے کہیا، "لکڑی دے اک مڈھ وانگوں رہو۔" اسی انج کر سکنے آں پر ایس لئی سمجھ بجھ، پیار، درد مندی، اتے اپنے اتے دوسریاں لئی آدر اتے ستکار دی لوڑ اے۔ ایس دا مطلب ایہ نہیں کہ اسی کسے شے نوں دبا رہے آں جو کہ بعد وچ سانوں ہور زیادہ پریشان کرے گی۔ اک سیانے اتے درد مند من دے راہیں اسی منفی شکتی دا خاتمہ کرنے آں جو سانوں اجیہا کجھ کہن یا کرن اوپر اکساندی اے جس اوپر اسی مغروں پچھتانے آں۔ تے ایس طراں اسی مثبت جذبے اتے سمجھ بجھ دے راہیں تعمیری سبھاو اپنانے آں۔

خلاصہ

جد اسی ہانی کارک طریقیاں توں پرہیز کرنے آں تے ایس توں نرا دوجیاں نوں ہی فیدہ نہیں ہوندا بلکہ اسی آپوں ایس توں سب توں ودھ کے فیدہ چکنے آں۔ جد اسی ایہ گل جان لینے آں کہ ساڈا اپنا پرم پرا ساڈی سوگمان دشا  دا سبب اے تے اسی خود بخود  - در  حقیقت، اسی منفی، ہانی کارک عادتاں اتے طور طریقیاں توں بچن وچ خوشی محسوس کراں گے۔ جد اسی ایہناں عادتاں نوں شکتی پوہنچانا بند کر دیاں گے، تے ساڈے لوکاں نال سانگھے مضبوط اتے پر خلوص ہون گے، اتے اسی اپنے من وچ ہور شانت ہوواں گے۔ جے اسی ایہ چاہنے آں کہ ساڈے من شانت ہون تے سانوں کرم، گفتار اتے وچار دے تباہ کرن والے پرم پرا توں جان چھڈان دی کوشش کرنی ہووے گی۔ انج کرن نال ساڈا زندگی دا معیار بوہت اچا ہووے گا۔ 

Top