အပျက်သဘော အပြုအမူ၏ အဓိပ္ပာယ်
ကျင့်ဝတ်စနစ်တိုင်းတွင် လက်ခံနိုင်သော စိတ်ကူးနှင့် လက်မခံနိုင်သော စိတ်ကူးအမျိုးမျိုးတွင် အခြေခံသော အပျက်သဘော အပြုအမူများစွာ ရှိကြပါသည်။ ဘာသာရေးနှင့် ပြည်သူ့ရေးရာ စနစ်များသည် ကောင်းကင်နိုင်ငံ အရှင်သခင်၊ နိုင်ငံ့ခေါင်းဆောင် သို့မဟုတ် ဥပဒေအချို့ဖြင့် ချမှတ်သည့် ဥပဒေများပေါ်တွင် အခြေခံပါသည်။ မလိုက်နာပါက အပြစ်ရှိပြီး ပြစ်ဒဏ်ကျခံရန် လိုပါသည်။ လိုက်နာသောအခါ ကောင်းကင်ဘုံသို့ရောက်ခြင်း၊ လုံခြုံစိတ်ချပြီး ညီညွတ်သော အသိုင်းအဝိုင်းတွင် နေထိုင်ရခြင်း စသည်ဖြင့် ချီးမြှောက်ခံရပါသည်။ လူသားချင်း စာနာသော စနစ်များသည် အခြားသူများကို အန္တရာယ် မပေးရန် အာရုံစိုက်ပါသည်။ သို့သော် ဒါက ပြဿနာ ရှိပါသည်။ အခြားတစ်ယောက်အတွက် အန္တရာယ် ရှိသောအရာ၊ အထောက်အကူ ပြုသောအရာကို အမြဲတမ်း အမှန်တကယ် သိရှိနိုင်ပါမည်လား။ ဥပမာ၊ တစ်ယောက်ယောက်ကို အော်ငေါက်ခြင်းမှာ သူတို့ကိုစိတ်ထိခိုက်စေနိုင်သလို အန္တရာယ် ရှောင်ရှားနိုင်အောင်လည်း ကူညီနိုင်ပါသည်။
ဗုဒ္ဓဘာသာ ကျင့်ဝတ်သီလသည် မိမိကိုယ်တိုင် ပျက်စီးစေသော အပြုအမူမှ ရှောင်ရှားရန် အလေးထားပါသည်။ အထူးသဖြင့် ရေရှည်တွင် အန္တရာယ် ဖြစ်စေမည့်ပုံစံဖြင့် မပြုမူရန် ဖြစ်ပါသည်။ လမ်းပေါ်တွင် ကျော်တက်ရန် ကြိုးစားနေသော ယာဉ်မောင်းကို အော်ဟစ်ပါက ခဏတာမျှ မိမိစိတ်ကို ကျေနပ်စေသော်လည်း စိတ်ကို မတည်မငြိမ် ဖြစ်ကာ စွမ်းအင်များ ယုတ်လျော့စေပါသည်။ စိတ်ငြိမ်းချမ်းမှု ပျောက်ဆုံးသွားစေပါသည်။ အော်ဟစ်တတ်သည့်အကျင့် ရှိသောအခါ အဆင်မပြေမှု တစ်ခုခုကြုံတိုင်း ဝမ်းနည်းနေရပါမည်။ ထိုအခါ အခြားသူများနှင့် ဆက်ဆံရေးကိုသာမက မိမိကျန်းမာရေးကိုလည်း ထိခိုက်စေပါသည်။
တစ်ဖက်တွင်မူ ကျွန်ုပ်တို့၏ အပြုအမူက အခြားသူများအတွက် မေတ္တာ၊ ကရုဏာ၊ နားလည်မှုတို့ဖြင့် အမှန်တကယ် အလေးထားသည့်စိတ် ပါဝင်နေပါက အော်ဟစ်လိုစိတ် ဖြစ်လာလျှင်လည်း ထိုသို့မပြုမိအောင် အလိုလို ရှောင်ရှားမိလာပါသည်။ စောစောက ယာဉ်မောင်းကို ဝမ်းမြောက်ဝမ်းသာ ကျော်တက်ခွင့် ပေးလိုက်ပါသည်။ ရလဒ်မှာ ထိုယာဉ်မောင်းက ဝမ်းသာသွားသလို ကျွန်ုပ်တို့လည်း တည်ငြိမ်ပြီး ငြိမ်းချမ်းသည့်အတွက် အကျိုးရှိပါသည်။ ဤသည်မှာ ပျော်ရွှင်သော စိတ်အခြေအနေအတွက် အခြေခံဖြစ်ပါသည်။ အော်ဟစ်လိုစိတ်ကို ချိုးနှိမ်ခြင်း မရှိဘဲ စိတ်အနှောင့်အယှက် ဖြစ်ခြင်းမျိုး မရှိတော့ပါ။ လမ်းပေါ်ကလူတိုင်း သူတို့သွားလိုရာကို အမြန်ဆုံး ရောက်လိုသည်ကို မြင်လာပြီး မိမိခရီးသည် ကားမောင်းပြိုင်ပွဲလို အဓိပ္ပာယ်မဲ့ ဖြစ်သွားမည်ကို နားလည်လာပါသည်။
ဗုဒ္ဓဘာသာ၌ အပျက်သဘော အပြုအမူဆိုသည်မှာ အနှောင့်အယှက်ပေးသော စိတ်ခံစားချက်များ၊ အပျက်သဘော အလေ့အထများ၏ လွှမ်းမိုးမှုအောက်တွင် စိတ်လိုက်မာန်ပါ ပြုမူခြင်းဟူ၍ အဓိပ္ပာယ် သတ်မှတ်ထားပါသည်။ ကျွန်ုပ်တို့သည် အန္တရာယ် ရှိသောအရာနှင့် အကူအညီပေးသောအရာကို မှန်ကန်စွာ မခွဲခြားနိုင်ပါ။ ထိုသို့ဖြစ်သည်မှာ အကောင်းဆုံး ဖြစ်မည့်အရာကို မသိခြင်း သို့မဟုတ် ထိုသို့သိသော်လည်း မိမိကိုယ်ကို ထိန်းချုပ်မှု လုံးဝမရှိခြင်းကြောင့် ဖြစ်နိုင်ပါသည်။ အဓိက အနှောင့်အယှက်ပေးသော စိတ်ခံစားချက်များမှာ လောဘ၊ ဒေါသ၊ မိမိအပြုအမူ၏ အကျိုးဆက် အကြောင်း မသိနားမလည်မှု၊ ထိုသို့ဒုက္ခပေးသည့် စိတ်ခံစားချက်များဖြင့် ပြောဆိုမှု၊ တွေးတောမှုတို့ ဖြစ်ပါသည်။ ထို့ပြင် မိမိကိုယ်ကို တန်ဖိုးမထားတော့ဘဲ မိမိအပြုအမူ ဘယ်လိုရှိမည်ကို ဂရုမစိုက်တော့ပါ။ ဘာပဲဖြစ်ဖြစ် ဆိုသည့် သဘောထား ရှိလာပါသည်။ ထိုအခါ ဝတ်စားဆင်ယင်ပုံ၊ ဆံပင်ပုံစံ၊ အပေါင်းအသင်းများစသည့် အပေါ်ယံကိစ္စအနည်းငယ်မှအပ မည်သည့်အရာမျှ အရေးမပါတော့ပါ။ ကျွန်ုပ်တို့၏ အပြုအမူက ကျွန်ုပ်တို့၏ မျိုးဆက်တစ်ခုလုံး သို့မဟုတ် ကျား၊ မ၊ လူမျိုး၊ ဇာတိနိုင်ငံ၊ ကိုးကွယ်သည့်ဘာသာ၊ သို့မဟုတ် သတ်မှတ်နိုင်သည့် အုပ်စုတစ်ခုခု အပေါ် မည်သို့သက်ရောက် မည်ကို အမှန်တကယ် လုံးဝဂရုမစိုက်တော့ပါ။ မိမိကိုယ်ကို ဂုဏ်သိက္ခာနှင့် မိမိကိုယ်ကို လေးစားမှု မရှိတော့ပါ။
ရိုးရာအစဉ်အလာအရ သတ်မှတ်ထားသော အပျက်သဘော ဆောင်ရွက်ချက် ဆယ်ချက်
အပျက်သဘောဖြစ်သော ကိုယ်၊ နှုတ်၊ စိတ် ဆောင်ရွက်ချက် အများအပြား ရှိပါသည်။ ဗုဒ္ဓဘာသာတွင်လည်း ထိုသို့ အန္တရာယ် အရှိဆုံး အချက်ဆယ်ချက်ကို သတ်မှတ်ထားပါသည်။ ယင်းတို့သည် အနှောင့်အယှက်ပေးသော စိတ်ခံစားချက်များ၊ အရှက်အကြောက်မဲ့ခြင်း၊ ဂရုမစိုက်ခြင်းတို့မှ အမြဲတမ်းနီးပါး ပေါ်ထွက်လာသည့်အတွက် အန္တရာယ်ရှိခြင်း ဖြစ်ပါသည်။ နက်ရှိုင်းစွာ အမြစ်တွယ်နေသော အလေ့အထများကြောင့် ဖြစ်ပေါ်လာပြီး ထိုအခါ အပျက်သဘော ဆောင်ရွက်မှုများကို အားဖြည့်ပေးပါသည်။ ရေရှည်တွင် ကျွန်ုပ်တို့၏ အပျက်သဘော အပြုအမူက ပျော်စရာမကောင်းသောဘဝကို ဖြစ်စေပြီး မိမိကိုယ်တိုင်အတွက် ပြဿနာများ ဆက်လက်ဖန်တီးပါတော့သည်။
ပျက်စီးစေတတ်သည့် ကိုယ်အမူအရာ သုံးမျိုး ရှိပါသည်။ ယင်းတို့မှာ-
၁။ သူတစ်ပါးအသက်ကို သတ်ဖြတ်ခြင်း - အခြားလူတစ်ယောက်မှသည် အသေးငယ်ဆုံး အင်းဆက်တစ်ကောင်အထိ မသတ်ဖြတ်ရန်။ အကျိုးဆက်မှာ မိမိမနှစ်သက်သော အရာမှန်သမျှအတွက် သည်းခံမှု မရှိတော့ပါ။ မနှစ်သက်သောအရာတိုင်းအတွက် ရုတ်ချည်း တုံ့ပြန်မှုမှာ ပြန်လည်တိုက်ခိုက်ပြီး ဖျက်ဆီးရန် ဖြစ်ပါသည်။ ကျွန်ုပ်တို့သည် ဤသို့သော တိုက်ခိုက်မှုမျိုးတွင် မကြာခဏ ပါဝင်ကြပါသည်။
၂။ မပေးသောအရာကိုယူခြင်း - ခိုးယူခြင်း၊ ချေးငှားပြီး ပြန်မပေးခြင်း၊ တစ်စုံတစ်ယောက် ပိုင်ဆိုင်သောအရာကို ခွင့်မတောင်းဘဲ အသုံးပြုခြင်း စသည်။ အကျိုးဆက်မှာ အမြဲတမ်း သနားစရာ ဖြစ်နေသလို ခံစားရပြီး အပြစ်ပုံချ ခံရပါသည်။ ဘယ်သူကမျှ မချေးငှားတော့ပါ။ အခြားသူများနှင့် ဆက်ဆံရေးသည် အပြန်အလှန် အမြတ်ထုတ်မှုပေါ်တွင် အဓိက မူတည်လာပါသည်။
၃။ မှားယွင်းသော လိင်မှုကိစ္စများ ကျူးလွန်ခြင်း - မုဒိန်းကျင့်ခြင်း၊ အသရေဖျက်ခြင်း၊ သွေးသားရင်း ကျူးလွန်မှု စသည်။ အကျိုးဆက်မှာ ကျွန်ုပ်တို့၏ လိင်ပိုင်းဆိုင်ရာ ဆက်ဆံရေးသည် အများအားဖြင့် ယာယီဖြစ်လာပြီး မိမိရော မိမိနှင့် မကြာခဏ တွဲနေသူများပါ အချင်းချင်း အမည်ခံမျှသာ ဖြစ်လာသည်။ အခြေခံအားဖြင့် မသန့်ရှင်းသောအရာများကို စိတ်ဝင်စားလာပါသည်။
ပျက်စီးစေတတ်သည့် နှုတ်အမူအရာ လေးမျိုး ရှိပါသည်။ ယင်းတို့မှာ-
၁။ လိမ်လည်ခြင်း - မှားယွင်းသောစကား၊ အခြားသူများကို လှည့်ဖြားသော စကား စသည်တို့ကိုပြောခြင်း။ အကျိုးဆက်မှာ မည်သူမျှ ကျွန်ုပ်တို့ ပြောသမျှကို မယုံတော့သလို သူတို့ပြောသမျှကိုလည်း ကျွန်ုပ်တို့ မယုံတော့ပါ။ အမှန်တရားနှင့် မိမိကိုယ်တိုင် ဖန်တီးမှုများ၏ ကွာခြားချက်ကို မသိနိုင်တော့ပါ။
၂။ သွေးခွဲစကားပြောခြင်း - အခြားသူများ မကောင်းကြောင်းကို ပြောကာ သူတို့တစ်ဦးနှင့်တစ်ဦး ကွဲကွာစေခြင်း သို့မဟုတ် သူတို့ချင်း မုန်းတီးပြီး၊ မနှစ်သက်အောင် ပြုလုပ်ခြင်း။ အကျိုးဆက်မှာ ကျွန်ုပ်တို့၏ မိတ်ဆွေများက သူတို့အကြောင်းကိုလည်း နောက်ကွယ်တွင် မကောင်းပြောမည်ကို သံသယဖြစ်သည့်အတွက် ကျွန်ုပ်တို့၏ ပေါင်းသင်းဆက်ဆံရေးမှာ ရေရှည် မတည်မြဲတော့ပါ။ အရင်းနှီးဆုံး သူငယ်ချင်းများ မရှိတော့ဘဲ အထီးကျန်မှု ခံစားလာရပါသည်။
၃။ ကြမ်းတမ်းစွာ ပြောခြင်း - အခြားသူများ စိတ်ထိခိုက်အောင် ပြောခြင်း။ အကျိုးဆက်မှာ လူအများက မိမိကို မနှစ်သက်ဘဲ ရှောင်ဖယ်လာပါသည်။ အတူရှိနေလျှင်လည်း သူတို့မှာ မသက်မသာ ဖြစ်နေပြီး ကြမ်းတမ်းစွာ ပြန်ပြောတတ်ပါသည်။ ကျွန်ုပ်တို့သည် ပို၍ အထီးကျန်လာပါသည်။
၄။ အတင်းအဖျင်း ပြောခြင်း - မိမိအချိန်ရော၊ အခြားသူများ၏ အချိန်ကိုပါ အကျိုးမဲ့ပြောဆိုမှုဖြင့် ဖြုန်းတီးခြင်း။ အခြားသူများ အပြုသဘော တစ်ခုခု ဆောင်ရွက်နေချိန် အကျိုးမဲ့စကားများဖြင့် ဝင်ရှုပ်ခြင်း။ အကျိုးဆက်မှာ မည်သူမျှ ကျွန်ုပ်တို့ကို အလေးအနက် မထားတော့ပါ။ လက်ထဲကဖုန်းကို ခကြာခဏ မကြည့်ဘဲ အလုပ်တစ်ခုခုအပေါ် အာရုံစိုက်၍ မရတော့ပါ။ အဓိပ္ပာယ် ရှိသောအရာ တစ်ခုမျှ ပြီးစီးအောင် မဆောင်ရွက်နိုင်တော့ပါ။
ပျက်စီးစေတတ်သည့် စိတ်အမူအရာ သုံးမျိုး ရှိပါသည်။ ယင်းတို့မှာ-
၁။ လိုချင်သောစိတ်ဖြင့် တွေးခြင်း - တစ်စုံတစ်ယောက်တွင် ရှိနေသောအရာ သို့မဟုတ် အရည်အသွေးကို အားကျမှုကြောင့် သို့မဟုတ် သူတို့ထက်သာအောင် ပိုကောင်းသောအရာကို မည်သို့ရယူရန် စိတ်စွဲပြီး တွေးတော စီစဉ်ခြင်း။ အကျိုးဆက်မှာ အခြားသူများ၏ အောင်မြင်မှုများအပေါ် အပျက်သဘော အတွေးများ အမြဲစွန်းထင်းနေသောကြောင့် စိတ်ငြိမ်းချမ်းမှု လုံးဝ သို့မဟုတ် ပျော်ရွှင်မှု မရှိတော့ပါ။
၂။ သူတစ်ပါးကို ပျက်စီးစေလိုသောစိတ်ဖြင့် တွေးခြင်း - အခြားတစ်ယောက်ကို ထိခိုက်နာကျင်အောင် သို့မဟုတ် သူတို့ပြုမူပြောဆိုသောအရာ တစ်ခုခုအတွက် သူတို့ကို တုံ့ပြန်နိုင်အောင် တွေးတောကြံစည်ခြင်း။ အကျိုးဆက်မှာ လုံခြုံမှု လုံးဝ မရှိတော့ပါ။ သက်သက်သာသာ မနေနိုင်တော့ပါ။ အကြောက်လွန်မှု၊ ကြောက်ရွံ့မှုတို့ အမြဲဖြစ်နေပြီး အခြားသူများကလည်း မိမိအား ပြန်လည်ကြံစည်မည်ကို ကြောက်လန့်နေပါသည်။
၃။ ရန်ငြိုးဖြင့် တစ်ဖက်စောင်းနင်း တွေးခြင်း - မှန်ကန်သောအရာနှင့် ဆန့်ကျင်ပြီး ခေါင်းမာစွာ တွေးတောရုံသာမက မိမိနှင့် သဘောထားမတိုက်ဆိုင်သူများနှင့် စိတ်ထဲတွင် ငြင်းခုန်နေပြီး သူတို့ကို ရန်လိုသောပုံစံဖြင့် ချိုးနှိမ်ခြင်း။ အကျိုးဆက်မှာ စိတ်ကို ပိတ်ပင်ထားမိပြီး အကျိုးပြု အကြံဉာဏ်များကို လုံးဝ လက်မခံတော့ပါ။ ကျွန်ုပ်တို့၏ နှလုံးသားများမှာလည်း အခြားသူများကို တံခါးပိတ်လိုက်သည်။ မိမိအတွက်သာ အမြဲတွေးနေပြီး မိမိသာအမြဲ မှန်သည်ဟု ထင်လာပါသည်။ မသိနားမလည်ဘဲ မိုက်မဲနေမိပါသည်။
မည်သည့် ဘာသာတရား သို့မဟုတ် ယုံကြည်မှု ရှိသည်ဖြစ်စေ ဤ ၁၀ ချက်ကို ရှောင်ရှားခြင်းသည် ပိုမိုပျော်ရွှင်သော ဘဝကို ရရှိလိုသူတိုင်းအတွက် ဆီလျော်မှု ရှိနေပါသည်။
အပျက်သဘော အပြုအမူ ဆယ်မျိုးကို အကျယ်ရှင်းပြခြင်း
အပျက်သဘော အပြုအမူ ဆယ်ချက်သည် ကျွန်ုပ်တို့ ရှောင်ရှားရန်လိုသော အပြုအမူ ဆယ်မျိုးကို ကျယ်ကျယ်ပြန့်ပြန့် ဖော်ပြနေပါသည်။ မိမိအပြုအမူနှင့် ယင်း၏ အကျိုးဆက်များကို တတ်နိုင်သလောက် ကျယ်ကျယ်ပြန့်ပြန့် တွေးကြည့်ရန်လိုပါသည်။ ထိုသို့တွေးစရာ နမူနာအချို့ကို ဖော်ပြလိုက်ပါသည်။ သို့သော် ဤစာရင်းတွင် လူတိုင်းက ထပ်ဖြည့်နိုင်မည်ဟု ယုံကြည်ပါသည်။
၁။ သူတစ်ပါးအသက်ကို သတ်ဖြတ်ခြင်း - အခြားသူများကို ကြမ်းတမ်းစွာ ရိုက်ပုတ်၊ ဆက်ဆံခြင်း။ တစ်ယောက်ယောက် အကူအညီလိုသောအခါ ကာယလုပ်အားဖြင့် ကူညီရမည်ကို လျစ်လျူရှုခြင်း။ နာမကျန်းသူ၊ အိုမင်းမစွမ်းသူတို့နှင့် အတူသွားသောအခါ လမ်းမြန်မြန် လျှောက်ခြင်း။ သဘာဝ ပတ်ဝန်းကျင်ကို ညစ်ညမ်းစေခြင်း၊ အထူးသဖြင့် ကလေးများကဲ့သို့ ဆေးလိပ် မသောက်သူများအနီး၌ ဆေးလိပ်သောက်ခြင်း အပါအဝင် ရုပ်ပိုင်းဆိုင်ရာ အန္တရာယ် တစ်ခုခု ဖြစ်စေခြင်း
၂။ မပေးသောအရာကိုယူခြင်း - အင်တာနက်မှ တရားမဝင် ဒေါင်းလုတ်ယူခြင်း။ တုပခြင်း။ လိမ်လည်ခြင်း။ အခွန်ရှောင်ခြင်း။ အခြားသူများ၏ ကိုယ်ရေးကိုယ်တာကို ကျူးကျော်ခြင်းနှင့် မိမိ၏ အိမ်ထောင်ဖက် သို့မဟုတ် သူငယ်ချင်း၏ ပန်းကန်ထဲမှ ခွင့်မတောင်းဘဲ ယူမြည်းခြင်း
၃။ မှားယွင်းသော လိင်မှုကိစ္စများ ကျူးလွန်ခြင်း - တစ်ယောက်ယောက်ကို လိင်ပိုင်းဆိုင်ရာ နှောင့်ယှက်ခြင်း။ လိင်ဆက်ဆံရာတွင် မိမိ အိမ်ထောင်ဖက်၏ လိုအပ်ချက်ကို လျစ်လျူရှုခြင်း။ ချစ်ခင်မှု မဆိုစလောက် သို့မဟုတ် အလွန်အမင်း ပေးခြင်း။
၄။ လိမ်လည်ခြင်း - တစ်စုံတစ်ယောက်နှင့် ဆက်ဆံရေးတွင် သူတို့အပေါ် မိမိခံစားချက်အမှန် သို့မဟုတ် ရည်ရွယ်ချက်အမှန်ကို လိမ်ခြင်း
၅။ သွေးခွဲစကားပြောခြင်း - တစ်စုံတစ်ယောက်က ပါဝင်ပတ်သက်နေသော သို့မဟုတ် ထိုသို့ပါဝင်ပတ်သက်ရန် စီစဉ်နေသော အပြုသဘော သို့မဟုတ် ကျင့်ဝတ်မငြိစွန်းသော အရာတစ်ခုခုကို ဝေဖန်ခြင်းနှင့် ထိုသို့ ပတ်သက်မှုကို အားမပေးခြင်း
၆။ ကြမ်းတမ်းစွာ ပြောခြင်း - လူတို့ကို အော်ငေါက်ခြင်း။ ဒေါသသံဖြင့် စကားပြောခြင်း။ စိတ်ထိခိုက်လွယ်သူ တစ်ယောက်ကို စာနာမှုမရှိဘဲ သို့မဟုတ် ဝေဖန်ပြစ်တင်ပြီး ပြောခြင်း။ မပြောသင့်သူ သို့မဟုတ် မပြောသင့်သောအချိန်၌ စော်ကားသော သို့မဟုတ် ထေ့ငေါ့သောစကား ပြောခြင်း။
၇။ အတင်းအဖျင်း ပြောခြင်း - အခြားသူများ၏ ယုံကြည်မှုကို သစ္စာဖောက်ကာ သူတို့၏ အတွင်းရေး လျှို့ဝှက်ချက်များကို အခြားသူများအား ထုတ်ပြောခြင်း။ အသေးအဖွဲ ကိစ္စများကို အခြားသူများအား အထူးသဖြင့် ညဘက်တွင် စာတို သို့မဟုတ် မက်ဆေ့ခ်ျပို့ခြင်း။ နေ့စဉ်ဘဝ၏ အသေးအဖွဲ ကိစ္စများအကြောင်း ဓာတ်ပုံနှင့် မှတ်ချက်များကို လူမှုကွန်ရက် မီဒီယာတွင် တင်ခြင်း။ အခြားသူများ စကားပြော၍ မပြီးသေးမီ ကြားဖြတ်ပြောခြင်း။ အလေးအနက် စကားဝိုင်းများတွင် မိုက်မဲသော အရာများ ပြောခြင်း
၈။ လိုချင်သောစိတ်ဖြင့် တွေးခြင်း - စားသောက်ဆိုင်တွင် အတူစားနေသူက သူတို့ မှာထားသောအရာကို မြည်းကြည့်ရန် သို့မဟုတ် တစ်ငုံသောက်ကြည့်ရန် စိတ်ကူးခြင်း။ အခြားသူများ၏ စိတ်လှုပ်ရှားဖွယ်ကောင်းသော အချိန်များကို လူမှုကွန်ရက်မီဒီယာမှ ဓာတ်ပုံများ၊ ပို့စ်များ မြင်တွေ့ဖတ်ရှုရသောအခါ မိမိကိုယ်ကို ဝမ်းနည်းပြီး မိမိဆိုလျှင် မည်မျှနာမည်ကြီးပြီး ပျော်ရွှင်နေမလဲဟု အားကျပြီးတွေးခြင်း
၉။ သူတစ်ပါးကို ပျက်စီးစေလိုသောစိတ်ဖြင့် တွေးခြင်း - တစ်ယောက်ယောက်က ကြမ်းတမ်း ဆိုးရွားသောကိစ္စတစ်ခုခု လာပြောနေသာအခါ ဘာပြန်ပြောရမှန်းမသိပါက ထိုသူနာကျင်အောင် ပြန်ပြောလိုက်သင့်ကြောင်း နောက်ပိုင်းမှ စိတ်ထဲတွင် တွေးမိခြင်း
၁၀။ ရန်ငြိုးဖြင့် တစ်ဖက်စောင်းနင်း တွေးခြင်း - မိမိကိုယ်တိုင် လုပ်နိုင်သည်ဟု ထင်သောအရာတစ်ခုကို တစ်ယောက်ယောက်က ကူညီရန်ပြောလာသောအခါ အပျက်သဘော၊ ရန်လိုသော အတွေးဖြင့် တွေးခြင်း။ နယ်ပယ်တစ်ခုကို မိမိက စိတ်မဝင်စားခြင်း၊ အရေးမကြီးဟုထင်ခြင်း ရှိသော်လည်း ထိုအန္တရာယ် မရှိသော နယ်ပယ်တွင် တိုးတက်အောင် ကြိုးစားနေသူ တစ်ယောက်အား တုံးအသည်ဟု တွေးခြင်း။
မိမိကိုယ်ကို အပျက်သဘောဖြစ်အောင် ပြုမူခြင်း
မိမိကိုယ်ကို ပြုမူသောနည်းများသည် အခြားသူများကို ရည်ရွယ်သော အပြုအမူ အတိုင်း အပျက်သဘော ဖြစ်နိုင်ပါသည်။ ပိုမို ပျော်ရွှင်သောဘဝကို ရရှိရန်အတွက် ထိုအပျက်သဘော ပုံစံများကို အသိအမှတ်ပြုကာ ပြုပြင်ရန် ကြိုးစားရပါမည်။ ထို့ပြင် အပျက်သဘော ပြုမူနည်းဆယ်ချက်သည် ကျွန်ုပ်တို့ ရပ်တန့်ရန်လိုသည့် အပြုအမူများလည်း ဖြစ်သည်ဟု ဆိုလိုပါသည်။
၁။ သူတစ်ပါးအသက်ကို သတ်ဖြတ်ခြင်း - အလွန်အကျွံ အလုပ်လုပ်ခြင်း၊ မလောက်မင စားသောက်ခြင်း၊ အားကစား မလှုပ်ရှားခြင်း၊ လုံလောက်အောင် မအိပ်စက်ခြင်းတို့ဖြင့် မိမိကိုယ်ကို ရုပ်ပိုင်းဆိုင်ရာအရ နှိပ်စက်ခြင်း
၂။ မပေးသောအရာကိုယူခြင်း - အသေးအဖွဲ ကိစ္စများတွင် ငွေကြေးဖြုန်းတီးခြင်း သို့မဟုတ် မိမိကိုယ်တိုင်အတွက် ငွေကြေး ချွေတာရန် မလိုသောအချိန်တွင် စေးနှဲခြင်း သို့မဟုတ် ချွေတာခြင်း
၃။ မှားယွင်းသော လိင်မှုကိစ္စများ ကျူးလွန်ခြင်း - မိမိကျန်းမာရေးကို ထိခိုက်စေနိုင်သော လိင်မှုကိစ္စများတွင် ပါဝင်ခြင်း သို့မဟုတ် ညစ်ညမ်းအကြောင်းရပ်များဖြင့် စိတ်ကို ညစ်နွမ်းစေခြင်း
၄။ လိမ်လည်ခြင်း - မိမိ၏ ခံစားချက် သို့မဟုတ် စိတ်ဓာတ်စေ့ဆော်မှုများနှင့် ပတ်သက်ပြီး မိမိကိုယ်ကို လိမ်ညာခြင်း
၅။ သွေးခွဲစကားပြောခြင်း - အမြဲတမ်း ငြီးတွားခြင်းဖြင့် အခြားသူများက မိမိနှင့် ရှိရသည်ကို မနှစ်သက်ဘဲ ရှောင်ခွာလာအောင် မနှစ်မြို့ဖွယ် စကားများ ပြောခြင်း
၆။ ကြမ်းတမ်းစွာ ပြောခြင်း - မိမိကိုယ်ကို နှုတ်ဖြင့် နှိပ်စက်ခြင်း
၇။ အကျိုးမဲ့ ပြောခြင်း - မိမိ၏ ကိုယ်ရေးကိုယ်တာ ကိစ္စများ၊ သံသယနှင့် စိုးရိမ်မှုများကို စဉ်းစားဆင်ခြင်မှု မရှိဘဲ ပြောခြင်း သို့မဟုတ် လူမှုကွန်ရက် မီဒီယာ ကြည့်ခြင်း၊ ပျင်းစရာ ဗီဒီယိုဂိမ်းများ ကစားခြင်း၊ အင်တာနက်ကြည့်ခြင်းတို့ဖြင့် အကန့်အသတ်မရှိ အချိန်ဖြုန်းခြင်း
၈။ လိုချင်သောစိတ်ဖြင့် တွေးခြင်း - ပြီးပြည့်စုံလိုမှုကြောင့် မိမိကိုယ်ကို မည်သို့အောင်နိုင်ရန် တွေးခြင်း
၉။ သူတစ်ပါးကို ပျက်စီးစေလိုသောစိတ်ဖြင့် တွေးခြင်း - မိမိသည် မည်မျှ ဆိုးရွားကြောင်း၊ ပျော်ရွှင်ရန် မထိုက်တန်ကြောင်း အပြစ်ရှိသောစိတ်ဖြင့် တွေးခြင်း
၁၀။ ရန်ငြိုးဖြင့် တစ်ဖက်စောင်းနင်း တွေးခြင်း - မိမိကိုယ်တိုင် တိုးတက်ရန် သို့မဟုတ် အခြားသူများကို ကူညီရန် ကြိုးစားမှုအတွက် မိမိသည် တုံးအကြောင်း တွေးခြင်း။
ကျွန်ုပ်တို့၏ အပျက်သဘော ပုံစံများကို ဖြေရှင်းနည်း
အတိတ်က ကျွန်ုပ်တို့၏ အပျက်သဘော အပြုအမူများကို စတင် လေ့လာသောအခါ မိမိကိုယ်ကို အပျက်သဘော မခံစားမိရန် အရေးကြီးပါသည်။ အပြစ်ရှိသည်ဟု ခံစားမိကာ ထိတ်လန့်မည့်အစား ထိုသို့ ပြုမူမိသည်မှာ မိမိအပြုအမူ၏ သက်ရောက်မှုကို လျစ်လျုရှုမိကာ မသိနားမလည်မှုကြောင့် ဆိုသည်ကို လက်ခံသင့်ပါသည်။ ကျွန်ုပ်တို့သည် မွေးကတည်းက ဆိုးသွမ်းခြင်းကြောင့် မဟုတ်ဘဲ အနှောင့်အယှက် ပေးသော စိတ်ခံစားချက်များ၏ တွန်းပို့မှုကြောင့် စိတ်လိုက်မာန်ပါ ဖြစ်ခဲ့ပါသည်။ မိမိပြုခဲ့သောအရာကို နောင်တရပြီး မဖြစ်ခဲ့သင့်ကြောင်း ဆန္ဒ ဖြစ်လာပါသည်။ သို့သော် အတိတ်ကို မပြောင်းလဲနိုင်ကြောင်း သဘောပေါက်ပါသည်။ ပြီးခဲ့သောအရာသည် အတိတ် ဖြစ်သော်လည်း ယခုအခါ ထိုသို့သော အပြုအမူမျိုး ထပ်မဆောင်ရွက်ရန် အတတ်နိုင်ဆုံး ကြိုးစားမည်ဟု စိတ်ပိုင်းဖြတ်နိုင်ပါသည်။ ထိုအခါ ဘဝတွင် ရရှိလိုသော အပြုသဘော လမ်းကြောင်းကို အတည်ပြုကာ မေတ္တာ၊ ကရုဏာ အခြေခံသည့် အပြုသဘော ဆောင်ရွက်ချက်များ တတ်နိုင်သလောက် ကြိုးစားဆောင်ရွက်ရပါမည်။ ထိုအခါ အပျက်သဘော အားများကို ချေဖျက်ကာ နောက်ဆုံးတွင် အသာစီးရစေမည့် အပြုသဘော အလေ့အထများ ပိုမို ပွားများလာပါသည်။
ထို့နောက် မိမိကြုံတွေ့ရသော လူများ၊ အခြေအနေများကို စတင်ပြီး ဖြည်းဖြည်းချင်း တုံ့ပြန်လာနိုင်ပါသည်။ ထိုနည်းဖြင့် အပျက်သဘော အလေ့အထဖြင့် ပြုမူလိုစိတ်နှင့် အမှန်တကယ် ပြုမူခြင်းတို့အကြား အချိန်ကွက်လပ်ကို ရရှိလာပါသည်။ အကျိုးရှိမည့်အရာ၊ အန္တရာယ် ရှိမည့်အရာ၊ အပျက်သဘော ကိုယ်၊ နှုတ်၊ စိတ် ပြုမူဆောင်ရွက်မှုမှ ရှောင်ရှားရန် ကူညီမည့်အရာကို ထိုအချိန်လေးတွင် ဆုံးဖြတ်လာနိုင်ပါသည်။ အိန္ဒိယဗုဒ္ဓဘာသာ ဆရာတော်ကြီး ရှန်တီဒေဝ ဟောကြားသလိုပင် ‘‘သစ်တုံးကဲ့သို့ကျင့်ပါ။’’ နားလည်မှု၊ မေတ္တာ၊ ကရုဏာ၊ မိမိနှင့် အခြားသူများအား လေးစားမှုတို့ဖြင့် ထိုကဲ့သို့ ကျင့်နိုင်ပါသည်။ အရာအားလုံး ချိုးနှိမ်ထားရမည်ဟု မဆိုလိုပါ။ ထိုအခါ စိုးရိမ်တင်းကျပ် လာရုံသာ ရှိပါသည်။ နောင်အခါ နောင်တရမည့်ကိစ္စကို ပြုမူ၊ ပြောဆိုစေမည့် အဖျက်စွမ်းအားကို ဉာဏ်ပညာနှင့် စာနာတတ်သောစိတ်ဖြင့် ဖယ်ရှားနိုင်ပါသည်။ ထိုအခါ အပြုသဘော စိတ်ခံစားချက်များနှင့် နားလည်မှုတို့ဖြင့် အပြုသဘော သက်ရောက်အောင် လွတ်လပ်စွာ ဆောင်ရွက်လာနိုင်ပါတော့သည်။
အကျဉ်းချုပ်
အပျက်သဘော အပြုအမူများမှ ရှောင်ရှားလိုက်သောအခါ အခြားသူများကို အကျိုးရှိစေရုံသာမက နောက်ဆုံးတွင် မိမိအတွက်လည်း အကျိုးရှိပါသည်။ မိမိ၏ မပျော်ရွှင်မှု အကြောင်းရင်းမှာ မိမိ၏ အပြုအမူဖြစ်ကြောင်း သိလာသောအခါ အပျက်သဘောနှင့် အဆိုးဖြစ်သော အလေ့အထနှင့် ဆောင်ရွက်ချက်များကို ဝမ်းမြောက်စွာ အလိုလို ရှောင်ရှားလာနိုင်ပါသည်။ ထိုအလေ့အထများ မဖြစ်အောင် ရပ်တန့်လိုက်သောအခါ အခြားသူများနှင့် ဆက်ဆံရေး တိုးတက်လာပြီး ပို၍ စစ်မှန်လာပါသည်။ တစ်ချိန်တည်းမှာပင် စိတ်သက်သာရာ ရလာပါသည်။ စိတ်ငြိမ်းချမ်းမှု အမှန်တကယ် လိုချင်ပါက ကိုယ်၊ နှုတ်၊ စိတ် အပျက်သဘောများကို ကြိုးစားဖယ်ရှားရပါမည်။ ထိုအခါ ကျွန်ုပ်တို့၏ ဘဝအရည်အသွေးကို သိသာထင်ရှားစွာ တိုးတက်ကောင်းမွန်စေပါလိမ့်မည်။