ಇಂದಿನ ಜಗತ್ತಿನಲ್ಲಿರುವ ಬೌದ್ಧಧರ್ಮ

ಚೀನಾ ಪ್ರಜೆಗಳ ಗಣರಾಜ್ಯ 

ಕಳೆದ 2,000 ವರ್ಷಗಳ ಚೀನೀ ಇತಿಹಾಸದಲ್ಲಿ, ಬೌದ್ಧಧರ್ಮವು ಪ್ರಮುಖ ಪಾತ್ರವನ್ನು ವಹಿಸಿದೆ ಮತ್ತು ಪೂರ್ವ ಏಷ್ಯಾದಲ್ಲಿ ಬೌದ್ಧಧರ್ಮದ ಹರಡುವಿಕೆಯಲ್ಲಿ ಚೀನೀ ಬೌದ್ಧಧರ್ಮವು ಕ್ರಿಯಾತ್ಮಕ ಪಾತ್ರವನ್ನು ವಹಿಸಿದೆ. ಆರಂಭಿಕ ತಾಂಗ್ ರಾಜವಂಶವು (618-907 CE) ಕಲೆ ಮತ್ತು ಸಾಹಿತ್ಯದ ಪ್ರವರ್ಧಮಾನದೊಂದಿಗೆ ಬೌದ್ಧಧರ್ಮದ ಸುವರ್ಣಯುಗವನ್ನು ಕಂಡಿತು. 

1960 ಮತ್ತು 70 ರ ದಶಕದ ಸಾಂಸ್ಕೃತಿಕ ಕ್ರಾಂತಿಯ ಸಮಯದಲ್ಲಿ, ಹೆಚ್ಚಿನ ಚೀನೀ ಬೌದ್ಧ ಮಠಗಳನ್ನು ನಾಶಮಾಡಲಾಯಿತು ಮತ್ತು ಉನ್ನತ ತರಬೇತಿಯನ್ನು ಪಡೆದ ಸನ್ಯಾಸಿಗಳು, ಸನ್ಯಾಸಿನಿಗಳು ಮತ್ತು ಗುರುಗಳನ್ನು ಗಲ್ಲಿಗೇರಿಸಲಾಯಿತು ಅಥವಾ ಜೈಲಿನಲ್ಲಿರಿಸಲಾಯಿತು. ಟಿಬೆಟ್ ಮತ್ತು ಒಳ ಮಂಗೋಲಿಯಾದಲ್ಲಿ, ಬೌದ್ಧಧರ್ಮದ ನಿಗ್ರಹವು ಇನ್ನಷ್ಟು ತೀವ್ರವಾಗಿತ್ತು. ಚೀನಾದಲ್ಲಿ ಸುಧಾರಣೆಯಾದಂತೆ ಮತ್ತು ಹೊರಜಗತ್ತಿಗೆ ಮತ್ತಷ್ಟು ತೆರೆದಂತೆ, ಸಾಂಪ್ರದಾಯಿಕ ಧರ್ಮಗಳಲ್ಲಿನ ಆಸಕ್ತಿಯು ಪುನಃ ಬೆಳೆಯಲಾರಂಭಿಸಿತು. ಹೊಸ ದೇವಾಲಯಗಳನ್ನು ನಿರ್ಮಿಸಲಾಯಿತು ಮತ್ತು ಹಳೆಯ ದೇವಾಲಯಗಳನ್ನು ಪುನಃಸ್ಥಾಪಿಸಲಾಯಿತು. ಮಠಗಳಿಗೆ ಸೇರಿದ ಹೆಚ್ಚಿನ ಜನರು ಗ್ರಾಮೀಣ ಪ್ರದೇಶದ ಬಡ ಮತ್ತು ಅವಿದ್ಯಾವಂತ ಕುಟುಂಬಗಳಿಗೆ ಸೇರಿದ್ದು, ಶಿಕ್ಷಣದ ಮಟ್ಟವು ಕಡಿಮೆಯಾಗಿರುವುದು. ಅನೇಕ ದೇವಾಲಯಗಳು ಕೇವಲ ಪ್ರವಾಸಿ ತಾಣಗಳಾಗಿ ಅಸ್ತಿತ್ವದಲ್ಲಿದ್ದು, ಸನ್ಯಾಸಿಗಳು ಕೇವಲ ಟಿಕೆಟ್ ಸಂಗ್ರಹಕಾರರು ಮತ್ತು ದೇವಾಲಯದ ಪರಿಚಾರಕರಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ.  

ಇಂದು ಚೀನೀಯರು, ಹೆಚ್ಚಿನ ಸಂಖ್ಯೆಯಲ್ಲಿ ಬೌದ್ಧಧರ್ಮದಲ್ಲಿ ಆಸಕ್ತಿಯನ್ನು ತೋರಿಸಿದ್ದಾರೆ, ಟಿಬೆಟಿಯನ್ ಬೌದ್ಧಧರ್ಮದ ಮೇಲಿನ ಭಕ್ತಿಯೂ ಗಮನಾರ್ಹವಾಗಿ ಹೆಚ್ಚುತ್ತಿದೆ. ಪ್ರಸ್ತುತವಾಗಿ ಬೌದ್ಧರ ಜನಸಂಖ್ಯೆಯು 20%ರಷ್ಟು ಇದೆ ಎಂದು ಅಂದಾಜಿಸಲಾಗಿದೆ, ಮತ್ತು ಚೀನಾದಾದ್ಯಂತ, ದೇವಾಲಯಗಳು ತೆರೆದಿರುವ ಸಮಯಗಳಲ್ಲಿ ಸಂಪೂರ್ಣವಾಗಿ ಕಾರ್ಯನಿರತವಾಗಿರುತ್ತವೆ. ಜನರು ಶ್ರೀಮಂತರಾದಂತೆ ಮತ್ತು ಕಾರ್ಯನಿರತರಾದಂತೆ, ತಮ್ಮ ಒತ್ತಡದಿಂದ ತಪ್ಪಿಸಿಕೊಳ್ಳಲು, ಚೀನೀ ಮತ್ತು ಟಿಬೆಟಿಯನ್ ಬೌದ್ಧಧರ್ಮದತ್ತ ತಿರುಗುತ್ತಿದ್ದಾರೆ. ವಿಶೇಷವಾಗಿ, ಚೀನೀ ಭಾಷೆಯಲ್ಲಿ ಕಲಿಸುವ ಟಿಬೆಟಿಯನ್ ಲಾಮಾಗಳ ಸಂಖ್ಯೆಯು ಹೆಚ್ಚಾಗಿರುವ ಕಾರಣದಿಂದಾಗಿ, ಟಿಬೆಟಿಯನ್ ಬೌದ್ಧಧರ್ಮದ ಬಗ್ಗೆ, ಅನೇಕ ಹಾನ್ ಚೀನೀಯರಲ್ಲಿ ಪ್ರತ್ಯೇಕವಾದ ಆಸಕ್ತಿಯಿದೆ.  

ತೈವಾನ್, ಹಾಂಗ್ ಕಾಂಗ್ ಮತ್ತು ಸಾಗರೋತ್ತರ ಚೀನೀ ಪ್ರದೇಶಗಳು 

ಚೀನಾದಿಂದ ಪಡೆದ ಪೂರ್ವ ಏಷ್ಯಾದ ಮಹಾಯಾನ ಬೌದ್ಧ ಸಂಪ್ರದಾಯಗಳು ತೈವಾನ್ ಮತ್ತು ಹಾಂಗ್ ಕಾಂಗ್‌ನಲ್ಲಿ ಅತ್ಯಂತ ಪ್ರಬಲವಾಗಿವೆ. ತೈವಾನ್ನಲ್ಲಿ ಸನ್ಯಾಸಿಗಳು ಮತ್ತು ಸನ್ಯಾಸಿನಿಗಳಿಂದ ಕೂಡಿದ ಬಲವಾದ ಸನ್ಯಾಸತ್ವದ ಸಮುದಾಯವಿದ್ದು, ಇದನ್ನು ಸಾಮಾನ್ಯ ಸಮುದಾಯವು ಉದಾರವಾಗಿ ಬೆಂಬಲಿಸುತ್ತಿದೆ. ಸಮಾಜದ ಕಲ್ಯಾಣಕ್ಕಾಗಿ, ಬೌದ್ಧ ವಿಶ್ವವಿದ್ಯಾನಿಲಯಗಳು ಮತ್ತು ಬೌದ್ಧ ಕಾರ್ಯಕ್ರಮಗಳಿವೆ. ಹಾಂಗ್ ಕಾಂಗ್ನಲ್ಲಿ ಕೂಡ ಪ್ರವರ್ಧಮಾನಕ್ಕೆ ಬರುತ್ತಿರುವ ಸನ್ಯಾಸತ್ವದ ಸಮುದಾಯವಿದೆ. ಮಲೇಷ್ಯಾ, ಸಿಂಗಾಪುರ್, ಇಂಡೋನೇಷಿಯಾ, ಥೈಲ್ಯಾಂಡ್ ಮತ್ತು ಫಿಲಿಪೈನ್ಸ್‌ನಲ್ಲಿರುವ ಸಾಗರೋತ್ತರ ಚೀನೀ ಬೌದ್ಧ ಸಮುದಾಯಗಳಲ್ಲಿ, ಪೂರ್ವಜರ ಕಲ್ಯಾಣಕ್ಕಾಗಿ ಮತ್ತು ಜೀವಂತವಾಗಿರುವವರ ಸಮೃದ್ಧಿ ಮತ್ತು ಸಂಪತ್ತಿಗಾಗಿ ಪ್ರಾರ್ಥಿಸುವ ಸಮಾರಂಭಗಳಿಗೆ ಪ್ರಾಧಾನ್ಯ ನೀಡಲಾಗುತ್ತದೆ. ಬೌದ್ಧ ಧರ್ಮಗುರುಗಳು ಭಾವಪರವಶತೆಯಲ್ಲಿ ಮಾತನಾಡಲು ಅನೇಕ ಮಾಧ್ಯಮಗಳಿವೆ ಮತ್ತು ಸಾಮಾನ್ಯ ಸಮುದಾಯವು ಆರೋಗ್ಯ ಮತ್ತು ಮಾನಸಿಕ ಸಮಸ್ಯೆಗಳಿಗಾಗಿ ಇವರ ಬಳಿ ಸಲಹೆಗಾಗಿ ಹೋಗುತ್ತಾರೆ. "ಏಷ್ಯನ್ ಹುಲಿ" ಆರ್ಥಿಕತೆಯ ಹಿಂದೆ ಪ್ರಮುಖ ಪ್ರೇರಕ ಶಕ್ತಿಯಾಗಿರುವ ಚೀನೀ ಉದ್ಯಮಿಗಳು, ತಮ್ಮ ಆರ್ಥಿಕ ಯಶಸ್ಸಿಗಾಗಿ, ಸನ್ಯಾಸಿಗಳಿಗೆ ತಮ್ಮ ಆಚರಣೆಗಳನ್ನು ಮಾಡಲು ಉದಾರವಾದ ದೇಣಿಗೆಗಳನ್ನು ನೀಡುತ್ತಾರೆ. ಜೊತೆಗೆ ತೈವಾನ್, ಹಾಂಗ್ ಕಾಂಗ್, ಸಿಂಗಾಪುರ್ ಮತ್ತು ಮಲೇಷ್ಯಾದಲ್ಲಿ ಟಿಬೆಟಿಯನ್ ಬೌದ್ಧರ ಸಂಖ್ಯೆ ಬೆಳೆಯುತ್ತಿದೆ.  

ದಕ್ಷಿಣ ಕೊರಿಯಾ 

ಬೌದ್ಧಧರ್ಮವು 3 ನೇ ಶತಮಾನದ CE ಯಲ್ಲಿ ಚೀನಾದಿಂದ ಕೊರಿಯಾದ ಪರ್ಯಾಯ ದ್ವೀಪವನ್ನು ತಲುಪಿತು. ಮೂಲಭೂತವಾದಿ ಕ್ರಿಶ್ಚಿಯನ್ ಸಂಘಟನೆಗಳಿಂದ ದಾಳಿಗಳು ಹೆಚ್ಚಿದ್ದರೂ, ದಕ್ಷಿಣ ಕೊರಿಯಾದಲ್ಲಿ ಬೌದ್ಧಧರ್ಮವು ಇನ್ನೂ ಪ್ರಬಲವಾಗಿದೆ. ಕಳೆದ ದಶಕದಲ್ಲಿ, ಇಂತಹ ಗುಂಪುಗಳು ಆರಂಭಿಸಿದ ಸಂಘರ್ಷದಿಂದ ಹೆಚ್ಚಿನ ಸಂಖ್ಯೆಯ ಬೌದ್ಧ ದೇವಾಲಯಗಳು ನಾಶವಾಗಿವೆ ಅಥವಾ ಹಾನಿಗೊಳಗಾಗಿವೆ. ಜನಸಂಖ್ಯೆಯಲ್ಲಿ 23% ಬೌದ್ಧರಿದ್ದಾರೆ. 

ಜಪಾನ್ 

ಬೌದ್ಧಧರ್ಮವು, 5 ನೇ ಶತಮಾನದಲ್ಲಿ ಕೊರಿಯಾದಿಂದ ಜಪಾನ್‌ಗೆ ಆಗಮಿಸಿದ್ದು, ಜಪಾನಿನ ಸಮಾಜ ಮತ್ತು ಸಂಸ್ಕೃತಿಯಲ್ಲಿ ಪ್ರಮುಖ ಪಾತ್ರವನ್ನು ವಹಿಸಿದೆ. 13 ನೇ ಶತಮಾನದಿಂದ, ವಿವಾಹಿತ ದೇವಾಲಯದ ಅರ್ಚಕರ ಸಂಪ್ರದಾಯವಿದ್ದು, ಅವರಿಗೆ ಮದ್ಯಪಾನವನ್ನು ಸೇವಿಸಲು ಯಾವುದೇ ನಿಷೇಧವಿಲ್ಲ. ಕಾಲಕ್ರಮೇಣ, ಅಂತಹ ಅರ್ಚಕರು ಬ್ರಹ್ಮಚಾರಿ ಸನ್ಯಾಸಿಗಳ ಸಂಪ್ರದಾಯವನ್ನು ಬದಲಾಯಿಸಿದರು. ಐತಿಹಾಸಿಕವಾಗಿ, ಜಪಾನ್ ಅನ್ನು ಬೌದ್ಧರ ಸ್ವರ್ಗವೆಂದು ನಂಬಿದ್ದು, ಕೆಲವು ಬೌದ್ಧ ಸಂಪ್ರದಾಯಗಳು ಅತಿಯಾಗಿ ರಾಷ್ಟ್ರೀಯತಾವಾದಿಯಾಗಿವೆ. ಆಧುನಿಕ ಕಾಲದಲ್ಲಿ, ಪ್ರಳಯದ ದಿನದಲ್ಲಿ ನಂಬುವ ಕೆಲವು ಮತಾಂಧ ಪಂಥಗಳು ತಮ್ಮನ್ನು ಬೌದ್ಧರೆಂದು ಕರೆದುಕೊಳ್ಳುತ್ತಿವೆ, ಆದರೆ ಅವುಗಳಿಗೆ ಮತ್ತು ಬುದ್ಧ ಶಾಕ್ಯಮುನಿಯ ಬೋಧನೆಗಳಿಗೆ ಯಾವುದೇ ಸಂಬಂಧವಿಲ್ಲ. 

ಸುಮಾರು 40% ರಷ್ಟು ಜನಸಂಖ್ಯೆಯು ಬೌದ್ಧರು ಎಂದು ಗುರುತಿಸಲಾಗಿದೆ ಮತ್ತು ಹೆಚ್ಚಿನ ಜಪಾನೀಯರು, ಜಪಾನಿನ ಮೂಲ ಧರ್ಮವಾದ ಶಿಂಟೋವಿನ ಜೊತೆಗೆ ಮಿಶ್ರಣವಾದ ಬೌದ್ಧಧರ್ಮದಲ್ಲಿ ನಂಬಿಕೆಯಿಡುತ್ತಾರೆ. ಜನನ ಮತ್ತು ಮದುವೆಗಳನ್ನು ಶಿಂಟೋ ಪದ್ಧತಿಗಳನ್ನು ಅನುಸರಿಸಿ ಆಚರಿಸಲಾಗುತ್ತದೆ, ಆದರೆ ಬೌದ್ಧ ಪುರೋಹಿತರು ಅಂತ್ಯಕ್ರಿಯೆಯ ಆಚರಣೆಗಳನ್ನು ನಡೆಸುತ್ತಾರೆ. 

ಜಪಾನ್‌ನಲ್ಲಿರುವ ದೇವಾಲಯಗಳನ್ನು ಪ್ರವಾಸಿಗರು ಮತ್ತು ಸಂದರ್ಶಕರಿಗಾಗಿ ಸುಂದರವಾಗಿ ಇರಿಸಲ್ಪಟ್ಟಿವೆ, ಆದರೂ ಬಹಳಷ್ಟು ದೇವಾಲಯಗಳು ವಾಣಿಜ್ಯೀಕರಣಗೊಂಡಿವೆ. ಬಹುಪಾಲಾಗಿ, ಪ್ರಾಮಾಣಿಕವಾದ ಅಧ್ಯಯನ ಮತ್ತು ಅಭ್ಯಾಸವು ತೀವ್ರವಾಗಿ ದುರ್ಬಲಗೊಂಡಿದೆ. ವಿಶ್ವದ ಅತಿದೊಡ್ಡ ಬೌದ್ಧ ಸಂಘಟನೆಗಳಲ್ಲಿ ಒಂದಾದ ಸೋಕಾ ಗಕ್ಕೈ. ಜಪಾನ್‌ನಲ್ಲಿ ಹುಟ್ಟಿಕೊಂಡಿತು. 

ಟಿಬೆಟ್ 

ಬೌದ್ಧಧರ್ಮವು 7 ನೇ ಶತಮಾನದ CE ಯಲ್ಲಿಯೇ ಟಿಬೆಟ್‌ಗೆ ಆಗಮಿಸಿತು. ಶತಮಾನಗಳವರೆಗೆ, ರಾಜಮನೆತನದ ಪ್ರೋತ್ಸಾಹ ಮತ್ತು ಶ್ರೀಮಂತರ ಬೆಂಬಲದೊಂದಿಗೆ, ಬೌದ್ಧಧರ್ಮವು ಟಿಬೆಟ್ ಜೀವನದ ವಿವಿಧ ಭಾಗಗಳಲ್ಲಿ ಬೇರೂರಿತು. 

ಚೀನಾ ಪ್ರಜೆಗಳ ಗಣರಾಜ್ಯ ಟಿಬೆಟ್ ಅನ್ನು ವಶಪಡಿಸಿಕೊಂಡ ನಂತರ, ಟಿಬೆಟ್ನಲ್ಲಿ ಬೌದ್ಧಧರ್ಮವನ್ನು ತೀವ್ರವಾಗಿ ನಿಗ್ರಹಿಸಲಾಯಿತು. 6,500 ಮಠಗಳು ಮತ್ತು ಸನ್ಯಾಸಿಗಳ ನಿವಾಸಗಳ ಪೈಕಿ, ಕೇವಲ 150 ಅನ್ನು ಹೊರತುಪಡಿಸಿ, ಉಳಿದವುಗಳನ್ನು ನಾಶಮಾಡಲಾಯಿತು, ಮತ್ತು ಬಹುಪಾಲು ಪಾಂಡಿತ್ಯ ಪಡೆದ ಸನ್ಯಾಸಿಗಳು ಮರಣದಂಡನೆಗೆ ಒಳಗಾದರು ಅಥವಾ ಯಾತನೆ ಶಿಬಿರಗಳಲ್ಲಿ ನಿಧನರಾದರು. ಸಾಂಸ್ಕೃತಿಕ ಕ್ರಾಂತಿಯ ನಂತರ, ಮಠಗಳ ಬಹುಪಾಲು ಪುನರ್ನಿರ್ಮಾಣವು ಮಾಜಿ ಸನ್ಯಾಸಿಗಳು, ಸ್ಥಳೀಯ ಜನರು ಮತ್ತು ದೇಶಭ್ರಷ್ಟ ಟಿಬೆಟಿಯನ್ನರ ಪ್ರಯತ್ನಗಳ ಮೂಲಕ ಆಗಿದೆ, ಸರ್ಕಾರವು ಕೇವಲ ಎರಡು ಅಥವಾ ಮೂರರ ಪುನರ್ನಿರ್ಮಾಣಕ್ಕೆ ಸಹಾಯ ಮಾಡಿದೆ.  

ಚೀನೀ ಕಮ್ಯುನಿಸ್ಟ್ ಸರ್ಕಾರವು ನಾಸ್ತಿಕವಾಗಿದೆ, ಆದರೆ ಐದು "ಮಾನ್ಯತೆ ಪಡೆದ ಧರ್ಮಗಳನ್ನು" ಅನುಮತಿಸುತ್ತದೆ, ಅವುಗಳಲ್ಲಿ ಬೌದ್ಧಧರ್ಮವು ಒಂದಾಗಿದೆ.  ಧಾರ್ಮಿಕ ವಿಷಯಗಳಲ್ಲಿ ಹಸ್ತಕ್ಷೇಪ ಮಾಡುವುದಿಲ್ಲ ಎಂದು ಅವರು ಹೇಳಿಕೊಂಡರೂ, ದಲೈ ಲಾಮಾ ಅವರು ಒಬ್ಬ ಟಿಬೆಟಿಯನ್ ಯುವಕನನ್ನು ಪಂಚನ್ ಲಾಮಾ ಅವರ ಪುನರ್ಜನ್ಮ ಎಂದು ಗುರುತಿಸಿದ ನಂತರ, ಅವನು ಮತ್ತು ಅವನ ಕುಟುಂಬದವರು ತಕ್ಷಣವೇ ಕಣ್ಮರೆಯಾದರು. ನಂತರ, ಚೀನಾ ಸರ್ಕಾರವು ತಮ್ಮದೇ ಆದ ಹುಡುಕಾಟವನ್ನು ಪ್ರಾರಂಭಿಸಿ, ಅರ್ಧ ಚೀನೀ, ಅರ್ಧ ಟಿಬೆಟಿನ ಹುಡುಗನೊಬ್ಬನನ್ನು ಹುಡುಕಿತು. ಅಂದಿನಿಂದ ದಲೈ ಲಾಮಾ ಅವರಿಂದ ಆಯ್ಕೆ ಆದವನು ಎಲ್ಲಿಯೂ ಕಂಡುಬಂದಿಲ್ಲ. 

ಇತ್ತೀಚಿನ ದಿನಗಳಲ್ಲಿ, ಪ್ರತಿಯೊಂದು ಮಠ, ಸನ್ಯಾಸಿ ನಿವಾಸ ಮತ್ತು ದೇವಾಲಯವು ತನ್ನದೇ ಆದ ಸರ್ಕಾರಿ ಕಾರ್ಯ-ತಂಡವನ್ನು ಹೊಂದಿದೆ. ಇವರು ಸಾಧಾರಣ ವಸ್ತ್ರಗಳಲ್ಲಿರುವ ಪೊಲೀಸರಾಗಿದ್ದು, ವಿವಿಧ ಕಾರ್ಯಗಳಲ್ಲಿ "ಸಹಾಯ" ಮಾಡಲು ಇಲ್ಲಿ ಇರುತ್ತಾರೆ. ಇದರರ್ಥ ಅವರು ಸನ್ಯಾಸಿಗಳ ಸಮುದಾಯವನ್ನು ವೀಕ್ಷಿಸುತ್ತಾರೆ ಮತ್ತು ಅವರ ಬಗ್ಗೆ ವರದಿ ನೀಡುತ್ತಾರೆ. ಕೆಲವೊಮ್ಮೆ, ಈ ಕಾರ್ಯ-ತಂಡಗಳು ಸನ್ಯಾಸಿಗಳ ಜನಸಂಖ್ಯೆಯಷ್ಟೇ ದೊಡ್ಡದಾಗಿರಬಹುದು. ಸರ್ಕಾರದ ಹಸ್ತಕ್ಷೇಪದ ಹೊರತಾಗಿ, ಟಿಬೆಟ್‌ನಲ್ಲಿ ಬೌದ್ಧರು ಎದುರಿಸುತ್ತಿರುವ ಮತ್ತೊಂದು ಪ್ರಮುಖ ಸಮಸ್ಯೆಯೆಂದರೆ ಅರ್ಹ ಶಿಕ್ಷಕರ ಕೊರತೆ. ಸನ್ಯಾಸಿಗಳು, ಸನ್ಯಾಸಿನಿಯರು ಮತ್ತು ಸಾಮಾನ್ಯ ಜನರು ಹೆಚ್ಚಿನದನ್ನು ಕಲಿಯಲು ಉತ್ಸುಕರಾಗಿದ್ದಾರೆ, ಆದರೆ ಬಹಳಷ್ಟು ಶಿಕ್ಷಕರು ಕೇವಲ ಸೀಮಿತ ತರಬೇತಿಯನ್ನು ಹೊಂದಿದ್ದಾರೆ. ಕಳೆದ ದಶಕದಲ್ಲಿ, ಸರ್ಕಾರವು ಲಾಸಾ ಬಳಿ ಬೌದ್ಧ "ವಿಶ್ವವಿದ್ಯಾಲಯ"ವೊಂದನ್ನು ಪ್ರಾರಂಭಿಸಿತು. ಇದು ಯುವ ತುಲ್ಕುಗಳಿಗೆ ತರಬೇತಿಯನ್ನು ನೀಡುವ ಶಾಲೆಯಾಗಿ ಕಾರ್ಯನಿರ್ವಹಿಸುತ್ತದೆ, ಅಲ್ಲಿ ಅವರು ಟಿಬೆಟಿಯನ್ ಭಾಷೆ, ಕ್ಯಾಲಿಗ್ರಫಿ, ವೈದ್ಯಶಾಸ್ತ್ರ ಅಕ್ಯುಪಂಕ್ಚರ್ ಮತ್ತು ಕೆಲವು ಬೌದ್ಧ ತತ್ತ್ವಶಾಸ್ತ್ರವನ್ನು ಕಲಿಯುತ್ತಾರೆ. ಡಿಜಿಟಲ್ ಯುಗವು ಯುವ ಟಿಬೆಟಿಯನ್ನರನ್ನು ಬೌದ್ಧಧರ್ಮಕ್ಕೆ ಹತ್ತಿರ ತಂದಿದೆ. ಅವರಲ್ಲಿ ಹಲವರು ಬೌದ್ಧ ಬೋಧನೆಗಳು ಮತ್ತು ಕಥೆಗಳನ್ನು ಹಂಚಿಕೊಳ್ಳುವ ‘ವೀ-ಚಾಟ್’ ಮತ್ತು ‘ವೇಯ್ಬೋ’ ಗುಂಪುಗಳ ಸದಸ್ಯರಾಗುತ್ತಾರೆ. ಇಂದು ಬೌದ್ಧ ಧರ್ಮದ ಬಗ್ಗೆ ಹೆಚ್ಚಾಗಿ ಕಲಿಯುವುದನ್ನು, ಒಬ್ಬರ ಗುರುತನ್ನು "ನಿಜವಾದ ಟಿಬೆಟಿಯನ್" ಎಂದು ಬಲಪಡಿಸುವ ಮಾರ್ಗವಾಗಿ ನೋಡಲಾಗುತ್ತದೆ. 

ಪೂರ್ವ ತುರ್ಕಿಸ್ತಾನ್ 

ಪೂರ್ವ ತುರ್ಕಿಸ್ತಾನದಲ್ಲಿ (ಕ್ಸಿನ್‌ಜಿಯಾಂಗ್)ನಲ್ಲಿದ್ದ ಕಲ್ಮಿಕ್ ಮಂಗೋಲರ ಹೆಚ್ಚಿನ ಮಠಗಳನ್ನು ಸಾಂಸ್ಕೃತಿಕ ಕ್ರಾಂತಿಯ ಸಮಯದಲ್ಲಿ ನಾಶ ಮಾಡಲಾಯಿತು. ಈಗ ಹಲವಾರು ಮಠಗಳನ್ನು ಪುನರ್ನಿರ್ಮಾಣ ಮಾಡಲಾಗಿದೆ, ಆದರೆ ಟಿಬೆಟ್‌ಗಿಂತಲೂ ಹೆಚ್ಚಾದ ಶಿಕ್ಷಕರ ಕೊರತೆ ಇಲ್ಲಿದೆ. ಅಧ್ಯಯನ ಸೌಲಭ್ಯಗಳ ಕೊರತೆಯಿಂದ ಯುವ ಸನ್ಯಾಸಿಗಳು ತುಂಬಾ ನಿರುತ್ಸಾಹಗೊಂಡಿದ್ದಾರೆ ಮತ್ತು ಅನೇಕರು ಹೊರಟುಹೋಗಿದ್ದಾರೆ. 

ಒಳ ಮಂಗೋಲಿಯಾ 

ಚೀನಾ ಪ್ರಜೆಗಳ ಗಣರಾಜ್ಯದ ನಿಯಂತ್ರಣದಲ್ಲಿ, ಒಳ ಮಂಗೋಲಿಯಾದಲ್ಲಿದ್ದ ಟಿಬೆಟಿಯನ್ ಬೌದ್ಧರು ಅತ್ಯಂತ ಹೀನಾಯ ಸ್ಥಿತಿಯಲ್ಲಿದ್ದರು. ಸಾಂಸ್ಕೃತಿಕ ಕ್ರಾಂತಿಯ ಸಮಯದಲ್ಲಿ, ಪಶ್ಚಿಮ ಭಾಗದಲ್ಲಿದ್ದ ಹೆಚ್ಚಿನ ಮಠಗಳು ನಾಶವಾದವು. ಮಂಚೂರಿಯಾದ ಭಾಗವಾಗಿದ್ದ ಪೂರ್ವಾರ್ಧದಲ್ಲಿ, ಎರಡನೆಯ ಮಹಾಯುದ್ಧದ ಕೊನೆಯಲ್ಲಿ, ರಷ್ಯನ್ನರು ಉತ್ತರ ಚೀನಾವನ್ನು ಜಪಾನಿಯರಿಂದ ಸ್ವತಂತ್ರಗೊಳಿಸಲು ಸಹಾಯ ಮಾಡುವಾಗ, ಅನೇಕ ಮಠಗಳು ಸ್ಟಾಲಿನ್ನ ಸೈನ್ಯದಿಂದ ನಾಶವಾಗಿದ್ದವು. 700 ಮಠಗಳಲ್ಲಿ ಕೇವಲ 27 ಉಳಿದಿವೆ. 

1980 ರ ದಶಕದಿಂದ, ದೇವಾಲಯಗಳನ್ನು ಮರುಸ್ಥಾಪಿಸಲು ಮತ್ತು ಮಠಗಳನ್ನು ಪುನರ್ನಿರ್ಮಿಸಲು ಪ್ರಯತ್ನಗಳನ್ನು ಮಾಡಲಾಗಿದೆ, ಇದರಲ್ಲಿ ಕೇವಲ ಮಂಗೋಲಿಯನ್ನರು ಮಾತ್ರವಲ್ಲದೆ ಹಾನ್ ಚೀನಿಯರು ಕೂಡ ಭಾಗವಹಿಸಿದ್ದಾರೆ. 

ಮಂಗೋಲಿಯಾ 

ಮಂಗೋಲಿಯಾದಲ್ಲಿ, ಸಾವಿರಾರು ಮಠಗಳು ಇದ್ದವು, ಇವೆಲ್ಲವನ್ನೂ1937 ರಲ್ಲಿ ಸ್ಟಾಲಿನ್ನ ಆದೇಶದ ಮೇಲೆ ಭಾಗಶಃ ಅಥವಾ ಸಂಪೂರ್ಣವಾಗಿ ನಾಶವಾದವು. 1946 ರಲ್ಲಿ, ಒಂದು ಮಠವನ್ನು ಉಲಾನ್ ಬಾತರ್‌ನಲ್ಲಿ ಸಾಂಕೇತಿಕವಾಗಿ ಪುನಃ ತೆರೆಯಲಾಯಿತು ಮತ್ತು 1970 ರ ದಶಕದಲ್ಲಿ ಸನ್ಯಾಸಿಗಳಿಗಾಗಿ ಐದು ವರ್ಷಗಳ ತರಬೇತಿಯ ಒಂದು ಕಾಲೇಜನ್ನು ತೆರೆಯಲಾಯಿತು. ಪಠ್ಯಕ್ರಮವನ್ನು ಹೆಚ್ಚು ಸಂಕ್ಷಿಪ್ತಗೊಳಿಸಲಾಗಿತ್ತು ಮತ್ತು ಮಾರ್ಕ್ಸ್ವಾದಿ ಅಧ್ಯಯನಕ್ಕೆ ಹೆಚ್ಚಿನ ಒತ್ತು ನೀಡಲಾಗಿತ್ತು, ಸನ್ಯಾಸಿಗಳು ಸಾರ್ವಜನಿಕರಿಗಾಗಿ ಸೀಮಿತ ಸಂಖ್ಯೆಯ ಆಚರಣೆಗಳನ್ನು ನಡೆಸಲು ಅನುಮತಿ ನೀಡಲಾಗಿತ್ತು. 1990 ರಲ್ಲಿ ಕಮ್ಯುನಿಸಂನ ಪತನದ ನಂತರ, ದೇಶಭ್ರಷ್ಟ ಟಿಬೆಟಿಯನ್ನರ ಸಹಾಯದಿಂದ ಬೌದ್ಧಧರ್ಮದ ಪ್ರಬಲವಾದ ಪುನರುಜ್ಜೀವನವಾಗಿದೆ. ಅನೇಕ ಹೊಸ ಸನ್ಯಾಸಿಗಳನ್ನು ತರಬೇತಿಗಾಗಿ ಭಾರತಕ್ಕೆ ಕಳುಹಿಸಲಾಗಿದೆ ಮತ್ತು 200 ಕ್ಕೂ ಹೆಚ್ಚು ಮಠಗಳನ್ನು ಸಾಧಾರಣ ಪ್ರಮಾಣದಲ್ಲಿ ಪುನರ್ನಿರ್ಮಿಸಲಾಗಿದೆ. 

1990 ರ ನಂತರ ಮಂಗೋಲಿಯಾದಲ್ಲಿ, ಬೌದ್ಧಧರ್ಮವು ಎದುರಿಸಿದ ಅತ್ಯಂತ ಗಂಭೀರ ಸಮಸ್ಯೆಯೆಂದರೆ ಆಕ್ರಮಣಕಾರಿ ಮಾರ್ಮನ್, ಅಡ್ವೆಂಟಿಸ್ಟ್ ಮತ್ತು ಬ್ಯಾಪ್ಟಿಸ್ಟ್ ಕ್ರಿಶ್ಚಿಯನ್ ಮಿಷನರಿಗಳ ಆಗಮನ, ಅವರು ಇಂಗ್ಲಿಷ್ ಕಲಿಸುವ ಸೋಗಿನಲ್ಲಿ ಇಲ್ಲಿಗೆ ಬಂದರು. ಜನರು ಮತಾಂತರಗೊಂಡರೆ, ಅಮೆರಿಕದಲ್ಲಿ ಅಧ್ಯಯನ ಮಾಡಲು ಅವರಿಗೆ ಹಣ ಮತ್ತು ಸಹಾಯವನ್ನು ನೀಡುತ್ತಾರೆ ಮತ್ತು ಮಂಗೋಲಿನ ಆಡುಮಾತಿನ ಭಾಷೆಯಲ್ಲಿ ಯೇಸುವಿನ ಬಗ್ಗೆ ಸುಂದರವಾದ ಮುದ್ರಿತ, ಉಚಿತ ಕಿರುಪುಸ್ತಕಗಳನ್ನು ನೀಡುತ್ತಾರೆ. ಹೆಚ್ಚು ಹೆಚ್ಚು ಯುವಕರು ಕ್ರಿಶ್ಚಿಯನ್ ಧರ್ಮಕ್ಕೆ ಆಕರ್ಷಿತರಾಗುವುದರೊಂದಿಗೆ, ಬೌದ್ಧ ಸಂಘಟನೆಗಳು ಆಡುಮಾತಿನಲ್ಲಿ ಬೌದ್ಧಧರ್ಮದ ಬಗ್ಗೆ ಮಾಹಿತಿಯನ್ನು ಮುದ್ರಿತ ಸಾಮಗ್ರಿಗಳು, ದೂರದರ್ಶನ ಕಾರ್ಯಕ್ರಮಗಳು ಮತ್ತು ರೇಡಿಯೋ ಕಾರ್ಯಕ್ರಮಗಳ ಮೂಲಕ ವಿತರಿಸಲು ಪ್ರಾರಂಭಿಸಿವೆ.

ಈಗ ಮಂಗೋಲಿಯಾದಲ್ಲಿ ಆಕ್ರಮಣಕಾರಿ ಧಾರ್ಮಿಕ ಮತಾಂತರವನ್ನು ನಿಷೇಧಿಸಲಾಗಿದೆ. 2010 ರಲ್ಲಿ, ಜನಸಂಖ್ಯೆಯ 53% ಬೌದ್ಧರಿದ್ದರು ಮತ್ತು 2.1% ಕ್ರಿಶ್ಚಿಯನ್ನರಿದ್ದರು.  

ಗಡಿಪಾರಾದ ಟಿಬೆಟಿಯನ್ನರು 

ಮಧ್ಯ ಏಷ್ಯಾದ ಟಿಬೆಟಿನ ಸಂಪ್ರದಾಯಗಳಲ್ಲಿ, ಅತ್ಯಂತ ಪ್ರಬಲವಾದದ್ದು ಪರಮಪೂಜ್ಯರಾದ ದಲೈ ಲಾಮಾ ಅವರ ಸುತ್ತವಿರುವ ನಿರಾಶ್ರಿತರ ಸಮುದಾಯದೊಂದಿಗೆ ಇದ್ದು, ಇವರು 1959 ರಲ್ಲಿನ ಚೀನೀ ಮಿಲಿಟರಿಯಿಂದ ಟಿಬೆಟ್ನ ಆಕ್ರಮಣದ ವಿರುದ್ಧ ಎಬ್ಬಿದ ಜನಪ್ರಿಯ ದಂಗೆಯ ಸಮಯದಿಂದ ಭಾರತದಲ್ಲಿ ಆಶ್ರಯ ಪಡುತ್ತಿದ್ದಾರೆ. ಅವರು ಟಿಬೆಟ್‌ನಲ್ಲಿರುವ ಬಹಳಷ್ಟು ಪ್ರಮುಖ ಮಠಗಳನ್ನು ಮತ್ತು ಹಲವಾರು ಸನ್ಯಾಸಿಗಳ ನಿವಾಸಗಳನ್ನು ಪುನರಾರಂಭಿಸಿದ್ದಾರೆ ಮತ್ತು ಸನ್ಯಾಸಿ ವಿದ್ವಾಂಸರು, ಮಾಸ್ಟರ್ ಧ್ಯಾನಿಗಳು ಮತ್ತು ಶಿಕ್ಷಕರಿಗೆ ಸಾಂಪ್ರದಾಯಿಕವಾದ ಪೂರ್ಣ ತರಬೇತಿಯ ಕಾರ್ಯಕ್ರಮವನ್ನು ನೀಡಿದ್ದಾರೆ. ಟಿಬೆಟಿನ ಬೌದ್ಧ ಸಂಪ್ರದಾಯದ ಪ್ರತಿಯೊಂದು ಪದ್ಧತಿಯ ಎಲ್ಲಾ ಅಂಶಗಳನ್ನು ಸಂರಕ್ಷಿಸಲು ಶೈಕ್ಷಣಿಕ, ಸಂಶೋಧನಾ ಮತ್ತು ಪ್ರಕಟಣಾ ಸೌಲಭ್ಯಗಳಿವೆ. 

ಗಡಿಪಾರಾದ ಟಿಬೆಟಿಯನ್ನರು ಲಡಾಖ್ ಮತ್ತು ಸಿಕ್ಕಿಂ ಸೇರಿದಂತೆ ಭಾರತ, ನೇಪಾಳ ಮತ್ತು ಭೂತಾನ್‌ನ ಹಿಮಾಲಯ ಪ್ರದೇಶಗಳಿಗೆ ಶಿಕ್ಷಕರನ್ನು ಕಳುಹಿಸುವ ಮೂಲಕ ಮತ್ತು ವಂಶಾವಳಿಗಳನ್ನು ಮರುಪ್ರಸಾರ ಮಾಡುವ ಮೂಲಕ ಬೌದ್ಧಧರ್ಮವನ್ನು ಪುನರುಜ್ಜೀವನಗೊಳಿಸಲು ಸಹಾಯ ಮಾಡಿದ್ದಾರೆ. ಈ ಪ್ರದೇಶಗಳಲ್ಲಿನ ಅನೇಕ ಸನ್ಯಾಸಿಗಳು ಮತ್ತು ಸನ್ಯಾಸಿನಿಯರು ಟಿಬೆಟಿನ ನಿರಾಶ್ರಿತರ ಮಠಗಳು ಮತ್ತು ಸನ್ಯಾಸಿಗಳ ನಿವಾಸದಲ್ಲಿ ತಮ್ಮ ಶಿಕ್ಷಣ ಮತ್ತು ತರಬೇತಿಯನ್ನು ಪಡೆಯುತ್ತಿದ್ದಾರೆ. 

ನೇಪಾಳ 

ನೇಪಾಳಿನ ಬಹುಪಾಲು ಜನಸಂಖ್ಯೆಯು ಹಿಂದೂಗಳಾಗಿದ್ದರೂ, ಬುದ್ಧನ ಜನ್ಮಭೂಮಿಯಲ್ಲಿ ಪ್ರಬಲವಾದ ಬೌದ್ಧ ಸಾಂಸ್ಕೃತಿಕ ಪ್ರಭಾವಗಳನ್ನು ಇಂದಿಗೂ ಕಾಣಬಹುದು. ನೆವಾರ್ಸ್, ಗುರುಂಗ್ಸ್ ಮತ್ತು ತಮಾಂಗ್‌ಗಳಂತಹ ಜನಾಂಗೀಯ ಗುಂಪುಗಳು ನೇಪಾಳದ ಬೌದ್ಧಧರ್ಮದ ಸಾಂಪ್ರದಾಯಿಕ ರೂಪವನ್ನು ಅಭ್ಯಾಸ ಮಾಡುತ್ತಾರೆ. ಜನಸಂಖ್ಯೆಯಲ್ಲಿ 9% ರಷ್ಟು ಬೌದ್ಧರಿದ್ದಾರೆ. 

ಬೌದ್ಧಧರ್ಮ ಮತ್ತು ಹಿಂದೂ ಧರ್ಮದ ಮಿಶ್ರಣವನ್ನು ಅನುಸರಿಸಿ, ನೇಪಾಳವು ಮಠಗಳೊಳಗೆ ಜಾತಿ ಭೇದಗಳನ್ನು ಇಟ್ಟುಕೊಂಡಿರುವ ಏಕೈಕ ಬೌದ್ಧ ಸಮಾಜವಾಗಿದೆ. ಕಳೆದ 500 ವರ್ಷಗಳಲ್ಲಿ ವಿವಾಹಿತ ಸನ್ಯಾಸಿಗಳ ಅಸ್ಥಿತ್ವವನ್ನು ಕಂಡಿದೆ, ಆನುವಂಶಿಕ ಜಾತಿಯೊಂದಿಗೆ ಅವರು ದೇವಾಲಯದ ಪಾಲಕರು ಮತ್ತು ಧಾರ್ಮಿಕ ನಾಯಕರಾಗುತ್ತಾರೆ.  

ರಷ್ಯಾ 

ಬುರಿಯಾಟಿಯಾ, ತುವಾ ಮತ್ತು ಕಲ್ಮಿಕಿಯಾ ರಷ್ಯಾದಲ್ಲಿರುವ ಮೂರು ಸಾಂಪ್ರದಾಯಿಕವಾದ ಟಿಬೆಟಿಯನ್ ಬೌದ್ಧ ಪ್ರದೇಶಗಳಾಗಿವೆ. ಬುರಿಯಾಟಿಯಾದಲ್ಲಿ ಹಾನಿಗೊಳಗಾದ ಮೂರು ಮಠಗಳನ್ನು ಹೊರತುಪಡಿಸಿ, ಈ ಪ್ರದೇಶಗಳಲ್ಲಿನ ಎಲ್ಲಾ ಮಠಗಳನ್ನು 1930 ರ ದಶಕದ ಉತ್ತರಾರ್ಧದಲ್ಲಿ ಸ್ಟಾಲಿನ್ ಸಂಪೂರ್ಣವಾಗಿ ನಾಶಪಡಿಸಿದನು. 1940 ರ ದಶಕದಲ್ಲಿ, ಸ್ಟಾಲಿನ್ ಕಟ್ಟುನಿಟ್ಟಾದ ಕೆಜಿಬಿಯ ಕಣ್ಗಾವಲಿನಲ್ಲಿ, ಬುರಿಯಾಟಿಯಾದಲ್ಲಿ ಎರಡು ಸಾಂಕೇತಿಕ ಮಠಗಳನ್ನು ಮರು-ತೆರೆದನು; ವಿವಸ್ತ್ರಗೊಂಡ ಸನ್ಯಾಸಿಗಳು ಆಚರಣೆಗಳಿಗಾಗಿ, ಹಗಲಿನಲ್ಲಿ ತಮ್ಮ ನಿಲುವಂಗಿಯನ್ನು ಸಮವಸ್ತ್ರವಾಗಿ ತೊಡುತ್ತಿದ್ದರು. ಕಮ್ಯುನಿಸಂನ ಪತನದ ನಂತರ, ಈ ಎಲ್ಲಾ ಮೂರು ಪ್ರದೇಶಗಳಲ್ಲಿ ಬೌದ್ಧಧರ್ಮದ ದೊಡ್ಡ ಪುನರುಜ್ಜೀವನವಾಗಿದೆ. ಗಡಿಪಾರಾದ ಟಿಬೆಟಿಯನ್ನರು ಶಿಕ್ಷಕರನ್ನು ಕಳುಹಿಸಿಕೊಟ್ಟಿದ್ದಾರೆ ಮತ್ತು ಹೊಸತಾಗಿರುವ ಯುವ ಸನ್ಯಾಸಿಗಳನ್ನು ತರಬೇತಿಗಾಗಿ ಭಾರತದಲ್ಲಿನ ಟಿಬೆಟಿಯನ್ ಮಠಗಳಿಗೆ ಕಳುಹಿಸಲಾಗುತ್ತದೆ. ಬುರಿಯಾಟಿಯಾ, ತುವಾ ಮತ್ತು ಕಲ್ಮಿಕಿಯಾದಲ್ಲಿ 20 ಕ್ಕೂ ಹೆಚ್ಚು ಮಠಗಳನ್ನು ಮರುಸ್ಥಾಪಿಸಲಾಗಿದೆ. 

ಯುರೋಪಿಯನ್ನರು ಬೌದ್ಧ ದೇಶಗಳನ್ನು ವಶಪಡಿಸಿಕೊಂಡ ಕಾರಣದಿಂದ ಮತ್ತು ಕ್ರಿಶ್ಚಿಯನ್ ಮಿಷನರಿಗಳು ಮತ್ತು ವಿದ್ವಾಂಸರ ಕೃತಿಗಳ ಮೂಲಕ ಬೌದ್ಧಧರ್ಮದ ವಿವರವಾದ ಜ್ಞಾನವು 19 ನೇ ಶತಮಾನದ ಯುರೋಪಿಗೆ ಬಂದಿತು. ಅದೇ ಸಮಯದಲ್ಲಿ, ಚೀನೀ ಮತ್ತು ಜಪಾನಿನ ವಲಸೆ ಕಾರ್ಮಿಕರು ಉತ್ತರ ಅಮೆರಿಕಾದಲ್ಲಿ ದೇವಾಲಯಗಳನ್ನು ನಿರ್ಮಿಸಿದರು.

ಬೌದ್ಧಧರ್ಮದ ಎಲ್ಲಾ ಪ್ರಕಾರಗಳು, ಪ್ರಪಂಚದಾದ್ಯಂತ, ಸಾಂಪ್ರದಾಯಿಕವಾಗಿ ಬೌದ್ಧವಾಗಿಲ್ಲದ ದೇಶಗಳಲ್ಲೂ ಸಹ ಕಂಡುಬರುತ್ತವೆ. ಇದು ಎರಡು ಪ್ರಮುಖ ಗುಂಪುಗಳನ್ನು ಒಳಗೊಂಡಿದೆ: ಏಷ್ಯಾದ ವಲಸಿಗರು ಮತ್ತು ಏಷ್ಯನ್ ಅಲ್ಲದ ಅನುಯಾಯಿಗಳು. ಏಷ್ಯನ್ ವಲಸಿಗರು, ವಿಶೇಷವಾಗಿ ಯುಎಸ್ (US) ಮತ್ತು ಆಸ್ಟ್ರೇಲಿಯಾದಲ್ಲಿ ಮತ್ತು ಸ್ವಲ್ಪ ಮಟ್ಟಿಗೆ ಯುರೋಪ್‌ನಲ್ಲಿ, ತಮ್ಮದೇ ಆದ ಸಂಪ್ರದಾಯಗಳ ಅನೇಕ ದೇವಾಲಯಗಳನ್ನು ಹೊಂದಿದ್ದಾರೆ. ಈ ದೇವಾಲಯಗಳು ಭಕ್ತಿಯ ಆಚರಣೆಯನ್ನು ಉತ್ತೇಜಿಸುವುದು ಮತ್ತು ವಲಸಿಗ ಸಮುದಾಯಗಳು ತಮ್ಮ ವೈಯಕ್ತಿಕ ಸಾಂಸ್ಕೃತಿಕ ಗುರುತನ್ನು ಕಾಪಾಡಿಕೊಳ್ಳಲು ಸಹಾಯ ಮಾಡಲು ಸಮುದಾಯ ಕೇಂದ್ರವನ್ನು ಒದಗಿಸುವುದಕ್ಕೆ ಪ್ರಾಧಾನ್ಯ ನೀಡುತ್ತವೆ. ಇಂದು, ಅಮೆರಿಕದಲ್ಲಿ ನಾಲ್ಕು ದಶಲಕ್ಷಕ್ಕೂ ಹೆಚ್ಚು ಬೌದ್ಧರಿದ್ದಾರೆ ಮತ್ತು ಯುರೋಪ್‌ನಲ್ಲಿ ಎರಡು ದಶಲಕ್ಷಕ್ಕೂ ಹೆಚ್ಚು ಬೌದ್ಧರಿದ್ದಾರೆ. 

ಇಂದು ಪ್ರಪಂಚದಾದ್ಯಂತ, 100 ಕ್ಕೂ ಹೆಚ್ಚು ದೇಶಗಳಲ್ಲಿ ಮತ್ತು ಪ್ರತಿ ಖಂಡದಲ್ಲಿ ಎಲ್ಲಾ ಸಂಪ್ರದಾಯಗಳ ಸಾವಿರಾರು ಬೌದ್ಧ “ಧರ್ಮ ಕೇಂದ್ರಗಳ”ನ್ನು ಕಾಣಬಹುದಾಗಿದೆ. ಈ ಟಿಬೆಟಿಯನ್, ಝೆನ್ ಮತ್ತು ಥೆರವಾದ ಕೇಂದ್ರಗಳಲ್ಲಿ ಹೆಚ್ಚಿನವುಗಳನ್ನು ಏಷ್ಯನ್ ಆಗಿಲ್ಲದವರು ಆಗಾಗ್ಗೆ ಭೇಟಿ ನೀಡಿದ್ದು, ಇಲ್ಲಿ ಧ್ಯಾನ, ಅಧ್ಯಯನ ಮತ್ತು ಧಾರ್ಮಿಕ ಆಚರಣೆಗೆ ಪ್ರಾಧಾನ್ಯ ನೀಡಲಾಗುತ್ತದೆ. ಇಲ್ಲಿನ ಶಿಕ್ಷಕರಲ್ಲಿ ಪಾಶ್ಚಾತ್ಯರು ಮತ್ತು ಏಷ್ಯಾದ ಜನಾಂಗೀಯ ಬೌದ್ಧರಿಬ್ಬರೂ ಸೇರಿದ್ದಾರೆ. US, ಫ್ರಾನ್ಸ್ ಮತ್ತು ಜರ್ಮನಿಯಲ್ಲಿ ಹೆಚ್ಚಿನ ಸಂಖ್ಯೆಯ ಕೇಂದ್ರಗಳನ್ನು ಕಾಣಬಹುದಾಗಿದೆ. ಆಳವಾದ ತರಬೇತಿಗಾಗಿ ಅನೇಕ ಗಂಭೀರ ವಿದ್ಯಾರ್ಥಿಗಳು ಏಷ್ಯಾಕ್ಕೆ ಭೇಟಿ ನೀಡುತ್ತಾರೆ. ಇದಲ್ಲದೆ, ಪ್ರಪಂಚದಾದ್ಯಂತ ಹಲವಾರು ವಿಶ್ವವಿದ್ಯಾನಿಲಯಗಳಲ್ಲಿ ಬೌದ್ಧ ಅಧ್ಯಯನ ಕಾರ್ಯಕ್ರಮಗಳಿವೆ ಮತ್ತು ಬೌದ್ಧಧರ್ಮ ಮತ್ತು ಇತರ ಧರ್ಮಗಳು, ವಿಜ್ಞಾನ, ಮನೋವಿಜ್ಞಾನ ಮತ್ತು ವೈದ್ಯಕೀಯ ವಿಷಯಗಳ ನಡುವೆ ನಿರಂತರವಾಗಿ ಬೆಳೆಯುತ್ತಿರುವ ಸಂವಾದ ಮತ್ತು ವಿಚಾರಗಳ ವಿನಿಮಯವಿದೆ. ಈ ವಿಷಯದಲ್ಲಿ ಪರಮಪೂಜ್ಯ ದಲೈ ಲಾಮಾ ಅವರು ಅತ್ಯಂತ ಮಹತ್ವದ ಪಾತ್ರವನ್ನು ವಹಿಸಿದ್ದಾರೆ.