Өөр хийгээд өрөөл дор сэтгэлийг тэгшигтэх ба арилжих

Цэнжаб Сэркон Ринбүүчи таалал барихаасаа хоёр сарын өмнө Доктор Берзинд тус сургаалыг үг үгээр нь дуудан өгч бичүүлж, түүний айлдсан хамгийн чухал сургаал болгон хадгалан уламжлуулахыг хүсжээ. Энэхүү сургаалд бидний зовлон, асуудлуудын хамгийн том эх сурвалж болох – өөрийг эрхэмлэх хандлагыг – арилгаж харин түүний оронд бүхий л амгалан, жаргалангийн эх сурвалж болох – бусдыг чин сэтгэлээс эрхэмлэх хандлагыг – төлөвшүүлэх бясалгалыг нарийвчлан тайлбарласан байдаг.

Бусдын тусад бүрэн зорьсон, тэдэнд аль болох их тус хүргэх үүднээс гэгээрлийн хутагт хүрэхийг зорьсон сэтгэл болох бодь сэтгэлийг төрүүлэх хоёр арга байна – шалтгаан ба үрийн долоон хэсэгт ёс (уг ба үрийн долоон увдис), өөрт болон бусдад хандах хандлагаа тэгшитгэх хийгээд солих ёс (өөр хийгээд өрөөл дор сэтгэлийг тэгшитгэх ба арилжих) эдгээр болно. Тус аргуудын аль аль нь тэдгээрийн өмнө тусад нь хийх, тэдгээрийн зэхэл бүтээл болох, тэгш сэтгэлийг төлөвшүүлэх өвөрмөц аргатай. Тэдгээр нь тэгш сэтгэл гэсэн ижил нэртэй боловч тэдгээрийг төрүүлэх хэлбэр нь өөр өөр.

  1. Шалтгаан ба үрийн долоон хэсэгт бясалгалын хамаг амьтныг эх гэж мэдэх ойлголтын өмнө гарах тэгш сэтгэлийн бясалгалд садан, дайсан, үл таних (завсрын) хүмүүсийг дүрслэх ба тэрхүү тэгш сэтгэл нь тэдэнд тачаах болон хилэгнэх сэтгэлийг арилгасан тэгш сэтгэл байна. Үүний өөр нэг нэр нь үнэндээ “садан, дайсан, завсрын хүмүүст төрүүлэх тачаах, хилэгнэх сэтгэлийг арилгасан эгэл тэгш сэтгэл” гэх нэр юм. Эгэл гэдэг үг нь дараагийн өөр зүйлийг багтаасан хоёр дахь арга бий гэсэн утгыг илэрхийлнэ.

    Тэгш сэтгэлийн энэхүү эхний төрлийн нөгөө нэр нь “шравака, пратекабуддха нарын дунд нийтлэг байх тэгш сэтгэлийг төлөвшүүлэх арга болох эгэл тэгш сэтгэл” гэсэн нэр байна. Шравака (шравага, сонсоод сонсогчид) болон пратекабуддха (брадигабуд, өөрөө ялгуугсад) нар нь Бурхан багшийн сургаалын Хинаяна ёсны (Бага хөлгөний) бүтээлчдийн хоёр төрөл юм. Энд эгэл гэдэг үг нь энэ төрлийн тэгш сэтгэлийн хувьд бидэнд бодь сэтгэл байхгүй, энэ тэгш сэтгэлд бодь сэтгэл оролцоогүй гэсэн утгыг илэрхийлнэ.
  2. Өөрт болон өрөөлд хандах хандлагаа солих хийгээд тэгшитгэх аргын зэхэл бүтээл болгон төлөвшүүлдэг тэгш сэтгэл нь дээрх тэгш сэтгэлийн адил тэгш сэтгэл биш юм. Энэ нь хамаг амьтанд тус хүргэх, тэдний асуудлыг арилгах зорилго бүхий бодол болон үйлд нь хол, ойрын ямар ч сэтгэл оролцоогүй тийм тэгш сэтгэл байна. Энэ нь онцгой ялгаатай нийтийн бус Махаяна ёсны (Их хөлгөний) тэгш сэтгэл төлөвшүүлэх арга юм.
Top