درد مندی کیہ شے اے؟

بدھ مت وچ درد مندی توں مراد دوجیاں دے لئی دکھ اتے دکھ دے سبب توں مکتی دی آشا اے۔ ایس دی بنیاد دوجے لوکاں دے جذبیاں دے احساس اوپر ہے، خاص طور تے جد اسی آپوں اجیہی بپتا نال نبڑ رہے ہوئیے۔ جے سانوں ایس نال کدی واسطہ نہ وی پیا ہووے جو اوہناں اوپر بیت رہی اے، فیر وی اسی اپنے آپ نوں اوہناں دی تھاں تصور کر کے اندازہ کر سکنے آں کہ ایہ کس قدر ہولناک ہووے گا۔ ایہ سوچ کے کہ اسی ایس توں نجات پان دی کس قدر ڈاڈھی آشا رکھدے ہوواں گے، تے اسی دوجیاں لئی وی ایس توں چھٹکارا پان دی زبردست اچھیا کراں گے۔

پیار اتے درد مندی لوڑاں نیں نہ کہ عیش عشرت دا سامان۔ ایہناں دے بغیر انسانیت دی بقاء ممکن نہیں ہے۔ – چودھویں دلائی لاما 

درد مندی ساڈے دل اتے دماغ نوں دوجیاں لئی کھول دیندی اے، اتے انج سانوں اکلے پن اتے آپوں گھڑے ہوۓ من دی رجھتا دے وچاراں توں ازادی دلاندی اے۔ زندگی وچ مسلیاں نال نبڑن وچ اسی سب برابر آں، اتے جد اسی دوجیاں نال سمبندھ نوں محسوس کرنے آں تے اسی اکلے پن اتے پریشانی اوپر قابو پا لینے آں۔ سائینس نے وی ایہ ثابت کیتا اے کہ درد مندی سانوں خوشی اتے رکھشا دا احساس دیندی اے۔ دوجیاں دے دکھ درد نوں سہنا اتے اوہناں دی مدد کرن دی اچھیا کرنا سانوں اندرلی شکتی اتے خود اعتمادی بخشدی اے۔ جے اسی درد مندی پیدا کرن دی مشق کرئیے تے ایہ ساڈے لئی شانتی دا بھر پور اُت پتی استھان بن جاندی اے۔

[ویکھو: درد مندی کویں پنگری جاۓ] 

درد مندی فعال ہونی چاہیدی اے جو سانوں دوجیاں دے دکھ درد نوں گھٹ کرن دی ذمہ واری قبول کرن دی اکساوٹ دیوے۔ ہو سکدا اے کہ ساڈی سہائتا کرن دی یوگتا محدود ہووے، پر فیر وی ساڈے کولوں جو وی ہو سکے سانوں ضرور کرنا چاہیدا اے کیونکہ انج دا سبھاو کہ جد لوکی دکھی ہون اتے مصیبت جھل رہے ہون اتے اسی کھلوتے منہ پئے ویکھئیے، برداشت لائق نہیں اے۔ 

درد مندی اوس ویلے ڈاڈھی کار گر ہوندی اے جد ایس وچ عقل اتے سرت وی شامل ہووے، تاں جے اسی سوتر پربندھ دا چون کرئیے۔ جے اسی جذباتی لحاظ نال اینے معتبر آں کہ جے اسی مدد نہ کر سکئیے یا ساڈی صلاح کار گر نہ ہووے تے نہ ہی پریشان ہوئیے اتے نہ ہی حوصلہ ہارئیے تے اجیہی دَشا وچ درد مندی ساڈی کمزوریاں اوپر قابو پان اتے اپنی یوگتا توں بھر پور فیدہ چکن وچ زبردست اکساوٹ بن جاندی اے۔