چھ اتم سمپت دا جائزہ: چھ پرامت

اپکار توں مراد دوجیاں نوں ضرورت دے مطابق دین دی آشا اے۔ ایس دے فیدے درج ذیل نیں:

• ایس توں ساڈے اندر من دی آدرتا پیدا ہوندی اے کہ اسی دوجیاں لئی کجھ کر سکنے آں، اتے ایہ سانوں کمتر من دی آدرتا اتے دل شکنی ورگے مسلیاں توں بچن یا ایہناں توں نکلن وچ مدد کردی اے۔
• ایہ سانوں لگاوٹ، بُخل اتے کنجوسی ورگے پرتندھ جو من دی سوگمان حالتاں نیں جو وار وار مسلیاں دا سبب ہوندے نیں اوپر قابو پان وچ سہائت ہوندی اے۔
• ایہ حاجتمنداں دی حاجت دور کردی اے۔

اچار ونت اوہ صورت حال اے جس دے ہیٹھ اسی ہانی کارک سبھاو توں اوس دی برائیاں نوں موہرے رکھدے ہوۓ پرہیز کرنے آں ۔ ایس دے فیدے درج ذیل نیں:

• ایہ سانوں اوہناں سارے مسلیاں توں بچاندا اے جو ہانی کارک کرم، گفتار اتے وچار توں جنم لیندے نیں۔ ایس توں دوجیاں دے نال آپس دا بھروسہ پنگردا اے جو کہ سچی یاری دا مڈھ اے۔
• ایہ سانوں ساڈے بے قابو منفی سبھاو اوپر قابو پان اتے اچار ونت پیدا کرن وچ سہائت ہوندا اے جس توں اک شانت اتے مضبوط من پنگردا اے۔
• ایہ سانوں کسے نوں نقصان پوہنچان توں روکدا اے۔

           صبر توں مراد مصیبتاں نوں برداشت کرن، بغیر روسے، پریشانی دے، دی یوگتا اے۔ ایس دے فیدے نیں:

• ایہ سانوں حلات دے خراب ہون، یا ساڈے کولوں یا دوجیاں کولوں کوئی غلطی ہوجان دی صورت وچ تماشا لان توں باز رہنے دی یوگتا بخشدا اے۔
• ایہ سانوں غصہ، بے صبری اتے عدم برداشت جو کہ من دی پریشان کرن والیاں حالتاں نیں اوپر قابو پان وچ مدد کردا اے۔ اسی اوکھے حلات وچ وی شانت رہنے آں۔
• ایس دے سبب اسی دوجیاں دی چنگی طراں مدد کر سکنے آں، کیونکہ جد اوہ ساڈی گل نہ منن، غلطیاں کرن، قول اتے کرم وچ عقل دے گھاٹے دا وکھالا کرن، یا سانوں تنگ کرن تے اسی اوہناں اوپر غصہ نئیں کردے۔

    استقلال توں مراد اوکھے حلات وچ ہمت نہ ہارنا اے سغوں اخیر تک مستقل جتن کرنا اے۔ ایس دے فیدے نیں:

• ایہ سانوں اوس کم نوں جو اسی شروع کیتا ہے توڑ تک پوہنچان دی، بغیر حوصلہ ہارے، ہمت دیندا ہے۔
• ایہ سانوں نا اہلی اتے التوا بہ سبب سستی جس وچ اسی معمولی گلاں دی وجہ توں توجہ کھو بیٹھنے آں، اوپر قابو پان وچ سہائت ہوندا اے۔
• ایہ ڈاڈھے اوکھے کماں نوں توڑ پوہنچان وچ مدد کردا اے، اتے اوہ جنہاں دی مدد کرنا بوہت اوکھا ہووے اوہناں توں  ہتھ روکن توں باز رکھدا اے۔

من دی استقامت (سمادھ) من دی اجیہی حالت اے جو ذہنی اوارگی، سستی اتے جذباتی پریشانی توں پوری طراں ازاد اے۔ ایس دے فیدے درج ذیل نیں:

• اسی جو کجھ وی کر رہے ہوئیے ایہ سانوں اوس اوپر توجہ قائم رکھن وچ سہائت ہوندا اے تا کہ اسی بھل چک اتے درگھٹنا توں بچے رہئیے۔
• ایہ سانوں خوف اتے  پریشانی اوپر قابو پان، اتے حد توں زیادہ جذباتی ہوون، ترنگ یا جذباتی ہیجان دے سبب توجہ نہ دین توں بچاندا اے
• ایہ سانوں دوجیاں دی گل اتے سبھاو اوپر گوہ کرن وچ مدد دیندا اے تا کہ اسی اوہناں دی مدد دے ودیہ طریقے نوں متھ سکئیے۔

نکھیڑلی پچھان (سیانپ) من دی اوہ حالت اے جو اوِش ہی صحیح طور اوپر مناسب اتے غیر مناسب، درست اتے غلط وچکار انتر کردی اے۔ ایس دے فیدے درج ذیل نیں:

• ایہ ساڈے لئی کسے خاص صورت حال وچ کھلی اتے درست جوت جگاوندی اے کہ کیہ کرنا اے اتےکیوں کرنا اے، انج سانوں اجیہا کجھ کرن توں روکدی اے جس اوپر سانوں بعد وچ پچھتانا پوے۔
• ایہ سانوں پلیکھے اتے الجھن اوپر قابو پان وچ مدد کردی اے۔
• ایہ سانوں دوجیاں دی حالت دی درست سرت پرکھ پرچول راہیں پراپت کرن دی یوگتا دیندی اے تا کہ سانوں ٹھیک اندازہ ہووے کہ کیہ کہنا اتے کرنا اے جس توں اوہناں نوں زیادہ توں زیادہ فیدہ ہووے۔