ပြီးပြည့်စုံရမည့် ပါရမီခြောက်ပါး အကျဉ်းချုပ်

အခြားသူများကို လိုအပ်သောအရာမှန်သမျှ ပေးကမ်းလိုစိတ် ဖြစ်ပါသည်။ ၎င်း၏အကျိုးကျေးဇူးများမှာ-

• အခြားသူများကို ဖြည့်ဆည်းပေးစရာ တစ်ခုခု ရှိသည်ဆိုသော မိမိကိုယ်ကို တန်ဖိုးထားစိတ် ရရှိကာ မိမိကိုယ်ကို တန်ဖိုးမထားမှုနှင့် စိတ်ဓာတ်ကျမှု၏ ပြဿနာများကို ရှောင်ရှား၊ ဖယ်ရှားနိုင်ပါသည်။
• တဏှာ၊ လောဘ၊ စေးနှဲခြင်းဆိုသည့် ပြဿနာများ ပြန်ဖြစ်စေသော မပျော်ရွှင်မှု စိတ်အခြေအနေများကို ကျော်လွှားစေနိုင်သည်။
• လိုအပ်နေသူများကို ကူညီပေးသည်။

သီလကျင့်ဝတ်သည် အပျက်သဘော အပြုအမူများ၏ ဆိုးကျိုးကို သဘောပေါက်ခြင်းအားဖြင့် ယင်းတို့ကို ရှောင်ရှားခြင်းဖြစ်သည်။ ၎င်း၏အကျိုးကျေးဇူးများမှာ-

• အန္တရာယ်ပေးသော ပြုမူ၊ ပြောဆို၊ တွေးတောမှုများကြောင့် ဖြစ်ပေါ်လာသည့် ပြဿနာအားလုံးကို ရှောင်ရှားစေနိုင်သည်။ စစ်မှန်သော ခင်မင်မှုအတွက် အခြေခံဖြစ်သည့် အခြားသူများနှင့် ယုံကြည်မှု တည်ဆောက်ရန် အခြေခံကို ဖန်တီးပေးပါသည်။
• စိတ်လိုက်မာန်ပါ အပျက်သဘော ပြုမူမှုကို ကျော်လွှားကာ မိမိကိုယ်ကို ထိန်းချုပ်နိုင်စေသည့်အတွက် ပိုမိုအေးဆေးတည်ငြိမ်သော စိတ်ကို ရရှိစေသည်။
• အခြားသူများကို အန္တရာယ် မပေးမိစေရန် ကာကွယ်ပေးသည်။

သည်းခံခြင်းသည် အခက်အခဲများကို ဒေါသမထွက်၊ ဝမ်းမနည်းဘဲ ခံနိုင်ရည်ရှိခြင်း ဖြစ်ပါသည်။ ၎င်း၏အကျိုးကျေးဇူးများမှာ-

• တစ်ခုခုအမှားအယွင်း ဖြစ်သောအခါတွင်ဖြစ်စေ၊ အခြားသူများက အမှားပြုလုပ်သောအခါဖြစ်စေ ရုပ်ပျက်ဆင်းပျက် မြင်ကွင်းမျိုး မဖြစ်အောင် ရှောင်ရှားနိုင်စေပါသည်။
• အနှောင့်အယှက်ပေးသော စိတ်အခြေအနေများ ဖြစ်သည့် ဒေါသ၊ စိတ်မရှည်မှုနှင့် သည်းမခံနိုင်မှုတို့ကို ကျော်လွှားစေပါသည်။ အခက်အခဲ ကြုံသောအခါ တည်ငြိမ်အောင် ထိန်းထားနိုင်လာပါသည်။
• အခြားသူများကို ပိုမိုကောင်းမွန်စွာ ကူညီနိုင်စေပါသည်။ အကြောင်းမှာ သူတို့က မိမိအကြံဉာဏ်ကို မလိုက်နာခြင်း၊ အမှားလုပ်ခြင်း၊ ကျိုးကြောင်းမဆီလျော်စွာ ပြုမူ၊ ပြောဆိုခြင်း သို့မဟုတ် စိတ်ညစ်အောင်လုပ်ခြင်းတို့ ရှိလာသောအခါ သူတို့ကို ဒေါသမထွက်သောကြောင့် ဖြစ်ပါသည်။

ဇွဲလုံ့လဆိုသည်မှာ အခက်အခဲများ ကြမ်းတမ်းလာသောအခါ လက်မလျှော့ဘဲ အဆုံးအထိ တစ်သမတ်တည်း ဆက်လက်အားထုတ် ကြိုးစားသည့် ရဲစွမ်းသတ္တိ ဖြစ်ပါသည်။ ၎င်း၏အကျိုးကျေးဇူးများမှာ-

• မိမိစတင်ထားသောအရာကို စိတ်မပျက်ဘဲ ပြီးစီးအောင် ဆောင်ရွက်ရန် ခွန်အားရရှိစေပါသည်။
• အသေးအဖွဲများကြောင့် အာရုံပြောင်းကာ မလုံလောက်မှုနှင့် ပျင်းရိမှုကြောင့် ရွှေ့ဆိုင်းလိုစိတ်ကို ကျော်လွှားစေပါသည်။
• အခက်ခဲဆုံး အလုပ်များကို အောင်မြင်စွာ ဆောင်ရွက်စေနိုင်ပြီး အကူအညီပေးရန် အခက်ခဲဆုံးလူများကို လက်မလျှော့မိအောင် ကာကွယ်ပေးပါသည်။

စိတ်တည်ငြိမ်ခြင်း (စူးစိုက်ခြင်း) ဆိုသည်မှာ စိတ်ပျံ့လွင့်မှု၊ ထုံထိုင်းမှုနှင့် စိတ်ခံစားချက် ဝမ်းနည်းမှုတို့မှ လုံးဝကင်းလွတ်သော စိတ်အခြေအနေ ဖြစ်ပါသည်။ ၎င်း၏အကျိုးကျေးဇူးများမှာ-

• မိမိလုပ်ဆောင်နေသော အရာမှန်သမျှကို အာရုံစိုက်စေနိုင်သည့်အတွက် အမှားအယွင်းနှင့် မတော်တဆမှုများကို ရှောင်ရှားနိုင်ပါသည်။
• စိတ်ဖိစီးမှုနှင့် စိုးရိမ်သောက၊ အလွန်အကျွံ စိတ်လှုပ်ရှားမှု၊ သတိလက်လွတ်မှု သို့မဟုတ် စိတ်ခံစားချက် မတည်ငြိမ်မှုတို့ကို ကျော်လွှားစေပါသည်။
• အခြားသူများ ပြောသောအရာ၊ သူတို့ပြုမူပုံတို့ကို အာရုံစိုက်နိုင်စေသည့်အတွက် ကျွန်ုပ်တို့သည် သူတို့အားမည်သို့ ကူညီရမည်ကို ပိုမိုကောင်းမွန်စွာ မြင်လာနိုင်ပါသည်။

ခွဲခြားသိရှိသောပညာ (ဉာဏ်ပညာ) သည် သင့်တော်သောအရာနှင့် မသင့်တော်သောအရာ၊ မှန်ကန်သောအရာနှင့် မှားယွင်းသောအရာကို မှန်မှန်ကန်ကန်၊ သေသေချာချာ ခွဲခြားသိမြင်သော စိတ်အခြေအနေ ဖြစ်ပါသည်။ ၎င်း၏အကျိုးကျေးဇူးများမှာ-

• အခြေအနေ တစ်ခုခုတွင် ဘာလုပ်ရမည်၊ ဘယ်လို ပြုမူရမည်ကို ရှင်းလင်းမှန်ကန်စွာ မြင်နိုင်စေပြီး နောက်ပိုင်းတွင် နောင်တရမည့် အရာကို မလုပ်မိအောင် တားဆီးပေးပါသည်။
• ဆုံးဖြတ်ချက် မပြတ်သားမှုနှင့် ရှုပ်ထွေးမှုများကို ကျော်လွှားစေနိုင်ပါသည်။
• အခြားသူများ၏ အခြေအနေကို တိကျစွာ အကဲဖြတ်စေနိုင်သည့်အတွက် အကျိုးအရှိဆုံး ဖြစ်အောင် ဘာကိုပြုမူ၊ ပြောဆိုရမည်ကို သိလာပါသည်။