ནང་ཆོས་སློབ་སྦྱོང་བྱེད་དགོས་དོན་གང་ཡིན་ནམ།

ང་ཚོ་འགྱུར་བ་གཏོང་འདོད་ཡོད་པ་དང་ཡར་རྒྱས་གཏོང་འདོད་པ་འདི་ནི་གནད་དོན་གལ་ཆེན་པོ་ཞིག་རེད། འདི་ནི་ང་ཚོ་སྒོམ་བརྒྱབ་ནས་རྟོག་པའི་འཆར་སྣང་གི་ཞིང་ཁམས་ལྟ་བུ་ལ་བྲོས་འདོད་བྱེད་པ་ཞིག་མིན། དེ་འདྲ་ཡིན་ན། ཐབས་ལམ་མང་པོ་ཡོད་པ་རེད། དཔེར་ན། བཟི་སྨན་བཟའ་བ་དང་། ཆང་རག་འཐུང་ན་འགྲིག་གི་ཡོད་པ་རེད། ང་ཚོས་གཞན་གང་གི་ཐད་ལ་བསམ་བློ་གཏོང་མི་དགོས་པར་ཉིན་གང་པོར་གཞས་དང་རོལ་དབྱངས་ཉན་ནས་སྡོད་ཆོག་གི་རེད། ནམ་རྒྱུན་ང་ཚོ་གནས་སྟངས་དེ་འདྲ་བའི་ཤུགས་རྐྱེན་འོག་ཡོད་སྐབས་སོ་སོའི་དཀའ་ངལ་དེ་ཚབས་ཆེན་པོ་དང་དངོས་གནས་ཡིན་པ་བསམ་གྱི་མེད། འོན་ཀྱང་དཀའ་ངལ་དེ་རྟག་པ་ཡང་བསྐྱར་ཡོང་གི་ཡོད། གང་ཡིན་ཟེར་ན། ང་ཚོས་དཀའ་ངལ་ལ་གདོང་ལེན་བྱེད་རྒྱུ་སྦྱངས་མེད་པས་རེད། མི་མང་པོ་ཞིག་གིས་སྒོམ་ནི་བཟི་སྨན་ལྟར་བེད་སྤྱོད་བྱེད་ཀྱི་ཡོད། འོན་ཀྱང་འདིས་ཕུགས་རྒྱང་རིང་པོར་གནས་ཐུབ་པའི་རླབས་ཆེན་གྱི་ཕན་ཐོགས་ཡོང་གི་མེད། ང་ཚོས་དྲིལ་བུ་དཀྲོལ་བ་དང་རྔ་བརྡུང་བ་སོགས་ནང་པའི་ཞིང་ཁམས་ནང་ཡོད་པ་ནང་བཞིན་བྱེད་སྲིད་ཀྱང་། དེས་དངོས་གནས་རང་རྒྱུད་ལ་འགྱུར་བ་ཐེབས་པའི་སྐུལ་འདེད་གང་ཡང་གཏོང་གི་མེད། དེ་ནི་དཀའ་ངལ་དེ་ལས་གཡོལ་ཐབས་ཙམ་ཞིག་ཡིན་པས་དེས་མི་ཕན།

ཡིན་ནའང་ང་ཚོས་ནང་པའི་ཆོས་སྲོལ་གྱི་དགོངས་དོན་ལྟར་སྒོམ་རྒྱག་པ་ཡིན་ན།དཀའ་ངལ་ལས་གཡོལ་ཐབས་མི་བྱེད་པར་དེ་ལ་གདོང་ལེན་བྱས་ནས་དེ་ལས་ཐར་བ་བྱེད་ཀྱི་རེད། དེ་ནི་དངོས་གནས་དྲང་གནས་སྙིང་སྟོབས་ཅན་ཞིག་ཡིན་པ་དང་། དེ་ལ་འབད་བརྩོན་ཧ་ཅང་མང་པོ་བྱེད་དགོས་ཀྱི་ཡོད། དེ་གང་ཡིན་ཟེར་ན། དེ་ལས་སླ་པོ་ཞིག་མེད་པས་ཡིན། ང་ཚོ་ལའང་དེ་དགའ་པོ་དང་སྐྱིད་པོ་ཞིག་ཡོད་པའི་ངེས་པ་མེད་པ་སོང་ཙང་། སྔོན་ཚུད་ནས་གྲ་སྒྲིག་ཨང་གསར་བྱེད་དགོས་ཀྱི་ཡོད། ང་ཚོས་དེ་ལུས་སྦྱོང་བྱེད་པ་དང་མཚུངས་བསྡུར་བྱེད་ཆོག དཔེར་ན། ལུས་སྦྱོང་བྱེད་ཡག་ཁག་པོ་ཡོད་པ་དང་། ང་ཚོའི་ལུས་ཀྱི་ཤ་གནད་ལ་རྨ་་བཟོ་བ་སོགས་དཀའ་ངལ་མང་པོ་ཡོང་གི་ཡོད་ཀྱང་། ད་དུང་སོ་སོའི་ལུས་ཁམས་ཀྱི་འཕྲོད་བསྟེན་ཡག་པོ་དང་ནུས་ཤུགས་ཆེ་རུ་གཏོང་བའི་ཆེད་དཀའ་ངལ་དེ་དག་ལ་བཟོད་སྒོམ་བྱེད་འདོད་ཡོད་པ་ལྟ་བུ་རེད།

ང་ཚོས་སྒོམ་བརྒྱབ་དུས་སེམས་ལ་འབད་བརྩོན་བྱེད་ནས་ཡར་རྒྱས་གཏོང་གི་ཡོད་པ་མ་གཏོགས་ལུས་ལ་འབད་བརྩོན་བྱེད་ཀྱི་མེད། དེ་ཙམ་གྱི་ཁྱད་པར་ལས་གཞན་གཅིག་པ་རེད། ནང་པའི་ཆོས་ལུགས་ཁ་ཤས་ནང་ལུས་སེམས་གཉིས་ཀ་ཟུང་དུ་འབྲེལ་ནས་སྒོམ་རྒྱག་སྟངས་ཡོད་པ་རེད། དཔེར་ན། དྲག་པོའི་སྒྱུ་རྩལ་ལྟ་བུ། འོན་ཀྱང་བོད་ཀྱི་ནང་པའི་ཆོས་ལུགས་ནང་དེ་འདྲ་མེད་པ་རེད། ལུས་སྦྱོང་བྱས་པས་ཕན་རླབས་ཆེན་པོ་ཡོད་པ་ལས་སྐྱོན་གང་ཡང་མེད། འོན་ཀྱང་སྐབས་འདིར་དམིགས་པ་གཏད་ས་གཙོ་བོ་དེ་སེམས་རེད། དེ་ཡང་ང་ཚོའི་བློ་གྲོས་དང་རིག་སྟོབས་ཙམ་མིན་པར་སེམས་ཚོར་དང་སེམས་ཁམས་ཀྱི་སྐོར་ལ་བཤད་ཀྱི་ཡོད།  ནང་པའི་བླ་ཆེན་དང་མཁས་པ་ཚོས། ནང་ཆོས་ཉམས་ལེན་བྱེད་འགོ་བཙུག་སྐབས་གཞི་རྩའི་གལ་གནད་ཅིག་ནི་སེམས་འདུལ་དགོས་པའི་ཐད་ནན་གྱིས་གསུངས་ཡོད། དེ་གང་ཡིན་ཟེར་ན། ང་ཚོས་ལས་ཀ་བྱེད་སྟངས་དང་། སྤྱོད་ཚུལ་སྟོན་སྟངས། མི་གཞན་དང་འབྲེལ་བ་བྱེད་སྟངས་དང་བཅས་པ་ཚང་མ་སེམས་ཀྱི་གནས་སྟངས་གང་འདྲ་ཡོད་མེད་ཀྱི་དབང་སྒྱུར་འོག་ཏུ་ཡོད་པས་ཡིན།  

ང་ཚོས་མི་ཚེའི་ནང་དཀའ་ངལ་མང་པོ་ཡོད་པ་ཧ་གོ་གི་ཡོད་ལ། དེ་དག་གི་འབྱུང་ཁུངས་ནི་སོ་སོ་རང་ཉིད་ཀྱི་སེམས་ནང་མ་འགྲིག་པའམ་འདོད་བློ་མི་ཁེངས་པ་ཞིག་ཡོད་པ་དེའང་ཤེས་ཀྱི་ཡོད། གལ་སྲིད་ང་ཚོས་དྲང་པོ་དྲང་གཞག་བྱས་ནས་སོ་སོ་རང་ཉིད་ལ་བརྟག་དཔྱད་བྱེད་པ་ཡིན་ན། ང་ཚོ་ལ་ཁོང་ཁྲོ་ནས་འདོད་རྔམ་གྱི་བར་དང་། རང་འདོད་དོན་གཉེར། ཕྲག་དོག འདོད་ཆགས། ཁེངས་དྲེགས། གཏི་མུག་སོགས་པའི་ཉོན་མོངས་པ་གྲངས་ལས་འདས་པ་ཡོད་པ་ཧ་གོ་གི་རེད།དེ་ལས་གཏིང་ཟབ་པ་ཕྱིན་ན། མི་ཚེ་འདི་གང་ཡིན་པའི་ཐད་ཉེན་སྲུང་མེད་པ་དང་མགོ་རྙོག་ཅན་ཞིག་ཡོད་པ་ཤེས་རྟོགས་ཡོང་གི་ཡོད། ནམ་རྒྱུན་ང་ཚོའི་སེམས་དེ་ཉོན་མོངས་དབང་དུ་སོང་ནས་ང་ཚོའི་སྐད་ཆ་ཤོད་སྟངས་དང་། སྤྱོད་ཚུལ་སྟོན་སྟངས། གཞན་དང་འབྲེལ་བ་བྱེད་སྟངས་སོགས་ཀྱིས་རང་གཞན་གཉིས་ཀར་དཀའ་ངལ་བཟོ་གི་ཡོད་པ་དང་། ང་ཚོ་གཅིག་པོ་སྡོད་སྐབས་སུའང་ང་ཚོའི་སེམས་ཡང་སེ་མི་བདེ་བ་དང་རྣམ་རྟོག་སྣ་ཚོགས་པ་དང་མཉམ་དུ་མྱུར་རྒྱུག་བྱེད་ཀྱི་ཡོད། ལས་སླ་པོའི་སྒོ་ནས་བཤད་ན། ང་ཚོ་དངོས་གནས་སྐྱིད་པོ་ཞིག་མེད།

སྒོམ་གྱི་དགོས་འདུན་ནི་གནས་སྟངས་འདི་ལྟ་བུ་ལ་འགྱུར་བ་གཏོང་བར་ཕན་ཐོགས་བྱེད་ཀྱི་ཡོད། འདི་ནི་བཟི་སྨན་ཁ་ཤས་བཟས་ནས་སེམས་ནང་བསམ་བློ་གང་ཡང་འཁོར་རྒྱུ་མེད་པ་ལྟ་བུ་མ་རེད། མི་ཁ་ཤས་ཀྱིས་སྒོམ་དེ་འདྲ་ཞིག་ལ་བརྩིས་པ་ཡིན་ནའང་དེ་ནི་དཀའ་ངལ་སེལ་བའི་ཐབས་ལམ་མ་རེད། ཁོང་ཚོས། མར་བསྡད་ནས་མིག་བཙུམ་པ་དང་། སེམས་ནང་ཅི་ཡང་མི་དྲན་པ་ཡིན་ན། གང་ལྟར་ཁོ་ཚོའི་དཀའ་ངལ་ཚང་མ་ཡལ་འགྲོ་གི་རེད་བསམ་གྱི་ཡོད། དེས་ཕན་ཐོགས་ཀྱི་མེད། ང་ཚོས་དཀའ་ངལ་ལ་ཧུར་ཐག་གིས་འཐབ་རྒོལ་བྱས་ཏེ་ཁ་གཏད་གཅོག་དགོས་ཀྱི་ཡོད།

ང་ཚོས་ཡང་ནས་ཡང་དུ་ནང་པའི་བསྟན་བཅོས་ནང་ཉོན་མོངས་དེ་ཚོ་ང་ཚོའི་དགྲ་བོ་ངོ་མ་རེད་ཅེས་ཚིག་དེ་ཤུགས་དྲག་པོའི་སྒོ་ནས་འགྲེལ་བརྗོད་བྱས་ཡོད་པ་མཐོང་ཡོང་གི་ཡོད། དེས་ང་ཚོ་ཞེད་སྣང་སྐྱེ་འཇུག་པའམ། འཁྲུལ་སྨྱོ་འདྲ་བའི་སེམས་ནད་བྱུང་ནས་ཉོན་མོངས་དེ་དག་བདུད་འདྲ་པོ་བཟོ་གི་མེད་པར། ང་ཚོས་གང་འབད་བརྩོན་བྱེད་དགོས་པ་དེ་ཤེས་ཀྱི་ཡོད། དཀའ་རྙོག་བཟོ་མཁན་དེ་དག་གི་ཐད་ལ་ནང་པའི་གཞུང་ཡིད་དབང་འཕྲོག་པ་ཞིག་ཡོད། དེ་ལས། “ཉོན་མོངས་ཁྱེད་ཀྱིས་ང་ལ་སྡུག་བསྔལ་དང་དཀའ་ངལ་མང་པོ་བཟོས་སོང་། ད་འགྲིག་སོང་། ཁྱེད་རང་གི་དུས་ཚོད་རྫོགས་ཚར་པ་རེད།” ཅེས་གསུངས་ཡོད། བྱས་ཙང་། ང་ཚོས་ཕུ་ཐུང་ཡར་སྒྲིལ་ཏེ་མར་བསྡད་ནས་རང་གི་སེམས་འགྱུར་བ་གཏོང་ཐབས་བྱེད་དགོས། དེ་ནི་སྒོམ་གྱི་དོན་ངོ་མ་རེད།

སྒོམ་ཞེས་པ་ལས་སླ་པོའི་ཐོག་ནས་བཤད་ན། ང་ཚོའི་གོམས་གཤིས་ངན་པའི་རིགས་ལ་འགྱུར་བ་བཏང་ནས་ཕན་ཡོན་ལྡན་པའི་གོམས་གཤིས་བཟང་པོ་རྣམས་གོང་འཕེལ་གཏོང་བའི་ཐབས་ལམ་ཞིག་རེད། གོམས་གཤིས་དེ་དག་ནི། ང་ཚོའི་བསམ་བློ་གཏོང་སྟངས་དང་། ཚོར་བ་མྱོང་སྟངས། དེ་བཞིན་སེམས་ཚོར་དྲག་པོའི་སྒོ་ནས་ཕ་རོལ་ལ་ཡ་ལན་བྱེད་སྟངས་བཅས་ཡིན། དེ་ནི་སྦྱོང་བརྡར་དང་ཡང་ནས་ཡང་དུ་བསྐྱར་ཟློས་ཀྱི་བརྒྱུད་རིམ་ལྡན་པའི་རིག་གསར་ཚན་རིག་གི་ཐབས་ལམ་ཞིག་རེད། དཔེར་ན། ང་ཚོས་རྩེད་མོའི་རིགས་དང་། གཞས་དང་རོལ་ཆ། ཡང་ན་ཞབས་བྲོ་སོགས་ལ་སྦྱོང་བརྡར་བྱེད་པའི་སྐབས་དང་པོ་གང་ལ་གང་འཚམས་དཀའ་ལས་རྒྱག་དགོས་པའི་ཚོར་སྣང་ཡོང་གི་ཡོད་ཀྱང་། ཕྱིས་སུ་རིམ་པས་གོམས་འདྲིས་ཐེབས་ནས་རང་བཞིན་གྱིས་ཡོང་བསྡད་ཀྱི་ཡོད། དེ་ག་ནང་བཞིན་ང་ཚོའི་སེམས་དང་སེམས་ཚོར་གྱི་རིགས་ལའང་གཅིག་པ་རེད།།

ད་དྲི་བ་ཆེན་པོ་ཞིག་སླེབས་ཡོང་གི་ཡོད་པ་ནི། ང་ཚོས་དངོས་གནས་འགྱུར་བ་གཏོང་ཐུབ་བམ། ཞེས་པ་དེ་རེད།ང་རང་ཚོ་སོ་སོ་འགྱུར་བ་ཞིག་གཏོང་བ་ལ་དང་པོ་ང་ཚོ་འགྱུར་བ་གཏོང་ཐུབ་པའི་ཡིད་ཆེས་བརྟན་པོ་ཞིག་ཡོད་དགོས། མི་ཁ་ཤས་ཀྱིས། “ང་རང་གི་བྱེད་སྟངས་འདི་ག་རང་ཡིན། དེ་འགྱུར་བ་གཏོང་ཡག་ལ་ངས་གང་ཡང་བྱེད་མི་ཐུབ་པས། ང་རང་དེ་འདྲ་རང་གནས་དགོས་ཀྱི་ཡོད།” ཅེས་ཟེར་མཁན་དེ་འདྲ་ང་ཚོས་ཡང་སེ་མཐོང་གི་ཡོད། ཡང་ཁ་ཤས་ཀྱིས། “ང་ནི་མི་རླུང་ཚ་པོ་ཞིག་ཡིན། ང་རང་ཁོང་ཁྲོ་ཟ་ཆོག་ཆོག་ཡིན། དེ་ནི་ངའི་རང་བཞིན་རེད།” ཅེས་དེ་འདྲ་བརྗོད་མཁན་ཡང་ཡོད། གལ་སྲིད་ང་ཚོས་སོ་སོའི་གཤིས་ཀའི་ཆ་ཤས་ཤིག་ལ་ཤུགས་ཆེན་པོས་ངོས་འཛིན་བྱེད་ན། རང་བཞིན་གྱིས་དེ་འགྱུར་བ་གཏོང་ཁག་པོ་ཆགས་ཀྱི་རེད།

ང་ཚོས་རང་སོ་སོ་ལ་དྲང་པོའི་ངང་བལྟ་དགོས། ང་ཚོའི་གཤིས་ཀ་ཁ་ཤས་ལ་ངོས་བཟུང་དགོས་དོན་ཅི་ཡིན་ནམ། གལ་སྲིད་ང་ཚོ་དངོས་གནས་མི་རླུང་ཚ་པོ་ཞིག་ཡིན་ན། ང་ཚོ་དུས་རྟག་ཏུ་རླུང་ལངས་ནས་སྡོད་དགོས་ཨེ་ཡོད། ང་ཚོ་རླུང་ལངས་པའི་རྒྱུ་མཚན་གྱིས་གཞན་ལ་སྐྱོན་བརྗོད་བྱེད་སྲིད། དཔེར་ན། ངའི་ཕ་མས་འདི་འདྲ་བྱས་པ་སོང་ཙང་། ང་རླུང་ལངས་སོང་ཟེར་གྱི་ཡོད། དེ་འདྲ་ཟེར་ན་ཕན་ཐོགས་གང་ཡང་མེད། གལ་སྲིད་ང་ཚོས་གཏིང་ཟབ་པོར་ཡག་པོ་བྱས་ནས་བལྟས་ན། སེམས་ཚོར་དེ་དག་དོན་ངོ་མ་ག་ནས་ཡོང་གི་འདུག་འཚོལ་ཐབས་བྱེད་ཆོག དེ་མ་ཡིན་པར་ང་ཚོས་ཉིན་ལྟར་རང་ཉིད་རང་ལ། “རླུང་མ་ལོངས། འདོད་རྔམ་མ་བྱེད། རང་འདོན་དོན་གཉེར་མ་བྱེད།” ཅེས་བཤད་བསྡད་པ་ཡིན་ན། དེས་དེ་དག་འགོག་ཐུབ་རྒྱུ་ཁག་པོ་རེད། མ་རེད་པས། དེ་ཡིན་དུས་ང་ཚོས་སེམས་ཚོར་དྲག་པོ་མྱོང་སྟངས་ཀྱི་ཐད་འགྱུར་བ་གཏོང་ཐུབ་པའི་ཐབས་ལམ་ཞིག་ངེས་པར་དུ་འཚོལ་དགོས།

ནང་ཆོས་ལས་ང་ཚོའི་སེམས་ཚོར་གནས་འབབ་ཀྱི་རྨང་གཞི་བྱེད་མཁན་དེ་ལ་བློའི་འཁྱེར་སོ་ཞེས་ཟེར་ཆོག་པར་གསུངས་ཀྱི་ཡོད། དེས་གང་སྟོན་གྱི་ཡོད་ཟེར་ན། ང་ཚོས་དངོས་པོ་ལ་ལྟ་སྟངས་སྐོར་བཤད་ཀྱི་ཡོད། དཔེར་ན། ང་ཚོ་སོ་སོའི་ལས་ཀ་དེ་ཤོར་བ་ལ་བསམ་བློ་གཅིག་གཏོང་དང་། དེ་ནི་ཧ་ཅང་གི་བཀྲ་མི་ཤིས་པའི་སྡུག་ཅག་ཡིན་པ་བལྟས་ནས་ང་ཚོ་རླུང་ལངས་པ་དང་སེམས་ངལ་ཡིད་ཞུམ་གྱི་ཚོར་སྣང་ཡོང་གི་ཡོད། དེ་ག་རེ་བྱས་ནས་ཡོང་གི་ཡོད་ཅེ་ན། སྐབས་དེ་དུས་ང་ཚོས་དེ་ནི་འཛམ་གླིང་ནང་གི་གནས་སྟངས་སྡུག་ཤོས་ལྟ་བུ་ཞིག་ཡིན་བསམས་ཀྱི་ཡོད་པས་ཡིན།

ང་ཚོའི་ལས་ཀ་ཤོར་བ་དེ་ནི་དངོས་ཡོད་གནས་ཚུལ་ཞིག་རེད། དེ་ལ་འགྱུར་བ་གཏོང་མི་ཐུབ། ང་ཚོས་ག་རེ་འགྱུར་བ་གཏོང་ཐུབ་ཟེར་ན། ལས་ཀ་ཤོར་བ་དེ་ལ་ལྟ་སྟངས་གང་འདྲ་ཞིག་དགོས་པ་དེ་ལ་འགྱུར་བ་གཏོང་ཐུབ་ཀྱི་རེད། དེ་ནི་བློའི་འཁྱེར་སོ་ཟེར་བའི་དོན་ཡིན། བྱས་ཙང་། ང་ཚོས་དེ་ལ་ལྟ་སྟངས་མི་འདྲ་བ་ཞིག་ནས་ལྟ་ཐབས་བྱེད་ཐུབ། དཔེར་ན། ལས་ཀ་ཤོར་བའི་རྐྱེན་གྱིས་ང་ཚོས་སོ་སོའི་ཕྲུ་གུ་དང་མཉམ་དུ་དུས་ཚོད་མང་བ་གཏོང་ཐུབ་བསམ་པའམ། ཡང་ན་འཚོ་ཐབས་ཀྱི་ལས་ཀ་གཞན་ཞིག་འཚོལ་རྒྱུ་བསམ་བློ་གཏོང་ཆོག དེས་ང་ཚོར་དངུལ་མང་པོ་འཐོབ་ཡག་ལ་ཕན་མི་ཐོགས་ཀྱང་། ལས་ཀ་ཤོར་བའི་སེམས་འཁྲེལ་དང་བློ་ཕམ་དེ་ཡོང་གི་མ་རེད། དེར་བརྟེན་དངོས་པོ་ལ་བལྟ་སྟངས་གང་འདྲ་ཡོད་མེད་ཀྱིས་ང་ཚོའི་ཚོར་བ་མྱོང་ཚུལ་ལ་ཤུགས་རྐྱེན་སྤྲོད་ཀྱི་ཡོད་པས། སྒོམ་རྒྱག་པའི་སྐབས་སུ་དམིགས་པ་དེ་འདྲ་ཞིག་ལ་གཏད་ཆོག་པ་ཡིན།

ངའི་གྲོགས་པོ་ཉེ་ཤོས་ཤིག་གཟའ་འཁོར་སྔོན་མ་འདས་གྲོངས་སུ་ཕྱིན་པ་དེ་ནི་སེམས་ཧ་ཅང་སྐྱོ་བའི་གནས་ཚུལ་ཞིག་རེད། ང་སེམས་ཕམ་པོ་ཡོང་གི་འདུག དེ་ནི་གང་ཡང་ཡོད་མ་རེད། སེམས་ཕམ་པོ་བྱུང་ན་ནོར་འཁྲུལ་གང་ཡང་མེད། ཁོང་འདས་གྲོངས་སུ་ཕྱིན་པར་ང་སེམས་སྐྱོ་གི་ཡོད་པ་བཤད་མི་དགོས་པ་ཞིག་རེད། འོན་ཀྱང་སྐབས་འདིར་ངས་བསམ་བློ་གང་འདྲ་གཏོང་དགོས་སམ། བདུན་ཕྲག་སྔོན་མ་ཁོང་གྲོངས་བ་རེད། ངས་ཁོང་མ་གྲོངས་སྔོན་ལ་ཁ་པར་ཞིག་གཏོང་དགོས་བསམ་བྱུང་། ཡིན་ནའང་ངས་ཁ་པར་གཏོང་ཡག་དུས་ཚོད་རྩ་ནས་བྱུང་མ་སོང་། ཁོང་རང་ལྟ་བུར་མཚོན་ན། བདེ་ཐག་ཆོད་ཡོད་པ་དང་གཟུགས་པོ་བཀྲུ་བར་ཕྱིན་པའི་སྐབས་སྙིང་ཁྲག་དགག་སྟེ་འཁྲུད་ཁང་ནང་འདས་གྲོངས་སུ་ཕྱིན་པ་རེད།དེ་ནི་རྩ་ནས་བྱུང་མི་སྲིད་པ་ལྟ་བུར་གློ་བུར་ཐོག་རྒྱག་བྱུང་བ་རེད། ངས་ཁོང་ལ་བདུན་ཕྲག་གཅིག་གི་སྔོན་སྐད་ཆ་བཤད་དགོས་བསམ་ཀྱང་བཤད་མ་ཐུབ་པ་དེས་འགྱོད་པ་ཤུགས་ཆེན་སྐྱེ་སྲིད་ལ་གལ་སྲིད་ངས་ཁོང་གྲོངས་རྒྱུ་ཡིན་པ་སྔོན་ཚུད་ནས་ཤེས་ན། ངས་ཁོང་ལ་སྐད་ཆ་བཤད་ངེས་རེད་ཅེས་རང་ཉིད་རང་ལ་རླུང་ལངས་ཀྱི་རེད། དེ་འདྲ་བསམ་བློ་བཏང་ན། སོ་སོའི་ཚོར་བའི་གནས་སྟངས་ཇེ་སྡུག་ནས་ཇེ་སྡུག་ཏུ་འགྲོ་གི་རེད།

དེ་འདྲ་བསམ་བློ་བཏང་ཡག་གི་ཚབ་ལ། ཁོང་མཉམ་དུ་དུས་ཚོད་སྐྱིད་པོ་སྐྱེལ་བ་ཚང་མ་དང་། ངེད་གཉིས་གྲོགས་པོ་ཆགས་ནས་ལོ་ངོ་༣༥ཕྱིན་པ་དང་། ཕན་ཚུན་མཉམ་བཟའ་མཉམ་སྡོད་དང་མཉམ་སྤྱོད་བྱས་ཡོད་པ་དང་། ངས་ཁོང་འདྲ་བའི་མི་བཟང་པོ་དེ་འདྲ་སེམས་ཐག་ཉེ་པོའི་ངོ་ཤེས་བྱུང་བ་ནི་དམིགས་བསལ་སྐལ་བ་དང་ལྡན་པ་ཞིག་ཡིན་པར་དྲན་གྱི་འདུག ཁོང་ནུབ་ཕྱོགས་ནས་ཡིན་པའི་ལྷག་བསམ་རྣམ་དག་གི་ཆོས་ཉམས་ལེན་པ་ཚད་དང་ལྡན་པ་ཞིག་ཡིན་པ་དང་། ཁོང་འདྲ་བ་ཕལ་ཆེར་དེ་སྔ་ང་ལ་གྲོགས་པོ་བཟང་པོ་ཞིག་མེད། ཁོང་གིས་ང་རང་གི་ཉམས་ལེན་རྣམས་མུ་མཐུད་ཡར་རྒྱས་གོང་འཕེལ་དུ་གཏོང་བར་སེམས་སྐུལ་ཤུགས་ཆེན་བྱས་ཡོད་པ་མ་ཟད། ཁོང་རང་གིས་ཆུང་མར་བརྩེ་བ་སྤྲད་པ་ནང་བཞིན་ང་རང་ཆོས་ཉམས་ལེན་ད་ལྟའང་བྱེད་དང་བྱེད་མུས་ཡིན་པ་དེ་ཁོང་གིས་ཤེས་ན་ཁོང་དགའ་ཚོར་ཆེན་པོ་ཡོང་གི་རེད། ཅེས་བསམ་དགོས་ཀྱི་ཡོད།

དེ་འདྲ་བསམ་བློ་གཏོང་སྟངས་ནི་སྒོམ་གྱི་འབྲས་བུ་རེད། ཁྱེད་ལ་རྫུ་འཕྲུལ་གྱི་རིགས་དང་། ཡང་ན་ཡ་མཚན་ལྟ་བུ་གང་ཡང་ཐོབ་ཀྱི་མེད། གང་ཐོབ་ཀྱི་ཡོད་པ་ནི། ཁྱེད་རང་དཀའ་ངལ་ཅན་གྱི་གནས་སྟངས་དང་འཕྲད་ནས་སེམས་མི་དགེ་བ་དང་མི་སྐྱིད་པ་བྱུང་སྐབས་དེ་ག་རང་མུ་མཐུད་ནས་བྱེད་བསྡད་ན། གནས་སྟངས་ཇེ་སྡུག་ཏུ་འགྲོ་གི་ཡོད་པ་ཐོག་མ་ནས་ཤེས་པའི་བློ་གྲོས་ཤིག་ང་ཚོ་ལ་ཡོད། དཀའ་ངལ་ཅན་གྱི་གནས་སྟངས་དེ་དག་ལ་གོ་རྟོགས་ཡག་པོ་སླེབས་ནས་སྦྱོང་བརྡར་འདང་ངེས་ལ་བརྟེན་ནས་དངོས་པོ་ལ་ལྟ་སྟངས་དེ་རྦད་དེ་འགྱུར་བ་གཏོང་ཐུབ། ང་རང་གི་གྲོགས་པོ་ཡག་ཤོས་དེ་འདས་གྲོངས་སུ་ཕྱིན་སྐབས་སེམས་སྐྱོ་པོ་བྱུང་བ་ནང་བཞིན་ང་ཚོ་ད་དུང་ཡང་སེམས་སྐྱོ་བའི་ཚོར་སྣང་ཡོང་སྲིད་ཀྱང་། ང་ཚོས་སེམས་མི་སེམས་སྡུག་དེ་གཞི་འཇམ་པོར་བཟོ་བ་ལ་བསམ་ཚུལ་རྣམས་མཉམ་སྡེབ་ཀྱིས་བདེ་སྐྱིད་ངེས་ཅན་ཞིག་ཁ་སྣོན་བྱེད་ཐུབ། 

དེ་འདྲ་སོང་ཙང་། ང་ཚོས་དངོས་པོའི་གནས་ཚུལ་ལ་ལྟ་སྟངས་ཐད་འགྱུར་བ་གཏོང་ཐུབ་ཀྱི་རེད་དམ། ཞེས་དྲི་བ་གཏོང་གི་རེད། དེའི་ལན་ནི་རེད་རེད་ཟེར་རྒྱུ་རེད། གལ་སྲིད་ཁྱེད་ཀྱིས་ཕྲུ་གུ་ཡིན་པའི་སྐབས་འདོད་མོས་ཆེ་ལ་ཡིན་མདོག་ཁ་པོ་མཐོང་བ་དེ་ཚོ་ཆེན་པོ་ཆགས་སྐབས་དེ་དག་ཐམས་ཅད་ཆོ་མེད་པ་དང་། གླེན་རྟགས། ཉོབ་ཏོ་འདྲ་པོ་མཐོང་གི་ཡོད། ང་ཚོ་ལོ་ན་ཆེ་རུ་འགྲོ་དུས་བློའི་འཁྱེར་སོ་དེ་ལའང་འགྱུར་བ་ཆེན་པོ་ཕྱིན་ཚར་བ་རེད། ང་ཚོས་ད་དུང་མུ་མཐུད་དེ་ལས་ལྷག་ག་འགྱུར་བ་གཏོང་ཐུབ་ཀྱི་ཡོད་པའི་ཡིད་ཆེས་རྙེད་པ་ཡིན་ན། དེ་ནས་ང་ཚོས་ཐབས་ལམ་ཁ་ཤས་ལ་ངེས་པར་དུ་སྦྱོང་དགོས། དེ་ལ་རིམ་པ་གསུམ་ཡོད་པ་ནི།

• གནས་ཚུལ་མ་ནོར་བ་འཐོབ་པ།༼ཐོས་པ།༽ང་ཚོས་གཞན་ལས་ཐོས་པ་དང་། དེབ་ཀློག་པའམ་སྦྱངས་པ་ལས་བྱུང་བའི་ཕན་ཐོགས་ལྡན་པའི་གོམས་གཤིས་གང་ཡིན་པའི་སྐོར་ལ་ཤེས་པར་བྱེད་དགོས། རིམ་པ་དང་པོ་འདིས་ང་ཚོས་ངེས་པར་དུ་ཤེས་པའི་དོན་སྟོན་གྱི་མེད། ཡིན་ནའང་འདི་ནི་ནང་པའི་ཐབས་ལམ་ཞིག་ཡིན་པ་ང་ཚོས་རྣམ་པར་འབྱེད་ཐུབ་ཀྱི་ཡོད།
• དེའི་དོན་དག་ལ་བསམ་ཞིབ་བྱེད་པ།༼བསམ་པ།༽ང་ཚོ་ལ་གནས་ཚུལ་རག་པ་དེ་དག་ལ་ཕྱོགས་གང་ས་ནས་བསམ་བློ་གཏོང་བ་དང་དཔྱད་པ་བྱེད་དགོས། དེ་འདྲ་བྱས་པ་ཡིན་ན། ང་ཚོས་དེ་གང་ཡིན་ཡིན་པ་ཤེས་ཐུབ། ང་རང་ཚོས་གང་འཚོལ་བཞིན་པ་ནི་ཕན་ཐོགས་མེད་པ་མ་ཡིན་པར་བདེན་པ་ཡིན་པའི་གོ་རྟོགས་ཤིག་འཐོབ་དགོས་ཀྱི་ཡོད། དེ་ག་ནང་བཞིན་དེས་ང་ཚོ་ལ་ཕན་ཐོགས་ཀྱི་ཡོད་པའི་ཡིད་ཆེས་རྙེད་པ་དགོས། དེ་བྱུང་ན་ང་ཚོས་མི་ཚེའི་ནང་དེ་མཉམ་སྡེབ་བྱེད་ཐུབ་ཀྱི་རེད།
• སྒོམ་པ།༼སྒོམ།༽ད་ང་ཚོས་གང་ཤེས་པ་དང་སྦྱངས་པ་དེ་ཕན་ཐོགས་ལྡན་པའི་གོམས་གཤིས་སུ་གོང་འཕེལ་གཏོང་བའི་ཆེད་སྒོམ་རྒྱག་རྒྱུ་གྲ་སྒྲིག་ཡོད།

གནས་ཚུལ་ཡང་དག་པའམ་མ་ནོར་བ་ཞིག་རག་རྒྱུ་ནི་ང་ཚོས་བསམ་པ་ནང་བཞིན་ལས་སླ་པོ་མེད། ནང་ཆོས་ཀྱི་ཐབས་ལམ་ངོ་མ་བཤད་ཀྱི་ཡོད་ཚུལ་བརྗོད་མཁན་མི་མང་པོ་ཡོད། འོན་ཀྱང་དེབ་གཅིག་བྲིས་ནས་དཔར་བསྐྲུན་བྱས་པ་ཙམ་གྱིས་དེབ་དེའི་ནང་དོན་ཡང་དག་པ་དང་མ་ནོར་བ་ཡིན་པའི་ཁྱབ་པ་མེད། ཡང་དགེ་རྒན་སྐད་གྲགས་ཆེན་པོ་དང་ཡིད་དབང་འགུགས་ནུས་ཀྱི་ཁྱད་ཆོས་དང་ལྡན་པ་ཙམ་གྱིས་ཁོང་གིས་གང་བཤད་པ་དེ་མ་ནོར་བ་ཞིག་ཡིན་པའི་ངེས་པ་མེད། དམག་ཆེན་གཉིས་པའི་སྐབས་བྱུང་བའི་ཧིཊ་ལར་སྐད་གྲགས་ཆེན་པོ་དང་ཡིད་དབང་འགུགས་པོ་ཞིག་ཡོད་ཀྱང་། ཁོས་གང་བཤད་པ་ཡང་དག་པ་མ་ཡིན་པའམ་ནོར་བ་ཡིན་པ་གསལ་པོ་རེད།

དེ་འདྲ་ཡིན་པ་སོང་ཙང་། ནང་པའི་ཆོས་ཀྱིས་ང་ཚོའི་རྣམ་དཔྱོད་བེད་སྤྱོད་གཏོང་དགོས་པ་ནན་བཤད་བྱེད་ཀྱི་ཡོད། ང་ཚོ་དུད་འགྲོ་སེམས་ཅན་དང་ཁྱད་པར་གང་གིས་འབྱེད་ཀྱི་ཡོད་ཟེར་ན། དུད་འགྲོ་སེམས་ཅན་རྣམས་ལ་སྦྱོང་བརྡར་སྤྲད་ནས་ལས་ཀ་མང་པོ་བྱེད་ཐུབ་ཀྱང་། ང་ཚོ་དུད་འགྲོ་སེམས་ཅན་ལས་ལྷག་པ་ཞིག་ཡོད་པ་ནི་རྣམ་དཔྱོད་རེད། ང་ཚོས་ཕན་ཐོགས་ཡོད་པ་དང་མེད་པའི་དབར་ཁྱད་པར་འབྱེད་ཐུབ་ཀྱི་ཡོད། ང་ཚོས་གང་མ་ཤེས་པ་དེར་རྣམ་དཔྱོད་བེད་སྤྱོད་བཏང་ནས་ཤེས་པར་བྱེད་ཐུབ། དེ་འདྲ་ནི་ང་ཚོས་ཆོས་ཉན་པ་དང་ཆོས་ཀྱི་དཔེ་དེབ་ལྟ་ཀློག་བྱེད་སྐབས་དེ་ག་རང་བྱེད་དགོས་ཀྱི་ཡོད།

སངས་རྒྱས་ཀྱིས་གསུངས་པའི་ཆོས་ཐམས་ཅད་ཀྱི་ཀུན་སློང་ནི་གཞན་ལ་ཕན་པ་སྒྲུབ་རྒྱུ་དེ་རེད། ཡིན་ནའང་ད་དུང་དེ་ལྟར་ཡིན་མིན་ང་རང་ཚོ་སོ་སོས་དཔྱད་པ་བྱེད་ཆོག དེ་ལྟར་དཔྱད་པ་བྱེད་པ་ལ་ང་ཚོས་ཕུགས་རྒྱང་རིང་པོའི་ཤུགས་རྐྱེན་ལའང་ལྟ་དགོས་ཀྱི་ཡོད། གང་ཡིན་ཟེར་ན། ཕུགས་རྒྱང་ཐུང་ཐུང་ལ་ལྟ་ན་སྐྱིད་པོ་ཞིག་ཕལ་ཆེར་མི་ཡོང། དེ་ནི་སྨན་བཅོས་བྱས་པ་ནང་བཞིན་གནས་སྐབས་སྐྱིད་པོ་གང་ཡང་མེད། ཡིན་ནའང་ཕུགས་རྒྱང་རིང་པོ་ལ་ཕན་ཐོགས་ཡོད། དཔེ་ཆ་བཞག་ན། འབྲས་ནད་ལ་སྨན་བཅོས་ (chemotherapy) བྱེད་པ་ནང་བཞིན་རེད།

གལ་སྲིད་ང་ཚོས་གོང་དུ་བཤད་པ་ལྟར། ནང་ཆོས་ལ་དཔྱད་པ་མ་བྱས་པ་དང་། དེ་སོ་སོའི་མི་ཚེ་དང་ཉམས་མྱོང་མཉམ་དུ་འབྲེལ་བ་བཟོས་མེད་ན། ང་ཚོས་དོན་ངོ་མ་དེའི་སྟེང་ལ་སྒོམ་གང་འདྲ་བྱས་ནས་བརྒྱབ་ཐུབ་བམ། དེ་ནི་ང་ཚོས་ཅ་ལག་གཅིག་དགོས་ཀྱི་ཡོད་མེད་དང་ཕན་ཐོགས་ཡོད་མེད་ལ་བསམ་བློ་གང་ཡང་མ་བཏང་ནས་ཉོས་པ་ནང་བཞིན་རེད།

ཆོས་ཀྱི་རྣམ་གཞག་ཐད་ལ་བསམ་བློ་གཏོང་བའི་རྒྱུད་རིམ་ནི་ཕན་ཐོགས་ཆེན་པོ་ཡོད་དང་ཡོད། མི་ཁ་ཤས་ཀྱིས་དེ་ལ་སྒོམ་གྱི་རྣམ་པ་ཞིག་ཡིན་པར་བརྗོད་ཚར་ཡོད་སྲིད། ཡིན་ནའང་ང་ཚོས་འགྲོ་ལུགས་འགྲོ་སྟངས་ཀྱི་ཆ་ནས་སྒོམ་ཞེས་ཟེར་ཆོག་པ་དེ་ནི་ཕན་ཐོགས་ཆེ་བའི་སེམས་ཀྱི་གནས་བབས་དེ་ང་རང་ཚོའི་མི་ཚེ་དཀྱུས་མའི་ནང་མཉམ་སྦྲེལ་བྱེད་པའི་རྒྱུད་རིམ་ཞིག་ཡིན། དེ་ལའང་ནང་གསེས་ཀྱི་རིམ་པ་གཉིས་ཡོད་པ་ནི།

• དཔྱད་སྒོམ། རིམ་པ་དང་པོ་དེ་ལ་ནམ་རྒྱུན་དཔྱད་སྒོམ་ཟེར་གྱི་ཡོད། དེ་ནི་བློའི་འཁྱེར་སོ་ཡར་རྒྱས་ཕྱིན་པའི་སྒོ་ནས་ཡུལ་ལ་དམིགས་པ་གཏད་ཅིང་། དེ་ལ་ཞིབ་ཕྲར་རྣམ་པར་དཔྱད་པ་དང་རྒྱབ་རྟེན་གྱི་ཆ་རྐྱེན་རྣམས་ལ་ཞིབ་དཔྱད་བྱེད་ཀྱི་ཡོད།
• འཇོག་སྒོམ། རིམ་པ་གཉིས་པ་ནི་ང་ཚོས་དམིགས་པའི་ཡུལ་ལ་ཞིབ་ཚགས་པོས་ཧུར་ཐག་དཔྱད་པ་བྱེད་ཀྱི་མེད། འོན་ཀྱང་ཡུལ་ལ་དམིགས་པ་མདོ་བསྡུས་སུ་འཛིན་པའི་ཚུལ་གྱིས་གནས་ཏེ། དཔྱད་པའི་མཐའ་དོན་གཙོ་བོ་ནི་ང་ཚོར་དེའི་ཕྱོགས་སུ་བློའི་འཁྱེར་སོ་གང་འདྲ་ཞིག་ཡོད་པ་དེ་ཡིན།

མི་མང་པོ་ཞིག་གིས་སྒོམ་རྒྱག་དུས་དབུགས་ལ་དམིགས་པ་གཏད་ཀྱི་ཡོད། ང་ཚོའི་སེམས་ཞི་འཇམ་དུ་བཟོས་ནས་སོ་སོའི་དབུགས་དབྱུང་རྔུབ་ལ་དམིགས་པ་གཏད་ཀྱི་ཡོད། དེ་ནི་ལས་སླ་བོ་མཐོང་གི་ཡོད། ཡིན་ནའང་དེ་ནི་ཧ་ཅང་དཀའ་ལས་ཁག་པོ་ཡོད་རེད། ང་ཚོས་དབུགས་ལ་དམིགས་པ་གཏད་པའི་སྐབས་ག་རེ་བྱེད་ཡག་གི་ཐབས་ཤེས་གཏོང་གི་ཡོད་ཅེ་ན། ཐོག་མར་ང་ཚོས་སེམས་ནང་ཉོན་མོངས་དང་ཚོར་བ་སྣ་ཚོགས་ཡོང་འཇུག་མཁན་གྱི་སྐད་སྒྲ་དེ་ཞི་འཇམ་བཟོ་དགོས་ཀྱི་ཡོད། དེ་ནི་རྒྱབ་ལྗོངས་ཀྱི་གཞི་གདན་བག་ལ་ཉལ་བའི་བསམ་པ་དེ་ཚོ་མེད་པ་བཟོ་གི་ཡོད་པ་འདྲ་པོ་ཡོད། ཡིན་ནའང་དེ་དང་མཉམ་དུ་དབུགས་སྦྱོང་བྱེད་སྟངས་ཐད་གང་ཐོས་པ་དང་། བསམ་པ། དེ་བཞིན་གང་རྟོགས་པ་ལ་གོ་བ་ཡོད་པའི་ཐོག་ནས་དབུགས་ལ་དམིགས་པ་གཏད་ཆོག་གི་རེད། འདིར་དཔྱད་སྒོམ་དང་འཇོག་སྒོམ་གཉིས་ཀ་ཡོང་གི་ཡོད། དཔེར་ན། ང་ཚོས་དབུགས་དེ་དུས་རྟག་ཏུ་འགྱུར་བ་འགྲོ་གི་ཡོད་ཙང་མི་རྟག་པའི་མཚོན་དོན་དུ་བརྩིས་ཆོག་པའམ།ཡང་ན་སོ་སོའི་དབུགས་ལས་གཞན་པའི་ང་ཟེར་བ་ཞིག་མེད་པའི་བདེན་དོན་ལ་བལྟ་ཆོག གང་ལྟར་ཡང་། དབུགས་གཏོང་མཁན་དེ་སུ་ཡིན་མིན་བལྟ་ཆོག་ཀྱང་། དེ་འདྲ་བའི་དཔྱད་ཞིབ་དེས་ལས་དང་པོ་བ་རྣམས་ལ་མགོ་རྙོག་ཏོག་ཙམ་བཟོ་སྲིད་པ་ཡིན།

ཐོག་མར་འགོ་བཙུག་སའི་གནས་ཡག་ས་ཞིག་ནི། ཡང་བསྐྱར་ང་ཚོ་སོ་སོ་རང་ལ་བལྟ་དགོས། ང་ཚོ་རྟག་ཏུ་སྤྱིར་བཏང་ལས་ཀ་དང་ནང་མི། དེ་བཞིན་སྤྱི་ཚོགས་ཀྱི་གནོན་ཤུགས་ཆེན་པོ་ཞིག་གི་འོག་ཏུ་སྡོད་ཀྱི་ཡོད། དེར་བརྟེན་ང་ཚོའི་སེམས་ཀྱང་དུས་རྟག་ཏུ་སེམས་འཁྲེལ་དང་དཀའ་རྙོག་ཅན་གྱི་བསམ་བློ་མང་པོ་མཉམ་དུ་མྱུར་རྒྱུག་བྱེད་ཀྱི་ཡོད་པས། ལྷོད་ལྷོད་ངལ་གསོ་རག་རྒྱུ་དཀའ་ལས་ཁག་པོ་ཡོད། དེ་འདྲ་ཡིན་དུས། ང་ཚོ་ལ་ངལ་གསོ་མང་བ་རག་པ་དང་གཞི་རྩ་བརྟན་པ་ཚོར་བ་ཙམ་གྱིས་ཕན་ཐོགས་ཆེ་བ་ཡོང་གི་རེད། དེས་མཐར་ཐུག་ང་ཚོའི་དཀའ་ངལ་རྣམས་སེལ་ཐུབ་ཀྱི་མེད་ནའང་དེ་ནི་ཕན་ནུས་ལྡན་པའི་གོམ་པ་དང་པོ་དེ་རེད།དབུགས་ལ་དམིགས་པ་གཏད་པས་ང་ཚོས་གཟུགས་པོའི་དངོས་ཡོད་ཀྱི་གནས་ལུགས་དེ་མྱོང་ཐུབ། དཔེར་ན། “ང་རང་གསོན་པོར་གནས་ཡོད་པ་”ལྟ་བུ། དབུགས་ཀྱི་རྒྱུ་བ་ནི་མ་ཤི་བར་དུ་འགྲོ་བཞིན་ཡོད་པས། དེ་ནི་ང་ཚོ་གསོན་པོ་ཡིན་པའི་བརྡ་མཚོན་ཡག་པོ་ཞིག་ཡིན། ང་ཚོ་ལ་དཀའ་ངལ་གང་འདྲ་ཞིག་ཡོད་ནའང་དབུགས་ནི་དེར་ཡོད་ཡོད་པ་རེད། གལ་སྲིད་ང་ཚོས་དེ་ཡག་པོ་བྱས་ནས་ཤེས་ཚོར་བྱུང་ན། ང་ཚོའི་མི་ཚེ་དཀའ་ལས་ཁག་པོ་གང་འདྲ་ཞིག་ཡོད་ནའང་མུ་མཐུད་ནས་འགྲོ་སྡོད་ཀྱི་ཡོད་པ་ཤེས་ཡག་ལ་ཕན་ཐོགས་ཀྱི་ཡོད། ངའི་གྲོགས་པོ་འདས་གྲོངས་སུ་ཕྱིན་པའི་སྐབས་ནང་བཞིནའདིས་ཀྱང་ཕན་ཐོགས་ཆེན་པོ་ཡོད། དེ་གང་ཡིན་ཞེ་ན། ངས་གང་ལྟར་ཡང་མི་ཚེ་ནི་མུ་མཐུད་ནས་འགྲོ་གི་ཡོད་པ་ཤེས་ཀྱི་ཡོད་པས་ཡིན།

བྱས་ཙང་། ང་ཚོ་ལ་གནས་ཚུལ་འདི་ཡོད་པས། དེའི་ཐོག་ལ་བསམ་བློ་བཏང་བ་དང་། དེ་ཤེས་པར་བྱས་ནས་དེ་དོན་དང་ལྡན་པ་ཞིག་ཡིན་པའི་ཡིད་ཆེས་རྙེད་ཀྱི་ཡོད། ད་ང་ཚོའི་མི་ཚེ་མུ་མཐུད་འགྲོ་སྡོད་ཀྱི་ཡོད་པ་དང་། རང་ཉིད་ཞེད་སྣང་དང་ཡིད་ཞུམ་ཀྱི་བསམ་བློའི་ནང་ཡོངས་སུ་མ་ཤོར་བ་བྱས་ཏེ། སོ་སོའི་ལུས་པོ་འདི་དང་འབྲེལ་བ་ཟབ་ཏུ་གཏོང་རྒྱུ་དེ་ཤེས་ན་ཕན་ཐོགས་ཡོད་པ་མ་རེད་དམ། ཡིན་དང་ཡིན། ཕན་ཐོགས་ཡོད་པ་རེད། ངས་དབུགས་ལ་དམིགས་པ་གཏད་པ་དང་དབུགས་དེ་ཤེས་རྟོགས་ཐུབ་ཀྱི་རེད་དམ། ཐུབ་ཀྱི་རེད། གལ་སྲིད་ཁྱེད་རང་སྐར་ཆ་གཅིག་གཉིས་ཙམ་གྱི་རིང་སོ་སོའི་ལས་ཀ་གཞན་རྣམས་མཚམས་འཇོག་བྱེད་པ་ཡིན་ན། ང་ཚོས་སོ་སོའི་དབུགས་འགྲོ་འོང་ཚོར་ཐུབ་ཀྱི་རེད། དབུགས་ནི་དུས་རྟག་ཏུ་དེར་ཡོད་ཡོད་པ་རེད། དེ་འདྲ་ཡིན་དུས། ང་ཚོ་ལ་གཏིང་ཟབ་པོ་དང་ཚད་མཐོ་པོའི་གོ་རྟོགས་ཀྱི་གནས་ཚད་དགོས་ཀྱི་མེད། ཇི་ཙམ་གྱི་གོ་བ་གཏིང་ཟབ་པ་ཡོད་པ་དེ་ཚོད་ཀྱིས་ཡག་ག་ཡོད་པ་བཤད་མི་དགོས་པ་རེད། ཡིན་ནའང་ཐོག་མར་འགོ་བཙུག་སྐབས་དེ་ཙམ་གྱི་འགྲིག་གི་ཡོད།

ང་ཚོས་དབུགས་ལ་དམིགས་པ་གཏད་པའི་སྐབས་དེ་ལ་རོགས་ཕན་བྱེད་མཁན་ཀྱི་སེམས་བྱུང་ངམ་སེམས་ཀྱི་གནས་བབས་གཉིས་ཡོད་པ་ནི།

• ཤེས་རྟོགས་རགས་པ། ཡུལ་གང་ཞིག་གི་རིམ་པ་རགས་པ་ལ་དོ་སྣང་བྱེད་པ།  
• དཔྱད་པ་ཕྲ་མོ། ཡུལ་གང་ཞིག་ལ་ཤིན་ཏུ་ཞིབ་ཚགས་པོའི་རིམ་པ་རྟོགས་པ།

ཤེས་རྟོགས་རགས་པ་དང་དཔྱད་པ་ཕྲ་མོ་གཉིས་ཀྱི་ཁྱད་པར་བཤད་པའི་སྐབས་སྲོལ་རྒྱུན་གྱི་དཔེ་ནི་རི་མོ་ཞིག་ལ་བལྟས་ནས་འགྲེལ་བརྗོད་བྱེད་ཀྱི་ཡོད། དེའི་སྐབས་ཤེས་རྟོགས་རགས་པའི་ཐོག་ནས་རི་མོ་ལ་ལྟ་སྐབས་དེ་ནི་རི་མོ་ཞིག་ཡིན།དེ་ཡང་ཕལ་ཆེར་མི་བྱེ་བྲག་པ་ཞིག་གི་རི་མོ་ཡིན། དེ་ལྟར་ཤེས་པའི་སྐབས་ཡིད་ཤེས་ཀྱིས་དེ་ཤེས་ཚོར་ཡོང་གི་མེད་པར་དབང་པོའི་ཤེས་པས་བལྟས་པ་ཙམ་གྱིས་ཤེས་ཀྱི་ཡོད། དེ་ལ་ང་ཚོས་སྤྱིར་བཏང་ཐ་སྙད་བེད་སྤྱོད་བཏང་ན་ “ཤེས་རྟོགས་” ཟེར་གྱི་ཡོད། དཔྱད་པ་ཕྲ་མོའི་སྐབས་ང་ཚོས་རི་མོ་དེ་ལ་ཞིབ་ཚགས་པོར་ལྟ་བ་དང་། རི་མོའི་ནང་གི་མི་དེའི་གཟུགས་དབྱིབས་ཀྱི་ཁྱད་ཆོས་དང་བཅས་ཏེ་རི་མོ་འདི་ནི་མི་འདིའི་རེད་ཅེས་ཤེས་རྟོགས་ཡོང་གི་ཡོད།

འདི་ནི་ང་ཚོས་དབུགས་ལ་དམིགས་པ་གཏད་ནས་སྒོམ་པའི་སྐབས་བྱེད་ཀྱི་ཡོད།ང་ཚོས་དབུགས་དེ་དུས་རྟག་ཏུ་འགྲོ་གི་ཡོད་པ་ཤེས་ཀྱི་ཡོད། དེ་ནས་ང་ཚོས་དབུགས་དེ་སྣ་བུག་བརྒྱུད་དབྱུང་རྔུབ་བྱེད་ཀྱིཡོད་པའི་ཐད་ལ་ཞིབ་ཚགས་པོས་བརྟག་དཔྱད་བྱེད་པ་དང་། ང་ཚོ་ལ་ལེགས་ཉེས་གང་ཡོང་ཡང་མ་ཤི་བར་དུ་དབུཌ་དེ་མི་ཆད་པར་འགྲོ་བསྡད་ཀྱི་ཡོད། དེའི་དོན་ནི་དབུགས་དེ་བརྟན་པོ་དང་། ཉེན་སྲུང་ཡོད་པ། དེ་བཞིན་ལྟོས་རུང་ཞིག་ཡིན་པ་རེད། དེ་འདྲ་ཡིན་པ་སོང་ཙང་། ང་ཚོས་དེ་ལ་ “དཔྱད་སྒོམ་” ཞེས་བརྗོད་ཀྱི་ཡོད། གང་ཡིན་ཟེར་ན། ང་ཚོས་དེ་རྟག་ཏུ་ཤེས་བསྡད་ཀྱི་ཡོད། ང་ཚོས་དེ་ལ་དཔྱད་པ་བྱེད་ཀྱི་མེད་ཀྱང་དེ་ལ་ཐབས་ལམ་འགའ་ཞིག་བརྒྱུད་དེ་ལྟ་ཚུལ་ཞིག་ནས་ལྟ་ཞིབ་བྱེད་པ་ཙམ་དང་ཤེས་པ་ཙམ་རེད།

རིམ་པ་གཉིས་པ་འཇོག་སྒོམ་ནི། ང་ཚོས་ཆེད་མངཌ་འབད་བརྩོན་གྱིས་དཔྱད་པ་བྱེད་མི་དགོས་པར། ཤེས་པ་ཙམ་གྱིས་འགྲིག་གི་ཡོད། འདི་ནི་ཡུལ་གང་ཞིག་འབད་བརྩོན་གྱིས་གོ་རྟོགས་ཡོང་བ་དང་འབད་བརྩོན་མི་དགོས་པར་ཤེས་པ་ཙམ་གྱིས་འགྲིག་པའི་སེམས་ཀྱི་གནས་བབས་གཉིས་མི་འདྲ་བ་རེད། ང་ཚོས་སྒོམ་བརྒྱབ་ཀྱི་ཡོད། དེའི་འབྲས་བུ་ལ་མི་བརྟན་པོ་ཞིག་དང་ཉེན་སྲུང་ཡོད་པའི་ཚོར་སྣང་ཡོང་གི་ཡོད། འདི་ལྟ་བུའི་གནས་སྟངས་ནི་ང་ཚོས་ཡང་ནས་ཡང་དུ་ཉམས་ལེན་བྱེད་པའམ། བྱུང་ན་ཉིན་ལྟར་སྦྱོང་བརྡར་བྱེད་ན་ཡོང་གི་ཡོད།

དམིགས་བསལ་ང་ཚོ་གནད་དོན་བྱེ་བྲག་ཅིག་ལ་སེམས་མི་སྐྱིད་པའི་ཚོར་སྣང་སྐྱེ་བའི་སྐབས་ཆོས་ཉམས་ལེན་ལ་དྲན་གསོས་ཐབས་བྱེད་ན་ཡག་པོ་ཡོད། འདི་ནི་ང་ཚོས་གོང་དུ་ལུས་རྩལ་སྦྱོང་བརྡར་ལ་དཔེ་བཞག་པ་ནང་བཞིན་དཀའ་ལས་ཁག་པོ་ཡོད་དང་ཡོད། ཡིན་ནའང་མཐར་ཐུག་ཤེས་རྟོགས་དེ་ང་ཚོའི་རྒྱུད་ལ་ཧ་ཅང་གི་གཏིང་ཟབ་པོ་དང་བརྟན་པོ་འབྱར་ནས་ཡོད་པ་ང་ཚོས་དུས་རྟག་ཏུ་དེ་ཤེས་ཀྱི་ཡོད། མི་ཚེ་ནི་མུ་མཐུད་དེ་འགྲོ་སྡོད་ཀྱི་ཡོད་པ་དང་། གཏིང་རིང་པོར་བསམས་ན། ང་ཚོར་གང་བྱུང་ཡང་དོན་ལ་དཀའ་ངལ་མེད་པ་རེད། ང་ཚོས་དེ་གཏིང་ཟབ་པོ་ཞིག་ཧ་གོ་བ་ལ་བརྟེན་ནས་མི་ཚེ་ལ་ལྟ་སྟངས་དེ་འགྱུར་བ་གཏོང་མཁན་གྱི་གོམས་གཤིས་ཆགས་འགྲོ་གི་ཡོད། དེ་ནི་སྒོམ་གྱི་འབྲས་བུ་རེད། གལ་སྲིད་ང་ཚོས་དེ་ག་དུས་བརྗེད་སོང་བ་ཡིན་ན། ཡང་བསྐྱར་ག་དུས་ཡིན་ནའང་དབུགས་ལ་དམིཌ་པ་གཏད་ནས་སོ་སོར་དྲན་གསོ་དང་གྲུང་པོ་བཟོ་ཐུབ། ང་ཚོས་ཉིན་རེའི་མི་ཚེ་ལ་གདོང་ལེན་གང་འདྲ་བྱེད་ཀྱི་ཡོད་པའི་ཐོག་ནས་ང་ཚོའི་སེམས་ཀྱི་གནས་བབས་ལ་འགྱུར་བ་ངོ་མ་ཞིག་གཏོང་དགོས་རྒྱུ་དེ་རེད། དེ་ནི་ང་ཚོ་དཀའ་ངལ་ལས་གཡོལ་སྟེ་རྟོག་བཟོའི་ཞིང་ཁམས་འདྲ་པོ་ལ་ཕྱིན་པ་ཞིག་མ་ཡིན། འོན་ཀྱང་དེ་ནི་ང་ཚོའི་སེམས་དང་སེམས་ཚོར་ཡར་རྒྱས་གཏོང་བའི་ཆེད་ཧུར་ཐག་གིས་འབད་བརྩོན་བྱེད་པའི་རྒྱུད་རིམ་ཞིག་རེད་ལ། མཐར་ཐུག་ང་ཚོ་གནས་སྟངས་དེ་འདྲ་ཞིག་གི་ནང་སླེབས་ཀྱི་ཡོད།

ད་ལྟ་ང་ཚོས་གང་གི་སྐོར་ལ་བཤད་པ་དེ་སེམས་ཁམས་རིག་པའི་རྒྱས་སྤྲོས་ཆེ་བའི་ཐབས་ལམ་ཞིག་ལའང་བལྟ་ཆོག་གི་རེད། དེ་འདྲ་བལྟ་ན་འགྲིག་གི་ཡོད། ཡིན་ནའང་ང་ཚོས་གཟབ་དགོས་པ་ཞིག་ལ། ནང་ཆོས་ནི་སེམས་ཁམས་རིག་པའི་རྣམ་པ་གཞན་ཙམ་ཞིག་ལ་ཡིན་པ་རེད་བསམ་རྒྱུ་མེད། ནང་ཆོས་ནི་དེ་ལས་ཧ་ཅང་གི་ལྷག་པ་ཞིག་རེད། ནང་ཆོས་ནང་ང་ཚོའི་དམིགས་ཡུལ་དེ་སངས་རྒྱས་ཀྱི་གོ་འཕང་དང་། སེམས་ཅན་ཐམས་ཅད་ལ་ཕན་ཐོགས་སོགས་ལྡབ་ཀྱིས་ལྷག་ག་ཡོད། འོན་ཀྱང་ང་ཚོ་ཧ་ཅང་གལ་ཆེ་བའི་གོམ་པ་དང་པོ་འདི་བརྒྱུད་ནས་འགྲོ་དགོས་ཀྱི་ཡོད།

ང་ཚོའི་དཀའ་ངལ་ལས་གཡོལ་ཐབས་ཙམ་བྱེད་པ་ནི་ལས་སླ་བོ་ཡོད། དཔེར་ན། ཉིན་གང་པོ་གཞས་དང་རོལ་དབྱངས་ལ་ཉན་པ་དང་། སོ་སོ་ལས་ཀ་ཞིག་ལ་མགོ་འཁོར་དུ་འཇུག་པ་དང། དེ་བཞིན་ཆང་རག་འཐུང་ནས་ར་བཟི་སྟེ་ཚང་མ་བརྗེད་དུ་བཅུག་པ་སོགས་ཡོད། གནས་སྐབས་ཀྱི་ཐབས་ལམ་དེ་དག་གིས་ནམ་ཡང་ཕན་ཐོགས་དེ་ཙམ་ཡོང་གི་མེད་པར། དཀའ་ངལ་དེ་དག་དུས་རྟག་ཏུ་ཡང་བསྐྱར་ཡོང་གི་ཡོད། ང་ཚོས་དོན་ངོ་མ་བསམ་བློ་བཏང་ནས་ཆོས་ཉམས་ལེན་གྱི་སྒོམ་རྒྱག་པ་ཡིན་ན། སོ་སོ་དང་གཞན་ལ་ལྟ་སྟངས་དང་ཉམས་མྱོང་གང་བྱུང་བ་དེ་དག་ལ་མཐའ་ཅིག་ཏུ་འགྱུར་བ་གཏོང་ཐུབ་ཀྱི་རེད། དེས་ང་ཚོའི་དཀའ་ངལ་ཚང་མ་ནམ་ཡང་ལམ་སེང་མེད་པ་བཟོ་གི་མེད། ཡིན་ནའང་དེས་ང་ཚོ་དཀའ་ངལ་གྱི་དབང་འོག་ཏུ་མ་སོང་བར། དེ་དག་ལ་ཐད་ཀར་གདོང་ལེན་བྱེད་པའི་ནུས་སྟོབས་ཡོད་པ་ཧ་གོ་བའི་སྒོ་ནས་ཁ་གཏད་གཅོག་ཐུབ་པ་བྱེད་ཀྱི་ཡོད།