کاروبار چلان دے پنج بودھی اصول

عام طور تے بدھ مت نوں سمادھ  نال جوڑیا جاندا اے۔ پر ایہ کئی ایہو جئی اکھ دھرائیاں وی دیندا اے جنہاں دا پریوگ کسے وی وشے وچ ممکن اے۔ آؤ اسی ایہناں بودھی اصولاں دی پرکھ پرچول کرنے آں جو کسے کاروبار یا پراجیکٹ نوں چلان وچ سہائت ہو سکدے نیں۔

اپنے لکشن نوں کھول کے بیان کرو

بدھ مت ایس گل اوپر بوہت زور دیندا اے کہ بودھی پاٹھ شروع کرن توں پہلے اپنے لکشن اتے دِشا دی صاف سدھ بدھ ضروری اے۔ ساڈا مقصد اپنے آپ نوں نقصان پوہنچان والے جذبیاں توں مکمل مکتی دلوانا اتے اپنے من اتے قلب دی یوگتا نوں پوری طراں حرکت وچ لیاونا اے۔ ایہ اخیرلی دَشا "گیان" اخواندی اے۔

ایسے طراں، جد اسی کوئی نواں پراجیکٹ یا دھندا شروع کرئیے، تے لکشن دا کھول کے بیان کرنا بے حد ضروری اے۔ کیا ایہ منافع کمانا اے؟ کیا ایہ ساڈے گاہکاں دے لئی کوئی خاص قدر اتے قیمت ودھانا اے یا کسے مسلے دا حل لبھنا اے جس نال اوہناں نوں واہ پیندا اے؟ لکشن دا بیان جس قدر صاف ہووے گا، اوس دا اوپا لبھنا اونا ہی سوکھا ہووے گا، اتے کامیابی دا امکان وی اونا ہی روشن ہووے گا۔

کارنتا دے اصول اوپر چلو

اک وار جد لکشن نوں متھ لیا جاۓ تے فیر اوہناں سبباں دی پچھان کرنی ہووے گی جو ایس نوں پان وچ کم آون گے۔ گیان پان دے لئی ایہ سبب ساڈے ہانی کارک سبھاو دی روک تھام اتے ساڈے من دی بھلی صفتاں دی مشق، دنیا دی مثبت اتے حقیقت پسند ول نال تکنی اتے ایس نال نبڑن اوپر مشتمل نیں۔ 

کسے کاروباری پراجیکٹ دے معاملہ وچ اسی سرتائی ول نال ایہناں سبباں دا جائزہ لواں گے جو سانوں ساڈے لکشن تک پوہنچا سکن۔ ایہ طریقہ نسبت معکوس سمان اے۔ اسی مختلف کرم جو لکشن نوں پان وچ کار گر ہون گے دی منطقی اوڑک دے تانے بانے اوپر گوہ کرنے آں۔ ایہ طریقہ سانوں لکشن نوں پان اتے پراجیکٹ دے لئی اک پربھاوت لائحہ عمل تیار کرن لئی ضروری کرماں نوں متھن وچ مدد کردا اے۔

درد مندی: گاہک دی مشکل حل کرو

درد مندی بدھ مت دا اک ڈاڈھا تگڑا اصول اے۔ مہاتما بدھ دی شکشا دےانوسار:

درد مندی توں مراد دوجیاں نوں مصیبتاں توں مکتی دلانے دی آشا اے۔

ایس دا کاروبار نال کیہ سمبندھ اے؟ کاروباری ادارہ گاہک دی کوئی مشکل حل کردا اے۔ جے  ایہ نواں حل جو ایس کاروبار نے کڈھیا، ایہ ہن دے حل توں ودیہ اے تے ایہ مقابلہ دی دوڑ جت لیندا اے۔ یعنی، کسے اجیہی اوکڑ دی سدھ جو ساڈے گاہکاں نوں موہرے آ سکدی اے، ایس نوں گاہکاں دی اکھ دھرائی دے انوسار سمجھنا بوہت ضروری اے۔ سانوں کسے سچ مچ دی مشکل دی پچھان اتے اوس نوں ہمیش موہرے رکھنا جس توں ساڈے گاہکاں نوں اوہناں  دی زندگی وچ واسطہ پیندا اے، اتے ایس سرت تے سمجھ  دی بنیاد اوپر، ایس مسلے دا کوئی چنگا جیہا اوپا لبھنا اے۔ گاہک نوں پربھاوت جاننا یا صارف اوپر توجہ، ایہناں شیواں  دی بنیاد درد مندی اوپر اے۔

انت یاتا: بدلدی دنیا دے نال انوسارتوا پیدا کرو

بدھ مت دی پرچول توں حقیقت بارے اک ہور قیمتی اکھ  دھرائی ملدی اے: ہر شے ہر ویلے بدلدی رہندی اے – اسی آپوں، واتا ورن، اتے ساڈے آلے دوالے سب لوکی۔ کسے اکھ دھرائی دے فریب وچ آ جانا جو ویکھن وچ صاف اتے پکی پیٹھی دِسدی ہووے بڑا سوکھا اے؛ پر شتابی ہی بدلدی ہوئی دنیا وچ، اجیہی سوچ اکثر پکھ پات، ڈھٹائی اتے ہٹیل پن دا سبب ہوندی اے۔
ذرا نیٹ فلکس دی مثال لوو۔ اوہناں نے محسوس کیتا کہ انٹرنیٹ نے خبر نشر دے وسیلیاں دے طور طریقے بدل دتے نیں۔ پرانے وچار دے لوکاں کول ویڈیو مواد نوں ویکھن دا اک ہی طریقہ سی: ڈی وی ڈی کراۓ اوپر لے لو۔ پر نیٹ فلکس نے محسوس کیتا کہ ایس دا اک سوکھا طریقہ وی اے- ویڈیو سٹریمنگ۔ خبر نشر دے ورتو دی پوری دی پوری صنعت نوں منڈی اتے گاہکاں دی عادتاں دا اندازہ نہ ہویا۔ پر نیٹ فلکس نے ایس نوں سب توں پہلے پچھانیا اتے پوری صنعت نوں ہمیش لئی بدل دتا۔

نیتی وشے: اپنی، اپنی ٹیم دی اتے گاہک دی عزت کرو

بودھی سنسکاراں دی بنیاد اہنسا اوپر اے۔ اسی جاننے آں کہ ہر کوئی خوشی دی آشا رکھدا اے اتے کوئی وی دکھ جھلنا نہیں چاہندا۔ جے اسی اپنے کرماں دی بنیاد ایس اصول نوں بنائیے اتے دوجیاں نوں نقصان پوہنچان توں پرہیز کرئیے تے اسی اوہناں دی آدرتا اتے اعتماد نوں جت سکنے آں۔ 

جے اسی اپنے ہمکاراں دی عزت کرئیے، تے ایس توں ٹیم دے اندر اعتماد اتے بھروسہ پیدا ہوندا اے۔ اسی لوکاں دے منہ اوپر یا اوہناں دے پٹھ پچھے اوہناں بارے کوئی ماڑی گل کہن توں پرہیز کرنے آں، اتے اپنا سبھاو نرول رکھنے آں۔ نالے ہور ایہ کہ، اسی اپنے گاہک دا جس قدر زیادہ ستکارکراں گے، تے بدلہ وچ اونا ہی اعتماد اتے وفا پاواں گے۔ وڈے کاروبار جویں زیپوس نے اپنا کاروباری نمونہ گاہک دی ضرورتاں دے پربھاؤ اتے کارندیاں دے وچکار شانتی اتے ایمانداری اوپر قائم کیتا۔

خلاصہ

اپنے کاروبار نوں شکتی دین لئی اسی پنج بودھی اصولاں نوں کم وچ لیا سکنے آں۔ ایہ اصول درج ذیل نیں:

• اپنے لکشن نوں بیان کرو
• کارنتا دے قنون اوپر بھروسہ کرو
• اپنے گاہک لئی درد مندی اتے تعلق خاطری پیدا کرو
• انت یاتا نوں مت بھلو اتے اپنی سوچ وچ لیف اتے نویکلا پن قائم رکھو
• سنسکاراں اوپر عمل کرو اتے اپنے ہمکاراں اتے گاہکاں دی عزت کرو۔