ལམ་གྱི་རིམ་པའི་སྲོལ་རྒྱུན་གྱི་བཤད་པ།

འཆི་བ་ནི་ངེས་པ་རེད།

གལ་སྲིད་ང་ཚོས་མི་ལུས་རིན་ཆེན་གང་འདྲ་ཞིག་ང་ཚོར་ཐོབ་པར་བསམ་བློ་བཏང་ན། དེ་ནི་རྡོ་དང་ལྕགས་རིགས་ལས་བཟོས་པ་ཞིག་མིན། གལ་སྲིད་རྡོ་དང་ལྕགས་ལས་བཟོས་པ་ཞིག་ཡིན་ན། རྒྱུན་རིང་པོ་གནས་ཐུབ་ཀྱི་རེད། དངོས་ནས་བྱས་ན། གལ་སྲིད་ང་ཚོས་ལུས་པོ་འདི་གཏུབ་ནས་དེའི་ནང་ག་རེ་འདུག་བལྟ་བ་ཡིན་ན། དེའི་ནང་ཁྲག་དང་རྒྱུ་མས་ཁེངས་ནས་ཡོད། དཔེར་ན། མི་ཚོས་ཁྲོམ་ནས་ཤ་ཉོས་པའི་རྗེས་སུ་དུད་འགྲོ་སེམས་ཅན་བསད་པའི་ནང་ཁྲོལ་སོ་སོའི་ནང་དུ་དཔྱངས་ནས་བཞག་པ་དང་འདྲ་པོ་ཡོད། ང་ཚོའི་ལུས་པོ་ནང་གི་ནང་ཁྲོལ་དེ་དག་ནི་ཆུ་ཚོད་ནང་གི་ཆ་ཤས་དང་འདྲ་བར་གས་ཆག་སླ་པོ་ཡོད།

གལ་སྲིད་ང་ཚོས་འཆི་བ་མི་རྟག་པ་དང་མི་ག་ཚོད་མང་པོ་ཤི་ཟིན་པར་བསམ་བློ་བཏང་ན། ཕྲེང་བ་མང་པོའི་ཕྲེང་རྡོག་རེ་རེ་བྱས་ནས་བརྩི་ཐུབ་ཀྱི་རེད། གལ་ཏེ་ངས་བོད་མི་ཚོ་དྷ་རམ་ས་ལར་སླེབས་ནས་བཟུང་སྟེ་ག་ཚོད་ཙམ་ཤི་ཟིན་པར་བསམས་ན། ང་རང་གི་ཕྲེང་བ་ཆ་ཚང་ཐོག་ནས་མགྱོགས་པོ་བརྩི་ཐུབ།

མི་ལུས་ཐོབ་ནས་འཆི་མི་དགོས་པར་གནས་པའི་མི་གཅིག་ཀྱང་མེད། རྩི་ཤིང་དང་ཤིང་སྡོང་རྣམས་འཇིག་སྟངས་ལ་བལྟས་ན། འཆི་བ་ནི་དུས་ཀྱི་སྔ་ཕྱི་ཙམ་ཡིན་པ་མཐོང་ཐུབ། སྐྱེ་བའི་མཐའ་མ་འཇིག་པའམ་འཆི་བ་ཡིན་པ་ནི་རང་བཞིན་རེད། དེ་ལས་གཡོལ་ཐབས་སོགས་གང་ཡང་བྱེད་མི་ཐུབ། དེ་བཞིན་ང་ཚོ་འདིར་མཉམ་འཛོམས་བྱུང་བའི་མཐའ་མ་ཁ་གྱེས་དགོས་པ་དང་། ཡར་སོང་ན་མཐའ་མ་མར་ཡོང་རྒྱུ་ཡིན། ང་ཚོ་འཆི་རྒྱུ་ཡིན་པ་ལས་གཞན་གང་ཡང་བྱ་རྒྱུ་མེད་པ་དེ་ཤེས་པའི་ཐོག་འཆི་བ་ཐོག་ཏུ་མ་བབས་པའི་སྔོན་ཆོས་ཉམས་སུ་ལེན་པའི་ཐབས་ལ་འབད་དགོས་པ་ཡིན།

རྒྱུ་མཚན་དེའི་ཕྱིར་ང་ཚོས་སོ་སོ་ག་འདྲ་སེ་འཆི་རྒྱུ་ཡིན་པའི་ཐད་བསམ་བློ་གཏོང་དགོས། དཔེར་ན། རང་ཉིད་ནད་ཀྱིས་མནར་བའི་དབང་དུ་བཏང་ནས་ལུས་ཀྱི་ཤ་མདོག་ཞེད་སྣང་ཚ་པོ་དང་མདོག་ཉེས་པོ་གྱུར་བ་དང་། ཧ་ཅང་སྐྱོ་པོ་ཆགས་པ། རང་གི་སྤུན་ཉེ་ཚང་མས་ངུ་བཞིན་དུ་དེ་འདྲའི་མདོག་ཉེས་པ་ལ་ཨང་ཞེས་བརྗོད་པ།  སྨན་པ་ཡོང་ནས་རང་ལ་སྨན་བྱིན་ཀྱང་། རེ་བ་དེ་ཙམ་མི་འདུག དཔེ་སྡུག་ཅག་ཆགས་སོང་ཞེས་བརྗོད་པར་བསམ་བློ་གཏོང་དགོས།

དུས་ངེས་མེད་དུ་འཆི་བ།

དེ་བཞིན་རང་ཉིད་ག་དུས་འཆི་མིན་ལ་ངེས་པ་མེད། ལོ་ན་ཤིན་ཏུ་མཐོ་ཞིང་སྐྲ་ལོ་དུང་ལྟར་དཀར་བའི་ཕ་མ་རྒན་རྒོན་གྱིས་རང་གི་ཕྲུ་གུའི་ཕུང་པོ་ས་འོག་ཏུ་སྦས་པ་མཐོང་རྒྱུ་ཡོད། དེར་མ་ཟད། མི་མང་པོ་ཞིག་ནི་ནམ་རྒྱུན་གཏན་གྱི་ཁ་ལག་ཟས་ཏེ་བརྣངས་ནས་འཆི་འགྲོ་མཁན་ཡོད།

ཁྱེད་རང་ཚོས་བོད་ཀྱི་དཔེ་འདིར་བསམ་བློ་གཏོང་ན་འགྲིགས། དེ་ཡང་མི་གཅིག་གིས་ཤ་དུམ་བུ་ཆེན་པོ་མང་པོ་་ཟུར་དུ་བཞག་ནས། ཁོས་དེ་དག་སང་ཉིན་ཞོགས་པ་བཟའ་གི་ཡིན་ཞེས་བརྗོད་པ་རེད། འོན་ཀྱང་ཤ་རྡོག་པོ་དེ་ཟ་རྒྱུ་མ་བྱུང་སྔོན་ཁོ་རང་ཤི་བ་རེད། ཡང་དཔེ་གཞན་ཞིག་ནི། སིམ་ལཱ་ནས་ཡིན་པའི་ཞོག་ཁོག་འདེབས་མཁན་གྱི་ཞིང་པ་ཞིག་ངས་ངོ་ཤེས་ཀྱི་ཡོད། ཁོ་རང་གིས་ཉིན་དགུང་ཟས་བག་ལེབ་བརྔོས་མ་ཞིག་བཟོ་འཆར་ཡོད། འོན་ཀྱང་བག་ལེབ་བཟོ་བཞིན་པའི་སྐབས་ཁོང་ཤི་བ་ལྟ་བུ་རེད།

མི་རྟག་པ་དང་འཆི་བ་ལ་ཡི་རངས་བྱེད་པའི་ཐབས་ལེགས་ཤོས་ནི་དེའི་སྐོར་དེབ་ཀློག་པ་ཙམ་མ་ཡིན་པར། ང་ཚོས་ཧ་གོ་བའི་མི་ཤི་ཟིན་པ་རྣམས་ལ་བསམ་བློ་གཏོང་རྒྱུ་དེ་ཡིན།

འཆི་བའི་དུས་སུ་ཆོས་གཅིག་པུས་ཕན་ཐོགས་བྱེད་ཐུབ།

འཆི་བ་སྒོམ་དགོས་པའི་གནད་འགག་གང་ཡིན་ནམ། དགེ་མཚན་ཆེ་ཤོས་ནི་ཆོས་ཉམས་ལེན་བྱེད་རྒྱུ་དེ་ཡིན་པ་སྟོན་གྱི་ཡོད།

ང་ཚོས་ཕྱི་དངོས་པོའི་ཐོག་ནས་བསམ་བློ་བཏང་ན། འཆི་བའི་དུས་སུ་ང་ཚོས་གང་ཡང་མཉམ་དུ་ཁྱེར་མི་ཐུབ་པ་ཤེས་ཀྱི་རེད། དཔེར་ན། ཁྱེད་རང་དངུལ་ཧ་ཅང་མང་པོ་ཡོད་པའི་ཚོང་པ་ཕྱུག་པོ་ཞིག་ཡིན་ན། རང་ལ་དབང་བ་ནི་རང་གི་ཕུང་པོ་མེར་སྲེག་གཏོང་བའི་སྐབས་ཕུང་པོ་སྒྲིལ་བྱེད་ཀྱི་གོས་གོང་ཆེན་པོ་ཞིག་ཡོད་པ་དེ་ཡིན། འོན་ཀྱང་ཚོང་པ་དེས་རྒྱལ་ཁབ་གཅིག་ནས་གཅིག་བརྒྱུད་དེ་ཕྱིན་ནས་རང་གི་རྒྱུ་ནོར་གསོག་པའི་ཆེད་དུ་མི་དགེ་བའི་ལས་བསགས་པ་ནི་ཧ་ཅང་མང་པོ་ཡིན་སྲིད་པ་རེད།

གལ་སྲིད་ཁྱེད་རང་ལ་གཡོག་པོའམ་ལས་མི། ཡང་ན་བཀོད་འདོམས་བྱེད་མཁན་གྱི་དམག་དཔོན་འབུམ་གཅིག་ཡོད་ཀྱང་། ཁྱེད་རང་འཆི་བའི་སྐབས་དེ་དག་སུ་གཅིག་ཀྱང་རང་དང་མཉམ་དུ་ཡོང་མི་ཐུབ། དེ་བཞིན་སྤུན་མཆེད་ཀྱི་ལུང་པ་ཁེངས་ནས་ཡོད་ཀྱང་རོགས་བྱེད་མི་ཐུབ། ཁོང་ཚོས་གང་བྱེད་ཐུབ་པ་ནི། རང་ཉིད་འཆི་བའི་སྐབས་ད་ག་སེ་ཡར་ལངས་ནས་སྡོད་རྒྱུ་དང་། རང་ཉིད་ཞི་བདེའི་ངང་འཆི་རྒྱུ་བར་ཆད་དང་། ཕྱི་མའི་སྐྱེ་བ་ལ་འགོག་རྐྱེན་ཁོ་ན་བྱེད་ཀྱི་ཡོད།

འཆི་བའི་དུས་སུ་རོགས་བྱེད་ཐུབ་མཁན་གཅིག་ཁོ་ན་ཡོད་པ་ནི་ཆོས་ཉམས་ལེན་བྱས་པ་དེ་ཡིན། གསོན་པའི་སྐབས་བཟང་པོའི་ལས་ལ་བརྟེན་ནས་དགེ་བའི་ལས་ཀྱི་ནུས་པ་སྟོབས་ཆེན་བསགས་ཡོད་པ་སོང་ཙང་། དེས་སྐྱེ་བ་ཕྱི་མར་ཕན་རླབས་ཤིན་ཏུ་ཆེན་པོ་ཡོང་ཐུབ། འོན་ཀྱང་མི་དགེ་བའི་ལས་ཀྱི་ནུས་པས་དེ་དག་སྡུག་ཏུ་གཏོང་གི་ཡོད། དེ་ནི་འཆི་བར་བསམ་བློ་མ་བཏང་བར་རང་ངོས་ནས་ཤེས་རྟོགས་ཐུབ་པའི་གནད་དོན་ཞིག་ཡིན། བོད་ནང་བོད་མི་མང་པོ་ཞིག་ཧ་ཅང་ཕྱུག་པོ་ཡོད་ཀྱང་། འཆི་བའི་དུས་སུ་རང་ལ་ཡོད་པའི་ཤེས་བྱ་དང་ནང་གི་ཡོན་ཏན་གཅིག་པུ་མ་གཏོགས་ཁྱེར་ཐུབ་ཀྱི་མེད། བྱས་ཙང་། ང་ཚོས་ཚེ་འདིའི་ནང་བསམ་པ་རྣམ་དག་གི་སྒོ་ནས་ཆོས་ཉམས་ལེན་བྱེད་དགོས་པ་ལས་འཇིག་རྟེན་གྱི་བྱ་གཞག་ལ་མགོ་འཁོར་ནས་དུས་ཚོད་འཕྲོག་བརླག་གཏོང་རྒྱུ་མེད།

ང་ཚོས་འཇིག་རྟེན་གྱི་བྱ་གཞག་ཚང་མར་གྲོ་ཡི་སྦུན་པའམ་ཕུབ་མ་དང་འདྲ་བ་གལ་གནད་གང་ཡང་མེད་པ་ཞིག་ཡིན་པར་བསམ་བློ་གཏོང་དགོས། འཇིག་རྟེན་གྱི་བྱ་བར་སྙིང་པོ་གང་ཡང་མེད། འཇིག་རྟེན་གྱི་བྱ་གཞག་ཚང་མ་ཕྲུ་གུས་བྱེ་མའི་ཁང་པ་བཟོ་བ་དང་གཅིག་པར་བལྟ་དགོས། ཕྲུ་གུས་དེ་ལྟར་རྩེད་མོ་རྩེད་ནས་ཁང་པ་བཟོས་ཚར་རྗེས་དེ་ག་རང་ལ་གཡུགས་ནས་ནང་ལ་ལོག་འགྲོ་གི་ཡོད། དེ་ནི་ང་ཚོས་འཇིག་རྟེན་གྱི་བྱ་གཞག་ལ་བསམ་བློ་གཏོང་སྟངས་དེ་ཡིན།

གལ་སྲིད་ཁྱེད་ཀྱིས་དེའི་རིགས་ལ་བསམ་བློ་གཏོང་ཐུབ་ན། དེས་ཁྱེད་ཀྱི་ཆོས་ཉམས་ལེན་ལ་རོཌ་ཕན་རླབས་ཆེན་བྱེད་ཀྱི་རེད།།

སྐྱེས་བུ་ཆུང་ངུའི་བསམ་པ།

གལ་སྲིད་ང་ཚོས་འཇིག་རྟེན་གྱི་བྱ་གཞག་ཚང་མ་དགོས་པ་དང་གལ་ཆེན་མིན་པར་བསམས་ན། ཆོས་ཉམས་ལེན་བྱེད་རྒྱུ་གཅིག་པུ་དེ་གལ་ཆེན་པོ་ཡིན་པར་ཧ་གོ་གི་རེད།  ཆོས་ཉམས་ལེན་བྱེད་པ་ནི་སྐྱེ་བ་ཕྱི་མར་ཕན་ཐོགས་ཡོང་ཆེད་དུ་ཡིན། དཔེར་ན། “ད་ལྟ་ང་ལ་མི་ལུས་རིན་ཆེན་ཞིག་ཐོབ་ཡོད། སྐྱེ་བ་ཕྱི་མ་ངན་འགྲོའི་གནས་སུ་མི་ལྷུང་བའི་ཆེད་དུ་ངས་མི་ལུས་འདི་བེད་སྤྱོད་གཏོང་གི་ཡིན་” ཞེས་བསམ་བློ་འཁྱེར་བ་ནི། ང་ཚོས་མི་ལུས་རིན་ཆེན་འདི་ལས་ཁེ་ཕན་ཆུང་ཤོས་ལེན་པའི་རིམ་པ་དེ་ཡིན།

ངན་འགྲོའི་གནས་གསུམ་པོ་གང་རུང་དུ་མི་ལྷུང་བ་ལ་གང་གིས་སྔོན་འགོག་བྱེད་དམ་ཞེ་ན། བཟང་སྤྱོད་ཀྱི་རང་ཁྲིམས་དམ་པོར་སྲུང་རྒྱུ་དེས་བྱེད་པ་ཡིན། འོན་ཀྱང་ང་ཚོས་ཚུལ་ཁྲིམས་གཙང་མ་སྲུང་འདོད་ཀྱི་ཀུན་སློང་བརྟན་པོ་ཞིག་སྐྲུན་ནའང་། དེ་ག་ལེར་ཉམས་འགྲོ་གི་ཡོད། དེར་བརྟེན་ངན་འགྲོའི་གནས་སུ་མི་སྐྱེ་བའི་སྔོན་འགོག་བྱེད་པའི་ཆེད་དུ་སོ་སོ་རང་རྒྱུད་ཀྱི་ཉོན་མོངས་མེད་པ་བཟོ་དགོས། དེ་ནི་ཧ་ཅང་བཙོག་པ་ཆགས་པའི་གོས་ཤིག་འཁྲུ་བ་ནང་བཞིན་དང་པོ་ཤུགས་ཆུང་ཆུང་བྱེད་པ་དང་དེ་ནས་རིམ་བཞིན་ཤུགས་ཆེ་རུ་གཏོང་དགོས། དེ་ག་ནང་བཞིན་རང་རྒྱུད་ཀྱི་ཉོན་མོངས་མེད་པ་བཟོ་བ་ལ། ག་ལེར་ག་ལེར་ཞི་འཇམ་པོའི་ཐོག་ནས་འགོ་བཙུགས་ཏེ། རིམ་པས་རང་གི་བརྩོན་འགྲུས་ཀྱི་ནུས་ཤུགས་ཡོད་ཚད་དེའི་ཐོག་སྤྲོད་དགོས། བྱས་ཙང་། བཟང་སྤྱོད་ཀྱི་རང་ཁྲིམས་སྲུང་བར། དེ་ག་ལེར་ལག་བསྟར་བྱེད་དགོས་ཤིང་། དེ་ནས་རིམ་པས་ཉམས་ལེན་ལ་བརྟེན་ནས་ཉོན་མོངས་རྣམས་མེད་པ་བཟོ་ཐུབ། དེ་མིན་རང་གི་བརྩོན་འགྲུས་དེ་ལས་སླ་པོའི་སྒོ་ནས་ཉམས་འགྲོ་བ་ཡིན།

གལ་ཏེ་ངན་འགྲོའི་གནས་གསུམ་དུ་མི་སྐྱེ་བའི་ཆེད་དུ་བཟང་སྤྱོད་ཀྱི་རང་ཁྲིམས་སྲུང་བ་ཡིན་ན། དེ་ནི་ཆོས་ཉམས་ལེན་བྱེད་པའི་རིམ་པ་དམའ་ཤོས་དེ་ཡིན།

སྐྱེས་བུ་འབྲིང་གི་བསམ་པ།

གལ་ཏེ་ངན་སོང་གསུམ་དུ་སྐྱེ་བ་ལས་ཐར་ནས་ནས་སྐྱེ་བ་ཕྱི་མ་ལྷའམ་མིའི་གནས་སུ་སྐྱེས་ནའང་། ང་ཚོས་འཁོར་བའི་གནས་གང་དུ་སྐྱེ་བ་ཐམས་ཅད་སྡུག་བསྔལ་གྱི་རང་བཞིན་ཡིན་པར་ཤེས་ཐབས་བྱེད་དགོས། དེའི་སྐོར་ལམ་རིམ་ནང་ཤིན་ཏུ་རྒྱས་པར་གོ་བསྡུར་གནང་ཡོད། འོན་ཀྱང་དཔེ་འདིའི་ཐོག་ནས་ཀྱང་འགྲེལ་བཤད་རྒྱག་ཐུབ། དཔེར་ན། རང་ཉིད་ཉི་མའི་ཚ་དྲོད་འོག་ལངས་བསྡད་ནས་ཚ་བ་འཚིག་ན། ལམ་སེང་ཉི་འོད་མེད་སའི་ནང་ཞིག་ཏུ་འགྲོ་གི་རེད། བྱས་ཙང་། ཁྱེད་རང་ཚ་བའི་སྡུག་བསྔལ་ལས་ཐར་བ་རེད། ཡིན་ནའང་ཁང་པ་དེའི་ནང་ནས་གྲང་བའི་སྡུག་བསྔལ་ཡོང་རྒྱུ་དེ་ལྷག་ཡོད། དེར་བརྟེན་ང་ཚོ་ལ་སྡུག་བསྔལ་མེད་པའི་འཁོར་བའི་གནས་ཤིག་རྩ་བ་ནས་མེད།

ཉོན་མོངས་ཀྱིས་ང་ཚོ་དབང་མེད་ཡང་ནས་ཡང་དུ་སྐྱེ་བའི་འཁོར་བའི་ནང་འཁོར་དུ་འཇུག་གི་ཡོད། ཤིང་སྡོང་གི་རྩ་བ་ལྟ་བུ་འཁོར་བའི་རྩ་བ་ནི། ཆོས་རྣམས་རང་དབང་ཚུགས་ཐུབ་ཏུ་གྲུབ་པར་འཛིན་པ་དེ་ཡིན། འཁོར་བའི་ནང་འཁོར་བ་ནི་ཕྲུ་གུ་རྩེད་མོ་རྩེ་སའི་འཕྲུལ་ཆས་འཁོར་ལོ་དང་འདྲ་ཞིང་མཚམས་གང་དུའང་སླེབས་ཀྱི་མེད། དེ་ལས་མར་བབ་པའི་ཐབས་གཅིག་པུ་ནི་སོ་སོ་མཐོ་རུ་གཏོང་དགོས་པ་སྟེ། དེའི་སྒང་ལ་སླེབས་ཐུབ་པ་དང། དེ་ལས་ཐར་བ་བྱ་རྒྱུ་དེ་ཡིན། དེ་ལྟར་བྱེད་པ་ལ། ང་ཚོ་རྟོགས་པ་དང་ལྡན་ཞིང་། རྟོག་པ་དང་བྲལ་བའི་ངོ་བོ་ཉིད་མེད་པ་སྟེ། མི་སྲིད་པའི་བདག་མེད་པར་རྟོགས་པའི་ཆོས་རྣམ་འབྱེད་ཀྱི་ཤེས་རབ་དང་ལྡན་པའི་འཕགས་པའི་གང་ཟག་ཆགས་དགོས་ཀྱི་ཡོད།

ང་ཚོའི་སེམས་རྒྱུད་དུ་དེ་ལྟ་བུའི་སྟོང་ཉིད་རྟོགས་པའི་ཤེས་རབ་ཅིག་སྐྱེད་པར། སེམས་ཀྱི་གནས་བབས་ཞི་ཞིང་བརྟན་ཚུགས་པའི་ཞི་གནས་འཐོབ་རྒྱུ་གལ་ཆེན་པོ་ཡིན། དེ་སྒྲུབ་པར་བཟང་སྤྱོད་ཀྱི་རང་ཁྲིམས་སྲུང་དགོས། བྱས་ཙང་། ལྷག་པའི་བསླབ་པ་གསུམ་སྟེ། ཚུལ་ཁྲིམས་དང་། བསམ་གཏན། ཤེས་རབ་བཅས་ཀྱིས་དབང་མེད་ཡང་ནས་ཡང་དུ་སྐྱེ་བའི་འཁོར་བ་ལས་ཐར་བར་བྱེད་ཀྱི་ཡོད། གལ་ཏེ་ང་ཚོས་དེ་དག་ཉམས་ལེན་བྱེད་པ་ཡིན་ན། འཁོར་བའི་སྐྱེ་རྒྱུན་གཅོད་ཐུབ།

སོ་སོའི་ཤེས་ཚད་གོང་འཐོར་གཏོང་བ་ལ་བརྟེན་ནས་འཕགས་པའི་གང་ཟག་ཆགས་པ་ལ་རིགས་གསུམ་ཡོད་པ་ནི།

• མཐོང་ལམ་ཐོབ་པའི་འཕགས་པའི་གང་ཟག
• སྒོམ་ལམ་ཐོབ་པའི་འཕགས་པའི་གང་ཟག
• མི་སློབ་པའི་ལམ་ཐོབ་པའི་འཕགས་པའི་གང་ཟག་བཅས་གསུམ་ཡིན།

མཐོང་ལམ་ཐོབ་པའི་འཕགས་པའི་གང་ཟག་རྣམས་ལ་རྟོག་མེད་མངོན་སུམ་གྱིས་སྟོང་ཉིད་གསར་དུ་རྟོགས་པ་ཡོད། སྒོམ་ལམ་ཐོབ་པའི་འཕགས་པའི་གང་ཟག་རྣམས་ཀྱིས་མུ་མཐུད་སྒོམ་པའམ། ཡང་ན་དེ་ལྟ་བུའི་སྟོང་ཉིད་རྟོགས་པའི་རྟོག་མེད་མངོན་སུམ་གྱི་ཤེས་པ་རང་རྒྱུད་ལ་གོམས་པར་བྱེད་ཀྱི་ཡོད། གལ་སྲིད་རང་ངོས་ནས་སྒོམ་གང་མང་ཞིག་བརྒྱབ་པ་དང་། རང་གི་སེམས་དེ་སྟོང་ཉིད་རྟོཌ་པའི་ཤེས་པ་ལ་ཡོངས་སུ་གོམས་ཤིང་། རང་རྒྱུད་ལ་ཡོད་པའི་ཐར་བའི་གེགས་སུ་གྱུར་བའི་སྒྲིབ་པ་ཐམས་ཅད་ནམ་ཡང་མི་འབྱུང་བའི་ཚུལ་དུ་དག་པ་ཡིན་ན། ཁྱེད་རང་དགྲ་བཅོམ་པའི་གོ་འཕང་ཐོབ་པ་ཡིན།

བྱམས་པ་དང་སྙིང་རྗེ།

འོན་ཀྱང་རང་ཉིད་གཅིག་པུ་དགྲ་བཅོམ་པའི་གོ་འཕང་ཐོབ་པ་ཙམ་གྱིས་འགྲིག་གི་མེད། གང་ཡིན་ཞེ་ན། སེམས་ཅན་ཐམས་ཅད་དཀའ་སྡུག་གི་གནས་སྟངས་འདིའི་ནང་གཅིག་པར་གནས་ཡོད་ཅིང་། དེ་དག་ཐམས་ཅད་སྡུག་བསྔལ་མྱོང་བཞིན་པ་དང་། ཚང་མས་དེ་ལས་ཐར་འདོད་ཡོད་པ་རེད། གལ་ཏེ་ང་ཚོས་སེམས་ཅན་ཐམས་ཅད་སྡུག་བསྔལ་ལས་ཐར་བ་ཤོག་ཅེས་པའི་བསམ་པ་ཞིག་བསྐྱེད་ན་དེ་ལ་ “སྙིང་རྗེ་” ཞེས་ཟེར་གྱི་ཡོད། འོན་ཀྱང་སེམས་ཅན་ཐམས་ཅད་སྡུག་བསྔལ་ལས་ཐར་བ་ཤོག་ཅེས་པའི་བསམ་པ་ཞིག་སྐྱེད་པ་ལ། དང་པོ་སོ་སོའི་སྡུག་བསྔལ་ཐོག་རྒྱུན་རིང་པོ་རྩེ་གཅིག་ཏུ་སྒོམ་རྒྱག་དགོས་པ་དང་། དེ་ནས་གནས་ཚུལ་འཇིགས་སུ་རུང་བ་དེ་ཤེས་རྟོགས་བྱུང་བ་དང་། ཁྱེད་ཀྱིས་སྡུག་བསྔལ་ལས་ཐར་བའི་ཆོད་སེམས་ངེས་འབྱུང་གི་བསམ་པ་གོང་མཐོར་གཏོང་ཐུབ་པ་ཡིན། ནམ་ཞིག་སྡུག་བསྔལ་དེ་འཇིགས་སུ་རུང་བ་ཞིག་ཡིན་པར་ཤེས་པ་དང་དེ་ལས་ཐར་འདོད་ཀྱི་བསམ་པ་ཡོང་བའི་སྐབས་སུ། གཞི་ནས་སེམས་ཅན་ཐམས་ཅད་ལ་བསམ་པ་དེ་བེད་སྤྱོད་བྱེད་ཆོག དེ་ནི་སྙིང་རྗེ་རེད།

དེ་འདྲ་སོང་ཙང་། ངེས་འབྱུང་ནི་རང་ཉིད་སྡུག་བསྔལ་ལས་ཐར་འདོད་ཀྱི་བསམ་པ་ཞིག་ཡིན་ཞིང་། སྙིང་རྗེ་ནི་སེམས་ཅན་ཐམས་ཅད་སྡུག་བསྔལ་ལས་ཐར་འདོད་དེ་ཡིན། སྙིང་རྗེ་དང་བྱམས་པའི་ཁྱད་པར་ནི། སྙིང་རྗེ་དང་བཅས་ཏེ་ང་ཚོས། “སེམས་ཅན་ཐམས་ཅད་སྡུག་བསྔལ་དང་སྡུག་བསྔལ་གྱི་རྒྱུ་དང་བཅས་པ་ལས་ཐར་ན་ཅི་མ་རུང་” ཞེས་བསམ་གྱི་ཡོད། བྱམས་པའི་སྐབས་སུ་སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་ན་ཅི་མ་རུང་སྙམ་པ་དེ་ཡིན།

བཏང་སྙོམས་དང་བྱང་ཆུབ་ཀྱི་སེམས་གོང་འཕེལ་གཏོང་ཚུལ།

ང་ཚོར་བྱམས་པ་དང་སྙིང་རྗེ་མེད་པའི་རྒྱུ་མཚན་གང་ཡིན་ནམ། ང་ཚོས་སེམས་ཅན་ཐམས་ཅད་སྡུག་བསྔལ་དང་བྲལ་བ་དང་བདེ་བ་དང་ལྡན་པར་ཤོག་ཅེས་ཡིད་སྨོན་མི་བྱེད་པའི་རྒྱུ་མཚན་གང་ཡིན་ནམ།གང་ཡིན་ཟེར་ན། ང་ཚོའི་སེམས་ནི་འཇམ་པོ་མེད་ཅིང་རྩུབ་པོ་ཡོད་པ་དང་། ལེགས་ཉེས་སྣ་ཚོགས་ཡོད། ང་ཚོའི་སེམས་འདི་འཁོད་མི་སྙོམ་པ་དེ་གང་ཡིན་ནམ་ཞེ་ན། ང་ཚོའི་གཉེན་དང་གྲོགས་པོའི་ཕྱོགས་ལ་འདོད་ཆགས་ཧ་ཅང་ཆེན་པོ་ཡོད་པ་དང་། སོ་སོའི་མི་དགའ་སའམ་དགྲ་བོ་མཐོང་བའི་སྐབས་སུ་ང་ཚོ་ལ་ཞེ་སྡང་ཧ་ཅང་ཆེན་པོ་ཡོད་པས་ཡིན།

བྱས་ཙང་། འཁོད་སྙོམ་པོ་མེད་པའི་ལམ་ཞིག་ང་ཚོས་འཁོད་སྙོམ་པ་ག་འདྲ་སེ་བཟོ་དགོས་སམ།  དེ་ཡང་དཔེར་ན། ཁ་སང་མི་ཞིག་གིས་ཁྱེད་རང་ལ་སྒོར་མོ་བརྒྱ་སྤྲད་པ་དང་། ཡང་མི་གཞན་ཞིག་གིས་དེ་རིང་ཁྱེད་རང་ལ་སྒོར་མོ་བརྒྱ་སྤྲད་པ་རེད། ཁ་སང་དངུལ་སྤྲོད་མཁན་དེས་དེ་རིང་ཞོགས་པ་ཁྱེད་རང་གི་གདོང་ལ་ཁུ་ཚུར་གཅིག་གཞུས་པ་དང་། དེ་རིང་དངུལ་སྤྲོད་མཁན་དེས་ཁྱེད་རང་གི་གདོང་ལ་ཁ་སང་ཁུ་ཚུར་གཞུས་པ་རེད། ད་འོ་ན་ཁྱེད་རང་མི་དེ་གཉིས་ལས་སུ་ལ་དགའ་པོ་བྱེད་དགོས་པ་དང་། སུ་ལ་མི་དགའ་བ་བྱེད་དགོས་སམ། ཞེས་པའི་དཔེ་འདིའི་ཐོག་ནས་ང་ཚོས་ཤེས་ཐུབ་པ་ཡིན།

བྱས་ཙང་། དེ་ནང་བཞིན་སྔོན་ཆད་སོ་སོའི་དགྲ་བོས་རང་ཉིད་ལ་ཕན་ཆེན་པོ་ག་འདྲ་བཏགས་ཡོད་པ་དང་། མ་འོངས་པར་ཡང་ཕན་ཆེན་པོ་འདོགས་སྲིད་པ་ཡིན། དེ་བཞིན་ང་ཚོའི་གྲོགས་པོས་སྔོན་མ་རང་ཉིད་ལ་གནོད་ཆེན་པོ་སྐྱེལ་ཡོད་པ་དང་། མ་འོངས་པ་ལའང་གནོད་སྐྱེལ་རྒྱུ་ཡིན་པ་རེད། དེ་ནི་དུས་ཀྱི་ཁྱད་པར་ཙམ་ཡིན།

ཡང་དཔེ་གཞན་ཞིག་ནི། ཤ་ཟ་མཁན་དང་། མི་མ་སྤྱང་ཡིན་པ། མི་གསོན་པོའི་ཁྲག་འཇིབ་མཁན་སོགས་མིའི་རིགས་སྣ་ཚོགས་པ་ཞིག་ཡོད། ང་ཚོས་དེ་དག་ཡིད་དུ་འོང་བ་མཐོང་ནས་གཅིག་དང་མཉམ་དུ་ཆང་ས་རྒྱག་རྒྱུའི་འདོད་པ་ཡོང་སྲིད། འོན་ཀྱང་མཚན་མོ་གཅིག་ལ་དེའི་མཆེ་བ་རྣམས་ཕྱིར་དོན་ནས་ང་ཚོ་བཟའ་གི་རེད།

རང་གིས་ཁྱི་ཞིག་ལ་གཞུས་པ་ན། དེས་སྐད་བརྒྱབ་སྟེ་རང་ལ་སོ་རྒྱག་གི་རེད། དེར་བརྟེན་ང་ཚོས་དགྲ་ལ་ཁོང་ཁྲོ་ལངས་ན། ཁྱི་དེ་དང་འདྲ་བར་ཡ་ལན་སློག་གི་ཡོད། ང་ཚོས་འཁོད་སྙོམ་པོ་མེད་པའི་སེམས་འདི་དང་། ང་ཚོ་ལ་ཡོད་པའི་འདོད་ཆགས་དང་ཞེ་སྡང་འདི་མེད་པ་བཟོས་ནས་བཏང་སྙོམས་ཀྱི་སེམས་ཤིག་འཐོབ་དགོས་ཀྱི་ཡོད། བཏང་སྙོམས་དེའི་སྟེང་ང་ཚོས་བྱམས་པ་དང་སྙིང་རྗེ་སྐྱེད་ཐུབ། དཔེར་ན། འཁོད་མི་སྙོམ་པའི་ལམ་དེ་བཅོས་ནས་སྣུམ་འཁོར་འགྲོ་ཐུབ་པའི་ལམ་འཁོད་སྙོམ་པོ་ཞིག་བཟོ་དགོས་པ་ལྟ་བུ་རེད།

ང་ཚོ་ལ་རྫས་མེ་ལྟ་བུ་གཏོར་ནས་ལམ་འཁོད་སྙོམ་པོ་བཟོ་བ་ནང་བཞིན་གྱི་བསམ་བློ་ནུས་སྟོབས་ལྡན་པ་ཞིག་དགོས་ཀྱི་ཡོད། བསམ་བློ་ག་འདྲ་ཞིག་དགོས་སམ་ཞེ་ན། གཞན་སེམས་ཅན་རྣམས་ཀྱི་དཀའ་དྲིན་ལ་བསམ་དགོས། དཔེར་ན། ང་ཚོས་འོ་མ་འཐུང་གི་ཡོད། འོ་མ་ནི་བ་ཕྱུགས་དང་མ་ཧེ་ལས་ཡོང་གི་ཡོད། དེ་དག་ཕྱི་ལོགས་ཐོན་ནས་རྩྭ་ཟ་བ་དང་ཆུ་འཐུང་གི་ཡོད། ང་ཚོས་ག་རེ་བྱེད་ཀྱི་ཡོད་ཟེར་ན། དེ་དག་ལས་འོ་མ་འཇོ་གི་ཡོད། རི་བོང་དང་ཙི་ཙི་སོགས་སྨན་སྦྱོར་ཚོད་ལྟའི་ཆེད་བེད་སྤྱོད་བྱེད་ཀྱི་ཡོད། བྱས་ཙང་། ཙི་ཙི་དང་རི་བོང་སོགས་ཀྱི་ཚེ་སྲོག་བཏང་ནས་ང་ཚོས་སྨན་ལོངས་སུ་སྤྱོད་ཀྱི་ཡོད།

ང་ཚོས་སོ་སོའི་དགྲ་རུ་འཛིན་པ་དང་སོ་སོ་ལ་གནོད་པ་སྐྱེལ་བའི་མིའི་གྲངས་ཚད་ནི་ངེས་ཅན་ཞིག་ལས་མེད། གལ་ཏེ་ཁོང་ཚོས་ང་ཚོར་གནོད་པ་བྱས་པ་དང་ཁོང་ཚོའི་དཀའ་དྲིན་གཉིས་བསྡུར་ན། ཕྱི་མ་བཀའ་དྲིན་དེ་སྔ་མ་གནོད་པ་བྱས་པ་ལས་རྦད་དེ་མང་བ་དང་ཆེ་བ་ཡོད། དེ་བཞིན་ཁོང་ཚོས་རང་ཉིད་ལ་བྱས་པའི་གནོད་པ་རྣམས་དངོས་གནས་བྱས་ན་ཕན་ཐོགས་ཆེན་པོ་ཡོང་སྲིད། སངས་རྒྱས་ཀྱི་གོ་འཕང་འཐོབ་པར། ང་ཚོས་བཟོད་པ་ཡར་རྒྱས་གཏོང་དགོས་པ་དང་། བཟོད་པ་སྒོམ་ཡག་ལ། ང་ཚོར་མི་སྣང་བར་མི་འགྲོ་བའམ་རྩུབ་སྤྱོད་ཅན་དེ་འདྲ་དགོས་ཀྱི་ཡོད། གལ་ཏེ་མི་ཚང་མ་བཟང་པོ་ཤ་སྟག་ཡིན་ན། ང་ཚོས་བཟོད་པ་གོང་འཕེལ་གཏོང་མི་ཐུབ། ང་ཚོར་ཁོང་ཁྲོ་བྱེད་མཁན་གྱི་སེམས་ཅན་ཡིན་པ་ལས་སངས་རྒྱས་མ་ཡིན། བྱས་ཙང་། ཁོ་ཚོས་ང་ཚོ་ལ་བཟོད་པ་བསླབ་ཀྱི་ཡོད། དཔེར་ན། ཇོ་བོ་རྗེ་དཔལ་ལྡན་ཨ་ཏི་ཤ་བོད་དུ་ཕེབས་སྐབས། རྒྱ་གར་བ་སྐད་ཅོར་ཚ་པོ་ཞིག་མཉམ་དུ་ཁྲིད་གནང་ཡོད། མི་དེས་ཇོ་བོ་རྗེའི་བཟོད་པ་ལ་རྟག་ཏུ་ལྟ་ཚོད་བྱེད་ཀྱི་ཡོད། མི་དེ་མཉམ་དུ་ཁྲིད་གནང་དགོས་དོན་གང་ཡིན་ནམ་ཞེས་ཞུས་སྐབས། བཟོད་པ་ཉམས་ལེན་བྱེད་པའི་ཆེད་དུ་ཡིན་ཞེས་བཀའ་གནང་ཡོད། དེར་བརྟེན་ང་ཚོ་ལ་སེམས་ཅན་དང་སངས་རྒྱས་ཀྱི་དཀའ་དྲིན་མཚུངས་པ་ཡིན། དེ་ནི་རྒྱལ་སྲས་ཆེན་པོ་ཞི་ལ་ལྷས་མཛད་པའི་སྤྱོད་འཇུག་ལས་ཞིབ་པར་གསལ་ཡོད།

སངས་རྒྱས་ལ་སྐུ་རླུང་བཞེང་རྒྱུ་མེད་པར་རྒྱུ་མཚན་ཞིག་ཡོད། དེ་ནི་ཉོན་མོངས་ཐམས་ཅད་ལས་ཐར་བའི་རྩེ་གཅིག་པའི་ཏིང་ངེ་འཛིན་ཡོད་པའི་དབང་གིས་ཡིན། སངས་རྒྱས་ལ་རྩེ་གཅིག་པའི་ཏིང་ངེ་འཛིན་དེ་ཡོད་པས། ཁོང་སྐུ་རླུང་བཞེང་གི་མེད། བྱས་ཙང་། ང་ཚོས་དེ་གོང་མཐོར་གཏོང་དགོས། ཞོགས་པ་ང་ཚོས་བསམ་པ་གཉིས་སྐྱེད་པའི་སྒོ་ནས་ཡར་ལངས་དགོས།

• དེ་རིང་ངས་གཞན་ལ་ཁོང་ཁྲོ་སློང་གི་མིན་ཞེས་པ་དང་།
• གཞན་གྱིས་ང་ལ་ཁོང་ཁྲོ་སློང་འཇུག་གི་མིན།

གལ་ཏེ་ང་ཚོ་བསམ་པ་དེ་ལ་གོམས་ན། ང་ཚོའི་རྒྱུད་ཀྱི་ཉོན་མོངས་རྣམས་ཉུང་དུ་ཉུང་དུ་བཏང་ནས་མཐར་ཉོན་མོངས་ལས་རྦད་དེ་ཐར་བའི་གནས་བབས་ཤིག་ཐོབ་ཀྱི་ཡོད། དེ་འདྲའི་ཐོག་ནས་སངས་རྒྱས་ཀྱི་གོ་འཕང་འཐོབ་ཐུབ་པ་ཡོང་གི་ཡོད།

གལ་སྲིད་ང་ཚོས་སངས་རྒྱས་ཀྱི་ཐུགས་མཉེས་པའི་ཐབས་ག་རེ་བྱེད་ཐུབ་བམ་ཟེར་ན། དེ་ནི་གཞན་སེམས་ཅན་ལ་སེམས་པ་བཟང་པོ་དང་རོགས་རམ་བྱེད་རྒྱུ་དེ་ཡིན། དེ་ལྟར་བྱས་ན་དངོས་གནས་སངས་རྒྱས་ཐུགས་མཉེས་པོ་ཡོང་རྒྱུ་རེད། དཔེར་ན། གལ་ཏེ་ཕ་མ་ཕྲུ་གུ་མང་པོ་ཡོད་མཁན་ཞིག་ཡིན་ན། ང་ཚོས་ཕ་མ་གཅིག་པུ་ལ་དགའ་པོ་མ་བྱས་པར། ཁོང་ཚོའི་ཕྲུ་གུ་ལ་བྱམས་པོ་བྱེད་པས་ཕ་མ་དེ་ལས་མང་བ་སྐྱིད་པོ་ཡོང་ཐུབ། དེ་ག་ནང་བཞིན་ང་ཚོས་གྲངས་མེད་པའི་སེམས་ཅན་དང་སངས་རྒྱས་ལའང་བྱམས་བརྩེ་བྱས་ན་སངས་རྒྱས་རྣམས་ཐུགས་མཉེས་པ་ཡོང་གི་རེད། དེ་འདྲ་སོང་ཙང་། དེ་དག་ཐམས་ཅད་གཞིར་བཞག་སྟེ། ང་ཚོས། “སེམས་ཅན་ཐམས་ཅད་ཀྱི་དོན་ངས་སངས་རྒྱས་ཀྱི་གོ་འཕར་འཐོབ་པར་བྱ་རྒྱུ་ཡིན་” ཞེས་དམིགས་ཡུལ་བྱང་ཆུབ་ཀྱི་སེམས་སྐྱེད་ཐབས་ལ་འབད་དགོས།

དེ་ལས་ལྷག་པ་ཞིག་ནི། སེམས་ཅན་ཐམས་ཅད་ཀྱི་དོན་དུ་ཚེ་འདི་རང་ལ་སངས་རྒྱས་ཀྱི་གོ་འཕང་འཐོབ་པར་བྱ་རྒྱུའི་ཀུན་སློང་ཧ་ཅང་ཤུགས་ཆེན་པོ་ཞིག་ང་ཚོར་ད་ལྟ་ཉིད་ནས་དགོས་པ་ཡིན། སངས་རྒྱས་ཀྱིས་ཚེ་གཅིག་ལ་སངས་རྒྱས་ཀྱི་གོ་འཕང་འཐོབ་པའི་ཐབས་གཅིག་ཡོད་གསུངས་ཡོད། ཐབས་དེ་གང་ཡིན་ནམ་ཞེ་ན། དེ་ནི་སྔགས་ཀྱི་ལམ་དེ་ཡིན། གལ་ཏེ་ཁྱེད་རང་གིས་སྔགས་ཀྱི་ལམ་དེ་ཉམས་ལེན་བྱས་ན། ཚེ་གཅིག་གི་ནང་སངས་རྒྱས་ཀྱི་གོ་འཕང་འཐོབ་སྲིད་པ་ཡིན།

ང་ཚོར་ཚེ་གཅིག་རང་ལ་འཚང་རྒྱ་བའི་ཀུན་སློང་ཤུགས་དྲག་པོ་ཞིག་ཡོད་ནའང་། དེ་ལས་སླ་པོ་ཞིག་རེད་བསམ་རྒྱུ་མེད། དེ་གང་ཡིན་ཞེ་ན། སྐྱེ་བ་ཐོག་མ་མེད་པ་ནས་བཟུང་ང་ཚོས་མི་དགེ་བའི་ལས་གྲངས་ལས་འདས་པ་བསགས་ཚར་བ་རེད། སྔགས་ལམ་ཧ་ཅང་མྱུར་པོ་ཡོད་ཀྱང་། དེ་ལམ་དཀའ་ལས་ཁག་པོ་ཤིག་ཡིན། ང་ཚོས་སྔགས་ལམ་ཉམས་སུ་ལེན་པ་དེ་གནམ་གྲུ་ཞིག་གི་ནང་འགྲོ་བ་ལྟར་ཧ་ཅང་མྱུར་པོ་རེད་བསམ་རྒྱུ་མེད། དེ་འདྲའི་ལས་སླ་པོ་མེད། དཔེར་ན། རྗེ་བཙུན་མི་ལ་རས་པས་རང་གི་བླ་མ་མར་པའི་དྲུང་དུ་དཀའ་ཐུབ་མང་པོ་ཞེ་དྲགས་མྱོང་དགོས་བྱུང་ཡོད་པ་དཔེར་ན། སྲས་མཁར་དགུ་ཐོག་བརྩིགས་པ་དང་། ཉེས་རྡུང་བཏང་བ་སོགས་སྡུག་བསྔལ་མང་པོ་མྱངས་ཡོད། རྒྱུ་མཚན་དེ་ལ་བརྟེན་ནས་ཁོང་ཚེ་གཅིག་ལུས་གཅིག་ལ་སངས་རྒྱས་ཡོད། འོན་ཀྱང་ང་ཚོ་ནི་རྗེ་བཙུན་མི་ལས་དཀའ་སྤྱད་མྱངས་པའི་ཆ་ཙམ་ཡང་མྱོང་འདོད་མེད་པ་རེད།

གལ་སྲིད་ང་ཚོར་ཚེ་འདི་རང་ལ་འཚང་རྒྱ་རྒྱུའི་འདུན་པ་ཤུགས་ཆེན་ཞིག་དང་དཀའ་སྤྱད་མང་པོ་མྱོང་རྒྱུའི་གྲ་སྒྲིག་ཨང་གསར་ཡོད་ན། དེ་ནས་རྒྱུན་བརྟན་པའི་ཉམས་ལེན་ལ་བརྩོན་པའི་སྒོ་ནས་མཐར་དངོས་གནས་སངས་རྒྱས་ཀྱི་གོ་འཕང་འཐོབ་ཐུབ་པའི་གོ་སྐབས་ཤིག་ཡོད་པ་ཡིན།

མི་ལུས་རིན་ཆེན་ཐོབ་པ་འདི་ང་ཚོས་ཆོས་ཉམས་ལེན་དང་། མ་འོངས་པར་སྐྱེ་བ་བཟང་པོ་ཞིག་དང་། ཐར་པ་འཐོབ་པ་དང་། ཐམས་ཅད་མཁྱེན་པའི་གོ་འཕང་འཐོབ་པ་བཅས་ལ་བེད་སྤྱོད་བྱེད་ཆོག་པ་ཡིན། དེ་ལྟར་འཐོབ་པ་ལ། ང་ཚོས་ལམ་རིམ་ལ་སློབ་སྦྱོང་བྱེད་དགོས། འདིའི་ནང་དུ་མི་དགེ་བའི་ལས་ལམ་བཅུ་སྤོང་རྒྱུ་དང་། སོ་སོའི་ཉོན་མོངས་མེད་པ་བཟོ་རྒྱུ། འཁོར་བ་ལས་ཐར་འདོད་ཀྱི་ཆོད་སེམས་ཏེ་ངེས་འབྱུང་དང་། དམིགས་ཡུལ་བྱང་ཆུབ་ཀྱི་སེམས་རྒྱུད་ལ་སྐྱེད་པར་བྱ་རྒྱུ། རྩེ་གཅིག་པའི་ཏིང་ངེ་འཛིན་འཐོབ་རྒྱུ། དེ་བཞིན་རྟོག་མེད་ཀྱི་སྒོ་ནས་སྟོང་ཉིད་རྟོགས་པ་བཅས་གསལ་ཡོད།།