ལམ་རིམ་གྱི་བསྡུས་དོན།

ང་ཚོ་ཚང་མར་མི་ལུས་རིན་ཆེན་འདི་ཐོབ་ཅིང་། མི་ལུས་རིན་ཆེན་འདིའི་ཐོག་ནས་སེམས་ཡར་རྒྱས་གཏོང་བར་གོ་སྐབས་ཆེ་ཤོས་སྤྲད་ཀྱི་ཡོད། སངས་རྒྱས་ཀྱི་གོ་འཕང་འཐོབ་པར་ད་ལྟའི་མིའི་ལུས་རྟེན་འདི་ལས་གོ་སྐབས་བཟང་བ་ཞིག་ང་ཚོར་རྩ་བ་ནས་མེད། ཐ་ན་འབྱུང་འགྱུར་ང་ཚོར་ལྷ་རྣམས་ཀྱི་རྒྱལ་པོ་བརྒྱ་བྱིན་གྱི་གོ་འཕང་ཐོབ་ཀྱང་མི་ལུས་འདི་ལས་བཟང་བ་མེད།

ད་ལྟ་ང་ཚོར་ཐོབ་པའི་ལུས་རྟེན་འདི་ལས་ཡག་པའི་བྱ་བའི་རྟེན་གཞི་ཞིག་མེད་སྟབས། འདི་བེད་སྤྱོད་ཡག་ཤོས་གཏོང་བའི་རྒྱུད་རིམ་ཚང་མ་ཤེས་རྟོགས་བྱ་རྒྱུ་གལ་འགངས་ཆེན་པོ་ཡིན། སེམས་པ་བཟང་བ་དང་སྙིང་རྗེ་ཆེ་བ་སོགས་ནང་སེམས་ཀྱི་ཐོག་ནས་ཡར་རྒྱས་གཏོང་རྒྱུ་ནི་ང་ཚོའི་སེམས་རྒྱུད་གོང་འཕེལ་གཏོང་སྟངས་ཡག་ཤོས་ཡིན། སེམས་བཟང་པོ་གཞི་རྩ་བྱས་ནས། ང་ཚོས་སྙིང་རུས་ལྡན་པའི་བྱང་ཆུབ་ཀྱི་སེམས་རྒྱུད་ལ་སྐྱེད་ཐབས་བྱེད་དགོས། དེ་ནི་སངས་རྒྱས་ཀྱི་གོ་འཕང་འཐོབ་པར་བྱེད་པའི་ཡིད་སྨོན་ཞིག་ཡིན། ཕྱོགས་གཞན་ཞིག་ནས་བཤད་ན། དེ་ནི་སེམས་ཅན་ཐམས་ཅད་ལ་གང་ཐུབ་ཐུབ་ཀྱིས་ཕན་པ་སྒྲུབ་པའི་དོན་དུ་ང་ཚོའི་མི་དགེ་བའི་ཉེས་པ་ཀུན་སྤོང་བ་དང་སོ་སོའི་ནུས་པ་ཆ་ཚང་བེད་སྤྱོད་ཐུབ་པའི་ཡིད་སྨོན་ཞིག་ཡིན། ང་ཚོས་སོ་སོའི་སེམས་གཞན་ལ་བསྔོ་བ་དང་སངས་རྒྱས་ཀྱི་གོ་འཕང་ལ་འབད་པ་ནི། ང་ཚོས་མི་ལུས་རིན་ཆེན་འདི་བེད་སྤྱོད་ཡག་ཤོས་སུ་གཏོང་ཐུབ་པ་ཡིན།

སྐྱེ་བ་སྔོན་མའི་དགེ་བའི་ནུས་པ་ནི་ཚེ་འདིའི་གྲུབ་འབྲས་ཀྱི་རྒྱུ་ཡིན།

འགྲོ་བ་མིའི་རིགས་འདྲ་མིན་མང་པོ་ཡོད་པ་དེ་དག་ཚང་མའི་ནང་སངས་རྒྱས་ཀྱི་གོ་འཕང་འཐོབ་པར་འདོད་པ་ཕར་ཞོག སོ་སོའི་མ་འོངས་པའི་མི་ཚེར་ཕན་ཐོགས་བསྒྲུབ་པའི་སྤྲོ་བ་ཡོད་མཁན་གྱི་མི་ཧ་ཅང་དཀོན་པོ་ཡིན། མི་མང་ཆེ་བ་ནི་རང་ཉིད་གཅིག་པུའི་དོན་དུ་ཚེ་འདིའི་བདེ་བའི་ཆེད་དུ་དོ་འཁུར་བྱེད་མཁན་ཤ་སྟག་ཡིན། ཡིན་ནའང་། མི་ཚང་མ་སྡུག་བསྔལ་མི་འདོད་པ་དང་བདེ་བ་འདོད་པ་ནི་གཅིག་པ་རེད།

ཚེ་འདི་སྐྱིད་པོ་འདོད་པའི་མི་རྣམས་ལ། བདེ་སྐྱིད་རིགས་མི་འདྲ་བ་གཉིས་ཡོད་དེ། ལུས་ཀྱི་བདེ་སྐྱིད་དང་ཡིད་ཀྱི་བདེ་སྐྱིད་ཡིན། མི་མང་ཆེ་བས་དོ་སྣང་གི་ཚད་དེ་ལུས་ཀྱི་བདེ་བ་གཅིག་པུ་ལ་བཞག་གི་ཡོད། འོན་ཀྱང་ལུས་ཀྱི་བདེ་བ་ལ་གཞིགས་ན། ང་ཚོའི་མི་ཚེའི་བདེ་སྐྱིད་དེའི་ཚད་ངེས་ཅན་ཞིག་འཐོབ་ཐབས་སུ་ང་ཚོ་ཚང་མས་ལས་དོན་སྒྲུབ་ཀྱི་ཡོད་ཀྱང་། མི་མང་ཆེ་བས་དེ་ག་འདྲ་སེ་སྒྲུབ་དགོས་མིན་དངོས་གནས་ཤེས་ཀྱི་མེད། དཔེར་ན། ཟས་དང་། གོས། གནས་ས། གོ་གནས་ལ་རྗེས་སྙེག་བྱེད་མཁན་གྱི་མི་ཚོས་ཉེས་མེད་ཀྱི་སེམས་ཅན་ཉམ་ཆུང་རྣམས་གསོད་པའམ་ལྐོག་གསོད་བྱེད་པ། ཡང་ན་སེམས་ཅན་མང་པོ་ཞིག་སྡེབ་གསོད་བྱེད་ཀྱི་ཡོད། མི་གཞན་རྣམས་ཀྱིས་ནི་མ་བྱིན་པར་ལེན་པ་དང་། མགོ་སྐོར་སླུ་བྲིད་བྱེད་པ། ཡང་ན་མཚན་རྐུན་གྱི་བྱ་སྤྱོད་སྤེལ་གྱི་ཡོད། དེ་དག་ཐམས་ཅད་ཀྱི་དགོས་པ་ནི། ཚང་མས་བདེ་སྐྱིད་ཀྱི་རྗེ་སུ་སྙེག་པ་དང་ལུས་ཀྱི་བདེ་བ་ཡོང་ཐབས་བྱེད་ཀྱི་ཡོད། འོན་ཀྱང་ཁོང་ཚོས་ཐབས་ཤེས་བྱེད་པ་བཞིན་བདེ་བ་དེ་སྒྲུབ་ཐབས་ཀྱི་ཐབས་ལམ་ཏག་ཏག་ཅིག་དངོས་གནས་ཤེས་ཀྱི་མེད། བདེ་སྐྱིད་ཀྱི་ཚབ་ཏུ་ཁོང་ཚོས་རང་ཉིད་ལ་དཀའ་ངལ་མང་བ་བཟོ་ཡི་ཡོད།

ཕྱོགས་གཞན་ཞིག་ནས། ཚོང་ལས་དང་། དཔལ་འབྱོར། ཞིང་ལས། ཤེས་ཡོན། སྒྱུ་རྩལ་ལ་སོཌ་པའི་འཚོ་རྟེན་ལ་དྲང་བདེན་གྱི་སྒོ་ནས་འཚོ་བ་སྐྱེལ་ཐབས་བྱེད་མཁན་གྱི་མི་རྣམས་སྡེ་ཚན་གཉིས་སུ་དབྱེ་བ་ཕྱེ་ཆོག ཕྱོགས་གཅིག་ནས་རྒྱུ་ནོར་དང་དཔལ་འབྱོར་མཁོ་སྒྲུབ་བྱེད་པར་འབད་བརྩོན་བསྟེན་པ་བཞིན་ལེགས་གྲུབ་ཐུབ་མཁན་ཞིག་དང་། དེ་ལྟར་ལམ་ལྷོང་མ་ཐུབ་པའམ་ཡོངས་སུ་ཕམ་འགྲོ་མཁན་ཞིག་ཡོད། ཁག་ཅིག་ལ་ལམ་ལྷོང་བྱུང་བ་དང་། གཞན་རྣམས་ལ་ལེགས་གྲུབ་མི་ཡོང་བའི་རྒྱུ་མཚན་གང་ཡིན་ནམ་ཞེས་གལ་སྲིད་ང་ཚོས་སྐད་ཆ་དྲིས་པ་ན། དེ་ནི་སྐྱེ་བ་སྔོན་མར་ཁོ་ཚོས་དེ་དང་མཐུན་པའི་རྒྱུ་ས་བོན་དང་ནུས་པ་བསགས་པ་སོང་ཙང་ཡིན། རང་གི་སྐྱེ་བ་སྔོན་མར་ལས་ངན་བྱེད་མཁན་དང་མི་དགེ་བའི་ནུས་པ་ཤུགས་ཆེན་པོ་གསོག་མཁན་རྣམས་ཀྱི་འབྲས་བུ་ནི་ཚེ་འདིར་ལམ་ལྷོང་མི་ཡོང་བ་དེ་རེད། དེ་ལས་ལྡོག་སྟེ། སྔོན་མ་ལས་བཟང་པོ་བྱེད་མཁན་དང་དགེ་བའི་ནུས་པ་གསོག་མཁན་རྣམས་ཀྱི་འབྲས་བུ་ནི་ཚེ་འདིར་ལམ་ལྷོང་དང་བདེ་སྐྱིད་དང་ལྡན་པ་ཞིག་ཡོང་གི་ཡོད།

མི་འགའ་ཞིག་ལ་བྱ་བ་ལམ་ལྷོང་ཡོང་བ་དང་གཞན་ཁག་ཅིག་ལ་མི་ཡོང་བའི་རྒྱུ་མཚན་གང་ཡིན་འགྲེལ་བརྗོད་བྱས་པ་འདི་རང་ངོས་ནས་ཁས་ལེན་མ་བྱས་ན། ཁྱད་པར་དེ་འདྲ་ག་རེ་བྱས་ནས་ཡིན་མིན་གྱི་རྒྱུ་མཚན་དངོས་གནས་ཡོད་ཀྱི་མ་རེད། གལ་སྲིད་མི་རྣམས་ཀྱིས་བརྩོན་འགྲུས་དང་འཇོན་ཐང་གཅིག་མཚུངས་ཐོག་བྱ་བ་སྒྲུབ་ན། གྲུབ་འབྲས་ཀྱང་དེ་བཞིན་འཐོབ་ངེས་ཡིན། མི་འགའ་ཞིག་གི་སེམས་ལ། གྲུབ་འབྲས་དང་ལྡན་པ་ནི་ཚེ་འདིའི་ནང་སོ་སོའི་འཚོ་ཐབས་ཆེད་ལས་རིགས་གང་ཞིག་བྱས་པ་ལས་ཡོང་གི་ཡོད་བསམ་གྱི་ཡོད། དཔེར་ན། ཚོང་ལས་གཉེར་བའམ་དཔལ་འབྱོར་མཁོ་སྒྲུབ་བྱེད་པ་ལྟ་བུ་རེད། འོན་ཀྱང་མཐའ་གཅིག་ཏུ་རྒྱུ་མཚན་དེ་ལྟར་མ་ཡིན། གྲུབ་འབྲས་ལྡན་པའི་རྒྱུ་རྐྱེན་ངོ་མ་ནི་རང་གི་སྐྱེ་བ་སྔོན་མར་ལས་བཟང་པོ་བྱས་པ་ལས་ཐོབ་པའི་ནུས་པའི་རྐྱེན་གྱིས་ཡིན་པ་དང་། ཆབས་ཅིག་ཚེ་འདིར་བསགས་པའི་ལས་ནི་རྒྱུ་དེ་དག་གི་འབྲས་བུ་སྨིན་པར་བྱེད་པའི་འཕྲལ་གྱི་རྐྱེན་བྱེད་ཀྱི་ཡོད།

དེ་ག་ནང་བཞིན་གྲུབ་འབྲས་ནི་རྒྱུ་དང་རྐྱེན་གཉིས་མཉམ་དུ་བྱུང་བ་ལ་རག་ལས་ཡོད། རྒྱུ་ནི་སྐྱེ་བ་སྔོན་མ་ནས་ཡོང་བ་ཞིག་དང་། དེ་ནི་དགེ་མི་དགེའི་ནུས་པ་བསགས་པ་ཞིག་ཡིན། འཕྲལ་རྐྱེན་ནི་དུས་ཚོད་དང་བརྩོན་འགྲུས་ལ་བརྟེན་ནས་ཚེ་འདིའི་ནང་འབྱུང་གི་ཡོད། རྒྱུ་དང་རྐྱེན་གཉིས་པོ་ངེས་པར་དུ་མཉམ་དུ་ཡོང་དགོས་པ་ཡིན།

སྐྱེ་བ་ཕྱི་མ་ལ་སེམས་འཁུར།

ཚེ་འདི་ལ་མི་རྣམས་ག་ཚོད་ཕྱུག་པོ་ཆགས་པ་དང་། ཁོང་ཚོས་དཔལ་ཡོན་ལ་སྐྱིད་པོ་ག་ཚོད་གཏོང་གི་ཡོད་ཀྱང་། ད་དུང་མི་སུ་གཅིག་ཀྱང་སོ་སོས་གང་བསགས་པའི་རྒྱུ་དངོས་པོ་ལ་འདོད་པ་ཁེངས་ཀྱི་མེད། མི་སུ་གཅིག་གིས་ཀྱང་། “ད་འགྲིགས་སོང་། ད་ང་ལ་གང་ཡང་མི་དགོས་”ཤེས་བརྗོད་ཀྱི་མེད། སོ་སོར་གང་ཡོད་པ་དེ་ལ་ཆོག་ཤེས་ནམ་ཡང་མེད་པར། རྟག་ཏུ་དེ་ལས་མང་བ་དགོས་འདོད་པ་དང་། ཁོ་ཚོས་མི་ཚེ་ཚང་མ་དེའི་དོན་དུ་ལས་ཀ་བྱེད་ཡག་ལ་བེད་སྤྱོད་བཏང་ཡོད། འོན་ཀྱང་ཁོ་ཚོའི་ལས་ཀར་ནམ་ཡང་མཇུག་རྫོགས་རྒྱུ་མེད།

དེ་ནི་རྫོགས་མཐའ་མེད་པའི་འཁོར་ལོ་ཞིག་ཆགས་ཀྱི་ཡོད། དཔེར་ན། ཞིང་པས་ལོ་གཅིག་གི་ནམ་དུས་བཞིའི་རིང་དཀའ་ལས་བརྒྱབ་ཏེ་ས་ཞིང་འདེབས་པ་དང་། རྟག་ཏུ་ཞིང་ཁར་འགྲོ་ནས་སྟོན་ཐོག་བཙས་མ་རྔ་གི་ཡོད། དཔྱིད་ཀའི་དུས་སུ་ཡང་བསྐྱར་ས་བོན་འདེབས་ཤིང་། འཁོར་ལོ་དེ་བརྒྱུད་ནས་ལས་ཀ་ཡང་བསྐྱར་བྱེད་དགོས་ཀྱི་ཡོད། དེ་ནི་ང་ཚོས་མུ་མཐུད་དེ་རྫོགས་རྒྱུ་མེད་པའི་ལས་ཀ་ག་འདྲ་བྱེད་ཀྱི་ཡོད་པའི་དཔེ་མཚོན་ཞིག་ཡིན།

མ་གཞི་ང་ཚོས་ཚེ་འདིའི་ལས་དོན་རྫོགས་མཐའ་མེད་པ་ཞིག་རེད་ཅེས་རྩ་བ་ནས་བསམ་གྱི་མེད། ཡིན་ནའང་། ང་ཚོ་འཆི་བའི་དུས་སྐབས་སུ་དངོས་གནས་ལས་དོན་རྣམས་རྫོགས་པའི་དུས་དེ་ཡོད། སྐབས་དེ་དུས་བདེ་སྐྱིད་དང་ལྡན་པའི་སྒོ་ནས་རྫོགས་པ་མ་ཡིན་པར། དེ་ལས་ལྡོ་སྟེ། སྡུག་བསྔལ་དང་བློ་འགྱོད་ཀྱི་གནས་སྟངས་འོག་རྫོགས་འགྲོ་གི་ཡོད།

བྱས་ཙང་། ཚེ་འདིའི་དོན་དུ་ཟས་དང་གོས། གཏམ་དང་སྙན་གྲགས་ཀྱི་དོན་ཁོ་ན་འཐོབ་པའི་ཆེད་འབད་བརྩོན་བྱེད་མཁན་རྣམས་ནི་རང་གིས་རང་ལ་མགོ་སྐོར་གཏོང་གི་ཡོད། དེ་འདྲ་ཡིན་པ་སོང་ཙང་། དེ་དག་གིས་ལུས་ཀྱི་བདེ་བ་སྟེར་ཐུབ་སྲིད་ཀྱང་། ཡིད་ཀྱི་བདེ་བ་སྟེར་མི་ཐུབ། ཡིད་ཀྱི་བདེ་བ་མེད་པར། མི་ཚེའི་ནང་དོན་གོ་མ་གྲུབ་པར་ལུས་པ་དང་། འཆི་བའི་སྐབས་སུ་སྡུག་བསྔལ་གྱི་ངང་མི་ཚེ་མཇུག་རྫོགས་འགྲོ་གི་ཡོད།

དེར་བརྟེན་ཡུན་རིང་བ་གནས་ཐུབ་པའི་སེམས་ལ་བརྟེན་པའི་བདེ་བའི་ཆེད་དུ་ལས་ཀ་བྱེད་དགོས་རྒྱུ་གལ་ཆེན་པོ་ཡིན། ཚེ་འདིའི་ནང་གྲུབ་ཐུབ་པའི་ལུས་ཀྱི་བདེ་བ་ནི་ཡུན་རིང་གནས་ཐུབ་པའི་བདེ་བ་བརྟན་པོ་ཞིག་མིན། གལ་སྲིད་ང་ཚོར་དངོས་གནས་དྲང་གནས་ཡུན་རིང་གནས་ཐུབ་པའི་བདེ་སྐྱིད་ཅིག་དགོས་ན། སོ་སོའི་ཚེ་རབས་རྗེས་མ་རྣམས་ཀྱི་ཐོག་ལ་བསམ་བློ་གཏོང་དགོས། གང་ཡིན་ཟེར་ན། རྒྱུ་མཚན་དེ་ལ་བསམ་བློ་བཏང་བའི་སྐབས། ང་ཚོས་དངོས་གནས་ཡུན་གནས་ཐུབ་པའི་བདེ་སྐྱིད་ཅིག་གི་ཆེད་ལས་དོན་སྒྲུབ་ཐུབ།

གལ་ཏེ་ང་ཚོས་མ་འོངས་པའི་མི་ཚེའི་ནང་བདེ་སྐྱིད་འཐོབ་པའི་ཆེད་དུ་ལས་དོན་སྒྲུབ་ཀྱི་ཡོད་ན། དེས་དམ་ཆོས་ཉམས་ལེན་གྱི་ཁོངས་སུ་གཏོགས་པའི་ཆོས་པ་ཞེས་པའི་ངེས་ཚིག་གི་དོན་གང་ཡིན་པ་དེ་ཏག་ཏག་ཆགས་ཐུབ་ཀྱི་ཡོད། གལ་སྲིད་ང་ཚོས་ཚེ་འདིའི་བདེ་དོན་ཁོ་ནར་སེམས་འཁུར་བྱས་བསྡད་ན། དངོས་པོ་རྣམས་ནི་འཇིག་པའི་རང་བཞིན་ཡིན་པ་དང་། ང་ཚོ་ནི་ཕྱི་དངོས་པོར་ཆགས་ཞེན་ཆེ་བའི་འཇིག་རྟེན་པ་ཙམ་ཞིག་ཡིན་པས། དེ་ལས་ལྡོག་སྟེ། ཚེ་རབས་རྗེས་མའི་བདེ་དོན་ལ་སེམས་འཁུར་བྱེད་འགོ་བཙུག་པ་ཡིན་ན། ང་ཚོ་ཆོས་པ་ཞིག་ཆགས་ཀྱི་ཡོད།

མ་འོངས་པའི་མི་ཚེའི་ནང་བདེ་སྐྱིད་ཡོང་བའི་ཐབས་སུ་མི་དགེ་བའི་སྤྱོད་ལམ་འགོག་པ།

མ་འོངས་པའི་མི་ཚེའི་ནང་བདེ་སྐྱིད་ཡོང་བར་ངེས་བརྟན་བྱེད་པའི་ཐབས་ལམ་གྱི་ཁོངས་སུ་ཆོས་ཀྱི་སྔོན་འགོག་ཐབས་ལམ་ངེས་ཅན་ཞིག་བསྟེན་དགོས་པ་ཚུད་ཡོད། དམིགས་བསལ་མི་དགེ་བའི་ལས་བྱེད་པ་ལས་འགོག་ཐབས་བྱེད་དགོས་པའི་དོན་ཡིན། མི་དགེ་བའི་ལས་བཅུ་ཡོད་པ་ལས། ལུས་ཀྱི་གསུམ་དང་། ངག་གི་བཞི། ཡིད་ཀྱི་གསུམ་བཅས་ཡིན། བཅུ་པོ་གང་རུང་གི་སྒོ་ནས་མི་དགེ་བའི་ལས་གསོག་པ་ལས་འཛེམས་ནས་རང་ཉིད་སྲུང་སྐྱོབ་བྱེད་ན། མ་འོངས་པའི་མི་ཚེའི་ནང་ང་ཚོར་བདེ་སྐྱིད་ཡོང་བར་བྱེད་ཀྱི་ཡོད།

གལ་སྲིད་ང་ཚོས་ད་གཟོད་བཟང་ཕྱོགས་ནས་བྱ་སྤྱོད་སྤེལ་བ་ཞིག་གཏན་འབེབས་བྱས་ཡོད་ན། དེ་ནས་ང་ཚོ་ལ་ཚེ་འདི་དང་ཕྱི་མ་གཉིས་ཀར་གནས་སྟངས་ཡག་པོ་ཡོང་བར་བྱེད་པའི་ཆོས་ཉམས་ལེན་གྱི་གོམ་པ་དང་པོ་དེ་ཡོད་པ་ཡིན། འདི་ལྟ་བུའི་དགེ་བའི་སྤྱོད་ལམ་གྱི་ཁོངས་སུ། དཔེར་ན། བསམ་བཞིན་དུ་དུད་འགྲོ་སེམས་ཅན་དང་འབུ་སྲིན་གྱི་སྲོག་གཅོད་པ་དང་། མ་བྱིན་པར་ལེན་པ་བཅས་ཀྱི་སྐྱོན་ཆ་དང་ལས་མི་དགེ་བའི་འབྲས་བུ་ཡོངས་རྫོགས་དེ་དག་ལས་ཡོང་གི་ཡོད་པ་ལ་བསམ་ཞིབ་བྱེད་པ་ལྟ་བུ་ཡིན། དེའི་ཁོངས་སུ་སྡིག་པའི་ལས་ངོས་འཛིན་པའི་ཐོག་རྗེས་མ་ནས་སྲོག་གཅོད་དང་མ་བྱིན་པ་ལེན་པའི་ལས་མི་བྱེད་པའི་དམ་བཅའ་བརྟན་པོ་ཞིག་འཇོག་པ་དེ་ཚུད་ཡོད། མི་རྣམས་ཀྱིས་དེ་ལྟ་བུའི་དམ་བཅའ་འཇོག་པའི་སྐབས། དམ་བཅའ་བཞག་པ་ནང་བཞིན་ལས་ལ་དངོས་སུ་འཇུག་གི་འདུག་མི་འདུག་ངེས་བརྟན་བཟོ་མཁན་དམག་མིའམ་ཉེན་རྟོག་པ་ཞིག་གཡས་གཡོན་ལ་དགོས་ཀྱི་མེད། སོ་སོའི་བཟང་སྤྱོད་ཀྱི་བསམ་བློ་དང་ཚུལ་ཁྲིམས་ཀྱིས་གནོད་བྱེད་མི་དགེ་བའི་ལས་ལ་འཇུག་པ་ལས་བཀག་འགོག་བྱེད་ཀྱི་ཡོད།

ཚུལ་ཁྲིམས་དམ་པོར་སྲུང་རྒྱུ་དེ་ནི་ང་ཚོ་འཆི་བའི་སྐབས་སེམས་ཀྱི་གནས་བབས་སྐྱིད་པོ་ཞིག་ཡོང་བའི་ཐབས་ལམ་ཞིག་ཡིན། དེ་མིན་ང་ཚོ་སྡུག་བསྔལ་དང་སེམས་འཚབ་ཀྱི་ངང་ནས་འཆི་དགོས་ཐུག་སྲིད་པ་ཡིན། གལ་ཏེ་ང་ཚོས་ཚུལ་ཁྲིམས་དང་ལྡན་པའི་མི་ཞིག་ཡིན་པའི་སྔོན་འགོག་ཐབས་ལམ་དེ་དག་ལག་བསྟར་བྱས་ཡོད་ན། གང་ལྟར་འཆི་བའི་དུས་སྐབས་སུ་ང་ཚོས་སེམས་འཁྲེལ་གང་ཡང་བྱེད་མི་དགོས་པ་ཆགས་ཀྱི་རེད། དེ་བཞིན་དུ་སྐྱེ་བ་ཕྱི་མ་མིའི་ལུས་རྟེན་དུ་སྐྱེ་བའམ། ཡང་ན་ལྷ་ཡུལ་དུ་རྒྱ་བྱིན་ལྟ་བུའི་ལྷའི་གོ་འཕང་ཡང་འཐོབ་པ་ལ་ངེས་པ་སྙེད་པར་བྱེད་ཐུབ།

སྐྱེ་བ་ཚང་མའི་ནང་དབང་མེད་ཡང་ནས་ཡང་དུ་འབྱུང་བའི་དཀའ་ངལ།

གལ་ཏེ་ང་ཚོའི་མིའི་སྐྱེ་བ་བླངས་བའམ། ཐ་ན་ལྷའི་དབང་པོའི་གོ་འཕང་ཐོབ་ཀྱང་། ང་ཚོའི་མི་ཚེའི་ནང་དཀའ་ངལ་འབྱུང་ངེས་རེད། དབང་མེད་ཡང་ནས་ཡང་དུ་དཀའ་ངལ་འབྱུང་གི་ཡོད་སྟབས། ང་ཚོ་གང་དུ་སྐྱེས་པའམ། ལུས་རྟེན་གང་ལ་སྐྱེས་ཀྱང་ཁྱད་པར་མེད། དེར་བརྟེན་དེ་ལྟར་བྱུང་ན་མི་དགེ་བའི་ལས་སྤོང་བའི་ཚུལ་ཁྲིམས་ལག་བསྟར་བྱེད་པར་དོན་མེད་པ་དང་། དེ་ལྟར་བྱེད་བཞིན་པ་ནི་ང་ཚོ་སོ་སོ་རང་ཉིད་ངན་འགྲོའི་གནས་སུ་མི་སྐྱེ་བའི་ཆེད་དུ་སྔོན་འགོག་གི་ཡིད་སྨོན་བྱེད་པ་ཙམ་ཡིན། རྒྱུ་མཚན་ནི་ང་ཚོ་གང་དུ་སྐྱེས་པ་དང་ལུས་རྟེན་གང་ལ་སྐྱེས་ཀྱང་དཀའ་ངལ་ཡོང་རྒྱུ་ངེས་པ་རེད།

དེས་ང་ཚོར་བསམ་པ་རྒྱ་ཆེ་བ་ཞིག་དགོས་པ་སྟོན་གྱི་ཡོད། དཔེར་ན། གལ་སྲིད་ང་ཚོས་ལྷིང་འཇགས་པོ་དང་ཞི་བར་གནས་པའི་སེམས་ཀྱི་གནས་བབས་ཤིག་བསྐྲུན་པ་ན། དེ་ལ་ལེགས་སྦྱར་སྐད་ནང་ཤ་མ་ཐ་དང་བོད་སྐད་དུ་ཞི་གནས་ཞེས་ཟེར། དེའི་འབྲས་བུར། ང་ཚོ་བདེ་འགྲོའི་སྐྱེ་གནས་ལྷའི་གོ་འཕང་འཐོབ་ཐུབ། དེ་ཡང་གཟུགས་ཁམས་སམ་གཟུགས་མེད་ཁམས་ཀྱི་ལྷའི་སྐྱེ་གནས་འཐོབ་ཐུབ། དེ་ལ་བརྟེན་ནས་སྐྱེ་གནས་དེ་གའི་བདེ་བའི་དཔལ་ཡོན་ཐམས་ཅད་མྱོང་ཐུབ། འོན་ཀྱང་དེ་ལྟའི་སྐྱེ་གནས་སུ་སྐྱེ་བ་བླངས་ཀྱང་། དེ་ལ་ཧང་སངས་དགོས་ཡག་གང་ཡང་མེད། དེ་ནི་གནམ་དུ་བསྙེགས་པའི་ཁང་བཟང་མཐོ་པོ་ཞིག་གི་སྟེང་ཐོག་ཏུ་འཛེགས་པ་དང་གཅིག་པ་རེད། ནམ་ཞིག་ང་ཚོ་དེར་སླེབས་པ་དང་། བྱེད་རྒྱུ་དམིགས་བསལ་གང་ཡང་མེད་པར། རང་འཇགས་མར་འབབ་དགོས་ཀྱི་ཡོད།

སངས་རྒྱས་ཀྱི་གསུང་ལ་ཡིད་ཆེས་རྙེད་པ།

དེ་འདྲ་སོང་ཙང་། ང་ཚོ་གང་དུ་སྐྱེས་ཀྱང་སྡུག་བསྔལ་མེད་པ་བཟོ་ཐབས་བྱེད་རྒྱུ་དང་དེ་ལས་བརྒལ་ནས་འགྲོ་ཐབས་བྱ་དགོས་ངེས་ཤིག་ཡིན། དེ་ལྟར་བྱེད་པར། ང་ཚོས་ཆོས་རྣམ་འབྱེད་ཀྱི་ཤེས་རབ་ལ་བརྟེན་ནས་ང་ཚོའི་དཀའ་ངལ་དང་སྡུག་བསྔལ་གྱི་རྩ་བ་གཅོད་དགོས། དེ་ལ་བརྟེན་ནས་ང་ཚོས་དངོས་པོའི་གནས་ལུགས་དང་རྟོག་པའི་འཆར་སྣང་གཉིས་ཀྱི་དབར་དབྱེ་བ་གསལ་པོ་འབྱེད་ཐུབ། ལམ་འདི་བརྒྱུད་ནས་མཐར་ཆོས་ཐམས་ཅད་ཀྱི་གནས་ལུགས་སྟོང་པ་ཉིད་དེ། ཐབས་ལམ་གང་གིས་ཆ་ནས་ཡོད་པ་མི་སྲིད་པ་དེ་རྟོགས་ཀྱི་ཡོད། དངོས་པོའི་གནས་ལུགས་ཀྱི་དོན་གསལ་པོར་རྟོགས་པ་འདིས་ང་ཚོའི་ཕྱིན་ཅི་ལོག་པའི་བློའི་ཁྱེར་སོ་མེད་པ་བཟོ་ཞིང་། སྐྱེ་བ་ག་འདྲ་ཞིག་གི་ནང་དུ་ང་ཚོས་མྱོང་སྲིད་པའི་དཀའ་ངལ་དང་སྡུག་བསྔལ་རྣམས་རྩ་བ་ནས་མེད་པ་བཟོ་གི་ཡོད། མཐར་དེ་ལ་བརྟེན་ནས་དུས་ནམ་ཡང་ཡུན་གནས་ཐུབ་པའི་བདེ་སྐྱིད་ཅིག་ཡོང་ཞིང་། དེ་ནི་ང་ཚོས་བསྒྲུབ་ཐུབ་པ་ཞིག་ཡིན།

ང་ཚོས་སངས་རྒྱས་ཀྱི་གསུང་ཉར་ཚགས་བྱས་པའི་བཀའ་བསྟན་གཞུང་ལུགས་དག་ལས་སྟོང་ཉིད་ཀྱི་སྐོར་ལ་ཐོས་བསམ་སློབ་གཉེར་བྱེད་ཐུབ། འོན་ཀྱང་སྟོང་ཉིད་དང་འབྲེལ་བ་ཙམ་མ་ཡིན་པར། སངས་རྒྱས་ཀྱིས་གསུངས་པའི་གཞུང་ལུགས་ཐམས་ཅད་ཚད་མ་དང་ཁུངས་ཐུབ་ཀྱི་རང་བཞིན་ཞིག་ཡིན་པའི་ཡིད་ཆེས་དེ་ང་ཚོ་ལ་ག་འདྲ་སེ་རྙེད་ཐུབ་བམ། དེ་དག་གི་ཁུངས་ཐུབ་ཀྱི་རང་བཞིན་ཞིག་ཡིན་པའི་ཡིད་ཆེས་དེ་ངེས་པར་དུ་རྒྱུ་མཚན་དང་བརྟག་དཔྱད་གཞིར་བྱས་ནས་འཐོབ་དགོས། དཔེར་ན། སྟོང་ཉིད་ལ་མཚོན་ན། ང་ཚོས་རྒྱུ་མཚན་རིག་པ་ལ་བརྟེན་ནས་སྟོང་ཉིད་ཀྱི་ཁུངས་ཐུབ་རང་བཞིན་ལ་ཡིད་ཆེས་རྙེད་པར་བྱེད་ཐུབ། དེར་མ་ཟད། རྩེ་གཅིག་པའི་ཏིང་ངེ་འཛིན་དང་སེམས་ལྷིང་འཇགས་དང་ཞི་བདེའི་ངང་གནས་པ་ཞིག་ཡོང་བའི་ཐབས་སུ་གསུངས་པའི་ཆོས་རྣམས་རང་གིས་ཉམས་སུ་ལེན་ནས་རང་རྒྱུད་ལ་དངོས་སུ་བསྐྱེད་པར་བྱས་ཏེ་གསུང་རབ་རྣམས་ཁུངས་ཐུབ་བཟོ་ཐུབ། དེའི་སྟེང་ལ་ཉམས་ལེན་འདི་དག་བརྒྱུད་ནས་རྩེ་གཅིག་པའི་ཏིང་ངེ་འཛིན་འདིའི་ཞར་བྱུང་གི་འབྲས་བུར། ང་ཚོས་དངོས་གནས་ཚད་མཐོ་ལ་མཆོག་ཏུ་གྱུར་བ། དབང་པོའི་སྤྱོད་ཡུལ་ལས་འདས་པའི་གོ་རྟོགས་ ༼མངོན་ཤེས་༽ ལ་སོགས་པ་སྣ་ཚོགས་པ་ཉམས་སུ་མྱོང་ཐུབ། མདོར་ན། ང་ཚོས་རང་གི་ཉམས་མྱོང་ལ་བརྟེན་ནས་སངས་རྒྱས་ཀྱིས་གསུངས་པའི་ཆོས་རྣམས་ཁུངས་ལྡན་ཡིན་པར་གཏན་འབེབས་བྱེད་ཐུབ།

དེ་བཞིན་རང་གི་བརྩོན་འགྲུས་དང་སྙིང་རུས་ལ་བརྟེན་ནས་སངས་རྒྱས་ཀྱིས་གང་གསུངས་པའི་བརྗོད་གཞི་ཐོག་ལ་རྒྱུ་མཚན་རིག་པ་དང་སྒེར་གྱི་ཉམས་མྱོང་གིས་ཁུངས་ཐུབ་བཟོ་ཐུབ་པ་དང་། ང་ཚོས་སྤྱིར་སངས་རྒྱས་ཀྱི་གསུང་ཁུངས་ཐུབ་ཀྱི་རང་བཞིན་ཡིན་པར་ཡིད་ཆེས་པའི་དད་པ་སྐྱེད་ཐུབ། ཡིད་ཆེས་པའི་དད་པ་དེ་ལས་ཐོབ་པའི་ཉེན་སྲུང་དེས་སངས་རྒྱས་ཀྱིས་དེ་ལས་ཀྱང་རྟོགས་དཀའ་བའི་གནད་དོན་གཞན་མང་པོ་གསུངས་པ་རྣམས་ཁུངས་ཐུབ་ཀྱི་རང་བཞིན་ཡིན་པའི་ཡིད་ཆེས་གཏིང་ཟབ་ཅིག་སྐྱེད་ཀྱི་ཡོད།

དཔེར་ན། སངས་རྒྱས་ཀྱི་ཞལ་ནས། གལ་སྲིད་ང་ཚོས་བྱ་བ་བཟང་པོ་བསྒྲུབས་ན། དེའི་ཉེར་འབྲས་སུ་མིའམ་ལྷ་ལྟ་བུ་བདེ་འགྲོའི་གོ་འཕང་ཐོབ་པ་དང་། དེ་ལས་ལྡོག་སྟེ། གལ་སྲིད་ང་ཚོས་མི་དགེ་བའི་ལས་ངན་པ་བསགས་ན། དམྱལ་བ་དང་། ཡི་དྭགས་ཏེ། བཀྲེས་ཤིང་སྐོམ་པའི་གདོན་ཞེས་སུ་གྲགས་པ་དང་། ཡང་ན་དུད་འགྲོ་སོགས་ངན་འགྲོའི་སྐྱེ་གནས་སུ་ལྷུང་རྒྱུ་ཡིན། འདི་དག་ནི་ང་ཚོའི་ཉམས་མྱོང་དང་རྒྱུ་མཚན་རྐྱང་པ་ལ་བརྟེན་ནས་ཁུངས་ཐུབ་བཟོ་བའམ་བདེན་སྐྱེལ་ཐུབ་རྒྱུ་ཁག་པོ་ཡོད་པའི་སྤྱོད་ལམ་གྱི་རྒྱུ་འབྲས་སྐོར་བཤད་པའི་གཏམ་ཞིག་ཡིན། འོན་ཀྱང་ང་ཚོས་ལུང་ལ་རྨོངས་དད་བྱེད་པ་གཞིར་བཞག་ཐོག་དེ་དག་ཁས་ལེན་བྱེད་མི་དགོས། དེ་གང་ཡིན་ཞེ་ན། གལ་སྲིད་རྩེ་གཅིག་པའི་ཏིང་ངེ་འཛིན་དང་སྟོང་ཉིད་ལ་ཡང་དག་པའི་གོ་རྟོགས་རྙེད་པ་དང་འབྲེལ་བའི་ཐད་སངས་རྒྱས་ཀྱིས་གང་གསུངས་པ་དེ་ཁུངས་ཐུབ་ཀྱི་རང་བཞིན་ཡིན་པར་རྒྱུ་མཚན་རིགས་པ་དང་ཉམས་མྱོང་གིས་སྒྲུབ་ཀྱི་ཡོད་ན། སངས་རྒྱས་ཀྱིས་གང་གསུངས་པ་དང་། སྤྱོད་ལམ་དང་དེའི་འབྲས་བུའི་སྐོར་ལའང་ཁས་ལེན་བྱེད་པ་ནི་མཐའ་གཅིག་ཏུ་རྒྱུ་མཚན་ལྡན་པ་ཆགས་ཀྱི་ཡོད།

དེའི་མཇུག་འབྲས་སུ། སྟོང་ཉིད་དང་། དངོས་པོའི་གནས་ལུགས། དེ་བཞིན་གང་གི་ཆ་ནས་བདེན་པ་གྲུབ་པའི་ཆོས་ཡོད་པ་མི་སྲིད་པ་སོགས་ཀྱི་ཐད་ལ་སངས་རྒྱས་ཀྱིས་གང་གསུངས་པ་དེའི་ཐོག་ལ་ང་ཚོས་ཧ་ཅང་ནན་ཏན་གྱིས་བསམ་བློ་གཏོང་དགོས། དེ་ལྟར་ཚད་ལྡན་ཡིན་པར་ངོས་འཛིན་བྱེད་པ་དང་ཆབས་ཅིག་དེ་ནས་ང་ཚོས་བཟང་ཕྱོགས་དགེ་བའི་བྱ་སྤྱོད་སྤེལ་བའི་འབྲས་བུ་ནི་བདེ་བ་དང་། ངན་ཕྱོགས་མི་དགེ་བའི་བྱ་སྤྱོད་སྤེལ་བའི་འབྲས་བུ་ནི་སྡུག་བསྔལ་ཡིན་ཞེས་སངས་རྒྱས་ཀྱིས་གསུངས་པའི་གནད་དོན་གཞན་དག་ལ་མུ་མཐུད་ནས་བསམ་བློ་གཏོང་དགོས། དེ་ལྟར་བྱས་པས། ང་ཚོར་ཡིད་ཆེས་པའི་དད་པ་ཞིག་ཐོབ་ནས་སངས་རྒྱས་ཀྱིས་གསུངས་པའི་གནད་དོན་དེ་དག་ཀྱང་ཡང་དག་པ་དང་ཁུངས་ཐུབ་རེད་ཅེས་དང་། དེ་ལ་གཞི་བཅོལ་ནས། ཚུལ་དང་མཐུན་པའི་སྒོ་ནས་རང་ཉིད་ཀྱི་སྤྱོད་ལམ་ལ་སྒྱུར་བཅོས་གཏོང་བའི་ཐག་གཅོད་བརྟན་པོ་ཞིག་བཟོ་དགོས། གལ་སྲིད་ང་ཚོས་བདེ་བ་འདོད་ན། དེ་དང་མཐུན་པའི་བྱ་སྤྱོད་སྤེལ་དགོས་ཀྱི་ཡོད། དེ་ནི་ང་ཚོས་བཟང་ཕྱོགས་དང་དགེ་བའི་ལམ་ནས་བྱ་སྤྱོད་སྤེལ་དགོས་རྒྱུ་དེ་ཡིན།

ངེས་འབྱུང་། དཀའ་ངལ་ཐམས་ཅད་ལས་ཐར་བའི་ཆོད་སེམས།

ང་ཚོར་ད་ལྟ་རྙེད་པའི་མིའི་ལུས་རྟེན་ཁྱད་པར་དུ་འཕགས་པ་འདིའི་བྱ་བའི་རྟེན་གཞི་དང་། ཆོས་ཕྱོཌ་ཀྱི་ཉམས་ལེན་གོང་འཕེལ་དུ་གཏོང་བའི་རྗེས་མཐུན་གྱི་གོ་སྐབས་རྣམས་རྒྱུ་མེད་རྐྱེན་མེད་ལས་བྱུང་བ་ཞིག་མ་ཡིན་པར་བསམ་བློ་གཏོང་དགོས། དེ་ནི་རང་གི་སྐྱེ་བ་སྔོན་མའི་ནང་དགེ་བའི་ལས་རླབས་པོ་ཆེ་བསགས་པའི་འབྲས་བུ་ཡིན། ང་ཚོས་བཟང་ཕྱོགས་དགེ་བའི་ལས་ལ་འཇུག་ཡོད་ཤག་རེད་ལ། དེ་ལ་བརྟེན་ནས་ད་ལྟ་ང་ཚོ་མིའི་ལུས་རྟེན་གྱི་གོ་སྐབས་བཟང་པོ་འདི་ཐོབ་པ་རེད། དེར་བརྟེན་ང་ཚོས་གོ་སྐབས་བཟང་པོ་འདི་འཕྲོ་བརླག་འགྲོ་འཇུག་རྒྱུ་མེད། གལ་སྲིད་ང་ཚོ་ཚེ་འདི་གཅིག་པུའི་དོན་དུ་ལྟོ་དང་གོས། གཏམ་དང་སྙན་གྲགས་ལྟ་བུ་ལ་མགོ་འཁོར་བསྡད་ན། མི་ཚེ་འདི་འཕྲོག་བརླག་ཡིན། གལ་སྲིད་དེ་དག་ང་ཚོའི་སེམས་འཁུར་བྱེད་ས་གཙོ་བོ་དེ་ཡིན་ན། དེ་ནས་འདི་སྣང་གི་ཞེན་འཛིན་འདི་ལ་བརྟེན་ནས། ང་ཚོ་ཚེ་འདི་རང་གི་ནང་ཆགས་ཞེན་དེ་ལས་ཟློག་མི་ཐུབ་པ་ཡིན།

ཕྱོགས་གཞན་ཞིག་ནས། དཔེར་ན། གལ་སྲིད་ང་ཚོས་བརྒྱ་བྱིན་ལྟ་བུ་ལྷའི་གོ་འཕང་འཐོབ་ནས་སྐྱེ་བ་ཕྱི་མར་བདེ་སྐྱིད་འབྱུང་བའི་དོན་དུ་རྩོལ་བ་དང་ནུས་ཤུགས་ཆ་ཚང་བྱས་པ་ཡིན་ན། ད་དུང་དེ་ལ་དཀའ་ངལ་ཡོད་པ་ཡིན། ལྷ་རྣམས་ལ་ཐོབ་པའི་ལུས་རྟེན་ལ་ལྟོས་དང་། ལྷ་ལ་ནི་བདེ་བ་ཧ་ཅང་ཆེན་པོ་ཡོད་ཅིང་། གནས་སྐབས་ཕྱིའི་སྣང་ཚུལ་ལ་དཀའ་ངལ་དེ་འདྲ་མེད། འོན་ཀྱང་འཆི་བའི་སྐབས་སུ། འདི་ལྟ་བུའི་ལྷ་ལ་འགྱོད་སེམས་དང་ངོ་གནོང་ཚད་མེད་པ་ཡོད་པ་ཡིན། དེའི་རྒྱུ་མཚན་ནི། ཁོ་ཚོའི་མི་ཚེ་ཆ་ཚང་བདེ་སྐྱིད་དང་ལྡན་པ་དེ་རྨི་ལམ་ལྟར་སྣང་བ་དང་། འཆི་བའི་དུས་སླེབས་པའི་མཚམས་སུ་དེས་བཟོད་གླགས་མེད་པའི་སྡུག་བསྔལ་དང་མི་སྐྱིད་པ་ཡོང་བར་བྱེད་ཀྱི་ཡོད། དེར་བརྟེན། དེ་ལྟ་བུའི་ལུས་རྟེན་ཞིག་ལ་དམིགས་ཡུལ་ཟིན་པ་ནི། ང་ཚོའི་དཀའ་ངལ་རྣམས་སེལ་བའི་ཐབས་མ་རེད།

དེར་མ་ཟད། ང་ཚོའི་དལ་འབྱོར་གྱི་མི་ལུས་རིན་ཆེན་འདི་ཆ་ཚང་བའི་བེད་སྤྱོད་ཚུལ་དང་མཐུན་པ་བྱེད་དགོས། གང་ཡིན་ཟེར་ན། འདི་ནི་འཕྲོག་བརླག་འགྲོ་ཡག་གི་ཉེན་ཁ་ཆེན་པོ་ཡོད་པས་ཡིན། སྐྱེས་ཚར་བའི་རྗེས་ལ་འཆི་བ་ལས་ཐར་བའི་མི་སུ་གཅིག་ཀྱང་མེད། འཆི་བ་ནི་ང་ཚོ་ཚང་མ་ལ་ཡོང་རྒྱུ་ཡིན་པ་ངེས་པ་རེད། དེ་ནི་ག་དུས་སླེབས་མིན་དུས་སྔ་ཕྱིའི་ཁྱད་པར་ཙམ་ཡིན། མི་སུ་གཅིག་གིས་ཀྱང་ཁོའམ་མོའི་འཆི་བའི་དུས་ཚོད་ག་དུས་ཡོང་མིན་བཤད་མི་ཐུབ། དོན་ངོ་མའི་གནས་སྟངས་འདི་དག་ལ་བསམས་པ་དེས། ང་ཚོ་བདེ་པོའི་ངང་འཚོ་ཞིང་གནས་པའི་རིང་གོ་སྐབས་བཟང་པོ་ཡོད་པ་དེ་དག་གི་ཁེ་ཕན་ཡོངས་རྫོགས་ལེན་དགོས་པའི་རེ་འདུན་ཞིག་སླེབས་པར་བྱེད་ཀྱི་ཡོད།

དེར་བརྟེན་ང་ཚོའི་ཚེ་འདི་ཙམ་གྱི་ཆེད་དུ་རྒྱུ་དངོས་འཐོབ་འདོད་ཀྱི་ཞེན་འཛིན་མཐའ་དག་ལས་ངེས་པར་དུ་ཟློག་དགོས་པ་ཡིན། དེ་ཡང་ཚེ་འདིའི་འཇིག་པའི་ཆོས་ཅན་གྱི་རྒྱུ་དངོས་རྣམས་ལ་ཡུན་དུ་གནས་པའི་སྙིང་པོ་མེད་པའི་ཚུལ་ལ་བསམ་ཞིབ་ཀྱི་ཐོག་ནས་དེ་ལྟར་བྱེད་དགོས། དེ་ལྟར་ང་ཚོ་ཚེ་འདིའི་དོན་དུ་རྒྱུ་དངོས་ལ་ཞེན་འཛིན་ཡོད་པ་ལས་ཟློག་སྟེ། ཞེན་འཛིན་དེ་འདྲའི་རིགས་གཞི་རྟེན་དུ་བྱས་ནས་དཀའ་ངལ་ལས་ཐར་བའི་ཆོད་སེམས་ཤིག་སྐྱེད་ཀྱི་ཡོད། དེ་ལྟ་བུའི་སྡུག་བསྔལ་ལས་ཐར་བའི་ཆོད་སེམས་དེ་ལ་“ངེས་འབྱུང་”ཞེས་ཟེར་གྱི་ཡོད།

དེ་ག་ནང་བཞིན། ང་ཚོས་མ་འོངས་པའི་མི་ཚེར་བསམ་བློ་གཏོང་དགོས་ཤིང་། ང་ཚོ་གང་དུ་སྐྱེ་སྲིད་པ་དེའི་གནས་སྟངས་སྣ་ཚོགས་པ་ལ་ལྟ་ཞིབ་བྱེད་དགོས། ང་ཚོས་སྐྱེ་བ་ཕྱི་མར་མི་དང་ལྷའི་ལུས་རྟེན་ལྟ་བུར་སྐྱེས་ནས་དེའི་བདེ་བ་དང་ལོངས་སྤྱོད་འཐོབ་ཐུབ་པ་ལ་བསམ་བློ་བཏང་སྐབས། དེ་དག་གིས་ཀྱང་སྡུག་བསྔལ་སྟེར་གྱི་ཡོད་པ་དྲན་དགོས། ང་ཚོར་ལོངས་སྤྱོད་འཛོམས་པོ་ག་ཚོད་ཡོད་ཀྱང་། དཀའ་ངལ་ནི་དབང་མེད་དུ་འབྱུང་གི་ཡོད། དེ་འདྲ་ཡིན་ཙང་། སྐྱེ་བ་ཕྱི་མའི་བདེ་བ་དང་དངོས་པོ་དེ་དག་ལ་ཆགས་པ་དང་ཞེན་འཛིན་བྱ་རྒྱུ་དེ་ཡང་སྤོང་དགོས། དེ་ལ་ང་ཚོས་ཆོད་སེམས་ཀྱི་རིགས་གཉིས་པ་ཞིག་བསྐྱེད་ཐབས་བྱས་ནས་མཇུག་མཐུད་དགོས། དེ་ཡང་། སྐྱེ་བ་ཕྱི་མའི་རྒྱུ་དངོས་ལ་ཞེན་འཛིན་ཡོད་པ་ལས་བྱུང་བའི་དཀའ་ངལ་དེ་དག་ལས་ཐར་བའི་ཆོད་སེམས་དེ་ཡིན། བྱས་ཙང་། སྡུག་བསྔལ་ལས་ཐར་བའི་ཆོད་སེམས་ཀྱི་རིགས་གཉིས་ཡོད་པ་ཡིན། སྐྱེ་བ་འདིའི་སྡུག་བསྔལ་ལས་ཐར་འདོད་ཀྱི་ཆོད་སེམས་དང་། སྐྱེ་བ་ཕྱི་མ་ཐམས་ཅད་ཀྱི་སྡུག་བསྔལ་ལས་ཐར་འདོད་ཀྱི་ཆོད་སེམས་བཅས་གཉིས་ཡོད།

མི་རྟག་པ།

ཆོས་ཉམས་ལེན་པ་ནི། མི་ཚེའི་ནང་གི་གནས་སྟངས་ག་འདྲ་ཞིག་ཡིན་རུང་རྟག་པ་བརྟན་པ་མེད་པའི་དོན་ངོ་མ་ལ་དྲན་ཤེས་དང་ལྡན་པ་དང་། འཆི་བ་མི་རྟག་པ་ལ་དྲན་ཤེས་དང་ལྡན་པ། དེར་མ་ཟད། སོ་སོ་སྒེར་གྱི་དཀའ་ངལ་དང་མི་ཚེའི་ནང་གི་དཀའ་ངལ་ཡོད་དོ་ཅོག་ལ་དྲན་ཤེས་ལྡན་པའི་སྒོ་ནས་ཤེས་མཁན་དེ་ཡིན། འདི་ནི་དེ་ལྟ་བུའི་ཆོས་པ་ལ་དཀའ་ངལ་གྱི་རིགས་ཐམས་ཅད་སྤོང་བར་སྔོན་འགོག་ཐབས་ལམ་སྣ་ཚོགས་པ་བསྟེན་དགོས་པའི་སེམས་སྐུལ་བྱེད་ཀྱི་ཡོད། གལ་ཏེ་མི་རྟག་པ་དང་། དཀའ་ངལ། འཆི་བ་བཅས་ང་ཚོས་བརྗེད་པར་བྱས་ནས་དེ་དག་མེད་པ་བཟོ་ཐུབ་ཀྱི་ཡོད་ན། དེ་ནི་དཔེ་མི་སྲིད་པའི་ཡག་པོ་རེད། འོན་ཀྱང་དོན་ངོ་མར་ང་ཚོས་དེ་ལྟར་བྱེད་མི་ཐུབ། ང་ཚོ་འཆི་རྒྱུ་ཡིན་པ་དང་ང་ཚོའི་མི་ཚེའི་ནང་སྡུག་བསྔལ་ཡོད་པ་སོགས་དངོས་ཡོད་གནས་ལུགས་དེ་དག་ལ་སྣང་མེད་བཏང་བ་ཙམ་གྱིས་དེ་དག་མེད་པ་བཟོ་མི་ཐུབ། དེར་བརྟེན་ང་ཚོའི་དཀའ་ངལ་རྣམས་ཧ་གོ་བ་བྱས་ན་ལེགས་ཤིང་། དེ་དག་ལ་དོན་དངོས་དང་མཐུན་པའི་སྒོ་ནས་གདོང་ལེན་གྱིས་སྔོན་འགོག་ཐབས་ལམ་འདྲ་མིན་ལ་བསྟེན་ནས་མེད་པ་བཟོ་དགོས། དེ་ནི་ཆོས་ཉམས་ལེན་གྱི་ཁོངས་སུ་གང་ཚུད་ཡོད་པ་དེ་ཡིན།

སངས་རྒྱས་ཉིད་ཀྱིས་ཀྱང་། ཐོག་མར་ཐབས་ལམ་འདི་དག་དང་འབྲེལ་བའི་བརྒྱུད་པ་སྣ་ཚོགས་པ་ལན་མང་བསྟན་པ་དེ་དག་མི་རྟག་པ་གསུངས་པའམ་ཆོས་གང་ཡང་རྟག་པ་བརྟན་པ་མེད་ཚུལ་གྱི་སྒོ་ནས་གཏན་ལ་ཕབ་མཛད་གནང་ཡོད། ཁོང་ནས་ཆོས་ཀྱི་འཚོལ་ཞིབ་ཆ་ཚང་མི་རྟག་པ་རྟོགས་པ་ནས་འགོ་བཙུགས་པ་རེད། དེ་ག་ནང་བཞིན་ཁོང་སྐུ་ཚེ་རྫོགས་ཏེ་སྐུ་མྱ་ངན་ལས་འདས་པའི་སྐབས་སུའང་ཁོང་ནས་གདུལ་བྱ་རྟག་འཛིན་ཅན་རྣམས་ལ་མི་རྟག་པའི་དངོས་ཡོད་ཀྱི་གནས་སྟངས་དེ་སྟོན་པའི་སྒོ་ནས་ཕེབས་པ་རེད།

འཕགས་པའི་བདེན་པ་བཞི།

སྡུག་བསྔལ་རྣམས་རྒྱུ་མེད་ལས་བྱུང་བ་མ་ཡིན། དེ་དག་ནི་རྒྱུ་མཚན་གང་ཡང་མེད་པར་འབྱུང་གི་མེད། དེ་ལས་ལྡོག་སྟེ། ང་ཚོའི་དོན་དམ་པའི་སྡུག་བསྔལ་དང་མི་བདེ་བ་རྣམས་དོན་དམ་པའི་རྒྱུ་ལས་བྱུང་ཞིང་། དེ་དག་ཀྱང་ང་ཚོའི་རང་འགུལ་གྱི་སྤྱོད་ལམ་དང་ཉོན་མོངས་པའི་བློ་ལས་འབྱུང་གི་ཡོད། ཕྱོགས་གཞན་ཞིག་ནས་བཤད་ན། དེ་དག་ཐམས་ཅད་ང་ཚོའི་ལས་དང་ཉོན་མོངས་པ་ལས་འབྱུང་གི་ཡོད། ཉོན་མོངས་དབང་གིས་རང་འགུལ་གྱི་བྱ་སྤྱོད་སྤེལ་བ་ལ་བརྟེན་ནས་དཀའ་ངལ་ཚང་མ་ཡོང་བསྡད་ཀྱི་ཡོད།

ད་དཀའ་ངལ་ཚང་མའི་རྒྱུ་དེ་གཉིས་ལས། ང་ཚོས་རང་འགུལ་གྱི་སྤྱོད་ལམ་དེའི་རྩ་བ་ནི་ཉོན་མོངས་པའི་བློ་ལ་ཐུག་ཡོད་པ་ཤེས་ཐུབ། གལ་སྲིད་ང་ཚོས་ནང་པའི་གཞུང་ནང་འགྲེལ་བརྗོད་བྱས་པའི་ཉོན་མོངས་ཀྱི་རིགས་མི་འདྲ་བ་བརྒྱད་ཁྲི་བཞི་སྟོང་ཚང་མར་བརྟག་དཔྱད་བྱས་པ་ཡིན་ན། དེ་དག་ཚང་མ་འབྱུང་ཁུངས་གཅིག་རང་ནས་ཡོང་གི་ཡོད་པ་ནི། ང་ཚོས་ཆོས་ཐམས་ཅད་བདེན་པར་གྲུབ་པར་འཛིན་པ་དང་ངོ་བོ་ཉིད་ཀྱི་གྲུབ་པར་འཛིན་བཅུག་མཁན་གྱི་མ་རིག་པ་དེ་ཡིན།

རང་དང་གཞན་དངོས་པོ་གང་ལའང་ངོ་བོ་ཉིད་ཀྱིས་གྲུབ་པའི་ཆོས་རྡུལ་ཙམ་ཡང་མེད་ནའང་། ད་དུང་ང་ཚོས་བདེན་པར་གྲུབ་པའམ་ངོ་བོ་ཉིད་ཀྱི་གྲུབ་པར་འཛིན་གྱི་ཡོད། དེར་བརྟེན་གལ་སྲིད་ང་ཚོས་བདེན་པར་གྲུབ་པའི་ཆོས་མི་སྲིད་པ་རྟོགས་ཐུབ་པ་དང་རྣམ་པར་འབྱེད་ཐུབ་པ་ཡིན་ན། དེས་དེ་ལྟར་གྲུབ་པར་འཛིན་པ་དེ་མེད་པ་བཟོ་བའི་གཉེན་པོ་ལྟ་བུ་བྱེད་ཀྱི་ཡོད།

བདེན་པར་གྲུབ་པ་དང་རང་བཞིན་གྱིས་གྲུབ་པའི་ཆོས་གཅིག་ཀྱང་མེད་པ་རྟོགས་པའི་སྐབས་དེ་ལྟ་བུའི་རྟོགས་པ་དེ་ལ་ “དོན་དམ་པའི་སེམས་ཀྱི་ལམ་མམ་” “ལམ་གྱི་བདེན་པ་” ཞེས་སུ་གྲགས་པ་དང་། དེ་ནི་འཕགས་པའི་བདེན་པ་བཞིའི་ནང་ནས་གཅིག་ཡིན། དེ་ནི་རྟོགས་པའི་ཡོན་ཏན་མཐོན་པོར་སོན་པའི་“འཕགས་པའི་”རྒྱུད་ལ་ཡོད་པའི་ལམ་ཡིན་ཅིང་། འཕགས་པའི་གང་ཟག་རྣམས་ཀྱིས་གནས་ལུགས་ཡང་དག་པའམ་བདེན་པར་གཟིགས་པ་དང་། མཐར་ཐུག་ཐར་པ་དང་ཐམས་ཅད་མཁྱེན་པའི་ས་ལ་འཁྲིད་པར་བྱེད་ཀྱི་ཡོད།

ང་ཚོས་དོན་དམ་པའི་སེམས་ཀྱི་ལམ་སྟེ། བདེན་པ་དང་ངོ་བོ་ཉིད་ཀྱིས་གྲུབ་པ་མེད་པ་རྟོགས་པའི་ཆོས་རྣམ་འབྱེད་ཀྱི་ཤེས་རབ་ཡོད་པའི་སྐབས་སུ་ང་ཚོར་ཉོན་མོངས་མེད་པ་ཆགས་ཀྱི་ཡོད། དེ་གང་ཡིན་ཞེ་ན། དེ་འདྲ་བའི་འཁྲུལ་སྣང་གི་བློ་ནི་བདེན་པར་གྲུབ་མི་སྲིད་པ་ལ་རྟོག་པའི་སྒོ་ནས་ཡིད་ཆེས་བྱེད་པ་ལ་གཞིར་བྱས་ཡོད་པས་ཡིན། ང་ཚོར་ཉོན་མོངས་པའི་བློ་མེད་པ་ཡིན་ན། དེ་ནས་ང་ཚོས་སོ་སོ་ལ་དཀའ་ངལ་བཟོ་གི་མ་རེད། དེ་ལྟ་བུའི་དཀའ་ངལ་ནམ་ཡང་མི་འབྱུང་ཞིང་མི་མྱོང་བའི་གནས་དེ་ལ་“དོན་དམ་པའི་འགོག་པའམ་”“འགོག་པའི་བདེན་པ་”ཞེས་སུ་གྲགས་པ་ཡིན།

དེ་ནི་འཕགས་པའི་གང་ཟག་རྣམས་ཀྱིས་བདེན་པར་མཐོང་བའི་བདེན་པའི་དོན་བཞི་ཡིན་ལ། འདི་རྣམས་ནི་འཕགས་པའི་བདེན་པ་བཞི་ཡིན། བདེན་པ་དང་པོ་གཉིས་ཀྱིས་ཉོན་མོངས་གང་ཡིན་པའི་དོན་དམ་གྱི་སྡུག་བསྔལ་དང་དེའི་རྒྱུ་དངོས་ཏེ། རང་འགུལ་གྱི་སྤྱོད་ལམ་དང་ཉོན་མོངས་ཅན་གྱི་བསམ་ཕྱོགས་དང་འབྲེལ་བ་ཞིག་ཡིན། ང་ཚོས་གང་ཞིག་ཐར་པ་འཐོབ་པའི་བདེན་པ་ཕྱི་མ་གཉིས་ཀྱི་ཐད་ལ་དོ་སྣང་གིས་ལྟ་ཞིབ་བྱེད་པའི་སྐབས་སྡུག་བསྔལ་གྱི་རྒྱུ་གཏན་དུ་མེད་པ་བཟོ་བའི་སྒོ་ནས་དཀའ་ངལ་ཐམས་ཅད་འགོག་པའི་བདེན་པ་ཞིག་འཐོབ་འདོད་བྱེད་ཀྱི་ཡོད། དེ་ལྟར་བྱེད་པའི་ཐབས་ནི་དོན་དམ་པའི་སེམས་ཀྱི་ལམ་ཞིག་བསྐྱེད་དགོས། དེ་འདྲའི་ཐོག་ནས་བདེན་པ་བཞི་ལ་རྟོགས་པ་མཐོ་བའི་འཕཌ་པའི་གང་ཟག་རྣམས་ཀྱིས་བདེན་པ་དངོས་སུ་གཟིགས་ཡོད་པའི་ངོས་འཛིན་དང་གོ་རྟོགས་ཤིག་ང་ཚོར་སླེབས་པ་ཡིན།

ང་ཚོར་ཡོད་པའི་མི་ལུས་རིན་ཆེན་འདི་ཁྱད་པར་དུ་འཕགས་པའི་བྱ་བའི་རྟེན་གཞི་ཞིག་བཟོ་བའི་ཐོག་སོ་སོའི་འབད་བརྩོན་ཡོད་ཚད་འཕགས་པའི་བདེན་པ་བཞི་རྟོགས་པའི་ཆེད་དུ་ཤུགས་རྒྱག་དགོས། དེ་ལྟར་བྱས་པའི་རྗེས་སུ་སྐྱེ་བ་འདིའི་སྟེང་ཐོབ་པའི་གོ་སྐབས་བཟང་པོ་རྣམས་བེད་སྤྱོད་ཡང་དག་པ་གཏོང་ཐུབ། ང་ཚོས་བདེན་པར་གྲུབ་པའི་དངོས་པོ་གཅིག་ཀྱང་མེད་ཅེས་པའི་ཕན་ཡོན་ཆེ་བའི་སེམས་ཀྱི་གོམས་གཤིས་རྒྱུན་ཆད་མེད་པ་དང་། རིག་པ་བརྟན་པོ་ཞིག་བསྐྱེད་པའི་སྐབས་ང་ཚོས་དཀའ་ངལ་ཐམས་ཅད་ཡོངས་སུ་སྤངས་ཀྱི་ཡོད།

སྙིང་རྗེ་གོང་འཕེལ་གཏོང་བ།

ང་ཚོ་སོ་སོ་རང་གི་ཆེད་དུ་སྡུག་བསྔལ་ཐམས་ཅད་མེད་པ་བཟོ་བ་ནི་ཡག་པོ་རེད། འོན་ཀྱང་དེས་འདང་གི་མེད། གང་ཡིན་ཟེར་ན། ང་ནི་མི་གཅིག་རེད། གཞན་རྣམས་ནི་གྲངས་མེད་པ་རེད། གཞན་སེམས་ཅན་གྱི་གྲངས་ག་ཚོད་ཡིན་ང་ཚོས་ནམ་ཡང་བརྩི་མི་ཐུབ་ཅིང་། ཁོ་ཚོ་ཚང་མར་དཀའ་ངལ་ཡོད་པ་དང་། གང་ལྟར་ཡང་སྡུག་བསྔལ་མྱོང་རྒྱུ་ངེས་པ་རེད། དེར་བརྟེན་ང་ཚོ་གཅིག་པུའི་ཆེད་དུ་ལས་དོན་བསྒྲུབ་པ་ནི་དྲང་པོ་མ་རེད། ང་ཚོས་ཚང་མའི་སྡུག་བསྔལ་སེལ་བའི་ཐབས་ཤིག་འཚོལ་དགོས་ཀྱི་ཡོད།

བསམ་ཞིབ་བྱས་པའི་སྟེང་ནས་སེམས་ཅན་ཐམས་ཅད་རང་ཉིད་ལ་ཧ་ཅང་དཀའ་དྲིན་ཆེན་པོ་ཡིན་པ་གསལ་པོ་ཆགས་ཀྱི་ཡོད། དངོས་གནས་བྱས་ན། སེམས་ཅན་གཞན་ལས་དཀའ་དྲིན་ཆེ་བ་སུ་གཅིག་ཀྱང་མེད། ང་ཚོས་སངས་རྒྱས་ཀྱི་དཀའ་དྲིན་དང་། སེམས་ཅན་གྱི་དཀའ་དྲིན་ལ་བསམ་ཞིབ་བྱེད་སྐབས། དེ་གཉིས་གཅིག་པ་ཡིན་པར་རྟོགས་ཀྱི་ཡོད། དཔེར་ན། གལ་ཏེ་ང་ཚོ་སྦྲང་རྩི་ལ་དགའ་པོ་ཡོད་ན། སྦྲང་རྩི་གང་ནས་ཡོང་མིན་ཐད་བསམ་བློ་གཏོང་དགོས། དེ་ནི་སྦྲང་བུ་མང་པོ་ལས་འབྱུང་ཞིང་། སྦྲང་བུ་དེ་དག་མེ་ཏོག་ཧ་ཅང་མང་པོ་སྐོར་དགོས་པ་དང་། མེ་ཏོག་ཟེའུ་འབྲུ་རྣམས་བསྡུ་ལེན་གྱིས་གསོག་དགོས་པ། དེ་དག་སྦས་ཁུང་ནང་བཞག་སྟེ། མཐར་སྦྲང་ཚང་ནང་གསོག་འཇོག་བྱེད་པ་སོགས་སྦྲང་རྩི་གསོག་པར་དཀའ་ལས་མང་པོ་རྒྱག་དགོས་ཀྱི་ཡོད། གལ་ཏེ་ང་ཚོ་སྦྲང་རྩི་ལོངས་སུ་སྤྱོད་པར་རེ་བ་འདུག་ན། ང་ཚོས་སྦྲང་བུ་ཆུང་ཆུང་དེ་དག་གི་འབད་བརྩོན་དང་དཀའ་དྲིན་ལ་བརྟེན་དགོས། དེ་ག་ནང་བཞིན་ང་ཚོ་འགའ་ཞིག་བཟའ་བཞིན་པའི་ཤ་ལ་མཚོན་ན། ང་ཚོ་ནད་པ་དང་སྐྱོ་པོ་ཡིན་པའི་སྐབས་ང་ཚོའི་ལུས་སྟོབས་རྒྱས་པའི་ཟས་རིགས་ཤིག་དགོས་པ་དེ་ག་ནས་ཡོང་གི་ཡོད་དམ་ཞེ་ན། དེ་ནི་དུད་འགྲོ་ལས་བྱུང་ཞིང་། ང་རང་ཚོ་སོ་སོའི་ལུས་པོའི་སྟོབས་ཤུགས་རྒྱས་པ་དང་བཅུད་ལྡན་གྱི་ཟས་རག་པའི་ཆེད་དུ་དུད་འགྲོ་སེམས་ཅན་དེ་དག་གིས་སྲོག་བློས་གཏོང་དགོས་ཀྱི་ཡོད།

དེར་བརྟེན་ང་ཚོས་སྡུག་བསྔལ་ཐམས་ཅད་ལས་འགྲོལ་བའི་ཆོད་སེམས་བརྟན་པོ་ཞིག་གོང་འཕེལ་བཏང་བའི་རྗེས་སུ། བློའི་འཁྱེར་ཕྱོགས་དེ་སེམས་ཅན་གཞན་གྱི་ཕྱོགས་སུ་གནས་སྤོ་གཏོང་དགོས། ང་རང་ཚོ་སོ་སོ་སྡུག་བསྔལ་ལས་ཐར་འདོད་པ་ནང་བཞིན་སེམས་ཅན་ཐམས་ཅད་སྡུག་བསྔལ་ལས་བྲལ་བའི་ཡིད་སྨོན་ཞིག་ཀྱང་ཡོད་དགོས། དེ་ལྟ་བུའི་བསམ་ཕྱོགས་དེ་ལ་“སྙིེང་རྗེ་”ཞེས་ཟེར་བ་ཡིན།

གལ་སྲིད་ང་ཚོས་དོ་ནན་པོས་སོ་སོའི་སྡུག་བསྔལ་དང་། དེ་དག་ཇི་ལྟར་མི་དགོས་པའི་ཐད་བསམ་བློ་མ་བཏང་བ་དང་། གལ་ཏེ་ང་ཚོས་དེ་དག་སྤོང་བར་ཆོད་སེམས་བརྟན་པོ་ཞིག་མེད་ན། སེམས་ཅན་གཞན་གྱི་སྡུག་བསྔལ་ཐད་བསམ་བློ་གཏོང་རྒྱུ་ཁག་པོ་ཡིན་ཅིང་། གཞན་སེམས་ཅན་རྣམས་སྡུག་བསྔལ་ལས་ཐར་བར་བཅོས་མིན་གྱི་སྙིང་རྗེ་ཞིག་རྒྱུད་ལ་སྐྱེད་མི་ཐུབ་པ་ཡིན། དཔེར་ན། ལས་གནས་མཐོན་པོར་སོན་པའི་ལས་བྱེད་གཅིག་ལ་དེ་སྔོན་འཚོ་བའི་རྒྱུད་རིམ་ནང་དཀའ་ངལ་ཆེན་པོ་ཕྲད་དེ་གཞི་ནས་ལས་ཀྱི་སྣེ་མོར་སླེབས་ཡོད་ན། མི་དེས་གཞན་གྱི་དཀའ་ངལ་མཐོང་དུས་ཤ་ཚ་སྙིང་རྗེའི་བསམ་པ་ཡོང་གི་ཡོད། གཞན་ལ་ཕན་འདོགས་པའི་ཆ་ནས་བཤད་ན། དེ་ལྟ་བུའི་མི་དེ་མི་གཞན་མི་ཚེ་གང་པོར་བདེ་པོ་དང་སྐྱིད་པོའི་ངང་གནས་ཤིང་། སྡུག་བསྔལ་ཟེར་བ་དེ་གང་ཡིན་པ་ནམ་ཡང་མ་ཤེས་ནས་ལས་ཀྱི་སྣེ་མོ་བ་ཞིག་ཆགས་པ་དེ་ལས་རྦད་དེ་ཡག་ག་ཡོད།

བྱང་ཆུབ་ཀྱི་སེམས།

གཞན་སེམས་ཅན་ཐམས་ཅད་སྡུག་བསྔལ་ལས་ཐར་བ་ཤོག་ཅེས་པའི་བློའི་འཁྱེར་ཕྱོགས་དེ་ལ་ “སྙིང་རྗེ་” ཞེས་ཟེར་བ་དང་། གཞན་སེམས་ཅན་ཐམས་ཅད་བདེ་བ་དང་ལྡན་པར་ཤོག་ཅེས་པའི་བློའི་འཁྱེར་ཕྱོགས་དེ་ནི་ “བྱམས་པའི་” མཚན་ཉིད་ཡིན། གལ་ཏེ་ང་ཚོས་སེམས་ཅན་ཐམས་ཅད་བདེ་བ་དང་ལྡན་ཞིང་སྡུག་བསྔལ་ལས་བྲལ་བའི་ཡིད་སྨོན་དེ་ལ་བསམ་ཞིབ་བྱེད་པ་དང་། གལ་ཏེ་ང་ཚོས་གཞན་སེམས་ཅན་རྣམས་རང་ཉིད་ལ་དཀའ་དྲིན་ཆེན་པོ་ཞེ་དྲགས་ཡིན་པས། ང་ཚོས་ངེས་པར་དུ་དེའི་ཐད་གཅིག་བྱེད་དགོས་པ་དང་། དེ་ཡང་ཕྱི་ཚུལ་ཙམ་མ་ཡིན་པར། ཁོང་ཚོའི་སྡུག་བསྔལ་ཐམས་ཅད་སེལ་ཆེད་རོགས་པ་བྱེད་དགོས་པ་སྟེ། འདི་ལྟ་བུའི་འགན་འཁྲི་དང་ལེན་བྱེད་པ་དེ་ལ་ “ཆོད་སེམས་ཁྱད་པར་ཅན་ནམ་” ཡང་ན་ “ལྷག་བསམ་” ཞེས་ཟེར་གྱི་ཡོད།

གལ་ཏེ་ང་ཚོ་སོ་སོ་གཅིག་པུ་དོན་དུ་གཉེར་བའི་བློ་ཞིག་གི་གཞན་དབང་དུ་གྱུར་བ་ཡིན་ན། ང་ཚོ་ལ་སངས་རྒྱས་ཀྱི་ཡོན་ཏན་གོང་འཕེལ་གཏོང་རྒྱུ་དང་རྟོགས་པ་འཐོབ་རྒྱུའི་ལམ་ཞིག་རྩ་བ་ནས་མེད།དེ་བཞིན་གལ་སྲིད་ང་ཚོ་རང་འདོད་དོན་གཉེར་གྱི་བློ་ལས་བཟློག་སྟེ་གཞན་གྱི་ཐབས་སྐྱོ་བའི་གནས་སྟངས་ལ་དོ་འཁུར་བྱེད་པ་ན། དེ་ནི་ང་རང་ཚོ་སོ་སོ་སངས་རྒྱས་ཀྱི་གོ་འཕང་འཐོབ་པའི་གཞི་རྟེན་དེ་ཡིན། དེ་ནི་རང་ཉིད་ཀྱི་དོན་དུ་རྒྱུ་དངོས་གསོག་པའི་ཆེད་མི་གསོད་པ་དང་། མ་བྱིན་པར་ལེན་པ་སོགས་རང་འདོད་དོན་གཉེར་གྱི་བློ་དང་འབྲེལ་བའི་བྱ་བ་ལ་མི་འཇུག་པ་ཡིན། དེ་ལྟ་བུའི་སྦྱོང་འདྲིས་མེད་པའི་ཐབས་ལམ་གྱིས་དེ་ལས་མང་བའི་དཀའ་ངལ་ཁོ་ན་བཟོ་བ་དང་། དེའི་རྩ་བ་ནི་ང་ཚོའི་རང་འདོད་དོན་གཉེར་གྱི་བློ་དེ་ཡིན།

སངས་རྒྱས་བཅོམ་ལྡན་འདས་ཀྱང་གཞན་སེམས་ཅན་གྱི་བདེ་དོན་དུ་ཐུགས་འཁུར་གནང་བའི་འབྲས་བུར། སེམས་ཡོངས་སུ་གསལ་ཞིང་། ཡོན་ཏན་མཐར་ཕྱིན་པའི་ཐོག་རྫོཌ་པའི་སངས་རྒྱས་ཀྱི་གོ་འཕང་ཐོབ་ཐུབ་པ་བྱུང་ཡོད། དོན་ངོ་མའི་ཐོག་འདས་པ་དང་། ད་ལྟ་བ། མ་འོངས་བཅས་ཀྱི་སངས་རྒྱས་ཐམས་ཅད་ཀྱང་གཞན་སེམས་ཅན་ལ་ཐུགས་འཁུར་ཡོད་པར་གཞིར་བཞག་ཐོག་རང་རང་གི་ནུས་པ་ཡོངས་རྫོགས་རྟོགས་པའི་སངས་རྒྱས་ཀྱི་གོ་འཕང་ཐོབ་ཡོད་པ་ཡིན། དེར་བརྟེན། གལ་སྲིད་ང་ཚོ་དངོས་པོའི་གནས་ལུགས་དང་མཐུན་པ་ཞིག་ཡིན་ན། ང་ཚོར་“གཞན་སེམས་ཅན་ཐམས་ཅད་བདེ་བ་དང་ལྡན་པ་དང་དེ་དག་གི་སྡུག་བསྔལ་སེལ་བར་བྱེད་པའི་”ཆོད་སེམས་ཁྱད་པར་ཅན་ནམ་ལྷག་པའི་བསམ་པ་དེ་ཡོད་སྲིད་ཀྱང་། ང་ཚོས་དོན་ངོ་མར་ག་ཚོད་ཀྱིས་བྱེད་པར་འདོད་ཀྱང་། དེ་ལྟར་བྱེད་པའི་ནུས་པ་མེད་པ་ཡིན། དེ་ལྟ་བུའི་སེམས་ཅན་ཐམས་ཅད་ཀྱི་སྡུག་བསྔལ་སེལ་བར་རོགས་མགོན་དང་བདེ་བ་འཐོབ་པར་བྱེད་པའི་ནུས་པ་དེ་སངས་རྒྱས་གཅིག་པུ་ལ་ཡོད་པ་ཡིན།

དེར་བརྟེན། ང་ཚོའི་སེམས་འདི་གཞན་ལ་ཕན་པའི་དོན་དུ་ཡོངས་སུ་དམིགས་རྒྱུ་དང་། དེ་ལྟར་གང་ཐུབ་ཅི་ཐུབ་ཀྱིས་གཞན་ཕན་སྒྲུབ་པ་ལ་སངས་རྒྱས་ཀྱི་གོ་འཕང་འཐོབ་དགོས་ཀྱི་ཡོད། དེ་ལ་བྱང་ཆུབ་ཀྱི་སེམས་སམ་“བྱང་ཆུབ་སེམས་ཀྱི་དམིགས་དོན་”ཟེར་གྱི་ཡོད།

དེ་ལྟ་བུའི་སྙིང་རུས་དང་ལྡན་པའི་བྱང་ཆུབ་སེམས་ཀྱི་དམིགས་དོན་ཡོད་པའི་ཐོག་ནས་ང་ཚོས་མེ་ཏོག་ལྟ་བུའི་མཆོད་པ་སྟབས་བདེ་ཞིག་འབུལ་བའི་དབང་དུ་བཏང་ན། གལ་ཏེ་མཆོད་པ་དེའི་དམིཌ་ཡུལ་སེམས་ཅན་ཐམས་ཅད་ལ་ཕན་པ་དང་། དེ་ལྟར་ཕན་པ་གང་ཐུབ་ཀྱིས་སྒྲུབ་པ་ལ་ང་ཚོ་སངས་རྒྱས་ཀྱི་གོ་འཕང་འཐོབ་དགོས་པར་དམིགས་ཡོད་ན། བྱ་བ་སྟབས་བདེ་པོ་དང་ཆུང་ངུ་དེས་བསཌ་པའི་དགེ་བའི་ནུས་པ་ནི་ཧ་ཅང་ཆེན་པོ་ཡིན། དོན་ངོ་མར། ང་ཚོའི་དམིགས་ཡུལ་དེ་སེམས་ཅན་ཐམས་ཅད་ལ་ཕན་ཐུབ་པའི་ཆེད་དུ་ཡིན་ན། དེའི་ཕན་ཡོན་ནི་དམིགས་ཡུལ་དེ་ལ་དཔག་པ་ཞིག་ཡོང་གི་ཡོད། ཕན་ཡོན་ནི་རྒྱ་ཆེ་བའི་སེམས་ཅན་གྱི་གྲངས་དང་མཚུངས་པ་ཡིན། འདི་ལྟ་བུའི་སྒོ་ནས་ང་ཚོའི་སེམས་བཟང་པོ་དང་ལྷག་བསམ་རྣམ་དག་གིས་གཞན་ཕན་སྒྲུབ་པའི་ཕན་ཡོན་ནི་གསེར་དང་ནོར་བུའི་གང་བའི་འཛམ་བུ་གླིང་ཞིག་སངས་རྒྱས་ལ་མཆོད་པ་འབུལ་བའི་ཕན་ཡོན་ལས་ཀྱང་རླབས་ཆེ་བ་ཡོད། གལ་སྲིད་ང་ཚོས་འཇིག་རྟེན་ནང་གི་སེམས་ཅན་ཐམས་ཅད་ལ་ཟས་བྱིན་དགོས་ཀྱི་ཡོད་ནའང་། བྱང་ཆུབ་སེམས་ཀྱིས་ཟིན་པའི་དམིགས་དོན་དེ་རང་རྒྱུད་ལ་དུས་ཡུན་ཐུང་ཐུང་རིང་ཤར་བའི་ཕན་ཡོན་དེ་རླབས་ཆེ་བ་ཡོད། 

དེ་ཡང་། གལ་སྲིད་ང་ཚོས་འཇིག་རྟེན་ནང་གི་མི་ཚང་མར་ཟས་བྱིན་པས་གནས་སྐབས་གཅིག་གི་རིང་ལ་ལྟོགས་པའི་དཀའ་ངལ་སེལ་ཐུབ་ཀྱང་། མི་རིང་བར་ཡང་བསྐྱར་གྲོད་ཁོག་ལྟོགས་ཤིང་། ལྟོགས་པའི་སྡུག་བསྔལ་མུ་མཐུད་གནས་རྒྱུ་ཡིན་པ་ལ་བསམ་བློ་གཏོང་བ་ཡིན་ན། རྒྱུ་མཚན་རིཌ་པའི་སྒོ་ནས་སྒྲུབ་ཐུབ་ཀྱི་རེད། འོན་ཀྱང་གལ་སྲིད་ང་ཚོས་བྱང་ཆུབ་སེམས་ཀྱིས་ཟིན་པའི་སྒོ་ནས་དུས་རྟག་ཏུ་སེམས་ཅན་ཐམས་ཅད་ཀྱི་སྡུག་བསྔལ་ཚབས་ཆུང་དུ་གཏོང་བ་དང་། དེ་ལྟར་གང་ཐུབ་ཅི་ཐུབ་ཀྱིས་བྱེད་པ་ལ་སངས་རྒྱས་ཀྱི་གོ་འཕང་འཐོབ་པར་བསྔོ་སྨོན་བྱས་ཡོད་ན། དེས་སེམས་ཅན་ཐམས་ཀྱི་ལྟོགས་པའི་སྡུག་བསྔལ་སེལ་བ་མ་ཟད། དེ་དག་གི་དཀའ་ངལ་དང་སྡུག་བསྔལ་ཡོངས་སུ་རྫོགས་པ་ལྷག་ལུས་མེད་པ་བཟོ་ཐུབ་པའི་ནུས་པ་སྟེར་གྱི་ཡོད།

མཇུག་སྡོམ་གྱི་གཏམ།

དེ་འདྲ་ཡིན་པ་སོང་ཙང། དམིགས་ཡུལ་བྱང་ཆུབ་ཀྱི་སེམས་གོང་འཕེལ་གཏོང་བའི་ཐབས་སུ། ང་ཚོས་གཞན་སེམས་ཅན་ལ་གནོད་པའི་བྱ་བ་མི་བྱེད་པའི་དམ་བཅའ་བརྟན་པོ་འཇོག་དགོས། ང་ཚོས་གཞན་ལ་གནོད་འཚེ་བྱས་པའི་ཉེས་དམིགས་དང་སྐྱོན་ཆ་མཐོང་བའི་སྐབས་གནོད་ཡུལ་སུ་འདྲ་ཞིག་ཡིན་རུང་གནོད་འཚེ་མི་བྱེད་པའི་དམ་བཅའ་འཇོག་དགོས། དེ་ལྟར་བྱེད་ན་ཕན་ཐོགས་ཧ་ཅང་ཆེན་པོ་ཡོད། དེ་ལྟ་བུའི་སྤྱོད་ཚུལ་རིགས་ཀྱི་རྗེས་འབྲས་ནི་དངོས་གནས་དྲང་གནས་བསྔགས་བརྗོད་འོས་པ་ཞིག་ཡིན། གཞན་ལ་གནོད་པ་མི་བྱེད་པའི་དམ་བཅའ་བརྟན་པོ་དེ་ནི་ང་ཚོ་ཚང་མས་ད་ལྟ་རང་ལག་བསྟར་བྱེད་ཐུབ་པའི་ཆོས་ཕྱོགས་ཀྱི་ཐབས་ལམ་ཞིག་ཡིན། བྱས་ཙང་། ང་ཚོས་ཆོས་ཕྱོགས་ཀྱི་ཉམས་ལེན་དེ་གནས་ཚད་མཐོ་པོ་ཞིག་དང་ཐག་རིང་པོ་ཞིག་ལ་ཡོད་པ་ལྟ་བུའི་བསམ་བློ་གཏོང་མི་དགོས།

མདོར་བསྡུས་ན། ཆོས་ཉམས་ལེན་པ་ཞིག་ཆགས་པ་ཞེས་པ་དེ་ཡ་མཚན་ཆེ་བའི་མི་ཚེ་འདྲ་པོ་ཞིག་གི་ནང་གནས་ཀྱི་ཡོད་པའི་དོན་མ་ཡིན། འཇིག་རྟེན་ཁྱིམ་པ་མང་པོ་ཆོས་པ་ཚད་ལྡན་ཆགས་པའི་ལོ་རྒྱུས་མང་པོ་ཡོད། ང་ཚོས་གནའ་བོའི་རྒྱ་གར་གྱི་གྲུབ་ཆེན་བརྒྱད་བཅུ་རྩ་བཞིའི་རྣམ་ཐར་ལ་བལྟ་བའི་སྐབས་དེ་ནང་ནས་མང་པོ་ཞིག་ཁྱིམ་པ་མི་ནག་རེད།

གལ་ཏེ་ང་ཚོ་ལོ་ན་རྒས་ཡོད་ན། ལོ་ན་རྒས་པའི་མི་ཚོས་ཆོས་ཉམས་ལེན་པ་ཞིག་ཆགས་མི་ཐུབ་བསམས་ནས་ཡི་ཆད་དམ་སེམས་ཤུགས་ཆག་རྒྱུ་མེད། གལ་ཏེ་ང་ཚོས་འདས་པའི་ལོ་རྒྱུས་ལ་བལྟས་ན། དཔེ་མཚོན་གཅིག་ནི། ཁྱིམ་བདག་དཔལ་སྐྱེས་ཞུ་བ་དེ་རེད། ཁོང་ཁྱིམ་པ་ཞིག་ཡིན་ཅིང་། ཆོས་ཉམས་ལེན་པ་ཆགས་པའི་སྐབས་དགུང་ལོ་བརྒྱད་བཅུར་ཕེབས་ཡོད། མཐར་མི་ཚེ་དེ་གའི་ནང་ཁོང་དགྲ་བཅོམ་པའི་གོ་འཕང་ཐོབ་ཡོད། དེ་འདྲ་ཡིན་དུས་ང་ཚོ་ལོ་ཚོད་ལ་བལྟས་ནས་སེམས་ཤུགས་ཆག་རྒྱུ་མེད།

ཕྱོགས་གཞན་ཞིག་ནས། གལ་ཏེ་ང་ཚོ་ལོ་ན་གཞོན་གཞོན་ཡིན་ན། སྣང་ཆུང་གཏོང་རྒྱུ་མེད་པར། གང་ཐུབ་ཐུབ་ཀྱིས་ཐག་ཆོད་པོས་སོ་སོའི་ནུས་པ་གང་ཡོད་པ་བེད་སྤྱོད་བྱས་ཏེ་ཆོས་ཉམས་ལེན་བྱེད་དགོས། ང་ཚོས་ཆོས་ཕྱོགས་ཀྱི་སྔོན་འགོག་ཐབས་ལམ་འདི་དག་ཕྱིས་སུ་ལོ་ན་མ་རྒས་ཀྱི་བར་དུ་ཕྱི་འགྱངས་རྩ་བ་ནས་གཏོང་རྒྱུ་མེད། གང་ཡིན་ཞེ་ན། ང་ཚོ་ག་དུས་འཆི་མིན་ཤེས་མི་ཐུབ། དེར་མ་ཟད། རྒས་པའི་དུས་ཚོད་ནི་གློ་བུར་དུ་ཡོང་གི་ཡོད་པའི་བཟོ་འདྲ་ཞིག་ཡོད། དེ་ལྟར་ཡོང་དུས་ང་ཚོས་གློ་བུར་དུ་དེ་ཚོར་གྱི་ཡོད། འདུག་སེ་བྱས་ནས་ང་ཚོའི་མི་ཚེ་རྫོགས་འགྲོ་གི་ཡོད་རེད།

ང་ཚོས་དགེ་བའི་བྱ་བ་སྟབས་བདེ་པོ་དང་ལས་སླ་པོ་མང་པོ་བྱེད་ཐུབ་ཀྱི་ཡོད། ངས་ཤེས་གསལ་ལ། ལུང་པ་ཁ་ཤས་ནང་མི་རྣམས་ཀྱིས་དཀའ་ལས་མང་པོ་བརྒྱབ་པ་དང་དངུལ་མང་འགྲོ་སོང་བཏང་ནས་བྱིའུར་ཟས་སྦྱིན་གྱི་ཡོད། ཁོ་ཚོའི་ཁང་པའི་ཕྱི་རོལ་དུ་བྱིའུར་ཟས་སྟེར་མཁན་ཡོད་པ་དང་། ཉིན་རེར་བཞིན་བྱིའུར་ཟས་སྟེར་བའི་ཆེད་དུ་དངུལ་འབོར་སྟོང་ཕྲག་མང་པོ་འགྲོ་སོང་གཏོང་གི་ཡོད། དངོས་གནས་བྱས་ན། ཁོང་ཚོས་རང་གི་གུང་གསེང་ཀྱང་བློས་བཏང་ནས་བྱིའུ་ཚོར་གསོ་སྐྱོང་བྱེད་ཀྱི་ཡོད། དེ་ནི་ཉམས་ལེན་ནམ་བྱ་བ་ཧ་ཅང་བཟང་པོ་ཞིག་རེད། དེ་མཐོང་བ་དང་ང་རང་ཧ་ཅང་དགའ་པོ་ཡོང་གི་འདུག དེ་གང་ཡིན་ཟེར་ན། དེ་ནི་བྱང་ཆུབ་སེམས་དཔའི་ཉམས་ལེན་གྱི་རིགས་ཤིག་རེད། དེ་བཞིན་དུ་རྒྱ་གར་ནང་གནས་མཇལ་དུ་ཕྱིན་ནས་བག་ལེབ་དང་འབྲས་སོགས་ཟས་རིགས་རྣམས་ཕུག་རོན་དང་བྱིའུ་འདྲ་མིན་ལ་སྦྱིན་མཁན་གྱི་བོད་པའི་གནས་སྐོར་བ་མང་པོ་དཔེ་བཞག་རྒྱུ་ཡོད། དེ་ནི་མི་ཚེ་རིང་པོ་དང་སྐྱིད་པོ་ཡོང་བའི་རླབས་ཆེན་གྱི་བྱ་བ་ཞིག་ཡིན།

ཕྱོགས་བསྡོམས།

གལ་སྲིད་ང་ཚོས་བགྲོ་གླེང་ཕྱོགས་བསྡོམས་རྒྱག་ན། གནད་དོན་གཙོ་བོ་ཁག་ནི།

  • རྒྱུན་དུ་གཞན་ཐམས་ཅད་ལ་ཕན་པའི་བྱ་བ་སྒྲུབ་པར་སེམས་པ་བཟང་པོ་དང་བྱམས་བརྩེ་གོང་འཕེལ་གཏོང་དགོས།
  • སུ་འདྲ་ཞིག་དང་ག་འདྲ་ཞིག་ཡིན་ནའང་གནོད་པ་བྱ་མི་རུང་ལ། གནོད་པ་དང་དཀའ་ངལ་གྱི་རྒྱུ་བྱེད་མི་རུང་།

འདི་དག་ནི་ཡང་དག་པའི་ཉམས་ལེན་གྱི་གནད་དོན་གཙོ་བོ་རྣམས་ཡིན། ང་ཚོས་དམིགས་ཡུལ་བྱང་ཆུབ་སེམས་ཀྱིས་ཟིན་ཏེ། ལྷག་བསམ་རྣམ་དག་གི་ཐོག་ནས་མི་ལུས་ཁྱད་པར་ཅན་གྱི་ནང་ཡོད་པའི་བྱ་བའི་རྟེན་གཞི་ལ་ཁེ་བཟང་ཡོངས་རྫོགས་བླངས་ནས་གཞན་དོན་སྒྲུབ་པ་ལ་སངས་རྒྱས་ཀྱི་གོ་འཕང་འཐོབ་དགོས་ཀྱི་ཡོད། གདུག་སེ་བྱས་ནས། ང་ཚོས་དངོས་གནས་སེམས་ཡོངས་སུ་གསལ་ཞིང་ཡོན་ཏན་མཐར་ཕྱིན་པ་རྫོགས་པའི་སངས་རྒྱས་ཀྱི་གོ་འཕང་འཐོབ་ཐུབ་ཀྱི་རེད།།

Top