འཚེ་བ་མེད་པ་དང་ཆོས་ཕྱོགས་ཀྱི་རིན་ཐང་།

དེ་རིང་དེང་དུས་འཛམ་གླིང་ནང་འཚེ་བ་མེད་པ་དང་ཆོས་ཕྱོགས་ཀྱི་རིན་ཐང་ཐད་གཏམ་བཤད་བྱེད་རོགས་ཞེས་འབོད་སྐུལ་གནང་སོང་། ངའི་ཤེས་ཚོད་ལྟར་བྱས་ན། ཁྱེད་རང་ཚོ་སྨན་དང་སློབ་ཁྲིད་ཀྱི་ཆེད་ལས་བྱ་རྒྱུའི་འཆར་གཞི་ཡོད་ས་རེད། དེ་ལྟར་ན་བརྗོད་གཞི་འདི་དག་ཁྱེད་རང་ཚོ་ལྟ་བུའི་སློབ་ཕྲུག་རྣམས་ལ་དམིགས་བསལ་འབྲེལ་བ་ཆགས་ཀྱི་ཡོད། གང་ཡིན་ཟེར་ན། ཁྱེད་རང་ཚོའི་གཞན་ལ་ཕན་འདོགས་པའི་ཆ་ཤས་སུ་སོ་སོ་རང་ངོས་ནས་འཚེ་བ་མེད་པའི་སྤྱོད་ཚུལ་གྱི་སྒོ་ནས་ཕན་འདོགས་རྒྱུ་ནི་ཧ་ཅང་གལ་ཆེན་པོ་ཡིན་པ་ཤོད་ག་ལ་དགོས། ཕན་པའམ་རོགས་བྱེད་པ་ནི་འཚེ་བའི་ཟློག་ཕྱོགས་དེ་ཡིན་པ་གསལ་པོ་རེད། དེའི་སྟེང་རང་ཉིད་ལ་ཆོས་ཕྱོགས་ཀྱི་རིན་ཐང་ཞིག་ཡོད་པ་དེས་ལས་དོན་དེ་བས་དོན་སྙིང་ཆེ་བ་བཟོ་གི་ཡོད། དེ་ཡང་དངུལ་གསོག་སྒྲུབ་ཙམ་མིན་པར། དེ་ལས་ལྡོག་སྟེ། རང་གིས་དངོས་གནས་མི་རྣམས་ལ་དོན་ལྡན་གྱི་ཕན་ཐོགས་པའི་གོ་སྐབས་ཡོད་པ་ལ་རྗེས་སུ་ཡི་རངས་བྱེད་པར་ཕན་ཐུབ་པ་ཡིན།

ཆོས་ལུགས་ཚང་མ་ནས་གསུང་གི་ཡོད་པ་ནང་བཞིན་ནང་པ་སངས་རྒྱས་པའི་ཆོས་ཀྱི་ནང་དུའང་འཚེ་བ་མེད་པའི་སྐོར་ལ་ཧ་ཅང་མང་པོ་གསུང་རྒྱུ་ཡོད། དེ་ག་ནང་བཞིན་ཆོས་བརྒྱུད་མི་འདྲ་བ་སོ་སོས་འཚེ་བ་མེད་པའི་དོན་ལ་འགྲེལ་བརྗོད་མི་འདྲ་བ་བྱེད་ཀྱི་ཡོད། ང་ཚོས་ནམ་རྒྱུན་འཚེ་བ་ཟེར་དུས་བྱ་བའི་རིགས་སམ་འཚེ་བའི་བྱ་སྤྱོད་ཅིག་ལ་བསམ་བློ་གཏོང་བ་དང་འཚེ་བ་མེད་པ་ཟེར་དུས་བྱ་སྤྱོད་དེ་སྤོང་བ་ལ་བསམ་གྱི་ཡོད། འོན་ཀྱང་ནང་ཆོས་ནས་དེའི་ཐད་སེམས་དང་ང་ཚོའི་སེམས་ཀྱི་གནས་བབས་ཀྱི་ཕྱོགས་ནས་མང་བ་འཇུག་ཚུལ་ཤོད་ཀྱི་ཡོད། འདིའི་རྒྱུ་མཚན་ནི། ང་ཚོས་འཚེ་བའི་སྤྱོད་ལམ་བརྩམ་གྱི་ཡོད་མེད་གང་ལྟར་ཡང་། དེ་ཐུག་ས་ནི་འཚེ་བའི་སེམས་ཀྱི་གནས་བབས་ཤིག་ལ་ཐུག་ཡོད། མ་རེད་དམ། བྱས་ཙང་། སེམས་ནང་གཞན་ལ་གནོད་འཚེ་བྱ་རྒྱུའི་བསམ་བློ་དྲག་པོ་ཞིག་བཟུང་ནས་གཞན་ལ་གནོད་པ་བྱ་རྒྱུ་སྤོང་བ་ཙམ་གྱིས་གོ་ཆོད་པ་ཞིག་རྩ་ནས་མི་ཡོང་། དེར་བརྟེན་འཚེ་བའི་སེམས་ཀྱི་གནས་བབས་དེ་རྟོགས་རྒྱུ་དང་དེ་ལས་ཐར་བའི་ཐབས་ལ་སྦྱོང་རྒྱུ་གལ་ཆེན་པོ་ཡིན།

འཚེ་བ་དང་འཚེ་བ་མེད་པའི་དབྱེ་བ་གསུམ།

ནང་ཆོས་ནང་ང་ཚོས་འཚེ་བའི་སེམས་ཀྱི་གནས་བབས་དེ་དབྱེ་ན་མི་འདྲ་བ་གསུམ་དུ་འབྱེད་ཀྱི་ཡོད། སྐབས་འདིར་འཚེ་བ་ཞེས་པའི་ཚིག་དེ་བསྒྱུར་སྟངས་གཞན་ཞིག་ནི། ཕལ་ཆེར་དྲག་ཤུལ་ཅན་ཏེ། ཨིན་སྐད་ནང་གི་ cruel ཟེར་བ་དེ་རེད། ང་ཚོས་འཚེ་བ་ཅན་ཞེས་བཤད་པའི་སྐབས། གང་ཟག་དེ་དྲག་ཤུལ་དང་སྟོབས་ཤུགས་ཅན་ཡིན་པ་ཤོད་ཀྱི་མེད། གང་ཡིན་ཞེ་ན། སྐབས་རེར་གཞན་ཞིག་གིས་རང་དང་གཞན་ལ་གནོད་འཚེ་བྱེད་པ་ལས་འགོག་པའི་ཆེད་དུ་ང་ཚོས་དྲག་ཤུལ་གྱི་ཐབས་ལམ་བསྟེན་དགོས་ཀྱི་ཡོད། དཔེར་ན། ཁྱེད་ཀྱི་ཕྲུ་གུ་དེ་མོ་ཊའི་རྒྱ་ལམ་སྟེང་རྒྱུགས་ན། མོ་ཊ་ཞིག་ལ་བརྡབས་ནས་ལས་སླ་པོའི་ངང་སྲོག་ཤོར་སྲིད་པས། དེའི་སྐབས་ཁྱེད་ཀྱིས་ “ཨོ། སྙིང་ཉེ། ཁྱོད་རྒྱ་ལམ་སྟེང་མ་རྒྱུགས།” ཞེས་ཟེར་བ་ཙམ་མིན་པར། ཁྱེད་ཀྱིས་ཕྲུ་གུ་དེ་གང་འཚམས་དྲག་ཤུགས་ཀྱིས་འཛིན་དགོས་ཆགས་སྲིད་པ་ལྟ་བུ་རེད། བྱས་ཙང་། འཚེ་བ་ཞེས་པའི་དོན་དེ་འདྲ་ལ་གོ་བ་མ་ཡིན། འཚེ་བ་ནི་གནོད་འཚེ་བྱེད་འདོད་དེ་ཡིན་ཞིང་། གནོད་འཚེ་བྱེད་སྟངས་ཀྱང་མི་འདྲ་བ་མང་པོ་ཡོད། དེ་འདྲ་སོང་ཙང་། ནང་ཆོས་ནས་གསུངས་པའི་འཚེ་བའི་རིགས་གསུམ་ཡོད་ཀྱང་། ང་ཚོས་དེ་ལས་དབྱེ་བ་མང་བའང་བསམ་བློ་གཏོང་ཆོག་པ་ནི་ཤོད་མི་དགོས།

གཞན་གྱི་ཕྱོགས་སུ་འཚེ་བ།

འཚེ་བའི་རིགས་དང་པོ་ནི། གཞན་གྱི་ཕྱོགས་སུ་འཚེ་བའི་སྒོ་ནས་བསམ་བློ་གཏོང་བ་དེ་ཡིན། དེ་ནི་དྲག་ཤུལ་ཅན་དང་སྙིང་རྗེ་བྲལ་བའི་སྒོ་གནས་གཞན་ལ་གནོད་འཚེ་བྱ་རྒྱུ་དེ་རེད། སྙིང་རྗེ་ནི་གཞན་སེམས་ཅན་རྣམས་སྡུག་བསྔལ་དང་སྡུག་བསྔལ་གྱི་རྒྱུ་དང་བཅས་པ་ལས་ཐར་བའི་ཡིད་སྨོན་དེ་ཡིན། འདིར་གཞན་སྡུག་བསྔལ་ལས་འབྲལ་བར་འདོད་པའི་ཚབ་ཏུ་གཞན་ལ་སྡུག་བསྔལ་དང་ལྡན་ཞིང་དཀའ་ངལ་ཕྲད་ན་བསམ་གྱི་ཡོད། དེ་ཡང་ང་ཚོས་སྡུག་བསྔལ་གྱི་རྒྱུ་བྱེད་པའམ། ཡང་ན་གཞན་གྱིས་བྱེད་པ། གང་ལྟར་ཡང་དེ་ནི་རང་བཞིན་གྱི་ཆ་ནས་ཡོང་གི་ཡོད། དེ་ལྟའི་སེམས་ཀྱི་གནས་བབས་ལས་ཐར་བར། ང་ཚོས་མི་ཚང་མ་གཅིག་ཡིན་པའི་ཚུལ་ཏེ། ཚང་མར་བདེ་བ་འདོད་ཅིང་སྡུག་བསྔལ་མི་འདོད་པ་གཅིག་ཡིན་པའི་ཐོག་བསམ་བློ་བཏང་ན། དེས་ང་ཚོར་ཕན་གྱི་ཡོད།

དེ་འདྲ་ཡིན་ཙང་། མི་ཞིག་གིས་རང་ཉིད་ལ་གནོད་འཚེ་བྱེད་པའི་སྐབས་ཏེ། དཔེ་ཆ་བཞག་ན། ཁྱེད་ཀྱིས་འཛིན་གྲྭའི་ནང་སློབ་ཁྲིད་བྱེད་བཞིན་པ་དང་། སློབ་ཕྲུག་གཅིག་གིས་གནོད་འཚེ་བྱེད་པའམ་སློབ་ཕྲུག་གཞན་ལ་འཁྲུག་འཛིང་སློང་གི་ཡོད་ན། དེ་ནས་སློབ་ཕྲུག་དེ་ལ་ཉེས་ཆད་འགེལ་རྒྱུའི་བསམ་བློ་གཏོང་བ་ནི་ནམ་རྒྱུན་ཁོང་ཁྲོ་དང་བཟོད་སྒོམ་མེད་པ། དེ་བཞིན་སེམས་ཀྱི་གནས་བབས་མི་བདེ་བ་དང་བརྟན་ཚུགས་པོ་མེད་པ་ཞིག་ཡིན་པས། དེ་ལས་ལྡོག་སྟེ། ང་ཚོས་སློབ་ཕྲུག་དེ་ནད་པ་ཡིན་པར་བསམ་བློ་བཏང་ན་ཕན་ཐོགས་ཆེ་བ་ཡོད། སློབ་ཕྲུག་དེ་བདེ་བ་དང་ལྡན་པ་ཞིག་ཡོང་བར་འདོད་ནའང་། བདེ་བ་དང་ལྡན་པ་ཞིག་ཇི་ལྟར་ཆགས་པའི་ཐད་ལ་བསམ་བློ་གསལ་པོ་དང་མ་ནོར་བ་ཞིག་མེད་པར། དེས་རྨོངས་པའི་སེམས་ཤིག་གི་ནང་འཁྲུག་སློང་གི་བྱ་སྤྱོད་སྤེལ་ནས་བདེ་སྐྱིད་ཅིག་སྐྲུན་གྱི་རེད་བསམ་གྱི་ཡོད། བྱས་ཙང་། བྱིས་པ་དེའི་ཕྱོགས་སུ་བསམ་ཚུལ་དེ་འདྲ་ཞིག་ཡོད་པ་ལ་བརྟེན་ནས་ང་ཚོས་བྱིས་པ་དེ་སྡུག་ཅག་ཡིན་པ་དང་ཉེ་ཆད་འགེལ་དགོས་པའི་ཐོག་ནས་བསམ་བློ་གཏོང་གི་མེད། དེའི་ཚབ་ལ་ང་ཚོས་སྙིང་རྗེ་སྐྱེ་གི་ཡོད། སྙིང་རྗེ་ནི་འཛིན་ཁང་ནང་འཁྲུག་སློང་གི་བྱ་སྤྱོད་དང་སྤྱོད་ངན་བྱེད་དུ་འཇུག་པའི་བྱིས་པ་དེའི་རྒྱུད་ཀྱི་རྨོངས་པ་དང་དཀའ་ངལ་ལས་འབྲལ་བའི་ཡིད་སྨོན་དེ་ཡིན། 

ཡང་ང་ཚོས་གང་ཡང་མི་བྱེད་པའི་ཧུར་བརྩོན་གྱི་རང་བཞིན་དང་མི་ལྡན་པའི་དོན་མིན། འཚེ་བ་མེད་པ་ཟེར་དུས་ཧུར་བརྩོན་དང་མི་ལྡན་ཞིང་གང་ཡང་མི་བྱེད་པའི་དོན་མིན་པར། དེའི་དོན་ནི་ཁོང་ཁྲོ་མི་ཟ་བ་དང་འཁྲུག་སློང་གི་བྱིས་པ་དེ་ལ་གནོད་པའི་འདུན་པ་མེད་པ་ལ་གོ་བ་ཡིན། བྱས་ཙང་། ང་ཚོས་བྱིས་པ་དེ་འཁྲུག་སློང་གི་སྤྱོད་པ་དེ་མཚམས་འཇོག་བྱེད་ཆེད་ཐབས་ཤིག་འཚོལ་དགོས་པ་ནི་གསལ་པོ་རེད། དེ་ཡང་ཐབས་གང་ཡིན་ནའང་ཆོག་ཀྱང་། སློབ་གྲྭའི་ལམ་ལུགས་དང་མི་འགལ་བ་ཞིག་དགོས། དེའི་རྒྱབ་ཀྱི་ཀུན་སློང་དང་སེམས་ཀྱི་གནས་བབས་ནི་བྱིས་པ་དེ་ལ་ཉེས་ཆད་འགེལ་འདོད་ཀྱི་ཀུན་སློང་དང་རྩ་ནས་མི་འདྲ། གང་ཡིན་ཞེ་ན། བྱིས་པ་དེ་སྡུག་ཅག་ཡིན་པས་རེད།

ཀུན་སློང་ཞེས་བྱ་བ་དེ་རྟོགས་རྒྱུ་ཧ་ཅང་གལ་ཆེ། དེ་ལའང་རྣམ་པ་གཉིས་ཡོད། དང་པོ་ནི་ང་ཚོའི་དམིགས་ཡུལ་ལམ་བསམ་བློ་དེ་རེད། གཞན་དེ་ནི་དམིགས་ཡུལ་དེ་སྒྲུབ་པར་བྱེད་པའི་སེམས་ཚོར་དེ་རེད། དམིགས་ཡུལ་དེ་བྱིས་པ་དེར་རོགས་བྱ་རྒྱུ་དེ་རེད། དཔེར་ན། རྒྱུ་མཚན་དེ་ལ་བརྟེན་ནས་ང་ཚོ་དགེ་རྒན་ཞིག་ཆགས་ཀྱི་ཡོད། དེ་དང་གཅིག་མཚུངས་སུ་གལ་ཏེ་ཁྱེད་རང་སྨན་གྱི་སློབ་སྦྱོང་དང་འབྲེལ་བའི་ཆེད་ལས་ནང་འཛུལ་སྐབས་ཀྱི་དམིགས་ཡུལ་ནི། ནད་པར་རོགས་བྱ་རྒྱུ་དེ་རེད། འོ་ན་དམིགས་ཡུལ་དེ་སྒྲུབ་པར་བྱེད་མཁན་གྱི་སེམས་ཀྱི་གནས་བབས་དེ་གང་ཡིན་ནམ། གལ་ཏེ་དེ་དངུལ་གསོག་སྒྲུབ་དང་མི་གཞན་གྱིས་རང་ཉིད་དངོས་གནས་ཐུགས་རྗེ་ཆེ་ཞུ་བ་དང་བཀའ་དྲིན་ཆེན་པོ་ཚོར་བའི་ཆེད་ཡིན་ན། དེ་ནི་དངོས་གནས་རང་འདོད་དོན་གཉེར་གྱི་ཀུན་སློང་ཞིག་རེད། མ་རེད་དམ། དེ་ནི་རང་གཅེས་འཛིན་གྱི་ཀུན་སློང་ཆགས་ཀྱི་ཡོད། གང་ཡིན་ཟེར་ན། བསམ་བློའི་དམིགས་ས་དེ་མང་ཆེ་བ་སོ་སོའི་དོན་དུ་ཡིན་པ་དང་། མི་གཞན་དག་ལ་གང་ཡག་པོ་དང་ཕན་པོ་ཡོད་པའི་ཐོག་ལ་དམིགས་པ་གཏད་ཀྱི་མེད། དེ་ནི་ཨེམ་རྗེའམ་སྨན་པ་ཞིག་གིས་མི་དགོས་ནའང་ད་དུང་ནད་པ་ལྟ་བུ་མི་ཞིག་ལ་གཤགས་བཅོས་བྱེད་དགོས་ཀྱི་འདུག་ཅེས་སློབ་སྟོན་བྱེད་པ་ལྟ་བུ་རེད། སྨན་པ་དེས་དེ་ལྟར་སློབ་སྟོན་བྱེད་དགོས་དོན་ནི། གཤགས་བཅོས་དེ་ལས་དངུལ་མང་བ་བཟོ་ཐབས་ཁོ་ན་ཙམ་རེད། འོན་ཀྱང་མི་གཞན་དེར་ཕན་པའི་དམིགས་ཡུལ་དེ་བསྒྲུབ་པའི་ཆེད་ང་ཚོས་གང་གིས་སེམས་འགུལ་ཐེབ་དགོས་སམ་ཞེ་ན། དེ་ནི་སྙིང་རྗེ་སྟེ། གཞན་དོན་དུ་བསམ་པ་དང་གཞན་ལ་ཕན་པའི་ཐབས་ཡག་ཤོས་གང་ཡིན་པའི་ཐོག་བསམ་བློ་གཏོང་རྒྱུ་དེ་རེད།

ཡང་སྐབས་འགར་སྨན་གྱི་ཆེད་ལས་དེའི་ནང་། མི་གཞན་ཞིག་ལ་རོགས་བྱེད་ཕྱིར། ང་ཚོས་སྨན་བཅོས་བྱེད་དགོས་ཐུག་གི་ཡོད་པ་དང་། སྨན་བཅོས་དེ་ཡང་ན་ཟུག་ཅན་ཏེ། ཁབ་རྒྱག་པ་དང་གཤགས་བཅོས་བྱེད་པ་ལྟ་བུ་ཡོང་གི་ཡོད། ༼གཤགས་བཅོས་ནས་དྲག་སྐྱེད་ཡོང་རྒྱུ་དེ་ན་ཟུག་ཅན་ཞིག་རེད།༽ འོན་ཀྱང་དེ་ནི་འཚེ་བའི་ཐབས་ལམ་ཞིག་རེད་དམ་ཞེ་ན། མ་རེད། གང་ཡིན་ཟེར་ན། སྐབས་འདིར་ཀུན་སློང་ནི་གཞན་ལ་གནོད་ཕྱིར་མ་ཡིན་པར། གཞན་དེའི་ནད་ན་ཚ་དང་། སྡུག་བསྔལ་ལམ་དཀའ་ངལ་ལས་དྲག་སྐྱེད་ཡོང་བར་ཕན་པའི་ཆེད་དུ་ཡིན།

དེ་འདྲ་སོང་ཙང་། ཁྱེད་ཀྱིས་སློབ་གྲྭའི་སློབ་ཕྲུག་སྤྱོད་པ་འཚུབ་པོ་ཞིག་ལ་སྒྲིག་ཁྲིམས་བསླབ་དགོས་ན། འདི་དང་གཅིག་པ་རེད། ཁྱེད་ཀྱི་ཀུན་སློང་དེ་བཟང་པོ་ཞིག་རེད། སློབ་ཕྲུག་དེར་གནོད་ཕྱིར་མིན། ང་ཚོས་སློབ་ཕྲུག་དེའང་སོ་སོ་ནང་བཞིན་འགྲོ་བ་མི་ཞིག་ཡིན་པ་དང་། བདེ་བ་འདོད་པ་དང་སྡུག་བསྔལ་མི་འདོད་པ་ཞིག་ཡིན་པ་རྟོགས་ནས་ཕན་ཐོགས་བྱེད་འདོད་སྐྱེ་གི་ཡོད། དེ་བཞིན་རང་ངོས་ནས་སློབ་ཕྲུག་དེ་མི་ཚེའི་ནང་སྐྱིད་པོ་ཞིག་ཡོང་བའི་ལམ་ཁ་ཞིག་ཕལ་ཆེར་སྟོན་ཆོག །མ་འོངས་པར་སློབ་ཕྲུག་དེ་ཆེད་ལས་གང་གི་ནང་འགྲོ་མིན་ལ་མ་ལྟོས་པར། གལ་ཏེ་གང་ཟག་དེ་ལ་སྒྲིག་ཁྲིམས་ཡོད་པ་དང་གཞན་དང་མཉམ་འབྲེལ་བྱེད་སྟངས་ཤེས་ན། དེས་ཕན་ཐོགས་ཀྱི་རེད། མ་འོངས་པར་མི་སུ་འདྲ་ཞིག་ཡིན་རུང་ཚང་མར་གནད་དོན་འདི་དག་གིས་ཕན་གྱི་རེད།

སྒྲིག་ཁྲིམས་ནི་རང་གིས་རང་ལ་སྟངས་འཛིན་བྱེད་པ་དེ་ཡིན། ཕྲུ་གུས་སྤྱོད་ལོག་འཁྲབ་འདོད་བྱེད་པའི་སྐབས། ཕྲུ་གུ་དེར་སོ་སོ་རང་གིས་རང་ལ་སྟངས་འཛིན་དང་ཚོད་འཛིན་དགོས་པ་བསླབ་དགོས། དེ་ལྟར་བྱས་ན། ང་ཚོས་ཕྲུ་གུ་དེ་སྒྲིག་བཅུན་པའི་སྐབས། ཀུན་སློང་དང་དམིགས་ཡུལ་དེ་ཁོང་ཚོ་སོ་སོའི་ངོས་ནས་སྒྲིག་ཁྲིམས་ཡར་རྒྱས་གཏོང་བར་ཕན་འདོགས་རྒྱུ་དེ་རེད། ང་ཚོས་ཕྲུ་གུ་དེ་སྒྲིག་བཅུན་པའི་སྐབས། སེམས་ཀྱི་གནས་བབས་དེ་འདྲ་ཞིག་ཡོད་ན། དེས་ཕྲུ་གུ་དེ་དང་འབྲེལ་བ་ཤུགས་ཆེན་ཞིག་བྱེད་ཀྱི་ཡོད། དེ་ནི་ཕ་མས་རང་གི་ཕྲུ་གུ་སྒྲིག་བཅུན་པ་དང་འདྲ་ཞིང་། ཕ་མས་ཕྲུ་གུར་ཞེ་སྡང་གི་ཚོར་བ་སྐྱེད་པར་མི་བྱེད། བྱེད་དམ།

དེར་བརྟེན་གལ་ཏེ་ང་ཚོ་ཆེད་ལས་ཀྱི་རིགས་སྨན་དང་འབྲེལ་བའམ་སློབ་ཁྲིད་དང་འབྲེལ་བ་ལ་རོགས་བྱེད་རྩིས་ཡོད་ན། དེ་དག་སྦྱོང་བརྡར་བྱ་རྒྱུ་གལ་ཆེན་རེད་བསམ་གྱི་འདུག །ཆེད་ལས་དེ་དག་གི་ནང་བྱམས་བརྩེ་དང་སྙིང་རྗེའི་ཀུན་སློང་དང་ལྡན་པའི་སྒོ་ནས་ཁྱེད་ཀྱིས་ནད་པ་དང་སློབ་ཕྲུག་ཚོར་རོགས་བྱེད་འདོད་ཡོད་པ་དང་། མི་ཚེ་སྐྱིད་པ་དང་བཟང་བ་ཞིག་སྐྱེལ་འདོད་ཡོད་པ། དེ་བཞིན་སྡུག་བསྔལ་ལས་ཐར་འདོད་ཡོད་པ་བཅས་དང་། དེའི་ཕྱི་རོལ་ལ་ཆེད་ལས་པ་དོ་གལ་ཅན་ཞིག་དང་སྐབས་རེར་གང་ལ་གང་འཚམས་སྒྲིག་དམ་པོ་བྱེད་དགོས་ཀྱི་ཡོད། དེ་ལྟར་ང་ཚོས་ཆེད་ལས་དེ་འཚེ་བ་མེད་པའི་གོ་དོན་དང་པོ་དང་མཐུན་པའི་སྒོ་ནས་རྗེས་སུ་འཇུག་ཆོག

བྱས་ཙང་། གཞན་གྱི་ཕྱོགས་སུ་སྙིང་རྗེ་བྲལ་བའི་སྒོ་ནས་གནོད་འཚེ་བྱེད་འདོད་ཡོད་པ་དེའི་ཚབ་ལ་ང་ཚོར་སྙིང་རྗེ་དང་ལྡན་པ་དགོས། སྙིང་རྗེ་ནི་གནོད་འཚེ་དང་སྡུག་བསྔལ་དེ་དག་ལས་འབྲལ་འདོད་ཀྱི་ཡིད་སྨོན་དེ་ཡིན། ཨ་ཅང་ཅང་། མི་གཞན་ཞིག་ལ་རོགས་བྱེད་པའི་ཐབས་ལམ་ཡག་ཤོས་དེ་གང་ཡིན་པ་དེ་ཤེས་རྒྱུ་ཧ་ཅང་དཀའ་ལས་ཁག་པོ་ཡོད། སློབ་ཕྲུག་དང་ནད་པ་རེ་རེ་ནི་མི་སྒེར་རེ་རེ་རེད། དེའི་དོན་ནི་གང་ཟག་གཅིག་ལ་གོ་ཆོད་པ་དང་ཕན་ཐོགས་སྲིད་པ་དེ་གང་ཟག་གཞན་ཞིག་ལ་ཕན་ཐོགས་པའི་ངེས་པ་མེད། དེ་འདྲ་ཡིན་ཙང་། སྨན་པ་ཞིག་ཡིན་པའི་ཆ་ནས་ནད་པ་རེ་རེ་དང་། དགེ་རྒན་ཞིག་ཡིན་པའི་ཆ་ནས་སློབ་ཕྲུག་རེ་རེའི་སྒེར་གྱི་རྣམ་པར་གུས་ཞབས་བྱ་རྒྱུ་ཧ་ཅང་གལ་ཆེན་པོ་ཡིན། སྨན་པ་ཞིག་ལ་ཆ་བཞག་ན། ཉིན་ལྟར་བརྟག་དགོས་པའི་ནད་པ་ཧ་ཅང་མང་པོ་ཡོད་པ་དང་། དགེ་རྒན་ཞིག་གི་འཛིན་ཁང་སློབ་ཕྲུག་གིས་ཁེངས་ནས་ཡོད་པའི་སྐབས། དེ་ནི་ལས་སླ་པོ་ཞིག་མེད། འོན་ཀྱང་གང་ཟག་རེ་རེ་བཞིན་སྒེར་གྱི་ངོས་ནས་དངོས་གནས་ཤེས་རྟོགས་མི་སྲིད་པ་ལྟར་ཡིན་ནའང་། སླར་ཡང་གལ་ཆེན་པོ་དེ་གང་རེད་ཅེ་ན། ཁོང་ཚོ་ངོ་ཤེས་པར་བྱ་རྒྱུའི་དོ་དབྱིངས་ཡོད་པའི་སེམས་ཀྱི་གནས་བབས་ཤིག་དགོས། ཁོང་ཚོར་དོ་དབྱིངས་བྱེད་པ་དེ་ནི་ཁོང་ཚོར་གུས་ཞབས་བྱེད་པ་ལ་གཞི་བཅོལ་ཡོད། དེ་ནས་ཁོང་ཚོར་དོ་དབྱིངས་དང་གུས་ཞབས་གཅིག་པའི་སྒོ་ནས་རང་ཉིད་གྲོགས་ཉེ་པོ་ཞིག་གམ་སྤུན་མཆེད་ནང་བཞིན་བལྟ་ཐབས་བྱེད་དགོས་ཤིང་། དེ་ཡང་ང་ཚོ་དང་ཁོང་ཚོའི་ལོ་ཚད་ལ་དཔག་པའི་ཁྱེད་ཀྱི་ཕྲུ་གུ་དང་། ཕ་མ། གཅེན་གཅུང་སུ་འདྲ་ཞིག་ཡིན་ནའང་ཆོག

ངའི་བསམ་པར། ང་ཚོས་དྲན་གསོ་བྱས་ན་ནམ་རྒྱུན་ཧ་ཅང་ཕན་ཆེ་བའི་རྩ་འཛིན་ལམ་སྟོན་གྱི་ནང་ནས་གཅིག་ནི། གང་ཟག་དེ་འགྲོ་བ་མི་ཞིག་ཡིན་པ་དང་ང་རང་ལ་ཚོར་བ་ཡོད་པ་ནང་བཞིན་མི་དེ་ལའང་ཡོད་ཅེས་དྲན་དགོས། སོ་སོ་རང་ཉིད་བདེ་བ་འདོད་པ་ལྟར་ཁོང་ཚོ་ལའང་བདེ་བ་འདོད་ཀྱི་ཡོད། སོ་སོ་རང་ཉིད་ལ་གཞན་གྱིས་དགའ་པོ་བྱེད་པར་འདོད་པ་ནང་བཞིན་ཁོང་ཚོ་ལའང་གཞན་གྱིས་དགའ་པོ་བྱེད་ན་འདོད་ཀྱི་ཡོད། གལ་ཏེ་ང་ལ་གནོད་འཚེ་ཅན་གྱི་བསམ་བློ་ཡོད་པ་དང་ཁོང་ཚོར་གནོད་པའི་ལས་བརྩམ་པ་དང་། ཁོང་ཚོའི་ཕྱོགས་སུ་ཧ་ཅང་སྣང་མེད་བཏང་ན། ཁོང་ཚོར་གནོད་པ་དེ་ཚོར་གྱི་རེད། དེ་ནི་མི་གཞན་ཞིག་གིས་ང་ཚོར་དེ་ལྟར་བྱས་ན་ང་ཚོར་གནོད་པ་དེ་ཚོར་ངེས་པ་དང་གཅིག་པ་རེད། རང་ཉིད་མི་སྒེར་ཞིག་ཡིན་པའི་ཆ་ནས་གཞན་ལ་གུས་ཞབས་བྱེད་པའི་སེམས་དེ་ཧ་ཅང་གལ་ཆེན་པོ་ཡིན།

རང་ཕྱོགས་སུ་འཚེ་བ་མེད་པ།

འཚེ་བ་མེད་པའི་རིགས་གཉིས་པ་ནི་གོང་དུ་འགྲེལ་བརྗོད་བྱས་དང་བྱེད་མུས་ཀྱི་འཚེ་བ་མེད་པ་དང་ཕྲན་བུ་འབྲེལ་བ་ཆགས་ཡོད། དེ་གང་ཡིན་ཟེར་ན། འདིར་ང་ཚོས་རང་ཕྱོགས་སུ་འཚེ་བ་མེད་པའི་སྐོར་ཤོད་ཀྱིན་ཡོད། ༼འཚེ་བ་མེད་པའི་རིགས་དང་པོ་དེ་ནི་གཞན་ཕྱོགས་སུ་འཚེ་བ་མེད་པ་དེ་རེད།༽ སྐབས་འདིར་ང་ཚོས་རང་གིས་རང་ལ་མི་གནོད་པའི་སྐོར་ཤོད་ཀྱིན་ཡོད། རང་གིས་རང་ལ་གནོད་པའི་སྐབས་སུ་རང་གི་རང་ལ་བརྩེ་བ་མེད་པའི་སྒོ་ནས་རང་གིས་རང་ལ་གནོད་འཚེ་བྱེད་འདོད་སྐྱེ་གི་ཡོད། རང་གིས་རང་ལ་གནོད་འཚེ་བྱེད་པ་དེ་བསམ་བཞིན་དུ་ཡིན་སྲིད་ལ་བསམ་བཞིན་དུ་མ་ཡིན་པའང་ཡིན་སྲིད། དཔེར་ན། “ང་རང་སྡུག་ཅག་ཡིན། ང་རང་ཡག་པོ་མིན། ང་རང་འདོད་བློ་ཚིམས་པའི་ཡག་པོ་མིན།” ཞེས་པའི་བསམ་བློ་ལྟ་བུ་རེད།

ལྷག་པར་དུ་གལ་ཏེ་སོ་སོ་རང་ཉིད་སྨན་པ་ཞིག་ཡིན་པ་དང་རང་གི་ནད་པ་ཞིག་ཤི་བ་ཡིན་ན། དེ་ནི་འབྱུང་ངེས་པ་རེད། དེ་ལ་ “ཨོ་ཧོ། ང་རང་སྨན་པ་ཞེད་སྣང་ཅན་ཞིག་རེད། དཔེ་སྡུག་ཅག་རེད།” ཅེས་བསམ་པ་དང་། དེ་ནས་རང་གིས་རང་ལ་ནག་ཉེས་ཅན་དུ་ཚོར་ནས་གང་ལྟར་རང་གིས་རང་ལ་ཉེས་ཆད་གཏོང་གི་ཡོད། དེ་ཡང་ནམ་རྒྱུན་གང་འཚམས་ཀྱི་སེམས་ཁམས་དང་སེམས་ཚོར་སྐྱེན་པོ་རེད། གང་ཡིན་ཞེ་ན། སོ་སོ་སྨན་པ་ཞིག་ཡིན་པའི་ཆ་ནས་ནད་པ་དེ་ལ་རོགས་བྱས་མ་ཐུབ་པར་གྲོངས་པ་རེད། གལ་ཏེ་ང་ཚོ་སྨན་པའམ་དགེ་རྒན་ཞིག་བྱེད་མཁན་ཡིན་ན། གནད་དོན་དེ་དག་ལ་གྲ་སྒྲིག་དགོས་ངེས་ཡིན། ང་ཚོ་སངས་རྒྱས་མིན་ཙང་། མི་ཚང་མར་རོགས་བྱེད་མི་ཐུབ། ཐ་ན་སངས་རྒྱས་ཀྱིས་ཀྱང་ཚང་མར་རོགས་བྱེད་ཐུབ་མེད། དེ་འདྲ་སོང་ཙང་། མཚམས་མཚམས་ང་ཚོར་ལམ་ལྷོང་མ་བྱུང་བ་ནི་རང་བཞིན་རེད། ང་ཚོས་ནད་པ་ཞིག་བཅོས་ཐབས་བྱེད་མི་ཐུབ་པའམ། ཡང་ན་ང་ཚོས་ཕྲུ་གུ་ཞིག་ལ་སླབ་གསོ་བྱེད་མི་ཐུབ་པ། གང་ཡིན་རུང་དེ་ནི་དངོས་པོའི་ཆོས་ཉིད་རེད། མི་གཞན་ཞིག་ལ་ཕན་ཐོགས་བྱེད་པར། ཕ་རོལ་པོ་དེའི་ངོས་ནས་ཀྱང་གོ་ཤེས་ཅན་བྱེད་དགོས་ཀྱི་ཡོད། ནད་ཀྱི་རིགས་ཁ་ཤས་ང་ཚོས་བཅོས་ཐུབ་ཡག་མེད། ང་ཚོས་བཅོས་ཐུབ་སྲིད་ཀྱང་། སྐབས་རེར་ནོར་འཁྲུལ་བྱེད་ཀྱི་ཡོད། གང་ལྟར་ཡང་ང་ཚོ་འགྲོ་བ་མི་རེད། དེ་ག་ནང་བཞིན་སློབ་ཕྲུག་འགའ་ཞིག་ལ་སེམས་ཚོར་དང་སྤྱི་ཚོགས་ཀྱི་དཀའ་ངལ། དེ་བཞིན་ནང་མི་ཁྱིམ་ཚང་གི་དཀའ་ངལ་ལྟ་བུ་ནི་ང་ཚོའི་ནུས་པ་ལས་འདས་པ་ཡིན་པས། རོགས་བྱེད་ཐུབ་ཡག་མེད། 

བྱས་ཙང་། རང་གིས་རང་ལ་ཇི་ལྟར་གནོད་འཚེ་བྱེད་སྲིད་པའི་ཚུལ་ལ་ལྟ་ཞིབ་བྱེད་དགོས། ཕྱོགས་གཞན་ཞིག་ནས་བཤད་ན། རང་གི་ཕྱོགས་སུ་འཚེ་བ་དེ་རེད། རང་གིས་རང་ལ་གནོད་ཚུལ་དེ་ཡང་། དཔེར་ན། རང་གིས་རང་ལ་ཨུ་ཚུགས་ཆེན་པོས་མི་སྲིད་པ་ཞིག་ཡིན་ནའང་། ད་དུང་ “ང་རང་སྐྱོན་དང་བྲལ་ཞིང་། ཡང་དག་པ་ཞིག་བྱེད་དགོས་ཀྱི་འདུག་” ཅེས་བསམ་པ་དེ་རེད། ང་ཚོས་གང་བྱེད་བཞིན་པའི་ཐོག་ལ་གང་ཡག་ཡག་བྱེད་ཐབས་བྱེད་དགོས་ངེས་རེད། འོན་ཀྱང་སུ་གཅིག་ཀྱང་སྐྱོན་དང་བྲལ་བ་ཞིག་མིན། དེར་བརྟེན་ང་ཚོ་གནད་དོན་གཅིག་གམ་གཞན་ཞིག་གི་ཐོག་ལམ་ལྷོང་མ་བྱུང་ན། ང་ཚོས་དེར་འགྱོད་པ་སྐྱེ་ངེས་རེད། ང་ཚོས་མ་འོངས་པར་དེ་ལས་ཡག་ག་བྱེད་ཐུབ་པའི་རེ་འདོད་ཡོད། ཡིན་ནའང་ང་ཚོས་དངོས་གནས་ཧུར་ཐག་བྱེད་དགོས་ཤིང་། དེ་ལ་བརྟེན་ནས་སེམས་ངལ་གནོན་ཤུགས་ནང་མ་འཚུད་པ་བྱེད་དགོས། གང་ཡིན་ཟེར་ན། སེམས་ངལ་བྱེད་པ་དེས་སོ་སོའི་ལས་ཀ་དང་ལས་ཀ་དོན་སྨིན་ལྡན་པ་ཞིག་ཡོང་བར་གནོད་ཀྱི་ཡོད།

ད་ཁྱེད་ཀྱིས་ “ངས་ང་རང་ལ་སེམས་ངལ་མི་འབྱུང་བའམ། ཡང་ན་ཧ་ཅང་གནོད་འཚེ་ཅན་གྱི་ཚོར་བ་ལས་ཇི་ལྟར་སྔོན་འགོག་བྱེད་ཐུབ་བམ་” ཞེས་བརྗོད་སྲིད། ཁྱེད་ཀྱིས་ཤེས་གསལ་ལྟར། གལ་ཏེ་ཁྱེད་རང་ལ་སློབ་ཕྲུག་ཅིག་ཡོད་པ་དང་དེས་སློབ་སྦྱོང་སོགས་ཡག་པོ་བྱེད་བཞིན་པའི་སྐབས། རྒྱུ་མཚན་འགའ་ཞིག་ལ་བརྟེན་ནས་སློབ་ཕྲུག་དེས་སློབ་གྲྭ་བཞག་ནས་ཕྱིན་པ་ཡིན་ན། བློ་ཕམ་པོ་ཞིག་རང་བཞིན་གྱིས་ཡོང་གི་རེད། ཡིན་ནའང་གནད་འགགས་ནི་སེམས་ངལ་དང་སེམས་གཅོང་ཆགས་རྒྱུ་མེད། བྱས་ཙང་། དྲི་བ་གང་རེད་དམ་ཞེ་ན། ང་ཚོས་རང་གིས་རང་ལ་སེམས་ངལ་མི་ཆགས་པའི་རོགས་ཇི་ལྟར་བྱེད་ཐུབ་བམ། གནད་དོན་འདི་ནི་ང་ཚོས་ཞུས་ཟིན་པའི་གཞན་དང་མཉམ་དུ་གདོང་ལེན་བྱེད་སྟངས་དང་འབྲེལ་བ་ཆགས་ཀྱི་ཡོད། གཞན་ལ་དངོས་གནས་ཕན་པ་བསྒྲུབ་འདོད་དང་གནོད་པ་མི་སྐྱེལ་བའི་ཆེད་དུ་གལ་ཆེ་ཤོས་ནང་གི་གཅིག་ནི། གཞན་ལ་གུས་ཞབས་བྱ་རྒྱུ་དེ་རེད། དེ་དང་མཚུངས་པར་རང་གིས་རང་ལའང་གུས་ཞབས་དེ་དགོས་ཀྱི་ཡོད། ང་ཚོས་དུས་རྟག་ཏུ་ “ང་ལ་འཇོན་ཐང་དང་ནུས་པ་ཡོད། དེ་མིན་ང་རང་སྨན་པའམ་དགེ་རྒན་ཆགས་ཐུབ་ཡོད་ཀྱི་མ་རེད་” ཅེས་སླར་ཡང་ངེས་གཏན་བཟོ་རྒྱུ་གལ་ཆེ། ང་ཚོས་སོ་སོའི་ཀུན་སློང་དེ་ “ངས་བྱེད་བཞིན་པའི་ལས་ཀ་འདི་བྱེད་པའི་སྐབས། ང་རང་ལ་ཀུན་སློང་བཟང་པོ་ཞིག་ཡོད་” ཅེས་དང་། དེ་བཞིན་ “འགྲོ་བ་མི་ཞིག་ཡིན་པའི་ཆ་ནས་ང་རང་སྐྱོན་བྲལ་ཞིག་མིན། ཡིན་ནའང་ངས་གང་ཐུབ་ཅི་ཐུབ་ཀྱིས་འབད་བརྩོན་བྱེད་པས། རང་གི་རང་ལ་གུས་བརྩི་བྱེད་ཀྱི་ཡོད་” ཅེས་སླར་ཡང་ངེས་གཏན་བཟོ་དགོས། དེ་ལྟར་བྱེད་པ་ལ་བརྟེན་ནས་ང་ཚོ་སེམས་ངལ་མི་འབྱུང་བར་ཕན་གྱི་ཡོད།

འོ་ན་རང་གིས་རང་ལ་དྲང་པོ་དྲང་གཞག་གིས་བརྟག་དཔྱད་བྱེད་པ་དང་། དེ་ནས་ངས་གང་ཐུབ་ཅི་ཐུབ་བྱས་མི་འདུག་ཅེས་ང་ཚོས་ཤེས་རྟོགས་ཡོང་བའི་སྐབས། ག་རེ་ཡོང་གི་ཡོད་དམ། ངས་དེ་ལས་ཡག་ག་བྱས་ཡོད་ཀྱི་རེད། རེད། གནས་སྟངས་དེའི་ནང་ང་ཚོས་འགྱོད་པ་སྐྱེ་ངེས་རེད། ང་ཚོས་ “མ་འོངས་པར། ངས་སྔར་ལས་འབད་བརྩོན་ཆེ་བ་བྱེད་ཀྱི་ཡིན་” ཞེས་སླར་ཡང་ངེས་གཏན་བཟོ་རྒྱུ་གལ་ཆེན་པོ་ཡིན། འོན་ཀྱང་ང་ཚོས་གང་ཐུབ་ཐུབ་དེ་བྱས་མེད་པའི་ཚོར་བ་དེ་ཡང་ནས་ཡང་དུ་འབྱུང་བ་ལ་སྔོན་འགོག་བྱེད་ཐབས་བྱེད་པར། དེ་དག་གི་རྒྱུ་གང་དང་གང་ཡིན་པར་བརྟག་དཔྱད་བྱེད་དགོས། དེ་ནི་ང་རང་དཀའ་ལས་ཁ་དྲགས་ནས་ཡིན་སྲིད། དེ་ལའང་རང་གིས་རང་ལ་དྲང་པོ་བྱེད་དགོས་པ་ལས་གནོད་འཚེ་བྱ་རྒྱུ་མེད། ང་ཚོས་ངལ་གསོ་རྒྱག་པར་སོ་སོའི་དགོས་མཁོ་གང་ཡིན་པ་དང་། སོ་སོའི་བཅད་མཚམས་དེ་གང་ཡིན་ཤེས་དགོས་ཤིང་། སླར་ཡང་དེ་དག་ལ་གུས་ཞབས་བྱེད་དགོས། དེའི་ཐད་སྡུག་ཅག་བསམ་རྒྱུ་མེད། མི་ཚང་མར་སོ་སོའི་ཚད་བཀག་རེར་ཡོད། ཛ་དྲག་སྐབས་སུ་ང་ཚོས་ག་དུས་ཡིན་ནའང་མང་བ་བྱེད་ཐུབ་ཀྱང་། གནས་སྟངས་ཚང་མ་ཛ་དྲག་ཅིག་མིན། མཚམས་མཚམས་ང་ཚོས་ “ང་རང་ལ་ངལ་གསོ་ཞིག་དགོས་འདུག་” ཅེས་བརྗོད་དགོས་པ་ཙམ་རེད། དེ་ནས་གལ་ཏེ་བྱུང་ན་ངལ་གསོ་དེ་རྒྱག་ཐབས་བྱེད་དགོས། སྐབས་རེར་དེ་འདྲ་ཡོང་མི་སྲིད་པའང་ཡིན། འོན་ཀྱང་ཐུབ་པ་ཞིག་ཡིན་ན། ནག་ཉེས་མི་ཚོར་བའི་སྒོ་ནས་ངལ་གསོ་དེ་རྒྱག་དགོས།

གལ་ཏེ་ང་ཚོས་ཆེད་ལས་ཤིག་དང་མཉམ་དུ་ཁྱིམ་ཚང་སྐྱོང་རྒྱུའི་ཆ་སྙོམ་སྒྲིག་ཐབས་བྱེད་ཀྱི་ཡོད་ན། དེ་ནི་དུས་རྟག་ཏུ་ལས་སླ་པོ་མིན། ང་ཚོའི་ཕྲུ་གུ་ཚོར་དགོས་མཁོ་མང་དག་ཅིག་ཡོད། འོན་ཀྱང་སོ་སོའི་དུས་ཚོད་རེའུ་མིག་བཟོ་བཀོད་བྱ་རྒྱུ་དེ་གལ་ཆེ་ཤོས་སུ་འཛིན་དགོས། དེ་ལྟར་བྱས་ན། ལས་ཀ་འཕར་མ་བྱེད་པ་དང་ཧ་ཅང་ཡིད་ཐང་ཆད་པ་མི་ཡོང་ཞིང་། དེ་ནས་ངས་ལས་ཀ་ཡག་པོ་ཞིག་རྩ་ནས་བྱེད་ཀྱིན་མི་འདུག་བཅས་མཐར་རང་ཉིད་ནུས་མེད་དུ་གྱུར་བའི་དུས་མཚམས་སུ་མ་སླེབས་བར་དུ་དེ་ལྟར་མུ་མཐུད་ནས་འགྲོ་འཇུག་རྒྱུ་མེད། གང་ཡིན་ཞེ་ན། སོ་སོའི་དགོས་མཁོ་ལ་སྣང་མེད་གཏོང་བ་ནི་རང་གིས་རང་ལ་དངོས་གནས་འཚེ་བ་ཞིག་ཡིན། བྱས་ཙང་། རང་ཕྱོགས་སུ་འཚེ་བ་མེད་པ་དེ་ནི་ཧ་ཅང་གལ་ཆེན་པོ་ཡིན།

གཞན་ལ་རྐྱེན་ངན་སོགས་བྱུང་སྐབས་དགའ་བ་མི་བསྒོམ་པ།

འཚེ་བ་མེད་པའི་རིགས་གསུམ་པ་ནི། གཞན་དག་ལ་རྐྱེན་ངན་རིགས་བྱུང་སྐབས་སུ་དེ་ལ་དགའ་བ་མི་བསྒོམ་པར་གདུང་སེམས་མཉམ་བསྐྱེད་བྱ་རྒྱུ་དེ་རེད། ཕྱོགས་གཞན་ཞིག་ནས་གལ་ཏེ་ང་ཚོས་ཡ་ང་སྙིང་མེད་པའི་སེམས་ཀྱི་གནས་བབས་ཐོག་ནས་འཚེ་བ་ལ་བསམས་ན། གཞན་སྡུག་བསྔལ་གྱིས་མནར་བར་དགའ་བ་བསྒོམ་པ་དེ་གདུག་རྩུབ་ཅན་དུ་ཆ་འཇོག་བྱེད་པ་ཡིན། དེ་ནི་གཞན་གྱི་དཀའ་ངལ་ནང་རང་ཉིད་དགའ་བ་སྒོམ་པའི་ཡ་ང་སྙིང་རྗེ་མེད་པའི་སེམས་ཀྱི་གནས་བབས་ཤིག་ཡིན། ཡང་མིན་ན་མི་ཞིག་ལམ་ལྷོང་མ་བྱུང་བའི་སྐབས་དེ་ལྟར་བྱེད་པ་ནི་གདུག་རྩུབ་ཅན་གྱི་སེམས་དང་ལྡན་པ་ཡིན། ང་ཚོས་ “ངས་དངོས་གནས་བྱ་རྒྱུའི་ལས་འདི་མ་རེད་” ཅེས་བསམ་སྲིད། འོན་ཀྱང་ཁྱེད་ཀྱིས་ཆབ་སྲིད་དང་འབྲེལ་བའི་དཔེ་མཚོན་ལ་བསམ་བློ་བཏང་ན། འོས་མི་གཉིས་ཡོད་པའི་དབང་དུ་བཏང་ནས་ཁྱེད་རང་མི་དགའ་སའི་འོས་མི་དེའི་ལས་ཁུངས་ཤོར་བའམ། འོས་བསྡུ་ཤོར་བ། ཡང་ན་ཕྱིར་འབུད་གཏོང་བ་ཡིན་ན། ང་ཚོ་ཧ་ཅང་དགའ་གི་རེད། ང་ཚོས་མི་དེར་རྐྱེན་ངན་བྱུང་བར་དགའ་བ་སྒོམ་གྱི་རེད། རེད་དམ་མ་རེད། དེ་ག་ནང་བཞིན་གནས་སྟངས་འདི་འདྲའི་རིགས་ལ་ང་ཚོས་ཡག་ཤོས་དང་འོས་ཤིང་འཚམས་པ་ཡིན་བསམ་པའི་མི་དེ་འོས་ཤོག་ཐོབ་ན། ང་ཚོས་མི་དེའི་བདེ་སྐྱིད་ལ་དགའ་བ་སྒོམ་གྱི་ཡོད། འོན་ཀྱང་མི་གཞན་དེ་ཤོར་བར་ང་ཚོས་དགའ་བ་སྒོམ་དགོས་པའི་རྒྱུ་མཚན་ཅི་ཡང་མེད། གང་ཡིན་ཟེར་ན། ཁོང་ཚོར་ནང་མི་ཡོད་པ་ནི་ཤོད་མི་དགོས་པ་དང་། ཁོང་ཚོ་ལ་བརྟེན་ནས་ཡོད་པའི་མི་གཞན་དག་ཀྱང་ཡོད། ཁོང་ཚོས་སྡུག་བསྔལ་མྱོང་བཞིན་ཡོད། དེར་མ་ཟད། ཁོང་ཚོའང་འགྲོ་བ་མི་ཡིན་པ་རེད། ཁོང་ཚོར་འོས་མ་ཐོབ་པ་དེར་ང་རང་དགའ་ནའང་། ཁོང་ཚོའི་མི་ཚེའི་ནང་བདེ་སྐྱིད་འབྱུང་བའི་ཡིད་སྨོན་བྱེད་དགོས་པ་མ་གཏོགས་ན་བ་དང་སྡུག་ཅག་ཅིག་འབྱུང་བའི་ཡིད་སྨོན་བྱེད་མི་ཉན།

བྱས་ཙང་། ང་ཚོས་འཚེ་བ་མེད་པ་རིགས་གསུམ་གྱིས་བསམ་བློ་ངན་པའམ་སྙིང་རྗེ་དང་བྲལ་བའི་བསམ་བློ་གསུམ་ལ་ཁ་གཏད་བྱེད་ཀྱི་ཡོད། དེ་ཡང་།

  • སྙིང་རྗེ་མེད་པ། དེ་ནི་གཞན་སྡུག་བསྔལ་དང་འཕྲད་ན་བསམ་པ།
  • རང་གིས་རང་ལ་བརྩེ་བ་མེད་པ། བསམ་བཞིན་དུའམ་བསམ་བཞིན་དུ་མ་ཡིན་པར་རང་གིས་རང་ལ་གནོད་འཚེ་བྱེད་འདོད་བྱེད་པ།
  • གཞན་གྱི་རྐྱེན་ངན་ལ་དགའ་བ། གཞན་ལམ་ལྷོང་མ་བྱུང་བའམ་སྡུག་ཅག་རིགས་བྱུང་བའི་སྐབས་དགའ་བ་བསྒོམ་པ།

གོང་དུ་ཞུས་པ་ལྟར། འཚེ་བ་དང་དྲག་ཤུལ་མེད་པའི་སྒོ་ནས་བྱ་བ་བརྩམས་ནས་ང་ཚོས་ཡ་ང་སྙིང་རྗེ་མེད་པའི་བློ་དེ་དག་ཤུགས་ཆེ་རུ་གཏོང་གི་ཡོད། ནང་པའི་མདོ་ཞིག་གི་ནང་སྔ་རབས་ཀྱི་དཔེ་མཚོན་ཞིག་ཡོད་པ་ནི། སྒོམ་རྒྱག་མཁན་གཉིས་ཆུ་བོ་ཞིག་གི་འགྲམ་དུ་སྒོམ་རྒྱག་བཞིན་ཡོད་པ་དང་། མི་ཞིག་ཆུའི་འགྲམ་དུ་སླེབས། ཆུ་བོ་དེའི་རླབས་ནི་ཧ་ཅང་ཤུགས་ཆེན་པོ་ཡོད། མི་དེས་ཆུའི་ནང་མཆོངས་ཏེ་རྐྱལ་རྒྱག་ནས་ཆུའི་ཕ་རོལ་ཏུ་བརྒལ་ཐབས་བྱེད་ཀྱི་ཡོད། དེ་ནི་སུས་ཀྱང་རྐྱལ་རྒྱག་ནས་ཕ་རོལ་ཏུ་བརྒལ་མི་ཐུབ་པའི་ཆུ་བོ་ཞིག་ཡིན་པ་དང་། མི་སུ་ཞིག་གིས་རྐྱལ་རྒྱག་ཐབས་བྱས་ན་ཆུས་འཁྱེར་རྒྱུ་ངེས་པ་རེད། དེའི་ཚེ་ན་སྒོམ་རྒྱག་མཁན་གཅིག་གིས་ནི། རང་གི་གདོང་ལ་ཞི་བའི་རྣམ་འགྱུར་དང་བཅས་ཏེ་གང་ཡང་བྱེད་འདོད་མེད་པར། མི་དེ་མཆོང་ན་མཆོང་ཆུས་འཁྱེར་རྒྱུ་ཡིན་པ་ངེས་པ་རེད་ཅེས་བསམས་ནས་བསྡད་ཡོད། སྒོམ་རྒྱག་མཁན་གཞན་དེ་ཡར་ལངས་ནས་མི་དེ་ཆུའི་ནང་ཕྱིན་ན་ཉེན་ཁ་ཡོད་སྐོར་བརྗོད་ཀྱང་། ད་དུང་མི་དེས་མ་ཉན་པ་སོང་ཙང་། ཁོས་མི་དེ་ཉེན་ཁ་ལས་འགོག་ཕྱིར་མུར་འཛོག་གཞུས་ནས་དྲན་མེད་བརྒྱལ་བ་རེད། སངས་རྒྱས་ཀྱི་གནས་སྟངས་དེ་དག་གཟིགས་ནས་ ༼སངས་རྒྱས་དངོས་སུ་དེར་བྱོན་ནས་གཟིགས་པ་༽ ཁོང་གིས། གདོང་ལ་འཛུམ་མདངས་དང་བཅས་བསྡད་ནས་ཡོད་པའི་སྒོམ་རྒྱག་མཁན་དེས་འཚེ་བའི་ལས་བྱས་པ་དང་། རང་གིས་རང་ལ་གནོད་འཚེ་ལས་སྐྱོབས་ཕྱིར་མུར་འཛོག་གཞུས་པ་དེ་ནི་འཚེ་བ་མེད་པའི་ལས་ཡིན་ཞེས་གསུངས། དེ་གང་ཡིན་ཞེ་ན། དེ་ནི་ཀུན་སློང་དང་སེམས་ཀྱི་གནས་བབས་ལ་རག་ལུས་ཡོད། དེ་ཡང་རང་གིས་རང་ལ་སྡུག་བསྔལ་མི་འབྱུང་བ་དང་ཆུས་མི་འཁྱེར་བའི་ཆེད་དུ་མི་དེ་ལ་རོགས་བྱེད་འདོད་ཀྱི་ཀུན་སློང་དང་ལྡན་པའི་ཕྱིར།

ཆོས་ཕྱོགས་ཀྱི་རིན་ཐང་།

དེ་དག་ཐམས་ཅད་དེ་རིང་ཞོགས་པའི་བརྗོད་གཞིའི་ཚན་པ་གཉིས་པ་དང་འབྲེལ་བ་ཆགས་ཡོད། དེ་ནི་དེང་རབས་འཛམ་གླིང་ནང་ཆོས་ཕྱོགས་ཀྱི་རིན་ཐང་ཟེར་བ་དེ་རེད། ཨིན་སྐད་ནང་གི་ spiritual ཟེར་བའི་ཚིག་འདི་འགྲེལ་བརྗོད་བྱེད་དཀའ་མོ་ཞིག་ཡོད། ཚིག་འདི་ལ་ཐུན་མིན་གྱི་གོ་དོན་ཀྱང་འདྲ་མིན་ཡོད་པ་གསལ་པོ་རེད་ལ། དེ་ཡང་ཨིན་སྐད་དང་ཨུ་རུ་སུའི་སྐད་གཉིས་ཀའི་ནང་གོ་དོན་འདྲ་མིན་ཡོད་པ་ཐེ་ཚོམ་མེད། འོན་ཀྱང་སྐབས་འདིར་ང་ཚོས་ནང་པའི་གོ་དོན་ལྟར་བྱས་ནས་དེ་ཇི་ལྟར་འགྲེལ་ཡོད་པར་བལྟ་རྒྱུའམ། དེའི་སྐད་དོད་གང་ཡིན་པའི་ཐོག་ལ་བལྟ་རྒྱུ་ཡིན། ནང་ཆོས་ནང་ང་ཚོས་ཆོས་ཀྱི་སྐོར་ཤོད་ཀྱི་ཡོད། ཆོས་ཟེར་དུས་སྔོན་འགོག་གི་ཐབས་ལམ་ཞིག་ལ་ཟེར་གྱི་ཡོད། ཆོས་ནི་སྡུག་བསྔལ་དང་དཀའ་ངལ་སྤོང་ཕྱིར་ང་ཚོས་ཉམས་ལེན་བྱེད་ཀྱི་ཡོད། དེ་ནི་ཁྱེད་ཀྱིས་མོ་ཊ་གཏོང་བའམ་རྐང་འཁོར་གཏོང་བའི་སྐབས་གཞན་ལ་མི་བརྡུང་བའི་ཆེད་ལམ་ཕྱོགས་སྒྱུར་བ་ལྟ་བུ་གློ་བུར་གྱི་གནས་སྟངས་ཤིག་ལ་བསམ་བློ་གཏོང་བ་མ་ཡིན། དེ་ནི་ཆོས་ཆགས་ཀྱི་མེད།

ང་ཚོས་ཉིན་རེ་བཞིན་དུ་བྱེད་པའི་བྱ་གཞག་ཙམ་གྱི་སྐོར་ལ་སྐད་ཆ་ཤོད་ཀྱི་མེད། ང་ཚོས་དེ་ལ་སེམས་དོན་ནམ་ཆོས་ཞེས་ཟེར་ངེས་མ་རེད། དེ་ལས་ལྡོག་སྟེ། ང་ཚོས་མ་འོངས་པར་བྱ་བའི་སྔོན་འགོག་བྱེད་འདོད་ཀྱི་བསམ་བློ་གཏོང་བ་ཞིག་ཡིན། དེ་ཡང་ནང་ཆོས་ཚུད་པའི་ཆོས་ལུགས་མང་ཆེ་བའི་ནང་། འདི་ནི་མ་འོངས་ཚེ་རབས་མང་པོ་དང་འབྲེལ་ནས་བསམ་བློ་གཏོང་གི་ཡོད་པ་དང་། ཆོས་ལུགས་གཞན་ཁ་ཤས་ཀྱི་ནང་མི་ཚེ་རྗེས་མའི་ཐོག་བསམ་བློ་གཏོང་གི་ཡོད། དེའི་དོན་ནི་ཚེ་འདི་ཙམ་གྱི་འཇིག་རྟེན་གྱི་ཆོས་ལ་སེམས་འཁུར་བྱེད་པ་དེ་གཙོ་བོ་མ་ཡིན། རྒྱུ་མཚན་ནི་ང་ཚོ་ཤི་བའི་སྐབས་སུ་དེ་དག་ཐམས་ཅད་བཞག་ནས་འགྲོ་དགོས་ཤིང་། མ་འོངས་པའི་མི་ཚེའི་ནང་གི་དུས་ཚོད་དཔག་ཏུ་མེད་པ་དང་བསྡུར་ན། ཚེ་འདི་ནི་ཧ་ཅང་ཐུང་ཐུང་ཡིན་པས་སོ།།

གལ་ཏེ་ང་ཚོས་སྐྱེ་བ་ཕྱི་མའམ་མི་ཚེ་རྗེས་མར་ཡིད་ཆེས་བྱས་ན། གདན་དོན་འདི་ནི་ཏག་ཏག་འགྲིག་བསྡད་ཡོད། འོན་ཀྱང་ང་ཚོ་མང་པོ་ཞིག་གིས་དེ་ལྟར་ཡིད་ཆེས་མི་བྱེད་པ་ཡོད་སྲིད། བྱས་ཙང་། ང་ཚོ་ད་དུང་ཡང་ཆོས་ཕྱོགས་ཀྱི་མིའམ་ཆོས་པ་ཆགས་ཐུབ་བམ། ངའི་བསམ་པར། གལ་ཏེ་ང་ཚོས་ཚེ་འདིའི་ནང་རྒྱུ་དངོས་གསོག་སྒྲུབ་ཙམ་གྱི་དོན་དུ་བསམ་བློ་མི་གཏོང་བ་དང་། ང་རང་སྒེར་དང་ངའི་ནང་མིའི་དོན་དུ་མ་བསམ་པར། གལ་ཏེ་ང་ཚོས་དུས་ཚོད་དེ་ལས་མང་བ་མ་འོངས་པའི་མི་རབས་ལྟ་བུར་བསམ་བློ་བཏང་ན། ང་ཚོ་ཆོས་པ་ཆགས་ཐུབ་ངེས་རེད། ཕྱོགས་གཞན་ཞིག་ནས་ཐ་ན་ང་ཚོས་མཐུན་སྦྱོར་རོགས་རམ་ཆུང་ངུ་ཞིག་གམ་གང་འདྲ་ཞིག་བྱེད་ཐུབ་སྲིད་ནའང་། དེས་འཛམ་གླིང་འདི་གནས་བཟང་པོ་ཞིག་བཟོ་ཐབས་བྱེད་དགོས། འདིར་སངས་རྒྱས་ཀྱིས་དཔེ་ཞིག་གསུངས་ཡོད་པ་ནི། ཁུག་མ་ཆེན་པོ་ཞིག་འབྲས་རེ་རེས་ཡོངས་སུ་ཁེངས་ཡོད་པ་དང་། མི་འགའ་ཞིག་གིས་འབྲས་ཁུག་དེའི་ནང་འབྲས་སྦར་མོ་གང་བླུགས་ནས་མཐུན་རྐྱེན་སྦྱོར་ཐུབ་པ་དང་། ཡང་མི་འགའ་ཞིག་གིས་ནི་འབྲས་འབྲུ་གཅིག་ལས་འབུལ་མི་ཐུབ་སྲིད། འོན་ཀྱང་མི་དེ་གཉིས་ཀས་འབུལ་གྱི་ཡོད། དོན་གནད་ངོ་མ་དེ་རེད། ང་ཚོས་མང་པོ་དེ་ཙམ་འབུལ་མི་ཐུབ་པ་ཤེས་ནའང་མ་མཐར་ཡང་ཐབས་ཤེས་བྱེད་ཀྱི་ཡོད།

དེར་བརྟེན་ཁྱེད་རང་དགེ་རྒན་ནམ་སྨན་པའི་ལས་ཀར་སྦྱོང་བརྡར་བྱེད་ཀྱི་ཡོད་ན། འདི་ནི་འཛམ་གླིང་བཟང་པོ་ཞིག་སྐྲུན་པར་མཐུན་སྦྱོར་རོགས་རམ་བྱ་རྒྱུར་བསམ་བློ་གཏོང་བའི་གོ་སྐབས་བཟང་པོ་ཞིག་ཡིན་པ་གསལ་པོ་རེད། དགེ་རྒན་ཡིན་པའི་ཆ་ནས་མ་འོངས་པར་ཁོང་ཚོའི་ངོས་ནས་མཐུན་སྦྱོར་རོགས་ཕན་སྒྲུབ་རེ་ཡོད་པའི་མི་རྣམས་ལ་ང་ཚོས་སྦྱོང་བརྡར་སྤྲོད་བཞིན་ཡོད་པ་དང་། སྨན་པ་ཡིན་པའི་ཆ་ནས་ནད་པ་རྣམས་ནད་ལས་བཅོས་ཐབས་བྱས་ཏེ། མ་འོངས་པར་ཁོང་ཚོས་ཀྱང་མུ་མཐུད་དེ་མཐུན་སྦྱོར་རོགས་རམ་བྱེད་ཐུབ་པ་བཟོ་གི་ཡོད། བྱས་ཙང་། དེ་ནི་ཁོང་ཚོར་བདེ་བ་དང་ལྡན་ཞིང་སྡུག་བསྔལ་མི་འབྱུང་བར་འདོད་པ་དང་འབྲེལ་བ་ཆེན་པོ་ཡོད། དེ་འདྲ་སོང་ཙང་། ཁོང་ཚོའི་ཕྱོགས་སུ་འཚེ་བ་དང་གདུག་རྩུབ་ཅན་གྱི་བསམ་བློ་གང་ཡང་མེད་པར་ཁོང་ཚོར་གུས་ཞབས་བྱེད་དགོས། ང་ཚོས་ “ངས་མ་འོངས་པར་མཐུན་རྐྱེན་སྦྱོར་ཐུབ་” ཅེས་བསམ་པའི་སྒོ་ནས་རང་གིས་རང་ལ་གུས་ཞབས་བྱེད་དགོས་པ་དང་། “ཁོང་ཚོས་ཀྱང་མཐུན་རྐྱེན་སྦྱོར་ཐུབ་” ཅེས་བསམ་པའི་སྒོ་ནས་རང་གི་ནད་པ་དང་སློབ་ཕྲུག་རྣམས་ལའང་གུས་ཞབས་བྱེད་དགོས། འོ་ན་མཐུན་སྦྱོར་ཟེར་བའི་དོན་གང་རེད་དམ། འཛམ་གླིང་འདི་སྔར་ལས་བཟང་བའི་གནས་ཤིག་སྐྲུན་པ་ཞེས་པའི་དོན་གང་རེད་དམ། དེ་ནི་གཞི་རྩའི་ཆ་ནས་མི་རྣམས་ལ་བདེ་སྐྱིད་མང་བ་འབྱུང་བའི་ཐབས་འདྲ་པོ་ཞིག་ཁྱབ་སྤེལ་བྱེད་ཀྱི་ཡོད། བདེ་སྐྱིད་མང་བ་ཡོད་པ་ཞེས་པ་ནི་རྒྱུ་དངོས་ཡོད་མེད་ཀྱི་རིམ་པའི་ཐོག་ནས་བཤད་པ་ཙམ་མིན། དེ་གལ་ཆེན་པོ་ཡིན་ནའང་། ད་དུང་སེམས་ཀྱི་ཞི་བདེ་ཞིག་དགོས་ཀྱི་ཡོད། དེ་ཡང་ཐུན་མིན་གྱི་ཐབས་རྩལ་ཁོ་ན་སྤྱོད་ཐུབ་པ་ཙམ་མིན་པར། མི་ཚེའི་ནང་གང་འབྱུང་ནའང་གདོང་ལེན་བྱ་ཕྱིར་སེམས་ཚོར་གྱི་ཐབས་རྩལ་རྣམས་ཀྱང་བཀོལ་ཐུབ་པ་དགོས།

དེར་བརྟེན་དེ་དག་ནི་ངས་ཆོས་ཕྱོགས་ཀྱི་རིན་ཐང་ཁག་རེད་བསམ་གྱི་འདུག །ཕྱོགས་གཞན་ཞིག་ནས་བཤད་ན། ང་ཚོས་སོ་སོའི་མི་ཚེའི་ནང་གལ་ཆེན་པོ་དེ་གང་ལ་ཆ་འཇོག་བྱེད་པ་དང་། དེ་ཡང་ང་ཚོས་མི་ཚེའི་ནང་གང་བྱེད་བཞིན་པ་དང་འབྲེལ་ནས་ཡོད། མདོར་བསྡུས་ན། སྤྱིར་བཏང་མི་ཚང་མ་དང་དམིགས་བསལ་ཁྱེད་རང་ཚོ་ལྟ་བུ་ན་གཞོན་ཚོས་ཀུན་སློང་གི་ཐོག་ལ་དོ་གལ་ཆེན་པོའི་བསམ་བློ་གཏོང་རྒྱུ་དེ་ཧ་ཅང་གལ་ཆེན་པོ་རེད་བསམ་གྱི་འདུག །ངས་སློབ་སྦྱོང་བྱེད་དགོས་པའི་རྒྱུ་མཚན་དང་སློབ་སྦྱོང་གང་ཞིག་བྱེད་ཀྱིན་ཡོད་དམ། མི་ཚེའི་ནང་ང་རང་གྲུབ་འབྲས་གང་ཞིག་འཐོབ་འདོད་ཡོད་དམ། མ་འོངས་པར་ངའི་ནང་མིའི་ཆེད་དུ་གང་ཞིག་འཐོབ་འདོད་ཡོད་དམ། མ་འོངས་པའི་མི་རབས་ཀྱི་ཆེད་དུ་ངས་མཐར་ལག་རྗེས་གང་ཞིག་འཇོག་དགོས་སམ། ང་རང་དེ་ལྟར་འདོད་པའི་རྒྱུ་མཚན་གང་ཡིན་ནམ། དེ་དག་གི་ཐོག་ལ་ནང་གི་འཚོལ་ཞིབ་མང་དག་ཅིག་བྱེད་དགོས་ཐུག་སྲིད་ཀྱང་། དངོས་གནས་བྱ་འོས་པ་ཞིག་ཡིན། དྲི་བ་དེ་དག་གི་ལན་ང་ཚོར་འདོད་བློ་དེ་ཙམ་མི་ཁེངས་པ་ཞིག་ཡིན་སྲིད། ངའི་བསམ་པར། “ངས་ངའི་ཀུན་སློང་བཅོས་ཐབས་བྱེད་དགོས་སམ་མི་དགོས་” ཞེས་ཐག་གཅོད་བྱ་ཕྱིར་དཔྱད་མཚམས་ཤིག་བེད་སྤྱོད་བྱེད་དགོས་པ་དེ་ནི་ངས་གང་བྱེད་བཞིན་པ་དེས་རང་གཞན་གཉིས་ཀར་བདེ་སྐྱིད་སྐྲུན་གྱི་རེད་དམ་མ་རེད། ཡང་མིན་ན་དེས་སྡུག་བསྔལ་སྐྲུན་གྱི་རེད་དམ། དེ་ལྟར་དཔྱད་ཞིབ་བྱེད་པའི་སྐབས། ཕུགས་རྒྱང་རིང་པོའི་འབྲས་བུ་ནི་གནས་སྐབས་གློ་བུར་བའི་འབྲས་བུ་ལས་རྦད་དེ་གལ་ཆེ་བ་ཡིན། འོན་ཀྱང་གལ་ཏེ་ང་ཚོས་སོ་སོའི་མི་ཚེའི་ནང་གང་བྱེད་བཞིན་པ་དེ་གསལ་པོ་ཆགས་པ་དང་། མི་ཚེའི་ནང་ཁ་ཕྱོགས་བཟང་པོ་ཞིག་ཏུ་འགྲོ་བཞིན་ཡོད་པ་ཤེས་ན། དེས་ང་ཚོར་བདེ་ཐབས་དང་འདོད་བློ་ཁེངས་པའི་ཚོར་བ་ཧ་ཅང་ཡག་པོ་ཞིག་སྦྱིན་གྱི་ཡོད།

ངའི་བསམ་པར། སྐབས་རེར་མི་རྣམས་སེམས་ངལ་ཅན་བཟོ་བའི་རྐྱེན་གཅིག་ནི། ཁོང་ཚོས་སོ་སོའི་མི་ཚེ་ལ་དོན་སྙིང་མེད་པ་དང་ཁ་ཕྱོགས་མེད་པ་རྟོགས་ཀྱི་ཡོད། ང་ཚོས་ཆེད་ལས་ཤིག་ལ་རྗེས་སྙེག་བྱེད་ཀྱང་། ང་ཚོའི་སེམས་དམིགས་པ་དེའི་ཐོག་ལ་མེད། དེ་ནས་ང་ཚོས་འཛམ་གླིང་གི་དཀའ་ངལ་དང་། སོ་སོའི་རྒྱལ་ཁབ་ཀྱི་དཀའ་ངལ། སོ་སོའི་རྫོང་ཁག་དེའི་དཀའ་ངལ། སོ་སོའི་ནང་མིའི་དཀའ་ངལ། སོ་སོ་རང་ཉིད་ཀྱི་དཀའ་ངལ་སོགས་དེ་དག་ཐམས་ཅད་ཧ་ཅང་ཞེད་སྣང་ཚ་པོ་དང་མང་དྲགས་པ་ཚོར་གྱི་ཡོད། བྱས་ཙང་། དེ་དག་ཐམས་ཅད་ལ་དོན་སྙིང་གང་ཞིག་ཡོད་དམ། སེམས་ཀྱི་གནས་བབས་དེ་འདྲ་ཞིག་གི་ཐོག་ནས་མི་ཚེ་ཞིག་སྐྱེལ་བ་དེའི་དོན་སྙིང་གང་ཡོད་དམ། དེ་ནི་དངོས་གནས་སེམས་སྐྱོ་པོ་ཞིག་རེད། མི་ཚེ་ཧ་ཅང་བདེ་སྐྱིད་དང་ལྡན་པ་ཞིག་མིན། སླར་ཡང་ཡི་མུག་གི་ཚོར་བ་དེ་ལས་ཐར་ཕྱིར་རང་གིས་རང་ལ་གུས་ཞབས་དགོས། ང་ཚོས་ “ཕྱིའི་གནས་སྟངས་ཅི་འདྲ་ཞིག་ཡོད་མེད་ལ་མི་ལྟོས་པར། སོ་སོ་རང་ཉིད་ཡར་རྒྱས་བཏང་ནས་མི་བཟང་པོ་ཞིག་ཆགས་པའི་ནུས་པ་དེ་སོ་སོ་ལ་ཡོད་” ཅེས་ང་ཚོས་སླར་ཡང་ངེས་གཏན་བཟོ་དགོས། དེ་ནི་སོ་སོ་རང་ཉིད་བདེ་སྐྱིད་དང་ལྡན་པའི་མི་ཞིག་ཡོང་བ་ཁོ་ན་མ་ཡིན་པར། འདི་ངོས་ལེན་ཐོག་སོ་སོའི་སེམས་ཀྱི་གནས་བབས་ཡོངས་སུ་རྫོགས་པས་གཡས་གཡོན་གྱི་མི་ཚང་མར་ཤུགས་རྐྱེན་སྤྲོད་ཀྱི་རེད། བྱས་ཙང་། གཞན་ལ་སྨན་བཅོས་དང་སློབ་ཁྲིད་གང་རུང་གི་སྒོ་ནས་རོགས་བྱེད་པ་ནི་དོན་སྙིང་ལྡན་པའི་བྱ་བ་ཞིག་ཡིན། ང་ཚོས་མ་འོངས་པ་ཅི་འདྲ་ཞིག་འབྱུང་ཤེས་ཚོད་མི་ཐིག །འོན་ཀྱང་མི་རྣམས་འཕྲོད་བསྟེན་ཡག་པོ་དང་ཤེས་ཡོན་སློབ་སྦྱོང་ཅན་ཡིན་ན། དེར་རེ་བ་ཞིག་ཡོད་པ་རེད། རེ་བ་དེ་ཡང་གནས་སྟངས་ཇེ་བཟང་ནས་ཇེ་བཟང་འགྲོ་བའི་རེ་བ་དེ་ཡོད་པ་རེད། དེ་ལྟར་བསམ་བློའི་ནང་འཆར་ཁག་པོ་ཡོད་སྲིད། ཡིན་ནའང་གལ་ཏེ་མ་འོངས་པར་དཀའ་ངལ་མང་བ་བྱུང་ནའང་། ང་ཚོས་མི་རྣམས་ལ་དཀའ་ངལ་དེ་དག་ལ་གདོང་ལེན་བྱ་རྒྱུར་གྲ་སྒྲིག་ཡག་ག་ཡོང་བའི་རོགས་བྱེད་ཐུབ།

དེ་དག་ནི་དེང་དུས་འཛམ་གླིང་ནང་འཚེ་བ་མེད་པ་དང་ཆོས་ཕྱོགས་ཀྱི་རིན་ཐང་སྐོར་ཡོད་པའི་ངའི་བསམ་ཚུལ་ཁག་ཡིན།

བརྙན་པར། དགེ་སློང་མ་ཐུབ་བསྟན་ཆོས་སྒྲོན། “ནང་ཆོས་སྦྱོང་དགོས་པའི་རྒྱུ་མཚན་གང་ཡིན་ནམ།”

དྲི་བ་དྲིས་ལན།

ང་ཚོའི་དེང་དུས་ཀྱི་འཛམ་གླིང་ནང་། ནང་པའི་རིན་ཐང་གི་ཁྲོད་དུ་སྙིང་རྗེ་ཡོད་པ་ང་ཚོས་ཤེས་གསལ་རེད། འོན་ཀྱང་མི་ཚེ་དངོས་ཀྱི་ནང་གནས་སྟངས་ཧ་ཅང་ཁག་པོ་ཡིན་པ་དང་། སྐབས་རེར་ཕ་མའི་ལྟ་སྐྱོང་བྲལ་བའི་ཕྲུ་གུ་འཚར་ལོངས་བྱུང་བ་དང་དེ་དག་གང་ལ་གང་འཚམས་ཀྱི་དྲག་རྩུབ་ཅན་ཡོད། ང་ཚོར་མཚོན་ན། གལ་ཏེ་ང་ཚོ་དགེ་རྒན་ཡིན་ན། སྙིང་རྗེའི་དགོས་གལ་ཆེ་ཚུལ་དེ་ར་སྤྲོད་བྱ་རྒྱུ་ཧ་ཅང་དཀའ། དེ་ཡང་ཁོང་ཚོས་ནུས་སྟོབས་ཞན་པའི་མི་རྣམས་ལ་གནོད་མི་སྐྱེལ་བ་དང་རྩུབ་པོ་མི་བྱེད་པར་སྲུང་སྐྱོབ་ཇི་ལྟར་བྱེད་དགོས་མིན་ཤེས་དགོས། བྱས་ཙང་། ང་ཚོ་དགེ་རྒན་ཡིན་པའི་ཆ་ནས་བསླབ་བྱ་འདི་སློབ་ཕྲུག་ཚོར་ཇི་ལྟར་སྤྲོད་དགོས་སམ། ལྷག་པར་དུ་དྲག་ཤུལ་ཆེ་ཞིང་དཔལ་འབྱོར་དང་སྤྱི་ཚོགས་ཀྱི་གནས་བབས་ཧ་ཅང་དཀའ་ཚེགས་ཅན་གྱི་ནང་འཚར་ལོངས་བྱུང་བའི་སློབ་ཕྲུག་རྣམས་ལ་བསླབ་བྱ་འདི་ཇི་ལྟར་སྤྲོད་དགོས་སམ།

དེ་ལྟའི་སློབ་ཕྲུག་དྲག་པོ་དང་རྩུབ་པོ་རྣམས་ལ་ཕན་པའི་ཐབས་གཅིག་ནི། ཁོང་ཚོར་སྦྱིན་པ་གཏོང་བཅུག་ནས་གཏོང་ཕོད་ཅན་ཆགས་པར་བྱེད་དགོས། ཕྱོགས་གཞན་ཞིག་ནས་གལ་ཏེ་མི་ཞིག་ ༼དཔེར་ན། ཕྲུ་གུ་ཞིག་༽ ལ་མི་གཞན་ནམ་ཕྲུ་གུ་གཞན་དག་ལ་སྦྱིན་པའི་གོ་སྐབས་དེ་སྤྲད་པའམ། ཡང་ན་ཁོང་ཚོས་རྒྱུགས་ཤོག་གམ་ནང་ལས་མཐར་ཕྱིན་པའམ། གཏོང་ཕོད་ཀྱི་ལས་གང་ཞིག་བྱེད་ཀྱང་དེ་ནི་གཞན་དག་ལ་ཕན་ཕྱིར་བྱེད་ཀྱི་ཡོད། དེས་སློབ་ཕྲུག་དེ་ལ་རང་གིས་རང་ལ་རིན་ཐང་ཞིག་སྤྲོད་ཀྱི་ཡོད། ཕྱོགས་གཞན་ཞིག་ནས་སློབ་ཕྲུག་དེ་འཚར་ལོངས་ཀྱི་གནས་སྟངས་ཧ་ཅང་ཁག་པོ་ཞིག་ནས་ཡོང་བ་དང་བརྩེ་བ་བྲལ་བ་ཚོར་བའི་སྐབས། ཁོང་ཚོས་ནམ་རྒྱུན་ངོས་ལེན་མེད་པའི་ཚོར་བ་འདི་སྤྱོད་པ་རྩུབ་པོའི་སྒོ་ནས་བྱེད་ཀྱི་ཡོད། “རང་ཉིད་ལ་རྒྱབ་ལྗོངས་ཡག་པོ་ཞིག་མེད་པ་སོང་ཙང་། སྤྱིར་བཏང་ང་རང་མི་ཚེའི་ནང་ཡག་པོ་ཞིག་ཏུ་ཆ་འཇོག་མ་བྱས་ན། ངས་མི་ཚང་མར་རང་ཉིད་ཡག་པོ་མིན་ཚུལ་སྟོན་གྱི་རེད།” ཡང་ཁོང་ཚོ་སྤྱི་ཚོགས་དང་རྒྱབ་འགལ་ཅན་དང་སྤྱི་ཚོགས་ཀྱི་ཆ་ཤས་སུ་མིན་པར་ནག་ཉེས་ཀྱི་རིགས་བྱེད་པ་སོགས་ཡོང་གི་ཡོད། དེ་ནི་གང་འཚམས་ཀྱི་བདེན་པ་རེད། འོན་ཀྱང་ཁོང་ཚོ་མི་བཟང་པོ་ཡིན་ཞེས་སྟོན་ཕྱིར་གོ་སྐབས་ཤིག་སྤྲད་པ་དང་། ཁོང་ཚོར་སྦྱིན་རྒྱུ་ཞིག་ཡོད་པ་དེ་ཡང་སྦྱིན་སྟངས་ཡག་པོ་དང་ཕན་ནུས་ལྡན་པའི་ཐོག་ནས་བྱིན་མེད་ནའང་། མི་རུང་བ་དང་ངན་པ་ཙམ་མིན་པར་ཁོང་ཚོར་འབུལ་རྒྱུའི་བཟང་བའི་ཆ་ཞིག་ཀྱང་ཡོད་པར་ཚོར་འཇུག་གི་ཡོད།

ནང་པའི་ལྟ་ཚུལ་ལྟར་བྱས་ན། དེ་ནི་སྦྱིན་པ་ལ་བརྟེན་ནས་དགེ་བའི་ནུས་པའམ་བསོད་ནམས་གསོག་གི་ཡོད། འོན་ཀྱང་ང་ཚོས་འདི་ནང་པའི་འགྲེལ་བཤད་ཅིག་རྒྱག་མི་དགོས། ངའི་བསམ་པར། སེམས་ཁམས་ཀྱི་ཚོར་བའི་ནང་ངས་གང་འགྲེལ་བརྗོད་བྱས་པ་དེ་སྐབས་རེར་ཕན་ཐོགས་ལྡན་པ་ཡོང་གི་ཡོད།  ཡིན་ནའང་ཁོང་ཚོར་སྦྱིན་པའི་ནང་ཕན་བྱེད་དགེ་བ་ཞིག་བྱ་རྒྱུ་ཡོད་པས། ཁོང་ཚོར་འདི་ནི་ཉེས་ཆད་ཅིག་ཡིན་པའི་བསམ་ཚུལ་དེ་སྦྱིན་མི་ཉན་པ་གལ་ཆེ།

ང་ཚོའི་མི་ཚེའི་ནང་། ང་ཚོས་གཞན་ཞིག་སྒྲིག་བཅུན་པའམ་སྒྲིག་འོག་ཏུ་འཇུག་པ་ལ་ནམ་རྒྱུན་གདོང་ལེན་བྱེད་ཀྱི་ཡོད། འོན་ཀྱང་བསྐྱར་དུ་སྒྲིག་བཅུན་བྱེད་པའི་རྒྱུད་རིམ་ཞིག་ཀྱང་ཡོད། དེ་ནི་ང་ཚོས་མི་ཞིག་ཡང་བསྐྱར་སྒྲིག་བཅུན་བྱེད་ཐབས་བྱེད་པ་དེ་རེད། རྒྱུད་རིམ་དེའི་ནང་། སྤྱི་ཚོགས་ཞབས་ཞུ་ལྟ་བུའི་ལས་དོན་ནམ་ཡང་ན་ཉེས་ཆད་ལྟ་བུ་སྒྲིག་བཅུན་སའི་གང་ཟག་དེ་ལ་ཕན་ཐོགས་ཆེ་ཤོས་གང་རེད་དམ། ཡང་ན་མི་དེ་ལ་བཟང་སྤྱོད་ཀྱི་སློབ་གསོ་ཕན་ཆེ་ཤོས་གང་རེད་དམ། དཔེར་ན། བཙོན་ཁང་ནང་ཡོད་པའི་ནག་ཉེས་ཅན་གྱི་མི་རྣམས་དང་། བྱིས་པ་མིན་པའི་སྐབས་ང་ཚོས་སྒྲིག་འོག་ཏུ་འཇུག་འདོད་ཡོད་པའི་མི་རྣམས་ལྟ་བུ་རེད།

སྤྱི་ཡོངས་ཀྱི་ཆ་ནས་འདི་ལ་ལན་འདེབས་བྱ་རྒྱུ་ཁག་པོ་རེད། གང་ཡིན་ཞེ་ན། མི་ཚང་མ་སྒེར་སོ་སོ་རེད། ང་རང་སྒེར་གྱི་ངོས་ནས་བཙོན་ཁང་ནང་སློབ་ཁྲིད་བྱས་མྱོང་མེད་ཀྱང་། ངའི་ནང་པའི་ཆོས་གྲོགས་མང་པོ་ཞིག་བཙོན་ཁང་དུ་སློབ་ཁྲིད་བྱས་ཡོད། ཁོང་ཚོས་ཆ་རྒྱུས་བྱུང་བ་ཞིག་ནི། ཚང་མ་མ་རེད། ཡི་ནའང་བཙོན་པ་མང་ཆེ་བ་ཞིག་ལ་དུས་ཚོད་མང་པོ་འགོར་གྱི་ཡོད། གང་ཡིན་ཟེར་ན། ཁོང་ཚོར་སོ་སོའི་མི་ཚེ་ལ་བརྟག་དཔྱད་ཆེད་དུས་ཚོད་མང་པོ་ཡོད། དཔེར་ན། ཁོང་ཚོས་སོ་སོའི་མི་ཚེའི་ནང་གང་བྱས་དང་བྱེད་མུས་ཡིན་པ་དང་། ཁོང་ཚོར་མི་ཚེ་ལས་གང་དགོས་འདོད་བྱེད་དམ། བྱས་ཙང་། བཙོན་པ་མང་པོ་ཞིག་ནི་རང་གི་ཁོང་ཁྲོ་དང་། འཚེ་བའི་སྐུལ་ཤུགས་བཅས་ལ་གདོང་ལེན་བྱེད་ཐབས་སྦྱོང་འདོད་གང་འཚམས་ཡོད། དེ་ལ་བརྟེན་ནས་རང་སེམས་ཞི་བར་བྱེད་པའི་ནང་པའི་གཞི་རྩའི་སྒོམ་གྱི་རིགས་ལ་ཧ་ཅང་གོ་ཤེས་ལྡན་པ་ཡིན། དཔེ་ཆ་བཞག་ན། དབུགས་ལ་དམིགས་པ་གཏད་ནས་སྒོམ་རྒྱག་པ་ལྟ་བུ་རེད། དེ་འདྲ་སོང་ཙང་། མི་དེ་འདྲའི་རིགས་ནི་རོགས་རམ་འདིའི་རིགས་ལ་གོ་ཤེས་ཅན་ཡིན་པ་གསལ་པོ་རེད། མི་ཚང་མ་རོགས་པ་འཐོབ་པར་གོ་ཤེས་ལྡན་པ་མིན། གལ་ཏེ་ཁོང་ཚོ་གོ་ཤེས་ཅན་མིན་ན། ང་ཚོས་ཕལ་ཆེར་གང་ཡང་བྱེད་མི་ཐུབ་པ་འདྲ་པོ་རེད། ཁོང་ཚོས་རང་གི་མི་ཚེར་ཡར་རྒྱས་དང་འགྱུར་བ་གཏོང་འདོད་མེད་པའི་སྐབས། ལུས་ཀྱི་སྒོ་ནས་ཁོང་ཚོར་ཉེས་ཆད་འགེལ་བ་ཙམ་ནི་ཁོང་ཚོའི་རྒྱུད་ལ་སྡང་འཛིན་དང་ཁོང་ཁྲོ་ཇེ་མང་སྐྲུན་པ་ཙམ་ལས་གཞན་ཕན་ཐོགས་མེད།

སེམས་ཁམས་རིག་པའི་ནང་བཀོལ་སྤྱོད་བྱེད་པའི་སྦྱོང་བརྡར་གྱི་རིགས་འགའ་ཞིག་ཡོད་ནའང་། དེ་དག་སྐབས་འདིར་སྤྱོད་རུང་ཞིག་མིན་སྲིད་ཀྱང་། ཁྱེད་རང་ཚོར་བསམ་བློ་གཏོང་གཞི་ཞིག་མཁོ་སྤྲོད་བྱ་ཕྱིར། བྱིས་པ་ཞིག་ཡོད། དེ་ཡང་ནམ་རྒྱུན་བཅུ་ཐོག་ན་གཞོན་ཞིག་རེད། ན་གཞོན་དེ་རྦད་དེ་འདྲིས་དཀའ་ལ་ཕན་མེད་དྲག་རྩུབ་ཅན་ཞིག་ཡིན་པ་དང་མི་ཚོགས་དང་མཉམ་དུ་འགྲུལ་སྐྱོད་བྱེད་བཞིན་ཡོད། ཁོང་ཚོར་འགོ་ཁྲིད་ཅིག་ཡོད་པ་དང་མཉམ་དུ་བོང་བུ་ཞིག་ཀྱང་ཡོད། བོང་བུ་ནི་མཁྲེགས་བཟུང་ཨུ་ཚུགས་ཅན་གྱི་དུད་འགྲོ་ཞིག་ཡིན་པས། རང་གིས་གང་འདོད་པ་ལྟར་བྱེད་དུ་འཇུག་དཀའ་བ་ནི་ཤོད་ག་ལ་དགོས། ཁོང་ཚོ་ཚང་མ་བོང་བུ་དེར་འགན་འཁུར་དགོས་ཀྱི་ཡོད་པ་སོང་ཙང་། ཚང་མས་གདོང་ལེན་བྱེད་དགོས་ཤིང་། སོ་སོའི་བཟོད་སྒོམ་མེད་པ་དང་ཁོང་ཁྲོ་ལས་ཐར་ཐབས་སོགས་སྦྱངས་ནས་གང་ལྟར་ཡང་བོང་བུ་དེ་དང་མཉམ་དུ་བསྟུན་དགོས། དེ་ནི་བོང་བུ་མཉམ་དུ་འགྲུལ་བཞུད་བྱེད་པ་དང་བོང་བུ་ལ་བཟོད་སྒོམ་བྱེད་པ་བཅས་དགེ་བའི་ལས་ཤིག་བྱ་རྒྱུའི་འགན་འཁྲི་ཞིག་སྤྲོད་ཀྱི་ཡོད་པའི་དོན་ཡིན།

སྐབས་རེར་ཕྲུ་གུ་ཞིག་ལ་དུ་འགྲོ་ཞིག་གཅེས་སྐྱོང་བྱེད་དགོས་པའི་ལས་འགན་ཞིག་སྤྲད་ན། དུད་འགྲོ་དེས་ཁོང་ཚོར་སྐྱོན་བརྗོད་མི་བྱེད་ཀྱང་། མི་རྣམས་ཀྱིས་བྱེད་ཀྱི་ཡོད། དཔེར་ན། ཁྱི་ཞིག་ལ་མཚོན་ན། ཁྱི་དེ་ལ་ཁྱེད་ཀྱིས་ཇི་ཙམ་སྒྲིག་བསླབས་ཀྱང་ཁྱི་དེས་ད་དུང་ཁྱེད་ལ་དགའ་གི་ཡོད། བྱས་ཙང་། ཁོང་ཚོས་སེམས་ཅན་གཞན་ཞིག་ལ་གདོང་ལེན་བྱེད་བཅུག་ན། སྐབས་རེར་གཞན་ཞི་དུལ་བཟོ་བའི་ཤུགས་རྐྱེན་སོགས་འགན་འཁྲི་ཞིག་ལེན་གྱི་ཡོད། འོན་ཀྱང་མི་ཁས་ཧ་ཅང་དྲག་རྩུབ་ཅན་དེ་འདྲ་ཡོད། དེ་དག་ལ་ཁྱི་ཞིག་སྤྲད་པའི་དབང་དུ་བཏང་ན། ཁོང་ཚོས་ཁྱི་དེ་ལ་མནར་གཅོད་གཏོང་གི་ཡོད་པས་གཟབ་གཟབ་བྱེད་དགོས།

ང་རང་ལ་གྲོགས་པོ་ཞིག་ཡོད། ཁོང་ནི་སེམས་ནད་སྨན་པ་ཞིག་ཡིན་པ་དང་ཁོ་མོས་གཙོ་བོ་དྲག་རྩུབ་ཅན་དང་ནང་མེད་པའི་བཅུ་ཐོག་ན་གཞོན་རྣམས་ལ་གདོང་ལེན་ཐོག་སྲང་ལམ་ནང་བསྡད་ནས་དཀའ་ངལ་གྱི་རིགས་རྣམས་མྱོང་མཁན་ཞིག་རེད། ཁོ་མོས་བཀོལ་སྤྱོད་བྱེད་ཅིང་ཕྲན་ལ་གནང་བའི་ལམ་སྟོན་གཅིག་ནི། ང་ཚོས་གོང་དུ་ཞུས་པ་སྟེ། གདུག་རྩུབ་ཅན་གྱི་ཕྲུ་གུ་དེ་དག་ལ་ལྟ་ཕྱོགས་འཛིན་སྟངས་དེ་ནི་དོ་དབྱིངས་ལྡན་པ་དང་འགྲོ་བ་མི་ཞིག་ཡིན་པའི་གུས་ཞབས་དགོས་པ་དེ་རེད། ཁོང་ཚོར་དོ་གལ་གཙིགས་ཆེན་དུ་འཛིན་དགོས། ཁོང་ཚོས་གང་བཤད་པར་དངོས་སུ་ཉན་རྒྱུའི་དུས་ཚོད་ཟུར་འདོན་བྱེད་དགོས་པ་དང་ཁོང་ཚོའི་དཀའ་ངལ་གང་ཡིན་པ་ཤེས་དགོས། འོན་ཀྱང་ཁྱེད་ཀྱིས་ངེས་པར་དུ་སྤོང་དགོས་པའི་གནད་དོན་ཞིག་ནི། གལ་ཏེ་ཁྱེད་ཀྱིས་ཁོང་ཚོར་ཉན་གྱི་ཡོད་ན། དེ་ནས་ “ཨོ་ཧོ། ཁྱེད་རང་གི་དུས་ཚོད་རྫོགས་སོང་། ཁྱེད་རང་ད་འགྲོ་དགོས་” ཞེས་བརྗོད་རྒྱུ་མེད། དེ་ནི་ངོས་ལེན་མེད་པ་ཞིག་ཡིན་དུས་ཁོང་ཚོས་དེ་ལ་ཧ་ཅང་དྲག་རྩུབ་ཀྱི་སྒོ་ནས་ཡ་ལན་སྤྲོད་ཀྱི་རེད།

དེ་ལས་བསླབ་བྱ་གང་རག་ཐུབ་ཅེ་ན། གལ་ཏེ་ང་ཚོས་གདུབ་རྩུབ་ཅན་མ་འདུལ་བའི་སློབ་ཕྲུག་ཅིག་ལ་གདོང་ལེན་བྱེད་དགོས་ན། སློབ་ཕྲུག་དེ་ལ་ཁྱེད་ཀྱི་དུས་ཚོད་སྤྲོད་དགོས། སློབ་ཕྲུག་དེས་གང་བཤད་པར་ཉན་དགོས་ཤིང་། དེའི་དཀའ་ངལ་གང་ཡིན་ཤེས་ཐབས་བྱེད་དགོས། ༼ཐ་ན་ཁྱེད་ཀྱིས་དཀའ་ངལ་དེ་སེལ་ཐུབ་པ་ཞིག་བྱུང་མེད་ནའང་། ཁྱེད་ཀྱིས་སློབ་ཕྲུག་དེ་ལ་ཤ་ཚའི་སྒོ་ནས་ཉན་པ་ཙམ་གྱིས་ཕན་གྱི་ཡོད།༽ འོན་ཀྱང་དེ་ལ་དུས་ཚོད་ཚད་བཀག་ཅིག་བཟོ་མི་ཉན་ལ་འགྲོ་བ་མི་ཞིག་ལྟར་སློབ་ཕྲུག་དེ་ལ་གུས་ཞབས་བྱེད་དགོས།

དོན་ངོ་མར་ཁོང་ཚོར་སྒྲིག་བཅུན་པ་སོགས་བྱེད་པར་གང་བྱེད་དགོས་པ་ནི་ཧ་ཅང་ཤོད་དཀའ་བ་ཞིག་རེད། ཁྱེད་ཀྱི་སྤྱི་ཚོགས་ནང་ངོས་ལེན་བྱ་རུང་བ་གང་ཡིན་པ་དང་། ངོས་ལེན་བྱ་མི་རུང་བ་གང་ཡིན་ངས་ཤེས་ཀྱི་མེད། འོན་ཀྱང་དམིགས་བསལ་ཁོང་ཁྲོ་དང་བཅས་ཏེ་ཉེས་ཆད་འགེལ་རྒྱུ་དེས་ཕན་ཐོགས་ཀྱི་མ་རེད།

ང་ཚོའི་མི་གཞན་དང་ཉིན་རེའི་འབྲེལ་བའི་ནང་བསུན་གཙེར་བྱུང་བ་དེ་ལས་ཇི་ལྟར་ཐར་ཐུབ་བམ།

གལ་ཏེ་ང་ཚོས་ཡིད་ལ་མི་འཐད་པ་དང་བསུན་གཙེར་ཅན་དུ་ཚོར་བའི་གནས་སྟངས་གང་འདྲ་ཞིག་ལ་དཔྱད་ན། དེ་དག་ནི་སྤྱི་ཚོགས་ཀྱི་གནས་བབས་དང་། དཔལ་འབྱོར་གྱི་གནས་བབས། དེའི་ནང་ཚུད་པའི་མི་རྣམས་ཀྱི་ཁྱིམ་དུ་གང་འབྱུང་བཞིན་ཡོད་པ། ཁོང་ཚོའི་རྒྱབ་ལྗོངས་ཀྱི་ལོ་རྒྱུས་སོགས་རྒྱུ་དང་རྐྱེན་གནས་སྟངས་གཞན་མང་པོ་ལ་བརྟེན་ནས་འབྱུང་གི་ཡོད་པ་ཤེས་ཀྱི་རེད། ང་ཚོ་དེ་ལ་བསུན་གཙེར་སྐྱེས་པ་དང་ཁོང་ཁྲོ་ལངས་པའི་སྐབས། ང་ཚོའི་སེམས་ནང་གང་བསམ་བཞིན་པ་ནི་དེའི་བྱུང་རྐྱེན་བྱེད་ཀྱི་ཡོད་པའམ། ང་ཚོས་བསུན་གཙེར་ཅན་དུ་རྟོགས་པ་གང་ཡང་ཡིན་སྲིད་པ་དེ་དཀའ་ངལ་གྱི་གདོན་ཆེན་རྡོག་རྡོག་རང་ཚུགས་སུ་གྲུབ་པ་ཞེད་སྣང་ཚ་པོ་ཞིག་བཟོ་གི་ཡོད། དེ་གང་ལ་རག་ལུས་པའི་རྒྱུ་དང་རྐྱེན་ཚང་མ་བརླག་གཏོང་གི་ཡོད་པ་དང་། དངོས་གནས་གང་ཡིན་པ་ལས་ལྷག་པའི་སྐྱོན་གྱི་ཆ་ངན་པ་མང་པོ་རྟོག་པའི་འཆར་སྣང་དུ་སྐྲུན་གྱི་ཡོད། ང་ཚོས་དེ་འདྲ་ཞིག་ཆགས་པར་འདོད་ཀྱི་མེད་པ་སོང་ཙང་། ཁོང་ཁྲོ་ནི་ངོས་ལེན་མེད་པའི་སེམས་ཚོར་ཤུགས་ཆེན་ཞིག་ཆགས་ཀྱི་ཡོད།

གལ་ཏེ་ང་ཚོས་འདིའི་སྐོར་བསམ་བློ་གཏོང་བ་དང་། དེ་ནས་ངོས་ལེན་མེད་པ་སྟེ། དེའི་རྒྱབ་ཀྱི་ཐབས་ཚུལ་དེ་ནི། “ངས་སྡུག་བསྔལ་འདི་དང་དཀའ་ངལ་འདི་མེད་པ་གྱུར་ན་བསམ་པའི་ཡིད་སྨོན་བྱེད་ཀྱི་ཡོད་” ཅེས་པ་དེ་རེད། དེ་ནི་སྙིང་རྗེ་རེད། བྱས་ཙང་། ཁོང་ཁྲོ་དང་བསུན་གཙེར་གྱི་ཁ་གཏད་དམ་ཡང་ན་གཉེན་པོ་ནི་རྟག་ཏུ་བྱམས་པ་ཡིན། བྱམས་པ་ནི་གཞན་བདེ་བ་དང་བདེ་བའི་རྒྱུ་དང་ལྡན་པར་ཤོག་ཅེས་པའི་ཡིད་སྨོན་དེ་ཡིན།

ཁོང་ཚོས་བྱ་སྤྱོད་ངན་པ་སྤེལ་བའི་རྒྱུ་མཚན་ནི་རྐྱེན་དེ་དག་ཡིན་པ་དང་དེའི་ཕྱིར་ཁོང་ཚོ་སྐྱིད་པོ་མེད་པ་རེད། ཁོང་ཚོས་བྱ་སྤྱོད་ངན་པ་དང་བསུན་གཙེར་མཚམས་འཇོག་བྱེད་པའི་ཆེད་དུ་ཁོང་ཚོར་བདེ་བ་དང་ལྡན་པར་འདོད་ཀྱི་ཡོད། ཁོང་ཚོ་བདེ་བ་དང་ལྡན་པ་ལ་ངས་ཁོང་ཚོ་སྡུག་བསྔལ་འབྱུང་བ་དང་གདུག་རྩུབ་ཀྱི་སྒོ་ནས་བྱ་སྤྱོད་སྤེལ་བའི་རྒྱུ་ཚང་མ་ཤེས་དགོས་ཤིང་། དེ་ནས་ཁྱེད་ཀྱིས་འགྱུར་བ་གཏོང་ཐུབ་པ་གང་འདུག་ཅེས་བལྟ་དགོས།

དེ་དག་ནི་ང་ཚོས་བེད་སྤྱོད་བྱེད་པའི་ཐབས་ལམ་ཁ་ཤས་ཡིན། དེ་ནི་གཞི་རྩའི་ཆ་ནས་དཔྱད་པ་བྱེད་ཀྱི་ཡོད་པ་སྟེ། འདི་ནི་རྒྱུ་འདི་འདྲ་ཞིག་ལས་འབྱུང་གི་ཡོད་པ་དང་། རྒྱུ་དེ་དག་ལ་བརྟེན་ནས་བྱ་སྤྱོད་སྤེལ་རྒྱུ་དེ་མཚམས་འཇོག་བྱེད་འདོད་འདུག །བྱས་ཙང་། ཁོང་ཚོའི་སྤྱོད་ལམ་ལ་གང་གིས་ཤུགས་རྐྱེན་བྱེད་ཀྱིན་ཡོད་པ་དེ་འགྱུར་བ་གཏོང་བར་ངས་གང་བྱེད་ཐུབ་བམ།

དགེ་རྒན་ཡིན་པའི་ཆ་ནས། ང་ཚོས་སློབ་ཕྲུག་ཚོར་རིག་གཞུང་མི་འདྲ་བ་དང་། སྤྱི་ཚོགས་མི་འདྲ་བ། ཆོས་ལུགས་མི་འདྲ་བ་སོགས་རྒྱབ་ལྗོངས་སོ་སོ་མི་འདྲ་བའི་སྒོ་ནས་གདོང་ལེན་བྱེད་དགོས། སློབ་ཕྲུག་མི་འདྲ་བ་དེ་དག་ཐམས་ཅད་ལ་སྒྲིག་ལམ་དང་ཤེས་ཡོན་སློབ་ཕྱིར། བཟོད་སྒོམ་བྱེད་པ་ཙམ་གྱིས་འགྲིག་གི་ཡོད་དམ།

ངའི་བསམ་པར། ཆ་རྐྱེན་གལ་ཆེ་ཤོས་ཤིག་ནི་ཕྲུག་གུ་ཚོར་དོ་དབྱིངས་ཡོད་པ་དེ་རེད། དེ་ནི་ཕྲུ་གུ་དེ་དག་གི་ཆོས་ལུགས་དང་སྤྱི་ཚོགས་ཀྱི་རྒྱབ་ལྗོངས་གང་ཡིན་པ་ལ་གོམས་འདྲིས་ཆགས་དགོས་པའི་དོན་ཡིན། ཁྱེད་ཀྱི་སློབ་སྦྱོང་སྤྲོད་ཐབས་བྱེད་པའི་མི་རྣམས་ཇི་ཙམ་གྱིས་ཡག་པོ་རྟོགས་པ་དེ་ཚོད་ཀྱིས་ཁོང་ཚོར་དངོས་གནས་གང་དགོས་པ་དེ་རྟོགས་ཀྱི་རེད། ཤེས་ཡོན་གྱི་དམིགས་བྱ་དང་གནད་འགགས་ནི་ཡིག་རྒྱུགས་འཕྲོད་ཐུབ་པ་ཙམ་ཞིག་མིན་པར། ཁོང་ཚོ་མི་བཟང་པོ་ཞིག་ཆགས་རྒྱུ་དེ་རེད། བྱས་ཙང་། དེ་དག་གི་སྐོར་སྦྱོང་དགོས། ཁོང་ཚོར་རང་སོ་སོའི་སྐོར་དང་། ནང་མི་སྐོར། རྒྱབ་ལྗོངས་ལོ་རྒྱུས་སོགས་ཀྱི་སྐོར་ལ་རྩོམ་ཐུང་ངུ་དེ་འདྲ་འབྲི་བཅུག་ནའང་འགྲིག་པ་ཡིན། སློབ་ཕྲུག་ཁོ་རང་ཚོའི་ངོས་ནས་སོ་སོའི་སྐོར་ཤོད་ཐབས་བྱེད་འཇུག་དགོས། དེ་ལྟར་བྱས་ན། ཁྱེད་ཀྱིས་ཁོང་ཚོའི་སྐོར་ཏོག་ཙམ་ཡག་ག་ཧ་གོ་གི་རེད།

སོ་སོའི་བསམ་ཚུལ་བརྗོད་པར་འཚེར་སྣང་བྱེད་མཁན་དེ་འདྲ་ང་ལ་ནམ་རྒྱུན་ཐུག་གི་འདུག །ཡང་སྐབས་རེར་སོ་སོ་རང་ཉིད་ཀྱི་སྐོར་ཤོད་རྒྱུ་ངོ་ཚ་བྱེད་ཀྱི་འདུག །དེ་གང་ཡིན་ཞེ་ན། ཁོང་ཚོས་གང་བཤད་པ་དེ་ངོས་ལེན་བྱེད་ཀྱི་མ་རེད་བསམས་ནས་ཞེད་སྣང་བྱེད་ཀྱི་ཡོད། ངའི་དྲི་བ་ནི། མི་དེ་འདྲའི་བློ་ཆུང་ཆུང་དང་ཞེད་སྣང་ལས་ཐར་བར་རོགས་ཅི་ལྟར་བྱེད་དགོས་སམ།

དེ་ནི་དམིགས་བསལ་བཅུ་ཐོག་ན་གཞོན་གྱི་ནང་དཀའ་ངལ་ཆེན་པོ་ཞིག་རེད་བསམ་གྱི་འདུག །ཁོང་ཚོ་དངོས་གནས་རང་གི་གོ་བབ་འདྲ་མཉམ་ལ་ཁས་ལེན་དགོས་པའི་ཐད་ཧ་ཅང་སེམས་འཁུར་ཆེན་པོ་ཡོད། ནང་པའི་རབ་བྱུང་བའི་ཤེས་ཡོན་ནང་ལག་བསྟར་བྱེད་པའི་ཐབས་ལམ་གཅིག་ནི། སློབ་ཚན་གཅིག་གི་རྗེས་སུ་སློབ་ཕྲུག་ཚང་མ་ཆ་བགོས་ཏེ་ཟུང་སྦྲེལ་ཐོག་ཕན་ཚུན་གྲོས་བསྡུར་བྱེད་ཀྱི་ཡོད། ཁོང་ཚོའི་དབར་ལ་རྟགས་གསལ་གཏོང་གི་ཡོད། རྒྱུ་མཚན་རིག་པའི་རྩོད་གླེང་བྱེད་ཀྱི་ཡོད། འོན་ཀྱང་གོང་དུ་ཞུས་པའི་བརྗོད་གཞིའི་ཐོག་ལ་གྲོས་བསྡུར་བྱས་ནས་ཁོང་ཚོས་ཤེས་ཡོད་མེད་བལྟ་གི་ཡོད། བྱས་ཙང་། ཁོང་ཚོས་འཛིན་གྲྭ་ཡོངས་ཀྱི་མདུན་དུ་སྐད་ཆ་ཤོད་ཀྱི་མེད། དེ་འདྲའི་སྐབས་སློབ་ཕྲུག་འགའ་ཞིག་ནི་བསམ་ཤེས་མེད་པ་དང་ཁོང་ཚོར་གད་མོ་དགོད་པ་སོགས་བྱེད་སྲིད་པ་ཡིན། འོན་ཀྱང་སློབ་ཕྲུག་གཉིས་གཉིས་དབར་གྲོས་བསྡུར་བྱེད་སྐབས། གཅིག་གིས་ངེས་པར་དུ་སྐད་ཅ་ཤོད་དགོས་ཀྱི་ཡོད། དགེ་རྒན་ངོས་ནས་ཀྱང་སྐོར་ར་བསྐྱོན་ཏེ་སྡེ་ཚན་རེ་རེ་བཞིན་སྐར་མ་གཅིག་གཉིས་ཙམ་ཁོང་ཚོས་གང་བཤད་པར་ཉན་དགོས། དེས་ཁོང་ཚོས་དངོས་གནས་བརྗོད་གཞི་དེའི་སྐོར་གྲོས་བསྡུར་བྱེད་ཀྱི་ཡོད་མེད་དང་། འབྲེལ་མེད་གཞན་གྱི་སྐོར་ཤོད་ཀྱི་ཡོད་མེད་ངེས་བརྟན་བཟོ་དགོས། འདི་ནི་དགེ་རྒན་གྱི་ཐབས་ལམ་ཧ་ཅང་ཡག་པོ་ཞིག་ཡིན། གང་ཡིན་ཟེར་ན། དེས་སློབ་ཕྲུག་གཅིག་ལའང་དེ་གར་གྲུང་པོ་མེད་པའི་སྒོ་ནས་བསྡད་དེ་མི་ཉན་པ་དང་དོ་སྣང་མི་བྱེད་པ་སོགས་ཅི་གང་མི་ཤེས་པ་ཞིག་མི་ཡོང་བ་བཟོ་གི་ཡོད། ཁོང་ཚོས་གཅིག་ཤོད་དགོས་ལ་སློབ་ཕྲུག་གཞན་དེ་ལ་རང་ཉིད་ཀྱིས་དོ་སྣང་བྱས་པ་དང་ཡག་པོ་ཉན་ཡོད་པ་དེ་སྟོན་དགོས་ཀྱི་ཡོད། དེ་འདྲའི་སྐབས་ངོ་ཚ་བྱ་མི་ཉན། འོན་ཀྱང་ཁོང་ཚོས་གྲོས་བསྡུར་བྱེད་རོགས་དེ་རྟག་ཏུ་མི་གཅིག་པ་འདེམ་རྒྱུ་མེད་པའི་ཐོག་ལ་བལྟ་ཞིབ་བྱེད་དགོས། ཁོང་ཚོས་དེ་བརྗེ་པོ་རྒྱག་དགོས། དེ་ནི་དགོན་སྡེ་ཁག་གི་ཤེས་ཡོན་ལམ་ལུགས་ནང་ལག་བསྟར་བྱེད་པའི་ཐབས་ལམ་ཞིག་རེད། གཅིག་བྱས་ན་དེས་ཕན་ཐོགས་སྲིད་པ་རེད།།

Top