Як развіваць любоў

Усяленская любоў – пажаданне, каб іншыя былі шчаслівыя і валодалі прычынамі шчасця, – узнікае дзякуючы разуменню сваёй найцяснейшай узаемасувязі з усімі астатнімі істотамі [Гл.: Што такое любоў?]. Мы частка чалавецтва, і наш дабрабыт звязаны з дабрабытам усіх людзей у цэлым. Ніхто з нас не зможа пазбегнуць наступстваў эканамічнага крызісу або змянення клімату. Паколькі мы ўзаемазвязаны з усім чалавецтвам, цалкам дарэчы распаўсюдзіць клопат і любячую дабрыню на кожнага.

Развіццё любові да іншых натуральным чынам робіць розум спакойным. Гэта найвышэйшая крыніца жыццёвага поспеху. – 14-ы Далай-лама

Каб адчуць любоў, важна ўсвядоміць гэтую ўзаемасувязь. Усё, што вы ясьце, чым карыстаецеся і чым цешыцеся, прыходзіць да вас дзякуючы працы іншых. Падумайце пра тысячы людзей у самых розных кутках свету, якія зрабілі прыладу, на якой вы зараз чытаеце гэты тэкст. Гэта дапаможа адчуць сувязь з усімі істотамі і падзяку, і ў вас узнікне глыбокае перажыванне шчасця, якое ідзе знутры. Дзякуючы гэтаму вы натуральным чынам пачняце клапаціцца пра шчасце іншых. Гэтыя пачуцці – аснова ўсяленскай любові.

Кароткая медытацыя для развіцця любові

Спачатку важна развіць любячую дабрыню да сябе. Не жадаючы шчасця сабе, чаму мы будзем жадаць яго іншым? Выклічце глыбокае пачуццё:

• Як было б выдатна, калі б я быў шчаслівы і валодаў прычынамі шчасця.
• Я жадаю сабе шчасця.
• Няхай я змагу зрабіць сябе шчаслівым.

Калі вы зможаце шчыра пажадаць сабе шчасця, распаўсюджвайце гэтае пачуццё на іншых.

1. Распаўсюдзьце любоў на каханых, блізкіх і сяброў.

2. Далей – на ўсіх тых, каго сустракаеце рэгулярна і хто вам абыякавы.

3. Затым – на людзей, якія вам зусім не падабаюцца.

4. Нарэшце, на ўвесь свет і ўсіх істот у ім.

Так вы разаўеце любоў не толькі да сябе і сваіх блізкіх, але і да ўсіх істот.

Калі вы можаце што-небудзь зрабіць дзеля дабрабыту іншых, важна гэта рабіць. Калі гэта немагчыма, уяўляйце, што даяце іншым тое, што прывядзе іх да дабрабыту, прычым не толькі да кароткатэрміновага, але і да доўгатэрміновага. Гаворка ідзе не толькі пра матэрыяльную дапамогу, напрыклад, пра тое, каб даць ежу галодным і прытулак бяздомным. Многія багатыя і паспяховыя людзі таксама пакутуюць, і трэба ўключаць іх у свае пажаданні. Паступова пачуццё шчырай любові да сваёй сям'і, сяброў, да ўсіх, каго вы сустракаеце, будзе ўзнікаць натуральна, прыносячы шчасце і вам, і іншым.