འཁོར་བའི་སྡུག་བསྔལ་སྤོང་བ།

གལ་སྲིད་ང་ཚོ་འགྲོ་བ་མི་ཞིག་ཏུ་སྐྱེ་བ་བླངས་ན། ཚེ་རིང་པོ་ཡོད་པ་དང་། ལུས་སྟོབས་ཆེ་བ། གཞན་ལ་བཟང་ཕྱོགས་ཀྱི་ཤུགས་རྐྱེན་སྦྱིན་ཐུབ་པ། རང་ལ་རྒྱུ་ནོར་མང་བ་སོགས་ཀྱི་ཁྱད་ཆོས་ལྡན་པས་གཞན་དོན་སྒྲུབ་པའི་མཐུན་རྐྱེན་ཆ་ཚང་ཚང་ཡོད། དཔེར་ན། མིའི་སྐྱེ་བ་བླངས་ཀྱང་ཚེ་ཐུང་ཐུང་ཞིག་ལས་མེད་ན། ཐ་ན་ང་ཚོར་དམ་པའི་ཆོས་ཉམས་སུ་ལེན་རྒྱུར་དོ་དབྱིངས་ཧ་ཅང་ཆེན་པོ་ཡོད་ཅིང་རྩེ་གཅིག་ཏུ་སྒྲུབ་ཀྱང་། སོ་སོའི་དོན་གཉེར་གྱི་འབྲས་བུ་མཐོང་རྒྱུ་ཧ་ཅང་ཁག་པོ་རེད། གལ་སྲིད་ང་ཚོར་ན་ཚ་སྡུག་ཅག་གཅིག་ཕོག་ན། དེས་ཀྱང་ང་ཚོར་འགོག་རྐྱེན་ཆེན་པོ་བཟོ་གི་ཡོད་པ་དང་། རབ་ཏུ་བྱུང་ནས་གྲྭ་ཆས་གྱོན་མི་ཐུབ་པའང་བཟོ་གི་ཡོད། དེར་བརྟེན་འཕྲོད་བསྟེན་ཡག་པོ་དགོས་རྒྱུ་དེ་གལ་ཆེ་ཞིང་ཕན་ཐོགས་ཧ་ཅང་ཆེན་པོ་ཡོད།

དེར་མ་ཟད། གལ་སྲིད་ང་ཚོས་ཁྱིམ་ཚང་ཆེན་པོ་ཞིག་གི་ནང་སྐྱེས་པ་དང་དབང་ཤུགས་ཆེན་པོ་ཡོད་ན། རང་ཉིད་ཡར་རྒྱས་གཏོང་འགྱུར་མཐུན་རྐྱེན་བཟང་པོ་ཡོད་པ་ཙམ་མ་ཟད་གཞན་རྣམས་ཀྱང་རང་ལ་ཉན་འཇོག་བྱེད་འཇུག་ཐུབ་ཀྱི་ཡོད། ང་ཚོས་གཞན་རྣམས་ཆོས་ལ་འཇུག་པར་སྐུལ་སློང་ཡག་པོ་ཞིག་སྤེལ་ཐུབ། དེར་བརྟེན་ཅི་སྟེ་མིའི་སྐྱེ་བ་ཞིག་ལེན་འདོད་ན། དེའི་རྒྱུ་སྣ་ཚོགས་པ་རྣམས་གསོག་དགོས་ཀྱི་ཡོད། རྒྱུ་དེ་དག་ནང་སོ་སོའི་ཕ་མ་དང་། ཡོན་ཏན་ཅན། བཟང་པོ་སོགས་ལ་བསྙེན་བཀུར་གུས་བརྩི་བྱེད་རྒྱུའང་ཚུད་ཡོད།

དེའི་སྟེང་གལ་ཏེ་གཟུགས་མཛེས་པ་དང་ཡིད་དུ་འོང་བ་ཞིག་ཏུ་སྐྱེས་ན། གཞན་རྣམས་རང་བཞིན་གྱིས་ང་ཚོར་ཡིད་འཕྲོག་འགྲོ་གི་ཡོད། གཞན་རྣམས་ང་ཚོ་གང་དུ་ཡོད་པར་དེར་སླེབས་ནས་ང་ཚོས་གང་བཤད་པ་ལ་ཉན་འདོད་སྐྱེ་གི་ཡོད། དེ་ལྟར་ཡོང་བར་རྒྱུ་ནི། དཔེར་ན། བཟོད་པ་བསྟེན་ནས་གོམས་གཤིས་སུ་འཇགས་པ་བྱེད་དགོས་པ་ལས་ཁོང་ཁྲོ་རྩ་ནས་བཟའ་རྒྱུ་མེད། དེ་བཞིན་སངས་རྒྱས་ཀྱི་སྐུ་བརྙན་སོགས་ལ་ཟས་དང་། མེ་ཏོག །རྒྱན་ཆ། ན་བཟའ་སོགས་ཀྱི་མཆོད་པ་འབུལ་དགོས། དེ་ག་ནང་བཞིན་ང་ཚོས་དབུལ་པོ་དང་ནད་པ་རྣམས་ལ་ཟས་དང་གོས་སོགས་སྦྱིན་དགོས། དེ་ལྟར་བྱད་བཞིན་ལེགས་པའམ་གཟུགས་མཛེས་པའི་རྒྱུ་རྣམས་གསོག་དགོས།

གལ་སྲིད་ང་ཚོར་ཕྱི་ལུས་ཀྱི་སྟོབས་ཤུགས་ཆེ་བ་དང་ནང་སེམས་ཀྱི་སྟོབས་དང་ནུས་པ་ཆེན་པོ་ཡོད་ན། ང་ཚོས་རླབས་ཆེ་བའི་བྱ་གཞག་སྒྲུབ་ནུས་ཤིང་སོ་སོའི་ཉམས་ལེན་དང་འབད་བརྩོན་ཐམས་ཅད་ཀྱི་འབྲས་བུ་བཟང་པོ་རྣམས་དངོས་སུ་ལོངས་སྤྱོད་ཐུབ་པ་ཡོང་གི་ཡོད། དེའི་རྒྱུ་ནི་ལུས་སེམས་ཀྱི་སྤྱོད་པ་སྣ་ཚོགས་སྒྲུབ་དགོས། དེའང་གཞན་གྱིས་བྱེད་བསམ་པའི་ཡིད་ལ་འཁོར་མི་ཐུབ་པ་དང་དེ་དག་ཡོངས་སུ་རྫོགས་པ་སྒྲུབ་ཐུབ་མིན་བལྟ་དགོས།

ངག་གི་ཐོག་ནས་ཆ་འཇོག་འཕེར་བ་ཞིག་དགོས་རྒྱུ་གནད་ཆེ། དེ་ལྟར་ཡོད་ན་ང་ཚོས་གང་བཤད་པར་གཞན་གྱི་གཡོ་ཟོལ་མེད་པར་ཉན་འཇོག་བྱེད་ངེས་རེད། མིའམ་ལྷ་སོགས་སུ་འདྲ་ཞིག་ཡིན་རུང་ང་ཚོར་རྣ་བ་གཏོད་རྒྱུར་དགའ་པོ་བྱེད། གལ་སྲིད་ངག་གི་ཐོག་ནས་ཡིད་ཆེས་འཕེར་བ་ཞིག་ཡོད་ན། དེ་ལ་བརྟེན་ནས་ང་ཚོས་གཞན་ལ་རོགས་རམ་ཡག་པོ་བྱེད་ཐུབ། དེའི་རྒྱུ་ནི་ང་ཚོས་གང་བརྗོད་ནའང་དྲང་པོ་དགོས་པ་དེ་ཡིན། རྫུན་སྨྲ་མི་ཉན། ཚིག་རྩུབ་ཤོད་མི་རུང་། དེ་མིན་ངག་གི་མི་དགེ་བའི་ལས་གསོག་མི་རུང་། དཔེར་ན། མི་གཉིས་ཀྱིས་ཚིག་གཅིག་པ་དང་དོན་གཅིག་པའི་སྐད་ཆ་ཞིག་བཤད་ན། མི་རྣམས་ཀྱིས་གཅིག་ལ་ཉན་ཞིང་གཞན་དེ་ལ་ཉན་གྱི་མེད། དེའི་ཁྱད་པར་ནི་སྐྱེ་བ་སྔོན་མའམ་འདས་པའི་དུས་སུ་ལས་གང་བསགས་ཡོད་མེད་ལ་ཐུག་ཡོད། རྒྱུན་དུ་རྫུན་དང་སྐད་ཆ་སྟོང་པ། ངག་འཁྱལ་ཤ་སྟག་ཤོད་མཁན་དེར་མི་རྣམས་ཀྱིས་ཉན་འདོད་མི་བྱེད།

འདི་དག་ནི་རྒྱུའི་ལས་སོ་སོའི་ཐོག་ནས་འབྲས་བུ་བཟང་པོ་དེ་དག་འབྱུང་བའི་སྐོར་རེད། དེར་བརྟེན་ཁྱད་ཆོས་དེ་དག་ཚང་བའི་མི་ལུས་ཤིག་འཐོབ་རྒྱུར་ང་ཚོས་ད་ལྟ་ནས་རྒྱུ་བཟང་པོ་དེ་དག་གསོག་དགོས་ཀྱི་ཡོད། གང་ཡིན་ཞེ་ན། དཔེར་ན། གལ་སྲིད་ང་ཚོ་སྐྱེ་བ་ཕྱི་མ་ཁྲིམས་འགལ་ནག་ཉེས་ཅན་ནམ་ཡང་ན་མི་གདུག་པ་ཅན་ཤ་སྟག་ཡོད་པའི་ཁྱིམ་ཚང་ངམ་སྤྱི་ཚོགས་ཤིག་གི་ནང་སྐྱེས་ན། དམ་པའི་ཆོས་ཉམས་སུ་ལེན་རྒྱུའི་གེགས་བར་དེ་དག་ལས་ཟློག་རྒྱུ་ཧ་ཅང་ཁག་པོ་ཡིན། ཐ་ན་སོ་སོ་རང་ཉིད་ལ་ཁྱད་ཆོས་ཡག་པོ་ཚང་ཡོད་ཀྱང་གཞན་གྱི་རྐྱེན་ངན་པ་རྣམས་ཀྱིས་ཤུགས་རྐྱེན་མ་ཐེབས་པ་བྱེད་རྒྱུ་ཧ་ཅང་དཀའ། དེ་ལྟར་ཡོང་བར། “རང་ལ་ཕྱི་མ་དལ་འབྱོར་གྱི་མི་ལུས་བཟང་པོ་ཞིག་དང་མཐུན་རྐྱེན་འཛོམས་པའི་མི་ལུས་ཤིག་འཐོབ་པ་ཤོག །ཚེ་རབས་ནས་ཚེ་རབས་བརྒྱུད་དམ་པའི་ཆོས་ཉམས་ལེན་བྱེད་པར་བར་ཆད་མེད་པའི་གནས་ཤིག་ཏུ་སྐྱེ་བ་ཤོག །ངས་རྟག་ཏུ་གཞན་ལ་ཕན་འདོགས་ཐུབ་པར་ཤོག །ང་སྐྱེ་བ་ཕྱི་མ་གཞན་ལ་གནོད་འཚེ་བྱེད་མཁན་ཞིག་ཏུ་མི་སྐྱེ་བ་ཤོག” །ཅེས་ང་ཚོས་སྨོན་ལམ་ཡག་པོ་རྒྱག་དགོས། སྨོན་ལམ་དེ་དག་ནི་ཁྱད་ཆོས་དང་མཐུན་རྐྱེན་མཐའ་དག་ཚང་བའི་དལ་འབྱོར་གྱི་མི་ལུས་བཟང་པོ་ཞིག་འཐོབ་པའི་ཆེད་དུ་ཡིན།

དལ་བ་བརྒྱད་དང་འབྱོར་བ་བཅུ་སོགས་ཁྱད་ཆོས་ཚང་མ་ཚང་བའི་མི་ལུས་ཤིག་ཐོབ་པ་ཙམ་ལ་ང་ཚོས་ཡིད་ཚིམས་ནས་བསྡད་རྒྱུ་མེད། མི་ལུས་དེ་འདྲ་ཞིག་རྙེད་པ་ཙམ་ལ་ངོ་མཚར་ཆེ་རྒྱུ་མེད། གང་ཡིན་ཟེར་ན། ད་དུང་དབང་མེད་ཀྱིས་ཡང་ནས་ཡང་དུ་འབྱུང་བའི་སྡུག་བསྔལ་ཡོད། མདོར་ན། ང་ཚོས་ག་ཚོད་སྙིང་རྗེ་པོ་མཐོང་ཡང་། རྟག་ཏུ་དཀའ་ངལ་དང་སྡུག་བསྔལ་གྱི་རང་བཞིན་ཙམ་ལས་མ་འདས། ང་ཚོ་གང་དུ་སྐྱེ་འགྱུར་གྱི་འཁོར་བའི་ནང་དཀའ་ངལ་ཙམ་ལས་གཞན་ཅི་ཡང་མེད། “ང་ཚོ་རྒྱུ་ནོར་ཇི་ཙམ་ཡོད་པ་དང་། ངའི་མི་ཚེའི་ནང་ང་ལ་དངོས་པོ་ཡག་པོ་ཇི་ཙམ་ཡོད་ཀྱང་ད་དུང་ང་ལ་དཀའ་ངལ་སྣ་ཚོགས་འཕྲད་རྒྱུ་རེད།” ཅེས་ང་ཚོས་ཤེས་པ་བྱས་ཏེ་བསམ་བློ་གཏོང་དགོས། གལ་སྲིད་དཀའ་ངལ་དང་སྡུག་བསྔལ་འདྲ་མིན་ལ་ང་ཚོས་བསམ་བློ་ཡག་པོ་བཏང་ན། དེ་དག་ལས་ཐར་འདོད་ཀྱི་བློ་ཞིག་སྐྱེ་གི་རེད། དེ་ལྟར་འཁོར་བའི་སྡུག་བསྔལ་ལས་ཐར་འདོད་ཀྱི་བློ་སྐྱེ་བ་བཞིན་ང་ཚོས་སོ་སོའི་སྤྱོད་ཚུལ་ཡར་རྒྱས་གཏོང་ཐུབ། དཀའ་ངལ་དང་སྡུག་བསྔལ་དེ་དག་ལས་ཐར་འདོད་པའི་འདོད་པ་ཤུགས་དྲག་དེ་གཞི་ལ་བཞག་སྟེ། ང་ཚོས་ཐར་པ་མངོན་དུ་བྱ་ཕྱིར་འབད་བརྩོན་བྱེད་ངེས་ཡིན། དེ་ནི་ད་ལྟ་ང་ཚོར་ཐོབ་པའི་དལ་འབྱོར་མི་ལུས་ཀྱི་ཐོག་ནས་ང་ཚོས་སྒྲུབ་ཐུབ་པའི་བྱ་བ་ཞིག་ཡིན།

བརྗོད་བྱ་འདི་ནི་གཞམ་གསལ་གཞུང་འདིའི་ཚིག་བཅད་ནང་བཀྲལ་ཡོད་པ་ནི།

༥༽ སྤྱད་པས་མི་ངོམས་སྡུག་བསྔལ་ཀུན་གྱི་སྒོ།། ཡིད་བརྟན་མི་རུང་སྲིད་པའི་ཕུན་ཚོགས་ཀྱི།། ཉེས་དམིགས་རིག་ནས་ཐར་བའི་བདེ་བ་ལ།། དོན་གཉེར་ཆེན་པོ་སྐྱེ་བར་བྱིན་གྱིས་རློབས།། ཞེས་གསུངས་ཡོད།

དེ་ཡང་། ཚིག་རྐང་དང་པོའི་ནང་། “སྤྱད་པས་མི་ངོམས་སྡུག་བསྔལ་ཀུན་གྱི་སྒོ།” ཞེས་པ་དེས་ང་ཚོར་སྐྱེ་བ་གང་འདྲ་ཞིག་བླངས་ཀྱང་ཟློག་ཐབས་མེད་པར་མྱོང་དགོས་པའི་སྡུག་བསྔལ་གྱི་རིགས་དང་པོ་དེ་སྟོན་གྱི་ཡོད། ང་ཚོར་ཡིད་དུ་འོང་བའི་དངོས་པོ་དང་། རྒྱུ་ནོར། བདེ་བ་སོགས་ཇི་ཙམ་ཡོད་ཀྱང་འདོད་པ་ནམ་ཡང་ཁེངས་ཀྱི་མེད། དེ་ལས་ལྡོག་སྟེ། སྡུག་བསྔལ་ཤ་སྟག་ཡོང་གི་ཡོད། དེ་ནི་སྐོམ་པས་གདུང་བའི་གང་ཟག་ཅིག་གིས་ལན་ཚྭའི་ཆུ་འཐུང་བ་དང་འདྲ་པོ་ཡོད། ང་ཚོས་ལན་ཚྭའི་ཆུ་ཇི་ཙམ་བཏུང་ཀྱང་སྐོམ་པ་མི་སེལ་བར་སྐོམ་ཤས་ཆེ་རུ་འགྲོ་གི་ཡོད། དེ་ག་ནང་བཞིན་མི་ཞིག་ལ་ལོངས་སྤྱོད་མང་པོ་ཡོད་པ་དང་འདྲ། གང་ཡིན་ཟེར་ན། འཁོར་བའི་ནང་ལས་ཉོན་གྱིས་བཅིངས་ནས་ཡོད། ཁོང་ཚོར་ག་ཚོད་ཡོད་ཀྱང་འདོད་པ་ནམ་ཡང་ཚིམས་ཀྱི་མེད། ག་དུས་ཡིན་ཀྱང་མང་བ་དགོས་འདོད་བྱེད། མི་ཞིག་ལ་གོ་གནས་མཐོན་པོ་ཞིག་ཐོབ་སྐབས། མཐོན་པོ་ཡིན་པ་མ་ཚོར་བར། ད་དུང་དེ་ལས་མཐོ་བ་འཐོབ་ན་བསམ་གྱི་ཡོད། དེ་ནི་མི་ཚང་མས་འདོད་པའི་གནས་སྟངས་ཤིག་ཡིན། ང་ཚོར་རྒྱུ་ནོར་ཇི་ཙམ་མང་པོ་ཡོད་པ་དང་། དངོས་པོ་ཇི་ཙམ་ཞིག་གསོག་འཇོག་བྱས་མིན་ལ་མ་ལྟོས་པར། ད་དུང་མང་བ་དགོས་འདོད་བྱེད་ཀྱི་ཡོད། འོན་ཀྱང་མཐར་རྩ་ཆེར་འཛིན་པའི་དངོས་པོ་དེ་དག་ཚང་མ་འཇིག་རྒྱུ་ལས་མེད། རྒྱུ་ནོར་ཇི་ཙམ་བསགས་ཀྱང་མཐར་ཟད་པའམ་འཇིག་འགྲོ་གི་ཡོད།

ང་ཚོར་ག་ཚོད་མང་བ་ཡོད་པ་དེའི་ཚོད་ཀྱིས་དཀའ་ངལ་མང་བ་ཡོང་གི་ཡོད། དེའང་འདིར་ “སྡུག་བསྔལ་ཀུན་གྱི་སྒོ་” ཞེས་གསུངས་ཡོད། དཔེར་ན། ང་ཚོར་དབྱིན་སྒོར་ས་ཡ་གཅིག་ཡོད་ན། དེ་བརླག་དོགས་ཀྱི་སེམས་འཁྲལ་དང་གཞན་གྱིས་འཕྲོག་དོགས་ཀྱི་སེམས་འཁྲལ་སོགས་ཡོང་གི་ཡོད། དེས་ང་ཚོར་སེམས་འཁྲལ་མང་པོ་བཟོ་གི་ཡོད། དབྱིན་སྒོར་ལྔའམ་དྲུག་ཙམ་ལས་མེད་པའི་མི་འགའ་ཞིག་ཡོད་ཅིང་ཉིན་རེའི་ཟས་ཉོ་རྒྱུར་འདང་ཙམ་ཡོད་པ་རྣམས་ཅུང་ཟད་སེམས་ལྷོད་པོ་དང་སེམས་འཁྲལ་ཉུང་བ་ཡོང་གི་ཡོད། ཁོང་ཚོའི་སེམས་ལ་རང་དབང་ཡོད། དེ་ལས་ལྡོག་སྟེ། དངུལ་ཧ་ཅང་མང་པོ་ཡོད་པའི་མི་རྣམས་ཀྱིས་དངུལ་རྣམས་དམ་པོར་ཉར་ཏེ་སེར་སྣ་བྱས་ནས་ཐ་ན་སྒོར་ལྔ་དྲུག་ཙམ་ཡང་གཏོང་འདོད་བྱེད་ཀྱི་མེད། དེར་བརྟེན་ང་ཚོར་ཇི་ཙམ་མང་བ་ཡོད་པ་དེའི་ཚོད་ཀྱིས་དཀའ་ངལ་མང་བ་བྱུང་ནས། ཧ་ཅང་སེར་སྣ་ཚ་པོ་ཆགས་ཀྱི་ཡོད།

ང་ཚོར་གྲོགས་པོ་གྲོགས་མོ་དང་ངོ་ཤེས་པ་ག་ཚོད་མང་པོ་ཡོད་ཀྱང་འཛོམས་པའི་མཐའ་མ་སོ་སོར་བྲལ་དགོས་ཀྱི་ཡོད། འཛོམས་པའི་མཐའ་མ་བྲལ་དགོས་པ་དངོས་པོའི་གཤིས་ལུགས་ཡིན། ང་ཚོ་ག་ཚོད་མཐོ་པོ་ཡར་སླེབས་ཀྱང་མཐའ་མ་མར་འབབ་དགོས་ཀྱི་ཡོད། དཔེར་ན། ད་ལྟ་ང་ཚོ་ཡོད་སའི་མཁར་འདི་བཞེངས་མ་ཐག་ཧ་ཅང་མཛེས་སྡུག་ལྡན་པའི་ཁང་བཟང་ཞིག་ཡིན། ད་ཆ་དུས་ཚོད་ཀྱི་དབང་གིས་འདི་འདྲ་བའི་རྙིང་པ་དང་དེ་ཙམ་མཛེས་པོ་མེད་པ་ཞིག་ཏུ་གྱུར་བ་རེད། གཞུང་འདིའི་ནང་། “ཡིད་བརྟན་མི་རུང་” ཞེས་གསུངས་ཡོད་པ་ལྟར་རེད། འཁོར་བའི་ཆོས་རྣམས་ཇི་ཙམ་ཡིད་དུ་འོང་བར་སྣང་ཡང་། མཐའ་མ་དེ་ལ་དཀའ་ངལ་དང་སྡུག་བསྔལ་ཁོ་ན་ལས་མེད།

ང་ཚོ་འཁོར་བའི་ནང་སྐྱེ་བ་གང་བླངས་ཀྱང་སྡུག་བསྔལ་གྱི་རིགས་སྣ་ཚོགས་ཤིག་མྱོང་དགོས་ཀྱི་ཡོད། འདོད་པ་ནམ་ཡང་ཚིམ་མི་ཐུབ་པའི་དཀའ་ངལ་ལྟ་བུ་ཡོད་ཅིང་། དེ་སྔོན་ཚུད་ནས་བཤད་ཟིན། དེ་བཞིན་མི་ཚེའི་ངེས་བརྟན་ཅི་ཡང་མེད་པའི་དཀའ་ངལ་ཡང་ཡོད། སྐབས་ཤིག་ལ་མི་ཞིག་གི་མི་ཚེའི་ནང་རང་ཉིད་གོ་གནས་མཐོ་བའི་ལས་བྱེད་པ་ཞིག་ཆགས་སྲིད་པ་དང་། ཡང་མཐའ་མཇུག་ཏུ་བྱུས་ཉེས་བྱུང་སྟེ་ཧ་ཅང་སྐྱོ་པོ་ཆགས་པའང་ཡོང་གི་ཡོད། དེ་ནི་ང་ཚོས་མི་ཞིག་གི་མི་ཚེའི་ནང་མཐོང་རྒྱུ་ཡོད་པའི་ཆོས་ཤིག་ཆགས་ཡོད། དེ་ག་ནང་བཞིན་མི་ཞིག་གི་མི་ཚེའི་འགོ་སྟོད་དུ་གྲོགས་པོ་ཧ་ཅང་བཟང་པོ་ཞིག་ཡོད་ན། ཚེ་སྨད་དུ་དགྲ་བོར་འགྱུར་བའང་ཡོང་གི་ཡོད་པ་དང་། ཚེ་སྟོད་ལ་དགྲ་ཡིན་པ་དེ་ཚེ་སྨད་དུ་གྲོགས་པོར་འགྱུར་སྲིད་པ་ཡིན། དེར་བརྟེན་དགྲ་དང་གྲོགས་ཞེས་པའི་གནས་སྟངས་ཐད་ངེས་བརྟན་རྩ་བ་ནས་མེད། དེར་མ་ཟད། ང་ཚོར་ཅ་ལག་ཅིག་ལ་ཆགས་པའི་ཆགས་པ་ཤུགས་ཆེན་པོ་ཡོད་པའམ་ཅ་ལག་ཅིག་དགོས་འདོད་ཆེན་པོ་ཡོད་ན། རྟག་ཏུ་འདོད་པའི་ཅ་ལག་དེ་འཐོབ་རྒྱུར་འབད་བརྩོན་བྱས་ཀྱང་འདོད་དོན་ལྟར་མ་སྒྲུབ་པར། གང་མི་འདོད་པ་ཞིག་ཡོང་གི་ཡོད། མདོར་ན། མི་འདོད་པ་དེ་རྟག་ཏུ་ངང་ངམ་ཤུགས་ཀྱིས་རང་ཐོག་ཏུ་བབས་ཀྱི་ཡོད།

མི་དང་མིས་མྱོང་བའི་སྡུག་བསྔལ་ཙམ་གྱི་སྐོར་བཤད་ན། རྒ་བ་སོགས་ཀྱི་སྡུག་བསྔལ་ཚང་མ་ཡོད། ང་ཚོ་ལོ་ན་རྒ་བ་དང་རང་བཞིན་གྱིས་ཐབས་སྐྱོ་རུ་སྐྱོ་རུ་ཕྱིན་ནས་ན་བ་སོགས་ཡོང་གི་ཡོད། དེ་ནི་ང་ཚོའི་མིག་གིས་མཐོང་རྒྱུ་ཡོད་པའི་ཆོས་ཉིད་ཅིག་ཡིན། དེ་བཞིན་ན་བའི་དཀའ་ངལ་དང་སྡུག་བསྔལ་ཡོད། དེ་ཡང་ང་ཚོས་གཡས་གཡོན་གང་སར་མཐོང་རྒྱུ་ཡོད་པ་ཞིག་ཡིན། མི་མང་པོ་ཞིག་ནད་འདྲ་མིན་གྱིས་མནར་བཞིན་ཡོད། ང་ཚོ་རང་ཉིད་ན་བའི་སྐབས། ནད་ཀྱི་སྡུག་བསྔལ་ཚང་མ་མྱོང་གི་ཡོད། དེ་ག་ནང་བཞིན་གཞན་ལའང་གཅིག་པ་ཡིན།

ད་དུང་འཆི་བའི་ཚེ་ང་ཚོར་འཕྲད་བཞིན་པའི་སྡུག་བསྔལ་མི་བཟོད་པ་ཞིག་ཡོད། འཆི་བའི་སྐབས་ང་ཚོར་སྨན་དང་སྨན་པ་ཇི་ཙམ་ཚད་ལྡན་ཞིག་ཡོད་ཀྱང་སུ་གཅིག་གིས་ཀྱང་ང་ཚོར་རོགས་བྱེད་མི་ཐུབ། དེའི་སྐབས་ཀྱི་མི་བདེ་བ་དང་སྡུག་བསྔལ་རྣམས་ང་ཚོས་མྱོང་དགོས་པའི་སྡུག་བསྔལ་གྱི་ནང་ནས་སྡུག་ཤོས་དེ་ཡིན། གལ་སྲིད་སྐྱེ་བ་ཕྱི་མ་ཞེས་པ་མེད་ན། གནས་ཚུལ་ཐ་དད་རེད། འཆི་བ་དེ་མི་ཞིག་གི་མཐའ་མ་ཡིན་རྒྱུ་རེད། འོན་ཀྱང་གནད་དོན་དེ་འདྲ་མ་རེད། སྐྱེ་བ་ཕྱི་མ་ཡོད་པ་བདེན་པ་རེད། ཤི་བའི་རྗེས་ང་ཚོས་ལུས་རྟེན་གང་རུང་ཞིག་ཏུ་སྐྱེ་བ་ལེན་དགོས།

ང་ཚོ་སྐྱེ་བའི་སྔོན་འཆི་དགོས་པ་དང་། ཤི་མ་ཐག་བར་དོར་འགྲིམ་དགོས། ཅི་སྟེ་རང་གིས་མི་དགེ་བའི་ལས་སྟོབས་ཆེན་པོ་བསགས་ཡོད་ན། བར་དོའི་གནས་སྐབས་སུ་འཇིགས་སྣང་མི་བཟོད་པ་ཡོང་ཞིང་སྡུག་བསྔལ་མང་པོ་མྱོང་གི་ཡོད། ང་ཚོ་གསོན་པའི་སྐབས་དཀའ་ངལ་ཁྱད་གསོད་བྱས་ཏེ་རྒྱུ་ནོར་ཅ་ལག་ཇི་ཙམ་མང་པོ་བསགས་ཡོད་ཀྱང་། འཆི་བའི་ཚེ་དེ་དག་ཚང་མ་རྒྱབ་ཏུ་བསྐྱུར་ནས་སོ་སོ་གཅིག་པུ་འགྲོ་དགོས་ཀྱི་ཡོད། ང་ཚོས་གཅིག་ཀྱང་མཉམ་དུ་ཁྱེར་མི་ཐུབ། གྲོགས་པོ་དང་། རོགས་པ། སྤུན་མཆེད་སོགས་སུ་གཅིག་ཀྱང་ང་ཚོ་མཉམ་དུ་ཡོང་གི་ཐུབ། སོ་སོ་ཁྱེར་རྐྱང་དུ་བར་དོ་བརྒྱུད་དེ་འགྲོ་དགོས། གལ་སྲིད་སོ་སོའི་མི་ཚེའི་མི་དགེ་བའི་ལས་མང་པོ་བསགས་ཡོད་ཚེ། སྡུག་བསྔལ་མི་བཟོད་པ་མྱོང་དགོས། གནས་སྐབས་དེར་འཕྲད་པའི་སྡུག་བསྔལ་ནི་ཧ་ཅང་ཚབས་ཆེན་པོ་ཡོད།

བར་དོའི་སེམས་ཅན་ལ་མཚོན་ན། ལོ་ན་བརྒྱད་ལ་སོན་པའི་བྱིས་པ་ཞིག་གི་ལུས་ཀྱི་ཆེ་ཆུང་ཙམ་གྱི་མིའི་གཟུགས་ཚད་ཡོང་གི་ཡོད། བར་དོ་ནི་སྐྱེ་བའི་སྔོན་གྱི་གནས་སྐབས་དེ་ཡིན། གཞན་ཡང་ཤི་བའི་རྗེས་མ་སྐྱེས་གོང་བར་དོ་ཞིག་འགྲིམ་དགོས། དེར་བརྟེན་གལ་སྲིད་ང་ཚོ་མིའི་སྐྱེ་བ་ཡང་བསྐྱར་བླངས་ན། ཤི་བའི་རྗེས་ཀྱི་བར་དོའི་སྐབས། ཕྱི་མ་ལེན་རྒྱུའི་སྐྱེ་བའི་ལུས་རྟེན་དང་འདྲ་བའི་ལུས་ཤིག་ལེན་གྱི་ཡོད། གང་ཡིན་ཟེར་ན། བར་དོའི་ལུས་དང་སྐྱེ་འགྱུར་གྱི་ལུས་གཉིས་ཀྱི་འཕེན་བྱེད་ཀྱི་ལས་གཅིག་པ་ཡིན།

རྟེན་འབྲེལ་བཟང་པོའི་ཐོག་ནས་ངས་ཚེ་འདིར་འགྲོ་བ་མི་ཞིག་ཡིན་པའི་ཆ་ནས་དང་སྐྱེ་བ་ཕྱི་མ་ཡང་བསྐྱར་མི་ལུས་ལེན་པའི་ཆ་ནས་སྐད་ཆ་བཤད་ཡོད། འོན་ཀྱང་རྟག་ཏུ་དེ་ལྟར་མི་ཡོང་། ང་ཚོ་སྐྱེ་བ་གཅིག་ནས་གཞན་དུ་འཕོ་འགྱུར་འགྲོ་ངེས་པ་ཡིན། གལ་སྲིད་ཡང་བསྐྱར་མིའི་ལུས་རྟེན་འཐོབ་དགོས་ན། ཚེ་འདིའི་མཇུག་རྫོགས་ནས་བར་དོའི་ཕྱིས་སུ་མ་ཡི་མངལ་དུ་ཉིང་མཚམས་སྦྱོར་བ་བརྒྱུད་ནས་འགྲོ་དགོས། དེ་ནས་མ་ཡི་མངལ་དུ་ཆགས་ནས་དེར་མྱོང་བའི་སྡུག་བསྔལ་དང་དཀའ་ངལ་རྣམས་ཤིན་ཏུ་ཚབས་ཆེ། ང་ཚོར་གུ་དོག་པའི་མ་ཡི་མངལ་ནང་ཟླ་བ་དགུ་དང་ཉིན་བཅུ་སྡོད་དགོས་པ་ཡིན། གལ་སྲིད་ང་ཚོས་ད་ལྟ་རང་ཉིད་སྒོ་དང་སྒེའུ་ཁུང་གཅིག་ཀྱང་མེད་པའི་ཁང་ཆུང་ཞིག་གི་ནང་བཅུག་ཡོད་པར་བསམ་བློ་བཏང་ན། སྡུག་བསྔལ་ག་ཚོད་ཡོད་དམ། དེ་ལ་ང་ཚོས་རྩ་བ་ནས་དགའ་པོ་བྱེད་ཀྱི་མེད། དེ་ག་ནང་བཞིན་ང་ཚོས་བསམ་བློ་བཏང་ན། མ་ཡི་མངལ་ནས་དུས་ཡུན་དེ་ལྟར་བཅུག་སྟེ་སྡུག་བསྔལ་ཧ་ཅང་མང་པོ་མྱོང་གི་ཡོད།

དེ་རྗེས་སྐྱེས་མ་ཐག་པའི་བྱིས་པ་ཞིག་ལ་འཕྲད་པའི་དཀའ་ངལ་ལ་བསམ་བློ་བཏང་ན། བྱིས་པ་ཚོས་སྐད་ཆ་ཤོད་མི་ཐུབ་པ་དང་། གོམ་པ་རྒྱག་མི་ཐུབ་པ། སོ་སོའི་སྐྱག་གཅིན་ལའང་ཚོད་འཛིན་ཐུབ་ཀྱི་མེད། ཡང་སེ་སྐྱག་གཅིན་མཉམ་དུ་རྩེད་མོ་རྩེད་ནས་མི་གཙང་བ་བཟོས་ཏེ་དགའ་རྒྱུ་ཅི་ཡང་མེད། དེ་ནས་ཏོག་ཙམ་ཆེན་པོ་ཆགས་རྗེས། སློབ་གྲྭ་སོགས་བརྒྱུད་རིམ་ཆ་ཚང་ཞིག་འགྲིམ་དགོས། བརྒྱུད་རིམ་དེ་དག་གི་ཁྲོད་ཨ་ཅང་ཅང་དཀའ་ངལ་མང་པོ་ཡོད།

གནས་སྟངས་དེ་དག་དབང་མེད་ཀྱིས་ཡང་ནས་ཡང་དུ་འབྱུང་བའི་ཆོས་ཉིད་ཅིག་ཡིན། དེ་ལྟའི་བརྒྱུད་རིམ་དེ་ཡང་ནས་ཡང་དུ་འགྲིམ་དགོས་ཀྱི་ཡོད། དེ་ལ་འཁོར་བ་ཟེར། ཐ་ན་ང་ཚོ་སྐྱེ་བ་ཕྱི་མ་མིའི་སྐྱེ་བ་བླངས་ཀྱང་། བརྒྱུད་རིམ་དེ་དག་ཡང་ནས་ཡང་དུ་མྱོང་དགོས་ཀྱི་ཡོད། སྐབས་རེ་བྱ་བ་ཐམས་ཅད་བཀྲ་ཤིས་ལོ་ལེགས་ངང་སྒྲུབ་པ་དང་། སྐབས་རེ་བཀྲ་མི་ཤིས་པ་ཡོང་གི་ཡོད། དོན་དངོས་སུ་དུས་མང་ཆེ་བར་བྱ་བ་རྣམས་ཚགས་ཚུད་པོ་ཡག་པོ་ཡོང་གི་མེད། མདོར་ན། ང་ཚོའི་མི་ཚེ་ནི་སྡུག་བསྔལ་དང་དཀའ་ངལ་གྱིས་ཁེངས་ཡོད། གལ་སྲིད་ང་ཚོར་དངུལ་དང་། རྒྱུ་ནོར། གྲོགས་པོ། སྐད་གྲགས་སོགས་ཡོད་ནའང་། དེ་དག་ཉར་ཕྱོགས་དང་བེད་སྤྱོད་གཏོང་ཕྱོགས་དང་འབྲེལ་བའི་དཀའ་ངལ་མང་པོ་ཞིག་འཕྲད་ཀྱི་ཡོད། གལ་ཏེ་འདོད་པའི་དངོས་པོ་དེ་དག་མེད་ན། ཡང་ང་ཚོར་འཐོབ་འདོད་ཀྱི་བསམ་པ་དང་མི་འཐོབ་པའི་དཀའ་ངལ་དང་སྡུག་བསྔལ་འབྱུང་གི་ཡོད། མདོར་ན། ང་ཚོར་རྒྱུ་ཅ་ལག་ཡོད་ཀྱང་རུང་མེད་ཀྱང་རུང་། ཐམས་ཅད་མི་རིང་བར་བརླག་འགྲོ་རྒྱུ་ཡིན་པས། དེའི་ཚོད་ཀྱིས་ང་ཚོར་དཀའ་ངལ་དང་སྡུག་བསྔལ་འཕྲད་ཀྱི་ཡོད།

ད་ང་ཚོས་དོ་སྣང་བྱེད་ས་གཙོ་བོ་ནི། སྡུག་བསྔལ་དང་དཀའ་ངལ་དེ་དག་ཐམས་ཅད་ཀྱི་རྒྱུ་དང་རྩ་བ་གང་ཡིན་རྩད་གཅོད་བྱ་རྒྱུ་དེ་ཡིན། གལ་སྲིད་དཀའ་ངལ་དེ་དག་ལ་རྒྱུ་རྩ་བ་ནས་མེད་ན། དེ་དག་མེད་པ་བཟོ་ཐབས་མེད། འོན་ཀྱང་དོན་དངོས་སུ་དེ་དག་ལ་རྒྱུ་ཡོད། “ང་ཚོར་འཕྲད་པའི་དཀའ་ངལ་དེ་དག་གི་རྩ་བའམ་འབྱུང་ས་དེ་གང་ཡིན།” ཞེས་དྲིས་ན། ང་ཚོས་དེ་དག་ཚང་མ་དཀའ་ངལ་དང་སྡུག་བསྔལ་གྱི་རྒྱུ་ངོ་མ་དེ་ལས་བྱུང་། དེ་ཡང་རང་ཤུགས་ཀྱི་སྤྱོད་ལམ་མམ་ལས་དང་ཉོན་མོངས་ལས་བྱུང་། ང་ཚོའི་དཀའ་ངལ་གྱི་རྒྱུན་ཚང་མ་ཉོན་མོངས་པའི་དབང་དུ་སོང་བ་ལས་བྱུང་ཞིང་དེ་ལ་ལས་ཟེར། ང་ཚོའི་རྒྱུད་ལ་ཉོན་མོངས་སྣ་ཚོགས་ཡོད་པར་བརྟེན་ལས་ངན་པ་བྱས་ཏེ་རྒྱུ་དེ་གསོག་གི་ཡོད། ཉོན་མོངས་དེ་དག་གང་ལས་བྱུང་ངམ་ཞེ་ན། ཆོས་རྣམས་རང་བཞིན་གྱིས་གྲུབ་པར་འཛིན་པ་ལས་བྱུང་། དཔེར་ན། ཆོས་རྣམས་རང་བཞིན་གྱི་གྲུབ་པ་དང་། རྙེད་དུ་ཡོད་པ། བདེན་པར་གྲུབ་པ། རང་ངོས་ནས་གྲུབ་པར་སྣང་གི་ཡོད། དེ་ལྟ་བུའི་བདག་འཛིན་མ་རིག་པའི་དབང་གིས་བདེན་པར་གྲུབ་པར་འཛིན་པས་དེས་དཀའ་ངལ་ཐམས་ཅད་ཀྱི་རྩ་བ་བྱེད་ཀྱི་ཡོད། བདེན་པར་གྲུབ་པ་འཛིན་སྟབས་ཐམས་ཅད་ལོག་པར་སྣང་ནས་མ་འགྲིགས་པ་དང་སྡུག་བསྔལ་ཐམས་ཅད་ཀྱི་རྒྱུ་བྱེད་པ་ཡིན།

སངས་རྒྱས་ཉིད་ཀྱིས་ཆོས་ཀྱི་འཁོར་ལོ་རིམ་པ་གསུམ་བསྐོར་ནས་སྔོན་འགོག་གི་ཐབས་ལམ་གསུམ་བསྟན་ཡོད། དེ་ནི་ཅུང་ཡོངས་གྲགས་རེད། འཁོར་ལོ་རིམ་པ་དང་པོ་དེ་ནི་འཕགས་པའི་བདེན་པ་བཞིའི་ཆོས་ཀྱི་འཁོར་ལོ་བསྐོར་གནང་ཡོད། བདེན་པ་བཞི་པོ་འཕགས་པའི་ངོར་བདེན་པས་ན་བདེན་པ་ཡིན། དེ་ལས་དང་པོ་ནི་དཀའ་ངལ་དངོས་སམ་སྡུག་བསྔལ་བདེན་པ་དང་། གཉིས་པ་ནི་དཀའ་ངལ་དེ་དག་གི་འབྱུང་ཁུངས་ཏེ་ཀུན་འབྱུང་བདེན་པ་ཡིན། ཀུན་འབྱུང་བདེན་པའི་ནང་གཙོ་བོ་རང་ཤུགས་ཀྱི་སྤྱོད་ལམ་མམ་ལས་དང་ཉོན་མོངས་ཚུད་ཡོད། དེ་དག་ཀྱང་བདེན་འཛིན་ལས་བྱུང་།

དོན་དངོས་སུ་བདེན་པར་གྲུབ་པ་དང་། བཏགས་དོན་བཙལ་ནས་རྙེད་རྒྱུ་ཡོད་པ། རང་བཞིན་གྱིས་གྲུབ་པ། རང་དབང་དུ་གྲུབ་པའི་ཆོས་གཅིག་ཀྱང་མེད། ང་ཚོས་ཆོས་རྣམས་དེ་ལྟར་གྲུབ་པར་སྒྲོ་བཏགས་ཏེ། དོན་དངོས་སུ་མ་གྲུབ་པ་ཞིག་ང་ཚོར་སྣང་ངོར་དེ་ལྟར་གྲུབ་པར་སྣང་གི་ཡོད། དེ་ནི་ང་ཚོས་འདིར་རང་བཞིན་གྱིས་གྲུབ་པའི་སྐོར་ཤོད་པའི་སྐབས་དོན་ཡང་ཡིན། དེ་ནི་ལོག་ཤེས་ཡིན། གང་ཡིན་ཞེ་ན། འཛིན་པ་དེས་ཡིན་པ་མི་སྲིད་པའི་གྲུབ་ལུགས་ཤིག་ཡོད་པར་འཛིན་གྱི་ཡོད་ཅིང་ལོག་ཤེས་ཆགས་ཀྱི་ཡོད། དེ་དངོས་པོའི་གནས་ལུགས་དང་མི་མཐུན་ཞིང་དོན་དངོས་ལ་འབྲེལ་བ་རྩ་ནས་མེད། དེར་བརྟེན་གལ་སྲིད་ང་ཚོས་རང་བཞིན་གྱིས་གྲུབ་པ་མེད་པར་རྟོགས་པའི་བློ་ཞིག་རྒྱུད་ལ་སྐྱེད་ཐུབ་ན། དེ་ནི་རྨོངས་པ་མ་རིག་པ་དེའི་གཉེན་པོ་ཡིན་ཞིང་། དེའི་ཐོག་ནས་བདག་འཛིན་སོགས་སྤོང་ཐུབ་ཀྱི་ཡོད།

ཆོས་རྣམས་རང་བཞིན་མ་གྲུབ་པར་རྟོགས་པའི་བློ་དེས་རང་བཞིན་གྱིས་གྲུབ་པར་འཛིན་པའི་འཛིན་པར་ཇི་ལྟར་གནོད་དམ་ཞེ་ན། གལ་སྲིད་ང་ཚོས་ཆོས་རྣམས་བདེན་པར་གྲུབ་པ་མེད་པར་རྟོགས་པའི་བློ་ཞིག་རྒྱུད་ལ་སྐྱེད་ཐབས་བྱས་ཏེ་གོམས་འདྲིས་བསྟེན་ན། དེས་རང་འགུལ་ངང་བདེན་འཛིན་དང་འཛིན་སྟངས་འགལ་བའི་སྒོ་ནས་བདེན་འཛིན་མེད་པར་བཟོ་ཐུབ་ཀྱི་ཡོད། གང་ཡིན་ཟེར་ན། བདེན་པར་གྲུབ་པ་དང་བདེན་མེད་གཉིས་བློ་གཅིག་གི་ངོར་གཞི་མཐུན་མི་སྲིད་པའི་དངོས་འགལ་ཡིན་ཞིང་། བདེན་མེད་རིག་པས་གྲུབ་ན་བདེན་གྲུབ་རང་བཞིན་གྱིས་ཁེག་འགྲོ་གི་ཡོད། དེའི་ཐོག་ནས་ང་ཚོས་བདེན་པར་གྲུབ་པ་མེད་པར་རྟོགས་ན། ཉོན་མོངས་སོགས་མི་འབྱུང་།

བདེན་འཛིན་ལ་གཉེན་པོ་བསྟེན་པ་ནི། ང་ཚོས་ཤིང་སྡོང་ཞིག་གི་རྩ་བ་བཅད་ན། དེའི་ལོ་མ་དང་ཡན་ལག་རྣམས་རང་བཞིན་གྱིས་སྐམ་འགྲོ་བ་དང་མཚུངས། ང་ཚོས་ཆོས་རྣམས་བདེན་པར་གྲུབ་པ་འཛིན་པའི་བདེན་འཛིན་བཀག་ན། ཉོན་མོངས་བརྒྱད་ཁྲི་ཞི་སྟོང་ཐམས་ཅད་སྤོང་གི་ཡོད་ཅིང་། དེ་དག་ཚང་མ་བདེན་འཛིན་དེ་ལས་བྱུང་། གཞན་ཡང་ཉོན་མོངས་བརྒྱད་ཁྲི་བཞི་སྟོང་ཚང་མ་བདེན་འཛིན་དེ་ལས་བྱུང་སྟབས། ང་ཚོས་བདེན་པར་གྲུབ་པའི་ཆོས་མེད་པ་རྟོགས་སྐབས། སྡུག་བསྔལ་ཐམས་ཅད་ཀྱི་རྩ་བ་གཅོད་ཀྱི་ཡོད། བྱས་ཙང་། ཆོས་རྣམས་བདེན་མེད་དུ་རྟོགས་པའི་བློ་དེ་ནི་ཐར་པ་དངོས་ཀྱི་རྒྱུའམ་རྩ་བ་ཡིན། དེར་བརྟེན་བདེན་མེད་རྟོགས་པའི་བློ་དེ་རང་རྒྱུད་ལ་སྐྱེད་ཐབས་བྱེད་རྒྱུ་དེ་ཧ་ཅང་གནད་འགག་ཆེན་པོ་ཡིན། དེ་ལྟར་ཐུབ་ན། ང་ཚོའི་དཀའ་ངལ་དང་སྡུག་བསྔལ་ཐམས་ཅད་འབྱུང་བར་མི་འགྱུར་རོ།།

ང་ཚོའི་རྒྱུད་ཀྱི་དཀའ་ངལ་ཐམས་ཅད་མེད་པ་བཟོས་པའམ་སྡུག་བསྔལ་ཐམས་ཅད་སྤངས་པའི་སྤངས་པ་དེ་ལ་འགོག་བདེན་ཞེས་བྱ། ང་ཚོས་དཀའ་ངལ་ལམ་སྡུག་བསྔལ་རྣམས་མེད་པ་ཇི་ལྟར་བཟོས་སམ། འགོག་བདེན་ཇི་ལྟར་མངོན་དུ་བྱ་དགོས་སམ་ཞེ་ན། དེ་ནི་ཆོས་རྣམས་བདེན་མེད་དུ་རྟོགས་པའི་བློའམ་ལམ་ཏེ་ལམ་བདེན་ལ་བརྟེན་ནས་སྤོང་དགོས་ཀྱི་ཡོད། དེ་ལྟར་རྟོགས་པའི་བློ་དེ་ལམ་བདེན་དང་བདེན་བཞིའི་ནང་གི་བཞི་པ་དེ་ཡིན། དེར་བརྟེན་ཉོན་མོངས་ལས་བྱུང་བའི་སྡུག་བསྔལ་ཐམས་ཅད་སྤོང་བའི་གཉེན་པོ་ནི་ལམ་བདེན་ཡིན་ཞིང་། དེ་ལ་བརྟེན་ནས་ང་ཚོས་ཆོས་རྣམས་ཀྱི་གནས་ལུགས་མཐར་ཐུག་དེ་རྟོགས་ཐུབ། གཞན་ཡང་ཆོས་རབ་ཏུ་རྣམ་འབྱེད་ཀྱི་ཤེས་རབ་བམ་བདེན་པར་གྲུབ་པ་རྩ་བ་ནས་མེད་པར་རྟོགས་པའི་བློ་དེ་ཡིན། དེ་ནི་འགོག་བདེན་འཐོབ་བྱེད་ཀྱི་རྒྱུ་ལམ་གྱི་བདེན་པ་ཡིན། དེ་རྗེས་ཉོན་མོངས་རྣམས་ཡང་བསྐྱར་མི་འབྱུང་། སོང་ཙང་། ལམ་བདེན་དང་འགོག་བདེན་ནི་བདེན་བཞིའི་ནང་གི་ཕྱི་མ་གཉིས་ཏེ་རྒྱུ་འབྲས་ཚན་པ་གཅིག་ཡིན་ཞིང་། དང་པོ་དེ་རྒྱུ་དང་ཕྱི་མ་འབྲས་བུ་ཡིན།

འོན་ཏེ་ང་ཚོས་འགོག་བདེན་དེ་འབྲས་བུའི་རིགས་ཇི་འདྲ་ཡིན་མིན་བརྟག་པ་བྱེད་དགོས། དེ་ནི་བྲལ་བའི་འབྲས་བུ་ཞིག་ཡིན། བྲལ་འབྲས་དེ་འབྲས་བུའི་རིགས་ཤིག་ཡིན། འོན་ཀྱང་དེ་ནི་འགོག་བདེན་ཐོབ་པ་ལྟར། རྒྱུ་རྐྱེན་དུ་མ་ཚོགས་པ་ལ་བརྟེན་ནས་བྱུང་བའི་འབྲས་བུའི་རིགས་མ་ཡིན། འགོག་བདེན་ནི་རྟག་པའི་ངོ་བོར་གནས་པའི་འབྲས་བུ་བཏགས་པ་བ་ཞིག་ཡིན། བྲལ་འབྲས་ཤིག་ཏུ་དེ་ནི་རྒྱུ་དང་རྐྱེན་ལ་མ་བརྟེན་པ་ཞིག་ཡིན་ཞིང་། འགྱུར་བ་འགྲོ་གི་མེད།

དེར་བརྟེན་འགོག་བདེན་དང་ལམ་བདེན་གཉིས་ནི་བདེན་བཞིའི་ནང་ནས་རྣམ་བྱང་ཕྱོགས་ཀྱི་བདེན་པ་གཉིས་ཡིན། ང་ཚོས་ཉོན་མོངས་ཀྱི་ཕྱོགས་ལ་ལྟ་སྐབས་བདེན་པ་དང་པོ་གཉིས་ཡོང་གི་ཡོད། ཉོན་མོངས་ཕྱོགས་ཀྱི་བདེན་པའི་སྐབས་ཀུན་འབྱུང་བདེན་པ་དེ་རྒྱུ་དང་། སྡུག་བསྔལ་བདེན་པ་དེ་འབྲས་བུ་ཡིན།

ང་ཚོས་རྒྱུན་དུ་འདོན་བཞིན་པའི་རྟེན་འབྲེལ་སྙིང་པོ་ཞེས་པའི་གཟུངས་སྔགས་ཤིག་ཡོད་པ་ནི། ལེགས་སྦྱར་སྐད་དུ། ཨོཾ་ཡེ་དྷརྨཱ་ཧེཏུ་པྲབྷབཱ་ཧེཏུནྟེཥཱནྟཐཱགཏོ་ཧྱབདཏ། ཏེཥཱཉྩ་ཡོ་ནིརོདྷ་ཨེཝཾམཧཱ་ཤྲམཎཿ སྭཱཧཱ། ཞེས་པའི་དོན་ནི། ཨོཾ།  ཆོས་རྣམས་ཐམས་ཅད་རྒྱུ་ལས་བྱུང་། །དེ་རྒྱུ་དེ་བཞིན་གཤེགས་པས་གསུངས། །རྒྱུ་ལ་འགོག་པ་གང་ཡིན་པ། །དགེ་སྦྱོང་ཆེན་པོས་དེ་སྐད་གསུངས། །ཞེས་ༀ་ཞེས་པས་ཆོས་གང་ཡིན་ཀྱང་རྒྱུ་ལས་བྱུང་བར་སྟོན་པ་དང་། དེ་བཞིན་གཤེགས་པས་རྒྱུ་གསུངས་པ། དེ་དག་བཀག་པའི་འབྲས་བུ་འགོག་པའི་བདེན་པའང་དགེ་སྦྱོང་ཆེན་པོས་གསུངས་པར་བསྟན་ཡོད། བྱས་ཙང་། རྟེན་འབྲེལ་སྙིང་པོའི་གཟུངས་སྔགས་འདིས་བདེན་པ་བཞི་ནང་གི་རྒྱུ་འབྲས་ཀྱི་ཚན་པ་སྟོན་གྱི་ཡོད།

སངས་རྒྱས་ཀྱིས་སེམས་ཡོངས་སུ་སྦྱངས་པ་དང་མཐར་ཕྱིན་པའི་གོ་འཕང་སྟེ་སངས་རྒྱས་ཀྱི་གོ་འཕང་མངོན་དུ་མཛད། ཁོས་གིས་སངས་རྒྱས་ཀྱི་གོ་འཕང་མངོན་དུ་མཛད་པ་དང་། གང་གི་གདུལ་བྱ་རྣམས་སྡུག་བསྔལ་ལས་ཐར་བའི་ཐར་པ་འཐོབ་བྱེད་ཀྱི་ལམ་ཆ་ཚང་ལ་མ་ནོར་བ་ཞིག་བསྟན་ཡོད། དེ་ཡང་འཕགས་པའི་གཟིགས་ངོར་བདེན་པ་ཡིན་པའི་བདེན་དོན་བཞིའི་ཐོག་ནས་ཆོས་བསྟན། གལ་སྲིད་ང་ཚོས་བདེན་པ་བཞི་ལས་བརྩམས་པའི་ཆོས་དེ་ཚུལ་བཞིན་དུ་ཉམས་སུ་བླངས་ན། སངས་རྒྱས་དང་འདྲ་བའི་ཐར་པའི་གོ་འཕང་ཞིག་འཐོབ་སྲིད་པ་ཡིན།

ང་ཚོ་རང་གཞན་སེམས་ཅན་ཐམས་ཅད་ཀྱིས་སྡུག་བསྔལ་མི་འདོད་ཅིང་བདེ་བ་འདོད་པའི་གནས་ལུགས་དེ་ཚང་མས་ཤེས་རྟོགས་བྱུང་ཡོད། དེར་མ་ཟད། བདེ་བ་དེ་ཡང་གནས་སྐབས་ཙམ་མིན་པར་གཏན་གྱི་བདེ་བ་ཞིག་དོན་གཉེར་བྱེད་ཀྱི་ཡོད། དེ་འདྲ་བའི་བདེ་བ་ནི་སྡུག་བསྔལ་དང་དཀའ་ངལ་ཐམས་ཅད་རྒྱུ་དང་བཅས་པ་སྤངས་པའི་ཐར་པའི་ས་ཁོ་ན་ལ་ཡོད་པ་ཡིན། ང་ཚོས་འཁོར་བ་ལས་གྲོལ་པའི་ཐར་པ་དོན་གཉེར་བྱེད་པ་ཙམ་དུ་མ་ཟད། ཐར་པ་ནི་སྒྲུབ་ཐུབ་པ་ཞིག་ཡིན་པར་ཡིད་ཆེས་ཀྱང་བྱེད་ཀྱི་ཡོད། འོན་ཀྱང་སྡུག་བསྔལ་ལས་ཐར་པའི་ཐར་པ་དེ་རྒྱུ་མེད་རྐྱེན་མེད་ལས་བྱུང་གི་མེད་པར། རྒྱུ་ཞིག་ལ་བརྟེན་ནས་འབྱུང་གི་ཡོད། རྒྱུ་དེ་ཡང་ཆོས་རྣམས་བདེན་པར་གྲུབ་པ་མེད་པར་རྟོགས་པའི་ཆོས་རབ་ཏུ་རྣམ་འབྱེད་ཀྱི་ཤེས་རབ་དེ་ཡིན། ང་ཚོར་གོ་རྟོགས་དེ་ཙམ་རྙེད་རྗེས་དེ་ལ་བརྟེན་ནས་ཐར་པའི་རྒྱུ་ཆོས་རབ་ཏུ་རྣམ་འབྱེད་ཀྱི་ཤེས་རབ་དེ་གོང་འཕེལ་གཏོང་ཐུབ་ན། སོ་སོས་འདོད་པའི་གཏན་གྱི་བདེ་བ་སྟེ་སྡུག་བསྔལ་དང་དཀའ་ངལ་ཐམས་ཅད་ལས་ཐར་པའི་ཐར་པའི་གོ་འཕང་སྒྲུབ་ཐུབ་ཀྱི་ཡོད། གལ་སྲིད་ང་ཚོས་ཐར་པའི་གོ་འཕང་དེ་འདོད་ན། ངེས་པར་དུ་དོན་གཉེར་ཆེན་པོའི་སྒོ་ནས་འབད་བརྩོན་བྱེད་དགོས།

དེ་ལྟའི་དོན་གཉེར་ཆེན་པོ་དེ་ཇི་ལྟར་སྐྱེད་དགོས་ཞེས་དང་། ཐར་པའི་གོ་འཕང་དེ་ཇི་ལྟར་འཐོབ་བམ་ཞེ་ན། ཐོག་མར་ཆོས་རབ་ཏུ་རྣམ་འབྱེད་ཀྱི་ཤེས་རབ་གོང་འཕེལ་གཏོང་དགོས། དེ་ལ་སྐབས་རེར་ལྷག་པའི་བསླབ་པ་ཤེས་རབ་ཀྱི་བསླབ་པ་ཞེས་ཀྱང་ཟེར། དེའི་སྔོན་དུ་ང་ཚོས་ལྷག་པའི་བསླབ་པ་ཏིང་ངེ་འཛིན་གྱི་བསླབ་པ་དགོས། དེ་ཐོབ་པར་ལྷག་པའི་བསླབ་པ་ཚུལ་ཁྲིམས་ཀྱི་བསླབ་པ་སྦྱོང་དགོས། ཚུལ་ཁྲིམས་དང་ཏིང་ངེ་འཛིན་གྱི་བསླབ་པ་གཉིས་ཀྱིས་ཆོས་རབ་དུ་རྣམ་འབྱེད་ཀྱི་ཤེས་རབ་ཀྱི་རྨང་གཞི་བརྟན་པོ་ཞིག་བྱེད་ཀྱི་ཡོད། ལྷག་པའི་ཚུལ་ཁྲིམས་ཀྱི་བསླབ་པའི་ནང་སོ་སོར་ཐར་པའི་སྡོམ་པའི་སྡོམ་སེམས་སྣ་ཚོགས་ཤིག་སྲུང་དགོས་པ་སྟོན་གྱི་ཡོད།

༦༽ རྣམ་དག་བསམ་པ་དེ་ཡིས་དྲངས་པ་ཡི།། དྲན་དང་ཤེས་བཞིན་བག་ཡོད་ཆེན་པོ་ཡིས།། བསྟན་པའི་རྩ་བ་སོ་སོར་ཐར་བ་ལ།། སྒྲུབ་པ་སྙིང་བོར་བྱེད་པར་བྱིན་གྱིས་རློབས།། ཞེས་གསུངས་ཡོད།

སོ་ཐར་གྱི་སྡོམ་པར་རིགས་བརྒྱད་ཡོད་པ་ནི། ཁྱིམ་པའི་སྡོམ་པ་གསུམ་དང་རབ་བྱུང་གི་སྡོམ་པ་ལྔ་ཡོད། རབ་བྱུང་གི་སྡོམ་པ་ལྔ་ལས་དགེ་སློང་གི་སྡོམ་པ་ལ་སྲུང་བྱ་ཉིས་བརྒྱ་ལྔ་བཅུ་ང་གཉིས་ཡོད། གཞི་ཐམས་ཅད་ཡོད་པར་སྨྲ་བའི་ལུགས་ཀྱི་དགེ་སློང་མའི་སྡོམ་རྒྱུན་དེ་ད་ལྟའི་ཆར་བོད་ནང་བཞུགས་མེད། འོན་ཀྱང་དགེ་ཚུལ་ཕ་མ་གཉིས་ལ་སྲུང་བྱ་ཁག་གཉིས་གཉིས་ཡོད་པ་དང་། དགེ་སློབ་མ་ལ་སྲུང་བྱ་ཁག་ཅིག་ཡོད། དེ་བཞིན་དགེ་བསྙེན་ཕ་མ་གཉིས་ལའང་སྲུང་བྱ་ཁག་གཉིས་རེ་ཡོད་ཅིང་། བསྙེན་གནས་ལའང་ཡོད། དེར་བརྟེན་སོ་ཐར་གྱི་སྡོམ་པ་རིགས་བརྒྱད་ཡོད། དེ་དག་ལས་རང་གི་ནུས་པར་འཚམས་པའི་སྡོམ་པ་གང་ལེན་འདོད་ཀྱང་བླངས་ཟིན་པའི་རྗེས། ཁ་ཞེ་གཉིས་མེད་ཀྱིས་གཟབ་ནན་ཐོག་སྲུང་དགོས། ཐ་ན་སྲོག་ཀྱང་བློས་གཏོང་གིས་སྲུང་དགོས། ང་ཚོས་མི་དགེ་བ་བཅུ་སྤོང་གི་ཚུལ་ཁྲིམས་ཐེ་བའི་ཚུལ་ཁྲིམས་གང་འདྲ་ཞིག་སྲུང་བར་ཁས་ལེན་བྱས་ཀྱང་ངེས་པར་དུ་གཟབ་ནན་ཐོག་སྲུང་དགོས། ཚུལ་ཁྲིམས་ཡང་དག་པར་སྲུང་བ་ནི་སངས་རྒྱས་ཀྱི་གོ་འཕང་འཐོབ་བྱེད་ཀྱི་རྩ་བ་ཆགས་ཡོད། སྲུང་བྱ་དེ་དག་ལེགས་པར་སྲུང་ན་ཐ་ན་རང་རྒྱལ་དགྲ་བཅོམ་པའི་གོ་འཕང་འཐོབ་ཐུབ། དེར་བརྟེན་དེ་དག་ལ་སོ་ཐར་གྱི་སྡོམ་པ་ཞེས་བྱ་བ་ཡིན་ཞིང་། ལེགས་སྦྱར་གྱི་སྐད་དུ་པྲཏི་མོཀྴ་ཞེས་པའི་ཐ་སྙད་ཀྱི་དོན་ཡང་དེ་ཡིན།

གལ་སྲིད་ང་ཚོས་ཚུལ་ཁྲིམས་ཡག་པོ་མ་སྲུང་ན། མངོན་མཐོ་ལྷ་མིའི་གོ་འཕང་འཐོབ་པའི་ཐབས་གཞན་མེད། དཔེར་ན། ང་ཚོར་དངུལ་དང་རྒྱུ་དངོས་ཀྱིས་ཁེངས་པའི་ཁང་པ་ཞིག་ཡོད་ཅིང་། དེ་དག་ཉིན་རེ་བཞིན་དུ་མི་མང་སྟོང་ཕྲག་མང་པོར་བྱིན་ཏེ། སྦྱིན་པ་ཉམས་ལེན་བྱས་ཀྱང་། ཚུལ་ཁྲིམས་ཡག་པོ་མ་སྲུང་ན། སྦྱིན་པ་བཏང་བའི་འབྲས་བུར་སྐྱེ་བ་ཕྱི་མ་འབྱོར་བདག་ཅན་ཞིག་ཏུ་སྐྱེ་སྲིད་ཀྱང་། མི་ཕྱུག་པོ་ཞིག་ཏུ་སྐྱེ་བའི་ངེས་པ་མེད། དེ་ལས་ལྡོག་སྟེ། ངན་འགྲོའི་གནས་སུའང་སྐྱེ་སྲིད། དཔེར་ན། ཕྱེད་ཀ་མིའི་གཟུགས་དང་ཕྱེད་ཀ་དུད་འགྲོའི་གཟུགས་ཅན་གྱི་ཀླུ་ལྟ་བུའི་དུད་འགྲོ་འབྱོར་བ་དང་ལྡན་པར་སྐྱེ་སྲིད་པའམ། ཡང་ན་འབྱོར་བ་ཤིན་ཏུ་ཆེ་བའི་ཡི་དྭགས་སོགས་ལའང་སྐྱེ་སྲིད། ཡི་དྭགས་ཁ་ཅིག་དཔེར་ན། གསེར་ལས་གྲུབ་པའི་ཕོ་བྲང་ནང་སྡོད་ནའང་། སྐྱེ་བ་སྔོན་མ་སེར་སྣ་ཚ་པོ་བྱས་པའི་རྐྱེན་གྱིས་རང་གི་ལུས་ལས་ཤ་བཅད་དེ་དུམ་བུར་བཏང་ནས་བཟའ་དགོས་པ་ཁེལ་གྱི་ཡོད། གང་ཡིན་ཟེར་ན། ཁོང་ཚོར་ཟས་གཞན་གང་ཡང་རྙེད་ཀྱི་མེད། དེ་ལྟ་བུའི་གནས་སྟངས་ནི་སྐྱེ་བ་སྔོན་མ་སྦྱིན་པ་བཏང་ཡང་ཚུལ་ཁྲིམས་མ་སྲུང་བའི་ཉེས་དམིགས་རེད།

གལ་ཏེ་དེ་ལྟར་སྦྱིན་པ་བཏང་བ་དང་མཉམ་དུ་ཚུལ་ཁྲིམས་ལེགས་པ་སྲུང་ཡོད་ན། དེའི་འབྲས་བུར་སྐྱེ་བ་ཕྱི་མ་འབྱོར་བ་ཅན་གྱི་མི་ཞིག་ཏུ་སྐྱེ་ཐུབ། དེར་མ་ཟད། རང་ལ་ཡོད་པའི་རྒྱུ་ནོར་རྣམས་བེད་སྤྱོད་གང་འདོད་ལྟར་གཏོང་ཐུབ་ཅིང་གཞན་ལའང་སྦྱིན་ཏེ། སྔར་བས་ལྷག་པའི་ཡར་རྒྱས་ཡོང་ཆེད་མུ་མཐུད་དགེ་བའི་ནུས་པ་གོང་འཕེལ་གཏོང་ཐུབ། དེས་ན་སྦྱིན་པ་བཏང་བ་དང་ཚུལ་ཁྲིམས་སྲུང་པ་ལས་འབྲས་བུ་སྔར་བས་ལེགས་པ་མྱོང་ཐུབ། དེ་ལས་ལྡོག་སྟེ། སྦྱིན་པ་བཏང་ནས་ཚུལ་ཁྲིམས་མ་སྲུང་ན། དེའི་འབྲས་བུར་མིར་སྐྱེ་མི་ཐུབ་པར་ངན་འགྲོའི་གནས་གང་རུང་ནང་སྐྱེ་དགོས་པ་ཡིན། ངན་འགྲོའི་གནས་སུ་སྐྱེས་ན་སྡུག་བསྔལ་མི་བཟོད་པ་མྱོང་དགོས་པ་མ་ཟད་དེ་ལས་ཐར་བའི་སླད་དགེ་བའི་ནུས་པ་གསོག་མི་ཐུབ།

ཚུལ་ཁྲིམས་སྲུང་ནས་སངས་རྒྱས་ཀྱིས་གསུང་པ་རྣམས་ལ་དོ་ནན་པོས་ཞིབ་ཚགས་པོ་བྱས་ཏེ་སྦྱོང་བརྡར་མཐར་ཕྱིན་པ་བྱ་རྒྱུ་ནི་དམ་པའི་ཆོས་ཉམས་ལེན་བྱེད་སྟངས་ལེགས་ཤོས་དེ་ཡིན། ང་ཚོས་གང་གསུངས་པ་ཐམས་ཅད་ལག་བསྟར་མ་ཐུབ་ཀྱང་གང་ཐུབ་ཅི་ཐུབ་ཀྱིས་རྩ་བའི་ཚུལ་ཁྲིམས་རྣམས་སྲུང་ན། མ་འོངས་པའི་སངས་རྒྱས་རྣམ་འདྲེན་ལྔ་པ་རྗེ་བཙུན་བྱམས་པ་མགོན་པོའི་འཁོར་གྱི་སློབ་མ་ཞིག་ཏུ་སྐྱེ་བ་ལེན་ཐུབ། དེ་ནི་སངས་རྒྱས་ཀྱིས་བསྟན་པའི་དམིགས་བསལ་ཁྱད་ཆོས་ཤིག་ཡིན།

ཚུལ་ཁྲིམས་སྲུང་རྒྱུ་ནི་ནང་པའི་ཆོས་ཀྱི་སྙིང་པོའམ་གཙོ་བོ་དེ་ཡིན། ཐར་པ་འཐོབ་པ་ལ་ང་ཚོས་ཆོས་རབ་ཏུ་རྣམ་འབྱེད་ཀྱི་ལྷག་པའི་བསླབ་པ་ཤེས་རབ་ཀྱི་བསླབ་པ་རྒྱུད་ལ་སྐྱེ་དགོས། ཤེས་རབ་དེ་སྐྱེད་པ་ལ་ལྷག་པའི་བསླབ་པ་ཏིང་ངེ་འཛིན་གྱི་བསླབ་པ་སློབ་དགོས། ཏིང་ངེ་འཛིན་གྱི་བསླབ་པ་འཐོབ་པ་ལ་ལྷག་པའི་བསླབ་པ་ཚུལ་ཁྲིམས་ཀྱི་བསླབ་པ་ལེགས་པར་སྲུང་དགོས་ཀྱི་ཡོད། དེ་ནི་གོང་གི་ཤོ་ལོ་ཀ་དེའི་ནང་གོ་སྡུར་བྱས་ཡོད།

ད་ང་ཚོས་སྐྱེས་བུ་ཆུང་ངུའི་ལམ་གྱི་རིམ་པའི་ཐོག་ནས་ཡར་རྒྱས་ཞེ་དྲགས་བཏང་ཡོད། སྔོན་མ་ང་ཚོས་སྐྱེ་བ་རྗེས་མ་ཡག་པོ་ཡོང་བ་དང་མངོན་མཐོ་ལྷ་མིའི་གོ་འཕང་འཐོབ་ཆེད་འབད་བརྩོན་ཞེ་དྲགས་བསྟེན་ཡོད། འོན་ཀྱང་ད་ལྟ་ང་ཚོ་གང་དུ་སྐྱེས་ཀྱང་ཁྱད་པར་མི་འདུག །ཐམས་ཅད་དབང་མེད་ཀྱིས་ཡང་ནས་ཡང་དུ་འབྱུང་བའི་འཁོར་བའི་གནས་རེད་འདུག་བསམ་པའི་ངེས་ཤེས་ཤིག་རྙེད་ཡོད། དེའི་ཕྱིར་དཀའ་ངལ་དང་སྡུག་བསྔལ་ཐམས་ཅད་ལས་ཐར་བའི་བསམ་པ་ཤུགས་ཆེན་པོ་ཞིག་བསྐྱེད་ཅིང་། འཁོར་བའི་སྡུག་བསྔལ་ལས་ཐར་བའི་ཐར་པ་ཤིག་དོན་གཉེར་བྱེད་ཀྱི་ཡོད། དེ་ནི་སྐྱེས་བུ་འབྲིང་གི་བསམ་པ་ཡིན།

གལ་སྲིད་ང་ཚོས་འདིར་བསྟན་པའི་ལམ་རྣམས་རྒྱུད་ལ་སྐྱེ་ཐུབ་ན། དཀའ་ངལ་ཐམས་ཅད་ཀྱི་རྒྱུའམ་རྩ་བ་དེ་གཅོད་ཐུབ་པ་དང་། རིམ་པས་ཐར་པའི་གོ་འཕང་མངོན་དུ་བྱ་ཐུབ་པ་ཡོང་གི་ཡོད། མདོར་ན། ཅི་སྟེ་ང་ཚོས་འདིར་བསྟན་པའི་ཉམས་ལེན་ཚང་མར་ཚུལ་བཞིན་དུ་འཇུག་ན། རང་རང་གི་ཐར་པ་མངོན་དུ་བྱེད་ཐུབ། དེ་ནི་སྐྱེས་བུ་འབྲིང་གི་བསམ་པའི་ཚད་ཡིན།

འོན་ཏེ་སོ་སོའི་གཅིག་པུར་སྡུག་བསྔལ་ལས་ཐར་པའི་ཐར་པ་ཐོབ་པ་ཙམ་གྱིས་འགྲིག་གི་མེད། མ་གཞི་ཉོན་མོངས་སོགས་ཀྱི་མི་དགེ་བའི་བསམ་པ་དང་བྲལ་བའི་དགྲ་བཅོམ་པ་ཞིག་ཆགས་ཐུབ་ན་ཧ་ཅང་ཡག་པོ་རེད། ང་ཚོར་རྣམ་དཔྱོད་ཀྱི་ནུས་པ་དང་རྩལ་དམིགས་བསལ་ཅན་མངོན་ཤེས་ལྔ་སོགས་དང་ལྡན་པ་ཆགས་ནའང་། སོ་སོ་གཅིག་པུའི་ཆེད་ཐར་པ་དོན་གཉེར་བྱེད་པ་ཙམ་གྱིས་འགྲིག་ངེས་ཤིག་མིན། དཔེར་ན། མི་དཀྱུས་མ་རྣམས་སོ་སོར་གང་ཡོད་པ་དེས་འདོད་པ་མི་ཁེངས་པ་ལྟར། ཆོས་པ་ཞིག་གི་ངོས་ནས་སོ་སོ་གཅིག་པུའི་ཆེད་ཐར་པ་དོན་གཉེར་བྱས་ན་ཏག་ཏག་འགྲིགས་ཀྱི་མེད། དེ་ཙམ་གྱིས་མི་འགྲིགས།

འདིར་དཀའ་ངལ་ནི་སོ་སོ་གཅིག་པུ་ཐར་པ་ཐོབ་ན། དེས་སེམས་ཅན་ཐམས་ཅད་ཀྱི་འདོད་དོན་སྒྲུབ་ཐུབ་ཀྱི་མེད། དེར་བརྟེན་ང་ཚོས་གཞན་སེམས་ཅན་ཐམས་ཅད་ལ་ཕན་ཇི་ལྟར་འདོགས་ཐུབ་ཅེ་ན། སྐྱོན་ཐམས་ཅད་དང་བྲལ་ཞིང་ཡོན་ཏན་ཐམས་ཅད་དང་ལྡན་པའི་སངས་རྒྱས་ཀྱི་གོ་འཕང་འཐོབ་པར་བྱ་རྒྱུ་ནི་ཐབས་ལམ་གཅིག་པུ་དེ་ཡིན། དགྲ་བཅོམ་པ་ཙམ་ཆགས་པ་ཙམ་གྱིས་སེམས་ཅན་ཐམས་ཅད་ལ་ཕན་འདོགས་ཐུབ་ཀྱི་མེད། དགྲ་བཅོམ་པའི་གོ་འཕང་ཐོབ་ནའང་། གཞན་སེམས་ཅན་ཐམས་ཅད་ལ་ཕན་འདོགས་པའི་ནུས་པ་མེད།

དགྲ་བཅོམ་པ་ཞིག་ཆགས་ནའང་སེམས་ཅན་ཐམས་ཅད་ཀྱི་དོན་སྒྲུབ་མི་ཐུབ་པའི་རྒྱུ་མཚན་གང་ཡིན་ཟེར་ན། བདེན་པ་རེད། ང་ཚོར་དགྲ་བཅོམ་པའི་གོ་འཕང་ཐོབ་ན། ཉོན་མོངས་པའི་སྒྲིབ་པ་ཐམས་ཅད་སྤངས་ཏེ་དེའི་ཚོད་ཀྱི་ནུས་པ་ཐོབ་ཀྱི་ཡོད། འོན་ཀྱང་སྒྲིབ་པ་གཉིས་ཡོད་པ་ལས་དགྲ་བཅོམ་པས་གཅིག་མ་གཏོགས་སྤོང་ཐུབ་ཀྱི་མེད། དགྲ་བཅོམ་པས་སྒྲིབ་པ་གཉིས་པ་སྟེ་ཤེས་སྒྲིབ་སྤངས་མེད། དེར་བརྟེན་དེ་དག་ལ་རྣམ་མཁྱེན་འཐོབ་པ་ལ་བར་དུ་གཅོད་པའི་གེགས་ད་དུང་ཡོད་པ་དང་། མཐར་ཐུག་གི་འབྲས་བུ་མངོན་དུ་བྱ་ཐུབ་མེད། ཅི་སྟེ་ང་ཚོས་རང་གིས་འབད་བརྩོན་བྱས་ཏེ་མཐར་ཐུག་གི་གོ་འཕང་དེ་སྒྲུབ་ཐུབ་མེད་ན། གཞན་སེམས་ཅན་རྣམས་ལ་དེ་སྒྲུབ་ཕྱིར་རོགས་ཇི་ལྟར་བྱེད་ཐུབ། སོ་སོ་རང་གི་འདོད་དོན་སྒྲུབ་ཐུབ་མེད་ན། གཞན་གྱི་འདོད་དོན་ཇི་ལྟར་སྒྲུབ། ང་ཚོར་འཁོར་བ་ལས་ཐར་པའི་དགྲ་བཅོམ་པའི་གོ་འཕང་ཐོབ་ཡོད་ཀྱང་། ད་དུང་རྟོགས་པ་མཐར་ཕྱིན་པའི་སངས་རྒྱས་ཀྱི་གོ་འཕང་འཐོབ་ཐུབ་མེད།

སངས་རྒྱས་ཀྱི་གོ་འཕང་མངོན་དུ་བྱ་དགོས་པའི་རྒྱུ་མཚན་གང་ཡིན་ནམ། སེམས་ཡོངས་སུ་གསལ་ཞིང་མཐར་ཕྱིན་པའི་གནས་བབས། སྤང་རྟོགས་མཐར་ཕྱིན་པ་རྫོགས་པའི་སངས་རྒྱས་ཀྱི་གོ་འཕང་འཐོབ་པར་བྱ་དགོས་དོན་གང་ཡིན་ནམ། དེའི་དགོས་དོན་གཙོ་བོ་ནི་སེམས་ཅན་ཐམས་ཅད་ལ་གང་ཐུབ་ཅི་ཐུབ་ཀྱིས་ཕན་འདོགས་རྒྱུ་དེ་ཡིན། ང་ཚོས་དམིགས་ཡུལ་དེ་སྒྲུབ་བྱེད་ཀྱི་བསམ་པ་ཞིག་བསྐྱེད་པ་ན་དེ་ལ་བྱང་ཆུབ་ཀྱི་སེམས་ཞེས་བྱ་བ་ཡིན། དེའི་དམིགས་དོན་གཙོ་བོ་ནི་གཞན་སེམས་ཅན་ཐམས་ཅད་ལ་ཕན་པ་གང་ཐུབ་བསྒྲུབ་ཕྱིར་ཡིན། དེའི་ཕྱིར་ད་ལྟ་མ་ཐོབ་པའི་རང་གི་འཐོབ་བྱར་འགྱུར་བའི་སངས་རྒྱས་ཀྱི་གོ་འཕང་དོན་དུ་གཉེར་ནས་རྩེ་གཅིག་ཏུ་ཆོད་སེམས་བརྟན་པོས་འཇུག་པའི་སེམས་ཀྱི་གནས་བབས་དེ་ལ་བྱང་ཆུབ་ཀྱི་སེམས་ཞེས་སུ་གྲགས་པ་ཡིན། དམིགས་ཡུལ་དེ་གང་རེད་དམ་ཞེ་ན། དེ་ནི་གཞན་དོན་ཡིན། ང་ཚོས་གང་བྱེད་པར་འདོད་པ་ནི་སེམས་ཅན་ཐམས་ཅད་ཀྱི་དགོས་འདུན་མཐའ་དག་བསྒྲུབ་པར་བྱ་རྒྱུ་དེ་ཡིན། འོན་ཏེ་ང་ཚོས་འབད་བརྩོན་བྱས་ན། དམིགས་ཡུལ་དེ་སྒྲུབ་ཐུབ་པ་དང་། དེའི་ཐོག་ནས་ང་ཚོས་གཞན་དོན་སྒྲུབ་ཐུབ། གལ་སྲིད་ང་ཚོས་གཞན་དོན་ལ་དམིགས་པའི་བྱང་ཆུབ་ཀྱི་སེམས་མེད་ན། རྒྱ་ཆེ་བའི་ཐེག་པ་ཆེན་པོའི་བློ་གང་ཡང་རྒྱུད་ལ་སྐྱེ་ཐུབ་མེད། ཐ་ན་ང་ཚོས་སྟོང་ཉིད་དམ་དངོས་པོའི་གནས་ལུགས་ཚུལ་བཞིན་དུ་རྟོགས་ཀྱང་བྱང་ཆུབ་སེམས་མེད་ན། ནམ་ཡང་སངས་རྒྱས་ཀྱི་གོ་འཕང་འཐོབ་མི་ཐུབ།

དེ་ལྟ་བུའི་བྱང་ཆུབ་སེམས་སྐྱེད་ཆེད་ང་ཚོས་དཀའ་ལས་རྒྱག་དགོས། དེ་ཡང་ང་ཚོས་གློ་བུར་དུ་མཐེབ་ཅུ་འདྲ་པོ་ཞིག་མནན་ནས་དགོས་འདུན་སྒྲུབ་མི་ཐུབ། དེར་བརྟེན་བྱང་ཆུབ་སེམས་དེ་གང་ལ་བརྟེན་ཡོད་དམ་ཞེ་ན། རྩ་བ་སྙིང་རྗེ་ལ་རག་ལས་ཡོད། དེར་བརྟེན་དང་པོ་ང་ཚོས་སྙིང་རྗེ་ཆེན་པོ་སྐྱེད་རྒྱུར་འབད་བརྩོན་བྱས་ཏེ་སེམས་ཀྱི་གོམས་གཤིས་སུ་འཇགས་ཐུབ་པར་བྱེད་དགོས།

སྙིང་རྗེ་ཞེས་པ་གང་རེད་དམ། སྙིང་རྗེ་ནི་དམིགས་པ་སེམས་ཅན་ཐམས་ཅད་ལ་དམིགས་ནས་རྣམ་པ་དེ་དག་སྡུག་བསྔལ་དང་བྲལ་བར་ཤོག་ཅེས་པའི་སེམས་ཁུར་ཤུགས་དྲག་པོ་ཞིག་ཡིན། དེ་ལ་སྙིང་རྗེ་ཞེས་བྱ། སེམས་ཅན་ཐམས་ཅད་བདེ་བ་དང་ལྡན་པར་ཤོག་ཅེས་པའི་བློ་དེ་བྱམས་པ་ཡིན། “ང་ཚོས་སེམས་ཅན་ཐམས་ཅད་སྡུག་བསྔལ་ལས་བྲལ་ན་ཅི་མ་རུང་། བྲལ་བ་བདག་གིས་བྱ་སྙམ་པའི་བློ་ཤུགས་དྲག་པོ་ཞིག་བསྐྱེད་ན། དེ་ལ་ཆོད་སེམས་ཁྱད་པར་ཅན་ནམ་ལྷག་བསམ་ཟེར་གྱི་ཡོད།” འོན་ཀྱང་ང་ཚོས་སེམས་ཅན་ཐམས་ཅད་སྡུག་བསྔལ་བྲལ་བ་ཤོག །བྲལ་བར་བདག་གིས་བྱ་སྙམ་པའི་བློ་ཞིག་ཡོད་ཀྱང་། ད་ལྟ་རང་ལ་ནུས་པ་མེད། ནུས་པ་དེ་སུ་ལ་ཡོད་དམ་ཞེ་ན། སྐྱོན་ཐམས་ཅད་དང་བྲལ་ཞིང་ཡོན་ཏན་ཐམས་ཅད་ལྡན་པའི་སངས་རྒྱས་ཉག་གཅིག་ལ་ཡོད། དེར་བརྟེན་ང་ཚོས་རང་ནུས་ཡོད་ཚད་ཀྱིས་སངས་རྒྱས་ཀྱི་གོ་འཕང་འཐོབ་པ་དང་། གཞན་སེམས་ཅན་རྣམས་ཀྱི་སྡུག་བསྔལ་མེད་པ་བཟོས་ཏེ་བདེ་བ་སྒྲུབ་འདོད་པའི་བློ་དེ་ལ་བྱང་ཆུབ་ཀྱི་སེམས་ཞེས་བྱ་བ་ཡིན།

ལྷག་བསམ་དང་བྱང་ཆུབ་ཀྱི་སེམས་གཉིས་ཀ་སྙིང་རྗེ་ཆེན་པོ་ལས་ཡོང་གི་ཡོད། བྱམས་པ་ནི་དེའི་རྒྱུ་ཡིན། དེར་བརྟེན་སྙིང་རྗེ་དེ་རང་གི་གོམས་གཤིས་སུ་འཇགས་ཐུབ་པ་བྱེད་དགོས་པ་དང་། ཡང་ན་དེ་སྒོམ་དགོས། རྒྱུ་མཚན་ནི་སྙིང་རྗེ་ནི་བྱང་ཆུབ་སེམས་ལ་སོགས་པའི་ཁྱད་ཆོས་རྣམས་ཀྱི་རྩ་བ་ཡིན། གལ་སྲིད་ང་ཚོས་སྙིང་རྗེ་སྒོམ་ཐབས་བྱས་ན། ང་ཚོའི་རྒྱུད་དུ་ཡོད་པའི་དྲི་མའམ་མི་དགེ་བའི་བག་ཆགས་སམ་ནུས་པ་མང་པོ་ཞིག་རང་འགུལ་གྱིས་དག་འགྲོ་གི་ཡོད།

ཐེག་པ་ཆེན་པོའི་ཤིང་རྟའི་སྲོལ་འབྱེད་གཉིས་ལས་གཅིག་ནི་འཕགས་པ་ཐོགས་མེད་ཡིན། ཁོང་གིས་རང་གི་ཡི་དམ་རྗེ་བཙུན་བྱམས་པ་མགོན་པོ་དངོས་སུ་མཇལ་ཕྱིར་ལོ་མང་རིང་དཀའ་བ་སྤྱད་མཛད་ཡོད། ཁོང་གིས་སྒོམ་སྒྲུབ་ཉམས་ལེན་གནང་ས་ནི་ནཱ་ལནྜའི་འཁྲིས་སུ་ཡིན་ཞིང་། བྱ་རྒོད་ཕུང་པོ་རི་དང་ཐག་ཉེ་པོ་ཡོད། མི་ལོ་བཅུ་གཉིས་རིང་སྒོམ་སྒྲུབ་ལ་གཞོལ་ནས་མཐར་རྗེ་བཙུན་བྱམས་པ་མགོན་པོ་མཇལ། དང་པོ་ཁོང་གིས་ལོ་གསུམ་སྒོམ་བརྒྱབ་ནས་མཚམས་བཞག་སྟེ་རང་གནས་སུ་ལོག །དེ་རྗེས་ཡང་བསྐྱར་བྲག་ཕུག་ནང་ཕྱིར་ཕེབས་ཏེ་ལོ་གསུམ་སྒོམ་བརྒྱབ། ཡང་ལོ་གསུམ་བཅས་ཁྱོན་བསྡོམས་ལོ་བཅུ་གཉིས་སྒོམ་བརྒྱབ་པ་རེད།

ལོ་བཅུ་གཉིས་སྒོམ་བརྒྱབ་རྗེས་འབྲས་བུ་མ་ཐོན་པར་བྲག་ཕུག་ནང་ནས་ཐུགས་སེམས་སྐྱོ་པོའི་ངང་མར་ཕེབས་པའི་སྐབས། ལམ་ཟུར་དུ་ཁྱི་ཆེན་པོ་ཞིག་ལ་ལྤགས་ནད་ཕོག་ནས་ལུས་ཡོངས་རྫོགས་རྨས་ཁེངས་པ་ཞིག་གཟིགས། ཁྱི་དེ་ལ་སྤུ་མེད་པ་དང་། ལུས་རྨད་ཡོངས་ལ་རྨས་ཁྱབ་ནའང་། ད་དུང་ཁྱི་སྐད་རྒྱག་པ་གཟིགས། ཡ་ང་བའི་གནས་སྟངས་དེ་གཟིགས་མ་ཐག་ཐུགས་ལ་སྙིང་རྗེ་དྲག་པོ་འཁྲུངས། ཁྱི་དེའི་ལུས་པོར་རྨ་ཡོད་པ་མ་ཟད་རྨའི་ནང་ཤ་འབུས་ཁེངས་ནས་ཡོད། དེར་བརྟེན་སྙིང་རྗེ་མ་བཟོད་པར་ཉེ་འགྲམ་གྱི་གྲོང་ལས་གྲི་རྣོན་པོ་ཞིག་རག་ཐབས་གནང་སྟེ་ཁྱི་ཡོད་སར་ཕེབས། ཤ་འབུ་རྣམས་ཕྱིར་བཏོན་ཏེ་བསྐྱུར་ན། དེ་དག་ཟས་མ་རྙེད་པར་འཆི་དྭོགས་ཀྱིས། རང་གི་བརླ་ནས་ཤ་རྡོག་པོ་ཞིག་བྲེགས་ཏེ། ཤ་འབུ་རྣམས་དེའི་སྟེང་འཇོག་རྩིས་བྱས། འོན་ཏེ་ཤ་འབུ་རྣམས་ལག་པས་བཏོན་ན་འཆི་དོགས་ཀྱིས། མར་སྒུར་སྒུར་བྱས་ཏེ་ལྕེས་འབུ་རྣམས་བླངས་ཏེ་ཤ་རྡོག་དེའི་སྟེང་བཞག་གནང་བ་རེད།

ཁོང་གིས་མིག་བཙུམས་ནས་མར་སྒུར་སྒུར་བྱས་ཏེ། ལྕེས་ཤ་འབུ་རྣམས་ལེན་ཐབས་བྱས་ཀྱང་། ཤ་འབུ་ལ་ཁོང་གི་ལྗགས་སྙོབས་ཐུབ་ཀྱི་མེད། གང་ཡིན་ན་སྙམ་ཏེ། མིག་གདངས་ཏེ་བལྟས་པ་ན། ཁྱི་ཡོད་སའི་རང་གི་མདུན་དུ་རྗེ་བཙུན་བྱམས་པ་མགོན་པོ་དངོས་སུ་མཇལ། ཁྱི་དེ་རྗེ་བཙུན་བྱམས་པ་མགོན་པོས་སྤྲུལ་པ་ཞིག་ཡིན། དེ་མ་ཐག་འཕགས་པ་ཐོགས་མེད་ཀྱིས་རྗེ་བཙུན་གྱི་ན་བཟའ་ནས་བཟུང་སྟེ། “ངས་ཁྱེད་རང་མཇལ་བའི་ཆེད་དུ་མི་ལོ་བཅུ་གཉིས་དཀའ་ལས་བརྒྱབ་པ་ཡིན། ད་ལྟ་བར་དུ་མཇལ་མི་ཐུབ་པའི་རྒྱུ་མཚན་གང་ཡིན་ནམ།” ཞེས་དྲིས་པར། རྗེ་བཙུན་གྱིས། “ང་ལོ་བཅུ་གཉིས་རིང་རྟག་ཏུ་ཁྱོད་དང་མཉམ་དུ་ཡོད། དེ་གང་ཡིན་ཟེར་ན། ཁྱོད་ཀྱི་སེམས་མ་རིག་པས་བསྒྲིབས་ཏེ་ཁྱོད་ཀྱིས་ང་མཐོང་ཐུབ་མེད། འོན་ཀྱང་ཁྱོད་ཀྱིས་ཁྱི་དེ་མཐོང་མ་ཐག་བཅོས་མིན་གྱི་སྙིང་རྗེ་སྐྱེས་པའི་རྐྱེན་གྱིས་ད་ཁྱོད་ཀྱིས་ང་མཐོང་ཐུབ་པ་རེད། ལོ་བཅུ་གཉིས་རིང་ང་རྟག་ཏུ་འདིར་ཡོད་པའི་དཔང་རྟགས་ནི་ངའི་གྲྭ་ཆས་ཀྱི་སྣེ་ལ་ལྟོས་དང་། ལོ་དེ་དག་རིང་ཁྱོད་ཀྱིས་གཡུགས་པའི་མཆིལ་མ་དང་སྣབས་ལུད་སོགས་ཀྱི་ཁེངས་ཡོད།” ཅེས་གསུངས།

ད་གཟོད་རྗེ་བཙུན་བྱམས་པ་མགོན་པོ་མཇལ་བ་དང་། འཕགས་པ་ཐོགས་མེད་ཐུགས་རབ་ཏུ་མཉེས་ཏེ། རྗེ་བཙུན་རང་གི་དཔུང་པའི་སྟེང་བཞུགས་སུ་གསོལ་ནས། གྲོང་ཁྱེར་ནང་ཁྱེར་ཏེ། སྐད་ཤུགས་ཆེན་པོས། “ངས་རྗེ་བཙུན་གདན་འདྲེན་ཞུས་ཡོད། མི་ཚང་མ་མཇལ་བར་ཤོག” །ཅེས་བོས། མི་རྣམས་རང་རང་གི་ཁྱིམ་ལས་ཕྱིར་ཐོན་ནས་བལྟས་པས། འཕགས་པ་ཐོགས་མེད་ཀྱི་དཔུང་པའི་སྟེང་ནས་ཅི་ཡང་མ་མཇལ། མི་ཚང་མས། “འཕགས་པ་ཐོགས་མེད་འདི་སྙིང་རྗེ། ལོ་བཅུ་གཉིས་རིང་སྒོམ་བརྒྱབ་སྟེ། ད་སྨྱོན་པ་ཆགས་འདུག” །ཅེས་ལབ་གླེང་བྱས། དེ་ནས་རྗེ་བཙུན་བྱམས་པ་མགོན་པོས་འཕགས་པ་ཐོགས་མེད་ལྷ་ཡུལ་དགའ་ལྡན་དུ་ཁྲིད་དེ། འཕགས་པ་ཐོགས་མེད་ལ་བྱམས་ཆོས་སྡེ་ལྔ་ལེགས་པར་བསྩལ། དེ་ནས་ཕྱིས་སུ་འཕགས་པ་ཐོགས་མེད་ཀྱི་རྗེ་བཙུན་བྱམས་པ་མགོན་པོས་མཛད་པའི་བྱམས་ཆོས་སྡེ་ལྔ་མི་ཡུལ་དུ་གདན་དྲངས། རྒྱ་ཆེན་སྤྱོད་པའི་རྒྱུད་ཀྱི་ཆོས་རྣམས་དེ་ནས་བརྒྱུད་པ་ཞིག་ཡིན།

འདི་ནི་གཤམ་གྱི་ཤོ་ལོ་ཀ་འདིའི་བསྟན་དོན་ཡིན།

༧༽ རང་ཉིད་སྲིད་མཚོར་ལྷུང་བ་ཇི་བཞིན་དུ།། མར་གྱུར་འགྲོ་བ་ཀུན་ཀྱང་དེ་འདྲ་བར།། མཐོང་ནས་འགྲོ་བ་སྒྲོལ་བའི་ཁུར་འཁྱེར་བའི།། བྱང་ཆུབ་སེམས་མཆོག་འབྱོངས་པར་བྱིན་གྱིས་རློབས།། ཞེས་གསུངས་ཡོད།

ཚིགས་སུ་བཅད་པ་འདིས་སྐྱེ་བོ་ཆེན་པོའི་བསམ་པ་བསྟན་གྱི་ཡོད། དང་པོ། ང་ཚོར་སྐྱེ་བོ་ཆུང་ངུའི་བསམ་པ་ཡོད་པའི་སྐབས། ང་ཚོས་འཆི་བའི་སྡུག་བསྔལ་དང་ཕྱི་མ་ངན་སོང་གསུམ་དུ་སྐྱེ་བར་འཇིགས་སྣང་བྱེད་ཀྱི་ཡོད། དེ་ནས་སྐྱེ་བོ་འབྲིང་གི་བསམ་པ་སྐྱེས་ཏེ། འཁོར་བའི་སྡུག་བསྔལ་ཐམས་ཅད་ལ་བསམས་ནས་དེ་དག་ལས་ཐར་པའི་བློ་བཅོས་མིན་ཞིག་གམ་ངེས་འབྱུང་གི་བསམ་པ་སྐྱེ་གི་ཡོད།

ངེས་འབྱུང་གི་བསམ་པ་ལ་གཉིས་ཡོད་པ་ལས། ཚེ་འདི་སྣང་གི་ཆོས་ལ་ཆགས་པའི་ཆགས་པ་ལས་ཟློག་པ་དང་། ཚེ་ཕྱི་མའི་ཆོས་ལ་ཆགས་པའི་ཆགས་པ་ཟློག་པ་གཉིས་ཡོད། ཡང་ན་ཚེ་འདིའི་སྣང་ཤས་ཟློག་པ་དང་ཚེ་ཕྱི་མའི་སྣང་ཤས་ཟློག་པ་གཉིས་ཡོད། ང་ཚོའི་སྡུག་བསྔལ་ཐམས་ཅད་ལ་བསམ་བློ་གཏོང་བ་དང་དེ་དག་ལས་ཐར་ན་ཅི་འདྲ་ཡོད་དམ་སྙམ་པའི་ཐོག་ནས། ང་ཚོས་ངེས་འབྱུང་གི་བློ་ཕྱི་མ་དེ་རྒྱུད་ལ་བསྐྱེད་ན། སོ་སོ་གཅིག་པུའི་སྡུག་བསྔལ་ལ་བསམ་བློ་གཏོང་བ་ལས་ཟློག་ཐུབ་པ་དང་། གཞན་སེམས་ཅན་གྱི་སྡུག་བསྔལ་ལའང་བསམ་བློ་གཏོང་ཐུབ། དེ་ལྟར་བསམ་བློ་གཏོང་བ་ནི་རང་གཞན་སེམས་ཅན་ཐམས་ཅད་སྡུག་བསྔལ་ལས་བྲལ་འདོད་པའི་བློ་སྟེ་ངེས་འབྱུང་གི་བསམ་པ་ཆགས་ཀྱི་ཡོད། དེ་ལྟར་ང་ཚོས་སྙིང་རྗེ་ཆེན་པོ་རྒྱུད་ལ་སྦྱོང་དགོས་པ་ཡིན། སྙིང་རྗེའི་ཐོག་ནས་གཞན་སེམས་ཅན་རྣམས་ཀྱང་སྡུག་བསྔལ་ལས་བྲལ་བར་འདོད་ཀྱི་ཡོད། སྙིང་རྗེའི་ཐོག་ནས་ང་ཚོས་གཞན་དོན་སྒྲུབ་པའི་ཁུར་རང་གིས་ཁྱེར་གྱི་ཡིན། རང་གིས་བྱེད་ཀྱི་ཡིན་ཞེས་པའི་ཆོད་སེམས་ཁྱད་པར་ཅན་ནམ་ལྷག་བསམ་དང་བྱང་ཆུབ་སེམས་སྐྱེ་གི་ཡོད། དེ་ལྟར་གཞན་དོན་སྒྲུབ་པའི་སླད་ང་ཚོས་མཐའ་གཅིག་ཏུ་སངས་རྒྱས་ཀྱི་གོ་འཕང་འཐོབ་ཆེད་དཀའ་ལས་རྒྱག་ཐུབ། དེ་ནི་སྐྱེ་བོ་ཆེན་པོའི་བློ་སྦྱོང་ཚུལ་ཡིན།

འདིའི་འཕྲོས་ཀྱི་གནད་དོན་རྣམས་ཤོ་ལོ་ཀ་འདིའི་ནང་གསལ་ཡོད་པས། སང་ཉིན་མུ་མཐུད་དེ་ང་ཚོས་གོ་སྡུར་ལྷུག་པོ་བྱ་རྒྱུ་ཡིན།