ལས་དང་བཟང་སྤྱོད་ཀྱི་ཚུལ་ཁྲིམས་ལ་དྲན་ཤེས་བསྟེན་པ།

བསྐྱར་ཞིབ།

ང་ཚོས་ཀུན་སློང་རྣམ་པ་དག་པ་ཞིག་བཅོས་དགོས། དཔེར་ན། གཞན་སེམས་ཅན་ཐམས་ཅད་ལ་ཕན་འདོགས་པའི་ཆེད་དུ་དང་པོ་རང་ཉིད་ཀྱི་འཐོབ་བྱར་འགྱུར་བའི་བླ་མེད་རྫོགས་བྱང་གི་གོ་འཕང་མངོན་དུ་བྱེད་ཀྱི་ཡིན་ཞེས་པ་ལྟ་བུ། དམིགས་ཡུལ་དེ་སྒྲུབ་པའི་ཆེད་དུ་ཀུན་སློང་དེའི་ཐོག་ནས་ལྷག་བསམ་རྣམ་དག་གིས་ཡོན་ཏན་གཞིར་འགྱུར་མའི་གཞུང་འདི་ཉན་ནས་གང་ཤེས་པ་དེ་ཉམས་ལེན་ནང་སྒྲིལ་གྱི་ཡིན་ཞེས་པའི་བསམ་པ་ཤུགས་ཆེན་པོ་ཞིག་དགོས།

ཁ་སང་ང་ཚོས་ལམ་གྱི་རྩ་བ་བཤེས་གཉེན་བསྟེན་པའི་ཚུལ་ལ་གོ་སྡུར་བྱས་པ་རེད། མ་ཟད་ང་ཚོས་དལ་བ་བརྒྱད་དང་འབྱོར་བ་བཅུ་ཚང་མའི་རྩ་ཆེའི་མི་ལུས་སྐོར་དང་། དེ་རྙེད་དཀའ་བའི་ཚུལ་ལ་བགྲོ་གླེང་ལྷུག་པོ་བྱས་ཟིན། དལ་བ་བརྒྱད་དང་འབྱོར་བ་བཅུ་ཡོད། ང་ཚོའི་བྱ་བའི་རྟེན་གཞིར་གྱུར་བའི་འགྲོ་བ་མིའི་ལུས་རྟེན་འདི་ལ་དེ་དག་ཐམས་ཅད་ཚང་ཡོད་པ་རེད།

སྤྱིར་བཏང་ནས་མིའི་ལུས་རྟེན་འདི་ཧ་ཅང་འཐོབ་དཀའ་བ་ཡིན། ང་ཚོར་མིའི་ལུས་རྟེན་འདི་ཐོབ་མ་ཐག་གོམ་པ་རྒྱག་ཐུབ་ཀྱི་མེད། གོམ་པ་རྒྱག་ཐུབ་པའི་ནུས་པ་སླེབས་པར་མ་མཐར་ལོ་གཅིག་ལྷག་འགོར་གྱི་ཡོད། དུད་འགྲོ་ཡིན་ན་སྐྱེས་མ་ཐག་ཧ་ལམ་གོམ་པ་རྒྱག་ཐུབ་ཀྱི་ཡོད། ཁོང་ཚོས་སྐྱེས་མ་ཐག་ཏུ་གོམ་པ་རྒྱག་ཐུབ་པའི་རྒྱུ་མཚན་ནི། དུད་འགྲོ་དེ་དག་དུད་འགྲོའི་ལུས་རྟེན་གྲངས་མེད་པ་བླངས་ཟིན་པས། དུད་འགྲོ་བགས་ཆགས་ཧ་ཅང་ཤུགས་ཆེན་པོ་ཡོད། མིའི་ཕྲུ་གུ་རྣམས་སྐྱེས་མ་ཐག་མི་རྒན་པ་ནང་བཞིན་སོ་སོའི་རྐང་པའི་སྟེང་ལང་མི་ཐུབ་པའི་དོན་དངོས་འདིས་གང་སྟོན་གྱི་ཡོད་ཟེར་ན། སྐྱེ་བ་སྔོན་མ་མིའི་ལུས་རྟེན་འདི་ཐོབ་པ་ཧ་ཅང་དཀོན་པོ་ཡིན་པའི་ཚུལ་བསྟན་གྱི་ཡོད། དེར་བརྟེན་མིའི་བགས་ཆགས་ཧ་ཅང་ཞན་པོ་ཡོད།

སངས་རྒྱས་ཤཱཀྱ་ཐུབ་པ་མཆོག་མིའི་རྟེན་དུ་སྐུ་འཁྲུངས་མ་ཐག་གང་གི་ཞབས་སྟེང་དུ་བཞེངས་ཐུབ་པ་དང་གོམ་པ་བདུན་སྤོས་གནང་མཛད་ཡོད། དེ་ནི་སྔོན་གྱི་སྐྱེ་བ་གྲངས་མེད་ནང་མིའི་ལུས་རྟེན་མང་པོ་ཞིག་རྒྱུན་མི་ཆད་པར་ཐོབ་པའི་དབང་གིས་ཡིན། དེར་བརྟེན་འཁྲུངས་མ་ཐག་མི་རྒན་པ་ལྟར་གོམ་པ་སྤོ་ཐུབ་པ་བྱུང་། དེ་ག་ནང་བཞིན་མི་སྐྱེ་བ་ལན་གྲངས་མང་པོ་བླངས་པའི་སྐབས་དེ་དག་རིང་མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བརྒྱད་བཅུ་བརྒྱན་པའི་སྐུ་ཁྱད་པར་བ་འདི་འཐོབ་བྱེད་ཀྱི་རྒྱུ་རྣམས་བསགས་ཡོད།

དེས་ན་གནད་དོན་དང་པོ་ནི་ང་ཚོས་རང་ལ་ཐོབ་པའི་དལ་བ་བརྒྱད་དང་འབྱོར་བ་བཅུ་ཚང་བའི་དལ་འབྱོར་མི་ལུས་འདི་ངོས་འཛིན་དགོས་པ་དང་། དེ་ནས་དལ་འབྱོར་མི་ལུས་རྙེད་དཀའ་བའི་ཚུལ་བ་བསམ་བློ་གཏོང་དགོས། དེ་རྗེས་གཞི་ནས་དལ་འབྱོར་མི་ལུས་ཀྱི་གལ་ཆེའི་རང་བཞིན་དང་། ལུས་རྟེན་འདིའི་ཐོག་ནས་དཔེར་ན། སངས་རྒྱས་ཀྱི་གོ་འཕང་སྒྲུབ་པ་ལྟ་བུའི་བྱ་བ་རླབས་ཆེན་སྒྲུབ་ཐུབ་པའི་ཚུལ་ལ་བསམ་བློ་གཏོང་ཐུབ། ང་ཚོས་མཚན་སྙན་ཡོངས་སུ་གྲགས་པའི་རྗེ་བཙུན་མི་ལ་རས་པར་བསམ་བློ་གཏོང་དགོས། ཁོང་གིས་དལ་འབྱོར་མི་ལུས་ཀྱི་ཐོག་ནས་ཚེ་གཅིག་ལུས་གཅིག་ལ་སངས་རྒྱས་ཀྱི་གོ་འཕང་མངོན་དུ་མཛད་ཡོད།

ང་ཚོར་ཐོབ་པ་དང་གཅིག་པ་རེད། ཁྱད་པར་རྩ་བ་ནས་མེད། དེར་བརྟེན་དལ་འབྱོར་མི་ལུས་ཁྱད་པར་བ་འདིའི་ཐོག་ནས། མི་ལུས་འདི་མ་ཤོར་སྔོན། ང་ཚོས་ག་ཚོད་ཐུབ་ཐུབ་ཀྱིས་ནང་པའི་ཆོས་ནས་གསུངས་པའི་ཐབས་ལམ་རྣམས་ཉམས་ལེན་ནང་སྒྲིལ་ཐབས་བྱེད་དགོས། སང་ཉིན་ཉམས་ལེན་བྱེད་ཀྱི་ཡིན་ཟེར་ཕྱི་བཤོལ་བྱེད་མི་ཉན། གང་ཡིན་ཟེར་ན། ང་ཚོ་ག་དུས་འཆི་མིན་བཤད་ཚོད་མི་ཐིག་པས། འཆི་བའི་དུས་ནི་ངེས་བརྟན་མེད་པ་ཞིག་ཡིན། དེར་བརྟེན་ད་ལྟ་རང་ནས་དམ་པའི་ཆོས་ཉམས་ལེན་བྱེད་ཀྱི་ཡིན་ཞེས་ཆོད་སེམས་བརྟན་པོ་ཞིག་དགོས།

ཁ་སང་ང་ཚོས་འཆི་བ་དང་མི་རྟག་པ་དང་འབྲེལ་བའི་གནད་དོན་དེ་དག་ཐོག་གོ་སྡུར་བྱས་པ་ལ་བརྟེན་ནས་ང་ཚོས་ཚེ་སྲོག་གང་ཡིན་ཀྱང་རྟག་པ་བརྟན་པ་མེད་པར། ཤི་བའི་རྗེས་སྐྱེ་བ་ལེན་དགོས་ཀྱི་ཡོད་པའི་ཚུལ་ལ་རྒྱུས་མངའ་བྱུང་ཡོད། དེ་བཞིན་ང་ཚོས་གནོད་འཚེ་ཅན་གྱི་ལས་སུ་ཞུགས་ནས་མི་དགེ་བའི་ལས་སྟོབས་ཆེན་བསགས་པ་ལ་བརྟེན་ནས་ངན་འགྲོའི་གནས་སུ་སྐྱེ་རྒྱུ་ཡིན་པ་ལའང་རྒྱུས་མངའ་བྱུང་ཡོད། ངན་འགྲོའི་གནས་སུ་སྐྱེས་ན། དཀའ་ངལ་སྡུག་བསྔལ་ཇི་ཙམ་ཡོད་པ་དང་། ཁ་ཐབས་སྐྱོ་བའི་གནས་དེར་འཇིགས་སྣང་སྐྱེས་ཏེ། དེ་ལ་ཐར་ཐབས་ལ་ང་ཚོས་ངེས་པར་དུ་བསམ་བློ་གཏོང་དགོས། དེའི་ཕྱིར་ང་ཚོར་ཐབས་གང་ཞིག་ལ་བརྟེན་ནས་ཡང་དག་པའི་ལམ་བསྟན་ཏེ་ང་ཚོར་ཁ་ཐབས་སྐྱོ་བའི་གནས་དེ་དག་ལ་གཡོལ་ཐུབ་པའི་ཐབས་སྣ་ཚོགས་ཤིག་ལ་བསམ་བློ་གཏོང་དགོས། དེ་ལྟར་ལམ་ཡང་དག་པ་སྟོན་མཁན་ནི་དཀོན་མཆོག་གསུམ་ཉག་གཅིག་ཡིན་པ་ངོས་བཟུང་སྟེ། དཀོན་མཆོག་གསུམ་ལ་སྐྱབས་སུ་འགྲོ་བའི་བར་ཆད་རྣམས་སེལ་ཐབས་བྱས་ནས། སྐྱབས་སུ་ཚུལ་བཞིན་དུ་འཇུག་ཐུབ་པ་བྱེད་དགོས། དེའི་སྐོར་ང་ཚོས་གོ་སྡུར་བྱས་ཟིན།

ད་དུང་ང་ཚོས་སོ་སོའི་མི་ཚེའི་ནང་སྐྱབས་སུ་འགྲོ་བའི་རྒྱུའམ་རྒྱུ་མཚན་ལ་ངེས་ཤེས་དགོས་རྒྱུ་གལ་ཆེན་པོ་ཡིན། དང་པོ་ནི་སྐྱབས་དེ་འདྲ་ཞིག་མེད་ན། སྐྱེ་བ་ཕྱི་མ་ང་ཚོར་གང་འབྱུང་ངེས་སམ་ཞེས་པའི་འཇིགས་སྣང་དེ་ཡིན། གཉིས་པ་ནི་སྐྱབས་སུ་འགྲོ་བའི་ཡུལ་དེ་དག་ལ་ང་ཚོ་སྐྱོབ་པའི་ནུས་པ་ཡོད་པར་ཡིད་ཆེས་དགོས་ཀྱི་ཡོད། དེའི་སྟེང་གལ་སྲིད་ང་ཚོས་ཐེག་པ་ཆེན་པོའི་སྐྱབས་འགྲོ་བྱེད་ཀྱི་ཡོད་ན། སེམས་ཅན་ཐམས་ཅད་ལ་དམིགས་པའི་རྩ་བའི་སྙིང་རྗེའི་ཀུན་སློང་དགོས་ཀྱི་ཡོད། དེའི་ཐོག་ནས་ང་ཚོས་དགོས་ངེས་ཀྱི་རྒྱུ་ཚོགས་ཚང་བའི་ཐོག་ནས་སྐྱབས་སུ་འགྲོ་དགོས་ཀྱི་ཡོད།

སྐྱབས་སུ་འགྲོ་བའི་བློ་སྦྱོང་བའི་ཚུལ།

ནམ་ཞིག་ང་ཚོས་སྐྱབས་སུ་སོང་བ་ན། སོ་སོའི་མི་ཚེའི་ནང་དངོས་སུ་སྐྱབས་འགྲོ་ཉམས་སུ་བླང་ཕྱིར་གནད་དོན་སྣ་ཚོགས་ཀྱི་ཐོག་ནས་སྦྱོང་བརྡར་བྱ་རྒྱུ་གལ་ཆེན་པོ་ཡིན། དཔེར་ན། སངས་རྒྱས་ལ་སྐྱབས་སུ་སོང་ན། སྐྱབས་འགྲོའི་བློ་སྦྱོང་ཚུལ་ནི། སངས་རྒྱས་ཀྱི་སྐུ་ཚབ་ཅིག་མཐོང་ནའང་། དེའི་སྤྱན་ཀྱོག་ཀྱོག་རེད་འདུག །ཡང་ཞལ་རས་ཁྱད་མཚར་པོ་འདུག་སོགས་བརྗོད་དེ་ནམ་ཡང་སྐྱོན་བརྗོད་བྱ་མི་རུང་། ང་ཚོས་མ་གུས་པའི་རིགས་རྩ་བ་ནས་བྱེད་རྒྱུ་མེད། མདོར་ན། སངས་རྒྱས་ཀྱི་སྐུ་ཚབ་བམ་སྐུ་རྟེན་དཔེར་ན། སྐུ་བརྙན་སོགས་ལ་སྐྱོན་བརྗོད་མ་བྱས་པར་ང་ཚོས་སངས་རྒྱས་དངོས་ལྟར་འདུ་ཤེས་འཛིན་དགོས། བྱས་ཙང་། སངས་རྒྱས་ལ་སྐྱོན་བརྗོད་བྱ་རྒྱུའི་ཚབ་ལ་སྐུ་རྟེན་བཞེངས་མཁན་གྱི་སྒྱུ་རྩལ་བའམ་འཇིམ་བཟོ་བ་དེས་སྐུ་ཡག་པོ་བཞེངས་མི་འདུག །ལྷ་བྲིས་བ་དེ་མཁས་པོ་མི་འདུག་ཅེས་བརྗོད་ཆོག །འོན་ཀྱང་སངས་རྒྱས་ཀྱི་སྐུ་རྟེན་ལ་བཅོས་མིན་གྱི་གུས་པ་བྱེད་དགོས། དེར་མ་ཟད། སངས་རྒྱས་ཀྱི་སྐུ་འདྲ་ཚོང་གཉེར་ནམ་ཡང་བྱ་རྒྱུ་མེད། དེ་བཞིན་སངས་རྒྱས་ཀྱི་སྐུ་གསུང་ཐུགས་གསུམ་མཚོན་པའི་མཚོན་བྱེད་རྣམས་ལ་མ་གུས་པ་རྩ་བ་ནས་བྱེད་མི་ཉན། སྐུ་འདྲ་སོགས་ཀྱི་སྟེང་འགྲོ་བ་དང་སྐུ་འདྲའི་སྟེང་ཅ་དངོས་གཞན་འཇོག་པ་སོགས་བྱེད་རྒྱུ་མེད།

མ་ཟད་སངས་རྒྱས་ལ་ང་ཚོས་སྐྱབས་སུ་བཟུང་བའི་ཚེ། འཇིག་རྟེན་པའི་ལྷ་དཔེར་ན། བརྒྱ་བྱིན་དང་བྲམ་ཟེ་སོགས་ལ་སྐྱབས་སུ་འགྲོ་མི་ཉན། རྒྱུ་མཚན་ནི་འཇིག་རྟེན་པའི་ལྷ་དེ་དག་གིས་ང་ཚོར་ཉེན་མེད་ཀྱི་ཁ་ཕྱོགས་ཤིག་དང་ལམ་ཡང་དག་པ་ཞིག་སྟོན་མི་ནུས། དེ་དག་ལ་བརྟེན་པ་ནི་རང་གི་ལུས་སྒོ་དང་སྒེའུ་ཁུང་གི་ཡོལ་བ་ཞིག་ལ་བརྟེན་པ་དང་འདྲ་པོ་ཡོད། དེ་ནི་ཁ་སང་ང་ཚོས་ལྷའི་བུ་ཞིག་གིས་བརྒྱ་བྱིན་གྱི་དྲུང་དུ་ཕྱིན་ནས་དཀའ་ངལ་དེ་ལས་ཐར་ཐབས་ཀྱི་རོགས་མགོན་གནང་རོགས་ཞེས་ཞུས་པར། བརྒྱ་བྱིན་གྱིས། “ངས་ཁྱོད་ཀྱི་བྱ་དཀའ་བའི་གནད་དེ་ལས་ཐར་བའི་ཉེན་མེད་ཀྱི་ཁ་ཕྱོགས་ཡང་དག་པ་ཞིག་སྟོན་མི་ཐུབ། ལམ་ཡང་དག་པ་ཞིག་སྟོན་ཐུབ་མཁན་གཅིག་རང་ཡོད་པ་ནི་སངས་རྒྱས་རེད།” ཅེས་གསུངས་པ་དང་འདྲ་པོ་ཡོད།

ང་ཚོས་སྔོན་འགོག་གི་ཐབས་ལམ་ཆོས་ལ་བརྟེན་ནས་ཉེན་མེད་ཀྱི་ཁ་ཕྱོགས་ཤིག་འཚོལ་བའམ་སྐྱབས་སུ་འགྲོ་བའི་སྐབས། ཆོས་མཚོན་པར་བྱེད་པའི་གསུང་རབ་དང་གཞུང་སོགས་ལ་ཧ་ཅང་གུས་བརྩི་བྱེད་དགོས་ཤིང་། དེ་དག་གི་སྟེང་དུ་ཅ་དངོས་གཞན་འཇོག་མི་ཉན། དཔེར་ན། སྐབས་འགར་ང་ཚོས་དཔེ་ཆ་ཀློག་བཞིན་པའི་སྐབས། ཤོག་ལྷེ་རླུང་གིས་འཁྱེར་ཉེན་ཆེ་བས། དཔེ་ཆའི་སྟེང་ཤོག་གནོན་ལྟ་བུ་འཇོག་དགོས་གལ་ཆགས་ཀྱི་ཡོད། འོན་ཀྱང་ཕྱོགས་གཞན་ཞིག་ནས། དྲན་ཤེས་མ་བསྟེན་པར་ཕྲེང་བ་ལ་སོགས་པ་གང་བྱུང་དཔེ་ཆའི་སྟེང་འཇོག་མི་ཉན།

ཁྱེད་རང་ཚོ་ཚང་མས་ནང་པའི་གོམས་སྲོལ་སྣ་ཚོགས་པ་རྣམས་མཁྱེན་པའི་ཐོག་ནས་གཞུང་ནང་གསུང་པ་གཞིར་བཟུང་ཉམས་ལེན་གནང་གི་ཡོད་རེད། དེ་ཧ་ཅང་ཡག་པོ་རེད། དཔེ་ཆ་རྣམས་ཞ་ལའི་སྟེང་དཔེ་རས་སོགས་ཅི་ཡང་མེད་པར་འཇོག་རྒྱུ་མེད། མ་མཐར་དཔེ་ཆའི་འོག་ཏུ་རས་སོགས་བཞག་ནས་དེའི་སྟེང་དཔེ་ཆ་འཇོག་དགོས། དེ་ག་ནང་བཞིན་སངས་རྒྱས་ཀྱི་སྐུ་འདྲ་ལའང་ཡིན། གལ་སྲིད་ང་ཚོས་སངས་རྒྱས་དང་ཆོས་ཀྱི་མཚོན་དོན་རྣམས་ལའང་དད་གུས་རྣམ་དག་བྱས་ན། དེ་ཧ་ཅང་ཕན་རླབས་ཆེན་པོ་ཡོད། གང་ཡིན་ཟེར་ན། དེ་ལ་བརྟེན་ནས་རང་གིས་ཚོགས་རླབས་པོ་ཆེ་གསོག་ཐུབ་ཀྱི་ཡོད། དེ་བཞིན་སོ་སོའི་མཛུབ་མོ་རློན་པ་བཟོས་ཏེ་ཤོག་ལྷེ་བརྗེ་པོ་རྒྱག་མི་ཉན། གལ་སྲིད་ཤོག་ལྷེ་བརྗེ་པོ་རྒྱག་ཆེད་ལག་པ་རློན་པ་བཟོ་དགོས་ན། ཕོར་པ་ཆུང་ཆུང་ཞིག་གི་ནང་ཆུ་བླུགས་ནས་སོ་སོའི་འགྲམ་དུ་ཉར་དགོས། གཞན་ཡང་ང་ཚོས་ཡིག་ཐོག་ཏུ་པར་བརྒྱབས་པའི་དཔེ་དེབ་གཞན་ལའང་གུས་བརྩི་གཅིག་མཚུངས་སུ་བྱེད་དགོས། གསར་ཤོག་དང་དེ་མིན་པར་བརྒྱབས་པའི་ཡིག་རིགས་བརྒྱུད་ང་ཚོར་ཆོས་འཆད་ཉན་དང་ཐོས་བསམ་བྱེད་ཐུབ་ཀྱི་ཡོད། དེར་བརྟེན་པར་བརྒྱབས་པའི་དཔེ་གཟུགས་གང་འདྲ་ཞིག་གི་ནང་ཐོན་ཀྱང་དེ་དག་ལ་གུས་ཞབས་ཞུ་དགོས། དཔེར་ན། ང་ཚོས་ཚགས་པར་རྣམས་གད་སྙིགས་འཐུམ་ཆེད་བེད་སྤྱོད་གཏོང་བའམ་ཞ་ལ་གཙང་མ་བཟོ་ཆེད་བེད་སྤྱོད་བྱེད་རྒྱུ་མེད། མ་ཟད་ང་ཚོས་ཚགས་པར་སོགས་གང་བྱུང་གསང་སྤྱོད་དང་ས་ཆ་བཙོག་སར་མ་གཡུག་པར་གུས་ཞབས་དང་བཅས་བླུགས་སྣོད་ནང་ཏག་ཏག་འདོར་དགོས།

ང་ཚོས་སྔོན་འགོག་གི་ཐབས་ལམ་ཆོས་ལ་སྐྱབས་སུ་འགྲོ་བའམ་ཉེན་མེད་ཀྱི་ཁ་ཕྱོགས་ཞིག་འཚོལ་བའི་སྐབས། ལག་ལེན་བསྟར་དགོས་པའི་གནད་དོན་གཞན་ཞིག་ནི། གཞན་སེམས་ཅན་སུ་གང་ལའང་གནོད་འཚེ་བྱེད་རྒྱུ་མེད།

དེ་ག་ནང་བཞིན་ང་ཚོས་དགེ་འདུན་དཀོན་མཆོག་ལ་སྐྱབས་སུ་འགྲོ་བའི་སྐབས། དགེ་འདུན་གྱི་སྡེ་རྣམས་དགེ་འདུན་དཀོན་མཆོག་དངོས་སུ་འདུ་ཤེས་བཟུང་ནས་ཀུན་ལ་གུས་བརྩི་བྱེད་དགོས་པ་ལས། ཁོང་དག་ལ་གནོད་པའི་མིང་ཡ་མ་ཟུང་དེ་འདྲ་འབོད་མི་ཉན།

ལས་འབྲས་ལ་བསམས་ནས་སྤྱོད་ལམ་སློབ་ཚུལ།

ལས་རྒྱུ་འབྲས་ཀྱི་རྣམ་གཞག་དང་བསྟུན་ནས་གཟབ་གཟབ་བྱས་ཏེ་སོ་སོའི་སྤྱོད་ལམ་ལ་འགྱུར་བཅོས་གཏོང་རྒྱུ་ནི་ང་ཚོའི་མི་ཚེའི་ནང་དཀོན་མཆོག་གསུམ་ལ་སྐྱབས་སུ་འགྲོ་དགོས་པའི་གནད་དོན་གལ་ཆེན་པོ་ཞིག་ཡིན། དེ་ཡང་དཀར་པོ་དགེ་བའི་ལས་བྱས་པ་ལ་བརྟེན་ནས་དགེ་བའི་ནུས་པའམ་ཚོགས་གསོག་གི་ཡོད། དེའི་འབྲས་བུར་ང་ཚོར་བདེ་སྐྱིད་འབྱུང་གི་ཡོད་པ་ང་ཚོས་ཤེས་དགོས། གལ་སྲིད་ཉོན་མོངས་པའི་གཞན་དབང་དུ་སོང་ནས་ནག་པོ་མི་དགེ་བའི་ལས་བྱས་ན། དེ་ལས་སྡུག་བསྔལ་འབའ་ཞིག་འབྱུང་གི་ཡོད། དེར་བརྟེན་སྐྱབས་སུ་འགྲོ་བའམ་མི་ཚེའི་ནང་ཉེན་མེད་ཀྱི་ཁ་ཕྱོགས་ཤིག་འཚོལ་བའི་རྒྱུ་མཚན་གཙོ་བོ་ནི་སོ་སོའི་སྤྱོད་ལམ་ལ་བརྟེན་ནས་འབྲས་བུ་གང་ཞིག་འབྱུང་བ་ཤེས་པར་བྱ་རྒྱུ་དང་དེ་དང་བསྟུན་ནས་བྱ་སྤྱོད་སྤེལ་རྒྱུ་དེ་ཡིན།

ལས་འབྲས་ལ་དབྱེ་ན་བཞི་ལས། ༡) ལས་ངེས་པ། ༢) འཕེལ་བའི་ལས། ༣) མ་བྱས་པ་མི་འཕྲད་པ། ༤) བྱས་པ་ཆུད་མི་བཟའ་བ་བཅས་སོ།

ཁ་སང་ང་ཚོས་ལས་ངེས་པ་དང་འཕེལ་བའི་སྐོར་གོ་སྡུར་བྱས་ཟིན་པ་རེད། ད་ལས་ཀྱི་དབྱེ་བ་གསུམ་པ་དེ་གང་རེད་ཞུས་ན། མ་བྱས་པ་མི་འཕྲད་པ་རེད། དེ་ཡང་ང་ཚོས་ལས་གང་ཞིག་མ་བྱས་ན། དེའི་འབྲས་བུ་སྨིན་ཐུབ་ཀྱི་མེད།

སངས་རྒྱས་ཞལ་བཞུགས་པའི་སྐབས། གནས་བརྟན་བཅུ་དྲུག་གམ་སྐབས་རེ་དགྲ་བཅོམ་པ་བཅུ་དྲུག་ཅེས་འབོད་པའི་ནང་། གནས་བརྟན་གསེར་གྱི་བེའུ་ཞེས་བྱ་བ་ཞིག་ཡོད། ཁོང་འཁྲུངས་པ་མ་ཐག་གསེར་གྱི་ལྕི་བ་གཏོང་མཁན་གྱི་གླང་ཆེན་ཞིག་འཁྲིས་སུ་སླེབས་ནས་རྟག་ཏུ་ཁོང་གི་འཁྲིས་སུ་བསྡད། གསེར་གྱི་ལྕི་བ་གཏོང་མཁན་གྱི་གླང་ཆེན་དེ་རྟག་ཏུ་ཁོང་གི་འཁྲིད་སུ་སྡོད་པའི་རྒྱུ་མཚན་ནི། སྐྱེ་བ་སྔོན་མ། གསེར་གྱི་བེའུ་ཁོང་སངས་རྒྱས་འོད་སྲུང་གི་སྐུ་དུས་སུ་འཁྲུངས་པ་དང་། སངས་རྒྱས་འོད་སྲུང་གིས་གླང་ཆེན་ཞིག་བཞོན་རྟར་བེད་སྤྱོད་གནང་ཡོད། སྐུ་སྐྱེ་དེའི་སྐབས། ཁོང་གིས་གླང་ཆེན་དེར་གུས་པ་དང་བཅས་གསེར་ལས་གྲུབ་པའི་ལོ་མ་བསྟེར་བའི་དགེ་བའི་ལས་ཀྱི་སྟོབས་ལ་བརྟེན་ནས། སངས་རྒྱས་ཤཱཀྱ་ཐུབ་པའི་སྐབས་སླར་སྐྱེ་བ་བླངསཔ་དང་། འཁྲུངས་མ་ཐག་གསེར་གྱི་ལྕི་བ་གཏོང་མཁན་གླང་ཆེན་ཞིག་ཁོང་གི་འཁྲིས་སུ་བྱུང་བ་རེད།

ཁོང་གང་དུ་འཁྲུངས་སའི་ཡུལ་གྱི་རྒྱལ་པོའི་མཚན་ལ་རྒྱལ་པོ་མ་སྐྱེས་དགྲ་ཞེས་འབོད་པ་ཞིག་ཡོད་པ་དེས། རིན་མེད་དུ་གསེར་འཐོབ་རྒྱུར་འདོད་པ་ཤིན་ཏུ་ཆེ་སྟབས། གླང་ཆེན་དེ་དགོས་འདོད་ཡོད་པས། མི་རྣམས་ལ་གླང་ཆེན་དེ་ཁོ་པའི་འགྲམ་དུ་འཁྲིད་ཤོག་ཅེས་བཀའ་བཏང་། འོན་ཀྱང་གླང་ཆེན་དེ་རྒྱལ་པོའི་འགྲམ་ག་དུས་ཁྲིད་ཀྱང་གླང་ཆེན་དེ་རང་བཞིན་གྱིས་ཡལ་འགྲོ་བ་དང་། རྫུ་འཕྲུལ་གྱི་སྟོབས་ལས་ཡལ་དེ་ཁྱེའུ་གསེར་གྱི་བེའུའི་འགྲམ་དུ་སླེབས་ཀྱི་ཡོད། རྒྱལ་པོས་ཐེངས་གསུམ་ཐབས་ཤེས་བྱས་ཀྱང་གཅིག་པ་བྱུང་། དེའི་རྒྱུ་མཚན་ནི། རྒྱལ་པོ་དེ་ལ་གླང་ཆེན་དེ་བེད་སྤྱོད་བྱ་རྒྱུའི་ལས་ཀྱི་ནུས་པ་མེད། གླང་ཆེན་དེ་ལས་གསེར་རྣམས་བེད་སྤྱོད་གཏོང་རྒྱུའི་ལས་བསགས་མེད་ཀྱང་གསེར་གྱི་བེའུས་ལས་དེ་བསགས་ཡོད། ལས་འབྲས་ཀྱི་རྣམ་གཞག་ནི་བསམ་གྱིས་མི་ཁྱབ་པ་ཞིག་ཡིན། ཐ་ན་རྒྱལ་པོ་ལའང་དེ་ལ་འགྱུར་བ་གཏོང་བའི་ནུས་པ་མེད།

ལས་ཀྱི་དབྱེ་བ་བཞི་པ་དེ་ནི་ལས་བྱས་པ་ཆུད་མི་ཟ་བ་སྟེ། གལ་སྲིད་ང་ཚོས་ལས་ཤིག་བསགས་པ་ན། དེའི་འབྲས་བུ་འཕྲོ་བརླག་མ་སོང་བར་རང་གིས་མྱོང་དགོས་ཀྱི་ཡོད། དེ་ཡང་གནས་བརྟན་བཅུ་དྲུག་གི་ནང་གི་གསེར་གྱི་བེའུར་སྐྱེ་བ་བླངས་པའི་ཁྱེའུ་དེས་རྟག་ཏུ་རང་གི་འཁྲིས་སུ་གླང་ཆེན་དེ་འཁོར་དགོས་པའི་ལས་ཀྱི་འབྲས་བུ་ལས་ཤེས་ཐུབ། དེར་བརྟེན་སྐྱེ་བ་སྔོན་མ་ཁོང་གིས་སངས་རྒྱས་འོད་སྲུང་གི་གླང་ཆེན་ལ་གསེར་གྱི་ལོ་མ་བྱིན་པའི་ལས་དེ་དོན་མེད་པ་ཞིག་མིན། དེའི་མཐུ་ལས་འབྲས་བུ་དེ་བྱུང་། དེར་མ་ཟད། གསེར་གྱི་བེའུ་ནར་སོན་པ་དང་། ཁོང་གིས་རང་གི་ཁྱིམ་གཡུགས་ཏེ། གྲྭ་ཆས་བཞེས་ཏེ་མཐར་དགྲ་བཅོམ་པའི་གོ་འཕང་ཐོབ། དེར་བརྟེན་སེམས་ནང་དེ་བཞག་སྟེ། ང་ཚོས་མ་མཐར་དགེ་བ་ཆུང་ཙག་ཡིན་ཀྱང་བྱེད་ཀྱི་ཡིན་བསམ་པའི་ཆོད་སེམས་བརྟན་པོ་ཞིག་སྐྱེད་དགོས། དགེ་བ་དེ་ཧ་ཅང་ཆུང་ཆུང་ཡིན་པར་བསམ་བློ་གཏོང་མི་ཉན། གང་ཡིན་ཟེར་ན། ཆུ་ཐིགས་བསགས་པའི་སྣོད་ཁེངས་ཞེས་པ་ལྟར་ཡིན།

དེ་ལྟར་ང་ཚོས་གང་ཐུབ་ཅི་ཐུབ་ཀྱིས་དགེ་བའི་ལས་ཆུང་ཙག་ཡན་ཆད་ནས་གསོག་ཐབས་དང་མི་དགེ་བའི་ལས་ཆུང་ཙག་ཡིན་ཀྱང་འཛེམ་ཐབས་བྱེད་རྒྱུའི་ཆོད་སེམས་བརྟན་པོ་ཞིག་སྐྱེད་དགོས། ང་ཚོས་གང་བྱས་ཀྱང་ཁྱད་པར་མེད་བསམས་ནས་རང་གིས་རང་མགོ་སྐོར་བ་དང་ལྐུགས་པ་ནམ་ཡང་བཟོ་རྒྱུ་མེད། གཟབ་གཟབ་མ་བྱས་ན། མི་དགེ་བའི་ལས་ཆུང་ཆུང་ཞིག་གིས་ཀྱང་འབྲས་བུ་ཧ་ཅང་ངན་པ་མྱོང་དགོས་པ་ཆགས་ཀྱི་ཡོད། གནོད་སེམས་དང་བཅས་ཐ་ན་དུག་སྦྲང་ཞིག་བསད་དེ། སོ་སོའི་བྱས་ཉེས་དེ་ནོར་བ་ཁས་ལེན་མ་བྱས་ན། ཕྱི་ཉིན་དེར་དེའི་མི་དགེ་བའི་ལས་ཧ་ཅང་སྟོབས་ཆེ་བར་གྱུར་ཏེ་དུག་སྦྲང་གཉིས་བསད་པའི་ཉེས་པ་འབྱུང་བ་ཡིན། གནངས་ཉིན་དེར་ལས་ངན་དེ་ལྡབ་འགྱུར་སོང་ནས་བཞི་བསད་པའི་ཉེས་པ་འབྱུང་ཞིང་། ལོ་དེ་གའི་ནང་རང་གི་བྱས་ཉེས་དེ་དྲང་པོ་དྲང་བཞག་དང་གསང་པོར་ངོས་ལེན་བྱས་ཏེ་འགྱོད་གཤགས་མ་བྱས་པ་དང་། ལས་ངན་དེ་ཉུང་དུ་གཏོང་ཆེད་གཉེན་པོ་གང་ཡང་མ་བསྟེན་ན། བསམ་ཡུལ་ལས་འདས་པའི་མི་དགེ་བའི་ལས་ཧ་ཅང་ཆེན་པོ་འབྱུང་གི་ཡོད།

ང་ཚོའི་ལག་གཉིས་ཀྱི་བར་དུག་སྦྲང་བཙིར་ཏེ་བསད་པ་ལས། དཔེར་ན། རྣམ་སྨིན་གྱི་འབྲས་བུར། སྐྱེ་བ་རྗེས་མ་ང་ཚོ་དམྱལ་བའི་སེམས་ཅན་གཟུགས་སྟོབས་ཆེན་པོ་ཞིག་ཏུ་བླངས་ཏེ། རང་ཉིད་རི་ཆེན་པོ་གཉིས་ཀྱི་དབར་དུ་ལངས་ནས་དུག་སྦྲང་བཙིར་བ་ལྟར། རི་གཉིས་པོའི་བར་དུ་བཙིར་ནས་སྡུག་བསྔལ་མི་བཟོད་པ་མྱོང་དགོས་པ་ཡིན། རི་གཉིས་ཀྱིས་བཙིར་ནས་སླར་གློད་པ་དང་། ང་ཚོས་གསོན་ཐབས་བྱེད་ཅིང་། ཡང་བསྐྱར་བཙིར་ནས་གློད་དེ་ཡང་ནང་ཡང་དུ་འབྱུང་གི་ཡོད། དེ་ལྟ་བུའི་སྡུག་བསྔལ་དེ་རང་གི་སྔོན་བསགས་ལས་ངན་ཡོངས་སུ་མ་དག་བར་མྱོང་དགོས་ཀྱི་ཡོད།

དེའི་ཕྱིར་གནད་དོན་གཙོ་བོ་ནི་ང་ཚོས་དགེ་བའི་ལས་གང་མང་སྒྲུབ་ཐབས་དང་མི་དགེ་བའི་ལས་སྤོང་ཐབས་བྱེད་དགོས། དགེ་བའི་ལས་ཆུང་ཙག་ཡིན་ཀྱང་ངེས་པར་དུ་སྒྲུབ་དགོས། དེ་ནི་སངས་རྒྱས་ཀྱི་བསྟན་པའི་ཆོས་ཀྱི་སྙིང་པོ་ཡིན། ང་ཚོས་སངས་རྒྱས་ཀྱི་བསྟན་པའི་ཆོས་དང་དེའི་ཉམས་ལེན་སྐོར་ཤོད་ཀྱི་ཡོད་པས། དགེ་བ་སྒྲུབ་ཐབས་དང་མི་དགེ་བ་སྤོང་ཐབས་བྱེད་དགོས་པ་ནི་གཙོ་བོ་ཡིན།

སངས་རྒྱས་ཀྱི་ཆོས་ནས་གསུང་པའི་ལས་འབྲས་ལ་གདེང་ཐོབ་པ།

ནང་པའི་གཞུང་སྣ་ཚོགས་ནང་ལས་འབྲས་ཀྱི་སྐོར་ལ་ཧ་ཅང་མང་པོ་གསུང་ཡོད། དཔེར་ན། མདོ་མཛངས་བླུན་དང་དེ་བཞིན་བཀའ་འགྱུར་ལྟ་བུ། བཀའ་འགྱུར་གྱི་པོད་སོ་སོར་བོད་ཡིག་ཐོག་ནས་གྲངས་ཀ་བརྒྱབ་ཡོད་པ་དང་། དེ་དག་གི་ནང་ནས་མདོ་སྡེ་ ༼ ས་ ༽ དང་། ༼ ཧ། ༽ ༼ ཤ་ ༽ བཅས་ཀྱི་ནང་འདིའི་སྐོར་ཧ་ཅང་རྒྱས་པོ་གསུངས་ཡོད། བྱས་ཙང་། དེ་དག་གཟིགས་ཐུབ་ན་ཧ་ཅང་ཕན་ཐོགས་ཆེན་པོ་ཡོད།

དཔེར་ན། དགེ་བའི་ལས་བྱས་ན། བདེ་བ་འབྱུང་བ་དང་། མི་དགེ་བའི་ལས་བྱས་ན། འབྲས་བུ་སྡུག་བསྔལ་འབྱུང་བའི་ཚུལ་དེ་ཡང་ང་ཚོས་ནང་པའི་དཔེ་གཞུང་དག་ལས་རྟོགས་ཐུབ། ང་ཚོས་ལུང་ལ་བརྟེན་ནས་དེ་དག་ཁས་ལེན་བྱེད་ཀྱི་ཡོད། གང་ཡིན་ཟེར་ན། ལས་འབྲས་ཀྱི་ཚུལ་དེ་ང་ཚོས་རྒྱུ་མཚན་རིགས་པར་བསམ་བློ་བཏང་ནས་ར་སྤྲོད་ཐུབ་རྒྱུ་ཧ་ཅང་ཁག་པོ་རེད།

གལ་སྲིད་ང་ཚོས་དེའི་ཐད་བསམ་བློ་ཞིབ་མོ་བཏང་ན། ལས་ཀྱི་སྐོར་ཐོག་མར་གསུང་མཁན་དེ་སུ་རེད། མཛད་པ་པོ་སུ་རེད། ལུང་དེའི་ཁུངས་ག་རེ་རེད་དམ་ཞེས་བསམ་བློ་གཏོང་དགོས། གལ་སྲིད་ལུང་གི་ཁུངས་དེ་སེམས་ཡོངས་སུ་དག་པ་དང་སངས་ཡོངས་སུ་རྒྱས་པ་ཞིག་ཡིན་ན། དེ་ལྟ་བུའི་གང་ཟག་ཅིག་གིས་རྫུན་སྨྲ་བ་མི་སྲིད་པ་ཡིན། དེར་མ་ཟད། ལས་རྒྱུ་འབྲས་ཐོག་སངས་རྒྱས་ཤཱཀྱ་ཐུབ་པས་གསུངས་པའི་ལུང་རྣམས་ལ་ང་ཚོས་གདེང་ཁེལ་བའི་ཡིད་ཆེས་ཇི་ལྟར་བྱེད་དམ། ང་ཚོས་སངས་རྒྱས་ཀྱི་གསུང་གི་སྙིང་པོ་སྡེ་སྣོད་གསུམ་མཇལ་དགོས། སྡེ་སྣོད་གསུམ་ནི་འདུལ་བའི་སྡེ་སྣོད། མདོ་སྡེའི་སྡེ་སྣོད། མངོན་པའི་སྡེ་སྣོད་བཅས་ཡིན།

སངས་རྒྱས་ཀྱི་ཆོས་ནང་གསུང་པའི་ཤེས་རབ་ཀྱི་ཕར་ཕྱིན་བརྗོད་བྱར་བྱས་པའི་གཞུང་རྣམས་མཇལ་དགོས། དེ་དག་ནང་སྟོང་པ་ཉིད་དེ་ཡིན་པ་མི་སྲིད་པའི་གྲུབ་ལུགས་མེད་ཚུལ་བསྟན་པའི་སྐོར་གྱིས། ཆོས་རྣམས་རང་བཞིན་གྱིས་གྲུབ་མེད་པ་དང་རྟོག་བཏགས་ཙམ་ཡིན་པའི་ཚུལ་རྒྱས་པར་རྒྱུ་མཚན་གྱི་ཐོག་ནས་ར་སྤྲོད་མཛད་ཡོད། རྒྱུ་མཚན་དེ་དག་ལ་བསམ་བློ་བཏང་ན། ང་ཚོས་གསལ་པོ་བྱས་ཤེས་ཐུབ་རྒྱུ་རེད། རྒྱུ་མཚན་གྱི་ཐོག་ནས་ང་ཚོས་སངས་རྒྱས་ལ་ཡིད་ཆེས་དང་དད་པ་བརྟན་པོ་ཞིག་རྙེད་ཐུབ། ཡིད་ཆེས་སམ་ངེས་ཤེས་དེའི་ཐོག་ནས་སངས་རྒྱས་ནི་ལས་རྒྱུ་འབྲས་བསྟན་པའི་ལུང་དེ་དག་གི་ཁུངས་བཙན་པོའམ་ཡང་དག་པ་ཞིག་ཡིན་པ་རྒྱུས་མངའ་ལོན་ཐུབ། དེ་གཞི་ལ་བཞག་སྟེ། ང་ཚོས་སོ་སོའི་སྤྱོད་ཚུལ་ལ་བྱ་ར་བྱེད་ཐུབ་ཅིང་། ཐ་ན་རིམ་པ་ཆུང་ཙག་ནས་སངས་རྒྱས་ཀྱིས་གསུངས་པ་ནང་བཞིན་ལས་འབྲས་ཀྱི་རྣམ་གཞག་དང་མཐུན་པའི་བྱ་བ་བྱེད་ཐུབ།

དཔེར་ན། སངས་རྒྱས་ཤཱཀྱ་ཐུབ་པས། གལ་སྲིད་ང་ཚོས་དགེ་བའི་ལས་བཅུ་དང་མཐུན་པར་ལས་བཟང་པོ་བྱས་ན། དེའི་ཉེར་ལེན་ལས་སྐྱེ་བ་རྗེས་མ་མངོན་མཐོ་ལྷ་མིའི་གོ་འཕང་འཐོབ་ཐུབ་ཅེས་ཞེས་གསུངས་ཡོད། དེ་ནས་ང་ཚོས་སངས་རྒྱས་ཀྱིས་སྟོང་ཉིད་རྟོགས་པའི་ཤེས་རབ་སྐོར་གང་གསུངས་པ་ཐམས་ཅད་ལ་བལྟ་དགོས། ང་ཚོས་རྒྱུ་མཚན་བསམ་བློ་བཏང་ནས་ཁོང་གིས་དངོས་པོའི་གནས་ལུགས་སྐོར་གང་གསུངས་པ་ཐམས་ཅད་བདེན་པའམ་དོན་ལ་གནས་པར་ཤེས་ན། བདེན་དོན་དེ་གནས་དོན་གཞན་གྱི་ཐོག་ལ་སྦྱོར་དགོས། དཔེར་ན། གལ་སྲིད་ང་ཚོས་བྱ་བ་བཟང་པོ་བྱས་ན། དེའི་འབྲས་བུར་མངོན་མཐོ་ལྷ་མིའི་གོ་འཕང་འཐོབ་པ་ལྟ་བུ། དེ་ལྟར་ལུང་དེ་དག་དོན་ལ་གནས་པའི་ཚུལ་ལ་ངེས་ཤེས་བརྟན་པོ་ཞིག་རྙེད་ཐུབ།

མི་ཁ་ཤས་ཀྱིས། “འགྲོ་བ་མི་ནི་ང་ཚོས་དངོས་སུ་མཐོང་ཐུབ་ཀྱི་ཡོད། འོན་ཏེ་ལྷ་མཐོང་རྒྱུ་མེད་པ་དང་དམྱལ་བ་པ་དང་ཡི་དྭགས་སོགས་ཡོད་ཟེར་བ་ནི་བདེན་པ་མིན།” ཞེས་ཟེར་གྱི་ཡོད། མི་དེ་དག་གིས་སོ་སོས་མ་མཐོང་བ་རྒྱུ་མཚན་དུ་བྱས་ཏེ་མ་མཐོང་བ་དེ་མེད་པའི་སྒྲུབ་བྱེད་དུ་འགོད་ཀྱི་ཡོད། འོན་ཀྱང་ང་ཚོས་སོ་སོས་མ་མཐོང་བ་ཙམ་རྒྱུ་མཚན་དུ་བྱས་ཏེ་ཆོས་དེ་མེད་ཅེས་ཟེར་ན། རྒྱུ་མཚན་ལྟར་སྣང་ངམ་རིགས་པ་རྣོ་མེད་ལས་མ་འདས། ཕྱོགས་གཞན་ཞིག་ནས། དཀར་པོ་དགེ་བའི་ལས་ལ་བརྟེན་ནས་ཕྱི་མ་མངོན་མཐོ་ལྷ་མིའི་གོ་འཕང་འཐོབ་པ་དང་། ནག་པོ་མི་དགེ་བའི་ལས་བསགས་ནས་ཕྱི་མ་ངན་འགྲོའི་སྐྱེ་བ་ལེན་རྒྱུ་ངེས་པ་སོགས་ལ་ཡིད་ཆེས་བྱེད་པ་ནི། གཞི་རྟེན་ཡང་དག་པ་ཞིག་ཡིན་ཞིང་མཐར་ཐུག་སངས་རྒྱས་ཐུབ་པའི་རྩ་བ་ཞིག་ཀྱང་ཡིན། དེར་བརྟེན་སངས་རྒྱས་ཀྱིས་གང་གསུངས་པ་དེར་གདེང་ཚོད་དང་བཅས་ཡིད་ཆེས་བྱེད་པ་ནི་ལམ་མ་ནོར་བ་ཞིག་ཡིན། གང་ཡིན་ཟེར་ན། ཁོང་གི་བླ་ན་མེད་པའི་ཚད་མའི་སྐྱེས་བུ་ཞིག་ཡིན། གཞི་དེའི་ཐོག་ནས་ང་ཚོས་སངས་རྒྱས་ཀྱིས་གང་གསུངས་པ་དང་མཐུན་པའི་ཐོག་ནས་སོ་སོའི་བྱ་སྤྱོད་ལ་བྱ་ར་ཡང་དག་པ་ཞིག་བྱེད་ཐུབ། རྒྱུ་མཚན་ནི། ཁོང་གིས་གང་གསུངས་པའི་ཆོས་ཞིབ་ཅིང་ཕྲ་བ་ཐམས་ཅད་ལས་རྒྱུ་འབྲས་དང་འབྲེལ་བའི་ཐོག་ནས་ལམ་ཕྱིན་མ་ལོག་པ་ཞིག་བསྟན་ཡོད།

གནད་དོན་དེ་དག་ཉམས་ལེན་ནང་སྒྲིལ་ཕྱོགས་ནི་ང་ཚོས་དྲང་པོ་དྲང་གཞག་ངང་སོ་སོས་མི་དགེ་བའི་ལས་ཤིག་བྱེད་ཀྱི་འདུག་ན་ལམ་སེང་ངོས་འཛིན་བྱ་ཐབས་བྱེད་དགོས། ལས་ནོར་བ་ཞིག་བྱེད་པ་ར་འཕྲོད་མ་ཐག་དེ་ལས་ངེས་པར་དུ་ཟློག་དགོས་པ་ཡིན། དེ་ག་ནང་བཞིན་ང་ཚོས་དགེ་བའི་ལས་ཤིག་བྱེད་ཀྱི་འདུག་ན། དེའི་ཕན་ཡོན་ཤེས་ལ་བརྟག་པ་བྱས་ཏེ། སླད་ཕྱིན་གང་ཐུབ་ཅི་ཐུབ་ཀྱིས་དགེ་བའི་ལས་མང་ཙམ་བྱ་ཐབས་ལ་འབད་དགོས། དེ་ནི་ཉམས་ལེན་གྱི་སྙིང་པོ་ཡིན། དེ་ནི་འགོ་འཛུགས་བྱེད་ས་དེ་ཡིན།

ཐོག་མ་མེད་པ་ནས་ང་ཚོ་མི་དགེ་བའི་ལས་ལ་གོམས་འདྲིས་ཧ་ཅང་ཤུགས་ཆེན་པོ་ཡོད། དེར་བརྟེན་ང་ཚོས་ག་རེ་བྱས་ཀྱང་། མི་དགེ་བའི་གོམས་འདྲིས་དང་། དེའི་བག་ཆགས་དང་། ངན་ལངས། འདོད་ཕྱོགས་རྣམས་ཀྱི་དབང་འོག་ཏུ་ཡོད། དེ་དག་ཧ་ཅང་ཤུགས་ཆེན་པོ་ཡོད། འོན་ཀྱང་རང་ངོས་ནས་ག་རེ་བྱེད་དགོས་སམ་ཞེ་ན། ག་ལེར་ག་ལེར་འབད་བརྩོན་བྱས་ཏེ་དགེ་བའམ་གོམས་གཤིས་བཟང་པོ་ཞིག་རང་རྒྱུད་དུ་འཇགས་གང་ཐུབ་བྱེད་དགོས། ནམ་ཞིག་རང་རྒྱུད་ཀྱི་གོམས་གཤིས་ངན་པ་དེ་དག་བསལ་ཐུབ་ན། རིམ་བཞིན་མི་དགེ་བའི་ལས་སུ་འཇུག་རྒྱུའི་འདོད་ཕྱོགས་ཉུང་དུ་ཉུང་དུ་ཕྱིན་ཏེ། དགེ་བའི་ལས་སུ་འཇུག་འདོད་ཆེ་རུ་ཆེ་རུ་འགྲོ་གི་ཡོད། མཐར་ང་ཚོས་ལས་བཟང་པོ་དང་ཡག་པོ་ཤ་སྟག་བྱེད་ཐུབ།

དགེ་བཤེས་འབན་གུང་རྒྱལ་གྱི་དཔེ།

“གསོག་པ་དང་སྦྱོང་བ་” ཞེས་པའི་ཐ་སྙད་གཉིས་པོར་གཞིགས་ན། དེ་གཉིས་ཀྱིས་སྔོན་འགྲོའི་ཉམས་ལེན་སྐོར་འགྲེལ་བརྗོད་བྱེད་ཀྱི་ཡོད། ང་ཚོས་དགེ་བའི་ལས་དང་གོམས་གཤིས་བཟང་པོ་གསོག་པའམ་གོང་འཕེལ་གཏོང་བ་དང་། མི་དགེ་བའི་ལས་སམ་ཉོན་མོངས་རྣམས་སྦྱོང་བར་གོ་གི་ཡོད། འདིར་ངས་ཁྱེད་རང་ཚོས་དགེ་བཤེས་འབན་གུང་རྒྱལ་གྱི་མི་ཚེའི་ལོ་རྒྱུས་དང་སྦྱར་ནས་བཤད་ན། ཕན་ཐོགས་ཆེ་བར་བསམས། ལོ་རྒྱུས་ཧ་ཅང་ཡག་པོ་ཡོད།

བོད་ནང་བཀའ་གདམས་སྲོལ་རྒྱུན་ནང་ཐོག་མར་མཚན་ལ་དགེ་བཤེས་འབན་གུང་རྒྱལ་ཞེས་བྱ་བའི་བཤེས་གཉེན་ཧ་ཅང་བཟང་པོ་ཞིག་ཡོད། ཁོང་གི་མཚན་ལ་ཡོངས་གྲགས་མིང་འདོགས་སུ་འཕན་ཀུན་རྒྱལ་ཞེས་ཟེར། དེའི་དོན་ནི་ཡུལ་འཕན་པོའི་ནང་གི་ཇག་པའི་འགོ་གཙོ་ཞིག་ལ་གོ་བ་ཡིན། ཕྱིས་སུ་ཁོང་ཉམས་ལེན་པ་ཞིག་ཆགས་ཏེ། ཆོས་མིང་དུ་དགེ་བཤེས་ཚུལ་ཁྲིམས་རྒྱལ་བ་ཞེས་ཐོབ། དེའི་དོན་ནི་ཚུལ་ཁྲིམས་རྣམ་པར་དག་པ་དང་ལྡན་པར་གོ་བ་ཡིན། འོན་ཀྱང་ཁོང་ཆོས་ཕྱོགས་ཀྱི་ཉམས་ལེན་པ་ཞིག་མ་ཆགས་གོང་། མཚན་ཐོག་མ་དེ་འབོད་པའི་སྐབས། གཏུམ་དྲག་ཆེ་བའི་ཇག་པ་ཞིག་ཡིན་ཞིང་སྤྱོད་པ་ཧ་ཅང་རྩུབ་པོ་ཡོད། ཁོང་ལ་ད་དུང་ས་ཞིང་ཡོད་ཅིང་ས་ཞིང་ཁྱོན་ཨེ་ཀར་བཞི་བཅུ་ཙམ་ཡོད། ས་ཞིང་ནང་ལས་ཀ་བྱེད་པའི་སྐབས་ཁོང་གིས་ག་དུས་ཡིན་ཀྱང་ལས་ཀ་ངན་པ་ཤ་སྟག་བྱེད་ཀྱི་ཡོད། དེར་བརྟེན་མི་རྣམས་ཀྱིང་ཁོང་ལ་ “དཀའ་རྙོག་གི་ས་ཞིང་ཨེ་ཀར་བཞི་བཅུ་ཡོད་པའི་མི་” ཞེས་ཟེར་སྲོལ་ཡོད།

ཉིན་གཅིག་ཁོང་རང་ཁྱིམ་གྱི་ཉེ་འགྲམ་གྱི་ལ་ཞིག་གི་སྟེང་འགྲོ་བའི་སྐབས། འགྲིམ་འགྲུལ་བྱེད་མཁན་གྱི་ཚོང་པ་ཞིག་ཐུག་པ་དང་། ཚོང་པ་དེས་འཕན་རྐུན་རྒྱལ་ཐུག་པ་མ་ཤེས་པར། “འདིའི་གཡས་གཡོན་དུ་སྤྱོད་རྩུབ་ཅན་གྱི་ཇག་པ་འཕན་རྐུན་རྒྱལ་མཐོང་རྒྱུ་འདུག་གམ།” ཞེས་སྐད་ཆ་དྲིས་པར། འཕན་རྐུན་རྒྱལ་གྱིས། “ང་འཕན་རྐུན་རྒྱལ་ཡིན།” ཞེས་ལན་བཏབ་མ་ཐག་ཚོང་པ་ཤིན་ཏུ་སྐྲག་ནས་རྟ་ཐོག་ནས་སར་ཟག་སྟེ་རིའི་སྟེང་ནས་མར་ལྷུངས་བ་རེད། དེ་མཐོང་བ་དང་འཕན་རྐུན་རྒྱལ་གྱི་སེམས་ནང་གཡོ་འགུལ་ཚད་མེད་ཐེབས་ཏེ། “གལ་སྲིད་ངའི་མིང་ཙམ་ཐོས་པ་ཙམ་གྱིས་གཞན་ལ་འཇིགས་སྣང་དེ་འདྲ་ཡོང་གི་ཡོད་ན། དངོས་གནས་ཞེད་སྣང་རེད། ངས་མི་དགེ་བའི་ལས་ཧ་ཅང་སྟོབས་ཆེན་པོ་གསོག་གི་འདུག” །ཞེས་བསམས་ནས་ཁོང་གིས་སྔོན་བྱས་ལས་ལ་འགྱོད་སེམས་བྱས་ཏེ། ཆོམ་རྐུན་སོགས་སྤྱོད་ངན་གྱི་རིགས་བྱ་རྒྱུ་མིན་ཞེས་བློ་ཐག་གཙང་མ་བཅད་པ་རེད།

དེ་རྗེས་སེམས་ཐག་གཙང་བཅད་ཀྱིས་དགེ་བའི་བཤེས་གཉེན་ཞིག་བསྟེན་པ་དང་། ལས་དོན་དང་ཉམས་ལེན་སོགས་ལ་དཀའ་སྤྱད་འབད་བརྩོན་ཧུར་ཐག་གནང་། ཁོང་གིས་མི་དགེ་བ་བཅུ་སྤངས་ནས་དགེ་བའི་ལས་བཅུ་ཉམས་སུ་ལེན་རྒྱུ་དེ་གཙོ་བོར་གནང་སྟེ། ཉིན་རེ་བཞིན་རང་གིས་གང་བྱས་ཐོར་བཀོད། ཁོང་ལ་སོལ་བ་ཆུང་ཆུང་ཞིག་ཡོད་པ་དང་། གལ་ཏེ་མི་དགེ་བའམ་འཚེ་བའི་ལས་ཤིག་བྱས་ན། རྡོའི་སྟེང་རྟགས་ནག་པོ་ཞིག་བརྒྱབ་པ་དང་། དེ་བཞིན་སོལ་བ་དཀར་པོ་ཞིག་ཡོད་ཅིང་ག་དུས་དགེ་བའི་ལས་བྱས་ཀྱང་། རྟགས་དཀར་པོ་ཞིག་རྒྱག་གི་ཡོད། དེ་ལྟར་ཁོང་གིས་ཟིན་ཐོ་ཉར་གྱི་ཡོད། འགོ་སྟོད་དུ་ཉིན་ལྟར་རྟགས་ནག་པོ་མང་བ་བྱུང་ཞིང་དཀར་པོ་ཧ་ལམ་དཀོན། འོན་ཀྱང་མཐའ་མ་རྟགས་ནག་པོ་ཉུང་དུ་ཉུང་དུ་ཕྱིན་ནས། དཀར་པོ་མང་དུ་རིམ་གྱིས་འཕེལ་ཡོད་པ་རེད།

དེ་ལྟར་ཁོང་གིས་ཉམས་ལེན་གནང་བའི་འགོ་སྟོད་དུ་རྟགས་དཀར་པོ་ལས་ནག་པོ་མང་བར་བརྟེན་རང་གི་ལག་པ་གཡོན་མ་དེ་གཡས་པས་ཟིན་ནས་བཙིར་ཏེ། “འཕན་རྐུན་རྒྱལ། ཁྱོད་དེ་འདྲའི་གདུག་རྩུབ་ཆེ་བ་ལ། སྔོན་མ་ཁྱོད་ངན་ལངས་ཤོར་བ་ཞིག་ཡིན། ད་དུང་མུ་མཐུད་ལས་ངན་ལ་འཇུག་གི་འདུག །དེ་འདྲ་བྱས་ན་ཕན་པ་ཅི་ཡང་མེད།” ཅེས་རང་གིས་རང་ལ་གཤེ་གཤེ་ཚབས་ཆེན་བཏང་། དེ་ལྟར་ཁོང་གིས་རང་གི་བྱས་ཉེས་ངོས་བཟུང་ནས་རང་གིས་རང་གཤེ་གཤེ་བཏང་བ་རེད། འོན་ཀྱང་དེའི་རྗེས་ཁོང་གིས་ཉམས་ལེན་ཧུར་ཐག་གནང་སྟེ། ཉིན་རེའི་ཉམས་ལེན་རྣམས་ཐོ་འགོད་བྱས། མཛོད་ཁང་ནང་གི་ཚོང་པ་ཞིག་དང་འདྲ་བར་ཉིན་གྱི་མཐའ་མ་དེར་ཐོ་འགོད་བྱས་པ་རྣམས་རྩིས་རྒྱག་གི་ཡོད། མཐར་ཐོ་གཞུང་ནང་རྟགས་དཀར་པོ་རྦད་དེ་མང་བ་བྱུང་། དེ་ནས་ཁོང་གིས་རང་གི་ལག་པ་གཡས་པ་དེ་གཡོན་མས་བཟུང་ནས། རང་གིས་རང་ལ་འཚམས་འདྲི་བྱས་ཤིང་། “ད་ཁྱོད་དངོས་གནས་དགེ་བཤེས་ཚུལ་ཁྲིམ་རྒྱལ་བ་ཆགས་འདུག །ཁྱོད་ཀྱིས་བྱ་བ་ཐམས་ཅད་ཡག་པོ་བྱས་འདུག” །ཅེས་བརྗོད་ཀྱི་ཡོད། དེ་ནི་ཁོང་གིས་རང་གིས་རང་ལ་རྗེས་སུ་ཡི་རངས་བྱེད་སྟངས་དེ་ཡིན།

དེ་ལྟ་བུའི་ཉམས་ལེན་པ་རླབས་ཆེན་ཞིག་ཆགས་སྟབས། ཁོང་གི་མཚན་སྙན་ཕྱོགས་ཀུན་ཏུ་ཁྱབ། ཉིན་གཅིག་ཁོང་ཉེ་འགྲམ་གྱི་གྲོང་ཁྱེར་ནང་བསོད་སྙོམས་ལ་ཕེབས་པའི་སྐབས་ཁྱིམ་ཚང་ཞིག་གི་ནང་བསོད་སྙོམས་སློང་བར་ཕེབས། ཁྱིམ་ཚང་དེའི་སྒོ་འགྲམ་དུ་གཟེད་མ་ཞིག་གི་ནང་ཇ་ལོས་ཁེངས་པ་ཞིག་གཟིགས། ཁོ་རང་སྔོན་མ་རྐུ་ཁྱེར་ལ་རྦད་དེ་གོམས་ནས་བག་ཆགས་ཤུགས་ཆེན་པོ་ཡོད་སྟབས། རང་དབང་མེད་པར་ལག་པ་རང་འགུལ་གྱིས་གཟེད་མའི་ནང་བརྐྱངས་ཏེ་ཇ་ལོ་ཏོག་ཙམ་ལེན་རྩིས་གནང་། དེ་མ་ཐག་དྲན་ཤེས་བསྟེན་ནས་སོ་སོའི་ལག་པ་སོ་སོས་འཇུས་ཏེ། ཁྱིམ་བདག་ལ། “མགྱོགས་པོ་ཤོག །འདིར་རྐུ་མ་འདུག །ངས་རྐུ་མ་བཟུང་ཡོད།” ཅེས་སྐད་ཤུགས་ཆེན་པོས་བོས།

ཡང་ཐེངས་གཞན་ཞིག་ལ་ཁོང་ཁང་ཆུང་ཞིག་གི་ནང་སྒོམ་བརྒྱབ་པའི་སྐབས། ཕྱི་ཉིན་དེར་ཁོང་གི་སྦྱིན་བདག་གཟིགས་སྐོར་ལ་ཕེབས་སྐོར་བརྡ་ལན་ཞིག་འབྱོར། དེར་བརྟེན་ཉིན་དེའི་ཞོགས་པ་སྔ་པོ་ནས་ལངས་ཏེ། ཁང་ཆུང་ནང་གད་ཕྱིས་གཙང་མ་བརྒྱབ་པ་དང་། མཆོད་ཤོམ་སྟེང་མཆོད་པ་གྲ་རྒྱས་པོ་ཞིག་བཤམས། དེ་ནས་མར་བསྡད་དེ་སོ་སོའི་ཀུན་སློང་ལ་དཔྱད་པ་བྱས། གང་ཡིན་ཟེར་ན། དེ་ནི་ཁོང་གི་རྒྱུན་ལྡན་གྱི་ཉམས་ལེན་གནང་ཕྱོགས་ཤིག་ཡིན། ང་ཚོས་ཞོགས་པ་སོ་སོའི་ཁྱིམ་གྱི་མཆོད་ཤོམ་སྟེང་མཆོད་པ་ཕུལ་ནས་སྒོམ་འགོ་འཛུགས་ཀྱི་ཡོད། དེ་ནས་མར་བསྡད་དེ་སོ་སོའི་ཀུན་སློང་ལ་བརྟག་པ་བྱེད་སྲོལ་ཡོད། ཁོང་མར་བཞུགས་ནས་ཀུན་སློང་ལ་བརྟག་དཔྱད་བྱས་པ་དང་། ཁོང་གིས་བསམ་པར། “དཀའ་ལས་དེ་ལྟར་བརྒྱབ་སྟེ་ཁང་པ་གཙང་བཟོ་བྱས་ནས་མཆོད་པ་རྒྱས་པོ་བཤམས་པའི་རྒྱུ་མཚན་གང་ཡིན་ནམ།” ཞེས་བསམ་བློ་འཁོར། དེར་བརྟེན་ཁོང་གིས་འཇིག་རྟེན་ཆོས་བརྒྱད་ཀྱི་གཞན་དབང་དུ་སོང་ནས་དེ་ལྟར་བྱེད་པ་རྟོགས། དེ་དག་ཚང་མ་སྦྱིན་བདག་གི་ཡིད་མགུ་ཆེད་བྱས་པ་ངོས་འཛིན་ཐུབ། སོང་ཙང་། དེ་ལྟ་བུའི་ཀུན་སློང་ནི་སྡུག་ཅག་ཅིག་ཡིན་པ་ཤེས་ནས། སྒོམ་འགྲམ་དུ་ཕྱིན་ཏེ་གད་སྙིགས་བླུག་སྣོད་ནང་ཐལ་བ་ཡོད་པ་ལས་གང་ཙམ་བླངས་ཏེ། མཆོད་ཤོམ་སྟེང་བཏོར་ནས་ཚང་མ་ཛར་ཛོར་བཟོས། དེ་རྗེས་ཁོང་གི་སྙན་གྲགས་གང་སར་ཁྱབ་སྟེ་དགེ་བཤེས་ཚུལ་ཁྲིམས་རྒྱལ་བ་ཞེས་འཇིག་རྟེན་ཆོས་བརྒྱད་ཀྱི་བྱ་སྤྱོད་ཐམས་ཅད་ལ་ཐལ་བ་བཏོར་ཞེས་ཀུན་ལ་གྲགས་པ་རེད།

ཡང་ཉིན་ཞིག་མི་ཞིག་གིས་ཉམས་ལེན་པ་འགའ་ཞིག་ལ་ཞོ་སྦྱིན་པའི་སྐབས། འཕན་རྐུན་རྒྱལ་ཁོང་དེ་དག་གི་ཁྲོད་ནས་རྒྱབ་ཏུ་བསྡད་ཡོད་ཅིང་། མདུན་གྱི་མི་རྣམས་ལ་ཞོ་བྱིན་པའི་སྐབས། ཁོང་གིས་གཞན་རྣམས་ལ་བཟའ་བཏུང་མང་པོ་ཐོབ་པར་དོ་སྣང་བྱུང་སྟེ། རྒྱབ་ནས་སེམས་ནང་གང་བྱུང་དྲན་བཞིན་རང་ལ་ཞོ་འདང་ཨེ་ཡོང་སྙམ་པ་དང་། དེ་མ་ཉིད་དུ་སེམས་ནང་རྣམ་རྟོག་དང་བསམ་ངན་སྐྱེ་འགོ་ཚུགས། ཞོ་སྦྱིན་མཁན་དེ་མཐར་ཁོང་གི་དྲུང་དུ་སླེབས་པ་དང་། འཕན་རྐུན་རྒྱལ་གྱིས་སོ་སོས་གང་བསམ་པ་དེ་ཤེས་ནས། རང་གི་ཕོར་བ་ཁ་སྦུབ་བསློགས་ཏེ། “ང་ལ་ཞོ་མི་དགོས། ཐུགས་རྗེ་ཆེ། མདུན་གྱི་མི་དེ་དག་ཞོ་འཐུང་བར་བལྟས་ནས་ང་འདོད་པ་ཚིམས་སོང་།” ཞེས་བརྗོད།

འཕན་རྐུན་རྒྱལ་གྱིས་རྟག་ཏུ་རང་ཉིད་ཉམས་ལེན་པ་ཉམས་ཆུང་ཞིག་ཡིན་ཞེས་བརྗོད་ཀྱི་ཡོད། འོན་ཀྱང་ཉམས་ལེན་བྱེད་སྟངས་ཐད་ཁོང་གིས་མི་དགེ་བའི་ལས་ཤ་སྟག་བྱེད་པ་དོ་སྣང་བྱུང་ནས། སེམས་ནང་རྣམ་རྟོག་དང་གྲུང་ཤ་སྐྱེ་གི་ཡོད། ཡང་དགེ་བའི་ལས་ག་དུས་བྱས་ཀྱང་ཅུང་ཟད་ལྷོད་ལྷོད་བྱས་ཏེ། “དེ་ནི་ངའི་ཉམས་ལེན་བྱེད་སྟངས་རེད” །ཅེས་བརྗོད་ཀྱི་ཡོད།

ཆོས་ཉམས་ལེན་བྱེད་མཁན་ཞིག་གིས་གཙོ་བོ་རྟག་ཏུ་རང་གི་སེམས་ལ་བྱ་ར་ནན་པོ་བྱེད་དགོས། སོ་སོའི་ཀུན་སློང་དང་ལས་གང་ཞིག་བྱེད་མིན་ཐད་རྟག་ཏུ་དཔྱད་པ་བྱེད་རྒྱུ་གལ་ཆེ། དེ་ནི་དོ་སྣང་དགོས་པའི་གནད་དོན་གཙོ་བོ་ཞིག་ཡིན། ང་ཚོས་མི་གཞན་གྱི་ཐོག་མི་འདོད་པའམ་བྱུས་ཏོག་ཞེ་དྲག་བྱེད་རྒྱུ་མེད། དེ་ནི་སོ་སོའི་ལས་འགན་མ་ཡིན། དེ་ལས་ལྡོག་སྟེ། རང་གིས་ག་རེ་བྱེད་པ་དང་སོ་སོའི་སྤྱོད་ཚུལ་ལ་དོ་སྣང་བྱེད་དགོས་ཀྱི་ཡོད། རྒྱལ་སྲས་ཆེན་པོ་ཞི་བ་ལྷས་ཀྱང་དེའི་ཐོག་ནན་པོ་གསུངས་ཡོད་ཅིང་། གཞུང་འདིའི་ནང་དུའང་།

༤༽ ངེས་པ་བརྟན་པོ་རྙེད་ནས་ཉེས་པའི་ཚོགས།། ཕྲ་ཞིང་ཕྲ་བ་རྣམས་ཀྱང་སྤོང་བ་དང༌།། དགེ་ཚོགས་མཐའ་དག་སྒྲུབ་པར་བྱེད་པ་ལ།། རྟག་ཏུ་བག་དང་ལྡན་པར་བྱིན་གྱིས་རློབས།། ཞེས་གསུངས་ཡོད།

སྐབས་འདིར། “རྟག་ཏུ་བག་དང་ལྡན་པར་བྱིན་གྱིས་རློབས། །” ཞེས་བརྗོད་སྐབས། སྨྱོན་པ་ལྟ་བུ་དང་བསམ་མེད་ངང་ལས་ངན་མི་བྱེད་པར་བྱིན་གྱིས་རློབས་ཞེས་གསོལ་བ་འདེབས་པའམ། ཡང་ན་སེམས་སྐུལ་དེ་ལྟར་གནང་རོགས་ཞུ་གི་ཡོད། དཔེར་ན། ང་ཚོའི་ལུས་ཀྱི་བྱ་སྤྱོད་ཐོག་ནས་ཚོད་འཛིན་མེད་པར་སོ་སོའི་དུས་ཚོད་རྣམས་ཆང་འཐུང་བ་དང་། ཐ་མག་འཐེན་པ། དུག་རྫས་ལོངས་སྤྱོད་བྱེད་པ་སོགས་ཀྱི་ཆེད་དུ་ཆུད་ཟོས་སུ་གཏོང་གི་མིན་ཞེས་བརྟན་པོ་བཟོ་དགོས། ངག་གི་ཐོག་ནས་བསམ་བློ་ཅི་ཡང་མ་བཏང་བར་ཁ་ནས་གང་ཐོན་སྨྲ་བ་དང་གཞན་ཚིག་ངན་སྨྲ་བ་སོགས་སྡོམ་དགོས། དེ་ག་ནང་བཞིན་ཡིད་ཀྱི་ཐོག་ནས་གཞན་བརྣབ་སེམས་དང་གནོད་སེམས་སོགས་མི་སྐྱེ་བ་བྱེད་ཀྱི་ཡིན་ཞེས་བསམ་བློ་བརྟན་པོ་ཞིག་དགོས། དེ་ཡང་ལུས་ངག་ཡིད་གསུམ་གྱི་ཐོག་ནས་བག་མེད་ཀྱི་ཐོག་བྱ་སྤྱོད་ཅི་ཡང་བྱེད་ཀྱི་མིན་ཞེས་ངེས་བརྟན་བཟོ་དགོས། དེ་ནི་སློབ་དཔོན་ཟླ་བ་གྲགས་པས་མགོན་པོ་ཀླུ་སྒྲུབ་ཀྱི་གཞུང་དབུ་མ་རྩ་བ་ཤེས་རབ་ཀྱི་འགྲེལ་པ་དབུ་མ་འཇུག་པའི་ནང་དུའང་གསུངས་ཡོད། སློབ་དཔོན་ཟླ་བ་གྲགས་པའི་ཞལ་སྔ་ལས། ང་ཚོས་མི་དགེ་བའི་ལས་བཅུ་ལས་སྤོང་བའི་ཕྱིར་རང་གི་སྤྱོད་ལམ་ཚུལ་བཞིན་དུ་སྲུང་དགོས་པའི་ཐད་དམིགས་བསལ་ནན་པོ་བྱས་གསུངས་ཡོད།

ཚུལ་ཁྲིམས་བསྲུང་བའི་གལ་གནད།

བཟང་སྤྱོད་དང་མཐུན་པའི་ཉམས་ལེན་དེ་དག་ཚང་མར་བལྟས་ན། ང་ཚོས་མི་དགེ་བའི་ལས་སྤོང་ཐབས་དང་དགེ་བའི་ལས་སྒྲུབ་ཐབས་བྱེད་དགོས་ཀྱི་ཡོད། དེ་ལྟ་བུའི་སྤངས་བླངས་ཀྱི་བྱ་བ་དེ་རྩ་བའི་ཆ་ནས་ཐོག་མའི་ཀུན་སློང་གི་རིམ་པའི་ཁོང་སུ་གཏོགས་ཀྱི་ཡོད། ད་ཆ་ང་ཚོས་སོ་སོའི་ཉམས་ལེན་གྱི་གནས་ཚད་དེ་མཐོ་རུ་ཕྱིན་པ་དང་། “དེ་ནི་ལས་དང་པོ་བ་ཚོའི་ཉམས་ལེན་ཆུང་ཙག་དེ་འདྲ་རེད། ང་ལ་དགོས་མཁོ་ཆེར་མ་མཆིས།” ཞེས་ཟེར་ནས་དེ་ལ་སྣང་ཆུང་གཏོང་མི་ཉན། ཚུལ་ཁྲིམས་ཡང་དག་པ་ཞིག་སྲུང་བ་དང་ཉམས་ལེན་གང་འདྲ་ཞིག་བྱས་ཀྱང་གཞི་རྩ་ནས་ཧ་ཅང་བརྟན་པོ་དགོས། དེ་ནི་ང་ཚོ་རྐང་པ་གཉིས་ཀྱི་སྟེང་ཡར་ལངས་པ་དང་འདྲ། རྐང་པ་གཉིས་ལ་བརྟེན་ནས་གོམ་པ་སྤོ་བ་དེས་རྨང་གཞི་བརྟན་པོ་ཞིག་སྐྲུན་གྱི་ཡོད།

གལ་སྲིད་ང་ཚོས་གཞན་ལ་གནོད་པའི་ལས་སྡོམ་པའི་ཚུལ་ཁྲིམས་སྲུང་རྒྱུར་སྣང་ཆུང་དང་གལ་ཆེན་པོ་མ་བརྩིས་པ་དང་རྟག་ཏུ་ལས་བཟང་པོའམ་དགེ་བའི་ལས་བྱ་རྒྱུའི་འབད་བརྩོན་མ་བྱས་པར། དེ་གལ་ཆེན་པོ་མ་རེད་ཅེས་བརྗོད་དེ། སྟོང་པ་ཉིད་རྟོགས་ཐབས་བྱེད་པའམ་བྱང་ཆུང་སེམས་རིན་པོ་ཆེ་བསྐྱེད་ཐབས་བྱེད་པ། ཡང་ན་སྔགས་ཀྱི་ཉམས་ལེན་བྱེད་པར་འབད་བརྩོན་བསྟེན་ན་དོན་འབྲས་སོན་པ་ཞིག་ནམ་ཡང་ཡོང་མི་ཐུབ། དེ་ལྟར་བྱས་ན་དོན་མེད་རེད། དང་པོ་ཡོན་ཏན་ཀུན་གྱི་གཞིར་གྱུར་པའི་ཚུལ་ཁྲིམས་ཀྱི་རྐང་པ་དེ་ཡག་པོ་སྲུང་སྟེ། གཞི་ནས་ཉམས་ལེན་གཞན་རྣམས་ལ་འབད་བརྩོན་བྱེད་དགོས། རྐང་པའམ་གཞི་རྟེན་དེ་མེད་པར་ཉམས་ལེན་དེ་དག་བྱེད་མི་ཐུབ། འདས་པའི་དུས་སུ་སེ་ར་དགོན་པའི་ནང་སོག་པོའི་དགེ་བཤེས་ཤིན་ཏུ་མཁས་པ་ཞིག་ཡོད། ཐེངས་གཅིག་ཚོང་པ་ཞིག་ཁོང་གི་དྲུང་དུ་བཅར་ནས་སྟོང་ཉིད་ཐོག་ཆོས་སྟོན་རོགས་ཞེས་ཞུས་པར། དགེ་བཤེས་དེས། “སྔོན་ལ་སྟོང་ཉིད་ཕར་ཞོག །རྐུན་པོ་འདི་ལྟར་བྱེད་མཚམས་འཇོག་དགོས།” ཞེས་གསུངས།

ཚུལ་ཁྲིམས་ཀྱི་བསླབ་པ་ཚུལ་བཞིན་དུ་སྲུང་རྒྱུ་དང་མི་དགེ་བའི་ལས་དེ་དག་སྤོང་རྒྱུ་ཧ་ཅང་གལ་ཆེན་པོ་རེད། འདིར་ཁྱེད་རང་ཚོར་དགེ་བའི་བཤེས་གཉེན་ཧ་ཅང་ཡག་པོ་ཡོད་རེད། ཁྱེད་རང་ཚོས་ཁོང་ལ་ལས་རྒྱུ་འབྲས་ཀྱི་ཐོག་ལ་ཆོས་མང་ཙམ་སྟོན་རོགས་ཞེས་ཞུ་དགོས། ལྷག་པར་དུ་དགེ་བ་དང་མི་དགེ་བའི་ལས་གཉིས་ལས་སྔ་མ་ཉམས་སུ་ལེན་རྒྱུ་དང་ཕྱི་མ་དོར་བྱ་ཡིན་པའི་ཚུལ་ལ་བཀའ་སློབ་མང་ཙམ་ཞུ་དགོས། བླ་མའི་བཀའ་སློབ་བཞིན་དུ་ལས་འབྲས་ཀྱི་རྣམ་གཞག་དང་དགེ་སྡིག་གི་རྣམ་གཞག་ཐོག་སྤང་བླངས་ཡང་དག་པ་བྱས་ན། ཕྱི་མ་ངན་སོང་དུ་སྐྱེ་གི་མེད། གཞི་རྟེན་དེའི་ཐོག་ནས་སྐྱེ་བ་ཕྱི་མ་མིའམ་ལྷའི་གནས་སུ་སྐྱེ་ཐུབ་ཀྱི་ཡོད། དེ་རྗེས་མུ་མཐུད་སྐྱེ་བ་བཟང་དུ་བཟང་དུ་འགྲོ་ཐུབ། སྤང་བླངས་འཇུག་ལྡོག་ཚུལ་བཞིན་དུ་བྱས་ཏེ་མཐར་སངས་རྒྱས་ཀྱི་གོ་འཕང་སྒྲུབ་ཐུབ། དེ་ཧ་ཅང་དཀའ་ལས་ཁག་པོ་ཞིག་མ་རེད།

རྩ་བའི་དབྱེ་གཞིའི་ཐོག་ནས་དགེ་བ་བཅུ་དང་མི་དགེ་བ་བཅུ་ཡོད། ང་ཚོས་དེ་དག་ལ་ཚུལ་བཞིན་དུ་བརྟག་པ་བྱས་ཏེ་སོ་སོའི་སྒོ་གསུམ་གྱི་སྤྱོད་པར་གཟབ་ནན་བྱེད་དགོས། སོ་སོས་སོ་སོར་དཔྱད་པ་བྱེད་སྟངས་དེ་ང་ཚོས་དགེ་བཤེས་འཕན་རྐུན་རྒྱལ་ལྟར་བྱེད་དགོས། དེ་ལྟར་བྱས་ན་ཡར་རྒྱས་འགྲོ་ཐུབ། ཐེངས་ཤིག་འཕན་རྐུན་རྒྱལ་གྱིས། “ང་སྔོན་མ་ཇག་པ་བྱས་ལམ་རྙིང་པར་འགྲོ་སྐབས། ང་ལ་ས་ཞིང་ཧ་ཅང་ཁྱོན་ཆེན་པོ་ཡོད་ཅིང་། རྔོན་རྒྱག་པ་དང་། ཉ་འཛིན་པ། ལམ་སྟེང་གི་འགྲུལ་པ་བཅོམ་པ་བྱས་ཀྱང་། ཟས་འདང་ངེས་ཐོབ་ཐུབ་པ་མ་བྱུང་། ད་ཆ་ངས་འཇིག་རྟེན་པའི་བྱ་གཞག་བློས་བཏང་སྟེ་ལམ་ནོར་ཟློག་ཤེས་བྱས་པས། མི་རྣམས་ལ་ང་ལ་མཆོད་པ་འབུལ་ཏེ། ཟས་བེད་སྤྱོད་བཏང་མ་ཚར་བ་ཐོབ་ཀྱི་འདུག” ཅེས་གསུངས་ཡོད། ད་དུང་ཁོང་གིས། “སྔོན་མ་ངའི་ཁ་ལ་ཟས་རྙེད་ཀྱི་མེད། ད་ལྟ་ཟས་ཀྱི་ངའི་ཁ་རྙེད་ཀྱི་མི་འདུག” །ཅེས་གསུངས།

དེར་བརྟེན་ང་ཚོས་སོ་སོ་ལ་རྒྱུ་ནོར་སོགས་གང་ཡོད་པ་རྣམས་བེད་སྤྱོད་ཚུལ་བཞིན་དུ་གཏོང་དགོས། དཔེར་ན། འབུལ་རྫས་ལེགས་ཉེས་ལ་མ་ལྟོས་པར་གང་ཡོད་པ་དེ་མཆོད་པ་འབུལ་བ་ལྟ་བུ། བེད་མེད་དམ་ཆུད་ཟོས་སུ་ནམ་ཡང་གཏོང་རྒྱུ་མེད། དེ་ག་ནང་བཞིན་ང་ཚོས་སོ་སོ་གཅིག་པུའི་ཁ་ལ་ཟས་འཐོབ་རྒྱུར་བསམ་བློ་གཏོང་རྒྱུ་མེད་པ་དང་། སོ་སོའི་གནས་སྐབས་ཀྱི་འདོད་པ་འཚིམ་ཆེད་འབད་བརྩོན་ནམ་ཡང་བྱེད་མི་ཉན། དེ་ལྟར་བྱེད་པ་ནི་བྱ་དེ་ཞིག་གམ་ཙི་ཙི་ཞིག་གིས་གཡས་གཡོན་དུ་བསྐྱོད་དེ་ཁ་ལག་འཚོལ་བ་དང་འདྲ་བ་ཡིན། ཅི་སྟེ་ང་ཚོ་ཉམས་ལེན་པ་རྣལ་མ་ཞིག་ཡིན་ན། ལྟོགས་ཤི་ཐེབས་ཀྱི་རེད་བསམས་ནས་སེམས་འཁྲལ་བྱེད་དགོས་པ་རྩ་ནས་མེད། ཉམས་ལེན་པ་བཅོས་མིན་ཞིག་ལྟོགས་ཤི་ཐེབས་པའི་སྐོར་ད་ལྟ་བར་དུ་གོ་རྒྱུ་གཅིག་ཀྱང་མེད། ཉམས་ལེན་པ་བརྒྱ་ཕྲག་མང་པོ་བྱུང་བའི་ཁྲོད་ནས་ལྟོགས་ཤི་ཐེབས་པ་གཅིག་ཀྱང་བྱུང་མེད་པ་ལས་རྟོགས་ཐུབ།

དེར་བརྟེན་ད་ལྟ་ང་ཚོར་ཐོབ་པའི་དལ་འབྱོར་གྱི་མི་ལུས་འདི་ཡོད་པའི་ཐོག་ནས་ཉམས་ལེན་ཡང་དག་པ་ཞིག་དང་བེད་སྤྱོད་ཚུལ་བཞིན་དུ་གཏོང་རྒྱུ་ཧ་ཅང་གནད་འགག་ཆེན་པོ་རེད། དེའི་རྒྱུ་མཚན་ནི་ང་ཚོས་བདེ་བ་འདོད་ཅིང་སྡུག་བསྔལ་ནམ་ཡང་འདོད་ཀྱི་མེད། འདོད་པའི་བདེ་བའི་རྒྱུ་དེ་ཕན་བྱེད་དགེ་བའི་ལས་ཀྱི་ཐོག་ནས་འདིར་འགྲེལ་བརྗོད་བྱས་ཡོད་པ་དང་། མི་འདོད་པ་སྡུག་བསྔལ་གྱི་རྒྱུ་དེ་བཞིན་གནོད་བྱེད་མི་དགེ་བའི་ལས་ཀྱི་ཐོག་ནས་འདིར་འགྲེལ་བཤད་བརྒྱབ་ཡོད། དེ་བས་ན། ང་ཚོས་བདེ་བ་འདོད་སྟབས་བདེ་བའི་རྒྱུ་སྒྲུབ་དགོས།

དབང་མེད་ཀྱིས་ཡང་ནས་ཡང་དུ་འབྱུང་བའི་འཁོར་བར་སྐྱེ་བའི་ཉེས་དམིགས།

ང་ཚོས་ཚུལ་ཁྲིམས་ལེགས་པར་སྲུང་ན་ངན་འགྲོའི་སྐྱེ་བ་བཀག་ནས་མངོན་མཐོ་ལྷ་མིའི་གོ་འཕང་འཐོབ་ཐུབ་ནའང་། དེ་ཙམ་གྱིས་ཡིད་ཚིམས་ནས་སྡོད་རྒྱུ་མེད། ང་ཚོ་དབང་མེད་ཀྱིས་ཡང་ནས་ཡང་དུ་འབྱུང་བའི་འཁོར་བའི་གནས་གང་འདྲ་ཞིག་གི་ནས་སྐྱེས་ཀྱང་དེའི་ནང་སྡུག་བསྔལ་དང་དཀའ་ངལ་གྱི་རིགས་མང་པོ་ཞིག་ཡོད། མཐའ་གཅིག་ཏུ་བདེ་བ་དང་ཉེན་སྲུང་ཡོད་པའི་འཁོར་བའི་གནས་གཅིག་ཀྱང་མེད། ང་ཚོར་གོ་རྟོགས་དེ་ག་ཙམ་ཞིག་རྙེད་ན། དེ་ནི་འཛིན་གྲྭ་འོག་མ་ནས་གོང་མར་འཕོ་བ་ལྟར་ཡར་རྒྱས་ཀྱི་རྣམ་པ་ཐོན་ཡོང་གི་རེད། གཤམ་གྱི་ཤོ་ལོ་ཀའི་ནང་དེའི་སྐོར་གོ་སྡུར་མཛད་ཡོད།

༥༽ སྤྱད་པས་མི་ངོམས་སྡུག་བསྔལ་ཀུན་གྱི་སྒོ།། ཡིད་བརྟན་མི་རུང་སྲིད་པའི་ཕུན་ཚོགས་ཀྱི།། ཉེས་དམིགས་རིག་ནས་ཐར་བའི་བདེ་བ་ལ།། དོན་གཉེར་ཆེན་པོ་སྐྱེ་བར་བྱིན་གྱིས་རློབས།། ཞེས་གསུངས་ཡོད།

གོང་དུ་ང་ཚོས་ངན་སོང་གསུམ་པོ་གང་རུང་གི་དཀའ་ངལ་དང་སྡུག་བསྔལ་གྱི་རང་བཞིན་དུ་གྱུར་བའི་འཁོར་བའི་སྐྱེ་བ་སྤོང་ཚུལ་སྐོར་གོ་སྡུར་བྱས་པ་རེད། ད་ལྟ་ང་ཚོས་རྒྱ་ཆེ་རུ་བཏང་ནས་འཁོར་བ་སྤྱིའི་ཉེས་དམིགས་སམ་གནས་སྟངས་སྐོར་གོ་སྡུར་བྱེད་ཀྱི་ཡིན། འཁོར་བས་བསྡུས་པའི་ཆོས་དཔེར་ན། དངོས་པ་དང་། གོ་གནས། བདེ་བ་སོགས་ང་ཚོར་ཡིད་དུ་འོང་བ་ཞིག་སྣང་སྲིད་ཀྱང་དེ་ལ་ང་ཚོས་འདོད་པ་ནམ་ཡང་ཚིམ་གྱི་མེད། དེ་དག་གིས་སྡུག་བསྔལ་འཕར་བ་ཁོ་ན་སྐྱེད་པར་བྱེད་ཀྱི་ཡོད། དེར་བརྟེན་ང་ཚོས་སྡུག་བསྔལ་དང་དཀའ་ངལ་དེ་དག་ལས་ཡོངས་སུ་ཐར་བའི་ཆོད་སེམས་བརྟན་པོ་ཞིག་སྐྱེད་དགོས། དེ་ལ་ངེས་འབྱུང་ཞེས་བྱ་བ་ཡིན། ངེས་འབྱུང་གི་བསམ་པའི་ཐོག་ནས་ང་ཚོས་ཐར་པ་འཐོབ་བྱེད་དོ་སྣང་ངམ་འབད་བརྩོན་འཕར་མ་ཞིག་བྱེད་དགོས། བསམ་པའམ་ལམ་འདི་ཤོ་ལོ་ཀ་འདིའི་ནང་འགྲེལ་བརྗོད་མཛད་ཡོད།

དེ་དག་ཐམས་ཅད་ཀྱི་གཞི་རྟེ་ནི་དགེ་བའི་བཤེས་གཉེན་ཚུལ་བཞིན་དུ་བསྟེན་པ་དེ་ཡིན། དེ་ནས་བྱ་བའི་རྟེན་གཞིར་གྱུར་བའི་དལ་འབྱོར་མི་ལུས་དང་འཆི་བ་མི་རྟག་པར་བསམ་བློ་གཏོང་དགོས། ང་ཚོས་དལ་འབྱོར་མི་ལུས་ཐོབ་པར་དགའ་བ་སྒོམ་པ་དང་། དེ་རྙེད་དཀའ་བའི་ཚུལ་ཡིད་ལ་བྱེད་དགོས། དེ་ནས་འཆི་བར་བསམས་ནས་ཆོས་གཅིག་ཀྱང་རྟག་པ་བརྟན་པ་མེད་པ་མི་རྟག་པའི་རང་བཞིན་ཡིན་པ་སྒོམ་དགོས། དེ་ལྟའི་གོ་སྐབས་དེ་ནམ་ཞིག་བརླག་འགྲོ་གི་ཡོད། ཤི་བའི་རྗེས་ང་ཚོས་ངན་སོང་གསུམ་པོ་གང་རུང་དུ་སྐྱེ་བ་ཡིན། འཁོར་བའི་ནང་གི་འཇིགས་སུ་རུང་བའི་དཀའ་ངལ་དང་སྡུག་བསྔལ་ཅི་རིགས་ལ་བསམས་ནས་ད་གཟོད་སྡུག་བསྔལ་མེད་པའི་གནས་དང་དེ་དག་ལས་གཡོལ་ཐབས་སུ་ཉེན་མེད་ཀྱི་ཁ་ཕྱོགས་བཟང་པོ་འཚོལ་བའམ་དཀོན་མཆོག་གསུམ་ལ་སྐྱབས་སུ་འགྲོ་གི་ཡོད། སྐྱབས་སུ་འགྲོ་བའི་ཚུལ་དེའང་ང་ཚོས་ལས་རྒྱུ་འབྲས་ཀྱི་རྣམ་གཞག་ཐོག་ནས་དཔེ་ལེན་ཐུབ། དེ་དག་སྐོར་སྔ་ས་ནས་གོ་སྡུར་ཞུས་ཟིན།

གཤམ་གྱི་དུམ་ཚན་ནང་ང་ཚོས་མུ་མཐུད་ཤོ་ལོ་ཀ་འདིའི་ཐད་གོ་སྡུར་བྱེད་ཀྱི་ཡིན།

Top