ຄຸນສົມບັດອັນອື່ນຂອງພຣະເຊີກົງຣິນໂປເຊ

ພະລັງວິເສດຂອງພໍ່ຂອງພຣະຣິນໂປເຊ, ພຣະເຊີກົງດໍເຈຊັງ

ພຣະເຊີກົງຣິນໂປເຊບໍ່ເຄີຍອ້າງວ່າຕົນເອງເປັນໂຍກີ ຫຼື ມີພະລັງວິເສດໃດໆ. ຖ້າເຮົາຢາກເຫັນຕົວຢ່າງຂອງຜູ້ທີ່ມີ, ເພິ່ນບອກວ່າເຮົາບໍ່ຕ້ອງເບິ່ງໄປໄກໃນອາດີດ. ພຣະບິດາຂອງເພິ່ນເອງ, ພຣະເຊີກົງດໍເຈຊັງ (Serkong Dorjechang), ເປັນຕົວຢ່າງທີ່ຊັດເຈນ. ໃນຖານະພຣະສົງຢູ່ໃນວັດການເດັນຈັງເຊະ (Ganden Jangtse), ພໍ່ຂອງເພິ່ນໄດ້ບັນລຸຂັ້ນອະນຸດຕະຣະໂຍຄະຕັນຕຣະ ທີ່ເພິ່ນສາມາດປະຕິບັດເຕັກນິກໂຍຄະພິເສດດ້ວຍຄູ່ນອນເພື່ອບັນລຸເຖິງລະດັບຈິດໃຈທີ່ເລິກເຊິ່ງທີ່ສຸດ. ຈຸດລ້ຳເລິກໃນຂັ້ນທີ່ສົມບູນນີ້ຮຽກຮ້ອງໃຫ້ມີຄວາມຊໍານານຢ່າງເຕັມປ່ຽມຂອງລະບົບພະລັງທີ່ລະອຽດອ່ອນ, ກັບການຄວບຄຸມຢ່າງສົມບູນທັງວັດຖຸພາຍໃນ ແລະ ພາຍນອກ ແລະ ພະລັງ. ຄໍາປະຕິຍານຂອງເພິ່ນກ່ຽວກັບການພົມມະຈັນໂດຍປົກກະຕິຈະຫ້າມເພິ່ນຈາກການປະຕິບັດດັ່ງກ່າວ. ເມື່ອສົມເດັດພຣະດາໄລລາມະທີ 13 ໄດ້ຂໍພິສູດເຖິງການບັນລຸຂອງເພິ່ນ, ພຣະເຊີກົງດໍເຈຊັງໄດ້ຜູກເຂົາໂຕຢັກໃຫ້ເປັນຂອດແລ້ວມອບໃຫ້. ເມື່ອເຊື່ອໝັ້ນແລ້ວ, ອົງພຣະດາໄລລາມະທີ 13 ໄດ້ອະນຸຍາດໃຫ້ພຣະເຊີກົງດໍເຈຊັງສືບຕໍ່ດູແລວັດຂອງເພິ່ນໃນຂະນະທີ່ປະຕິບັດຢູ່ໃນລະດັບນີ້. ພຣະຣິນໂປເຊໄດ້ກ່າວຕາມຄວາມເປັນຈິງວ່າພວກເພິ່ນໄດ້ເກັບເຂົານີ້ໄວ້ຢູ່ໃນເຮືອນຂອງເພິ່ນຕັ້ງແຕ່ຕອນຍັງນ້ອຍພຸ້ນ.

ພຣະເຊີກົງດໍເຈຊັງໄດ້ຮັບການນັບຖືຢ່າງກວ້າງຂວາງວ່າເປັນນັກແປມາປາ (Marpa) ແຫ່ງສັດຕະວັດທີ 11 ກັບຊາດມາເກີດ. ແລ້ວ, ພຣະເຊີກົງຣິນໂປເຊເອງກໍໄດ້ເກີດມາເພື່ອສືບເຊື້ອສາຍຂອງພໍ່ຂອງເພິ່ນ ແລະ ຖືກນັບຖືວ່າເປັນລູກຊາຍຜູ້ມີຊື່ສຽງຂອງມາປາ ທາມະ-ໂທເທິ (Darma-dode) ກັບຊາດມາເກີດ. ແຕ່ເຖິງແນວນັ້ນ, ພຣະຣິນໂປເຊກໍບໍ່ເຄີຍກ່າວເຖິງເລື່ອງນີ້ກັບຜູ້ຂ້າ, ແລະ ບໍ່ເຄີຍປຽບທຽບຕົນເອງກັບພໍ່. ຢ່າງໃດກໍຕາມ, ເຖິງວ່າພຣະຣິນໂປເຊຈະງຽບຢູ່, ແຕ່ມັນກໍເຫັນໄດ້ແຈ້ງຕໍ່ຜູ້ທີ່ໃກ້ຊິດກັບເພິ່ນວ່າເພິ່ນສາມາດຄວບຄຸມພະລັງລົມທີ່ລະອຽດອ່ອນຂອງເພິ່ນໄດ້ ແລະ ມີພະລັງວິເສດ. ວິທີທີ່ພຣະຣິນໂປເຊສາມາດນອນຫຼັບຍາມໃດກໍໄດ້ເປັນຕົວຊີ້ໃຫ້ເຫັນເຖິງຈຸດນີ້ເປັນຢ່າງດີ. ຄັ້ງໜຶ່ງພຣະຣິນໂປເຊໄດ້ກວດໄຟຟ້າຫົວໃຈເຊິ່ງເປັນສ່ວນໜຶ່ງຂອງການກວດສຸຂະພາບທີ່ເມືອງແມດິສັນ, ຣັດວິສຄອນຊິນ. ຕອນທີ່ພຣະຣິນໂປເຊນອນລົງຮັບການກວດນັ້ນ ເພິ່ນຍັງກະຕືລືລົ້ນ ແລະ ຕື່ນຕົວຢູ່. ແຕ່, ເມື່ອໝໍບອກໃຫ້ພຣະຣິນໂປເຊຜ່ອນຄາຍ, ພາຍໃນບໍ່ເທົ່າໃດວິນາທີເພິ່ນກໍໂກນແລ້ວ.

Top