فکر مندی دا احساس پیدا کرنا

دوجے لوکاں نوں انسان جان کے، جنہاں دے جذبے ساڈے ورگے ہی نیں، اوہناں لئی ایس گل دا احساس اتے فکر پیدا کرنے آں کہ اسی اوہناں نال کس طراں دا ورتا کرئیے اتے انج گل کرئیے کہ اوہ دکھی نہ ہون۔
Meditation generating care matheus ferrero

وستر

ہن جد کہ اسی اپنے ساہ اوپر گوہ راہیں، جو کہ کسے وی مراقبہ دی پہلی شرط اے، اپنے من نوں شانت کر لیا اے، تے ہن اسی من دا اک مثبت اتے تعمیری روپ بنان نوں تیار آں۔ لوکاں نال میل جول کرن دی خاطر، سب توں ضروری شے اوہناں لئی خلوص بھریا فکر مندی دا احساس ہونا لازم اے۔ ایس دا مطلب اوہناں نوں پربھاؤ جاننا اے، انج دے لوکی جنہاں دے ساڈے وانگوں جذبے نیں۔ ایس حقیقت توں اکھ چرانا اتے بے حسی پنگرنا سوکھا اے، فیر وی، جد اسی مصروف ہوئیے یا پریشان ہوئیے یا اپنی ذات وچ مست ہوئیے۔ پر اسی جس قدر زیادہ اپنے مسلیاں اتے اپنے جذبیات اوپر توجہ دینے آں، اونے ہی زیادہ سنتاپ ہوندے چلے جانے آں۔ اسی اپنے آلے دوالے وسیع تر حقیقت توں بے خبر آں۔

چونکہ انسان اک سماجی مخلوق اے؛ تے اسی سب اپنی بھلائی لئی اک دوجے دے محتاج آں۔ سانوں آپس وچ معاملہ کرن دی ضرورت پیش آوندی اے۔ چنانچہ لوکاں دے نال حقیقت پسند اتے صحت مند ول نال معاملہ کرن دی خاطر سانوں خلوص دے نال اوہناں دی بھلائی نوں موہرے رکھنا چاہیدا اے۔ خاص طور اوپر، سانوں اوہناں دے حالات اتے جذبیاں  نوں حقیقت دے درپن وچ ویکھنا چاہیدا اے، خصوصاً جس طراں اسی اوہناں نال ورتاو کرنے آں۔

مثال دے طور تے جد اسی کسے نوں ملنے آں، تے جو ساڈے نال دن وچ پیش آیا اوہ ساڈے مزاج اوپر اثر پاوندا اے، تے اوہناں دے نال وی ایہی معاملہ اے۔ جد اسی اوہناں نال  ملے آں تے اوہ کدرے اسمان توں نازل نئیں سان ہوئے۔ اوہناں دا ہن دا مزاج ساڈی ملاقات اوپر اثر پاوے گا، جویں کہ ساڈا۔ جے اسی ایس دَشا دی حقیقت توں واقف نئیں آں، اپنے اتے اوہناں دے یعنی دونواں دے بارے، تے ساڈی ملاقات اُنج دی نئیں ہووے گی جس دی اسی توقع کر رہے ساں۔ ہور ایہ کہ اسی اوہناں نال کس طراں گل کرنے آں اتے اوہناں نال کس طراں ورتاؤ کرنے آں ایس دا اوہناں دے جذبیاں اوپر اثر ہووے گا، بالکل انج ہی جس طراں کہ اوہناں دی گل بات اتے رویہ دا ساڈے اوپر اثر ہووے گا۔ جد اسی اپنے آپ نوں ایہناں سچائیاں توں با خبر رکھئیے اتے لوکاں نال ملاقات دے سمے ایہناں اوپر اکھ رکھئیے- بھاویں اوہ دوست ہون، اجنبی ہون یا اجیہے لوکی جوسانوں چنگے نئیں لگدے – تے ساڈی ملاقاتاں ساڈے لئی اتے اوہناں لئی زیادہ فیدہ مند اتے تسلی بخش ہو جان گیاں۔ 

سمادھ 

  • ساہ اوپر گوہ راہیں شانت ہو جاؤ۔ 
  • شانت من دے نال، بنا انتر، کسے اجیہے پرش دا تصور کرو جس دے تسی نیڑے محسوس کردے او اتے اوس نال بیٹھک نوں پسند کردے او
  • اوہناں نال انج دا ورتاو کرو کہ اوہ اک انسان نیں جو جذبے رکھدا  اے،
  • جویں کہ میں واں۔
  • تہاڈا مزاج ساڈے آپس دے معاملہ کرن اوپر اثر پائے گا، 
  • جویں کہ میرا مزاج ایس اوپر اثر پائے گا۔
  • میں تہاڈے نال کس طراں پیش آنا واں اتے کیہ کجھ کہنا واں دا اثر وی تہاڈے جذبیاں اوپر ہووے گا۔
  • ایس لئی، جس طراں میں تہاڈے کولوں توقع کرنا واں کہ ساڈے میل جول وچ تسی میرے جذبیاں دا خیال رکھو گے، اُنج ہی میں تہاڈی فکر کرنا واں۔ میں تہاڈے جذبیاں دا احساس کرنا واں۔
  • ہن کسے جان پچھان والے یا کسے اجنبی دا تصور کر کے، جس لئی تسی کوئی خصوصی جذبےنئیں رکھدے، جویں کہ اوہ پرش جو سینما گھر وچ تہاڈی ٹکٹ لیندا اے، سارے عمل نوں دوہراؤ۔
  • ہن فیر سارے عمل نوں دوہراؤ کسے اجیہے انسان نوں تصور وچ لیا کے جس نوں تسی پسند نئیں کردے اتے جس دی بیٹھک وچ تسی بے چینی محسوس کردے او۔ 

مکدی گل

ایہ مراقبہ کئی شیواں لئی استعمال ہوندا اے اتے ایس نوں کافی ودھایا وی جا سکدا اے۔ اسی مختلف عمر، مختلف جنس اتے مختلف نسل وغیرہ دے لوکاں اوپر اتے بیان کیتے گئے تن پدھراں وچ ایس دا پریوگ کر سکنے آں۔ اسی ایس مراقبہ نال اپنے اوپر وی گوہ کر سکنے آں۔ اسی وی انسان آں اتے جذبے رکھنے آں؛ اتے جس طراں اسی اپنے آپ نال پیش آنے آں اتے من ہی من وچ اپنے آپ نال ہمکلام ہونے آں ایس دا ساڈے جذبیاں اوپر ڈوہنگا اثر ہوندا اے۔ ایس طراں اسی اپنے لئی وی فکر مندی دا احساس پیدا کرنے آں۔

Top