Тлумачэнне
Пасля таго як мы супакоілі розум, засяродзіўшыся на дыханні, што з'яўляецца неабходнай папярэдняй умовай для любой наступнай медытацыі, мы можам наладзіцца на пазітыўны, стваральны стан розуму. Размаўляючы з іншымі людзьмі, вельмі важна шчыра праяўляць да іх клопат і інтарэс. Гэта значыць важна прымаць іншых сур'ёзна, памятаючы, што яны таксама людзі і ў іх таксама ёсць пачуцці, як і ў нас. Тым не менш, калі мы занятыя, адчуваем стрэс або занадта захопленыя сабой, пра гэта лёгка забыцца і страціць чуласць. Аднак чым мацней мы засяроджваемся на сабе, сваіх праблемах і пачуццях, тым больш нешчаслівымі становімся. Мы губляем кантакт з навакольным светам.
Людзі – гэта сацыяльныя жывёлы: наш дабрабыт залежыць ад іншых людзей. Нам неабходна кантактаваць з іншымі. Таму для таго, каб узаемадзейнічаць з іншымі людзьмі ў здаровым, рэалістычным ключы, неабходна шчыра клапаціцца пра іх дабрабыт. У прыватнасці, нам варта быць чулымі да абставін і пачуццяў іншых людзей, асабліва да іх пачуццяў, якія ўзнікаюць у адказ на нашы дзеянні ў адносінах з імі.
Тое, што адбылося з намі раней на працягу дня, уплывае на наш настрой, і гэта ж дакладна для людзей, з якімі мы сутыкаемся. Калі мы іх бачым, яны не ўзнікаюць з ніадкуль. Стан гэтых людзей, як і наш стан, паўплывае на нашы зносіны. Калі мы неўспрымальныя да гэтага факту, як у дачыненні да нас саміх, так і да іншых, то якасць узаемадзеяння з людзьмі будзе моцна адрознівацца ад жаданай. У дадатак, тое, як мы размаўляем з людзьмі, і тое, як мы абыходзімся з імі, паўплывае на іх пачуцці гэтак жа, як іх мова і паводзіны паўплываюць на нашы пачуцці.
Калі мы памятаем пра гэта і падтрымліваем памятаванне кожны раз, калі мы побач з іншымі людзьмі (з сябрамі, з незнаёмцамі ці з тымі, хто нам не падабаецца), то наша ўзаемадзеянне будзе больш прадуктыўным і здавальняючым і для нас, і для гэтых людзей.
Медытацыя
- Супакойцеся, засяродзіўшыся на дыханні.
- Апынуўшыся ў спакойным стане розуму, без асуджэння падумайце пра блізкага вам чалавека, з якім вам хочацца быць побач.
- Падумайце: «Ты чалавек, і ў цябе ёсць пачуцці».
- «Гэтак жа, як і ў мяне».
- «Твой настрой паўплывае на нашы зносіны».
- «Гэтак жа, як і мой настрой».
- «Тое, як я абыходжуся з табой і што я кажу, паўплывае на твае пачуцці».
- «Таму, гэтак жа як я чакаю, што ў нашых узаемаадносінах ты будзеш клапаціцца пра мяне і пра мае пачуцці, я буду клапатлівы да цябе. Я буду клапаціцца пра твае пачуцці».
- Паўтарыце ўсе крокі адзін за адным, канцэнтруючыся на чалавеку, які ледзь вам знаёмы, гэта значыць вы не адчуваеце да яго ніякіх пачуццяў. Гэта можа быць, напрыклад, білецёр у кінатэатры.
- Паўтарыце гэтую паслядоўнасць крокаў, канцэнтруючыся на чалавеку, які вам не падабаецца, з якім вам некамфортна знаходзіцца побач.
Рэзюмэ
У гэтай медытацыі ёсць шмат варыяцый, і яна можа быць дапоўнена. Медытуючы на малазнаёмых людзей, на тых, хто нам падабаецца і не падабаецца, можна таксама выбіраць прадстаўнікоў розных узроставых, гендарных, нацыянальных груп і гэтак далей. Таксама можна зрабіць аб'ектам медытацыі саміх сябе. Мы таксама людзі, і ў нас ёсць пачуцці; тое, як мы ставімся да сябе і як мы ў думках размаўляем з сабой, вельмі моцна ўплывае на нашы пачуцці. Такім чынам мы таксама развіваем клапатлівае стаўленне да сябе.