Тлумачэнне
Медытацыя – гэта метад фарміравання карыснай звычкі праз паўтарэнне. Мы пракладваем новы нейронны шлях і аслабляем стары. Для гэтага спачатку неабходна супакоіць думкі, якія пралятаюць, стварыўшы такім чынам адкрытую прастору для фарміравання новага разумення і стану розуму, якія прыносяць карысць. Сама па сабе здольнасць супакойвацца – карысная звычка, аднак гэты нейтральны стан можа стаць асновай як для стваральнага, так і для разбуральнага стану розуму. Спакойны стан, які мы хочам выкарыстоўваць у якасці адкрытай прасторы для развіцця стваральнага стану розуму, – гэта неабходны падрыхтоўчы этап.
Спакой дапамагае нам лепш спраўляцца са складанасцямі ў жыцці. Часта мы не можам належным чынам справіцца з цяжкасцямі з-за таго, што наш розум замутнены; з-за стомленасці і стрэсу розум блукае. Напрыклад, у нас быў доўгі, цяжкі працоўны дзень; застаўся гадзіна, перш чым мы зможам сысці, і ў нас ёсць яшчэ не скончаная праца. Засяроджванне на дыханні дапаможа нам супакоіцца, каб мы змаглі справіцца з гэтай сітуацыяй з ясным розумам.
Медытацыя
- Сядзьце прама, рукі пакладзіце на калені. Вочы напаўзакрытыя, погляд накіраваны ў падлогу, сківіцы расслабленыя.
- Расслабце напружанне ў целе, асабліва рот, лоб і плечы. Мы не зможам расслабіць розум, пакуль не расслабім цела.
- Дыхайце як звычайна, праз нос.
- У думках адлічыце 11 цыклаў дыхання, і рабіце гэта зноў і зноў, звяртаючы ўвагу на тое, як паветра ўваходзіць і выходзіць праз ноздры.
- Застаючыся з гэтым адчуваннем, працягвайце лічыць цыклы (утрымлівайце ўвагу на адчуваннях пры дапамозе «ментальнага клею»).
- Падтрымлівайце пільнасць, каб выяўляць моманты, калі ўвага саслізгвае з-за прытупленасці або блукання розуму.
- Калі вы выяўляеце, што перасталі ўтрымліваць увагу, зноў накіруйце ўвагу на дыханне і падлік.
- Калі вы выявілі, што розум пачаў блукаць, мякка адпусціце думку, уяўляючы, як яна пакідае розум на выдыху, і зноў вярніцеся да ўсведамлення дыхання і падліку.
- Калі вашы плечы або твар зноў напружыліся, расслабце іх.
- Каাব завяршыць медытацыю, зноў увайдзіце ў ціхі, спакойны стан розуму.
Рэзюмэ
Калі мы стаміліся і адчуваем стрэс, калі нам хочацца больш яснасці розуму і эмацыйнай раўнавагі для вырашэння складаных сітуацый, то нам трэба супакоіцца і вярнуць сабе самавалоданне. Для гэтага варта перазагрузіць розум, нібы камп'ютар, расслабіўшы цела і засяродзіўшыся на дыханні, лічачы ўдыхі і выдыхі. Практыкуючы гэтую медытацыю дома, мы фарміруем новы нейронны шлях і новую звычку. Дзякуючы гэтаму мы будзем памятаць пра гэты метад і прымяняць яго, калі ён нам спатрэбіцца. Нам будзе лягчэй прымяняць і падтрымліваць нашу практыку медытацыі ў паўсядзённым жыцці.