တည်ငြိမ်စေခြင်း

ဝင်လေထွက်လေကို အာရုံစိုက်ကာ ယင်း၏သံသရာလည်နေမှုကို ရေတွက်ရင်း မိမိကိုယ်ကို တည်ငြိမ်စေကာ စိတ်၏အပြုသဘော အခြေအနေများ ဖော်ထုတ်နိုင်ပါသည်။

ရှင်းလင်းချက်

တရားရှုမှတ်ခြင်းဆိုသည်မှာ အပြုသဘော အလေ့အထများကို အထပ်ထပ်ဆောင်ရွက်သည့်နည်းလမ်းတစ်ခု ဖြစ်ပါသည်။ ဦးနှောက်အာရုံကြော အချက်ပြလမ်းကြောင်းသစ်တစ်ခု ဖန်တီးကာ လမ်းကြောင်းဟောင်းကို အားနည်းစေခြင်းနှင့် ဆင်တူသည်။ ထိုသို့ဆောင်ရွက်ရန်အတွက် အရင်ဆုံး ကျွန်ုပ်တို့၏ လှုပ်ရှားနေသောစိတ်ကို တည်ငြိမ်သွားစေဖို့ လိုပါသည်။ သို့မှသာ ပိုအကျိုးပြုသည့် နားလည်မှုနှင့်သဘောထားအသစ်ကို ဖော်ထုတ်ရန် နေရာလွတ် ရရှိလာပါသည်။ ဤသို့ တည်ငြိမ်စေနိုင်စွမ်းသည် အကျိုးပြုသည့် အလေ့အထတစ်ခု ဖြစ်သည်။ သို့သော် အပြုသဘောထား သို့မဟုတ် အပျက်သဘောထားကို ဖော်ထုတ်ရန် အခြေခံဖြစ်နိုင်သည့် ဘက်မလိုက်သော အခြေအနေ တစ်ရပ်လည်း ဖြစ်ပါသည်။ ဤသို့တည်ငြိမ်သောအခြေအနေကို အသုံးချကာ အပြုသဘော စိတ်အခြေအနေ ဖော်ထုတ်ရန် နေရာလွတ်အဖြစ် ကျွန်ုပ်တို့အသုံးချပါမည်။ ထိုသို့ဆောင်ရွက်ရန် ဤသည်မှာ မရှိမဖြစ်လိုအပ်သည့် ကြိုတင်ပြင်ဆင်မှု အဆင့်တစ်ခု ဖြစ်ပါသည်။ 

တည်ငြိမ်အောင်ပြုလုပ်ခြင်းဖြင့် ကျွန်ုပ်တို့သည် ဘဝတွင်ကြုံရသည့် ခက်ခဲသောကိစ္စရပ်များကို ပိုမိုကောင်းမွန်စွာ ဖြေရှင်းနိုင်လာပါသည်။ တစ်ခါတစ်ရံ ယင်းတို့ကို သေချာဖြေရှင်းမှုမပြုနိုင်အောင် ကာကွယ်သည့်အရာမှာ ကျွန်ုပ်တို့၏ စိတ်မကြည်လင်မှုသာဖြစ်သည်။ မောပန်းမှု၊ စိတ်ဖိစီးမှုတို့ကြောင့် စိတ်ပျံ့လွင့်မှုများ ပြည့်နေခြင်းမျိုးဖြစ်သည်။ ဥပမာ၊ အလုပ်တွင် အချိန်ကြာမြင့်စွာ အခက်အခဲကြုံရသည့် နေ့တစ်နေ့ ရင်ဆိုင်ရသည်။ အလုပ်တွင် အချိန်တစ်နာရီ ထပ်နေရသည်။ နောက်ထပ် လုပ်စရာတွေ ပေါ်လာသည်။ ဝင်လေထွက်လေကို အာရုံစိုက်ခြင်းဖြင့် ဤသို့စိန်ခေါ်မှုရှိသော အခြေအနေကို ကြည်လင်သောစိတ်ဖြင့် ဖြေရှင်းနိုင်စေမည့် တည်ငြိမ်မှုကို ကျွန်ုပ်တို့ရရှိလာပါမည်။

တရားရှုမှတ်ခြင်း

  • ခါးကိုမတ်မတ်ထားပြီး ထိုင်ကာ လက်ကို ပေါင်ပေါ်တင်ထားပါ။ မျက်စိ အနည်းငယ်ဖွင့်ပြီး ကြမ်းပြင်ကို ကြည့်ကာ သွားများကို အံကြိတ်မထားပါနှင့်။
  • သင့်ခန္ဓာကိုယ်မှ အထူးသဖြင့် ပခုံး၊ ခံတွင်းနှင့် နဖူး စသည်တို့တွင် တင်းကြပ်မှုကို ဖြေလျှော့ပါ။ ခန္ဓာကိုယ်မပြေလျော့ပါက စိတ်ကို တည်ငြိမ်စေနိုင်မည် မဟုတ်ပါ။
  • နှာခေါင်းဖြင့် ပုံမှန်အသက်ရှူပါ။
  • သင့်စိတ်ထဲမှနေ၍ ဝင်လေထွက်လေ ၁၁ ကြိမ်အထိ ထပ်ခါတလဲလဲ ရေတွက်ပါ။ နှာသီးဖျားမှ လေအဝင်၊ အထွက်ကို အာရုံသိရှိမှုဖြင့် စူးစိုက်ထားပါ။
  • ဝင်လေထွက်လေ သိရှိမှုနှင့် ရေတွက်မှုကို ဆက်လက်သတိပြုပါ (စိတ်၏ကော်စေးဖြင့် ကပ်ထားပါ)။
  • ငြီးငွေ့မှု သို့မဟုတ် စိတ်ပျံ့လွင့်မှုကြောင့် အာရုံစူးစိုက်မှုမရှိတော့လျှင် သိရှိစေရန် နိုးနိုးကြားကြားရှိပါ။
  • အာရုံစူးစိုက်မှုမရှိတော့သည်ကို သိရှိသောအခါ ဝင်လေထွက်လေနှင့် ရေတွက်မှုကို ပြန်လည်စူးစိုက်ပါ။
  • စိတ်ပျံ့လွင့်နေပြီဟု သိရှိပါက အတွေးကို ဖြေးညင်းစွာဖြေလျှော့ပြီး ထွက်လေနှင့်အတူ ယင်းကို ဖယ်ထုတ်လိုက်သည်ဟု တွေးကြည့်ပါ။ ထို့နောက် ဝင်လေထွက်လေနှင့် ရေတွက်မှုကို ပြန်လည်စူးစိုက်ပါ။
  • ပခုံး သို့မဟုတ် မျက်နှာတွင် တင်းရင်းလာပါက ယင်းတို့ကို ထပ်မံ၍ဖြေလျှော့ပါ။
  • အဆုံးတွင် တရားရှုမှတ်ခြင်းသို့ ကူးပြောင်းသည့်အနေနှင့် ငြိမ်သက်သောစိတ်ဖြင့် ထပ်မံတည်ငြိမ်အောင် ပြုလုပ်ပါ။

အကျဉ်းချုပ်

ကျွန်ုပ်တို့ ပင်ပန်းဖိစီးပြီး စိန်ခေါ်မှုရှိသော အခြေအနေများ ဖြေရှင်းရန် ပိုမိုကြည်လင်သောစိတ်နှင့် စိတ်ခံစားချက် ညီမျှမှုတို့ လိုအပ်သောအခါ ကျွန်ုပ်တို့သည် တည်ငြိမ်အောင် ပြုလုပ်ရန်နှင့် မိမိစိတ်နှင့် စိတ်ခံစားချက် ပုံစံမပျက်အောင် ထိန်းသိမ်းရန် လိုအပ်ပါသည်။ ကွန်ပျူတာလိုပင် ကျွန်ုပ်တို့စိတ်ကို ပြန်လည်စတင်ဖို့လိုပါသည်။ ထိုအတွက် ခန္ဓာကိုယ်ကို ဖြေလျှော့ကာ ဝင်လေထွက်လေကို အာရုံစိုက်ရင်း ဝင်လေထွက်လေကို ရေတွက်နေရပါမည်။ အိမ်တွင် ဤနည်းဖြင့် တရားရှုမှတ်သောအခါ ဦးနှောက်အာရုံကြော အချက်ပြလမ်းကြောင်းတစ်ခု ဖြစ်ပေါ်ပြီး အလေ့အထ ဖြစ်လာပါသည်။ သို့ဖြင့် ဤနည်းကို နေ့စဉ်ဘဝတွင် လိုအပ်သလို အသုံးချရန် သတိတရရှိလာပြီး ထိုသို့ဆက်လက်အသုံးချသွားရန် ပိုမိုလွယ်ကူလာပါသည်။

Top