Тлумачэнне
Многія з нас адчуваюць, што жыццё праходзіць дарэмна. Магчыма, нам здаецца, што ў нас бескарысная праца, ці, можа быць, мы беспрацоўныя і не бачым асаблівых перспектыў на паляпшэнне сітуацыі. Можа, мы яшчэ вучымся ў школе і ставім пад сумненне каштоўнасць і сэнс нашай адукацыі. Нам страшна, што далей будзе толькі горш, і з'яўляецца рызыка, што мы ўпадзём у дэпрэсію. Разам з тым мы хацелі б зрабіць што-небудзь вартае, што магло б змяніць свет да лепшага, і нам хацелася б падзяліць гэта з іншымі. Многія, магчыма, разумеюць, што ні высокі заробак, ні буйная маёмасць не задавальняюць нашу патрэбу ў сэнсах.
У будызме гэтая тэма разглядаецца ў кантэксце надзейнага напрамку, які звычайна перакладаецца як «прыбежышча». Калі мы разумеем, што наша каштоўнае чалавечае жыццё абавязкова скончыцца смерцю і, калі мы не пачнём жыць стваральна, наперадзе нас могуць чакаць горшыя перараджэнні, – мы пачынаем думаць, як гэта прадухіліць. Гэтак жа, нават калі мы не верым у перараджэнні, можна пачаць цаніць гэтае каштоўнае чалавечае жыццё. Мы асцерагаемся, што ў гэтым жыцці наша сітуацыя стане горшай, разумеючы, наколькі жудасна будзе паміраць у шкадаваннях пра тое, што гэтае жыццё было бессэнсоўным.
Надзейны напрамак, які прапануе будызм, указаны Трыма Каштоўнасцямі. Галоўная каштоўнасць – гэта Дхарма, гэта значыць сапраўдныя спыненні [пакут] і сапраўдныя пуцяводныя станы розуму. Мы працуем над сабой, ухіляем свае недахопы і, развіваючы станоўчыя якасці, поўнасцю раскрываем свой патэнцыял. Заганы ўключаюць у сябе турбуючыя эмоцыі, недахоп канцэнтрацыі, сябелюбства, цяжкасці ў камунікацыі і гэтак далей. Пазітыўныя якасці – гэта базавыя чалавечыя каштоўнасці: дабрыня, спачуванне, цярпенне, разуменне, дараванне, сумленнасць і гэтак далей, разам з разуменнем этыкі, засяроджаннем і праніклівасцю. Калі мы будзем працаваць над раскрыццём гэтых якасцей, чаго ў поўнай ступені дасягнулі буды і часткова – майстры з высокім спасціжэннем, то пэўна здабудзем сэнс жыцця.
Хоць нам, магчыма, захочацца падзяліцца з іншымі, гэта не значыць, што дастаткова проста публікаваць пасты пра наш поспех у сацыяльных сетках. Наадварот, адчуўшы ўпэўненасць у сабе, мы дзелімся пладамі свайго развіцця, актыўна дапамагаючы іншым, чым зможам. Такім чынам, надзейны напрамак заснаваны на асцярозе таго, што наша жыццё стане горшым; на ўпэўненасці, што праца над сабой – гэта надзейны шлях, з дапамогай якога мы зможам пазбегнуць горшых сітуацый; і на спагадлівасці і спачуванні да іншых людзей, якім мы хацелі б дапамагчы, падзяліўшы з імі свой поспех.
Медытацыя
- Супакойцеся, засяродзіўшыся на дыханні.
- Падумайце пра сваё жыццё: як вам здаецца, ці ёсць у ім сэнс?
- Падумайце пра тое, што вы хацелі б дзяліцца падзеямі свайго жыцця з іншымі.
- Падумайце пра тое, што, калі вы працуеце над ухіленнем сваіх недахопаў і раскрыццём свайго патэнцыялу, гэта магло б надаць сэнс вашаму жыццю і даць вам магчымасць дзяліцца не дробязямі, а асэнсаванымі аспектамі жыцця, і як было б цудоўна, калі б тое, чым вы дзеліцеся з іншымі (не толькі анлайн, але і пры асабістым кантакце), магло б дапамагчы гэтым людзям.
- Уявіце, як вы ўпадаеце ў дэпрэсію з-за адсутнасці асэнсаванага напрамку ў вашым жыцці, нібы падаеце з абрыву.
- Падумайце пра тое, як праца над сабой выратавала б вас ад дэпрэсіі, а таксама магла б стаць выдатным падарункам, які вы падзялілі б з іншымі.
- Прыміце рашэнне рухацца ў гэтым напрамку.
- Уявіце тое самае, толькі цяпер вы каля краю абрыву і вось-вось упадзяце.
- Уявіце тое самае, толькі цяпер вы далёка ад абрыву, але паступова набліжаецеся да яго.
Рэзюмэ
Калі наша жыццё здаецца руцінным, сумным і бессэнсоўным, трэба ўзяць ініцыятыву ў свае рукі. Нам варта прытрымлівацца станоўчага напрамку, які быў бы асэнсаваным не толькі для нас, але і для іншых людзей. Прытрымліваючыся такога напрамку, мы працуем над сабой, каб пазбавіцца ад недахопаў і раскрыць станоўчы патэнцыял. Незалежна ад таго, хочам мы ў поўнай меры прайсці духоўны шлях, як гэта зрабілі буды і істоты з высокім спасціжэннем, ці не, – так ці інакш, выпраўляючыся ў гэтае падарожжа, мы моцна палепшым якасць жыцця.