جٹسنما تنزین پالمو نال سمبھاشن

سٹڈی بدھزم: کیا تسی اپنے بارے کجھ  دس سکدے او؟ 

تنزین پالمو: میں انگلستان وچ پیدا ہوئی اتے لندن وچ پلی ودھی۔ جد میں اٹھارہ ورہیاں دی ہوئی تد میں اک کتاب پڑھی اتے دھرم نال واقف ہوئی۔ جد میں ادھی کتاب پڑھی سی تد میں اپنی ماں نوں ایہ آکھیا، "میں اک بدھ متی آں،" جس دے جواب وچ اوس نے آکھیا،"ہلا تے ایہ گل اے؟ بوہت ودیہ، توں جدوں کتاب مُکا لویں تے مینوں ایس بارے دسیں۔" میں انج محسوس کیتا کہ میں ہمیش توں ہی بودھی پنتھ نوں مندی ساں پر میں ایس دے وجود توں انجان ساں، کیوں جے اوہناں دناں وچ 'بدھا' دا شبد تک نئیں سی بولیا جاندا۔ ایہ سٹھ دے دھاکے دی گل اے، ایس لئی کجھ زیادہ مواد پراپت نئیں سی، حتیٰ کہ لندن وچ وی نئیں۔ بعد وچ میں محسوس کیتا کہ میں تبتی پنتھ نوں زیادہ مندی ساں، اتے جد میں ویہ ورہیاں دی ہوئی تے میں بھارت گئی۔ اپنے اکیویں جنم دن اوپر میں اپنے لاما خمترُل رنپوچے نوں ملی، اتے تن ہفتے مغروں میں اپنا پہلا منصب پراپت کیتا بطور اک بھکشو دے، اتے فیر اوس دے نال کم شروع کر دتا۔

اوس نے مینوں لاہول جان نوں آکھیا، جتھے میں اگلے اٹھارہ ورہے بتاۓ۔ فیر میں کجھ ورہے بھارت وچ گزارے۔ مینوں اک پاٹھ شالا قائم کرن نوں آکھیا گیا ایس لئی میں بھارت واپس آئی، اودوں توں میں اپنا سمے ایتھے ہی گزاریا اے نالے دنیا بھر وچ گھم پھر کے دھرم اوپر بھاشن دیندیاں ہوئیاں۔

سٹڈی بدھزم: بدھ مت وچ اجیہی کیہڑی شے سی جس نے تہانوں اپنے ول کھچیا؟

 تنزین پالمو: مینوں بچپن توں ہی ایہ احساس سی کہ اسی فطری طور تے کامل ہاں، اتے ایہ کہ اساں گھڑی مڑی مڑ کے آونا اے اودوں تیکر کہ سانوں اپنے فطری طور اوپر کامل ہون دا گیان نہ ہو جاۓ۔ پر سوال ایہ سی کہ کمال اصلوں کیہ شے وے اتے ایس نوں کویں پراپت کیتا جاوے؟ اتے بدھ مت میرے ہتھ لگا تے مینوں صحیح رستہ ملیا۔ میں مہاتما بدھ دی بے حد شکر گزار آں کہ اوس نے راہ وکھائی، اتے نرا ایس دا ما حاصل ہی نئیں دسیا، سغوں کھول کے ایہ وی دسیا کہ اوتھے تیکر کویں اپڑیا جاوے۔ 

سٹڈی بدھزم: کیا تہانوں کدی ایہ گل اولّی لگی اے کہ لندن دی اک کڑی کوہ ہمالیہ دے دور دراز علاقے وچ جا وسی؟

تنزین پالمو: مینوں لندن توں اٹھ کے لاہول جا وسن وچ کدی کوئی حیرانی نئیں ہوئی۔ ایہ بڑا قدرتی جیہا لگیا۔ لندن وچ مینوں ایہ احساس سی کہ میں کسے غلط تھاں تے آں اتے میں ایس نوں چھڈنا چاہندی ساں۔ میں آسٹریلیا یا نیوزی لینڈ جان بارے سوچیا۔ ایس وچ انگلستان دے خلاف کوئی گل نئیں پر مینوں ایہ احساس سی کہ اوہ تھاں میرے لئی نئیں سی۔ پر اک وار جدوں مینوں دھرم دا گیان ہو گیا، تے مینوں سمجھ آ گئی کہ میں اوتھے جانا منگنی آں جتھے گورو نیں۔ اوس ویلے اجیہی تھاں بھارت سی۔

سٹڈی بدھزم: اجوکی اُگواڑی دنیا وچ سانوں ساری جانکاری لئی انٹرنیٹ اوپر دھرواس کرنا چاہیدا اے یا کیہ ساڈے لئی جیوندے جاگدے گوروواں کولوں گیان لینا ضروری اے؟  

تنزین پالمو: انٹرنیٹ بے حد فائدہ مند ہو سکدا اے جویں کہ کتاباں، پر میں ایہ سمجھنی آں کہ بدھ مت دے پاٹھ لئی ایہو ای سب کجھ نئیں۔ اک پدھر اوپر پہنچ کے، جویں ہور وی کوئی کلا سکھن وانگوں ، کسے اجیہے بندے کولوں مدد لینی پیندی اے جو ساڈے کولوں  زیادہ گنی ہووے۔ جے اسی گائیک، رقاص یا کھڈاری بننا چاہنے آں، تے اسی کجھ ڈی وی ڈی ڈاؤن لوڈ کر کے ویکھ سکنے آں، پراخیر سانوں کسے دی لوڑ  پیندی اے جو ساڈی کلا نوں پرکھ کے  سانوں نجی طور تے ہدائیتاں دے۔ ایہ دونویں سانویں نیں۔ اسی ہر ویلے استاد دے قدماں ہیٹھ نئیں بیٹھے رہ سکدے، پر سانوں ویلے کویلے کسے دی لوڑ پیندی اے جو سانوں پرکھے اتے سانوں راہ وکھاۓ۔

سٹڈی بدھزم: اسی استاد کویں لبھئیے ؟

تنزین پالمو: بھارت وچ بوہت سارے لوکی میرے نال سمسیاواں اوپر وچار ونڈ کرن لئی آوندے نیں۔ میرا ایہ کہنا اے کہ ایہناں وچوں ادھے ایہ کہندے نیں،" میرے موہرے اک مسٔلہ اے۔ مینوں کسے گورو دی کھوج اے۔" باقی دے ادھے کہندے نیں،" میرے موہرے اک مسٔلہ اے کیوں جے میرا اک گورو اے!" ایس پاروں ایہ اینا سَوکھا نئیں۔ 

اُنج تے بوہت سارے یوگی ادھیاپک موجود نیں، پر ایس دا ایہ مطلب نئیں کہ ہر استاد سب لئی سوتر اے، سانواں اے، انج ہی جویں کہ سب لوکی اک ہی جَن نال پیار نئیں کردے۔ ساڈے ساریاں دے کرم وکھو وکھ نیں تے ایس لئی مختلف چیلیاں لئی مختلف گورو کارگر ہون گے۔ 

انج  ہی کجھ استاد اجیہے نیں جنہاں نوں استاد نئیں ہونا چاہیدا۔ پر اصل گل ایہ ہے کہ سانوں بھولپن کولوں کم نئیں لینا چاہیدا، یا کسے دے بیبے اتے سوہنے سبھاو  اوپر صدقے تے واری نئیں جانا چاہیدا۔ چھڑا ایس لئی کہ کوئی بوہت سندر اے، ایس دا مطلب ایہ نئیں کہ اوہ سچ مچ لائق وی اے۔ ایہ گل کتاباں وچ وی لکھی اے اتے تقدس مآب دلائی لاما وی سانوں یاد کرواندے رہندے نیں کہ سانوں کسے منکھ دے سبھاو نوں اوس ویلے نئیں پرکھنا چاہیدا جد اوہ تخت نشین ہووے، سغوں اوہناں دی نجی زندگی دی پرکھ پرچول کرنی چاہیدی اے۔ اوہ عام جنتا نال کویں معاملہ کردے نیں – نہ کہ وڈے چندے دین والیاں نال– سغوں عام لوکاں نال جو اوہناں لئی کجھ خاص اہمیت نئیں رکھدے۔ میں اپنے لاما کولوں اک اُچیچ طور اوپر جھیڑے والے لاما بارے پُچھیا جس نوں اوہ چنگی طراں جاندا سی، تے اوہ آکھن لگا کہ ایس معاملے وچ کجھ کہنا مشکل اے، ہاں پر اج توں ویہ ورہے مغروں اوہ ویکھے گا کہ اوس دے چیلے کیہو جیہے نکلے۔ 

جتھوں تیکر میرا تعلق اے، میں جد اپنے لاما دا نام سنیا تے مینوں اوسے گھڑی پتہ لگ گیا کہ ایہی میرا لاما اے۔ تے ایتھے میں اپنی ہی نصیحت نوں جھوٹا ثابت کر رہی آں! فیر وی اوہ اک مہاتما بدھ سی تے ایہ میرے لئی بڑی نصیباں والی گل سی۔ اتے ہوراں نوں میں ایہ صلاح دیاں گی کہ استاد دے شاگرداں نوں ویکھو۔ کیا تسی اوہناں وانگوں بننا چاہندے او؟ جے تہانوں اک چنگا اتے گوڑھا سانگھا نظر آوے، اتے اوہناں دا پاٹھ وی چنگا ہووے اتے اوہ بھلے نیک دل لوکی ہون، تے تسی اعتبار کر سکدے او۔

سٹڈی بدھزم: اج دے ایس لکھاں سوچاں اتے فلسفیاں دے دور وچ بدھ مت دا ہی گیان کیوں پراپت کیتا جاۓ؟ 

 تنزین پالمو: بدھ مت وچ چنگی گل ایہ ہے کہ ایہ نرا تہانوں بھلی مانسی دی مت ہی نئیں دیندا سغوں ایہ وی دسدا اے کہ بھلے مانس کویں بنیا جاۓ۔ ایہ چھڑا ایہ نئیں کہندا کہ،"غصہ نہ کرو،" ایہ سانوں غصہ نہ کرن دے طریقے وی سکھاندا اے۔ ایہ ہر اوس کم نوں کرن دے طریقے وی دسدا اے جس دا ایہ اپدیش دیندا اے۔ اتے اوہناں سارے منفی گناں نوں قابو کرن دے جنہاں نوں اسی بدلی کرنا اے۔

ایہ بےحد فائدہ مند اے کیوں جے بھاویں کوئی پکا بودھی نہ وی ہووے، تے فیر وی ایہ سانوں چنگا انسان بنان وچ سہائت  ہوندی اے۔ میں کئی اجیہے کیتھولک پادریاں اتے راہباواں نوں جاننی آں جو چنگا کیتھولک بنن لئی بودھی شکشا پراپت کردے نیں، اتے اجیہے  یہودی جو چنگا یہودی بنن لئی ایہناں نوں پراپت کردے نیں۔ کیوں نہ ہووے! ایہ سانوں ساڈی فطرت نوں نیڑلی پدھر توں پچھانن وچ مدد دیندا اے، جس اندر اخیر اسی سارے رلت آں۔

 سٹڈی بدھزم: پچھوکڑ سمے وچ دماغی خبرگیری بوہت لوکک ہوئی اے۔ تہاڈا ایس بارے کیہ وچار اے؟

تنزین پالمو: اج کل دماغی خبر گیری اک ہمہ گیر شبد بن گئی اے، پر اپنی روز دی زندگی وچ زیادہ باخبری دا اصول بڑا مڈھلا اے۔ ایس دے نال نال، کجھ من دی سرکھیا دے اشلوکاں اوپر گوہ کرنا جو کہ ساڈیاں سمسیاواں نوں ڈھالن اتے حل کرن لئی بناۓ گئے نیں، بوہت فائدہ مند اے۔ باہرلی ساری دشاواں اتے اوہ کبّے لوکی جنہاں نال سانوں واہ پیندا اے، تے بجاۓ غصہ، روسا اتے اشانتی دے، اسی ویکھنے آں کہ اسی ایہناں ساریاں شیواں نوں نال لے کے بدھ مت دی راہ اوپر انج ٹُریے کہ جس توں سانوں شکست دی تھاں  شکتی ملے۔ ایہ بڑا کم دا اُپدیش اے، اتے ایس پاروں میں ایس وشے اوپر بوہت گل کرنی آں کہ دھرم دی مشق نوں کویں اپنی زندگی کا حصہ بنایا جاۓ، نئیں تے نراش اتے لاچاری سانوں اسانی نال گھیر لیندی اے۔

اسی بھاویں چلہ کٹ رہے ہوئیے یا باہر دی دنیا وچ ہوئیے، سانوں چاہیدا اے کہ اسی جاگرت دی صفت نوں زیادہ توں زیادہ اُنّت کرئیے۔ دھیان دا وٹ جانا ساڈے سبناں لئی اک بڑا مسٔلہ اے – جس نوں مہاتما بدھ نے باندر دماغ دا نام دتا۔ اساں ایس باندر دماغ نوں سِدھانا اے۔ اسی جتھے کدرے وی ہوئیے اتے جو وی کر رہے ہوئیے، یا تے ساڈی سرت قائم ہوندی اے یا نئیں ہوندی۔ یا اسی حاضر دماغ ہونے آں یا نئیں ہوندے۔ ایس اندر کوئی ونڈ نئیں۔ زندگی وچ اک پرم اپدیش جو مینوں ملیا اوہ آشرم اندر جوگیاں کولوں ملیا۔ اوہناں نے من دا ہر گھنٹے وچ تن وار منویوگ کرن دی صلاح دتی۔ اسی تھوڑے چِر لئی رکن دا وعدہ کرنے آں ایہ ویکھن لئی کہ ساڈا من کیہ پیا کردا اے، اتے کس حال وچ اے۔ اسی ایس اوپر کوئی فیصلہ نئیں دیندے، اسی نرا ایس دا نروپن کرنے آں۔ ہولی ہولی اسی اپنی سوچ اتے اپنی مثبت اتے منفی حالتاں بارے سُرت پھڑن دے عادی ہو جاواں گے۔ ایس طراں اسی زیادہ توں زیادہ اپنے من دے مالک نہ کہ غلام بن جاواں گے۔

سٹڈی بدھزم: چوکھے سمے  تیکر دھرم پاٹھ کرن لئی اپنے جوش و خروش اتے شوق  نوں قائم رکھنا مشکل ہوندا اے۔ ایس نوں قائم رکھن لئی اسی کیہ کر سکنے آں؟

تنزین پالمو: پہلی گل تے ایہ ہے کہ تھوڑا ہولا محسوس کرو! میں کئی وار آکھیا اے کہ ستواں ناپ ہاسے مذاق دی حِس ہونی چاہیدی اے، تاں جے اسی اپنے آپ نوں حدوں ودھ  اہمیت نہ دئیے۔ سانوں اپنا پاٹھ سنجیدگی نال کرنا چاہیدا اے، پر ایس دے نال نال سانوں اپنے آپ نوں حد توں ودھ پربھاو نئیں دینی چاہیدی۔

ایتھے میں ایہ سمجھنی آں کہ ساڈے لئی ایس گل دا احساس بوہت ضروری اے کہ اسی بطور انسان پیدا ہوۓ آں تے اسی  جو چاہئیے کر سکنے آں، کوئی کتاب چک کے نہ صرف اوس نوں پڑھ سکنے آں سغوں ایس نوں سمجھ  وی سکنے آں۔ ایس پدھر دی ودیا انسانی اتحاس وچ گھٹ ہی دسدی اے، ایس لئی سانوں ایس نوں ایویں ہی نئیں جاننا چاہیدا۔ سانوں جو کجھ ملیا اے سانوں ایس دی بےحد قدر کرنی چاہیدی اے اتے ایس نوں ضائع نئیں کرنا چاہیدا،  نئیں تے سانوں بوہت پچھتاوا ہووے گا۔

ہور ایہ کہ ایہ کسے حد تک ٹیکنالوجی نال وی رلدا ملدا اے، تہانوں اپنی بیٹری چارج کرن دی لوڑ اے۔ چلے کٹنا، ویلے کویلے مہان گوروواں کولوں گیان لینا، ایہ سب ساڈی بیٹری چارج کرن وچ سہائت ہوندے نیں۔ ایس طراں سانوں اکساوٹ ملدی اے تے اسی ایس ودیا دا اپنی زندگی وچ پریوگ کر سکنے آں جو سانوں ملی اے، جو کہ بوہت ضروری اے۔

اتے اخیرلی گل ایہ ہے کہ مہاتما بدھ نے چنگے بیلیاں دی پربھاو اوپر بوہت زور دتا۔ اسی اک اجیہے سماج وچ رہنے آں جو اکو ہی دِشا ول لگا جا رہیا اے، ایس پاروں اجیہے کجھ یاراں دا ہونا ضروری اے جنہاں دے اتے ساڈے سنسکار رلدے ہوون اتے جو سانوں ہلا شیری دین اتے ساڈی مدد کرن ایہ جانن وچ کہ اسی اکلے یا انوکھے نئیں، سغوں اسی جو کر رہے آں ایہ زندگی گزارن دا ودیہ طریقہ اے۔ ایس توں سانوں دھرم نوں اپنی زندگی دے وچکار نہ کہ آلے دوالے رکھن وچ مدد ملے گی، تاں جے اسی زندگی نوں دھرم دی مشق وچ خرچ کرئیے۔
                                                                     
 سٹڈی بدھزم: کدی کدار لوکی بدھ مت نوں بےاُدمی اکھ دھرائی مِتھدے نیں، تہاڈا ایس بارے کیہ وچار اے؟

تنزین پالمو: بدھ مت سب توں زیادہ ترِکھا نظام اے! سارا وقت اسی من دے نال نبڑنے آں، ایس نوں کویں سِدھایا جاۓ، اتے اسی کس طراں اپنے روائتی من توں سمُکھ ہو جائیے۔ ایس لئی بڑا ڈاڈھا پکا ارادہ اتے ثابت قدمی دی لوڑ اے۔ نالے ایہ کہ ایس لئی شانت سبھاو اتے وڈا دل وی چاہیدا اے، نہ کہ اشانتی اتے پریشانی۔ ایہ یقیناّ کوئی ٹیک لا کے بیٹھن اتے اپنے آپ ہون والا معاملہ نئیں۔ جے اسی ایس اوپر کم نئیں کراں گے، تے ایہ نئیں ہوۓ گا!

سٹڈی بدھزم: بدھ مت وچ عورتاں دا جو کردار اے کیا تسی ایس بارے کجھ دس سکدے او؟ 

تنزین پالمو: بدھ مت اندر عورتاں دے کردار دی کوئی خاص ریت نئیں۔ ساریاں کتاباں مرد بھکشوواں نے دوجے بھکشوواں لئی لکھیاں۔ تے عورتاں بارے عام رویہ رن بیزاری دا سی، جس اندرعورتاں ممتنع غیر دا کردار ادا کردیاں سان، جو کسے نِکے معصوم بھکشو اوپر داو لائی بیٹھی ہوون۔ ایس سماج اندر سوانیاں لئی ودیا اتے ڈوہنگے گیان دا پراپت تاں جے اوہ بوہت قابل بن جاون بوہت اوکھا کم سی۔

ہن حالات بوہت بدل گئے نیں۔ کڑیاں وی منڈیاں دے نال سکول وچ پڑھدیاں نیں، اتے چوکھی پڑھی لکھی ہو رہیاں نیں۔ ایس سال گیشماواں، دینی عالماں دی پہلی کھیپ تیار ہو کے نکلے گی جنہاں نوں تقدس مآب دلائی لاما سنداں دین گے۔ اتے سب توں ودھ  کے بھکشو سوانیاں موہرے آ رہیاں نیں، بڑا ڈاڈھا روحانی پاٹھ اتے لمے چلے کٹ رہیاں نیں، اتے انج اپنے لُکے ہوۓ گناں دی پچھان کر رہیاں نیں۔ ایتھے ایہ دسنا ضروری اے کہ ایس تحریک دے وڈے سرپرست خود بھکشو نیں، بس اک وار جدوں اوہناں نوں احساس ہو گیا کہ عورتاں وی پڑھ لکھ سکدیاں نیں۔ اوہ استاد بن گئے اتے اوہ بھکشو زنانیاں دی حوصلہ افزائی کرن وچ بوہت اگے اگے سان۔ پر فیر وی اوہ عورتاں دی مکمل منصب یابی دے خلاف نیں، جس دی پشلے تیہ ورہیاں توں مخالفت ہو رہی اے۔ 

سٹڈی بدھزم: بھکشو عورتاں جو کامیابی پراپت کر رہیاں نیں ایس بارے جان کے بوہت خوشی ہوئی۔ کیا ایہ سب قدرتی طور تے ہویا یا کہ ایس دی شروعات اوکھی سی؟ 

تنزین پالمو: جے تسی کسے آشرم وچ جاؤ اتے پوچھو کہ سب توں وڈی اوکڑ کیہ اے، تے ایس دا جواب ہمیش ایہ ہووے گا کہ من دی ہولی آدرتا اتے دھرواس دا گھاٹا۔ ایس اوپر سمے لگے گا۔ لداخ وچ پہلی وار جو کڑیاں بھکشو بنیاں اتے جو
اج کل دیاں نیں دے وچکار  بڑا فرق اے۔ نویاں کڑیاں نوں ایہ احساس نئیں کہ اوہناں نوں 'کمزور' اتے فرمانبردار ہونا اے، تے اوہ ایہ سمجھدیاں نیں کہ اوہ کجھ وی کر سکدیاں نیں کیوں جے اوہناں نے اوہناں توں پہلاں آون والیاں نوں تکیا اے۔ ایس طراں، اوہناں دے دل وچ کوئی شک شبہ نئیں۔

میں بھکشو سوانیاں دے پہلے جتھے کولوں پوچھیا کہ کیا مرد فطری طور تے سوانیاں کولوں بوہتے سرتیلے نیں تے سب نے ہاں وچ جواب دتا۔ میں آکھیا  کہ،"نئیں، اوہناں نوں چھڑا زیادہ موقع ملدا اے۔ جے تہانوں دوہناں نوں اکو جیہا موقع ملے تے تسی دونویں ودیہ ہو۔ کوئی مرد سیانے ہوندے نیں، کوئی مورکھ۔ کوئی عورتاں سیانیاں ہوندیاں نیں، کوئی مورکھ ۔ اسی سب انسان آں، کوئی اُتم اتے پرم نئیں۔" ہن جے میں ایہ سوال پوچھاں تو کڑیاں ایس سوال توں ہی پلیکھے وچ پے جاون گیاں! تے دَشا اگے نالوں چنگی تے ہو رہی اے۔

سٹڈی بدھزم: کیا عورتاں نوں مکمل منصب داری دین دا امکان نظر آوندا اے؟

تنزین پالمو: ایس ویلے اسی تقدس مآب کرمپا توں ایہ امید کر رہے آں کیوں جے اوہناں نے ایہ آکھیا سی کہ ایہ کم ہو جاۓ گا۔ تے ہن اسی ایہ ویکھنا اے کہ اوہ ایس نوں کویں کرن گے، کیوں جے ہر کسے نوں کوتک ہووے گی۔ ایہ گل بڑی ضروری اے کہ ایہ کم صحیح طریقے نال ہووے اتے اوہ ایس نوں انج کرن کہ سب ایس اوپر راضی ہون کہ ایہ صحیح منصب یابی اے، کیوں جے ایس نال سب لئی راہ پدھر ہو جاۓ گی۔

سٹڈی بدھزم: اتے اخیرلا سوال ایہ ہے کہ جو لوکی وچھوڑے یا نراش دے مارے  نیں، اوہ کیہ کرن؟

تنزین پالمو: نراش، من دی آدرتا دا گھاٹا، اکل ونج وغیرہ دا ودیہ علاج ایس گل دا احساس اے کہ اسی مہاتما بدھ جیہی فطرت دے مالک آں۔ باقی دے سارے مسٔلے جویں کیڑ، ساڑا، لوبھ، اجیہی عادتاں نیں جو اسی آپوں پائیاں نیں، پر ایہ ساڈی فطرت دا اٹوٹ انگ نئیں۔ 

اسی گھٹیا اپرادھی نئیں، اسی بےمُل ہستیاں نئیں۔ اسی موتی وانگوں سندر آں۔ 

سانوں اکثر ایہ دسیا جاندا اے کہ ساڈی یوگیا بڑی تھوڑی اے، جو کہ بڑی افسوس والی گل اے۔ اصل وچ، ساڈی یوگیا ات حدل اے۔ من دی فطرت یقین نہ آون دی حد تک حیران کرن والی اے۔ اسی گھٹیا اپرادھی نئیں، اسی بےمُل ہستیاں نئیں۔ اسی موتی وانگوں سندر آں۔ 

بدھ مت سانوں ساڈے ات حدل انا دے مارے ہوۓ من دے اوپر قابو پان اتے کسے وڈے اتے سچ مچ پرم منورتھ نوں اپنان وچ مدد کردا اے۔ سمادھ راہیں اسی ڈوہنگا گیان پراپت کرنے آں۔ عام طور تے اسی وچار، احساس اتے جذبیاں اندر ڈُبے ہونے آں۔ گیان راہیں اسی ایہناں ساریاں دا نروپن کر سکنے آں بغیر ایس وچ وگ جان دے۔ ایس توں سانوں اپنے روز دے جکڑے ہوۓ من دی تھاں کسے ڈوہنگی اتے کھلی دَشا نال پچھان ہوندی اے۔ اسی سب ایس تیکر پہنچ سکنے آں۔ ایہ ایڈا مشکل کم نئیں۔ کجھ  سبق اتے مشق نال ہر کوئی ایس نوں کر سکدا اے۔    

جٹسنما تنزین پالمو دی ہور ویڈیو ویکھو