ဉာဏ်အလင်း ရရှိခြင်း လမ်းကြောင်း

တိဘက်ဗုဒ္ဓဘာသာ၏ ကိုယ်တိုင် ပြောင်းလဲမှုလမ်းကြောင်းသည် lam-rim ဟုခေါ်သော ရှင်းလင်းစုဖွဲ့ထားသည့် အဆင့်များအတိုင်း လိုက်နာပါသည်။ lam-rim သည် ကျွန်ုပ်တို့၏ လက်ရှိအခြေအနေမှသည် ဗုဒ္ဓအဖြစ်သို့ တက်လှမ်းရောက်ရှိနည်း အသိပညာကို ပေးပါသည်။

စူးစိုက်ခြင်း

အာရုံစူးစိုက်မှုရှိပါက ဥပမာ၊ တစ်စုံတစ်ယောက်ကို နားထောင်ပေးပြီး အကူအညီပေးရန် ကြိုးစားသောအခါ ပွင့်လင်းမှု၊ မေတ္တာနှင့် နားလည်မှုစသည့် အပြုသဘော စိတ်အခြေအနေများကို ကျွန်ုပ်တို့၏စိတ်က အာရုံစိုက်နိုင်ပါသည်။ ဆက်လက်စူးစိုက်မှု ရှိရန်မှာ ကျွန်ုပ်တို့စိတ်ကို မလေလွင့်အောင်နှင့် မညစ်ညူးအောင် တည်ငြိမ်စွာထားနိုင်ရန် လိုပါသည်။ ထိုအတွက် သတိဖြင့်ရှုမှတ်မှု၊ သတိရှိမှုနှင့် ကိုယ့်ကိုယ်ကိုယ် စည်းကမ်းသတ်မှတ်ထားမှုတို့ လိုအပ်ပါသည်။ သတိဖြင့်ရှုမှတ်ပါက ကျွန်ုပ်တို့စိတ်ကို ထိန်းထားသော အခြေအနေအတိုင်း အာရုံမလွင့်အောင် ထားနိုင်ပါသည်။ သတိရှိပါက ကျွန်ုပ်တို့ စိတ်ပျံ့လွင့်သောအခါ သိရှိနိုင်သည်။ ကိုယ့်ကိုယ်ကိုယ် စည်းကမ်းသတ်မှတ်ထားပါက ကျွန်ုပ်တို့ အလေးထား အာရုံစိုက်မှု မူလအခြေအနေကို ပြန်ဆွဲခေါ်နိုင်ပါသည်။ ကျွန်ုပ်တို့၏ စိတ်အခြေအနေနှင့် စိတ်က ကျွန်ုပ်တို့နှင့် အခြားသူများအပေါ် သက်ရောက်ပုံကို အရှိအတိုင်း ဂရုပြုပါက အထပ်ထပ် တရားထိုင်ကျင့်ကြံခြင်းဖြင့် ထိုအရည်အချင်းများ တိုးတက်အောင် လေ့ကျင့်နိုင်ပါသည်။

အနတ္တ (ဘာမှမရှိခြင်း)

လက်တွေ့အမှန်တရားအကြောင်း စိတ်ရှုပ်ထွေးပါက ကျွန်ုပ်တို့ ကိုယ်တိုင်အပေါ်တွင်လည်းကောင်း၊ ကျွန်ုပ်တို့ တွေ့ကြုံရသူများနှင့် အရာရာအပေါ်တွင်လည်းကောင်း မဖြစ်နိုင်သော တည်ရှိမှုနည်းလမ်းများကို မှန်းဆမိစေပါသည်။ ဥပမာ၊ ဘဝတွင် ကျွန်ုပ်တို့၏ ပြဿနာများမှာ ကျွန်ုပ်တို့၏ သဘောထားနှင့် အပြုအမူများနှင့် သီးခြားစီ ဖြစ်ပေါ်သည်ဟု စိတ်ကူးယဉ်ကြပါသည်။ ကျွန်ုပ်တို့၏ စိတ်ကူးယဉ် မှန်းဆချက်များနှင့်ဆိုင်သော မှန်ကန်သည့်အချက် တစ်ခုမှ မရှိကြောင်း၊ ကျွန်ုပ်တို့ပြဿနာများသည် အကြောင်းတရား ပေါင်းစုံရောယှက်ရာမှ ပေါ်ထွက်လာပြီး ပြောင်းလဲတတ်ကြောင်း သဘောပေါက်ပါက အနတ္တ (ဘာမှမရှိခြင်း) ကို သဘောပေါက်လာကာ ထိုအကြောင်းတရားတို့မှ ကိုယ်တိုင် လွတ်မြောက်မည့် အဓိပ္ပာယ်ရှိသော မဟာဗျူဟာများ ချမှတ်နိုင်ပါသည်။