རྒྱུ་འབྲས་མན་ངག་བདུན་སྒོམ་པའི་སྒོ་ནས་བྱང་ཆུབ་ཀྱི་སེམས་བསྐྱེད་ཚུལ།

བྱང་ཆུབ་ཀྱི་སེམས་ཞེས་པ་ནི། སེམས་ཅན་གྱི་དོན་ཡང་དག་པ་སྒྲུབ་ཐུབ་པའི་ཆེད་དུ་སངས་རྒྱས་ཀྱི་གོ་འཕང་འཐོབ་པ་ལ་དམིགས་པ་ཞིག་ཡིན། དེ་འདྲའི་བྱང་ཆུབ་ཀྱི་སེམས་དེ་རང་རྒྱུད་ལ་སྐྱེ་བ་དང་སྐྱེས་ནས་ནུས་ཤུགས་ཆེ་རུ་གཏོང་བ་ལ་རྒྱུ་འབྲས་མན་ངག་བདུན་གྱི་ཐབས་ལམ་ལ་བརྟེན་དགོས། དེ་ཡང་སྐྱེ་བའི་རིམ་པ་ལ་སེམས་ཚོར་དང་གོ་རྟོགས་ཀྱི་རྒྱུད་རིམ་ཞིག་འགྲོ་དགོས་ཤིང་། དེ་ཡང་ཐོག་མར་འགྲོ་བ་སེམས་ཅན་ཐམས་ཅད་ལ་བཏང་སྙོམས་ཀྱི་བློ་བསྐྱེད་པ་ནས་མགོ་བཙུགས་ཏེ་ཐམས་ཅད་རང་གི་མ་བྱས་མི་མྱོང་བ་མེད་པས་མར་ཤེས་པ་དང་། མའི་བྱམས་བརྩེ་དྲན་པས་དྲིན་དྲན་པ། བཀའ་དྲིན་དྲན་པ་ལ་བརྟེན་ནས་དྲིན་ལན་འཇལ་དགོས་པས་དྲིན་གཟོ་བ། འདིས་སེམས་ཅན་ཐམས་ཅད་ལ་གཅིག་མཚུངས་སུ་བྱམས་པ་དང་སྙིང་རྗེ་བསྐྱེད་པར་བྱེད་པས་ཡིད་འོང་གི་བྱམས་པ་དང་སྙིང་རྗེ། དེ་ནས་སེམས་ཅན་གྱི་དོན་རང་གིས་བྱེད་ཀྱི་ཡིན་བསམ་པ་ཙམ་མ་ཡིན་པར། དེའི་འགན་དེ་རང་ཉིད་ཀྱིས་འཁུར་གྱི་ཡིན་ཞེས་སེམས་ཐག་བཅད་པའི་ཆོད་སེམས་ཁྱད་པར་ཅན་ནམ་ལྷག་བསམ་བསྐྱེད་པ་དང་། རྒྱུའི་རིམ་པ་འདིའི་འབྲས་བུ་ནི་བྱང་ཆུབ་སེམས་ཀྱི་དམིགས་ཡུལ་དེ་འབྱུང་བ་ཡིན།

ངོ་སྤྲོད།

དལ་འབྱོར་གྱི་མི་ལུས་རིན་པོ་ཆེ་འདི་ང་ཚོ་ལ་ཐོབ་ཡོད་པ་སོང་ཙང། ང་ཚོས་འདི་ལ་བརྟེན་ནས་ནང་པ་སངས་རྒྱས་པའི་ལམ་ལ་འཇུག་ཐུབ་ཀྱི་ཡོད། ཡིན་ནའང་ང་ཚོ་ལ་ཡོད་པའི་རང་དབང་དང་གོ་སྐབས་འདི་དག་དུས་གཏན་དུ་གནས་ཀྱི་མ་རེད། དེར་བརྟེན་ད་ལྟ་ང་ཚོ་ལ་དལ་འབྱོར་གྱི་མི་ལུས་ཞིག་ཡོད་པའི་སྐབས་འདིར་ང་ཚོས་གོ་སྐབས་ཆ་ཚང་ལེན་དགོས་ཀྱི་ཡོད། 

ང་ཚོའི་མི་ལུས་རིན་པོ་ཆེ་འདི་ལས་གོ་སྐབས་ལེན་ཡག་གི་ཐབས་ཤེས་ཡག་ཤོས་ནི། ང་ཚོའི་མི་ལུས་འདི་བྱང་ཆུབ་ཀྱི་སེམས་བསྐྱེད་པའི་ཆེད་དུ་བེད་སྤྱོད་བྱེད་རྒྱུ་དེ་ཡིན། བྱང་ཆུབ་སེམས་ཀྱི་དམིགས་ཡུལ་ཞེས་པ་ནི་ད་ལྟ་སངས་རྒྱས་ཀྱི་གོ་འཕང་ཐོབ་མེད་ཀྱང་སོ་སོ་སངས་རྒྱས་ཀྱི་གོ་འཕང་འཐོབ་པའི་ཆེད་དུ་སེམས་གཏིང་ནས་དམིགས་པ་གཏད་པ་དེ་ཡིན། འོན་ཀྱང་སངས་རྒྱས་ཀྱི་གོ་འཕང་འཐོབ་ཐུབ་པར་བྱེད་པའི་རྒྱུ་བདེ་གཤེགས་སྙིང་པོ་གཞི་རྟེན་དུ་བྱས་ནས་རྗེས་མ་རང་གི་སེམས་རྒྱུན་ལ་ཆ་འཇོག་བྱེད་ཆོག་པ་ཡིན། དེ་འདྲའི་གོ་འཕང་ཐོབ་ཆེད་ཀྱི་ཆ་རྐྱེན་ནང་དགེ་བའི་ནུས་ཤུགས་དང་གཏིང་ཟབ་ཀྱི་རིག་པའི་མ་ལག། ང་ཚོའི་ཁྱད་ཆོས་བཟང་པོ་སྣ་ཚོགས་པ་རྣམས་དང་སེམས་དག་པའམ་གཙང་བའི་རང་བཞིན་སོགས་ཡོད། འདི་ལྟ་བུའི་བྱང་ཆུབ་ཀྱི་སེམས་བསྐྱེད་པ་ལ་དམིགས་འདུན་གཉིས་ཀྱི་གྲོགས་བྱེད་ཀྱི་ཡོད་པ་ནི། དང་པོ། སངས་རྒྱས་ཀྱི་གོ་འཕང་གང་མགྱོགས་མགྱོགས་འཐོབ་རྒྱུ་དང་། གཉིས་པ། སངས་རྒྱས་ཀྱི་གོ་འཕང་ཐོབ་པའི་ཐབས་དེ་ལ་བརྟེན་ནས་སེམས་ཅན་གྱི་དོན་སྒྲུབ་རྒྱུ་དེ་ཡིན།

ང་ཚོས་བྱང་ཆུབ་ཀྱི་སེམས་བསྐྱེད་པའི་སྐབས་སུ་གོང་ཞུས་ཀྱི་དམིགས་འདུན་གཉིས་པོ་གོ་རིམ་ལྡོག་ནས་བསྐྱེད་ཀྱི་ཡོད། དེ་ཡང་ཐོག་མར་ང་ཚོས་འགྲོ་བ་མིའི་རིགས་ཙམ་མ་ཡིན་པར། སེམས་ཅན་ཐམས་ཅད་ལ་ཕན་པ་སྒྲུབ་འདོད་ཀྱི་འདུན་པ་ཆ་ཚང་བ་ཞིག་སྐྱེད་ཀྱི་ཡོད། འདི་ནི་ང་ཚོའི་སེམས་ཅན་ལ་དམིགས་པའི་བྱམས་པ་དང་། སྙིང་རྗེ། ལྷག་བསམ་གྱིས་ཀུན་ནས་བསླངས་ཏེ་ཡོང་གི་ཡོད་ཅིང་། འདི་དག་གི་སྐོར་ལ་ཞིབ་ཕྲའི་གནད་དོན་རྣམས་གཏམ་བཤད་འདིའི་གཤམ་དུ་བགྲོ་གླེང་བྱ་རྒྱུ་ཡིན། དེ་ནས་སེམས་ཅན་རྣམས་ལ་ཆེས་ནུས་པ་དང་ལྡན་པའི་སྒོ་ནས་ཕན་འདོགས་པའི་ཆེད་དུ་ང་ཚོར་ཐམས་ཅད་མཁྱེན་པའི་གོ་འཕང་ཐོབ་འདོད་ཀྱི་འདུན་པ་ཡོང་གི་ཡོད། ང་ཚོར་ཡོད་པའི་སྐྱོན་གྱི་ཆ་དང་ལྡེང་མིན་གྱི་ཆ་ཚང་མ་མེད་པ་བཟོ་བའི་ཆེད་སངས་རྒྱས་ཀྱི་གོ་འཕང་འཐོབ་དགོས་ཀྱི་ཡོད། དེ་གང་ཡིན་ཞེ་ན། སྐྱོན་གྱི་ཆ་དེ་དག་གིས་ང་ཚོས་གཞན་དོན་ཡག་ཤོས་སུ་སྒྲུབ་ཐུབ་པ་ལ་འགོག་རྐྱེན་བྱེད་ཀྱི་ཡོད། དཔེར་ན། ང་ཚོ་མི་གཞན་ལ་ཁོང་ཁྲོ་ཟ་བའི་སྐབས་ང་ཚོས་ག་འདྲ་བྱས་ནས་ཁོ་ཚོ་ལ་རོགས་པ་བྱེད་ཐུབ་བམ། དེ་ག་ནང་བཞིན་རང་གི་ནུས་པ་ཡོངས་རྫོགས་རྟོགས་པའི་ཆེད་དུ་སངས་རྒྱས་ཀྱི་གོ་འཕང་འཐོབ་དགོས་ཀྱི་ཡོད་ལ། ང་ཚོས་ནུས་པ་དེ་དག་ཆ་ཚང་བ་རྟོགས་ནས་སེམས་ཅན་གྱི་དོན་ཡང་དག་པ་སྒྲུབ་པ་ལ་བེད་སྤྱོད་བྱེད་ཐུབ་པ་དགོས། བྱས་ཙང། བྱང་ཆུབ་ཀྱི་སེམས་བསྐྱེད་པའི་སྐབས་སུ། དང་པོ་ང་ཚོ་སངས་རྒྱས་ཀྱི་གོ་འཕང་འཐོབ་པར་འདོད་ཀྱི་ཡོད། གང་ཡིན་ཞེ་ན། དེ་ནི་གོང་འཕང་མཐོ་ཤོས་སམ་མཆོག་ཏུ་གྱུར་བ་དེ་ཡིན་པ་དང། དེ་ནས་གཞུང་ལ་ཁྲལ་ཡིན་གཅིག་སྤྲོད་དགོས་པ་ལྟ་བུ་གཞི་ནས་སེམས་ཅན་གྱི་དོན་སྒྲུབ་དགོས་པ་ཞིག་མ་ཡིན།

བྱང་ཆུབ་ཀྱི་སེམས་བསྐྱེད་པའི་ཐབས་ལམ་ལ་གཉིས་ཡོད། གཅིག་ནི་རྒྱུ་འབྲས་མན་ངག་བདུན་ལས་བྱང་ཆུབ་སེམས་བསྐྱེད་ཚུལ་དང་། གཞན་དེ་ནི་བདག་དང་གཞན་གྱི་བསམ་ཕྱོགས་མཉམ་པ་དང་བརྗེ་བ་༼བདག་གཞན་མཉམ་བརྗེ་༽ཡི་སྒོ་ནས་བྱང་ཆུབ་སེམས་བསྐྱེད་པ་དེ་ཡིན། འདི་གཉིས་ལས་ཐབས་ལམ་དང་པོ་རྒྱུ་འབྲས་མན་ངག་བདུན་གྱི་སྐོར་སྐབས་འདིར་བགྲོ་གླེང་བྱ་རྒྱུ་ཡིན། 

 བཏང་སྙོམས་བསྐྱེད་པ།

རྒྱུ་འབྲས་མན་ངག་བདུན་བཤད་པ་ལ། བང་རིམ་དང་པོ་དྲུག་རྒྱུ་དང་། ཐ་མའམ་བདུན་པ་བྱང་ཆུབ་སེམས་དངོས་སུ་བསྐྱེད་པ་ནི་འབྲས་བུ་ཡིན། རྒྱུ་འབྲས་མན་ངག་བདུན་གྱི་གྲངས་སུ་མེད་པའིསྔོན་འགྲོའི་ལམ་གྱི་རིམ་པ་ཞིག་ནས་ཉམས་ལེན་འདི་མགོ་བཙུག་གི་ཡོད། དེ་ནི་འགའ་ཞིག་ལ་ཡིད་དབང་འཕྲོག་པ་དང་འགས་ཤས་ལ་ཆགས་པ། འགའ་ཤས་ལས་ཞེ་སྡང་དང་སྣང་མེད་དུ་སྡོད་པའི་བློ་ལས་ཐར་ནས་ཐམས་ཅད་ལ་བཏང་སྙོམས་སུ་བལྟ་བའི་བློ་བསྐྱེད་རྒྱུ་དེ་ཡིན། སྔོན་འགྲོའི་རིམ་པ་འདི་ལ་འཇུག་དགོས་པའི་རྒྱུ་མཚན་ནི། སེམས་ཅན་ཐམས་ཅད་ལ་བློ་རྒྱ་ཡངས་ཤིང་ལྟ་སྟངས་གཅིག་པ་ཡོང་བའི་ཆེད་དུ་ཡིན།

སེམས་ཅན་ཐམས་ཅད་གཅིག་པའམ་མཉམ་པ་ཡིན་པའི་གོ་རྟོགས་དེ་ཡོང་བ་ལ། སེམས་ཅན་ཐམས་ཅད་ལ་བློ་རྒྱ་ཡངས་པའི་སྒོ་ནས་གཅིག་པར་བལྟ་དགོས་པ་དང་། དེ་ནི་སེམས་ཀྱི་རྒྱུན་ལ་ཐོག་མ་དང་ཐ་མ་མེད་པ་རྟོགས་པ་ལས་ཡོང་གི་ཡོད། དེ་ལྟར་སེམས་ལ་ཐོག་མ་དང་ཐ་མ་མེད་པས་སེམས་ཅན་རྣམས་མཚམས་རེར་རང་གི་གྲོགས་པོ་བྱས་ཡོད་པ་དང་། མཚམས་རེར་རང་གི་དགྲ་བྱས་ཡོད་པ། ཡང་གནས་སྐབས་འགའ་རེར་ཆ་རྒྱུས་མེད་པའི་མི་ཞིག་ཀྱང་བྱས་ཡོད་པས། ང་ཚོའི་གནས་བབས་དེ་ག་དུས་ཡིན་ནའང་འགྱུར་བ་འགྲོ་ཡི་ཡོད། རྒྱུ་མཚན་འདི་ལ་བལྟས་ན། སེམས་ཅན་ཐམས་ཅད་གཅིག་པ་ཡིན། 

འདི་ལྟ་བུའི་བསམ་བློ་གཏོང་སྟངས་ཀྱི་རྒྱབ་ལ་ང་ཚོས་ཤེས་དགོས་པའི་གནད་དོན་གཙོ་བོ་ནི་། ཐོག་མ་མེད་པའི་སེམས་ཞེས་པ་དེ་ཡིན། ནང་པ་སངས་རྒྱས་པའི་ནང་འདི་ནི་གཞི་རྩའི་ཁས་ལེན་ཞིག་ཡིན། སྐྱེ་བ་སྔ་ཕྱི་ཞེས་པ་ནི་མྱོང་བའི་རྒྱུན་ཞིག་ལ་བཞག་དགོས་པ་དང་། སེམས་ཀྱི་རྒྱུན་འགྲོ་བ་ཡང་མྱོང་བའི་རྒྱུན་ཞིག་རེད། སེམས་ཅན་ཐམས་ཅད་རང་བཞིན་ལྷན་སྐྱེས་ཀྱིས་མི་དང་། དུད་འགྲོ། ཕོ་དང་མོ་སོགས་མེད་པར། དེ་དག་བྱེ་བྲག་སོ་སོ་ནས་ཡོད་པ་ཡིན། སེམས་ཀྱི་རྒྱུན་དེས་ཚེ་གཅིག་ལ་སེམས་ཅན་བྱེ་བྲག་པ་གང་ཞིག་ལ་སྐྱེ་བ་ལེན་པ་དང་། ཕོ་མོའི་སྐྱེ་བ་བྱེ་བྲག་པ་གང་ཞིག་ལེན་པ་སོགས་ནི། ཚེ་དེའི་སྔ་མའི་ལས་ཀྱི་སྤྱོད་ལམ་དང་དེའི་རྗེས་ཀྱི་འབྲས་བུ་ལ་རག་ལུས་ཡོད།

ཐོག་མ་མེད་པའི་སེམས་ཞེས་པའི་གནད་དོན་འདི་ནི་བྱང་ཆུབ་སེམས་བསྐྱེད་པར་བྱེད་པའི་གཞི་རྩའི་དགོས་ངེས་ཅན་གྱི་གོ་རྟོགས་ཤིག་ཡིན། འདི་ལྟ་བུའི་གོ་རྟོགས་ལ་གཞི་རྟེན་བྱས་ནས་ང་ཚོས་སེམས་ཅན་ཐམས་ཅད་ལ་གཅིག་དུ་བཟུང་བའི་བྱམས་སྙིང་རྗེ་དེ་བསྐྱེད་ཐུབ་པ་ཡོང་གི་ཡོད། དེར་བརྟེན། དཔེར་ན། ང་ཚོས་སེམས་ཅན་གཞན་རྣམས་དུག་སྦྲང་ཙམ་ཡིན་པ་ལྟ་བུ་མི་མཐོང་བར། དེ་ལས་ལྡོག་སྟེ་དེ་ནི་སྐྱེ་བ་གྲངས་མེད་པའི་སེམས་ཀྱི་རྒྱུན་ཞིག་ལས་ཀྱི་དབང་གིས་ཚེ་འདིར་འབྲས་བུར་དུག་སྦྲང་དུ་སྐྱེས་པ་ཞིག་ལས་རང་བཞིན་ལྷན་སྐྱེས་ཀྱིས་དུག་སྦྲང་མིན་པའི་གནད་དོན་དེ་རྟོགས་ཐུབ། བསམ་བློ་འདི་ལ་བརྟེན་ནས་དུག་སྦྲང་ལ་ཡང་འགྲོ་བ་མིའི་རིགས་ནང་བཞིན་གྱི་བློ་རྒྱ་ཡངས་པའི་ལྟ་སྟངས་ཡོང་ཐུབ་པ་ཡིན། བྱང་ཆུབ་སེམས་ཀྱི་བློ་སྟོབས་ནི། དངོས་གནས་འགྲོ་བ་སེམས་ཅན་ཐམས་ཅད་ལ་དོན་དམ་པའི་ཕན་ཐོགས་བྱེད་པའི་འདུན་པ་ལས་བྱུང་བ་ཞིག་ཡིན། འདི་ལས་སླ་པོ་ཞིག་མེད་པ་ནི་བཤད་མི་དགོས་པ་རེད།

 སེམས་ཅན་ཐམས་ཅད་རང་གི་མ་བྱས་མྱོང་བ་ཤེས་པ། ༼མར་ཤེས་པ།༽

ང་ཚོས་བཏང་སྙོམས་ལ་བརྟེན་ནས་སེམས་ཅན་ཐམས་ཅད་ཐོག་མ་མེད་པའི་སེམས་ཀྱི་རྒྱུན་ཞིག་ལས་བྱུང་བ་མཐོང་ཐུབ་པ་དང་། ཚེ་འདིའི་ལུས་ཕུང་ཡང་སེམས་ཅན་དེ་དག་གི་ཡིན་པར་ཁས་ལེན་བྱེད་པའི་སྐབས་གཞི་ནས་ང་ཚོས་རྒྱུ་འབྲས་མན་ངག་བདུན་སྒོམ་པའི་ནང་གི་རིམ་པ་དང་པོ་དེར་ཉམས་ལེན་བྱ་རྒྱུའི་གྲ་སྒྲིག་ཨང་བསར་ཡོད་པ་ཡིན། དེ་ཡང་སེམས་ཅན་ཐམས་ཅད་རེ་རེ་བཞིན་དུས་ནམ་ཞིག་གི་ཚེ། རང་གི་མ་བྱས་མྱོང་བ་ཤེས་རྒྱུ་དེ་ཡིན། འདི་སྒྲུབ་བྱེད་ཀྱི་རྒྱུ་མཚན་ནི། ཚི་འདི་ལ་རང་སྐྱེ་སྲིང་སྐྱོང་གསུམ་བྱེད་མཁན་གྱི་ཨ་མ་ཡོད་པ་ལྟར། སྐྱེ་བ་ཐོག་མ་མེད་པ་ནས་ང་ཚོ་མའི་མངལ་ལམ་སྒོ་ང་སོགས་སྐྱེ་གནས་གང་རུང་ནས་སྐྱེ་བ་བླངས་ཡོད་ཅིང་། སྐབས་དེ་དུས་ཀྱང་ཨ་མ་ཡོད་པ་བཤད་མི་དགོས་པ་རེད། སྐྱེ་བ་ལ་ཐོག་མ་མེད་པ་དང་སེམས་ཅན་གྲངས་ཀྱི་མི་ལངས་པའི་ཚད་ཡོད་པའི་རང་བཞིན་སོགས་རྒྱུ་མཚན་དུ་བྱས་ནས་སེམས་ཅན་ཐམས་ཅད་ཐོག་མ་མེད་པ་ནས་རང་གི་མ་བྱས་མྱོང་བ་དང་། རང་གིས་ཀྱང་སེམས་ཅན་རྣམས་ཀྱི་མ་བྱས་མྱོང་བ་སྒྲུབ་ཐུབ། དེར་མ་ཟད། སེམས་ཅན་ཐམས་ཅད་རང་གི་ཕ་དང་དགའ་ཉེ་སྤུན་མཆེད་སོགས་བྱས་མྱོང་བ་ཤ་སྟག་ཡིན་པ་ཡང་སྒྲུབ་ཐུབ། 

སེམས་ཅན་ཐམས་ཅད་རང་གི་མར་བལྟ་བའི་སྐབས་སུ་རང་བཞིན་ལྷན་སྐྱེས་ཀྱིས་རང་གི་མ་ཡིན་པ་ལྟ་བུའི་སྣང་བ་མི་ཡོང་བ་ལ་གཟབ་གཟབ་བྱེད་དགོས། གང་ཡིན་ཞེ་ན། དེ་ལྟར་མཐོང་རྒྱུ་དེ་ཡང་ཏོག་ཙམ་དཀའ་རྙོག་ཅན་ཞིག་ཆགས་སྲིད་པ་ཡིན། ང་ཚོས་སྟོང་པ་ཉིད་ཀྱི་དོན་རང་བཞིན་གྱིས་གྲུབ་པའམ་རང་ཚུགས་སུ་གྲུབ་པ་གཅིག་ཀྱང་མེད་པ་དེ་ནམ་ཡང་མི་བརྗེད་པའི་ཐབས་ཤེས་བྱེད་དགོས། 

སེམས་ཅན་ཐམས་ཅད་རང་གི་མ་བྱས་མྱོང་བ་ཤེས་པ་དེས་སེམས་ཅན་གཞན་དང་འབྲེལ་བ་བྱེད་སྟངས་ལ་རྩ་བ་ནས་འགྱུར་བ་གཏོང་གི་ཡོད། འདིའི་སྐབས་སུ་སེམས་ཅན་ཐམས་ཅད་ལ་ལྟ་སྟངས་གཅིག་ཏུ་བལྟ་བའི་བཏང་སྙོམས་ཀྱི་བསམ་བློ་ཙམ་མ་ཡིན་པར། དེ་ལས་བརྒལ་ནས་སེམས་ཅན་ཐམས་ཅད་དང་མཉམ་དུ་སེམས་ཐག་ཧ་ཅང་ཉེ་པོ་དང་། བརྩེ་སེམས་དྲོན་མོ། དེ་བཞིན་བྱམས་བརྩེའི་འབྲེལ་ལམ་ཞིག་བྱུང་ཡོད་པ་དང་འབྱུང་ཆོག་པ་དེ་མཐོང་ཐུབ།

 མའི་བྱམས་བརྩེའི་བཀའ་དྲིན་དྲན་པ། ༼དྲིན་དྲན།༽

རྒྱུ་འབྲས་མན་ངག་བདུན་ལས་གཉིས་པ་ནི། མའི་བྱམས་བརྩེའི་བཀའ་དྲིན་དྲན་པ་དེ་ཡིན། ནུབ་ཕྱོགས་པ་མང་པོ་ཞིག་ལ་འདི་ནི་སྒོམ་རྒྱག་པའི་སྐབས་ཏོག་ཙམ་དཀའ་རྙོག་ཅན་གྱི་རིམ་པ་ཞིག་ཆགས་ཀྱི་ཡོད། དེ་གང་ཡིན་ཟེར་ན། རྒྱ་གར་གྱི་མི་དང་བོད་པ་ཚོས་ཚེ་འདི་ལ་ག་དུས་ཡིན་ནའང་ཨ་མ་དཔེ་རུ་བཞག་གི་ཡོད། སྤྱི་ཚོགས་དེ་ཚོའི་ནང་རང་གི་མ་དང་མཉམ་དུ་ཡོད་པའི་འབྲེལ་ལམ་ནི་ནུབ་ཕྱོགས་ཀྱི་སྤྱི་ཚོགས་དང་བསྡུར་ན་ཧ་ལམ་རྙོག་འཛིངས་ཆུང་བ་དང་དཀའ་ངལ་ཉུང་བ་ལྟ་བུ་ཡོད། དེ་བདེན་པ་ཡིན་མིན་ནི་གང་ཟག་སྒེར་སོ་སོའི་གནས་སྟངས་ལ་རག་ལུས་པ་ཤོད་མི་དགོས་པ་ཡིན། ངས་ལོ་ཉེར་དགུའི་རིང་བོད་པ་དང་རྒྱ་གར་གྱི་སྤྱི་ཚོགས་ནང་བསྡད་པ་ལས་བྱུང་བའི་ཉམས་མྱོང་དང་གོ་རྟོགས་ནས་བཤད་ན། སྤྱི་ཚོགས་དེ་ཚོའི་ནང་ཡོད་པའི་གཞོན་ནུ་དང་དར་མ་སོགས་ཀྱི་རང་གི་ཨ་མ་དང་མཉམ་དུ་ཡོད་པའི་འབྲེལ་བ་དེ་ནུབ་ཕྱོགས་པ་ལས་ཆེས་རྙོག་འཛིངས་ཆུང་བ་དང་སེམས་འཆོལ་ཉུང་བ་ཡོད་པ་ལྟ་བུ་འདུག 

སྒོམ་རྒྱག་པའི་སྐབས་སུ་ཐབས་ལམ་གྱི་རིམ་པ་འདི་ནི་རང་གི་ཨ་མ་ཇི་ཙམ་གྱི་བཀའ་དྲིན་ཆེན་པོ་ཡིན་པའམ། གལ་སྲིད་རང་གི་ཨ་མ་འདས་གྲོངས་སུ་ཕྱིན་པ་ཡིན་ན། ཁོང་གིས་བཀའ་དྲིན་ཆེན་པོ་བསྐྱངས་མྱོང་ཡོད་པ་དྲན་རྒྱུ་དེ་ཡིན། དེའི་ཐབས་ལ་མའི་མངལ་ནས་ཟླ་བ་དགུའི་རིང་དཀའ་སྡུག་མྱངས་ནས་འཁྱེར་ཡོད་པ་སོགས་ནས་མགོ་བཙུགས་ཏེ་བཀའ་དྲིན་དྲན་དགོས། དེ་ནས་བསམ་བློ་དེ་རྒྱ་ཆེ་རུ་བཏང་ནས་སེམས་ཅན་ཐམས་ཅད་ཀྱི་ཚེ་རབས་ཐོག་མ་མེད་པ་ནས་དེ་འདྲའི་བྱམས་བརྩེས་བསྐྱངས་ཡོད་པ་ལ་བསམ་དགོས།   

མི་མང་པོ་ཞིག་གིས་ནུབ་ཕྱོགས་པ་རྣམས་ལ་འདི་ཆོས་ཁྲིད་བྱེད་པའི་སྐབས་སུ། ཁྱེད་རང་སོ་སོའི་ཨ་མ་དང་འབྲེལ་ལམ་ཡག་པོ་མེད་ན་དེའི་ཚབ་ལ་རང་དང་འབྲེལ་བ་ཡག་པོ་ཡོད་པའི་ཨ་ཕའམ། གྲོགས་པོ་ཉེ་པོ་སོགས་རང་ལ་བྱམས་བརྩེས་བསྐྱངས་མྱོང་བའི་མི་སུ་འདྲ་ཞིག་བསམ་ཀྱང་འགྲིག་ཅེས་གསལ་བཤད་གནང་གི་ཡོད། དེ་ལ་བརྟེན་ནས་སྒོམ་འདི་རྒྱག་ཐབས་བྱེད་པའི་སྐབས་དེ་རང་ལ་འཁར་བའམ་འགགས་ནས་སྡོད་ཀྱི་མ་རེད། བྱས་ཙང། ངའི་བསམ་པར། འདི་ནི་ཐབས་ལམ་ཕན་ཐོགས་ཅན་ཞིག་རེད་བསམ་གྱི་འདུག འོན་ཀྱང་གལ་སྲིད་རང་གི་མ་དང་མཉམ་དུ་ཡོད་པའི་འབྲེལ་བ་ལ་དཀའ་ངལ་ཡོད་ན། སྣང་མེད་དུ་མ་བཞག་པར་གདོང་ལེན་བྱེད་དགོས་རྒྱུ་ནི་ཧ་ཅང་གལ་ཆེན་པོ་རེད་བསམ་གྱི་འདུག གལ་སྲིད་རང་གི་མ་དང་མཉམ་དུ་འབྲེལ་ལམ་བཟང་པོ་མེད་ན། མི་གཞན་སུ་འདྲ་ཞིག་དང་མཉམ་དུའང་བྱམས་བརྩེ་ལྡན་པའི་འབྲེལ་ལམ་བཟང་པོ་ཡོང་རྒྱུ་ཧ་ཅང་དཀའ་ལས་ཁག་པོ་ཡིན་པ་དང་། ག་དུས་ཡིན་ནའང་དཀའ་ངལ་ཅིག་ཡོང་སྡོད་ཀྱི་རེད། དེར་བརྟེན་རང་གི་མ་དང་མཉམ་དུ་ཡོད་པའི་འབྲེལ་བ་དེ་སྔ་ཇི་ཙམ་གྱི་དཀའ་རྙོག་ཆེན་པོ་བྱུང་ཡོད་སྲིད་པའམ། ཡང་ན་ད་ལྟའི་གནས་སྐབས་སུ་འབྲེལ་བར་དཀའ་རྙོག་ཡོད་བཞིན་པ་གང་འདྲ་ཞིག་ཡིན་ནའང་། ཨ་མ་དང་མཉམ་དུ་ཡོད་པའི་འབྲེལ་བ་ངོ་མ་ལ་ལྟ་ཞིབ་དང་། ཨ་མའི་བྱམས་བརྩེ་དང་བཀའ་དྲིན་ཤེས་ཐབས་བྱ་རྒྱུ་ནི་ཤིན་ཏུ་གལ་ཆེན་པོ་ཡིན། 

དང་པོ་དེར་ང་ཚོས་མིག་དཔེར་འོས་པའི་ཨ་མའི་བྱམས་བརྩེ་ལ་བལྟ་དགོས། སྲོལ་རྒྱུན་གྱི་གཞུང་ལུགས་ཁག་ནང་དེ་དག་གི་སྐོར་ལ་འགྲེལ་བཤད་ཁེངས་ནས་ཡོད་པ་དཔེར་ན། དེ་དུད་འགྲོ་སེམས་ཅན་མང་པོ་ལའང་མཐོང་གི་ཡོད། བྱ་ལྟ་བུར་མཚོན་ན། གནམ་གཤིས་གྲང་བ་དང་ཆར་ཆུས་སྦང་བ་ཡིན་ནའང་བྱ་དེས་རང་གི་སྒོ་ངའི་སྟེང་ལ་སྡོད་ནས་སྲུང་སྐྱོབ་བྱེད་པ་དང་། སྒོ་ང་སྨིན་ནས་ཕྲུ་གུ་སྐྱེས་སྐབས་འབུ་སྲིན་སོགས་ཁ་ནང་མུར་ནས་མིད་ཁྱུར་མི་བཏང་བར་རང་གི་བྱིའུ་ཕྲུག་ཚོར་ཟས་སྦྱིན་གྱི་ཡོད། དེ་ནི་དངོས་གནས་ཐུན་མོང་མ་ཡིན་པའི་བྱམས་བརྩེ་ཞིག་ཡིན།

དུད་འགྲོ་དང་འབུ་སྲིན་གྱི་འཇིག་རྟེན་ནང་རང་གི་ཕྲུ་གུ་བཟའ་མཁན་གྱི་ཨ་མའི་དཔེ་མཚོན་ཡང་མང་པོ་ཡོད་པ་ཤོད་མི་དགོས་ཀྱང་། ད་དུང་དེ་དག་གིས་ཀྱང་ཕྲུ་གུ་སྐྱེ་བའི་དཀའ་སྡུག་མྱངས་ཡོད། རང་སྐྱེ་སྲིང་བྱེད་མཁན་གྱི་ཨ་མ་དངོས་གནས་ཡིན་ནའང་འདྲ། མ་ཚབ་ཡིན་ནའང་འདྲ་སྟེ། གང་ལྟར་ཡང་ཁོ་ཚོས་མངལ་ནང་ཟླ་བ་དགུ་འཁྱེར་གྱི་ཡོད་པ་ནི་གཅིག་པ་ཡིན། ཐ་ན་དེང་སང་ཚན་རིག་ཡར་ཐོན་ལ་བརྟེན་ནས་ཚོད་ལྟའི་ཤེལ་སྦུབ་ (test tube) ལས་སྐྱེས་པའི་ཕྲུ་གུ་ཞིག་ཡིན་ནའང་། ཨ་མ་འདྲ་བ་དེས་མངལ་ནང་འཁྱེར་ཡོད་མེད་འབྲེལ་བ་མེད་པར། ཚོད་ལྟའི་ཤེལ་སྦུབ་དེའི་དྲོད་ཚད་ཏག་ཏག་བསྡད་ཡོད་མེད་སོགས་ལྟ་སྲུང་བྱེད་མཁན་གྱི་མི་ཞིག་ཡོད་དགོས་པ་ཡིན། དེར་བརྟེན་ཨ་མས་རང་གི་ཕྲུ་གུ་མངལ་ཤོར་དུ་མ་འཇུག་པར། རང་གི་སྡུག་བསྔལ་ལ་བཟོད་སྒོམ་བྱས་ནས་མངལ་ནང་ཉར་བ་ཙམ་གྱིས་ཤིན་ཏུ་བཀའ་དྲིན་ཆེན་པོ་ཡིན། དེ་ཙམ་མ་ཟད་ཕྲུ་གུ་དངོས་སུ་སྐྱེ་བའི་སྐབས་སུ་སྡུག་བསྔལ་ཚད་མེད་མྱངས་ཡོད་པ་དང། དེ་ནས་ང་ཚོ་བྱིས་པའི་སྐབས་སུ་མཚན་དཀྱིལ་ལ་ལངས་ནས་ཁ་ལག་དང་འོ་མ་སྟེར་བ་སོགས་བྱམས་སྐྱོང་བྱེད་མཁན་ཞིག་མེད་ན། ད་ལྟ་ང་ཚོ་གསོན་པོར་འཚོ་གནས་ཐུབ་མེད། འདི་དང་འདི་འདྲ་བའི་མའི་བཀའ་དྲིན་རྣམས་སྲོལ་རྒྱུན་གྱི་དཔེ་ཆ་ཁག་གི་ནང་ནན་བཤད་གནང་ཡོད། 

གལ་སྲིད་ང་ཚོ་སོ་སོའི་ཨ་མ་དང་མཉམ་དུ་ཡོད་པའི་འབྲེལ་བ་ལ་དཀའ་ངལ་ཡོད་པ་ཡིན་ན། ༸རྒྱལ་དབང་ལྔ་པོ་ཆེན་པོས་མཛད་པའི་ལམ་རིམ་ནང་གི་བླ་མ་སྒོམ་པ་ནས་ཇི་ལྟར་འགོ་འཛུགས་དགོས་པའི་ལེགས་ཆ་བླངས་ཆོག་གི་རེད་བསམ་གྱི་འདུག། གནའ་སྔ་མོའི་གཞུང་མང་པོ་ཞིག་ནང་ཁྱད་ཆོས་བཟང་པོ་ཁོ་ན་ཚང་མཁན་གྱི་དགེ་བའི་བཤེས་གཉེན་ཞིག་རྙེད་ཐབས་ནི་ཧ་ལམ་མི་སྲིད་པ་ལྟ་བུ་ཞིག་ཡིན་པར་གསུངས་ཡོད། དགེ་བའི་བཤེས་གཉེན་ག་འདྲ་ཞིག་ཡིན་ཀྱང་ལེགས་ཉེས་ཀྱི་ཁྱད་ཆོས་གཉིས་ཀ་འདྲེས་ནས་ཡོད་པ་ཞིག་ལས་རྣམ་པར་དག་པའི་དགེ་བའི་བཤེས་གཉེན་ཞེས་པ་ཞིག་མེད་པ་རེད། བླ་མའམ་དགེ་བའི་བཤེས་གཉེན་སྒོམ་པའི་སྐབས་སུ་དགེ་བའི་བཤེས་གཉེན་ལ་ཧ་ལས་པའི་གུས་ཞབས་དང། སེམས་སྐུལ། རྗེས་སུ་ཡི་རངས་སྐྱེད་པ་ལ། ཁོང་གི་ཁྱད་ཆོས་བཟང་པོ་རྣམས་དང་བྱམས་བརྩེ་ལ་དམིགས་པ་གཏད་ནས་སྒོམ་དགོས། འདི་ལ་བརྟེན་ནས་བྱམས་བརྩེ་དང་ཁྱད་ཆོས་བཟང་པོ་དེ་དག་ཉམས་ལེན་པ་རང་གི་རྒྱུད་ལ་སྐྱེད་པའི་སྐུལ་མ་བྱེད་ཀྱི་ཡོད། 

༸གོང་ས་ལྔ་པོ་ཆེན་པོས། འདི་ལྟར་བླ་མ་སྒོམ་པའི་རྒྱུད་རིམ་ནང་ང་ཚོས་དགེ་བའི་བཤེས་གཉེན་གྱི་སྐྱོན་གྱི་ཆ་དང་ནོར་འཁྲུལ་གྱི་རིགས་ལ་ཁས་མི་ལེན་པ་ཡང་བྱེད་མི་དགོས་ཤེས་འགྲེལ་བརྗོད་གནང་ཡོད། དེ་ལྟར་བྱས་ན་རྨོངས་པའི་རང་བཞིན་ཞིག་རེད། ང་ཚོས་སྐྱོན་ཆ་དེ་དག་ཧ་གོ་བ་བྱས་ནས་གནས་སྐབས་རིང་ཟུར་དུ་འཇོག་དགོས། གང་ཡིན་ཞེ་ན། གལ་སྲིད་དགེ་བའི་བཤེས་གཉེན་གྱི་སྐྱོན་ཆ་དང་ནོར་འཁྲུལ་ལ་བསམ་བློ་བཏང་ན། སྐྱོན་བརྗོད་བྱེད་རྒྱུ་དང་བསམ་ཕྱོགས་ངན་པ་ཞིག་ཡོང་རྒྱུ་ལས་ལྷག་མེད། དེ་ནི་སེམས་སྐུལ་ཐེབས་བྱེད་ཞིག་རྩ་ནས་མ་ཡིན་པར། དགེ་བའི་བཤེས་གཉེན་གྱི་ཁྱད་ཆོས་བཟང་པོ་དང་བྱམས་བརྩེ་ལ་དམིགས་ནས་སྒོམ་ན་གཞི་ནས་ང་ཚོ་ལ་སེམས་སྐུལ་ཐེབས་ཀྱི་ཡོད། 

བྱས་ཙང་། ཐོག་མར་སྐྱོན་ཆ་ཡོད་པ་རྣམས་ངོས་ལེན་བྱེད་དགོས་ཀྱི་ཡོད། འོན་ཀྱང་སྐྱོན་ཆ་དེ་དག་དངོས་གནས་ཡིན་ནམ། ཡང་ན་དེ་དག་ང་རང་ཚོས་རྟོག་བཟོ་བྱས་པ་ཞིག་ཡིན་དྲང་པོ་དྲང་གཞག་གིས་བརྟག་དཔྱད་བྱེད་དགོས། གལ་སྲིད་སྐྱོན་ཆ་དེ་དག་རྟོག་བཟོ་བྱས་པ་ཞིག་ལས་དངོས་གནས་མིན་པ་ཡིན་ན། ང་ཚོས་དེ་དག་རྩ་བ་ནས་སྤོང་དགོས། ཡང་དགེ་བའི་བཤེས་གཉེན་ལ་རྟོག་བཟོ་མ་ཡིན་པའི་སྐྱོན་གྱི་ཆ་རྣམས་ད་ལྟ་ཡོད་བསྡད་པ་ཞིག་ཡིན་ནམ། ཡང་མིན་ན་འདས་པའི་ལོ་རྒྱུས་ཀྱི་ནང་ཡོད་པའི་སྐྱོན་ཆ་ང་ཚོས་བློས་གཏོང་བྱེད་འདོད་མེད་པ་ཞིག་ཡིན་བརྟག་དཔྱད་བྱེད་དགོས། གལ་སྲིད་དེ་དག་ད་ལྟ་ཡོད་བསྡད་པ་ཞིག་མ་ཡིན་པར། འདས་པའི་ལོ་རྒྱུས་ནང་ཡོད་པ་ཞིག་ཡིན་ན་དེ་ཚོ་འབྲེལ་བ་དེ་ཙམ་མེད་པས། ང་ཚོ་དེའི་ནང་སྡོད་རྒྱུ་མཚམས་འཇོག་བྱེད་དགོས་ཀྱི་ཡོད། ང་ཚོ་ད་ལྟའི་དུས་ཀྱི་དགེ་བའི་བཤེས་གཉེན་ལ་ཡོད་པའི་སྐྱོན་ཆ་དེ་དག་དངོས་གནས་གང་ཡིན་གསལ་པོ་ཆགས་པའི་སྐབས་ང་ཚོས། འགྲིག་གི་རེད། དེ་དག་ནི་ཁོང་ཚོའི་ད་ལྟ་ཡོད་བཞིན་པའི་སྐྱོན་རྣམས་རེད་ཟེར་གྱི་ཡོད། དེ་ནས་ང་ཚོས་དེ་དག་གནས་སྐབས་རིང་ཟུར་ལ་བཞག་ནས་དགེ་བའི་བཤེས་གཉེན་གྱི་ཁྱད་ཆོས་བཟང་པོ་ཁོ་ན་ལ་དམིགས་པ་གཏད་ནས་སྒོམ་དགོས། 

ངའི་བསམ་པར། བསམ་བློ་གཏོང་སྟངས་འདི་དང་གཅིག་པ་ཞིག་རང་གི་ཨ་མའི་བྱམས་བརྩེ་ལ་དམིགས་ནས་བསམ་ཆོག་པ་ཞིག་ཡིན་ཏེ། མི་སུ་འདྲ་ཞིག་གི་ཨ་མ་ཡིན་ཀྱང་རྣམ་དག་སྐྱོན་མེད་ཞིག་ཡོང་ཐབས་མེད། གལ་སྲིད་རང་ཉིད་ཕྲུ་གུ་ཡོད་པའི་ཕ་མ་ཞིག་ཡིན་ན། སྐྱོན་མེད་རྣམ་དག་གི་ཕ་མ་ཞིག་བྱེད་རྒྱུ་ཧ་ལས་པའི་ཁག་པོ་ཡིན་པ་ཤེས་ཐུབ། དེ་འདྲ་སོང་ཙང་། རང་གི་ཕ་མ་ཡང་སྐྱོན་མེད་རྣམ་དག་ཅིག་ཡོང་རྒྱུའི་རེ་བ་རྒྱག་རྒྱུ་མེད། དེ་ནས་ང་ཚོས་རང་གི་ཨ་མའི་སྐྱོན་ཆ་དང་ནོར་འཁྲུལ་བྱུང་བ་དང་ཡོད་བསྡད་པ་རྣམས་ལ་བལྟས་ནས། སྐྱོན་ཆ་དེ་དག་གི་རྒྱུ་དང་རྐྱེན་གང་ལ་བརྟེན་ནས་ཡོང་གི་ཡོད་པ་ཤེས་པར་བྱེད་དགོས། དཔེར་ན། དུག་སྦྲང་གི་སེམས་ཀྱི་རྒྱུན་དེ་རང་བཞིན་ལྷན་སྐྱེས་ཀྱིས་དུག་སྦྲང་ (རང་བཞིན་ལྷན་སྐྱེས་ཀྱིས་བསུན་པོ་བཟོ་མཁན་ཞིག་དེ་བས་ཀྱང་མིན། ) མིན་པ་ལྟར། རང་གི་ཨ་མ་ཡང་རང་བཞིན་ལྷན་སྐྱེས་ཀྱིས་མི་སྡུག་ཅག་ཞིག་མིན། ང་ཚོས་རྟོག་བཟོ་བྱས་ནས་ཨ་མར་ནོར་འཁྲུལ་མེད་པ་ལ་ཡོད་པ་ལྟར་མི་བཟོ་རྒྱུ་དང་། ཡང་གནའ་སྔ་མོ་ནས་འདས་ཚར་བའི་ནོར་འཁྲུལ་ལ་བསམས་ནས་སྡོད་རྒྱུ་མེད་པ་གཟབ་གཟབ་བྱེད་དགོས། དེ་ལྟར་ད་ལྟ་ཡོད་བསྡད་པ་དང་འདས་པའི་སྐབས་སུ་བྱུང་བ་སོགས་ཀྱི་ཨ་མའི་ནོར་འཁྲུལ་གྱི་རིགས་ཀྱང་གནས་སྐབས་རིང་ཟུར་དུ་བཞག་ནས་ང་ཚོས་བསམ་བློ་བཏང་སྟེ། གང་ལྟར་ཨ་མ་ལ་ནོར་འཁྲུལ་ཡོད་ལ་ནོར་འཁྲུལ་ཤོར་མྱོང་ཀྱང་ཡོད། ཡིན་ནའང་ཁོང་ནི་མི་གཞན་ཚང་མ་དང་འདྲ་བར་ནོར་འཁྲུལ་ཡོད་པ་གཅིག་པ་རེད་ཅེས་ཟེར་དགོས་ཤིང། དེ་ནས་ང་ཚོས་ཨ་མའི་ཁྱད་ཆོས་བཟང་པོ་རྣམས་དང་རང་ལ་གནང་བའི་བྱམས་བརྩེ་ལ་བལྟ་དགོས།

ངས་སུ་ཡིན་ཏག་ཏག་ཅིག་དྲན་པ་གསོས་ཀྱི་མི་འདུག་ཀྱང་། ནུབ་ཕྱོགས་པའི་ནང་ཆོས་དགེ་རྒན་ཞིག་གིས་སྒོམ་གྱི་ཐབས་ལམ་ཞིག་གསུངས་ཡོད་པ་དེ་ཧ་ཅང་ཕན་ཐོགས་ཆེན་པོ་ཞིག་མཐོང་སོང། སྐབས་འདིར་ང་ཚོས་ཨ་མ་ལ་ཡོད་པའི་ཁྱད་ཆོས་སྡུག་པའི་རིགས་རྣམས་ཟུར་ལ་བཞག་ནས་རང་གི་མི་ཚེ་འདི་ལོ་ལྔ་དང་བཅུ་ཅན་གྱི་སྡེ་ཚན་བརྒྱུད་ནས་འགྲོ་དགོས། ང་ཚོས་སྐར་མ་ལྔ་ཙམ་གྱི་དུས་ཚོད་བཏང་ནའང་འདྲ། ཆུ་ཚོད་ཕྱེད་ཀ།ཆུ་ཚོད་གཅིག ཡང་མིན་ན་དུས་ཚོད་གང་མང་བཏང་ནའང་འགྲིག གང་ལྟར་སོ་སོའི་ཨ་མས་ལོ་ལྔའམ་བཅུའི་ནང་རང་ལ་བསྐྱངས་པའི་བྱམས་བརྩེ་རྣམས་དྲན་ཐབས་བྱེད་དགོས། དེ་ཡང་དང་པོ་ཨ་མའི་མངལ་ནས་སྐྱེས་པ་དང་ལོ་ལྔ་མ་ཆགས་བར་དུ་ཨ་མས་ཆབ་གདན་ག་ཚོད་བརྗེས་པ་དང་། ལྟོ་ག་ཚོད་སྟེར་བ། གཟུགས་པོ་ག་ཚོད་འཁྲུ་རོགས་བྱས་པ་སོགས་དྲན་གསོ་བྱེད་དགོས། དེ་ནས་ལོ་ལྔ་ནས་བཅུའི་བར་ལ་སློབ་གྲཱ་ལ་བསྐྱལ་བ་དང་། རང་གི་ཨ་མས་ང་ཚོར་ནང་སྦྱོང་ལ་རོགས་པ་བྱས་མེད་སྲིད་ལ་ཡོད་ཀྱང་སྲིད། གང་ལྟར་ཡང་ང་ཚོར་ཁ་ལག་བཟོས་པ་དང་ང་ཚོའི་གྱོན་ཆས་རྣམས་བཀྲུས་པ་སོགས་བྱེད་མྱོང་བ་དྲན་དགོས། དེ་ནས་ང་ཚོ་བཅུ་ཐོག་ན་གཞོན་ཡིན་པའི་སྐབས་སུ་འགྲོ་སོང་ཆེད་དུ་དངུལ་སྤྲད་ཡོད་ཀྱི་རེད། དེ་ལྟར་རང་གི་ཨ་མ་དེ་ཇི་ཙམ་སྡུག་ཅག་ཞིག་ཡིན་ཀྱང་ང་ཚོའི་མི་ཚེ་རེ་རེའི་ནང་བྱམས་ཞིང་བརྩེ་བས་བསྐྱངས་ཡོད་པ་ནི་བཤད་མི་དགོས་པ་ཞིག་རེད། 

དེ་ག་ནང་བཞིན་ང་རང་ཚོའི་ཕ་དང་། སྤུན་མཆེད་གཞན། གྲོགས་པོ་གྲོགས་མོ་སོགས་ལའང་གཅིག་པ་བསམ་བློ་གཏོང་ཆོག འདི་ནི་སྒོམ་ཉམས་ལེན་ལ་ཕན་ཐོགས་ཆེན་པོ་ཡོད། མཚམས་མཚམས་ང་ཚོའི་སེམས་ནང་། “ང་ལ་བརྩེ་དུང་ཡོད་མཁན་སུ་གཅིག་མི་འདུག” ལྟ་བུ་ཡིད་ཞུམ་པའི་བསམ་བློ་སྐྱེས་པའི་སྐབས་སུ་འདི་ནི་དམིགས་བསལ་གྱི་གཉེན་པོ་ནུས་པ་དང་ལྡན་པ་ཞིག་ཡིན། དེ་འདྲའི་སྒོ་ནས་ཚེ་འདིར་རང་གི་མའི་བཀའ་དྲིན་མཐོང་ཐུབ་ན། སེམས་ཅན་ཐམས་ཅད་ཀྱང་དེ་དག་གཅིག་པ་རང་ལ་བཀའ་དྲིན་ཆེན་པོ་ཡིན་པ་ཤེས་ཐུབ། སྐྱོན་མེད་རྣམ་དག་གི་ཨ་མ་ཞེས་པ་ཞིག་ནི་མེད་པས། དུད་འགྲོའི་སྐྱེ་བ་སོགས་བླངས་པའི་སྐབས་ཨ་མས་ང་ཚོ་ཟས་ཡོད་སྲིད་ཀྱང་། བྱམས་དང་བརྩེ་བས་ཀྱང་བསྐྱངས་ཡོད།  

མའི་བྱམས་བརྩེ་ལ་དྲིན་ལན་འཇལ་བ། ༼དྲིན་གཟོ་བ།༽

རྒྱུ་འབྲས་མན་ངག་བདུན་གྱི་སྙིང་པོ་བསྡུས་པའི་ཆོས་ཀྱི་རིམ་པ་གསུམ་པ་ནི། ང་ཚོར་ཐོབ་པའི་ཨ་མའི་བྱམས་སྐྱོང་གི་བརྩེ་བ་རྣམས་ལ་དྲིན་ལན་གཟོ་འདོད་ཀྱི་འདུན་པ་སྐྱེད་རྒྱུ་དེ་ཡིན། འདི་ཡོང་བའི་ཆེད་དུ་ང་ཚོས་རང་གི་ཨ་མ་མིག་གིས་མཐོང་མི་ཐུབ་པའི་ལོང་བ་དང། གང་བྱེད་དགོས་མི་ཤེས་པ་ཡོངས་སུ་རྨོངས་པ། སེམས་སྡུག་བློ་ཕམ་གྱི་ངང་གཡང་གཟར་གྱི་རྩེ་ཟུར་ལ་ལངས་ནས་སྡུག་བསྔལ་གྱི་གཡང་སར་ལྷུང་ལ་ཉེ་བ་ལྟ་བུར་བསམ་དགོས། དེ་བཞིན་རང་ཉིད་ཀྱང་མའི་བུ་དང་བུ་མོའི་ཚུལ་དུ་ཁོང་གི་འགྲམ་ལ་ལངས་ནས་གཡང་སར་ལྷུང་བ་ལས་ཇི་ལྟར་སྐྱོབ་དགོས་པ་ཤེས་ཀྱི་ཡོད་པ་ལྟར་བསམ་དགོས། དེ་འདྲའི་གནས་སྐབས་སུ་གལ་སྲིད་ང་ཚོ་ཨ་མའི་ཕྲུ་གུ་ཡིན་པའི་ཆ་ནས་རོགས་རམ་མ་བྱས་ན་སུས་བྱེད་སྲིད་དམ། ཁོ་ཚོ་སུ་ལ་སྐྱབས་སུ་བཅོལ་ཐུབ་བམ། བསམ་བློ་དེ་ལྟར་བཏང་པའི་རྐྱེན་གྱིས་ཁོ་ཚོའི་དྲིན་ལན་འཇལ་ནས་འཁོར་བའི་སྡུག་བསྔལ་ཐམས་ཅད་ལས་ཐར་བའི་སེམས་གཏིང་གི་རེ་འདོད་འདི་སྐྱེད་པ་ལ་རོགས་བྱེད་ཀྱི་ཡོད། 

འདུན་པ་དེ་ཤུགས་ཆེ་རུ་གཏོང་བའི་ཆེད་དུ་བཤད་ཚར་བའི་མའི་བཀའ་དྲིན་དྲན་པའི་སྒོམ་གྱི་ཉམས་ལེན་ལ་མུ་མཐུད་གོམས་འདྲིས་བྱེད་ཆོག། ཡང་བསྐྱར་རང་གི་མི་ཚེའི་ནང་གི་ལོ་ལྔ་དང་བཅུའི་ས་བཅད་བཟོས་ནས་རང་གི་ཨ་མ་ལ་དྲིན་ལན་དང་བྱམས་སྐྱོང་ཇི་ལྟར་བྱས་ཡོད་མེད་སྐོར་ལ་བསམ་ནས་བརྟག་དཔྱད་བྱེད་དགོས། དེ་བཞིན་རང་གི་ཕ་དང་སྤུན་མཆེད། གྲོགས་ཕོ་མོ་སོགས་ཀྱི་སྐོར་ལའང་གཅིག་པ་བསམ་དགོས། 

གལ་སྲིད་ང་ཚོ་མང་ཆེ་བས་ཨ་མས་རང་ལ་བྱམས་སྐྱོང་ག་ཚོད་བྱས་ཡོད་པ་དང་། རང་གིས་ཨ་མར་སྤྲད་པའི་བྱམས་བརྩེ་གཉིས་བསྡུར་བ་ཡིན་ན། རང་གིས་ཨ་མར་སྤྲད་པ་ལས་རྦད་དེ་མང་བའི་བྱམས་བརྩེ་ཞིག་ཨ་མས་རང་ལ་སྤྲད་ཡོད་པ་ཤེས་ཀྱི་རེད། འདིའི་དོན་དག་ནི་སོ་སོ་ནག་ཉེས་ཅན་ཞིག་ཚོར་བའི་ཆེད་དུ་བཤད་པ་ཞིག་མ་རེད། ནག་ཉེས་ཅན་ཡིན་པར་ཚོར་བ་དེ་ནི་ནུབ་ཕྱོགས་པའི་སེམས་འཆོལ་བའི་ཐུན་མིན་གྱི་ཡ་ལན་བྱེད་ཚུལ་ཞིག་ཡིན། འདིའི་གནད་འགག་ནི་བྱང་ཆུབ་ཀྱི་སེམས་སྒོམ་པའི་རིམ་པ་རྗེས་མ་ལ་ཕན་པའི་ཆེད་དུ་ཡིན་ཅིང་། དེ་ནི་རང་ལ་ཐོབ་པའི་བཀའ་དྲིན་ངོས་བཟུང་རྒྱུ་དང་། བཀའ་དྲིན་ལ་སེམས་གཏིང་ནས་བསམ་ཤེས་ཀྱིས་ཚོར་བ་ཞིག་སྐྱེས་ནས་དྲིན་ལན་འཇལ་འདོད་ཀྱི་འདུན་པ་དེ་ཡིན།

ངས་ད་ལྟ་བཤད་མ་ཐག་པའི་སྒོམ་གྱི་ཉམས་ལེན་ལ་འདྲིས་ཐབས་འདི་དངོས་གནས་ཀྱི་སེམས་ལ་ཚོར་བ་ཞིག་སླེབས་པ་ལ་ཕན་ཐོགས་ཆེན་པོ་མཐོང་བྱུང་། སེམས་ལ་ཚོར་བ་ཞིག་སླེབས་དགོས་རྒྱུ་དེ་གལ་ཆེན་པོ་རེད་བསམ་གྱི་འདུག། ནུབ་ཕྱོགས་པའི་ནང་པ་མང་པོ་ཞིག་གིས་བྱམས་པ་དང་སྙིང་རྗེ་སྒོམ་གྱི་ཡོད་པ་མ་ཟད། གཞན་ལ་ཕན་ཐོགས་བྱེད་མཁན་མང་པོ་ཞིག་ད་དུང་ཡང་རང་གི་ཕ་མ་མཉམ་དུ་འབྲེལ་བ་ཡག་པོ་མེད་པ་དང་། མུ་མཐུད་ནས་དེ་ག་རང་གི་ནང་འཁར་ནས་གནས་ཡོད་པ་ངས་མཐོང་སོང་། བྱས་ཙང་། ངའི་བསམ་པར། འབྲེལ་བ་དེ་དཀའ་ངལ་ཅན་ཞིག་ཡིན་པ་རྒྱུ་མཚན་དུ་བྱས་ནས་གཡོལ་རྒྱུའི་ཚབ་ལ་འབྲེལ་བ་ཡར་རྒྱས་གཏོང་ཐབས་ལ་འབད་བརྩོན་བྱེད་ན་དངོས་གནས་ཕན་ཐོགས་ཡོད་པ་མཐོང་གི་འདུག །

དྲིན་གཟོ་བའི་ཉམས་ལེན་གྱི་ཐབས་ལམ་བསྟན་པ།

མན་ངག་གི་རིམ་པ་རེ་རེའི་ནང་ལ་ཡོད་དགོས་པའི་གནད་འགག་ཞིག་ནི་རང་ཉིད་ཀྱི་བློ་ཁ་ཕྱེས་ཏེ་ཉམས་ལེན་གྱི་ཁྱབ་ཚད་འགྲོ་བ་ཐམས་ཅད་ལ་རྒྱ་སྐྱེད་དུ་གཏོང་རྒྱུ་དེ་ཡིན། རིམ་པ་རེ་རེའི་ནང་དང་པོ་ཉམས་ལེན་རྒྱ་ཆུང་ས་ནས་འགོ་བཙུག་ཆོག་ཀྱང་། རིམ་པས་ང་ཚོའི་དམིགས་ཚད་དེ་རྒྱ་སྐྱེད་གཏོང་དགོས། ང་ཚོས་འདི་ལྟར་བཏང་སྙོམས་གཞི་ལ་བཞག་པའི་ཐོག་ནས་སེམས་ཅན་ཐམས་ཅད་རང་སོ་སོ་ནས་སེམས་ཀྱི་རྒྱུན་ཞིག་ཡིན་པ་གཅིག་མཚུངས་མཐོང་ནས་སྒོམ་དགོས་པ་ཡིན། ངས་འདི་ལྟར་གནད་ལ་སྨིན་པའི་ཐོག་ནས་སྒོམ་སྟངས་ཤིག་རྙེད་པ་ནི། རང་ཉིད་ཀྱི་བསམ་བློའི་ནང་“སེམས་ཅན་ཐམས་ཅད་”ལ་དམིགས་ནས་མིག་བཙུམ་ཞིང་མར་བསྡད་ནས་སྒོམ་རྒྱག་པ་ཙམ་མ་ཡིན་པར། དེ་ལས་ཀྱང་གནད་དུ་སྨིན་པ་ཞིག་ནི། ངས་ཚོར་བ་སྐྱེན་པོའི་རང་བཞིན་གྱི་སྦྱོང་བརྡར་དང་སྦྲགས་ནས་སེམས་ཅན་ཐམས་ཅད་ལ་ཆ་སྙོམས་ཀྱི་སེམས་ཚོར་ཞིག་སྐྱེད་ཐབས་སྐོར་བཤད་པ་དེ་དང་གཅིག་པ་ཉམས་ལེན་བྱེད་རྒྱུ་དེ་རེད།

ཕྱོགས་གཞན་ཞིག་ནས་བཤད་ན། བཟང་ཕྱོགས་ཀྱི་བསམ་ཕྱོགས་འདི་དག་དང་པོ་རང་གི་གྲོགས་པོ་དང་། སོ་སོ་མི་དགའ་སའི་མི། ཆ་རྒྱུས་མེད་པའི་མི་སོགས་ཀྱི་འདྲ་པར་དང་གཟུགས་རིས་འདྲ་མིན་ལ་དམིགས་པ་གཏད་ནས་ཡར་རྒྱས་གཏོང་ཐབས་བྱེད་དགོས། དེ་ནས་ང་ཚོའི་མཉམ་དུ་བསྡད་ནས་སྒོམ་རྒྱག་མཁན་གྱི་མི་ལ་དངོས་སུ་བལྟས་ཏེ་སྒོམ་ཐབས་བྱེད་དགོས་ཞིང་། རིམ་བཞིན་དམིགས་ཚད་ཆེ་རུ་བཏང་ནས་ས་འོག་མེ་འཁོར་དང་སྤྱི་སྤྱོད་རླངས་འཁོར་སོགས་ཀྱི་ནང་འགྲོ་སྐབས་ཀྱི་མི་རྣམས་ལ་དམིགས་ནས་སྒོམ་དགོས། འདི་ལྟར་ང་ཚོས་ཡར་རྒྱས་གཏོང་ཐབས་བྱེད་བཞིན་པའི་དགེ་བའི་བསམ་ཕྱོགས་རྣམས་གཞན་ལ་དངོས་སུ་ལག་བསྟར་བྱེད་དགོས་ཀྱི་ཡོད། 

དེ་ག་ནང་བཞིན་ང་ཚོའི་སེམས་ནང་ལྟ་གྲུབ་ཡོད་པ་ཙམ་མ་ཡིན་པར། དངོས་སུ་ང་ཚོས་མཐོང་བའི་སྐབས་སུ་དུད་འགྲོ་དང་། འབུ་སྲིན་ཡན་ཆད་ལ་ཡང་ལག་ལེན་བསྟར་དགོས། དེ་འདྲ་ལག་བསྟར་བྱེད་པའི་སྐབས་སུ་བོད་པའི་སྤྱི་ཚོགས་ནང་མཚམས་མཚམས་མཐོང་རྒྱུ་ཡོད་པའི་མཐའ་གཅིག་ལ་ལྷུང་ངེས་པའི་ཉམས་ལེན་ཞིག་བྱེད་རྒྱུ་ཡོད་པ་དེ་སྤོང་ཐབས་བྱེད་དགོས། དེ་ཡང་བོད་པ་ཚོས་མི་ལས་འབུ་སྲིན་ལ་བྱམས་བརྩེ་སྤྲོད་རྒྱུ་དེ་ལས་སླ་བ་ཡོད་པ་ལྟ་བུ་རེད། དཔེར་ན། གལ་སྲིད་དགོན་པ་ཞིག་གི་སྐོར་ལམ་ལ་འབུ་གྲོག་མ་ཞིག་ཡོད་ན། མི་ཚང་མས་གྲོག་མ་དེ་ལ་མི་གནོད་ཡག་གི་ཐབས་ཤེས་གང་དྲག་བྱེད་ཀྱི་རེད། ཡིན་ནའང་འགྲོ་བ་མིའི་རིགས་ལ་དེ་འདྲའི་སེམས་འཁུར་དང་བྱམས་བརྩེ་སྟོན་གྱི་མེད། དེ་ལ་དཔེ་ཞིག་བཞག་ན། རྒྱ་གར་དང་ཕྱི་རྒྱལ་བ་ལྟ་བུ་དགོན་པར་མཇལ་མཁན་ཚོས་ཤེས་འདོད་ཆེན་པོའི་ཐོག་ནས་སྐད་ཆ་དྲིས་ན། དེ་ལྟར་ཧབ་ཐོབ་རྒྱབ་ནས་རོགས་པ་བྱེད་པའི་ངེས་པ་མེད། བྱས་ཙང་། སྐབས་འདིར་ང་ཚོ་ལ་ལྟ་སྟངས་མ་ནོར་བ་ཞིག་ཡོད་དགོས།

མི་འགའ་ཤས་ཀྱིས་མི་ལ་རོགས་རམ་བྱེད་རྒྱུ་ལས་འབུ་གྲོག་མར་རོགས་རམ་བྱེད་རྒྱུ་ལས་སླ་བ་ཡོད་ཟེར་སྲིད། རྒྱུ་མཚན་ནི་འབུ་གྲོག་མས་རང་ཉིད་ལ་ལན་སློག་པ་སོགས་ཁག་པོ་བཟོ་གི་མ་རེད། ཡིན་ནའང་མིས་ནམ་རྒྱུན་ང་ཚོར་ཁག་པོ་བཟོ་གི་ཡོད་པས་ཡིན། དེར་མ་ཟད། འབུ་གྲོག་མས་བསུན་པོ་བཟོས་ན་ཡར་བཀྱག་ནས་ས་ཆ་གཞན་ཞིག་ལ་བཞག་པའམ་ཕྱི་ལོགས་ལ་བཞག་ན་དེ་ཡི་ཆོག་ཀྱང་། མི་རྣམས་ཁོང་ཁྲོ་ཟ་བ་སོགས་བྱུང་ཚེ་དེ་ལྟར་བྱེད་མི་ཐུབ་པ་ཡིན། གང་ལྟར་ཡང་། ངས་བཤད་འདོད་ཀྱི་གནད་འགག་ནི། མི་མང་པོ་ཞིག་གིས་ “སེམས་ཅན་ཐམས་ཅད་” ཅེས་ཐམས་ཅད་ལ་བསམ་བློ་བཏང་ནས་སྒོམ་རྒྱག་པ་ལས་ “འཚོ་བ་ངོ་མའི་” ནང་ཡོད་པའི་དངོས་གནས་ཀྱི་མི་ལ་དམིགས་ནས་སྒོམ་རྒྱག་གི་མེད། འདི་ཡིས་སྒོམ་པའི་ལམ་འཕེལ་རྒྱས་འགྲོ་རྒྱུར་དཀའ་ངལ་ཆེན་པོ་ཞིག་བཟོ་གི་ཡོད།

བྱམས་པ་ཆེན་པོ། ༼ཡིད་འོང་གི་བྱམས་པ།༽

ང་ཚོས་སེམས་ཅན་ཐམས་ཅད་རང་གི་མ་བྱས་མྱོང་ཡོད་པ་ཧ་གོ་བ་དང་། མའི་བྱམས་བརྩེ་དྲན་ཞིང་དྲིན་གཟོའི་བསམ་བློ་སྐྱེ་སྐབས་ང་ཚོ་ལ་རང་བཞིན་གྱིས་ཚོར་བ་འདྲེན་ནུས་ཀྱི་བྱམས་བརྩེ་ཞིག་སྐྱེ་གི་ཡོད། འདི་ནི་མི་སུ་ཐུག་ཀྱང་རང་བཞིན་གྱིས་བྱུང་བའི་སྙིང་ཉེ་བ་དང་བརྩེ་སེམས་དྲོན་མོའི་ཚོར་བ་ཞིག་ཡིན། འདི་ལྟ་བུའི་᫄ᨕ᫙་᪠་ᫍᨑᨵ་སྐྱེད་པར་དམིགས་བསལ་གྱི་ལོགས་སུ་སྒོམ་ཉམས་ལེན་གྱི་རིམ་པ་ཞིག་དགོས་ཡག་མེད། དེར་མ་ཟད། འདི་ལ་བྱམས་སྐྱོང་དང་སེམས་འཁུར་ལྡན་པའི་བྱམས་པ་སྟེ། མི་ཞིག་ལ་གཅེས་སྐྱོང་གི་བྱམས་པ་ཞིག་ཡོད་པ་ཞེས་ཀྱང་ཟེར་ལ། མི་དེའི་བདེ་སྡུག་ལ་སེམས་ཁྲེལ་ཡོད་པ་དང་། མི་དེ་ལ་གནས་སྟངས་སྡུག་ཅག་རིགས་བྱུང་ན། སེམས་ཧ་ཅང་སྐྱོ་པོ་ཡོང་གི་ཡོད། 

ཚོར་བ་འདྲེན་ནུས་ཀྱི་བྱམས་བརྩེ་གཞི་ལ་བཞག་ནས་ང་ཚོ་རྒྱུ་འབྲས་མན་ངག་བདུན་གྱི་རིམ་པ་བཞི་པ་ལ་འགྲོ་དགོས། དེ་ནི་བྱམས་པ་ཆེན་པོ་སྒོམ་རྒྱུ་དེ་ཡིན། བྱམས་པ་ནི་མི་གཞན་ཞིག་བདེ་བ་དང་ལྡན་ན་བསམ་པའི་བློ་དེ་ཡིན་ཅིང་། སྤྱིར་བཏང་དེ་ལྟ་བུའི་དུས་རྒྱུན་རང་གི་དགའ་སའི་མི་ལ་སླེབས་ཀྱི་ཡོད། ཡིན་ནའང་བྱམས་པ་ཆེན་པོ་ནི། སེམས་ཅན་ཐམས་ཅད་བདེ་སྐྱིད་དང་ལྡན་པ་དང་། བདེ་སྐྱིད་ཀྱི་རྒྱུ་དང་ལྡན་པར་ཤོག་བསམ་པའི་བློ་ཞིག་ལ་ཟེར། བདེ་སྐྱིད་དང་བདེ་སྐྱིད་ཀྱི་རྒྱུ་གཉིས་ཀའི་བློ་དགོས་རྒྱུ་དེ་དངོས་གནས་ཧ་ཅང་གལ་ཆེན་པོ་ཡིན། འདིའི་དོན་ནི། བདེ་སྐྱིད་ཞེས་པ་རྒྱུ་ཞིག་ལ་བརྟེན་ནས་ཡོང་གི་ཡོད་པ་ལས་དཀོན་མཆོག་གིས་རོགས་མགོན་བྱེད་པའམ། ཡང་ན་རླུངས་རྟ་རྒྱུགས་པ་ཙམ་མ་ཡིན་ལ། བདེ་སྐྱིད་ཀྱི་རྒྱུ་སོ་སོ་རང་ཉིད་ཀྱང་མ་ཡིན་པ་དེ་ཡག་པོ་ཤེས་རྟོགས་ཡོང་བའི་ཆེད་དུ་ཡིན།

ལས་རྒྱུ་འབྲས་ཀྱི་རྣམ་གཞག་བཤད་པའི་སྐབས་བདེ་སྐྱིད་ཀྱི་རྒྱུ་རྣམས་བཤད་ཡོད་པ་ནི། གལ་སྲིད་མི་རྣམས་ཀྱིས་འདོད་ཆགས་དང་། ཁོང་ཁྲོ། ཞེ་སྡང་སོགས་མེད་པའི་སྒོ་ནས་དགེ་བའི་ལས་བྱས་ན། དེའི་འབྲས་བུར་བདེ་སྐྱིད་མྱོང་གི་ཡོད། དེར་བརྟེན་འདིར་ང་ཚོས། “སེམས་ཅན་ཐམས་ཅད་ལ་བདེ་སྐྱིད་དང་བདེ་སྐྱིད་ཀྱི་རྒྱུ་དང་ལྡན་པར་ཤོག སེམས་ཅན་ཐམས་ཅད་ཀྱིས་བདེ་སྐྱིད་མྱོང་བའི་ཆེད་དུ་དངོས་གནས་དགེ་བ་དང་བཟང་པོའི་ལས་བྱེད་པར་ཤོག་” ཅེས་བྱམས་པ་ཆེན་པོའི་སྒོ་ནས་བསམ་དགོས་པ་ཡིན།  

ཉམས་ལེན་གྱི་རིམ་པ་འདི་ནས་བཟུང་སྟེ་ང་ཚོས་བྱང་ཆུབ་ཀྱི་སེམས་སྒོམ་ནས་སེམས་ཅན་ཐམས་ཅད་ལ་ཕན་པའི་དོན་དུ་སངས་རྒྱས་ཀྱི་གོ་འཕང་ཐོབ་པ་ལ་འབད་བརྩོན་བྱེད་ཀྱི་ཡོད་པ་གསལ་པོ་ཆགས་པ་རེད། ཡིན་ནའང་རོགས་རམ་བྱེད་པ་ཞེས་པའི་སྐབས་སུ་དངོས་ཡོད་ཀྱི་སེམས་ཅན་རྣམས་ཡར་འཐེན་ནས་ཐར་པའི་བདེ་སྐྱིད་ལ་འགོད་པ་ལྟ་བུ་མིན་པ་ཡང་ཤེས་དགོས། རྒྱུ་མཚན་ནི་སངས་རྒྱས་ཀྱི་གོ་འཕང་ཐོབ་ཚར་ནས་ང་ཚོས་མི་གཞན་ལ་བདེ་བ་ཐོབ་ཐབས་ཀྱི་ལམ་སྟོན་ཐུབ་ཀྱང་བདེ་བའི་རྒྱུ་ངོ་མ་ནི་གང་ཟག་སོ་སོ་རང་ཉིད་ཀྱིས་སྒྲུབ་དགོས་པ་ཡིན།

སྙིང་རྗེ་ཆེན་པོ།

དེའི་རྗེས་ལ་རིམ་པ་ལྔ་པ་ནི་སྙིང་རྗེ་ཆེན་པོ་རེད། དེ་ནི་སེམས་ཅན་ཐམས་ཅད་སྡུག་བསྔལ་དང་སྡུག་བསྔལ་གྱི་རྒྱུ་དང་འབྲལ་འདོད་ཀྱི་བློ་ཞིག་ལ་ཟེར། གོང་དུ་ཞུས་པ་བཞིན་འདིར་ཡང་སྡུག་བསྔལ་ཙམ་མ་ཟད་སྡུག་བསྔལ་གྱི་རྒྱུ་ལས་ཀྱང་བྲལ་དགོས་པ་ཡིན། སྡུག་བསྔལ་ནི་རྒྱུ་ལས་ཡོང་གི་ཡོད་པས་སྡུག་བསྔལ་མེད་པ་བཟོ་བའི་ཆེད་དུ་སྡུག་བསྔལ་གྱི་རྒྱུ་མེད་པ་བཟོ་དགོས་པ་དེ་ཡག་པོ་ཤེས་རྟོགས་དགོས་ཀྱི་ཡོད། འདི་ནི་དངོས་གནས་དངོས་ཡོད་གནས་ཚུལ་དང་མཐུན་པའི་ལྟ་ཚུལ་ཞིག་ཡིན། བྱམས་པ་ཆེན་པོ་དང་སྙིང་རྗེ་ཆེན་པོ་ནི། “སེམས་ཅན་ཐམས་ཅད་སྡུག་བསྔལ་གྱི་མནར་བས་ཨ་ཁ་དང་སྙིང་རྗེ་” བསམ་པའི་སེམས་ཚོར་ཙམ་ཞིག་མ་ཡིན་པར། དེ་དག་སྤྱོད་ལམ་གྱི་རྒྱུ་དང་རྐྱེན་ལ་གོ་རྟོགས་ཡོད་པ་དེས་གྲོགས་བྱས་པ་ཞིག་ཡིན།

བརྙན་པར། མཁའ་འགྲོ་རིན་པོ་ཆེ། “སྙིང་རྗེ་གོང་འཕེལ་གཏོང་ཚུལ།”

སྙིང་རྗེ་ཆེན་པོ་དེས་སྤྱིར་བཏང་གི་སྙིང་རྗེ་ཕལ་པ་ལས་ཁྱད་པར་འཕགས་ཚུལ་མང་པོ་ཡོད་པ་ལས་འགའ་ཞིག་ནི།

  • འདི་ནི་སེམས་ཅན་འགའ་ཤས་ལ་དམིགས་པའི་སྙིང་རྗེ་ཞིག་མ་ཡིན་པར། སེམས་ཅན་ཐམས་ཅད་ལ་མཉམ་པར་དམིགས་པའི་སྙིང་རྗེ་ཞིག་ཡིན།
  • སྙིང་རྗེ་ཆེན་པོ་ནི་བྱམས་པ་ཆེན་པོ་ལྟར། སེམས་ཅན་ཐམས་ཅད་ལ་བུ་གཅིག་པའི་མས་བྱམས་སྐྱོང་གནང་བ་ནང་བཞིན་སེམས་ཅན་རེ་རེར་བྱམས་སྐྱོང་དང་སེམས་འཁུར་གྱི་སྒོ་ནས་སྲུང་སྐྱོབ་བྱེད་རྒྱུའི་འདུན་པ་ཞིག་ཡིན།
  • སེམས་ཅན་རེ་རེ་བཞིན་རྨོངས་པ་དང་། རྨོངས་པ་དང་འདྲེས་པ། རྨོངས་པ་ཇེ་མང་བཟོ་བ་ལས་བྱུང་བའི་དབང་མེད་ཀྱིས་ཡང་ནས་ཡང་དུ་སྐྱེ་བ་ལེན་པའི་ཕུང་པོ་འདིའི་ཁྱབ་པ་འདུ་བྱེད་ཀྱི་སྡུག་བསྔལ་རྒྱུན་སྲིང་བར་བྱེད་ཀྱི་ཡོད་པ་དེ་ལས་ཐར་འདོད་ཀྱི་འདུན་པ་ཞིག་ཡིན། དེར་བརྟེན་འདུན་པ་འདི་ནི་སེམས་ཅན་ཐམས་ཅད་འགྱུར་བའི་སྡུག་བསྔལ་དང་སྡུག་བསྔལ་གྱི་སྡུག་བསྔལ་སོགས་ལས་ཐར་འདོད་ཀྱི་བློ་ཙམ་ཞིག་མིན། འགྱུར་བའི་སྡུག་བསྔལ་ཞེས་པ་ནི་འཇིག་རྟེན་པའི་ཟག་བཅས་ཀྱི་བདེ་བའམ་བདེ་བ་ཉི་ཚེ་བ་རྒྱུན་རིང་མི་སྡོད་ཅིང་འདོད་པ་ཁེངས་རྒྱུ་མེད་པ་རྣམས་ཡིན། སྙིང་རྗེ་ཆེན་པོ་ཞེས་པ་ནི་སྡུག་བསྔལ་དེ་རྣམས་ལས་ཐར་བ་ལ་སེམས་ཅན་རྣམས་ལྷ་ཡུལ་དུ་སྐྱེ་བའི་འདུན་པ་ཞིག་མ་རེད།
  • འདི་ནི་སེམས་ཅན་ཐམས་ཅད་ཁྱབ་པ་འདུ་བྱེད་ཀྱི་སྡུག་བསྔལ་ལས་ཐར་ཐུབ་པའི་ཡིད་ཆེས་བརྟན་པོ་ཞིག་ལ་གཞི་རྟེན་བྱས་པ་ཞིག་ཡིན་པ་ལས། འདུན་པ་དང་ཡིད་སྨོན་ཡག་པོ་ཞིག་དང་ཡིན་མདོག་ཁ་པོ་གཅིག་པུ་ཙམ་ཞིག་ནི་མ་ཡིན།

སྙིང་རྗེ་ནི་དུས་རྒྱུན་ནས་ངེས་འབྱུང་གི་བསམ་པ་དང་འདྲ་བའི་བློའི་འཁྱེར་སོ་ཞིག་ལ་འགྲེལ་བརྗོད་བྱེད་ཀྱི་ཡོད། འདི་ནི་ཐར་འདོད་ཀྱི་ཆོད་སེམས་སམ་འདུན་པ་དྲག་པོ་ཞིག་ཡིན། ངེས་འབྱུང་ནི་རང་གི་སྡུག་བསྔལ་དང་སྡུག་བསྔལ་དེའི་རྒྱུ་ལ་དམིགས་ནས་དེ་ལས་ཐར་འདོད་ཀྱི་བློའི་འཁྱེར་སོ་ཞིག་ཡིན། རང་གི་སྡུག་བསྔལ་དང་སྡུག་བསྔལ་གྱི་རྒྱུ་ལས་ཐར་འདོད་ཀྱི་ཆོད་སེམས་ལ་གཞིར་བྱས་ནས་ང་ཚོས་སེམས་ཅན་གཞན་གྱི་ཚོར་མྱོང་ཤེས་པའི་ནུས་པ་བསྐྱེད་ཐུབ་ཀྱི་ཡོད། དེ་ནི་རང་ཉིད་སོ་སོར་སྡུག་བསྔལ་ལས་ཐར་འདོད་ཀྱི་འདུན་པ་དྲག་པོ་ཡོད་པ་དེ་བརྗེས་ནས་བསམ་བློའི་འཁྱེར་སོ་དེ་སེམས་ཅན་གཞན་དང། དེ་དག་གི་སྡུག་བསྔལ། སྡུག་བསྔལ་གྱི་རྒྱུ་ལ་ཁ་ཕྱོགས་བསྒྱུར་ནས་དེ་དག་ལས་ཐར་བར་ཤོག་ཅེས་རང་གིས་རང་ལ་ཡིད་སྨོན་ཤུགས་དྲག་བྱས་པ་ནང་བཞིན་སེམས་ཅན་གཞན་ལའང་དེ་ལྟར་བྱེད་དགོས་ཀྱི་ཡོད། 

ནམ་རྒྱུན་ནས་ཡོད་བསྡད་པའི་ཟེར་རྒྱུན་ཞིག་ལ། རང་གི་སྡུག་བསྔལ་ལ་བསམས་ནས་དེ་ལས་ཐར་འདོད་ཀྱི་བློ་ཞིག་མ་སྐྱེས་བར་དུ་སེམས་ཅན་གཞན་གྱི་ཚོར་བ་ཤེས་ནུས་དང་སྙིང་རྗེ་བཅོས་མིན་ཞིག་སྐྱེ་རྒྱུ་དེ་ཁག་པོ་ཡིན་ཟེར་གྱི་ཡོད། ང་ཚོས་ཤེས་དགོས་རྒྱུ་ཞིག་ལ། ང་ཚོ་ལ་སྡུག་བསྔལ་གྱིས་ག་ཚོད་མནར་གྱི་ཡོད་པ་དེ་བཞིན་སེམས་ཅན་གཞན་ལ་ཡང་དེ་ལྟར་སྡུག་བསྔལ་གྱིས་མནར་གྱི་ཡོད་པ་དེ་ངེས་པར་དུ་ཤེས་དགོས། འདི་ལྟ་བུའི་གོ་རྟོགས་ཞིག་ཡོང་བ་ལ་དང་པོ་རང་ཉིད་ཀྱིས་སྡུག་བསྔལ་མྱོང་བ་དེས་དངོས་གནས་རང་ལ་གནོད་ཀྱི་ཡོད་པ་ངོས་ལེན་བྱ་རྒྱུ་ལ་རག་ལས་ཡོད། དེ་མིན་ན་སེམས་ཅན་གཞན་གྱི་སྡུག་བསྔལ་ལ་ང་ཚོས་ཛ་དྲག་དང་དོ་གལ་དུ་བརྩི་གི་མ་རེད། ང་ཚོས་རང་ལ་བཀའ་དྲིན་ཆེ་བའི་མ་ཡུམ་སྡུག་བསྔལ་ལས་གྲོལ་ནས་བདེ་སྐྱིད་དང་ལྡན་ན་བསམ་པའི་བློ་ཞིག་ག་དུས་ཡིན་ཀྱང་ཡོད་པ་དེ་དྲན་དགོས། དེར་བརྟེན་ང་ཚོས་རང་གི་ཨ་མ་དང་། ཨ་ཕ། སྤུན་ཉེ་འདུ། གྲོགས་ཕོ་མོ་སོགས་ནས་མགོ་བཙུགས་པ་ཡིན་ན། དེ་འདྲའི་སྒོམ་ནི་དངོས་གནས་དྲང་གནས་ཀྱི་ཚོར་བ་དང་དོན་སྙིང་ཡོད་པའི་སྒོམ་ཞིག་ཆགས་ཀྱི་ཡོད།

བརྙན་པར། མཚན་ཞབས་སེར་ཀོང་རིན་པོ་ཆེ་སྐུ་ཕྲེང་ ༢། “སྙིང་རྗེ་ཟེར་བ་དེ་གང་རེད་དམ།”

ཐབས་ཤེས་འདི་རྒྱ་སྐྱེད་བཏང་ནས་རང་མཐོང་ཆུང་བའི་བསམ་བློ་དེ་ཇེ་ཉུང་དུ་གཏོང་བ།

ཇི་ལྟར་ཐོག་མར་རང་ཉིད་སྡུག་བསྔལ་དང་སྡུག་བསྔལ་གྱི་རྒྱུ་ལས་ཐར་འདོད་ཀྱི་འདུན་པ་ཞིག་ཡོད་པ་ཡིན་ན། གཞན་ལ་དམིགས་པའི་སྙིང་རྗེ་དེ་རྣམ་པར་དག་པའི་སྒོ་ནས་སྐྱེ་ཐུབ་ཅེས་བསྟན་བཅོས་ནང་གསུངས་པ་བཞིན་བྱམས་པ་ལའང་རྣམ་གཞག་འདི་རང་གི་ཐོག་ལ་བསམས་ནས་བཤད་ཆོག་གི་རེད་བསམ་གྱི་འདུག། འདི་ནི་དམིགས་བསལ་གྱི་རང་མཐོང་ཆུང་བའི་མི་རྣམས་ལ་འབྲེལ་བ་ཆེན་པོ་ཡོད། རང་མཐོང་ཆུང་བའི་དཀའ་ངལ་འདི་ནི་ནུབ་ཕྱོགས་པའི་སྤྱི་ཚོགས་ཁག་གི་ནང་ཡོད་བསྡད་པ་ཞིག་ལས་བོད་པ་དང་ཐ་ན་རྒྱ་གར་གྱི་སྤྱི་ཚོགས་ནང་ལ་དེ་ཙམ་མེད། ང་ཚོས་སེམས་ཅན་གཞན་རྣམས་བདེ་བ་དང་བདེ་བའི་རྒྱུ་དང་ལྡན་པར་ཤོག་ཅེས་ལྷག་བསམ་རྣམ་དག་གིས་ཡིད་སྨོན་བྱེད་ཐུབ་པ་ལ། ཐོག་མར་རང་ཉིད་བདེ་བ་དང་བདེ་བའི་རྒྱུ་དང་ལྡན་པར་ཤོག་ཅེས་ལྷག་བསམ་རྣམ་དག་གིས་ཡིད་སྨོན་བྱེད་དགོས། གལ་སྲིད་ང་ཚོས་རང་ཉིད་བདེ་བ་དང་ལྡན་པའི་འོས་བབ་མེད་པར་ཚོར་བ་ཡིན་ན། གཞན་སེམས་ཅན་རྣམས་ལ་བདེ་བ་དང་ལྡན་པའི་འོས་བབ་ཅིག་ག་རེ་བྱས་ནས་ཡོད་པ་ཡིན་ནམ།

དེ་འདྲ་ཡིན་པ་སོང་ཙང། རང་ཉིད་བདེ་བ་འདོད་པ་འདི་ནི་རང་མཐོང་ཆུང་བའི་དཀའ་ངལ་ཡོན་ན། སྒོམ་གྱི་རིམ་པའི་ནང་དགོས་ངེས་ཅན་ཞིག་ལ་ཁ་སྣོན་བྱེད་ཆོག་ལ། འདི་ནི་གལ་ཆེན་པོ་ཞིག་རེད་བསམ་གྱི་འདུག སེམས་ཅན་ཐམས་ཅད་ལ་བདེ་སྐྱིད་ཀྱི་འོས་བབ་ཡོད་པའི་བསམ་བློ་གཏོང་སྟངས་འདིས་ང་ཚོ་ལ་རྒྱུ་བདེ་གཤེགས་སྙིང་པོ་ཡོད་པའི་དྲན་གསོ་བ་ལ་རོགས་རམ་བྱེད་ཀྱི་ཡོད། རང་གཞན་སུ་འདྲ་ཞིག་ཡིན་ནའང་རང་བཞིན་གྱིས་མི་སྡུག་ཅག་ཞིག་མེད་པར། ཚང་མའི་རྒྱུད་ལ་སངས་རྒྱས་རུང་གི་ནུས་པ་དང་། གཞན་ལ་ཕན་ཐོགས་ཐུབ་པ། དེ་བཞིན་བདེ་སྐྱིད་དང་ལྡན་པའི་འོས་བབ་སོགས་ཡོད་པ་ཡིན། 

གནད་དོན་གཞན་ཞིག་ལ། བྱམས་དང་སྙིང་རྗེ་ནི་ཐེག་པ་ཆུང་ངུའི་གྲུབ་མཐའ་ཁག་གི་ནང་ལ་ཡང་ཡོད་བསྡད་པ་ཞིག་ཡིན་ནའང། མའི་བཀའ་དྲིན་དྲན་པའི་ཐོག་ནས་རྒྱུ་འབྲས་མན་ངག་བདུན་གྱི་རིམ་པའི་དབང་དུ་བྱས་སྟེ་བྱམས་པ་དང་། སྙིང་རྗེ་སྒོམ་ཐབས་འདི་ལྟ་བུ་ནི་དེ་དག་གི་ནང་བསྟན་མེད། ཡིན་ནའང་ང་ཚོས་ཐེག་པ་ཆུང་ངུའི་ནང་བྱམས་དང་སྙེང་རྗེའི་སྒོམ་ཐབས་དེ་མི་འདུག་ཞེས་བསམ་རྒྱུ་མེད། གང་ལྟར་དེ་དག་གི་ནང་མེད་པ་ནི་བྱང་ཆུབ་སེམས་སྒོམ་པའི་རིམ་པ་རྣམས་རེད།

ཆོད་སེམས་ཁྱད་པར་ཅན། ༼ལྷག་པའི་བསམ་པ།༽

སྐད་སྒྱུར་བ་མང་པོ་ཞིག་གིས་རྒྱུ་འབྲས་མན་ངག་བདུན་གྱི་དྲུག་པ་དེར་བསྒྱུར་སྟངས་མི་འདྲ་བ་གནང་ཡོད། འགའ་ཤས་ཀྱིས་འདི་ལ་ “རང་དོན་མེད་པའི་ཡིད་སྨོན་རྣམ་དག་” ཅེས་བསྒྱུར་ཡོད་ཅིང་། ༸གོང་ས་མཆོག་གིས་ “གོ་ལ་སྤྱིའི་འགན་འཁྲི་” ཞེས་པའི་ཐ་སྙད་དེ་བེད་སྤྱོད་གནང་གི་འདུག ངས་ཀྱང་འདི་ལ་བསྒྱུར་སྟངས་མི་འདྲ་བ་འགའ་ཤས་བེད་སྤྱོད་བྱས་ཡོད་ཀྱང་། སྐབས་འདིར་ “ཆོད་སེམས་ཁྱད་པར་ཅན་” ཞེས་བསྒྱུར་འདོད་བྱུང་། སྙིང་རྗེ་ཆེན་པོ་ལ་བརྟེན་ནས་སེམས་ཅན་ཐམས་ཅད་ལ་ཕན་འདོད་ཀྱི་འདུན་པ་དང་བསམ་པ་ཞིག་སྐྱེ་ཡི་ཡོད། སྐབས་འདིར་རང་གིས་ངེས་པར་དུ་བྱེད་ཀྱི་ཡིན་ཞེས་དམ་བཅའ་བརྟན་པོ་ཞིག་འཇོག་གི་ཡོད། སེམས་ཅན་གཞན་གྱི་སྡུག་བསྔལ་ལ་ཁ་ཡོད་ལག་ཡོད་ཀྱི་ཕན་ཐོགས་པའི་བྱ་བ་བྱེད་པའི་འགན་འཁྲི་དེ་རང་ཐོག་དུ་འཁྱེར་གྱི་ཡོད། གལ་སྲིད་མི་ཞིག་ཆུས་འཁྱེར་བའམ་མཚོ་ཡི་ནང་བྱིངས་བསྡད་ཡོད་ན། ང་ཚོ་ཆུ་ངོགས་སམ་མཚོ་ངོགས་སུ་ཡར་ལངས་ནས་ “ཨ་ཙི། ཨ་ཙི། འདི་འདྲ་ཞིག་ཡོང་མེད་ན་” ཟེར་ནས་མི་སྡོད་པར་ཆུའི་ནང་མཆོངས་ནས་མི་དེ་སྐྱོབ་ཐབས་བྱེད་དགོས། དེ་བཞིན་བྱང་ཆུབ་ཀྱི་སེམས་སྒོམ་པའི་སྐབས་སུ་ཡང་སེམས་ཅན་ཐམས་ཅད་ལ་གང་ཐུབ་ཅི་ཐུབ་ཀྱིས་རོགས་རམ་བྱ་རྒྱུའི་གོ་ལ་སྤྱིའི་འགན་འཁྲི་དེ་ང་རང་གིས་བྱེད་ཀྱི་ཡིན་ཞེས་ཐག་གཅོད་གཙང་མ་ཞིག་ཡོད་དགོས།

བྱང་ཆུབ་སེམས་ཀྱི་དམིགས་ཡུལ། ༼བྱང་ཆུབ་ཀྱི་སེམས།༽

རྒྱུ་འབྲས་མན་ངག་བདུན་གྱི་རིམ་པ་དང་པོ་དྲུག་གི་རྒྱུའི་ཉེར་ལེན་སྒྲུབ་པ་ལ་བརྟེན་ནས་འབྲས་བུ་མན་ངག་བདུན་པ་བྱང་ཆུབ་སེམས་ཀྱི་དམིགས་པ་བསྐྱེད་པ་ཡིན། དེ་ཡང་ང་ཚོས་རང་ལ་ཡོད་པའི་ཉོན་མོངས་པ་དང་སྐྱོན་གྱི་ཆ་སོགས་ལ་བལྟས་ནས་སེམས་ཅན་གཞན་ལ་ཕན་རླབས་ཆེ་ཤོས་ཇི་ལྟར་སྒྲུབ་ཐུབ་ཀྱི་ཡོད་མེད་དཔྱད་ན། ཕན་ཐོགས་དེ་ཙམ་སྒྲུབ་ཐུབ་གྱི་མེད་པ་དེ་ང་ཚོས་རྟོགས་ཀྱི་ཡོད། གལ་ཏེ་རང་ཉིད་རང་འདོད་དོན་གཉེར་ཅན་དང་། བཟོད་སྒོམ་མེད་པ། མི་གཞན་ལ་ཆགས་པ་སྐྱེ་བ། གཞན་ལ་ཁོང་ཁྲོ་ཟ་བ། ལེ་ལོ་ཅན་ཡིན་པ། གལ་སྲིད་རང་ཉིད་ག་དུས་ཡིན་ནའང་དཀའ་ལས་ཁག་བ་དང། མི་གཞན་ལ་བསམ་ཤེས་བྱེད་མི་ཐུབ་པ། གཞན་ལ་འབྲེལ་བ་ཡག་པོ་བྱེད་མི་ཐུབ་པ། དེ་བཞིན་མི་གཞན་གྱིས་རང་ཉིད་ལ་མི་དགའ་བ་བྱེད་པའམ་ཁས་ལེན་བྱེད་ཀྱི་མ་རེད་བསམས་ནས་ཞེད་སྣང་སྐྱེ་བ་སོགས་གནས་སྟངས་འདི་ཚང་མས་མི་གཞན་ལ་གང་ཐུབ་ཅི་ཐུབ་ཀྱིས་ཕན་པ་བསྒྲུབ་རྒྱུ་ལ་དངོས་གནས་འགོག་རྐྱེན་བྱེད་ཀྱི་ཡོད། དེར་བརྟེན་གཞན་ལ་དངོས་གནས་ཀྱི་ཕན་པ་བྱེད་འདོད་ཡོད་ན། ང་ཚོས་གནས་སྟངས་འདི་དག་སྤོང་དགོས། དཀའ་ལས་བརྒྱབ་ནས་གནས་སྟངས་འདི་དག་མེད་པ་བཟོས་ཏེ་རང་གི་སྐྱེས་སྟོབས་ཀྱི་རིག་རྩལ་དང་འཇོན་ཐང། དེ་བཞིན་རྒྱུ་བདེ་གཤེགས་སྙིང་པོའི་ཡོན་ཏན་རྣམས་དངོས་སུ་བེད་སྤྱོད་བཏང་ནས་གཞན་ལ་ཕན་པ་སྒྲུབ་ཐབས་བྱེད་དགོས། དེ་ལྟར་མཐུ་དང་ནུས་པ་ཀུན་ལྡན་གྱི་དཀོན་མཆོག་ཆགས་མི་ཐུབ་ཀྱང་། ང་ཚོས་དུས་རྒྱུན་དུ་སེམས་ནང་ “གང་ཐུབ་ཅི་ཐུབ་ཀྱིས་” རོགས་པ་བྱེད་ཀྱི་ཡིན་ཞེས་བསམ་དགོས། འདི་ལྟ་བུའི་བསམ་བློ་གཏོང་སྟངས་གཞི་ལ་བཞག་ནས་སེམས་ཅན་ཐམས་ཅད་ལ་ཕན་པ་བྱེད་ཐུབ་པའི་སངས་རྒྱས་ཀྱི་གོ་འཕང་འཐོབ་པའི་ཆེད་དུ་ལུས་སེམས་གཉིས་ཀྱི་སྒོ་ནས་ཆོད་སེམས་བརྟན་པོ་དགོས་པ་ཡིན། འདི་ནི་བྱང་ཆུབ་སེམས་ཀྱི་དམིགས་པའམ་བྱང་ཆུབ་སེམས་བསྐྱེད་པ་ཞེས་པ་དེ་ཡིན། འདི་ཡོད་པ་ལ་བརྟེན་ནས་ད་ལྟ་ཐོབ་མེད་ཀྱང་དངོས་གནས་སེམས་ཅན་གྱི་དོན་བྱེད་ཐུབ་པའི་སངས་རྒྱས་ཀྱི་གོ་འཕང་དེ་འཐོབ་འདོད་ཀྱི་བསམ་པ་ཀུན་ནས་སྐྱེ་བ་ཡིན།

བྱང་ཆུབ་སེམས་དཔའི་སྤྱོད་པ།

བྱང་ཆུབ་སེམས་བསྐྱེད་ཚར་བའི་རྗེས་ལ་རང་གི་དཔག་ཚོད་ཀྱི་ནུས་པ་ལ་བརྟེན་ནས་སེམས་ཅན་གཞན་ལ་ཕན་པ་བྱེད་པ་ཡིན། རྒྱུ་མཚན་ནི་། རྒྱུ་འབྲས་མན་ངག་བདུན་སྒོམ་པའི་རིམ་པ་ནས་བསྐྱེད་པའི་གཞན་ཕན་གྱི་འགན་འཁྲི་འཁུར་རྒྱུའི་ཁྱད་པར་དུ་འཕགས་པའི་ཆོད་སེམས་དེ་ང་ཚོར་ཡོད་པས་ཡིན།

འདིའི་དོན་ནི་འདི་ནས་བཟུང་ཏེ་ག་དུས་ཡིན་ཀྱང་སེམས་ཅན་གཞན་ལ་དཀའ་ངལ་འཕྲད་པ་མཐོང་བའི་སྐབས། དཔེར་ན། ཁྱིམ་མེད་པའི་མི་ཞིག་མཐོང་ན། དེ་ཁྱིམ་མེད་པའི་མི་ཙམ་ཞིག་ལ་མི་མཐོང་བར། ཁོང་རྣམས་རང་བཞིན་ལྷན་སྐྱེས་ཀྱིས་སྐྱོ་བོའམ། ལེ་ལོའི་དབང་གིས་ཁྱིམ་མེད་པ་རེད་ཅེས་རྟོག་པས་དཔྱད་ཞིབ་བྱ་རྒྱུ་མེད། དེ་ལས་ལྡོག་སྟེ་ཚེ་འདི་དང་ཚེ་འདིའི་གནས་སྐབས་བྱེ་བྲག་པ་ཞིག་ལ་མི་དེའི་གནས་སྟངས་འདི་འདྲ་ཞིག་གི་ནང་ཡོད་པ་ཤེས་དགོས། ཁྱིམ་མེད་པའི་མི་དེའི་སེམས་ཀྱི་རྒྱུན་ནི་ཐོག་མ་མེད་པ་དང་། དུས་ནམ་ཞིག་གི་ཚེ་སོ་སོའི་མའམ་ཕ་བྱས་ནས་ང་ཚོ་ལ་བྱམས་བརྩེས་བསྐྱངས་མྱོང་ཡོད་པ་དང་། མངལ་གྱི་ནང་འཁྱེར་མྱོང་ཡོད་པ་དང་སྐྱེས་པའི་རྗེས་སུ་ཆབ་གདན་བརྗེས་པ་སོགས་བྱས་མྱོང་ཡོད་པས། ང་ཚོ་ལ་ཧ་ཅང་བཀའ་དྲིན་ཆེན་པོ་ཡིན་ལ་དྲིན་ལན་འཇལ་དགོས་ཀྱི་ཡོད། དེར་བརྟེན་ང་ཚོས་ཁོང་རྣམས་ལ་བདེ་བ་དང་བདེ་བའི་རྒྱུ་དང་ལྡན་པར་ཤོག་ཅེས་ཡིད་སྨོན་བྱེད་པ་དང་། སྡུག་བསྔལ་དང་སྡུག་བསྔལ་གྱི་རྒྱུ་དང་འབྲལ་ཐུབ་པར་ཤོག་ཅེས་པའི་བློ་སྐྱེད་དགོས། དེ་ལྟར་ཡོང་བ་ལ་འགན་འཁྲི་དེ་སོ་སོ་རང་གིས་འཁྱེར་ནས་བྱེད་དགོས་ཀྱི་ཡོད།

འོ་ན་ང་ཚོས་ག་རེ་བྱེད་དགོས་སམ་ཞེ་ན། ང་ཚོས་དོན་ངོ་མར་དེ་དག་ལ་ཕན་པའི་བྱ་བ་ཞིག་རྩོམ་དགོས་ཀྱི་ཡོད་པ་གཏོགས་སོ་སོ་ནང་ལ་ཕྱིན་ནས་སྒོམ་བརྒྱབ་སྟེ་རང་གི་སྐྱོན་ཆ་ལས་ཐར་ཐབས་བྱེད་པས་འགྲིག་ཐབས་མེད། སྒོམ་མང་ཙམ་རྒྱག་དགོས་ངེས་ཡིན་ནའང་། སྒོམ་བརྒྱབ་པ་དེས་སྐབས་དེ་ལ་རང་གི་སེམས་ལ་ཡོད་པའི་འཚེར་སྣང་དང་། དོགས་པ། སེར་སྣ་སོགས་དབང་དུ་བསྒྱུར་བ་ལ་སེམས་སྐུལ་བྱས་ཏེ་སེམས་ཅན་ལ་ཕན་ཐོགས་ཐབས་གཅིག་བྱེད་དགོས། དེ་ཡང་ཐ་ན་འཛུམ་མདངས་གཅིག་ལས་མ་བྱུང་ནའང་སྟོན་དགོས།  

ཕྱོགས་གཞན་ཞིག་ནས་བཤད་ན། ང་ཚོས་ཆོད་སེམས་ཁྱད་པར་ཅན་ནམ་ལྷག་པའི་བསམ་པ་ལ་བརྟེན་ནས་རང་གི་སྐྱོན་ཆ་སྲུང་གང་ཐུབ་ལ་འབད་པ་དང། རང་གི་ནུས་པ་བེད་སྤྱོད་གཏོང་གང་ཐུབ་བྱས་ནས་གཞན་ལ་ཕན་ཐོགས་བྱེད་རྒྱུ་དེ་ཡིན། ང་ཚོ་ནང་ལ་འགྲོ་བའི་སྐབས་སུ་རང་གི་སྒོམ་སོགས་ཀྱི་ཉམས་ལེན་ཡར་རྒྱས་གང་ཐུབ་གཏོང་དགོས་རྒྱུ་ནི་བཤད་མི་དགོས་པ་རེད། འོན་ཀྱང་ཁྱིམ་མེད་པའི་མི་རྣམས་དྲན་པ་མི་བརྗེད་པ་བྱས་ནས་ནང་ལ་སྒོམ་རྒྱག་པ་ཙམ་གྱི་ཆེད་དུ་འགྲོ་རྒྱུ་མེད། བྱས་ཙང་། གལ་སྲིད་ང་ཚོའི་ཆོད་སེམས་དེ་རྣམ་པར་དག་པ་ཞིག་ཡིན་ན། འདིས་ང་ཚོ་དྲན་ཤེས་ཅན་ཞིག་དུ་གནས་པར་བྱེད་ཐུབ། 

ང་ཚོས་དུས་ནས་དུས་སུ་རང་ཉིད་ཡར་རྒྱས་གཏོང་རྒྱུའི་སེམས་སྐུལ་ཆེ་ཤོས་དེ་ནི་དཀའ་ངལ་འཕྲད་ནས་རོགས་པ་དགོས་མཁན་གྱི་སེམས་ཅན་དང་ཐུག་པའི་སྐབས་སུ་ཡོང་གི་ཡོད། ང་ཚོས་ས་འོག་མེ་འཁོར་འབབ་ཚུགས་ལ་དགུན་ཁ་གནམ་གཤིས་གྲང་མོའི་སྐབས་ཤིག་ལ། ས་གཞི་གྲང་མོའི་སྟེང་རྨོ་རྒན་མོ་ཞིག་སློང་མོ་སློང་བཞིན་ཡོད་པ་མཐོང་བ་དང་། ང་ཚོས་གལ་སྲིད་ཁོང་ང་ཚོའི་ཨ་མ་ཡིན་ན་ག་རེ་བྱེད་དམ། གལ་སྲིད་ཁོང་ནི་རང་གི་ཚེ་འདིའི་ཨ་མ་ངོ་མ་དེ་ཡིན་ན། ང་ཚོས་ཡ་མེད་བཏང་ནས་འགྲོ་སྲིད་དམ། ཡང་མིན་ན་ས་འོག་མེ་འཁོར་བབས་ཚུགས་ནང་ཁྱིམ་མེད་པའི་མི་གཞོན་གཞོན་ཞིག་འཕྲལ་སེལ་གྱི་ཚགས་ཤོག་གི་སྐོར་སྐྱོད་ཚོང་ལས་བྱེད་བཞིན་པ་དེར་ལྟོས་དང་། གལ་སྲིད་ཁོ་དངོས་གནས་ང་ཚོའི་ཕྲུ་གུ་ཡིན་ན་ང་ཚོ་ལ་་ཚོར་བ་ག་འདྲ་ཞིག་ཡོང་གི་རེད་དམ། བུ་དེ་ལ་ཡང་ཕ་མ་སྤུན་མཆེད་ཡོད་རེད། ང་ཚོས་བསམ་བློ་འདི་ལྟར་གཏོང་རྒྱུ་གལ་ཆེན་པོ་ཡིན། རྒྱ་གར་ནང་ང་ཚོས་མཛེ་ནད་ཅན་དང་དེ་མིན་གྱི་དབང་པོ་སྐྱོན་ཅན་མང་པོ་ལམ་སྟེང་ལ་མཐོང་རྒྱུ་ཡོད་ཀྱང། ནམ་རྒྱུན་ང་ཚོས་མཛེ་ནད་ཅན་འདི་དག་ལའང་ནང་མི་ཡོད་རེད་ནམ་ཡང་བསམ་གྱི་མེད། ཁོ་ཚོ་ལ་ཡང་ནང་མི་ཡོད་པས་འགྲོ་བ་མིའི་མཐོང་སྤྲོད་དགོས།

དངོས་གནས་དྲང་གནས་ཁྱིམ་མེད་པའི་མི་དང་གནས་སྐབས་ཀྱི་ཁྱིམ་མེད་པའི་མིའི་དབར་ལ་དབྱེ་བ་འབྱེད་པའི་རྣམ་དཔྱོད་ཅིག་ང་ཚོ་ལ་དགོས་ངེས་ཞིག་ཡིན། ཁྱིམ་མེད་པའི་མི་འགའ་ཤས་ལམ་སྟེང་ལ་འཚང་ཀའི་ངང་ནས་དངུལ་སློང་གི་ཡོད་པ་ནི་སྨན་རྫས་དང་ཆང་རག་ཉོ་བའི་ཆེད་དུ་རེད། གནས་སྟངས་དེ་འདྲའི་སྐབས་སུ་ནང་པ་སངས་རྒྱས་པས་ཟེར་བའི་ “ཐབས་མཁས་པོ་” ཞེས་པ་དེ་ལག་བསྟར་བྱེད་དགོས། ང་ཚོར་རོགས་པ་བྱེད་འདོད་ཡོད་ཅིང་། རོགས་པ་གང་ཞིག་ཁོ་ཚོར་སྡུག་བསྔལ་ཡོང་ཆེད་ཀྱི་རྒྱུ་དང་བདེ་བ་འབྱུང་བྱེད་ཀྱི་རྒྱུ་ཆགས་ཀྱི་ཡོད་མེད་རོབ་ཙམ་ཤེས་ཐུབ་པས། ང་ཚོས་དངོས་གནས་གང་ཕན་ཐོགས་ཆེ་བ་དེ་བྱེད་དགོས། སྐབས་དེར་ང་ཚོས་དངུལ་སྤྲད་ན་དེ་དག་སྨན་རྫས་དང་ཆང་རག་ཉོ་ཆེད་དུ་བེད་སྤྱོད་གཏོང་སྲིད་པས་དངུལ་མ་སྤྲད་ན་ཡག་ག་ཡོད་སྲིད། གལ་སྲིད་ང་ཚོར་ཁ་ལག་ཏོག་ཙམ་ཞིག་ཡོད་པ་དེ་སྤྲད་པ་ཡིན་ན་ཕན་ཐོགས་ཆེ་བ་ཡོད། གང་ལྟར་ཡང། ཁོ་ཚོར་བྱམས་སེམས་དང་བརྩི་མཐོང་སྤྲོད་དགོས་པ་ལས་མི་ཐབས་སྡུག་པོ་དང་། ཞེན་ལོག་སྐྱེ་གཞིའི་གད་སྙིགས་ལྟ་བུའམ་ར་བཟི་ལྟ་བུར་བསམ་རྒྱུ་མེད། ཁོ་ཚོ་ནི་སྡུག་བསྔལ་མྱོང་བཞིན་པའི་འགྲོ་བ་མིའི་རིགས་ཞིག་ཡིན། 

མི་ཞིག་ལ་ཕན་ཐོགས་བྱེད་ཐབས་ཡག་ཤོས་དེ་གང་ཞིག་ཡིན་མིན་ཐག་གཅོད་རྒྱུ་ལས་སླ་པོ་མིན། ང་ཚོར་ཡང་སོ་སོའི་ཚད་བཀག་གི་ནུས་པ་ཡོད་པས། གང་ཞིག་རོགས་པ་ཡག་ཤོས་ཡིན་མིན་ཤེས་ཀྱི་མེད། དེ་ཡང་དག་པར་ཤེས་པ་ལ་སངས་རྒྱས་ཀྱི་གོ་འཕང་འཐོབ་དགོས་ཀྱི་ཡོད་ཀྱང། ད་ལྟ་ང་ཚོས་གང་ཐུབ་ཅི་ཐུབ་ཀྱིས་ཐབས་ཤེས་བྱེད་དགོས། མཚམས་མཚམས་ང་ཚོས་ནོར་འཁྲུལ་བྱེད་ཀྱི་རེད། ཡིན་ནའང་མ་མཐར་ཡང་ང་ཚོས་ཐབས་ཤེས་དང་འབད་བརྩོན་བྱེད་དགོས།

ཕྱོགས་བསྡོམས།

ང་ཚོས་རྒྱུ་འབྲས་མན་ངག་བདུན་གྱི་ཐབས་ལམ་ལ་བརྟེན་ནས་བྱང་ཆུབ་སེམས་ཀྱི་དམིགས་པ་བསྐྱེད་པའི་སྐབས་སུ། ང་ཚོའི་དམིགས་ཡུལ་ནི་སེམས་ཅན་ལ་ཕན་འདོགས་པའི་མཐར་ཐུག་སངས་རྒྱས་ཀྱི་གོ་འཕང་ཐོབ་རྒྱུ་དེ་རེད། དེ་ཡང་སེམས་ཅན་མང་པོར་གཅིག་ཏུ་བལྟ་བའི་སེམས་ཚོར་ཤུགས་ཆེན་ཞིག་གི་རྒྱབ་སྐྱོར་ཐོབ་ཡོད་དགོས་པ་ཡིན། སེམས་ཚོར་འདིའི་ནང་སེམས་ཅན་ཐམས་ཅད་ལ་གཅིག་མཚུངས་ཀྱི་བློ་ཐག་ཉེ་པོ་དང་འབྲེལ་ནས་ཡོད་པའི་བློ་ཞིག་དང་། གཞན་གྱིས་བསྐྱངས་པའི་བྱམས་བརྩེ་ལ་ཡི་རངས།  བཀའ་དྲིན་དྲན་ཤེས་ཀྱི་ཚོར་བ་ཟབ་པ། སེམས་འཁུར། བྱམས་པ། སྙིང་རྗེ། དེའི་སྟེང་སེམས་ཅན་ཐམས་ཅད་ལ་གང་ཐུབ་ཅི་ཐུབ་ཀྱིས་རོགས་པ་བྱེད་འདོད་ཀྱི་འགན་འཁྲི་འཁྱེར་རྒྱུའི་ཆོད་སེམས་བརྟན་པོ་ཞིག་ཡོད་པ་བཅས་ཚུད་ཡོད། འདི་འདྲའི་སེམས་ཚོར་གྱི་རྨང་གཞི་ཞིག་ཡོད་པའི་རྒྱུ་མཚན་གྱིས་ང་ཚོའི་བྱང་ཆུབ་སེམས་ཀྱི་དམིགས་ཡུལ་དེ་ནུས་ཤུགས་ལྡན་པ་དང་། བརྟན་པ། བཅོས་མ་མ་ཡིན་པ་ཞིག་ཆགས་ཀྱི་ཡོད།།

Top