ཡན་ལག་བདུན་གྱི་སྨོན་ལམ་གྱི་འགྲེལ་བ།

གལ་ཏེ་ང་ཚོས་ནང་དུ་སྒོམ་རྒྱག་པའི་ཆེད་སྔོན་འགྲོའི་ཚུལ་དུ་ཉམས་ལེན་དེ་དག་བྱེད་ཀྱིན་ཡོད་ན། ང་ཚོས་འཛིན་གྲྭ་མ་ཚུགས་གོང་ལ་བྱེད་པ་ནང་བཞིན་སྔོན་ལ་ང་ཚོས་ནང་གད་འཕྱག་དང་གཙང་བཟོ་བྱེད་དགོས། དཔེར་ན། གལ་ཏེ་ཤོག་བུ་དང་གྱོན་ཆས་རིགས་གང་སར་བཀྲམས་ཡོད་ན། ང་ཚོས་དེ་དག་གཙང་མ་བཟོ་དགོས། དེ་ལྟར་བྱེད་པའི་སྐབས། ང་ཚོས་“ངས་ནང་གཙང་མ་དང་གྲ་འགྲིག་པོ་བཟོ་བཞིན་པ་ནང་བཞིན་ངའི་སེམས་གསལ་པོ་དང་། གཙང་མ། གོ་རིམ་ལྡན་པ་ཞིག་ཏུ་འགྱུར་བར་ཤོག་”ཅེས་བསམ་དགོས།

ང་ཚོས་གཙང་མ་དང་། གྲ་འགྲིག་པོ། གོ་རིམ་ལྡན་པའི་ཁོར་ཡུག་ཅིག་གི་ནང་སྒོམ་ཉམས་ལེན་དང་བསླབ་པ་སློབ་གཉེར་བྱ་རྒྱུ་དེ་ཧ་ཅང་གལ་ཆེན་ཡིན། དེ་ཡང་ང་ཚོ་ལས་ཀ་བྱེད་ས་ལའང་གཅིག་པ་རེད། ང་ཚོས་གང་མཐོང་བ་དང་། ཐ་ན་ཕྱི་ངོས་ཙམ་གྱི་སྒོ་ནས་མཐོང་ནའང་། དེས་ང་ཚོའི་སེམས་ཀྱི་གནས་བབས་ལ་ཤུགས་ཆེར་ཤུགས་རྐྱེན་བྱེད་ཀྱི་ཡོད། གལ་ཏེ་ང་ཚོའི་ཉེ་འཁྲིས་སུ་ཡོད་པ་ཚང་མ་འཛོར་པོ་ཡོད་ན། ང་ཚོའི་སེམས་ཀྱང་འཛོར་པོའམ་མི་གསལ་བ་ཆགས་ཀྱི་ཡོད། གཞན་ཡང་ང་ཚོ་སྒོམ་རྒྱག་ས་དང་སློབ་གཉེར་བྱེད་ས་དེ་མཛེས་ཉམས་དང་སྤྲོ་སྣང་འཕེལ་པོ་ཞིག་ཡོད་ན་ཕན་ཆེ། ཉེ་འཁོར་མཛེས་ཤིང་ལྟ་ན་སྡུག་པ་དེ་མཐོང་བ་དེས་ནམ་རྒྱུན་ང་ཚོའི་སེམས་སྐྱིད་པོ་བཟོ་བ་དང་། སེམས་སྐྱིད་པའི་གནས་བབས་དེས་ཕན་བྱེད་དགེ་བའི་ལས་བྱ་རྒྱུའི་གོ་ཤེས་ལྡན་པ་ཆགས་ཀྱི་ཡོད། གལ་ཏེ་ང་ཚོའི་ཉེ་འཁོར་དུ་གང་ཡོད་པ་རྣམས་མདོག་ཉེས་པོ་དང་བཙོག་པ་མཐོང་ན། ང་ཚོས་དེ་ལ་ངོས་ལེན་བྱེད་འདོད་མེད་པ་དང་དེས་ང་ཚོའི་སེམས་ཀྱི་གནས་བབས་ལ་གནོད་ཀྱི་ཡོད། རྒྱུ་མཚན་དེ་ལ་བརྟེན་ནས་ང་ཚོས་ནམ་རྒྱུན་སོ་སོའི་ནང་ལ་ཡིད་དབང་འཕྲོག་པའི་མཆོད་བཤམ་སྒྲིག་པ་སྟེ། དཔེ་སྒྲོམ་མམ་ལྕོག་ཙེ་ལྟ་བུ་ཞིག་གོས་ཆེན་ལྟ་བུ་རས་ཆ་སྙིང་རྗེ་པོས་འགེབས་པ་དང་། དེའི་སྒང་ལ་ཉུང་མཐར་ཡང་སངས་རྒྱས་ཀྱི་སྐུ་འདྲ་ཞིག་གམ། ཡང་ན་རང་གི་མི་ཚེའི་ནང་གང་བྱེད་ཀྱི་ཡོད་པའི་ཉེན་མེད་ཀྱི་ཁ་ཕྱོགས་བཟང་པོའམ་སྐྱབས་སུ་འགྲོ་བའི་ཡུལ་མཚོན་པའི་རི་མོ་དང་སྣང་བརྙན་གཤོམ་གྱི་ཡོད།

ཉིན་ལྟར་ཞོགས་པ་རང་ཉིད་སོ་དང་། ལག་པ། གདོང་པ་བཀྲུ་བ་དང་། ནང་གཙང་མ་བཟོ་ཚར་བའི་རྗེས་སུ་ང་ཚོས་ཡོན་ཆབ་འབུལ་གྱི་ཡོད། དེ་ཡང་གལ་ཏེ་མི་བདེ་བ་ཡོད་ན། ནམ་རྒྱུན་འཆར་ཅན་གྱི་ཡོན་ཆབ་འབུལ་སྣོད་ཀྱི་ཏིང་བདུན་ཡིན་མི་དགོས། ཆུ་གཙང་མ་ཕོར་པ་གང་འབུལ་བ་ཙམ་གྱིས་ཀྱང་འགྲིགས། ང་ཚོས་སུ་གཅིག་ལའང་སེམས་ལ་འཇུག་པ་བཟོ་ཐབས་བྱེད་ཀྱི་མེད། ད་དུང་ང་ཚོར་འདོད་པ་ཡོད་ན། ང་ཚོས་ཡང་ལའམ་མཆོད་མེ་དང་། མེ་ཏོག །བདུག་སྤོས་སོགས་ཀྱང་འབུལ་ཆོག །འོན་ཀྱང་དེ་ནི་གདམ་ཀ་རེད། སྲོལ་རྒྱུན་ལྟར་འགྲེལ་བརྗོད་བྱེད་པ་ནང་བཞིན་ང་ཚོས་སོ་སོའི་དམིགས་རྣམ་དུ་སངས་རྒྱས་དང་བླ་ཆེན་དམ་པ་རྣམས་སྤྱན་དྲངས་པའི་ཆེད་ས་ཆ་ཡིད་དུ་འོང་བ་ཞིག་སྐྲུན་པ་ཙམ་དུ་མ་ཟད། ང་ཚོས་སོ་སོའི་ནང་དེ་ཡང་གནས་བདེ་བ་དང་སྐྱིད་པོ་ཚོར་བ་ཞིག་ཏུ་བཀོད་སྒྲིག་བྱེད་དགོས། དེ་ལྟར་བྱེད་པའི་སྐབས། དེས་ང་ཚོ་སྒོམ་རྒྱག་པ་དང་། སློབ་གཉེར་བྱེད་པ། ཡང་ན་ཆོས་ལ་ཉན་པ་དང་མཐུན་པའི་སེམས་ཀྱི་གནས་བབས་ཤིག་གི་ནང་འཇོག་གི་ཡོད།

ནམ་རྒྱུན་ལུགས་སྲོལ་ལྟར་བྱས་ན། མར་མ་བསྡད་གོང་ང་ཚོས་མཆོད་ཤོམ་སྟེང་གི་སངས་རྒྱས་ཀྱི་སྐུ་འདྲའི་མདུན་ཕྱག་གསུམ་འཚལ་གྱི་ཡོད། ང་ཚོའི་ཕྱག་འཚལ་བ་དེ་བསམ་མེད་འཕྲུལ་ཆས་ལྟར་ཚོར་བ་མེད་པ་ཞིག་ཏུ་མི་འགྱུར་བའི་ཕྱིར། ང་ཚོས་ཐོག་མར་རང་གི་སེམས་ཀྱི་གནས་བབས་ཡག་པོ་ཞིག་གམ་ཀུན་སློང་བཟང་པོར་བཅོས་དགོས། དེ་ལྟར་བྱེད་པར། ང་ཚོས་དབུགས་ལ་དམིགས་པ་གཏད་ནས་རང་གི་ཀུན་སློང་སླར་ཡང་ངེས་བརྟན་བཟོ་དགོས། ང་ཚོས་ནམ་རྒྱུན་མར་བསྡད་པའི་རྗེས་སུ་དེ་གཉིས་བྱེད་ཀྱི་ཡོད་ནའང་། དེ་ནི་ཡར་ལངས་པའི་སྐབས་སུ་སྔོན་ནས་བྱས་ན་ཡག་ག་ཡོད།

ཐོག་མར་ང་ཚོ་ཞི་འཇམ་བཟོ་དགོས་པ་དང་ང་ཚོས་གང་བྱེད་བཞིན་པ་དང་གང་བྱེད་རྩིས་ཡོད་པའི་བར་ལ་སྟོང་ཆ་ཞིག་བཟོ་དགོས། ང་ཚོས་དགེ་བའི་བསམ་བློ་ཞིག་མ་སྐྱེད་གོང་ལ་སོ་སོའི་སེམས་དེ་ཞི་འཇམ་ཞིག་དང་བཏང་སྙོམས་ཀྱི་གནས་བབས་ཤིག་ཏུ་འཇོག་དགོས། ང་ཚོས་དེ་དབུགས་ལ་དམིགས་པ་གཏད་ནས་རང་གི་མིག་ཞ་ལའི་སྒང་ལ་དལ་ལྷོད་ངང་དམིགས་པའི་སྒོ་ནས་བྱེད་དགོས། གལ་ཏེ་ང་ཚོ་དམིགས་བསལ་བསུན་གཙེར་བྱུང་བའམ་སེམས་འཚབ་བྱུང་བ་ཡིན་ན། ཞི་འཇམ་བཟོ་བའི་སྐབས་མིག་བཙུམ་ནའང་ཆོག་ཀྱང་། དེ་ཅུང་ཟད་ལྡངས་ནས་བཞག་པ་དེ་ཐབས་ལམ་ལེགས་པ་ཡིན།

ང་ཚོས་རྣམ་རྒྱུན་སྣ་ཁུང་ནས་མགྱོགས་མ་དྲགས་དལ་མ་དྲགས་པ། རིང་མ་དྲགས་པ་དང་ཐུང་མ་དྲགས་པར་དབུགས་གཏོང་ལེན་བྱེད་ཀྱི་ཡོད། ང་ཚོས་དབུགས་བཀག་ནས་སྡོད་ཀྱི་མེད། འོན་ཀྱང་དབུགས་ཕྱིར་དབྱུང་བའི་རྗེས་ཀྱི་སླར་ཡང་ནང་དུ་མ་རྔུབ་གོང་ལ་བཀག་ནས་སྡོད་ཀྱི་ཡོད། ནམ་རྒྱུན་གྱི་ཐབས་ལམ་ནི། ཁུ་སིམ་ངང་ནས་དབུགས་ཀྱི་རྒྱུ་བ་ཕྱིར་དབྱུང་བ་དང་དེར་བཀག་པ་གཉིས་གཅིག་ཏུ་གྲངས་བརྩི་དགོས་ཤིང་། གལ་ཏེ་དེ་མགོ་རྙོག་ཚ་པོ་ཡོད་ན། ང་ཚོས་དབུགས་ནང་དུ་རྔུབ་པ་དང་ཕྱིར་དབྱུང་བ། དེ་ནས་བཀག་པ་བཅས་གཅིག་ལ་གྲངས་བརྩིས་ན་འགྲིགས། ལུགས་སྲོལ་ལྟར་བྱས་ན། ང་ཚོས་དེ་ལྟར་དབུགས་གྲངས་བཅུ་གཅིག་བར་དུ་བརྩི་བ་དང་། དེ་ནས་བཅུ་གཅིག་སྐོར་དེ་ཐེངས་མ་གཉིས་སམ་གསུམ་ཡང་ནས་ཡང་དུ་བརྩི་དགོས།

རང་གི་སེམས་དེ་དཀྲོག་རྐྱེན་ཐེབས་པ་དང་འབྲེལ་མེད་ཀྱི་བསམ་བློས་ཟིན་པའི་སྐབས་གཅིག་པུར་ང་ཚོས་དབུགས་གྲངས་ཀ་བརྩི་སྟངས་འདི་ལག་བསྟར་བྱེད་ཀྱི་ཡོད། གལ་ཏེ་ང་ཚོའི་སེམས་ལ་དེ་ཙམ་གྱི་བསུན་གཙེར་ཐེབས་མེད་ན། དབུགས་གྲངས་ཀ་བརྩི་དགོས་ངེས་ཤིག་མིན། སྣ་ཁུང་བརྒྱུད་ནང་དུ་ཡོང་བ་དང་ཕྱི་རུ་འགྲོ་བའི་དབུགས་ཀྱི་ཚོར་བའི་སྟེང་ལ་དམིགས་པ་གཏད་ཙམ་དེ་འགྲིག་པ་ཡིན། རེས་མོས་ལྟར་ང་ཚོས་དབུགས་སྐོར་དེ་ཐེངས་མ་ཁ་ཤས་གྲངས་ཀ་བརྩིས་ནས་མུ་མཐུད་གྲངས་ཀ་མ་བརྩིས་པར་མུ་མཐུད་དགོས། ཐབས་ལམ་གང་འདྲའི་སྒོ་ནས་ང་ཚོས་དབུགས་ལ་དམིགས་པ་གཏད་པའི་སྐབས། ང་ཚོས་མུ་མཐུད་དེ་མ་མཐར་ཡང་ནང་སེམས་སུ་ཁུ་སིམ་དང་ཞི་ལྷིང་ཞིག་མ་སྐྱེད་བར་དུ་འགྲོ་དགོས། གལ་ཏེ་ང་ཚོའི་སེམས་དེ་ཕྱི་རོལ་གྱི་བསམ་བློ་ལ་བརྟེན་ནས་དཀྲོག་རྐྱེན་ཐེབས་ན། ང་ཚོས་ཆོས་ལ་ནམ་ཡང་ཡག་པོ་བྱས་ནས་སྒོམ་མི་ཐུབ་ལ་དོ་སྣང་ཆེན་པོས་ཆོས་ལ་ཉན་མི་ཐུབ་པ་ཆགས་ཀྱི་ཡོད།

དུས་ནམ་ཞིག་གི་ཚེ་ན་ང་ཚོའི་སེམས་དེ་ལྟོས་ས་ལྟོས་ཕྱོགས་ཀྱི་སྒོ་ནས་ཁུ་སིམ་ཞི་འཇམ་ངང་ཡོད་པའི་སྐབས། ང་ཚོས་སྒོམ་ཅིའི་ཕྱིར་རྒྱག་རྩིས་བྱེད་པ་དང་སློབ་གཉེར་ཅིའི་ཕྱིར་བྱེད་རྩིས་ཡོད་པ། དེ་ག་ནང་བཞིན་ང་ཚོ་ཆོས་ཁྲིད་འཛིན་གྲྭའི་ནང་ཅིའི་ཕྱིར་སླེབས་ཡོད་པ་བཅས་ཀྱི་ཐད་བརྟག་དཔྱད་བྱེད་དགོས། ཕྱོགས་གཞན་ཞིག་ནས་ང་ཚོས་ཀུན་སློང་ལ་དཔྱད་པ་བྱེད་དགོས། དེ་ནི་ནང་ཆོས་ནང་ང་ཚོའི་ཀུན་སློང་ངམ་བྱ་བ་བྱེད་པའི་དམིགས་ཡུལ་ལ་གོ་བ་ཡིན། ང་ཚོ་དོ་དགོང་འདིར་བསམ་མེད་ཚོར་མེད་ཀྱི་འཕྲུལ་ཆས་ལྟ་བུའི་གོམས་གཤིས་ལ་བརྟེན་ནས་སེམས་ནང་དམིགས་ཡུལ་ངེས་ཅན་ཞིག་མེད་པའམ། ཡང་ན་སྤྱི་ཚོགས་འདུ་འཛོམས་ལྟ་བུ་གྲོགས་པོ་ཐུག་འཕྲད་དང་ཁོར་ཡུག་ཡིད་དུ་འོང་བ་ཞིག་ཏུ་སླེབས་པ་རེད་དམ།

ཡང་ན་ང་ཚོ་འདིར་དངོས་གནས་བློ་སྐྱེད་དང་སློབ་སྦྱོང་ཞིག་བྱ་ཕྱིར་སླེབས་པ་རེད་དམ། ང་ཚོས་ཤེས་ཡོན་ཙམ་གྱི་ཡིད་ལ་འཐད་པ་ཞིག་སྦྱོང་འདོད་ཡོད་པའམ། ཡང་ན་ང་ཚོས་ཁ་ཡོད་ལག་ཡོད་རང་གི་མི་ཚེའི་ནང་དངོས་སུ་ལག་བསྟར་ཐུབ་པ་ཞིག་སྦྱོང་འདོད་ཡོད་པ་རེད་དམ། དམིགས་ཡུལ་གང་རེད་དམ། དམིགས་ཡུལ་དེ་མི་ཚེ་ཏོག་ཙམ་ལས་སླ་རུ་གཏོང་རྒྱུ་དེ་རེད་དམ། ང་ཚོར་ཡོད་པའི་དཀའ་ངལ་འགའ་ཞིག་ལས་ཐར་བ་དེ་རེད་དམ། ཡང་མིན་ན་དེའི་སྒང་ལ་གཞན་ལ་དཀའ་ངལ་ཉུང་བ་སྤྲོད་ཐུབ་པ་བྱ་རྒྱུ་དེ་རེད་དམ། གཞན་ལ་ཕན་ཐོགས་གང་ཆེ་བསྒྲུབ་ཐུབ་པ་བྱ་རྒྱུ་དེ་རེད་དམ། གཅིག་བྱས་ན་དེ་ནི་དེ་དག་ཁ་ཤས་འདུས་པ་ལས་གྲུབ་པ་ཞིག་ཡིན་སྲིད།

ང་ཚོས་སྐྱེ་བ་ཕྱི་མར་མུ་མཐུད་དེ་ཆོས་ལ་སློབ་གཉེར་དང་ཉམས་ལེན་བྱེད་པའི་གོ་སྐབས་མང་བ་ཡོད་པའི་བདེ་འགྲོའི་སྐྱེ་བ་ལེན་པར་བྱེད་པའི་གོམས་གཤིས་སྐྲུན་ཕྱིར། མུ་མཐུད་རྒྱལ་སྲས་ཞི་བ་ལྷའི་སྤྱོད་འཇུག་སྦྱོང་འདོད་ཡོད་པ་རེད་དམ། དེའི་སྒང་ལ་ང་ཚོས་དབང་མེད་ཀྱིས་ཡང་ནས་ཡང་དུ་འབྱུང་བའི་སྐྱེ་བ་སྣ་ཚོགས་པ་ལས་ཐར་ཐུབ་པའི་ཆེད་འདི་བྱེད་ཀྱིན་ཡོད་དམ། ཡང་ན་དེ་ལས་བརྒལ་ཏེ། སེམས་ཅན་གཞན་རྣམས་དབང་མེད་ཀྱིས་ཡང་ནས་ཡང་དུ་འབྱུང་བའི་སྐྱེ་བ་ལས་ཐར་བར་ཕན་ཐོགས་ཐུབ་པའི་ཆེད་ང་ཚོས་བྱང་ཆུབ་སེམས་དཔའི་སྤྱོད་འཇུག་འདི་སྦྱོང་འདོད་ཡོད་པ་ཡིན་ནམ། ཐ་ན་དེ་ནི་ཀུན་སློང་མཐའ་དེ་གསུམ་མིན་ནའང་། མ་མཐར་ཡང་མི་ཚེའི་ནང་ཁ་ཕྱོགས་དེར་འགྲོ་བའི་དམིགས་ཡུལ་ཞིག་སྐྱེད་ཐབས་བྱེད་ཀྱི་ཡོད་དམ།

ང་ཚོས་སོ་སོའི་ནང་དུ་སྒོམ་འགོ་མ་ཚུགས་གོང་དང་རྒྱལ་སྲས་ཆེན་པོ་ཞི་བ་ལྷའི་སྤྱོད་འཇུག་ལ་སློབ་གཉེར་མ་བྱས་གོང་ཁ་ནང་ལྟས་ཀྱི་དཔྱད་པའི་ཐབས་ཚུལ་གྱི་རིམ་པ་གཅིག་པའི་རྗེས་སུ་འབྲང་གི་ཡོད། གལ་ཏེ་ང་ཚོས་སོ་སོའི་དམིགས་ཡུལ་ལམ་ཀུན་སློང་དེ་ཧ་ཅང་བཟང་པོ་མེད་པ་ཤེས་ན། དཔེར་ན། གོམས་གཤིས་དང་ནག་ཉེས་ལ་བརྟེན་ནས་སྒོམ་རྒྱག་པ་ལྟ་བུ་དང་། གལ་ཏེ་ང་ཚོས་དེ་ཟུར་དུ་བསྐྱུར་དགོས་ན། ཀུན་སློང་དེ་དགེ་བའི་ཕྱོགས་སུ་བཅོས་དགོས། གལ་ཏེ་ང་ཚོར་སྔོན་ཚུད་ནས་དགེ་བའི་ཀུན་སློང་ཡོད་ན། དེ་སླར་ཡང་ངེས་བརྟན་བཟོ་དགོས། ཐབས་ཚུལ་གྱི་རིམ་པ་འདིའི་རྗེས་སུ་འབྲང་རྒྱུ་ནི་ཧ་ཅང་གལ་འགངས་ཆེ། གང་ཡིན་ཞེ་ན། ཆོས་ཉན་དུ་ཡོང་རྒྱུ་དང་སྒོམ་རྒྱག་རྒྱུ་དེ་བསམ་མེད་ཀྱི་འཕྲུལ་ཆས་ནང་བཞིན་བྱ་རྒྱུ་ལས་སླ་པོ་ཡོད་པ་དང་། དེ་ལས་ང་ཚོར་བློ་སྐྱེད་དང་ལེགས་ཆ་ཉུང་ངུ་ལས་རག་གི་མེད།

དའི་རྗེས་ལ་ང་ཚོས་སྐྱབས་སུ་འགྲོ་དགོས་པ་དང་བྱང་ཆུབ་ཀྱི་སེམས་སྐྱེད་དགོས། འདིའི་དོན་ནི་ང་ཚོས་སོ་སོའི་དམིགས་ཡུལ་དང་འདུན་པ་ལ་སླར་ཡང་ངེས་བརྟན་བཟོས་ནས་མི་ཚེའི་ནང་ཉེན་མེད་དང་དགེ་བའི་ཁ་ཕྱོགས་བཟང་པོ་ཞིག་ལ་འགྲོ་བ་སྟེ། དེ་ནི་ངས་ངའི་སྐྱབས་འགྲོ་ཞེས་པ་དེ་ཨིན་སྐད་ནང་ཇི་ལྟར་བསྒྱུར་བའི་ཚུལ་དེ་ཡིན། ང་ཚོས་དཀའ་ངལ་ལས་གཡོལ་ཕྱིར་དང་སྡུག་བསྔལ་སྤོང་བའི་ཕྱིར་ཉེན་མེད་ཀྱི་ཁ་ཕྱོགས་ཤིག་ལ་འགྲོ་དགོས་ཞེས་བསམ་བློ་གཏོང་ཐབས་བྱེད་པ་དང་། དཀའ་ངལ་དེ་དག་རང་ཉིད་ལ་དགོས་འདོད་མེད། ང་རང་གནས་སྟངས་དཀའ་ཚེགས་ཅན་གྱི་ནང་མུ་མཐུད་དེ་འགྲོ་རྒྱུ་དངངས་སྐྲག་སྐྱེ་གི་འདུག །སྡུག་བསྔལ་སྤོང་བར་དགེ་བའི་ཁ་ཕྱོགས་བཟང་པོ་དེས་གང་སྟོན་གྱི་ཡོད་དམ། རྨོངས་པ་དང་ཡོངས་སུ་བྲལ་བའི་སེམས་ཀྱི་གནས་བབས་ཤིག་དང་དེ་ཡང་དགེ་བའི་ཡོན་ཏན་ཀུན་གྱིས་ཁེངས་པ་སྟོན་གྱི་ཡོད། དེ་ལྟ་བུའི་དག་སྦྱོང་དང་སྐྱེད་འཕེལ་གྱི་གནས་བབས་ཤིག་ནི་ཆོས་ཡིན། དེ་ལྟའི་གནས་བབས་ཡོངས་སུ་རྫོགས་པ་ཐོབ་ནས་ཁ་ཕྱོགས་སྟོན་མཁན་ནི་སངས་རྒྱས་ཡིན། དེ་ལྟའི་གནས་བབས་གང་འཚམས་ཤིག་ཐོབ་པ་རྣམས་ཀྱིས་ཀྱང་ཁ་ཕྱོགས་འདི་སྟོན་གྱི་ཡོད། དེ་དག་ནི་དགེ་འདུན་ཡིན། ངའི་མི་ཚེའི་ནང་ལག་བསྟར་བྱ་རྒྱུ་ཡིན་པའི་ཁ་ཕྱོགས་ནི་དེ་ཡིན་པ་རེད། སྐྱབས་སུ་འགྲོ་བ་ཞེས་པའི་དོན་ནི་མི་ཚེའི་ནང་ཁ་ཕྱོགས་འདི་སླར་ཡང་ངེས་བརྟན་བཟོ་བ་དེ་རེད།

དེར་མ་ཟད་། སོ་སོ་རང་ཉིད་ཁོ་ནའི་དོན་ཙམ་མིན་པར་གཞན་དོན་གང་ཐུབ་ཅི་ཐུབ་བསྒྲུབ་ཕྱིར། ངས་ཉེན་མེད་ཀྱི་ཁ་ཕྱོགས་བཟང་པོའམ་སྐྱབས་སུ་འགྲོ་གི་ཡོད། དམིགས་ཡུལ་འདི་བསྒྲུབ་པར། ངས་སངས་རྒྱས་ཀྱི་གོ་འཕང་རིན་པོ་ཆེ་མ་འཐོབ་ཀྱི་བར་དུ་ཁ་ཕྱོགས་འདི་བརྒྱུད་དེ་འགྲུལ་བཞུད་བྱེད་དགོས་ཤིང་། བློས་གཏོང་བྱ་རྒྱུ་མེད་ལ། ལམ་གྱི་ཆ་ཤས་ཙམ་གྱི་བར་དུ་ཕྱིན་ནས་འདོད་བློ་ཁེངས་ནས་སྡོད་མི་ཉན། སྐྱབས་འགྲོ་དང་བྱང་ཆུབ་ཀྱི་སེམས་ངེས་བརྟན་བཟོ་བའི་སྐབས། ང་ཚོས་དེ་འདྲ་ཞིག་བྱེད་དགོས་ཀྱི་ཡོད།

ཉེན་མེད་ཀྱི་ཁ་ཕྱོགས་དེར་གཞན་དོན་གང་ཐུབ་ཅི་ཐུབ་བསྒྲུབ་ཕྱིར་མུ་མཐུད་མཐར་འཁྱོལ་བར་འགྲོ་བའི་བློའི་ཁྱེར་སོའམ་སེམས་ཀྱི་གནས་བབས་དེ་ང་ཚོས་ཚོར་བའི་སྐབས། ཕྱག་འཚལ་དགོས། གལ་ཏེ་ང་ཚོ་མར་བསྡད་ཚར་བ་དང་ཡར་ལངས་ནས་ལུས་ཀྱི་སྒོ་ནས་ཕྱག་འཚལ་གྱི་མིན་ཞེས་ཐག་བཅད་ན། ང་ཚོས་ཕྱག་འཚལ་བ་དེ་སེམས་ནང་འཆར་བ་ཙམ་བྱེད་སྲིད། དེའི་གོ་དོན་ཞིག་ནི་ཕྱག་འཚལ་བ་ནི་ང་ཚོ་ཉེན་མེད་ཀྱི་ཁ་ཕྱོགས་དེའི་ནང་འཕེན་པ་ལྟ་བུ་དང་། དེ་ལྟར་གུས་ཞབས་དང་ལྡན་པའི་སྒོ་ནས་བྱེད་ཀྱིན་ཡོད། ཁ་ཕྱོགས་དེའི་ནང་ཕྱིན་ཟིན་པ་རྣམས་ལ་གུས་ཞབས་དང་། སོ་སོ་རང་ཉིད་ལ་གུས་ཞབས། སོ་སོས་དེ་ལྟར་བྱེད་ཐུབ་པའི་འཇོན་ཐང་ལ་གུས་ཞབས་བྱེད་པ་ཞིག་ཡིན། བྱས་ཙང་། ཕྱག་འཚལ་བ་ནི་རང་གིས་རང་ལ་མིང་ཆད་བཟོ་བའི་ལས་ཤིག་མིན་ལ་རང་གིས་རང་དམའ་རུ་གཏོང་བ་ཞིག་མིན་པར། དེ་ནི་རང་གིས་རང་ལ་དབུ་འཕང་དགུང་དུ་འདེགས་པ་ཞིག་ཡིན།

དེ་ནི་ཡན་ལག་བདུན་གྱི་དང་པོ་དེ་ཡིན། དེ་ཡང་སྐྱབས་སུ་འགྲོ་བ་དང་བྱང་ཆུབ་ཀྱི་སེམས་སྐྱེད་པའི་སྒོ་ནས་ཕྱག་འཚལ་བ་དེ་ཡིན། གལ་ཏེ་ང་ཚོས་འཛིན་གྲྭའི་ནང་ཉམས་ལེན་བྱེད་ཀྱིན་ཡོད་ན། ང་ཚོས་དེའི་མཚམས་སུ་མར་སྡོད་དགོས།

དེ་ནས་མཆོད་པ་འབུལ་རྒྱུ་དེ་རེད། སྐབས་འདིར་མཆོད་པ་འབུལ་བའི་སྐབས། སེམས་ཀྱི་གནས་བབས་གཙོ་བོ་སྐྱེད་དགོས་པ་ནི། ང་རང་ཁ་ཕྱོགས་འདིར་འགྲོ་གི་ཡོད། ང་རང་ཁ་ཕྱོགས་དེའི་ནང་ཡོངས་སུ་འཕེན་པ་ཙམ་མིན་པར། དམིགས་ཡུལ་དེ་འགྲུབ་པར། ངས་རང་ཉིད་ཀྱི་འཚོ་བ་སྐྱེལ་སྟངས་དང་། དུས་ཚོད། ནུས་པ་བཅས་འབུལ་རྒྱུའི་འདོད་འདུན་ཡོད། ངས་ཁ་ཕྱོགས་འདིའི་ནང་ཕྱིན་ནས་གཞན་ལ་ཕན་ཐོགས་སྔར་ལས་ལྷག་པ་ཞིག་བསྒྲུབ་པའི་ཆེད་སེམས་ཡོངས་སུ་རྫོགས་པ་དེའི་ནང་གཏོད་རྒྱུའི་འདོད་འདུན་ཡོད། སེམས་ཀྱི་གནས་བབས་དེ་འདྲ་ཞིག་གི་ནང་ང་ཚོས་མཆོད་པ་འབུལ་དགོས།

ང་ཚོས་ནམ་རྒྱུན་དེ་ནི་དམིགས་རྣམ་སྒོམ་པ་དང་བཅས་བྱེད་སྲོལ་ཡོད་ནའང་། གལ་ཏེ་ང་ཚོས་སོ་སོའི་སྒོམ་རྒྱག་སའི་ཁང་པའི་ནང་ཉམས་ལེན་བྱེད་ཀྱིན་ཡོད་ན། ང་ཚོས་ལུས་ཀྱི་སྒོ་ནས་མཆོད་པ་འབུལ་ན་ཆོག །ཕྱག་འཚལ་བའི་རྗེས་ཀྱི་མར་མ་བསྡད་པའི་གོང་དུ་ང་ཚོས་མཆོད་གཤོམ་མདུན་དུ་ཕྱིན་ཏེ། ང་ཚོའི་ལག་གཡོན་མའི་མཛུབ་མོ་བཞི་པ་དེ་ཆུས་བཀང་པའི་ཕོར་པའི་ནང་ཡུད་ཙམ་སྣུབ་པ་དང་། ཐིགས་པ་འགའ་ཞིག་མཛུབ་མོས་ཐེངས་གསུམ་གཡུགས་ནས་མཆོད་པ་འབུལ་བའི་རྟགས་མཚོན་པར་བྱེད་དགོས། དེའི་དོན་ནི་ང་ཚོས་སངས་རྒྱས་ཐམས་ཅད་ལ་མཆོད་པ་ཞིག་འབུལ་གྱི་ཡོད། ཡིན་ནའང་དེ་ནི་སངས་རྒྱས་རྣམས་ཀྱིས་ང་ཚོར་བསྐྱབ་ཀྱི་རེད་བསམས་ནས་རྔན་པའམ་ལེགས་སྐྱེས་ཤིག་འབུལ་བའི་ཀུན་སློང་མ་ཡིན་པ་དང་། གལ་ཏེ་ང་ཚོས་གང་ཡང་མ་ཕུལ་ན། སངས་རྒྱས་དེ་དག་གི་ང་ཚོར་སྣང་མེད་ཐོག་གཟིགས་རྟོག་གནང་གི་མ་རེད་བསམ་པ་དེ་འདྲ་མ་རེད། དེ་ལས་ལྡོག་སྟེ། ང་ཚོས་སྐྱབས་སུ་འགྲོ་བའི་ཡུལ་ལམ་དང་དུ་ལེན་པའི་མི་ཚེའི་ནང་གི་ཁ་ཕྱོགས་དེར་རང་ཉིད་ལ་གང་ཡོད་པ་ཐམས་ཅད་མཆོད་པ་འབུལ་གྱི་ཡོད། ང་ཚོ་དེ་ལྟར་སེམས་བདེ་བའི་གནས་བབས་ཤིག་གི་ནང་བྱེད་དགོས་ཤིང་། རང་ཉིད་ཀྱིས་མཆོད་པ་འབུལ་ཐུབ་པ་དེ་ལ་དགའ་བ་བསྒོམ་དགོས།

གལ་ཏེ་སོ་སོར་འདོད་པ་ཡོད་ན། ང་ཚོས་མཆོད་པ་རྒྱས་པོ་དེ་འདྲ་ཡང་འབུལ་ཆོག །དེ་ཡང་རྒྱལ་སྲས་ཆེན་པོ་ཞི་བ་ལྷའི་སྤྱོད་འཇུག་ནང་གསུངས་པ་ནང་བཞིན་འབུལ་ཆོག །ཡིན་ནའང་ང་ཚོའི་སེམས་ནང་མཆོད་པའི་དངོས་རྫས་ཡིད་དུ་འོང་བ་ཚང་མ་བསམ་བློ་འཁོར་ཆོག་ནའང་། ང་ཚོས་འབུལ་བའི་དངོས་རྫས་ཀྱི་ཐོ་གྲངས་རིང་པོ་ཞིག་དགོས་པའི་ངེས་པ་མེད། གལ་ཆེ་ཤོས་ནི་མཆོད་པ་གང་འབུལ་བཞིན་པ་དེ་སོ་སོའི་ངོས་ནས་ཀུན་སློང་བཟང་པོས་འབུལ་གྱི་ཡོད་པ་ཚོར་རྒྱུ་དེ་རེད། འདི་ནི་སྔོན་འགྲོའི་ཉམས་ལེན་གྱི་མཆོད་པའི་ཡན་ལག་གཉིས་པ་རེད།  གལ་ཏེ་ང་ཚོས་འདི་མཆོད་གཤོམ་མདུན་དུ་བསྒྲུབས་ཡོད་ན། དེ་ནས་ང་ཚོས་སོ་སོའི་གདན་སྟེང་དུ་སྡོད་དགོས།

ཡན་ལག་གསུམ་པ་ནི། སོ་སོའི་ཞན་ཆ་དང་། དཀའ་ངལ། སྡུག་བསྔལ་སོགས་སྐྱོན་གྱི་ཆ་རྣམས་དྲང་པོ་དྲང་གཞག་ངོས་ལེན་བྱེད་པ་དེ་རེད། རང་ལ་ཡོད་པའི་སྐྱོན་གྱི་ཆ་དེ་དག་གིས་གཞན་ལ་ཕན་ཐོགས་ཡག་ཤོས་བསྒྲུབ་པར་འགོག་རྐྱེན་བྱེད་ཀྱི་ཡོད་པས། དེ་དག་ཡོད་པར་ང་ཚོ་འགྱོད་པ་སྐྱེ་གི་ཡོད། ང་ཚོས་སོ་སོའི་སྐྱོན་གྱི་ཆ་ཚང་མ་དང་འབྲལ་འདོད་ཡོད་པ་དང་ནོར་འཁྲུལ་ཡང་བསྐྱར་མི་བྱེད་པའི་ཆོད་སེམས་འཇོག་གི་ཡོད། ང་ཚོས་སོ་སོའི་མི་ཚེའི་ནང་དང་དུ་ལེན་ཐབས་བྱེད་པའི་ཉེན་མེད་ཀྱི་ཁ་ཕྱོགས་བཟང་པོ་སླར་ཡང་ངེས་བརྟན་བཟོ་དགོས། དེ་ཡང་གཞན་དོན་རླབས་ཆེ་བ་བསྒྲུབ་ཐུབ་པའི་ཆེད་དུ་ཡིན། དེ་ནས་མཐར་ང་ཚོས་རྒྱལ་སྲས་ཆེན་པོ་ཞི་བ་ལྷའི་སྤྱོད་འཇུག་ལ་སློབ་གཉེར་བྱེད་པ་དང་སྒོམ་རྒྱག་པ་རྣམས་ནི་ང་ཚོའི་སྐྱོན་གྱི་ཆ་ལ་ཁ་གཏད་དུ་འགྲོ་བའི་དགེ་བའི་ལས་ཡིན་པ་རང་གིས་རང་ལ་དྲན་གསོ་བྱེད་དགོས། ཡན་ལག་གསུམ་པ་འདི་ཧ་ཅང་གལ་ཆེན་པོ་ཡིན། གང་ཡིན་ཞེ་ན། ང་ཚོར་དཀའ་ངལ་ཡོད་པ་ངོས་ལེན་བྱེད་པ་དང་། འདིར་ཡོད་པའི་ང་ཚོའི་དམིགས་ཡུལ་དང་རྒྱུ་མཚན་ལ་སླར་ཡང་ངེས་བརྟན་བཟོ་གི་ཡོད། ང་ཚོར་སྦྱོང་འདོད་ཡོད་པ་དང་དེ་དག་ལས་ཐར་བར་བྱེད་པའི་ཐབས་ལམ་རྣམས་ཉམས་ལེན་བྱེད་འདོད་ཡོད།

ཡན་ལག་བཞི་པ་ནི་རྗེས་སུ་ཡི་རངས་རེད། དེས་ང་ཚོའི་དཀའ་ངལ་དང་ནོར་འཁྲུལ་རྣམས་ངོས་ལེན་བྱེད་པ་ལ་བརྟེན་ནས་འབྱུང་སྲིད་པའི་རང་མཐོང་ཆུང་བའི་ཚོར་བ་གང་འདྲ་ཞིག་ཡིན་ནའང་དེ་ལ་ཁ་གཏད་གཅོག་པར་ཕན་གྱི་ཡོད། ང་ཚོས་སྐྱོན་གྱི་ཆ་ལ་ཤེས་རྒྱུ་དང་ཡོན་ཏན་གྱི་ཆ་ལ་སླར་ཡང་ངེས་བརྟན་བཟོ་རྒྱུ་གཉིས་ཆ་སྙོམ་པོ་བཟོ་དགོས། ང་ཚོ་ཚང་མར་བཟང་པོའི་ཁྱད་ཆོས་དང་ལྡན་ཞིང་། རང་གིས་བྱས་པའི་དགེ་བའི་ལས་དེ་འདྲ་ཡོད། དཔེར་ན། ང་ཚོས་སོ་སོས་ཕན་ཐོགས་ཅན་ཞིག་དང་བཟོད་སྒོམ་ཅན་བྱེད་ཐབས་བྱས་པའམ། ཡང་ན་ཤེས་ཐབས་བྱས་པ་སོགས་གང་ཡིན་ནའང་ང་ཚོས་ཤེས་སྲིད། ང་ཚོས་དེ་དྲན་གསོ་བྱས་ཏེ་ཡི་རངས་བྱེད་དགོས། ད་དུང་སོ་སོའི་རྒྱུད་ལ་ཡོད་པའི་སངས་རྒྱས་ཀྱི་རིགས་ལ་རྗེས་སུ་ཡི་རངས་བྱེད་དགོས་ཏེ། ང་ཚོར་མུ་མཐུད་ཡར་རྒྱས་གཏོང་ཐུབ་པའི་ནུས་པ་དང་འཇོན་ཐང་ཡོད། ང་ཚོར་བྱ་བའི་རྟེན་གཞི་ཞིག་ཡོད་པ་དང་རེ་བ་ཡོད་པ་རེད། གཞན་གྱི་བཟང་པོའི་ཡོན་ཏན་གྱི་དཔེ་མཚོན་རྣམས་དང་དགེ་བའི་ལས་ལ་བལྟས་ནས་ཕྲག་དོག་མེད་པའི་སྒོ་ནས་རྗེས་སུ་ཡི་རངས་བྱེད་དགོས། མི་གཞན་དག་མང་པོ་ཞིག་ཧ་ཅང་བཟང་པོ་དང་ཕན་ཐོགས་པོ་ཡོད་པ་དེ་དཔེ་མི་སྲིད་པའི་ཡག་པོ་རེད། དམིགས་བསལ་བླ་མའམ་དགེ་བའི་བཤེས་གཉེན་རྣམས་ལྟ་བུ་རེད། དེ་ཡང་ད་ལྟ་འཚོ་བཞུགས་ཀྱི་དགེ་བའི་བཤེས་གཉེན་ཙམ་ལ་གོ་བ་མ་ཡིན་པར། སངས་རྒྱས་དང་རྒྱལ་སྲས་ཆེན་པོ་ཞི་བ་ལྷ་སོགས་ལའང་གོ་བ་ཡིན། རྒྱལ་སྲས་ཞི་བ་ལྷས་དོན་ངོ་མར་ཕྱག་དཔེ་འདི་མཛད་པ་དེ་ངོ་མཚར་བའི་གནས་ཤིག་ཡིན་པར་བསམ་དགོས། ངས་དེ་ལ་རྗེས་སུ་ཡི་རངས་བྱེད་ཀྱི་ཡིན། རྒྱལ་སྲས་ཞི་བ་ལྷ་ཁྱེད་ལ་བཀའ་དྲིན་ཆེ་ཞུ་ཞེས་དེ་ལྟ་བུ་ནི་སེམས་ཀྱི་གནས་བབས་གལ་ཆེན་ཞིག་ཡིན།

བླ་མའམ་དགེ་བའི་བཤེས་གཉེན་རྣམས་ཀྱི་ཡོན་ཏན་དང་རྒྱལ་སྲས་ཞི་བ་ལྷས་ཕྱག་དཔེ་འདི་མཛད་པར་རྗེས་སུ་ཡི་རངས་བྱས་པའི་རྗེས་སུ་ང་ཚོ་ཡན་ལག་ལྔ་པར་གྲ་སྒྲིག་ཡོད་པ་རེད། དེ་ནི་ཆོས་གསུང་བར་བསྐུལ་བའམ་ཆོས་ཀྱི་འཁོར་ལོ་བསྐོར་བར་བསྐུལ་བ་དེ་རེད། ང་ཚོས་རྒྱལ་སྲས་ཞི་བ་ལྷས་འདི་མཛད་པ་ནི་ཧང་སངས་དགོས་པ་ཞིག་རེད་བསམ་དགོས་པ་དང་། ཕྱག་དཔེ་འདི་ལས་གཅིག་བསླབ་རོགས་གནང་དང་། ང་རང་སྦྱོང་འདོད་འདུག །འབོད་བསྐུལ་འདིས་ང་ཚོས་དཔེ་ཆ་ནས་གཅིག་ཀློག་པ་དང་ཐོས་པར་བྱས་ནས་དམིགས་བསལ་ཁོ་ནར་བསམ་བློ་གཏོང་བའི་ཀུན་སློང་ལ་ཁ་གཏད་བྱེད་ཀྱི་ཡོད། དཔེར་ན། ཧཱིཊ་ལར་གྱི་དྲག་བཙུབ་ལྟ་བུར་བཟོད་པའི་ཆོས་དེ་དག་ཇི་ལྟར་གོ་ཆོད་པ་ཞིག་ཡོང་སྲིད་དམ་ཞེས་པ་ལྟ་བུ་རེད། ཆོས་ཡང་དག་པ་དང་ཚད་ལྡན་ཞིག་ཡིན་མིན་བརྟག་རྒྱུ་དེ་གལ་ཆེ་ནའང་། ཐོག་མར་ང་ཚོས་སོ་སོའི་ཉིན་རེའི་མི་ཚེའི་ནང་ཆོས་ཇི་ལྟར་ལག་བསྟར་བྱེད་ངེས་ཡིན་པའི་ཐད་ལ་བསམ་བློ་གཏོང་དགོས། དེ་དག་གིས་ལས་ཀ་ཇི་ལྟར་བྱེད་ངེས་པའི་ཐད་ང་ཚོས་ཧ་གོ་བ་དང་ཡི་རངས་བྱེད་པའི་ཚེ་ན། དེ་ནས་ང་ཚོས་དམིགས་བསལ་དེ་འདྲ་ཡོད་མེད་བསམ་བློ་གཏོང་ཆོག །དེའི་རྗེས་སུ་ང་ཚོས་གཞི་ནས་ཐལ་དྲགས་པའི་དཔེ་མཚོན་ཧིཊ་ལར་ལྟ་བུའི་སྐབས་བཟོད་པའི་སྐོར་གྱི་ཆོས་དེ་ལག་བསྟར་རྩ་ནས་བྱེད་ཀྱི་མེད་པའམ། ཡང་ན་གནས་སྟངས་དེ་འདྲ་སྐབས་སུ་བཟོད་པའི་ཆོས་དེ་ཚད་མཐོ་བའི་ལམ་གྱི་རིམ་པ་ཁོ་ནར་ལག་བསྟར་བྱེད་ཆོག་པ་སོགས་གང་ཡིན་བརྟག་དཔྱད་བྱེད་ཆོག །ཆོས་གསར་པ་ཞིག་ཐོས་པའི་སྐབས། དེ་མ་ཐག་ལམ་སེང་“འོན་ཀྱང་”ཟེར་བའི་ཡ་ལན་དེ་གཅིག་སྦྱོང་འདོད་དང་ཤེས་འདོད་ཡོད་པའི་གུ་ཡངས་ཀྱི་བསམ་ཕྱོགས་དང་མཉམ་དུ་འབྱུང་གི་ཡོད། དེར་བརྟེན་གཞུང་ངམ་ཕྱག་དཔེ་ལ་འཇུག་པར་“ང་ལ་གཅིག་བསླབ་དང་”ཞེས་པའི་བསམ་ཕྱོགས་ཤིག་ཡོད་དགོས་པ་གདན་འགག་ཆེ། བློའི་ཁྱེར་སོ་དེ་ལྟ་བུ་ལ་བརྟེན་ནས་ང་ཚོས་ཐོག་མར་གང་ཀློག་པ་དང་ཐོས་པ་དེ་ཇི་ལྟར་ལག་བསྟར་བྱེད་ཐུབ་མིན་ལྟ་ཐབས་བྱེད་དགོས། ང་ཚོས་རྒྱལ་སྲས་ཞི་བ་ལྷའི་ཕྱག་དཔེའི་ནང་གི་གནད་དོན་ཚང་མ་ཁ་ཡོད་ལག་ཡོད་དང་། རང་སོ་སོའི་ནང་དུ་དང་། ལས་ཁུངས། ནང་མི་དང་གྲོགས་པོའི་ཁྲོད་དུ་སོགས་སྒེར་སོ་སོའི་ཉམས་སུ་ལེན་ཆོག་པ་ང་ཚོས་ཤེས་ཀྱི་རེད།

གལ་ཏེ་ང་ཚོས་སྒོམ་ཐུན་ཞིག་གི་སྔོན་དུ་ཡན་ལག་བདུན་པའི་སྔོན་འགྲོ་ཉམས་ལེན་བྱེད་ཀྱི་ཡོད་ན། ང་ཚོས་རང་གི་དགེ་བའི་བཤེས་གཉེན་དང་དཔེ་ཆ་ཁག་ལ་ད་དུང་གང་མང་བསླབ་རོགས་ཞེས་འབོད་བསྐུལ་ཞུ་དགོས། དེ་ནི་སྒོམ་རྒྱག་པ་བརྒྱུད་རང་ཉིད་ཀྱི་རྟོགས་རིམ་དང་གནས་ཚད་མཐོ་རུ་གཏོང་འདོད་ཡོད་པ་སྟོན་གྱི་ཡོད། ང་ཚོས་ཁོང་ཚོས་གང་བསླབས་པ་ལས་ནང་གི་རྟོགས་པ་དང་། གོ་རྟོགས། ཉམས་རྟོགས་སོགས་ཇེ་མང་འཐོབ་པར་སེམས་སྐུལ་དང་བྱིན་རླབས་གནང་རོགས་ཞེས་འབོད་བསྐུལ་ཞུ་དགོས།

དེ་ནས་ང་ཚོ་ཡན་ལག་དྲུག་པར་གྲ་སྒྲིག་ཡོད་པ་རེད། དེ་ནི་དགེ་བའི་བཤེས་གཉེན་རྣམས་ལ་མྱ་ངན་ལས་མི་འདའ་བར་གསོལ་བ་འདེབས་པ་དེ་རེད། ཁྱེད་རྣམས་ཀྱིས་ཆོས་གསུང་རྒྱུ་ནམ་ཡང་མཚམས་འཇོག་མ་གནང་རོགས། མུ་མཐུད་དེ་ཆོས་གསུང་རོགས་ཞེས་བསམ་དགོས། ང་ཚོས་སོ་སོའི་དགེ་བའི་བཤེས་གཉེན་ལ་ཆགས་ཞེན་ཡོད་ཙང་། དེ་ལྟར་གསོལ་བ་འདེབས་ཀྱི་མེད། དེ་ལས་ལྡོག་སྟེ། སོ་སོའི་ཉམས་ལེན་ལ་དོ་གལ་ཆེན་པོ་དང་ལྷག་བསམ་རྣམ་དག་ཡིན་པར་སླར་ཡང་ངེས་བརྟན་བཟོ་གི་ཡོད། “སེམས་ཅན་ཐམས་ཅད་ལ་ཕན་འདོགས་པའི་ཆེད་ང་རང་སངས་རྒྱས་ཀྱི་གོ་འཕང་མ་འཐོབ་བར་དུ་འབད་བརྩོན་བྱེད་འདོད་འདུག །བྱས་ཙང་། མ་ཕེབས་རོགས་གནང་། ང་རང་ད་དུང་སྦྱོང་དགོས་ཀྱི་འདུག་”ཅེས་བསམ་དགོས། ང་ཚོས་ད་དུང་ཆོས་རང་ལ་མུ་མཐུད་ནས་ང་ལ་བསླབ་རོགས། ཆོས་གསུང་རོགས་ཞེས་རྒྱལ་སྲས་ཞི་བ་ལྷ་དང་ཁོང་གི་ཕྱག་དཔེ་ལའང་དེ་ལྟར་བརྗོད་དགོས། ཆོས་གང་མང་གསུང་རོགས། ཕྱག་དཔེ་དེ་ལ་བརྟེན་ནས་ང་ལ་གོ་རྟོགས་དང་ཡར་རྒྱས་རྒྱུད་ཆད་མེད་པ་འཐོབ་འཇུག་རོགས་ཞེས་གསོལ་བ་བཏབ་ནས། རང་ཉིད་སངས་རྒྱས་ཀྱི་གོ་འཕང་མ་འཐོབ་བར་དང་སེམས་ཅན་གཞན་རྣམས་ཀྱང་སངས་རྒྱས་ཀྱི་གོ་འཕང་མ་འཐོབ་བར་དུ་མཚམས་འཇོག་བྱ་མི་ཉན།

ཡན་ལག་བདུན་པའམ་མཐའ་མ་ནི་དགེ་བ་རྫོགས་བྱང་དུ་བསྔོ་བ་དེ་རེད། ང་ཚོས་གང་སྦྱངས་པ་དང་ཤེས་པ་དེ་སངས་རྒྱས་ཀྱི་གོ་འཕང་འཐོབ་པའི་རྒྱུར་གྱུར་བ་དང་། དེ་ལ་བརྟེན་ནས་སེམས་ཅན་གཞན་ལ་ཕན་ཐོགས་གང་ཐུབ་ཅི་ཐུབ་འགྲུབ་པར་ཤོག་ཅེས་བསམ་དགོས། ངའི་གོ་རྟོགས་དེ་གཏིང་ཟབ་ཏུ་ཟབ་ཏུ་འགྲོ་བར་ཤོག །དེ་ངའི་སེམས་རྒྱུད་དུ་ཐིམས་ནས་བག་ཆགས་གཏིང་ཟབ་ཅིག་འཇོག་པ་དང་། དེ་ཡང་རིམ་པས་ངས་སངས་རྒྱས་ཀྱི་གོ་འཕང་དུ་བགྲོད་པའི་ལམ་ལ་ལག་བསྟར་བྱེད་ཐུབ་པར་ཤོག །ཁྱད་པར་དུ་ངས་གང་སྦྱངས་པ་དེ་ཉིན་རེའི་མི་ཚེའི་ནང་ལག་བསྟར་བྱེད་ཐུབ་པ་དང་། དེ་ལ་བརྟེན་ནས་ངས་གཞན་དང་འབྲེལ་བ་བྱེད་སྐབས་ཁྱད་པར་ཞིག་བཟོ་རྒྱུ་འགོ་བཙུག་པ་དང་། དེ་བཞིན་རིམ་པས་བཞིན་དུ་ངས་ཁོང་ཚོར་བདེ་སྐྱིད་མང་བ་སྐྲུན་ཐུབ་པར་ཤོག་ཅེས་བསྔོ་བ་བྱེད་པའོ།།

གལ་ཏེ་ང་ཚོར་འདོད་པ་ཡོད་ན། རྒྱལ་སྲས་ཞི་བ་ལྷའི་སྤྱོད་འཇུག་ནང་གི་ཡན་ལག་བདུན་པའི་ཚིགས་སུ་བཅད་པ་རྣམས་དང་། དེ་དང་མཉམ་དུ་སྔོན་ལ་ཀུན་སློང་བཅོས་ཕྱིར་ཚིགས་སུ་བཅད་པ་རྣམས་འདོན་དགོས་པ་དང་། དེ་ནས་མཎྜལ་ཕུལ་ཚར་བའི་རྗེས་ཀྱི་ཚིགས་སུ་བཅད་པ་བཅས་འདོན་ན་འགྲིགས།

སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པའི་ཚོགས་རྣམས་ཀྱིས། །འགྲོ་བ་ཕན་ཕྱིར་སངས་རྒྱས་འགྲུབ་པར་ཤོག །

ཐམས་ཅད་དུ་ཡང་ས་གཞི་དག །གསེག་མ་ལ་སོགས་མེད་པ་དང་། །ལག་མཐིལ་ལྟར་མཉམ་བཻཌཱུརྻའི།  རང་བཞིན་འཇམ་པོར་གནས་གྱུར་ཅིག །ལྷ་དང་མི་ཡི་མཆོད་པའི་རྫས། །དངོས་སུ་བཤམས་དང་ཡིད་ཀྱིས་སྤྲུལ། །ཀུན་བཟང་མཆོད་སྤྲིན་བླ་ན་མེད། །ནམ་མཁའི་ཁམས་ཀུན་ཁྱབ་གྱུར་ཅིག །

༡། དུས་གསུམ་གཤེགས་པའི་སངས་རྒྱས་ཀུན། །ཆོས་དང་ཚོགས་ཀྱི་མཆོག་བཅས་ལ། །ཞིང་རྡུལ་ཀུན་གྱི་གྲངས་སྙེད་ཀྱི། །ལུས་བཏུད་པས་ནི་བདག་ཕྱག་འཚལ། །

༢། འཇི་ལྟར་འཇམ་དབྱངས་ལ་སོགས་པས། །རྒྱལ་བ་རྣམས་ལ་མཆོད་མཛད་པ། །དེ་བཞིན་བདག་གིས་དེ་བཞིན་གཤེགས། །མགོན་པོ་སྲས་དང་བཅས་རྣམས་མཆོད། །

༣། ཐོག་མ་མེད་ལྡན་འཁོར་བ་ནས། །ཚེ་རབས་འདིའམ་གཞན་དག་ཏུ། །བདག་གིས་མ་འཚལ་སྡིག་བགྱིས་པའམ། །བགྱིད་དུ་བསྩལ་བ་ཉིད་དང་ནི། །གཏི་མུག་འཁྲུལ་པས་བདག་ནོན་ཏེ། །རྗེས་སུ་ཡི་རང་གང་བགྱིས་པ། །ནོངས་པ་དེ་ནི་མཐོང་བགྱིས་ནས། །བསམ་པ་ཐག་པས་མགོན་ལ་བཤགས། །

༤། སེམས་ཅན་ཐམས་ཅད་བདེ་མཛད་པའི། །ཐུགས་བསྐྱེད་དགེ་བ་རྒྱ་མཚོ་དང་། །སེམས་ཅན་ཕན་པ་མཛད་པ་ལ། །དགའ་བས་རྗེས་སུ་ཡི་རང་ངོ། །

༥། ཕྱོགས་རྣམས་ཀུན་གྱི་སངས་རྒྱས་ལ། །ཐལ་མོ་སྦྱར་ཏེ་གསོལ་བ་ནི། །སེམས་ཅན་སྡུག་བསྔལ་མུན་འཐོམས་ལ། །ཆོས་ཀྱི་སྒྲོན་མེ་སྤར་དུ་གསོལ། །

༦། རྒྱལ་བ་མྱ་ངན་འདའ་བཞེད་ལ། །ཐལ་མོ་སྦྱར་ཏེ་གསོལ་བ་ནི། །འགྲོ་འདི་ལྡོངས་པར་མི་དགོད་ཅིང་། །བསྐལ་པ་གྲངས་མེད་བཞུགས་པར་གསོལ། །

༧། དེ་ལྟར་འདི་དག་ཀུན་བྱས་ཏེ། །དགེ་བ་བདག་གིས་བསགས་པ་གང་། །དེས་ནི་སེམས་ཅན་ཐམས་ཅད་ཀྱི། །སྡུག་བསྔལ་ཐམས་ཅད་བསལ་བར་ཤོག །

ས་གཞི་སྤོས་ཆུ་བྱུགས་ཤིང་མེ་ཏོག་བཀྲམ། །རི་རབ་གླིང་བཞི་ཉི་ཟླའི་བརྒྱན་པ་འདི། །སངས་རྒྱས་ཤིང་དུ་དམིགས་ཏེ་འབུལ་བ་ཡིས། །འགྲོ་ཀུན་རྣམ་དག་ཞིང་དུ་སྤྱོད་པར་ཤོག ཨོཾ་ཨིདཾ་གུ་རུ་རཏྣ་མཎྜལ་ཀཾ་ནིར་ཡཏཡམི། བླ་མ་རིན་པོ་ཆེ་རྣམས་ལ་མཎྜལ་འདི་འབུལ་བར་བགྱིའོ། །

ང་ཚོས་བསྐྱེད་པའི་གོ་ཤེས་ལྡན་པའི་སེམས་ཀྱི་གནས་བབས་ལ་བརྟེན་ནས་ང་ཚོས་འཛིན་གྲྭའམ་ཡང་ན་སྒོམ་ཐུན་རྣམས་ལ་ཕལ་ཆེར་གྲ་སྒྲིག་ཨང་བསར་ཡོད་པ་ལྟ་བུ་རེད། འོན་ཀྱང་ཐོག་མར་རྩེ་གཅིག་པའི་སེམས་ལ་བརྟེན་ནས་ཐོས་པ་དང་། བསམ་པ། སྒོམ་པ་བཅས་ལ་དྲན་ཤེས་ལྡན་པའི་ཐག་གཅོད་བྱ་རྒྱུ་དེ་ཕན་ཐོགས་ཆེ། ང་ཚོས་རང་གི་དོ་སྣང་དེ་གཡེངས་བ་ཡིན་ན། ཚུར་དམིགས་པའི་སྟེང་དུ་འཇོག་དགོས་པ་དང་། གལ་ཏེ་ང་རང་གཉིད་ཤོར་གྲབས་བྱས་ན། ངས་ང་རང་གྲུང་པོ་བཟོ་གི་ཡིན་ཞེས་ཐག་གཅོད་བྱེད་དགོས། ང་ཚོས་དྲན་ཤེས་ལྡན་པའི་སྒོ་ནས་ཐག་གཅོད་དེ་དག་བྱེད་སྐབས། ང་ཚོར་རྩེ་གཅིག་ཏུ་གནས་པའི་གོ་སྐབས་ཡག་ག་ཡོད།

མཐར་ང་ཚོས་སོ་སོའི་རྩེ་གཅིག་པའི་ཏིང་ངེ་འཛིན་དང་ནུས་པ་རྣམས་ལ་ཆ་སྙོམ་ཡག་པོ་ཞིག་བཟོ་དགོས། གལ་ཏེ་ང་ཚོ་ཏོག་ཉོབ་སྣང་དང་གཉིད་ཡུར་བའི་ཚོར་བ་བྱུང་ན། ང་ཚོས་ནུས་པ་གོང་འདེགས་ཐོག་རང་གིས་རང་གྲུང་པོ་བཟོ་དགོས། དེ་ལྟར་བྱེད་པར། དུས་འཁོར་ནས་གདམས་པ་ལྟར། ང་ཚོས་མིག་ཡར་བལྟས་ཏེ་སྨིན་མའི་བར་མཚམས་སུ་དམིགས་པ་གཏད་དགོས་པ་དང་མགོ་བོ་འཁོད་སྙོམ་པོ་གནས་དགོས། གལ་ཏེ་ང་ཚོའི་སེམས་དཀྲོག་རྐྱེན་ཐེབས་པའམ་དངངས་འཚབ་བྱུང་ནས་ང་ཚོའི་སེམས་རྣམ་པར་གཡེངས་ན། དེ་དག་ཞི་འཇམ་བཟོ་བར་ནང་གི་རླུང་གཞི་རྩ་བརྟན་པོ་བཟོ་དགོས། དེའི་ཆེད་དུ་ང་ཚོས་ལྟེ་བའི་ཅུང་ཟད་འོག་སྟེ། རང་གི་ལུས་ཀྱི་དཀྱིལ་མཚམས་དེར་དམིགས་པ་གཏད་དགོས། དེའི་སྐབས་ང་ཚོས་མིག་མར་བལྟས་ནས་མགོ་བོ་འཁོད་སྙོམ་པར་གནས་དགོས། ང་ཚོས་ནམ་རྒྱུན་འཆར་ཅན་ལྟར། དབུགས་ཡར་འཕེན་སྐབས་ཕྱི་རུ་གཏོང་མི་དགོས་པའི་བར་དུ་དབུགས་ནང་དུ་བཀག་ནས་འཇོག་དགོས།

དེ་ལྟར་ང་ཚོས་འཛིན་གྲྭ་དང་། སྒོམ། སྒེར་གྱི་ཆོས་ལ་སློབ་གཉེར་གྱི་སྔོན་འགྲོའི་རིམ་པ་ཆ་ཚང་མཐར་ཕྱིན་པ་ཡིན། རྒྱལ་སྲས་ཞི་བ་ལྷ་ཁོང་ཉིད་ནས་མཆོད་པའི་ཡན་ལག་བདུན་གྱི་ཉམས་ལེན་དགོས་གལ་དང་ཕན་ཡོན་ཐོག་ལ་ནན་བརྗོད་གནང་ཡོད་པ་དང་། ང་རང་མཇལ་མྱོང་ཡོད་པའི་བོད་བརྒྱུད་ནང་བསྟན་གྱི་བླ་མའམ་དགེ་བའི་བཤེས་གཉེན་ཚང་མས་ཀྱང་དེ་དག་ནི་ཉིན་རེའི་ཉམས་ལེན་ལྟ་བུར་ནན་གྱིས་གསུང་གནང་གི་འདུག །ཐ་ན་ཡན་ལག་བདུན་པོ་དེ་དག་རང་ལའང་ཉིན་རེའི་ཉམས་ལེན་ཆ་ཚང་བ་ཞིག་དང་ལྡན་པ་ཡིན། ང་ཚོས་སྔོན་འགྲོ་དེ་དག་རྒྱལ་སྲས་ཞི་བ་ལྷའི་གཞུང་ནང་གི་ཚིགས་སུ་བཅད་པ་རྣམས་ཁ་འདོན་དུ་བྱས་ནས་ཉམས་ལེན་བྱེད་ཆོག་པའམ། ཡང་ན་ཚིགས་སུ་བཅད་མེད་པར་སོ་སོའི་ཚིག་རང་གི་ཐོག་ནས་སམ་ཚོར་བ་ལ་བརྟེན་ནས་ཉམས་ལེན་བྱེད་ཆོག །དོན་དག་གཙོ་བོ་ནི་ཡན་ལག་བདུན་པོ་རེ་རེར་ཚོར་བ་འདྲེན་ནུས་ཤིག་ཡོད་དགོས། ཚོར་བ་འདྲེན་ནུས་ཡོད་པ་དེས་སྒོམ་རྒྱག་པ་དང་སློབ་གཉེར་བྱེད་པར་མཐུན་པའི་སེམས་ཀྱི་གནས་བབས་ཤིག་སྐྲུན་གྱི་ཡོད།

སྔོན་འགྲོའི་ཉམས་ལེན་དེ་དག་གི་རྗེས་སུ་ང་ཚོའི་སྒོམ་ཐུན་གྱི་དངོས་གཞིའི་སྐབས། ང་ཚོས་དབུགས་ལ་དམིགས་པ་གཏད་སྲིད་པ་དང་། ལམ་རིམ་གྱི་བརྗོད་གཞི་ཞིག་གི་ཐོག་དམིགས་པ་གཏད་སྲིད་པ། ཡང་ན་རྒྱལ་སྲས་ཞི་བ་ལྷའི་གཞུང་ནས་ཚིགས་སུ་བཅད་པ་འགའ་ཞིག་ལའང་དམིགས་པ་གཏད་སྲིད། སྔོན་འགྲོའི་རིམ་པ་དེ་དག་གིས་ང་ཚོས་སྒོམ་ཐུན་དངོས་གཞིའི་ཆེད་དུ་གང་གདམ་ཀ་བྱེད་མིན་ལ་མ་ལྟོས་པར། ང་ཚོར་ཡང་དག་པའི་གོ་ཤེས་ཅན་ལྡན་པའི་སེམས་ཀྱི་གནས་བབས་ཤིག་སྐྱེད་པར་བྱེད་ཀྱི་ཡོད། ང་ཚོས་སྔོན་འགྲོའི་རིམ་པ་ཁོ་ན་ཉམས་ལེན་བྱ་རྒྱུའི་གདམ་ཀ་བྱེད་སྲིད། དེ་ག་རང་ཕུལ་དུ་བྱུང་བའི་ཉམས་ལེན་ཡིན། ང་ཚོས་སྔོན་འགྲོའི་དུས་ཚོད་ག་ཚོད་གཏོང་མིན་དེ་མི་འདྲ་བ་ཡོད་པ་དང་། དེ་ནི་སོ་སོར་རག་ལུས་ཡོད། ང་ཚོས་སྔོན་འགྲོ་མགྱོགས་པོ་བྱེད་པའམ་དལ་པོའི་ངང་བྱེད་པ་གང་ཡིན་རུང་། སྔོན་འགྲོ་དེ་ཆོ་ག་སྟོང་པ་ལྟ་བུ་བྱ་རྒྱུ་སྤོང་དགོས། ང་ཚོས་དེ་དག་གི་དོན་དག་སེམས་ནང་བཅང་དགོས་ཤིང་། སྔོན་འགྲོའི་རིམ་པ་རེ་རེ་བཞིན་ལྷག་བསམ་རྣམ་དག་གིས་སེམས་ནང་ཚོར་ཐབས་བྱེད་དགོས།།