සර්කොං රින්පෝෂේගේ මරණය හා පුනරුත්පත්තිය

රින්පෝෂේ හා නැවෑං ටැබෝ ආරාමයෙහි කෙටි වේලාවක් පමණක් රැඳෙමින් ජීප් රථයකින් යුධ හමුදා කඳවුරින් වේගයෙන් පිටවී ආහ. කැෂේන් ඩ්‍රබ්යෙල් හටද ඔවුන් සමගින් සම්බන්ධ වන ලෙස රින්පෝෂේ විසින් දන්වන ලද නමුත්, එම වයෝවෘද්ධ භික්ෂුවගේ පිළිවදන වූයේ තමාගේ චීවර එ් අවස්ථාවේ සෝදා ඇති බවයි. එයට කම් නැති බවත්, සිය අඳනය පිටින් පැමිණෙන ලෙසත් රින්පෝෂේ විසින් දැනුම් දෙන ලදී. වියළීම සඳහා ජීප් රියෙහි වහළයෙහි සිවුර ගැටගසන ලෙස දුන් උපදෙස මහළු භික්ෂුව විසින් පිළිපදින ලදී.

ස්පිටි සානුව තුළට රථය ධාවනය වන විට, රින්පෝෂේ විසින් නැවෑං වෙත පවසන ලද්දේ තමා නිරන්තරයෙන්ම ඔහුට ඕම් මනි පද්මේ හම් නමැති කරුණාවේ මන්ත්‍රය නොකඩවා ජප කරන ලෙස උපදෙස් දුන් නමුත් ඔහු එය කිසි විටෙක හෝ බරපතල සේ නොගත් බවයි. මෙය ඔහුගේ සමුගැනීමේ උපදෙසද විය.

ඉන්පසු ඔවුහූ කී ආරාමයෙහි නැවතුණහ. රින්පෝෂේ හට පූජාවන් සිදු කිරීමට අවශ්‍ය විය. දැන් රෑ බෝවී ඇති බැවින් එය පසුදා උදෑසන කළ හැකි බව නැවෑං විසින් ප්‍රකාශ කළද රින්පෝෂේ විසින් එ් අවස්ථාවේදීම එම කාර්යය සිදුකළ යුතු බවට අවධාරණය කරන ලදී. බොහෝ විට රින්පෝෂේගේ පාගමන යම් දුෂ්කරතාවයක් සහිතව කළ මන්දගාමී එකක් විය. මෙම අවස්ථාවේදී, කෙසේ වුවද, රින්පෝෂේගේ ගමන දිව යාමකට සමාන විය. නිදසුනක් ලෙස, වරෙක ගුවන් තොටුපළේදී,  අප යම් ගුවන් යානයක් සඳහා යාමට ප්‍රමාද වූ අවස්ථාවේදී, රින්පෝෂේ කෙතරම් වේගයෙන් දිව ගියේද යත් අප කිසිවෙකුට හෝ ඔහු හා සමාන්තර වීමට නොහැකි විය. එ් සමානවම වරෙක බුද්ධගයාවේදී, දලයි ලාමා වහන්සේ විසින් බුදුරජාණන් වහන්සේගේ වචනවල වෙළුම් සියයකින් යුත් තිබ්බත පරිවර්තනයට අදාළ සමූහ ගායනයකට සහභාගි වෙමින් සිටි අතරතුර, රින්පෝෂේ දලයි ලාමා වහන්සේට සෘජු ලෙසම පිටු පසින් හිඳගත් අතර, මම ඔහුට පිටුපසින් හිඳ ගතිමි. දලයි ලාමා වහන්සේගේ අතවූ පිටු බුරුල්ව තිබූ පොතෙන් පිටුවක් සුළඟට ගසාගෙන ගිය අවස්ථාවේදී, එය ක්ෂණිකව බිමින් අහුලාගනු පිණිස රින්පෝෂේ කෙතරම් වේගයෙන් දිව ගියේද යත් එය ඉගිල යාමකට සමාන විය. සාමාන්‍යයෙන් ඔහුට නැගී සිටීම සඳහා අන් අයෙකුගේ ආධාරය අවශ්‍ය විය. කී ආරාමයේ මේ අවස්ථාවේදීද රින්පෝෂේ කිසිදු ආධාරකයක් රහිතව වේගයෙන් කඳුකර මාර්ගය දිගේ දිවයන්නට විය.

රින්පෝෂේ විසින් සිය පූජාවන් සිදුකළ පසු, එදින රාත්‍රිය එහි ගතකරන ලෙස කී හිමිවරුන් විසින් ඔහුගෙන් ඉල්ලා සිටින ලදී. තමාට කීබාර් නගරයට එම රාත්‍රියේදීම යාමට අවශ්‍ය බව පවසමින් ඔහු විසින් එම ඉල්ලීම ප්‍රතික්ෂේප කරන ලදී. ඔවුනට ඔහු නැවත දකින්නට අවශ්‍ය වීනම්, ඔවුනටද එහි යාමට සිදුවනු ඇති බවද පවසන ලදී. ඉන්පසු සිදුවීමට යන දෙය පිළිබඳ මෙම උපදෙස් පණිවිඩයද ලබාදෙමින් ඔහු වේගයෙන් පිටවිය.

රින්පෝෂේ හා පිරිස කීබාර් ගමට පැමිණි පසු ඔහු දැන සිටි ගොවියෙකුගේ නිවෙස වෙත ගමන් කරන ලදී. එම පුද්ගලයා එ්වන විටද සිය ගොවිපලේ වූ අතර, කිසිදු අමුත්තෙකු පැමිණෙනු ඇතැයි අපේක්ෂාවක් නොවීය. ඊළඟට සිදුකළ යුතු යම් කටයුත්තක් වෙනුවෙන් ඔහු කාර්ය බහුලව සිටින්නේදැයි රින්පෝෂේ ඔහුගෙන් විමසීය. නැතැයි පැවසූ ගොවියා රින්පෝෂේ හට එහි නැවතීමට ආරාධනා කළේය.

ස්නානය කොට යෝගට් අනුභව කිරීමෙන් අනතුරුව, රින්පෝෂේ සිය මතකයෙන් ෂොංඛපා විසින් රචිත අර්ථ නිරූපණය කළ හැකි හා නියත අර්ථයන් පිළිබඳ අති විශිෂ්ට විග්‍රහ සාර ග්‍රන්ථය ගායනා කරන්නට වූ අතර එ් සඳහා ඔහුට පැය දෙකක් පමණ ගතවිය. එම කාර්යය අවසන් වූ පසු, ඔහු නැවෑං අමතා තමාට අසනීප ස්වභාවයක් දැනෙන බව පැවසීය. රින්පෝ‌ෂේ විසින් ඉන් අනතුරුව - ඔහු සාමාන්‍යයෙන් කිසිදින නොකළ දෙයක් වූ - සිය හිස නැවෑංගේ උරහිස මත තැබීය. පසුව කරුණු විමසා බලන විට ඔහු එය කරන ලද්දේ ආයුබෝවන් කීමක් ලෙස බව වැටහිණි. සිදුවන දෙය බලා සිටීම චොංෂෙයිලා හට නිසැක වශයෙන්ම දරාගැනීම‌ට නොහැකි තරම් දුෂ්කර දෙයක් වනු ඇති බැවින් මේ සියල්ලට පෙර චොංෂෙයිලා සිම්ලා වෙත යවා තිබිණි. ඔහු වයස අවුරුදු හයේ සිට රින්පෝෂේ සමග සිට ඇති අතර රින්පෝෂේ විසින් ඔහු සිය පුතු මෙන් ඇතිදැඩි කර තිබිණි.

තමා වෛද්‍යවරයෙකු හෝ යම් ඖෂධ අවශ්‍ය නම් එ්වා හෝ කැඳවන්නදැයි නැවෑං කළ විමසුමට රින්පෝෂේගේ පිළිතුර වූයේ එසේ කළ යුතු නොවන බවයි. තමාට කළ හැකි අන් යමක් පවත්නේදැයි නැවෑං විමසූ කල, රින්පෝෂේ විසින් ඉල්ලා සිටියේ තමාට වැසිකිලියට යාමට උපකාර කරන ලෙසයි. එ් අනුව නැවෑං විසින් එම උපකාරය කරන ලදී. ඉන්පසු රින්පෝෂේ විසින් සිය සයනය සකස් කරන ලෙස නැවෑං වෙතින් ඉල්ලා සිටින ලදී. ඔහු නිරන්තරයෙන්ම නිදන සාමාන්‍ය කහ වර්ණැති ඇතිරිල්ල වෙනුවට, සුදු පැහැති ඇතිරිල්ලක් එලන ලෙස රින්පෝෂේ විසින් නැවෑං වෙතින් ඉල්ලා සිටින ලදී. තන්ත්‍ර පිළිවෙතට අනුව, කහ වර්ණය යනු යමෙකු හට අන් අයට උපකාර කිරීමේ ඇති හැකියාව වර්ධනය කිරීමේ චාරිත්‍රයන් සඳහා භාවිත කෙරෙන්නක් වන අතර, සුදු වර්ණය යොදා ගනුයේ බාධක සන්සිඳුවීම පිණිසය.

ඉන්පසු රින්පෝෂේගේ කැඳවුමට අනුව නැවෑං හා කැචන් ඩෘබියෙල් ඔහුගේ කාමරයට පිවිසියහ. ඉන්පසු රින්පෝෂේ බුදුරජාණන් වහන්සේ සයනය කරන ඉරියව්වට අනුව සිය දකුණු ඇලයෙන් සැතපෙන්නට විය. සාමාන්‍යයෙන් නින්දට යනවිට ඔහු සිදු කරන්නාක් මෙන් සිය වමත වම් ඇලය මතද, දකුණත මුහුණට පහතින්ද පිහිටුවීම වෙනුවට, අත් තන්ත්‍ර ග්‍රහණ ක්‍රමයට එකිනෙක හරස් අතට පිහිටුවන ලදී. ඉන්පසු ගැඹුරින් හුස්ම ගන්නට වූ ඔහු හුදෙක් පැහැදිලි ලෙසම  "ගනුදෙනු" භාවනා ක්‍රියාවලිය හරහා අභාවප්‍රාප්ත විය. ඔහුගේ වයස අවුරුදු හැට නවයක් වූ අතර, සෞඛ්‍ය තත්ත්වය සර්ව සම්පූර්ණ විය. ඉන් මාස දෙකකට පෙර මවිසින් ඔහු දිල්ලියේදී පූර්ණ වෛද්‍ය පරීක්ෂණයකට සහභාගි කරවන ලදී.

හරියටම එ් අවස්ථාවේදී දලයි ලාමා වහන්සේ ජිනීවා බලා යාම සඳහා ගුවන් ගමනෙහි අතරමග සිටි අතර,  හදිසියේ සිය අදහස වෙනස්කළ සභාපති අරෆත් මහතා විසින් ස්විට්සර්ලන්තය බලා යාම සඳහා වූ සිය ගමන කල් තැබීමට තීරණය කළේය. මේ අනුව ගුවන් තොටුපළේදී ත්‍රස්ත ප්‍රහාරයක් සිදුවීමේ අවදානම වැළකිණි. දලයි ලාමා වහන්සේගේ ජීවිතයට එල්ලවූ තර්ජනය වියැකී ගියද, ගුවන් තොටුපලේ සිට හෝටලය දක්වා එන ගමනේදී දලයි ලාමා වහන්සේගේ රථ පෙළට මඟ වැරදිණි. කෙසේ වුවද, දලයි ලාමා වහන්සේට කිසිදු අනතුරක් සිදු නොවිණි. සර්කොං රින්පෝෂේ විසින් සාර්ථක ලෙස දලයි ලාමා වහන්සේගේ ජීවිතයට බලපෑ බාධකය භාරගෙන එ් වෙනුවට සිය ජීවන ශක්තිය මුදාහැර තිබිණි.

දීම හා ගැනීම හෙවත් ගනුදෙනු යනු අන්‍යයන් වෙතින් ඔවුන්ගේ බාධක තමා වෙතට පිළිගෙන ඔවුන් වෙත සතුට ලබාදීමේ උසස් බෝධිසත්ත්ව ශිල්ප ක්‍රමයකි. රින්පෝෂේ විසින් මෙම පිළිවෙත දේශනා කරන ලද කවර ස්ථානයක වුව, ඔහු ප්‍රකාශ කළේ අපගේ ජීවිත පූජා කිරීමට සිදු වුවද  මෙහිදී අප විසින් අන්‍යයන්ගේ දුක අප වෙත ලබාගැනීමට කැමැත්තෙන් පසුවිය යුතු බවයි. වෙනත් අයෙකුගේ හිසට සිදුවූ අනතුරක් පිළිගෙන එ් වෙනුවෙන් මියගිය, සිය ජන්ම භූමිය පැවති දිස්ත්‍රික්කයේ පුද්ගලයෙකු පිළිබඳ කුනු ලාමා රින්පෝෂේ විසින් දුන් නිදසුනක් ඔහු විසින් නිරන්තරයෙන්ම පවසන ලදී. ඔහුටද මෙය සිදුකිරීමට සිදු වුවහොත් එය නාස්තිදායක දෙයක් වේදැයි අප කළ විමසුමට රින්පෝෂේගේ පිළතුර වූයේ එසේ නොවන බවයි.  ඔහු ප්‍රකාශ කළේ එය ලෝක ප්‍රගමණය උදෙසා සිය ජීවිතය පූජාකළ ගගනගාමියෙකුගේ ජීවිතය මෙන් වනු ඇති බවයි. වීර ගගනගාමියෙකුගේ ආදර්ශය හා කීර්තිය විසින් සැලකිය යුතු විශ්‍රාම වැටුපක් ඔහුගේ පවුලේ සාමාජිකයන් වෙනුවෙන් වෙන්කර දෙනු ඇතිවාක් මෙන්ම, මෙම ලාමාවරයාගේ ජීවිත පූජාව නමැති වීර ආදර්ශය මගින් ජීවතුන් අතර සිටින ඔහුගේ සිසුන් වෙත ආධ්‍යාත්මික පෝෂණයක් ලබාදෙනු ඇත.

පැහැදිලි ආලෝකයක් තුළ දින තුනක් පුරා සර්කොං රින්පෝෂේ මරණ මංචක භාවනාවෙහි නියැළී සිටියේය. සිය පුනරුත්පත්තීන් දිශානතිගත කිරීමේ හැකියාව සහිත අය සාමාන්‍යයෙන් පුනරුත්පත්ති ලාමාවරුන්ගේ පරපුරක් බිහි කිරීමේ හෝ පවත්වාගෙන යාමේ ක්‍රියාවලියක කොටසක් ලෙස මෙම භාවනාවට ප්‍රවේශ වේ. භාවනාව අතරතුර, ඔවුන්ගේ හදවත් උණුසුම්ව පවත්නා අතර, ඔවුන් හුස්ම ගැනීම නවතා ඇති නමුත් සිරුරු නරක් වීම ආරම්භ නොවේ. සාමාන්‍යයෙන්, උසස් ලාමාවරුන් මෙම ස්වභාවයෙන් දින කිහිපයක් ගතකරන අතර, ඉන්පසු ඔවුන්ගේ හිස් කඩා වැටෙන අතර ඔවුන්ගේ විඥානය සිරුරු හැරගොස් ඇතිබව දක්වමින් නාස් පුඩු තුළින් රුධිරය පිටවේ.

සර්කොං රින්පෝෂේ සම්බන්ධයෙන් මෙම ලකුණු පහළ වූ විටදී ආකාශයේ දේදුණු දිදුලන්නට වූ අතර ඔහුගේ ආදාහන කටයුතු සිදු කිරීම සඳහා තෝරාගත් මුඩු කඳුකරය මතින් අසිරිමත් ආලෝකයන් දිස්වන්නට විය. ආදාහන උත්සවය සඳහා භික්ෂූන් වඩම්මවාගනු පිණිස දලයි ලාමා වහන්සේගේ ධර්මශාලාහි වූ නම්යාල් ආරාමය වෙත පණිවිඩ යැවුවද, එම පිරිසට නියමිත වේලාවට එහි පැමිණීමට නොහැකි විය. රින්පෝෂේ‌ගේද අපේක්ෂාව විය හැකිව තිබූ පරිදිම ස්පිටි භික්ෂූන් විසින් සාමාන්‍ය ලෙස අදාළ චාරිත්‍ර ඉටුකරන ලදී. ඉන් මඳ වේලාවකට පසුව, ආදාහනය සිදුවන ස්ථානයෙන් සුව කිරීමේ බලය සහිත පිරිසිදු ජල දහරාවක් නැගිණි. මේ දක්වාද විහිදෙන එය වන්දනාමාන සිදු කෙරෙන ස්ථානයක් බවට පත්ව ඇත. හරියටම ඉන් මාස නවයකට පසුව, 1984 මැයි මස 29වන දින, රින්පෝෂේ නැවත වරක් සාමාන්‍ය පවුලක උත්පත්තිය ලැබීය.

එයට වසර ගණනාවකට පෙර රින්පෝෂේට ෂෙරින් කොඩ්රැක් හා කුන්ෂැන්ග් නමැති ස්වාමි පුරුෂයෙකු හා බිරිඳක හමුවී තිබිණි. එ් දෙදෙනාම ඔහුට මහත් සේ සිත්ගත් දෙදෙනෙකු විය. ඉතා ප්‍රබල ධර්ම පිළිවෙත් පුරන්නන් වූ ඔවුන් විසින් රින්පෝෂේට පවසන ලද්දේ තමාගේ ගැඹුරුම පැතුම වූයේ භික්ෂුවක හා භික්ෂුණියක වීම බවයි. තරුණ පවුලක් සහිත වැඩිහිටියන් ලෙස ආරාමික ජීවිතයට සම්බන්ධ වීම මගින් බොහෝ ගැටලු ඉස්මතු කරනු ඇති බැවින් ප්‍රාදේශීය ගමේ ප්‍රධානියා මෙයට විරුද්ධ නිර්දේශයක් ලබාදෙන ලදී. පළමුව ඔවුන් විසින් සිය දරුවන් රැකබලාගත යුතුවිය. රින්පෝෂේ විසින් ගම් ප්‍රධානියාගේ උපදෙස අනුමත කරන ලදී. රින්පෝෂේ පුනරුත්පත්තිය ලැබුවේ මෙම මව්පියන්ගේ සිවුවන දරුවා ලෙසිනි.

මරණ මඤ්චක භාවනාවේ කෙළ පැමිණි මහා ලාමාවරුන්ගේ පුනරුත්පත්ති ස්ථානය සෙවීම සඳහා සිසුහූ විවිධ විධික්‍රම යොදා ගනිති. මෙම විධික්‍රම අතරට පේන කියන්නන්ගෙන් අදහස් ලබාගැනීම හා ඉතා ඉහළ අවබෝධයක් ලද ගුරුවරුන්ගේ සිහින ආදිය ඇතුළත් වේ. අවසන් අපේක්ෂකයා විසින් සමාන පෙනුමක් ඇති භාණ්ඩ ගණනාවක් වෙතින් මියගිය ලාමාවරයා සතුව තිබූ භාණ්ඩ කිහිපයක් නිවැරදිව හඳුනාගත යුතුවේ. කෙසේ වුවද, දලයි ලාමා වහන්සේ විසින් එවන් විධික්‍රම මතම පමණක් රඳා නොසිටින ලෙස උපදෙස් ලබාදෙනු ලබයි. ප්‍රබල අපේක්ෂකයෙකු ලෙස සලකනු ලැබීමට පෙර සිය අනන්‍යතාවය පිළිබඳ පැහැදිලි ලකුණු එම දරුවා විසින් ලබාදිය යුතුය.

සර්කොං රින්පෝෂේ ශාන්තුවරයෙකුට සමාන‌ කොට ස්පිටිහි පුද්ගලයන් විසින් සලකනු ලැබේ. සෑම නිවසකම පාහේ ඔහුගේ ඡායාරූපයක් දක්නට ලැබේ. කුඩා සර්කොං රින්පෝෂේට කථා කිරීමට හැකිවූ විගස, සිය මව්පියන්ගේ නිවසේ වූ රින්පෝෂේගේ රූපයක් පෙන්වූ ඔහු "එ් මං" යයි පැවසීය. දරුවා පිරික්සීම පිණිස නැවෑං පසුව එම නිවසට ගිය කල, දරුවා වහා ඔහුගේ අතට ගියේය. ඔහුත් සමග සිය ආරාමයට ආපසු යාමට ඔහුට අවශ්‍ය විය.

ඔහු කවුරුන්ද යන්න පිළිබඳ කිසිවෙකුට හෝ කිසිදු සැකයක් නොවීය. කෙසේ වුවද, ප්‍රකට ස්පිටි කාන්තාවන් කණ්ඩායමක් විසින් එයට වසර කිහිපයකට පෙර, සිය මිටියාවතෙහි ඊළඟ ආත්මයේ උපත ලබන ලෙස රින්පෝෂේගෙන් ඉල්ලා සිටියහ. සිය දුරස්ථ සීමා මායිමට යාම සඳහා ඉන්දියානු රජයෙන් අවසර ලබාගැනීම නිරතුරු ගැටලුවක් විය. එවන් පුනරුත්පත්තියක් මගින් සියල්ල වඩාත් පහසු කෙරෙනු ඇත. ඉමහත් ගෞරවයක් සේ එය ගනිමින් ඔහුගේ මව්පියන් විසින් සිය අවසරය එ් සඳහා ලබාදෙන ලද අතර, වයස අවුරුදු හතරේදී, කුඩා රින්පෝෂේ ධර්මශාලා කරා පිටත් විය. ඔහුගේ මව්පියන් වරින් වර ඔහු බැලීමට ගියද, දරුවා කිසි විටෙක හෝ ඔවුන් පිළිබඳ විමසා නැති අතර, ඔවුන් නොමැති අඩුපාඩුවක් දැනෙන බව හෝ අඟවා නැත. ආරම්භයේ පටන්ම, සිය නිවසේ සාමාජිකයන් සමගින් බොහෝ හුරුපුරුදු බවක් ඔහුට හැඟෙන්නට විය. ඔවුහූ ඔහුගේ හෘදයාංගම පවුලේ සාමාජිකයන් විය.

රින්පෝෂේ පළමු වරට ධර්මශාලාවට පැමිණි විට මම දේශනා චාරිකාවක් සඳහා ඉන්දියාවට පිටත්ව සිටියෙමි. මාස කිහිපයකට පසුව, ම ආපසු පැමිණි පසු, පමණ ඉක්මවා බලාපොරොත්තු සහිත හෝ පමණ ඉක්මවා සැක සහිත අයෙකු නොවීමට වගබගා ගනිමින් ඔහු බැලීමට ගියෙමි. මා රින්පෝෂේගේ කාමරයට ඇතුළුවන විට නැවෑං විසින් මා හඳුනන්නේදැයි දරුවාගෙන් විමසන ලදී. කොළු ගැටයාගේ පිළිතුර වූයේ "පිස්සු කථා කරනවද? ඇත්තටම මං මෙයාව දන්නවා" යන්නකි. ඔහුගේ සාලයේ බිත්තියෙහි වතිකානුවේ රැස්වීමක මා පැරණි සර්කොං රින්පෝෂේ හා දලයි ලාමා වහන්සේ හා පාප් වහන්සේ අතර සිටිමින් භාෂා පරිවර්තන කටයුතු කරන පැහැදිලි ඡායාරූපයක් පැවති බැවින් ඔහු එතුළින් මා හඳුනාගත් බව සිතීමි. එනමුත් අප හමුවූ අවස්ථාවේ සිටම, කුඩා රින්පෝෂේ විසින් පවුලේ සාමාජිකයෙකුට මෙන් හිතවත් බවක් හා සුව පහසු බවක් පාමින් මා හට සත්කාර කරන්නට විය. වයස අවුරුදු හතරක කුඩා දරුවෙකු හට එවැනි දෙයක් මවාපෑම කළ නොහැක. අන් කිසිවකටද වඩා මෙකරුණ මගින් ඔහු කවුරුන්ද යන කරුණ මා හට එ්ත්තු ගන්වන ලදී.

1998වනවිට නව සර්කොං රින්පෝෂේට වයස අවුරුදු දහ හතරක් වේ. ඔහු බොහෝ විටම මුංගෝඩ්හි ඔහුගේ ආරාමයේ ජීවත් වෙමින් අධ්‍යයන කටයුතුවල නිරතවන අතර, වසරකට වරක් හෝ දෙවරක් දලයි ලාමා වහන්සේ විසින් ප්‍රධාන දේශනාවන් පවත්වන අවස්ථාවන්හි ධර්මශාලා කරා පැමිණේ. චොන්ෂෙයිලා හා රින්පෝෂේගේ වයස්ගත කෝකියා මියගොස් ඇති අතර, නැවෑං සිවුරු හැර ගොස් විවාහ වී මේවන විට නේපාලයේ ජීවත් වේ. රින්පෝෂේ රැකබලා ගැනීම සඳහා ඔහුට දැන් නව භික්ෂු නිවාසයක් ඇති අතර, එහි සියලු දෙනා ඔහුගේ පෙර භවයේදී තෝරාගත් අය වේ. නිදසුනක් ලෙස, සිය නිවසට සම්බන්ධ වන‌ ලෙස හා ඔහුගේ ජීවිතයේ අවසන් මාස කිහිපයේ ඔහුට සාත්තු සප්පායම් කරන ලෙස ස්පිටි හා කින්නවුර් වෙතින් වයස අවුරුදු දහයේ පිරිමි ළමුන් දෙදෙනෙකු ඔහු පුද්ගලිකවම තෝරාගන්නා ලදී.

ඔහුගේ පූර්වගාමියා මෙන්ම හාස්‍ය රස වින්දනයක් ඔහු තුළද පවත්නා අතර, එ් හා සමානම ප්‍රායෝගික ප්‍රවේශයක්ද අනුගමනය කරන නමුත්, තරුණ සර්කොං රින්පෝෂේ හට ඔහුටම අනන්‍ය පෞරුෂයක් ඇත. එක් ජීවිත කාලයකින් අනෙක කරා නොකඩවා ගමන් කරනුයේ කුසලතා, නැඹුරුතා හා කර්ම සම්බන්ධතාවයන්ය. ඔහු සමග වූ මාගේ සම්බන්ධතාවය ගත්කල, ස්ටාර් ට්‍රෙක් නාට්‍ය මාලාවේ කපිතාන් කර්ක්ගේ මුල් කණ්ඩායමේ සාමාජිකයෙකුව සිට දැන් ස්ටාර්  ට්‍රෙක්: නව පරපුර හි කපිතාන් පිකාඩ්ගේ කණ්ඩායමට බැඳුණු සාමාජිකයෙකු මෙන් වූ හැඟීමක් මා තුළ ඇත. සියල්ල වෙනස්ව ඇති නමුත් අනිවාර්යයෙන්ම අඛන්ඩතාවයක්ද ඇත.

මේ දක්වා සර්කොං රින්පෝෂේ හදාවඩා ගැනීමට අදාළව පසුපස ආසනයේ කාර්ය භාරයක් ඉසිලුවෙමි. පැරණි රින්පෝෂේ ඔහුගේම පුද්ගලයන් හට සේවය කිරීම සිය ප්‍රධාන පරමාර්ථය කොට සැලකුවා විය හැකි බව මා හට හැඟිණි. තිබ්බතීයයන්ගේ අභාග්‍යයකටදෝ පමණ ඉක්මවූ වැඩි ලාමාවරුන් සංඛ්‍යාවක් බහිර රටවල හෝ සිය සම්ප්‍රදායික සංස්කෘතික වපසරියෙන් බැහැර ආසියානු ප්‍රදේශවල සේවය කිරීමට කැමැත්ත පළකොට ඇත. බුදු දහමේ තිබ්බතීය ස්වරූපය එ් අයුරින්ම නොනැසී පැවතීමට නම්, තිබ්බතීය මතු පරපුරයන් වෙත පුහුණුව ලබාදීම අත්‍යවශ්‍යය. මක් නිසාද, වර්තමානයේදී සම්පූර්ණ බෞද්ධ දේශනාවන් පවත්නේ තිබ්බතීය බසින් පමණකි. මාගේ පුහුණුව හා ආත්ම සංවර්ධනය සඳහා සිතාගත හැකි හොඳම ඉඩ ප්‍රස්ථාවන් රින්පෝෂේ විසින් මා වෙත සම්පාදනය කරන ලදී. ඔහු දැක්වූ කරුණාවට කෙළෙහි ගුණ දක්වනු පිණිස, එම කාර්යයම ඔහු වෙනුවෙන්ද සිදු කිරීමට අපේක්ෂා කරමි.

සංස්කෘතික ගැටුම් ඇතිවීමේ ඉඩ ප්‍රස්ථා අවම කරනු පිණිස රින්පෝෂේගේ නවීන අධ්‍යාපන කාර්යයන්හි මාගේ සහභාගිත්වය ලබා නොදුණිමි. සත්‍ය වශයෙන්ම, අප හමුවන ඕනෑම අවස්ථාවක අප අතර පවත්නා සමීප සම්බන්ධතාවය කැපී පෙනන ලෙස පැහැදිලි වන නමුත් සිතා මතාම ඔහු සමගින් පමණට වඩා සම්බන්ධතා පවත්වාගෙන යාමෙන් වැළකී සිටියෙමි. එ් වෙනුවට ඉන්දියාවේ තිබ්බතීය පාසැල්වල අනුගමනය කරන විෂය මාලාවම අනුගමනය කරමින් ඔහු වෙත ඉංග්‍රීසි, විද්‍යාව හා සමාජ අධ්‍යයනයන් ඉගැන්වීම සඳහා දේශීය තිබ්බතීය උපදේශකවරුන් සූදානම් කිරීමේ කටයුතු සඳහා උපකාර කළෙමි. මවිසින් ඔහු බටහිර රටවලට රැගෙන යාම හෝ ඔහු වෙනුවෙන් පරිගණකයක් හෝ වීඩියෝ ප්ලේයරයක් මිලදී ගැනීම සිදු කර නොමැති අතර මේවා ඔහු වෙත ලබා නොදෙන ලෙස අන් අයද අධෛර්ය කර ඇත්තෙමි. බොහෝ විටම තරුණ පුනරුත්පත්ති ලාමාවරුන් විසින් පරිගණක ක්‍රීඩා හා සටන් ජවනිකා සහිත වීඩියෝ සිය සම්ප්‍රදායික ආරාමික අධ්‍යයන කටයුතුවලට වඩා ආකර්ශනීය එ්වා බවට පත්කර ගනිති.

මා ගත් දිශානතිය මගින් කෙතරම් දායකත්වයක් ලබාදී ඇත්තේද යන කරුණ නොදනිමි. එනමුත්, රින්පෝෂේ තමාගේ සංස්කෘතික වටපිටාව තුළ ගැඹුරු ආරක්ෂිත බවක් හා පූර්ණ සුව පහසු බවක් පෙන්වයි. මෙය ඔහුට මෙන්ම මතු ඔහු හමුවන සියලු දෙනා හටද ප්‍රයෝජනවත් වනු ඇත. ඔහු පරිණත වන විටදී බටහිර සංස්කෘතීන් පිළිබඳ ස්වේච්ඡාවෙන්ම උගත හැක. මතු භවයේද නැවත වරක් ඔහුගේ සිසුවා වීමට හැකි වේවායි පතමි.