ངང་ངམ་ཤུགས་ཀྱི་ལས་ལས་ཐར་བ།

ལམ་རིམ་གྱི་སྐྱེས་བུ་འབྲིང་གི་དམིགས་ཡུལ་ཏེ། འགྱུར་བའི་སྡུག་བསྔལ་ ༼བདེ་བ་ཉི་ཚེ་བ་༽ དང་ཁྱབ་པ་འདུ་བྱེད་ཀྱི་སྡུག་བསྔལ་ ༼དབང་མེད་ཀྱིས་ཡང་ནས་ཡང་དུ་འབྱུང་བའི་སྐྱེ་བ་༽ ལས་ཐར་བར། དེ་དག་ངང་ངམ་ཤུགས་ཀྱི་འབྱུང་བར་བྱེད་པའི་ལས་ཀྱི་ནུས་པ་དང་ས་བོན་རྣམས་ནུས་ལྡན་དུ་འགྱུར་བ་དེ་ང་ཚོས་བཀག་འགོག་བྱེད་དགོས། ང་ཚོས་དེ་ནུས་ལྡན་དུ་ཇི་ལྟར་བཟོ་གི་ཡོད་དམ། དེ་ནི་གང་ལྟར་ང་ཚོས་བདེ་བ་དང་སྡུག་བསྔལ་གྱི་ཚོར་བ་ལ་ཡ་ལན་སྤྲོད་པའི་ཐོག་ནུས་ལྡན་བཟོ་གི་ཡོད།
 
སྤྱིར་བཏང་ང་ཚོས་བདེ་བ་དང་སྡུག་བསྔལ་ཚོར་བའི་སྐབས། ཐོག་མར་གང་འབྱུང་གི་ཡོད་དམ་ཞེ་ན། སྲེད་པ་ཞེས་པའི་སེམས་བྱུང་དེ་སྐྱེ་གི་ཡོད། སྒྲ་ཇི་བཞིན་དུ་ཚིག་དེའི་དོན་ནི་སྐོམ་པ་རེད། གལ་ཏེ་ང་ཚོ་སྐྱིད་པོ་མེད་པ་ཚོར་ན། ང་ཚོ་སྐྱིད་པོ་མེད་པའི་ཚོར་བ་དེ་ལས་འབྲལ་འདོད་ཀྱི་སྐོམ་པ་ཆུ་འདོད་ལྟར་ཡོང་གི་ཡོད། གལ་ཏེ་ང་ཚོས་བདེ་བ་ཉི་ཚེ་བ་དེ་ཚོར་གྱི་ཡོད་ན། དེ་ནི་ནམ་ཡང་ཡུན་དུ་གནས་ཀྱི་མེད་པ་ནི་ངེས་པ་རེད། དེ་ནས་མི་ཁ་སྐོམ་མཁན་ཞིག་ལྟར། ང་ཚོ་དེ་ལས་འབྲལ་འདོད་མེད། དེ་ནི་ཁྱེད་རང་ཧ་ཅང་ཁ་སྐོམ་ནས་ཡོད་པ་དང་ཆུ་ཧུབ་གང་ལས་འཐུང་མེད་པའི་སྐབས། མི་ཞིག་སླེབས་ནས་ཆུ་བླུགས་སྣོད་ཀྱི་ཤེལ་དམ་དེ་ཁྱེར་ནས་འགྲོ་བ་དེ་འདྲ་ཁྱེད་ཀྱིས་མི་འདོད་པ་ཡིན། དེས་ཁྱེད་རང་ད་དུང་ཁ་མང་བ་སྐོམ་གྱི་རེད། ཁ་སྐོམ་ཚུལ་རྣམ་པ་གཉིས་པོ་གང་རུང་གིས་ནུས་ལྡན་དུ་བཟོ་བའི་རྒྱུད་རིམ་དེ་འགོ་འཛུགས་བྱེད་ཀྱི་ཡོད། སྐྱིད་པོ་མེད་པ་ཚོར་བ་ལ་ང་ཚོས་ “ངས་འདི་ངེས་པར་དུ་སྤོང་དགོས་ཀྱི་འདུག་” ཅེས་བསམ་གྱི་ཡོད། ཡང་ན་སྐྱིད་པོ་ཚོར་བ་ལ་མཚོན་ན། ང་ཚོས་ “འདི་མགྱོགས་པོ་རྫོགས་ན་བསམ་པའི་འདོད་པ་དེ་མེད་” ཅེས་བསམ་གྱི་ཡོད།

རིམ་པ་གཉིས་པ་ཞིག་འབྱུང་གི་ཡོད་པ་ནི། ང་ཚོས་སྡུག་བསྔལ་ལས་འབྲལ་བར་འདོད་པ་དང་བདེ་སྐྱིད་དང་མི་འབྲལ་བར་འདོད་པའི་རྡོག་རྡོག་ཚུགས་ཐུབ་ཏུ་གྲུབ་པའི་ང་ཞིག་ལ་འཛིན་པ་སྐྱེ་གི་ཡོད། “ང་རང་སྐྱིད་པོ་མེད་པ་ཚོར་བ་འདི་ལས་འབྲལ་དགོས་ཀྱི་འདུག །ང་རང་སྐྱིད་པོ་འདི་ལས་ནམ་ཡང་མི་འབྲལ་བར་བྱེད་དགོས་ཀྱི་འདུག་” ཅེས་བསམས་ནས། ང་ང་ང་ཞེས་ངས་གང་བྱེད་པ་དང་། བཤད་པ། བསམ་པ་སོགས་གཞན་ལ་ལྟོས་མེད་རང་དབང་དུ་གྲུབ་པའི་ང་སྐྱིད་པོ་ཡིན་དགོས་པ་དང་ནམ་ཡང་སྡུག་བསྔལ་མེད་པ་ཞིག་ཡོད་པ་ལྟར་སྣང་གི་ཡོད། སྲེད་སྐོམ་འདི་དང་འཛིན་པ་གཉིས་མཉམ་སྡེབ་ཀྱིས་ལས་ཀྱི་ནུས་པ་དང་ས་བོན་ནུས་ལྡན་དུ་བཟོ་གི་ཡོད། དེས་ངང་ངམ་ཤུགས་ཀྱིས་མུ་མཐུད་དེ་སྐྱེ་བ་གཞན་དང་གཞན་དུ་འཁྲིད་ཀྱི་རེད།

ངས་འདིར་རྒྱུད་རིམ་འདི་གོ་བདེ་པོ་བཟོ་བཞིན་ཡོད། དེ་ནི་ངས་གང་འགྲེལ་བརྗོད་བྱས་པ་ལས་རྦད་དེ་རྙོག་འཛིངས་ཆེ་བ་ཡོད། དོན་ངོ་མར་ལས་ཀྱི་བག་ཆགས་ནུས་ལྡན་དུ་བཟོ་བའི་རྒྱུད་རིམ་འདི་འཆི་བའི་དུས་དང་ངང་ངམ་ཤུགས་དང་དབང་མེད་ཀྱིས་ཡང་ནས་ཡང་དུ་འབྱུང་བའི་སྐྱེ་བ་ཙམ་མིན་པར། དུས་རྟག་ཏུ་འབྱུང་བཞིན་ཡོད། སྐྱིད་པོ་མེད་པ་སྡོད་འདོད་མེད་པ་དང་བདེ་སྐྱིད་དེ་རྫོགས་པར་མི་འདོད་པ་ནི་ཐ་ན་དྲན་པ་མེད་པའི་སྒོ་ནས་ཀྱང་རྟག་ཏུ་ཡོང་གི་ཡོད།

ལས་ཀྱི་ནུས་པ་དང་ས་བོན་ནུས་ལྡན་དུ་བཟོ་བའི་མངོན་རྟགས་འདི་མཚམས་འཇོག་བྱེད་པར། ང་ཚོས་སྟོང་པ་ཉིད་རྟོགས་དགོས་ཤིང་། དེ་ལ་ངས་ཨིན་སྐད་ནང་ (voidness) ཟེར་གྱི་ཡོད། ང་ཚོའི་རང་གིས་རང་ལ་རྟོག་པའི་འཆར་སྣང་སྐྲུན་པའི་ང་ཞེས་བྱ་བ་ལྟོས་མེད་རང་དབང་བའི་ངོ་བོར་གནས་པ་དང་། དེས་གང་བྱེད་པ་རྣམས་གང་གིས་ཀྱང་ཕན་གནོད་མི་བྱེད་པ། རྟག་ཏུ་སྐྱིད་པོ་ཡིན་དགོས་པ་ལས་མི་སྐྱིད་པ་ནམ་ཡང་མིན་པ་ཞིག་ཏུ་སྣང་གི་ཡོད་པ་དེ་ནི་དངོས་པོའི་གནས་ལུགས་དང་མཐུན་གྱི་མེད། སྟོང་པ་ཉིད་ཅེས་པའི་དོན་ནི། དེ་འདྲའི་ཆོས་ཤིག་མེད་པ་དང་། སུ་གཅིག་ཀྱང་དེ་འདྲ་གྲུབ་མེད་པ་དེ་རེད། གལ་ཏེ་ང་ཚོས་རྟོག་པའི་འཆར་སྣང་དང་མཐུན་པ་གཅིག་ཀྱང་མེད་པ་དང་རྟོགས་པ་དེའི་སྒང་ལ་དམིགས་པ་གཏད་ནས་གནས་པ་དེ་རྟོགས་ཐུབ་ན། ང་ཚོས་མི་སྐྱིད་པ་དང་བདེ་བ་ཉི་ཚེ་བ་ཉམས་སུ་མྱོང་བའི་སྐབས། སྲེད་སྐོམ་དང་འཛིན་པ་ལ་བརྟེན་ནས་སེམས་གུ་དོག་པོ་དང་རྒོད་པོ་ཆགས་ཀྱི་མ་རེད། དེའི་ཚབ་ལ་ང་ཚོས། “ད་ང་རང་སྐྱིད་པོ་འདུག །ད་ང་རང་སྐྱིད་པོ་མི་འདུག །ཡིན་ནའང་གལ་ཡོད་མ་རེད། ཚོར་བ་དགའ་སྡུག་ནི་འཕེལ་འགྲིབ་འགྲོ་གི་ཡོད་པ་ནི་མི་ཚེའི་རང་བཞིན་རེད། གལ་ཡོད་མ་རེད། དམིགས་བསལ་གང་ཡང་མེད་” ཅེས་བསམ་གྱི་རེད།

ང་ཚོས་ག་རེ་མཚམས་འཇོག་བྱེད་དགོས་སམ་ཞེ་ན། ཚོར་བ་དེ་དག་དང་དེ་དག་ཉམས་སུ་མྱོང་བཞིན་པའི་ང་དེ་ལས་གནས་ཚུལ་ཆེན་པོ་ཞིག་བཟོ་རྒྱུ་དེ་མཚམས་འཇོག་བྱེད་དགོས། དེ་ལྟར་བྱས་ན། ང་ཚོའི་ལས་ཀྱི་ནུས་པ་དང་ས་བོན་ནུས་ལྡན་བཟོ་གི་ཡོད། དཔེར་ན། མི་གཞན་ཞིག་གིས་བྱ་བ་བྱེད་པའམ་སྐད་ཆ་ཤོད་པ་དེ་ལ་རྩ་ནས་མི་དགའ་བའི་སྐབས། ང་རང་ཧ་ཅང་མི་སྐྱིད་པའི་ཚོར་བ་མྱོང་བ་ལྟ་བུ་རེད། གལ་ཏེ་ངས་ “ང་ང་ང་” ཞེས་པར་ཞེན་འཛིན་སྐྱེས་ན། ཁྱེད་ཀྱིས་གང་བྱེད་པ་དེ་ལ་ང་སྐྱིད་པོ་མེད་པ་དང་ངས་ཁྱེད་ལ་སྐད་ལོག་རྒྱག་པའི་ལས་ཀྱི་ནུས་པ་དང་ས་བོན་ནུས་ལྡན་དུ་བཟོ་མཁན་གྱི་ཚོར་བ་མི་སྐྱིད་པ་དེ་སྤོང་བའི་སྐོམ་པ་ཆུ་འདོད་ཅིག་སྐྱེ་གི་ཡོད། ནུས་ལྡན་དུ་བཟོས་རྗེས་ངས་སྐད་ལོག་རྒྱག་པ་ལྟ་བུའི་ཚོར་བ་སྐྱེད་པར་བྱེད་པ་དང་ངས་ཁོང་ཁྲོ་ཟ་བ་ལྟ་བུའི་འདོད་ཕྱོགས་དེ་ཡང་ནུས་ལྡན་དུ་འགྱུར་གྱི་ཡོད། ཁོང་ཁྲོའི་ས་བོན་དེ་ནི་ལས་ཀྱི་ས་བོན་ཞིག་མིན་ནའང་། དེ་ནི་ཉོན་མོངས་པའི་ས་བོན་ཞིག་རེད། ཉོན་མོངས་པ་རྣམས་ལའང་ས་བོན་ཡོད་པ་རེད། དེ་དག་ང་ཚོས་མི་ཚོར་བའི་སྐབས་སམ་ཡང་ན་ཉོན་མོངས་པ་དེ་དག་མངོན་དུ་གྱུར་བའི་སྐབས། དེ་དག་གི་རྒྱུན་ཞིག་ད་དུང་ཡོད་པ་རེད། འོན་ཀྱང་བག་ཆགས་དང་ནུས་པ་དེ་དག་ཚང་མ་ནུས་ལྡན་དུ་ཆགས་པའི་སྐབས། ངས་ཚོད་འཛིན་མེད་པ་དང་སེམས་ཀྱི་ཞི་བདེ་མེད་པར་ངང་ངམ་ཤུགས་ཀྱི་སྒོ་ནས་འདོད་པ་དེ་བྱ་བའི་ངོ་བོར་གྱུར་ནས་ཁྱེད་ལ་སྐད་ལོག་རྒྱག་གི་ཡོད།
 
འོན་ཀྱང་། གལ་ཏེ་ངས་ “ང་རང་སྐྱིད་པོ་མེད་པ་དང་། ཁྱེད་ཀྱིས་གང་བྱེད་པར་ང་རང་མི་དགའ་ནའང་། དེ་ལས་གནས་ཚུལ་ཆེན་པོ་ཞིག་བཟོ་དགོས་པའི་རྒྱུ་མཚན་མེད་” པ་དེ་རྟོགས་ཐུབ་ན། ངས་སོ་སོ་རང་ཉིད་དང་སོ་སོ་རང་ཉིད་ལ་གང་དགོས་པར་དོ་སྣང་བྱེད་ཀྱི་མ་རེད། དེའི་འབྲས་བུར། ངས་སྐད་ལོག་རྒྱག་པའི་ལས་ཀྱི་བག་ཆགས་དང་ནུས་པ་དེ་དག་ནུས་ལྡན་དུ་བཟོ་གི་མེད། གསལ་པོར་ཞུས་ན། རིམ་པ་འདིར་སླེབས་ཐུབ་པར་གོ་རྟོགས་དེ་གང་འཚམ་གྱི་གཏིང་ཟབ་པོ་དང་རབ་ཏུ་བརྟན་པ་ཞིག་དགོས། ངས་དེ་གོ་བདེ་པོ་བཟོ་བཞིན་ཡོད། ཡིན་ནའང་འདི་ནི་ཁྱེད་རང་ལ་སྤྱི་བཏང་གི་བསམ་བློ་ཞིག་སྤྲོད་ཕྱིར་ཡིན།

རྒྱུ་ཞེས་བྱ་བ་ནི་རྒྱུ་དེ་ལས་འབྱུང་བའི་འབྲས་བུ་ཞིག་ཡོད་པ་དང་འབྲེལ་བ་ཁོ་ནར་བརྟེན་ནས་རྒྱུ་དེ་ཡོད་པ་དང་བྱ་བ་བྱེད་ཐུབ་ཀྱི་ཡོད། གལ་ཏེ་འབྲས་བུ་སྐྱེད་མི་ཐུབ་ན། དེ་ནི་རྒྱུ་རུ་གནས་མི་ཐུབ། ད་དུང་དམིགས་སུ་བཀར་ནས་ཞུས་ན། གལ་ཏེ་ཆོས་གང་ཞིག་དོན་ངོ་མར་དེ་ལས་འབྲས་བུ་ཞིག་འབྱུང་སྲིད་པ་ཡིན་ན། དེ་ནི་འབྲས་བུ་དེ་འབྱུང་བའི་ནུས་པ་ཡོད་པ་ཁོ་ན་ཆགས་ཐུབ། འབྲས་བུ་དེ་འབྱུང་བར་ནུས་པ་དེ་མཐུ་ལྡན་དུ་བཟོ་དགོས་ཀྱི་ཡོད། ཡིན་ནའང་གལ་ཏེ་ནུས་པ་དེ་མཐུ་ལྡན་དུ་བཟོ་ཐུབ་པའི་ཆོས་གང་ཡང་མེད་ན། དེ་ལས་འབྲས་བུ་འབྱུང་མི་སྲིད་པ་རེད། དེ་ནས་དེར་ནུས་པ་དེ་མེད་པ་རེད། གལ་ཏེ་དེར་འབྲས་བུ་ཞིག་སྐྱེད་ཐུབ་ན། འབྲས་བུ་དེ་སྐྱེད་པའི་ནུས་པ་ཁོ་ན་དེར་ཡོད་ཆོག

ཁྱེད་ཀྱི་ལས་ཀྱི་ནུས་པ་དང་བག་ཆགས་སྤོང་ཚུལ་དེ་ལྟར་རེད། དོན་དམ་རྟོག་མེད་ཀྱི་སྟོང་ཉིད་རྟོགས་པ་ལ་བརྟེན་ནས་རྡོག་རྡོག་ཚུགས་ཐུབ་ཏུ་གྲུབ་པའི་ང་ཟེར་བ་མེད་པ་སོགས་ཁྱེད་ཀྱིས་མི་དགེ་བའི་སྤྱོད་ལམ་ལ་གྲོགས་བྱེད་ངེས་པའི་ཉོན་མོངས་དང་། ཐ་ན་དགེ་བའི་སྤྱོད་ལམ་ལའང་གྲོགས་བྱེད་པའི་ཉོན་མོངས་རྣམས་ཀྱང་སྤོང་འགོ་བཙུག་གི་ཡོད། དེ་གང་ཡིན་ཞེ་ན། ཚུགས་ཐུབ་ཏུ་གྲུབ་པའི་ང་ལ་ཞེན་འཛིན་སྐྱེ་བའི་རྒྱུ་མཚན་གྱིས་ཉོན་མོངས་སྐྱེ་གི་ཡོད། རྟོག་མེད་ཀྱི་སྒོ་ནས་ཚུགས་ཐུབ་ཏུ་གྲུབ་པའི་ང་མེད་པར་རྟོགས་པའི་རྒྱུད་རིམ་རིང་པོའི་ནང་། གང་ལྟར་ཡང་། ང་ཚོའི་ཉོན་མོངས་རྣམས་ཀྱི་ཤེད་ཤུགས་དེ་བརླག་འགོ་བཙུག་གི་ཡོད། དེ་དག་ནི་ཉོན་མོངས་པས་ནུས་ལྡན་བཟོས་ཡོད་པས། རྒྱུ་མཚན་དེ་ལ་བརྟེན་ནས་ང་ཚོས་ལས་ཀྱི་བག་ཆགས་རྙིང་པ་ནུས་ལྡན་དུ་བཟོ་བའི་རྒྱུད་རིམ་དེ་ལྷོད་དུ་གཏོང་འགོ་བཙུག་གི་ཡོད། དེར་བརྟེན་ང་ཚོས་ངང་ངམ་ཤུགས་ཀྱི་ནུས་ཤུགས་དེ་ཞན་དུ་གཏོང་གི་ཡོད།
 
ཕྱོགས་གཞན་ཞིག་ནས་ཐ་ན་ང་ཚོའི་ཞན་དུ་ཕྱིན་པའི་ཉོན་མོངས་པ་རྣམས་ཀྱིས་ལས་ཀྱི་བག་ཆགས་ནུས་ལྡན་དུ་བཟོས་ནས་དེས་གཞན་ཞིག་ལ་སྐད་ལོག་རྒྱག་འདོད་སྐྱེད་པར་བྱས་ནའང་། ང་ཚོས་ལས་དེ་བསྐྱར་ཟློས་མི་བྱེད་པའི་གོ་སྐབས་བཟང་བ་ཞིག་ཡོད་པ་དང་། ང་ཚོའི་སྤྱོད་ལམ་གྱི་ངང་ངམ་ཤུགས་ཀྱི་རང་བཞིན་དེ་ཉུང་བ་ཡོང་གི་རེད། གང་ཡིན་ཟེར་ན། ང་ཚོའི་ཁོང་ཁྲོའི་ཉོན་མོངས་པ་དེ་ཞན་པ་ཡོད། ང་ཚོས་གང་བྱེད་འདོད་ཡོད་པ་དེ་ཇི་ཙམ་གྱིས་སྤོང་འདོད་ཆེ་བ་ཡོད་པ་དེ་ཚོད་ཀྱིས་དེ་མི་དགེ་བའམ་དབང་རྩ་འཁྲུགས་པའི་སྒོ་ནས་དགེ་བ་གང་ཡིན་རུང་ང་ཚོས་ལས་ཀྱི་བག་ཆགས་ཉུང་བ་སྐྲུན་གྱི་རེད། དེར་བརྟེན་ལས་ཀྱི་ནུས་པ་དང་བག་ཆགས་སྤོང་བའི་རྒྱུད་རིམ་མགྱོགས་ཏུ་འགྲོ་གི་ཡོད།

དག་སྦྱོང་གི་རྒྱུད་རིམ་འདི་ལམ་ལྷོང་ཡོང་བར། སྟོང་པ་ཉིད་ལ་དྲན་པ་ཉེ་བར་བཞག་པའི་བཟང་སྤྱོད་ཀྱི་ཚུལ་ཁྲིམས་ཤིག་ང་ཚོར་དགོས་ཀྱི་ཡོད། དེ་ཡང་ལས་སླ་པོའི་སྒོ་ནས་བརྗོད་ན། “སྐྱིད་པོ་དང་སྐྱིད་པོ་མེད་པ། གང་ཡིན་ནའང་ཡིན། ང་ཞེས་བྱ་བ་དུས་རྟག་ཏུ་སྐྱིད་པོ་ཡིན་དགོས་པ་ལས་སྡུག་བསྔལ་ནམ་ཡང་ཡིན་མི་ཆོག་པ་ཞིག་མེད། ང་ཡོད་པ་ནི་ཤོད་མི་དགོས་ཀྱང་། འདི་ལྟ་བུའི་ཡིན་པ་མི་སྲིད་པའི་ཚུལ་དུ་གྲུབ་པ་ཞིག་ནི་མེད།” ཅེས་པ་ལ་དྲན་པ་ཉེ་བར་གནས་ཕྱིར་ང་ཚོར་ཚུལ་ཁྲིམས་དེ་དགོས་ཀྱི་ཡོད།
 
ང་ཚོས་དེ་གཏིང་ཟབ་པོའི་སྒོ་ནས་རྟོགས་པའི་སྐབས། གལ་ཏེ་ཁྱེད་ཀྱིས་ག་རེ་འབྱུང་གི་ཡོད་པ་དང་དེས་ང་ཚོའི་ཉམས་མྱོང་ལ་ཕན་གནོད་སྤྲོད་འགོ་ཚུགས་ཟིན་པའི་ཐོག་ལ་བསམ་བློ་བཏང་ན། དེ་ནི་བློ་ལ་ཧ་ཅང་འཐད་པོ་ཡོད། དཔེ་ཆ་བཞག་ན། ང་ཚོར་རྟག་ཏུ་རོལ་དབྱངས་ཡོད་པ། རྟག་ཏུ་གཟུགས་མཐོང་བརྙན་འཕྲིན་སྤར་ནས་ཡོད་དགོས་པ་ལས། དེ་མིན་ང་ཚོ་སྐྱིད་པོ་མི་ཡོང་བའི་དབང་མེད་ཀྱི་འདོད་ཆགས་སམ་རྟག་ཏུ་སྤྲོ་སྐྱིད་དགོས་ཀྱི་མེད། ང་ཚོས་ནམ་རྒྱུན་མུ་མཐུད་དེ་ཁ་པར་སྔོག་བཤེར་བྱས་ནས་བརྡ་འཕྲིན་འབྱོར་ཡོད་མེད་ལྟ་བའམ་ངོ་དེབ་ནང་སྤེལ་བའི་གནས་ཚུལ་རྣམས་སྔོག་བཤེར་བྱེད་པ། ཡང་མིན་ན་གསར་འགྱུར་ལྟ་བའི་ངང་ངམ་ཤུགས་ཀྱི་རང་བཞིན་དེ་བརླག་གི་རེད། གང་ཡིན་ཞེ་ན། གོ་སྐབས་ཤོར་གྱི་ཡོད་པ་དང་སྡུག་བསྔལ་ལ་སྐྲག་པའི་ང་ཚུགས་ཐུབ་ཏུ་གྲུབ་པ་དེ་ལ་ང་ཚོས་འཛིན་པ་སྐྱེ་གི་མེད། ང་ཚོ་ངང་ངམ་ཤུགས་ཀྱི་མི་དགེ་བ་དང་ཉོན་མོངས་པ་དེ་དག་ལས་ཐར་གྱི་ཡོད།

ཧ་ཅང་མདོར་བསྡུས་ན། གཞན་གྱི་ལས་ཚུལ་རྣམས་ཡོངས་སུ་རྫོགས་པ་རྟོགས་ཤིང་། གཞན་དོན་ཡག་ཤོས་ཇི་ལྟར་བསྒྲུབ་ཚུལ་ཤེས་པའི་ཕྱིར། ཚད་མཐོའི་ཀུན་སློང་གི་རིམ་པའམ་སྐྱེས་བུ་ཆེན་པོའི་ལམ་གྱི་རིམ་པའི་དམིགས་ཡུལ་དེ་འཐོབ་དགོས། དེ་འཐོབ་པར་ང་ཚོའི་སྟོང་ཉིད་ཀྱི་གོ་རྟོགས་དེའི་རྒྱབ་ལ་བྱང་ཆུབ་སེམས་ཀྱི་ནུས་སྟོབས་དེ་དགོས། བྱང་ཆུབ་ཀྱི་སེམས་དེ་གང་རེད་དམ། སེམས་ཅན་ཐམས་ཅད་ལ་གཅིག་མཚུངས་ཀྱི་གཏིང་ཟབ་པའི་བྱམས་པ་དང་སྙིང་རྗེ་ཡོད་པ་ལ་གཞི་བྱས་ཏེ། ང་ཚོས་འགན་འཁྲི་ཁྱེར་ནས་སེམས་ཅན་ཐམས་ཅད་སྡུག་བསྔལ་དང་སྡུག་བསྔལ་གྱི་རྒྱུ་དང་བཅས་པ་ལས་ཐར་བའི་ཆེད་རོགས་བྱ་རྒྱུའི་ལྷག་བསམ་རྣམ་པར་དག་པའི་སྒོ་ནས་ཐག་གཅོད་བྱེད་པ་དེ་རེད། འོན་ཀྱང་གལ་ཏེ་ང་ཚོ་ཚང་མ་རྣམ་པ་ཐམས་ཅད་མཁྱེན་པའི་གོ་འཕང་ཐོབ་ན། དེ་ཁོ་ན་ལ་བརྟེན་ནས་གཞན་སེམས་ཅན་རེ་རེ་བཞིན་སངས་རྒྱས་ཀྱི་གོ་འཕང་ལ་ཇི་ལྟར་འཁྲིད་པའི་ཚུལ་ཡག་ཤོས་དེ་ཤེས་ཀྱི་རེད། བྱང་ཆུབ་ཀྱི་སེམས་ནི། ད་ལྟ་ང་ཚོར་ཐོབ་མེད་པའི་མ་འོངས་པའི་སངས་རྒྱས་ཀྱི་གོ་འཕང་ལ་དམིགས་པའི་སེམས་ཤིག་ཡིན། འོན་ཀྱང་དེ་ནི་ང་ཚོའི་རྒྱུད་ལ་ཡོད་པའི་རྒྱུ་བདེ་བར་གཤེགས་པའི་སྙིང་པོའམ་སངས་རྒྱས་ཀྱི་རིགས་ཞེས་བྱ་བ་ལ་བརྟེན་ནས་སངས་རྒྱས་ཀྱི་གོ་འཕང་འཐོབ་ཐུབ། སངས་རྒྱས་ཀྱི་རིགས་ནི་ང་ཚོ་ཚང་མར་ཡོད་པའི་སེམས་ཀྱི་རང་བཞིན་དག་པ་དང་ཡོན་ཏན་དང་ལྡན་པ་དེ་ཡིན་ཞིང་། དེས་ང་ཚོ་ཚང་མ་སངས་རྒྱས་ཀྱི་གོ་འཕང་ལ་འགོད་ཐུབ་ཀྱི་ཡོད། ང་ཚོའི་འདུན་པ་ནི་སོ་སོ་རང་ཉིད་ཀྱི་སངས་རྒྱས་ཀྱི་གོ་འཕང་དེ་འཐོབ་རྒྱུ་དེ་ཡིན་པ་དང་། གོ་འཕང་དེ་ལ་གཞི་བྱས་ནས་ང་ཚོས་གང་ཐུབ་པ་དང་ད་ལྟ་ང་ཚོས་དངོས་གནས་གང་ཐུབ་བྱེད་བཞིན་པ་ལས་ལྷག་པའི་གཞན་དོན་ཆ་ཚང་བ་ཞིག་བསྒྲུབ་ཐུབ།

བྱང་ཆུབ་ཀྱི་སེམས་ལ་བརྟེན་ནས་ང་ཚོས་སེམས་འདི་སྟོང་ཉིད་ཀྱི་གོ་རྟོགས་ལ་ལག་བསྟར་བྱེད་པའི་སྐབས། ང་ཚོའི་རྟོགས་པ་དེའི་རྒྱབ་ལ་སྔར་ལས་ལྷག་པའི་སྟོབས་དང་ནུས་པ་ཡོད། ང་ཚོས་ཆོས་ཐམས་ཅད་ཀྱི་རྟེན་འབྲེལ་སྔར་ལས་ལྷག་པ་མཐོང་ཐུབ་པ་དང་། འདིས་ང་ཚོའི་སེམས་ཀྱིས་ཆོས་རྣམས་གཞན་ལས་ལོགས་སུ་སྡེ་ཚན་ཕྱེས་ཏེ་སྒམ་ཞིག་གི་ནང་དུ་སྣང་བར་བྱེད་པའི་གོམས་གཤིས་དེ་མེད་པ་བཟོ་གི་ཡོད། དེ་ལྟར་སེམས་ཅན་རེ་རེའི་ད་ལྟའི་གནས་སྟངས་ཀྱི་ལས་ཀྱི་རྒྱུ་རྣམས་རྟོགས་ཐུབ་པ་དང་། ང་ཚོས་ཁོང་ཚོར་གང་བསླབ་སྲིད་པ་དེའི་འབྲས་བུས་དཀལ་ངལ་དང་སྡུག་བསྔལ་ལས་ཐར་བར་ཕན་གྱི་ཡོད། ང་ཚོས་འདས་པའི་དུས་སུ་གང་བྱུང་ཟིན་དང་། ད་ལྟ་གང་འབྱུང་བཞིན་པ། མ་འོངས་པར་གང་འབྱུང་རྒྱུ་ཡིན་པའི་རྟེན་འབྲེལ་གྱི་པར་རིས་ཡོངས་སུ་རྫོགས་པ་མཐོང་གི་རེད། འདིས་ང་ཚོས་གཞན་དག་ལ་བསླབ་བྱ་ཡག་ཤོས་རྒྱག་ཐུབ་པ་དང་ཕན་ཐོགས་ཆེ་ཤོས་བསྒྲུབ་ཐུབ་པར་བྱེད་ཀྱི་ཡོད།
 
བྱང་ཆུབ་ཀྱི་སེམས་སྐྱེད་པར། ང་ཚོའི་རང་འདོད་དོན་གཉེར་ལས་ཐར་བའི་ཕྱིར་དང་གཞན་དོན་ཆེད་རྩེ་གཅིག་ཏུ་དམིགས་པའི་ཕྱིར། ང་ཚོར་བཟང་སྤྱོད་ཀྱི་ཚུལ་ཁྲིམས་དགོས། གཞན་དོན་དུ་སེམས་ཁུར་བྱེད་པ་དེས་ང་ཚོར་ནུས་པ་ཆེ་བ་ཇི་ལྟར་སྦྱིན་པའི་ཚུལ་གྱི་དཔེ་མཚོན་སྟབས་བདེ་ཞིག་ནི། ང་ཚོ་ཉིན་རིང་ལ་དཀའ་ལས་ཆེ་བའི་ལས་ཀ་ནས་ནང་དུ་ལོག་དུས་རྦད་དེ་ཐང་ཆད་ནས་ཡོད་པའི་དབང་དུ་བཏང་། གལ་ཏེ་ང་ཚོ་སོ་སོ་རང་ཉིད་ལ་བལྟོས་ནས་སྡོད་ཀྱི་ཡོད་ན། དགོང་ཟས་བཟོ་རྒྱུ་དྲན་པ་བརྗེད་ནས་ངལ་གསོ་རྒྱག་པ་དང་དེ་ནས་གཉིད་ཁུག་ན་ཆོག །འོན་ཀྱང་། གལ་ཏེ་ང་ཚོར་ཕྲུ་གུ་ཡོད་ན། རང་ཉིད་ཐང་ག་ཚོད་ཆད་ཡོད་མེད་ཁྱད་མེད་ཐོག་ང་ཚོས་ནུས་པ་ཞིག་བཏོན་ནས་ཁོང་ཚོར་ཁ་ལག་བཟོ་བ་དང་། ཁོང་ཚོའི་དགོས་མཁོ་རྣམས་སྒྲུབ་པར་བྱེད་ཀྱི་རེད། བྱས་ཙང་། སོ་སོ་རང་ཉིད་ཁོ་ནར་སེམས་ཁུར་བྱེད་པ་ལས་གཞན་ལ་སེམས་ཁུར་དང་གཅེས་སྐྱོང་བྱེད་པ་དེས་ང་ཚོ་ལ་ནུས་པ་མང་བ་སྦྱིན་གྱི་ཡོད།

འདི་ནི་ཚད་མཐོ་བའི་ཚུལ་ཁྲིམས་ཀྱི་རིམ་པའི་ནང་གང་ཚུད་ཡོད་པ་དེ་རེད། རང་འདོད་དོན་གཉེར་ཅན་དང་རང་ཁོ་ནའི་དོན་དུ་བསམ་པ་དེ་མཚམས་འཇོག་བྱས་ནས་གཞན་དོན་ལ་བསམ་བློ་གཏོང་བའི་ཆེད་དུ་ཚུལ་ཁྲིམས་དེ་དགོས་ཀྱི་ཡོད། དེ་ལ་བརྟེན་ནས་ཡར་རྒྱས་ཀྱི་གནས་ཚད་མཐོ་ཤོས་དེར་སླེབ་ཕྱིར་དམིགས་དགོས་ཤིང་། དེ་ནི་ཐམས་ཅད་མཁྱེན་པའི་གོ་འཕང་འཐོབ་རྒྱུ་དེ་ཡིན།

མི་དགེ་བའི་ལས་ལས་ཐར་བ་དང་། དེ་ག་ནང་བཞིན་དགེ་མི་དགེའི་ལས་ཡོངས་སུ་རྫོགས་པ་ནས་ཐར་བ། དེ་ནས་ང་ཚོས་གཞན་ཐམས་ཅད་ཀྱང་དེ་དག་ལས་ཐར་བར་ཕན་འདོགས་ཐུབ་པའི་ཆེད་གཞན་རྣམས་ཀྱི་ལས་ཡོངས་སུ་རྫོགས་པ་རྟོགས་པར་འགོག་རྐྱེན་བྱེད་པའི་རང་གཅེས་འཛིན་གྱི་བློ་དེ་ལས་ཐར་བའི་ཐབས་གཙོ་བོ་ནི་བཟང་སྤྱོད་ཀྱི་ཚུལ་ཁྲིམས་འདི་ཡིན། ཚུལ་ཁྲིམས་འདི་གཅིག་པུས་འགྲིག་གི་མེད་པར། ཚུལ་ཁྲིམས་འདི་དྲན་པ་དང་། ཤེས་བཞིན། དམིགས་གཏད། གཅེས་སྐྱོང་སོགས་ཀྱིས་གྲོགས་བྱེད་དགོས།

ཡར་རྒྱས་ཀྱི་རྒྱུད་རིམ་འདིའི་ཐོག་མཐའ་བར་གསུམ་དུ་སྟོང་ཉིད་ཀྱི་གོ་རྟོགས་དེ་གལ་ཆེན་པོ་ཆགས་ཡོད། དེ་མིན་ཚུལ་ཁྲིམས་ལ་འཇུག་ཚུལ་ཧ་ཅང་གཉིས་སྣང་ཅན་ཞིག་ཡོད། ང་ཚོས་ང་ཞེས་བྱ་བ་གཅིག་ཡོད་པ་དེ་ཉེན་རྟོག་པ་ཞིག་ཡིན་པ་དང་། ང་གཞན་ཞིག་ཡོད་པ་དེ་ནི་སྤྱོད་རྩུབ་ཅན་སྒྲིག་བཅུན་དགོས་མཁན་དེ་ཡིན་པར་བསམ་བློ་འཁོར་གྱི་ཡོད། གལ་ཏེ་ང་ཚོས་ཚུལ་ཁྲིམས་ཡར་རྒྱས་གཏོང་བའི་བརྗོད་གཞི་ཡོངས་རྫོགས་དེ་ལྟ་བུའི་གཉིས་སྣང་གི་ནང་འཇུག་པར་བྱས་ན། ང་ཚོ་ལ་དཀའ་ངལ་འཕར་མ་ཧ་ཅང་མང་པོ་འབྱུང་གི་རེད། གནད་དོན་གཙོ་བོ་ནི། ང་ཚོས་ “ངས་འདི་བྱེད་དགོས་ཀྱི་འདུག་” ཅེས་དང་། “ང་ང་ང་” ཞེས་ཟེར་བ་དང་། “ཨོ་ཞེད་སྣང་ཚ་བའི་ང་། ང་རང་ཧ་ཅང་སྡུག་ཅག་རེད་” ཅེས་པའི་བསམ་བློ་འདི་འདྲ་མི་གཏོང་བའི་སྒོ་ནས་ཚུལ་ཁྲིམས་ལ་འབད་འབུངས་བྱེད་དགོས། དེ་དག་ཐམས་ཅད་བསྐྱུར་ནས་ལས་དོན་དེ་བསྒྲུབ་དགོས།།