ངོ་སྤྲོད།
མནྜལ་ལམ་དཀྱིལ་འཁོར་ནི། ཐོག་མར་ལོ་ངོ་སྟོང་ཕྲག་གོང་དུ་རྒྱ་གར་ནས་དར་བ་ཞིག་དང་། དེ་ཡང་ཚད་མཐོ་བའི་ཧིན་དུའི་ཆོས་དང་སངས་རྒྱས་པའི་ཆོས་ཀྱི་སྒོམ་ཉམས་ལེན་ལ་མཐུན་རྐྱེན་དུ་གྱུར་བའི་ཆེད་དུ་ཡིན་པ་དང་། དེང་གི་ཆར་ལ་མང་ཚོགས་ཀྱི་དོ་སྣང་དང་ཤེས་རྟོགས་ཀྱི་གནས་སུ་གྱུར་ཡོད། དུས་རབས་ཉི་ཤུ་པའི་འགོ་སྟོད་ཙམ་ནས་སུད་སིའི་སེམས་ཁམས་རིག་པ་ལ་དཔྱད་མཁས་པ་ཀརླ་ཇུངྒ་ (Carl Jung) གྱིས་དཀྱིལ་འཁོར་ནི་དྲན་ཤེས་མེད་པ་ལ་འཚོལ་ཞིབ་བྱེད་པའི་གསོ་དཔྱད་ཀྱི་ཐབས་ལམ་ཞིག་ཡིན་པར་ནུབ་ཕྱོགས་ཀྱི་བསམ་བློར་ངོ་སྤྲོད་བྱས་ཡོད། ལོ་མང་གོང་ནས་ཡེ་ཤུའི་ཆོས་དཔོན་པཽབ་ (pop culture) ཀྱི་རིག་གཞུང་ནང་དུ་མཎྜལ་གྱི་ཐ་སྙད་དེ་བླངས་ཡོད། དེ་ཡང་དེང་རབས་ཀྱི་བསམ་བློའི་གོ་དོན་ཙམ་མ་ཡིན་པར་དེང་སང་གི་མགྲོན་ཁང་དང་། སྐུ་མཉེ་ཁང་། མཚན་ཚོགས་ཁང་དང་། དུས་དེབ་ཁག་སོགས་ཀྱི་ནང་དུ་མིང་གསར་དུ་འདེམ་སྒྲུག་བྱེད་ནས་བེད་སྤྱོད་གཏོང་བཞིན་ཡོད། ཆེས་ཉེ་དུས་ཀྱི་ཆར་ལ། འཛམ་གླིང་གང་སར་ཡོད་པའི་འགྲེམས་སྟོན་ཁང་གི་ནང་བོད་ཀྱི་ནང་པའི་དགེ་འདུན་པ་རྣམས་ཀྱིས་བོད་ཀྱི་རིག་གཞུང་ཟབ་རྒྱས་དག་འགྲེམས་སྟོན་བྱ་ཕྱིར། ཚོན་མདངས་རབ་ཏུ་བཀྲ་བའི་བྱེ་མའི་མཎྜལ་བཞེངས་ཡོད། དེ་ལྟར་མཎྜལ་ལམ་དཀྱིལ་འཁོར་ཞེས་པ་དེའི་དོན་ངོ་མ་དེ་གང་ཡིན་ནམ་ཞེ་ན།
མཎྜལ་ཞེས་པ་ནི། འཇིག་རྟེན་འདི་མཚོན་པའི་རྟགས་སྒོར་སྒོར་ཅན་ཞིག་རེད། དེ་ནི་གཏིང་ཟབ་པའི་དོན་མཚོན་པ་ལ་བེད་སྤྱོད་བྱེད་པ་ཡིན།
མཎྜལ་ནི་ནང་པའི་སྒོམ་དང་ཉམས་ལེན་མི་འདྲ་བ་མང་པོའི་ནང་དུ་བེད་སྤྱོད་བྱེད་ཀྱི་ཡོད། ཆེད་རྩོམ་འདིས་སྒོམ་ཉམས་ལེན་གྱི་གནད་དོན་ཆེ་གྲས་ལ་བལྟ་བ་ཡིན།
གསང་སྔགས་ནང་གི་མནྜལ་ལམ་དཀྱིལ་འཁོར།
རྒྱུད་དམ་གསང་སྔགས་ཉམས་ལེན་གྱི་ནང་། སྒོམ་བརྒྱབ་མཁན་རང་ཉིད་རྟག་བརྟན་ཐ་མལ་པའི་རང་གཟུགས་བདག་ཅེས་བྱ་བ་དེ་མི་སྣང་བར་བྱེད་ནས། དེའི་ཚབ་ཏུ་རང་ཉིད་ཡི་དམ་ལྷའི་གཟུགས་སུ་བསྒོམ་པའམ་སངས་རྒྱས་ཀྱི་གཟུགས་རྣམ་དུ་བསྒོམ་པ་ཞིག་ཡིན། འདིས་སངས་རྒྱས་ཀྱི་གོ་འཕང་ཡོངས་སུ་ཐོབ་ཟིན་པའི་རྣམ་པ་གཅིག་གམ་དུ་མ་མཚོན་པ་ཡིན། དཔེར་ན། ཡོངས་གྲགས་དང་འབྲེལ་བའི་འཕགས་པ་སྤྱན་རས་གཟིགས་སྙིང་རྗེའི་རང་གཟུགས་སུ་བསྒོམ་པ་ལྟ་བུ་ཡིན། རྒྱུད་ཉམས་ལེན་པ་དག་གིས། རང་ཉིད་སྤྱན་རས་གཟིགས་ཀྱི་སྐུར་བསྒོམ་ནས། རང་ཉིད་སྤྱན་རས་གཟིགས་དང་འདྲ་བར་སྙིང་རྗེ་རྒྱུད་ལ་ལྡན་ཡོད་པར་ཚོར་གྱི་ཡོད། སངས་རྒྱས་ཀྱི་གཟུགས་རྣམ་དེས་གཞན་དོན་སྒྲུབ་པ་ཇི་བཞིན་ང་ཚོས་ཀྱང་གཞན་ལ་ཕན་ཐོགས་ཐུབ་པར་བསམ་བཞིན་དུ་དེའི་གོ་འཕང་ལ་སླེབས་མེད་པ་ཡོངས་སུ་ཤེས་པའི་སྐབས་སུ། ང་ཚོས་རང་ཉིད་སངས་རྒྱས་པར་བྱེད་པའི་རྒྱུ་རྐྱེན་རྣམས་གནད་ལ་སྨིན་པ་ཞིག་བསྐྱེད་པར་བྱེད་ཐུབ་ཀྱི་ཡོད།
སངས་རྒྱས་ཀྱི་གཟུགས་རྣམ་མམ་ཡི་དམ་གྱི་ལྷ་རྣམས་ནི། འཇིག་རྟེན་གྱི་ཁམས་ཤིན་ཏུ་དག་པ་མནྜལ་ཞེས་པའི་ནང་དུ་བཞུགས་ཡོད། མནྜལ་ཞེས་པའི་ཐ་སྙད་དེ་འཇིག་རྟེན་གྱི་ཁམས་ཤིན་ཏུ་དག་པ་དེའི་་ཁོར་ཡུག་ཙམ་ལ་གོ་བ་མ་ཡིན་པར། དེར་གནས་བཅའ་བའི་སེམས་ཅན་རྣམས་ལའང་གོ་བ་ཡིན། འཇིག་རྟེན་གྱི་ཁམས་དེ་དག་རེ་རེ་ཡང་མི་འདྲ་བ་ཏོག་ཙམ་ཡོད་ཀྱང་སྤྱི་ཡོངས་ཀྱི་ཆ་ནས་བཤད་ན། དེ་དག་ལ་ས་ཡི་བཀོད་པ་མཛེས་སྡུག་ལྡན་པའི་དབུས་སུ་རྒྱན་གྱིས་སྤྲས་པའི་ཕོ་བྲང་གྲུ་བཞི་མ་ཞིག་ཆགས་ཡོད་པ་དང་། དེའི་མཐའ་རུ་སྲུང་སྐྱོབ་ཀྱི་ལྕགས་རི་སྒོར་མོས་སྐོར་བ་ཡོད་པ་ནི། སྒོམ་ཉམས་ལེན་ལ་བར་དུ་གཅོད་པར་བྱེད་པའི་གེགས་ཐམས་ཅད་འགོག་པར་བྱེད་པ་ཡིན། འདིའི་ནང་གི་ཡི་དམ་ལྷའི་གཟུགས་རིས་གཙོ་བོ་ནི་ཕོ་མོ་གང་ཡིན་རུང་ཆོག་ལ། དེ་དག་ཀྱང་གཅིག་རྐྱང་པར་བཞུགས་པའམ། ཡང་ན་གཉིས་ཡབ་ཡུམ་གྱི་གཞལ་མེད་ཁང་གི་དབུས་སུ་བཞུགས་པ་དང་བཞེངས་པའི་ཚུལ་དུ་ཡོད་པ་ཡིན། དེ་དག་ནམ་རྒྱུན་ཡི་དམ་གྱི་ལྷ་གཞན་དང་གཞན་གྱིས་བསྐོར་བའི་བཀོད་སྒྲིག་བྱས་ཡོད་པ་དང་། མཚམས་རེ་ཡི་དམ་གྱི་ལྷ་འཕར་མའི་གཟུགས་རིས་དག་ཀྱང་ཕོ་བྲང་དེའི་ཕྱི་རོལ་ཏུ་བཞུགས་པའང་ཡོད། ཡི་དམ་གྱི་ལྷ་མང་པོ་ཞིག་ལ་ཞལ་དང་ཕྱག་ཞབས་དུ་མ་ཡོད་པ་དང་། དེ་དག་གིས་ཕྱག་མཚན་སྣ་ཚོགས་པ་འཛིན་ཡོད།།
དབང་གི་ནང་་མནྜལ་ལམ་དཀྱིལ་འཁོར་བེད་སྤྱོད།
ཏནྟྲའམ་གསང་སྔགས་ཉམས་སུ་ལེན་པ་ལ། དབང་ངེས་པར་དུ་ཞུ་དགོས་པ་ཡིན། དབང་ནི་གསང་སྔགས་ཀྱི་བླ་མ་མཚན་ཉིད་ཡོངས་སུ་ཚང་བ་ཞིག་གིས་གཙོ་འཛིན་པའི་ཆོ་གའི་རིམ་པ་རྒྱས་པ་ཞིག་ཡིན། དབང་བསྐུར་བའི་སྐབས་སུ། བླ་མའི་མདུན་དུ་ཆ་ཚད་གཉིས་ལྡན་གྱི་བྲིས་པའི་སངས་རྒྱས་ཀྱི་གཟུགས་རྣམ་མམ་ཡི་དམ་ལྷའི་མནྜལ་ཞིག་བཤམས་ཡོད་པ་དང་། དེ་ཡང་དུས་རྒྱུན་རས་ཀྱི་སྟེང་དུ་བྲིས་པའམ། ཡང་ན་བྱེ་མས་བཞེངས་བཞག་པ་ཞིག་ཡིན། དེ་ནི་ཤིང་གི་སྒྲོམ་ལས་གྲུབ་པའི་ཕོ་བྲང་གི་བཟོ་དབྱིབས་སྟབས་བདེར་བཀོད་པའི་ནང་དུ་བཅུག་ཡོད། གང་ལྟར་ང་ཚོས་མནྜལ་བསྒོམ་པའི་སྐབས་སུ། དེ་ནི་རྟག་ཏུ་ཆ་ཚད་གསུམ་ལྡན་གྱི་མནྜལ་ཞིག་ཏུ་མཐོང་བ་ཡིན།
ཆོ་གའི་ལས་ལ་འཇུག་པའི་སྐབས་སུ། བླ་མས་དབང་ཞུ་པ་པོ་དག་ལ་སྡོམ་པ་དང་། གཞལ་ཡས་ཁང་ངམ་ཕོ་བྲང་དུ་ཞུགས་ཆོག་པའི་གནང་བ་སྦྱིན་པ་ཡིན། དེ་དང་ཆབས་ཅིག་དབང་ཞུ་པ་པོ་རྣམས་ཀྱིས་རང་ཉིད་དེའི་ནང་ཞུགས་པའི་མོས་པའམ་ཞུགས་ཡིན་བསམ་པ་བྱེད་ཀྱི་ཡོད། ཡི་དམ་གྱི་ལྷ་ལ་སྒོམ་པའི་དམིགས་རྣམ་སྣ་ཚོགས་པའི་ཉམས་ལེན་ལ་བརྟེན་ནས་སངས་རྒྱས་ཀྱི་གོ་འཕང་འཐོབ་པ་ལ་བདེ་བར་གཤེགས་པའི་སྙིང་པོ་ཞེས་བྱ་བའི་ནུས་པ་དེ་མཐུ་ལྡན་དུ་གྱུར་བ་ཡིན། གལ་ཏེ་མནྜལ་བྱེ་མས་བཞེངས་བཞག་པ་ཞིག་ཡིན་ན། ཆོ་གའི་མཇུག་ཏུ་དེའི་ནང་གི་འབྲུ་རྣམས་འཕྱག་སྟེ་གཅིག་ཏུ་སྤུངས་པ་ཡིན། དེས་མི་རྟག་པ་མཚོན་པ་དང་། དེ་ཆུ་ཆེན་པོའི་ནང་དུ་ཕུལ་བ་ཡིན།
དེའི་རྗེས་སུ། དབང་ཞུ་པ་པོ་རྣམས་རང་ཉིད་ལྷ་སྐུར་བསྒོམ་པའི་དབང་བསྐུར་ཟིན་པ་དང་། མནྜལ་སྒོམ་སྒྲུབ་དེ་ཡང་དེ་དག་གི་ཉིན་རེའི་ཉམས་ལེན་ཞིག་ཏུ་གྱུར་བ་ཡིན། ཡི་དམ་ལྷ་རེ་རེས་འཛིན་པའི་ཕྱག་མཚན་དག་གིས་སྒོམ་ཉམས་ལེན་དང་འབྲེལ་བའི་གལ་གནད་རེར་མཚོན་པ་ཡིན། དཔེར་ན། ཕྱག་དྲུག་གི་ལྷ་ལྟ་བུས་ཕ་རོལ་ཏུ་ཕྱིན་པ་དྲུག་གམ་ཕུགས་རྒྱངས་རིང་པོའི་བསམ་ཕྱོགས་མཚོན་པ་ཡིན།
ཉམས་ལེན་པ་དག་གིས་རང་ཉིད་གཞལ་ཡས་ཁང་དེའི་ཕྱི་ནང་དུ་ཡོད་པའི་ཡི་དམ་གྱི་ལྷ་ཐམས་ཅད་སྒོམ་པ་མ་ཟད། རང་ཉིད་ཀྱང་གཞལ་ཡས་ཁང་རང་ཡིན་པའང་བསྒོམ་གྱི་ཡོད། དེ་ཡང་གཞལ་ཡས་ཁང་གི་དཀྱིལ་འཁོར་དེ་མཛེས་བཀོད་ཀྱི་སྒྱུ་རྩལ་ཕུན་སུམ་ཚོགས་པ་ཡོད་ལྟ་བུར་བསམ་པ་ནི། སྒོམ་ཉམས་ལེན་གྱི་རྣམ་པ་སྣ་ཚོགས་པར་མཚོན། མནྜལ་ཁ་ཤས་ཀྱི་ལྕགས་རི་བཞི་ཅན་དེས་བདེན་པ་བཞི་མཚོན་པའང་ཡོང་སྲིད་པ་ཡིན་ལ། གཞལ་ཡས་ཁང་གྲུ་བཞི་མ་དང་ཟུར་གྱི་རིང་ཐུང་ཚད་མཉམ་པ་ཡོད་པ་དེས། སྟོང་ཉིད་ཀྱི་ཆ་ནས་བཤད་ན། སངས་རྒྱས་དང་སངས་མ་རྒྱས་པའི་མི་ཕལ་པ་གཉིས་གཅིག་པ་ཡིན་པར་བསྟན་གྱི་ཡོད།
ཡང་གསང་སྔགས་ཀྱི་སྒོམ་སྒྲུབ་ཧ་ཅང་ཚད་མཐོ་པོར་སླེབས་སྐབས་སུ། ཡི་དམ་ལྷའི་ལུས་ཀྱི་ཆ་ཤས་རྣམས་གཞལ་ཡས་ཁང་གི་ཆ་ཤས་སུ་བསྒོམ་པའམ། ཡང་ན་གཞལ་ཡས་ཁང་གི་ཡི་དམ་སྣ་ཚོགས་པ་དག་རང་ཉིད་ཀྱི་ལུས་ཀྱི་ནང་དུ་གནས་ཡོད་པའང་བསྒོམ་པ་ཡིན། དེ་ལ་ལུས་ཀྱི་མནྜལ་ལམ་དཀྱིལ་འཁོར་ཞེས་ཟེར། དེ་དཀའ་ལས་ཁག་པོ་ཡོད། གང་ཡིན་ཞེ་ན། དེ་བསྒོམ་པ་ལ་བསམ་གཏན་ཕུལ་དུ་བྱུང་བ་ཞིག་དགོས་པ་དང་། སངས་རྒྱས་པའི་ལྟ་གྲུབ་ཞིབ་ཅིང་ཕྲ་བ་རྟོགས་པ་ཞིག་དགོས་པ་ཡིན།
སྤྱིར་བཏང་ཉམས་ལེན་གྱི་ནང་མནྜལ་ལམ་དཀྱིལ་འཁོར།
སངས་རྒྱས་པའི་ཆོས་ཀྱི་བླ་མ་གང་ཞིག་ལས། ཏནྟྲའམ་གསང་སྔགས་ཀྱི་ཆོས་དང་། ཡང་ན་སྤྱིར་བཏང་གི་ཆོས་གང་འདྲ་ཞིག་འཐོབ་པར་བྱེད་པའི་སྔོན་དུ་སློམ་མ་རྣམས་ཀྱིས། མཇུག་ཏུ་གཏང་རག་གི་མནྜལ་འབུལ་བའི་སྐབས་དེར་བླ་མ་དེ་ལ་མནྜལ་ཞུ་འབུལ་བྱེད་སྲོལ་ཡོད། སྐབས་འདིར་མནྜལ་ཞེས་པ་ནི། ཡང་དག་ཅིང་རིན་པོ་ཆེས་གང་བའི་འཇིག་རྟེན་གྱི་ཁམས་མཚོན་པ་ཡིན། དེ་གང་ཡིན་ཞེ་ན། སློམ་མ་རྣམས་ཀྱིས་ནི། འཛམ་གླིང་ནང་གི་དངོས་པོ་ཐམས་ཅད་ལས་ལྷག་པའི་རྩ་ཆེ་ལ་རིན་ཐང་ལྡན་པ་ནི་ཆོས་ཡིན་པར་འདོད་པས། མནྜལ་འབུལ་བ་ནི། ཁོ་ཚོར་ཆོས་འཐོབ་པར་བྱེད་པ་ལ། རང་ཉིད་ལ་གང་ཡོད་པ་དང་གང་ཡིན་པ་ཐམས་ཅད་འབུལ་རྒྱུའི་འདུན་སེམས་དེ་མཚོན་པ་ཡིན།
མནྜལ་འབུལ་སྟངས་དེ་སྣོད་ཕོར་ཞབས་ལེབ་ཀྱི་གཟུགས་སུ་ཡོང་ཆོག དེ་ཡང་ཞབས་འོག་དེ་ཡར་བཀྱག་ནས་བཟུང་སྟེ། ནས་དང་འབྲུ་གསར་གྱི་ཕུང་པོའམ། དེའི་ངོས་སུ་རྩ་ཆེ་བའི་རིན་པོ་ཆེ་རྣམས་གཅིག་གི་སྟེང་དུ་གཅིག་བཞག་པ། དེའི་ནང་དུ་ཇེ་རྒྱས་སུ་འགྲོ་བའི་ལྟེ་བ་ཐུན་མོང་དུ་སྤྱད་པའི་སྒོར་སྒོར་ཆུང་ངུ་དག་ཡོད་པ། དེའི་རྩེ་ཏོག་རྒྱན་གྱིས་བརྒྱན་པ་ཞིག་ཡོད། ཡང་ན་མནྜལ་དེ་ཕྱག་རྒྱས་བཟོས་ཤིང་འཛུབ་མོ་རྣམས་བཀོད་རིས་བྱེ་བྲག་ཅིག་ཏུ་གཅུས་སྒྲིམ་བྱས་པའང་ཡོད། མཎྜལ་དེ་གཉིས་ཀས་སངས་རྒྱས་པའི་རིག་པའི་གཞུང་ལུགས་ནང་གསལ་བའི་འཇིག་རྟེན་མངོན་འགྱུར་གྱི་འཆར་སྣང་ཡང་དག་པར་མཚོན་པ་ཡིན། མནྜལ་འབུལ་བའི་སྐབས་སུ་སློབ་མ་རྣམས་ཀྱིས། ཚིགས་བཅད་འདོན་པའི་སྒོ་ནས། འཛམ་གླིང་སྟེང་གི་ཆ་རྐྱེན་ཐམས་ཅད་ཆོས་འཐོབ་པའི་མཐུན་འགྱུར་དུ་ཡོང་བ་དང་། སེམས་ཅན་ཐམས་ཅད་འཇིག་རྟེན་ཡང་དག་པའི་ནང་གནས་ཐུབ་པ་དང་། ངོ་མཚར་བའི་ཆོས་འདི་དག་ལ་བགོ་སྐལ་དུ་ལེན་ཐུབ་པའི་ཡིད་སྨོན་བྱེད་པ་ཡིན།
ནང་པ་མང་པོ་ཞིག་གིས་སྔོན་འགྲོའི་ཆོས་བྱེད་ཀྱི་ཡོད། དེ་ཡང་ཚད་མཐོ་པོའི་སྒོམ་ལ་འཇུག་པའི་སྟ་གོན་ཚུལ་དུ་སྤྱིར་བཏང་ཡི་དམ་ལྷའི་བཟླས་བརྗོད་གྲངས་འབུམ་གསོག་དགོས་པ་ཡིན། སྔོན་འགྲོའི་ཆོས་འདི་དག་གིས། གེགས་ཅན་གྱི་སེམས་ཚོར་རྣམས་སེལ་བ་དང་། སྒོམ་ཉམས་ལེན་གྲུབ་འབྲས་ཐོན་པ་ཞིག་ཡོང་བ་ལ་དགོས་གལ་ཅན་གྱི་དགེ་བའི་ནུས་ཤུགས་གོང་འཕེལ་གཏོང་བ་ལ་ཕན་ཐོགས་ཡོད་པ་ཡིན། མནྜལ་འབུམ་ཚར་ཕུལ་བ་ནི། སྔོན་འགྲོའི་ཆོས་ཀྱི་ཆ་ཤས་གཅིག་ཡིན་པ་དང་། དེས་ཉམས་ལེན་པ་རྣམས་བརྩོན་འགྲུས་ཀྱི་སྒོ་ནས་སྒོམ་ལ་དུས་ཚོད་ཆ་ཚང་ཞིག་གཏང་བ་ལ་བཀག་འགོག་དང་སྟངས་འཛིན་མེད་པ་བཟོ་བ་ལ་ཕན་ཐོགས་པ་དང་། དེ་བཞིན་དུ་གྲུབ་འབྲས་མཐར་སོན་པ་ཞིག་ཡོང་བར་ཆ་ཚང་བློས་གཏང་ཐུབ་པའི་འདུན་སེམས་ཤུགས་དྲག་ཅིག་ཀྱང་བསྐྲུན་པ་ཡིན།
ཕྱོགས་བསྡོམས།
ཇི་ལྟར་ང་ཚོས་ཤེས་གསལ་ལྟར། མནྜལ་ལམ་དཀྱིལ་འཁོར་ནི། སངས་རྒྱས་པའི་ཆོས་ཀྱི་སྒོམ་ཉམས་ལེན་སྣ་ཚོགས་པ་མང་པོའི་ནང་། འཇིག་རྟེན་གྱི་ཁམས་ཙམ་ཞིག་མཚོན་པའི་ཕྱིར་མ་ཡིན་པར། སངས་རྒྱས་པའི་ལམ་གྱི་རྣམ་གྲངས་མི་འདྲ་བ་མང་པོའི་ནང་དུའང་སྤྱོད་བཞིན་ཡོད། བོད་ཀྱི་དགེ་འདུན་པ་རྣམས་ཀྱིས་འཛམ་གླིང་གི་འདུ་ཚོགས་གང་སར་བོད་ཀྱི་གནས་བབས་ཤེས་རྟོགས་ཀྱི་ཆེད་དུ་བྱེ་མ་ལས་གྲུབ་པའི་ཡིད་དུ་འོང་བའི་མནྜལ་བཞེངས་དང་བཞེངས་མུས་ལ། དེ་དག་བཟོའི་རྒྱུ་རྩལ་གྱི་ཆ་ཤས་ཡ་མཚན་ཅན་ཁོ་ནར་ཡིན་པར་མི་ལྟ་བ་དེ་གལ་ཆེ། མནྜལ་ནི་སྤྱིར་བཏང་གསང་སྔགས་ཉམས་ལེན་དང་སྒོས་སུ་ཚད་མཐོ་པོའི་གསང་སྔགས་ཀྱི་ཉམས་ལེན་གཉིས་ཀ་ལ་ལས་ཀ་གཙིགས་ཆེན་ཞིག་བྱེད་པའི་སྒོམ་གྱི་ཐབས་ལམ་རྒྱས་སྤྲོས་ལྡན་པ་ཞིག་ཡིན་པ་དང་། དེས་ང་ཚོའི་སངས་རྒྱས་ཀྱི་གོ་འཕང་འཐོབ་པའི་ལམ་ལ་མཐུན་རྐྱེན་དང་རོགས་ཕན་བྱེད་ཀྱི་ཡོད།།