སྙིང་རྗེའི་སེམས་དང་ལྡན་པའི་བྱང་ཆུབ་སེམས།

ང་ཚོ་ཆོས་ཉམས་ལེན་ལ་དངོས་སུ་འཇུག་པའི་ས་མཚམས་སྟོན་པ་ནི་གཙོ་བོ་སྐྱེ་བ་ཕྱི་མའི་དོན་དུ་དོ་དབྱིངས་དང་སེམས་ཁུར་ཡོད་པའི་སྐབས་རེད། གཞུང་ཚང་མས་འདི་ལ་མོས་མཐུན་བྱེད་ཀྱི་ཡོད། ང་ཚོས་སྐྱེ་བ་ཕྱི་མའི་དོན་དུ་དོ་འཁུར་བྱེད་པའི་སྐབས། ད་ལྟ་ཡོད་པའི་དཀའ་ངལ་ལས་ཀྱང་སྡུག་པའི་རིགས་སྤོང་འདོད་ཡོད་པ་རེད། ང་ཚོས་ད་ལྟ་གང་བྱེད་བཞིན་པ་དེ་སྐྱེ་བ་ཕྱི་མར་མཇུག་མཐུད་སྲིད་པའི་གནས་སྟངས་ཁག་ལ་ལྟ་གི་ཡོད། དཔེར་ན། “ང་རང་ཧ་ཅང་བསོད་ནམས་ཅན་ཡིན། ང་རང་མ་ཤི་བར་དུ་བཀྲེས་སྐོམ་གྱིས་མནར་ནས་མེད། ང་རང་བཙོན་པའི་གསོག་སྒར་ཞིག་གི་ནང་མེད། ང་ནི་སེམས་ཀྱི་སྒོ་ནས་དབང་པོ་སྐྱོན་ཅན་མིན། ང་རང་ཕན་ཚུན་གཅིག་གིས་གཅིག་ལ་འཐབ་རྒོལ་བྱེད་བཞིན་པའི་ཀླ་ཀློའི་གནས་སྟངས་ཤིག་གི་ནང་མེད། ང་རང་གནས་སྟངས་དེ་དག་ཐམས་ཅད་ལས་ཐར་བ་དང་རང་གིས་རང་ཆོས་ཕྱོགས་དང་འབྲེལ་བའི་ཡར་རྒྱས་གཏོང་རྒྱུའི་གོ་སྐབས་བཟང་པོ་ཡོད་པ་ནི་ཧ་ཅང་བསོད་ནམས་ཅན་ཞིག་ཡིན། དེ་ལྟ་ནའང་། འདི་ནི་ཡུན་དུ་གནས་ཀྱི་མ་རེད། འཆི་བ་ནི་བསླེབ་ངེས་པ་རེད། འཆི་བ་ནི་ཚང་མར་ཡོང་རྒྱུ་ཡིན་པ་དང་དེ་ག་དུས་ཡོང་མིན་ངེས་པ་རྩ་ནས་མེད། དོས་སྐྱེལ་རླངས་འཁོར་ལྟ་བུ་ཞིག་དང་དུས་ངེས་མེད་ནང་བརྡབ་རྡུང་ཤོར་ནས་འཆི་སྲིད། འཆི་བ་ལ་རྒས་དགོས་པའི་ངེས་པ་མེད། གཞོན་ནུའི་དུས་ནས་འཆི་སྲིད་པ་རེད་” ཅེས་ང་ཚོས་སོ་སོའི་མི་ལུས་རིན་ཆེན་ལ་བསམ་བློ་གཏོང་གི་ཡོད། དེ་ནས་ཤི་བའི་རྗེས་སུ་གང་འབྱུང་སྲིད་དམ་ཞེས་བསམ་བློ་གཏོང་དགོས། ང་ཚོ་གནས་སྟངས་ཡག་པོ་ཞིག་གམ་ཡང་ན་གནས་སྟངས་སྡུག་ཅག་གང་རུང་ཞིག་གི་ནང་འགྲོ་གི་རེད། གནས་སྟངས་ངན་པ་དེ་དག་ལ་བལྟས་ན། དཔེར་ན། འབུ་སྲིན་གྱི་རིགས་དང་ཡི་དྭགས་ཀྱི་གནས་སུ་སྐྱེ་བ་ལྟ་བུ་ནི་འཇིགས་པ་ཆེན་པོའི་ཚོར་བ་མྱོང་གི་རེད། དེ་ནི་ཞེད་སྣང་ (fear) མ་རེད་འཇིགས་པ་ (dread) རེད། 

ནང་ཆོས་ནང་ང་ཚོས་ཞེད་སྣང་སྐྱེད་ཐབས་བྱེད་ཀྱི་མེད། ང་ཚོ་ངན་སོང་དུ་སྐྱེ་བར་ཞེད་སྣང་འདུག་ཟེར་བ་ནི་ཡིག་སྒྱུར་ནོར་བ་ཞིག་རེད། ང་ཚོ་ངན་སོང་དུ་སྐྱེ་བར་འཇིགས་པ་སྐྱེ་གི་འདུག་ཟེར་བ་དེས་གོ་དོན་ཆེ་བ་སྟོན་གྱི་ཡོད། ཞེད་སྣང་ནི་ང་ཚོ་མི་དགའ་སའི་གནས་སྟངས་ཀྱི་ཉེ་འཁོར་དུ་ཐིག་རྡོག་རྡོག་ཆེན་པོ་ཞིག་འཐེན་པའི་སེམས་ཀྱི་གནས་བབས་སྐྱོན་ཅན་ཞིག་ཡིན་པ་དང་དེ་ལ་ང་ཚོས་འཇིགས་སུ་རུང་བ་བཟོ་གི་ཡོད། དེ་ནས་ང་ཚོ་འགུལ་མི་ཐུབ་པ་ཆགས་ཀྱི་ཡོད། ང་ཚོས་དེ་ལ་གདོང་ལེན་བྱེད་ཐུབ་ཀྱི་མེད། འདི་ནི་ནང་ཆོས་ནས་གང་གསུངས་པའི་དོན་དེ་མིན། ང་ཚོས་གང་གི་སྐོར་ལ་བཤད་པ་ནི་འཇིགས་པ་རེད། དེ་ནི་གནས་སྟངས་ཧ་ཅང་འཇིགས་སུ་རུང་བ་ཞིག་རང་ཉིད་ལ་འབྱུང་བར་མི་འདོད་པ་དེ་རེད། ཞེད་སྣང་དང་འཇིགས་པའི་དབར་གྱི་ཁྱད་པར་ནི། སྣང་བར་མི་འགྲོ་བའི་མི་ཞིག་དང་མཉམ་དུ་ཕྱེད་ཡོལ་གྱི་རིང་དུས་ཚོད་སྐྱེལ་དགོས་པ་དང་མི་དེས་ཕྱེད་ཡོལ་གྱི་རིང་དེ་ཧ་ཅང་ལྟ་ན་མི་སྡུག་པ་བཟོ་བའི་གནས་སྟངས་དང་འདྲ་པོ་རེད། ང་ཚོས་དེ་ལ་ཞེད་སྣང་མེད་ནའང་། འཇིགས་པ་ཡོད་པ་ལྟ་བུ་རེད། འཇིགས་པ་ནི་གནད་དོན་ཞིག་མི་འབྱུང་བའམ་མི་ཡོང་བའི་འདོད་འདུན་ཤུགས་དྲག་དེ་ཡིན་པ་རེད། 

མ་འོངས་པའི་ངན་སོང་གི་གནས་ལ་འཇིགས་ནས་དེ་དག་ལས་ཐར་བའི་ཁ་ཕྱོགས་ཤིག་འཚོལ་གྱི་ཡོད། དེ་དག་ལས་ཐར་བའི་ཁ་ཕྱོགས་ནི་སྐྱབས་སུ་འགྲོ་རྒྱུ་དེ་རེད། སྐྱབས་འགྲོ་ནི་ང་ཚོས་མི་ཚེའི་ནང་དང་དུ་ལེན་པའི་ཉེན་མེད་ཀྱི་ཁ་ཕྱོགས་ཤིག་ཡིན། ང་ཚོས་ཆོས་ཀྱི་ཁ་ཕྱོགས་སུ་འགྲོ་བ་ནི་ཆོས་ལ་སྐྱབས་སུ་འགྲོ་བ་དེ་རེད། ཆོས་ཆ་ཚང་བ་ནི་ང་ཚོའི་སྐྱོན་གྱི་ཆ་དང་དཀའ་ངལ་ཡོངས་སུ་རྫོགས་པ་སྤངས་ཤིང་ནུས་པ་ཡོངས་སུ་རྫོགས་པ་རྟོགས་པའི་སྤང་རྟོགས་ཀྱི་ཡོན་ཏན་དང་ལྡན་པའི་གནས་བབས་དེ་རེད། 

ཆོས་ནི་སྔོན་འགོག་གི་ཐབས་ལམ་ཞེས་པའི་དོན་ཡིན་པ་དང་དེ་ནི་ང་ཚོས་དཀའ་ངལ་དང་སྡུག་བསྔལ་སྤོང་བའི་ཕྱིར་ཉམས་སུ་ལེན་དགོས་པའི་ཆོས་རྣམས་རེད། སྡུག་བསྔལ་ཡོངས་རྫོགས་སྤོང་བར་མཐར་ཐུག་ང་ཚོས་གང་བྱེད་ཐུབ་པ་ནི་སྡུག་བསྔལ་དང་དཀའ་ངལ་དེ་དག་ལ་རྒྱུ་བྱེད་པའི་སྐྱོན་ཀུན་སྤོང་དགོས་ཀྱི་ཡོད། དེ་ཡང་ “གལ་ཏེ་ང་རང་ཁོང་ཁྲོ་ཟ་བ་དང་། བློ་ཕམ་པ། ཚ་གི་ཚི་གེ་ཆགས་པ། སེམས་འཁྲལ་ཅན་ཆགས་ན། དེས་རང་ཉིད་ལ་དཀའ་ངལ་མང་པོ་བཟོ་གི་རེད། ཡིན་ནའང་། ངས་སོ་སོའི་ནུས་པ་ཚང་མ་རྟོགས་ཐུབ་ན། ངས་གནས་སྟངས་ཚང་མར་གདོང་ལེན་བྱེད་ཐུབ་པ་དང་གཞན་ཚང་མར་ཐབས་ཤེས་གང་དྲག་ཅི་དྲག་གིས་ཕན་འདོགས་ཐུབ་ངེས་ཡིན་པ་” ལྟ་བུ་རེད། ང་ཚོས་དེ་མཐོང་བའི་སྐབས། ཁ་ཕྱོགས་དེར་འགྲོ་འདོད་སྐྱེ་གི་ཡོད། 

ཁ་ཕྱོགས་དེར་འགྲོ་བ་ནི་དགེ་བ་དང་ཕན་ཐོགས་ཅན་ཞིག་རེད། དེ་ནི་སངས་རྒྱས་རྣམས་ཀྱིས་བསྟེན་པར་མཛད་ཡོད་ལ། དགེ་འདུན་གྱི་སྡེས་དེ་ལ་བརྩོན་པར་བྱེད་བཞིན་ཡོདད། དགེ་འདུན་ནི་དངོས་པོའི་གནས་ལུགས་མངོན་སུམ་དང་རྟོག་མེད་ཀྱི་སྒོ་ནས་མཐོང་བའི་འཕགས་པའི་གང་ཟག་རྣམས་རེད། དགོན་སྡེ་ཁག་གི་རབ་ཏུ་བྱུང་བའི་དགེ་འདུན་དང་བཙུན་མ་རྣམས་ཀྱིས་འཕགས་པའི་དགེ་འདུན་དཀོན་མཆོག་མཚོན་གྱི་ཡོད། ཉེན་མེད་ཀྱི་ཁ་ཕྱོགས་བཟང་པོ་དེ་ང་ཚོའི་མི་ཚེའི་ནང་བསྟེན་པ་ནི་སྐྱེ་བ་ཕྱི་མའི་ནང་ངན་སོང་གི་གནས་སུ་མི་སྐྱེ་བའི་ཐབས་ཡིན་པ་རེད། 

དམིགས་བསལ་ང་ཚོས་སྤྱོད་ལམ་གྱི་རྒྱུ་དང་འབྲས་བུའི་སྐོར་ལ་བསམ་བློ་གཏོང་དགོས། གལ་ཏེ་ང་ཚོས་མི་དགེ་བའི་ལས་བརྩམས་ན། དེའི་འབྲས་བུར་གནོད་སྐྱོན་དང་དཀའ་ངལ་འབྱུང་གི་ཡོད་པ་ཤེས་དགོས། ང་ཚོས་མི་དགེ་བའི་ནུས་པའམ་སྡིག་པ་རླབས་པོ་ཆེ་གསོག་པ་དེ་མི་དགེ་བའི་ནུས་པ་དེ་སོ་སོ་རང་ཉིད་ཀྱིས་མྱོང་གི་ཡོད། ང་ཚོ་དེ་ལ་འཁར་ནས་ཡོད། གལ་ཏེ་ང་ཚོས་མི་དགེ་བའི་ལས་དེ་དག་ལ་འཛེམས་ནས་དགེ་བའི་ལས་ལ་འཇུག་པ་ཡིན་ན། དགེ་བའི་ནུས་པའམ་བསོད་ནམས་ཀྱི་ཚོགས་བསགས་ན། དེ་ལ་རྗེས་འབྲས་སུ་མ་འོངས་པར་གནས་སྟངས་བཟང་བ་ཡོང་གི་རེད། དེ་ལྟར་ང་ཚོས་སྐྱེ་བ་ཕྱི་མ་ཡར་རྒྱས་གཏོང་བའི་ཆེད་དུ་འབད་བརྩོན་བྱེད་དགོས། 

ང་ཚོ་སྐྱེ་བ་ཕྱི་མར་གང་དུ་སྐྱེས་ནའང་འདྲ་སྟེ། དེའི་སྐབས་སུའང་དབང་མེད་ཀྱིས་ཡང་ནས་ཡང་དུ་འབྱུང་བའི་དཀའ་ངལ་དང་སྡུག་བསྔལ་ཡོང་གི་རེད། དཔེར་ན། ཡིད་བསུན། མི་རྣམས་དང་ཐད་རྒོལ་དང་རྩོད་རྙོག །སོ་སོར་གང་འདོད་པ་དེ་མི་ཐོབ་པ། གང་མི་འདོད་པ་དང་འཕྲད་པ་སོགས་འབྱུང་ངེས་པ་རེད། དེ་དག་འབྱུང་བའི་རྒྱུ་མཚན་ནི་ང་ཚོ་སོ་སོ་སུ་ཡིན་མི་ཤེས་པ་དང་། ང་ཚོ་ཇི་ལྟར་ཡོད་པ་མི་ཤེས་པ། མི་གཞན་རྣམས་ཀྱང་ཇི་ལྟར་ཡོད་པ་མི་ཤེས་པའི་དབང་གིས་རེད། དེ་དག་གི་སྐོར་མི་ཤེས་པའི་རྐྱེན་གྱིས་ང་ཚོ་རྨོངས་ནས་ཡོད། རྨོངས་པ་སོང་ཙང་། ང་ཚོས་ཉེན་སྲུང་མེད་པ་ཚོར་གྱི་ཡོད། ཉེན་སྲུང་མེད་པ་ཚོར་བའི་རྐྱེན་གྱིས་ཉེན་སྲུང་དང་བདེ་འཇགས་ཤིག་ཡོང་བའི་ཕྱིར། རང་གི་ངོ་བོར་འཛིན་གྱི་ཡོད། ང་ཚོས་སོ་སོ་རང་ཉིད་ཀྱི་རྣམ་པ་ཞིག་ལ་འཛིན་པ་སྐྱེ་བ་དང་དེ་ཡང་བདེན་པ་དང་རྟོག་པ་གང་རུང་ཡིན་ཞིང་། དེ་ལ་ང་ཚོས་ “དེ་ནི་བདག་གམ་ང་རེད་” ཅེས་ངོས་འཛིན་བྱེད་ཀྱི་ཡོད། 

ང་ཚོས་སོ་སོ་རང་ཉིད་སྤྱི་ཚོགས་ཀྱི་ལས་འགན་ཡང་ན་འཚོ་ཐབས་ལ་ངོས་འཛིན་བྱེད་ཆོག་པ་སྟེ། “ང་ནི་ཚོང་པ་ཞིག་ཡིན། དེ་ནི་ང་རང་སུ་ཡིན་པ་དེ་རེད་” ཅེས་པའམ། ཡང་ན་ “ང་ནི་ཨ་མ་ཡིན་” ཞེས་པའམ་ “ང་ནི་ཨ་ཕ་ཡིན་” ཞེས་པ་ལྟ་བུ་རེད། ང་ཚོས་སོ་སོའི་ངོ་བོ་ཡོངས་སུ་རྫོགས་པ་དེ་ལ་གཞི་བྱེད་ཀྱི་ཡོད་པ་དང་། ད་དུང་ཡང་ཉེན་སྲུང་མེད་པ་ཚོར་གྱི་ཡོད། རང་གི་ངོ་བོ་དེ་དག་སྲུང་སྐྱོབ་དང་བདེན་པ་དག་སྐྱེལ་བྱེད་ཐབས་བྱེད་ཀྱི་ཡོད། དེ་ལྟར་བྱེད་པའི་སྐབས་སུ་ང་ཚོས་ཧ་ཅང་རང་ཤུགས་དང་ངང་ངམ་ཤུགས་ཀྱི་སྒོ་ནས་བྱ་སྤྱོད་སྤེལ་གྱི་ཡོད། ང་ཚོས་མི་གཞན་ལ་ཐུབ་ཚོད་གཏོང་གི་ཡོད། “ང་ནི་ཨ་ཕ་ཞིག་ཡིན་པ་དང་ང་ལ་གུས་ཞབས་བྱེད་དགོས་ངེས་རེད་” ཅེས་བསམ་གྱི་ཡོད། ང་ཚོའི་ཕྲུ་གུ་ལ་དེ་ལ་བརྟེན་པའི་དཀའ་ངལ་ཡོད་ངེས་པ་དང་རྩོད་རྙོག་ཆེན་པོ་ཞིག་ཡོད་པ་རེད། 

ཕྲུ་གུ་དེས་ “ང་ནི་རང་རྐང་ཚུགས་ཐུབ་པའི་མི་ཞིག་ཡིན། ང་རང་ག་རེ་བྱེད་འདོད་ཡོད་པ་དེ་ངས་ཤེས་” ཞེས་བཤད་ཀྱི་ཡོད། ཕྲུ་གུ་དེས་བཅུ་ཐོག་ན་གཞོན་ཞིག་ཡིན་པའི་ཆ་ནས་རང་གི་ངོ་བོ་དེ་རང་རྐང་ཚུགས་པ་ཞིག་ཡིན་པར་གཞི་བཅོལ་གྱི་ཡོད། དེ་ནས་ཨ་ཕས་རང་གི་ངོ་བོ་རྒྱུན་སྐྱོང་བྱེད་དགོས་པས། ཁོང་གིས་ “མ་རེད། ཁྱེད་ཀྱིས་ངའི་ཁ་ལ་ངེས་པར་དུ་ཉན་ནས་བརྩི་འཇོག་བྱེད་དགོས་” ཞེས་བརྗོད་ཀྱི་ཡོད། དེ་ལྟར་མི་ཚང་མ་ཉེན་སྲུང་མེད་པ་དང་རང་གི་སྤྱི་ཚོགས་ཀྱི་ལས་འགན་ལ་འཛིན་པ་ཇེ་ཆེར་སྐྱེ་གི་ཡོད། དེ་ལ་བརྟེན་ནས་དབང་མེད་ཀྱིས་ཡང་ནས་ཡང་དུ་རྩོད་པ་དང་། འཁྲུག་འཛིང་། འཁོན་འཛིན་སོགས་འབྱུང་གི་ཡོད། འདི་ནི་འཁོར་བ་ཞེས་སུ་གྲགས་པ་སྟེ། དབང་མེད་ཀྱིས་ཡང་ནས་ཡང་དུ་འབྱུང་བའི་སྡུག་བསྔལ་དང་དཀའ་ངལ་གྱིས་ཁེངས་ནས་ཡོད་པ་འདི་རེད། 

རྒྱུན་ཆད་མེད་པར་ཡང་ནས་ཡང་དུ་འབྱུང་བའི་དཀའ་ངལ་གྱི་རྒྱུན་འཁོར་འདི་ལས་ཐར་འདོད་ཀྱི་ཆོད་སེམས་ཤིག་ང་ཚོས་སྐྱེད་དགོས། འདི་ནི་ངེས་འབྱུང་ཡིན་པ་དང་ཨིན་སྐད་ནང་ནམ་རྒྱུན་ (renunciation) ཞེས་བསྒྱུར་ཡོད་ནའང་། འདི་ནི་འགྱུར་ནོར་བ་ཞིག་རེད། ཨིན་སྐད་ནང་ང་ཚོས་གང་ཡོད་པ་ཚང་མ་སྤངས་ནས་བྲག་ཕུག་ཏུ་སྡོད་དགོས་པ་ལྟ་བུའི་ཚིག་གི་ཐུན་མིན་གྱི་གོ་དོན་ཞིག་སྟོན་གྱི་ཡོད། སངས་རྒྱས་ཀྱིས་དེ་ལྟར་གསུངས་མེད། ང་ཚོར་བསམ་བློ་འདི་འདྲ་ཞིག་ཡོད། གང་ཡིན་ཞེ་ན། ང་ཚོས་རྗེ་བཙུན་མི་ལ་རས་པ་ལྟ་བུས་རང་གི་ནང་མི་དང་གྲོང་དང་བཅས་པ་སྤངས་མཛད་ནས་བྲག་ཕུག་ཏུ་བཞུགས་པའི་སྐོར་བཀླགས་མྱོང་ཡོད་སྟབས། ང་ཚོས་ཀྱང་དེ་ལྟར་བྱ་དགོས་ཞེས་བསམ་གྱི་ཡོད། དེ་ནི་ངེས་འབྱུང་གི་གོ་དོན་མིན། ང་ཚོས་སོ་སོའི་འདོད་ཆགས་རགས་པ་རྣམས་དང་རང་ལ་གང་ཡོད་པའི་དངོས་པོ་རྣམས་ལ་ཞེན་པ་དེ་སྤོང་དགོས་པ་གསལ་པོ་རེད། ཡིན་ནའང་། དེ་ནི་སོ་སོའི་ནང་ལ་རྒྱུ་དངོས་གང་ཡོད་པ་ཚང་མ་སྒེའུ་ནས་ཕྱིར་གཡུག་དགོས་པ་ལྟ་བུའི་དོན་མིན། 

དེ་ལས་ལྡོག་སྟེ། ངེས་འབྱུང་དེ་ཨིན་སྐད་ནང་ (renunciation) ཞེས་བསྒྱུར་བའི་བསམ་བློ་དངོས་ནི་ཐར་འདོད་ཀྱི་ཆོད་སེམས་དེ་རེད། དེ་ནི་ “རང་ཉིད་ལ་ཡོད་པའི་དཀའ་ངལ་དང་། རང་གི་ནང་མི་དང་མཉམ་དུ་རྩོད་རྙོག་གང་ཡོད་པ་རྣམས་དང་ལས་ཀའི་དཀའ་ངལ་སོགས་དེ་དག་ཐམས་ཅད་ནི་འཛད་མཐའ་མི་འདུག །ད་ང་ནི་ཞེན་པ་ལོག་གི་འདུག །ཉོབ་སྣང་སྐྱེ་གི་འདུག །འདི་དག་ལས་ཐར་འདོད་འདུག་” ཅེས་ང་ཚོས་བློ་ཐག་བཅད་ཟིན་པ་དང་སེམས་ཐག་ཆོད་ཟིན་པ་རེད། དེ་ལ་གཞི་བྱས་ནས་ང་ཚོས་དངོས་པའི་གནས་ལུགས་མཐོང་བའི་ཤེས་རབ་དང་ང་ཚོ་ཇི་ལྟར་ཡོད་པར་རྟོགས་པའི་ཤེས་རབ་གོང་འཕེལ་གཏོང་ཐབས་བྱེད་དགོས། དོན་ངོ་མར་ང་ཚོ་ནི་རྡོག་རྡོག་ཚུགས་ཐུབ་ཏུ་གྲུབ་པའི་ངོ་བོ་དེ་དག་གི་ནང་ལོགས་སུ་སྒོ་ལྕགས་རྒྱག་ནས་ཡོད་པ་ལྟ་བུ་གྲུབ་མེད། གནས་སྟངས་རྣམས་ནི་དེ་ལས་རྦད་དེ་གུ་ཡངས་པ་ཡོད། ང་ཚོ་ནི་ཁྱད་མཚར་པོ་དང་། རྟོག་པས་བསྐྲུན་པ། ཡིན་པ་མི་སྲིད་པའི་ཚུལ་དུ་གྲུབ་མེད། ང་ཚོ་ནི་ཕ་མ་གཅིག་པུ་མིན་པར། གྲོགས་པོ་དང་སོ་སོ་རང་ཉིད་ཀྱི་ཕ་མའི་ཕྲུ་གུའང་ཡིན་པ་རེད། ང་ཚོ་ནི་གནད་དོན་མང་པོའི་སྒོ་ནས་ཕན་ཚུན་འབྲེལ་བ་ཆགས་ཀྱི་ཡོད། དེར་བརྟེན་ང་ཚོས་ཐར་འདོད་ཀྱི་ཆོད་སེམས་འདི་གོང་འཕེལ་གཏོང་འདོད་ཡོད་པ་དང་། འདིས་ང་ཚོར་ཆོས་ཉམས་ལེན་ལ་འཇུག་པ་དང་ཤེས་རབ་འཐོབ་པར་སྐུལ་འདེད་བྱེད་ཀྱི་རེད། 

དེའི་རྗེས་སུ་ང་ཚོས་ “འཇིག་རྟེན་འདིའི་ནང་ཡོད་མཁན་ནི་ང་རང་གཅིག་པུ་མ་རེད། ང་དང་མཉམ་དུ་གཞན་ཐམས་ཅད་ཡོད། དེ་དག་གི་ཆེད་དུ་གང་བྱེད་དགོས་སམ། ཁོང་ཚོའི་ཆེད་དུ་ང་ལ་འགན་འཁྲི་ཞིག་ཡོད་དམ་” ཞེས་བསམ་དགོས། ང་ཚོས་ “མེད། ཁོང་ཚོའི་ཆེད་དུ་སུས་འགན་འཁྱེར་གྱི་རེད། ང་ནི་ཁོང་ཚོ་དང་འབྲེལ་བ་མེད། ངས་སོ་སོ་རང་ཉིད་གཅིག་པུའི་དོན་དུ་ལས་ཀ་བྱེད་ཐུབ་” ཅེས་ཤོད་སྲིད། འོན་ཀྱང་། འདི་ནི་དངོས་གནས་དངོས་ཡོད་དང་མི་མཐུན་པ་ཞིག་རེད། རྒྱ་གར་གྱི་སློབ་དཔོན་ཆེན་པོ་ཞི་བ་ལྷས་ལག་པ་དང་རྐང་པའི་དཔེ་མཚོན་བཞག་མཛད་ཡོད། གལ་ཏེ་ང་ཚོའི་རྐང་པར་ཚེར་མ་ཟུག་པའི་དབང་དུ་བཏང་ནས་ལག་པས་རྐང་པར། “རྐང་པ་བསོད་བདེ་མི་འདུག །དེ་ནི་ཁྱེད་ཀྱི་དཀའ་ངལ་རེད། ང་ནི་ལུས་སྟོད་འདིར་འགྲིག་གི་འདུག་” ཅེས་བརྗོད་ན། དེ་ནི་དངོས་གནས་གླེན་པ་རང་རེད། ལག་པས་རྐང་པར་རོགས་བྱེད་དགོས་ཀྱི་ཡོད། གང་ཡིན་ཞེ་ན། ཡན་ལག་ཚང་མ་ཕན་ཚུན་འབྲེལ་ནས་ཡོད་པ་དང་ང་ཚོ་ནི་གཞན་ཚང་མ་དང་ཧ་ཅང་འབྲེལ་ནས་ཡོད་པ་རེད། 

གལ་ཏེ་ཉིན་གཅིག་ཧྲིལ་པོའི་དུས་ཡུན་གྱི་ནང་བེད་སྤྱོད་བྱེད་པ་དང་སྐྱིད་པོ་གཏོང་བ་ཚང་མར་བསམ་བློ་བཏང་ན། ང་ཚོས་འདི་ལས་སླ་པོའི་སྒོ་ནས་མཐོང་ཐུབ། དཔེར་ན། ང་ཚོས་དེ་རིང་ཞོགས་ཟ་གང་འཐུང་ཡོད་པ་ལྟ་བུ་རེད། ང་ཚོས་འབྲུ་ཟས་ཕོར་པ་གང་བཟས་ཡོད་སྲིད། འོ་ན་འབྲུ་ཟས་ཕོར་པ་གང་དེ་ག་ནས་བྱུང་བ་རེད་དམ། གྲོ་དང་འབྲུ་རིགས་སྐྱེད་འཕེལ་བྱེད་པར་མི་མང་པོས་རྩོལ་བ་བྱས་ཡོད། ཐོག་མར་ས་བོན་བཏབ་པ་ནས་བཙས་མ་རྔ་བའི་དུས་ཀྱི་བར་དང་དེ་མཚམས་བཙས་མ་བརྔས་རྗེས་གྲོ་ཞིབ་ཏུ་བཟོ་བའི་ཕྱིར་བཟོ་ལས་ཁང་གི་འཐག་འཁོར་དུ་ཁྱེར་ནས་མི་འགའ་ཞིག་གིས་འབྲུ་ཟས་བཟོས་པ་དང་འགའ་ཞིག་གིས་དེ་དག་ཐུམ་རྒྱག་གི་ཡོད། མི་དེ་དག་ཐམས་ཅད་ཀྱིས་ང་ཚོའི་ཆེད་འབྲུ་ཟས་དེ་གྲ་སྒྲིག་བྱས་ཡོད། དེ་ནས་འབྲུ་ཟས་སྒམ་ཆུང་རྣམས་རྒྱལ་ཁབ་སོ་སོར་གཏོང་དགོས་པ་དང་སོ་སོའི་ས་ཆར་གནམ་གྲུ་དང་། གྲུ་གཟིངས། ལམ་ཐོག་ནས་འོར་འདྲེན་བྱེད་དགོས་ཀྱི་ཡོད། འོ་ན་ལམ་དང་གནམ་གྲུ་རྣམས་སུས་བཟོས་པ་རེད་དམ། དོས་སྐྱེལ་རླངས་འཁོར་དང་གནམ་གྲུ་བཟོ་བྱེད་ཀྱི་རྒྱུ་ཆ་རྣམས་ག་ནས་བྱུང་ཡོད་དམ། སྣུམ་གྱི་རིགས་ག་ནས་བྱུང་བ་རེད་དམ། རླངས་སྣུམ་བཟོ་ཆེད་གཏུམ་འབྲུག་ཚང་མའི་ལུས་པོ་རུལ་ཞིག་བཏང་བ་ལ་བསམ་བློ་ཐོངས། འབྲུ་ཟས་སྒམ་ཆུང་གཅིག་བཟོ་བའི་རྒྱུད་རིམ་ནང་མི་དང་དུད་འགྲོ་སེམས་ཅན་ཧ་ཅང་མང་པོ་ཡོད། 

ང་ཚོས་འབྲུ་ཟས་ཀྱི་ཁ་ལག་ཇི་ལྟར་བཟོས་ཡོད་དམ། དེ་ལ་ཐབ་ཚང་ནང་གློག་དགོས་པ་དང་ཐབ་ལ་རླངས་གཟུགས་དགོས་ཀྱི་ཡོད། དེ་ཡང་གློག་བཟོ་སྐྲུན་དང་མཁོ་སྤྲོད་ཀྱི་བཟོ་ལས་ཁང་དུ་ལས་ཀ་བྱེད་མཁན་དང་རླངས་གཟུགས་ལ་ཕུ་མདའ་རྒྱག་མཁན་དང་གསོར་འབིགས་བྱེད་མཁན་རྣམས་ལ་བརྟེན་ནས་རེད། བྱེད་སྒོ་དེ་དག་ཐམས་ཅད་ཀྱི་ནང་མི་ཧ་ཅང་མང་པོས་མཉམ་ལས་བྱས་ཡོད་པ་དང་ང་ཚོས་དེ་ནི་འབྲུ་ཟས་ཕོར་པ་ཆུང་ངུ་གཅིག་ཏུ་བསམ་གྱིན་ཡོད། ང་ཚོས་བཟའ་བའི་ཟས་དང་གྱོན་པའི་གོས་ལ་སོགས་པ་གཞན་དག་ཐམས་ཅད་ག་ནས་བྱུང་བ་རེད་དམ། ང་ཚོའི་ཁང་པའི་ནང་ཡོད་པའི་ཅ་དངོས་ཚང་མ་ག་ནས་བྱུང་བ་རེད་དམ། ངའི་འབྲུ་ཟས་བཟའ་བྱེད་ཀྱི་ཕོར་པ་དེའང་ག་ནས་བྱུང་བ་རེད་དམ། འབྲུ་ཟས་དེ་ལ་འགྱིག་ཚིའམ་ཤོག་མཐུག་ཅིག་ཀྱང་ཡོད་པས། དེ་ག་ནས་བྱུང་བ་རེད་དམ། དེ་ག་ནང་བཞིན་ཤིང་དང་། འགྱིག །ཤོག་བུ། པར་སྐྲུན་གྱི་བཟོ་ལས་ཁང་གི་མི་ཚང་མ་འབྲུ་ཟས་ཐུམ་བྱེད་བཟོ་བར་འབད་བརྩོན་བྱས་ཡོད་པས། དེ་དག་ཐམས་ཅད་ལ་བསམ་བློ་གཏོང་དགོས། 

ང་ཚོའི་མི་ཚེ་འཚོ་ཐུབ་པ་དང་གོ་སྐབས་དང་ལྡན་པ་བཟོ་མཁན་གྱི་མི་བརྒྱ་ཕྲག་དང་སྟོང་ཕྲག་ཡོད་པ་རེད། སོ་སོ་ཁོ་ནའི་དོན་དུ་ལས་ཀ་བྱེད་པ་ནི་དོན་དག་མེད་པ་ཞིག་རེད། གང་ཡིན་ཞེ་ན། ང་ཚོ་ཚང་མ་ཕན་ཚུན་རྟེན་ཅིང་འབྲེལ་ནས་ཡོད། གལ་ཏེ་མི་ཚང་མ་དཀའ་ངལ་ཅན་གྱི་གནས་སྟངས་འཇིགས་སུ་རུང་བ་ཞིག་གི་ནང་ཡོད་པ་དང་སོ་སོ་རང་ཉིད་ལ་དཀའ་ངལ་མེད་པར་འགྲིག་བསྡད་ཡོད་ན། དེས་ཕན་ཐོགས་པ་ཞིག་ཡོང་གི་མ་རེད། དེ་དང་མཚུངས་པར་གལ་ཏེ་རྡུལ་ཕྲན་གྱི་དམག་ཅིག་ལས་སོ་སོ་རང་ཉིད་གཅིག་པུ་གསོན་པོར་ཐར་བ་དང་མི་གཞན་ཚང་མ་འདས་གྲོངས་སུ་གྱུར་བ་དང་། སོ་སོ་ཁེར་རྐྱང་འབར་རྫས་ཉེན་སྐྱོབ་གནས་ཁང་དུ་ཁ་ལ་རླངས་གཟུགས་ཉེན་སྐྱོབ་ཀྱི་ཁ་རས་གྱོན་ནས་གསོན་པོར་ལྷག་ཡོད་ནའང་། དེས་ཕན་གྱི་མ་རེད། ང་ཚོ་དེ་ལྟར་དུས་ཚོད་ག་ཚོད་བར་དུ་གནས་ཐུབ་བམ། ཡུན་རིང་གནས་ཀྱི་མ་རེད་ལ། གནས་པའི་རིང་ལ་ཧ་ཅང་སྐྱིད་ཚོར་ལྡན་པ་ཞིག་ཀྱང་ཡོང་གི་མ་རེད། 

དེ་འདྲའི་སྒོ་ནས་ང་ཚོས་གཞན་དོན་དུ་བསམ་བློ་གཏོང་འགོ་བཙུག་གི་ཡོད། ང་ཚོས་གཞན་གྱི་བཀའ་དྲིན་དྲན་པ་དང་དེ་ལ་དྲིན་ལན་འཇལ་འདོད་ཡོད། ཁོང་ཚོར་བདེ་བ་དང་ལྡན་པའི་ཡིད་སྨོན་དང་བཅས་བྱམས་པ་སྐྱེད་པ་དང་སྡུག་བསྔལ་དང་འབྲལ་བར་ཤོག་ཅེས་སྙིང་རྗེ་སྒོམ་དགོས། དེའི་སྟེང་ལ་ང་རང་ཚོ་སོ་སོའི་ངོས་ནས་ཕན་ཕོགས་བསྒྲུབ་པའི་འགན་འཁྲི་དང་དུ་བླང་དགོས། ང་ཚོས་སོ་སོའི་ཕྲུ་གུ་ཆུས་ཁྱེར་བ་ལ་ཆུ་རྫིང་གི་ཟུར་དུ་ལངས་ནས་བལྟས་ཏེ་ “ཨ་ཙི། དེ་འདྲའི་ངོ་ཚ་བ་ལ། དེ་འདྲ་ཞིག་བྱུང་མེད་ན་ཅི་མ་རུང་” ཞེས་བརྗོད་པས་ཕན་ཐོགས་མེད་པ་ནང་བཞིན་རེད། དེ་ནི་སྙིང་རྗེ་འགྲིགས་ངེས་ཤིག་མིན། ང་ཚོས་དངོས་སུ་ཐབས་ཤེས་ཤིག་བྱེད་དགོས། ཆུའི་ནང་མཆོངས་ནས་ཕྲུ་གུའི་སྲོག་བསྐྱབ་པའི་འགན་དེ་འཁྱེར་དགོས། འདི་ནི་ཁྱད་པར་དུ་འཕགས་པའི་ཆོད་སེམས་ཏེ། ལྷག་པའི་བསམ་པ་དེ་ཡིན་པ་དང་དེ་ནི་ “ངས་གཞན་དོན་ཆེད་དུ་དངོས་སུ་ཐབས་ཤེས་དང་འབད་བརྩོན་བྱེད་ཀྱི་ཡིན་” ཞེས་པའི་ཆོད་སེམས་དེ་རེད། 

དེ་ནས་ང་ཚོས་ “གཞན་ལ་ཕན་འདོགས་པའི་ལས་ཀ་ཡག་ཤོས་དེ་ངས་དངོས་གནས་བྱེད་ནུས་སམ། དྲང་པོར་ཞུས་ན། ངས་བྱེད་མི་ནུས། ངས་སོ་སོ་རང་ཉིད་ལ་ཕན་འདོགས་པ་ཤིན་ཏུ་དཀའ་བས། གཞན་ལ་ཕན་ཇི་ལྟར་འདོགས་ཐུབ་བམ། ཐབས་གཅིག་རང་ཡོད་པ་ནི་ངས་སངས་རྒྱས་ཀྱི་གོ་འཕང་ཐོབ་པར་བྱ་རྒྱུ་དེ་རེད། སངས་རྒྱས་ཀྱི་གོ་འཕང་འཐོབ་པར། ངས་སྐྱོན་གྱི་ཆ་ཚང་མ་སྤོང་དགོས་པ་དང་ནུས་པ་དང་ཡོན་ཏན་གྱི་ཆ་ཡོངས་སུ་རྫོགས་པ་རྟོགས་དགོས་ཀྱི་ཡོད། དེ་ལྟར་བྱུང་ན། ངས་གཞན་ཐམས་ཅད་ལ་གང་ལ་གང་དགོས་ཀྱིས་ཕན་འདོགས་ཐུབ་ཀྱི་རེད་” ཅེས་རང་གིས་རང་ལ་འདྲི་དགོས། ང་ཚོས་བྱང་ཆུབ་ཀྱི་སེམས་སྐྱེད་དགོས། དེ་ཡང་གཞན་ཐམས་ཅད་ཀྱི་དོན་དུ་སངས་རྒྱས་ཀྱི་གོ་འཕང་འཐོབ་པའི་ཆེད་དུ་སེམས་སྐྱེད་དགོས། བྱང་ཆུབ་ཀྱི་སེམས་སྐྱེད་པ་ཞེས་པ་ནི་ང་ཚོའི་སེམས་དེ་གཞན་དོན་དུ་རྒྱ་སྐྱེད་པ་དང་། རང་གི་ནུས་པ་ཡོངས་སུ་རྫོགས་པ་རྟོགས་པ་དང་སྐྱོན་གྱི་ཆ་ཚང་མ་ལས་ཐར་ནས་གཞན་ལ་ཕན་གང་ཐུབ་བསྒྲུབ་པའི་ཆེད་རང་གི་སེམས་རྒྱ་སྐྱེད་གཏོང་བར་གོ་བ་ཡིན། 

འདི་ནི་ང་ཚོས་རང་གིས་རང་ལ་ཡར་རྒྱས་གཏོང་བའི་ལམ་གྱི་རིམ་པ་དེ་ཡིན། ཐོག་མར་ང་ཚོས་སྐྱེ་བ་ཕྱི་མ་བཟང་པོ་ཞིག་ཡོང་བར་ངེས་བརྟན་བཟོ་དགོས། དེ་ནས་སྡུག་བསྔལ་དང་དཀའ་ངལ་ཡོད་དོ་ཅོག་ལས་མཐའ་གཅིག་ཏུ་ཐར་བའི་ཆོད་སེམས་སྐྱེད་དགོས། མཐར་ཐུག་སེམས་ཅན་ཐམས་ཅད་ལ་ཕན་པའི་ཕྱིར། སངས་རྒྱས་ཀྱི་གོ་འཕང་འཐོབ་པའི་ཆེད་བསྔོ་སྨོན་བྱེད་དགོས། ང་ཚོས་གཞན་ཐམས་ཅད་བདེ་སྐྱིད་དང་ལྡན་པ་དང་སྡུག་བསྔལ་མི་འབྱུང་བའི་སེམས་ཁུར་དང་བཅས་བྱམས་པ་དང་སྙིང་རྗེ་ལ་གཞི་བྱས་ནས་འགན་འཁྲི་འདི་ཁུར་ལེན་བྱེད་དགོས། 

གལ་ཏེ་ང་ཚོས་ཆེས་ཐོག་མའི་ལམ་གྱི་རིམ་པ་རྣམས་བརྒྱུད་ནས་མ་འགྲིམས་པར། སངས་རྒྱས་ཀྱི་གོ་འཕང་འཐོབ་པའི་སྨོན་སེམས་མཐར་ཐུག་པའི་རིམ་པར་མཆོངས་འགྲོ་ཐབས་བྱས་ན། ག་རེ་ཡོང་གི་རེད་དམ། ང་ཚོར་དཀའ་ངལ་ཡོང་གི་རེད། དཔེར་ན། གལ་ཆེ་བའི་གོམ་པ་དང་པོ་དེ་ནི་སྐྱེ་བ་ཕྱི་མར་བསམ་བློ་གཏོང་རྒྱུ་དང་དེ་དག་ལ་དོ་གལ་ཆེན་པོ་བརྩི་རྒྱུ་དེ་རེད། ང་ཚོས་དེའི་ཐད་ལ་བསམ་བློ་དེ་ཙམ་བཏང་མེད་སྲིད། ཡང་ན་ང་ཚོས་དེ་ནི་སེམས་ནང་མ་བཅངས་བར་ཧ་ཅང་གསལ་ཁ་མེད་པའི་སྒོ་ནས་ཁས་ལེན་བྱས་ཡོད་སྲིད། གལ་ཏེ་ང་ཚོས་སྐྱེ་བ་མཐའ་མེད་པ་ཡོད་པའི་བདེན་དོན་ལ་བསམ་བློ་བཏང་མེད་ན། ང་ཚོས་ “མི་བྱེ་བྲག་ཅིག་དང་མཉམ་དུ་ངའི་འབྲེལ་བ་ཡོད་པའི་ནང་གནས་སྟངས་ཡག་པོ་ཞིག་ཡོང་གི་མི་འདུག །བྱས་ཙང་། མི་དེ་ལ་སྣང་མེད་བཏང་ནས་མི་གཞན་ཞིག་དང་མཉམ་དུ་འབྲེལ་བ་ཅིའི་ཕྱིར་མི་བཟོའམ་” ཞེས་བསམ་སྲིད། ང་ཚོར་བསམ་ཕྱོགས་འདི་ནི་ཆ་རྒྱུས་ཡག་པོ་མེད་པའི་མི་རྣམས་ཀྱི་ཕྱོགས་སུ་ཡོད་སྲིད་ལ། གནས་སྟངས་སྡུག་ཅག་གི་ནང་ཡོད་པའི་གྲོགས་པོ་ཚོ་ལའང་ཡོད་སྲིད། ང་ཚོས་དེ་དག་དང་ཁ་བྲལ་འདོད་ཡོད། སོ་སོའི་ཟླ་གྲོགས་ལ་ཡིད་ཐང་ཆད་པའམ་དེ་དག་ལ་བརྟེན་ནས་དཀའ་ངལ་གྱི་རིགས་ང་ཚོར་ཡོད་སྐབས། བཟའ་ཟླ་གསར་པ་ཞིག་བླང་དགོས་ཀྱི་ཡོད། རྒྱལ་ཁབ་འགའ་ཞིག་གི་ནང་། ཆང་ས་རྒྱག་པ་ཚང་མའི་བརྒྱ་ཆ་ལྔ་བཅུ་ཙམ་ཞིག་ནི་བཟའ་ཚང་ཁ་བྲལ་ནང་མཇུག་རྫོགས་ཀྱི་ཡོད། དེ་ནི་དངོས་གནས་ཧོན་འཐོར་དགོས་པ་ཞིག་དང་ཡིད་སྐྱོ་བའི་གནས་ཚུལ་ཞིག་ཀྱང་རེད། 

དེའི་རྒྱབ་ལ་རྒྱུ་མཚན་གང་ཡོད་དམ། ང་ཚོར་གཞན་དང་མཉམ་དུ་འབྲེལ་བ་མེད་པ་སོང་ཙང་། ང་ཚོས་དེ་དག་ལོ་འཁོར་པད་ཚལ་རྙིང་པ་ནང་བཞིན་སྣང་མེད་དུ་གཡུག་ཆོག་པའི་བསམ་བློ་དེ་ཡོད་པ་རེད། “ངས་མི་འདི་ལ་ད་ནས་བཟུང་རོགས་བྱེད་ཀྱི་མིན། ངས་མི་འདི་ཟུར་དུ་སྣང་མེད་འཇོག་ན་འགྲིགས། དེ་ལ་ཁྱད་པར་མེད་” ཅེས་པ་དེ་རེད། འོན་ཀྱང་། གལ་ཏེ་ང་ཚོར་སྐྱེ་བ་ཕྱི་མ་དང་མཐའ་མེད་པའི་སྐྱེ་བའི་སྐོར་ལ་བསམ་བློ་ཡོད་ན། དེ་ནས་ང་ཚོས་མི་ཞིག་དང་མཉམ་དུ་ཡོད་པའི་འབྲེལ་བ་དེ་སྤོང་མི་ཐུབ་པ་རྟོགས་ཀྱི་རེད། གལ་ཏེ་འབྲེལ་བ་དེ་ཡག་པོ་ཞིག་མེད་ན། ང་ཚོས་མི་དེ་ལ་སྣང་མེད་གཏོང་བ་དང་སླར་ཡང་མི་དེ་ནམ་ཡང་མི་མཐོང་བའི་སྒོ་ནས་དཀའ་ངལ་དེ་ལས་སེལ་མི་ཐུབ། གལ་ཏེ་ང་ཚོས་འབྲེལ་བའི་དཀའ་ངལ་འདི་ཚེ་འདིའི་ནང་མ་སེལ་ན། སྐྱེ་བ་ཕྱི་མའི་ནང་གནས་སྟངས་གཅིག་མཚུངས་ཤིག་ཡང་བསྐྱར་འབྱུང་གི་རེད། གལ་ཏེ་མི་དེ་ལ་བརྟེན་ནས་ད་ལྟ་ང་ཚོར་དཀའ་ངལ་གྱི་རིགས་ཡོད་པ་དང་ང་ཚོས་དེ་ལ་སྣང་མེད་བཏང་ན། སྐྱེ་བ་ཕྱི་མའི་ནང་ང་ཚོར་མི་དེ་དང་ཧ་ཅང་འདྲ་བ་ཞིག་འཕྲད་ཀྱི་རེད། དེ་ནི་མི་གཅིག་པ་དེའི་རྒྱུད་ཡིན་པ་དང་སླར་ཡང་ང་ཚོར་དཀའ་ངལ་གཅིག་མཚུངས་དང་འཕྲད་ཀྱི་རེད། ང་ཚོས་དེ་ལས་ཐར་ཐུབ་ཀྱི་མེད། 

གལ་ཏེ་ང་ཚོར་མི་གཞན་ཞིག་ལ་བརྟེན་ནས་དཀའ་ངལ་གྱི་རིགས་ཡོད་ན། ང་ཚོ་རྟག་ཏུ་མི་དེ་དང་མཉམ་དུ་གནས་དགོས་པའི་དོན་མིན། སྐབས་རེར་དེ་ནི་དཀའ་ལས་ཁག་པོ་ཡོད་སྲིད་ནའང་། མ་མཐར་ཡང་ང་ཚོས་གནས་སྟངས་ཡར་རྒྱས་གཏོང་ཐབས་བྱེད་པའམ་ཡང་ན་ཞི་མཐུན་ངང་ནས་ཁ་བྲལ་ཐབས་བྱེད་དགོས། ང་ཚོས་སྤུས་ཚད་ཏོག་ཙམ་ཡར་རྒྱས་གཏོང་ཐབས་བྱེད་ཆོག །གང་ཡིན་ཞེ་ན། སྐྱེ་བ་ཕྱི་མའི་ནང་དེ་མུ་མཐུད་ནས་འགྲོ་རྒྱུ་ཡིན་པ་རེད། ད་ལྟའི་གནས་སྟངས་ལ་གདོང་ལེན་བྱེད་པར་གྲ་སྒྲིག་ཆ་ཚང་བ་ཞིག་མེད་སྲིད་ནའང་། ང་ཚོས་རེ་བ་དང་བཅས་སྐྱེ་བ་ཕྱི་མའི་ནང་གདོང་ལེན་བྱེད་ཀྱི་རེད། 

ང་ཚོས་གཞན་ཐམས་ཅད་ཀྱི་དོན་དུ་སེམས་རྒྱ་སྐྱེད་གཏོང་བ་དང་དེ་དག་ལ་ཕན་པའི་ཕྱིར་སངས་རྒྱས་ཀྱི་གོ་འཕང་ཐོབ་ཐབས་བྱེད་པའི་སྐབས། གལ་ཏེ་ང་ཚོར་སྐྱེ་བ་ཕྱི་མའི་དོན་དུ་བསམ་བློ་ཡོད་ན། དེ་ནི་ཧ་ཅང་ཕན་ཐོགས་ཆེན་པོ་ཡོད། གལ་ཏེ་སྐྱེ་བ་ཕྱི་མའི་དོན་དུ་བསམ་བློ་མེད་ན། “ངས་གཞན་ཐམས་ཅད་ཀྱི་ཆེད་དུ་སེམས་རྒྱ་སྐྱེད་གཏོང་གིན་ཡོད། ཡིན་ནའང་། ང་རང་དངོས་གནས་མི་དེ་ལ་དགའ་གི་མི་འདུག །བྱས་ཙང་། ངས་མི་དེ་བརྗེད་ནས་མི་གཞན་དག་གི་དོན་བསྒྲུབ་ཀྱི་ཡིན་” ཞེས་བསམ་པའི་དཀའ་ངལ་དེ་ང་ཚོར་ཡོང་སྲིད། ང་ཚོས་གཞན་སུ་ལས་བྲོས་ཐབས་དང་གཡོལ་ཐབས་མེད་པ་དང་སྐྱེ་བ་ཕྱི་མའི་ནང་མི་དེ་དག་དང་མུ་མཐུད་ནས་འཕྲད་རྒྱུ་ཡིན་པར་རྟོགས་པའི་སྐབས། དེས་ང་ཚོའི་སེམས་དེ་གཞན་ཐམས་ཅད་ལ་རྒྱ་སྐྱེད་གཏོང་བར་ཕན་གྱི་ཡོད། དེར་བརྟེན་དེ་དག་ལ་གདོང་ལེན་བྱེད་དགོས། ང་ཚོས་གཞན་ཚང་མ་ལ་བྱམས་པ་དང་བརྩེ་བ་ཤུགས་ཆེ་བ་སྐྱེད་ཐུབ་པ་དགོས། དེ་ནི་གནད་དོན་གལ་ཆེན་ཞིག་རེད།

རྣམ་པ་གཞན་ཞིག་ནི་ནམ་རྒྱུན་ཡང་སེ་ང་ཚོས་སོ་སོའི་སྡེ་ཁག་ཆུང་ངུ་ལ་བརྟེན་ནས་ངོས་འཛིན་དང་ཆ་འཇོག་བྱེད་ཀྱི་ཡོད། ང་ཚོས་ཨ་རི་བ་དང་། རྒྱ་མི། ནང་པ། ཡང་ན་ནང་མི་དང་ཕོ་མོའི་དབྱེ་བ། དེ་བཞིན་བཅུ་ཐོག་ན་གཞོན་དང་། དར་མ། ལོ་ན་བགྲེས་པ་བཅས་ཀྱི་སྡེ་ཁག་ལ་བརྟེན་ནས་ངོས་འཛིན་བྱས་ཏེ། “ངས་སོ་སོ་རང་ཁོངས་སྡེ་ཁག་གི་མི་ཁོ་ནར་འབྲེལ་བ་བྱེད་ཐུབ། ཁོང་ཚོའི་དཀའ་ངལ་ཁོ་ན་ཤེས་ཐུབ་ཀྱི་འདུག །དེར་བརྟེན་ངས་ཁོང་ཚོ་གཅིག་པུར་རོགས་བྱེད་ཐུབ། ངས་ཨ་རིའི་མི་གཞན་དག་གཅིག་པུར་རོགས་བྱེད་ཐུབ། ངས་ཨ་ཧྥི་རི་ཀར་ཡོད་པའི་མི་རྣམས་ཇི་ལྟར་རྟོགས་ཐུབ་བམ་” ཞེས་ཚོར་གྱི་ཡོད། དེ་ག་ནང་བཞིན་ “ངས་ནང་པ་གཞན་ཁོ་ནར་རོགས་བྱེད་ཐུབ། གང་ཡིན་ཞེ་ན། ཆོས་ལུགས་གཞན་གྱི་རྒྱབ་ལྗོངས་ནས་ཡིན་པའི་མི་རྣམས་རྟོགས་རྒྱུ་ནི་མི་སྲིད་པ་རེད་” ཅེས་བསམ་གྱི་ཡོད། ཡང་ “ངས་སྐྱེས་པ་གཞན་ཁོ་ནར་རོགས་བྱེད་ཐུབ། གང་ཡིན་ཞེ་ན། ངས་བུད་མེད་རྣམས་ཇི་ལྟར་རྟོགས་ཐུབ་བམ་” ཞེས་དང་། “ངས་བུད་མེད་ཁོ་ནར་རོགས་བྱེད་ཐུབ། གང་ཡིན་ཞེ་ན། སྐྱེས་པ་ཚང་མ་ཞེན་འཛིན་པ་ཡིན་པ་དང་ང་ལ་མཐོང་ཆུང་གཏོང་གིན་འདུག །ངས་མི་དེ་དག་འབྲེལ་བ་ཇི་ལྟར་བྱེད་ཐུབ་བམ་” ཞེས་བསམ་གྱི་ཡོད། “ངས་བཅུ་ཐོག་ན་གཞོན་གཞན་དག་ཁོ་ན་རྟོགས་ཐུབ་པ་དང་ཕན་འདོགས་ཐུབ། གང་ཡིན་ཞེ་ན། ཕ་མ་རྣམས་ཀྱིས་ག་རེ་འབྱུང་བཞིན་ཡོད་ཤེས་ཀྱི་མེད། ཁོང་ཚོས་ཤེས་ཀྱི་མེད།” “ངས་སྨིན་ཚད་ལོངས་པའི་དར་མ་ཁོ་ནར་རོགས་བྱེད་ཐུབ། གང་ཡིན་ཞེ་ན། ཕྲུ་གུ་ཚང་མ་ངན་ལང་ཤོར་ཚར་བ་དང་ཁྱེད་ཀྱིས་དེ་དག་ལ་གང་ཡང་བརྗོད་མི་ཐུབ་” ཅེས་བསམ་གྱི་ཡོད། 

དེ་འདྲ་སོང་ཙང་། ང་ཚོས་ཚེ་འདི་ཙམ་དང་སོ་སོའི་ལོ་ཚད་དེ་བཞིན་ཕོ་མོའི་དབྱེ་བ། ནང་མི་ཁྱིམ་ཚང་། རྒྱལ་ཁབ་ལ་སོགས་པར་གཞིགས་ནས་ད་ལྟའི་གནས་སྟངས་བྱེ་བྲག་ཅིག་ལ་བསམ་བློ་གཏོང་བའི་སྐབས། ང་ཚོས་རང་གིས་རང་ལ་ཚད་བཀག་བཟོ་གི་ཡོད། གལ་ཏེ་ང་ཚོས་སྐྱེ་བ་ཕྱི་མ་དང་སྔ་མ་བཅས་མཐའ་མེད་པའི་སྐྱེ་བ་ལ་བསམ་བློ་བཏང་ན། “ང་ནི་གཞོན་དར་རྒས་སོགས་ཀྱི་ལོ་ཚད་ཚང་མའི་ནང་ཕྱིན་ཡོད། ང་རང་གཞོན་ནུ་ཆགས་ཡོད། དར་མའི་གནས་སྐབས་སུ་གནས་ཡོད། དེ་ནས་རྒས་ཡོད། ངས་ལོ་ཚད་མི་འདྲ་བ་སྣ་ཚོགས་པའི་མི་རྣམས་དང་འབྲེལ་བ་བྱེད་ཐུབ། གང་ཡིན་ཞེ་ན། ངས་ཉམས་མྱོང་དེ་དག་བརྒྱུད་ནས་བསླེབས་པ་རེད། ངས་དེ་དག་ལ་ཡི་རང་བྱེད་ཆོག །ང་ནི་རིགས་རུས་དང་རྒྱལ་འབངས་ཚང་མ་ཆགས་ཡོད། ང་ནི་རིག་གཞུང་གི་རྒྱབ་ལྗོངས་མི་འདྲ་བ་ཚང་མ་ནས་བསླེབས་པ་ཞིག་རེད།” གོ་རྟོགས་འདིས་སྡེ་ཁག་ཚང་མ་དང་འབྲེལ་བ་བྱེད་ཐུབ་པར་བཟོ་བ་དང་དེ་དག་དང་མཉམ་དུ་འབྲེལ་བ་ཞིག་ཡོད་པ་ཚོར་འཇུག་གི་རེད། 

ང་ཚོས་འདི་རྒྱ་སྐྱེད་བཏང་ནས་སྐྱེ་བ་སྔ་མའི་ནང་དུད་འགྲོའི་སྐྱེ་བ་བླངས་ཡོད་པ་དྲན་དགོས། དེའི་སྐབས། “མི་ཞིག་གིས་ཁྱེད་ལ་རྡོག་རྒྱག་གཞུ་བའམ་རྡུང་རྡེག་གཏོང་བའི་སྐབས། ངས་གང་འདྲ་ཚོར་ཡོད་དམ་” ཞེས་བསམ་དགོས། དེ་ལྟར་ང་ཚོས་དུད་འགྲོ་སེམས་ཅན་རྣམས་ཀྱིས་ཀྱང་བདེ་བ་དང་སྡུག་བསྔལ་མྱོང་གི་ཡོད་པ་དང་དེ་དག་ལ་ལྟ་ཚུལ་འཛིན་སྟངས་དང་གསོ་སྐྱོང་བྱེད་སྟངས་ཐད་ལ་ང་ཚོས་གཟབ་ནན་ཆེ་བ་བྱེད་ཀྱི་རེད། 

དེའི་ཕྱིར་སྐྱེ་བ་སྔ་ཕྱིའི་སྐོར་བསམ་བློ་གཏོང་བ་ནི་གཞན་ཐམས་ཅད་ལ་ཉེ་འབྲེལ་གྱི་ཚོར་བ་ཞིག་སྟེར་བར་ཧ་ཅང་ཕན་ཐོགས་ཆེན་པོ་ཡོད། ང་ཚོས་ཕོ་མོ་གཉིས་ཀའི་སྒོ་ནས་ཚང་མར་འབྲེལ་བ་བྱེད་ཆོག །དེ་ཡང་། “ང་རང་སྐྱེ་བ་སྔ་མར་སྐྱེས་པ་དང་བུད་མེད་གཉིས་ཀ་བྱས་ཡོད་” ཅེས་བསམ་པ་ལྟ་བུ་རེད། ང་ཚོས་དེ་དག་ལ་ཡི་རང་དང་གཞན་ཚོར་ཤེས་པར་བྱེད་པ་དང་སྡེ་ཁག་ཚང་མའི་དཀའ་ངལ་དང་གནས་སྟངས་རྟོགས་པར་བྱེད་ཐུབ། འདི་ནི་གཞན་ཐམས་ཅད་ལ་ཕན་འདོགས་པའི་ཆེད་ང་ཚོས་སེམས་རྒྱ་སྐྱེད་གཏོང་བར་ཧ་ཅང་ཕན་རླབས་ཆེ་ཞིང་། གཞན་དོན་ཡག་ཤོས་སུ་བསྒྲུབ་ཐུབ་པའི་ཕྱིར་སངས་རྒྱས་ཀྱི་གོ་འཕང་འཐོབ་འདོད་ཡོད། སྐྱེ་བ་ཕྱི་མར་བསམ་བློ་གཏོང་བ་ལས་བྱུང་བའི་གནད་དོན་གལ་ཆེན་འགའ་ཞིག་ཡོད། དེ་དག་མེད་པར་ང་ཚོའི་སེམས་རྒྱ་སྐྱེད་གཏོང་སྟངས་དེ་ཧ་ཅང་ཚད་བཀག་ཅན་ཆགས་ཀྱི་ཡོད། 

གཞན་ལ་ཕན་པའི་ཕྱིར་ང་ཚོའི་སེམས་གཞན་དོན་དུ་དམིགས་པའི་སྐབས། རྣམ་པ་ཆེ་ཁག་གལ་ཆེན་གཞན་ཞིག་ནི་ཐར་འདོད་ཀྱི་ཆོད་སེམས་དེ་རེད། གཞན་ལ་ཕན་འདོགས་བཞིན་པའི་སྐབས། ང་ཚོས་ནམ་རྒྱུན་དེ་ནི་ཉོན་མོངས་ལྡན་པའི་རྒྱུ་མཚན་དང་བཅས་བྱེད་ཀྱི་ཡོད། ང་ཚོས་གཞན་ལ་རོགས་བྱེད་ཀྱིན་ཡོད། གང་ཡིན་ཞེ་ན། ང་ཚོར་བྱམས་བརྩེ་ཚོར་འདོད་ཡོད། དཔེར་ན། “ཧ་ཅང་སྐད་གྲགས་ཆགས་པའི་ཆེད་དུ་ངས་ཁྱེད་ལ་རོགས་བྱེད་ཀྱི་ཡིན།” “ངས་མི་དེ་ལ་རོགས་བྱེད་ཀྱིན་ཡོད་པ་སོང་ཙང་། ཚང་མས་ང་ལ་དགའ་པོ་བྱེད་ཀྱི་ཡོད། ང་རང་དགའ་པོ་བྱེད་པ་དང་ཡི་རང་བྱེད་པའི་ཕྱིར་ངས་རོགས་བྱེད་ཀྱི་ཡོད།” “མི་གཞན་ཚང་མས་ང་ནི་མི་དེ་འདྲ་བཟང་པོ་ཞིག་འདུག་ཅེས་བསམ་པའི་ཕྱིར་ངས་རོགས་བྱེད་ཀྱིན་ཡོད། དེ་ནས་ང་རང་སྐད་གྲགས་ཅན་ཞིག་ཆགས་ཀྱི་རེད།” “ངས་རོགས་བྱེད་ཀྱིན་ཡོད། གང་ཡིན་ཞེ་ན། གལ་ཏེ་ངས་རོགས་མ་བྱས་ན། ང་རང་གི་མཐོང་བརླགས་ནས་མི་རྣམས་ཀྱིས་ང་ལ་སྡུག་ཅག་བསམ་གྱི་རེད། ངས་རོགས་བྱེད་པར་འགན་འཁུར་དུ་ཚོར་གྱི་འདུག་” ཅེས་བསམ་པ་དང་། “ངས་རང་ཉིད་གལ་ཆེན་དུ་ཚོར་བའི་ཕྱིར་ཁྱེད་ལ་རོགས་བྱེད་ཀྱི་ཡིན། ངས་རོགས་བྱེད་པ་དེའི་ལན་དུ་ང་ལ་བརྩེ་བ་སྤྲོད་ཀྱི་རེད་” ཅེས་རང་ཉིད་མེད་དུ་མི་རུང་བའི་དགོས་གལ་ལྟ་བུ་ཚོར་གྱི་ཡོད། “ངའི་ཕྲུ་གུ་ཚོ་ལོ་ན་སུམ་ཅུ་བཞི་བཅུ་སོན་ཟིན་ནའང་། ངས་ད་དུང་ཡང་ཁོང་ཚོར་ག་རེ་གྱོན་དགོས་པ་དང་ག་རེ་བཟའ་དགོས་པའི་སྐོར་ཤོད་དགོས་ཐུག་གི་འདུག །གང་ཡིན་ཞེ་ན། རང་ཉིད་མེད་དུ་མི་རུང་བའི་དགོས་གལ་ཞིག་ཏུ་ཚོར་གྱི་ཡོད། ཕྲུ་གུ་ཚོའི་མི་ཚེའི་ནང་ང་རང་གལ་ཆེན་པོ་ཡིན་པའི་ལས་འགན་ཡོད་པ་ཚོར་གྱི་འདུག་” ཅེས་ཕ་མ་རྣམས་ལ་སྐབས་རེར་བསམ་ཕྱོགས་འདི་འདྲ་ཞིག་ཡོད། ང་ཚོས་མེད་དུ་མི་རུང་བའི་དགོས་གལ་ཏུ་ཚོར་བའི་ཕྱིར་གཞན་ལ་རོགས་བྱེད་པ་ནི་ཁོང་ཚོ་སོ་སོའི་ཁེ་ཕན་ཆེད་དུ་བཀོལ་སྤྱོད་བྱེད་པ་དེ་རེད། 

གལ་ཏེ་ང་ཚོར་ཐར་འདོད་ཀྱི་ཆོད་སེམས་ཡོད་ན། ང་ཚོས་དབང་མེད་ཀྱིས་ཡང་ནས་ཡང་དུ་འབྱུང་བའི་གནས་སྟངས་དང་ཉོན་མོངས་ལྡན་པའི་འབྲེལ་བ་དེ་དག་ཐམས་ཅད་ལ་བལྟས་ནས་དེ་དག་གིས་སྐྲུན་པའི་དཀའ་ངལ་རྣམས་མཐོང་གི་ཡོད། དེ་ནས་ང་ཚོས་དེ་ལས་ཐར་འདོད་ཀྱི་ཆོད་སེམས་སྐྱེད་ཀྱི་ཡོད། དེ་ཡང་། “ད་འགྲིགས་སོང་། ང་རང་འདི་ལས་ཐར་དགོས་ཀྱི་འདུག །འདི་ནི་ཆོ་མེད་པ་ཞིག་རེད་འདུག །འདིས་རྩུབ་སྤྱོད་དང་། སེམས་འཚབ། དངངས་འཚབ་ཧ་ཅང་ཆེན་པོའི་རྒྱུ་བྱེད་ཀྱིན་འདུག་” ཅེས་བསམ་པ་ལྟ་བུ་རེད། 

ང་ཚོར་ཐར་འདོད་ཀྱི་ཆོད་སེམས་དེ་ཡོད་པའི་སྐབས། ང་ཚོས་རོགས་བྱེད་བཞིན་པའི་མི་རྣམས་ལ་ཉོན་མོངས་ཅན་གྱི་ཕན་ཚུན་འབྲེལ་གླེང་གང་འདྲ་ཞིག་ཡོད་པ་ནའང་། དེ་དག་ལས་ཐར་འདོད་ཀྱི་ཆོད་སེམས་ཀྱང་ཡོད་པ་རེད། “མི་ཚང་མས་ང་རང་མི་ཧ་ཅང་ཡག་པོ་ཞིག་ཡིན་པར་བསམ་པའི་ཕྱིར། ངས་རོགས་བྱེད་ཀྱི་ཡོད། མི་འདི་གང་བསམ་གྱི་ཡོད་པ་དང་མི་དེས་གང་བསམ་གྱི་ཡོད་པར་ང་རང་སེམས་འཁྲལ་འདུག །མི་གཞན་ཞིག་དཔང་པོར་ཡོད་པ་ཁོ་ནའི་སྐབས་སུ་ངས་རོགས་བྱེད་ཀྱི་ཡོད། དེ་ལྟར་བྱུང་ན། དཔང་པོ་དེས་མི་གཞན་དག་ལ་ཤོད་ཆོག་གི་རེད། ངས་མི་རྣམས་ཀྱི་ཡིད་ལ་འཐད་པོ་ཞིག་ཡོང་བའི་ཕྱིར་རོགས་པ་བྱེད་ཀྱི་ཡོད། ངས་དགེ་རྩའི་རོགས་སྐྱོར་ཚོགས་པ་ཁག་ལ་སྦྱིན་པ་གཏོང་གི་ཡོད་ནའང་། སུ་ཡིན་མི་གསལ་བའི་སྒོ་ནས་སྦྱིན་པ་གཏོང་ངེས་མ་རེད། མི་གཞན་ཚང་མས་ངས་སྦྱིན་པ་བཏང་བ་དེ་ཤེས་པའི་ཕྱིར་སྦྱིན་པ་གཏོང་གི་ཡོད། དོན་ངོ་མར་ངས་སོ་སོའི་མིང་བྲིས་པའི་བྱང་བུ་ཞིག་བཟོས་ནས་དངུལ་ག་ཚོད་སྦྱིན་པ་བཏང་ཡོད་པ་སྟོན་གྱི་ཡོད་པ་” ལྟ་བུ་རེད། ཐར་འདོད་ཀྱི་ཆོད་སེམས་ལ་བརྟེན་ནས་ “ངས་མི་གཞན་རྣམས་ང་ལ་བརྟེན་མཁན་དང་རེ་མཁན་ཆགས་པ་དང་ང་རང་གལ་ཆེན་ཡིན་པར་ཚོར་བའི་ཆེད་དུ་གཞན་ལ་རོགས་བྱེད་ཀྱི་ཡོད་” ཅེས་བསམ་པའི་སྐྱོན་རྣམས་ང་ཚོས་མཐོང་གི་ཡོད། གལ་ཏེ་ང་ཚོར་དཀའ་ངལ་དེ་དག་ཐམས་ཅད་ལས་ཐར་འདོད་ཀྱི་ཆོད་སེམས་བརྟན་པོ་ཞིག་ཡོད་ན། ང་ཚོས་གཞན་ལ་ཕན་འདོགས་པའི་ཞེ་གཏིང་གི་ཀུན་སློང་དེ་དག་ཐམས་ཅད་སྤོང་དགོས། 

ང་ཚོས་དེ་ལམ་སེང་མཚམས་འཇོག་བྱེད་མི་ཐུབ་པ་སྲིད་ནའང་། མ་མཐར་ཡང་ཉོན་མོངས་ལྡན་པའི་རྒྱུ་མཚན་ཆེད་དུ་གཞན་ལ་རོགས་བྱེད་པ་དེས་དཀའ་ངལ་བཟོ་རྒྱུ་ཡིན་པ་མཐོང་གི་ཡོད། ཕ་རོལ་གྱི་མི་གཞན་དེ་མཐར་དེ་ལ་སྡང་འཛིན་བྱེད་ཀྱི་རེད། ང་ཚོས་གང་བྱེད་ཀྱིན་ཡོད་པ་ཁོང་ཚོས་ཤེས་རྒྱུ་ཡིན་པ་དང་ཕལ་ཆེར་དེ་ལ་བརྟེན་ནས་ང་ཚོ་ལ་དཀའ་རྙོག་བཟོ་སྲིད། འདིས་གཞན་ལ་ཕན་འདོགས་པའི་ཆེད་ང་ཚོའི་རྩོལ་བ་ལ་སྣང་ཆུང་བྱེད་སྲིད། ང་ཚོའི་ཉོན་མོངས་ལྡན་པའི་ཀུན་སློང་ལ་དྲི་བ་གཏོང་བ་ཙམ་དུ་མ་ཟད། གཞན་ལ་ཕན་འདོགས་པའི་ང་ཚོའི་བྱེད་སྒོ་ཚང་མར་དྲི་བ་གཏོང་དགོས་ཤིང་། ཐ་ན་ཕན་འདོགས་ཐབས་བྱེད་བཞིན་པ་དེའང་སྤོང་སྲིད། 

ང་ཚོས་ཉོན་མོངས་ཅན་གྱི་ཀུན་སློང་གང་འདྲ་ཞིག་ཡོད་ནའང་། དེ་དག་མེད་པ་བཟོ་དགོས། དེ་ཇི་ལྟར་བྱེད་དམ་ཞེ་ན། དེ་ནི་ང་ཚོས་ཀུན་སློང་ངན་པ་ཞིག་ལ་བརྟེན་ནས་བྱ་སྤྱོད་སྤེལ་བའི་སྐབས། རྩུབ་སྤྱོད་དང་ཟོག་རྫུ་བྱུང་བ་ཚང་མ་ལས་ཐར་བའི་ཆོད་སེམས་དང་བཅས་བྱེད་དགོས། གཞན་དང་མཉམ་དུ་ཕན་ཚུན་འབྲེལ་བ་ཡོད་པ་དེ་ཉོན་མོངས་ཅན་གྱི་ཀུན་སློང་གིས་ཧ་ཅང་ཤུགས་ཆེན་མི་བསླད་པའི་ཕྱིར། ཐར་འདོད་ཀྱི་ཆོད་སེམས་འདི་གོང་འཕེལ་གཏོང་རྒྱུ་ཧ་ཅང་གལ་ཆེན་པོ་ཡིན། དེ་གལ་ཆེན་པོ་ཡིན་ནའང་། ང་ཚོས་དེ་ལ་སྣང་མེད་གཏོང་འདུན་བྱེད་པའི་བཟོ་འདྲ་ཞིག་ཡོད། 

ཆོས་ཀྱི་དམིགས་ཡུལ་དང་དགོས་དོན་མང་ཆེ་བ་ནི་ང་ཚོར་ཡོད་པའི་སྐྱོན་གྱི་ཆ་རྣམས་ངོས་འཛིན་བྱ་རྒྱུ་དང་དེ་དག་བཅོས་སྒྱུར་གཏོང་རྒྱུ། དེ་བཞིན་ང་ཚོར་ཡོད་པའི་ཁྱད་ཆོས་བཟང་པོ་རྣམས་གོང་འཕེལ་གཏོང་རྒྱུ་དེ་རེད། རང་ཉིད་ཡར་རྒྱས་གཏོང་བར་འབད་པའི་སྐབས། ཐབས་ལམ་རིམ་པ་བརྒྱུད་ནས་ཡར་རྒྱས་གཏོང་དགོས་པ་དང་སོ་སོ་རང་ཉིད་ཀྱི་སྐོར་རྟོགས་པའི་ཕྱིར་སྒེར་གྱི་ཉམས་མྱོང་རྣམས་བེད་སྤྱོད་བྱེད་དགོས། དཔེར་ན། “ཁྱེད་ཀྱིས་འདི་ཅིའི་ཕྱིར་མི་བྱེད་དམ། ཁྱེད་ཀྱིས་ཕ་གི་ཅིའི་ཕྱིར་མི་བྱེད་དམ། ཁྱེད་རང་ནང་དུ་དུས་ཐོག་ལ་ཅིའི་ཕྱིར་མ་བསླེབས་པ་རེད་དམ། ཁྱེད་ཀྱིས་ཁ་པར་ཅིའི་ཕྱིར་བཏང་མེད། ཁྱེད་ཀྱིས་གད་སྙིགས་ཕྱི་ལོགས་སུ་ཅིའི་ཕྱིར་འཁྱེར་གྱི་མེད་དམ་” ཞེས་སོགས་སོ་སོའི་བཟའ་ཟླ་དང་བུ་ཕྲུག་ཚོར་བསུན་གཙེར་བཟོ་བའི་གོམས་གཤིས་ཤིག་ང་ཚོར་ཡོད་པ་ལྟ་བུ་རེད། ང་ཚོས་འདི་ནི་ཧ་ཅང་གནོད་བྱེད་ཀྱི་བྱ་སྤྱོད་ཅིག་ཡིན་པ་ཤེས་ཀྱི་ཡོད། དེས་འབྲེལ་བའི་ནང་དངངས་འཚབ་ཧ་ཅང་མང་པོ་བཟོ་གི་ཡོད། འདིའི་འབྲས་བུར་ཕལ་ཆེར་སོ་སོའི་ཟླ་གྲོགས་སམ་བུ་ཕྲུག་རྣམས་ཚོར་བ་མེད་པ་ཆགས་པ་དང་རྒྱང་ཐག་རིང་དུ་བཏང་ནས་ “ང་ལ་བསུན་གཙེར་མ་བཟོ་བར་ཁེར་རྐྱང་ཞོག་” ཅེས་བརྗོད་ཀྱིན་ཡོད། ཡང་ཁོང་ཚོ་དེ་ཙམ་གྱི་ཁ་བསང་པོ་མེད་ན། ང་ཚོར་སྣང་མེད་གཏོང་བ་དང་རྦད་དེ་ཚོར་བ་མེད་པ་ཆགས་ཀྱི་རེད། དེ་ནས་ང་ཚོས་ “ཁྱེད་ཀྱིས་ང་ལ་སྐད་ཆ་ཅིའི་ཕྱིར་མི་བཤད་དམ། ཁྱེད་ཀྱིས་འདི་དང་དེ་ཅིའི་ཕྱིར་མི་བྱེད་དམ་” ཞེས་བརྗོད་པ་དང་། ཁོང་ཚོ་ཞི་འཇམ་པ་དང་ཁ་ནང་དུ་ཕྱོགས་ཆེ་བ་ཆགས་ནས་ནང་དུ་རྩ་ནས་བསླེབ་ཀྱི་མེད། འདིས་སྡུག་བསྔལ་ཧ་ཅང་ཆེན་པོ་སྐྲུན་གྱི་ཡོད། འདི་མཚམས་འཇོག་བྱེད་པར་ང་ཚོས་ནམ་རྒྱུན་གང་བྱེད་དམ། 

ཐོག་མར་ང་ཚོས་རང་གིས་རང་ལ་སྟངས་འཛིན་བྱེད་ཐབས་དང་བཅས་ “ངས་བཤད་མི་ཉན་པ་ཤེས་པ་སོང་ཙང་། ངས་ཤོད་ཀྱི་མིན་” ཞེས་བསམ་དགོས། ང་ཚོས་དམ་པོར་སྟངས་འཛིན་བྱེད་ཀྱི་ཡོད་ནའང་། དེ་ནི་ནམ་རྒྱུན་དཀའ་ལས་ཁག་པོ་ཡོད། གང་ལྟར་ང་ཚོས་བསུན་གཙེར་བཟོ་རྒྱུ་འགོ་བཙུག་གི་ཡོད། “ངས་རྣམ་དཔྱོད་ཀྱི་སྒོ་ནས་བསུན་གཙེར་བཟོ་མི་ཉན་པ་དེ་ཤེས་ཀྱི་ཡོད་ནའང་། ངས་སྟངས་འཛིན་བྱེད་ཐུབ་ཀྱི་མི་འདུག །དེ་བཀག་འགོག་བྱེད་ཐུབ་པའི་ནུས་སྟོབས་དེ་ང་ལ་མེད་” ཅེས་བསམ་གྱི་ཡོད། དེ་ནས་ང་ཚོ་རང་གིས་རང་ལ་ཁོང་ཁྲོ་བ་དང་བཅས་ཏེ། “དེ་ནི་འཇིགས་སུ་རུང་བ་རེད། ངས་སྐད་ཆ་མི་ཤོད་རྒྱུའི་ཐབས་ཤེས་བྱས་ཀྱང་། ཐུབ་མ་སོང་” བསམ་གྱི་ཡོད། ཁོང་ཁྲོའི་གནས་བབས་དེའི་ནང་ང་ཚོ་ཧ་ཅང་བློ་ཕམ་ནས་ཡོད་ཙང་། སོ་སོ་རང་ཉིད་འགྱུར་བ་གཏོང་བ་དང་ཡར་རྒྱས་གཏོང་རྒྱུ་དེ་ཧ་ཅང་ཁག་པོ་ཡོད།

དེ་ལྟར་ཁོང་ཁྲོ་དེ་ལམ་སེང་ནག་ཉེས་སུ་གྱུར་ནས་ “ངས་ནོར་འཁྲུལ་ཆེན་པོ་བཟོས་སོང་། ང་རང་ཧ་ཅང་ནག་ཉེས་ཅན་ཚོར་གྱི་འདུག །ང་ཞེད་སྣང་ཚ་པོ་རེད། ངས་བསུན་གཙེར་མ་བཟོས་ན་ཏག་ཏག་ཡིན། ངས་དཀའ་རྙོག་གཞན་ཞིག་བཟོས་སོང་” ཞེས་བསམ་ཀྱི་ཡོད། ནག་ཉེས་ནི་ཧ་ཅང་སྟབས་ཉེས་པ་དང་སྐྱིད་པོ་མེད་པའི་སེམས་ཀྱི་གནས་བབས་ཤིག་ཡིན་པ་དང་། སེམས་ཀྱི་གནས་བབས་དེའི་ནང་ང་ཚོས་སོ་སོ་རང་ཉིད་ཕྲུ་གུ་སྤྱོད་པ་འཚུབ་པོ་ཞིག་ལྟར་ཤུགས་ཆེན་ངོས་འཛིན་བྱས་ཏེ། “ང་ནི་ཧ་ཅང་སྤྱོད་འཚུབ་ཅན་ཞིག་ཡིན། ངས་གང་བྱས་འདུག་ལྟོས་དང་། ཨ་ཕ་དང་ཨ་མ་གཉིས་ཀྱིས་ད་ནས་བཟུང་ང་ལ་དགའ་མོས་བྱེད་ཀྱི་མ་རེད་” ཅེས་བསམ་པ་དང་རང་ཉིད་སྡུག་ཅག་ཏུ་ཚོར་གྱི་ཡོད། ང་ཚོས་ཇི་ཙམ་གྱིས་ནག་ཉེས་ཆེ་བ་ཚོར་བ་དེའི་ཚོད་ཀྱིས་ཕྲུ་གུ་སྤྱོད་འཚུབ་ཅན་དུ་ངོས་འཛིན་བྱེད་པ་དང་། ཇི་ཙམ་གྱིས་ཕྲུ་གུ་སྤྱོད་འཚུབ་ཅན་དུ་ངོས་འཛིན་བྱེད་པ་དེའི་ཚོད་ཀྱིས་ནག་ཉེས་ཆེ་བ་ཚོར་གྱི་ཡོད། དེ་ནི་དཀའ་རྙོག་ལུ་གུ་རྒྱུད་ཅིག་རེད། སླར་ཡང་ང་ཚོས་ནག་ཉེས་དེ་འདྲ་ཚོར་བའི་སྐབས། གནས་སྟངས་འགྱུར་བ་གཏོང་རྒྱུ་དེ་ཁག་པོ་ཡོད། 

དེ་ནས་ང་ཚོས་ནག་ཉེས་ལས་བརྒལ་ནས་ཉོབ་པའི་ངང་ཚུལ་དུ་འགྲོ་གི་ཡོད་པ་སྟེ། “ང་ནི་རྩོད་རྙོག་དེ་དག་ཐམས་ཅད་ལ་ཧ་ཅང་ཡིད་ཐང་ཆད་སོང་། ངས་བསུན་གཙེར་བཟོ་བའི་སྐབས། དེའི་ཡ་ལན་དུ་ངའི་ཟླ་གྲོགས་སམ་ཕྲུ་གུས་སྡང་འཛིན་དང་བཅས་བསུན་གཙེར་བྱ་རྒྱུ་མཚམས་འཇོག་བྱོས་ཞེས་ང་ལ་བརྗོད་པ་སོགས་འབྱུང་བཞིན་པའི་གནས་སྟངས་དེ་དག་ཐམས་ཅད་ལ་ཡིད་ཐང་རྦད་དེ་ཆད་སོང་། ཉོབ་སྣང་སྐྱེས་སོང་། མང་དྲགས་སོང་། ང་རང་དེ་དག་ལས་ཐར་བར་བྱེད་དགོས་ཀྱི་འདུག་” ཅེས་བསམ་པ་ལྟ་བུ་རེད། 

དེ་དག་ནི་ཐར་འདོད་ཀྱི་ཆོད་སེམས་སྐྱེད་པར་ང་ཚོས་བརྒྱུད་ནས་འགྲོ་དགོས་པའི་ཐབས་ལམ་ཁག་རེད། ང་ཚོས་སོ་སོ་རང་ཉིད་ལ་ཁོང་ཁྲོ་ཟ་བའི་སྐབས། འགྱུར་བ་གཏོང་གི་མེད། ང་ཚོས་ནག་ཉེས་ཅན་དུ་ཚོར་བའི་སྐབས། འགྱུར་བ་གཏོང་གི་མེད། ང་ཚོས་ “འདི་ནི་ཆོ་མེད་གླེན་པ་” རེད་ཅེས་པའི་ཉོབ་སྣང་གི་གནས་བབས་ཤིག་གི་ནང་འགྱུར་བ་གཏོང་གི་ཡོད། དེ་ནི་ང་ཚོས་དེ་ལས་ཐར་ཐབས་བྱེད་པའི་སྐབས་རེད། 

གལ་ཏེ་ང་ཚོས་རང་གིས་རང་ཡར་རྒྱས་གཏོང་བའི་རིམ་པ་དེ་དག་ཐམས་ཅད་བརྒྱུད་ནས་ཕྱིན་མེད་ན། གཞན་ལ་ཕན་འདོགས་ཐབས་བྱེད་སྐབས། གནོད་བྱེད་མི་དགེ་བའི་སེམས་ཚོར་དེ་དག་ཐམས་ཅད་ཁོང་ཚོའི་སྟེང་ལ་རྟོག་འཆར་སྐྲུན་འདུན་ཞིག་ཡོད། དེ་ནི་ཧ་ཅང་དྲང་པོ་མིན་པ་ཆགས་ཀྱི་ཡོད། དཔེར་ན། ངས་མི་ཞིག་ལ་ཕན་འདོགས་ཐབས་བྱེད་པ་དང་ཐོག་མར་ངས་མི་དེ་ལ་ཐུབ་ཚོད་བཏང་ནས། “ངས་རང་གིས་རང་ལ་སྟངས་འཛིན་བེད་སྤྱོད་བྱེད་འདོད་འདུག །བྱས་ཙང་། ཁྱོད་ཀྱིས་ཀྱང་བྱོས། འགྱུར་བ་གཏོང་དགོས། ཁྱོད་ཀྱིས་དེ་འདྲ་བྱ་རྒྱུ་མཚམས་འཇོག་བྱེད་དགོས་” ཞེས་བརྗོད་པ་ལྟ་བུ་རེད། 

ནམ་རྒྱུན་ཡང་སེ་ང་ཚོས་སོ་སོའི་ཕྲུ་གུ་ཚོར་དེ་འདྲ་བའི་བྱ་སྤྱོད་སྤེལ་གྱི་ཡོད། དེ་དག་ལ་ཐུབ་ཚོད་གཏོང་བ་དང་སོ་སོའི་རེ་འདུན་ཁོང་ཚོར་འགེལ་ཐབས་དང་སྟངས་འཛིན་བྱ་རྒྱུ་སླ་བ་ཡོད། མི་སུ་འདྲ་ཞིག་ཀྱང་ཕྲུ་གུ་ནང་བཞིན་ལྟ་ཚུལ་འཛིན་པར་དགའ་མོས་མི་བྱེད་པ་དང་དམིགས་བསལ་ཁོང་ཚོ་ང་ཚོའི་ཕྲུ་གུ་མིན་ན། དེ་བས་དགའ་མོས་བྱེད་ངེས་མ་རེད། 

མི་སུ་གང་རང་ཉིད་འགྱུར་བཅོས་གཏོང་བའམ་ཡར་རྒྱས་གཏོང་ཕྱིར་གཞན་གྱིས་ཐུབ་ཚོད་བཏང་བར་དགའ་མོས་བྱེད་ཀྱི་མ་རེད། “ཁྱེད་ཀྱིས་འགྱུར་བ་གཏོང་དགོས། ཁྱེད་རང་སློབ་གྲྭར་འགྲོ་དགོས། ཁྱེད་རང་ལས་ཀ་ཞིག་རག་པར་བྱེད་དགོས། ཁྱེད་ཀྱིས་འདི་བྱེད་དགོས་ཕ་གི་བྱེད་དགོས་” ཞེས་ང་ཚོས་གཞན་ལ་ཨུ་ཚུགས་བྱེད་པའི་སྐབས། ང་ཚོ་ཧ་ཅང་ཤུགས་ཆེན་པོ་བསླེབ་ཀྱི་ཡོད། ང་ཚོ་དབང་ཚད་ཀྱིས་གཞན་ལ་སྟངས་འཛིན་བྱེད་པ་ཞིག་གི་ནང་འགྲོ་བཞིན་ཡོད། དེ་ལྟར་བྱས་ན། ག་རེ་ཡོང་གི་ཡོད་ཅེ་ན། ཕ་རོལ་གྱི་གང་ཟག་དེས་ང་ཚོའི་བསླབ་བྱར་མི་ཉན་པའམ་ང་ཚོས་རོགས་བྱེད་འདོད་པ་ལ་ངོས་ལེན་མི་བྱེད་པ་ཆགས་ཀྱི་ཡོད། བྱས་ཙང་། ང་ཚོས་སོ་སོ་རང་ཉིད་ལ་ཁོང་ཁྲོ་བྱས་པ་ནང་བཞིན་ད་ལྟ་ང་ཚོས་གཞན་གྱི་ཕྱོགས་སུ་ཁོང་ཁྲོ་ལངས་ནས་ “ཁྱེད་རང་མི་འཇིགས་སུ་རུང་བ་རེད། ངས་ཁྱོད་ལ་འདི་བྱོས་ཞེས་བཤད་ཀྱང་། ཁྱེད་ཀྱིས་བྱས་མ་སོང་། ཁྱོད་ཀྱིས་སོ་སོ་རང་གིས་རང་ལ་དཀའ་ངལ་བཟོས་པ་ཚང་མ་ལ་ལྟོས་དང་” ཞེས་བརྗོད་ཀྱི་ཡོད། དེ་ནི་ང་ཚོས་ཕན་འདོགས་ཐབས་བྱེད་བཞིན་པའི་མི་དེ་ལ་འབྲེལ་བ་ཡང་དག་པ་བྱེད་པ་ཞིག་མིན། ཕ་རོལ་པ་དེས་ང་ཚོའི་བསླབ་བྱར་དང་ལེན་མི་བྱེད་པའི་སྐབས་སུ་ཁོང་ཁྲོ་ཟ་བ་དེས་འཁོན་འཛིན་ཆེན་པོ་ཞིག་གི་རྒྱུ་བྱེད་ཀྱི་ཡོད། 

དེ་ནས་ང་ཚོ་མུ་མཐུད་ནས་འགྲོ་རྒྱུ་ཡིན། ང་ཚོས་རང་གིས་རང་ལ་ནག་ཉེས་ཅན་དུ་ཚོར་བ་ནང་བཞིན་མི་གཞན་དེ་ནག་ཉེས་ཅན་དུ་ཚོར་ཐབས་བྱེད་ཀྱི་ཡོད། “ངས་ཁྱེད་ཀྱི་ཆེད་དུ་གང་བྱེད་བཞིན་པ་ལ་ཁྱེད་ཀྱིས་ཡི་རང་བྱེད་ཀྱི་མི་འདུག །ངས་དཀའ་ལས་ཆེན་པོ་དེ་འདྲ་རྒྱག་པ་ལ་གཅིག་ལྟོས་དང་། མ་མཐར་ཡང་ཁྱེད་ཀྱིས་ཡི་རང་བྱེད་ཐུབ་པ་དང་ཐབས་ཤེས་དང་འབད་བརྩོན་བྱེད་ཐུབ་པ་ཞིག་རེད་” ཅེས་བསམ་གྱི་ཡོད། ང་ཚོ་ཕ་མ་ཆགས་ནས་ཕ་རོལ་གྱི་གང་ཟག་དེ་ནག་ཉེས་ཅན་དུ་བཟོ་ཐབས་བྱེད་ཀྱི་ཡོད། 

དེའི་རྗེས་སུ་ང་ཚོ་རིམ་པ་རྗེས་མའི་སྐོར་ཤོད་རྒྱུ་ཡིན། “ང་ལ་དཀའ་ངལ་དང་སྡུག་བསྔལ་མང་བས། འདི་དག་ལ་ཐང་ཆད་སོང་། འདི་དག་ལས་ཐར་བར་བྱེད་དགོས་ཀྱི་འདུག་” ཅེས་བསམ་གྱི་ཡོད། དེ་དང་ཕྱོགས་མཚུངས་པར་ང་ཚོས་མི་གཞན་དེ་ལ་བལྟས་ནས་ “འདི་ནི་དངོས་གནས་མང་དྲགས་སོང་། འདི་དག་ལས་ཐར་བར་བྱེད་དགོས་ཀྱི་འདུག་” ཅེས་བསམ་གྱི་ཡོད། དེ་ལྟར་ང་ཚོས་ཕ་རོལ་གྱི་མི་དེ་ལ་ཕན་འདོགས་ཀྱི་ཡོད། ང་ཚོས་སོ་སོ་རང་ཉིད་དཀའ་ངལ་དེ་དག་ལས་ཐར་འདོད་ཀྱི་ཆོད་སེམས་ཚོར་བ་ནང་བཞིན་གཞན་དག་ཀྱང་དཀའ་ངལ་ལས་ཐར་བར་ཕན་པའི་ཆོད་སེམས་ཤིག་ཀྱང་ང་ཚོར་ཡོད། འདི་ནི་ཧ་ཅང་གལ་ཆེན་པོ་རེད། གལ་ཏེ་ང་ཚོས་རང་ངོས་ནས་དང་རང་གི་ཉམས་མྱོང་བརྒྱུད་ནས་ལམ་གྱི་རིམ་པར་འབད་བརྩོན་མ་བྱས་ན། ང་ཚོས་གཞན་ལ་ཕན་འདོགས་ཐབས་བྱེད་སྐབས། སོ་སོའི་དཀའ་ངལ་ཡོད་དོ་ཅོག་གཞན་གྱི་སྟེང་དུ་རྟོག་འཆར་སྐྲུན་འདུན་བྱེད་པ་དང་། ང་ཚོས་ཐུབ་ཚོད་གཏོང་བ་དང་། ཁོང་ཁྲོ་ཟ་བ། ཡང་ན་མི་དེ་ནག་ཉེས་ཅན་དུ་ཚོར་བར་བྱེད་པའི་སྒོ་ནས་འགྱུར་བ་གཏོང་ཐབས་བྱེད་ཀྱི་ཡོད། དེ་དག་ནི་གཞན་ལ་ཕན་འདོགས་པར་བར་ཆད་ཆེ་ཁག་རྣམས་རེད། 

གཞན་ལ་ཕན་འདོགས་པའི་སྐབས་སུ་ཤེས་དགོས་པའི་རྣམ་པ་གཞན་ཞིག་ནི་མི་ཞིག་ལ་དཀའ་ངལ་ཡོད་པ་དང་དེ་ང་ཚོ་དང་ཐུག་འཕྲད་དུ་བསླེབས་ནས་ཁོང་ཚོའི་སྒྲུང་རྣམས་བཤད་པ་དང་། ཏོག་ཙམ་རྗེས་ནས་ང་ཚོ་སྒྲུང་དེ་ལ་ཐང་ཆད་པའི་གནས་སྟངས་དེ་རེད། དེ་ནི་གློག་བརྙན་ལྟད་མོ་ཡིད་ལ་མི་འཐད་པ་ཞིག་ལྟ་བ་དང་འདྲ་ཞིང་། ང་ཚོས་ལྟད་མོ་གཞན་ཞིག་བརྗེ་པོ་རྒྱག་འདོད་ཡོད། གང་ཡིན་ཞེ་ན། ལྟ་བཞིན་པའི་ལྟད་པོ་དེ་ནི་ཡིད་ལ་མི་འཐད་པ་དང་སྤྲོ་བ་མེད་པ་ཞིག་ཡིན་པ་རེད། ང་ཚོས་མི་གཞན་དེ་དོ་གལ་ཆེན་པོ་བརྩི་གི་མེད་པ་སོང་ཙང་། འདི་འདྲ་འབྱུང་གི་ཡོད། ཕ་རོལ་གྱི་མི་དེས་དཀའ་ངལ་ཞིག་གི་སྐོར་ཤོད་ཀྱིན་ཡོད་པ་དང་དེ་ལ་ང་ཚོས་ “གློག་བརྙན་ལྟད་མོ་འདི་དུས་ཡུན་རིང་པོར་གནས་ཀྱི་འདུག །ང་རང་གྲོད་ཁོག་ལྟོགས་ཀྱི་འདུག །ངས་གཟུགས་མཐོང་བརྙན་འཕྲིན་ལྟ་རྒྱུ་མཚམས་འཇོག་བྱེད་ཀྱི་ཡིན་” ཞེས་བསམ་གྱིན་ཡོད། དཀའ་ངལ་དེ་དག་ཁོང་ཚོར་དངོས་གནས་ཡིན་པ་དང་དེ་དག་གིས་གནོད་འཚེ་བྱེད་ཀྱི་ཡོད་ནའང་། ང་ཚོས་མི་དེ་ལ་དོ་གལ་ཆེན་པོ་བརྩི་གི་མེད། ལམ་གྱི་རིམ་པ་འགོ་སྟོད་ལ་ང་ཚོས་རང་གིས་རང་ལ་དོ་གལ་ཆེན་པོ་བརྩིས་མེད་པ་སོང་ཙང་། ང་ཚོས་མི་གཞན་དག་ལ་ནམ་རྒྱུན་དོ་གལ་ཆེན་པོ་བརྩི་གི་མེད། 

སོ་སོའི་དཀའ་ངལ་ལ་བལྟས་ནས་དེ་དག་ལ་གདོང་ལེན་བྱེད་ཐབས་དང་བཅས་རང་གིས་རང་ལ་དོ་གལ་ཆེན་པོ་བརྩི་རྒྱུ་ནི་ཧ་ཅང་གལ་ཆེན་པོ་རེད། གལ་ཏེ་ང་ཚོས་སོ་སོ་རང་ཉིད་དང་སོ་སོའི་དཀའ་ངལ་ལ་དོ་གལ་ཆེན་པོ་བརྩིས་མ་ཐུབ་ན། གཞན་དང་གཞན་གྱི་དཀའ་ངལ་རྣམས་ལ་ང་ཚོས་དོ་གལ་ཆེན་པོ་ཇི་ལྟར་བྱེད་ཐུབ་བམ། གལ་ཏེ་ང་ཚོས་སོ་སོ་རང་ཉིད་ཀྱི་བདེ་སྐྱིད་ལ་གཅེས་སྐྱོང་མ་བྱས་ན། གཞན་ཐམས་ཅད་བདེ་སྐྱིད་དང་ལྡན་པར་འདོད་པའི་སེམས་ཇི་ལྟར་སྐྱེད་ཐུབ་བམ། 

རང་གིས་རང་ལ་གཅེས་སྐྱོང་བྱེད་པ་ནི་རང་འདོད་དོན་གཉེར་དང་རང་ཁོ་ནར་གཅེས་པར་འཛིན་པའི་དོན་མིན་ལ། “ང་ལ་ཨ་སྒོར་ས་ཡ་མང་པོ་དགོས་པ་དང་ཅ་དངོས་འདི་དག་ཐམས་ཅད་ཉོ་རྒྱུ་ཡིན་” ཞེས་པའི་དོན་ཀྱང་མ་རེད། དེ་ལས་ལྡོག་སྟེ། ང་ཚོས་འགྲོ་བ་སེམས་ཅན་ཞིག་ཡིན་པའི་ཆ་ནས་རང་གིས་རང་ལ་གུས་ཞབས་དང་ཆེ་མཐོང་བྱེད་ཀྱི་ཡོད། 

མི་མང་པོར་རང་གིས་རང་ལ་ “ང་ནི་ཡག་པོ་མིན། ང་ལ་བདེ་སྐྱིད་འདོད་པའི་འོས་བབ་མེད་ལ་གཞན་གྱིས་བརྩེ་བ་སྤྲོད་པའི་འོས་བབ་མེད་” ཅེས་ཚོར་ནས་བསམ་བློ་དང་བསམ་ཕྱོགས་སྡུག་ཅག་ཅིག་ཡོད་པ་རེད། གལ་ཏེ་དེ་ནི་ང་ཚོས་རང་གིས་རང་ལ་གང་འདྲ་ཚོར་བ་དེ་ཡིན་ན། “གལ་ཏེ་ང་རང་སྐྱིད་པོ་ཡོང་བའི་འོས་བབ་མེད་ན། ཁྱེད་ལ་འོས་བབ་ཅིའི་ཕྱིར་ཡོད་དམ་” ཞེས་པའི་བསམ་བློ་དེ་ལས་སླ་པོའི་སྒོ་ནས་རྗེས་སུ་འབྲང་གི་ཡོད། འོན་ཀྱང་། ང་ཚོས་སོ་སོ་རང་ཉིད་ལ་བལྟས་ནས་ “ང་ལ་སངས་རྒྱས་ཀྱི་རིགས་ཡོད། སངས་རྒྱས་ཀྱི་གོ་འཕང་འཐོབ་ཐུབ་པ་དང་གཞན་ཐམས་ཅད་ལ་ཕན་འདོགས་ཐུབ་པའི་ཆ་རྐྱེན་ཚང་མ་ངའི་རྒྱུད་ལ་ཡོད། ང་ལ་སེམས་ཡོད། ནུས་པ་ཡོད། འབྲེལ་གླེང་བྱེད་པའི་ནུས་པ་ཡོད། སེམས་བཟང་པོའི་ཆ་གང་འཚམས་ཤིག་ཡོད། དེ་དག་ཐམས་ཅད་གོང་འཕེལ་གཏོང་ཐུབ། བྱས་ཙང་། ང་ལ་བདེ་སྐྱིད་དང་ལྡན་ཞིང་མི་ཚེ་བཟང་པོ་ཞིག་སྐྱེལ་བའི་འོས་བབ་ཡོད་ངེས་པ་རེད་” ཅེས་བསམ་གྱི་ཡོད། 

དེ་འདྲའི་སྒོ་ནས་ང་ཚོས་སོ་སོ་རང་ཉིད་ལ་དོ་གལ་དུ་བརྩི་བ་དང་རང་གིས་རང་ལ་གུས་ཞབས་བྱེད་ཀྱི་ཡོད། “ང་རང་ལ་བདེ་སྐྱིད་དང་ལྡན་པ་དང་དཀའ་ངལ་ལས་ཐར་བའི་འོས་བབ་ཡོད་” པར་ང་ཚོས་ཤེས་ཀྱི་ཡོད། འདི་ལ་གཞི་རྩ་ལྟ་བུར་བྱས་ནས་ང་ཚོས་གུས་ཞབས་དེ་གཞན་ལ་རྒྱུད་སྤེལ་བྱེད་ཆོག །ཁོང་ཚོ་ལའང་ཡར་རྒྱས་གཏོང་བའི་འཇོན་ཐང་དེ་ཡོད་པ་དང་། སངས་རྒྱས་ཀྱི་རིགས་ཡོད་པ། ནུས་པ་ཆ་ཚང་ཡོད་པ་ང་ཚོས་མཐོང་གི་ཡོད། དེ་ལ་གཞི་རྩ་བཞག་ནས་ཁོང་ཚོ་ལའང་བདེ་སྐྱིད་མྱོང་བ་དང་སྡུག་བསྔལ་ཀུན་དང་འབྲལ་བའི་འོས་བབ་ཡོད་པ་རེད། དེ་ལྟར་ཁོང་ཚོ་ལ་དོ་གལ་ཆེན་པོ་བརྩི་གི་ཡོད། 

ང་ཚོས་གཞན་དོན་གང་ཐུབ་ཐུབ་བསྒྲུབ་པ་དང་སངས་རྒྱས་ཀྱི་གོ་འཕང་འཐོབ་པའི་ཕྱིར་བྱང་ཆུབ་ཀྱི་སེམས་སྐྱེད་པའི་སྐབས། གལ་འགངས་ཆེ་བའི་གནད་དོན་ཆེ་ཁག་འགའ་ཞིག་ཡོད་པ་རེད། དེ་ནི་ང་ཚོས་ཐོག་མ་ཉིད་ནས་གཞན་དོན་བསྒྲུབ་ཀྱི་མེད་པ་དང་ང་ཚོས་སོ་སོ་རང་ཉིད་ཀྱི་ཆེད་དུ་ཡར་རྒྱས་གཏོང་དགོས་ཤིང་། ཡར་ཐོན་ཚད་མཐོའི་རིམ་པར་བསླེབས་ན། གཞི་ནས་གཞན་ལ་ཕན་འདོགས་དགོས་ཞེས་བརྗོད་ཀྱི་མེད། ཐེག་པ་ཆེན་པོ་ལུགས་ལྟར་བྱས་ན། ང་ཚོས་ཐོག་མ་ཉིད་ནས་གཞན་ལ་ཕན་འདོགས་ཀྱི་ཡོད། ཡིན་ནའང་། ང་ཚོས་ “ངས་དེ་སྔོན་གྱི་ལམ་གྱི་རིམ་པ་ཚང་མ་ཟུར་དུ་བཞག་ནས་མཆོང་རྒྱག་རྒྱག་སྟེ་གཞན་ལ་ཕན་འདོགས་པ་ཙམ་ལ་འབད་བརྩོན་བྱེད་ཆོག་” ཅེས་བསམ་བཞིན་དུ་ཕན་འདོགས་ཀྱི་མེད། ང་ཚོས་ལམ་འགྲིམ་པའི་སྐབས་སུ་གཞོན་དོན་རང་ནུས་གང་ཐུབ་བྱེད་དགོས། དེ་ནི་ནང་པའི་ལམ་ལ་མེད་དུ་མི་རུང་བའི་གལ་གནད་ཅན་ཞིག་རེད། 

དེ་ལྟ་ནའང་། ད་ལྟ་ང་ཚོས་གཞན་ལ་གང་ཐུབ་ཅི་ཐུབ་ཀྱིས་ཕན་འདོགས་པའི་སྐབས་དང་བསྟུན་ནས་ང་ཚོས་སྔོན་གྱི་རྨང་གཞིར་གྱུར་བའི་གཞི་རྟེན་གྱི་ཀུན་སློང་དང་ཉམས་མྱོང་རྣམས་གོང་འཕེལ་གཏོང་བར་དུས་ཚོད་གང་ལ་གང་འཚམས་ཤིག་གཏོང་དགོས་པའི་ཐད་ལ་ངེས་བརྟན་བཟོ་དགོས། དེའི་རྒྱུ་མཚན་ནི། གལ་ཏེ་ང་ཚོས་དེ་ལྟར་མ་བྱས་ན། གཞན་ལ་ཕན་འདོགས་པའི་སྐབས་སུ་ང་ཚོར་དཀའ་ངལ་འཕྲད་སྲིད་པ་ཞིག་རེད། གཞན་ལ་བརྟེན་ནས་ང་ཚོར་དཀའ་ངལ་འཕྲད་བཞིན་པའི་སྐབས། ང་ཚོས་ཁོང་ཚོ་ལ་སྣང་མེད་གཏོང་ཆོག་ཅེས་བསམ་སྲིད། ང་ཚོས་སྣང་མེད་གཏོང་ཐུབ་ཀྱི་མེད། ང་ཚོར་མཐའ་མེད་པའི་སྐྱེ་བ་ལེན་རྒྱུ་ཡོད་པས། དེ་དག་དང་སླར་ཡང་འཕྲད་རྒྱུ་ཡིན་པ་རེད། ཡང་ན་ང་ཚོས་སོ་སོའི་ལོ་ཚད་དང་མཉམ་པའི་རིག་གཞུང་གི་རྒྱབ་ལྗོངས་གཅིག་པ་རྣམས་ཁོ་ནར་ཕན་འདོགས་ཐུབ་ཅེས་ཚོར་སྲིད། དེ་འདྲ་ཞིག་མ་རེད། ང་ཚོ་ནི་ལོ་ཚད་དང་། རིག་གཞུང་། ཕོ་མོའི་དབྱེ་བའི་རིགས་སོགས་ཚང་མ་བརྒྱུད་ནས་ཕྱིན་ཡོད་པས། ང་ཚོས་དེ་དག་ཐམས་ཅད་ལ་འབྲེལ་བ་མཐུད་ཐུབ། 

དེར་མ་ཟད། ང་ཚོས་སོ་སོ་རང་ཉིད་ལ་དགའ་མོས་བྱེད་པ་དང་། གལ་ཆེན་དུ་བརྩི་བ། ཡང་རང་ཉིད་མེད་དུ་མི་རུང་བའི་དགོས་གལ་ཏུ་ཚོར་བ་ཁོ་ནའི་ཕྱིར་གཞན་ལ་ཕན་འདོགས་ཀྱི་མེད། དེ་འདྲ་བའི་ཉོན་མོངས་ལྡན་པའི་འབྲེལ་བ་ལས་ཐར་འདོད་ཀྱི་ཆོད་སེམས་ཤིག་ཡོད། གང་ཡིན་ཞེ་ན། དེ་དག་གིས་དབང་མེད་ཀྱིས་ཡང་ནས་ཡང་དུ་འབྱུང་བའི་དཀའ་ངལ་བཟོ་གི་ཡོད་པ་ང་ཚོས་ཤེས་ཀྱི་ཡོད། ང་ཚོས་ཁོང་ཚོར་ཕན་འདོགས་པའམ་ཡང་ན་ང་ཚོའི་བསླབ་བྱ་དང་ལེན་བྱེད་པར་ཐུབ་ཚོད་གཏོང་ཐབས་བྱེད་པའི་སྐབས། དེ་ལ་བརྟེན་ནས་རང་ཉིད་དབང་ཚད་ལོག་སྤྱོད་ཀྱི་ནང་འགྲོ་གི་མ་རེད། ཁོང་ཚོས་ང་ཚོའི་བསླབ་བྱ་ལ་མི་བརྩི་བའི་སྐབས། དེ་ལ་བརྟེན་ནས་ཁོང་ཚོར་ཁོང་ཁྲོ་མི་ཟ་བའམ་ཡང་ན་ཁོང་ཚོ་ནག་ཉེས་ཅན་དུ་ཚོར་གྱི་མ་རེད། དེ་གང་ཡིན་ཞེ་ན། ང་ཚོ་རང་གིས་རང་ཡར་རྒྱས་གཏོང་བའི་རྒྱུད་རིམ་ཡོངས་སུ་རྫོགས་པ་བརྒྱུད་ནས་ཕྱིན་ཟིན་པ་རེད། དཔེར་ན། ང་ཚོས་རང་གིས་རང་ལ་སྟངས་འཛིན་བྱེད་ཐབས་བྱས་པ་དང་། རང་གིས་རང་ལ་ཁོང་ཁྲོ་བྱས་པ། ནག་ཉེས་ཅན་དུ་ཚོར་ཡོད། འོན་ཀྱང་། ང་ཚོ་ཧ་ཅང་ཡིད་ཐང་ཆད་ནས་ཐར་འདོད་ཀྱི་ཆོད་སེམས་ཡོད་པ་རེད། ང་ཚོས་དེ་ལས་ཐར་བའི་ཐག་གཅོད་བརྟན་པོ་བྱེད་ཀྱི་ཡོད། དེ་ལྟར་བྱས་པ་དང་བཅས་གཞན་ཀྱི་སྟེང་དུ་ང་ཚོས་རྟོག་འཆར་སྐྲུན་གྱི་མ་རེད། 

རྒྱུད་རིམ་ཆ་ཚང་བའི་སྔ་ཕྱི་བར་གསུམ་དུ་ང་ཚོས་རང་གིས་རང་ལ་དོ་གལ་ཆེན་པོ་བརྩིས་ཡོད། ང་ཚོས་སངས་རྒྱས་ཀྱི་རིགས་སམ་རྒྱུ་བདེ་བར་གཤེགས་པའི་སྙིང་པོ་ལ་ངོས་འཛིན་བྱེད་པ་དང་སངས་རྒྱས་ཐུབ་པ་དང་གཞན་ཐམས་ཅད་ལ་ཕན་པའི་ཆ་རྐྱེན་དང་ནུས་པ་ཆ་ཚང་ང་ཚོར་ཡོད་པ་ཤེས་ཀྱི་ཡོད། ང་ཚོ་རང་གིས་རང་ལ་དོ་གལ་ཆེན་པོ་བརྩི་བར་བརྟེན་སོ་སོ་རང་ཉིད་ལ་གུས་ཞབས་ཡོད་པ་རེད། ནང་ཆོས་ཀྱི་ནང་། གཞན་ལ་གུས་ཞབས་བྱེད་པ་ནི་ཕ་རོལ་པ་དེ་ལ་ཞེད་སྣང་སྐུལ་བ་མིན་པར། “ངས་སོ་སོ་རང་ཉིད་ལ་དོ་གལ་ཆེན་པོ་བརྩིས་ནས་རང་གིས་རང་ལ་བཟང་ཕྱོགས་ཀྱི་སྒོ་ནས་ལྟ་གི་ཡོད། ང་རང་བདེ་སྐྱིད་དང་ལྡན་པའི་འོས་བབ་ཡོད་” ཅེས་པའི་དོན་རེད། དེ་ལྟར་ང་ཚོར་ལྷག་བསམ་རྣམ་དག་གི་བསམ་ཕྱོགས་དེ་དང་གཅིག་པ་ཞིག་གཞན་གྱི་ཕྱོགས་སུའང་ཡོད་ཆོག་པ་སྟེ། “ངས་ཁྱེད་ལའང་གུས་ཞབས་བྱེད་ཀྱི་ཡོད། ཁྱེད་ལ་སངས་རྒྱས་ཀྱི་རིགས་ཡོད་པ་ལ་ངས་གུས་བརྩི་བྱེད་ཀྱི་ཡོད། ཐ་ན་ཁྱེད་ཀྱིས་ད་ལྟ་གླེན་པ་ལྟ་བུའི་བྱ་སྤྱོད་སྤེལ་ནའང་། ཁྱེད་རང་སྙིང་རྗེ་ཅན་དང་རྣམ་དཔྱོད་ལྡན་པའི་མི་ཞིག་ཆགས་ཐུབ་པའི་ནུས་པ་ཡོད་པ་ངས་ཤེས་ཀྱི་འདུག །ངས་སོ་སོ་རང་ཉིད་ཀྱི་དཀའ་ངལ་རྣམས་ལ་དོ་གལ་ཆེན་པོ་བརྩི་བ་ནང་བཞིན་ཁྱེད་ཀྱི་དཀའ་ངལ་རྣམས་ལའང་དོ་གལ་ཆེན་པོ་བརྩི་གི་ཡོད། ངས་སོ་སོ་རང་ཉིད་ཀྱི་དཀའ་ངལ་གྱིས་ཇི་ལྟར་གནོད་པ་མཐོང་བ་ནང་བཞིན་ཁྱེད་ཀྱི་དཀའ་ངལ་གྱིས་ཁྱེད་ལའང་གནོད་ཀྱི་ཡོད་པར་ངས་ཡི་རང་བྱེད་ཆོག་” ཅེས་བརྗོད་པ་ལྟ་བུ་རེད། དེ་ལྟ་བུའི་བསམ་ཕྱོགས་ལ་བརྟེན་ནས་ང་ཚོས་ལྷག་བསམ་ཧ་ཅང་ཆེ་བའི་སྒོ་ནས་གཞན་ལ་ཕན་འདོགས་ཐུབ་པ་ཡོང་གི་ཡོད། 

དཀའ་ངལ་གྱི་འབྱུང་ཁུངས་གཞན་ཞིག་ནི་སྐབས་རེར་ང་ཚོས་མི་ཞིག་ལ་ཕན་འདོགས་ཐབས་བྱེད་ནའང་དེས་ཕན་གྱི་མེད། ང་ཚོ་སེམས་ཤུགས་ཆག་གི་ཡོད། དཔེ་མཚོན་ཤུགས་ཆེན་པོ་ཞིག་ནི་ང་ཚོས་སོ་སོའི་ནང་མི་ནང་ནས་གཅིག་ལ་ཕན་འདོགས་ཐབས་བྱེད་པ་དང་མི་དེ་རང་ཤི་རྒྱག་པ་ལྟ་བུ་རེད། དེ་ནི་གནས་སྟངས་འཇིགས་སུ་རུང་བ་ཞིག་ཡིན་པ་དང་དེའི་སྐབས། “གལ་ཏེ་ངས་འདི་འདྲ་ཞིག་དང་དེ་འདྲ་ཞིག་བྱས་ཡོད་ན། མི་དེས་རང་ཤི་རྒྱག་ཡོད་ཀྱི་མ་རེད་” ཅེས་སོ་སོ་རང་ཉིད་ལ་སྐྱོན་འཛུགས་བྱེད་སླ་པོ་ཡོད། ང་ཚོ་བྱང་ཆུབ་སེམས་དཔའི་སྤྱོད་ཚུལ་སྟོན་ཐབས་ཀྱི་རྒྱུད་རིམ་ནང་ཧ་ཅང་ཡིད་ཞུམ་པ་དང་སེམས་ཤུགས་ཆག་སྲིད། ང་ཚོ་ལམ་ལྷོང་བྱུང་མེད་པ་ལྟ་བུ་སྣང་བའི་སྐབས། ཧ་ཅང་ནག་ཉེས་ཅན་དང་འཇིགས་སུ་རུང་བ་ཚོར་ནས་དེ་ལམ་འགྲིམ་པའི་སྐབས་ཀྱི་བར་ཆད་ཆེན་པོ་ཞིག་ཆགས་སྲིད་པ་རེད། 

འདིར་དཀའ་ངལ་ནི་ང་ཚོས་དཔེ་འོས་ཤིང་འཚམས་པོ་མེད་པ་ལ་གཞིགས་ནས་བསམ་བློ་གཏོང་གི་ཡོད། ང་ཚོས་རང་ཉིད་ལྷ་ཡིན་བསམ་པའམ། ཡང་ན་ང་ཚོ་སྔོན་ནས་ལྷ་ཡིན་དགོས་པ་དང་ང་ཚོས་མི་ཞིག་ལ་དོན་རྐྱེན་ཞིག་འབྱུང་བ་དེ་བཀག་འགོག་བྱས་ཐུབ་ཡོད་པ་ཞིག་དགོས་བསམ་གྱི་ཡོད། ནང་ཆོས་ཀྱི་ནང་། ང་ཚོས་ “དེ་ནི་མི་སྲིད་པ་རེད། མི་སུ་གང་ཞིག་ནུས་མཐུ་ཀུན་ལྡན་མིན། འཇིག་རྟེན་ན་ནུས་པ་ངེས་ཅན་ཞིག་ལས་མེད་” ཅེས་བརྗོད་ཀྱི་ཡོད། ཚན་རིག་པ་ཚོས་དེ་ལ་མོས་མཐུན་བྱེད་ཀྱི་ཡོད། འཇིག་རྟེན་ནང་གི་ནུས་པའི་རྣམ་པ་གཅིག་ནི་སངས་རྒྱས་ཀྱི་མཛད་པ་འཕྲིན་ལས་ཀྱི་ནུས་སྟོབས་དེ་ཡིན་པ་དང་། དེ་ནི་སངས་རྒྱས་ཀྱིས་མི་སུ་འདྲ་ཞིག་ཡིན་ནའང་ཚང་མར་སྟོན་མཛད་ཐུབ་པའི་འཕྲིན་ལས་དེ་རེད། གཞན་ཞིག་ནི་སྔོན་གྱི་བྱ་བ་བྱེད་པའི་གོམས་གཤིས་ལ་གཞི་བྱས་པའི་མི་རྣམས་ཀྱི་སེམས་ནང་བསླེབ་པའི་རང་ཤུགས་ཀྱི་ནུས་པ་དེ་རེད། འཇིག་རྟེན་ན་ནུས་པ་ངེས་ཅན་ལས་མེད་པ་སོང་ཙང་། ང་ཚོས་གཅིག་གིས་གཞན་ལ་བཀག་འགོག་བྱེད་མི་ཐུབ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་གཞན་ལ་བཟང་ཕྱོགས་དགེ་བའི་ཐབས་ཚུལ་གྱིས་ཤུགས་རྐྱེན་སྤྲོད་ཐབས་གནང་ཐུབ། ཁོང་རྣམ་པས་གཞན་ཞིག་གི་ལས་དོན་ལ་བཀག་འགོག་དང་མཚམས་འཇོག་གནང་མི་ཐུབ། གལ་ཏེ་རང་ཤི་རྒྱག་རྒྱུའི་རང་ཤུགས་དེ་མི་ཞིག་གི་སེམས་ནང་ཧ་ཅང་ཤུགས་ཆེན་པོ་ཡོད་ན། མི་དེ་རང་ཤི་རྒྱག་ངེས་རེད། 

ང་རང་སྔོན་རྒྱ་གར་རྡ་རམ་ས་ལར་ཡོད་སྐབས། དཔེ་མཚོན་ཧ་ཅང་ཡིད་ལ་འཐད་པ་ཞིག་བྱུང་སོང་། ང་རང་ལས་ཀ་བྱེད་སའི་དཔེ་མཚོད་ཀྱི་མདུན་གྱི་ཆུ་ཡུར་ནང་ཙི་ཙི་ཞིག་ཆུས་འཁྱེར་བཞིན་འདུག །ངའི་གྲོགས་པོ་ཞིག་གིས་ཙི་ཙི་དེ་བསྐྱབས་ནས་སའི་སྟེང་དུ་དྲག་སྐྱེད་ཆེད་དུ་བཞག་སོང་། ངའི་གྲོགས་པོ་དེ་ནས་ཐོན་མ་ཐག་བྱ་ཁྲ་ཆེན་པོ་ཞིག་གིས་ཧོབ་ཁྱེར་བྱས་སོང་། 

ང་ཚོས་གཞན་སུ་ལ་ཕན་འདོགས་ཐུབ་ཀྱི་མི་འདུག །གང་ཡིན་ཞེ་ན། གང་འབྱུང་རྒྱུ་ཡིན་པ་ནི་ཁོང་ཚོའི་ལས་རེད་ཅེས་དཔེ་མཚོན་དེ་ལ་བསམ་བློ་གཏོང་མི་དགོས། ལས་ནི་ལས་སྐལ་ལམ་བསྐོས་ཐང་ཞིག་ཏུ་བསམ་རྒྱུ་མེད། “ཙི་ཙི་དེ་འཆི་རྒྱུ་ཡིན་པ་ནི་དེའི་ལས་སྐལ་རེད། ངས་རོགས་བྱེད་དགོས་པའི་རྒྱུ་མཚན་མེད། གང་ཡིན་ཞེ་ན། འཆི་རྒྱུ་ཡིན་པ་དེ་ནི་ཙི་ཙིའི་ལས་རེད་” ཅེས་བསམ་པ་ལྟ་བུ་རེད། ང་ཚོས་རོགས་གང་དྲག་བྱེད་དགོས། གལ་ཏེ་ང་ཚོས་ཕན་འདོགས་ཐབས་བྱེད་བཞིན་པའི་མི་དེ་ལ་ཁོ་རང་གི་ངོས་ནས་རོགས་བྱེད་པའི་ས་བོན་ནམ་ནུས་པ་ཞིག་བསྐྲུན་ཡོད་ན། ང་ཚོའི་རོགས་བྱ་རྒྱུ་དེ་དང་འབྲེལ་བའི་སྒོ་ནས་མི་དེ་ལ་ང་ཚོས་ཕན་འདོགས་ཐུབ་ཀྱི་རེད། གལ་ཏེ་ས་བོན་མེད་ན། དེ་ནི་ཙི་ཙིའི་དཔེ་མཚོན་དང་འདྲ་པོ་ཆགས་ངེས་རེད། ང་ཚོས་ཙི་ཙི་དེ་བསྐྱབས་ནའང་། དེ་ཤི་གི་རེད། 

དེ་ནི་ང་ཚོས་གཞན་ལ་ཕན་འདོགས་ཐབས་བྱེད་པའི་སྐབས་དང་གཅིག་པ་རེད། བྱང་ཆུབ་སེམས་དཔའི་གོ་འཕང་ལ་མངོན་པར་འདོད་པའི་སྒོ་ནས་ང་ཚོས་གཞན་ལ་ཕན་གང་ཐུབ་འདོགས་ཐབས་བྱེད་ཀྱི་ཡོད། དེས་ཕན་ན་འགྲིག་པ་རེད། ང་ཚོས་རང་གིས་རང་ལ་དགའ་བསུ་བྱེད་ཀྱི་མེད་ལ། ཚང་མར་ང་ཚོ་ཧ་ཅང་སྙིང་རྗེ་ཅན་དང་བཟང་པོ་ཡིན་ཞེས་མི་རྣམས་ལ་ཤོད་ཀྱི་མེད། གལ་ཏེ་དེས་མ་ཕན་ན། ང་ཚོས་ནག་ཉེས་ཅན་དུ་ཚོར་མི་དགོས། ང་ཚོས་སེམས་ཚོར་གྱི་སྒོ་ནས་རང་གིས་རང་ལ་རྡུང་རྡེག་དང་ཉེས་ཆད་གཏོང་མི་དགོས། ང་ཚོས་ཐབས་ཤེས་གང་དྲག་བྱེད་པ་དང་། གལ་ཏེ་མི་དེ་གོ་ཤེས་ཅན་ཞིག་ཡོད་ན། དེས་ཕན་ཐོགས་ངེས་རེད། གལ་ཏེ་གོ་ཤེས་ཅན་ཞིག་མེད་ན། ང་ཚོས་བྱེད་ཐུབ་པ་གང་ཡང་མེད། ང་ཚོ་སུ་གང་ནི་ནུས་མཐུ་ཀུན་ལྡན་གྱི་བྱེད་པོ་དཀོན་མཆོག་ལྟ་བུ་ཞིག་མིན། དེ་འདྲ་ཞིག་ཡིན་ངེས་མ་རེད། གལ་ཏེ་མི་ཞིག་གི་སེམས་ནང་ཡོད་པའི་བག་ཆགས་དང་ངར་ཤུགས་དེ་ཧ་ཅང་ཤུགས་ཆེན་ཡོད་ན། མི་དེས་ལས་ཤིག་བྱེད་པ་ལ་སུས་ཀྱང་བཀག་འགོག་བྱེད་མི་ཐུབ། 

ང་ཚོས་གཞན་ལ་ཕན་འདོགས་ཐབས་བྱེད་པའི་སྐབས། དངོས་ཡོད་དང་མཐུན་པ་དགོས་རྒྱུ་དང་གཞན་ཐམས་ཅད་ཀྱི་དཀའ་ངལ་རྣམས་ང་ཚོས་སེལ་མི་ཐུབ་པ་དེ་རྟོགས་དགོས་རྒྱུ་གལ་ཆེན་པོ་རེད། ང་ཚོས་དེ་འདྲ་ཞིག་བྱེད་ཐུབ་པའི་ཡིད་སྨོན་སྐྱེད་ཀྱི་ཡོད། དེ་དག་ལ་སྙིང་ཐག་པ་ནས་གཅེས་སྐྱོང་དང་བཅོས་མིན་གྱི་ཕན་འདོགས་པའི་འགན་འཁྲི་དང་ལེན་བྱེད་ཀྱི་ཡོད། གལ་ཏེ་དེས་ཕན་གྱི་ཡོད་ན། འགྲིག་པ་རེད། གལ་ཏེ་ཕན་གྱི་མེད་ན། སོ་སོའི་ངོས་ནས་གང་དྲག་དྲག་དང་ཐུབ་ཐུབ་འབད་བརྩོན་བྱས་པ་རེད། སེམས་ཤུགས་ཆག་རྒྱུ་མེད།

༧གོང་ས་༧སྐྱབས་མགོན་ཆེན་པོ་མཆོག་གི་ཞལ་སྔ་ནས། ང་ཚོས་ “སེམས་ཅན་ཐམས་ཅད་ལ་ཕན་འདོགས་པའི་ཕྱིར་བདག་སངས་རྒྱས་ཀྱི་གོ་འཕང་རིན་པོ་ཆེ་འཐོབ་པར་ཤོག་” ཅེས་འདོན་པའི་སྐབས། འདིར་སྨོན་ལམ་གྱི་གོ་རིམ་ལ་ཉེན་ཁ་ཅུང་ཟད་ཡོད། ང་ཚོ་ལ་ནམ་རྒྱུན་ནན་བརྗོད་གཙོ་བོ་དེ་ནི་ “བདག་སངས་རྒྱས་ཀྱི་གོ་འཕང་འཐོབ་པར་ཤོག་”  ཅེས་པ་དེ་རེད། དེ་ཅིའི་ཕྱིར་ཞེ་ན། དེ་ནི་གོ་གནས་མཐོ་ཤོས་དང་། མཆོག་ཏུ་གྱུར་བ། བདེ་བ་ཆེ་ཤོས་དེ་ཡིན་པ་རེད། གང་ལྟར་ཡང་། ང་ཚོར་གནས་ཚད་མཐོ་ཤོས་དང་མཚན་སྙན་ཆེ་ཤོས་དེ་དགོས་ཀྱི་ཡོད། འོན་ཀྱང་། “བདག་སངས་རྒྱས་ཀྱི་གོ་འཕང་འཐོབ་པར་ཤོག་” ཅེས་པ་དེ་ “སེམས་ཅན་ལ་ཕན་འདོགས་པའི་ཕྱིར་” ཞེས་པའི་རྗེས་སུ་ཡོང་གི་ཡོད། དེ་ནི་ང་ཚོས་རྗེས་སུ་ཁྲལ་མང་པོ་སྤྲོད་དགོས་པའི་བཟོ་འདྲ་ཞིག་ཡོད། དེ་ནི་ང་ཚོས་དངོས་གནས་བྱེད་འདོད་པ་དེ་མིན་པར། གལ་ཏེ་ང་ཚོ་སངས་རྒྱས་འདོད་ཡོད་ན། དེ་ནི་ང་ཚོས་བྱེད་དགོས་པའི་འགན་འཁྲི་ཞིག་ཆགས་ཀྱི་ཡོད། ང་ཚོས་སེམས་ཅན་ཐམས་ཅད་ལ་ཕན་འདོགས་དགོས་ཀྱི་ཡོད། ༧གོང་ས་༧སྐྱབས་མགོན་ཆེན་པོ་མཆོག་གིས། “ངས་སེམས་ཅན་གྱི་དོན་གང་ཐུབ་ཅི་ཐུབ་བསྒྲུབ་འདོད་འདུག །དེ་ལྟར་ཕན་འདོགས་པར། ངས་སངས་རྒྱས་ཀྱི་གོ་འཕང་ཐོབ་པར་བྱེད་དགོས་ཀྱི་འདུག་” ཅེས་ནན་བརྗོད་བྱ་དགོས་ཞེས་གསུངས་ཡོད། “ངས་སེམས་ཅན་ཐམས་ཅད་ལ་ཕན་འདོགས་འདོད་འདུག་” ཅེས་པ་ནི་ནན་བརྗོད་བྱེད་ས་གཙོ་བོ་དེ་ཡིན་དགོས།

སྐབས་རེར་ང་ཚོས་གཞན་ལ་ཕན་འདོགས་པའི་སྐོར་ལ་བསམ་བློ་གཏོང་སྐབས། ང་ཚོའི་ཆོས་ཉམས་ལེན་ལ་སེམས་པ་རྣམ་དག་མེད་པའི་བར་ཆད་འབྱུང་སྲིད། ང་ཚོས་ “ངས་སེམས་ཅན་ཐམས་ཅད་ལ་ཕན་འདོགས་རྒྱུ་ཡིན་པ་དང་སེམས་ཅན་ཐམས་ཅད་ལ་བདག་བརྩེ་བ་ཡོད་” བརྗོད་ཀྱི་ཡོད། འོན་ཀྱང་། ང་ཚོའི་ཕ་མ་དང་བུ་ཕྲུག་ཚོས་ང་ཚོར་རོགས་བྱེད་རོགས་ཞེས་ཟེར་དུས་ང་ཚོས་དེ་ལ་ “ང་རང་བསུན་པོ་བཟོ་རྒྱུ་མཚམས་ཞོག །ངས་སེམས་ཅན་ཐམས་ལ་ཕན་འདོགས་ཐབས་བྱེད་ཀྱིན་ཡོད་” ཅེས་ཁོང་ཁྲོ་དྲག་པོའི་སྒོ་ནས་སྐད་ཆ་ཤོད་ཀྱི་ཡོད། དེ་ནི་ཇི་ལྟར་ང་ཚོའི་བློའི་ཁྱེར་སོ་དག་བཅོས་བྱེད་པའི་བློ་སྦྱོང་གི་གཞུང་ནས་གསུངས་པ་ལྟར། ཐོག་མར་སོ་སོ་རང་ཉིད་ལ་ཕན་འདོགས་རྒྱུ་ནས་འགོ་འཛུགས་བྱེད་དགོས་པ་དང་། དེ་ནས་རྒྱ་སྐྱེད་བཏང་ནས་རང་གི་ནང་མི་དང་སོ་སོའི་ཉེ་འཁོར་མི་རྣམས་དང་བཅས་པར་ཕན་འདོགས་དགོས། ཕྱོགས་གཞན་ཞིག་ནས་ང་ཚོས་རང་དང་བློ་ཐག་ཉེ་བ་རྣམས་ལ་རོགས་བྱེད་དགོས། ཁོང་ཚོར་སྣང་མེད་གཏོང་མི་ཉན། ནམ་རྒྱུན་སྤྱི་ཚོགས་ཞབས་ཞུའི་ལས་དོན་བྱེད་མཁན་ཚོར་སྡང་འཛིན་ཅན་གྱི་བུ་ཕྲུག་ཡོད། གང་ཡིན་ཞེ་ན། ཁོང་ཚོ་ནི་གཞན་དོན་ཆེད་དུ་འབད་བརྩོན་ཆེ་དྲགས་པའི་རྐྱེན་གྱིས་སོ་སོའི་ནང་མིའི་ཆེད་དུ་དུས་ཚོད་ནམ་ཡང་མེད་པས་རེད། དེ་ནི་དངོས་གནས་དྲང་བདེན་ཞིག་མིན། གལ་ཏེ་ང་ཚོས་སངས་རྒྱས་ཀྱི་བསླབ་བྱའི་རྗེས་སུ་འབྲངས་ན། ང་ཚོས་ཐོག་མར་སོ་སོའི་ནང་མི་ནས་འགོ་འཛུགས་བྱས་ཏེ་དེ་དག་ལ་གཅེས་སྐྱོང་བྱེད་དགོས་ངེས་རེད། 

བཏང་སྙོམས་གོང་འཕེལ་གཏོང་བ་ནི་ “ད་ངས་སོ་སོའི་བུ་ཕྲུག་ཚོར་སྣང་མེད་བཏང་ནས་གཞན་ཐམས་ཅད་ཀྱི་དོན་དུ་ལས་ཀ་བྱེད་ཀྱི་ཡིན་” ཞེས་པའི་དོན་མ་རེད། དེའི་དོན་ནི་ “ཇི་ལྟར་ང་རང་ལ་སོ་སོའི་བུ་ཕྲུག་ཚོའི་ཆེད་བྱམས་བརྩེའི་བསམ་བློ་དྲག་པོ་ཞིག་ཡོད་པ་ནང་བཞིན་ངས་དེའི་ཁོངས་སུ་མི་གཞན་དག་མང་དུ་མང་དུ་འཇུག་གི་ཡིན། བུ་ཕྲུག་གཉིས་ཀྱི་ཚབ་ལ་ད་གཟོད་ང་ལ་བུ་ཕྲུག་ལྔ་དང་། བཅུ། བརྒྱ། སྟོང་ཕྲག་ཡོད་” ཅེས་པ་དེ་རེད། ང་ཚོས་སོ་སོའི་བྱམས་བརྩེའི་སེམས་ཁུར་གྱི་ཁྱབ་ཚད་དེ་རྒྱ་སྐྱེད་གཏོང་གིན་ཡོད། ང་ཚོས་ས་ཆ་གཅིག་ནས་གཅེས་སྐྱོང་དང་བྱམས་བརྩེ་ཁྱེར་ནས་ས་ཆ་གཞན་ཞིག་ལ་སྤོ་བཞུད་བྱེད་ཀྱི་མེད། ང་ཚོ་དང་བློ་ཐག་ཉེ་བ་རྣམས་ལ་གཅེས་སྐྱོང་བྱ་རྒྱུ་དང་དེ་གཞན་ལ་ཕན་པའི་བསམ་བློ་རྒྱ་སྐྱེད་གཏོང་རྒྱུ་གལ་ཆེན་པོ་རེད། ང་ཚོའི་གྲོགས་པོ་དང་། རྒྱུས་མངའ་མེད་པའི་མི། སོ་སོའི་མི་དགའ་བའི་མི་རྣམས་དང་དེ་བཞིན་དུད་འགྲོ་སྲོག་ཆགས་དང་སྲིན་པོ་ལ་སོགས་སྐྱེ་གནས་མི་འདྲ་བའི་ནང་ཡོད་པའི་སྲོག་ལྡན་ཚང་མར་བློ་རྒྱ་སྐྱེད་གཏོང་དགོས། 

བྱང་ཆུབ་ཀྱི་སེམས་སྐྱེད་པའི་དོན་ནི། ང་ཚོའི་སེམས་རྒྱ་སྐྱེད་གཏོང་རྒྱུ་དེ་རེད། ང་ཚོའི་སེམས་རྒྱ་སྐྱེད་གཏོང་བ་ནི་ང་ཚོས་རང་འདོད་དོན་གཉེར་ནས་སེམས་ཅན་ཐམས་ཅད་ལ་གཅེས་པར་འཛིན་པའི་བར་དུ་མཆོང་ཐེངས་གཅིག་ལ་བགྲོད་ཐུབ་པའི་དོན་མིན། དེའི་ཆེད་དུ་རིམ་པས་ཡར་རྒྱས་གོང་འཕེལ་གཏོང་དགོས། དེ་འདྲའི་སྒོ་ནས་ང་ཚོ་ལྷག་བསམ་ཆེ་བ་ཆགས་ཀྱི་རེད། ང་ཚོས་ “ངས་སེམས་ཅན་ཐམས་ཅད་ལ་ཕན་འདོགས་པའི་ཕྱིར་འབད་བརྩོན་བྱེད་ཀྱིན་ཡོད་” ཅེས་བརྗོད་ཀྱི་ཡོད་ནའང་། སོ་སོའི་ཕ་མ་དང་བུ་ཕྲུག་ཚོར་གཅེས་སྐྱོང་མ་བྱས་ན། ང་ཚོས་ལྷག་བསམ་ཅན་དང་སེམས་པ་རྣམ་དག་བྱེད་མི་ཐུབ། བྱང་ཆུབ་ཀྱི་སེམས་ནི་ནམ་རྒྱུན་ང་ཚོའི་ནང་མི་ཁྱིམ་ཚང་དང་ཕ་མ་བུ་ཕྲུག་གི་གལ་གནད་ཀྱི་རིག་གཞུང་ལམ་ལུགས་ཀྱི་རིན་ཐང་ལྡན་པ་དང་འགལ་བ་ཞིག་རྩ་ནས་མིན། གཞི་རྩ་དེ་ལ་བཞག་ནས་བྱང་ཆུབ་ཀྱི་སེམས་སྐྱེད་པ་དང་དེ་ནས་མུ་མཐུད་དེ་རྒྱ་སྐྱེད་གཏོང་གི་ཡོད། 

ང་ཚོས་གཞན་དོན་གང་ཐུབ་ཅི་ཐུབ་བསྒྲུབ་ཐུབ་པའི་ཆེད་དུ་རང་གི་སེམས་རྒྱ་སྐྱེད་གཏོང་བ་དང་། སྐྱོན་གྱི་ཆ་ཡོངས་སུ་རྫོགས་པ་སྤོང་བ་དང་ནུས་པའི་ཆ་ཀུན་རྟོགས་པའི་སེམས་བསྐྱེད་པའི་ཐེག་པ་ཆེན་པོའི་ལམ་དུ་འཇུག་པའི་སྐབས། དེ་དག་ནི་ང་ཚོས་ཤེས་དགོས་པའི་གནད་དོན་གལ་ཆེན་ཁག་རེད། གལ་ཏེ་ང་ཚོས་དེ་དག་སེམས་ནང་བཅངས་ན། ལམ་འགྲིམ་པའི་སྐབས་སུ་དཀའ་ངལ་ཉུང་བ་འཕྲད་ཀྱི་རེད། 

སྐྱེ་བ་སྔ་མའི་མྱོང་བ་གང་ཐོབ་པ་ལ་བརྟེན་ནས་ཚེ་འདིའི་ནང་གི་གོམ་པའམ་ཐབས་ལམ་དེ་དག་ལས་འགའ་ཞིག་ལ་ཟུར་ལམ་བཟོས་ནས་མགྱོགས་ལམ་ཞིག་བསྟེན་ཐུབ་པ་ཡོང་སྲིད་དམ། 

དེ་ཡོང་སྲིད་པ་ཞིག་རེད། ཉམས་ལེན་པའི་རིགས་གཉིས་ཡོད་དེ། གཅིག་ནི་ཚང་མ་ཅིག་ཅར་དུ་འབྱུང་བ་ཞིག་དང་ཡང་ལམ་རིམ་གྱིས་འགྲིམ་པའི་ཉམས་ལེན་པ་བཅས་ཡོད། དེར་བརྟེན་ཅིག་ཅར་བའི་ལམ་དང་རིམ་གྱིས་བའི་ལམ་གཉིས་ཡོད། འོན་ཀྱང་། བོད་ཀྱི་བླ་མ་མཚན་སྙན་ཤིན་ཏུ་ཆེ་བའི་ནང་ནས་གཅིག་གིས་གནད་དོན་འདིའི་སྐོར་འགྲེལ་བ་ཞིག་མཛད་གནང་ཡོད་པ་དང་། དེའི་ནང་ཁོང་གིས་ཅིག་ཅར་དུ་འབྱུང་བའི་ཉམས་ལེན་པ་ནི་ཤིན་ཏུ་དཀོན་པའི་གང་ཟག་ཅིག་ཡིན་པར་གསུངས། ཚེ་འདིའི་ནང་ང་ཚོས་ཐབས་ལམ་རྣམས་མཆོངས་ནས་འགྲོ་ཐུབ་པའམ་ཡང་ན་ཐབས་ཚུལ་རྣམས་ཟུར་དུ་བསྐྱུར་ནས་བགྲོད་ཐུབ་པའི་ཆེད་སྐྱེ་བ་སྔོན་མའི་ནང་དགེ་བ་བསོད་ནམས་ཀྱི་ནུས་པ་དང་བག་ཆགས་ཚང་མ་བསགས་པ་ནི་ཤིན་ཏུ་དཀོན་པོ་ཡིན་པ་རེད། དེ་ནི་ནམ་རྒྱུན་ང་ཚོ་ལེ་ལོའི་དབང་དུ་ཤོར་བའི་རྒྱུ་མཚན་གྱིས་ཡིན་པ་དང་ལམ་གྱི་རིམ་པ་ཚང་མ་བརྒྱུད་ནས་འགྲོ་འདོད་མེད་པར། “ང་ནི་སྐྱེ་བ་སྔོན་མའི་ནང་བསོད་ནམས་རླབས་པོ་ཆེ་གསོག་མཁན་ཞིག་ཡིན། ང་ནི་ཚང་མ་ཅིག་ཅར་དུ་འབྱུང་བའི་ཉམས་ལེན་འདེམས་སྒྲུག་བྱས་པ་ཉུང་ཤས་ཀྱི་ནང་ནས་གཅིག་ཡིན་པས། ངས་ལམ་གྱི་རིམ་པ་འགའ་ཞིག་ཟུར་དུ་བསྐྱུར་ནས་མདུན་མཆོང་རྒྱག་ན་འགྲིག་” ཅེས་ང་ཚོས་ཁག་འདོགས་ཀྱི་ཡོད། ང་ཚོས་རང་གིས་རང་ལ་དྲང་པོ་དྲང་གཞག་བྱེད་དགོས། མི་སུ་འདྲ་ཞིག་གིས་སྐྱེ་བ་སྔོན་མའི་ནང་དེ་ལྟ་བུའི་དགེ་བའི་ནུས་པ་མང་པོ་བསགས་ཡོད་པ་ནི་ཤིན་ཏུ་དཀོན་པོ་རེད། ང་ཚོས་གོམ་པའམ་ཐབས་ཚུལ་རེ་རེའི་ཆེད་དུ་ལོ་མང་པོ་གཏོང་མི་དགོས་ནའང་། ལམ་གྱི་རིམ་པ་རེ་རེ་བཞིན་དུ་བགྲོད་པར་གནོད་སྐྱོན་གང་ཡང་མེད། བྱང་ཆུབ་ལམ་གྱི་རིམ་པའི་གཞུང་གཅིག་གི་ནང་། ཐ་ན་བག་ཆགས་རྣམས་དེར་ཡོད་ནའང་། ང་ཚོས་མདུན་མཆོང་མི་རྒྱག་པར་ལམ་རྣམས་མྱུར་པོའི་སྒོ་ནས་འགྲིམས་ཏེ་སླར་ཡང་ངེས་བརྟན་བཟོ་དགོས་པ་ནི་ཡག་པོ་ཞིག་རེད་ཅེས་གསུངས། 

ང་ཚོས་གཞན་ལས་ཁེ་ཕན་མི་བླང་བའི་སྒོ་ནས་སེམས་བཟང་པོ་དང་སྙིང་རྗེ་ཅན་བྱེད་ཐུབ་བམ།

དྲུང་པ་ཆོས་ཀྱི་རྒྱ་མཚོའམ་ཆོས་རྒྱམ་དྲུང་པ་རིན་པོ་ཆེས་བརྗོད་ཚུལ་ཕུལ་དུ་བྱུང་བ་ཞིག་གསར་བཟོ་མཛད་ཡོད་པ་དྲི་བ་འདི་དང་འབྲེལ་བ་འདུག །ཁོང་གིས་ཨིན་སྐད་ནང་ (Idiot Compassion) “གླེན་པའི་ངང་ཚུལ་གྱི་སྙིང་རྗེ་” ཞེས་གསུངས་ཡོད། དེ་ནི་ཤེས་རབ་དང་བྲལ་བའི་སྙིང་རྗེ་ཡིན་པ་རེད། དཔེར་ན། ཕྲུ་གུ་ཆུང་ཆུང་ཚོས་རྟག་ཏུ་མངར་ཆའི་རིགས་དགོས་ཞེས་བཤད་པ་དང་འདྲ་པོ་རེད། གླེན་པའི་ངང་ཚུལ་གྱི་སྙིང་རྗེ་ལ་བརྟེན་ནས་ཕྲུ་གུ་དེས་མངར་ཆ་སློང་བ་ཙམ་རྒྱུ་མཚན་དུ་བྱས་ནས་ང་ཚོས་དེ་ལ་རྒྱུན་ཆད་མེད་པར་མངར་ཆའི་རིགས་སྤྲོད་ངེས་རེད། ཡང་ན་མི་སྙིང་རླུང་ཅན་ཞིག་བསླེབས་ནས་ “ང་ལ་མེ་མདའ་ཞིག་རག་པར་གྱིས། མི་ཞིག་ལ་ངས་མེ་མདའ་རྒྱག་འདོད་འདུག་” ཅེས་བརྗོད་པ་དང་། གལ་ཏེ་ང་ཚོས་མི་དེ་ལ་ “ངས་སྦྱིན་པ་ཉམས་ལེན་བྱེད་བཞིན་ཡོད་པས། ཡིན་ད་ཡིན། ངས་ཁྱེད་ལ་མེ་མདའ་ཞིག་རག་པར་བྱེད་ཀྱི་ཡིན་” ཞེས་བརྗོད་ན། དེ་ནི་གླེན་པའི་ངང་ཚུལ་གྱི་སྙིང་རྗེ་ཆགས་ཀྱི་ཡོད། 

དེ་ག་ནང་བཞིན་མི་རྣམས་ཀྱིས་ང་ཚོ་ལས་ཁེ་ཕན་ལེན་པའི་སྐབས། ང་ཚོས་མུ་མཐུད་ནས་བྱིན་ན། དེས་ཁོང་ཚོ་ཕན་ཐོགས་ཡོང་གི་མེད། དོན་ངོ་མར་དེ་ནི་ཁོང་ཚོ་ཡར་རྒྱས་གོང་འཕེལ་འགྲོ་བར་གནོད་གཞི་ཅན་ཆགས་ཀྱི་ཡོད། སྐབས་འགར་ཧ་ཅང་བརྟན་པོ་དང་དམ་པོ་དགོས་རྒྱུ་གལ་ཆེན་པོ་རེད། ང་ཚོས་གཞན་ལ་གང་མཁོ་བ་དེ་སྦྱིན་དགོས་པ་དང་ཁོང་ཚོར་གང་དགོས་མཁོ་ཡོད་པ་ནི་ཚུལ་ཁྲིམས་ཡིན་སྲིད། ཁོང་ཚོར་མི་ཞིག་གིས་ “མིན་” ཞེས་བརྗོད་པ་དེ་དགོས་ཀྱི་ཡོད་སྲིད་པ་དང་མི་ཞིག་གིས་ཁོང་ཚོར་ཚད་བཀག་བཟོ་བ་དེ་དགོས་ཀྱི་ཡོད་སྲིད། དཔེ་ཆ་བཞག་ན། ཕྲུ་གུ་ཧ་ཅང་འཚུབ་པོ་ཞིག་ལ་སྒྲིག་ཁྲིམས་དགོས་པ་ལྟ་བུ་རེད། ནུབ་ཕྱོགས་སུ་ཁྲིམས་མེད་པའི་ལྟ་གྲུབ་ཀྱིས་གསོ་སྐྱོང་བྱས་པའི་མི་རབས་ཤིག་ཡོད་པ་སྟེ། “ཕྲུ་གུ་ཚོས་རང་གི་གང་འདོད་འདོད་བྱེད་དུ་འཇུག་པ་དང་། རང་དབང་སྤྲོད་དགོས་” པའི་ལམ་ལུགས་ཤིག་ཡོད། སྲིད་བྱུས་ལམ་ལུགས་འདི་ནི་རྐྱེན་ངན་བཀྲ་མི་ཤིས་པ་ཞིག་བྱུང་ཡོད། ཕྲུ་གུ་མང་པོ་ཞིག་ལ་བརྩེ་བ་མ་ཐོབ་པ་དང་ཉེན་སྲུང་མེད་པར་ལུས་པ་རེད། གང་ཡིན་ཞེ་ན། ཕ་མ་ཚོས་སྒྲིག་ཁྲིམས་བཟོ་དགོས་ངེས་ཡིན་ནའང་། ཁོང་ཚོས་བཟོས་མེད། ཕྲུག་གུ་ཚོས་རང་གི་ཕ་མས་བརྩེ་བ་སྤྲོད་ཀྱི་མེད་པ་དང་སྒྲིག་ཁྲིམས་བཟོ་བར་དོ་སྣང་དང་སེམས་ཁུར་བྱེད་ཀྱི་མེད་པར་ཚོར་ཡོད། དེ་འདྲ་ཡིན་དུས་མཚམས་མཚམས་ལ་ “མིན་” ཞེས་བརྗོད་ནས་ཚད་བཀག་བཟོ་རྒྱུ་དང་གཞན་ཐམས་ཅད་ཀྱི་རང་ཉིད་ནས་ཁེ་ཕན་ལེན་དུ་འཇུག་རྒྱུ་མེད་པ་དེ་ཧ་ཅང་གལ་ཆེན་པོ་རེད། 

གླེན་པའི་ངང་ཚུལ་གྱི་སྙིང་རྗེ་ནི་ཕན་ཐོགས་ཅན་ཞིག་མིན། ང་ཚོར་ཤེས་རབ་ཟུང་དུ་འབྲེལ་བའི་སྙིང་རྗེ་དགོས་ཀྱི་ཡོད། འདི་ནི་ནང་པའི་ཆོས་ཀྱི་རྨང་གཞི་དེ་ཡིན་པ་དང་དེ་ནི་ཨོཾ་མ་ཎི་པདྨེ་ཧཱུྃ་ཞེས་པའི་འཕགས་པ་སྤྱན་རས་གཟིགས་ཀྱི་གཟུངས་སྔགས་ཀྱི་ནང་དུ་གསལ་ཡོད། མ་ཎི་ནི་ནོར་བུ་དང་དེས་སྙིང་རྗེ་མཚོན་གྱི་ཡོད། པདྨེ་ནི་མེ་ཏོག་པདྨ་སྟེ་ཤེས་རབ་མཚོན་གྱི་ཡོད། དེ་གཉིས་ཟུང་དུ་འབྲེལ་ནས་ཡོད། 

སྐབས་རེར་ “མིན་” ཞེས་བརྗོད་དགོས་ངེས་ཤིག་ཆགས་ཀྱི་ཡོད། འོན་ཀྱང་། འདིས་མི་གཞན་དེ་ལ་གནོད་སྲིད། གང་ཡིན་ཞེ་ན། ཕ་རོལ་པོ་དེས་ཤེས་རྟོགས་ཡོང་གི་མེད། དེ་ཡག་པོ་འདུག་གམ། གལ་ཏེ་གནས་སྐབས་དུས་ཡུན་ཐུང་ངུའི་ནང་ཏོག་ཙམ་གནོད་གཞི་ཅན་ཞིག་ཡོད་པ་དང་ཕུགས་རྒྱང་རིང་པོའི་ནང་ཧ་ཅང་ཕན་ཐོགས་ཅན་ཞིག་ཡོད་ན། བྱ་བ་དེ་བྱེད་དགོས་ཀྱི་ཡོད་ཅེས་ལས་ཀྱི་སྐོར་བཤད་པའི་སྐབས་སུ་གསུང་གི་ཡོད། གལ་ཏེ་གནས་སྐབས་དང་ཕུགས་གཉིས་ཀར་ཕན་ཐོགས་ཅན་ཞིག་ཡིན་ན། དེ་ནི་ཡག་ཤོས་ཡིན་པ་གསལ་པོ་རེད། ཡིན་ནའང་། ངས་ཕྲུ་གུ་ཚོས་ངུ་སྐད་མི་རྒྱག་པའི་ཕྱིར་མངར་ཆའི་རིགས་སྤྲད་པ་དང་དེ་ལ་བརྟེན་ནས་རང་ཉིད་ཀྱང་གཉིད་ཉལ་བར་འགྲོ་ཆོག་ན། དེ་ནི་གནས་སྐབས་རིང་ཕན་པོ་ཡོད་ནའང་ཕུགས་རྒྱང་རིང་པོའི་ནང་ཕན་ཐོགས་མེད། ཕྲུ་གུ་ཚོས་རྒྱུན་མ་ཆད་པར་མངར་ཆའི་རིགས་བཟའ་བར་བརྟེན་ན་གི་ཡོད་པ་སོང་ཙང་། དེས་ཕྲུ་གུ་ཚོར་གནོད་ཀྱི་ཡོད། དེར་མ་ཟད། ཁོང་ཚོ་གཅེས་ལང་ཤོར་ནས་སྤྱོད་འཚུབ་ཅན་གྱི་སྡུག་ཕྲུག་ཆགས་ཀྱི་རེད། གནས་སྟངས་འདིའི་ནང་གནས་སྐབས་རིང་ལ་ཏོག་ཙམ་གནོད་པ་དང་མི་སྡུག་པ་བྱ་རྒྱུ་དེ་ཕན་པ་ཡོད། གང་ཡིན་ཞེ་ན། ཕུགས་རྒྱང་རིང་པོའི་ནང་དེ་ཕན་ཐོགས་ཅན་ཞིག་ཡིན། གང་ཕན་ཐོགས་ཅན་དང་གང་གནོད་གཞི་ཅན་ཡིན་པར་ལྟ་བའི་ལེགས་ཉེས་རྣམ་འབྱེད་ཀྱི་ཤེས་རབ་དེ་དགོས་ཀྱི་ཡོད། འོན་ཀྱང་། གནད་དོན་དེ་དག་ལས་འགའ་ཞིག་ནི་སྤྱིར་བཏང་གི་བསམ་ཤེས་རེད། 

གལ་ཏེ་ང་ཚོའི་མི་ཚེ་དུས་ལ་མ་བབས་སྔོན་ནས་མཇུག་རྫོགས་པའི་དབང་དུ་བཏང་ན། སྐྱེ་བ་ཕྱི་མའི་ནང་སླར་ཡང་ང་ཚོ་གང་ཟག་གཅིག་པའི་ཁྱོ་ཤུག་གང་རུང་ཆགས་ཀྱི་རེད་དམ། 

དེ་ནི་སྲིད་པ་ཞིག་ཡིན་ནའང་ངེས་པ་མེད། གལ་ཏེ་འབྲེལ་བ་དེ་ཧ་ཅང་ཤུགས་ཆེན་པོ་ཡོད་ན། དེ་ཡོང་སྲིད་པ་རེད། འདི་ལ་དཔེ་མཚོན་ཡོད་པ་ནི། ཕྲུ་གུ་ཞིག་ནང་མི་ཞིག་གི་ནང་སྐྱེས་པ་དང་དེ་ཕྲུ་གུ་མ་འབྱར་སྐབས་ནས་འདས་གྲོངས་སུ་གྱུར་བ་རེད། ཡིན་ནའང་། སྒེར་གྱི་ངོས་ནས་ནང་མི་དང་ཧ་ཅང་འབྲེལ་བ་ཤུགས་ཆེན་ཞིག་ཡོད་པའི་རྐྱེན་གྱིས་སླར་ཡང་ནང་མི་དེ་གའི་ནང་སྐྱེས་པ་ལྟ་བུ་རེད། དེ་འདྲ་ཡོང་གི་ཡོད་ནའང་། སྤྱིར་བཏང་ནས་ལས་ཀྱི་རྣམ་པར་སྨིན་པ་སྣ་ཚོགས་པ་ཡོད། འཆི་བའི་དུས་སྐབས་སུ་ལས་ཀྱི་བག་ཆགས་མི་འདྲ་བ་སྣ་ཚོགས་པ་མཐུ་ལྡན་དུ་གྱུར་ཡོད་སྲིད་པ་དང་དེ་དག་གིས་ང་ཚོ་སླར་ཡང་སྐྱེ་བ་མི་འདྲ་བ་ལེན་པར་སྐུལ་འདེད་བྱས་ཡོད། 

དེ་ག་ནང་བཞིན་ང་ཚོར་ཁྱོ་ཤུག་གང་རུང་དང་འདྲ་བའི་གང་ཟག་གཅིག་ཙམ་ལ་འབྲེལ་བ་ཞིག་ཡོད་པ་མིན། ཚེ་རབས་མང་པོའི་ནང་ང་ཚོར་གང་ཟག་མི་འདྲ་མང་པོ་དང་མཉམ་དུ་ང་ཚོ་འབྲེལ་བ་བྱུང་ཡོད། འབྲེལ་བ་དེ་དག་མུ་མཐུད་ནས་འགྱུར་བ་འགྲོ་གི་ཡོད། སྐྱེ་བ་གཅིག་གི་ནང་། མི་གཞན་ཞིག་དང་མཉམ་དུ་འབྲེལ་བ་ཞིག་འབྱུང་གི་ཡོད་པ་དང་ང་ཚོའི་འབྲེལ་བ་དེ་འགྱུར་གྱི་ཡོད། དེར་བརྟེན་འབྲེལ་བ་དེའི་རྒྱུད་ནི་ཁྱོ་ཤུག་གི་འབྲེལ་བ་རང་འཇགས་ཡིན་དགོས་པའི་ངེས་པ་མེད་པར། དེ་གཉིས་བ་ཕྱུགས་གཉིས་སུ་སྐྱེས་ནས་རྩྭ་བཟའ་བཞིན་ཡོད་སྲིད་པའམ་ཡང་ན་འབུ་གྲོག་མར་སྐྱེས་ནས་གྲོག་མཁར་སྟེང་དུ་མཉམ་ལས་བྱེད་བཞིན་ཡོད་སྲིད། དེ་ནི་སྔོན་འབྲེལ་བ་ཇི་ལྟར་འཕེལ་རྒྱས་ཕྱིན་པར་རག་ལུས་ཡོད། དེར་མ་ཟད། ང་ཚོས་གང་ཟག་དེ་སྐྱེ་བ་ཕྱི་མ་དང་སྐྱེ་བ་ཕྱི་མའི་ཕྱི་མར་ཡང་མི་ཐུག་པ་སྲིད། ད་དུང་སྐྱེ་བ་སྟོང་ཕྲག་མང་པོའི་རིང་གང་ཟག་དེ་དང་མི་ཐུག་པའང་སྲིད། 

རྡོག་རྡོག་ཚུགས་ཐུབ་ཏུ་གྲུབ་པའམ་བདེན་པར་གྲུབ་པའི་བདག་མེད་པའི་གཞི་རྩའི་ཆོས་ཚུལ་དང་ཟུང་དུ་འབྲེལ་བའི་སྒོ་ནས་སྐྱེ་བ་ཕྱི་མ་རྟོགས་རྒྱུ་དེ་གལ་ཆེན་པོ་རེད། དེ་ནི་སྐྱེ་བ་ཕྱི་མའི་ནང་ཁྱོ་ཤུག་གང་རུང་གིས་ང་རང་བཟའ་ཟླ་ཐུག་ཏུ་འགྲོ་རྒྱུ་ཡིན་ཞེས་པ་དེ་འདྲ་མ་རེད། གང་ཟག་རེ་རེ་ནི་རྒྱུད་ཅིག་ཡིན་པ་དང་དེ་ཡང་ནུས་པའི་རྒྱུད་དང་། ཤེས་པའི་རྒྱུད། བག་ཆགས་དང་གོམས་གཤིས་ཀྱི་རྒྱུད་ཅིག་ཡིན། སྐྱེ་བ་ཕྱི་མ་འགའ་ཞིག་གི་ནང་གང་ཟག་གཉིས་ཀྱི་རྒྱུད་དེ་ཐུག་ནའང་། དེ་ནི་ད་ལྟའི་དུས་ཀྱི་ང་ཚོ་ནང་བཞིན་ཁྱོད་དང་ང་དེ་གནས་ཀྱི་མ་རེད། 

མི་ཚོགས་འཚང་འགག་ཡོད་ས་ཞིག་ལ་ཕྱིན་ནས་དེར་ཡོད་པའི་མི་གཅིག་གམ་གཉིས་ལ་སྣང་བར་འགྲོ་བའི་ཉམས་མྱོང་དེ་ང་ཚོར་ཚང་མར་བྱུང་ཡོད། ཁོང་ཚོའི་ཕྱོགས་སུ་བློ་ཐག་ཉེ་པོ་དང་བྱམས་བརྩེའི་ཚོར་བ་ཞིག་ཡོད་པ་དང་དེ་དག་དང་མཉམ་དུ་སྐད་ཆ་ཤོད་འདོད་ཡོད། ཡང་ཕྱོགས་གཞན་ཞིག་ནས་མི་གཞན་ཞིག་གིས་ང་ཚོར་ “མདོག་ཉེས་པ་ལ། མི་དེ་དང་མཉམ་དུ་འབྲེལ་བ་བྱེད་འདོད་མི་འདུག་” ཅེས་པའི་ཚོར་བ་སྟེར་གྱི་ཡོད། འདི་ག་རེ་བྱས་ནས་ཡོང་གི་ཡོད་དམ། འདི་ནི་མི་དེ་དང་སྔོན་གྱི་འབྲེལ་བ་ཞིག་ཡོད་པའི་བརྡ་མཚོན་ཞིག་རེད། ང་ཚོར་སེམས་ཅན་མི་འདྲ་བ་གྲངས་ལས་འདས་པ་དང་འབྲེལ་བ་ཡོད། འབྲེལ་བ་འགའ་ཞིག་ནི་གསར་བ་དང་ཤུགས་ཆེ་བ་ཡོད་པ་སོང་ཙང་། མི་དེ་དག་དང་མཉམ་དུ་ཡོད་པའི་ང་ཚོའི་ཉམས་མྱོང་གིས་ང་ཚོར་ཤུགས་རྐྱེན་ཆེ་བ་སྤྲོད་ཀྱི་ཡོད། འབྲེལ་བ་གཞན་རྣམས་ཞན་པོ་ཡོད་སྲིད་པ་སྟེ། དཔེར་ན། ང་ཚོ་གྲོང་ཁྱེར་གཅིག་གི་ནང་སྐྱེས་ནའང་། ཕན་ཚུན་ནམ་ཡང་ཐུག་གི་མེད་པ་ལྟ་བུ་རེད། 

འདི་ག་རིངྒ་པོར་ལ་མི་འགའ་ཤས་ཀྱིས་རང་ཉིད་སྲུང་སྐྱོབ་ཕྱིར་སངས་རྒྱས་ཀྱི་སྐུ་འདྲ་ཆུང་ངུའི་རིགས་འཁྱེར་གྱི་འདུག །དེས་ཇི་ལྟར་ཕན་གྱི་ཡོད་དམ། 

འདིར་ཆ་རྐྱེན་གཉིས་ཡོད། གཅིག་ནི་ཡུལ་གྱི་ཕྱོགས་ནས་རེད། དེ་ཡང་སྐུ་འདྲ་དེའི་རིགས་བླ་མ་རྩ་ཆེན་རྣམས་ཀྱིས་རབ་གནས་མཛད་ཡོད། བླ་མ་དགེ་བའི་བཤེས་གཉེན་མང་པོ་གཅིག་ཏུ་འདུས་ནས་མ་ཎི་ཚར་ས་ཡ་བཅུ་ཞལ་འདོན་མཛད་པ་དང་ཞལ་ཕུ་གནང་ནས་བསྒྲུབས་ཡོད། བླ་མ་གཅིག་གིས་ཀྱང་གནང་ཐུབ་པའམ་ཡང་ན་ཁོང་གིས་གཏིང་ཟབ་ལ་རྩེ་གཅིག་པའི་ཏིང་ངེ་འཛིན་གྱི་སྒོམ་ནང་བཞུགས་ཐུབ། འདི་ལ་ཚན་རིག་དང་མཐུན་པའི་དཔེ་མཚོན་ཞིག་བཞག་ན། སྔགས་འདོན་པ་དང་ཏིང་ངེ་འཛིན་སྒོམ་པ་དེས་སྐུ་རྟེན་གྱི་ཁབ་ལེན་ཁྱབ་རའམ་ནུས་པའི་ཁྱབ་ར་འགྱུར་བ་གཏོང་གི་ཡོད། དེ་ལ་བརྟེན་ནས་དེ་དག་ལ་དམིགས་བསལ་ཆོས་ཕྱོགས་ཀྱི་ཁབ་ལེན་ཁྱད་ཆོས་ངེས་ཅན་ཞིག་ཡོད་པ་རེད། 

ཆ་རྐྱེན་གཉིས་པ་ནི་སྐུ་འདྲ་བེད་སྤྱོད་གཏོང་མཁན་གྱི་མི་རྣམས་ཀྱི་དད་པ་དང་ཡིད་ཆེས་དང་ཁོང་ཚོས་སྔོན་བསགས་པའི་ལས་ཀྱང་རེད། གལ་ཏེ་མི་རྣམས་ལ་སྐུ་འདྲ་དེ་འདྲ་ཞིག་གིས་རང་ཉིད་སྐྱོབ་ཀྱི་རེད་བསམ་པའི་དད་པ་དང་ཡིད་ཆེས་ཡོད་ན། ཁོང་ཚོར་ཡོད་པའི་དད་པ་དེས་བསྐྱབ་ཐུབ་པ་ཡིན། དེས་རྡུལ་ཕན་འབར་རྫས་ལྟ་བུ་ཞིག་ལས་བསྐྱབ་ཀྱི་མེད་སྲིད་ནའང་། གནས་སྟངས་ལ་བཟང་ཕྱོགས་ལམ་ནས་གདོང་ལེན་བྱེད་པའི་གདེང་ཚོད་མེད་པའི་བྱུང་རྐྱེན་གྱི་ནང་ཁོང་ཚོར་སྲུང་སྐྱོབ་བྱེད་སྲིད་པ་ཡིན། 

གལ་ཏེ་སྲུང་མདུད་དང་སྐུ་འདྲའི་རིགས་ཕག་པ་ཞིག་གི་སྐེ་ལ་བཏགས་ན། དེས་ཤན་པས་གསོད་པ་ལས་སྐྱོབ་ཐུབ་མིན་ངས་མི་ཤེས། ཡིན་ནའང་། མི་ཞིག་ལ་བྱིན་བརླབས་འདི་འཇུག་པར་བྱེད་པའི་ནུས་པ་ཡོད་ན། དེས་ཕན་གྱི་ཡོད། ཆ་རྐྱེན་དེ་གཉིས་ཀ་དགོས་ཀྱི་ཡོད། དེ་ནི་ལྷུ་སྒྲིག་རྩེད་མོའི་གྲུབ་ཆ་དུམ་བུ་གཉིས་མཉམ་དུ་སྒྲིག་པ་ལྟ་བུ་རེད།།