སྒོམ་མ་རྒྱག་པའི་སྔོན་ལ་ག་རེ་ཤེས་དགོས་པ།

གཅིག་བྱེད་ན་ང་ཚོས་གཅེས་སྐྱོང་གི་བསམ་ཕྱོགས་ཀྱི་བྱེད་ལས་དེ་མི་གཞན་གྱི་ཕྱོཌ་ལ་བལྟས་པ་ཡིན་ན་ལས་སླ་བ་ཤེས་སྲིད། གལ་སྲིད་ངས་གཞན་ལ་གཅེས་སྐྱོང་མེད་ན། ངས་གང་བྱེད་པ་དང་གང་བཤད་པའམ། ཡང་ན་ཁོ་ཚོས་དེ་ལ་དགའ་པོ་བྱེད་དང་མི་བྱེད་འབྲེལ་བ་གང་ཡང་ཡོད་མ་རེད། ཡིན་ནའང་གལ་ཏེ་ངས་མི་གཞན་གལ་ཆེན་པོ་རྩིས་ཀྱི་ཡོད་ན། ངའི་སྤྱོད་ལམ་གྱིས་མི་གཞན་ལ་ཤུགས་རྐྱེན་གང་སྤྲོད་ཀྱི་ཡོད་པ་དེ་ལ་སེམས་འཁུར་བྱེད་ཀྱི་རེད། ང་ཚོས་དེ་འདྲའི་གཅེས་སྐྱོང་དེ་སོ་སོ་རང་ལ་སླེབས་ཐུབ་པ་བྱེད་དགོས། སོ་སོ་རང་གིས་མི་ཚེ་རྩ་ཆེན་པོ་འདི་ཐོབ་ཡོད་པའི་ཁེ་ཕན་ཡག་པོ་མ་ལེན་པར་འཕྲོ་བརླག་གཏང་བ་ཡིན་ན། ཉིན་གཅིག་སོ་སོ་ཤི་སྐབས་འགྱོད་པ་ཧ་ཅང་ཆེན་པོ་སྐྱེ་གི་རེད།

གནད་དོན་འདི་ང་ཚོས་སྤྱིར་བཏང་མི་ཚེ་ནང་འཁྱེར་ཡོང་ཆོག་གི་རེད། དཔེར་ན། ངས་ང་རང་གི་ཕྲུ་གུ་གང་འདྲ་བྱས་ནས་གསོ་སྐྱོང་བྱེད་ཀྱི་ཡོད། སོ་སོས་གང་འདྲ་བྱས་ནས་ལས་ཀ་བྱེད་ཀྱི་ཡོད་པ་དང་སོ་སོའི་སྤྱིར་བཏང་ལུས་དང་སེམས་ཀྱི་དོན་དུ་གཅེས་སྐྱོང་གང་འདྲ་བྱས་ཀྱི་ཡོད། བསམ་བློའི་འཁྱེར་ཕྱོགས་འདི་ལྟ་བུས་ཆོས་གལ་ཆེན་པོ་ཡིན་པ་བསམ་གྱི་རེད། ཆོས་སེམས་ནང་ཡོད་པའི་ཐོག་ནས་ག་ལེར་ག་ལེར་ཆོས་དེ་དུས་རྟག་ཏུ་མ་དྲན་ཡང་ཉུང་མཐར་ཡང་དུས་ཚོད་མང་པོའི་ནང་དྲན་ཐུབ་ཀྱི་ཡོད། སྒོམ་ནི་ང་ཚོ་ཆོས་ལ་ཡང་ནས་ཡང་དུ་གོམས་འདྲིས་ཆགས་ནས་དེ་དག་སེམས་ཀྱི་རང་བཞིན་གྱི་ཆ་ཤས་སུ་འགྱུར་བའི་ཐབས་ལམ་ཞིག་ཡིན། དེ་འདྲའི་གནས་སྐབས་སུ་དེ་དག་དྲན་པར་བྱེད་པ་ལ་ང་ཚོས་རྩོལ་བ་གཅིག་ཀྱང་བྱེད་མི་དགོས་པ་ཆགས་ཀྱི་ཡོད།

གལ་སྲིད་ང་ཚོས་གཏིང་ཟབ་པའི་གོ་རྟོགས་དེ་འདྲ་འཐོབ་ཐུབ་པའི་ནུས་པ་ཡོད་པ་ཡིད་ཆེས་རྙེད་སོང་ན། དེ་ལ་དངོས་གནས་སེམས་ཡོངས་སུ་གཏད་ནས་དཀའ་ལས་རྒྱག་གི་རེད། གལ་ཏེ་ང་ཚོར་ཡིད་ཆེས་རྙེད་པ་ཞིག་བྱུང་མེད་ན། དེ་ནི་དཔུང་པ་རྡབ་རྡབ་གཡུག་གཡུག་བྱས་ནས་ནམ་མཁར་འཕུར་རྩིས་བྱེད་པ་དང་གཅིག་པ་རེད། དེ་ལ་ཡིད་མི་བདེ་བྱེད་དགོས་དོན་ཅི་ཡོད། དང་པོ་འགོ་བཙུགས་དུས་ཐར་པ་དང་སངས་རྒྱས་ཀྱི་གོ་འཕང་གི་དོན་དག་ཀྱང་ཧ་གོ་གི་མ་རེད། འོན་ཀྱང་ང་ཚོས་དེ་ཚོའི་དོན་དག་ཤེས་པར་བྱ་རྒྱུ་དང་། དེ་ལ་འབད་བརྩོན་བྱ་རྒྱུའི་ཕུགས་རྒྱང་རིང་པོའི་དམིགས་ཡུལ་བཟུང་ནས་དཀའ་ལས་རྒྱག་དགོས། དེ་དང་མཉམ་དུ་འཆི་བ་དྲན་པ་ལ་བརྟེན་ནས་ང་ཚོའི་མི་ཚེ་འདི་འཕྲོ་བརླག་གཏོང་རྒྱུ་མེད་པའི་སྐུལ་ལྕག་བྱེད་རྒྱུ་ཕན་ཐོགས་ཀྱི་ཡོད།

ད་ང་ཚོ་རྒྱུད་རིམ་གྱི་རིམ་པ་གསུམ་པའི་ཐོག་བསམ་ཞིབ་བྱེད་རྒྱུ་སྒྲ་སྒྲིག་ཡོད་པ་རེད། བརྗོད་གཞི་འདི་ངོ་སྤྲོད་བྱེད་པ་ལ་རྗེ་ཙོང་ཁ་པ་ཆེན་པོས་གདམས་ངག་ཕན་ཐོགས་ཆེན་པོ་ཞིག་བྲིས་གནང་ཡོད། དེ་ཡང་མདོ་སྔགས་ཉམས་ལེན་གྱི་གདམས་ངག་༼ལམ་གྱི་རིམ་པ་མདོ་ཙམ་དུ་བསྟན་པ་༽ ཅེས་བྱ་བའི་ནང་ཁོང་གིས་སྒོམ་རྒྱག་པ་ལ་ “ང་ཚོའི་སྒྲུབ་ཐབས་བྱེད་བཞིན་ཡོད་པའི་སེམས་ཀྱི་གནས་བབས་དེའི་རྒྱུ་གང་དང་གང་ཡིན་པའི་ཐད་ལ་དཔྱད་པ་བྱེད་དགོས་ཀྱི་ཡོད།” ཅེས་བྲིས་གནང་ཡོད། དེ་འདྲ་ཡིན་དུས། དཔེར་ན། ང་ཚོ་སྙིང་རྗེ་ལྟ་བུ་གོང་འཕེལ་གཏོང་བར་འདོད་ན། ཐོག་མར་སྙིང་རྗེ་གོང་འཕེལ་ཡོང་བའི་རྒྱུ་དེ་ཚོ་ཤེས་དགོས་ཀྱི་ཡོད་པ་ནང་བཞིན་རེད།

འདི་ནི་ལྟོས་པའི་རིགས་པ་རེད། དེ་ཡང་གཞན་སེམས་ཅན་ཐམས་ཅད་སྡུག་བསྔལ་དང་སྡུག་བསྔལ་གྱི་རྒྱུ་དང་འབྲལ་འདོད་ཀྱི་བསམ་པ་སྐྱེད་པ་དེ་རེད། ༼དེ་ནི་ནང་ཆོས་ཀྱི་སྙིང་རྗེ་ཞེས་པའི་མཚན་ཉིད་དེ་ཡིན།༽ ང་ཚོ་ཚང་མ་ཕན་ཚུན་གཅིག་གིས་གཅིག་ལ་བརྟེན་ནས་ཡོད་པ་ཤེས་དགོས། དེ་མིན་ང་ཚོས་གཞན་སེམས་ཅན་གྱི་དོན་ལ་དོ་སྣང་ནམ་ཡང་སླེབས་ཀྱི་མ་རེད། བྱས་ཙང་། ང་ཚོ་འཚོ་ཞིང་གནས་པའི་དངོས་པོ་ཐམས་ཅད་གཞན་གྱི་འབད་བརྩོན་དང་བྱམས་བརྩེ་ལ་ཇི་ལྟར་བརྟེན་ནས་ཡོད་པའི་ཐོག་བསམ་བློ་གཏོང་དགོས། དཔེ་ཆ་བཞག་ན། གཞན་གྱིས་ང་ཚོའི་ཁ་ལག་བཟོས་ཡོད་པ་དང་། འགྲོ་ལམ་གསར་འཛུགས་བྱས་ཡོད་པ་སོགས་དཀའ་ལས་མང་པོ་རྒྱག་ཡོད་པ་ལྟ་བུ་ལ་བསམ་དགོས། ཁོང་ཚོས་ང་ཚོའི་འཚོ་བ་སྐྱེལ་རྒྱུ་ལས་སླ་པོ་བཟོས་པ་དྲན་ནས་ཁོང་ཚོ་ལ་བཀའ་དྲིན་རྗེས་དྲན་དང་རྗེས་སུ་ཡི་རངས་བྱེད་ཀྱི་རེད། ང་ཚོས་ལྷག་བསམ་རྣམ་དག་གིས་སེམས་གཏིང་ནས་དེ་ཚོ་དྲན་པ་ཡིན་ན། བཀའ་དྲིན་དྲན་ཤེས་ཀྱི་ཚོར་བ་དེས་རང་བཞིན་གྱིས་བྱམས་པའི་གཅེས་སྐྱོང་ཤུགས་ཆེན་པོ་སྐྱེས་ནས་ཁོང་ཚོ་ལ་སྡུག་པའི་རིགས་བྱུང་བ་ཡིན་ནའང་ང་ཚོ་མི་བདེ་བའི་ཚོར་སྣང་ཡོང་གི་རེད། དེས་བྱམས་པ་ཟེར་བ་གཞན་སེམས་ཅན་ཐམས་ཅད་ལ་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག ཅེས་པའི་བསམ་པ་དེ་སྐྱེ་འཇུག་གི་རེད། འོན་ཀྱང་ཁོང་ཚོ་བདེ་བ་མེད་པ་སྡུག་བསྔལ་འདྲ་མིན་གྱིས་མནར་བ་མཐོང་དུས་སྙིང་རྗེ་སྐྱེ་གི་རེད། ང་ཚོས་སྙིང་རྗེ་གོང་འཕེལ་གཏོང་བ་ལ་རིམ་པ་དེ་ཚོ་ཚང་མ་གོ་རིམ་མ་ནོར་བར་བརྟེན་ནས་འགྲོ་དགོས་ཀྱི་ཡོད།

སྙིང་རྗེ་དེ་ཡང་ངེས་བྱུང་ཡོད་པ་ལ་བརྟེན་དགོས་པ་རེད། ངེས་བྱུང་ཟེར་ན་སོ་སོའི་སྡུག་བསྔལ་ཤེས་ནས་དེ་དག་ལས་ཐར་བ་བྱེད་རྒྱུའི་སེམས་ཐག་བཅད་དེ། གཞན་སེམས་ཅན་ཐམས་ཅད་ལ་སྡུག་བསྔལ་དེ་འདྲ་བ་ཡོད་པ་དང་དེ་ལས་ཐར་འདོད་ཡོད་པ་གཅིག་མཚུངས་ཡིན་པ་ཤེས་པ་ཞིག་རེད། ངེས་བྱུང་གི་དོན་གཙོ་བོ་ནི། སྡུག་བསྔལ་ལས་ཐར་བར་སེམས་ཐག་ཆོད་པོ་ཡོད་པ་དེ་རེད། སྙིང་རྗེ་ཡང་དེ་དང་མཚུངས་པ་གཞན་སྡུག་བསྔལ་ལས་ཐར་པའི་བསམ་པ་ཤུགས་ཆེན་པོ་ཡོད་པ་དེ་ནི་དང་པོ་སོ་སོ་རང་ལ་སེམས་ཐག་ཆོད་པོའི་བསམ་པ་དེ་འདྲ་ཞིག་ཡོད་པ་ལ་བརྟེན་དགོས་པ་གསལ་པོ་རེད།

དེ་འདྲ་ཡིན་ཙང་། གལ་སྲིད་ང་ཚོས་སྒོམ་ནང་སྙིང་རྗེ་སྐྱེད་ཐབས་བྱེད་འདོད་ཡོད་ན། ལྟོས་གྲུབ་བམ་རྟེན་འབྲེལགྱི་གནད་དོན་འདི་དངོས་གནས་གལ་ཆེན་པོ་རེད། གང་ཡིན་ཟེར་ན། མཐར་ཐུག་ང་ཚོས་དེ་སྦྱོང་བརྡར་མང་པོ་དང་གོམས་འདྲིས་ཀྱིས་ལམ་སེང་སྐྱེས་ཐུབ་ཀྱི་ཡོད་ཀྱང་། དང་པོ་འགོ་བཙུགས་དུས་ང་ཚོས་དངོས་སུ་སེམས་པ་རྣམ་དག་གིས་དེ་མ་ཚོར་བར་དུ་རིམ་པ་ཆ་ཚང་བརྒྱུད་ནས་འགྲོ་དགོས། སྙིང་རྗེ་ལ་དངོས་གནས་སྒོམ་རྒྱག་དགོས་ན། རྒྱུད་རིམ་དེ་དག་དང་དེའི་རྒྱུ་དེ་ཚོ་གང་ལ་བརྟེན་ཡོད་པ་ཤེས་དགོས།

རྗེ་ཙོང་ཁ་པ་ཆེན་པོས་མུ་མཐུད་ནས་གསུངས་དོན། “ང་ཚོས་རྣམ་པ་སྣ་ཚོགས་པ་” དེ་དག་ཀྱང་ཤེས་དགོས་གསུངས་ཡོད། དེས་ག་རེ་གསུངས་ཀྱི་ཡོད་རེད་ཟེར་ན། གལ་སྲིད་ང་ཚོས་སེམས་ཅན་ཐམས་ཅད་སྡུག་བསྔལ་དང་སྡུག་བསྔལ་གྱི་རྒྱུ་ཚང་མ་མེད་པ་བཟོ་འདོད་ཀྱི་སྙིང་རྗེ་སྐྱེད་དགོས་ན། སྡུག་བསྔལ་གྱི་རྣམ་པ་མི་འདྲ་བ་དང་སྡུག་བསྔལ་གྱི་རྒྱུའི་རྣམ་པ་མི་འདྲ་བའི་གནས་སྟངས་ཚང་མ་ཤེས་དགོས་ཞེས་པའི་དོན་ཡིན། དེ་ནི་ཁོང་ཚོ་ལ་ཟས་ཞིམ་པོ་དང་ལས་ཀ་ཡག་པོ་འཐོབ་པའི་རོགས་བྱེད་པ་ཙམ་མིན་པར། ང་ཚོས་དབང་མེད་ཡང་ནས་ཡང་དུ་སྐྱེ་བ་ལེན་པའི་འཁོར་བ་འདིའི་ཀུན་ལ་ཁྱབ་པའི་སྡུག་བསྔལ་ལམ་ཁྱབ་པ་འདུ་བྱེད་ཀྱི་སྡུག་བསྔལ་དང་། དངོས་པོའི་གནས་ལུགས་ལ་གཞི་རྩ་ནས་མི་ཤེས་པ་དང་རྨོངས་པའི་དབང་གིས་འཁོར་བ་ལ་ཡུན་དུ་གནས་འཇུག་གི་ཡོད་པའི་སྐོར་བཤད་ཀྱིན་ཡོད། བྱམས་དང་སྙིང་རྗེ་སྒོམ་སྐབས་སོ་སོ་མར་བསྡད་ནས་ “ང་སེམས་ཅན་ཐམས་ཅད་ལ་བྱམས་དང་སྙིང་རྗེ་ཡོད་པ་དེ་ཡག་ག་ལ་” བསམ་ནས་བསྡད་རྒྱུ་མེད། དེ་ནི་བྱམས་པ་དང་སྙིང་རྗེའི་སྒོམ་གྱི་སྐོར་ཁ་གསལ་པོ་དང་ཡག་པོ་མེད་པ་ཞིག་རེད། བྱམས་དང་སྙིང་རྗེ་སྒོམ་སྐབས་ཀྱི་སེམས་སྐྱེད་པ་བྱེད་རྒྱུ་དེ་དཔེ་དམིགས་བསལ་ཅན་གྱི་སེམས་ཤིག་རེད། རྗེ་ཙོང་ཁ་པ་ཆེན་པོས། ང་ཚོ་སེམས་ཀྱི་གནས་བབས་གསལ་ཁ་ཡོད་པ་བཟོ་ཐུབ་མཁན་དེ་ཚོ་ཚང་མ་ལ་བརྗོད་ཀྱི་ཡོད་ཅེས་གསུངས་ཡོད།

དེ་ནས་སེམས་ཀྱི་གནས་བབས་གོང་འཕེལ་གཏོང་ཐབས་བྱེད་པའི་སྐབས་ང་ཚོ་གང་ལ་དམིགས་པ་བྱེད་ཀྱི་ཡོད་པ་ཤེས་དགོས་རྒྱུ་དེ་ཧ་ཅང་གལ་ཆེན་པོ་རེད། ང་ཚོའི་སེམས་ནང་གང་འཆར་དགོས་སམ། སྙིང་རྗེའི་སྐབས་སུ་ང་ཚོ་གཞན་སེམས་ཅན་དང་དེ་ཚོའི་སྡུག་བསྔལ་ལ་དམིགས་ཀྱི་ཡོད། སྐབས་འདིར་སྙིང་རྗེ་ཙམ་མིན། “སྙིང་རྗེ་ཆེན་པོ་” དེ་གཞན་སེམས་ཅན་ཡོད་དོ་ཅོག་ལ་འདྲ་མཉམ་ཡོད་པ་དེ་ཡིན། དེ་ནི་དངོས་གནས་སེམས་ཅན་དཔག་ཏུ་མེད་པ་ལ་དམིགས་ཀྱི་ཡོད་པས་ “ངས་ཐ་ན་འཇིག་རྟེན་ནང་ཡོད་པའི་སྲོག་ཆགས་འབུ་སྲིན་ཡན་ཆད་ལའང་རོགས་བྱེད་ཀྱི་ཡིན་” ཞེས་པ་ནི་བསམ་བློའི་གནས་ཚད་ཧ་ལས་དགོས་པ་ཞིག་རེད། འདིར་ང་ཚོས་སྒེར་སོ་སོའི་སེམས་རྒྱུད་ཀྱི་སྐོར་ལ་སྐད་ཆ་བཤད་ཀྱི་ཡོད། དེ་ཡང་སོ་སོའི་ལས་དབང་གིས་ད་ལྟ་འབུ་སྲིན་ལ་སྐྱེས་ཡོད་པ་མ་གཏོགས་ཁོང་ཚོ་དུས་རྟག་ཏུ་འབུ་སྲིན་ཡིན་པའི་དོན་མིན།ང་ཚོས་ཚེ་འདི་ལ་འབུ་སྲིན་ཡིན་པ་དེ་ཚོ་སྐྱོབས་པ་བྱེད་ཀྱི་ཡོད་པ་དེ་ཚོ་ཚེ་སྔོན་མ་སོ་སོ་རང་གི་ཨ་མ་ཡིན་པ་རེད། ཚེ་འདི་ལ་ངའི་ཨ་མ་སྐྱོབས་ཀྱི་ཡོད་པ་ཁོང་གི་ཚེ་མཐའ་མའི་སྐྱེ་བ་དེ་ལ་འབུ་ཞིག་ཡིན་སྲིད་པ་རེད།

འགྲོ་བ་སེམས་ཅན་ཐམས་ཅད་རེ་རེ་བཞིན་ཡིད་ལ་ཤར་བ་བྱེད་རྒྱུ་ནི་ལས་སླ་པོ་ཞིག་མ་རེད། ཡིན་ནའང་བསམ་པ་རྒྱ་ཆེ་བ་ཐེག་པ་ཆེན་པོའི་ཉམས་ལེན་བྱེད་སྐབས་ང་ཚོས་སོ་སོའི་ཉེ་འཁོར་དུ་གདུལ་བྱ་དཔག་ཏུ་མེད་པ་དམིགས་པ་བྱས་ནས་ཁོང་ཚོ་ཚང་མའི་སྡུག་བསྔལ་ཉུང་དུ་གཏོང་ཐབས་བྱེད་ཀྱི་ཡོད། ཐེག་པ་ཆེན་པོའི་མདོ་མང་པོ་ཐོག་མར་འགོ་བཙུག་སྐབས་གདུལ་བྱའི་གྲངས་བརྒྱ་ཕྲག་དང། ཁྲི་ཕྲག སྟོང་ཕྲག འབུམ་ཕྲག་ས་ཡ་སོགས་གྲངས་ཀྱི་ཚད་གཞི་འགྲེལ་བརྗོད་བྱས་ཡོད་པ་དེས་བསམ་པ་རྒྱ་ཆེ་བའི་ཚད་བསྟན་གྱི་ཡོད།

ཆ་སྙོམས་ཀུན་ལ་ཁྱབ་པའི་སྙིང་རྗེ་འདི་ལྟ་བུ་ཡོད་པ་ནི་དངོས་གནས་ཧ་ལས་པ་ཞིག་རེད། དེའི་གཞི་རྩ་ནི་ང་ཚོས་གཞན་ཚང་མའི་དོན་དུ་བསམ་བློ་གཏོང་བའི་བཏང་སྙོམས་ཀྱི་སེམས་དེ་རེད། ང་ཚོ་སྙིང་རྗེ་ཡག་པོ་བྱས་ནས་སྒོམ་པ་ལ་དེ་ཚོ་ཚང་མ་ཡག་པོ་ཤེས་དགོས།

དེར་མ་ཟད། ང་ཚོས་གང་དམིགས་པ་བྱེད་ཀྱི་ཡོད་པ་དེ་དང་སེམས་གཉིས་གང་འདྲ་བྱས་ནས་འབྲེལ་བ་ཡོད་པ་ཤེས་དགོས། གལ་སྲིད་ང་ཚོས་སྙིང་རྗེ་སྒོམ་གྱི་ཡོད་ན། ང་ཚོས་སྡུག་བསྔལ་གྱིས་མནར་བའི་སེམས་ཅན་རྣམས་དེ་ལས་ཐར་འདོད་དང་སྡུག་བསྔལ་གྱི་རྒྱུ་དེ་དག་ཚང་མ་མེད་པ་ཤོག་ཅེས་པའི་བློ་དེ་ཡོང་གི་ཡོད། དེ་ནི་མི་གཞན་ཞིག་ཡོང་ནས་ཁོ་ཚོར་རོགས་བྱེད་པའམ། ཡང་ན་སྡུག་བསྔལ་རྣམས་རང་བཞིན་གྱིས་མེད་པ་ཆགས་པ་ལྟར་མ་ཡིན་པར། སོ་སོ་རང་གི་ངོས་ནས་སྡུག་བསྔལ་རྣམས་མེད་པ་བཟོ་ཐབས་བྱེད་པ་ཞིག་རེད།

རྗེ་ཙོང་ཁ་པ་ཆེན་པོས། ང་ཚོ་སྙིང་རྗེ་གོང་འཕེལ་གཏོང་ཐབས་སུ་གང་གིས་ཕན་པ་དང་གང་གིས་གནོད་ཀྱི་ཡོད་པ་ཤེས་དགོས་ཞེས་གསུངས་ཡོད། སྙིང་རྗེ་གོང་འཕེལ་གཏོང་བ་ཕན་པ་ཙམ་མིན་པར། མིའི་སྡུག་བསྔལ་དེ་མེད་པ་ཆགས་ཐུབ་ཀྱི་ཡོད་པའི་ཡིད་ཆེས་རྙེད་པ་དེ་དཔེ་གལ་ཆེན་པོ་རེད། གལ་སྲིད་ང་ཚོས་དེ་ཡོང་སྲིད་པ་ཞིག་ཡིན་པ་བསམ་གྱི་མེད་ན། ང་ཚོས་དེ་ལ་ཡིད་སྨོན་དང་འབད་བརྩོན་བྱེད་རྒྱུ་འདོད་པ་གང་འདྲ་བྱས་ནས་སླེབས་ཀྱི་རེད། དེའི་གཞི་རྕ་ནི་སོ་སོ་སྡུག་བསྔལ་ལས་ཐར་ཐུབ་པ་དང་། གཞན་རྣམས་སྡུག་བསྔལ་ལས་བྲལ་བའི་ཆེད་སོ་སོས་ཕན་ཐོགས་བྱེད་ཐུབ་པའི་གདེང་དང་ལྡན་པའི་ཡིད་ཆེས་ཡོད་པ་དེ་རེད། དེ་ཡོང་བ་ལ་སོ་སོ་རང་ལ་ནུས་པ་གང་ཡོད་པ་དང་སངས་རྒྱས་ལ་ནུས་གང་ཡོད་པའི་ཐད་ལ་དངོས་ཡོད་དང་མཐུན་པའི་གོ་རྟོགས་ཤིག་ཡོད་དགོས། སྙིང་རྗེ་གོང་འཕེལ་ཡོང་བའི་འགོག་རྐྱེན་གང་རེད། དེ་ནི་བདག་འཇི༹ན་དང་རང་འདོད་དོན་གཉེར་ཙམ་མིན་པར། སེམས་ཤུགས་ཆག་པ་དང་སོ་སོ་རང་ཉིད་ལ་གདེང་ཚོད་མེད་པ་རྣམས་རེད། གང་ལྟར་ཡང་། སངས་རྒྱས་བཅོམ་ལྡན་འདས་ཀྱིས། སྡུག་བསྔལ་ནི་མི་ཞིག་གི་རྐང་པ་ནས་ཚེར་མ་བཏོན་པ་ནང་བཞིན་འདོན་ཐུབ་ཀྱི་མ་རེད། ཅེས་གསུངས་ཡོད། སངས་རྒྱས་བཅོམ་ལྡན་འདས་ཁོང་གིས་ཀྱང་ལམ་གཅིག་པོ་སྟོན་ཐུབ་པ་དང་སོ་སོ་རང་གིས་དཀའ་ལས་བརྒྱབ་དགོས་ཀྱི་ཡོད། བྱས་ཙང་། ང་ཚོས་སངས་རྒྱས་ཟིལ་གྱིས་གནོན་ཐུབ་པའི་རེ་བ་ཇི་ལྟར་བྱེད་ཐུབ་བམ།

མདོར་བསྡུས་ན། གལ་སྲིད་ང་ཚོ་ལ་སེམས་ཀྱི་གནས་བབས་ཀྱི་གསལ་ཁ་ངེས་ཅན་སྙིང་རྗེ་ལྟ་བུ་བསྐྱེད་པའི་གོ་རྟོགས་དེ་མེད་ན། ཕུགས་རྒྱང་རིང་པོ་འགྲོ་ཐུབ་ཀྱི་མ་རེད། དེ་འདྲ་བྱས་ནས་ང་ཚོས་སྒོམ་དེ་ག་ཚོད་ཀྱི་གྲ་རྒྱས་པོ་དང་གནད་འགག་ཆེན་པོ་ཡིན་པ་ལ་ཡི་རངས་བྱེད་འགོ་བཙུགས་ཤིང་། ང་ཚོས་དེ་ལ་ “སེམས་ཀྱི་ཚན་རིག་” ཅེས་ཀྱང་ཟེར་ཆོག་པ་ཡིན།

རྗེ་ཙོང་ཁ་པ་ཆེན་པོས། སྒོམ་གྱི་ཐུན་མཚམས་ཀྱི་དུས་ཚོད་དེ་ཡང་ཧ་ཅང་གལ་ཆེན་པོ་ཡིན་པ་ཡང་གསུངས་ཡོད། ཁོང་གིས། ང་ཚོ་ག་རེ་ལ་སྒོམ་བརྒྱབ་ཀྱི་ཡོད་པ་དེ་དང་འབྲེལ་བ་ཡོད་པའི་དཔེ་ཆ་མང་པོར་བལྟ་ཀློག་བྱེད་དགོས་པའི་བསླབ་བྱ་གནང་ཡོད། ཕྱོགས་གཅིག་ནས་བལྟས་དུས། དེ་ཡིས་ང་ཚོ་གང་བྱེད་ཀྱི་ཡོད་པ་དེ་སངས་རྒྱས་ཀྱི་གསུངས་ཡོད་པ་དེ་ཡིན་པའི་ཡིད་ཆེས་ངེས་བརྟན་བཟོ་གི་ཡོད་པ་དང་། ཕྱོགས་གཞན་ཞིག་ནས་བལྟས་དུས། སྔོན་གྱི་སྐྱེས་ཆེན་དམ་པ་རྣམས་ཀྱིས་གང་ཐོབ་ཡོད་པ་དང་ཁོང་ཚོའི་མཇ༹ད་རྗེས་ལ་བལྟ་ཀློག་བྱེད་སྐབས་ང་ཚོ་ལ་སེམས་སྐུལ་སྟེར་གྱི་རེད། དེའི་སྟེང་ལ་ཡང་རྗེ་ཙོང་ཁ་པ་ཆེན་པོས། ང་ཚོས་སྡིག་སྦྱོང་གི་ཉམས་ལེན་བྱེད་པའི་སྒོ་ནས་དགེ་བའི་ནུས་པ་སྐྱེད་སྤེལ་དང་མི་དགེ་བའི་ནུས་པ་སྦྱོང་དགོས་ཤེས་གསུངས་ཡོད།

ངས་དབྱིན་སྐད་ཀྱི་ “merit” (བསོད་ནམས་) ཞེས་པའི་ཐ་སྙད་ལ་ “དགེ་བའི་ནུས་པ་” (positive force) ཞེས་བེད་སྤྱོད་བྱེད་ཀྱི་ཡོད། དབྱིན་སྐད་ཀྱི་ “merit” ཞེས་པའི་ཚིག་འདིས་གོ་བ་ལོག་པ་ཡོང་གི་ཡོད། “merit” ཞེས་པའི་ཐ་སྙད་འདིས་སོ་སོས་ཨང་གྲངས་བསྡུ་གསོག་བྱེད་ཀྱི་ཡོད་པའི་བཟོ་འདྲ་ཞིག་སྟེ། དེ་ལྟར་གྲངས་བརྒྱ་ལ་སླེབས་སོང་ན་སོ་སོ་རྒྱལ་ཁ་ཐོབ་པ་འདྲ་པོ་ཆགས་ཀྱི་འདུག ཡིན་ནའང་ང་ཚོས་ག་རེ་བྱེད་ཀྱི་ཡོད་ཟེར་ན། ལག་ཐོགས་ཁ་པར་ལ་གློག་ཤུགས་སྤྲད་པ་ནང་བཞིན། དགེ་བའི་ནུས་པ་སྐྱེད་སྤེལ་བྱས་ནས་ལས་ཀ་བྱེད་པ་ལ་ནུས་པ་འདང་ངེས་ཤིག་སླེབས་པ་བྱེད་ཀྱི་ཡོད། དེ་དང་མཉམ་དུ་ང་ཚོའི་སེམས་ལ་དག་སྦྱོང་བྱས་ནས་སེམས་ལ་འགོག་རྐྱེན་བྱེད་མཁན་དང་རང་ཉིད་ཀྱིས་ཅི་གང་མ་ཤེས་པ་བཟོ་མཁན་དེ་ཚོ་ལས་ཐར་དགོས་ཀྱི་ཡོད། ད་དུང་སེམས་ཚོར་གྱི་འགོག་རྐྱེན་རིགས་ཡོད་སྲིད། དགེ་བའི་ནུས་པ་སྐྱེད་སྤེལ་བྱེད་པ་དང་སྒྲིབ་སྦྱོང་ཀྱི་ཉམས་ལེན་མང་པོ་བྱས་པ་དེས་འགོག་རྐྱེན་མང་པོ་མེད་པ་བཟོས་ནས་གོ་རྟོགས་སྙེད་ཐུབ་པ་ཡོང་གི་རེད།

དེ་ཉམས་ལེན་གྱི་ཐོག་ནས་གང་ལ་གོ་དགོས་སམ་ཞེ་ན། ཉམས་ལེན་གྱི་ཐོག་ནས་ང་ཚོས་གཅིག་ཤེས་ཐབས་བྱེད་པའི་སྐབས་དེ་སོ་སོའི་ལས་ཀ་ཞིག་ཡིན་ནའང་དེ་ཤེས་ཐུབ་ཀྱི་མེད་ན། ང་ཚོ་ངལ་གསོས་ཏེ། གཞན་ལ་ཕན་པའི་བྱ་བ་གཞན་གང་རུང་ཞིག་སྒྲུབ་ཐབས་བྱེད་ཀྱི་ཡོད། དེ་འདྲའི་ཐོག་ནས་ང་ཚོས་སྔོན་གྱི་ལས་ཀ་དེ་བྱེད་སྐབས་ཁྱེད་རང་སུན་སྣང་མི་སྐྱེ་བར་སེམས་པ་བཟང་བ་དང་། དགེ་བ་མང་བ་ཡོང་གི་ཡོད་པ་དང་། རང་ཉིད་ལ་སྤོབས་པ་དང་རང་མཐོང་ཆེ་རུ་ཕྱིན་ནས་གནས་ཚུལ་དེ་ཏོ་ཙམ་ཡག་ག་ཤེས་ཐུབ་ཀྱི་ཡོད། བྱས་ཙང་། སུ་འདྲ་ཞིག་ཡིན་ཡང་ང་ཚོས་གཞན་ལ་ཕན་ཐོགས་ཐུབ་པའི་བྱ་བ་ཁ་ཤས་ཡོད་པ་རེད། དཔེར་ན། སོ་སོ་ཕྲུ་གུ་ལ་དུས་ཚོད་མང་བ་གཏོང་བའམ། ཡང་ན་སོ་སོའི་གཉེན་ཚན་ཁེར་རྐྱང་སྡོད་ཡོད་པ་ཁོང་ཐུག་འཕྲད་ལ་འགྲོ་བ་སོགས་ལས་ཀ་གང་ཡིན་ཡང་དགེ་བའི་ལས་བྱེད་རྒྱུ་གལ་ཆེན་པོ་རེད། སྤྱིར་བཏང་དགེ་བའི་ལས་ཀྱི་ཆོ་ག་ཕྱག་ལེན་མང་པོ་བྱེད་རྒྱུ་ཡོད་ཀྱང་། དངོས་གནས་མི་ཚེའི་ནང་གི་ཉམས་ལེན་ནི་ཤིན་ཏུ་སྟོབས་ཆེ་བ་ཡོད།

ང་ཚོ་མང་ཆེ་བ་སོ་སོའི་ཡར་རྒྱས་ཕྱིན་འདུག་མི་འདུག་ཞིབ་བཤེར་བྱེད་མཁན་སྒེར་གྱི་དགེ་རྒན་མེད་པ་རེད། ཡིན་ནའང་བློ་སྦྱོང་སྐབས་སུ་ཡར་རྒྱས་འགྲོ་གི་འདུག་མི་འདུག་ལྟ་མཁན་གྱི་དཔང་པོ་ཡག་ཤོས་དེ་སོ་སོ་རང་ཉིད་ཡིན་ཞེས་རྟག་ཏུ་གསུང་གི་ཡོད། སོ་སོའི་སེམས་རྩེ་གཅིག་ཏུ་གནས་ཐུབ་ཀྱི་འདུག་མི་འདུག་དང། ང་ཚོ་ལ་སེམས་གང་སར་མྱུལ་བའི་རྣམ་གཡེང་མང་པོ་འདུག་མི་འདུག་ཅེས་རང་གིས་རང་ལ་དྲིས་ནས་ཞིབ་བཤེར་བྱེད་དགོས་པ་ལས། གཞན་སུ་གཅིག་གིས་འདི་ཚོད་དཔོག་ཐུབ་ཀྱི་མ་རེད། ཆོས་དང་ཉམས་ལེན་གང་འདྲ་ཞིག་ཡིན་ནའང་དེ་ཚོ་ཚང་མ་ང་ཚོའི་སེམས་ཚོར་གྱི་གནས་བབས་ཡར་རྒྱས་གཏོང་ཡག་ཆེད་དུ་རེད། དེ་ཡང་སོ་སོ་རང་གིས་དཀའ་ལས་རྒྱག་དགོས་ཀྱི་ཡོད། དེ་འདྲ་ཡིན་ཙང་། སོ་སོ་ཁོང་ཁྲོ་ཟ་གི་འདུག་མི་འདུག ཡང་ན་ཁོང་ཁྲོ་ཟ་ཡག་ཉུང་དུ་ཕྱིན་འདུག་མི་འདུག་དཔྱད་ཁྲ་གཏོང་མཁན་ཡག་ཤོས་ནི་སོ་སོ་རང་ཉིད་རེད།

ང་ཚོས་དྲན་དགོས་པའི་རྩ་དོན་ཞིག་ནི་མི་ཚེའི་ནང་དགའ་སྡུག་སྣ་ཚོགས་ཡོང་གི་ཡོད་དུས་ཡར་རྒྱས་ལ་གོ་རིམ་ངེས་ཅན་ཞིག་ཡོད་མ་རེད། དེ་ནི་ནམ་ཡང་ཉིན་མ་ནས་ཉིན་མ་ཡག་ཏུ་འགྲོ་གི་མ་རེད། ང་ཚོ་ཐར་པ་མ་ཐོབ་བར་དུ་དགའ་སྡུག་སྣ་ཚོགས་ཡོང་གི་རེད། ང་ཚོས་ཡུན་རིང་པོར་ཉམས་ལེན་བྱས་ནས་སྤྱིར་བཏང་ཁོང་ཁྲོ་ཟ་གི་མེད་ཀྱང་། ད་དུང་སྐབས་རེར་ཁོང་ཁྲོ་ཟ་གི་ཡོད། ཡིན་ནའང་འདི་རྒྱུ་མཚན་དུ་བྱས་ནས་སེམས་ཤུགས་ཆག་རྒྱུ་མེད། ཕྱོགས་གཅིག་ནས་ང་ཚོ་སོ་སོ་ཡར་རྒྱས་གཏང་རྒྱུ་ལ་དཀའ་ལས་རྒྱག་དགོས་པ་དང་། ཕྱོགས་གཞན་ཞིག་ནས་སོ་སོ་ལ་བཙན་ཤེད་བྱེད་པའམ། ཡང་ན་སོ་སོས་སྣང་མེད་ཀྱིས་ནོར་འཁྲུལ་བྱེད་སྐབས་ནག་ཉེས་ཡིན་པ་ཚོར་རྒྱུ་མེད། ༧གོང་ས་མཆོག་གིས། སོ་སོའི་ཡར་རྒྱས་ག་ཚོད་བཏང་ཡོད་མེད་ལ་ཚོད་ལྟ་བྱེད་དུས་ལོ་ལྔའི་ནང་གི་གནས་སྟངས་དང་བསྡུར་ནས་བལྟ་དགོས་པ་ལས་གཟའ་འཁོར་གཅིག་ཙམ་ལ་བལྟ་རྒྱུ་མེད་ཅེས་གསུང་གི་ཡོད། གལ་སྲིད་ང་ཚོས་ལོ་ལྔ་སྔོན་དང་ད་ལྟའི་གནས་སྟངས་གཉིས་བསྡུར་ནས་དཀའ་ངལ་ལ་གདོང་ལེན་བྱེད་སྟངས་གང་འདྲ་བྱུང་མིན་བལྟ་བ་ཡིན་ན། ང་ཚོ་ཡར་རྒྱས་ཕྱིན་ཡོད་པ་གསལ་པོ་ཤེས་ཐུབ།

སྒོམ་རྒྱག་ས་དམིགས་བསལ་གྱི་ས་ཆ་གང་ཡང་མི་དགོས། ལྟོས་ས་ལྟོས་འཇོག་གི་ཆ་ནས་ས་ཆ་ཁ་ཁུ་སིམ་པོ་དང་གཙང་མ་ཡོད་ན་འགྲིག་གི་རེད། དེ་ལྟར་མ་བྱུང་བ་ཡིན་ནའང་གང་ཡང་ཡོད་མ་རེད། ངའི་གྲོགས་མོ་ཞིག་གཡར་ཁང་ཆུང་ཆུང་ཁང་མིག་གཅིག་ལས་མེད་པ་ཞིག་གི་ནང་སྡོད་ཀྱི་ཡོད་རེད། མོ་རང་གི་ཨ་མ་ལགས་ཀྱང་ཁང་པ་དེའི་ནང་མཉམ་དུ་སྡོད་ཀྱི་ཡོད་རེད། ཁང་པའི་ནང་ཨ་མ་ལགས་ཀྱི་གཟུགས་མཐོང་བརྙན་འཕྲིན་དང་རླུང་འཕྲིན་རྣམས་ཀྱང་གཏོང་ཉན་བྱེད་ཀྱི་ཡོད། ཁོང་ག་དུས་སྒོམ་རྒྱག་ན་ཨ་མས་མི་བདེ་བ་བྱེད་ཀྱི་ཡོད་རེད། དེ་འདྲ་ཡིན་ཙང་། ཁོང་ལ་སྒོམ་རྒྱག་ས་ཡག་ཤོས་ནི་གསང་སྤྱོད་ནང་ཡིན་པ་རེད། ཁོང་གསང་སྤྱོད་ནང་ཉིན་ལྟར་ཉམས་ལེན་དང་སྒོམ་སྒྲུབ་བྱེད་ཀྱི་ཡོད་པ་རེད། དེས་འགྲིག་གི་ཡོད་པ་རེད། ཁྱེད་རང་ལ་སྤོས་དང་མཆོད་མེ་སོགས་གང་ཡང་དགོས་ཀྱི་མེད། དེ་ཚོ་ནི་ “དངོས་པོ་” ཙམ་རེད། གཙོ་ཆེ་ཤོས་ནི། ང་ཚོའི་སེམས་ཀྱིས་ག་རེ་བྱེད་ཀྱི་ཡོད་པ་དེ་རེད། སྒོམ་ནི་སེམས་ཀྱི་གནས་བབས་ཁ་ཅིག་ལ་སྦྱོང་བརྡར་བྱེད་ཀྱི་ཡོད། དེ་འདྲ་ཡིན་ཙང་། དེ་ས་གནས་དང་དུས་གང་ལའང་བྱེད་ཐུབ་པ་ཞིག་རེད། སྐབས་རེ་སེམས་ཀྱི་གནས་བབས་ཁ་ཤས་ང་ཚོ་ས་འོག་མེ་འཁོར་དང་སྤྱི་སྤྱོད་རླངས་འཁོར་སོཌ་ཀྱི་ནང་ཡོད་སྐབས་གོང་འཕེལ་གཏོང་ཡག་ལས་སླ་བ་ཡོད་སྲིད། དཔེ་མཚོན་ཙམ་ཞིག་ཞུས་ན། ང་ཚོ་བཟོད་པ་ཡར་རྒྱས་གཏོང་དགོས་ན། མི་ཚོགས་འཚང་ཀ་ཆེན་པོ་ཡོད་སའི་སྤྱི་སྤྱོད་རླངས་འཁོར་ལྟ་བུའི་ནང་ཕྱིན་ནས་ཉམས་ལེན་བྱེད་པ་ལས་ཡག་ག་ཞིག་མེད། གང་ཡིན་ཞེ་ན། དེར་དངོས་སུ་ཡོད་པའི་མི་ཚོགས་ཀུན་ལ་དམིགས་ནས་ཚང་མ་བདེ་སྐྱིད་འདོད་པ་དང་སྡུག་བསྔལ་མི་འདོད་པ་སོགས་སྒོམ་ཆོག་གི་ཡོད། བྱས་ཙང་། དེ་ནི་སོ་སོ་གཅིག་པོ་ཁེར་རྐྱང་ནང་དུ་བསྡད་ནས་བཟོད་པ་སྒོམ་པ་ལས་ཡག་ག་ཡོད་རེད། སྒོམ་རྒྱག་སྐབས་གལ་གནད་ཆེ་ཤོས་ནི། ཉིན་ལྟར་མ་ཆད་པར་བྱེད་དགོས་པ་དེ་ཡིན། ཁྱེད་རང་ཁ་ལག་

བཟའ་རྒྱུ་དང་གསང་སྤྱོད་ནང་འགྲོ་རྒྱུ་མི་བརྗེད་པ་ནང་བཞིན་སྒོམ་དེ་ཡང་མི་བརྗེད་པར་དུས་རྟག་ཏུ་རྒྱག་དགོས། ཉིན་ལྟར་སྐར་མ་ལྔ་ལས་སྒོམ་རྒྱག་གི་མེད་པ་ཡིན་ནའང་སོ་སོའི་མི་ཚེའི་ནང་གི་ཆ་ཤས་བརྟན་པོ་ཞིག་ཏུ་བཟོ་ཐུབ། ང་ཚོ་སུ་ཡིན་རུང་ཞོགས་པ་སྐར་མ་ལྔ་སྔོན་ལ་ལངས་ནས་སྒོམ་རྒྱག་སྟེ། གོམས་གཤིས་དེ་ཉིན་རེའི་བྱེད་སྒོ་ནང་བཅུག་ཐུབ། དེ་ནི་དཀའ་སྡུག་དང་མནར་གཅོད་ལྟ་བུ་ཡིན་དགོས་ཀྱི་མེད་པ་དང་། དེའི་ཚབ་ཏུ་གོམས་གཤིས་དེ་བརྟན་པའི་རང་བཞིན་ཞིག་ཆགས་ནས་ཉིན་མོར་ག་ཚོད་ཀྱི་བྲེལ་བ་བྱུང་ཡོད་ཀྱང་སྒོམ་མ་ཆད་པ་རྒྱུན་མཐུད་ནས་རྒྱག་རྒྱུའི་དུས་ཚོད་ཟུར་འདོན་བྱེད་ཀྱི་རེད།།