ངེས་འབྱུང་ནི་སྙིང་རྗེའི་རྨང་གཞི་ལྟ་བུ་ཡིན།

ཁྱེད་ལ་སེམས་ཅན་ཐམས་ཅད་སྡུག་བསྔལ་ལས་འབྲལ་བར་འདོད་པའི་སྙིང་རྗེའི་སེམས་མ་བསྐྱེད་པའི་སྔོན་དུ་ཐོག་མར་སོ་སོ་རང་ཉིད་ཀྱི་དཀའ་ངལ་རྣམས་ལ་བསམ་བློ་བཏང་ནས་ངེས་པར་དུ་རྟོགས་དགོས། གལ་ཏེ་ཁྱེད་ཀྱིས་སོ་སོ་རང་ཉིད་ཀྱི་དཀའ་ངལ་དང་སྡུག་བསྔལ་ལ་བསམ་བློ་མི་གཏོང་བ་དང་དེ་དག་ལས་ཐར་བ་དང་དེ་དག་སེལ་བའི་འདུན་སེམས་ཤིག་མེད་ན། གཞན་སེམས་ཅན་ཐམས་ཅད་སྡུག་བསྔལ་ལས་འབྲལ་བར་འདོད་པའི་བློ་དེ་རང་རྒྱུད་ལ་སྐྱེད་རྒྱུ་ཧ་ཅང་ཁག་པོ་རེད། ཁྱེད་རང་སོ་སོའི་དཀའ་ངལ་ཚང་མ་ལས་དངོས་གནས་ཐར་བའི་ཡིད་སྨོན་དེ་མ་བྱས་གོང་ལ་ཁྱེད་རང་སྐྱེ་བ་ཕྱི་མའི་གནས་སྟངས་གང་འདྲ་ཞིག་གི་ནང་སྐྱེས་ནའང་འདྲ་སྟེ། དེ་ནི་གལ་སྲིད་དབང་མེད་ཀྱིས་ཡང་ནས་ཡང་དུ་འབྱུང་བའི་འཁོར་བའི་གནས་སྟངས་ཤིག་ཡིན་ན། དེ་ནི་དཀའ་ངལ་གྱི་རང་བཞིན་ཞིག་ཡིན་པ་དེ་ངེས་པར་དུ་རྟོགས་དགོས། ཁྱེད་རང་ག་ཚོད་ཀྱིས་ཕྱུག་པོ་ཡིན་པ་དང་རྒྱུ་ནོར་ལོངས་སྤྱོད་ག་ཚོད་ཙམ་ཁྱེད་ལ་ཡོད་ནའང་། ད་དུང་ཡང་ཁྱེད་ལ་དཀའ་ངལ་ལས་གཞན་གང་ཡང་མེད་པ་དེ་ངེས་པར་དུ་ཤེས་དགོས། 

ང་ཚོ་གནས་སྟངས་གང་འདྲ་ཞིག་གི་ནང་དུ་ཡོད་ནའང་འདྲ་སྟེ། ང་ཚོར་ཡོད་པའི་རྒྱུ་ནོར་ལོངས་སྤྱོད་ལ་གཞིགས་ན་དེ་དག་ལ་དཀའ་ངལ་ཡོད་པ་ནི་ངེས་པ་ཞིག་རེད། ཡིན་ནའང་། ང་ཚོས་དེ་ལ་སྣང་མེད་གཏོང་འདུན་བྱེད་ཀྱི་ཡོད། ང་ཚོར་གནད་དོན་དེ་དག་ལ་བརྟེན་ནས་དཀའ་ངལ་ཆེན་པོ་ཡོད་ནའང་། ད་དུང་དངོས་གནས་སྐྱིད་པོ་ཡོད་པའི་བཟོ་འདྲ་ཞིག་བསམ་བློ་གཏོང་གི་ཡོད། གང་ཡིན་ཞེ་ན། ཁྱེད་རང་དབང་མེད་ཀྱིས་ཡང་ནས་ཡང་དུ་འབྱུང་བའི་གནས་སྟངས་ཤིག་གི་ནང་ཡོད་སྟབས། གནས་སྟངས་དེའི་ནང་ཐ་ན་ཁྱེད་རང་གོ་གནས་ཧ་ཅང་མཐོ་པོ་ཡིན་ནའང་། དེ་དང་འབྲེལ་བའི་དཀའ་ངལ་གྱི་རིགས་མང་པོ་ཡོད། ཁྱེད་རང་གོ་གནས་དེ་ཤོར་བ་དང་གོ་གནས་གཅོག་པའི་སེམས་འཁྲལ་གྱི་དཀའ་ངལ་ཡོད། ཁྱེད་ལ་དེ་ལས་ལྷག་པའི་གོ་གནས་སྤར་གྱི་ཡོད་དང་མེད་ཅེས་བསམ་པའི་སེམས་འཁྲལ་ཡོད་པ་དང་དོན་ངོ་མར་ཁྱེད་རང་ནམ་ཡང་འདོད་བློ་མི་ཁེངས་བར་གནས་སྟངས་ཡོངས་སུ་རྫོགས་པ་ལ་སེམས་འཚབ་ཆེན་པོས་ཁེངས་ཀྱི་རེད། 

དེ་དང་མཚུངས་པར་ང་ཚོ་ཚང་མ་སྐྱེས་ནས་ངེས་པར་དུ་འཆི་དགོས་ནའང་། ང་ཚོ་མང་ཆེ་བ་ནི་རང་ཉིད་ལ་ཡོད་པའི་བག་ཆགས་ཀྱི་ཤུགས་ལ་བརྟེན་ནས་ང་ཚོའི་མི་ཚེའི་ནང་གི་གནས་སྟངས་རྟག་ཏུ་འགྱུར་བ་འགྲོ་བཞིན་ཡོད་པ་དང་རྟག་པའི་དངོས་པོ་གཅིག་ཀྱང་མེད་པའི་བདེན་དོན་དེ་ལ་སྣང་མེད་གཏོང་ཐབས་བཟོ་འདྲ་བྱེད་ཀྱི་ཡོད། ཆོས་རྣམས་ནི་རྟག་ཏུ་མི་རྟག་པ་རེད། འོན་ཀྱང་། ང་ཚོས་ཆོས་རྣམས་རྟག་པ་དང་ཡུན་དུ་གནས་ཀྱི་ཡོད་པ་ནང་བཞིན་དེ་དག་ལ་འཛིན་པ་སྐྱེ་གི་ཡོད། ང་ཚོས་ཆོས་རྣམས་རྟག་པ་དང་འགྱུར་བ་མེད་པ་ལྟ་བུར་འཛིན་གྱི་ཡོད། དོན་ངོ་མར་དེ་དག་ཐམས་ཅད་འགྱུར་བ་འགྲོ་རྒྱུ་ནི་ངེས་པ་རེད། 

ཐ་ན་ཁྱེད་ཀྱིས་མི་རྟག་པའི་རང་བཞིན་དང་འཆི་བ་དེ་ཤེས་ནའང་། སྐྱེ་བ་ཕྱི་མའི་ནང་བརྗིད་ཉམས་ཆེ་ཤོས་ཀྱི་ལྷ་ཞིག་གམ་ཡང་ན་མི་ཕྱུག་ཤོས་ཤིག་ཏུ་སྐྱེ་ཕྱིར་འབད་བརྩོན་ཧ་ཅང་ཆེན་པོ་བྱེད་མཁན་མི་མང་པོ་ཡོད། མི་མང་པོ་ཞིག་ལ་མངོན་འདོད་དེ་ཡོད་པ་རེད། ཐ་ན་ཁྱེད་རང་ལྷ་རུ་སྐྱེས་པའི་དབང་དུ་བཏང་ནའང་། ཁྱེད་རང་ལྷའི་རིགས་གསུམ་ལས་གང་རུང་ཞིག་ལ་སྐྱེ་སྲིད་པ་རེད། དེ་དག་ནི་འདོད་ཁམས་སུ་ཡོད་པའི་ལྷའི་རིགས་དང་། གཟུགས་ཁམས་སུ་ཡོད་པའི་ལྷ། དེ་བཞིན་གཟུགས་མེད་ཀྱི་ཁམས་སུ་ཡོད་པའི་ལྷ་བཅས་རེད། 

ལྷའི་གནས་དེ་གསུམ་པོ་རེ་རེ་བཞིན་དུ་གོང་མཐོར་འགྲོ་བ་དང་བསྟུན་ནས་དེ་དག་གནས་སའི་ལྷའི་ཞིང་ཁམས་སམ་གཞལ་ཡས་ཁང་རྣམས་བརྗིད་ཉམས་ཇེ་ཆེར་འགྲོ་བ་དང་། གོང་ནས་གོང་དུ་འཕེལ་བ་དང་བསྟུན་གནས་སྟངས་ཚང་མ་འོག་མ་འོག་མ་རྣམས་མོག་མོག་པོར་བྱེད་པའམ་ཟིལ་གྱིས་གནོན་གྱི་ཡོད། གོང་མའི་ལྷ་རྣམས་དང་བསྡུར་ན་འོག་མར་གནས་པ་ཚང་མ་ཧ་ཅང་དམན་པ་མཐོང་གི་ཡོད། ལྷའི་གནས་སྣ་ཚོགས་པ་དེ་དག་གི་ནང་ལྷ་རྣམས་མི་ཚེ་ཧ་ཅང་རིང་པོ་དང་བདེ་སྐྱིད་ཀྱིས་ཁེངས་ནས་གནས་ཀྱི་ཡོད་པས། དེ་དག་ལ་དཀའ་ངལ་དང་སྡུག་བསྔལ་རྩ་ནས་མེད་པ་ལྟར་སྣང་གི་ཡོད། འོན་ཀྱང་། རིམ་བཞིན་མཐར་དེ་དག་གི་ཚེ་ཟད་པ་དང་། ལྷར་སྐྱེ་བ་དང་བདེ་སྐྱིད་ཕུན་སུམ་ཚོགས་པའི་ངང་གནས་པའི་རྒྱུ་སྔོན་བསགས་པའི་དགེ་བའི་ནུས་པ་རྣམས་ཟད་ནས་མེད་པ་ཆགས་ཀྱི་ཡོད། 

དེ་ནས་ལྷ་རྣམས་ཀྱིས་ད་སྔོན་གྱི་དུས་སུ་སྡིག་པ་མི་དགེ་བའི་ལས་བསགས་པའི་འབྲས་བུ་མྱོང་བའི་དུས་ལ་བབས་པར་ཤེས་པ་དང་ཁོང་ཚོ་ལྷའི་གནས་ནས་ལྷུང་རྒྱུ་ཡིན་པ་དང་སྐྱེ་བ་ངན་པ་འཇིགས་སུ་རུང་བ་ཞིག་ལེན་རྒྱུ་ཡིན་པའང་ཤེས་ཀྱི་ཡོད། ལྷ་རྣམས་ལ་འཆི་བའི་རྟགས་རྣམས་ཐོན་པའི་སྐབས། ཁོང་ཚོར་མི་སྐྱིད་པ་དང་སྡུག་བསྔལ་བཟོད་མི་ཐུབ་པ་ཞིག་ཡོད། ཁོང་ཚོས་གྱོན་པའི་མེ་ཏོག་གི་ཕྲེང་བ་རྣམས་སྐམ་པོར་གྱུར་ནས་རིམ་ཡལ་དུ་འགྲོ་འགོ་བཙུག་གི་ཡོད། ལུས་པོ་ནས་དྲི་མ་ངན་པ་ཁ་བ་དང་ནམ་རྒྱུན་རྟག་ཏུ་ཁོང་ཚོ་དང་མཉམ་དུ་འགྲོགས་མཁན་གྱི་གྲོགས་པོ་རྣམས་ཀྱིས་ཁ་ཡ་དང་འབྲེལ་བ་མི་བྱེད་པ་ཡིན། གཞན་ཚང་མས་རང་ཉིད་ཁེར་རྐྱང་དང་རྒྱང་ཐག་རིང་དུ་བཞག་ནས་འབྲེལ་བ་བྱེད་ཀྱི་མེད། ལྷ་དེ་དག་གིས་མྱོང་བའི་སེམས་ཀྱི་སྡུག་བསྔལ་དང་ཟུག་རྔུ་ནི་ཤིན་ཏུ་ཆེན་པོ་རེད།

ལྷ་རྣམས་གནས་སའི་ལྷའི་ཁང་བཟང་ངམ་གཞལ་ཡས་ཁང་རྣམས་ཧ་ཅང་བརྗིད་ཉམས་ཅན་ཡིན། དེ་དག་ནི་མཛེས་ཤིང་ལྟ་ན་སྡུག་པའི་ནོར་བུ་དང་རྩ་ཆེན་འོད་མདངས་ལྡན་པའི་རིན་པོ་ཆེའི་རིགས་ལས་གྲུབ་པ་ཞིག་རེད། ཡིན་ནའང་། ཁོང་ཚོས་རང་ལ་ཡོད་པའི་གཞལ་ཡས་ཁང་དང་སྡོད་གནས་ཡིད་དུ་འོང་བ་དང་གྲོགས་པོ་བཟང་པོ་ལ་སོགས་པ་དེ་དག་ཐབས་ཅད་བཞག་ནས་འཆི་དགོས་པར་བརྟེན་སྡུག་བསྔལ་དང་གདུང་བ་ཧ་ཅང་དྲག་པོ་དང་བཟོད་མི་ཐུབ་པ་འདི་ཡོད་པ་རེད། ང་ཚོས་བསམ་བློའི་ནང་འཁོར་བའི་སྐྱེ་བ་གལ་ཆེ་ཤོས་དེ་ནི་ལྷའི་སྐྱེ་བ་ཡིན་ངེས་པ་དང་ཐ་ན་ལྷ་རུ་སྐྱེས་ནའང་ད་དུང་ཁྱེད་ལ་དཀའ་ངལ་ལས་གཞན་མེད་པ་དེ་རྟོགས་རྒྱུ་གལ་ཆེན་པོ་རེད། ཁྱེད་ཀྱིས་སྡུག་བསྔལ་དེ་དག་ཐམས་ཅད་མྱོང་དགོས་ཀྱི་ཡོད། 

ཁྱེད་རང་སྐྱེ་བ་ལེན་སྲིད་པའི་གཟི་བརྗིད་དང་བརྗིད་ཉམས་ཅན་གྱི་གནས་སྟངས་དེ་དག་ཐམས་ཅད་ལ་བལྟས་ནས་དེ་དག་ཚང་མའི་ནང་དབང་མེད་ཀྱིས་ཡང་ནས་ཡང་དུ་འབྱུང་བའི་གནས་སྟངས་དང་དཀའ་སྡུག་ཁོ་ན་ཡིན་པ་རྟོགས་པའི་སྐབས། ཁྱེད་ཀྱིས་ “ང་རང་དཀའ་སྡུག་ཅན་གྱི་གནས་སྟངས་འདི་དག་ཐམས་ཅད་ལས་ངེས་པར་དུ་ཐར་བར་བྱེད་དགོས་ཀྱི་འདུག་” ཅེས་པའི་བསམ་ཕྱོགས་དང་བློ་ཞིག་སྐྱེད་ཀྱི་ཡོད། འདི་ལ་ཐར་འདོད་ཀྱི་ཆོད་སེམས་སམ་ངེས་འབྱུང་ཟེར་གྱི་ཡོད། འདི་ནི་སྡུག་བསྔལ་ཀུན་ལས་ཐར་འདོད་ཀྱི་ཆོད་སེམས་དེ་རེད། 

འདི་ལྟ་བུའི་ཐར་འདོད་ཀྱི་ཆོད་སེམས་ལ་ཁྱེད་ཀྱིས་མ་འོངས་སྐྱེ་བ་ཕྱི་མར་ཧ་ཅང་ཞེན་ཆགས་ཡོད་པ་དེ་ལས་རྒྱབ་ཀྱིས་ཕྱོགས་པའི་ཆོད་སེམས་ཟེར་བ་རེད། གལ་ཏེ་ཁྱེད་ཀྱིས་འདི་དག་ཐམས་ཅད་ཉམས་ལེན་དང་བཅས་སྒོམ་རྒྱག་ནས་དངོས་སུ་རང་གི་སེམས་ཀྱི་ཕན་ཐོགས་ཅན་གྱི་གོམས་གཤིས་ཤིག་ཏུ་བསྐྲུན་ན། དེ་ནས་ཁྱེད་ཀྱིས་དངོས་གནས་སྡུག་བསྔལ་ལས་ཐར་བར་འདོད་པའི་ཆོད་སེམས་ཤིག་སྐྱེད་ཐུབ། འོན་ཀྱང་། ཐར་འདོད་ཀྱི་ཆོད་སེམས་འདི་ལ་བརྟེན་ནས་སྐྱེ་བ་ཕྱི་མར་ཧ་ཅང་ཞེན་ཆགས་ཡོད་པ་ལ་རྒྱབ་ཀྱིས་ཕྱོགས་པ་དེ་དང་། འདི་ལ་བརྟེན་ནས་སྐྱེ་བ་ཕྱི་མར་ལྷ་དང་མི་ཕྱུག་པོ་ཞིག་ལ་སྐྱེ་བའི་སྡུག་བསྔལ་འདི་དག་ཐམས་ཅད་ལས་ཐར་འདོད་ཀྱི་ཆོད་སེམས་འདི་རང་རྒྱུད་ལ་མ་བསྐྱེད་གོང་ལ་ཚེ་འདིའི་དངོས་པོར་ཧ་ཅང་ཞེན་ཆགས་ཡོད་པ་ལས་རྒྱབ་ཀྱིས་ཕྱོགས་པའི་ཐར་འདོད་ཀྱི་ཆོད་སེམས་འདི་རང་རྒྱུད་ལ་སྐྱེད་དགོས་ངེས་རེད། གང་ཡིན་ཞེ་ན། གལ་ཏེ་ཁྱེད་རང་ཚེ་འདིའི་ཞེན་ཆགས་ལ་རྒྱབ་ཀྱིས་མ་ཕྱོགས་ན། མ་འོངས་སྐྱེ་བ་ཕྱི་མའི་ནང་ཞེན་ཆགས་ལ་རྒྱབ་ཀྱིས་ཕྱོགས་རྒྱུ་དེ་ཧ་ཅང་དཀའ་ལས་ཁག་པོ་ཆགས་ཀྱི་རེད། 

གལ་ཏེ་ང་ཚོས་ཚེ་འདིའི་ནང་ངེས་པར་དུ་འཕྲད་དགོས་པའི་གནས་སྟངས་ཀྱི་སྐོར་བསམ་བློ་བཏང་ན། ང་ཚོས་དཀའ་སྡུག་ཆེ་ཁག་བཞི་ལ་ངེས་པར་དུ་གདོང་ལེན་བྱེད་དགོས་ཀྱི་ཡོད།  ང་ཚོས་དཀའ་ངལ་བཞི་ལ་ངེས་པར་དུ་གདོང་ལེན་བྱེད་དགོས། དཀའ་སྡུག་ཅན་གྱི་གནས་སྟངས་བཞི་པོ་དེ་དག་གང་རེད་དམ། དེ་དག་ནི་སྐྱེ་བ་དང་། ན་བ། རྒ་བ། འཆི་བ་སྟེ། རྒ་ཤིའི་སྡུག་བསྔལ་རེད། 

འོ་ན་སྐྱེ་བའི་སྡུག་བསྔལ་ལམ་དཀའ་སྡུག་གི་གནས་སྟངས་དེ་གང་རེད་དམ། འདི་ནི་སྡུག་བསྔལ་ཆེན་པོ་དང་ཧ་ཅང་མི་སྐྱིད་པ་ཡོད་པ་ཞིག་རེད། ཡིན་ནའང་། དེ་བྱུང་བའི་སྐབས་སུ་ང་ཚོ་ནི་ཧ་ཅང་ཆུང་ཆུང་ཡིན་སྟབས། ང་ཚོས་ཡག་པོ་དྲན་ཐུབ་ཀྱི་མེད། འོ་ན་སྐྱེ་བ་ལེན་པའི་ནང་དངོས་གནས་གང་གཏོགས་ཡོད་དམ། སྐྱེ་བའི་སྐད་ཅིག་དང་པོ་དེ་ནི་མངལ་ཆགས་པའི་སྐད་ཅིག་ལ་གོ་བ་སྟེ། དེ་ནི་ཁྱེད་ཀྱི་རིག་པའམ་ཤེས་པའི་རྒྱུན་དེ་ཐོག་མར་མ་འོངས་ལུས་ཀྱི་གཞི་རྟེན་ནང་འཇུག་པའི་སྐབས་རེད། འདི་ནི་མངལ་དུ་ཞུགས་པའི་གནས་སྐབས་ཡིན་པ་དང་དོན་ངོ་མར་སྐྱེ་བ་ཞེས་པར་གོ་བ་ཡིན། མངལ་དུ་ཞུགས་པའི་སྐད་ཅིག་གཉིས་པ་ནས་བཟུང་སྟེ། རྒ་བའི་རྒྱུད་རིམ་ཡོངས་སུ་རྫོགས་པ་འབྱུང་གི་ཡོད་པ་དང་རྒ་བ་དེ་ལ་བརྟེན་ནས་ཁྱེད་ལ་དཀའ་ངལ་དང་སྡུག་བསྔལ་ཚང་མ་འབྱུང་གི་ཡོད། 

ན་བའི་སྡུག་བསྔལ་ལ་ཆ་བཞག་ན། འདི་ནི་ང་ཚོ་ཚང་མར་གོམས་འདྲིས་ཡོད་པ་ཞིག་རེད། ནད་ཀྱི་རིགས་སྣ་ཚོགས་པ་རྣམས་བསྡུས་ན་ནད་རིགས་བཞི་བརྒྱ་རྩ་བཞིའི་ནང་བསྡུ་ཆོག་པ་དང་དེའི་སྒང་ལ་དུས་ངན་སྙིགས་མའི་དུས་སྨད་ཙམ་ལ་འབྱུང་བར་ལུང་དུ་བསྟན་པའི་ནད་རིགས་གསར་པ་མང་པོ་ཡོད་པ་དེ་དག་ཐམས་ཅད་ནི་ང་ཚོས་དངོས་སུ་འབྱུང་བཞིན་ཡོད་པ་མཐོང་ཐུབ་པ་དག་རེད། 

མི་སུ་འདྲ་ཞིག་སྐྱེས་པ་ལ་བསམ་བློ་ཞིག་བཏང་ན། འཆི་བའི་སྡུག་བསྔལ་མྱོང་རྒྱུ་ངེས་པ་རེད། གལ་ཏེ་ཁྱེད་ཀྱིས་དེའི་སྐོར་ལ་བསམ་བློ་བཏང་ན། འཆི་ཁར་ཁྱེད་ཀྱིས་གྱོན་གོས་ལྟ་ན་སྡུག་པ་དང་ཟས་ཞིམ་ཤོས་དང་དགའ་ཤོས་སོགས་ཚང་མ་བཞག་ནས་འགྲོ་དགོས་ཤིང་། ཁྱེད་རང་དངོས་གནས་ཚེ་འདི་བཞག་ནས་འགྲོ་དགོས་པ་སོང་ཙང་། གནས་སྟངས་ཧ་ཅང་ཡ་ང་བ་ཞིག་དང་འཕྲད་རྒྱུ་ཡིན་པ་རྟོགས་ཀྱི་རེད། རྒ་བ་དང་ན་བ་འཆི་བའི་དཀའ་ངལ་གྱི་རིགས་སྣ་ཚོགས་པ་གང་ཞིག་སྔོན་དུ་འབྱུང་དང་རྗེས་སུ་འབྱུང་གི་གོ་རིམ་ཐོག་ལ་ངེས་པ་མེད། གང་ཡིན་ཞེ་ན། མི་འགའ་ཞིག་ནི་མངལ་ཆགས་ནས་ཨ་མའི་མངལ་དུ་ཡོད་པའི་སྐབས་ཀྱི་སྐར་མ་ཁ་ཤས་རྗེས་སུ་ཤི་སྲིད་ལ། མངལ་དུ་ཡུད་ཙམ་རྒས་ནས་ཤི་སྲིད་པ་རེད། 

ཐ་ན་ཁྱེད་རང་མངལ་གྱི་ནང་ཡོད་པའི་དུས་སྐབས་ཡོངས་སུ་རྫོགས་པའི་ནང་འཚོ་གནས་ཐུབ་ནའང་ཁྱེད་ཀྱིས་ཧ་ཅང་རྒྱ་ཆུང་བའི་མའི་མངལ་དུ་ཟླ་བ་དགུའི་རིང་ལ་མཚམས་བཀག་ཐོག་གནས་དགོས་ཀྱི་ཡོད་པའི་ཐོག་ལ་བསམ་བློ་གཏོང་དགོས། གལ་ཏེ་ཁྱེད་རང་སྒོ་དང་སྒེའུ་ཁུང་མེད་པའི་ཁང་པ་ཆུང་ཆུང་ཞིག་གི་ནང་བཅུག་པ་ཡིན་ན། གང་འདྲ་ཚོར་ས་རེད། དེའི་ཐད་ལ་བསམ་བློ་གཏོང་ཐབས་བྱེད་དགོས། དེ་འདྲ་ཞིག་གི་ནང་ཐ་ན་ཉིན་མ་གསུམ་བཞིའི་རིང་བཅུག་ནས་བཞག་ནའང་། དེ་ནི་ཁྱེད་ལ་ཧ་ཅང་བཟོད་དཀའ་བ་ཞིག་ཆགས་ངེས་རེད། 

ང་ཚོ་ཐོག་མར་ཨ་མའི་མངལ་ནས་སྐྱེས་པའི་སྐབས་དང་ཕྲུ་གུ་མ་འབྱར་ཡིན་པའི་སྐབས། ང་ཚོ་གང་འདྲ་ཞིག་ཡོད་པར་བསམ་བློ་ཐོངས་དང་། ང་ཚོར་སོ་མེད་པ་དང་གྱོན་གོས་མེད་པ་རོགས་མགོན་རྩ་ནས་མེད་པ་རེད། རང་གིས་རང་ལ་གང་ཡང་བྱེད་ཐུབ་ཀྱི་མེད། ང་ཚོ་ནི་མཐའ་གཅིག་ཏུ་ཨ་མའི་བྱམས་བརྩེ་དང་གཅེས་སྐྱོང་ལ་བརྟེན་དགོས་པའི་རྒྱུ་མཚན་དང་ཆུང་དུས་ཨ་མའི་གཅེས་སྐྱོང་ཁོ་ན་ལ་བརྟེན་ནས་དཀའ་སྡུག་ཆེ་བའི་དུས་སྐབས་དེའི་ནང་འཚོ་གནས་ཐུབ་པ་བྱུང་ཞིང་། ད་ལྟ་གསོན་པོར་ཡོད་པ་འདི་རེད། ང་ཚོ་ཕྲུ་གུ་ཆུང་ངུའི་སྐབས་སུ་ག་རེ་བྱེད་དགོས་པ་དང་ཇི་ལྟར་བྱེད་དགོས་མིན་རྩ་ནས་ཤེས་ཀྱི་མེད་པ་དེས་ང་ཚོར་དཀའ་སྡུག་ཧ་ཅང་ཆེན་པོ་སྤྲད་ཡོད། ཁྱེད་རང་བྱིས་པ་ཆུང་ངུ་དང་ཕྲུ་གུ་མ་འབྱར་ཡིན་པའི་སྐབས། དཀའ་ངལ་ག་ཚོད་ཡོད་པའི་ཐད་ལ་བསམ་བློ་བཏང་ན། ཁྱེད་ཀྱིས་ཤེས་ཐུབ། དེ་ནི་སྐྱིད་ཚོར་ལྡན་པ་ཞིག་མེད།

སྐྱེ་བ་དངོས་ཀྱི་རྒྱུད་རིམ་ནི་ཧ་ཅང་ཟུག་རྔུ་ཆེན་པོ་ཡིན་པ་དང་དངོས་སུ་མའི་མངལ་ནས་བཙས་པའི་རྒྱུད་རིམ་ནང་སྡུག་བསྔལ་དཔག་ཏུ་མེད་པ་ཞིག་ཡོད། དེ་ནི་ཧ་ཅང་གདུང་བ་དྲག་པོ་དང་ཟུག་རྔུ་ཆེན་པོ་ཞིག་ཡིན་ནའང་། ང་ཚོས་དྲན་གྱི་མེད། 

གལ་ཏེ་ཁྱེད་རང་རྒས་འཁོགས་ཆགས་པའི་བར་འཚོ་གནས་ཐུབ་ནའང་། རྒ་བ་དང་རྒས་ཤིང་འཁོགས་པའི་སྡུག་བསྔལ་རྣམས་ནི་སྡུག་བསྔལ་ཡུན་རིང་ཤོས་གནས་པ་དེ་རེད། དེ་ནི་ཁྱེད་ཀྱི་མི་ཚེ་གང་པོར་གནས་སྲིད་པ་རེད། ཁྱེད་རང་ལོ་བརྒྱད་ཅུའི་བར་དུ་གནས་པའི་དབང་དུ་བཏང་ན། ཁྱེད་རང་ལོ་ན་མཐོ་རུ་འགྲོ་བའམ་རྒས་སུ་འགྲོ་བའི་སྐབས་སུ་དཀལ་ངལ་ཧ་ཅང་ཆེན་པོ་འཕྲད་ཀྱི་རེད། རྒ་བའི་སྡུག་བསྔལ་དེ་དག་ནི་ང་ཚོས་བསམ་བློའི་ཡུལ་དུ་མེད་པའམ་ང་ཚོས་ཤེས་རྟོགས་མེད་པར་འཇབ་བུའི་སྒོ་ནས་ང་ཚོར་འཕྲད་ཀྱི་རེད། རྒ་བ་ནི་ཧ་ཅང་བརྟན་པོ་དང་རིམ་པ་བཞིན་དུ་དུས་ཡུན་རིང་པོ་ནས་འབྱུང་གི་ཡོད་པ་དང་ང་ཚོས་ཤེས་རྟོགས་ཀྱང་ཡོང་གི་མེད། གལ་ཏེ་རྒ་བའི་སྡུག་བསྔལ་རྣམས་རིམ་པས་བྱུང་མེད་པར་གློ་བུར་དུ་བྱུང་ཡོད་ན། དེ་ནི་དངོས་གནས་དྲང་གནས་འཇིགས་སུ་རུང་བ་དང་དཀའ་ཚེགས་ཅན་ཞིག་ཆགས་ངེས་རེད། ལོ་བཅུ་དྲུག་ཡིན་པ་དང་ཕྱི་ཉིན་ཁྱེད་རང་ཡར་ལངས་པའི་སྐབས་ཁྱེད་རང་ལོ་བརྒྱད་ཅུ་ཡིན་ན། དེ་ནི་གང་འདྲ་ཆགས་ཀྱི་རེད་བསམ་བློ་གཏོང་དགོས། དེ་ནི་ཁྱེད་རང་ཀྱིས་གདོང་ལ་འབག་ཅིག་བཀོན་པ་འདྲ་པོ་ཆགས་ངེས་རེད། འདི་འདྲ་ཞིག་ཏུ་འགྱུར་བར་ཁྱེད་རང་རིམ་པས་འགྱུར་བ་འགྲོ་བ་དང་རྒས་ཀྱི་ཡོད་པ་རྟོགས་དགོས། 

གལ་ཏེ་ཁྱེད་ཀྱིས་རང་ཉིད་རྒས་འཁོགས་སྐབས་ལུས་ཀྱི་ནུས་ཤུགས་ལྟ་བུ་སྡུག་བསྔལ་རྣམས་ལ་བསམ་བློ་བཏང་ན། ཁྱེད་ཀྱི་སེམས་ནང་ལས་ཀ་བྱེད་འདོད་ཤུགས་ཆེན་ཡོད་ནའང་། ལུས་པོས་བྱེད་ཐུབ་ཀྱི་མེད། དེས་ཁྱེད་ལ་བསུན་གཙེར་གྱི་དཀའ་ངལ་ཤུགས་དྲག་ཅིག་སྤྲོད་ཀྱི་ཡོད། ཁྱེད་རང་གཞོན་ནུའི་སྐབས། སེམས་ཧ་ཅང་གསལ་པོ་ཡོད་ནའང་། ཁྱེད་ཀྱི་གནས་ཚུལ་རྣམས་དྲན་པ་བརྗེད་རྒྱུ་འགོ་བཙུག་པ་དང་མིག་གི་གསལ་པོ་མཐོང་མི་ཐུབ་པ་སོགས་ཞེད་སྣང་ཅན་ཆགས་ཀྱི་ཡོད། དེ་ག་ནང་བཞིན་ཁྱེད་རང་ཧ་ཅང་དགའ་མོས་བྱེད་པའི་ཁ་ལག་རྣམས་ཀྱང་རང་གི་ལུས་ཁམས་ལ་མི་འཕྲད་པ་དང་། ཁྱེད་ཀྱིས་བཟའ་འདོད་ཡོད་ནའང་། བཟའ་མི་ཐུབ་པ་དང་དེས་ཁྱེད་རང་ནད་པ་བཟོ་གི་ཡོད། ཁྱེད་རང་འགྲོ་བར་འདོད་པའི་ས་ཆར་འགྲོ་མི་ཐུབ་པ་དང་བྱེད་པར་འདོད་པའི་ལས་ཀའི་རིགས་ཚང་མ་བྱེད་མི་ཐུབ་པ་ཆགས་ཀྱི་ཡོད། དེ་ནི་ཧ་ཅང་འཇིགས་སུ་རུང་བའི་དཀའ་སྡུག་ཅིག་རེད། 

དེ་དང་མཚུངས་པར། ཁྱེད་ཀྱི་མི་ཚེའི་ནང་རྒྱུ་ནོར་ལོངས་སྤྱོད་ག་ཚོད་བསགས་ཡོད་ནའང་། མཐར་ཐུག་དེ་དག་ཐམས་ཅད་བཞག་ནས་འགྲོ་བའི་དུས་སྐབས་ཤིག་བསླེབ་ཀྱི་རེད། དེ་ནི་དཀའ་སྡུག་ཆེན་པོ་ཞིག་ཡིན་པ་དང་དེ་ལ་བརྟེན་ནས་ཁྱེད་རང་མི་སྐྱིད་པ་དང་སྡུག་བསྔལ་ཅན་ཆགས་ཀྱི་ཡོད། 

ང་ཚོས་གདོང་ལེན་བྱེད་དགོས་པའི་དཀའ་ངལ་ཆེ་ཤོས་ནི་ང་ཚོ་དངོས་སུ་འཆི་དགོས་པའི་སྐབས་དེ་རེད། དེའི་སྐབས་ང་ཚོས་བསྟེན་དང་སྟེན་མུས་ཀྱི་སྨན་ཚང་མ་བེད་སྤྱོད་མེད་པ་རེད། སྨན་གྱི་བཅོས་ཐབས་སོགས་ང་ཚོས་ཐབས་ཤེས་གང་བྱས་ནའང་ཕན་ཐོགས་མེད་པར་ང་ཚོས་འཆི་བར་དངོས་སུ་གདོང་ལེན་བྱེད་དགོས་ཀྱི་ཡོད། ང་ཚོར་གང་ཡོད་པའི་རྒྱུ་དངོས་ཡོད་དོ་ཅོག་བཞག་ནས་འགྲོ་དགོས་པ་དང་ང་ཚོའི་སེམས་ཀྱི་རྒྱུད་དེ་ཁེར་རྐྱང་དུ་མུ་མཐུད་ནས་སྐྱོད་དགོས་ཀྱི་ཡོད། དེ་ནི་ང་ཚོར་འཕྲད་པར་འགྱུར་བའི་དཀའ་ངལ་དང་སྡུག་བསྔལ་ཆེ་ཤོས་དེ་ཆགས་ཀྱི་ཡོད། 

འཆི་བའི་སྐབས་ཁྱེད་ཀྱིས་མྱོང་བའི་སྡུག་བསྔལ་འདི་ནི་ཧ་ཅང་དངངས་ཚབས་ཅན་ཞིག་ཡིན་ནའང་། དེའི་དུས་ཡུན་ནི་ཧ་ཅང་ཐུང་ཐུང་རེད། གང་ཡིན་ཞེ་ན། དངོས་སུ་འཆི་བར་དུས་ཚོད་ཅུང་ཙམ་ལས་འགོར་གྱི་མེད། ཚང་མ་ཚར་བའི་རྗེས་སུ་དེ་ཙམ་སྡུག་ཅག་ཆགས་ངེས་མ་རེད། གང་ཡིན་ཞེ་ན། འཆི་བའི་སྡུག་བསྔལ་དང་དངང་ཚབས་དེ་ཐུང་ཐུང་ཡིན་པ་དང་དེ་ལས་ཁྱེད་རང་ལམ་སེང་ཐར་གྱི་ཡོད། འོན་ཀྱང་། དོན་ངོ་མར་གནས་སྟངས་དེ་འདྲ་མ་རེད། གང་ཡིན་ཞེ་ན། དེའི་རྗེས་སུ་ཁྱེད་རང་སླར་ཡང་སྐྱེ་བ་ལེན་དགོས་ཀྱི་ཡོད། ཁྱེད་རང་འཁོར་བའི་རྒྱུན་འཁོར་འདི་ཚང་མ་ཡང་བསྐྱར་བརྒྱུད་ནས་འགྲོ་དགོས། དེ་ནི་འཛད་མཐའ་མེད་པར་མུ་མཐུད་ནས་འགྲོ་བའི་དབང་མེད་ཀྱིས་ཡང་ནས་ཡང་དུ་འབྱུང་བའི་གནས་སྟངས་ཤིག་ཡིན། 

དབང་མེད་ཀྱིས་ཡང་ནས་ཡང་དུ་འབྱུང་བའི་རྒྱུན་འཁོར་གྱི་གནས་སྟངས་འདི་ནི་བསྐྱར་ལྡབ་ཡང་ལྡབ་ཀྱིས་འབྱུང་བ་ཞིག་ཡིན། དེ་ནི་ལོ་རེའི་ནམ་དུས་དང་འདྲ་བ་རེད། དེ་དག་དཔྱིད་ཀ་དང་། དབྱར་ཁ། སྟོན་ཁ། དགུན་ཁ་བཅས་ནམ་དུས་བཞི་བརྒྱུད་ནས་འགྲོ་བ་དང་དེ་ནས་རྒྱུན་འཁོར་དེ་བསྐྱར་ལྡབ་ཡང་ལྡབ་བྱེད་ཀྱི་ཡོད། དེ་ནི་བཙས་མ་རྔ་བའམ་སྟོན་འབྲས་བསྡུ་བའི་སྐབས་སུ་ཞིང་ཁའི་ནང་བཀོལ་སྤྱོད་བྱེད་པའི་འཕྲུལ་ཆས་ཆེན་པོ་དེ་དང་འདྲ་པོ་རེད། དེ་ཡང་འཕྲུལ་ཆས་ཀྱི་འཁོར་ལོ་འཁོར་བཞིན་དུ་སྟོན་ཐོག་རྔ་བ་དང་མཚུངས་པ་རེད། དེའི་རྗེས་སུ་ཡང་ལོ་ཏོག་འདེབས་འཛུགས་བྱེད་པ་དང་ཞིང་ཁའི་ནང་ས་བོན་འདེབས་པ་སོགས་ཡང་ནས་ཡང་དུ་རྒྱུན་འཁོར་བྱེད་པ་དང་འདྲ་བ་རེད། 

ཁྱེད་ཀྱིས་ “དཀའ་ངལ་དེ་དག་ཐམས་ཅད་ཤེས་རྟོགས་དང་དྲན་དགོས་པའི་དགོས་དོན་གང་རེད་དམ་” ཞེས་འདྲི་སྲིད། དེ་ལ་དགོས་པ་རྒྱུ་མཚན་ཞིག་ཡོད་པ་རེད། གང་ཡིན་ཞེ་ན། དེས་ཁྱེད་ལ་ད་ལྟ་ནས་དཀའ་ངལ་དེ་དག་ལས་ཐར་འདོད་ཀྱི་བློ་ཞིག་སྐྱེད་པར་སེམས་ཤུགས་དང་བློ་སྟོབས་སྦྱིན་གྱི་ཡོད་པ་དང་དོན་ངོ་མར་ཁྱེད་རང་ལ་ཡོད་པའི་དཀའ་ངལ་དེ་དག་ལས་ཐར་བའི་ཐབས་ཤིག་ཡོད། གལ་ཏེ་དཀའ་ངལ་དེ་དག་ལས་ཐར་བའི་ཐབས་ཤིག་མེད་ན། དཀའ་ངལ་དེ་དག་མི་དྲན་པ་དང་དེ་དག་ལ་བསམ་བློ་རྩ་ནས་མ་བཏང་ན་ཡག་ག་ཡོད། ཡིན་ནའང་། དཀའ་ངལ་དེ་དག་ལས་ཐར་བའི་ལམ་ཞིག་ཡོད་པ་དང་དེ་དག་ལ་བསམ་ཞིབ་བྱེད་པའི་སྒོ་ནས་ཁྱེད་ཀྱིས་ཐབས་ལམ་དེ་ལ་འབད་བརྩོན་བྱེད་ཐབས་ཀྱི་སེམས་ཤུགས་བསླེབ་ཀྱི་རེད། 

ང་ཚོས་ཚེ་འདིའི་འདོད་དོན་དང་འབྲེལ་བའི་ཟས་དང་གོས་གཏམ་སྙན་གྲགས་སོགས་ཀྱི་ནང་དུ་ཚུད་པའི་དཀའ་ངལ་ལ་བསམ་བློ་བཏང་ནས། ཁྱེད་ཀྱིས་དེ་དག་ལ་སྙིང་པོ་མེད་པ་དང་དོན་སྙིང་མེད་པ་དེ་དག་གི་ཆེད་དུ་རང་གི་ནུས་པ་དང་རྩོལ་བ་བྱེད་པ་མཐོང་བའི་སྐབས། ཚེ་འདིའི་རྒྱུ་དངོས་སོགས་ལ་ཧ་ཅང་ཞེན་ཆགས་དེ་སྤོང་བའི་སེམས་ཤིག་བསྐྱེད་ནས་སྡུག་བསྔལ་གྱི་རིགས་དེ་དག་ཐམས་ཅད་ལས་ཐར་འདོད་ཀྱི་ཆོད་སེམས་སྐྱེད་དགོས། གལ་ཏེ་ཁྱེད་རང་དབང་མེད་ཀྱིས་ཡང་ནས་ཡང་དུ་འབྱུང་བའི་གནས་སྟངས་ཡ་ང་བ་གང་རུང་དུ་སྐྱེས་ན། ཁྱེད་ལ་འཕྲད་ངེས་པའི་དཀའ་ངལ་གྱི་རིགས་ཚང་མར་བསམ་བློ་གཏོང་དགོས་པ་དང་། དམིགས་བསལ་ཁྱེད་རང་ངན་སོང་གི་གནས་གང་རུང་ལ་སྐྱེས་ན། དེ་ནི་ཅི་འདྲའི་འཇིགས་སུ་རུང་བ་ཞིག་མ་ཡིན་ནམ་ཞེས་བསམས་ནས་ “འདི་ནི་འཇིགས་སུ་རུང་བ་ཞིག་རེད་འདུག །ངས་དཀའ་ངལ་འདི་དག་ཐམས་ཅད་ལས་ཐར་བར་བྱེད་དགོས་ཀྱི་འདུག་” ཅེས་ཚོར་བའི་སྒོ་ནས་ཐར་འདོད་ཀྱི་ཆོད་སེམས་སྐྱེད་དགོས། 

དེ་ནས་ཁྱེད་རང་བསམ་བློའི་སྦྱོང་བརྡར་གྱི་རྒྱུན་དེ་ལ་བརྟེན་ནས་མུ་མཐུད་སྐྱོད་པའི་ཚེ། ཇི་ལྟར་ཁྱེད་ལ་སྡུག་བསྔལ་ཀུན་ལས་ཐར་འདོད་ཀྱི་ཆོད་སེམས་བརྟན་པོ་འདི་ཡོད་པ་ལྟར། གཞན་ཚང་མའང་གནས་སྟངས་གཅིག་མཚུངས་འདིའི་ནང་ཇི་ལྟར་ཡོད་པའི་ཐད་ལ་བསམ་བློ་གཏོང་དགོས། གཞན་ཐམས་ཅད་ཀྱང་གང་དུ་སྐྱེས་ནའང་འདྲ་སྟེ། མི་ཚེའི་ནང་དཀའ་ངལ་འདིའི་རིགས་འཕྲད་ངེས་པ་རེད། དེ་ལྟར་ཁྱེད་ཀྱིས་བློའི་ཁྱེར་སོ་དེ་བརྗེ་པོ་རྒྱག་ནས་སོ་སོའི་སྡུག་བསྔལ་ལས་ཐར་འདོད་ཀྱི་ཆོད་སེམས་ལ་གཞིགས་ནས་བསམ་བློ་གཏོང་རྒྱུའི་ཚབ་ལ་ཁྱེད་ཀྱིས་གཞན་ཐམས་ཅད་ཀྱང་དེ་ག་ནང་བཞིན་དཀའ་ངལ་ལས་འབྲལ་དགོས་ཞེས་ཐར་འདོད་ཀྱི་ཆོད་སེམས་གཅིག་མཚུངས་སུ་རང་རྒྱུད་ལ་སྐྱེད་དགོས། གཞན་ཐམས་ཅད་སྡུག་བསྔལ་ལས་འབྲལ་བར་འདོད་པའི་འདུན་སེམས་དང་བློའི་ཁྱེར་སོ་དེ་ལ་སྙིང་རྗེ་ཟེར་གྱི་ཡོད། 

སྙིང་རྗེ་ནི་སོ་སོའི་སེམས་རྒྱུད་ཀྱི་ཆ་ཤས་སུ་སྐྱེད་དགོས་པ་ནི་ཧ་ཅང་གལ་ཆེན་པོ་ཡིན་པས། ཁྱེད་ཀྱིས་སྙིང་རྗེ་རང་རྒྱུད་ལ་སྐྱེད་ཐུབ་པའི་ཐབས་ལམ་ངེས་པར་བྱེད་དགོས། གཞན་ཚང་མར་སྐྱིད་པོ་དང་བདེ་སྐྱིད་དང་ལྡན་པ་ཡོང་བར་སྨོན་པའི་སྐབས། དེ་ལྟ་བུའི་ཚོར་བ་དང་བསམ་བློ་དེ་ལ་བྱམས་པ་ཟེར་གྱི་ཡོད། ཁྱེད་ཀྱིས་རང་ཉིད་གོང་འཕེལ་འགྲོ་བའི་ཆེད་ཉམས་ལེན་འདི་དག་བྱེད་དགོས་པ་དང་། ཁྱེད་ཀྱིས་བྱམས་པ་དང་སྙིང་རྗེ་གཉིས་ཀ་རང་རྒྱུད་ཀྱི་ཆ་ཤས་སུ་སྐྱེད་པར་ངེས་དགོས། 

དཔེར་ན། ཁྱེད་ཀྱིས་དམིགས་བསལ་ཞིམ་པོ་ཡོད་པའི་ཟས་བཟའ་བཞིན་པའི་སྐབས། “མི་གཞན་ཚང་མས་ཟས་ཞིམ་པོ་འདི་ལ་ལོངས་སྤྱོད་པ་དང་བྲོ་བ་མྱོང་ཐུབ་ན་ཅི་མ་རུང་” ཞེས་པའི་བསམ་བློ་དེ་སྐྱེད་ཐབས་བྱེད་དགོས། ཕྱི་ལོགས་སུ་ཧ་ཅང་གནམ་གཤིས་གྲང་མོ་ཡོད་པ་དང་ཁྱེད་ཀྱིས་གོས་དྲོ་པོ་གྱོན་ཡོད་པའི་སྐབས། དེ་དང་མཚུངས་པར་ཁྱེད་ཀྱིས་སེམས་ཅན་གཞན་ཚང་མ་གྲང་བའི་སྡུག་བསྔལ་གྱིས་མནར་བ་རྣམས་ལ་ “དེ་དག་ཐམས་ཅད་ལའང་གྱོན་གོས་དྲོ་པོ་འདི་འདྲ་ཞིག་ཡོད་ན་ཅི་མ་རུང་” ཞེས་ཡིད་སྨོན་བྱེད་དགོས། ཁྱེད་རང་ཁང་པ་ལྟ་ན་སྡུག་པ་དང་བདེ་པོ་དྲོ་པོ་ཞིག་གི་ནང་སྡོད་པའི་སྐབས། ཁྱེད་ཀྱིས་དུད་འགྲོ་སྲོག་ཆགས་སྣ་ཚོགས་པ་སྡོད་གནས་མེད་མཁན་རྣམས་ལ་བསམ་བློ་བཏང་ནས་སླར་ཡང་ “སེམས་ཅན་ཐམས་ཅད་ལ་སྡོད་གནས་ལྟ་ན་སྡུག་ལ་མཐུན་རྐྱེན་ཀུན་ཚང་ཞིག་དང་ལྡན་ན་ཅི་མ་རུང་” ཞེས་པའི་ཡིད་སྨོན་ཤུགས་དྲག་འདི་སྐྱེད་དགོས། གལ་ཏེ་ཁྱེད་ཀྱིས་ཉམས་ལེན་བྱེད་པ་དང་སྨོན་ལམ་འདི་ལྟར་རྒྱག་ན། འདི་ལས་ཐོག་མར་གང་འབྱུང་གི་རེད་ཅེ་ན། དེ་དག་ཇི་ལྟར་སྨོན་པ་ཚང་མ་ཁྱེད་ལ་འབྱུང་གི་རེད། འོན་ཀྱང་། ཁྱེད་ཀྱིས་དེ་དག་ཐམས་ཅད་རང་ཉིད་ལ་འབྱུང་གི་རེད་ཅེས་ཤེས་ནས་འཐོབ་འདོད་དང་བཅས་སྨོན་ལམ་རྒྱག་པ་ནི་ཡང་དག་པ་ཞིག་དང་སྨོན་ལམ་ཚུལ་ལྡན་ཞིག་རྩ་ནས་མིན། 

བཀའ་གདམས་སྐུ་མཆེད་གསུམ་གྱི་ནང་ནས་གཅིག་ལ་དགེ་བཤེས་སྤྱན་སྔ་བ་ཞུ་བ་དེས་རྟག་ཏུ་ “སེམས་ཅན་ཐམས་ཅད་ཀྱི་དོན་དུ་བདག་དམྱལ་བའི་གནས་ཤིག་ཏུ་སྐྱེ་བར་ཤོག་” ཅེས་སྨོན་ལམ་བཏབ་ཀྱི་ཡོད། ཁོང་སྐུ་འདས་གྲབས་ཡོད་སྐབས། ཁོང་གིས་ “ཨ་ཙི། ངའི་སྨོན་ལམ་རྣམས་འགྲུབ་ཀྱི་མི་འདུག་” ཅེས་གསུངས་པ་རེད། ཁོང་གི་ཞབས་ཕྱིས་ཁོང་ལ་ “ཁྱེད་ཀྱིས་མི་ཚེ་གང་པོར་ཆོས་ཉམས་ལེན་གནང་སོང་། ད་ལྟ་ཁྱེད་ཀྱི་སྨོན་ལམ་ཚང་མ་འགྲུབ་ཀྱི་མ་རེད་ཅེས་གསུངས་པའི་དོན་གང་རེད་དམ་” ཞེས་དྲིས་པ་རེད། དེ་ལ་ཁོང་གིས་ “ངའི་མི་ཚེ་གང་པོར་སེམས་ཅན་ཐམས་ཅད་ཀྱི་དོན་དུ་ང་རང་ངན་སོང་གང་རུང་གི་གནས་སུ་སྐྱེ་བར་ཤོག་ཅེས་སྨོན་ལམ་བཏབ་ཡིན། ད་ལྟ་ང་རང་འཆི་གྲབས་ཡོད་སྐབས། ང་རང་དག་པའི་ཞིང་ཁམས་ཤིག་ཏུ་སྐྱེ་རྒྱུ་ཡིན་པའི་སྣང་བ་བྱུང་། བྱས་ཙང་། མཆོད་འབུལ་གྲ་སྒྲིག་གནང་རོགས་” ཞེས་གསུངས་པ་རེད། དེ་ནས་ཁོང་གིས་འཇིག་རྟེན་ཟླུམ་པོའི་རྟགས་ཅན་གྱི་དཀྱིལ་འཁོར་བཞེངས་ནས་མཎྜལ་གྱི་མཆོད་པ་འབུལ་འགོ་ཚུགས་པ་དང་བཅས་དེ་ལྟར་སྐུ་མྱ་ངན་ལས་འདས་པ་རེད། 

ཁྱེད་ཀྱིས་དོ་སྣང་ཆེན་པོས་བདག་གཞན་མཉམ་བརྗེ་ཇི་ལྟར་བྱེད་ཚུལ་གྱི་རྒྱུད་རིམ་ཡོངས་སུ་རྫོགས་པའི་སྐོར་གྱི་ཆོས་ཁྲིད་བྱེད་དགོས་ཞེས་གསུངས་པ་དེ་ཧ་ཅང་ཡག་པོ་རེད། ཁྱེད་རང་བདག་གཞན་མཉམ་བརྗེའི་བློ་སྦྱོང་ཚུལ་ལ་དོ་དབྱིངས་ཡོད་པའི་སྐབས། རྒྱུད་རིམ་འདི་དག་དང་འདིར་འགྲེལ་བརྗོད་བྱས་པའི་བསམ་བློའི་སྦྱོང་བརྡར་གྱི་རྒྱུན་རྣམས་བརྒྱུད་ནས་འགྲོ་རྒྱུ་ཧ་ཅང་གལ་ཆེན་པོ་རེད། དེ་ནི་དཔེར་ན། ཁང་པ་ཞིག་གསར་བཞེངས་བྱེད་པར་ཐོག་མའི་གཞི་རྟེན་ནམ་རྨང་གཞི་འདིངས་བ་ལྟ་བུ་དེ་དག་ཐམས་ཅད་སྔོན་དུ་འགྲོ་བའི་སྒོ་ནས་དེའི་སྟེང་ལ་འཆར་ཟིན་འགོད་པ་ལ་བརྟེན་ནས་ཁང་པ་རྒྱག་དགོས་པ་དང་མཚུངས་པའོ།།