ཏནྟྲའམ་རྒྱུད་ཅེས་པ་དེ་ག་རེ་ཡིན་ནམ། །

ལེགས་སྦྱར་གྱི་སྐད་དུ་ཏནྟྲ་ཞེས་པ་ནི། འཐེན་བརྒྱང་བྱེད་པའི་དོན་ཏེ། དེ་ལའང་གོ་དོན་གཉིས་ཡོད། དང་པོ་ནི། ཐགས་ཁྲིའི་སྟེང་གི་སྐུད་པའི་གཅུ་སྒྲིམ་ལྟ་བུ་དེ་འཐེན་རྒྱོང་བྱེད་པ་ཡིན། ཏནྟྲ་ཉམས་ལེན་ནི་གཅུ་སྒྲིམ་སྟེང་དུ་མདོའི་ཉམས་ལེན་ཡོད་དོ་ཅོག་ལྷན་གཅིག་ཏུ་འཐག་པ་དེ་ཡིན། ཡང་འཐེན་བརྒྱང་བྱེད་པའི་དོན་ནི། ཐོག་མ་དང་མཐའ་མ་མེད་པར་དུས་ཡུན་ཧྲིལ་པོའི་ནང་མི་ཟད་རྟག་པའི་རྒྱུད་ཅིག་ལ་གོ་བ་ཡིན། དེ་ནི་སྤྱིར་བཏང་ང་རང་ཚོའི་སེམས་ཀྱི་རྒྱུད་ལ་གོ་བ་ཡིན། གང་ཟག་རང་རང་སོ་སོའི་སེམས་ཀྱི་རྒྱུད་དེ་ནི་ཡུལ་ཅན་གྱི་སྒོ་ནས་མི་ཚེ་ཉམས་སུ་མྱོང་བཞིན་ཡོད། འདི་ལྟ་བུའི་རྒྱུད་ཀྱི་ཁོངས་སུ། ལུས་ཡོད་པ་དང་། ཕན་ཚུན་འབྲེལ་ལམ་གྱི་ཐབས་ངག་ཡོད་པ་དང་། དེ་བཞིན་དུ་སེམས་དང་། སྦྱོར་བ་དང་། རང་གཞན་གཉིས་ཀར་བསམ་ཤེས་དང་བྱམས་སྐྱོང་ལྡན་པ་ལྟ་བུའི་ཡོན་ཏན་བཟང་པོ་སྣ་ཚོགས་པ་སྟེ། ལྷན་སྐྱེས་ཀྱིས་རང་ཉིད་རང་ལ་གཅེས་སྲུང་དང་རང་ཉིད་དང་རིཌ་འདྲ་བའི་སེམས་ཅན་རྣམས་ལ་གཅེས་སྲུང་བྱེད་པ་དེ་ཡིན། ང་རང་ཚོ་ཚང་མ་ལ་ཡོན་ཏན་གྱི་རྣམ་པ་དེ་དག་ཡོད་ལ། མི་ཚེ་རེ་རེའི་ནང་དུ་ཡར་རྒྱས་ཀྱི་གནས་ཚད་ངེས་ཅན་ཞིག་གི་ནང་སླེབས་ཀྱི་ཡོད། འགྱུར་ལྡོག་ཅན་གྱི་ཆ་རྐྱེན་འདི་དག་གི་སྟེང་དུ་སེམས་ཀྱི་རྒྱུད་སྟོང་པ་ཉིད་ ༼ཐབས་ལམ་མི་སྲིད་པ་གང་གི་ཆ་ནས་མ་གྲུབ་པ་༽ དང་། དངོས་འབྲེལ་བྱེད་ན། འགྱུར་ལྡོག་གི་རང་བཞིན་ཅན་འདི་རིམ་གྱིས་གོང་འཕེལ་དུ་འགྲོ་བ་ལ། ཆ་རྐྱེན་འདི་དག་ལ་བསྐུལ་རྐྱེན་བྱེད་ཆོག་པ་ཡིན་ལ། དེ་ལ་སངས་རྒྱས་ཀྱི་ས་བོན་ནམ་བདེ་བར་གཤེགས་པའི་སྙིང་པོའི་ཆ་རྐྱེན་ཞེས་ཟེར་བ་དང་། མི་ཟད་རྟག་པའི་རྒྱུད་དམ་ཏནྟྲ་ཞེས་པ་ནི། དེ་ཡི་ཆ་ཤས་སུ་གྱུར་བ་ཡིན།

ང་ཚོའི་རྒྱུད་རེ་རེ་ལ་གཞི་དང་ལམ་དང་འབྲས་བུ་བཅས་རིམ་པ་གསུམ་ཡོད་པ་ལས།

རྒྱུད་ཀྱི་གཞིའི་རིམ་པ་ནི། རང་དབང་མེད་་པར་ཡང་ནས་ཡང་དུ་འབྱུང་བཞིན་པའི་འཁོར་བའི་མི་ཚེ་རེ་རེའི་ནང་གི་ཐ་མལ་བའི་ལུས་ཀྱི་ཐོག་མ་མེད་པའི་རྒྱུད་དེ་ཡིན། དེ་ལྟ་བུའི་ཐ་མལ་བའི་ལུས་ནི། རང་སོ་སོ་དང་གཞན་དག དེ་བཞིན་ཆོས་ཐམས་ཅད་ཇི་ལྟར་གྲུབ་ཡོད་པ་དེ་མ་ཤེས་པའམ་མ་རིག་པའི་དབང་དང་། ཉོན་མོངས་པ་དང་། དེའི་ཕྱོགས་སུ་འཁྲིད་པར་བྱེད་པའི་ལས་ཀྱི་སྐུལ་ཤུགས་དབང་གིས་བྱུང་བ་ཞིག་ཡིན། འདི་ལྟ་བུའི་རྨོངས་པ་དང་འདྲེས་ཏེ་རྒྱུད་འདི་སྡུག་བསྔལ་སྣ་ཚོགས་པས་ཁེངས་པ་དང་། ང་ཚོས་རྨོངས་པ་འདི་སེལ་བའི་ཐབས་ཤིག་མ་བྱེད་ན། དེ་རང་ལ་གནས་རྒྱུན་སྲིང་བའི་སྒོ་ནས་མུ་མཐུད་དེ་གཞིའི་རིམ་པ་རང་གི་སྒང་ལ་དུས་རྟག་ཏུ་བསྐྱོད་དགོས་ཐུག་པས། རྒྱུད་ཀྱི་གཞིའི་རིམ་པ་དེ་མ་དག་པ་མཚོན་པ་ཡིན།

རྒྱུད་ཀྱི་འབྲས་བུའི་རིམ་པ་ནི། ཡོངས་སུ་དག་པའི་དེ་བཞིན་གཤེགས་པའི་སྙིང་པོའི་ཆ་རྐྱེན་ཟད་མཐའ་མེད་པའི་རྒྱུད་དེ་ཡིན་ཞིང་། དེ་ནི་ད་ལྟ་ལུས་དང་། ངག་དང་། ཡིད་དང་། སྦྱོར་བ་དང་། ཡོངས་སུ་མྱ་ངན་ལས་འདས་པའི་ཡོན་ཏན་དང་ལྡན་པའི་གཟུགས་སུ་ཡོད་པ་ཡིན།

རྒྱུད་ཀྱི་ལམ་གྱི་རིམ་པ་ནི། ང་ཚོའི་སེམས་རྒྱུད་དེ་གཞིའི་གནས་སྐབས་ནས་འབྲས་བུའི་གནས་སྐབས་ལ་འདྲེན་པར་བྱེད་པའི་བར་ལམ་ལྟ་བུའི་བྱེད་ལས་ཅན་གྱི་རྒྱུད་ཆ་ཙམ་ཞིག་དག་པ་དེ་ཡིན། ང་ཚོས་དེ་བཞིན་གཤེགས་པའི་སྙིང་པོའི་ཆ་དེ་དག་རང་གི་སེམས་ནང་བསམ་མནོ་བཏང་སྟེ་ཉམས་སུ་ལེན་གྱིན་ཡོད། དེ་ནི་ང་རང་ཚོའི་ལུས་ལ་སོགས་པ་ད་ལྟའི་དུས་སུ་ཡི་དམ་གྱི་ལྷའི་གཟུགས་སུ་སངས་རྒྱས་སུ་སྣང་བ་དེ་ཡིན། ང་ཚོས་གང་བསམ་བཞིན་པ་དེ་ནི་འབྱུང་འགྱུར་གནས་སྟངས་ཀྱི་རིམ་པ་ཞིག་ཡིན་པ་ཤེས་པའི་སྐབས་སུ་དེ་ལྟར་ཉམས་སུ་ལེན་པ་ཡིན། འོན་ཀྱང་ང་ཚོས་སངས་རྒྱས་ཀྱི་ས་བོན་ནམ་བདེ་བར་གཤེགས་པའི་སྙིང་པོ་དེ་ཡོངས་སུ་དག་པ་ཞིག་བྱེད་ན། དེ་དངོས་སུ་ཡོང་ཐུབ་ལ་འབྱུང་ངེས་པ་ཞིག་ཡིན། རང་ཉིད་སངས་རྒྱས་ཀྱི་གཟུགས་སུ་བསམ་ནས་བསྒོམ་པའི་རྣམ་པ་འདིའི་རྒྱུ་མཚན་གྱིས། ཏནྟྲའམ་རྒྱུད་གསང་སྔགས་ཀྱི་ཉམས་ལེན་ལ་འབྲས་བུའི་ཐེག་པ་ཞེས་ཟེར་བ་ཡིན། གང་ཡིན་ཞེ་ན། ང་ཚོས་ད་ལྟ་ནས་བཟུང་གང་འཐོབ་པར་འགྱུར་བའི་འབྲས་བུ་སངས་རྒྱས་ཀྱི་གོ་འཕང་དེ་དང་མཚུངས་པའི་ཚུལ་གྱིས་ཉམས་ལེན་བྱེད་ཀྱི་ཡོད་པས་ཡིན།

ང་རང་ཚོས་རྒྱུད་ཀྱི་ལམ་གྱི་རིམ་པའི་ནང་། ཡི་དམ་གྱི་ལྷ་མང་པོ་སོ་སོ་ནང་བཞིན་བསྒོམ་དགོས་པ་དང་། དེ་དག་ལ་ཞལ་དང་། ཕྱག་དང་། ཞབས་ལ་སོགས་པའི་ཡན་ལག་དུ་མ་དང་ལྡན་པ་ཡིན། དེ་དག་ཐམས་ཅད་ནི་རྒྱུད་ཀྱི་སྐུད་པའི་གཅུ་སྒྲིམ་ལྟ་བུ་དེ་ཡིན། གང་ཡིན་ཞེ་ན། དེའི་སྟེང་དུ་གང་མཚོན་གྱི་ཡོད་པ་དེ་ང་ཚོས་འཐག་གི་ཡོད་པའི་ཕྱིར། དེ་དག་གི་སྐུའི་ཁྱད་ཆོས་རེ་རེས་ཀྱང་མདོ་ཕྱོགས་ནས་བཤད་པའི་ལམ་རིམ་གྱི་ཆོས་ཀྱི་རྣམ་པ་མི་འདྲ་བ་རེ་རེ་མཚོན་པ་ཡིན། དཔེར་ན། ཕྱག་དྲུག་ཡོད་པ་ནི། སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་བཅས་ཕ་རོལ་ཏུ་ཕྱིན་པ་དྲུག་པོ་དུས་གཅིག་ཏུ་དེར་ཡོད་པར་མཚོན། ཕ་རོལ་ཏུ་ཕྱིན་པ་དྲུག་པོ་དེ་དག་གསལ་པོར་བྲིས་པའི་གཟུགས་རིས་ཀྱི་ནང་དུ་བསྒོམ་པ་ལ་བརྟེན་ནས་ང་ཚོས་དུས་གཅིག་ཏུ་དེ་དག་ལ་དྲན་པ་བརྟན་པོར་གནས་ཐུབ་ཅིང་། གཟུགས་རིས་མེད་པའི་སྒོ་ནས་སྒོམ་པ་ལས་རྦད་དེ་ལས་སླ་བ་ཡོད།

དེ་ལྟར་ཡན་ལག་སྣ་ཚོགས་ཀྱི་སྐུ་རུ་སོ་སོ་རང་ཉིད་བསྒོམ་པའི་སྐབས་སུ། དགེ་བའི་ནུས་སྟོབས་དང་ཟབ་པའི་རིག་སྟོབས་ཀྱི་སྦྲེལ་མཐུད་དྲ་བ་ལྟ་བུ་བསོད་ནམས་དང་ཡེ་ཤེས་ཀྱི་ཚོགས་གཉིས་པོ་གོང་འཕེལ་གཏང་བའི་ཕྱིར། ང་ཚོ་སྒོམ་གྱི་ཉམས་ལེན་དང་རྒྱུན་ལྡན་མི་ཚེའི་བྱ་གཞག་གཉིས་ཀ་ལ་ཞུགས་པ་ཡིན། གཞན་དག་ལ་བྱམས་སྙིང་རྗེའི་སྒོ་ནས་ཕན་བཏགས་པ་དང་། ཆོས་དང་གང་ཟག་གང་འདྲ་ཞིག་ཡིན་ནའང་། ཐམས་ཅད་སྟོང་པའི་རང་བཞིན་ལ་དམིགས་པ་གཏད་པ་ཡིན། སྦྲེལ་མཐུད་ཀྱི་དྲ་བ་འདི་གཉིས་པོ་ཡང་བདེ་བར་གཤེགས་པའི་སྙིང་པོའི་ཆ་རྐྱེན་ཡིན་པ་དང་། དེ་དག་གི་ནུས་པ་ནི་སངས་རྒྱས་ཀྱི་ས་བོན་གཞན་གཞི་དང་ལམ་དང་འབྲས་བུའི་རིམ་པ་ལ་བརྟེན་ནས་བྱ་བ་བྱེད་པ་ཞིག་ཡིན། དེར་བརྟེན། སྦྲེལ་མཐུད་ཀྱི་དྲ་བ་འདི་དག་ནུས་ཤུགས་ཆེ་རུ་གཏོང་བའི་བརྒྱུད་རིམ་འགོ་འཛུཌ་བྱེད་པ་ལ། ང་ཚོས་ཕྱག་འཚལ་བ་དང་། རྡོ་རྗེ་སེམས་དཔའི་བསྒོམ་བཟླས་ཀྱི་སྒོ་ནས་སྒྲིབ་པ་སྦྱོང་བ་སོགས་སྔོན་འགྲོའི་ཉམས་ལེན་གྱི་རིམ་པ་རྣམས་ཏནྟྲའམ་རྒྱུད་གསང་སྔགས་ཀྱི་ཉམས་ལེན་འགོ་མ་རྩོམ་གོང་ནས་བྱེད་དགོས་པ་ཡིན།

ཡི་དམ་ལྷ་ཡི་གཟུགས་སུ་རང་ཉིད་སངས་རྒྱས་ཡིན་པར་བསྒོམ་འགོ་འཛུགས་པ་ལ། ང་ཚོར་ཏནྟྲའམ་གསང་སྔགས་ཀྱི་བླ་མ་མཚན་ཉིད་ཚང་བ་ཞིག་ལས་དབང་ཐོབ་དགོས་པ་ཡིན། དེ་ཡང་སྔོན་འགྲོའི་དགོས་མཁོར་གྱུར་བའི་མདོ་ཕྱོགས་ཀྱི་སློབ་གཉེར་དང་ཉམས་ལེན། དེ་བཞིན་རང་ཉིད་སྟ་གོན་ལྡེང་ངེས་བྱས་ཡོད་ན། གཞི་ནས་དབང་ཞུ་བ་ཡིན། ཆོ་གའི་རིམ་པའི་སྐབས་གསང་སྔགས་ཀྱི་བླ་མ་དང་ང་ཚོས་ཡི་དམ་གྱི་ལྷ་བསྒོམ་པའི་ནུས་སྟོབས་ཀྱིས། བདེ་བར་གཤེགས་པའི་སྙིང་པོ་ནུས་ལྡན་དུ་གྱུར་བ་དང་། དེ་འཕེལ་རྒྱས་སུ་འགྲོ་བའི་སྒོ་ནས་རང་ཉིད་སངས་རྒྱས་ཀྱི་གཟུགས་སུ་འགྱུར་འགོ་བརྩམས་པ་ཡིན། དེ་ལྟ་བུའི་འགྱུར་བའི་རིམ་པ་དེ་བར་ཆད་མེད་པའི་ཐོག་ཡོང་བའི་ངེས་བརྟན་བཟོ་བ་ལ། ང་ཚོས་སྡོམ་པ་མི་འདྲ་བ་མང་པོ་ལེན་གྱི་ཡོད། སྡོམ་ཁྲིམས་དེ་དག་ནི། ང་ཚོའི་ཉམས་ལེན་ལ་གནོད་སྐྱོན་ཕོག་ཉེན་གྱི་ལུས་ངག་ཡིད་གསུམ་གྱི་སྤྱོད་པ་རྣམས་སྡོམ་ཞིང་སྲུང་བ་ཡིན། དེའི་ནང་ཚུལ་ཁྲིམས་ཀྱི་སྡོམ་པ་དང་། བྱང་ཆུབ་སེམས་དཔའི་སྡོམ་པ་དང་། སྐབས་འགར་གསང་སྔགས་ཀྱི་སྡོམ་པའང་ཡོད། དྲན་པ་མི་གསལ་བའམ་ཤེས་བཞིན་མེད་པའི་སྒོ་ནས་སྡོམ་པ་འདི་དག་ལེན་ན། ང་ཚོ་ལ་དབང་མི་འཐོབ་པ་ཡིན་ལ། སྡོམ་པ་དེ་དག་གང་ལེགས་གང་གཙང་གིས་མ་སྲུང་བ་ཡིན་ན། རང་གི་རྒྱུད་ལ་གསང་སྔགས་ཀྱི་ཉམས་ལེན་དངོས་གཞི་དེ་མེད་པ་ཡིན།

འཁྲིག་སྦྱོར་གྱི་ལས་སམ་ཡ་མཚན་ཅན་གྱི་ཆོ་ག་ཕྱག་ལེན་དང་འབྲེལ་བ་རྩ་ནས་མེད་པའི་ཐོག་གསང་སྔགས་ཀྱིས་ང་ཚོའི་ནུས་པ་ཆ་ཚང་སད་པའི་ཕྱིར། ཆེས་ཚད་མཐོ་ཞིང་སྣ་ཚོགས་པའི་ལམ་ལུགས་ཤིག་དགོས་འདུན་སྟོན་གྱི་ཡོད། གསང་སྔགས་ཀྱི་ཉམས་ལེན་དེ་ལས་སླ་པོ་ཞིག་གི་སྒོ་ནས་སྣང་མེད་དུ་འཛིན་རྒྱུ་མེད། ང་ཚོ་ཧུར་བརྩོན་གྱིས་ཆོ་ག་ཕྱག་ལེན་གྱི་ནང་དུ་ཞུགས་པའི་སྐབས་སུ། ང་ཚོས་མི་ཚེ་གང་པོར་སྡོམ་པ་སྲུང་རྒྱུའི་ཁས་ལེན་དམ་བཅའ་བྱེད་ཀྱི་ཡོད། རྒྱུ་མཚན་དེ་རང་ལ་བརྟེན་ནས། སངས་རྒྱས་པའི་ཆོས་ཀྱི་ལྟ་གྲུབ་དག་ལ་གཞི་རྩ་གརྟན་པོ་ཞིག་ཡོད་པའི་ཐོག་གསང་སྔགས་ཀྱི་ཉམས་ལེན་འགོ་འཛུགས་དགོས་ངེས་ཡིན། ཡིན་ནའང་ཁྱད་པར་དུ་སེམས་ཅན་ཐམས་ཅད་ཀྱི་དོན་དུ་ཀུན་ཁྱབ་ཀྱི་བྱམས་པ་དང་སྙིང་རྗེ། དེ་བཞིན་སྟོང་ཉིད་ལའང་གོ་བ་ཡག་པོ་ཞིག་ནི་དགོས་པ་ཡིན།

ཚད་མཐོ་པོར་སླེབས་པའི་ཉམས་ལེན་པ་དག་ལ་རྒྱུད་དམ་གསང་སྔགས་ནི། སེམས་ཀྱི་འབར་མདེལ་ལྟ་བུ་ཡིན། གལ་ཏེ་ཡང་དག་པར་ཉམས་སུ་ལེན་ན། དེས་བདག་འཛིན་དང་རང་གཅེས་འཛིན་གྱི་སེམས་དེ་འཇོམས་པར་བྱེད་ཅིང་། ཉམས་ལེན་པ་དག་སེམས་ཅན་ཐམས་ཅད་ལ་རྒྱུན་མི་ཆད་པའི་ཕན་པ་རླབས་པོ་ཆེ་མཛད་ཐུབ་པར་འགྱུར་བའི་སངས་རྒྱས་ཀྱི་གོ་འཕང་ལ་མྱུར་བ་ཉིད་དུ་འདྲེན་པར་བྱེད་པ་ཡིན།