༄༅། །ན་མོ་མཉྫུ་ཤྲི་ཡེ། བློ་རིག་རྣམ་གཞག་བཤད་པ་ལ། །ཡུལ་ཅན་བློ་དང་ཡུལ་གཉིས་ལས། ། སྤྱིར་ན་ཡུལ་ཅན་གྱི་མཚན་ཉིད། །རང་ཡུལ་ཅི་རིགས་ལྡན་པ་ཡི། །དངོས་པོ་དེ་ཡིན་དབྱེ་བ་ནི། །གཟུགས་ཤེས་ལྡན་མིན་འདུ་བྱེད་གསུམ། །རྗོད་བྱེད་སྒྲ་ཀུན་དང་པོ་དང་། །ཤེས་པ་ཐམས་ཅད་གཉིས་པ་དང་། །གང་ཟག་མཐའ་དག་གསུམ་པ་ཡིན། །བློ་ལ་མཚན་ཉིད་རྣམ་གྲངས་དང་། །དབྱེ་བ་གསུམ་ལས་དང་པོ་ནི། །རིག་པ་བློ་ཡི་མཚན་ཉིད་ཡིན། །བློ་དང་ཤེས་པ་རིག་པ་དང་། །གསལ་བ་རྣམས་ནི་དོན་གཅིག་ཡིན། །དབྱེ་ན་རྣམ་པ་མང་ཡོད་དེ། །རྟོགས་པའི་བློ་དང་མ་རྟོགས་བློ། །བློ་རིག་བདུན་དུ་དབྱེ་བ་དང་། །ཚད་མ་དང་ནི་ཚད་མིན་དང་། །རྟོག་བཅས་རྟོག་མེད་བློ་གཉིས་དང་། ། མངོན་སུམ་དང་ནི་རྗེས་དཔག་དང་། །སེམས་དང་སེམས་བྱུང་གཉིས་སོགས་མང་། །
རང་ཡུལ་རྟོགས་དང་མ་རྟོགས་ལ། །རྟོགས་དང་མ་རྟོགས་བློ་ཞེས་བྱ། །བློ་རིག་བདུན་ལས་མངོན་རྗེས་དང་། །བཅད་ཤེས་གསུམ་པོ་རྟོགས་པའི་བློ། །གཞན་བཞི་མ་རྟོགས་བློ་ཡིན་ལ། །དེ་ཡང་མཁས་པ་ཁ་ཅིག་གིས། །ཡིད་དཔྱོད་རྟོགས་བློར་གསུངས་པ་ནི། །ཡིད་དཔྱོད་ཙམ་གྱིས་རྟོགས་ལ་དགོངས། །རྟོགས་ལ་དངོས་རྟོགས་ཤུགས་རྟོགས་གཉིས། །རྣམ་པ་ཤར་དང་མ་ཤར་བར། །ཡུལ་དེ་རྟོགས་ལ་རིམ་བཞིན་འདོད། །སྡེ་བདུན་ཡིད་ཀྱི་མུན་སེལ་ལས། །སྤྱིར་བཏང་ཚད་མས་དངོས་ཤུགས་དང་། ། མངོན་སུམ་དང་ནི་རྗེས་དཔག་གིས། །དངོས་རྟོགས་ཤུགས་རྟོགས་གསུངས་པ་དེ། །དང་པོ་གོ་ཐོབ་རིགས་པ་དང་། །གཉིས་པ་མདོ་སྡེ་པ་ཡི་ལུགས། །ཡང་ན་ཕྱི་མ་གཉིས་པོ་ནི། །མངོན་རྗེས་བྱེ་བྲག་པ་ལ་དགོངས། །ཚད་མིན་བློ་ཡི་དངོས་ཤུགས་ཀྱིས། །རྟོགས་ཚུལ་གསུངས་པའང་དེས་རིགས་འགྲེ། །
བློ་རིག་བདུན་དུ་དབྱེ་བ་ནི། །ཡིད་དཔྱོད་སྣང་ལ་མ་ངེས་པ། །བཅད་ཤེས་ལོག་ཤེས་ཐེ་ཚོམ་དང་། ། མངོན་སུམ་རྗེས་དཔག་དང་བཅས་བདུན། །དེ་ཡང་རང་ཡུལ་བདེན་པ་ལ། །གསར་དུ་ཞེན་པའི་ཚད་མིན་བློ། །ཡིད་དཔྱོད་ཀྱི་ནི་མཚན་ཉིད་ཡིན། །དབྱེ་ན་རྒྱུ་མཚན་མེད་པ་དང་། །དེ་བཞིན་རྒྱུ་མཚན་འགལ་བ་དང་། །མ་ངེས་པ་དང་མ་གྲུབ་དང་། །ཡོད་ཀྱང་གཏན་ལ་མ་ཕབ་པའི། །ཡིད་དཔྱོད་དང་བཅས་རྣམ་པ་ལྔ། །མཚན་གཞི་གོ་རིམ་བཞིན་དུ་སྒྲ། །མི་རྟག་ཅེས་པའི་ངག་ཙམ་ལས། །སྒྲ་མི་རྟག་པར་འཛིན་པའི་བློ། །དེ་བཞིན་དུ་ནི་དེ་སྒྲུབ་ཀྱི། །འགལ་དང་མ་ངེས་མ་གྲུབ་པའི། །རྟགས་ལས་དེ་ལྟར་འཛིན་པ་དང་། །བྱས་པའི་རྟགས་ལ་བརྟེན་ནས་སྒྲ། །མི་རྟག་པ་རུ་འཛིན་པ་ཡི། །ཡིད་དཔྱོད་ལྟ་བུ་ཡིན་ཞེས་གསུངས། །བསྡུས་ན་གཉིས་ཏེ་དང་པོ་ནི། །རྒྱུ་མཚན་མེད་པའི་ཡིད་དཔྱོད་དང་། །ཡིད་དཔྱོད་ཕྱི་མ་བཞི་པོ་ནི། །རྒྱུ་མཚན་ཅན་གྱི་ཡིད་དཔྱོད་དོ། །ཐོས་བྱུང་ཙམ་གྱི་གོ་བ་ནི། །ཕལ་ཆེར་ཡིད་དཔྱོད་ཡིན་པས་ན། །དེ་རྒྱུན་བརྟན་པོ་མིན་ཞེས་གསུངས། །
སྣང་ལ་མ་ངེས་པ་ཡི་བློ། །རང་གི་འཇུག་ཡུལ་རང་མཚན་ནི། །གསལ་བར་སྣང་ཡང་མ་ངེས་པའོ། ། དབྱེ་ན་གསུམ་སྟེ་དེར་གྱུར་པའི། །དབང་མངོན་ཡིད་མངོན་རང་རིག་གསུམ། །དེ་ལ་རྣལ་འབྱོར་མངོན་སུམ་ནི། །གང་སྣང་ཐམས་ཅད་ངེས་པས་ན། །སྣང་ལ་མ་ངེས་པ་མེད་དོ། །དེ་འདྲའི་དབང་མངོན་ལ་ཡང་ལྔ། །ཡིད་ནི་གཞན་དུ་ཕྱོགས་དུས་ཀྱི། །སོ་སྐྱེའི་གཟུགས་འཛིན་དབང་མངོན་ནས། ། རེག་འཛིན་དབང་མངོན་བར་ལྔའམ། །སོ་སྐྱེའི་རྒྱུད་ཀྱི་དབང་མངོན་ལྔའི། །སྐད་ཅིག་ཐ་མ་ལྟ་བུའོ། ། སོ་སྐྱེའི་དུས་མཐའི་སྐད་ཅིག་མའི། །ཡིད་མངོན་དང་ནི་རང་རིག་ཀུན། །སྣང་ལ་མ་ངེས་པ་ཡིན་ལ། ། འཕགས་པའི་འདིར་བསྟན་ཡིད་མངོན་ནི། །ཚད་མར་རིགས་པའི་རྒྱན་ལས་གསུངས། །དེ་འདྲའི་རང་རིག་མངོན་སུམ་ནི། །རྒྱང་འཕེན་པ་དང་གཅེར་བུ་པའི། །རྒྱུད་ཀྱི་རྗེས་དཔག་ཚད་མ་དང་། ། ལོག་པའི་ཤེས་པ་ལ་སོགས་པ། །ཉམས་སུ་མྱོང་བའི་རང་རིག་དང་། །རང་སྡེ་བྱེ་བྲག་སྨྲ་བ་ཡི། །རྒྱུད་ཀྱི་རང་རིག་ལྟ་བུ་དང་། །སོ་སྐྱེའི་རྒྱུད་ཀྱི་རང་རིག་གི། སྐད་ཅིག་ཐ་མ་ལྟ་བུ་མང་། །
རྟོགས་ཟིན་རྟོགས་པའི་ཚད་མིན་གྱི། །རིག་པ་བཅད་ཤེས་ཀྱི་མཚན་ཉིད། །དབྱེ་ན་མངོན་སུམ་རྗེས་དཔག་གི། རྒྱུན་དུ་གྱུར་པའི་བཅད་ཤེས་དང་། །དེ་གཉིས་གང་རུང་མ་ཡིན་པའི། །བཅད་ཤེས་དང་བཅས་གསུམ་དུ་ཡོད། །དང་པོ་ལ་ཡང་དབང་ཡིད་དང་། །རང་རིག་རྣལ་འབྱོར་མངོན་སུམ་གྱི། ། བཅད་ཤེས་ལ་སོགས་དུ་མ་ཡོད། །རིམ་བཞིན་དབང་མངོན་ལྔ་པོ་དང་། །གཞན་སེམས་ཤེས་པའི་མངོན་ཤེས་དང་། །རྒྱུན་དང་ལྡན་པའི་རང་རིག་དང་། །སློབ་པའི་རྣལ་འབྱོར་མངོན་སུམ་གྱི། །སྐད་ཅིག་གཉིས་པ་ལྟ་བུ་འོ། །མངོན་སུམ་སྐད་ཅིག་གཉིས་པ་ནི། །དེ་བཞི་གང་རུང་མ་ཡིན་པའི། །བཅད་ཤེས་སུ་ནི་འཇོག་ཀྱང་རུང་། །གཉིས་པ་རྗེས་དཔག་ཚད་མ་ཡི། །སྐད་ཅིག་གཉིས་པ་ལྟ་བུ་ཡིན། ། གསུམ་པ་མངོན་རྗེས་སོ་སོ་ཡིས། །དྲངས་པའི་ངེས་ཤེས་ལྟ་བུ་དང་། །ཚད་མ་སྐད་ཅིག་གཉིས་པ་བཞིན། །བསྡུ་ན་རྟོག་པ་བཅད་ཤེས་དང་། །རྟོག་མེད་བཅད་ཤེས་གཉིས་སུ་འདུས། །
ལོག་ཤེས་མཚན་ཉིད་རང་གི་ཡུལ། །ཕྱིན་ཅི་ལོག་ཏུ་འཛིན་པའི་བློའོ། །དབྱེ་ན་རྟོག་པ་ལོག་ཤེས་དང་། །རྟོག་མེད་ལོག་ཤེས་གཉིས་སུ་ཡོད། །རང་གི་ཞེན་ཡུལ་ལ་འཁྲུལ་བའི། །ཞེན་རིག་དང་པོའི་མཚན་ཉིད་དང་། །རང་གི་འཛིན་སྟངས་ལ་འཁྲུལ་བའི། །གསལ་སྣང་ཅན་གྱི་རིག་པ་དེ། །རྟོག་མེད་ལོག་ཤེས་ཀྱི་མཚན་ཉིད། །དང་པོ་ཆོས་དང་གང་ཟག་གི། བདག་འཛིན་རྣམ་གཉིས་ལྟ་བུ་དང་། ། གངས་རི་སྔོན་པོར་སྣང་བ་ཡི། །དབང་ཤེས་ལྟ་བུ་གཉིས་པ་ཡིན། །ཚད་མ་ཡིད་ཀྱི་མུན་སེལ་ལས། ། ལོག་རྟོག་རྟོག་པ་ལོག་ཤེས་དང་། །སྒྲོ་འདོགས་གསུམ་པོ་དོན་གཅིག་དང་། །དོན་མི་འགྱུར་གྱི་ཐེ་ཚོམ་ཡང་། །རྟོག་པ་ལོག་ཤེས་ཡིན་པར་གསུངས། །རང་གི་ཡུལ་ལ་མཐའ་གཉིས་སུ། །དོགས་པའི་སེམས་བྱུང་ཐེ་ཚོམ་སྟེ། །དོན་འགྱུར་མི་འགྱུར་ཆ་མཉམ་པའི། །ཐེ་ཚོམ་གསུམ་ཡོད་རིམ་པ་བཞིན། །སྒྲ་མི་རྟག་གམ་སྙམ་པ་དང་། །དེ་བཞིན་རྟག་གམ་སྙམ་པ་དང་། །རྟག་གམ་མི་རྟག་སྙམ་པའི་བློའོ། །ཐེ་ཚོམ་ལ་ནི་རྩ་ཉོན་གྱིས། །ཁྱབ་པར་བཞེད་དང་ཉོན་མོངས་ཅན། །ཡིན་མིན་གཉིས་སུ་ཕྱེ་བའང་ཡོད། །
རང་མཚན་དང་ནི་སྤྱི་མཚན་གཉིས། །རིམ་བཞིན་སྣང་ཡུལ་བྱེད་པའི་བློ། །མངོན་སུམ་དང་ནི་རྟོག་པའོ། །དེ་ཡང་རྟོག་བྲལ་མ་འཁྲུལ་བའི། །རིག་པ་མངོན་སུམ་གྱི་མཚན་ཉིད། །དབྱེ་ན་དབང་མངོན་ཡིད་མངོན་དང་། །རང་རིག་རྣལ་འབྱོར་མངོན་སུམ་བཞི། །འཁྲུལ་རྒྱུ་བཞི་སྟེ་རྟེན་དང་ཡུལ། །གནས་དང་དེ་མ་ཐག་རྐྱེན་ལའོ། །བདག་རྐྱེན་དབང་པོ་གཟུགས་ཅན་ལས། །བྱུང་བའི་མངོན་སུམ་དབང་མངོན་ཏེ། །དེ་ལ་གཟུགས་འཛིན་དབང་མངོན་ནས། །རེག་བྱ་འཛིན་པའི་དབང་མངོན་བར། །ལྔ་ཡོད་དེ་རྣམས་རེ་རེ་ལའང་། །ཚད་མ་དང་ནི་བཅད་ཤེས་དང་། །སྣང་ལ་མ་ངེས་པ་གསུམ་ཡོད། ། བདག་རྐྱེན་ཡིད་དབང་ལ་བརྟེན་ནས། །བྱུང་བའི་མངོན་སུམ་ཡིད་མངོན་ཏེ། །གཟུགས་འཛིན་ཡིད་མངོན་སོགས་ལྔ་ཡོད། །རྟོག་པ་དང་བྲལ་མ་འཁྲུལ་བའི། །འཛིན་རྣམ་རང་རིག་མངོན་སུམ་སྟེ། །དེ་གཉིས་ལ་ཡང་གོང་ལྟར་དུ། །ཚད་མ་ལ་སོགས་གསུམ་གསུམ་བཤད། །དེ་ལ་ལ་འབྱོར་མངོན་སུམ་ནི། །བདག་རྐྱེན་ཞི་ལྷག་ཟུང་འབྲེལ་གྱི། །ཏིང་འཛིན་བསྒོམས་སྟོབས་ལས་བྱུང་བའི། །འཕགས་པའི་རྒྱུད་ཀྱི་མངོན་སུམ་ཡིན། །རྟེན་གྱི་སྒོ་ནས་དབྱེ་ན་ནི། །ཉན་རང་ཐེག་ཆེན་འཕགས་པའི་གསུམ། །ངོ་བོའི་སྒོ་ནས་རེ་རེ་ལའང་། །མཐོང་སྒོམ་མི་སློབ་ལམ་དང་གསུམ། །ཡུལ་གྱི་སྒོ་ནས་གཉིས་ཡིན་ཏེ། ། ཇི་ལྟ་ཇི་སྙེད་མཁྱེན་པའོ། །ལྡོག་ཕྱོགས་མངོན་སུམ་ལྟར་སྣང་ནི། །འཁྲུལ་དང་ཀུན་རྫོབ་ཤེས་པ་དང་། །རྗེས་དཔག་རྗེས་སུ་དཔག་ལས་བྱུང་། །དྲན་དང་མངོན་འདོད་ཅེས་བྱའོ། །མངོན་སུམ་ལྟར་སྣང་རབ་རིབ་བཅས། །ཞེས་གསུངས་དང་པོ་དྲུག་པོ་ནི། །རྟོག་པ་མངོན་སུམ་ལྟར་སྣང་དང་། །ཐ་མ་རབ་རིབ་ཅན་གྱི་བློ། །རྟོག་མེད་མངོན་སུམ་ལྟར་སྣང་སྟེ། །གོ་དོན་རིགས་རྒྱན་སོགས་སུ་ལྟོས། ། རྟོག་མེད་མངོན་སུམ་ལྟར་སྣང་དང་། །མེད་པ་གསལ་སྣང་ཅན་གྱི་བློ། །རྟོག་མེད་ལོག་ཤེས་དོན་གཅིག་གོ།
དེ་ཡང་སྒྲ་དོན་འདྲེས་རུང་དུ། །འཛིན་པའི་ཞེན་རིག་རྟོག་པ་སྟེ། །དབྱེ་བ་རྟོག་པ་དོན་མཐུན་དང་། ། རྟོག་པ་དོན་མི་མཐུན་དང་གཉིས། །མིང་སྦྱོར་དོན་སྦྱོར་རྟོག་པ་གཉིས། །བརྡ་རྟེན་ཅན་གྱི་རྟོག་པ་དང་། །དོན་གཞན་ལ་ནི་སྒྲོ་འདོགས་དང་། །ལྐོག་ཏུ་གྱུར་པའི་དོན་ཅན་གྱི། །རྟོག་པ་གསུམ་སོགས་དབྱེ་ཚུལ་མང་། །གཞན་ཡང་ཐོས་བསམ་སྒོམ་གསུམ་གྱི། །རྟོག་པ་གསུམ་ཡོད་དོན་རིམ་བཞིན། ། སྒྲ་སྤྱི་ཙམ་གྱིས་འཛིན་པ་དང་། །དོན་ལ་བསམས་ནས་ངེས་རྙེད་དང་། །བསམ་བྱུང་དོན་ལ་ཡང་ཡང་དུ། །འདྲིས་པའི་གོང་སའི་ཞེན་རིག་གོ།
ཚད་མའི་གྲངས་ལ་མང་ཉུང་གི། ལོག་རྟོག་བྱུང་ཚུལ་འདི་ལྟ་སྟེ། །རྒྱང་འཕེན་པ་དང་གཅེར་བུ་པས། ། མངོན་སུམ་ཚད་མ་གཅིག་ཙམ་འདོད། །གྲངས་ཅན་པ་ནི་མངོན་རྗེས་དང་། །སྒྲ་བྱུང་ཚད་མ་གསུམ་ཡིན་ཟེར། །རིགས་པ་ཅན་པས་དེ་གསུམ་སྟེང་། །དཔེ་ཉེར་འཇལ་དང་བཞི་རུ་འདོད། །རྒྱལ་དཔོག་པ་ནི་དེ་བཞི་དང་། །དོན་གྱིས་གོ་བའི་ཚད་མ་དང་། །དངོས་པོ་མེད་པའི་ཚད་མ་དང་། །དྲུག་པོ་ཁོ་ནར་གྲངས་ངེས་ཟེར། །ཙ་རི་ཀ་པས་དེ་དྲུག་སྟེང་། །རིགས་པ་དང་ནི་མི་དམིགས་དང་། །ཞེས་གྲགས་པ་དང་སྲིད་པ་དང་། །སྙམ་སེམས་པ་ཡི་ཚད་མ་བཅས། །བཅུ་གཅིག་ཏུ་ནི་གྲངས་ངེས་ཟེར། ། རང་ལུགས་མངོན་རྗེས་གཉིས་སུ་ངེས། །དེ་ལ་གསར་དུ་མི་སླུ་བའི། །རིག་པ་ཚད་མའི་མཚན་ཉིད་ཡིན། །དབྱེ་ན་མངོན་རྗེས་ཚད་མ་གཉིས། །གཞན་ཡང་རང་ལས་ངེས་པ་དང་། །གཞན་ལས་ངེས་ཀྱི་ཚད་མ་གཉིས། །སྒྲས་བརྗོད་སྒོ་ནས་སྐྱེས་བུ་དང་། །ངག་དང་ཤེས་པ་ཚད་མ་གསུམ། །
རྟེན་རྟགས་ཡང་དག་ལ་བརྟེན་ནས། །ལྐོག་གྱུར་དོན་འཇལ་རྗེས་དཔག་སྟེ། །དབྱེ་ན་དངོས་སྟོབས་གྲགས་པའི་དང་། །ཡིད་ཆེས་རྗེས་དཔག་གསུམ་དུ་བཤད། །རྗེས་དཔག་རྗེས་དཔག་ཚད་མ་གཉིས། །དོན་གཅིག་ཏུ་ནི་ཤེས་པར་བྱ། །རང་གི་གཞལ་བྱའི་ཡུལ་སྟེང་དོན། །གྲུབ་པ་མེད་ན་མི་འབྱུང་བའི། །ངེས་པ་རང་དང་གཞན་སྟོབས་ཀྱིས། །འདྲེན་པའི་ཚད་མ་རང་ལས་དང་། །གཞན་ལས་ངེས་ཀྱི་ཚད་མ་ཡིན། །རང་རིག་རྣལ་འབྱོར་མངོན་སུམ་གྱི། །ཚད་མ་གཉིས་དང་རྗེས་དཔག་དང་། ། དོན་བྱེད་སྣང་ཅན་གོམས་པ་ཅན། །གང་རུང་གྱུར་པའི་ཚད་མ་ལྔ། །རང་ལས་ངེས་ཀྱི་ཚད་མ་ཡིན། ། གཞན་ལས་ངེས་ཀྱི་ཚད་མ་ལ། །སྒྲས་བརྗོད་སྒོ་ནས་དབྱེ་བ་ནི། །དང་པོ་བ་དང་ཡིད་མ་གཏད། ། མངོན་སུམ་འཁྲུལ་རྒྱུ་ཅན་དང་གསུམ། །སྣང་བ་རང་དང་བདེན་པ་གཞན། །སྤྱི་ནི་རང་དང་ཁྱད་པར་གཞན། །སྣང་བ་ཉིད་ཀྱང་གཞན་ངེས་ཀྱི། །ཚད་མ་གསུམ་སོགས་བཤད་མོད་ཀྱི། །དངོས་བཏགས་ཁྱད་པར་ཕྱེ་བ་གཅེས། །གཞན་ལས་ངེས་ཀྱི་ཚད་མ་ལ། །ཚད་མས་ཁྱབ་ཀྱང་ཆོས་དེ་ལ། །གཞན་ལས་ངེས་ཀྱི་ཚད་མ་ལ། །དེ་ལ་ཚད་མ་མ་ཡིན་པས། །ཁྱབ་པ་ལ་སོགས་ཞིབ་ཆ་དགོས། །
ཡུལ་ལ་སྣང་གཟུང་ཞེན་འཇུག་བཞི། །སྣང་ཡུལ་གཟུང་ཡུལ་དོན་གཅིག་ཅིང་། །ཕྱི་རོལ་ཡུལ་ལ་མི་ལྟོས་པའི། །སྐྲ་ཤད་འཛག་སྣང་སོགས་མ་གཏོགས། །ཤེས་པ་ཀུན་ལ་སྣང་ཡུལ་ཡོད། །ཞེན་ཡུལ་རྟོག་པའི་སྒོས་ཆོས་ཏེ། །རྟོག་པ་དོན་མཐུན་ཀུན་ལ་ཡོད། །འཇུག་ཡུལ་ཚད་མས་བཅད་དོན་ཏེ། ། ཚད་མ་དང་ནི་དེ་ལྡན་གྱི། །སྐྱེས་བུ་ཀུན་ལ་ཡོད་པ་ཡིན། །རྟོག་པའི་ཞེན་ཡུལ་རྟོག་པ་ལ། །སྣང་ཡང་དེ་ཡི་སྣང་ཡུལ་མིན། །དེ་བཞིན་དེ་ཡི་སྣང་ཡུལ་ནི། །ཞེན་ས་ཡིན་ཡང་ཞེན་ཡུལ་མིན། །
དབང་མངོན་རྣམས་ལ་དམིགས་རྐྱེན་དང་། །བདག་རྐྱེན་དེ་མ་ཐག་རྐྱེན་གསུམ། །གཟུགས་འཛིན་དབང་པོའི་མངོན་སུམ་ལ། །རང་གི་རྣམ་པ་གཏོད་བྱེད་ཀྱི། །རྐྱེན་དེ་དེ་ཡི་དམིགས་རྐྱེན་ཡིན། ། མཚན་གཞི་དཔེར་ན་གཟུགས་ལྟ་བུ། །དེ་འདྲའི་དབང་མངོན་རང་དབང་དུ། །སྐྱེད་བྱེད་རྐྱེན་དེ་བདག་རྐྱེན་ཏེ། །ཐུན་མོང་ཐུན་མོང་མ་ཡིན་པའི། །བདག་རྐྱེན་གཉིས་ཡོད་དང་པོ་ནི། །དེ་ཡི་བདག་རྐྱེན་ཡིད་དང་ནི། །གཉིས་པ་མིག་དབང་ལྟ་བུ་འོ། །དེ་འདྲའི་དབང་མངོན་གསལ་རིག་ཏུ། །སྐྱེད་པའི་རྐྱེན་ནི་གསུམ་པ་སྟེ། །དེ་ཡི་སྔ་ལོགས་དེ་མ་ཐག། །བྱུང་བའི་ཡིད་ཤེས་ལྟ་བུའོ། །དེ་ཡིས་སྒྲ་འཛིན་སོགས་ལའང་འདྲ། །སེམས་ཙམ་ལུགས་ལ་བདག་རྐྱེན་དང་། །དེ་མ་ཐག་རྐྱེན་ཕལ་ཆེར་འདྲ། ། དམིགས་རྐྱེན་ལ་ནི་དངོས་བཏགས་ཀྱི། །འཇོག་ཚུལ་མི་འདྲའི་ཁྱད་པར་ཡོད། །
འདིར་བསྟན་ཡིད་མངོན་སྐྱེ་ཚུལ་ལ། །དབང་མངོན་སྐད་ཅིག་གཉིས་པ་ཕན། །ཡིད་མངོན་དང་ནི་དབང་ཡིད་གཉིས། །སྤེལ་མར་སྐྱེ་དང་འགྲོས་གསུམ་དང་། །རྒྱན་གྱི་ཡིད་མངོན་འདོད་ཚུལ་རྣམས། ། མི་འདོད་རང་ལུགས་དབང་མངོན་གྱི། །རྒྱུན་མཐའ་ཁོ་ནར་སྐྱེ་བར་བཞེད། །
རྟོག་བཅས་རྟོག་མེད་ཁྱད་པར་ཡང་། །ཕལ་ཆེར་གོང་སྨོས་ཤེས་པར་ནུས། །དབང་ཤེས་དང་ནི་མངོན་སུམ་གཉིས། །རྟོག་མེད་ཤེས་པ་ཁོ་ན་ཡིན། །ཡིད་ཤེས་ལ་ནི་རྟོག་བཅས་དང་། །རྟོག་མེད་ཤེས་པ་གཉིས་སུ་ཡོད། །སེམས་དང་སེམས་ལས་བྱུང་བ་ནི། །སེམས་དང་ཡིད་དང་རྣམ་ཤེས་རྣམས། །དོན་གཅིག་མིང་གི་རྣམ་གྲངས་ཡིན། །དབྱེ་ན་མིག་གི་རྣམ་ཤེས་ནས། །ཡིད་ཀྱི་རྣམ་ཤེས་བར་དྲུག་ཡོད། །སེམས་བྱུང་ལྔ་བཅུ་རྩ་གཅིག་སྟེ། །ཀུན་འགྲོ་ལྔ་དང་ཡུལ་ངེས་ལྔ། །དགེ་བ་བཅུ་གཅིག་རྩ་ཉོན་དྲུག། ཉེ་ཉོན་ཉི་ཤུ་གཞན་འགྱུར་བཞིའོ། །ཚོར་བ་འདུ་ཤེས་སེམས་པ་དང་། །ཡིད་ལ་བྱེད་དང་རེག་པ་ལྔ། །གཙོ་སེམས་ཀུན་གྱི་འཁོར་དུ་ནི། །འགྲོ་ཕྱིར་ཀུན་འགྲོ་ཞེས་བྱའོ། །འདུན་པ་མོས་པ་དྲན་པ་དང་། །ཏིང་འཛིན་ཤེས་རབ་ལྔ་པོ་ཡུལ། །བྱེ་བྲག་པ་ལ་འཇུག་ངེས་ཕྱིར། །ཡུལ་ངེས་ཞེས་པར་བཤད་པ་ཡིན། །
དད་དང་ངོ་ཚ་ཤེས་ཁྲེལ་ཡོད། །འདོད་ཆགས་དང་ནི་ཞེ་སྡང་དང་། །གཏི་མུག་མེད་པའི་དགེ་རྩ་གསུམ། །བརྩོན་འགྲུས་ཤིན་སྦྱངས་བག་ཡོད་དང་། །བཏང་སྙོམས་རྣམ་པར་མི་འཚེ་རྣམས། ། གཉེན་པོ་ངོ་བོ་མཚུངས་ལྡན་སོགས། །ཅི་རིགས་སྒོ་ནས་དགེ་བའོ། །འདོད་ཆགས་ཁོང་ཁྲོ་ང་རྒྱལ་དང་། །མ་རིག་ཐེ་ཚོམ་ལྟ་བ་དྲུག། རྩ་ཉོན་ཡིན་ཏེ་སེམས་རྒྱུད་ནི། །ཉོན་མོངས་བྱེད་པའི་གཙོ་བོ་འོ། ། ཁྲོ་དང་ཁོན་འཛིན་འཆབ་དང་འཚིག། ཕྲག་དོག་སེར་སྣ་སྒྱུ་དང་གཡོ། །རྒྱགས་དང་རྣམ་འཚེ་ངོ་ཚ་མེད། །ཁྲེལ་མེད་རྨུགས་རྒོད་མ་དད་དང་། །ལེ་ལོ་བག་མེད་བརྗེད་ངས་དང་། །ཤེས་བཞིན་མ་ཡིན་རྣམ་གཡེང་བཅས། །ཉི་ཤུ་རྩ་ཉོན་འཕེལ་སྐྱེ་དང་། །ཉེ་ཕྱིར་ཉེ་བའི་ཉོན་མོངས་སོ། །གཉིད་འགྱོད་རྟོག་དཔྱོད་གཞན་འགྱུར་ཏེ། །ཀུན་སློང་མཚུངས་ལྡན་ཅི་རིགས་ཀྱིས། །དགེ་དང་མི་དགེ་ལུང་མ་བསྟན། །གཞན་དང་གཞན་དུ་འགྱུར་བའོ། །
མདོ་སྡེ་སྤྱོད་པའི་དབུ་མ་པ། །ཐལ་གྱུར་བ་དང་བྱེ་སྨྲ་གསུམ། །མངོན་སུམ་ལ་ནི་དབང་ཡིད་དང་། ། རྣལ་འབྱོར་མངོན་སུམ་གསུམ་འདོད་དེ། །རང་རིག་མངོན་སུམ་ཁས་མི་ལེན། །མདོ་སྡེ་པ་དང་སེམས་ཙམ་པ། །རྣལ་འབྱོར་སྤྱོད་པའི་དབུ་མ་བས། །དབང་མངོན་ཡིད་མངོན་རང་རིག་དང་། །རྣལ་འབྱོར་མངོན་སུམ་བཞིར་བཞེད་དོ། །འདིར་ནི་མང་དུ་དོགས་པའི་ཕྱིར། །ཕལ་ཆེར་རྐང་གྲངས་ཙམ་ཞིག་བསྟན། །སོ་སོའི་མཚན་གཞི་གོ་དོན་སོགས། །སྤྱི་དོན་རིགས་རྒྱན་སོགས་ལ་ལྟོས། །
སྨྲས་པ། བློ་གྲོས་ཞིབ་མོས་བླང་དོར་གྱི། །བློ་ཡི་སྤུ་རིས་འབྱེད་པའི་ཕྱིར། །བློ་རིག་སྡོམ་ཚིག་མདོར་བསྡུས་འདི། །བློ་བཟང་མིང་ཅན་ཞིག་གིས་བཀོད། །འདིར་འབད་དགེ་བས་འགྲོ་བ་ཀུན། །ལེགས་ཉེས་ལྟ་བའི་མིག་ཕྱེ་ནས། །མ་ནོར་ལམ་བཟང་མཐར་ཕྱིན་ཏེ། །ཀུན་མཁྱེན་གོ་འཕང་མྱུར་ཐོབ་ཤོག །ཚུལ་འདི་ལྷག་བསམ་དགེ་བ་ཅན། །དགེ་སློང་ངག་དབང་བཟོད་པ་ཡིས། །མཐུན་རྐྱེན་སྦྱར་ཏེ་པར་དུ་བསྒྲུབས། །འདིས་མཚོན་དུས་གསུམ་དགེ་བའི་མཐུས། །ཚེ་འདིའི་ཕ་མས་ཐོག་དྲངས་པའི། །མཁའ་མཉམ་འགྲོ་བ་མ་ལུས་པ། །དལ་འབྱོར་རྟེན་བཟང་རིམ་བརྒྱུད་ནས། །སྐུ་གསུམ་གོ་འཕང་མྱུར་ཐོབ་ཤོག།