བཟང་སྤྱོད་ཀྱི་ཚུལ་ཁྲིམས་སྐྱེད་པ།

འཕགས་པའི་བདེན་པ་དང་པོ། ང་ཚོ་ཚང་མས་སྡུག་བསྔལ་མྱོང་གི་ཡོད།

མི་ཚེའི་ནང་གི་བདེན་པ་དང་པོ་ནི། ང་ཚོ་ཚང་མས་སྡུག་བསྔལ་གྱི་བདེན་པ་དེ་མྱོང་གི་ཡོད། ཐོག་མར་སྡུག་བསྔལ་གྱི་སྡུག་བསྔལ་རེད། དེ་ནས་བདེ་བ་ཉི་ཚེ་བ་དང་འབྲེལ་བའི་དཀའ་ངལ་རྣམས་ཡོད་དེ། དོན་ངོ་མར་བདེ་བ་ཉི་ཚེ་བ་ནི་ནམ་ཡང་ཡུན་དུ་མི་གནས་ཤིང་འདོད་བློ་ཚིམ་གྱི་མེད། ང་ཚོས་སྐད་ཅིག་རྗེས་མའི་ནང་གང་ཡོང་རྩ་ནས་ཤེས་ཀྱི་མེད། ང་ཚོས་བདེ་སྐྱིད་དངོས་སུ་ཐོབ་པའི་སྐབས། དེ་ནམ་རྒྱུན་སྡུག་བསྔལ་ལ་འགྱུར་འགྲོ་གི་ཡོད། དཔེར་ན། མཁྱགས་པ་བྱི་རིལ་བཟའ་རྒྱུ་མང་དྲགས་ན། དེའི་འབྲས་བུར་གྲོད་པ་ནད་པ་ཆགས་ཀྱི་ཡོད་པ་ལྟ་བུ་རེད། དེ་ནས་མཐར་ཁྱབ་པ་འདུ་བྱེད་ཀྱི་སྡུག་བསྔལ་ཟེར་བ་དེ་རེད། དེ་ནི་སྡུག་བསྔལ་དང་པོ་གཉིས་ཀྱི་གཞི་རྩ་ལྟ་བུ་དེ་རེད། ཁྱབ་པ་འདུ་བྱེད་ཀྱི་སྡུག་བསྔལ་ནི་དབང་མེད་ཀྱིས་ཡང་ནས་ཡང་དུ་འབྱུང་བའི་འཁོར་བ་འདི་རེད། འདི་ནི་ངང་ངམ་ཤུགས་ཀྱི་ལས་ལ་བརྟེན་ནས་བྱུང་ཞིང་། དེ་ཡང་ཉོན་མོངས་པས་བསྐུལ་བ་ཞིག་ཡིན། ཉོན་མོངས་དེ་དག་ཀྱང་སྤྱོད་ལམ་གྱི་རྒྱུ་འབྲས་དང་དངོས་པོ་རྣམས་ཇི་ལྟར་གནས་པའི་ཚུལ་མི་ཤེས་པའམ་མ་རིག་པ་ལ་བརྟེན་ནས་འབྱུང་གི་ཡོད། མ་རིག་པ་དེས་ང་ཚོ་འཁོར་བའི་ནང་མུ་མཐུད་དེ་སྐྱེ་བ་ལེན་དུ་འཇུག་པ་དང་། དེ་ནི་སྡུག་བསྔལ་གྱི་རིགས་དང་པོ་གཉིས་ཉམས་སུ་མྱོང་བའི་གཞི་རྩ་དེ་ཡིན། དེར་བརྟེན་མ་རིག་པས་ཉོན་མོངས་ཀྱི་རྒྱུ་བྱེད་པ་དང་ངང་ངམ་ཤུགས་ཀྱིས་བྱ་སྤྱོད་སྤེལ་དུ་འཇུག་གི་ཡོད། དེ་ལ་བརྟེན་ནས་ལས་ཀྱི་ནུས་པ་བསྐྲུན་པ་དང་དེས་དབང་མེད་ཀྱིས་ཡང་ནས་ཡང་དུ་འབྱུང་བའི་སྐྱེ་བ་ལེན་དུ་འཇུག་གི་ཡོད། དབང་མེད་ཀྱི་སྐྱེ་བ་འདི་ནི་སྡུག་བསྔལ་གྱི་རིགས་དང་པོ་གཉིས་ཏེ། སྡུག་བསྔལ་གྱི་སྡུག་བསྔལ་དང་བདེ་བ་ཉི་ཚེ་བ་ཡུན་དུ་མི་གནས་པའམ་ནམ་ཡང་འདོད་བློ་ཁེངས་རྒྱུ་མེད་པའི་བདེ་སྡུག་གི་འཕེལ་འགྲིབ་ཉམས་སུ་མྱོང་བའི་གཞི་རྩ་དེ་ཡིན། 

འཕགས་པའི་བདེན་པ་གཉིས་པ། སྡུག་བསྔལ་གྱི་རྒྱུ།

འཕགས་པའི་བདེན་པ་གཉིས་པ་ནི་སྡུག་བསྔལ་གྱི་རྒྱུ་དངོས་ཀུན་འབྱུང་བདེན་པ་རེད། སྡུག་བསྔལ་གྱི་རྒྱུ་དངོས་ནི་མ་རིག་པ་ (ལས་འབྲས་དང་དངོས་པོའི་གནས་ལུགས་ལ་རྨོངས་པའི་མ་རིག་པ་) རེད། ཉོན་མོངས་ (འདོད་རྔམ་དང་། ཆགས་སེམས། ཁོང་ཁྲོ། གཏི་མུག་) རྣམས་ནི་མ་རིག་པ་ལས་བྱུང་ཞིང་། ངང་ངམ་ཤུགས་ཀྱི་ལས་ནི་མ་རིག་པ་དེས་ཀུན་ནས་བསླངས་པ་ཞིག་ཡིན། 

འཕགས་པའི་བདེན་པ་གསུམ་པ། སྡུག་བསྔལ་འགོག་ཐུབ་པ་ཞིག་ཡིན།

འཕགས་པའི་བདེན་པ་གསུམ་པ་ནི། མ་རིག་པ་དེ་འགོག་པའི་བདེན་པ་དངོས་ཤིག་འཐོབ་རྒྱུ་ཡོད་པ་དེ་རེད། དེར་བརྟེན་སྡུག་བསྔལ་གསུམ་པོ་གཅིག་རྐྱང་སླར་ཡང་མི་འབྱུང་བ་ཡིན། 

འཕགས་པའི་བདེན་པ་བཞི་པ། སྡུག་བསྔལ་འགོག་པར་བྱེད་པའི་ལམ་གྱི་བདེན་པ།

འཕགས་པའི་བདེན་པ་བཞི་པ་ནི། སེམས་ཀྱི་ལམ་དངོས་སམ་རྟོགས་པའི་ལམ་གྱི་བདེན་པ་སྟེ། དེས་སྡུག་བསྔལ་འགོག་པར་བྱེད་པ་དེ་ཡིན། ལམ་གྱི་བདེན་པ་ནི་རྒྱུ་འབྲས་དང་དངོས་པོའི་གནས་ལུགས་ཇི་བཞིན་དུ་རྟོགས་པའི་ཡང་དག་པའི་རྟོགས་པ་དེ་རེད། གལ་ཏེ་ང་ཚོས་ཡང་དག་པའི་རྟོགས་པ་འདི་དང་ལྷན་དུ་དབང་མེད་ཀྱིས་ཡང་ནས་ཡང་དུ་འབྱུང་བའི་སྐྱེ་བ་ལས་ཐར་བའི་ཆོད་སེམས་བརྟན་པོ་ཞིག་རང་རྒྱུད་ལ་བསྐྱེད་ན། ང་ཚོ་འཕགས་པའི་བདེན་པ་དང་པོ་གཉིས་ (སྡུག་བསྔལ་བདེན་པ་དང་ཀུན་འབྱུང་བདེན་པ་) ལས་ཐར་བ་ཡིན། དེ་ལ་བརྟེན་ནས་ང་ཚོས་ཐར་པའི་གོ་འཕང་འཐོབ་ཀྱི་ཡོད། འོན་ཀྱང་གཞན་དོན་ཡག་ཤོས་བསྒྲུབ་པར། ང་ཚོ་ད་དུང་གཏིང་ཟབ་ཏུ་འབད་འབུངས་དང་བཅས་ཆོས་ཐམས་ཅད་ཕན་ཚུན་རྟེན་ཅིང་འབྲེལ་བར་འབྱུང་བ་ཡིན་པར་རྟོགས་པ་ལ་འགོག་རྐྱེན་བྱེད་པའི་སྒྲིབ་པ་རྣམས་ལས་ཐར་དགོས། 

གལ་ཏེ་ང་ཚོས་ཆོས་ཐམས་ཅད་ཇི་ལྟར་ཕན་ཚུན་རྟེན་འབྲེལ་ཡིན་པ་དེ་རྟོགས་ན། ང་ཚོས་སྤྱོད་ལམ་གྱི་རྒྱུ་དང་འབྲས་བུའི་རྣམ་གཞག་དེ་ཡོངས་སུ་རྫོགས་པ་རྟོགས་ཀྱི་ཡོད། དེའི་དོན་ནི་ང་ཚོས་གཞན་དོན་ཡག་ཤོས་ཇི་ལྟར་བསྒྲུབ་པའི་ཚུལ་དེ་ཤེས་པ་དང་། གཞན་དག་ལ་གང་བསླབ་པ་དེའི་འབྲས་བུ་གང་ཡོང་ཤེས་ཀྱི་རེད། བྱམས་པ་ (གཞན་སྡུག་བསྔལ་དང་དེའི་རྒྱུ་ལས་ཐར་འདོད་ཀྱི་བསམ་པ་) ལ་གཞི་རྩ་བྱས་ནས་ང་ཚོས་ཆོད་སེམས་ཁྱད་པར་དུ་འཕགས་པའི་ལྷག་བསམ་དེ་སྐྱེད་ཀྱི་ཡོད། དེ་ལ་བརྟེན་ནས་ང་ཚོས་གཞན་སེམས་ཅན་ཐམས་ཅད་ཐར་པ་དང་ཐམས་ཅད་མཁྱེན་པའི་གོ་འཕང་ལ་འགོད་པའི་འགན་འཁྲི་དེ་དང་ལེན་བྱེད་ཀྱི་ཡོད། འོན་ཀྱང་ད་ལྟ་ང་ཚོའི་གནས་སྟངས་ལ་དེ་ལྟར་བྱེད་མི་ཐུབ་པ་དེ་རྟོགས་པའི་སྒོ་ནས་ང་ཚོས་ཐོག་མར་བྱང་ཆུབ་ཀྱི་སེམས་དེ་སྐྱེད་དགོས། བྱང་ཆུབ་ཀྱི་སེམས་ལ་བརྟེན་ནས་གཞན་ཐམས་ཅད་སངས་རྒྱས་ཀྱི་གོ་འཕང་མཉམ་པར་འགོད་པའི་དམིགས་ཡུལ་དེ་དངོས་སུ་བསྒྲུབ་ཐུབ་པའི་ཆེད་དུ་རང་ཉིད་སངས་རྒྱས་ཀྱི་གོ་འཕང་འཐོབ་པར་དམིགས་ཀྱི་ཡོད། གལ་ཏེ་ང་ཚོས་དངོས་པོའི་གནས་ལུགས་ཀྱི་གོ་རྟོགས་དང་བྱང་ཆུབ་སེམས་ཀྱི་ཀུན་སློང་གཉིས་མཉམ་སྡེབ་བྱས་ན། ཐམས་ཅད་མཁྱེན་པའི་གོ་འཕང་འཐོབ་པའམ་སངས་རྒྱས་ཆགས་ཀྱི་ཡོད། 

བྱས་ཙང་། བརྗོད་པ་འགའ་ཞིག་གི་ནང་ཡོད་པ་དེ་ནི་ནང་པའི་ལམ་རེད། ཚུལ་ཁྲིམས་ལ་བརྟེན་ནས་ང་ཚོས་མི་དགེ་བའི་བྱ་སྤྱོད་སྤེལ་བ་སྤོང་གི་ཡོད། དེ་ལ་བརྟེན་ནས་ང་ཚོས་ངན་སོང་གི་སྐྱེ་གནས་སུ་མི་སྐྱེ་ཞིང་། དེའི་ཚབ་ལ་བདེ་འགྲོའི་སྐྱེ་གནས་སུ་སྐྱེ་གི་ཡོད། ཆོས་ཕྱོགས་ཀྱི་སྲོལ་རྒྱུན་གཞན་མང་པོའི་ནང་། གང་ལྟར་ཡང་བདེ་འགྲོ་ལྷ་ཡུལ་ལྟ་བུར་སྐྱེ་བའི་ཕྱིར་ཚུལ་ཁྲིམས་དེ་བསླབ་ཀྱི་ཡོད། སྐྱེ་བ་མཐོ་བའམ་བདེ་འགྲོའི་སྐྱེ་བར་ལེན་པའི་དམིགས་ཡུལ་ནི་ནང་པ་ཁོ་ནར་ཡོད་པ་ཞིག་མིན། ནང་ཆོས་ནང་བཟང་སྤྱོད་ཉམས་ལེན་ (སྐྱེ་བ་བཟང་བ་ཞིག་ལེན་ཕྱིར་མི་དགེ་བ་དང་གནོད་བྱེད་ཀྱི་ལས་སྤོང་བ་) གྱི་རིམ་པ་ནི། ཐར་པ་དང་ཐམས་ཅད་མཁྱེན་པའི་གོ་འཕང་འཐོབ་པའི་ལམ་གྱི་ཐེམ་སྐས་ལྟ་བུ་རེད། ང་ཚོར་སངས་རྒྱས་ཀྱི་གོ་འཕང་འཐོབ་པར་དགོས་གལ་གྱི་བྱ་བ་བྱེད་པའི་ཆེད་བདེ་འགྲོའི་སྐྱེ་བ་མང་པོ་དགོས་པས། བཟང་སྤྱོད་དང་ཚུལ་མཐུན་གྱི་སྤྱོད་ལམ་ཉམས་སུ་ལེན་པར་མཐུན་ཕྱོགས་ཀྱི་དགོས་དོན་ཧ་ཅང་ཆེན་པོ་ཞིག་ཡོད། ཉམས་ལེན་གྱི་རིམ་པ་འདི་ནང་པ་ཡིན་པ་ཇི་ལྟར་ཆགས་ཀྱི་ཡོད་ཅེས་ན། དེ་ནི་མཐར་ཐུག་ཐར་པ་དང་ཐམས་ཅད་མཁྱེན་པའི་གོ་འཕང་འཐོབ་པའི་ཆེད་ང་ཚོས་བྱང་ཆུབ་སེམས་ཀྱི་ཀུན་སློང་ལ་བརྟེན་ནས་བཟང་སྤྱོད་ཀྱི་ཚུལ་ཁྲིམས་ཉམས་ལེན་བྱེད་ཀྱི་ཡོད། 

ནང་ཆོས་ཀྱི་ནང་། ང་ཚོས་ལྷག་པའི་བསླབ་པ་གསུམ་གྱི་སྐོར་ཤོད་ཀྱི་ཡོད་པ་དང་། དེ་དག་ཀྱང་སོ་སོ་ཐར་པ་འཐོབ་པའི་ཀུན་སློང་དང་བཅས་ཏེ་ཉམས་ལེན་བྱེད་ཆོག་ལ། ཐམས་ཅད་མཁྱེན་པའི་གོ་འཕང་འཐོབ་པའི་ཀུན་སློང་དང་བཅས་ཏེ་ཉམས་ལེན་ཀྱང་བྱེད་ཆོག །ལྷག་པའི་བསླབ་པ་གསུམ་ལས་མཐོ་ཤོས་དེ་ནི་ཤེས་རབ་ཀྱི་བསླབ་པ་དེ་རེད། དེ་ནི་དངོས་པོའི་གནས་ལུགས་གང་ཡིན་པ་དང་རྟོག་པའི་འཆར་སྒོའམ་འཁྲུལ་སྣང་གང་ཡིན་རྣམ་པར་འབྱེད་པའི་ནུས་པ་དེ་རེད། དེར་བརྟེན་ཤེས་རབ་ནི་མ་རིག་རྨོངས་པ་གཅོད་པའི་སྟ་རེ་རྣོན་པོ་ལྟ་བུ་དེ་རེད།

ལྷག་པའི་བསླབ་པ་ཤེས་རབ་འདི་ལག་བསྟར་བྱེད་ཐུབ་པའི་གཞི་རྩ་དེ་ལ་ཏིང་ངེ་འཛིན་གྱི་བསླབ་པ་ཞེས་བྱ་བ་ཡིན། ཏིང་ངེ་འཛིན་ཞེས་པའི་དོན་ནི་ཡུལ་གཅིག་ལ་དམིགས་པ་གཏད་ཐུབ་པ་དེ་རེད། ཡུལ་དེ་ཡང་བྱེ་བྲག་ཏུ་དངོས་པོ་རྣམས་ཀྱི་གནས་ལུགས་དེ་རེད། དེའི་སྐབས་སུ་ང་ཚོའི་དོ་སྣང་དང་རིག་པ་རྩེ་སྒྲིམ་བྱེད་ས་དེ་ཡུལ་གཞན་ཞིག་ལ་རྣམ་པར་མི་གཡེངས་པའམ་བྱིང་བའི་དབང་དུ་མི་ཤོར་བར། གང་འདོད་ལྟར་ཡུན་རིང་པོར་དམིགས་པ་རྩེ་གཅིག་ཏུ་གནས་ཐུབ་པ་དེ་རེད། འདི་ལྟ་བུ་རྩེ་གཅིག་ཏུ་གནས་ཐུབ་པ་ནི་སྟ་རེ་དང་མཉམ་དུ་དམིགས་གཏད་ཡག་པོ་ཡོད་པ་དང་དཔེ་མཚུངས་པ་ཡིན། གང་ཡིན་ཞེ་ན། ང་ཚོས་རྟག་ཏུ་སྟ་རེས་དམིགས་སའམ་རྟགས་དེ་ལ་མ་ནོར་བར་རྡེག་དགོས། བྱས་ཙང་། ང་ཚོས་རྨོངས་པ་གཅོད་པར་འདོད་པའི་གནད་དེ་ལ་རྡེག་ཐུབ་པ་ཞིག་དགོས། 

ཏིང་ངེ་འཛིན་གྱི་བསླབ་པའི་གཞི་རྟེན་ནི་ཚུལ་ཁྲིམས་ཀྱི་བསླབ་པ་ཡིན། འདིའི་ནང་ང་ཚོས་འགྲེལ་བརྗོད་བྱས་དང་བྱེད་མུས་ཀྱི་བཟང་སྤྱོད་དང་ཚུལ་ཁྲིམས་ཀྱི་བརྗོད་གཞི་དེ་སླེབ་ཀྱི་ཡོད། རྩེ་གཅིག་པའི་ཏིང་ངེ་འཛིན་ཞིག་སྐྱེད་ཐུབ་པར། ང་ཚོ་རྣམ་པར་གཡེང་བའི་སྐབས་དམིགས་པ་བཅོས་པའི་ཆེད་དུ་ཚུལ་ཁྲིམས་དགོས་ཤིང་། ང་ཚོ་ཧ་ཅང་བྱིང་བ་དང་གཉིད་ཀྱི་དབང་དུ་ཤོར་བའི་སྐབས་ང་ཚོས་དམིགས་པ་བཅོས་དགོས། དེའི་ཆེད་དུ་ང་ཚོར་ཚུལ་ཁྲིམས་དགོས་ཤིང་། དེ་ནི་སྟ་རེ་དེ་བེད་སྤྱོད་བྱེད་ཐུབ་པའི་སྟོབས་སམ་ནུས་ཤུགས་ཡོད་པ་དང་མཚུངས་པ་ཞིག་ཡིན། དེར་བརྟེན་བཟང་སྤྱོད་ཀྱི་ཚུལ་ཁྲིམས་ནི་ཏིང་ངེ་འཛིན་གྱི་གཞི་རྟེན་ནམ་སྔོན་འགྲོ་ཆ་རྐྱེན་དེ་ཡིན་པ་དང་། དེ་ཡང་བསླབ་པ་མཐོ་ཤོས་ཤེས་རབ་ཀྱི་རྨང་གཞི་ལྟ་བུ་ཆགས་ཀྱི་ཡོད། 

ང་ཚོས་སྟོང་ཉིད་སྒོམ་བཞིན་པའི་སྐབས་དང་ཡུལ་གཞན་ཞིག་ལ་དམིགས་ནས་སྒོམ་རྒྱག་བཞིན་པའི་སྐབས་ཁོ་ནར་ཏིང་ངེ་འཛིན་འཇུག་གི་མེད། དེའི་དོན་ནི་གནས་སྟངས་ཡོངས་སུ་རྫོགས་པའི་ནང་དོན་སྨིན་ལྡན་པའི་དམིགས་པ་གཏད་དགོས། དཔེར་ན། གལ་ཏེ་ཁྱེད་ཀྱིས་གཞན་ཞིག་ལ་རོགས་བྱེད་ཐབས་བྱེད་ཀྱིན་ཡོད་ན། མི་གཞན་དེས་གང་ཤོད་ཀྱིན་ཡོད་པ་དེ་ལ་རྩེ་གཅིག་ཏུ་དམིགས་པ་གཏད་ནས་ཉན་དགོས། ཁྱེད་ཀྱིས་ཉན་དགོས་པ་ལས། རང་ཉིད་ཀྱི་སེམས་དེ་ཉིན་གུང་ཁ་ལག་ག་དུས་ཡིན་ན་བསམ་པ་ལྟ་བུ་གཞན་དུ་གཡེང་རྒྱུ་མེད། ཁྱེད་རང་གྲུང་པོ་དང་སྟོང་ལྷང་ལྷང་གི་རྣམ་གཡེང་མི་ཆགས་པའི་ཕྱིར། ཕ་རོལ་པོ་དེ་ལ་དོ་སྣང་སྤྲོད་དགོས། ཁྱེད་ཀྱིས་འོས་ཤིང་འཚམ་པ་གང་ཤོད་དགོས་པ་དང་། ཕན་ཐོགས་ལྡན་པ་གང་ཤོད་དགོས་པ། ཕན་ཐོགས་ལྡན་པ་གང་བྱེད་དགོས་པ། དེ་བཞིན་འོས་འཚམ་མིན་པ་དང་ཕན་ཐོགས་མེད་པ་གང་ཡིན་རྣམ་པར་འབྱེད་པའི་ཤེས་རབ་སྐྱེད་པའི་ཕྱིར་རྩེ་གཅིག་ཏུ་དམིགས་པ་གཏད་དགོས། བྱས་ཙང་། གང་བྱེད་འདོད་ཡོད་པའི་སྐོར་བསམ་བློ་གཏོང་རྒྱུ་ (དེ་ནི་ཉིན་གུང་ཁ་ལག་བཟའ་འདོད་པ་དེ་ཡིན་སྲིད་) དེ་འགོག་པའི་ཆེད་དུ་སླར་ཡང་ཁྱེད་ལ་ཚུལ་ཁྲིམས་དགོས་ཀྱི་ཡོད། དེའི་ཚབ་ལ་མི་གཞན་དེ་ལ་ཕན་པའི་ཐབས་ཡག་ཤོས་དེ་གང་ཡིན་པའི་ཐད་བསམ་བློ་གཏོང་དགོས།

དེར་བརྟེན་བཟང་སྤྱོད་ཀྱི་ཚུལ་ཁྲིམས་ནི་དགོས་གལ་ཆེན་པོ་ཞིག་ཡིན་པ་དང་། ནང་པའི་སྐབས་དོན་ལ་གཞིགས་ན། དེའི་དོན་ནི་ཆོས་རྣམ་འབྱེད་ཀྱི་ཤེས་རབ་ལ་བརྟེན་ནས་རྩེ་གཅིག་པའི་ཏིང་ངེ་འཛིན་གྱིས་དངོས་པོའི་གནས་ལུགས་ལ་དམིགས་ཐུབ་པ་དང་གཞན་ལ་ཕན་འདོགས་པ་དེ་ཡིན།

ད་གལ་ཏེ་ང་ཚོས་ཏིང་ངེ་འཛིན་གྱི་སྐོར་བཤད་ན། སེམས་ཀྱི་བྱེད་ལས་ཤིག་གི་སྐོར་ཤོད་ཀྱིན་ཡོད་པ་དང་། ང་ཚོར་ཚུལ་ཁྲིམས་དགོས་ཤིང་། དེ་ཡང་གཙོ་བོ་སེམས་ཀྱི་ཚུལ་ཁྲིམས་དེ་དགོས། ང་ཚོར་སྒོམ་རྒྱག་པའི་སྐབས་སྡོད་ཐུབ་པ་དང་། ལེ་ལོ་ལས་ཐར་བ། རྣམ་གཡེང་ལས་ཐར་བའི་ཆེད་དུ་ཚུལ་ཁྲིམས་དགོས་པ་ནི་གསལ་པོ་རེད། ཡིན་ནའང་ང་ཚོའི་སེམས་འདི་འདུལ་བའམ་སྒྲིག་བཅུན་རྒྱུ་དེ་ལུས་ངག་གི་སྤྱོད་ལམ་སྒྲིག་བཅུན་པའམ་ཚུལ་ཁྲིམས་བསྟེན་པ་ལས་རྦད་དེ་དཀའ་བ་ཡོད། བྱས་ཙང་། ང་ཚོའི་སེམས་ཀྱི་སྤྱོད་ལམ་སྒྲིག་བཅུན་ཐུབ་པའི་ནུས་ཤུགས་དེ་ཇི་ལྟར་འཐོབ་བམ། དེ་ཡང་ཐོག་མར་ང་ཚོའི་ལུས་དང་ངག་གཉིས་སྒྲིག་བཅུན་པའི་སྒོ་ནས་སེམས་འདི་སྒྲིག་བཅུན་པའི་ནུས་ཤུགས་དེ་འཐོབ་ཀྱི་ཡོད།

ནང་པའི་བཟང་སྤྱོད་རྣམ་གཞག་གི་ཐབས་ཚུལ་དང་ལུགས་གཞན་དག་གི་ཐབས་ཚུལ་དབར་གྱི་ཁྱད་པར་ཤེས་རྒྱུ་གལ་ཆེན་པོ་རེད། ང་ཚོ་མང་ཆེ་བ་ནི་ནུབ་ཕྱོགས་སམ་དབུས་ཤར་གྱི་རིག་གཞུང་ཞིག་གི་ནང་འཚར་ལོངས་བྱུང་ཡོད་པ་དང་། ནུབ་ཕྱོགས་དང་དབུས་ཤར་གྱི་རིག་གཞུང་ནང་། བཟང་སྤྱོད་ཀྱི་རྣམ་གཞག་ནི་གཞི་རྩའི་ཆ་ནས་སྒྲིག་ཁྲིམས་ཀྱི་གནད་དོན་ཞིག་རེད། འཇིག་རྟེན་བྱེད་པོ་དཀོན་མཆོག་གམ་ཨལ་ལཱས་གནང་བའི་ལྷའི་བཅས་ཁྲིམས་དེ་འདྲ་ཡོད་པ་དང་། སྤྱི་དམངས་ཀྱི་ཁྱབ་ཁོངས་སུ་རྒྱལ་པོའམ་ཡང་ན་ཁྲིམས་བཟོ་དང་ལྡན་པའི་གཞུང་གིས་བཟོས་པའི་སྒྲིག་ཁྲིམས་ཡོད། ནུབ་ཕྱོགས་ཀྱི་རིག་གཞུང་ནང་། བཟང་སྤྱོད་རྣམ་གཞག་གི་བསམ་བློ་དེ་ནི་དངོས་གནས་བཀའ་བརྩི་དང་ལེན་ལ་གཞི་བྱས་ཡོད། དེ་ཡང་དཀོན་མཆོག་གི་སྒྲིག་ཁྲིམས་དང་། སྤྱི་དམངས་ཀྱི་སྒྲིག་ཁྲིམས། ཡང་ན་གཉིས་ཀར་བཀའ་བརྩི་དང་ལེན་བྱེད་པ་དེ་རེད། གལ་ཏེ་ང་ཚོས་བཀའ་བརྩི་དང་ལེན་བྱས་ན། ང་ཚོ་མི་བཟང་པོ་དང་མི་སེར་བཟང་པོར་ཆ་འཇོག་བྱེད་པ་དང་། གལ་ཏེ་ང་ཚོས་བཀའ་བརྩི་དང་ལེན་མ་བྱས་ན། ང་ཚོ་མི་ངན་པ་དང་མི་སེར་ངན་པར་ཆ་འཇོག་བྱེད་ཀྱི་ཡོད། ཆོས་ལུགས་ཀྱི་ཁྱབ་ཁོངས་ནང་། མི་དེ་ནི་སྡིག་ཅན་ཞིག་ཏུ་མིང་བཏགས་ཡོད་པ་དང་། སྤྱི་དམངས་ཀྱི་ཁྱབ་ཁོངས་སུ་མི་དེ་ནི་ཁྲིམས་འགལ་ནག་ཉེས་ཅན་ཞིག་ཏུ་མིང་བཏགས་ཡོད། 

བྱས་ཙང་། ནུབ་ཕྱོགས་དང་དབུས་ཤར་རིག་གཞུང་གི་སྐབས་དོན་ནང་། སྡིག་པ་མི་དགེ་བའི་ལས་བྱེད་པོ་རྣམས་ནི་བཟང་སྤྱོད་ཀྱི་ཆ་ནས་ངན་པ་ཡིན་པར་ཆ་འཇོག་བྱེད་པ་དང་། རིག་གཞུང་ནས་ནག་ཉེས་ཡིན་པའི་སྣང་ཚུལ་ལ་ནན་བརྗོད་བྱེད་ཀྱི་ཡོད། ང་ཚོ་ནི་ནག་ཉེས་ཅན་ཡིན་པར་དཔྱད་ཁྲ་བཏང་ཡོད་པ་དང་། ཁྲིམས་ཐོག་དང་སེམས་ཁམས་ཀྱི་དོན་དུ་ནག་ཉེས་ཡིན། ནུབ་ཕྱོགས་སུ་ང་ཚོའི་བཟང་སྤྱོད་ཀྱི་རྣམ་གཞག་མང་ཆེ་བ་ནི། སྒྲིག་ཁྲིམས་ལ་བཀའ་བརྩི་དང་ལེན་བྱེད་པའི་བསམ་བློར་གཞི་རྩ་བྱས་ཡོད། གལ་ཏེ་སྤྱི་ཚོགས་ནང་གི་མི་འགའ་ཞིག་ཧ་ཅང་སྤྱང་གྲུང་ལྡན་པ་དང་དངུལ་འདང་ངེས་ཡོད་མཁན་ཡིན་ན། ཁོང་ཚོས་ཁྲིམས་རྩོད་པ་ཞིག་གླས་ནས་སྒྲིག་ཁྲིམས་ལ་སྐྱོན་གྱི་ཆ་གང་ཡོད་མེད་འཚོལ་གྱི་ཡོད། དེ་ལ་བརྟེན་ནས་ཁོང་ཚོས་སྒྲིག་ཁྲིམས་དེ་ལས་ཐར་བ་དང་ཉེས་ཆད་ལས་གཡོལ་ཐུབ་ཀྱི་ཡོད།

བཟང་སྤྱོད་ཀྱི་རྣམ་གཞག་ཐད་ལ་ནུབ་ཕྱོགས་དང་དབུས་ཤར་གྱི་བསམ་བློའི་ཁྱེར་སོ་དེ་ནང་པའི་ལྟ་ཚུལ་གྱི་ཆ་ནས་ཧ་ཅང་མི་འདྲ་བ་ཡོད། ནང་ཆོས་ནང་གི་བཟང་སྤྱོད་ཀྱི་རྣམ་གཞག་དེ་བཀའ་བརྩི་དང་ལེན་ལ་གཞི་རྩ་བྱས་མེད། དེ་ལས་ལྡོག་སྟེ། ནང་ཆོས་ནང་གི་བཟང་སྤྱོད་ཀྱི་རྣམ་གཞག་དེ་ནི་ཆོས་རྣམ་པར་འབྱེད་པའི་ཤེས་རབ་ལ་གཞི་རྩ་བྱས་ཡོད། ང་ཚོས་ཐ་སྙད་འདི་གོང་དུ་དངོས་པོའི་གནས་ལུགས་དང་རྟོག་པའི་འཆར་སྣང་དབར་རྣམ་པར་འབྱེད་པའི་སྐབས་སུ་མཐོང་ཟིན་པ་རེད། ཡིན་ནའང་འདིར་གཙོ་བོ་ཕན་ཐོགས་ཅན་གང་ཡིན་པ་དང་གནོད་གཞི་ཅན་གང་ཡིན་པ་རྣམ་པར་འབྱེད་ཀྱིན་ཡོད། འདི་ནི་ཁྲིམས་ཞིབ་ལྷན་ཚོགས་ཀྱི་སྐབས་དོན་ནང་། ཁྲིམས་མཐུན་གང་ཡིན་པ་དང་ཁྲིམས་འགལ་གང་ཡིན་པའི་དབར་ཁྱད་པར་འབྱེད་པ་དང་གང་ལ་གང་འཚམས་ཀྱི་མི་འདྲ་བ་རེད། ནང་པའི་སྐབས་དོན་ཡོངས་སུ་རྫོགས་པ་ནི་ང་ཚོས་སྡུག་བསྔལ་ལས་ཐར་འདོད་དང་སྡུག་བསྔལ་སྤོང་འདོད་དེ་ཡིན་པ་དྲན་དགོས། དེ་ལྟར་སྤོང་བར་སྡུག་བསྔལ་གྱི་རྒྱུ་མེད་པ་བཟོ་དགོས། དེའི་དོན་ནི་ང་ཚོས་སྡུག་བསྔལ་གྱི་རྒྱུ་གང་ཡིན་པའི་ཐད་ཡང་དག་པ་རྣམ་པར་འབྱེད་དགོས། དེ་ག་ནང་བཞིན་ང་ཚོར་སྡུག་བསྔལ་གྱི་རྒྱུ་དེ་སྤོང་བའི་ཀུན་སློང་ཞིག་ཀྱང་དགོས། མི་ཚང་མར་བདེ་བ་འདོད་པ་ནི་ཤོད་ག་ལ་དགོས། དེ་ནི་ང་ཚོ་འཚོ་གནས་ཀྱི་ལྷན་སྐྱེས་རིག་པ་དང་འབྲེལ་བའི་རང་བཞིན་གྱི་སྐུལ་སློང་ཞིག་ཡིན་པ་དང་། དེ་ནི་ཧ་ཅང་གཞི་རྩའི་ལྷན་སྐྱེས་ཀྱི་རིག་པ་ཞིག་རེད། འོན་ཀྱང་ནམ་རྒྱུན་སྡུག་བསྔལ་དང་བྲལ་བ་ཞིག་ཡོང་བའམ་ཡང་ན་ང་ཚོར་བདེ་སྐྱིད་འབྱུང་བར་གང་གིས་ཕན་གྱི་ཡོད་པ་དེ་ང་ཚོས་ཤེས་ཀྱི་མེད། 

དེར་བརྟེན་ཤེས་རབ་དེ་ཚུལ་ཁྲིམས་དང་ལྷན་དུ་འགྲོ་གི་ཡོད། ང་ཚོས་ཡང་དག་པའི་སྒོ་ནས་ “གལ་ཏེ་ངས་བྱ་སྤྱོད་འདི་འདྲ་ཞིག་སྤེལ་ན། འདིས་དཀའ་ངལ་གྱི་རྒྱུ་བྱེད་ཀྱི་རེད། འདིས་གཞན་ལ་དཀའ་ངལ་གྱི་རྒྱུ་བྱེད་སྲིད་ནའང་། གཙོ་བོ་སོ་སོ་རང་ཉིད་ལ་དཀའ་ངལ་བཟོ་སྲིད། གལ་ཏེ་ངས་དགེ་བའི་བྱ་སྤྱོད་སྤེལ་ན། དེ་ནི་སོ་སོ་རང་ཉིད་ལ་ཕན་ཐོགས་ཡོང་བ་མ་ཟད། གཞན་དག་ལའང་ཕན་སྲིད་” ཅེས་རྣམ་པར་འབྱེད་དགོས། ང་ཚོས་མི་དགེ་བའི་སྤྱོད་ལམ་སྤོང་དང་མི་སྤོང་ནི་དངོས་གནས་སོ་སོ་རང་ཉིད་ཀྱི་གདམ་ཀ་ཞིག་རེད། དེ་ནི་ང་ཚོས་སོ་སོ་རང་ཉིད་ལ་ཇི་ཙམ་གྱིས་དོ་གལ་བརྩི་གི་ཡོད་མེད་ལ་རག་ལུས་ཡོད་པ་དང་། མ་འོངས་པར་ང་ཚོས་མྱོང་སྲིད་པའི་སྡུག་བསྔལ་ལ་གཟབ་ནན་ཇི་ལྟར་བྱེད་པ་བཅས་ལ་རག་ལུས་ཡོད། མི་ཞིག་གིས་ཕན་ཐོགས་ཅན་གང་ཡིན་པ་མི་ཤེས་པ་ཙམ་གྱི་གནད་དོན་ཡིན་ཆོག །བྱས་ཙང་། མི་ཞིག་གིས་ལེགས་ཉེས་བླང་དོར་འབྱེད་མི་ཤེས་པ་ཙམ་རྒྱུ་མཚན་དུ་བྱས་ནས་མི་དགེ་བའི་བྱ་སྤྱོད་སྤེལ་བཞིན་པའི་མི་ཞིག་དང་ང་ཚོ་ཕྲད་པ་ཡིན་ན། ང་ཚོས་མི་དེ་ལ་གོ་རྟོགས་ཤིག་རྙེད་ཐབས་སུ་རོགས་ཕན་བྱེད་ཐུབ། 

དེ་ལ་དཔེ་མཚོན་གྲགས་ཆེ་ཤོས་དེ་ནི་བྱིས་པ་གཞོན་སྐྱེས་ཚོ་རེད། བྱིས་པ་གཞོན་ནུ་ཚོས་དེ་ཤེས་ཀྱི་མེད། དཔེར་ན། ཁྱེད་ཀྱིས་ཕྲུ་གུ་གཞན་གྱི་རྩེད་ཆས་རིགས་གཅོག་རྒྱུ་མེད་པའམ་གཞན་གྱི་རྩེད་ཆས་རིགས་ཁྱེར་ནས་འགྲོ་རྒྱུ་མེད་པ་དེ་ཁོང་ཚོར་བསླབ་དགོས། ང་ཚོ་ནུབ་ཕྱོགས་ཀྱི་བསམ་བློ་བསྒྱུར་བཅོས་དེས་ང་ཚོར་ཕྲུ་གུ་སྤྱོད་རྩུབ་ཅན་དེ་ལ་ “བུ་ངན་པའམ་བུ་མོ་ངན་པ་” ཞེས་མིང་དུ་འདོགས་འཇུག་གི་ཡོད། ཡིན་ནའང་ཁོང་ཚོས་དེ་ལས་བཟང་བའི་གནད་དོན་གང་ཞིག་ཀྱང་ཤེས་ཀྱི་མེད། བྱས་ཙང་། ཕྲུ་གུ་དེ་ནག་ཉེས་ཅན་དུ་བཟོ་དགོས་དོན་མེད། དེ་ནི་ནག་ཉེས་ཀྱི་གནད་དོན་ཞིག་རྩ་ནས་མིན་པར། དེ་ནི་ཤེས་ཡོན་གྱི་གནད་དོན་ཙམ་ཞིག་རེད། གལ་ཏེ་ང་ཚོས་ཕྲུ་གུ་ཚོར་ཁོང་ཚོའི་སྤྱོད་ལམ་གྱི་རྗེས་འབྲས་སུ་སྡུག་བསྔལ་མྱོང་གི་རེད་ཅེས་བསླབ་པ་དང་། ཁོང་ཚོས་སྤྱོད་ངན་བྱེད་པའི་སྐབས། ཕྲུ་གུ་གཞན་དག་གིས་དགའ་པོ་བྱེད་ཀྱི་མ་རེད་ཅེས་ང་ཚོས་ཤེས་རྟོགས་ཡོང་བར་བྱེད་ཐུབ་ན། ཁོང་ཚོས་ཤེས་ཀྱི་རེད།
 
གལ་ཏེ་ང་ཚོས་མི་ཞིག་རྨོངས་པའི་དབང་གིས་མི་དགེ་བའི་ལས་བྱེད་ཀྱི་ཡོད་པ་མཐོང་ན། མི་དེ་ནི་སྙིང་རྗེའི་ཡུལ་རན་ཞིང་འཚམ་པ་ཞིག་ཡིན་པ་ལས། ཁོང་ཁྲོ་དང་ཉེས་ཆད་འགེལ་ཡུལ་རན་ཞིང་འཚམ་པ་ཞིག་མིན། གལ་ཏེ་མི་ཞིག་གིས་གཞན་དག་ལ་གནོད་འཚེ་བྱེད་ཀྱིན་ཡོད་ན། སྙིང་རྗེའི་རྣམ་པ་དེའི་དབང་གིས་མི་དེ་བཙོན་ཁང་དུ་འཇུག་སྲིད་པ་ཡིན། འོན་ཀྱང་བྱ་བ་དེ་སྙིང་རྗེའི་དབང་གིས་ངེས་པར་དུ་བྱེད་དགོས། ང་ཚོས་མི་དེ་བཙོན་ཁང་དུ་འཇུག་པ་ནི་གཞན་དག་ལ་གནོད་འཚེ་མི་བྱེད་པ་དང་མི་གསོད་པར་སྔོན་འགོག་ཆེད་དང་། མི་དེས་སོ་སོ་རང་ཉིད་ལ་དཀའ་ངལ་མང་བ་མི་བཟོ་བའི་སྔོན་འགོག་ཆེད་དུ་ཡིན། ནང་པའི་ཐབས་ཚུལ་ནི་ཁྲིམས་ལུགས་ཀྱི་ནག་ཉེས་དང་ཉེས་ཆད་དང་བསྡུར་ན། སྤྱི་དམངས་ཀྱི་ཟིང་འཁྲུག་ཐད་ལ་ལྟ་ཚུལ་ཧ་ཅང་མི་འདྲ་བ་ཞིག་རེད། 

ནུབ་ཕྱོགས་པའི་བཟང་སྤྱོད་དེ་ནང་ཆོས་སྟེང་རྟོག་འཆར་སྐྲུན་མི་ཉན།

ང་ཚོས་ནང་ཆོས་ཉམས་ལེན་བྱེད་པའི་སྐབས། ནུབ་ཕྱོགས་ཀྱི་བཟང་སྤྱོད་ལ་འཛིན་པའི་བསམ་བློ་རྣམས་ནང་ཆོས་སྟེང་དུ་རྟོག་འཆར་སྐྲུན་རྒྱུ་མེད་པ་ཧ་ཅང་གལ་ཆེན་པོ་རེད། ནང་ཆོས་ཉམས་ལེན་གྱི་ནང་དཀའ་ངལ་མང་པོ་འབྱུང་གི་ཡོད། གང་ཡིན་ཞེ་ན། ང་ཚོ་ནུབ་ཕྱོགས་པ་ཡིན་པའི་ཆ་ནས་ནུབ་ཕྱོགས་ཀྱི་བཟང་སྤྱོད་ལ་ཡོད་པའི་བསམ་བློ་དེ་འོས་འཚམ་མེད་པའི་སྒོ་ནས་ནང་པའི་ཉམས་ལེན་གྱི་ནང་རྟོག་འཆར་སྐྲུན་གྱི་ཡོད། མི་འགའ་ཞིག་གིས་ནང་པ་ཡག་པོ་ཞིག་ཆགས་པར་སྒོམ་ཉམས་ལེན་ངེས་པར་དུ་བྱེད་དགོས་ཞེས་ཚོར་སྲིད་པ་རེད། ནུབ་ཕྱོགས་པ་འགའ་ཞིག་གིས་རང་གི་དགེ་བའི་བཤེས་གཉེན་ལ་བཀའ་བརྩི་དང་ལེན་བྱེད་དགོས་ཞེས་ཚོར་སྲིད་པ་ཡིན། དེ་ནི་ནང་པའི་ལྟ་ཚུལ་གྱི་ཆ་ནས་གང་འཚམ་གྱི་ཡ་མཚན་ཅན་ཞིག་རེད། དོན་ངོ་མར་ང་ཚོས་དགེ་བའི་བཤེས་གཉེན་གྱི་བསླབ་བྱར་ཉན་དགོས་ནའང་ང་ཚོས་སོ་སོའི་ཤེས་རབ་ཀྱང་བེད་སྤྱོད་བྱེད་དགོས། སྐབས་རེར་དགེ་བའི་བཤེས་གཉེན་གྱིས་ང་ཚོར་སོ་སོ་རང་ཉིད་ལ་ཡོད་པའི་རྣམ་དཔྱོད་བེད་སྤྱོད་གཏོང་ཕྱིར། མཐའ་གཅིག་ཏུ་ངོས་ལེན་བྱེད་དཀའ་ཞིང་ཧང་སངས་དགོས་པའི་གནད་དོན་དེ་འདྲ་ཤོད་ཀྱི་ཡོད། 

སངས་རྒྱས་ཀྱི་སྐུ་སྐྱེ་སྔོན་མའི་ལོ་རྒྱུས་ཤིག་ནི་ནང་། ཁོང་སློབ་ཕྲུག་མང་པོའི་ཁྲོད་ནས་གཅིག་ཡིན་པའི་སྐབས། དགེ་བའི་བཤེས་གཉེན་བྱེ་བྲག་ཅིག་གི་མདུན་ནས་བསླབ་པ་སློབ་གཉེར་གནང་བཞིན་ཡོད། དགེ་བའི་བཤེས་གཉེན་དེས་སློབ་ཕྲུག་རྣམས་ལ། ས་གནས་ཀྱི་གྲོང་གསེབ་ཏུ་ཕྱིན་ནས་རྐུ་མ་རྐུ་ནས་ཤོག་ཅེས་བརྗོད་པ་རེད། དེའི་སངས་རྒྱས་མ་གཏོགས་གཞན་སློབ་ཕྲུག་ཚང་མ་ཕྱིན་ནས་རྐུ་འཕྲོག་བྱས་ཏེ་དགེ་བའི་བཤེས་གཉེན་མདུན་དུ་ཁྱེར་ནས་སླེབས། སངས་རྒྱས་ནི་ནང་དུ་བསྡད་ནས་ཡོད། དགེ་རྒན་དེ་ཁོང་གི་སྡོད་ཁང་དུ་ཕྱིན་ནས་ “ཁྱེད་རང་ཕྱི་རུ་ཕྱིན་ནས་ངའི་ཆེད་དུ་རྐུ་འཕྲོག་མི་བྱེད་པའི་རྒྱུ་མཚན་གང་རེད་དམ། ཁྱེད་ཀྱིས་ང་རང་དགའ་པོ་དང་སྐྱིད་པོ་བཟོ་འདོད་མེད་དམ་” ཞེས་དྲིས་པ་རེད། དེ་ལ་ཁོང་གིས་ལན་དུ། “རྐུ་མ་རྐུ་བ་དེས་གཞན་སུ་ཞིག་སྐྱིད་པོ་བཟོ་ཐུབ་བམ་” ཅེས་བརྗོད་པ་རེད། བྱས་ཙང་། སྐྱེས་རབས་ལོ་རྒྱུས་འདིའི་བསླབ་བྱ་གང་རེད་ཅེ་ན། དགེ་བའི་བཤེས་གཉེན་དེ་ཉེན་རྟོག་པ་ཞིག་གམ་དམག་མི་ལས་སྣེ་ཞིག་ཡིན་པ་ནང་བཞིན་མིག་བཙུམས་ནས་བཀའ་བརྩི་དང་ལེན་བྱེད་པ་ནི་ནང་པའི་ལམ་མིན། དེ་ལས་ལྡོག་སྟེ། དགེ་བའི་བཤེས་གཉེན་གྱིས་བསླབ་བྱ་དང་ལམ་སྟོན་གནང་གི་ཡོད། དགེ་བའི་བཤེས་གཉེན་གྱིས་རང་གི་རྣམ་དཔྱོད་སྤྱོད་སྟངས་སྦྱོང་དགོས་པའི་ཐད་ལ་རོགས་གནང་གི་ཡོད། དེ་ལ་བརྟེན་ནས་ང་ཚོས་འབད་བརྩོན་དང་བཅས་སངས་རྒྱས་ཐུབ་པ་ཡིན། ང་ཚོ་སངས་རྒྱས་ཀྱི་བྲན་གཡོག་ཅིག་ཏུ་འགྱུར་བར་དམིགས་ཀྱི་མེད། ང་ཚོས་རང་ངོས་ནས་འབད་འབུངས་ལྷོད་མེད་ཐོག་སངས་རྒྱས་ཀྱི་གོ་འཕང་འཐོབ་པར་དམིགས་ཀྱིན་ཡོད།

ནུབ་ཕྱོགས་ཀྱི་ལྟ་ཚུལ་ལ་ཁྲིམས་ནི་འགྱུར་དུ་མི་གཏུབ་པ་ཡིན།

ནུབ་ཕྱོགས་པའི་བཟང་སྤྱོད་དང་ནང་པའི་བཟང་སྤྱོད་གཉིས་ཀྱི་དབར་ལ་མི་འདྲ་བའི་ཁྱད་པར་གཞན་ཞིག་ནི། ནུབ་ཕྱོགས་སུ་ཁྲིམས་ནི་རྩ་ཆེན་པོ་ཡིན་པའི་ཡིད་ཆེས་དང་བཅས་ཁོང་ཚོ་རང་སོ་སོ་ལ་ཕལ་ཆེར་ཚེ་སྲོག་ཡོད་པ་ལྟ་བུ་རེད། མི་རྣམས་ཀྱིས་དཀོན་མཆོག་གིས་གནང་བའི་ལྷའི་ཁྲིམས་དེ་འགྱུར་བ་གཏོང་མི་ཐུབ་བསམ་གྱི་ཡོད། སྤྱི་དམངས་ཀྱི་ཁྲིམས་རྣམས་ནུས་ལྡན་ཡིན་པའི་སྐབས་དེ་དག་ཁྲིམས་བཟོའི་རྒྱུད་རིམ་ལ་སྒྲིག་བཅོས་དང་བཅས་འགྱུར་བ་གཏོང་ཐུབ་ནའང་། ད་དུང་གང་འཚམ་གྱི་རྩ་ཆེན་དུ་ཆ་འཇོག་བྱེད་ཀྱི་ཡོད། འདིར་ང་ཚོས་གང་ངོས་འཛིན་བྱེད་དགོས་པ་དེ་ནི་ང་ཚོས་སྟོང་ཉིད་སྒོམ་པའི་སྐབས་གང་བྱེད་ཀྱི་ཡོད་པ་དང་མཚུངས་པ་ཞིག་རེད། སྟོང་པ་ཉིད་ཀྱིས་ཡིན་པ་མི་སྲིད་པའི་ཚུལ་གྱིས་གྲུབ་པའི་ཆོས་མེད་པའི་སྐོར་ཤོད་ཀྱིན་ཡོད། སྟོང་པ་ཉིད་རྟོགས་པར་ང་ཚོས་ཡིན་པ་མི་སྲིད་པའི་ཚུལ་གྱིས་གྲུབ་པ་དེ་ངོས་འཛིན་བྱེད་དགོས་ཤིང་། དེ་དག་དངོས་པོའི་གནས་ལུགས་གང་ལའང་གོ་གི་མེད་པ་དེ་རྟོགས་དགོས། ཡིན་པ་མི་སྲིད་པ་གྲུབ་ཚུལ་ཆེ་ཁག་ནང་གི་གཅིག་ནི་ཡུལ་ཞིག་གི་ནང་གཅིག་ཡོད་ (སྐབས་འདིར་ཁྲིམས་རེད་) པ་དང་དེས་སྐྲུན་གྱི་ཡོད། ཡང་ན་དེས་རང་དབང་གིས་གཞན་གང་ལའང་བལྟོས་མེད་ཀྱིས་གྲུབ་པར་བྱེད་ཀྱི་ཡོད། སྤྱི་དམངས་ཀྱི་ཁྲིམས་ནང་བསམ་བློ་མི་སྲིད་པ་དེ་ནི། “འདི་ནི་ཁྲིམས་རེད། རྐྱེན་གང་དག་ཡིན་ཁྱད་པར་མེད། གནས་སྟངས་ངེས་ཅན་དེ་གང་ཡིན་ཁྱད་པར་མེད། ཡང་ན་བརྗོད་དོན་གང་ཡིན་ཁྱད་པར་མེད། ཁྲིམས་ནི་རང་ངོས་ནས་གྲུབ་པ་ཞིག་ཡིན་པ་དང་རང་སོར་གནས་པ་ཞིག་ཡིན།”

ཉེ་ཆར་སུད་སིའི་རྒྱལ་ཁབ་ཀྱི་ནང་གནད་དོན་ཞིག་བྱུང་ཡོད་དེ། ཨ་རིའི་གཞུང་གི་དགོས་འདུན་ལྟར་གློག་བརྙན་བཀོད་ཁྲིད་པ་རོ་མན་པོ་ལནྶ་ཀི་ (Roman Polanski) འཛིན་བཟུང་བྱས་ཡོད། དེ་ནི་ཁོ་ལ་ངོ་སུམ་ཅུའི་གོང་དུ་སྙོན་འཛུགས་ཀྱིས་འཁྲིག་སྤྱོད་ལོག་སྤྱོད་ཀྱི་ནག་ཉེས་བྱས་པར་བརྟེན་ཁོ་རང་ཨ་རིའི་གཞུང་ལ་ཕྱིར་སྤྲོད་བྱ་རྒྱུའི་ཆེད་དུ་རེད། འདི་ནི་ “སྙོན་འཛུགས་དེ་བྱས་ནས་ལོ་ངོ་སུམ་ཅུ་ཕྱིན་ནའང་ཁྱད་པར་མེད་པའི་བློའི་ཁྱེར་སོའི་དཔེ་མཚོན་ཡག་པོ་ཞིག་རེད། སྙོན་འཛུགས་བྱེད་མཁན་གྱི་བུད་མེད་དེས་ཁྲིམས་མཐུན་གྱི་སྐྱོན་འཛུགས་དེ་ཕྱིར་འཐེན་བྱེད་འདོད་ནའང་ཁྱད་པར་མེད། ཁྲིམས་ནི་ཁྲིམས་རེད། མི་སུ་གཅིག་ཀྱང་ཁྲིམས་ཀྱི་གོང་དུའམ་ཁྲིམས་ལས་ལྷག་པ་མེད། ཁོང་ལ་ཉེས་ཆད་ངེས་པར་དུ་འགེལ་དགོས།” འདི་ནི་ཁྲིམས་ལ་རང་ངོས་ནས་ཚེ་སྲོག་ཅིག་ཡོད་པའི་བསམ་བློའི་དཔེ་མཚོན་ཧ་ཅང་ཡག་པོ་ཞིག་རེད། དེ་ཡང་རྐྱེན་གཞན་ལ་བལྟོས་མེད་ཀྱི་རང་དབང་བ་ཡིན་པ་དང་། ཁྲིམས་ནི་ཁྲིམས་ཡིན་པས། དེ་ལ་བཀའ་བརྩི་དང་ལེན་དགོས། ནང་པའི་ལྟ་ཚུལ་ནས་བྱས་ན། འདི་ནི་ཡིད་ཆེས་ནོར་བ་ཞིག་རེད། 

ནང་པའི་བཟང་སྤྱོད་ཀྱི་རྣམ་གཞག་ནི་རྩ་འཛིན་ལམ་སྟོན་ལྟ་བུ་རེད།

སངས་རྒྱས་ཀྱིས་བྱ་སྤྱོད་སྤེལ་སྟངས་དང་འབྲེལ་བའི་རྩ་འཛིན་ལམ་སྟོན་སྣ་ཚོགས་ཤིག་གསུངས་ཡོད་པ་དང་། དེ་དག་གིས་སྡུག་བསྔལ་གྱི་རྒྱུ་དང་ཆོས་ཕྱོགས་ཀྱི་ཡར་རྒྱས་ལ་བར་ཆད་གང་རུང་བྱེད་ཀྱི་རེད། དཔེ་ཆ་བཞག་ན། རབ་ཏུ་བྱུང་བ་རྣམས་ཕྱི་དྲོའི་ཁ་ཟས་སྤོང་གི་ཡོད། གང་ཡིན་ཟེར་ན། དེས་ཁོང་ཚོས་ཕྱི་དྲོ་སྒོམ་རྒྱག་སྐབས་སེམས་བྱིང་བའམ་མི་གསལ་བ་བཟོ་གི་ཡོད། སངས་རྒྱས་ཀྱིས་སྤྱོད་ལམ་གྱི་ཆེད་དུ་རྩ་འཛིན་ལམ་སྟོན་མང་པོ་གསུངས་པ་དང་ཆབས་ཅིག་ནང་པའི་བསམ་བློ་དང་བཟང་སྤྱོད་ཀྱི་རྩ་འཛིན་ལམ་སྟོན་ (དཔེར་ན། སྲོག་གཅོད་སྤོང་བའི་བསླབ་ཁྲིམས་ལྟ་བུ་) ནི་རྡོ་ལ་བརྐོས་པའི་བཀའ་རྒྱའི་ཁྲིམས་ཤིག་མ་རེད། རྩ་འཛིན་ལམ་སྟོན་དེ་རྩ་ཆེན་ཡིན་པ་དང་དེ་ཡང་མཐའ་གཅིག་ཏུ་གནས་སྟངས་དང་། བརྗོད་དོན། ཡང་ན་ཞི་འཇམ་གྱི་རྐྱེན་གང་རུང་ལ་བརྟེན་ནས་ཡོད་ཅེས་པའི་དོན་མིན། དེའི་ཚབ་ལ་ནང་པའི་བཟང་སྤྱོད་ཀྱི་རྩ་འཛིན་ཁག་ནི་རྟེན་ཅིང་འབྲེལ་བར་འབྱུང་བའི་ཆོས་རྣམས་རེད། དེ་དག་ནི་རྒྱུ་དང་རྐྱེན་ལ་བརྟེན་ནས་བྱུང་བ་དང་གནས་སྟངས་དང་རྐྱེན་རྣམས་ལས་བྱུང་བ་ཞིག་ཡིན། 

ང་ཚོས་གནད་དོན་འདི་རབ་བྱུང་གི་སྡེའི་སྡོམ་པའི་འཕེལ་རིམ་ལས་གསལ་པོར་མཐོང་ཐུབ། ནང་པའི་རབ་བྱུང་གི་སྡེ་སྔ་ཤོས་གྲས་སུ་སྡོམ་པ་མེད། འོན་ཀྱང་ནང་པའི་རབ་བྱུང་གི་སྡེའི་ནང་གནས་སྟངས་སྣ་ཚོགས་པ་བྱུང་ནས་དེས་དཀའ་ངལ་བཟོས་ཡོད། དེ་དག་ཀྱང་རབ་བྱུང་སྡེའི་ནང་ཁུལ་ལམ། ཡང་ན་རབ་བྱུང་གི་སྡེ་དང་རབ་བྱུང་གི་སྡེ་ལ་རྒྱབ་སྐྱོར་བྱེད་མཁན་གྱི་ཁྱིམ་པ་སྐྱ་བོའི་སྡེ་ཕན་ཚུན་དབར་དཀའ་ངལ་བྱུང་ཡོད། བྱས་ཙང་། སངས་རྒྱས་ཀྱིས། “དཀའ་ངལ་དེ་དག་སེལ་བའི་ཆེད་ལས་འདི་བྱ་མི་ཉན་” ཞེས་གསུངས་ཡོད་པ་དང་། དེ་ལས་སྡོམ་པ་བྱུང་བ་ཞིག་ཡིན། ཁྱེད་ཀྱིས་འདུལ་བར་ (རབ་བྱུང་སྡེའི་འདུལ་ཁྲིམས་) སློབ་སྦྱོང་བྱེད་སྐབས། འདུལ་ཁྲིམས་རེ་རེར་ནམ་རྒྱུན་སྡོམ་པ་དེ་ཇི་ལྟར་བྱུང་ཡོད་མེད་ཀྱི་ལོ་རྒྱུས་དང་སངས་རྒྱས་ཀྱིས་སྡོམ་པ་དེ་ཁྱབ་སྤེལ་གནང་དགོས་པའི་རྐྱེན་དེ་གང་ཡིན་པ་བཅས་གཞུང་དེ་ལས་གསུང་གི་ཡོད། གང་ལྟར་ཡང་། སྡོམ་པ་དེ་དག་ཐམས་ཅད་ལ་བརྟེན་ནས་རྐྱེན་གཞན་དག་གིས་རྩ་འཛིན་ལམ་སྟོན་དེ་རྡོག་རྫི་གཏོང་བའི་སྐབས། སྡོམ་པ་དེ་བརྩི་མེད་གཏོང་དགོས་པ་ཆགས་སྲིད་པའི་ཆ་རྐྱེན་ནི་རྟག་ཏུ་ཡོད་པ་རེད། 

དཔེ་མཚོན་ཞིག་ཞུས་ན། འདུལ་བའི་ནང་ཆགས་སེམས་སྤོང་བའི་ཕྱིར། གྲྭ་པའམ་དགེ་འདུན་པ་ཞིག་གིས་བུད་མེད་ལ་རེག་མི་ཆོག་པ་ཡིན། འོན་ཀྱང་གལ་ཏེ་བུད་མེད་དེ་ཆུས་འཁྱེར་བཞིན་ཡོད་ན། དགེ་འདུན་པ་དེ་ལྟད་མོ་བལྟས་ནས་མི་སྡོད་པར། བུད་མེད་དེ་ལ་ངེས་པར་དུ་རོགས་བྱེད་དགོས། སྐབས་རེར་དགོས་དབང་གིས་བཀག་སྡོམ་ལ་རྡོག་རྫི་གཏོང་གི་ཡོད་པ་ཧ་ཅང་གསལ་པོ་རེད། དེ་ནི་དམིགས་བསལ་འདུལ་བའི་ནང་གནང་བ་ཡོད་པ་རེད། ནང་ཆོས་ནང་བཟང་སྤྱོད་དང་རྩ་འཛིན་ལམ་སྟོན་གཉིས་ལྟོས་གྲུབ་རེད། དེ་གཉིས་གནས་སྟངས་བྱེ་བྲག་ཅིག་ལ་ཕན་ཚུན་ལྟོས་ནས་ཡོད། གལ་ཏེ་མི་དགེ་བའི་བྱ་སྤྱོད་སྤེལ་དགོས་གལ་ཡོད་པ་དང་། བྱ་སྤྱོད་དེས་སྡུག་བསྔལ་མྱོང་བར་བྱེད་ཀྱི་ཡོད་ན། ང་ཚོས་ནན་ཏན་བརྟག་ཞིབ་ཐོག་མདུན་དུ་སྐྱོད་དགོས། “གཞན་ལ་ཕན་པའི་ཕྱིར། ངས་ལས་འདི་ལ་བརྟེན་ནས་བྱུང་བའི་སྡུག་བསྔལ་འདི་རང་ཐོག་ཏུ་ངོས་ལེན་བྱེད་ཀྱི་ཡིན་” ཞེས་ང་ཚོས་ཤེས་ཀྱི་ཡོད། 

སངས་རྒྱས་ཀྱི་སྐུ་ཚེ་སྔོན་མའི་ལོ་རྒྱུས་ཤིག་གིས་གནད་དོན་འདི་འགྲེལ་བརྗོད་བྱེད་ཀྱི་ཡོད། སྐྱེ་བ་སྔོན་མའི་ནང་སངས་རྒྱས་ཤཱཀྱ་ཐུབ་པ་ནི་གྲུ་གཟིངས་ཤིག་གི་དེད་དཔོན་ཡིན་པ་དང་། གྲུ་དེའི་ནང་ཚོང་པ་ལྔ་བརྒྱ་ཡོད་པ་རེད། དེ་དག་གི་ནང་ནས་གྲུ་པ་གཅིག་གིས་ཚོང་པ་ཚང་མ་བསད་ནས་རྐུ་འཕྲོག་བྱེད་རྩིས་ཡོད། སངས་རྒྱས་ཀྱིས་མངོན་ཤེས་ལ་བརྟེན་ནས་མཁྱེན་ཐུབ་ཀྱི་ཡོད། སངས་རྒྱས་ཀྱིས་གྲུ་པ་དེ་མ་བསད་པར་ཚོང་པ་གཞན་རྣམས་སྲོག་སྐྱོབ་པའི་ཐབས་གཞན་མེད་པར་གཟིགས་པ་རེད། བྱས་ཙང་། སངས་རྒྱས་ཀྱིས་ཐུགས་ཐག་ཆོད་པོ་དང་ནན་ཏན་གྱི་སྒོ་ནས་ཚོང་པ་ལྔ་བརྒྱའི་སྲོག་བསྐྱབ་པ་དང་གྲུ་པ་དེས་ཀྱང་མི་དགེ་བའི་སྤྱོད་ལམ་ཀྱི་རྗེས་འབྲས་ཧ་ཅང་ངན་པ་དེ་མི་མྱོང་བའི་སྔོན་འགོག་གི་ཆེད་དུ་གྲུ་པ་དེ་གསོད་པའི་ལས་ཀྱི་རྗེས་འབྲས་རང་ཐོག་ཏུ་བླངས་པ་རེད།

བཟང་སྤྱོད་དང་བྱང་ཆུབ་སེམས་དཔའི་སྡོམ་པ།

བྱང་ཆུབ་སེམས་དཔའི་སྡོམ་པའི་ནང་རྩ་བའི་སྡོམ་པ་དང་ཡན་ལག་གི་སྡོམ་པ་གཉིས་ཚུད་ཡོད། ཡན་ལག་གི་སྡོམ་པ་མང་ཆེ་བ་ནི་རྒྱ་ཆེ་ལ་ཕུགས་རྒྱང་རིང་བའི་བསམ་ཕྱོགས་དྲུག་གམ་ཕ་རོལ་ཏུ་ཕྱིན་པ་དྲུག་གི་སྡེ་ཚན་དང་བསྟུན་ནས་བསྒྲིགས་ཡོད། (ཕ་རོལ་ཏུ་ཕྱིན་པ་དྲུག་ནི། སྦྱིན་པ་དང་། ཚུལ་ཁྲིམས། བཟོད་པ། བརྩོན་འགྲུས། བསམ་གཏན། ཤེས་རབ་བཅས་ཡིན།) བྱང་ཆུབ་སེམས་དཔའི་སྡོམ་པ་རྣམས་ནི་བྱང་ཆུབ་ཀྱི་སེམས་སྐྱེད་པར་བར་ཆད་བྱེད་ངེས་པའི་ཉེས་བྱས་སྤོང་བའི་ཁས་ལེན་དམ་བཅའ་ཁག་ཡིན། ཚུལ་ཁྲིམས་སྐྱེད་པ་དང་བསྟུན་ནས་སྡོམ་པ་དེ་གཉིས་པོ་འབྲེལ་བ་ཡོད། ཐོག་མར་གཞན་དོན་དུ་སེམས་ཁུར་བྱེད་པའི་སྐབས། ང་ཚོས་བྱབས་ཆུང་བ་དང་སེམས་རྒྱ་ཆུང་བ་ཡིན་པ་སྤོང་དགོས། སེམས་ཆུང་བའི་བསམ་ཕྱོགས་ལ་བརྟེན་ནས། མི་འདི་ངའི་རོགས་པ་འོས་པ་ཞིག་མ་རེད། ཁོ་མོར་སྐྱོན་མང་པོ་མེད། ངས་ཁོ་མོར་རོགས་བྱ་རྒྱུའི་ཐབས་ཤེས་ཅིའི་ཕྱིར་བྱེད་དམ་ཞེས་པའམ། ཡང་ན་འདི་ནི་ངའི་སྒོམ་རྒྱག་པའི་དུས་ཚོད་རེད། བྱས་ཙང་། ངས་ཁྱེད་ལ་རོགས་བྱེད་མི་ཐུབ། ངའི་དུས་ཚོད་རེའུ་མིག་ལྟར་བྱས་ན། ངས་སྒོམ་རྒྱག་དགོས་པས་ཁྱེད་ལ་དམིགས་བསལ་གང་ཡང་བྱེད་མི་ཐུབ། རྗེས་མ་དུས་ཚོད་གཞན་ཞིག་ལ་རོགས་བྱེད་ཆོག་ཅེས་བསམ་བློ་གཏོང་འཇུག་སྲིད། འདི་ནི་བྱབས་ཆུང་བར་བྱེད་པའི་གནད་དོན་རེད། 

སེམས་རྒྱ་ཆུང་བའི་བསམ་ཕྱོགས་ཀྱི་དཔེ་མཚོན་གཞན་ཞིག་ནི། ཁྱེད་ཀྱི་ཆོས་ཚོགས་སུ་གྲྭ་པ་ཞིག་ཡོད་པ་དང་ཁོང་ལ་ཅ་དངོས་ལྗིད་ཁོག་ཆ་པོ་ཞིག་འཁྱེར་རོགས་དགོས་ཀྱི་ཡོད་པར་ཆ་ཞོག །འོན་ཀྱང་ཁོས་གྲྭ་ཆས་ཡག་པོ་གྱོན་མེད། སེམས་རྒྱ་ཆུང་བའི་བསམ་ཕྱོགས་ནི། ཁོང་གིས་གྲྭ་ཆས་དེ་མ་ནོར་བར་ཡང་བསྐྱར་རན་འཚམ་མ་གྱོན་བར་དུ་ངས་ཁོང་ལ་རོགས་བྱེད་རྩིས་མེད། འདི་ནི་བྱབས་ཆུང་བའི་གནད་དོན་ཐད་སེམས་རྒྱ་ཆུང་ཆུང་བྱེད་པ་ཞིག་ཡིན་པ་ལས་གང་གལ་ཆེ་ཤོས་ཡིན་པ་ལ་དོ་སྣང་བྱེད་པ་ཞིག་མིན། གནད་དོན་འདིའི་ནང་གྲྭ་པ་དེ་ལ་ཅ་དངོས་དེ་ཁྱེར་རོགས་བྱེད་པ་དེ་རེད། དཔེ་མཚོན་གཞན་ཞིག་གི་ནང་། དྭང་བླང་བ་ཞིག་གིས་ཨིན་སྐད་ནས་འཇར་མིན་གྱི་སྐད་དུ་ངའི་གཏམ་བཤད་བསྒྱུར་བཞིན་ཡོད་པའི་དབང་དུ་བཏང་ན། ངས་མི་དེའི་བརྡ་སྤྲོད་དང་སྒྲ་གདངས་འདོན་སྟངས་བཅོས་རྒྱུ་འགོ་འཛུགས་བྱེད་པ་ནི་ཧ་ཅང་བྱབས་ཆུང་བའི་གནད་དོན་ཞིག་རེད། དེ་ལྟའི་སྐྱོན་བརྗོད་ཀྱིས་དམིགས་ཡུལ་ངོ་མ་དེ་བསྒྲུབ་པར་རོགས་བྱེད་ཀྱི་མེད། དེ་ནི་ངས་གང་ཤོད་ཀྱིན་ཡོད་པ་དེ་ཉན་མཁན་ཚོས་གོ་རྟོགས་རྙེད་པར་རོགས་བྱེད་པ་དེ་རེད། 

བྱང་ཆུབ་སེམས་དཔའི་སྡོམ་པ་དང་འབྲེལ་བ་ཡོད་པ་གཉིས་པ་དེ་ནི། བྱམས་པ་དང་སྙིང་རྗེའི་དབང་གིས་བྱ་སྤྱོད་སྤེལ་བའི་སྐབས། མི་དགེ་བའི་ལས་བྱ་རྒྱུ་མི་སྤོང་བ་དེ་རེད། གལ་ཏེ་ངའི་ཕྲུ་གུ་རྒྱུ་མའི་གཞན་རྟེན་སྲིན་འབུའི་ན་ཚ་ཡོད་ན། ངས་ཕྲུ་གུར་སྲིན་འབུ་དེ་གསོད་ཆེད་སྨན་མི་སྤྲོད་རྒྱུ་ཐག་གཅོད་བྱེད་ཆོག །གང་ཡིན་ཞེ་ན། ནང་ཆོས་ནང་གི་མི་དགེ་བ་བཅུའི་ནང་གི་གཅིག་ནི། གཞན་གྱི་སྲོག་གཅོད་པ་དེ་རེད། ང་ཚོས་དམིགས་བསལ་མེད་པའི་ཐོག་ནས་སྒྲིག་ཁྲིམས་ཀྱི་རྗེས་སུ་འཇུག་རྒྱུ་གལ་ཆེན་པོ་ཡིན་པ་ངས་ཡིད་ཆེས་བྱེད་སྲིད། འོན་ཀྱང་ཕྲུ་གུ་ལ་ངའི་བརྩེ་བ་དང་སྙིང་རྗེ་ཡོད་པ་ནི་གསལ་པོ་རེད་ལ། ངས་ཕྲུ་གུ་སྨན་པར་བསྟེན་ནས་སྲིན་འབུ་དེ་གསོད་ཕྱིར་ངས་སྨན་སྤྲོད་ངེས་རེད། སྲིན་འབུ་དེ་སྐྱེ་བ་སྔོན་མའི་ནང་ངའི་ཨ་མ་ཡིན་སྲིད་པ་ནི་བདེན་པ་རེད་ལ། ངས་སྲིན་འབུ་རྣམས་ལ་བཏང་སྙོམས་ཀྱི་ལྟ་ཚུལ་འཛིན་དགོས་པ་དེའང་བདེན་པ་རེད། འོན་ཀྱང་ཕྲུ་གུའི་ན་ཚ་དེ་ཆོས་དང་མཉམ་དུ་གླེན་པ་ཞིག་ཏུ་ལྟ་ཚུལ་མི་འཛིན་པའི་ཐག་གཅོད་ཐལ་ཆེ་བ་ཞིག་བྱེད་པ་དེ་ནི་རྨོངས་ཞེན་ཅན་ཞིག་ཡིན། ཕྲུ་གུ་དེའི་གྲོད་ཁོག་ནང་གི་སྲིན་འབུ་དེ་ལས་ཕྲུ་གུ་དེའི་ད་ལྟའི་མི་ཚེའི་ནང་གཞན་ལ་ཕན་རྦད་དེ་མང་བ་འདོགས་སྲིད་པ་ནི་གང་འཚམ་གྱི་གསལ་པོ་རེད། བྱས་ཙང་། ང་ཚོས་སྲིན་འབུ་དེ་ཁོང་ཁྲོ་དང་ཞེ་སྡང་དབང་གིས་ (སྲིན་འབུ་ངན་པ་) ཞེས་གསོད་ཀྱི་མེད་པར། སྲིན་འབུ་དེ་ལ་སྙིང་རྗེ་ཡོད། སྲིན་འབུ་དེ་བདེ་པོ་ཞིག་ཡོང་བར་ཡིད་སྨོན་བྱེད་ཀྱི་ཡོད་པ་དང་། དེ་གསོད་པར་སྐྱིད་པོ་ཚོར་གྱི་མེད། འོན་ཀྱང་ད་དུང་ཡང་སྐབས་རེར་ང་ཚོས་བྱམས་པ་དང་སྙིང་རྗེའི་དབང་གིས་མི་དགེ་བའི་ལས་ལ་འཇུག་དགོས་ཐུག་གི་ཡོད། 

འགྱུར་ལྡོག་གཏོང་རྒྱུ་མེད་པའི་སྐྱོན།

ཁྲིམས་ནི་ཁྲིམས་རེད། ནང་པའི་བཟང་སྤྱོད་ནི་ཁྲིམས་ལ་གཞི་རྩ་བྱས་ཡོད་པའི་བསམ་བློ་ཡོད་ཅེས་པའི་བསམ་བློ་འདི་གལ་ཏེ་ང་ཚོར་ཡོད་ན། འདི་ནི་ང་ཚོར་འཕྲད་པའི་དཀའ་ངལ་ཞིག་རེད། གལ་ཏེ་དེ་ཡིག་ཐོག་ཏུ་བྲིས་ཡོད་ན། དེ་ནི་རྩ་ཆེན་པོ་དང་འགྱུར་ལྡོག་གཏོང་རྒྱུ་མེད་པ་རེད། ང་ཚོར་རྟག་ཏུ་གནས་སྟངས་ལ་དཔྱད་པ་བྱས་ནས་དཀའ་ངལ་ངོ་མར་ཐག་གཅོད་བྱེད་དགོས་པར་བསླབས་ཡོད། གལ་སྲིད་ང་ཚོས་ཁྲིམས་ཀྱི་རྩ་འཛིན་ཡི་གེ་ལ་དྲག་པོའི་སྒོ་ནས་འཛིན་པའི་གནས་སྟངས་དེ་ལ་བརྟག་དཔྱད་བྱས་ཡོད་ན། དཀའ་ངལ་ངོ་མ་དེ་གང་ཡིན་པའམ་ཡང་ན་ཁྲིམས་ནང་གི་རྨོངས་ཞེན་གྱི་ཡིད་ཆེས་བྱ་རྒྱུའི་རྩ་བ་དེ་གང་རེད་དམ། དཀའ་ངལ་ནི་ང་ཞེས་བྱ་བ་ནོར་བ་ཞིག་ལ་འཛིན་པ་སྐྱེ་གི་ཡོད་པ་དེ་རེད། ང་ཚོ་རང་གིས་རང་ལ་གཉིས་སྣང་གི་ལྟ་ཚུལ་ཞིག་ཡོད། ང་ཞེས་བྱ་བ་རྡོག་རྡོག་ཚུགས་ཐུབ་ཏུ་གྲུབ་པ་ཞིག་ཡོད་པ་དང་དེ་སྤྱོད་རྩུབ་ཅན་དང་སྒྲིག་བཅུན་དགོས་ངེས་ཤིག་ཏུ་ལྟ་གི་ཡོད། དེ་ནས་ང་ཞེས་བྱ་བ་གཞན་ཞིག་ཡོད་པ་དེ་ནི་སྒྲིག་བཅུན་མཁན་དེ་ཡིན་པ་རེད། ང་ཚོས་ “ངས་ལས་འདི་བྱེད་པ་ལས་ངེས་པར་དུ་ཟློག་དགོས་ཀྱི་འདུག་” ཅེས་བསམ་གྱི་ཡོད། དེ་ནི་ང་ཞེས་བྱ་བ་ཞིག་ཕྱོགས་གཅིག་ན་ཡོད་པ་དང་། དེས་སོ་སོ་རང་ཉིད་ཕྱོགས་གཞན་ཞིག་ནས་གླེན་པའི་ལས་བྱ་རྒྱུ་མཚམས་འཇོག་བྱེད་རྩིས་ཡོད་པ་ལྟ་བུ་བསམ་གྱི་ཡོད། ང་ཚོར་བློའི་ཁྱེར་སོ་དེ་འདྲ་ཞིག་ཡོད་སྐབས། ང་ཞེས་བྱ་བ་རྡོག་རྡོག་ཚུགས་ཐུབ་ཏུ་གྲུབ་པ་གཉིས་ལ་ཡིད་ཆེས་བརྟན་པོ་ཞིག་ཡོད། དེ་གཉིས་ནི་འབྱུང་སྲིད་པའི་ནག་ཉེས་ཅན་དེ་དང་ཉེན་རྟོག་པ་གཉིས་རེད། ང་ཚོས་ང་ཞེས་བྱ་བ་དེ་ལ་ལྟ་ཞིབ་བྱ་རྒྱུའི་ལས་འགན་སྤྲོད་པའི་སྤྱང་གྲུང་གི་རང་བཞིན་དེ་ནི་ང་ཚོའི་སེམས་ནང་སྤྱོད་ལམ་ལ་བྱ་ར་བྱེད་བཞིན་པའི་བདེན་གྲུབ་ཀྱི་ཀེ་ཇཱི་བྷི་ཞེས་ཟེར་བའི་གསང་བའི་ཉེན་རྟོག་པའམ་ (KGB) བྱེད་པོ་ཡོད་པ་ཆགས་ཀྱི་ཡོད། ང་ཚོས་ད་དུང་ཁྲིམས་དེ་ཡང་རྡོག་རྡོག་ཚུགས་ཐུབ་ཏུ་གྲུབ་པ་ཞིག་ཡིན་པར་ཡིད་ཆེས་བྱེད་ཀྱི་ཡོད། ང་ཞེས་བྱ་བ་བྱ་ར་བྱེད་མཁན་ཞིག་ལྟར་རྡོག་རྡོག་ཚུགས་ཐུབ་ཏུ་གྲུབ་པར་ཡིད་ཆེས་པའི་འབྲས་བུ་གང་རེད་དམ། དེའི་འབྲས་བུ་ནི་ང་ཚོ་ཧ་ཅང་གི་གྱོང་པོ་དང་འགྱུར་ལྡོག་གཏོང་རྒྱུ་མེད་པ་རེད། 

ཚུལ་ཁྲིམས་ཀྱི་གོ་རྟོགས་ནོར་བ་འདི་ནི་སློབ་དཔོན་ཞི་བ་ལྷའི་སྤྱོད་འཇུག་ནང་གི་ཚིགས་བཅད་འགའ་ཞིག་ལ་གོ་བ་ལོག་སྒྲུབ་ལ་བརྟེན་ནས་ཤུགས་ཆེ་རུ་བཏང་ཡོད་སྲིད། གལ་ཏེ་ཁྱེད་ཀྱིས་ལས་དོན་གླེན་རྟགས་ཤིག་བྱེད་རྩིས་ཡོད་པའམ། ཡང་ན་གནོད་བྱེད་མི་དགེ་བའི་སྐད་ཆ་ཞིག་ཤོད་རྩིས་ཡོད་ན། (སྤྱོད་འཇུག་ནང་མི་དགེ་བའི་སྤྱོད་ལམ་གྱི་ཐོ་གྲངས་རིང་པོ་ཞིག་ཡོད།) གཞུང་གི་ནང་། “ཤིང་དུམ་བུ་གཅིག་དང་འདྲ་བར་གནས་དགོས་” ཞེས་གསུངས་ཡོད། ང་ཚོས་དེ་ལ་གོ་བ་ལོག་སྒྲུབ་ཀྱིས་ཤིང་དུམ་བུ་ནང་བཞིན་མཁྲེགས་པོ་དགོས་པ་དང་མི་གཟུགས་འཕྲུལ་ཆས་ནང་བཞིན་དགོས་པར་གོ་བ་ལེན་སྲིད། གལ་ཏེ་ང་ཚོས་མཁྲེགས་པོ་དང་གྱོང་པོའི་སྟངས་སྟབས་འདི་བླངས་ན། ང་ཚོས་ “ངས་བྱ་སྤྱོད་སྤེལ་རྩིས་མེད། ངས་ཡ་ལན་སློག་རྩིས་མེད། ངས་གང་ཡང་བྱེད་རྩིས་མེད་” བསམ་སྲིད། དེ་ནི་བསླབ་བྱའི་འགྲེལ་ཚུལ་ཡང་དག་པ་དེ་མ་རེད། ཤིང་དུམ་བུ་ལྟ་བུ་ཡོད་པའི་དོན་ནི། “མི་དགེ་བའི་ལས་དེ་སྤོང་བར་བརྟན་པོ་དགོས་” ཞེས་པའི་དོན་ཡིན་པ་ལས་ “ཤིང་དུམ་བུ་ཞིག་ལྟར་མཁྲེགས་པོ་དགོས་” པའི་དོན་མིན། ང་ཚོས་ང་ཞེས་བྱ་བ་ནོར་བ་འདི་ལ་བསམ་བློ་གཏོང་བའི་སྐབས། ང་ཚོ་མི་གཟུགས་འཕྲུལ་ཆས་ནང་བཞིན་མཁྲེགས་པོ་དང་གྱོང་པོ་ཆགས་ཀྱི་ཡོད། ང་ཚོས་ “སྤྱོད་རྩུབ་ཅན་གྱི་ང་འདི་ལ་སྒྲིག་གིས་བཅུན་དགོས་ཀྱི་འདུག །དེ་མིན་ང་རང་སྡུག་ཅག་རེད་” ཅེས་བསམ་གྱི་ཡོད།

ནང་པའི་བཟང་སྤྱོད་ཀྱི་རྣམ་གཞག་ལ་འཇུག་པའི་ཐབས།

དེར་བརྟེན་ང་ཚོས་ཞི་ལྷོད་བྱེད་དགོས་པ་དང་བཟང་སྤྱོད་ཀྱི་ཚུལ་ཁྲིམས་ཡང་དག་པ་བསྲུང་བའི་སྐབས་སུའང་ཞི་ལྷོད་བྱེད་དགོས་རྒྱུ་དེ་གལ་ཆེན་པོ་རེད། ང་ཚོས་དེ་ཇི་ལྟར་བྱེད་དམ། ཐོག་མར་ང་ཚོས་ཁྲིམས་ཀྱི་སྐོར་ཤོད་ཀྱིན་མེད་པར་རྩ་འཛིན་གྱི་ལམ་སྟོན་སྐོར་ཤོད་ཀྱིན་ཡོད་པ་དེ་རྟོགས་དགོས། རྩ་འཛིན་ལམ་སྟོན་དེས། གལ་ཏེ་ང་ཚོས་སྡུག་བསྔལ་སྤོང་བའམ་ཉུང་དུ་གཏོང་འདོད་ཡོད་ན། ལས་ཀྱི་རྒྱུད་རིམ་འདི་སྤོང་ཐུབ་ན་ཡག་པོ་ཡོད་པའི་ལམ་སྟོན་བྱས་ཡོད། ཐ་ན་ཁྲིམས་ཀྱི་དགོས་དོན་གང་ཡིན་པའི་ཐད་ལ་བསམ་བློ་ཙམ་ཡང་མེད་པ་དང་། དེ་ནི་གླེན་པའི་ཁྲིམས་ཤིག་ཡིན་པར་བསམས་ནའང་། འདི་ནི་ང་ཚོས་རྗེས་སུ་མི་འཇུག་ཀ་མེད་དུ་ཚོར་བའི་ཁྲིམས་ཤིག་མིན། དེ་འདྲ་མ་རེད། ནང་པའི་བཟང་སྤྱོད་ཀྱི་རྣམ་གཞག་ནི་ཆོ་མེད་དོན་མེད་ཀྱི་ཁྲིམས་མིན། སངས་རྒྱས་ཀྱིས་ང་ཚོ་རང་གིས་རང་ལ་དཀའ་ངལ་གྱི་རིགས་མི་སྐྲུན་པར་ཕན་པའི་ཆེད་སྙིང་རྗེའི་ཀུན་ནས་བསླངས་ཏེ་གནད་དོན་འགའ་ཞིག་མཛུབ་སྟོན་གནང་ཡོད། རྩ་འཛིན་ལམ་སྟོན་དེ་དག་ནི་སྙིང་རྗེ་དང་། རྒྱུ་གང་གིས་དཀའ་ངལ་བཟོ་གི་ཡོད་པ། གང་གིས་དཀའ་ངལ་དེ་སེལ་གྱི་ཡོད་པ་རྟོགས་པ་ལ་བརྟེན་ནས་བྱུང་ཡོད། ང་ཚོར་འཕྲད་པའི་གནས་སྟངས་ཚང་མ་མི་འདྲ་བ་རེད། གནས་སྟངས་རེ་རེའི་ནང་ཕན་ཐོགས་ཅན་གྱི་བྱ་སྤྱོད་སྤེལ་སྟངས་གང་ཡིན་པ་དང་། དེའི་ལྡོག་ཕྱོགས་སུ་ང་ཚོས་སྤོང་དགོས་པའི་ལས་གང་དག་ཡིན་ཐག་གཅོད་བྱེད་པར། སོ་སོའི་ཤེས་རབ་བེད་སྤྱོད་བྱེད་དགོས། གོ་རྟོགས་འདི་ (གང་བྱེད་དགོས་པ་དང་བྱེད་མི་དགོས་པ་ཤེས་པ་) རང་བཞིན་རྩོལ་མེད་ངང་ནས་ཡོང་དགོས་ཀྱི་ཡོད་པ་ལས། གཉིས་སྣང་གི་ཉེན་རྟོག་པས་འབྱུང་སྲིད་པའི་ཁྲིམས་འགལ་ནག་ཉེས་ཅན་ལ་སྒྲིག་བཅུན་པ་ལྟ་བུ་མིན།  

སེམས་བྱུང་ཞིག་ཡིན་པའི་བཟང་སྤྱོད་ཀྱི་ཚུལ་ཁྲིམས།

ནང་ཆོས་ནང་བཟང་སྤྱོད་ཀྱི་ཚུལ་ཁྲིམས་ཟེར་བའི་དོན་ངོ་མ་དེ་གང་རེད་དམ། ནང་པའི་སྐབས་དོན་ལྟར་བྱས་ན། ང་ཚོའི་མྱོང་བའི་སྐད་ཅིག་རེ་རེ་ནི་ཆ་ཤས་སྣ་ཚོགས་པ་དུ་མས་བསྐྲུན་པ་ཞིག་ཡིན། ཆ་ཤས་དེ་དག་སྡེ་ཚན་ལྔའི་ནང་དབྱེ་ཆོག་པ་དང་། དེ་དག་ལ་ཕུང་པོ་ལྔ་ཞེས་ཟེར་བ་ཡིན། ང་ཚོས་ད་ལྟའི་དུས་སྐབས་འདི་ལ་སྐད་ཅིག་གཅིག་ཉམས་སུ་མྱོང་བཞིན་ཡོད། ད་ལྟ་སྐད་ཅིག་འདིར་ངའི་མྱོང་བ་དེ་གང་གིས་སྐྲུན་གྱིན་ཡོད་དམ། དེ་ལ་ཆ་ཤས་ཧ་ཅང་མང་པོ་ཡོད། ངའི་ལུས་པོ་འདི་ངའི་མྱོང་བའི་ཆ་ཤས་ཡིན་པ་ཤོད་མི་དགོས་ཤིང་། དབང་ཤེས་སྣ་ཚོགས་པ་ཡོད་དེ། དཔེར་ན། མིག་གི་ཕྲ་ཕུང་རྣམས་ལྟ་བུ་རེད། ངས་རྣམ་ཤེས་ཀྱི་རིགས་མི་འདྲ་བ་འགའ་ཞིག་སྤྱད་ནས་ཡུལ་གང་དག་ཡོད་པ་ཤེས་ཀྱི་ཡོད། དཔེར་ན། གཟུགས་ལྟ་བུ་མཐོང་བྱ་དང་སྒྲ་ལྟ་བུ་ཐོས་བྱ་ལྟ་བུ་རེད། དེ་བཞིན་སེམས་ཚོར་སྣ་ཚོགས་པ་ཡོད་ལ་སེམས་བྱུང་སྣ་ཚོགས་པ་ཡོད། དཔེར་ན། ཏིང་ངེ་འཛིན་དང་། རིག་པ་རྩེ་སྒྲིམ། དོ་དབྱིངས་བཅས་སོ། །དེར་བརྟེན་ཆོས་དེ་དག་ཐམས་ཅད་ཀྱིས་ང་ཚོའི་མྱོང་བའི་སྐད་ཅིག་རེ་རེ་སྐྲུན་གྱི་ཡོད་པ་དེ་དག་སྡེ་ཚན་ལྔའི་ནང་གོ་རིམ་སྒྲིག་ཆོག་པ་དང་། དེ་ལ་ཕུང་པོ་ལྔ་ཞེས་ཟེར་གྱི་ཡོད། དེ་དག་གི་ནང་བགོ་འགྲེམས་བྱས་པ་ནི་སེམས་བྱུང་ཟེར་བ་དེ་རེད། བཟང་སྤྱོད་ཀྱི་ཚུལ་ཁྲིམས་ནི་སེམས་བྱུང་ཞིག་རེད། 

ཐོག་མར་སེམས་བྱུང་ཟེར་བ་དེ་གང་རེད་དམ། ང་ཚོས་སེམས་བྱུང་དེ་རྣམ་ཤེས་དང་ཁྱད་པར་འབྱེད་ཀྱི་ཡོད། སྐད་ཅིག་རེ་རེའི་ནང་ང་ཚོར་གནས་ཚུལ་འབྱོར་བཞིན་ཡོད་པ་དང་གནས་ཚུལ་རྣམས་བཟོ་སྐྲུན་བྱེད་བཞིན་ཡོད། གནས་ཚུལ་དེ་ང་ཚོའི་ཀླད་པའི་ནང་གློག་དང་རྫས་ཀྱི་སྐུལ་སློང་གི་རྣམ་པར་འགྲོ་གི་ཡོད། རྣམ་ཤེས་དེས་ཀླད་པའི་ནང་གནས་ཚུལ་གང་འདྲ་ཞིག་ཡོང་གི་ཡོད་ཤེས་ཐུབ། དེས་གནས་ཚུལ་དུམ་ཚན་བྱེ་བྱག་ཅིག་མིག་ཤེས་ཀྱི་མཐོང་བྱར་གྱུར་བའམ་ཡང་ན་རྣ་ཤེས་ཀྱི་ཉན་བྱར་གྱུར་བ་ཞིག་ཡིན་པ་ཤེས་ཀྱི་ཡོད། དེ་ག་ནང་བཞིན་ཚ་གྲང་ལྟ་བུ་གནས་ཚུལ་དེ་ལུས་ཀྱི་མྱོང་བྱར་འགྱུར་བ་ཡིན་པའང་ཤེས་ཀྱི་ཡོད། ང་ཚོ་ཚང་མ་འབྱུང་བཞིན་པའི་ཤེས་པའམ་རིག་པའི་ཆོས་དེ་ལ་གོམས་འདྲིས་ཡོད་པ་རེད། གལ་ཏེ་ང་ཚོར་གཙོ་སེམས་མེད་ན། འགྲེལ་ཚུལ་གང་ཡང་མེད་པའི་སྒོ་ནས་གློག་གི་སྐུལ་སློང་རྗེན་པ་ཁོ་ན་ཡོད་ངེས་རེད། 

སེམས་བྱུང་རྣམས་ཀྱིས་རྣམ་ཤེས་ཀྱི་གྲོགས་བྱེད་ཀྱི་ཡོད། སེམས་བྱུང་གིས་གཙོ་སེམས་ལ་གནས་ཚུལ་ནང་དུ་འབྱོར་བ་རྣམས་ལ་འབྲེལ་བ་བྱེད་ཚུལ་ཐད་རོགས་བྱེད་ཀྱི་ཡོད། སེམས་བྱུང་གི་ནང་། དོ་སྣང་སྤྲོད་པ་དང་། སྤྲོ་བ་ཡོད་པ། ཡང་ན་གནས་ཚུལ་དེའི་ཐད་བདེ་བ་དང་སྡུག་བསྔལ་གྱི་ཚོར་བ་མྱོང་བ་བཅས་ཚུད་ཡོད་སྲིད། སེམས་བྱུང་རྣམས་ནི་དགེ་དང་མི་དགེའི་སེམས་ཚོར་གང་རུང་ཡིན་ཆོག །སེམས་བྱུང་མང་པོ་ཡོད་པ་དང་། སེམས་བྱུང་སྣ་ཚོགས་པ་དེ་དག་གིས་ང་ཚོའི་མྱོང་བའི་སྐད་ཅིག་རེ་རེ་ལ་གྲོགས་བྱེད་ཀྱི་ཡོད། བཟང་སྤྱོད་ཀྱི་ཚུལ་ཁྲིམས་ནི་སེམས་བྱུང་དེ་དག་གི་ནང་ནས་གཅིག་རེད། 

བཟང་སྤྱོད་ཀྱི་ཚུལ་ཁྲིམས་ནི་སེམས་ཀྱི་སྐུལ་ཤུགས་ཞེས་པའི་སེམས་བྱུང་གི་ནང་གསེས་དབྱེ་བ་ཞིག་རེད། སེམས་ཀྱི་སྐུལ་ཤུགས་དེས་ཕྱོགས་ངེས་ཅན་ཞིག་ལ་འགྲོ་བའི་སེམས་ཀྱི་བྱེད་ལས་ཀྱི་རྒྱུ་བྱེད་པ་དང་། དེས་ང་ཚོས་བྱ་སྤྱོད་ཅིག་སྤེལ་བའི་རྒྱུ་བྱེད་ཀྱི་ཡོད། སེམས་ཀྱི་སྐུལ་ཤུགས་དེ་ནི་སོ་སོའི་མགོ་འབྲད་འབྲད་གཏོང་བའི་ངར་ཤུགས་ཤིག་ཡིན་ཆོག་ལ། སྐད་ཆ་ཞིག་ཤོད་འདོད་ཀྱི་སྐུལ་ཤུགས་ཤིག་ཡིན་ཆོག །དེ་ག་ནང་བཞིན་དེ་ནི་འཁྱགས་སྒམ་གྱི་འགྲམ་དུ་འགྲོ་བའི་སྐུལ་ཤུགས་དེའང་ཡིན་ཆོག

འཁྱགས་སྒམ་གྱི་འགྲམ་དུ་འགྲོ་བའི་སྐུལ་ཤུགས་དང་འདོད་པ་དེ་ནི་གཟུགས་མཐོང་བརྙན་འཕྲིན་ནང་ལྟད་མོ་བལྟ་བཞིན་པ་དེས་གྲོགས་བྱེད་ཆོག་པའི་སེམས་ཀྱི་སྐུལ་ཤུགས་ཤིག་ཡིན། གཟུགས་མཐོང་བརྙན་འཕྲིན་བལྟ་བཞིན་པའི་སྐབས། ང་ཚོའི་ལུས་པོ་ (མིག་ལ་ཡོད་པའི་འོད་ཀྱི་གློག་རྫས་ཕྲ་ཕུང་) དང་མིག་ཤེས་ (གཟུགས་) བརྒྱུད་ནས་ཀླད་པའི་ནང་གཟུགས་བརྙན་མང་པོ་ཞིག་འབྱོར་གྱི་ཡོད། འོན་ཀྱང་དེར་ད་དུང་ཡང་འཁྱགས་སྒམ་འགྲམ་དུ་འགྲོ་འདོད་ཀྱི་སྐུལ་ཤུགས་ཤིག་ཀྱང་ཡོད་པ་རེད། ཡར་ལངས་བའི་ངར་ཤུགས་དེས་གཟུགས་མཐོང་བརྙན་འཕྲིན་མཐོང་བའི་མྱོང་བ་ལ་གྲོགས་བྱེད་ཀྱིན་ཡོད། བྱས་ཙང་། ང་ཚོས་སྐུལ་ཤུགས་དེ་ལ་བརྟེན་ནས་བྱ་སྤྱོད་སྤེལ་ཆོག་ལ་བྱ་སྤྱོད་མ་སྤེལ་བའི་གདམ་ཀ་དེའང་བྱེད་ཆོག །འཁྱགས་སྒམ་གྱི་འགྲམ་དུ་འགྲོ་བའི་འདོད་པ་དེ་སྐྱེ་བའི་སྐབས། “མིན། འཁྱགས་སྒམ་གྱི་འགྲམ་དུ་འགྲོ་འདོད་ཡོན་ནའང་། འགྲོ་གི་མིན། ང་རང་འཁྱགས་སྒམ་གྱི་འགྲམ་དུ་ཕྱིན་ནས་ཁུར་ར་དུམ་བུ་གཅིག་རག་པ་བྱེད་འདོད་འདུག །འོན་ཀྱང་ངས་དེ་ལྟར་བྱེད་ཀྱི་མིན། གང་ཡིན་ཞེ་ན། ང་རང་ཟས་ཚོད་ངེས་ཅན་བསྟེན་བཞིན་པའི་སྐབས་ཡིན་” ཞེས་པའི་ཐག་གཅོད་ལ་གཞི་རྩ་བྱས་ནས་བཟང་སྤྱོད་ཀྱི་ཚུལ་ཁྲིམས་དང་ལྡན་པའི་ངང་གནས་ཆོག

ད་ང་ཚོས་བཟང་སྤྱོད་ཀྱི་ཚུལ་ཁྲིམས་ཀྱི་མཚན་ཉིད་ལ་བལྟ་ཆོག །བཟང་སྤྱོད་ཀྱི་ཚུལ་ཁྲིམས་ནི་ལུས་ངག་ཡིད་གསུམ་གྱི་ལས་རྣམས་སྲུང་སྐྱོབ་ཆེད་སེམས་ཀྱི་སྐུལ་ཤུགས་དེ་ཡིན། སྲུང་སྐྱོབ་ཟེར་བའི་དོན་ནི། བྱ་སྤྱོད་ཅིག་སྤེལ་བ་ལས་སྲུང་བའམ་སྐྱོབ་པ་དེ་རེད། སྲུང་སྐྱོབ་ཀྱི་སྐུལ་ཤུགས་དེ་ནི་སོ་སོའི་སེམས་དེ་གཞན་ལ་གནོད་པའི་རིགས་གང་ཡང་མི་བྱེད་པར་རྒྱབ་ཀྱིས་ཕྱོགས་པ་ལས་འབྱུང་གི་ཡོད། བྱས་ཙང་། ངས་གཞན་དག་ལ་གནོད་བསྐྱལ་འདོད་མེད་པ་སོང་ཙང་། ངས་སོ་སོའི་བྱ་སྤྱོད་ལ་སྲུང་སྐྱོབ་བྱེད་ཀྱི་རེད་ལ་གནོད་བྱེད་མི་དགེ་བའི་ལས་བྱ་རྒྱུ་སྤོང་གི་རེད། དེ་ནི་ “མིན། ངས་དེ་འདྲ་བྱེད་ཀྱི་མིན། ངས་ངའི་བུ་མོས་ཤིང་ཏོག་ཁུ་བ་གཤོས་པར་བརྟེན་རྡུང་རྡེག་གཏོང་གི་མིན། ཁོ་མོས་ནོར་འཁྲུལ་དེ་བཟོས་པ་སོང་ཙང་། ངས་སྐད་ལོག་རྒྱག་གི་མིན་” ཞེས་བརྗོད་པའི་སྐུལ་ཤུགས་དེ་ཡིན། སྐུལ་ཤུགས་དེའང་སྔོན་གྱི་དུས་སུ་གཞན་ལ་གནོད་འཚེ་བྱེད་པར་བསྐུལ་བའི་སེམས་བྱུང་གནོད་གཞི་ཅན་ནམ་མི་དགེ་བ་ལས་རྒྱབ་ཀྱིས་ཕྱོགས་བ་ལས་འབྱུང་ཆོག་པ་ཡིན། ཁོང་ཁྲོའི་དབང་གིས་བྱ་སྤྱོད་སྤེལ་རྒྱུ་སྤོང་བའི་སྐུལ་ཤུགས་དེ་ང་ཚོར་ཡོད་ཆོག །ཁོང་ཁྲོ་ལས་ཐར་བར་གཞི་བྱས་ནས་ང་ལ་ཁྲིམས་རང་བསྲུང་གི་ཚུལ་ཁྲིམས་ཀྱི་སྐུལ་ཤུགས་དེ་ཡོད་པ་དང་། དེ་ལ་བརྟེན་ནས་ངས་ཁོང་ཁྲོ་ཟ་བ་དང་ཁོང་ཁྲོའི་དབང་གིས་བྱ་སྤྱོད་སྤེལ་རྒྱུ་སྤོང་བར་རོགས་བྱེད་ཀྱི་རེད།

བཟང་སྤྱོད་ཀྱི་ཚུལ་ཁྲིམས་ནི་སྐད་ཅིག་ (དཔེར་ན། ངས་རང་གི་བུ་མོར་སྐད་ལོག་རྒྱག་འདོད་ཡོད་པའི་དུས་སྐབས་ཀྱི་སྐད་ཅིག་དེར་ངས་ཕྱིར་འཐེན་བྱེད་པ་ལྟ་བུ་) གི་ནང་འབྱུང་བའི་སྐུལ་ཤུགས་ཙམ་ཞིག་མིན་པར། དེ་ནི་ང་ཚོའི་སེམས་རྒྱུན་དུ་སྤྱིར་བཏང་གི་ལམ་སྟོན་ལྟར་ཡོད་པའི་རྩ་དོན་འདིའི་སྤྱིའི་རྣམ་པ་ཞིག་ཡིན་ཏེ། “ངས་སྤྱོད་ལམ་གྱི་རིགས་འགའ་ཞིག་སྤོང་གི་ཡིན། ངས་དྲན་པ་ཉེ་བཞག་ལག་བསྟར་བྱེད་ཀྱི་ཡིན། དེ་ནི་སེམས་ཀྱི་སྦྱར་རྩི་ལྟ་བུ་ཡིན་པ་དང་། དེས་སྐད་ལོག་རྒྱག་པར་བཀག་སྡོམ་བྱེད་ཀྱི་ཡོད། དེ་ནས་ངས་ཤེས་བཞིན་ལག་ལེན་བསྟར་ནས་གལ་ཏེ་ལམ་ལོག་པར་འགྲོ་གི་འདུག་དང་མི་འདུག་ཐད་ལྟ་ཞིབ་དང་བྱ་ར་བྱེད་ཀྱི་ཡིན་” ཞེས་པ་ལྟ་བུ་རེད། 

གཞན་ལ་གནོད་ངེས་ཡིན་པའི་མི་དགེ་བའི་སྤྱོད་ལམ་སྤོང་བའི་སྒང་ལ་བཟང་སྤྱོད་ཀྱི་ཚུལ་ཁྲིམས་ལ་ནང་གསེས་ཀྱི་དབྱེ་བ་མང་པོ་ཡོད། བྱས་ཙང་། སྤྱིར་བཏང་གི་ཆ་ནས་བཤད་ན། ཚུལ་ཁྲིམས་ཟེར་བའི་དོན་ནི། གཞན་ཙམ་མིན་པར་རང་ཉིད་ལའང་གནོད་གཞི་ཅན་གྱི་མི་དགེ་བའི་སྤྱོད་ལམ་སྤོང་བ་དང་དགེ་བའི་ལས་མི་སྤོང་བ་ལ་ཟེར། ཕྱོགས་གཞན་ཞིག་ནས་ངས་སྒོམ་རྒྱག་པ་དང་། སློབ་སྦྱོང་བྱེད་པ། དེ་བཞིན་ཆོས་ཕྱོགས་ཀྱི་ཉམས་ལེན་སྣ་ཚོགས་པ་སོགས་དགེ་བའི་ལས་བྱེད་པའི་ཚུལ་ཁྲིམས་དང་ལྡན་པ་ཡིན། དེར་མ་ཟད། གཞན་ལ་ཕན་འདོགས་པའི་ཆེད་དུ་བཟང་སྤྱོད་ཀྱི་ཚུལ་ཁྲིམས་ཀྱང་ཡོད། 

དེར་བརྟེན་བཟང་སྤྱོད་ཀྱི་ཚུལ་ཁྲིམས་དེ་ལ་དབྱེ་བ་གསུམ་ཡོད་དེ། མི་དགེ་བའི་སྤྱོད་ལམ་སྤོང་བའི་ཚུལ་ཁྲིམས་ (ཉེས་སྤྱོད་སྡོམ་པའི་ཚུལ་ཁྲིམས་) དང་། དགེ་བའི་སྤྱོད་ལམ་ལ་འཇུག་པ་ (དགེ་བ་ཆོས་སྡུད་ཀྱི་ཚུལ་ཁྲིམས།) གཞན་ལ་ཕན་འདོགས་པ་ (སེམས་ཅན་དོན་བྱེད་ཀྱི་ཚུལ་ཁྲིམས་) བཅས་ཡིན། བཟང་སྤྱོད་ཀྱི་ཚུལ་ཁྲིམས་ནི་སེམས་དེ་ཁ་ཕྱོགས་ངེས་ཅན་ཞིག་ལ་སྐྱོད་པར་བྱེད་པའི་སེམས་བྱུང་ཡིན་པ་དང་། དེས་ང་ཚོའི་མི་དགེ་བ་ལས་སྤོང་ཕྱིར་དང་། དགེ་བའི་སྤྱོད་ལམ་ལ་འཇུག་པའི་ཕྱིར། སེམས་ཅན་གྱི་དོན་བྱེད་པའི་ཕྱིར་དུ་རང་གི་སྤྱོད་ལམ་སྲུང་སྐྱོབ་བྱེད་ཀྱི་ཡོད། བཟང་སྤྱོད་ཀྱི་ཚུལ་ཁྲིམས་ཀྱིས་ང་ཚོའི་སྤྱོད་ལམ་སྲུང་སྐྱོབ་བྱེད་ཀྱིན་ཡོད་པ་དང་། དེ་ཡང་ཧ་ཅང་གཟབ་ནན་གྱིས་བྱེད་ཀྱི་ཡོད།

སེམས་བྱུང་གཞན་ཞིག་ནི་བཟང་སྤྱོད་ཀྱི་ཚུལ་ཁྲིམས་དང་ལྷན་དུ་འགྲོ་གི་ཡོད་པ་དེ་ལ་གཅེས་སྐྱོང་གི་བསམ་ཕྱོགས་སམ་བག་ཡོད་ཟེར། བག་ཡོད་ཟེར་བ་ནི་གཞན་དང་རང་གི་གནས་སྟངས་ལ་དོ་གལ་ཆེན་པོ་བྱེད་པའི་སེམས་བྱུང་ཞིག་ཡིན་པ་དང་། གནས་སྟངས་དེ་ལ་བརྟེན་ནས་བག་ཡོད་ཀྱི་བསམ་ཕྱོགས་དེས་དགེ་བའི་བསམ་བློའི་གོམས་གཤིས་དང་ཕན་ཐོགས་ཅན་གྱི་སྤྱོད་ལམ་ཞིག་སྐྱེད་པར་བྱེད་ཀྱི་ཡོད། དེ་ག་ནང་བཞིན་མི་དགེ་བ་དང་གནོད་བྱེད་ཀྱི་སྤྱོད་ལམ་གྱི་ཕྱོགས་སུ་འགྲོ་བ་ལས་སྲུང་སྐྱོབ་བྱེད་ཀྱི་ཡོད། གཅེས་སྐྱོང་གི་བསམ་ཕྱོགས་སམ་བག་ཡོད་ལ་སྐབས་རེར་ “གཟབ་ནན་བྱེད་པ་” ཞེས་བསྒྱུར་ཆོག །དཔེར་ན། གལ་ཏེ་ངས་ཁྱེད་ལ་སྐད་ལོག་རྒྱག་ན། དེས་ཁྱེད་ལ་སྡུག་ཅག་ཚོར་འཇུག་གི་རེད། ཁྱེད་རང་སྡུག་ཅག་ཚོར་བའི་སྒང་ལ། གལ་ཏེ་ངས་སྐད་ལོག་རྒྱག་ན། ང་རང་ཧ་ཅང་བློ་ཕམ་གྱི་རེད། དེའི་རྗེས་ལ་ང་རང་གཉིད་ཁུག་མི་ཐུབ་པ་ཆགས་སྲིད་པ་དང་སྡུག་བསྔལ་མྱོང་གི་རེད་ཅེས་དོ་གལ་ཆེན་པོ་བྱེད་ཀྱི་ཡོད། འདི་ལ་ངས་དོ་གལ་ཆེན་པོ་བྱེད་ཀྱི་ཡོད་དམ། བག་ཡོད་ཀྱི་བསམ་ཕྱོགས་འདིས་ངའི་སྤྱོད་ལམ་གྱིས་གཞན་དང་སོ་སོ་རང་ཉིད་ལ་རྗེས་འབྲས་ཇི་འབྱུང་ཐད་བསམ་བློ་གཏོང་བར་རོགས་བྱེད་ཀྱི་ཡོད། འདིས་ང་ལ་དགེ་བའི་སྤྱོད་ལམ་འགའ་ཞིག་སྐྱེད་པ་དང་མི་དགེ་བའི་སྤྱོད་ལམ་སྤོང་བར་ཕན་གྱི་ཡོད། 

བཟང་སྤྱོད་ཀྱི་ཚུལ་ཁྲིམས་དང་ལྡན་པའི་ཆེད་བག་ཡོད་ཀྱི་བསམ་ཕྱོགས་འདི་ནི་དགོས་གལ་ཞིག་ཡིན། འདིས་གལ་ཏེ་ངས་མི་དགེ་བའི་ལས་བྱས་ན། དེས་དཀའ་ངལ་བཟོ་གི་རེད། ཡང་ན་གལ་ཏེ་ངས་རོགས་མ་བྱས་ན། དེས་ཀྱང་དཀའ་ངལ་བཟོ་གི་རེད་ཅེས་དོ་གལ་ཆེན་པོ་བྱེད་པར་ཕན་གྱི་ཡོད། དཔེ་ཆ་བཞག་ན། ངས་བུད་མེད་ཅིག་གིས་ཕྲུ་གུ་སྐྱེལ་འདྲེན་བྱེད་ས་ཞིག་སྐས་འཛེགས་ནས་ཡར་ཁྱེར་མི་ཐུབ་པའི་དཀའ་ངལ་ཡོད་པ་མཐོང་བའི་དབང་དུ་བཏང་ནས། དེའི་སྐབས་སུ་ “གལ་ཏེ་ངས་མོ་རང་ལ་ཕྲུ་གུ་དང་ཕྲུ་གུ་སྐྱེལ་འདྲེན་བྱེད་ས་དེ་སྐས་འཛེགས་ནས་ཡར་ཁྱེར་རོགས་མ་བྱས་ན། དེ་ནི་ང་ཧ་ཅང་རང་འདོད་དོན་གཉེར་ཅན་ཡིན་པ་རེད། གལ་ཏེ་ང་རང་ཕྲུ་གུ་དང་མཉམ་དུ་ཡོད་མཁན་དེ་ཡིན་ན། ང་རང་ལ་མི་གཞན་ཞིག་རོགས་པ་དགོས་ངེས་རེད།” 

བཟང་སྤྱོད་ཀྱི་ཚུལ་ཁྲིམས་ལ་བརྟེན་ནས་ང་རང་རྟག་ཏུ་ཕན་ཐོགས་ལྡན་པའི་ཕྱོགས་སུ་འགྲོ་འདོད་ཡོད། བྱས་ཙང་། ངས་རྟག་ཏུ་ཚུལ་ཁྲིམས་བསྲུང་གི་ཡོད། གང་ཡིན་ཞེ་ན། ང་ལ་བག་ཡོད་ཀྱི་བསམ་ཕྱོགས་འདི་ཡོད། ངས་དྲན་པ་ཉེར་བཞག་སྤྱད་ནས་རང་ཉིད་ཚུལ་ཁྲིམས་ལ་སྦྱར་ནས་སྡོད་ཀྱི་ཡོད། གལ་ཏེ་སེམས་རྒྱ་ཡན་དུ་ཤོར་ཉེན་ཡོད་ན། ངས་ཤེས་བཞིན་བེད་སྤྱོད་བྱེད་ཀྱི་ཡོད། ངས་གང་ཞིག་འོས་འཚམ་ཡིན་པ་དང་། འོས་འཚམ་མིན་པ། གང་ཞིག་གནས་སྟངས་ལ་རན་འཚམ་ཡིན་མིན་མིག་བཙུམས་ནས་ཁྲིམས་ཀྱི་རྗེས་སུ་མི་འཇུག་པར། ཤེས་རབ་ཀྱིས་རྣམ་པར་འབྱེད་དགོས། ང་ཚོས་དེ་མཁྲེགས་པོ་མིན་པའི་སྒོ་ནས་བྱེད་ཀྱིན་ཡོད། གང་ཡིན་ཞེ་ན། ཕྱོགས་གཅིག་ནས་ང་ཚོར་འབྱུང་སྲིད་པའི་ཁྲིམས་འགལ་ནག་ཉེས་ཅན་ང་ཟེར་བའི་གཉིས་སྣང་གི་ཚོར་བ་ཞིག་མེད་ལ། ཕྱོགས་གཞན་ཞིག་ནས་འབྱུང་སྲིད་པའི་ནག་ཉེས་ཅན་དེ་རྟག་ཏུ་སྲུང་སྐྱོབ་བྱེད་མཁན་གྱི་ང་ཞེས་བྱ་བའི་ཉེན་རྟོག་པ་ཞིག་མེད། 

ང་ཚོས་ནང་པའི་ལྟ་ཚུལ་གྱི་སྒོ་ནས་ང་ཞེས་བྱ་བ་དེའི་སྐོར་ཤོད་སྐབས། ཀུན་རྫོབ་ཀྱི་ང་ཞེས་སུ་གྲགས་པ་ཞིག་ཡོད། བྱས་ཙང་། ང་ཚོས་སྐད་ཅིག་རེ་རེ་ལ་ང་ཞེས་གོ་བར་བྱེད་ཆོག་སྟེ། དཔེར་ན། ངས་འདི་བྱེད་བཞིན་ཡོད་དང་ངས་དེ་བྱེད་ཀྱིན་ཡོད་ཟེར་བ་ལྟ་བུ་རེད། ང་ཟེར་བ་འདི་ཚིག་དང་དོན་ཙམ་མིན་པར་དེ་ལ་གོ་དོན་ཞིག་ཡོད། དེ་ནི་ང་ཚོའི་སེམས་ཀྱི་ནང་གཞན་ལ་བལྟོས་མེད་ཀྱིས་རང་དབང་དུ་གནས་པ་ཞིག་མིན། གལ་ཏེ་ཁྱེད་ཀྱིས་ལུས་པ་ལོགས་སུ་ཆ་ཤས་སུ་འབྱེད་པའམ་ཀླད་པ་ཆ་ཤས་སུ་ཕྱེས་ན། ང་ཞེས་བྱ་བ་དེ་རྙེད་མི་ཐུབ། ང་ཚོར་ལུས་པོ་དང་། སེམས། སེམས་ཚོར་ཞེས་པའི་བྱེད་ལས་ཀྱི་སྡེ་ཚན་ཆ་ཚང་བ་ཞིག་ཡོད་པ་དེས་བྱ་བ་བྱེད་ཀྱིན་ཡོད། བྱས་ཙང་། ང་ཚོས་ང་དང་གཞན་ཞིག་གི་དབར་ཁྱད་པར་འབྱེད་ཐུབ། བག་ཡོད་ཀྱི་བསམ་ཕྱོགས་ལ་བརྟེན་ནས་ང་ཚོའི་སྤྱོད་ལམ་གྱིས་ཀུན་རྫོབ་ཀྱི་ང་ལ་ཕན་གནོད་འགྲོ་བར་གཟབ་ནན་བྱེད་ཀྱི་ཡོད། གལ་ཏེ་ང་ཚོར་ཀུན་རྫོབ་ཀྱི་ང་ཟེར་བའི་ཚོར་བ་ཞིག་དང་ཀུན་རྫོབ་ཀྱི་ང་ལ་ཤེས་རྟོགས་གང་ཡང་མེད་ན། ང་ཚོས་གང་ལའང་གཅེས་སྐྱོང་དང་གཟབ་ནན་བྱེད་ངེས་མིན། ངས་རང་ཉིད་སངས་རྒྱས་ཀྱི་གོ་འཕང་འཐོབ་པར་གཟབ་ནན་བྱེད་ངེས་མ་རེད། ངས་ཞོགས་པ་ཉལ་ཁྲི་ནས་ཡར་ལངས་དགོས་པའི་ཐད་གཟབ་ནན་བྱེད་ངེས་མ་རེད། དེར་བརྟེན་ཀུན་རྫོབ་ཀྱི་ང་འདི་སྣང་མེད་གཏོང་མི་ཉན། གང་ལྟར་ཡང་། ང་ཚོས་སོ་སོ་རང་ཉིད་ལ་རྡོག་རྡོག་ཚུགས་ཐུབ་ཏུ་གྲུབ་པའི་ང་ཞིག་ཏུ་ལྟ་ཚུལ་འཛིན་པའི་སྐབས། ང་ཚོར་གཉིས་སྣང་ཞིག་འབྱུང་གི་ཡོད། དེ་ནི་འབྱུང་སྲིད་པའི་བཙོན་པ་དང་དེ་ལ་སྲུང་སྐྱོབ་བྱེད་མཁན་གྱི་ཉེན་རྟོག་པ་གཉིས་རེད། ང་ཚོ་ཧ་ཅང་གྱོང་པོ་དང་མགོ་མཁྲེགས་ཅན་ཆགས་པ་དང་དེས་དཀའ་ངལ་བཟོ་གི་ཡོད། 

དེ་འདྲ་སོང་ཙང་། ཀུན་རྫོབ་ཏུ་གྲུབ་པའི་ང་དང་རྩ་ནས་གྲུབ་མེད་པའི་ཡིན་པ་མི་སྲིད་པའི་ང་ཞེས་བྱ་བ་ནོར་བ་དེ་གཉིས་དབར་གྱི་ཁྱད་པར་འབྱེད་རྒྱུ་གང་འཚམ་གྱི་ཁག་པོ་རེད། དེ་ལ་བརྟག་དཔྱད་ཞིབ་འཇུག་དང་ཁ་ནང་བལྟས་ཀྱི་དཔྱད་པ་མང་པོ་དགོས་ཀྱི་ཡོད། འོན་ཀྱང་ང་ཚོ་བཟང་སྤྱོད་དང་ལྡན་པའི་མི་ཞིག་ཡིན་པ་དང་། ང་ཚོར་བཟང་སྤྱོད་ཀྱི་ཚུལ་ཁྲིམས་ཡོད་པའི་སྐབས། གལ་ཏེ་དེ་འདྲ་ཡིན་པའི་རྒྱུད་རིམ་གྱི་ནང་ང་ཚོ་ཧ་ཅང་གྱོང་པོ་དང་། མགོ་མཁྲེགས་པོ། དལ་ལྷོད་མེད་པ། ཕྱོགས་གཞན་ཞིག་ནས་ང་ཚོ་བདེ་པོ་མེད་ན། ང་ཚོས་ཕལ་ཆེར་ཡིན་པ་མི་སྲིད་པའི་ཚུགས་ཐུབ་ཀྱི་ང་ཞིག་ལ་བསམ་བློ་གཏོང་བ་གཞིར་བཞག་ཐོག་ཚུལ་ཁྲིམས་ཉམས་ལེན་བྱེད་ཀྱིན་ཡོད་སྲིད། གལ་ཏེ་ང་ཚོ་དལ་ལྷོད་མང་བ་ཡོད་ན། དེ་ནས་ང་ཚོས་བཟང་སྤྱོད་ཀྱི་ཚུལ་ཁྲིམས་དེ་བཟང་པོའི་སྒོ་ནས་ཡག་ག་ཉམས་ལེན་བྱེད་ཀྱིན་ཡོད་སྲིད། དལ་ལྷོད་ངང་ཡོད་པ་ཟེར་དུས་ར་ལང་ཆང་ལང་གི་དོན་མིན་པར། དེ་ནི་ཚུལ་ཁྲིམས་ཀྱི་ཆ་ནས་སྟབས་བསྟུན་བདེ་བ་དང་སྤྲོ་ཉམས་ཆེ་བའི་དོན་རེད། གལ་ཏེ་ང་ཚོས་གནས་སྟངས་རེ་རེའི་ནང་རན་འཚམ་ཆགས་པའི་བྱ་སྤྱོད་སྤེལ་ཐུབ་ན། གཞན་ལ་གང་གིས་ཕན་པ་དང་གང་གིས་སོ་སོ་རང་ཉིད་ལ་ཕན་པ་དང་གནོད་ཀྱི་ཡོད་མེད་ལ་བསམ་ཞིབ་བྱེད་པ་དང་བཅས་ཏེ། ང་ཚོས་ཕ་རོལ་ཏུ་ཕྱིན་པའི་སྐབས་ནང་ཆོས་ནས་གསུངས་པའི་དགོངས་དོན་ལྟར། བཟང་སྤྱོད་ཀྱི་ཚུལ་ཁྲིམས་ཕལ་ཆེར་ཉམས་ལེན་བྱེད་ཀྱིན་ཡོད། 

ཕ་རོལ་ཏུ་ཕྱིན་པ་རྣམས་ནི། ཚུལ་ཁྲིམས་དང་། བཟོད་པ། སྦྱིན་པ། བརྩོན་འགྲུས། བསམ་གཏན། ཤེས་རབ་བཅས་པ་བྱང་ཆུབ་སེམས་ཀྱི་ཀུན་སློང་གིས་རྩིས་ཟིན་པའི་སྒོ་ནས་ཉམས་ལེན་བྱེད་པའི་སྐབས། དེ་ནི་ཕ་རོལ་ཏུ་ཕྱིན་པ་ཆགས་ཀྱི་ཡོད། (ཐེག་པ་ཆུང་ངུའི་ནང་དུའང་ཕ་རོལ་ཏུ་ཕྱིན་པ་ཡོད། ཐེག་པ་ཆུང་ངུ་ཟེར་བ་ནི། ཐར་འདོད་ཀྱི་ཆོད་སེམས་དང་ངེས་འབྱུང་གི་བསམ་པ་ལ་བརྟེན་ནས་ཉམས་ལེན་བྱེད་པ་ལ་ཟེར། ཐེག་པ་ཆེན་པོ་ནི་བྱང་ཆུབ་ཀྱི་སེམས་ཀྱིས་རྩིས་ཟིན་པའི་སྒོ་ནས་ཉམས་ལེན་བྱེད་པ་ལ་ཟེར། བྱས་ཙང་། ཕ་རོལ་ཏུ་ཕྱིན་པ་ནི་ཐེག་པ་ཆེ་ཆུང་གཉིས་ཀའི་ནང་ཡོད།) གང་ལྟར་ཡང་། གལ་ཏེ་ཁྱེད་ཀྱིས་ཕ་རོལ་ཏུ་ཕྱིན་པ་ཉམས་སུ་བླངས་ན། ཕར་ཕྱིན་དྲུག་པོ་རེ་རེ་བཞིན་ཁྱེད་ཀྱིས་ཉམས་ལེན་བྱེད་པ་དང་ལྷན་དུ་ཕར་ཕྱིན་གཞན་ལྔ་པོ་དུས་མཉམ་དུ་ཉམས་ལེན་བྱེད་དགོས་པར་ལམ་སྟོན་བྱས་ཡོད། དེར་བརྟེན་བཟང་སྤྱོད་ཀྱི་ཚུལ་ཁྲིམས་ལ་བརྟེན་ནས་དེར་ཡོད་པའི་ང་དང་། ཁྱོད། ཚུལ་ཁྲིམས་བཅས་ལ་ཤེས་རབ་དགོས་ཀྱི་ཡོད། ཆ་རྐྱེན་དེ་དག་ཐམས་ཅད་ཇི་ལྟར་གྲུབ་པའི་ཐད་ཤེས་རྟོགས་དགོས་རྒྱུ་ནི་ཧ་ཅང་གལ་ཆེན་པོ་རེད། 

འདི་ནི་ནང་ཆོས་ནང་བཟང་སྤྱོད་དང་འབྲེལ་བའི་ཚུལ་ཁྲིམས་ཀྱི་གཞི་རྩའི་བཤད་པ་ཞིག་ཆགས་ཡོད། དེ་ཡང་ཉམས་ལེན་གྱི་གཙོ་བོ་ཞིག་ཡིན། བཟང་སྤྱོད་ཀྱི་ཚུལ་ཁྲིམས་ནི་ཐར་པ་དང་ཐམས་ཅད་མཁྱེན་པའི་གོ་འཕང་འཐོབ་པའི་ཕྱིར་ཉམས་ལེན་བྱེད་པ་དང་རང་རྒྱུད་ལ་སྐྱེད་པར་བྱེད་ཀྱི་ཡོད་པ་ལས། མི་སེར་བཟང་པོའམ་མི་བཟང་པོ་ཙམ་ཞིག་ཆགས་པའི་ཆེད་དུ་མིན། འདི་ནི་དཀོན་མཆོག་ལྟ་བུའི་མཐུ་སྟོབས་ལ་བརྟེན་ནས་བཀའ་ཁྱབ་གཏོང་བའི་ཁྲིམས་སམ་ཡང་ན་གཞུང་ནས་བཀའ་ཁྱབ་གཏོང་བའི་ཁྲིམས་ཤིག་ཡིན་པར་ང་ཚོས་བཀའ་བརྩི་དང་ལེན་བྱེད་པར་གཞི་བྱས་མེད། འདིར་མི་བཟང་པོ་དང་ངན་པའི་བསམ་བློ་དེ་འདྲ་མེད་ལ། ནག་ཉེས་དང་། བྱ་དགའ། ཉེས་ཆད་ཀྱང་མེད། བཟང་སྤྱོད་ཀྱི་ཚུལ་ཁྲིམས་ནི་བྱེད་ལས་གསུམ་ལས་གང་རུང་ཞིག་དང་ལྡན་པའི་སེམས་བྱུང་ཞིག་ཡིན་ཏེ། ༡༽ མི་དགེ་བའི་སྤྱོད་ལམ་སྤོང་རྒྱུ། (རང་གཞན་གཉིས་ཀར་གནོད་པའི་མི་དགེ་བའི་ལས།) ༢༽ དགེ་བའི་སྤྱོད་ལམ་ལ་འཇུག་པ། (སྒོམ་རྒྱག་པ་ལྟ་བུ།) ༣༽ ཐབས་ལམ་གང་ཐུབ་ཅི་ཐུབ་ཀྱིས་གཞན་ལ་ཕན་འདོགས་པ་བཅས་རེད། དེ་ནི་ང་ཚོའི་སྤྱོད་ལམ་དེ་ཁ་ཕྱོགས་ངེས་ཅན་ཞིག་ལ་འདྲེན་པར་བྱེད་པའི་སེམས་ཀྱི་སྐུལ་ཤུགས་ཤིག་རེད། ང་ཚོས་མི་དགེ་བའི་བྱ་སྤྱོད་མི་སྤེལ་བ་དང་། དགེ་བའི་སྤྱོད་ལམ་སྤེལ་བ། དེ་བཞིན་གཞན་དོན་མི་བསྒྲུབ་པའི་ཕྱིར་བཟང་སྤྱོད་ཀྱི་ཚུལ་ཁྲིམས་ལ་བརྟེན་གྱི་ཡོད། བཟང་སྤྱོད་ཀྱི་ཚུལ་ཁྲིམས་ཀྱི་སེམས་བྱུང་འདི་ནི་བག་ཡོད་ཀྱི་བསམ་ཕྱོགས་དང་། དྲན་པ་ཉེར་བཞག །ཤེས་བཞིན། ཤེས་རབ་བཅས་ཀྱིས་གྲོགས་བྱས་ཡོད། 

གལ་ཏེ་ང་ཚོས་སེམས་ཀྱི་གནས་བབས་དེ་དག་རང་རྒྱུད་ལ་སྐྱེད་པའི་ཐབས་ལམ་ཁག་ཤེས་ཀྱི་ཡོད་ན། ཐབས་ལམ་འདི་ང་ཚོར་དུས་རྟག་ཏུ་དགོས་སམ། ཡང་ན་སྐབས་ཅིག་ལ་ང་ཚོས་སེམས་ཀྱི་གནས་བབས་དེ་དག་རྩོལ་བ་མེད་པ་དང་ཐབས་ལམ་གང་ཡང་མེད་པའི་སྒོ་ནས་རྒྱུན་སྐྱོང་བ་ཞིག་ཡོང་ཐུབ་བམ།

ཡོང་ཐུབ། མཐར་ཐུག་དེ་ནི་རང་བཞིན་གྱིས་ཡོང་གི་རེད། འགྲོ་ལུགས་འགྲོ་སྟངས་དངོས་དང་དེ་བཞིན་ང་ཚོས་ནང་པའི་ཉམས་ལེན་གྱི་ནང་ཡར་རྒྱས་གཏོང་ཐབས་བྱེད་པའི་དགེ་བའི་གནད་དོན་ཚང་མ་ནི། ༡༽ ཐོག་མར་ང་ཚོས་དེའི་སྐོར་ཐོས་དགོས་པ་དང་། དེ་ནས་ཐོས་པ་ཙམ་ལ་གཞི་བྱས་ཏེ་ང་ཚོས་ཉམས་ལེན་བྱེད་ཀྱི་ཡོད། ༢༽ འོན་ཀྱང་ང་ཚོས་གོ་རྟོགས་མ་རྙེད་ཀྱི་བར་དུ་དང་དེ་བདེན་པ་ཡིན་པར་ཡིད་ཆེས་མ་སྙེད་ཀྱི་བར་དུ་ཐོས་པ་བྱེད་དགོས། གལ་ཏེ་ཁྱེད་ཀྱིས་བཟང་སྤྱོད་ཀྱི་ཚུལ་ཁྲིམས་སྐོར་ཁོ་ན་ཐོས་ཡོད་ན། དེ་ཉམས་ལེན་མི་བྱེད་པ་སྲིད། ༣༽ འོན་ཀྱང་ཐོས་པ་དང་བསམ་པའི་རྗེས་སུ་ང་ཚོས་སྒོམ་རྒྱག་པར་གཞི་བྱས་ནས་ཉམས་ལེན་བྱེད་དགོས། དེའི་དོན་ནི་ང་ཚོས་དོན་ངོ་མར་རྒྱུ་དང་། འགྲོ་ལུགས་འགྲོ་སྟངས། ཐབས་ལམ་བཅས་བརྒྱུད་དེ་བཟང་སྤྱོད་ཀྱི་ཚུལ་ཁྲིམས་དེ་སྐྱེད་ཀྱི་ཡོད། བྱས་ཙང་། དྲན་པ་ཉེར་བཞག་དང་། ཤེས་བཞིན། དེ་ག་ནང་བཞིན་ཐབས་ལམ་གཞན་སྣ་ཚོགས་པ་ལ་བརྟེན་ནས་ང་ཚོས་བཟང་སྤྱོད་ཀྱི་ཚུལ་ཁྲིམས་ལ་རྒྱབ་རྟེན་བྱེད་པའི་བག་ཡོད་གཅེས་སྐྱོང་གི་བསམ་ཕྱོགས་དེ་སྐྱེད་དགོས། ང་ཚོར་བཟང་སྤྱོད་ཀྱི་ཚུལ་ཁྲིམས་སྐྱེད་པར་རོགས་བྱེད་མཁན་གྱི་ཐབས་ལམ་མང་པོ་ཡོད། ཐབས་ལམ་དེ་དག་གི་ནང་། དགེ་བའི་བཤེས་གཉེན་དང་ཐག་ཉེ་པོར་གནས་པའམ། ཡང་ན་རྟག་ཏུ་དགེ་བའི་བཤེས་གཉེན་དྲན་པ། ང་ཚོའི་ཡར་རྒྱས་ལ་རྒྱབ་སྐྱོར་བྱེད་པའི་སྤྱི་ཚོགས་མི་སྡེ་མ་ནོར་བ་ཞིག་གི་ནང་གནས་པ། དེ་དང་ཕྱོགས་མཚུངས་ཀྱི་བྱ་སྤྱོད་སྤེལ་མཁན་གྱི་མི་གཞན་དག་རང་གི་ཉེ་འཁོར་དུ་ཡོད་པ་བཅས་རེད། འདི་ལ་རྩོལ་བ་དང་ལྡན་པའི་ཡར་རྒྱས་ཟེར་གྱི་ཡོད། ང་ཚོས་སོ་སོ་རང་ཉིད་རྩོལ་བ་དང་། ལས་ཀ། བརྩོན་འགྲུས་བཅས་ལ་བརྟེན་ནས་ཡར་རྒྱས་གཏོང་དགོས། མཐར་ཐུག་ཉམས་ལེན་དེ་རྩོལ་མེད་ཆགས་ཀྱི་ཡོད། རྩོལ་མེད་ཟེར་བའི་དོན་ནི། ཁྱེད་ཀྱིས་སོ་སོའི་དམིགས་ཡུལ་ལ་དྲན་གསོ་གཏོང་བར་ཡིན་གཅིག་མིན་གཅིག་རྒྱུད་རིམ་ཞིག་འགྲིམ་པར་བལྟོས་མི་དགོས་པར། དེ་ནི་རང་བཞིན་ངང་ནས་ཡོང་གི་ཡོད། 

བྱང་ཆུབ་སེམས་དཔའི་སྡོམ་པའི་ནང་ (ལྷག་པར་དུ་བྱང་སེམས་ཡན་ལག་གི་སྡོམ་པའི་ནང་) གནད་དོན་དགུའི་ཐོ་གྲངས་ཤིག་ཡོད་པ་དང་། དེ་དག་སྤོང་དགོས་ཀྱི་ཡོད། དེ་དག་ནི་ང་ཚོའི་བཟང་སྤྱོད་ཀྱི་ཚུལ་ཁྲིམས་སྐྱེད་པར་བར་ཆད་བྱེད་ངེས་པའི་སྤྱོད་ལམ་ཁག་རེད། དཔེར་ན། ངས་གོང་དུ་འགའ་ཤས་ཞུས་ཟིན་པ་ཡིན། གཞན་གྱི་དོན་དུ་སེམས་ཁུར་བྱེད་པའི་སྐབས། བྱབས་ཆུང་བར་བྱེད་པ། ང་ཚོས་དེ་དག་རང་གིས་རང་ལ་དྲན་གསོ་གཏོང་དགོས། ང་ཚོས་དེ་དག་ཉམས་ལེན་བྱེད་པར་དྲན་གསོ་གཏོང་དགོས། གང་ཡིན་ཞེ་ན། ང་ཚོའི་ཡར་རྒྱས་ལ་གནོད་པའི་གྲུབ་འབྲས་ངན་པ་དེ་སྤོང་འདོད་ཡོད། ང་ཚོའི་བཟང་སྤྱོད་ཀྱི་ཚུལ་ཁྲིམས་དེ་རྩོལ་བ་མེད་པ་ཆགས་པའི་སྐབས། བྱང་ཆུབ་སེམས་དཔའི་སྡོམ་པར་སྣང་མེད་གཏོང་གི་ཡོད་པའི་དོན་མིན་ལ། ང་ཚོར་བྱང་སེམས་སྡོམ་པ་མི་དགོས་པའི་དོན་མིན། དེའི་དོན་ནི་ང་ཚོས་ཡང་ནས་ཡང་དུ་རང་གིས་རང་ལ་དྲན་གསོ་གཏོང་མི་དགོས་པར། སྡོམ་པ་དེ་ང་ཚོས་རང་ཤུགས་ཀྱིས་དྲན་གྱི་ཡོད་པ་དང་དེ་ནི་རྟག་ཏུ་དེར་ཡོད་པ་རེད། དེ་ནི་ “ངས་དེ་དྲན་གྱི་འདུག་”ཅེས་“ངས་ཚིག་རྣམས་དྲན་གྱི་འདུག་” ཟེར་བའམ། ཡང་ན་ “ངས་སེམས་ནས་འདི་འདོན་ཐུབ་” ཟེར་བ་ལྟ་བུ་མིན་པར། དེ་ལས་ལྡོག་སྟེ། ཚུལ་ཁྲིམས་ནི་དོན་ངོ་མར་སོ་སོའི་སྤྱོད་ལམ་གྱི་ནང་དུ་མཉམ་སྡེབ་བྱས་ཡོད་པ་དང་། དེ་ནི་བཙན་དབང་བྱས་པ་ཞིག་མིན། ཐོག་མའི་སྐབས་སུ་ཉམས་ལེན་འདི་དག་མང་པོ་ཞིག་ནི་བཅོས་པ་ལྟ་བུ་ཚོར་གྱི་རེད། ཡང་ནས་ཡང་དུ་གོམས་འདྲིས་བྱེད་པ་ཁོ་ན་ལ་བརྟེན་ནས་དེ་དག་རང་བཞིན་དང་མཉམ་སྡེབ་ཆགས་ཀྱི་ཡོད། གལ་ཏེ་ང་ཚོས་སྒྲ་ཧ་ཅང་ཡངས་པའི་སྒོ་ནས་ཐ་སྙད་བེད་སྤྱོད་བྱས་ན། དེ་ནི་རྟོག་བཅས་དང་རྟོག་མེད་ཀྱི་གོ་རྟོགས་དབར་གྱི་ཁྱད་པར་དེ་རེད། (དེ་ནི་རྟོག་བཅས་དང་རྟོག་མེད་ཀྱི་ཐུན་མིན་ཐ་སྙད་སྤྱོད་སྟངས་ཤིག་མིན་ནའང་། ནུབ་ཕྱོགས་སུ་ང་ཚོས་ཚིག་དེ་དག་སྒྲ་ཡངས་པའི་དབང་དུ་དེ་ལྟར་སྤྱོད་ཀྱི་ཡོད།) ཕྱོགས་གཞན་ཞིག་ནས་ཐོག་མར་ང་ཚོར་ཚུལ་ཁྲིམས་ལ་རྟོག་བཅས་ཀྱི་གོ་རྟོགས་ཤིག་ཡོད་ཀྱང་། མཐར་ཐུག་ང་ཚོས་ཚུལ་ཁྲིམས་ལ་རྟོག་མེད་ཀྱི་གོ་རྟོགས་ཤིག་རྙེད་ཀྱི་ཡོད། དེ་ནས་ཚུལ་ཁྲིམས་དེ་ང་ཚོའི་སྤྱོད་ལམ་གྱི་ནང་རང་བཞིན་རྩོལ་མེད་ངང་ནས་མཉམ་སྡེབ་ཆགས་ཀྱི་ཡོད།།