མདུན་བསྐྱེད།
༈ སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པའི་ཚོགས་རྣམས་ཀྱིས། །འགྲོ་བ་ཕན་ཕྱིར་སངས་རྒྱས་འགྲུབ་པར་ཤོག །
སེམས་ཅན་ཐམས་ཅད་ཉེ་རིང་ཆགས་སྡང་དང་། །བྲལ་ནས་ཁྱད་པར་འཕགས་པའི་བདེ་བ་ཐོབ། ། བཟོད་དཀའི་སྡུག་བསྔལ་རྒྱ་མཚོ་ལས་བསྒྲལ་ཏེ། །ཐར་པ་དམ་པའི་བདེ་དང་བྲལ་མ་གྱུར། །
འགྲོ་ཀུན་སྲིད་ཞིའི་འཇིགས་པ་ལས་སྒྲོལ་ཕྱིར། །རྫོགས་པའི་བྱང་ཆུབ་ཐོབ་པར་འདོད་པའི་སེམས། །དེང་ནས་བཟུང་སྟེ་སངས་རྒྱས་མ་ཐོབ་བར། །སྲོག་གི་ཕྱིར་ཡང་མི་བཏང་བཟུང་བར་བགྱི། །
བླ་མ་རྒྱལ་བ་སྲས་བཅས་རྣམས། །བདག་ལ་དགོངས་པར་མཛད་དུ་གསོལ། །ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང་། །བྱང་ཆུབ་སེམས་དཔའི་བསླབ་པ་ལ། །དེ་དག་ རིམ་བཞིན་གནས་པ་ལྟར། །བདག་ཀྱང་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང་། །བྱང་ཆུམ་སེམས་དཔའི་བསླབ་པ་ལ། ། རིམ་པ་བཞིན་དུ་བསླབ་པར་བགྱི། །
དེང་དུས་བདག་ཚེ་འབྲས་བུ་ཡོད། །མི་ཡི་སྲིད་པ་ལེགས་པར་ཐོབ། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་ད་གྱུར་ཏོ། །
ད་ནི་བདག་གིས་ཅི་ནས་ཀྱང་། །རིགས་དང་མཐུན་པའི་ལས་བརྩམས་ཏེ། །སྐྱོན་མེད་བཙུན་པའི་རིགས་འདི་ལ། །རྙོག་པར་མི་འགྱུར་དེ་ལྟར་བྱ། །
མདུན་གྱི་ནམ་མཁར་ཡིད་འཕྲོག་རིན་ཆེན་ཁྲི། །ཆུ་སྐྱེས་ཉི་ཟླ་རྒྱས་པའི་དཀྱིལ་འཁོར་སྟེང་། །རྩ་བའི་བླ་མ་ཁྱབ་བདག་རྡོ་རྗེ་འཆང་། ། སྐུ་མདོག་སྔོན་པོ་ཞལ་གཅིག་ཕྱག་གཉིས་ཀྱིས། །རྡོར་དྲིལ་བཟུང་ནས་རང་འདྲའི་ཡུམ་ལ་འཁྱུད། །མཚན་དཔེའི་གཟི་འབར་རིན་ཆེན་རྒྱན་མང་འཛིན། །ཡིད་འཕྲོག་ལྷ་རྫས་གོས་ཀྱི་ན་བཟའ་ཅན། །དྲན་པ་ཙམ་གྱིས་ གདུང་བ་ཀུན་སེལ་ཅིང་། །སྐྱབས་མཆོག་མ་ལུས་འདུས་པའི་བདག་ ཉིད་དུ། །སྐྱིལ་ཀྲུང་ཚུལ་གྱིས་བཞུགས་པའི་གནས་གསུམ་དུ། །
ཡི་གེ་གསུམ་མཚན་ཧཱུཾ་གི་འོད་ཟེར་གྱིས། །རང་བཞིན་གནས་ནས་བླ་མ་རྡོ་རྗེ་འཆང་། །ཛཿཧཱུཾ་བཾ་ཧོཿགཉིས་སུ་མེད་པར་གྱུར། །
གང་གི་དྲིན་གྱིས་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང་། །བླ་མ་རིན་ཆེན་ལྟ་བུ་ཡི། །རྡོ་རྗེ་ཅན་ཞབས་པད་ལ་འདུད། །
ཨོཾ་བཅོམ་ལྡན་དཔའ་བོའ་ིདབང་ཕྱུག་ལ་ཕྱག་འཚལ་ཧུཾ་ཧཱུཾ་ཕཊ། །ཨོཾ་བསྐལ་པ་ཆེན་པོའ་ིམེ་དང་མཉམ་པའི་འོད་ཧུ་ཧཱུཾ་ཕཊ། །ཨོཾ་རལ་པའི་ཅོད་པན་མི་བཟད་པ་དང་ལྡན་ཧུ་ཧཱུཾ་ཕཊ། །ཨོཾ་མཆེ་བ་རྣམ་པར་གཙིགས་པ་འཇིགས་པའི་ཞལ་ཧུ་ཧཱུཾ་ཕཊ། །ཨོཾ་སྟོང་ཕྲག་ཕྱག་ནི་འབར་བའི་འོད་ཟེར་ཅན་ཧུ་ཧཱུཾ་ཕཊ། །ཨོཾ་དགྲ་སྟ་ཞགས་གདེངས་མདུང་ཀ་ཊཾ་འཛིན་ཧུ་ཧཱུཾ་ཕཊ། །ཨོཾ་སྟག་གི་པགས་པའི་ན་བཟའ་འཛིན་པ་ཅན་ཧུ་ཧཱུཾ་ཕཊ། །ཨོཾ་སྐུ་ཆེན་དུད་ཀ་བགེགས་མཐར་མཛད་ལ་འདུད་ཧུ་ཧཱུཾ་ཕཊ།
།ཨོཾ་བཅོམ་ལྡན་འདས་མ་རྡོ་རྗེ་ཕག་མོ་ལ་ཕྱག་འཚལ་ཧུ་ཧཱུཾ་ཕཊ། །ཨོཾ་འཕགས་མའི་རིག་མའི་དབང་ཕྱུག་ཁམས་གསུམ་གྱིས་མི་ཐུབ་ཧུ་ཧཱུཾ་ཕཊ། །ཨོཾ་འབྱུང་པོའ་ིའཇིགས་པ་ཐམས་ཅད་རྡོ་རྗེ་ཆེན་པོས་འཇོམས་ཧུ་ཧཱུཾ་ཕཊ། ། ཨོཾ་རྡ་ོརྗེ་གདན་བཞུགས་གཞན་གྱིས་མི་ཐུབ་དབང་བྱེད་སྤྱན་ཧུ་ཧཱུཾ་ཕཊ། །ཨོཾ་གཏུམ་མོ་ཁྲོ་མོའ་ིགཟུགས་ཀྱིས་ཚངས་པ་སྐེམ་པར་མཛད་ཧུ་ཧཱུཾ་ཕཊ། །ཨོཾ་བདུད་རྣམས་སྐྲག་ཅིང་སྐེམ་པས་གཞན་གྱི་ཕྱོགས་ལས་རྒྱལ་ཧུ་ཧཱུཾ་ཕཊ། །ཨོཾ་རྨུག་བྱེད་རེངས་བྱེད་རྨོངས་བྱེད་ཀུན་ལས་རྒྱལ་ཧུ་ཧཱུཾ་ཕཊ། །ཨོཾ་རྡོ་རྗེ་ཕག་མོ་སྦྱོར་ཆེན་འདོད་དབང་མ་ལ་འདུད་ཧུ་ཧཱུཾ་ཕཊ། །
བདག་པོས་བཟུང་དང་མ་བཟུང་དང་། །དངོས་བཤམས་ཡིད་ཀྱིས་སྤྲུལ་བ་ལས། །བྱུང་བ་ཕྱི་ནང་གསང་བ་ཡི། །སྣ་ཚོགས་མཆོད་སྤྲིན་རྒྱ་མཚོས་མཆོད། །
བདག་གཞན་ལུས་ངག་ཡིད་གསུམ་ལོངས་སྤྱོད་དུས་གསུམ་དགེ་ཚོགས་བཅས། །རིན་ཆེན་མཎ་མཎ་ཌལ་བཟང་པོ་ཀུན་བཟང་མཆོད་པའི་ཚོགས་བཅས་པ།།བློ་ཡིས་བླངས་ནས་བླ་མ་ཡི་དམ་དཀོན་མཆོག་གསུམ་ལ་འབུལ། །ཐུགས་རྗེའི་དབང་གིས་བཞེས་ནས་བདག་ལ་བྱིན་གྱིས་བརླབ་ཏུ་གསོལ། །ཨི་དམ་གུ་རུ་རཏྣ་མཎ་ཌ་ལ་ཀཾ་ནིར་ཏ་ཡ་མི།
དུས་གསུམ་ཕྱོགས་བཅུའི་བདེ་གཤེགས་མ་ལུས་པ། །གང་འདུལ་ཇི་བཞིན་ངུར་སྨྲིག་རྣམ་རོལ་གྱིས། །གྲངས་མེད་ཞིང་དུ་རྒྱལ་བའི་མཛད་པ་ཅན། །བླ་མ་རིན་པོ་ཆེ་ལ་གསོལ་བ་འདེབས། །
རྡོ་རྗེ་འཆང་གིས་བློ་དམན་བསམ་པའི་ངོར། །ཆོས་སྤྱོད་ཕན་བདེའི་ལམ་བཟང་།རབ་འབྱམས་རྒྱལ་བའི་འཁོར་ལོ་མཐའ་དག་ལས། །ལྷག་པའི་ཞིང་གི་དམ་པར་ལེགས་བསྔགས་པའི། །བླ་མ་རིན་པོ་ཆེ་ལ་གསོལ་བ་འདེབས། །
མཆོག་དང་ཐུན་མོང་དངོས་གྲུབ་མ་ལུས་ཀུན། །མགོན་ཁྱོད་ཚུལ་བཞིན་བསྟེན་པའི་རྗེས་འགྲོ་བར། །མཐོང་ནས་ལུས་དང་སྲོག་ཀྱང་ཡོངས་བཏང་སྟེ། །ཁྱོད་མཉེས་ཁོ་ན་བསྒྲུབ་པར་བྱིན་གྱིས་རློབས། །
བདག་བསྐྱེད།
དེ་ལྟར་གསོལ་བ་བཏབ་པས་བླ་མ་མཆོག །རང་གི་སྤྱི་བོའ་ིགཙུག་ཏུ་ས་མཱ་ཛཿ
སླར་ཡང་དགྱེས་བཞིན་རང་དང་རོ་གཅིག་གྱུར། །
བདག་ཉིད་རྡོ་རྗེ་སེམས་དཔའི་ང་རྒྱལ་གྱིས། །ལྷན་སྐྱེས་བདེ་ཆེན་གསང་བའི་རྡོ་རྗེ་དང་།།རང་བཞིན་སྤྲོས་བྲལ་གསང་བའི་གྷཎ་ྜཡི།།མཚོན་བྱེད་བཟུང་ནས་བཅོམ་ལྡན་འདས་མར་འཁྱུད། །
བདག་གི་ལུས་དང་དེ་བཞིན་ལོངས་སྤྱོངས་དང་། །དུས་གསུམ་དགེ་ཚོགས་ཕུང་པོ་ཅི་མཆིས་པ། །མ་གྱུར་སེམས་ཅན་ཀུན་གྱི་དོན་གྱི་ཕྱིར། །དེང་ནས་ཕངས་པ་མེད་པར་བཏང་བར་བྱ། །
༈ སོ་སོར་ཐར་པའི་ལྟུང་བ་སྡེ་ལྔ་ལས། །ཕམ་པ་བཞི་དང་ལྷག་ མ་བཅུ་གསུམ་དང་། །སྤང་ལྟུང་སུམ་ཅུ་འབའ་ཞིག་དགུ་བཅུ་དང་། །སོར་བཤགས་བཞི་དང་ཉེས་བྱས་བརྒྱ་བཅུ་གཉིས། །གཞན་ཡང་གཞིས་བསྡུས་ལྟུང་སོགས་སྤོང་བར་བགྱི། །
༈ བདག་བསྟོད་གཞན་སྨོད་ཆོས་ནོར་མི་སྟེར་ཞིང་། །བཤགས་ཀྱང་མི་ཉན་ཐེག་ཆེན་སྤོང་བ་དང་། །དཀོན་མཆོག་དཀོར་འཕྲོག་ཆོས་སྤོང་ངུར་སྨྲིག་འཕྲོག །མཚམས་མེད་ལྔ་དང་ལོག་ལྟ་གྲོང་སོགས་འཇོམས། །མ་སྦྱངས་སྟོང་ཉིད་བསྟན་དང་རྫོགས་བྱང་ལྡོག །སོ་ཐར་སྤོང་དང་ཉན་སྨོད་ཟབ་བརྫུན་སྨྲ། །མཆོག་གསུམ་དཀོར་ལེན་ཁྲིམས་ངན་འཆའ་སེམས་གཏོང་། །ཉེས་དམིགས་མི་བལྟ་སྤྱོད་འདོད་མ་ལོག་དང་། །དགའ་མགུ་ངོ་ཚ་ཁྲེལ་མེད་ཀུན་དཀྲིས་བཞི། །ཚང་དགོས་བཅུ་དྲུག་མི་དགོས་ལོག་ལྟ་དང་། །སེམས་འདོར་གཉིས་བཅས་རྩ་ལྟུང་བཅོ་བརྒྱད་བསྲུང་། །
༈ བླ་མར་བརྙས་སྨོད་བསླབ་བྱར་ཁྱད་གསོད་བྱེད། །སྤུན་ལ་སྐྱོན་བརྗོད་འགྲོ་ལ་བྱམས་པ་སྤོང་། །སྨོན་འཇུག་སེམས་གཏོང་མདོ་སྔགས་ཆོས་ལ་སྨོད། །མ་སྨིན་གསང་སྒྲོག་རང་གི་ཕུང་པོར་བརྙས། ། སྟོང་པ་ཉིད་སྤོང་གདུག་ཅན་མཛའ་བོར་བསྟེན། །ལྟ་བ་མ་དྲན་དད་ལྡན་སེམས་སུན་འབྱིན། །དམ་ཚིག་མི་བསྟེན་བུད་མེད་སྨོད་པ་སྟེ། །རྩ་ལྟུང་བཅུ་བཞི་སྲོག་དང་བསྡོས་ཏེ་བསྲུང་། །
༈ ཡན་ལག་རྩ་བཞི་ཆང་དང་བྱ་མིན་སྤོང་། །དམ་པའི་མགོན་བསྟེན་གྲོགས་ལ་བསྙེན་བཀུར་བྱ། །དགེ་བཅུ་སྐྱོང་ཞིང་ཐེག་ཆེན་ལས་ལྡོག་རྒྱུ། །བརྙས་དང་འགོམ་སྤངས་དམ་ཚིག་མ་ལུས་བསྲུང་། །
༈ མཚན་ཉིད་མི་ལྡན་ཕྱག་རྒྱར་བསྟེན་དང་འདུ་ཤེས་གསུམ་བྲལ་སྙོམས་འཇུག་བྱེད། །སྣོད་མི་རུང་ལ་གསང་རྫས་སྟོན་དང་ཚོགས་འཁོར་དབུས་སུ་འཐབ་རྩོད་བྱེད། །དད་པས་འདྲི་ལ་ལན་ལོག་འདེབས་དང་ཉན་ཐོས་ནང་དུ་ཞག་བདུན་གནས། །ཡང་དག་མིན་ཡང་རྣལ་འབྱོར་པར་རློམ་དད་པ་མེད་ལ་དམ་ཆོས་སྟོན། །
བསྙེན་སོགས་མ་དག་དཀྱིལ་འཁོར་ལས་འཇུག་དགོས་མེད་སོ་བྱང་བསླབ་ལས་འདས། ། བླ་མ་ལྔ་བཅུའི་སྐབས་དང་འགལ་བའི་སྦོམ་པོ་རྣམས་ཀྱང་ཚུལ་བཞིན་བསྲུང་། །
༈ གཡོན་པའི་ཀུན་སྤྱོད་མི་བརྙས་མཆོད། །མཚན་ལྡན་མིན་ལ་སྙོམས་འཇུག་སྤང་། །སྦྱོར་ཚེ་ལྟ་དང་འབྲལ་མི་བྱ། །ཆགས་ལས་མ་ལོས་འགྱུར་མེད་བྱ། །ཕྱག་རྒྱ་རྣམ་གཉིས་འདོར་མི་བྱ། །ཕྱི་ནང་ཐབས་ལ་གཙོ་བོར་འབད། །ཀུནྡ་མི་འབྱིན་ཚངས་སྤྱོད་བསྟེན། །བྱང་སེམས་ལེན་ཚེ་སྐྱུག་བྲོ་སྤང་། །
༈ སོ་ཐར་བྱང་སེམས་རྡོ་རྗེ་ཐེག་པ་ཡི། །རྣམ་དག་བཅས་པའི་ བསླབ་པ་ཕྲ་མོ་ལས། །རྨི་ལམ་དུ་ཡང་འདའ་བར་མི་བྱེད་པར། །རྒྱལ་བའི་བཀའ་བཞིན་བདག་གིས་བསྒྲུབ་པར་བྱ། །
ཐེག་པ་གསུམ་དང་རྒྱུད་སྡེ་བཞིས་བསྡུས་པའི། །ལུང་དང་རྟོགས་པའི་དམ་ཆོས་མ་ལུས་པ། །རྒྱལ་བའི་དགོངས་པ་ཇི་བཞིན་ལེགས་བཟུང་སྟེ། །གང་འཚམས་ཐབས་ཀྱིས་འགྲོ་བ་ཡོངས་སུ་སྒྲོལ། །
བསྔོ་བ།
༈ འདི་ལས་འོངས་པའི་རྣམ་དཀར་དགེ་བའི་མཐུས། །ཚེ་རབས་ཀུན་ཏུ་རྡོ་རྗེ་འཆང་དབང་གིས། །བཅས་པའི་མཚམས་ལས་ནམ་ཡང་མི་འདའ་བར། །རིམ་གཉིས་ལམ་གྱི་རིམ་པ་མཐར་ཕྱིན་ཤོག །མདོར་ན་འདིས་མཚོན་དཀར་དགེ་བའི་ཚོགས། །ཇི་སྙེད་བསགས་པ་དེ་ཡིས་མྱུར་དུ་བདག །ནོར་བུའི་བང་མཛོད་ཤམྦྷ་ལར་སྐྱེས་ནས། །བླ་མེད་ལམ་གྱི་རིམ་པ་མཐར་ཕྱིན་ཤོག །སྐྱེ་བ་ཀུན་ཏུ་ཡང་དག་བླ་མ་དང་། །འབྲལ་མེད་ཆོས་ཀྱི་དཔལ་ལ་ལོངས་སྤྱོད་ཅིང་། །ས་དང་ལམ་གྱི་ཡོན་ཏན་རབ་རྫོགས་ནས། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །