སྔོན་འགྲོའམ་སྦྱོར་ཆོས་ཀྱི་སྔོན་དུ་གང་དགོས་སམ།

སྐད་ཡིག་གཞན།

སྒོམ་ཐུན་གང་འདྲ་ཞིག་གི་སྔོན་དུ་བསྒྲུབ་རྒྱུའི་ཚད་ལྡན་གྱི་སྔོན་འགྲོ་དང་སྦྱོར་བའི་ཆོས་དྲུག་གི་ཉམས་ལེན་གྱི་ནང་། སྐྱབས་སུ་འགྲོ་བ་ ༼ཉེན་མེད་ཀྱི་ཁ་ཕྱོགས་༽ དང་། བྱང་ཆུབ་སེམས་ཀྱི་ཀུན་སློང་སླར་ཡང་ངེས་བརྟན་བཟོ་དགོས། འོན་ཀྱང་ང་ཚོས་ཐོག་མ་ཉིད་ནས་ཉམས་ལེན་འདི་དག་བྱེད་རྩིས་ཡོད་ན། རང་རྒྱུད་ལ་སྐྱབས་འགྲོ་དང་བྱང་ཆུབ་ཀྱི་སེམས་མ་བསྐྱེད་པར་དེ་དག་ཇི་ལྟར་བྱེད་ཐུབ་བམ། འདི་ནི་དྲི་བ་དེ་རེད།

རྒྱབ་ལྗོངས་ཀྱི་ལོ་རྒྱུས།

སྦྱོར་ཆོས་དྲུག་པོ་དེ་དག་ལ་ལྟ་ཚུལ་འཛིན་སྟངས་དང་དེ་དག་ལམ་རིམ་གྱི་གཞུང་སྣ་ཚོགས་པའི་ནང་ཇི་ལྟར་རན་འཚམས་ཆགས་ཀྱི་ཡོད་པའི་ཐོག་བསྡུར་ཞིབ་བྱ་རྒྱུ་དེ་དོ་སྣང་བྱེད་འོས་པ་ཞིག་ཡོད། དེ་དག་ལམ་རིམ་གྱི་གཞུང་གཅིག་ནང་སྟོན་སྟངས་གཅིག་གི་སྒོ་ནས་བསྟན་པའི་རྒྱུ་མཚན་ཙམ་གྱིས་འདི་ནི་ལམ་ཏག་ཏག་དེ་ཡིན་པ་དང་། “འདི་ནི་འདི་འདྲ་ཞིག་དགོས་ཀྱི་འདུག་” ཅེས་པའི་དོན་མིན།

གལ་ཏེ་ང་ཚོས་རྗེ་ཙོང་ཁ་པའི་ལམ་རིམ་ཆེན་མོ་མཇལ་ན། ཐོག་མར་ཁོང་གིས་དགེ་བའི་བཤེས་གཉེན་དང་ལྷན་དུ་འབྲེལ་བ་བཟང་པོ་ཞིག་དགོས་པའམ་བཤེས་གཉེན་བསྟེན་ཚུལ་གྱི་སྐོར་བསྟན་པ་དང་། དེ་ནས་ཁོང་གིས་སྦྱོར་བའི་ཆོས་དྲུག་པོ་བསྟན་ཡོད། དེ་དག་ནི། རང་གི་སྒོམ་ཁང་གཙང་བཟོ་བྱེད་པའམ་གནས་ཁང་བྱི་དོར་བྱེད་པ་དང་། མཆོད་གཤོམ་སྒྲིག་བཀོད་བྱེད་པའམ་སྐུ་གསུང་ཐུགས་རྟེན་དགྲམ་པ། སྒོམ་གདན་མ་ནོར་བར་གྲ་སྒྲིག་བྱེད་པའམ་སྟན་བདེ་བ་ལ་འཁོད་པ་ལ་སོགས་པའོ། །སྦྱོར་ཆོས་དྲུག་པོ་ནི་ཁོང་གིས་དགེ་བའི་གཤེས་གཉེན་དང་དམ་ཚིག་གཙང་མ་དང་འབྲེལ་ཐག་ཉེ་པོ་ཡོང་བའི་ཚུལ་དུ་གཏན་ལ་ཕབ་གནང་ཡོད། འོན་ཀྱང་ང་ཚོས་རྗེ་ཙོང་ཁ་པས་སྐབས་དོན་ཅི་འདྲ་ཞིག་གི་ནང་ལམ་རིམ་གསུངས་པ་ཡོད་པ་དེ་ཤེས་དགོས།  སྐབས་དོན་ནི་གསང་སྔགས་ཀྱི་དབང་ཞིག་ཡིན་པ་དང་། དེའི་ནང་ཐོག་མར་ཁྱེད་ཀྱིས་ལམ་གྱི་རིམ་པར་བསྐྱར་ཞིབ་ཅིག་བྱེད་དགོས་ཤིང་། འདི་ནི་དགེ་འདུན་པ་དང་བཙུན་མ་རྣམས་ཀྱི་ཆེད་དུ་ཡིན། དམིགས་བསལ་དེའི་སྐབས་དགེ་འདུན་པ་རྣམས་ཀྱི་ཆེད་དུ་ཡིན། ཁོང་ཚོ་ལ་སྔོན་ཚུད་ནས་དགེ་བའི་བཤེས་གཉེན་ཞིག་དང་འབྲེལ་བ་ཞིག་ཡོད། ཐོག་མར་བླ་མའམ་དགེ་བའི་བཤེས་གཉེན་དང་འབྲེལ་བ་སྟོན་པ་དེ་ནི་སྐབས་དོན་དེའི་ནང་ཡོད་པ་ཞིག་ཡིན། དེ་ཡང་ཁྱེད་ལ་སྔོན་ཚུད་ནས་དགེ་བའི་བཤེས་གཉེན་ཞིག་ཡོད་པ་དང་། དགེ་བའི་བཤེས་གཉེན་དེའི་མདུན་ནས་ད་ལྟ་ཁྱེད་ལ་དབང་འཐོབ་བཞིན་ཡོད། བྱས་ཙང་། དེ་ནི་ཁྱེད་ཀྱིས་ཇི་ལྟར་བྱ་བའི་ཚུལ་དེ་རེད།

རྒྱལ་དབང་ལྔ་པ་ཆེན་པོའི་ལམ་རིམ་འཇམ་དཔལ་ཞལ་ལུང་ལས། ཁྱེད་ཀྱིས་ལམ་རིམ་གྱི་རྒྱུད་རིམ་ཡོངས་སུ་རྫོགས་པ་འགོ་མ་བཙུགས་སྔོན་ལ་ཧ་ཅང་གལ་ཆེ་བའི་ཆ་རྐྱེན་ནི། རང་གི་རྒྱུད་ལ་སྐྱབས་འགྲོ་དང་བྱང་ཆུབ་ཀྱི་སེམས་བསྐྱེད་དགོས་ཤིང་། དེ་ནས་ཁོང་གིས་རྗེ་ཙོང་ཁ་པའི་བཀའི་རྗེས་སུ་འབྲངས་ནས་དགེ་བའི་བཤེས་གཉེན་དང་འབྲེལ་བ། དེ་ནས་སྦྱོར་བའི་ཆོས་དྲུག་བཅས་གསུངས་ཡོད། གལ་ཏེ་ཁྱེད་ཀྱིས་དེའི་ཐད་བསམ་བློ་བཏང་ན། དེས་དངོས་གནས་དྲང་གནས་དོན་ཆེན་སྟོན་གྱི་ཡོད། གང་ཡིན་ཞེ་ན། སྦྱོར་བའི་ཆོས་ཀྱི་ནང་གི་གཅིག་ནི། སྐྱབས་སུ་འགྲོ་རྒྱུ་དང་བྱང་ཆུབ་ཀྱི་སེམས་ལ་སླར་ཡང་ངེས་བརྟན་བཟོ་རྒྱུ་དེ་རེད། བྱས་ཙང་། གལ་ཏེ་ཁྱེད་ཀྱིས་དེ་གཉིས་སྔོན་ཚུད་ནས་རང་རྒྱུད་ལ་བསྐྱེད་པར་བྱས་མེད་ན། ཇི་ལྟར་བྱེད་ཐུབ་བམ།

བོད་ཀྱི་བླ་ཆེན་དུ་མས་ཉམས་ལེན་དང་དངོས་ཡོད་དང་མཐུན་པའི་གཞུང་དེ་དག་བརྩམས་མཛད་པའི་ནང་ནས་རྒྱལ་དབང་ལྔ་པ་ཆེན་པོ་ནི་ཕལ་ཆེར་ཁ་ཡོད་ལག་ཡོད་ཀྱི་ཕན་ཐོགས་ཆེ་ཤོས་དང་ལྡན་པ་ཞིག་ཡིན། ཁོང་གི་དགེ་བའི་བཤེས་གཉེན་དང་འབྲེལ་བའི་སྐོར་གསུངས་པའི་སྐབས། ཐོག་མར་ཁྱེད་ཀྱིས་དགེ་བའི་བཤེས་གཉེན་དེའི་སྐྱོན་གྱི་ཆ་རྣམས་བལྟ་དགོས་ཤིང་། དེའི་ཐད་དངོས་ཡོད་དང་མཐུན་པར་བྱེད་དགོས། དེ་དག་ཁས་མི་ལེན་པ་བྱ་མི་རུང་། ཁོང་ཚོ་ཚང་མ་སྐྱོན་བྲལ་ཡང་དག་ཅིག་མིན་ཞེས་གསུང་མཁན་དེ་ཡིན། འོན་ཀྱང་དེ་ལ་དམིགས་པ་གཏད་པ་དང་། སྐྱོན་བརྗོད་བྱེད་པ། རྙོག་དྲ་བཤད་པ་སོགས་བྱེད་པས་ཕན་ཡོན་གང་ཡང་མེད། སྐྱོན་གྱི་ཆ་དང་རྙོག་དྲའི་རིགས་ལ་དམིགས་པས། ཁྱེད་ལ་སེམས་སྐུལ་ཐེབ་ཀྱི་མེད། དེ་ནས་ཁྱེད་རང་དགེ་བའི་ཡོན་ཏན་ནམ་ཁྱད་ཆོས་བཟང་པོའི་ཕྱོགས་སུ་ཁ་བསྒྱུར་དགོས། ཡིན་ནའང་ “ཁོང་ཚོ་ཚང་མ་སངས་རྒྱས་རེད། ཁོང་རྣམ་པས་གང་བྱེད་པ་ཚང་མ་ཡང་དག་པ་རེད་” ཅེས་པའི་བསམ་ཕྱོགས་འདི་འདྲ་ཞིག་མི་དགོས། དེ་ནི་གང་འཚམས་ཀྱི་བྱིས་བློ་གཏི་མུག་ཅན་ཞིག་ཆགས་སྲིད། དགེ་བའི་བཤེས་གཉེན་དེ་སངས་རྒྱས་སུ་བལྟ་དགོས་པའི་གནད་དོན་འདི་དངོས་པོའི་གནས་ལུགས་དང་མཐུན་པ་ཞིག་གི་ནང་རན་འཚམས་ཡོད་དགོས་ཤིང་། ལྟ་ཚུལ་དེ་འདྲའི་དགོས་དོན་དང་གཞི་རྩ་གང་ཡིན་པ་བརྟག་དགོས་ངེས་ཡིན།

༧གོང་ས་མཆོག་ནས་དུ་རྟག་ཏུ་ཁོང་རྒྱལ་བ་རིན་པོ་ཆེ་སྐུ་ཕྲེང་རིམ་བྱོན་གྱི་ཐུགས་ཀྱི་རྒྱུན་དེ་ཡིན་མིན་ངེས་བརྟན་མེད་ཅེས་གསུངས་པ་དང་། ཁོང་གིས་སྤྲུལ་སྐུའི་ལམ་ལུགས་དེ་སྲོལ་རྒྱུན་གྱི་ལམ་ལུགས་ལས་རྦད་དེ་རྒྱ་ཆེ་བའི་གོ་དོན་གྱི་ཐོག་ནས་འགྲེལ་བརྗོད་གནང་གི་ཡོད། འོན་ཀྱང་ཁོང་གིས། ཁོང་༧གོང་ས་སྐུ་ཕྲེང་ལྔ་པ་དང་བཅུ་གསུམ་པ་ཆེན་པོའི་ཐུགས་ཀྱི་རྒྱུན་དེ་ཡིན་པ་ཚོར་གནང་གི་འདུག་ཅེས་གསུང་གི་ཡོད། ཁ་ཡོད་ལག་ཡོད་ཀྱི་ཐབས་ཚུལ་དེ་ལྷན་སྐྱེས་ཀྱི་རིག་པའི་ལམ་ནས་གང་རྗེས་སུ་འབྲང་བ་དེ་རེད།

པཎ་ཆེན་རིན་པོ་ཆེ་སྐུ་ཕྲེང་ལྔ་པའི་ལམ་རིམ་མྱུར་ལམ་སྟེ། འདི་ནི་༧གོང་ས་ལྔ་པ་ཆེན་པོའི་ ༼༧གོང་ས་ལྔ་པ་ཆེན་པོའི་དགེ་བའི་བཤེས་གཉེན་ནི་པཎ་ཆེན་སྐུ་ཕྲེང་བཞི་པ་རེད་༽ རྗེས་སུ་རེད། ཁོང་གིས་སྦྱོར་བའི་ཆོས་དྲུག་སྔོན་དུ་བཞག་གནང་བ་དང་། དེ་ནས་དགེ་བའི་བཤེས་གཉེན་དང་འབྲེལ་བ་དེ་བཞག་གནང་ཡོད། ཁོང་གིས་ལམ་གྱི་རིམ་པ་རེ་རེའི་སྐབས་སུ་སྒོམ་ཉམས་ལེན་ཇི་ལྟར་བྱེད་དགོས་པའི་ཐད་ལ་གང་ལ་གང་འཚམས་ཀྱི་འགྲེལ་བརྗོད་རྒྱས་པོ་གནང་ཡོད། རྒྱུ་མཚན་དེ་ལ་བརྟེན་ནས་ཁྱེད་ཀྱིས་སྦྱོར་བའི་ཆོས་ནས་འགོ་འཛུགས་བྱེད་དགོས། གང་ཡིན་ཟེར་ན། དེ་ནི་ཁྱེད་ཀྱིས་སྒོམ་ཐུན་ཞིག་འགོ་འཛུགས་བྱེད་སྟངས་དེ་རེད། དེ་ནས་ལམ་རིམ་ནང་གི་སླར་ཡང་ངེས་བརྟན་བཟོ་དགོས་པའི་བརྗོད་གཞི་དང་པོ་དེ་ནི། དགེ་བའི་བཤེས་གཉེན་ཞིག་དང་ལྷན་དུ་ཡོད་པའི་འབྲེལ་བ་དེ་ཆགས་ཀྱི་ཡོད།

ང་ཚོས་བོད་ཀྱི་སྲོལ་རྒྱུན་གཞན་དག་གི་ནང་རྙེད་པའི་ལམ་རིམ་དང་རྒྱུ་ཆ་འདྲ་བའི་འགྲེལ་བརྗོད་ཁ་ཤས་ཀྱི་ནང་། ལམ་རིམ་ཆ་ཚང་གི་མཇུག་ཏུ་དགེ་བའི་བཤེས་གཉེན་ཞིག་དང་འབྲེལ་བའི་སྐོར་གྱི་གོ་བསྡུར་དེ་ཡོང་གི་ཡོད། ༧གོང་ས་སྐུ་ཕྲེང་བཅུ་བཞི་པ་ཆེན་པོ་མཆོག་གིས་དེ་ནི་རྦད་དེ་ཡག་ག་ཡོད་པ་ཚོར་གནང་གི་ཡོད། དེ་ལ་གོ་བ་ལོག་སྒྲུབ་ཉུང་བ་དང་། རྨོངས་པ་ཉུང་བ། དེ་བཞིན་སྐབས་འགར་དམའ་འབེབས་ཉུང་བ་ཡོང་གི་ཡོད། དེ་ཡང་༧གོང་ས་ལྔ་པ་ཆེན་པོས། ལམ་རིམ་གྱི་རྒྱུད་རིམ་ཡོངས་རྫོགས་འགོ་འཛུགས་བྱེད་པར། ཁྱེད་ལ་སྐྱབས་སུ་འགྲོ་དང་བྱང་ཆུབ་ཀྱི་སེམས་སྔོན་ཚུད་ནས་བསྐྱེད་དགོས་ཞེས་གསུངས་པའི་སྐབས་ནས་ཁོང་གིས་བརྡ་སྟོན་གནང་ཟིན་པ་རེད།

དེ་ནི་རྒྱབ་ལྗོངས་ཀྱི་ལོ་རྒྱུས་ཉུང་བསྡུས་ཤིག་རེད། ཡིན་ནའང་ད་དུང་ང་ཚོས་དེ་དག་དང་འབྲེལ་བའི་ཉམས་ལེན་གྱི་རིགས་ལ་འཇུག་ཚུལ་གྱི་ཆ་ནས་དང་། དམིགས་བསལ་དགེ་བའི་བཤེས་གཉེན་དང་འབྲེལ་བའི་ཆ་ནས་ཧ་ཅང་རྣམ་དཔྱོད་དང་ལྡན་པ་ཞིག་རེད་བསམ་གྱི་འདུག །༧གོང་ས་ལྔ་པ་ཆེན་པོའི་དགོངས་དོན་ལྟར་བྱས་ན། ཁྱེད་རང་ཉམས་ལེན་གྱི་ནང་དངོས་སུ་དོ་གལ་ཆེན་པོའི་སྒོ་ནས་མ་ཞུགས་གོང་ཆོས་དེ་དག་ལ་འབད་བརྩོན་བྱས་ཟིན་པའི་ཀུན་སློང་ཡང་དག་པ་ཞིག་དགོས་རྒྱུ་དེ་རེད། དེ་མིན་ཁྱེད་ཀྱི་ཀུན་སློང་གང་རེད་དམ། དེ་ནི་གང་འཚམས་ཀྱི་འཇིག་རྟེན་པའི་ཀུན་སློང་ཆགས་སྲིད། ༼གལ་ཏེ་ང་ཚོས་ཚིག་དེ་བེད་སྤྱོད་བྱེད་ཆོག་ན་༽ འོན་ཀྱང་མི་འགའ་ཞིག་ལ་དགེ་བའི་བཤེས་གཉེན་གྱི་མིག་དཔེ་བཟང་པོ་ལས་བྱུང་བའི་ཧ་ལས་པའི་སེམས་སྐུལ་ཙམ་དེས་འཐུས་པ་ཡིན། དེ་ལྟ་བུའི་སེམས་སྐུལ་ནི་སྔོན་འགྲོའི་རིམ་པ་དེ་དག་ཚང་མ་འགོ་འཛུགས་བྱེད་པར་འདང་ངེས་བཞིན་པ་ཡིན། འོན་ཀྱང་དེའི་ནང་གི་ཉེན་ཚབས་ནི། སེམས་སྐུལ་དེ་དོན་ངོ་མར་དགེ་བའི་བཤེས་གཉེན་གྱི་ཁྱད་ཆོས་དངོས་དང་འབྲེལ་བ་ལས་འབྱུང་གི་མེད་པའི་རྟོག་པའི་འཆར་སྣང་དེ་ཡིན་པ་ཤོད་མི་དགོས། ཡིན་ནའང་སློབ་ཕྲུག་ངོས་ནས་རྟོག་འཆར་དེ་འདྲ་ཞིག་ཡོད།

ཉམས་ལེན་མ་བྱས་གོང་སེམས་ཞི་དུལ་འཇམ་བཟོ་བ།

མི་མང་པོ་ཞིག་གིས། “ང་རང་ནང་པའི་ཉམས་ལེན་འགའ་ཞིག་བྱེད་འདོད་འདུག །ངས་ཐོག་མར་གང་བྱེད་དགོས་སམ།” ཞེས་སྐད་ཆ་འདྲི་གི་ཡོད། དེ་ལ་མི་མང་པོས། “ཁུ་སིམ་ངང་བསྡད་ནས་རང་གི་དབུགས་ལ་དམིགས་པ་གཏད་དགོས་ཤིང་། རང་གི་རྣམ་རྟོག་དང་སེམས་ཚོར་སྣ་ཚོགས་པར་དོ་སྣང་བྱེད་དགོས།” ཞེས་གདམས་ཀྱི་ཡོད། དེའི་རྒྱུ་མཚན་ནི་ཁྱེད་ཀྱིས་སེམས་ཞི་འཇམ་ངང་ནས་དབུགས་ཀྱི་སྟེང་རྩེ་གཅིག་ཏུ་དམིགས་པ་གཏད་ཐུབ་ཀྱི་མ་རེད། ༼ངས་དེ་ལྟར་བརྗོད་པའི་དོན་ནི། ང་ཚོས་སུ་ལ་ཀྱལ་ཀ་བྱེད་ཀྱིན་ཡོད་དམ།༽ དེའི་དོན་ལ་རང་གིས་རང་ངོ་ཤེས་པར་བྱེད་དགོས།

དེང་སང་མི་མང་ཆེ་བ་གང་དུ་ཕྱིན་ནའང་། ནམ་རྒྱུན་རང་གི་རྣ་བར་གཞས་དང་རོལ་དབྱངས་ཉན་བྱེད་ཀྱི་ཡོ་ཆས་བླུགས་ནས་འགྲོ་གི་ཡོད། ཁོང་ཚོས་རང་གཅིག་པུར་གནས་ཏེ་རང་གི་བསམ་བློ་ལ་དཔྱད་པ་བྱ་རྒྱུའི་དུས་ཚོད་ནམ་ཡང་ཟུར་འདོན་བྱེད་ཀྱི་མེད། ཁོང་ཚོ་ནི་དུས་རྟག་ཏུ་གཞན་ཞིག་གིས་རྣམ་པར་གཡེང་དགོས་པའམ། ཡང་ན་ཁོང་ཚོ་སོ་སོའི་ནང་ལ་ཡོད་སྐབས། རླུང་འཕྲིན་ནམ་དེ་མིན་གྱི་རོལ་དབྱངས་ཤིག་བཏང་ནས་སྡོད་དགོས་ཀྱི་ཡོད། ཡང་མིན་ན་སྐབས་འགའ་རེར་གཟུགས་མཐོང་བརྙན་འཕྲིན་སྤར་ནས་འཇོག་དགོས་ཀྱི་ཡོད། ཁོང་ཚོ་ཡར་ལངས་པའི་དུས་སྐབས་དེ་ནས་བཟུང་སྟེ་མཐར་མ་ཉལ་བར་དུ་དེ་དག་སྤར་ནས་འཇོག་གི་ཡོད། ང་རང་ལ་ཨ་ནེ་ཞིག་ཡོད། ཁོང་གིས་ཉིན་གང་པོར་ཆུ་ཚོད་ཉེར་བཞིའི་རིང་གཟུགས་མཐོང་བརྙན་འཕྲིན་སྤར་ནས་འཇོག་གི་རེད། ཁོང་རང་གཉིད་ཁུག་ཐབས་སུ་དེ་ལྟར་འཇོག་དགོས་ཀྱི་ཡོད། གལ་ཏེ་ཁོང་མཚན་དཀྱིལ་ལ་ཏོག་ཙམ་གཉིད་སད་པ་ཡིན་ན། བརྙན་འཕྲིན་དེ་སྤར་ནས་བཞག་པ་དེས་ཁོ་མོར་བདེ་ཚོར་ཞིག་སྤྲོད་ཀྱི་ཡོད། གལ་ཏེ་ཁྱེད་ཀྱིས་དེའི་ཐད་བསམ་བློ་བཏང་ན། དེ་ནི་དངོས་གནས་ཧང་སངས་དགོས་པ་ཞིག་རེད། བྱས་ཙང་། རོལ་དབྱངས་གླུ་གཞས་སོགས་གང་ཡང་མེད་པར་རང་གི་སེམས་ཞི་འཇམ་བཟོས་ཏེ་དབུགས་ལ་དམིགས་པ་གཏད་པའི་ཐོག་རང་གི་བསམ་བློའི་ནང་གང་ཡོད་མེད་དང་། རང་གི་ཚོར་བ་གང་ཡིན་པ་སོགས་ལ་བལྟ་དགོས། རང་གི་བསམ་བློ་དང་ཚོར་བ་རྣམས་རོལ་དབྱངས་ཀྱིས་བཀའ་བཀོད་གནོན་ཤུགས་འོག་ཏུ་མེད་པར་བྱ་རྒྱུ་དེ་མི་མང་པོ་ཞིག་ལ་གང་འཚམས་ཀྱི་བློ་མུན་སངས་པ་དང་མིག་དཔེ་འོས་པ་ཞིག་ཡིན།

བྱས་ཙང་། འགྲིག་གི་རེད། དེ་ནི་མི་མང་པོ་ཞིག་ལ་ཐོག་མར་འགོ་འཛུགས་བྱེད་དགོས་པའི་བསླབ་བྱ་རྒྱག་སྟངས་ཤིག་རེད། དངོས་གནས་བྱས་ན། དུས་ཚོད་མུ་མཐུད་འགྲོ་བཞིན་པའི་སྒང་ལ་འདི་ཉམས་ལེན་བྱེད་དགོས་པ་ནི་གལ་ཆེ་རུ་ཆེ་རུ་འགྲོ་གི་ཡོད། གང་ཡིན་ཞེ་ན། མི་རྣམས་ཀྱིས་དུས་རྟག་ཏུ་ཉན་བཞིན་པ་ནི་རོལ་དབྱངས་ཁོ་ན་མིན་ཞིང་། གཞོན་སྐྱེས་ཚོ་ཁོ་ན་ཙམ་མིན་པར་ལོ་ན་ཚད་ཅི་རིགས་པས་ཉན་བཞིན་བཞིན་ཡོད། དེ་བཞིན་ལག་ཐོགས་ཁ་པར་བརྒྱུད་འཕྲིན་ཡིག་གཏོང་རེས་བྱེད་པ་དང་། རང་གི་ལག་ཐོགས་ཁ་པར་ལ་ཡང་ནས་ཡང་དུ་བལྟ་ཞིབ་བྱེད་པ། རང་གི་ངོ་དེབ་དང་འཕྲུལ་སྒྲའམ་ཊུཝཱི་ཊར་གྱི་བརྡ་ལན་ལ་བལྟ་བ། དེ་ག་ནང་བཞིན་གནས་ཚུལ་གཞན་དག་ཚང་མའང་དུས་མཉམ་དུ་འབྱུང་བཞིན་ཡོད། དེ་ལྟའི་གནས་སྐབས་སུ་དེ་དག་སྔོག་བཤེར་དང་བརྡ་ལན་སྤྲོད་རྒྱུ་ལྷག་ལུས་འགྲོ་ཡོང་བསམ་པའི་གཞི་རྩའི་ཞེད་སྣང་ལ་བརྟེན་ནས་རང་སོ་སོའི་གྲོགས་པོ་རྣམས་ཀྱིས་ཞོགས་ཟས་གང་བཟས་ཡོད་མེད་ཤེས་དགོས་རྒྱུ་དེ་ཧ་ཅང་གལ་ཆེན་པོ་ཆགས་ཀྱི་ཡོད།

ངའི་གྲོགས་པོ་ཞིག་ཉེ་ཆར་ང་རང་ཐུག་འཕྲད་དུ་སླེབས་སོང་། ཁོང་ཨ་རིའི་ནིའུ་ཡོརྐ་ལ་སློབ་ཆེན་ཞིག་གི་དགེ་རྒན་ཆེན་མོ་རེད། ཁོང་གིས་སློབ་གཉེར་འདུ་ཚོགས་ཤིག་ལ་སློབ་འཁྲིད་བྱེད་ཀྱི་ཡོད་པ་དང་། དེ་ཡང་ཆུ་ཚོད་གསུམ་འགོར་གྱི་ཡོད། དེའི་སྐབས་ཁོང་གིས་སློབ་གཉེར་བ་ཚོ་ལ་སོ་སོའི་ལག་ཐོགས་ཁ་པར་དེ་སྒོའི་འགྲམ་གྱི་ཅོག་ཙེའི་སྒང་ལ་འཇོག་རོགས་ཞེས་ནན་སྐུལ་བྱེད་ཀྱི་ཡོད། དེ་མིན་ཨ་རིའི་སློབ་ཆེན་ཁག་གི་ནང་ག་རེ་ཡོང་གི་ཡོད་ཅེ་ན། སློབ་འཁྲིད་དང་གཏམ་བཤད་ཚང་མར་ཁོང་ཚོས་འཕྲིན་ཡིག་བཏང་ནས་བསྡད་ཀྱི་ཡོད། ཁོང་ཚོར་ “ངས་འཕྲིན་ཡིག་མ་བཏང་བར་དུ་ཅི་གང་ཉམས་སུ་མྱོང་ཐུབ་ཀྱི་མི་འདུག །ངས་ཚོར་བ་ལ་སོགས་པ་གང་ཡང་མྱོང་ཐུབ་ཀྱི་མི་འདུག” །ཅེས་པའི་བློའི་ཁྱེར་སོ་ཞིག་ཡོད་པ་རེད། ཁོ་མོས་གསུངས་པ་ལྟར་ན། འཛིན་ཁང་ནང་ཧ་ཅང་དངངས་འཚབ་ཆེན་པོ་འདུག །གང་ཡིན་ཟེར་ན། ཁོང་ཚོའི་ལག་ཏུ་སྤྱོད་བདེའི་ཁ་པར་མེད་པས། ཆུ་ཚོད་རེ་རེའི་མཚམས་སུ་ཁོ་མོས་འཛིན་ཁང་ནང་གི་སློབ་གཉེར་བ་རྣམས་ལ་སྐར་མ་ལྔའི་རིང་འཕྲིན་ཡིག་གཏོང་རྒྱུ་ཆེད་བར་སེང་སྤྲོད་ཀྱི་ཡོད་ཅེས་ཟེར། བྱས་ཙང་། དེ་ནི་ཐ་མག་འཐེན་རྒྱུ་དང་། གསང་སྤྱོད་འགྲོ་རྒྱུའི་ཆེད་དུ་བར་སེང་ཞིག་མིན་པར། དེ་ནི་ལག་ཐོགས་ཁ་པར་བརྒྱུད་འཕྲིན་ཡིག་གཏོང་རྒྱུའི་བར་སེང་ཡིན་པ་རེད། འཕྲིན་ཡིག་གཏོང་རེས་བྱ་རྒྱུ་དེ་དེང་སང་ཐ་མག་འཐེན་རྒྱུ་དང་གསང་སྤྱོད་ལ་འགྲོ་རྒྱུ་ལས་ཀྱང་གལ་ཆེ་བ་ཆགས་ཀྱི་ཡོད། དེ་ནི་དངོས་གནས་སེམས་སྐྱོ་དགོས་པ་ཞིག་ཡིན་པ་དང་། འདི་ནི་ནང་པའི་ཉམས་ལེན་དང་སྦྱོང་བརྡར་ལ་གདོང་ལེན་ཆེན་པོ་ཆགས་ཀྱི་ཡོད། དེ་ཡང་མི་རྣམས་ཞེན་ཆགས་སྐྱེ་བ་དང་ངན་པ་ལང་ཤོར་བྱུང་བའི་རྒྱུན་ཆད་མེད་པའི་གནས་ཚུལ་ཆ་འཕྲིན་དང་རྣམ་གཡེང་གི་རྒྱུན་དེ་ལས་ཐར་ཐབས་སུ་རོགས་བྱ་རྒྱུ་དེ་ཡིན།

བྱས་ཙང་། ལས་དང་པོ་བའམ་ཐོག་མའི་ཉམས་ལེན་ཞིག་ཡིན་པའི་ཆ་ནས་རང་གི་སེམས་ཞི་འཇམ་བཟོ་བ་དང་། དབུགས་ལ་དམིགས་པ་གཏད་པ། དེ་བཞིན་རང་གི་སེམས་ནང་གང་བྱུང་བ་ཐམས་ཅད་ལ་བདེ་པོ་ཞིག་ཚོར་དགོས། དེ་ཡང་རང་གིས་རང་ངོ་ཤེས་པར་བྱེད་དགོས། ༼དེ་ནི་ཧ་ཅང་གཉིས་སྣང་གི་སྒོ་ནས་ཤོད་འགྲོས་བྱེད་སྟངས་ཤིག་ཡིན་ནའང་༽ ད་དུང་ཕན་ཐོགས་ཡོད། གལ་ཏེ་ང་ཚོས་སྔོན་འགྲོའི་ཉམས་ལེན་གྱི་སྐོར་བཤད་ན། དབུགས་ལ་དམིགས་པ་གཏད་རྒྱུ་དེ་ཁྱེད་ཀྱིས་མི་ཞིག་ལ་ཕྱག་འབུམ་འཚལ་དགོས་ཞེས་བསླབ་བྱ་མ་རྒྱག་གོང་ནས་ཡོང་གི་དགོས་ཀྱི་ཡོད། གལ་ཏེ་ཁོང་ཚོས་ཕྱག་འབུམ་འཚལ་དགོས་ན། སྨྱོན་པ་ལྟ་བུ་ཆགས་ངེས་རེད་ལ། ཁོང་ཚོ་སའི་སྒང་ལ་མར་འགྲོ་དུས་རང་གི་ལག་ཐོགས་ཁ་པར་དེར་ཡོད་པ་དང་ལམ་སེང་འཕྲིན་ཡིག་སོགས་བརྡ་ལན་འབྱོར་ཡོད་མེད་སྔོག་བཤེར་བྱེད་ཀྱི་རེད། དེ་ནི་གླེན་རྟགས་འདྲ་པོ་ཡོད་ཀྱང་། གལ་ཏེ་ང་ཚོས་དེང་སང་འཛམ་གླིང་ནང་བློའི་ཁྱེར་སོ་དར་བཞིན་པ་ལ་བསམས་ན། དེ་ནི་དངོས་གནས་ཛ་དྲག་གི་དཀའ་ངལ་ཞིག་ཆགས་ཀྱི་ཡོད། གལ་ཏེ་ཁྱེད་རང་བཟོད་མ་ཐུབ་པ་དང་རང་གི་ལག་ཐོགས་ཁ་པར་ལག་ཏུ་མེད་པ་དང་། གནས་ཚུལ་གང་ཡོང་གི་ཡོད་པ་དང་། དེ་ལ་ “ཨོ། ང་ད་ལྟ་ཕྱག་འཚལ་སྐབས་མར་གུག་དུས་ངའི་པུས་མོ་ན་གི་འདུག །ངས་དེ་མི་ཞིག་ལ་འཕྲིན་ཡིག་གཏོང་དགོས་ཀྱི་འདུག །འཕྲུལ་སྒྲའི་ནང་བཀོད་ན་འཛམ་གླིང་ནང་གི་མི་ཚང་མས་ཤེས་ཀྱི་རེད།” ཅེས་འགྲེལ་བརྗོད་བྱ་རྒྱུ་སོགས་ཡང་ནས་ཡང་དུ་སྔོག་བཤེར་བྱེད་མ་ཐུབ་པ་ཡིན་ན། ཁྱེད་ཀྱིས་དུས་ཡུན་རིང་པོ་ཞིག་གི་ནང་དོ་གལ་ཧ་ཅང་ཆེན་པོའི་ཉམས་ལེན་ཚད་ལྡན་ཞིག་ཇི་ལྟར་བྱེད་ཐུབ་པ་ཡོང་སྲིད་དམ།

ལོ་རྒྱུས་ཀྱི་དུས་ཡུན་ཧྲིལ་པོའི་རིང་ནང་ཆོས་ནི་སྤྱི་ཚོགས་སྣ་ཚོགས་པས་མི་རྣམས་ཀྱི་དགོས་མཁོ་དང་བློའི་ཆུ་ཚད་དང་འཚམས་པའི་སྒོ་ནས་དང་ལེན་བྱས་ཡོད། ངའི་བསམ་པར། མ་འོངས་པ་དང་འབྱུང་ལ་ཉེ་བའི་མ་འོངས་པའི་ནང་དངོས་གནས་ནང་ཆོས་དང་། དམིགས་བསལ་ང་ཚོས་སྔོན་འགྲོའི་ཉམས་ལེན་དེ་དག་གི་སྐོར་ཤོད་ཀྱིན་ཡོད། དེ་དག་གང་ལྟར་ཡང་དཀའ་ངལ་དེ་དག་ལ་རན་ཞིང་འཚམས་པ་ཞིག་ཆགས་དགོས་ཀྱི་ཡོད། གང་ཡིན་ཞེ་ན། སྔོན་འགྲོའི་ཉམས་ལེན་དེ་དག་གི་དགོས་དོན་གང་རེད་དམ། དེ་ནི་བར་ཆད་རྣམས་སེལ་རྒྱུ་དང་དེ་དག་ལས་ཐར་རྒྱུ་དེ་རེད། བྱས་ཙང་། ལག་ཐོགས་ཁ་པར་བརྒྱུད་ནས་འཕྲིན་ཡིག་གཏོང་རེས་དང་སྤྱི་ཚོགས་བརྒྱུད་ལམ། དེ་བཞིན་རྒྱུན་ཆད་མེད་པའི་རོལ་དབྱངས་དང་གཞས་སོགས་ཉན་བྱེད་ཀྱི་འཕྲུལ་ཆས་ཨཡི་པོཌ་ iPod ཡར་རྒྱས་འགྲོ་བ་དང་བསྟུན་བར་ཆད་ཆེན་པོ་ཞིག་ཡོད་པ་རེད།

ང་ཚོས་ཆོས་རབ་ཏུ་རྣམ་པར་འབྱེད་པའི་ཤེས་རབ་ཀྱི་སྐོར་ཤོད་སྐབས། དེ་ལ་ནམ་རྒྱུན་ wisdom ཅེས་བསྒྱུར་ཡོད། དེ་ནི་ཆོས་རབ་ཏུ་རྣམ་པར་འབྱེད་པའི་ཤེས་རབ་ལ་ཚིག་གསལ་ཁ་དེ་ཙམ་མེད་པ་ཞིག་རེད། ཕན་ཐོགས་ཅན་གང་ཡིན་པ་དང་གནོད་གཞི་ཅན་གང་ཡིན་པའི་ཐོག་ལ་རྣམ་པར་འབྱེད་པ་ལ། མི་རྣམས་ཀྱིས་སོ་སོར་ལག་ཐོགས་ཁ་པར་སྤར་ནས་ཡོད་པ་དང་བསད་ནས་ཡོད་པའི་དབར་དང་། དེ་ཕན་ཐོགས་ཅན་ཡིན་པའི་སྐབས་ ༼གང་ཡིན་ཟེར་ན། སྤྱི་ཚོགས་བརྒྱུད་ལམ་དང་འཕྲིན་ཡིག་གཏོང་རེས་བྱ་རྒྱུ་དེ་ཕན་ཐོགས་ཅན་ཞིག་ཡིན་སྲིད་པ་ལ་ང་ཚོས་ཁས་མི་ལེན་པ་བྱེད་མི་ཐུབ།༽ དང་དེ་གནོད་གཞི་ཅན་ཞིག་ཡིན་པའི་སྐབས་རྣམ་པར་འབྱེད་ཐུབ་པ་དགོས་ཀྱི་ཡོད། དེ་ལྟ་བུའི་ཆོས་རབ་ཏུ་རྣམ་འབྱེད་ཀྱི་ཤེས་རབ་བསྐྱེད་མ་ཐུབ་ན། དེ་ནས་དཀའ་ལས་ཁག་པོ་ཞེ་དྲགས་རེད། ཁྱེད་ཀྱིས་ཆོས་རྣམ་འབྱེད་ཀྱི་ཤེས་རབ་དེ་ཇི་ལྟར་སྐྱེད་པར་བྱེད་དམ། ཆོས་ཀྱི་ནང་དེ་ཧ་ཅང་གསལ་པོ་རེད། དེ་ཡང་ཁྱེད་རང་ལ་རྩེ་གཅིག་པའི་ཏིང་ངེ་འཛིན་དགོས་པ་དང་། དེ་ལ་ཚུལ་ཁྲིམས་དགོས། བྱས་ཙང་། བསླབ་པ་གསུམ་མམ་ལྷག་པའི་བསླབ་པ་གསུམ་རེད། དེ་དག་ཁྱེད་ཀྱིས་ཇི་ལྟར་སྐྱེད་དགོས་པའི་ཐད་ལ་ཡང་དག་པ་དང་ཁ་གསལ་པོ་གསུངས་ཡོད།

སྦྱོར་བའི་ཆོས་དེ་དག་ནི་ཚུལ་ཁྲིམས་སྐྱེད་པར་ཧ་ཅང་ཕན་ཐོགས་ཆེ་བ་ཞིག་ཡིན། འོན་ཀྱང་ངའི་བསམ་པར། སྤྱི་ཚོགས་བརྒྱུད་ལམ་ཁག་ལ་ཧ་ཅང་གོམས་པ་ཆེ་ཞིང་ལང་ཤོར་ཕྱིན་པའི་མི་རྣམས་ལ་ནི་དེ་དག་ཐོག་མ་ཉིད་ནས་འགོ་འཛུགས་བྱེད་ཐུབ་དཀའ་མོ་རེད། ཁོང་ཚོས་དེ་ལག་བསྟར་ཐུབ་ཀྱི་མ་རེད། བྱས་ཙང་། དེའི་སྔོན་ལ་ཆེས་ཐོག་མ་ནས་ཐབས་ལམ་ཞིག་ཡོད་དགོས། དེ་ནི་དབུགས་ལ་དམིགས་པ་གཏད་པ་དང་སོ་སོའི་རྣམ་རྟོག་ངོས་འཛིན་དང་བསམ་བློ་དང་མཉམ་དུ་སྐྱོད་ཐབས་བྱེད་དགོས་པ་ནི་འགོ་བཙུག་ས་དེ་རེད། ཡིན་ནའང་ཁྱེད་རང་དེ་དག་ལ་སྨྱོན་པ་ལྟར་མིན་པའི་སྒོ་ནས་གདོང་ལེན་བྱེད་ཐུབ་ན། དེ་ནས་སྦྱོར་ཆོས་ཀྱི་ཉམས་ལེན་འདི་དག་གི་སྒྲོམ་གཞི་དེ་ཧ་ཅང་ཕན་རླབས་ཆེ་བ་ཞིག་ཡིན།

ལས་དང་པོ་བ་ཡིན་པའི་ཆ་ནས་སྦྱོར་བའི་ཆོས་དྲུག་ལ་འཇུག་པ།

དེ་ནས་ང་ཚོས་༧གོང་ས་ལྔ་པ་ཆེན་པོའི་དགག་པ་མཛད་པ་དེ་གང་འདྲ་རེད་དམ། གལ་ཏེ་ཁྱེད་ཀྱིས་སྔོན་ཚུད་ནས་དེའི་ཐོག་འབད་བརྩོན་བྱས་མེད་ན། སྦྱོར་ཆོས་དྲུག་པོའི་ནང་ནས་གཅིག་སྐྱབས་འགྲོ་དང་བྱང་ཆུབ་ཀྱི་སེམས་སླར་ཡང་ངེས་བརྟན་བཟོ་རྒྱུ་ཡིན་པ་དེ་དག་ཁྱེད་ཀྱིས་ཇི་ལྟར་ཉམས་ལེན་བྱེད་ཐུབ་བམ། བྱས་ཙང་། དེ་ནི་གནད་དོན་སྒོར་སྒོར་ཅན་ཞིག་རེད། མ་རེད་དམ། སྐྱབས་འགྲོ་དང་བྱང་ཆུབ་ཀྱི་སེམས་སྒོམ་པར་ཁྱེད་ལ་སྦྱོར་ཆོས་དེ་དག་དགོས་ནའང་། དེ་ལྟར་ཉམས་སུ་ལེན་ཐུབ་པར་ཁྱེད་ལ་སྐྱབས་འགྲོ་དང་བྱང་ཆུབ་ཀྱི་སེམས་དགོས་ཀྱི་ཡོད། གལ་ཏེ་སྐྱབས་འགྲོ་དང་བྱང་ཆུབ་ཀྱི་སེམས་རང་རྒྱུད་ལ་བསྐྱེད་མེད་ན། ཁྱེད་ཀྱིས་སྐྱབས་འགྲོ་དང་སེམས་བསྐྱེད་ཀྱི་སྨོན་ལམ་འབུམ་གསོག་པའི་སྔོན་འགྲོའི་ཉམས་ལེན་ཇི་ལྟར་བྱེད་ཐུབ་བམ། དེ་ལྟར་ཡིན་ན། ཁྱེད་ཀྱིས་ཚིག་ཙམ་བསྐྱར་ཟློས་བྱེད་ཀྱི་ཡོད། གལ་ཏེ་ཁྱེད་ལ་སངས་རྒྱས་དང་། ཆོས། དགེ་འདུན་བཅས་དཀོན་མཆོག་གསུམ་གྱི་སྐོར་གང་ཡང་མི་ཤེས་ན། ཁྱེད་ཀྱིས་ཕྱག་སུ་ལ་འཚལ་བཞིན་ཡོད་དམ། རྩིག་ངོས་དང་། ལྡེབས་རིས། སྐུ་འདྲ་སོགས་གང་ལ་ཕྱག་འཚལ་གྱིན་ཡོད་དམ། དེར་བརྟེན་ང་ཚོས་སྐྱབས་འགྲོ་དང་སེམས་བསྐྱེད་རང་རྒྱུད་ལ་མ་བསྐྱེད་གོང་ནས་སྦྱོར་ཆོས་དེ་དག་ལ་ཇི་ལྟར་འཇུག་པའི་ཐོག་ཏོག་ཙམ་གཏིང་ཟབ་པོའི་སྒོ་ནས་བསམ་བློ་གཏོང་དགོས། ལས་དང་པོ་བ་རྣམས་དངོས་གནས་རན་ཞིང་འཚམས་པའི་ཐོག་ནས་གདོང་ལེན་བྱེད་ཐབས་ཤིག་ཡོད་དམ།

ངས་ཆོས་ཡངས་པ་དང་ཆོས་ངོ་མ་ཞེས་དབྱེ་བ་ཕྱེ་གི་ཡོད། དེ་ཡང་།

ཐོག་མའི་ཆོས་ཡངས་པ་ཞེས་པ་དེ་ཧ་ཅང་ཕན་ཐོགས་ཆེན་པོ་ཡོད། གང་ཡིན་ཟེར་ན། མི་མང་ཆེ་བ་དེའི་ཐོག་ནས་ཆོས་ལ་འཇུག་གི་ཡོད། དེ་ནི་ཚེ་འདིའི་ནང་གི་གནས་བབས་ཡར་རྒྱས་གཏོང་རྒྱུའི་འདུན་པ་ཙམ་དེ་རེད། དཔེ་ཡག་པོ་རེད། དེ་ནི་དགོས་གལ་ཞིག་རེད།

ཆོས་ངོ་མ་ཞེས་པ་ནི་ལམ་རིམ་ལ་གོ་དགོས། དེ་ཡང་ཁྱེད་ཀྱིས་དངོས་སུ་ཚེ་ཕྱི་མའི་དོན་དུ་འབད་བརྩོན་བྱེད་ཀྱིན་ཡོད། ༼ཕྱི་མ་ངན་སོང་དུ་མི་སྐྱེ་བའི་ཆེད།༽ ང་ཚོ་འཁོར་བའི་ནང་ཡང་ནས་ཡང་དུ་སྐྱེ་བ་ལས་ཐར་བ་དང་ཐམས་ཅད་མཁྱེན་པའི་གོ་འཕང་ ༼སེམས་ཅན་ཐམས་ཅད་འཁོར་བར་ཡང་ནས་ཡང་དུ་སྐྱེ་བ་ལས་ཐར་བར་བྱེད་ཐུབ་༽ འཐོབ་རྒྱུ་དེ་རེད། དེ་ནི་ཆོས་ངོ་མའི་ཉམས་ལེན་རེད། ཚེ་འདི་ཙམ་གྱི་དོན་དུ་མ་རེད།

དེ་ག་ནང་བཞིན་ཆོས་ཡངས་པ་དང་ཆོས་ངོ་མའི་སྐྱབས་འགྲོ་དང་སེམས་བསྐྱེད་ཀྱང་ཡོད་པ་གསལ་པོ་རེད། བྱས་ཙང་། ཆོས་ཡངས་པའི་སྒོ་ནས་མི་རྣམས་ཀྱིས་དེ་ཇི་ལྟར་དང་ལེན་བྱེད་ཐུབ་པའི་སྐོར་ལ་བརྟག་དཔྱད་དང་བསམ་བློ་གཏོང་དགོས། གང་ཡིན་ཞེ་ན། རྣམ་པར་དག་པའི་སྒོ་ནས་ང་ཚོས་ “མི་ཚང་མ་ཧ་ཅང་ཚད་མཐོ་པོ་དང་། ཚང་མས་ཉམས་ལེན་གྱི་ནང་ལྷག་བསམ་རྣམ་དག་གིས་འཇུག་གི་ཡོད།” ཅེས་བསམ་བློ་གཏོང་བ་སོགས་ནི་དངོས་ཡོད་དང་མཐུན་པ་ཞིག་མ་རེད། དེ་ནི་རང་གིས་རང་མགོ་བསྐོར་བ་ཞིག་རེད་བསམ་གྱི་འདུག །ཐོག་མ་མེད་པའི་སེམས་ ༼སྐྱེ་བ་སྔ་མ་དང་ཕྱི་མར་གོ་དགོས་༽ ལ་ཡིད་ཆེས་ཡང་དག་པ་ཞིག་རྙེད་པ་དང་། སེམས་ཀྱི་རང་བཞིན་ཐོག་མ་མེད་པ་ལ་གོ་བ་གཏིང་ཟབ་ལ་འདང་ངེས་ཤིག་གི་ཐོག་ནས་ཐར་པ་དང་ཐམས་ཅད་མཁྱེན་པའི་གོ་འཕང་འཐོབ་ཐུབ་པར། འབད་བརྩོན་དང་དཔྱད་ཞིབ་ཧ་ཅང་ཆེན་པོ་དགོས་ཀྱི་ཡོད། གལ་ཏེ་ཐར་པ་དང་ཐམས་ཅད་མཁྱེན་པའི་གོ་འཕང་དེ་ཐོབ་རུང་ཡིན་པར་ཡིད་ཆེས་རྙེད་པ་ཞིག་བྱུང་མེད་ན། ཁྱེད་ཀྱིས་དེ་ལ་ཇི་ལྟར་དམིགས་ཐུབ་བམ། བྱས་ཙང་། ཁྱེད་ཀྱིས་དེའི་ཐད་ག་རེ་བྱེད་དགོས་སམ། དེ་ལ་སྔོན་འགྲོའི་ཉམས་ལེན་དང་གྲ་སྒྲིག་དགོས། གང་ལྟར་ཡང་། དེ་དང་འབྲེལ་བའི་སེམས་ནང་གི་འགོག་རྐྱེན་དཔེར་ན། “དེ་དག་སུ་ལ་དགོས་སམ། ད་ང་ཚོས་ཚེ་འདི་ཡར་རྒྱས་གཏོང་ཐབས་བྱེད་དགོས།” ཞེས་གཏིང་རིང་པོར་བསམས་ན། དེ་དག་ནི་སེམས་ཀྱི་འགོག་རྐྱེན་ཆེན་པོ་ཆགས་ཀྱི་ཡོད། མ་རེད་དམ། བྱས་ཙང་། ང་ཚོས་གུ་ཡངས་ཐོག་ནས་གནད་དོན་དེའི་ཐོག་གཏིང་ཟབ་པོར་བསམ་བློ་བཏང་ནས་དགེ་བའི་ནུས་པའམ་བསོད་ནམས་གསོག་དགོས། དེ་ལ་བརྟེན་ནས་ང་ཚོ་ཁ་ཕྱོགས་མ་ནོར་བར་འགྲོ་ཐུབ།

འདིར་ཚོད་དཔག་གང་ཡོད་ཅེ་ན། སྔོན་འགྲོའི་ཉམས་ལེན་དེ་དག་ཕན་ཐོགས་ཅན་ཡིན། ངས་ཆོས་ཀྱི་ནང་རྟག་ཏུ་བེད་སྤྱོད་བྱས་པའི་ཚིག་བེད་སྤྱོད་བྱེད་ཀྱི་ཡིན། དེ་ནི་ཐོག་མ་དང་། བར་མ། མཐའ་མ་སྟེ། ནམ་རྒྱུན་ཐོག་མཐའ་བར་གསུམ་ཟེར་བ་དེ་རེད། འགྲིག་གི་འདུག་གམ། སྦྱོར་ཆོས་དྲུག་ཙམ་མིན་པར་སྔོན་འགྲོའི་རིམ་རྣམས་ཀྱང་ཐོག་མཐའ་བར་གསུམ་ལ་ཕན་ཐོགས་ཅན་ཡིན། དེར་བརྟེན་ཉམས་ལེན་དྲུག་པོ་ལ་དཔྱད་ཞིབ་དང་བསམ་བློ་གཏོང་ཐབས་བྱས་ཏེ། དེ་དག་དེང་སང་ཆོས་ལ་དོ་དབྱིངས་ཡོད་པའི་མི་རྣམས་ལ་གཞིགས་ནས་ཁ་ཡོད་ལག་ཡོད་ཀྱིས་དངོས་ཡོད་དང་མཐུན་པའི་སྒོ་ནས་ཇི་ལྟར་སྤྱོད་དགོས་པའི་ཐད་ལ་བསམ་བློ་གཏོང་དགོས།།

Top