ཆོས་བཞི་རིན་པོ་ཆེའི་ཕྲེང་བ།

སྐད་ཡིག་གཞན།

༄༅། །རྒྱ་གར་སྐད་དུ། དྷ་རྨཱ་ཙ་ཏུར་རཏྣ་མཱ་ལ་ནཱ་མ། བོད་སྐད་དུ། ཆོས་བཞི་རིན་པོ་ཆེའི་ཕྲེང་བ་ཞེས་བྱ་བ།

སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །

༡༽གང་གི་རང་བཞིན་ཆོས་སྐུའི་མཁའ་དབྱིངས་ལ། །ངེས་ལ་ལྔ་ལྡན་གཟུགས་སྐུའི་དཀྱིལ་འཁོར་རྒྱས། །མཛད་པའི་ཟེར་གྱིས་གདུལ་བྱའི་པདྨོ་འཛུམ། །བདེ་གཤེགས་ཉི་མ་དད་བརྒྱའི་གཙུག་གིས་མཆོད། །

༢༽རྒྱལ་བའི་ཆོས་ཚུལ་རིན་ཆེན་དཔག་བསམ་ཤིང་། །མ་ལུས་སྲིད་ཞིའི་གདུང་སྐྱོབ་བསིལ་གྲིབ་དེར། །དད་ལྡན་སྐྱེ་རྒུ་རིམ་གྱིས་འཇུག་པའི་ཚུལ། །རྣམ་བཞིའི་ཡོོན་ཏན་ལྗོན་ཚོགས་བཤད་ཀྱིས་ཉོན། །

༼༡༽བློ་ཆོས་སུ་འགྲོ་བ།

དལ་འབྱོར་རྙེད་དཀའ་བ།

༣༽གང་ཞིག་མཐའ་མེད་འཁོར་བའི་རྒྱ་མཚོ་ལས། །བརྒལ་འདོད་རྣམས་ཀྱིས་ཐོག་མར་བསམ་བྱ་བ། །ཐར་པའི་ཆོས་དེ་ཞི་བདེ་བསྒྲུབ་པའི་ཕྱིར། །ད་རེས་ཚེ་འདིར་ཡོངས་སུ་འབད་པར་བྱ། །

༤༽རྙེད་པར་དཀའ་ཞིང་འཇིག་པར་སླ་བའི་ལུས། །དལ་འབྱོར་གྲུ་པོ་ཐོབ་དུས་མ་འབད་ན། ། སྲིད་པའི་མཚོ་ལས་ནམ་ཡང་མི་ཐར་ཞིང་། །སྣ་ཚོགས་སྡུག་བསྡལ་མང་ལྡན་རྒྱུན་མི་འཆད། །

༥༽སྐྱེ་ཤིའི་ཆུ་བོ་ཕ་མཐའ་མི་མངོན་ཞིང་། །ན་རྒའི་ལྦུ་ཕྲེང་ཀུན་ནས་འཁྲིགས་པའི་གནས། །ཉོན་མོངས་དུས་རླབས་སྲིད་རྩེའི་མཐའ་ཁྱབ་པའི། །མཚོན་ཆེན་མི་བཟད་འཇིགས་སུ་རྣམ་པར་རྩེན། །

༦༽གང་ཞིག་ཐོས་ནས་སྐྱེ་ཤི་རྒྱུན་ཆད་དེ། །བདེ་ཆེན་མཆོག་དང་ནམ་ཡང་མི་འབྲལ་བ། །ཞི་བའི་ཆོས་མཆོག་རིན་ཆེན་གྲུ་བཟང་གིས། །སྲིད་གསུམ་ཉོན་མོངས་ཆུ་གཏེར་བརྒལ་ཕྱིར་འབད། །

༧༽ད་རེས་ཐར་ལམ་བྱང་ཆུབ་མ་བསྒྲུབས་ན། །ཕྱི་ནས་བདེ་འགྲོའི་མིང་ཡང་མི་གྲགས་ཤིང་། །ངན་སོང་མཐའ་མེད་གཅིག་ནས་གཅིག་བརྒྱུད་དེ། །གཏན་དུ་འཁོར་བའི་གནས་ལས་ཐར་ཐབས་མེད། །

༨༽དེ་བས་བློ་དང་ལྡན་པའི་སྐྱེ་བོ་རྣམས། །དལ་དང་འབྱོར་བའི་མི་ལུས་ཐོབ་དུས་འདིར། །སྙིང་ནས་བརྩོན་པས་ཕན་བདེ་བསྒྲུབ་པར་བྱ། །དེས་ནི་རང་གཞན་དོན་གཉིས་འགྲུབ་པར་འགྲུར། །

འཆི་བ་དང་མི་རྟག་པ།

༩༽དལ་འབྱོར་ཐོབ་ཀྱང་ཡིད་བརྟན་འགའ་མེད་དེ། །ཐམས་ཅད་མི་བརྟན་འགྱུར་ཞིང་སྙིང་པོ་མེད། །སྐད་ཅིག་མི་རྟག་འཇིག་པའི་ཆོས་ཅན་ཏེ། །མྱུར་དུ་འཆི་ཞེས་སྙིང་ནས་བསམ་པར་བྱ། །

༡༠༽འདི་ལྟར་སྣོད་ཀྱི་འཇིག་རྟེན་ཐམས་ཅད་ཀྱང་། །མེ་བདུན་ཆུ་གཅིག་རླུང་གིས་འཐོར་བའི་ཚེ། །སྐྲ་རྩེའི་ལྷག་མ་ཙམ་ཡང་ཡོང་མེད་པར། །ཐམས་ཅད་སྟོང་སྟེ་ནམ་མཁའ་གཅིག་ཏུ་འགྱུར། །

༡༡༽བཅུད་རྣམས་མི་རྟག་འགྲོ་བ་གཡོ་བ་སྟེ། །ལྷ་དང་ལྷ་མིན་མི་དང་དུད་འགྲོ་དང་། །ཡི་དྭགས་དམྱལ་བའི་སེམས་ཅན་ཇི་སྙེད་ཀྱང་། །དུས་མཐར་འཆི་འཕོ་སྐྱེ་བའི་ཆུ་བོར་བྱིང་། །

༡༢༽ལོ་དང་ཟླ་བ་ཞག་དང་དུས་ཚིགས་དང་། །སྐད་ཅིག་མི་རྟག་འཇིག་ཅིང་གཡོ་བ་སྟེ། །དུས་བཞི་འགྱུར་བས་རྣམ་པར་སྐྱོ་བ་ཅན། །རང་གི་ཚེ་ཡང་མི་རྟག་འགྱུར་བ་སོམས། །

༡༣༽ཡིད་བརྟན་མེད་དོ་ལུས་སྲོག་འབྲལ་དུ་ཉེ། །སང་དང་བདག་གི་ཚེ་ཟད་དུས་འདི་གཉིས། །སྔོན་ལ་གང་འབྱུང་ངེས་པ་མེད་དོ་ཞེས། །དེ་རིང་ཉིད་ནས་ངེས་པར་བསམ་པར་བྱ། །

འཁོར་བའི་ཉེས་དམིགས།

༡༤༽འཆི་བ་བས་ཀྱང་སྐྱེ་བའི་སྡུག་བསྡལ་འཇིགས། །གང་དུ་སྐྱེས་སྐྱང་བདེ་བ་འགའ་མེད་དེ། །འཁོར་བའི་རང་བཞིན་མེ་ཡི་འོབས་ལྟ་བུ། །འདི་ལས་ད་རེས་ཐར་ཐབས་བཙལ་བར་བྱ། །

༡༥༽དམྱལ་བ་ཚ་གྲང་ཡི་དྭགས་བཀྲེས་དང་སྐོམ། །དུད་འགྲོ་གཅིག་ཟ་གླེན་རྨོངས་སྡུག་བསྡལ་ཏེ། །མི་རྣམས་ཉེས་གསུམ་བརྒྱད་ཀྱིས་ཡོངས་སུ་གདུང་། །ལྷ་མིན་འཐབ་རྩོད་ལྷ་རྣམས་འཆི་འཕོ་ལྟུང་། །

༡༦༽བདེ་སྡུག་འགྱུར་ཞིང་འདུ་བྱེད་སྡུག་བསྔལ་མང་། །ལྷ་ཡུལ་འབྱོར་བདེ་དག་ལས་ཚེ་འཕོས་ནས། །སླར་ཡང་དམྱལ་བའི་མེ་ནང་འཇུག་འཚལ་བས། །འདི་འདྲ་བསམས་ནས་སྲིད་ལས་འདའ་བར་མཛོད། །

༡༧༽ཚེ་འདིའི་སྣང་བ་རྨི་ལམ་སད་ཀ་འདྲ། །འགྱུར་ཞིང་མི་རྟག་དོར་ནས་འགྲོ་དགོས་པས། །འཁོར་དང་ལོངས་སྤྱོད་ལ་སོགས་ཅི་ཞིག་བྱ། །ད་ལྟ་ཉིད་དུ་ཆོས་ལ་འབད་པར་བགྱི། །

ཞི་གནས་སྦྱོང་བ།

༡༨༽འདོད་པ་དུག་དང་མཚོན་དང་མེ་འདྲ་ཞིང་། །ཡོངས་སུ་གདུངས་བས་བདེ་བའི་གོ་སྐབས་མེད། །བསགས་དང་བསྲུང་དང་སྤེལ་བས་སྡུག་བསྔལ་ཞིང་། །ཁེངས་དང་འཇུངས་དང་སེར་སྣས་རྟག་ཏུ་འཆིང་། །ཀུན་དང་རྩོད་བཅས་ཉོན་མོངས་ཟག་པ་འཕེལ། །འདུ་འཛིས་གཡེང་ཞིང་ལུས་དང་སྲོག་ལ་རྒོལ། །

༡༩༽དོན་དང་བྱ་བ་མང་ཞིང་ཆོས་དང་འགལ། །འཕགས་པ་རྣམས་ཀྱིས་རྟག་ཏུ་སྨད་པ་ཡིན། །འདོད་པ་ཆུང་རྣམས་ངང་གིས་དགེ་བ་འཕེལ། །དེས་ན་ཞི་བའི་ཐར་ལམ་ཞུགས་རྣམས་ཀྱིས། །འདོད་པ་ཆུང་ཞིང་ཆོག་ཤེས་ལྡན་པར་མཛོད། །

༢༠༽འདོད་པ་ཟད་ན་འཕགས་པ་དངོས་ཡིན་ལ། །འདོད་པ་ཆུང་ན་འཕགས་པའི་རིགས་ཞེས་བྱ། །འདོད་ལྡན་སྡུག་བསྡལ་ཉོན་མོངས་འཕེལ་བ་ལྟར། །འདོད་པ་ཆུང་རྣམས་ངང་གིས་དགེ་བ་འཕེལ། །དེ་བས་སྔོན་གྱི་དམ་པའི་རྗེས་འགྲོ་བས། །རྟག་ཏུ་ཆོག་ཤེས་ཡོ་བྱད་བསྙུང་བར་བྱ། །

༢༡༽མི་དང་འགྲོགས་པའི་ཉེས་པའང་ཚད་མེད་དེ། །དོན་མེད་རྣམ་པར་གཡེངས་ཤིང་བྱ་བའང་མང་། །ཁྲོ་དང་འཐབ་རྩོད་འཕེལ་ཞིང་ཆགས་སྡང་སྐྱེ། །རྟག་ཏུ་སྔུག་བསྔལ་འགོ་ཞིང་སྙིང་པོ་མེད། །

༢༢༽ཇི་ལྟར་བྱས་ཀྱང་མགུ་བའི་དུས་མེད་ལ། །གང་ལྟར་བསྟན་ཀྱང་ཕན་པའི་གོ་སྐབས་དཀའ། །དེ་ལྟར་མཉན་ཡང་ལེགས་པའི་ཆོས་མེད་ལ། །བཤེས་ལྟར་མཐུན་ཡང་ཐ་མ་འབྲལ་བར་འགྱུར། །

༢༣༽དེ་བས་འཁོར་དང་མཛའ་བཤེས་གཉེན་འདུན་ལ། །ཉེ་བར་བརྟེན་པའི་འབྲེལ་འདྲིས་ཀུན་སྤངས་ཏེ། །གཅིག་པུར་དབེན་པར་དམ་ཆོས་སྒྲུབ་པའི་ཕྱིར། །དེ་རིང་ཉིད་ནས་ངེས་པར་འབད་པར་བྱ། །

༢༤༽སྔོན་གྱི་སྐྱེ་བོ་དམ་པ་མཆོག་རྣམས་ཀྱང་། །དབེན་པར་གནས་ལས་བདུད་རྩི་བརྙེས་ཞེས་གསུངས། །དེ་ཕྱིར་བདག་ཀྱང་ཞི་བ་སྒྲུབ་པའི་ཕྱིར། །ནགས་ནང་དབེན་པ་གཅིག་པུར་གནས་པར་བྱ། །

༢༥༽དབེན་པའི་གནས་ནི་རྒྱལ་བ་རྣམས་ཀྱིས་བསྔགས། །མི་སྲུན་མི་མེད་ཟབ་མོའི་ཏིང་འཛིན་འཕེལ། །ངང་གིས་ཆོས་འགྲུབ་མི་རྟག་སྐྱོ་ཤས་སྐྱེ། །ཡོ་བྱད་སྐྱུངས་ཤིང་འདུ་འཛི་རྣམས་གཡེང་མེད། །

༢༦༽དད་དང་ངེས་འབྱུང་ཡོན་ཏན་ཚོགས་མང་ཞིང་། །འབྲེལ་འདྲིས་མེད་པས་ངང་གིས་བྱ་བ་ཉུང་། །གཞན་གྱི་སེམས་འཛིན་ངོ་སྲུང་བརྒྱད་མེད་། །རང་དབང་འབྱོར་བདེ་ཉིན་མཚན་ཆོས་ཀྱིས་འདའ། །

༢༧༽དལ་འབྱོར་དོན་ཡོད་སྒྲུབ་པ་སྙིང་པོར་བྱེད། །དེ་སོགས་ཡོན་ཏན་བརྗོད་ཀྱིས་མི་ལང་བས། །གཅིག་པུར་རབ་ཏུ་དབེན་པའི་ནགས་ཁྲོད་དུ། །ཚེ་གང་ཟབ་མོའི་ཏིང་འཛིན་བསྒྲུབ་པར་བྱ། །

༢༨༽དེ་ལྟར་ལེགས་གསུང་ཆོས་ཀྱི་ཆར་བསིལ་བས། །ཉོན་མོངས་གདུང་བའི་རྟོག་པ་རབ་ཞི་ནས། །ཏིང་འཛིན་དགེ་ཚོགས་པད་མཚོར་རབ་གང་སྟེ། །ཞི་བའི་གནས་ན་འབྱོར་བ་རབ་རྒྱས་ཤོག །

ཆོས་བཞི་རིན་པོ་ཆེའི་ཕྲེང་བ་ལས། བློ་ཆོས་སུ་འགྲོ་བའི་རབས་ཏེ་དང་པོའི། །  ། །

༼༢༽ཆོས་ལམ་དུ་འགྲོ་བ།

ཆོས་ལམ་དུ་འགྲོ་བའི་དགོས་པ།

༢༩༽དེ་ལྟར་རབ་དཀར་དམ་པའི་ཆོས་མཆོག་ལ། །དད་པས་རབ་ཞུགས་ཐར་ལམ་འདོད་རྣམས་ཀྱིས། །རང་གི་སེམསཉིད་རབ་ཏུ་གདུལ་བྱའི་ཕྱིར། །ཆོས་དེ་ལམ་དུ་འགྲོ་བ་རབ་ཏུ་གཅེས། །

༣༠༽འདི་ལྟར་རྒྱལ་བའི་བསྟན་ལ་རབ་ཞུགས་ནས། །ཐོས་བསམ་སྒོམ་པར་ཆས་པ་དེ་དག་ཀྱང་། །ཁ་ཅིག་མ་ཞི་རང་རྒྱུད་ངན་པ་དང་། །ལ་ལ་ལམ་ལོག་དམན་དང་ལམ་གོལ་ཞུགས། །

༣༡༽འདོད་སྲེད་ཆེ་དང་ཚེ་འདིར་གཡེངས་ལ་སོགས། །ཆོས་དང་འགལ་བའི་ཉེས་པ་དེ་དག་ཀུན། །ཆོས་དེ་ལམ་དུ་མ་སོང་དག་ལས་བྱུང་། །དེ་ལས་འདི་ཕྱིའི་ཉེས་པ་ཚད་མེད་དེ། །

༣༢༽འཁྲུལ་པས་བསླུས་གང་འཆི་ཁར་འགྱོད་པ་ཉིད། །བར་དོར་འཇིགས་དངངས་ཕྱི་མ་ངན་སོང་འགྲོ། །གཏན་དུ་སྲིད་ལས་ཐར་པའི་སྐབས་མེད་དོ། །དེ་བས་ཆོས་དེ་ལམ་དུ་འགྲོ་བར་བྱ། །

༣༣༽ཇི་ལྟར་ནད་ཀྱི་གཉེན་པོར་མི་དག་གིས། །བཀྲུ་སྨན་སྦྱར་ཡང་དེ་ཉིད་མ་དག་ན། །ཡོངས་སུ་གདུང་བས་སླར་ལ་གདུངས་པ་བཞིན། །གཉེན་པོར་མ་སོང་ཆོས་ལ་དགོས་པ་ཅི། །འདི་ན་དེ་འདྲའི་ཉེས་པ་ཚད་མེད་པས། །དད་ལྡན་སྐྱེ་བོས་ལེགས་པར་ཤེས་པར་བྱ། །

དགེ་བའི་བཤེས་གཉེན་བསྟེན་པ།

༣༤༽དེ་ལ་ཆོས་དེ་ལམ་དུ་འགྲོ་བ་ནི། །ཐོག་མར་དགེ་བའི་བཤེས་ལ་རག་ལས་པས། །མཚན་ལྡན་བླ་མ་དམ་པར་བསྟེན་པ་གཅེས། །དེ་ལས་ལེགས་རྒུའི་ཡོན་ཏན་དུ་མ་འབྱུང་། །

༣༥༽དེ་ཡང་ཐབས་མཁས་ཐུགས་རྗེའི་བདག་ཉིད་ཅན། །ཞི་ཞིང་དུལ་བ་བཟོད་དང་ལྡན་པ་སྟེ། །སྡོམ་དང་དམ་ཚིག་སྤྱོད་ཚུལ་ཕུན་སུམ་ཚོགས། །མང་དུ་ཐོས་ཤིང་ལེགས་པར་སྦྱངས་པ་ཆེ། །

༣༦༽བྱིན་རླབས་ཚད་མེད་གཞན་སྣང་ངང་གིས་འགྱུར། །ཚེ་འདི་མ་འདྲེས་ཆོས་བརྒྱད་མཁའ་ལྟར་དག །འབྲེལ་ཚད་དོན་ལྡན་ཐར་ལམ་འགོད་པ་འདི། །སྙིགས་མའི་དུས་སུ་རྒྱལ་བའི་རྣམ་འཕྲུལ་ཏེ། །རབ་དང་གུས་པ་ཆེན་པོས་བསྟེན་པར་བྱ། །

༣༧༽དེ་ལས་ཕན་ཡོན་ཚད་མེད་ཟད་མེད་དེ། །སྲིད་ལ་སྐྱོ་ཞིང་ངེས་འབྱུང་བློ་སྣ་ཐུང་། །ཚེ་འདི་བློས་ཐོངས་འཁྲུལ་སྣང་བདག་འཛིན་འཇིག །

༣༨༽ངང་གིས་དུལ་ཞིང་ཐོས་བསམ་སྒོམ་པ་ལྡན། །དད་སོགས་རྒྱ་ཆེ་སྦྱངས་པའི་ཡོན་ཏན་ལྡན། །ཚེ་འདི་དོན་ཡོད་ཕྱི་མ་འབྲས་དང་བཅས། །དེ་ཕྱིར་དམ་པ་རྣམས་ལ་བསྟེན་པར་བྱ། །

༣༩༽དེ་ཡང་རང་གི་སྒོ་གསུམ་ཟོལ་མེད་པས། །ནད་པས་སྨན་པ་ཚོང་པས་དེད་དཔོན་དང་། །གྲུབ་པས་མཉེན་པ་མགྲོན་པོས་སྐྱེལ་མ་ལྟར། །གུས་པའི་སྲི་ཞུས་རྟག་ཏུ་མཉེས་པར་བྱ། །

༤༠༽མ་དད་ལོག་པར་ལྟ་བའི་སེམས་སྐྱེས་ན། །སྐད་ཅིག་གྲངས་བཞིན་ངན་འགྲོར་འཇུག་པར་གསུངས།  །དེ་བས་བཤགས་སྡོམ་འགྱོད་ཚངས་ཆེན་པོ་ཡིས། །དམ་ཚིག་རྣམ་དག་མིག་བཞིན་བསྲུང་ལ་འབད། །

ངེས་འབྱུང་སྦྱོང་བ།

༤༡༽དེ་ལྟར་བཤེས་གཉེན་དམ་པར་རབ་བསྟེན་ནས། །ཐོས་བསམ་སྒོམ་པས་རང་རྒྱུད་སྦྱངས་བྱས་ནས། །ཐར་པ་ཁོ་ན་འདོད་པའི་བསམ་པ་ཡིས། །གང་བྱེད་དགེ་བ་འདུན་པས་བསྒྱུར་བ་ནི། །ཆོས་དེ་ལམ་དུ་འགྲོ་བའི་མན་ངག་ཡིན། །

༤༢༽ཉན་དང་སེམས་དང་ཁ་ཏོན་བྱེད་ནའང་། །རང་རྒྱུད་ཐར་པའི་དོན་དུ་དེ་བརྩམ་ཞིང་། །འབྲི་དང་ཀློག་དང་འཛིན་དང་འཆད་པ་ནའང་། །ཐར་པ་ཁོ་ན་འདོད་པས་བརྩམ་པར་བྱ། །

༤༣༽སྒོམ་དང་ལྟ་དང་སྤྱད་པར་བྱེད་པ་ནའང་། །ཐར་པ་ཁོ་ནའི་སེམས་དང་མ་བྲལ་བས། །ངེས་འབྱུང་སྐྱོ་ཤས་དྲག་པོས་འབད་པར་བྱ།  །སྙིང་པོའི་མན་ངག་འདི་ལས་གོང་ནས་མེད། །

༤༤༽ཟ་ཉལ་འགྲོ་འདུག་སྨྲ་བརྗོད་བསམ་ལ་སོགས། །མདོར་ན་བྱ་བ་གང་དང་གང་བྱེད་ཀྱང་། །ཐར་པ་འདོད་པའི་བློ་དང་མ་བྲལ་བས། །སྐྱོ་ཤས་བསྐྱེད་དེ་སེམས་རྒྱུད་གདུལ་བར་བྱ། །འདི་ནི་དམ་ཆོས་ལམ་དུ་འགྲོ་བའི་གནད། །

བྱང་ཆུབ་སེམས་ཀྱི་དམིགས་པ་སྦྱོང་བ།

༤༥༽ཁྱད་པར་ཐེག་ཆེན་ལམ་དུ་འགྲོ་བྱེད་པ། །དགེ་བ་གང་བྱེད་གཞན་དོན་དམིགས་པ་སྟེ། །སྙིང་རྗེ་སེམས་བསྐྱེད་མོས་བསྔོ་ཡི་རང་ཞིང་། །སེམས་ཅན་དོན་ཕྱིར་ཡོངས་སུ་བསྒྲུབ་པའོ། །

༤༦༽འདི་ལྟར་འགྲོ་ཀུན་བདག་གི་ཕ་དང་མ། །གཉེན་དང་རྩ་ལག་ཕན་གདགས་ཞིང་ཡིན་ལ། །བདག་ཀྱང་གཞན་དོན་བྱང་ཆུབ་སེམས་བསྐྱེད་པས། །འགྲོ་བའི་དོན་དུ་དགེ་བ་བསྒྲུབ་པར་བྱ། །

༤༧༽བདག་གི་དགེ་བས་འགྲོ་བ་བདེ་བར་འགྱུར། །དེ་ཀུན་སྡུག་བསྔལ་བདག་ལ་སྨིན་པ་དང་། །བདག་གི་དགེ་བ་འགྲོ་ལ་སྨིན་གྱུར་ཏེ། །ལུས་ཅན་ཐམས་ཅད་སངས་རྒྱས་ཐོབ་པར་ཤོག །སྙམ་དུ་ཚད་མེད་སྙིང་རྗེའི་སེམས་བསྐྱེད་སྦྱངས། །

༤༨༽དགེ་བ་གང་རྣམས་སྦྱོར་བ་སེམས་བསྐྱེད་དང་། །དངོས་གཞི་མི་དམིགས་རྗེས་ལ་བསྔོ་བ་བྱ། །དེ་ཡང་འཁོར་གསུམ་ཡོངས་སུ་དག་པ་ནི། །སྦྱང་བྱ་སྦྱོང་བྱེད་ཡོངས་སུ་སྦྱང་བ་པོ། །སྒྱུ་འདྲ་མེད་ལ་སྣང་ཙམ་སྤྲུལ་པ་བཞིན། །རང་བཞིན་དག་པས་གཞན་གྱི་དོན་ཕྱིར་བསྡོ། །

༤༩༽མོས་པ་རྒྱལ་དང་རྒྱལ་བའི་ཆོས་རྣམས་དང་། །རྒྱལ་སྲས་དམ་པ་རྣམས་དང་བསོད་ནམས་ཞིང་། །མ་ལུས་ཀུན་ལ་རབ་ཏུ་དད་པ་སྟེ། །རང་དོན་གཉིས་དོན་གཞན་དོན་མོས་པ་ལས། །བསྟོད་དང་བཀུར་དང་བསྔགས་པ་དཔེ་མེད་ཐོབ། །

༥༠༽ཡི་རང་རྒྱལ་དང་དེ་སྲས་འགྲོ་ཀུན་དང་། །དགེ་བ་ཀུན་ལ་དགའ་བ་སྒོམ་པ་སྟེ། །འདི་ནི་བསོད་ནམས་ཕུང་པོ་དཔག་ཏུ་མེད། །ཚད་མེད་ཆེན་པོར་བསྒྱུར་བའི་ཐབས་མཆོག་ཡིན། །

༥༡༽སྨོན་ལམ་རྣམ་དག་འགྲོ་བའི་དོན་ཕྱིར་གདབ། །སྤྱོད་ཡུལ་དག་པའི་མན་ངག་བསྒོམ་པར་བྱ། །

༥༢༽ཐ་མལ་ཕྱོགས་སུ་སྐད་ཅིག་མ་ཡེངས་པར། །སྒོ་གསུམ་དགེ་བ་གཞན་དོན་སྙིང་པོར་བྱ། །རང་རྒྱུད་བཏུལ་ནས་ལྷག་པའི་སེམས་བསྐྱེད་ལྡན། །ཆོ་གང་ལམ་དུ་འགྲོ་ཞེས་བྱ་བ་ལགས། །

༥༣༽དེ་ལྟར་དོན་ཟབ་དོ་མཚར་རྔ་སྒྲའི་དབྱངས། །ཟབ་ཅིང་རྒྱ་ཆེའི་ང་རོ་སྙན་གྲགས་པ། །མ་རིག་གཉིད་མྱོས་འགྲོ་ཀུན་རབ་སད་དེ། །ཞི་བའི་དགའ་སྟོན་རྒྱ་ཆེར་མཐོང་བར་ཤོག །

ཆོས་བཞི་རིན་པོ་ཆེའི་ཕྲེང་བ་ལས། ཆོས་ལམ་དུ་འགྲོ་བའི་རབས་ཏེ་གཉིས་པའོ། ། ། །

༼༣༽ལམ་གྱི་འཁྲུལ་པ་སེལ་བ།

ཐེག་ཆེན་ཐུན་མོང་གི་ལམ།

༥༤༽དེ་ནས་ལམ་གྱི་འཁྲུལ་བ་སེལ་བ་ཡང་། །ཐུན་མོང་ཁྱད་པར་བླ་ན་མེད་པ་ལས། །དང་པོ་ཐུན་མོང་ཐེག་པའི་ལམ་ཆེན་གང་། །ཚད་མེད་སེམས་བསྐྱེད་སྨོན་ལམ་སྙིང་རྗེའི་བདག །རླབས་ཆེན་སྤྱོད་པས་འཁྲུལ་པ་སེལ་བ་སྟེ། །

༥༥༽སྟོང་ཉིད་སྙིང་རྗེའི་སྙིང་པོ་དང་ལྡན་ཞིང་། །རང་གཞན་དོན་གཉིས་ཀུན་ཏུ་སྒྲུབ་པ་ན། །ཆོས་ཁམས་དགེ་བ་འདུས་མ་བྱས་པ་ཡི། །གླུ་བུར་དྲི་མ་རབ་ཏུ་སྦྱངས་པའི་ཕྱིར། །ཚོགས་དང་སྦྱོར་མཐོང་སྒོམ་པའི་ལམ་བཞི་རུ། །བྱང་ཆུབ་ཕྱོགས་ཆོས་སུམ་ཅུ་བདུན་སྒོམ་ཞིང་། །དག་པའི་ལྟ་བ་སྟོང་ཉིད་བཅུ་དྲུག་དང་། །སྐྱོན་མེད་སྤྱོད་པ་ཕ་རོལ་ཕྱིན་དྲུག་རྫོགས། །

༥༦༽གང་ཟག་ཆོས་བདག་གཉིས་པོ་མེད་རྟོགས་ནས། །ཉོན་མོངས་གཉེན་པོའི་ཐབས་ཀྱིས་སྦྱོང་བ་ནི། །བྱང་ཆུབ་སེམས་དཔའ་རྣམས་ཀྱི་ལམ་བཟང་སྟེ། །

༥༧༽སྒྱུ་མ་རྨི་ལམ་འཁྲུལ་པའི་ཚུལ་ཙམ་ལས། །སྤང་བླང་དོན་བྱས་དགེ་སྡིག་བླང་དོར་བྱེད། །འདོད་ཆགས་ཞེ་སྡང་གཏི་མུག་ཉོན་མོངས་ལ། །མི་གཙང་བྱམས་དང་རྟེན་འབྲེལ་ཆུ་བོས་སྦྱོང་། །

༥༨༽དམ་པའི་དོན་དུ་མ་སྐྱེས་རྣམ་དག་པས། །འཁོར་འདས་གཉིས་མེད་སྤྲོས་དང་བྲལ་བ་སྟེ། །བདེན་པ་གཉིས་དོན་རྟེན་ཅིང་འབྲེལ་འབྱུང་ལམ། །མཚན་ཉིད་རྒྱུ་ཡི་ཐེག་པ་ཆེན་པོ་ལགས། །

ཐེག་ཆེན་ཁྱད་པར་གྱི་ལམ་བཤད་པ།

༥༩༽ཁྱད་པར་ལམ་ཆེན་གསང་སྔགས་ཕྱི་ནང་སྟེ། །བསྐྱེད་རྫོགས་ཟུང་འཇུག་ཐབས་མཆོག་དཔག་ཏུ་མེད། །སྣ་ཚོགས་རིམ་པས་འཁྲུལ་པ་སྦྱོང་བ་སྟེ། །

༦༠༽གསང་སྔགས་ཕྱི་གསུམ་དག་པ་གཙོར་བྱེད་པ། །སྤང་བླང་རེས་འཇོག་དྲི་མ་གཉེན་པོས་སེལ། །ནང་ནི་ཟུང་འཇུག་གཉིས་མེད་ཡེ་ཤེས་ཀྱིས། །སྤང་བྱའི་དངོས་དེ་ཐབས་ཀྱིས་ལམ་དུ་བསྒྱུར། །

༦༡༽བདེ་གཤེགས་སྙིང་པོའི་གཞི་དབྱིངས་དཀྱིལ་འཁོར་ལ། །རང་སྣང་ཆོས་ཀུན་རང་སེམས་སྣང་བ་ཙམ། །འཁྲུལ་པ་དངོས་མེད་སྟོང་གཟུགས་གསལ་སྣང་ཉིད། །

༦༢༽ཕུང་པོ་ཁམས་དང་སྐྱེ་མཆེད་ལ་སོགས་པ། །རིགས་ལྔ་ལ་སོགས་དག་པར་དྲན་བྱས་ཏེ། །བསྐྱེད་པའི་རིམ་པས་སྣང་སྲིད་དཀྱིལ་འཁོར་གཅིག །ལུས་ལྷ་ངག་སྔགས་དྲན་རྟོག་འཕྲོ་འདུར་སྦྱོར། །ཐ་མར་འཁྲུལ་སྣང་སངས་རྒྱས་ཞིང་དུ་བལྟ། །

༦༣༽རྫོགས་པའི་རིམ་པས་ཐམས་ཅད་ཆོས་ཉིད་དང་། །བསམ་གྱིས་མི་ཁྱབ་འོད་གསལ་དབྱིངས་ལ་འཇུག །རྩ་དང་རླུང་དང་ཐེག་ལེའི་རྣལ་འབྱོར་གྱིས། །རླུང་སེམས་ལས་རུང་དབྱིངས་དང་ཡེ་ཤེས་སྦྱོར། །ཟུང་འཇུག་དབྱེར་མེད་ཕྱག་རྒྱ་ཆེན་པོའི་ལམ། །འབྲས་བུ་གསང་སྔགས་རྡོ་རྗེ་ཐེག་པ་ལགས། །

བླ་མེད་རྫོགས་པ་ཆེན་པོའི་ལམ།

༦༤༽བླ་མེད་ཐེག་པ་མཆོག་གསང་རྫོགས་པ་ཆེ། །ལྷུན་གྲུབ་དབྱིངས་ལ་དངོས་སུ་སྦྱོར་བ་སྟེ། །གཞི་དབྱིངས་མི་འགྱུར་ནམ་མཁའ་ལྟ་བུ་ལ། །ཡོན་ཏན་ལྷུན་གྲུབ་ཉི་ཟླ་གཟའ་སྐར་བཞིན། །བཙལ་བ་མེད་པར་ཡེ་ནས་ལྷུན་གྲུབ་པས། །འབད་ཅིང་རྩོལ་མེད་རང་བཞིན་མངོན་གསུམ་ལམ།།

༦༥༽འོད་གསལ་དབྱིངས་ཀྱི་དཀྱིལ་འཁོར་འདུས་མ་བྱས། །རང་གནས་ཆོས་སྐུ་མཉམ་པའི་དགོངས་པ་ཉིད། །རྟོགས་པར་བྱེད་པ་གནས་ལུགས་ལྟ་བའི་མཆོག །

༦༦༽དག་པའི་དབྱིངས་ལ་གླུ་བུར་སྒྲིབ་པའི་སྤྲིན། །འགྲོ་སེམས་འཁྲུལ་སྣང་མེད་བཞིན་སྣང་བ་ཡིས། །ཁམས་གསུམ་རིགས་དྲུག་བརྒྱུད་ཅིང་ཅིར་སྣང་ཡང་། །སྣང་བའི་དུས་ན་དོན་ལ་གྲུབ་པ་མེད། །མཁའ་དང་སྤྲིན་བཞིན་གླུ་བུར་རྐྱེན་སྣང་ཙམ། །འཁོར་བར་སྒྲོ་བཏགས་མཚན་ཉིད་ཆད་པ་སྟེ། །

༦༧༽མེད་བཞིན་སྣང་སྟེ་རང་གི་ངོ་བོས་སྟོང་། །སྟོང་སྣང་དངོས་མེད་རབ་རིབ་སྐྲ་བཤད་དང་། །རྨི་ལམ་སྒྱུ་མ་དུང་ལ་སེར་འཛིན་བཞིན། །ཇི་ལྟར་སྣང་དུས་ཉིད་ནས་གྲུབ་མ་མྱོང་། །གཞི་མེད་རྟེན་མེད་ཐོག་མ་དབུས་མཐའ་མེད། །རང་བཞིན་གདོད་ནས་དག་པར་ཤེས་པར་བྱ། །

༦༨༽འདི་ལྟར་སྣང་སྲིད་སྣོད་བཅུད་ཆོས་རྣམས་ལ། །གཟུང་བའི་ཡུལ་མེད་སྤྲུལ་པ་མིག་ཡོར་བཞིན། །འཛིན་པའི་སེམས་མེད་བར་སྣང་དག་པ་འདྲ། །གཟུང་འཛིན་གཉིས་མེད་འཁོར་བ་ཡོད་མ་མྱོང་། །མེད་སྣང་འཁྲུལ་པ་རང་བཞིན་ཤེས་པས་གྲོལ། །

༦༩༽སྤང་བླང་རྒྱུ་འབྲས་རྐྱེན་སྣང་རང་དག་པས། །གནས་ལུགས་དོན་ལ་རྒྱུ་འབྲས་འདས་ཤེས་བྱ། །དེ་ཡི་རྟེན་གཞི་རིག་པ་བྱང་ཆུབ་སེམས། །མྱ་ངན་འདས་དབྱིངས་ལྷུན་གྲུབ་ཆེན་པོ་ནི། །དོན་དམ་བདེན་པ་གདོད་ནས་དག་པ་སྟེ། །

༧༠༽ཐོག་མ་དང་ནི་ཐ་མ་མེད་པའི་བདག །རང་བཞིན་འོད་གསལ་ཟབ་ཞི་སྤྲོས་དང་བྲལ། །ཡེ་ནས་རང་གནས་ཆོས་སྐུ་དྲི་མ་མེད། །དུས་གསུམ་འཕོ་འགྱུར་མེད་པའི་ངོ་བོར་གནས། །

༧༡༽འདི་ནི་གཞི་དབྱིངས་རྡོ་རྗེ་སྙིང་པོ་སྟེ། །གང་གིས་དེ་རྟོགས་གནས་ལུགས་ལྟ་བ་ཉིད། །སྒྲོ་བསྐུར་ཞི་བ་དོན་གྱི་སྙིང་པོར་རྟོགས། །

སྒོམ་ཐོག་ལ་རྫོགས་ཆེན་གྱི་ལྟ་བ་དྲི་མེད་སྐྱེ་ཚུལ།

༧༢༽དྲི་མེད་སྒོམ་པ་འོད་གསལ་སྙིང་པོ་ནི། །རྟོགས་པའི་ངང་ནས་བྱིངས་རྒོད་སྤྲོས་དང་བྲལ། །ཡེངས་མེད་བློ་བྲལ་ཡངས་པ་ཆེན་པོ་སྟེ། །མཁའ་ལྟར་རྣམ་དག་རྒྱ་ཆད་ཕྱོགས་ལྷུང་མེད། །བསམ་བརྗོད་དམིགས་པ་ཀུན་ལས་འདས་པ་ལགས། །

སྤྱོད་པ་རྫོགས་ཆེན་གྱི་ལྟ་བ་བཞིན་ཡང་དག་པར་སྐྱོང་བ།

༧༣༽སྤྱོད་པ་གང་སྣང་བདེན་མེད་དག་པ་སྟེ། །ནང་གིས་འཛིན་པ་གང་ཤར་རང་གྲོལ་དང་། །ཕྱི་རོལ་གཟུང་བ་རྨི་ལམ་སྒྱུ་མའི་ཚུལ། །དོན་ལ་གཉིས་མེད་བླང་དོར་མེད་པར་སྤྱད། །

རྫོགས་པ་ཆེན་པོ་སྙིང་པོར་བསྡུས་པ།

༧༤༽གཟུང་འཛིན་ཉོན་མོངས་དགག་སྒྲུབ་ཆོས་རྣམས་ལ། །སྐྱེས་པ་རང་གྲོལ་རང་བཞིན་ཤེས་པས་གྲོལ། །གྲོལ་བ་ཡེ་རྫོགས་ཆོས་སྐུ་མཉམ་པའི་ངང་། །འཁོར་བ་སྤངས་ནས་མྱ་ངན་འདས་མི་འཚོལ། །

༧༥༽གང་སྣང་དོན་གྱི་གསལ་འདེབས་མེ་ལོང་ལ། །གང་ཤར་ཤེས་པ་རང་གྲོལ་ཆོས་སྐུའི་རྩལ། །ཆུ་དང་རླབས་བཞིན་ཆོས་སྐུར་ཕྱམ་གཅིག་གོ །འདི་ནི་མཐར་ཐུག་དོན་གྱི་དགོངས་པ་སྟེ། །ལྟ་བའི་ཡང་རྩེ་རྫོགས་པ་ཆེན་པོ་ལགས། །

མདོར་བསྡུས་པ།

༧༦༽མདོར་ན་གང་ཞིག་ཇི་ལྟར་ཉམས་ལེན་ཀྱང་། །བདག་འཛིན་རང་གྲོལ་ཉོན་མོངས་དབྱིངས་སུ་དག །ཐམས་ཅད་ཐབས་ཀྱི་སྤྱོད་ལ་མཁས་པ་ནི། །ལམ་གྱི་འཁྲུལ་པ་སེལ་ཞེས་བྱ་བར་བསྟན། །

༧༧༽དེ་ལྟར་ཆོས་ཚུལ་རིན་ཆེན་གྲུ་བོ་ཆེས། །མ་ལུས་སྐྱེ་རྒུ་སྲིད་མཚོ་རབ་བརྒལ་ནས། །ཞི་བ་རིན་ཆེན་ཐར་པའི་གླིང་མཆོག་ཏུ། །ཟག་མེད་ཞི་བདེའི་དགའ་སྟོན་མཐོང་པར་ཤོག །

ཆོས་བཞི་རིན་པོ་ཆེའི་ཕྲེང་བ་ལས། ལམ་གྱི་འཁྲུལ་པ་སེལ་པའི་རབས་ཏེ་གསུམ་པའོ། ། ། །

༼༤༽ འཁྲུལ་པ་ཡེ་ཤེས་སུ་དག་པ།

གནས་སྐབས་འཁྲུལ་པ་ཡེ་ཤེས་སུ་དག་པ།

༧༨༽དེ་ནས་འཁྲུལ་པ་ཡེས་ཤེས་དག་པ་ཡང་། །གནས་སྐབས་མཐར་ཐུག་དོན་གྱི་རིམ་པ་ལས། ། དང་པོ་གནས་སྐབས་ཉམས་ལེན་ལམ་གྱི་དུས། །ཟབ་མོའི་ཐབས་ཀྱིས་གོམས་པར་བྱས་པ་ལས། །ཉོན་མོངས་གང་སྐྱེས་དབྱིངས་སུ་རྣམ་པར་དག །རང་གསལ་ཡེས་ཤེས་མངོན་དུ་གྱུར་པ་ནི། །འཁྲུལ་རྟོག་ཡེ་ཤེས་དབྱིངས་སུ་དག་ཅེས་བྱ། །

༧༩༽དེ་ཡང་ཐུན་མོང་ཁྱད་པར་བླ་མེད་ལ། །བསྟེན་པའི་ཐབས་ཀྱིས་སོ་སོར་དབྱེ་བ་ནི། །གཉེན་པོས་སྦྱངས་དང་ཐབས་ཀྱིས་བསྒྱུར་བ་དང་། །རང་སར་རྣམ་གྲོལ་མ་སྤངས་དབྱིངས་སུ་དག །གང་དག་འདོད་ལ་ཇི་ལྟར་བསླབ་ན་ཡང་། །འགག་པ་ཉོན་མོངས་དག་པའི་དོན་དུ་གཅིག །

༨༠༽འདོད་ཆགས་ཞེ་སྡང་གཏི་མུག་ང་རྒྱལ་དང་། །ཕྲག་དོག་སྐྱེས་པའི་རང་ས་ངོས་ཟིན་དུས། །རང་བཞག་རང་གྲོལ་ཡེ་ཤེས་རྣམ་ལྔར་དག །ཀུན་རྟོག་མེ་ལོང་ཆོས་དབྱིངས་མཉམ་པ་ཉིད། །བྱ་བ་གྲུབ་པའི་ཡེ་ཤེས་ཆེན་པོ་རུ། །དུག་ལྔའི་འཁྲུལ་པ་གནས་སྐབས་དག་ཅེས་བྱ། །

མཐར་ཐུག་ཏུ་འཁྲུལ་པ་ཡེ་ཤེས་སུ་དག་པ།

༨༡༽མཐར་ཐུག་ཁམས་ཀྱི་གླུ་བུར་དྲི་བྲལ་ཏེ། །བྱང་ཆུབ་ཞི་བ་རྡུལ་བྲལ་བརྙེས་པ་ན། །དབྱིངས་ཀྱི་རང་བཞིན་ཅི་འདྲ་མངོན་དུ་འགྱུར། །སྐུ་གསུམ་ཆོས་སྐུ་རོ་གཅིག་ཡེ་ཤེས་བརྙེས། །དག་པ་གཉིས་ལྡན་དབྱིངས་ཀྱི་སྐུ་ཞེས་བྱ། །རྒྱལ་བ་ཉིད་ལས་གཞན་གྱི་ཡུལ་མིན་པ། །

༨༢༽ཆོས་དང་ལོངས་སྤྱོད་སྤྲུལ་པའི་སྐུ་གསུམ་ཉིད། །ཡེ་ཤེས་དང་བཅས་ངོ་བོ་ཉིད་སྐུས་བསྡུས། །རྟག་ཁྱབ་འདུས་མ་བྱས་ཤིང་འཕོ་འགྱུར་མེད། །

༨༣༽ཡིད་བཞིན་ནོར་བུ་ཆོས་སྐུའི་དབྱིངས་ན་བཞུགས། །དེ་ཉིད་ངང་ལས་ཡེ་ཤེས་ཕྲིན་ལས་སྐུ། །ལོངས་སྤྱོད་རྫོགས་དང་སྤྲུལ་སྐུའི་རོལ་པ་ནི། །སར་གནས་རྣམས་དང་འགྲོ་གཞན་སྣང་བ་ཡང་། །

༨༤༽རྒྱལ་བའི་བྱིན་རླབས་གདུལ་བྱའི་བསོད་ནམས་མཐུ། །ཚོགས་དོན་དག་ལས་དེ་ལྟར་སྣང་བ་ལས། །སྲིད་པ་ཇི་སྲིད་ཕྲིན་ལས་རྒྱུན་མི་འཆད། །ནོར་བུ་དཔག་བསམ་ལྗོན་ཤིང་རེ་བ་སྐོང་། །འདི་ནི་འཁྲུལ་པ་ཡེ་ཤེས་དག་ཅེས་བྱ། །

༨༥༽དེ་ལྟར་དོན་ཟབ་སྙིང་པོའི་རྟ་བདུན་གྱིས། །ཡིད་མཁའི་ལམ་ནས་གདུལ་བྱའི་འཇིག་རྟེན་དུ། །ཚིག་དོན་རྣམ་བཀྲའི་འོད་སྟོང་འཕྲོ་བ་ཡིས། །འགྲོ་ཀུན་མ་རིག་མུན་པ་སངས་བ་ཤོག །

 ཆོས་བཞི་རིན་པོ་ཆེའི་ཕྲེང་བ་ལས། འཁྲུལ་པ་ཡེ་ཤེས་སུ་དག་པའི་རབས་ཏེ་བཞི་པའོ། ། ། །

མཇུག་བྱང་།

༨༦༽ཚུལ་འདི་བློ་གྲོས་ཡངས་པའི་ཁང་བཟང་ནས། །ཐོས་བསམ་སྒོམ་པའི་འབྱོར་པས་རབ་བརྒྱན་པ། །རང་གཞན་དོན་གཉིས་དགའ་སྟོན་འགྱེད་པ་དེས། །མདོ་རྒྱུད་མན་ངག་སྙིང་པོའི་དོན་བཞིན་བཀོད། །

༨༧༽དགེ་བ་འདི་ཡིས་བདག་དང་འགྲོ་བ་ཀུན། །ཚེ་འདིར་སྲིད་པའི་རི་བོ་ཕྱིར་བསྙིལ་ནས། །བྱང་ཆུབ་ཞི་བ་རྡུལ་བྲལ་མཆོག་ཐོབ་སྟེ། །རང་གཞན་དོན་གཉིས་རྫོགས་པའི་སངས་རྒྱས་ཤོག །

༨༨༽དོན་གསལ་གངས་རི་རྒྱ་ཆེར་མཛེས་པའི་གནས། །རབ་དཀར་ཡོན་ཏན་ཕྱོགས་ཀྱི་ཐ་གྲུར་ཁྱབ། །གསུང་རབ་རིན་ཆེན་སྙིང་པོའི་གནས་འཚེར་བས། ། དང་ལྡན་སྐྱེ་བོའི་ཚོགས་རྣམས་དགའ་བར་མཛོད། །

ཆོས་བཞི་རིན་པོ་ཆེའི་ཕྲེང་བ་ཞེས་བྱ་བ།

ཐེག་པ་མཆོག་གི་རྣལ་འབྱོར་པ་ཀུན་མཁྱེན་ངག་གི་དབང་པོས་གངས་རི་ཐོད་དཀར་གྱི་མགུལ། མེ་ཏོག་སྤྲིན་གྱི་སྐྱེད་མོས་ཚལ་གྱི་ནང་། ཀུན་ཏུ་བཟང་པོའི་ཁང་བཟང་ཟླ་བ་ཆུ་ཤེལ་གྱིས་འཚེར་བར་སྦྱར་བ་སྟེ་རེ་ཞིག་རྫོགས་སོ། །ཕྱོགས་དུས་ཀུན་ཏུ་བདེ་ཆེན་གྱི་ཆར་བསྐལ་པ་རྫོགས་ལྡན་གྱི་དུས་བཞིན་འབབ་པས་བསམ་རྒུའི་རེ་བ་ཐམས་ཅད་འགྲུབ་པར་གྱུར་ཅིག། ། །

Top